ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠮᠠᠭᠲᠠᠭᠠᠯ Монгол бөхийн магтаал
399ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠮᠠᠭᠲᠠᠭᠠᠯ
ᠥᠨᠢᠷ ᠣᠯᠠᠨ ᠮᠣᠩᠭᠣᠯ ᠳᠤ
ᠥᠨᠢ ᠤᠲᠠᠭᠠᠨ ᠳᠡᠯᠭᠡᠷᠡᠭᠰᠡᠨ᠂
ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠨᠠᠭᠠᠲᠤᠮ ᠦ᠋ᠨ
ᠡᠩ ᠲᠡᠷᠢᠭᠦᠨ ᠳ᠋ᠤᠨᠢ ᠣᠷᠣᠭᠰᠠᠨ ᠂
ᠮᠣᠩᠭᠣᠯ ᠪᠥᠬᠡ ᠶ᠋ᠢᠨ ᠲᠤᠬᠠᠢ ᠬᠣᠯᠪᠣᠭᠰᠠᠨ
ᠮᠤᠩ ᠦᠭᠡᠢ ᠣᠯᠠᠨ ᠮᠠᠭᠲᠠᠭᠠᠯ ᠲᠠᠢ ᠂
ᠮᠣᠩᠭᠣᠯ ᠪᠥᠬᠡ ᠪᠡᠨ ᠮᠠᠭᠲᠠᠶᠠ ᠭᠡᠵᠦ
ᠮᠠᠨ ᠪ ᠦᠨᠲᠦᠰᠦᠲᠡᠨ ᠭᠦᠰᠡᠭᠰᠡᠭᠡᠷ ᠃
ᠾᠦᠩᠨᠦ ᠱᠦᠩᠨᠥ ᠶ᠋ᠢᠨ ᠦᠶᠡ ᠡᠴᠡ
ᠬᠦᠴᠦᠲᠦ ᠪᠥᠬᠡ ᠶ᠋ᠢᠨ ᠠᠯᠲᠠᠷ ᠲᠠᠢ ᠂
ᠬᠥᠬᠡ ᠮᠣᠩᠭᠣᠯ ᠦ᠋ᠨ ᠦᠶᠡ ᠡᠴᠡ
ᠬᠦᠲᠡᠷ ᠪᠠᠷᠰ ᠦ᠋ᠨ ᠴᠣᠯᠠ ᠲᠠᠢ ᠂
ᠤᠯᠤᠰ ᠦ᠋ᠨ ᠨᠠᠶ᠋ᠢᠷ ᠦ᠋ᠨ ᠪᠥᠬᠡ ᠪᠡᠨ
ᠣᠶᠤᠨ ᠪᠢᠯᠢᠭ ᠶ᠋ᠢᠡᠨ ᠰᠢᠪᠬᠠᠵᠤ ᠂
ᠤᠶᠠᠩᠭᠠᠯᠠᠨ ᠳᠠᠭᠤᠯᠠᠵᠤ ᠦᠵᠡᠶᠡ ᠭᠡᠵᠦ
ᠤᠤᠯ ᠠ᠋ᠴᠠ ᠪᠢ ᠬᠦᠰᠡᠭᠰᠡᠨ ᠶᠤᠮ ᠃
ᠴᠡᠯᠮᠡᠭ᠋ ᠠᠭᠠᠷ ᠲᠤᠨᠤᠯᠵᠠᠭᠰᠠᠨ
ᠴᠡᠴᠡᠭᠲᠦ ᠲᠠᠯᠠ ᠶ᠋ᠢᠨ ᠥᠷᠥᠴᠡᠨ ᠳᠤ
ᠴᠢᠭᠢᠭ ᠦ᠋ᠨ ᠦᠨᠦᠷ ᠬᠠᠩᠬᠤᠯᠤᠭᠰᠠᠨ
ᠬᠥᠬᠡᠪᠤᠯᠠᠭ ᠦ᠋ᠨ ᠵᠦᠯᠭᠡᠨ ᠳᠡᠭᠡᠷᠡ ᠂
ᠨᠠᠶ᠋ᠢᠷ ᠦ᠋ᠨ ᠲᠠᠭᠲᠤ ᠴᠣᠭᠴᠠᠯᠠᠵᠤ
ᠨᠠᠭᠠᠲᠤᠮ ᠦ᠋ᠨ ᠬᠤᠷᠠᠯ ᠡᠬᠢᠯᠡᠯᠡ ᠂
ᠨᠠᠢ᠍ᠮᠠᠨ ᠵᠣᠪᠬᠢᠰ ᠮᠠᠯᠴᠢᠳ
ᠨᠢᠰᠬᠦ ᠮᠡᠲᠦ ᠪᠡᠷ ᠴᠤᠭᠯᠠᠷᠠᠯᠠ ᠃
ᠬᠥᠷ ᠨᠠᠭᠠᠲᠤᠮ ᠭᠡᠳᠡᠭ ᠴᠢᠨᠢ
ᠬᠥᠲᠡᠭᠡ ᠨᠤᠲᠤᠭ ᠦ᠋ᠨ ᠴᠢᠮᠡᠭ ᠮᠥᠨ ᠂
ᠬᠥᠲᠡᠯᠮᠦᠷᠢᠴᠢ ᠣᠯᠠᠨ ᠮᠠᠯᠴᠢᠳ ᠦ᠋ᠨ
ᠬᠦᠰᠡᠵᠦ ᠢᠷᠡᠭᠰᠡᠨ ᠮᠥᠷᠥᠭᠡᠲᠦᠯ ᠮᠥᠨ ᠃
ᠪᠥᠬᠡ ᠬᠡᠲᠦᠢ ᠳᠤ ᠲᠠᠯᠪᠢᠬᠤ ᠪᠤᠢ ? ᠭᠡᠵᠦ
ᠪᠦᠭᠦᠲᠡᠭᠡᠷ ᠰᠤᠷᠠᠭ ᠲᠠᠯᠪᠢᠯᠠ ᠂
ᠪᠦᠲᠦᠭᠦᠨ ᠲᠠᠷᠭᠤᠨ ᠵᠠᠯᠠᠭᠤᠴᠤᠳ
ᠪᠥᠬᠡ ᠳᠤ ᠣᠷᠣᠬᠤ ᠪᠠᠷ ᠪᠡᠯᠡᠤᠠᠬᠡᠨᠡ ᠃
ᠲᠠᠯᠠ ᠨᠤᠲᠤᠭ ᠦ᠋ᠨ ᠵᠠᠯᠠᠭᠤᠴᠤᠳ
ᠲᠠᠪᠠ ᠪᠠᠷ ᠶ᠋ᠢᠠᠨ ᠥᠰᠦᠭᠰᠡᠨ ᠤᠯᠤᠰ ᠡ ᠂
ᠲᠠᠷᠠᠭ ᠰᠦ᠋ ᠪᠡᠨ ᠤᠤᠭᠤᠭᠠᠳ
ᠲᠠᠮᠢᠷᠵᠢᠭᠠᠳ ᠪᠣᠶ᠋ᠢᠵᠢᠬᠰᠠᠨ ᠡᠷᠡᠰ ᠡ ᠃
ᠲᠠᠯᠠ ᠶ᠋ᠢᠨ ᠨᠣᠭᠣᠭᠠᠨ ᠵᠦᠯᠭᠡᠨ ᠳᠤ
ᠲᠠᠲᠠᠬ᠋ᠠ ᠴᠢᠯᠡᠭᠡ ᠪᠡᠨ ᠭᠠᠷᠭᠠᠭᠰᠠᠨ ᠰᠠᠨᠵᠠᠢ ᠂
ᠲᠠᠭᠠᠲᠠᠢ ᠴᠠᠭᠠᠨ ᠮᠠᠩᠬᠠᠨ ᠳᠡᠭᠡᠷᠡ
ᠲᠠᠭᠠᠷᠠᠭᠰᠠᠭᠠᠷ ᠪᠠᠷᠢᠯᠲᠤᠵᠤ ᠰᠤᠷᠤᠭᠰᠠᠨ ᠰᠠᠨᠵᠠᠢ ᠃
ᠮᠠᠯᠵᠢᠬᠤ ᠣᠷᠣᠨ ᠪ ᠵᠠᠯᠠᠭᠤᠴᠤᠳ
ᠮᠠᠷᠢᠶᠠ ᠮᠢᠬᠠ ᠪᠠᠷ ᠭᠠᠶ᠋ᠢᠬᠠᠯᠲᠠᠢ ᠂
ᠮᠠᠨ ᠪ ᠨᠢᠲᠦ ᠪᠡᠷ ᠦᠵᠡᠬᠦ ᠳᠤ
ᠮᠠᠭᠲᠠᠭᠠᠯ ᠪᠦᠷᠢᠳᠦᠭᠰᠡᠨ ᠤᠯᠤᠰ ᠡ ᠃
ᠬᠣᠶ᠋ᠢᠰᠢ ᠬᠠᠨᠲᠤᠭᠤᠯᠵᠤ ᠪᠠᠷᠢᠬᠰᠠᠨ
ᠬᠣᠣᠰ ᠴᠠᠭᠠᠨ ᠮᠠᠶ᠋ᠢᠬᠠᠨ ᠠ᠋ᠴᠠ
ᠬᠤᠪᠴᠠᠯᠠᠵᠤ ᠵᠣᠲᠣᠭᠯᠠᠭᠰᠠᠨ ᠪᠥᠬᠡᠴᠦᠳ
ᠬᠣᠶᠠᠷ ᠭᠠᠷᠯᠠᠭᠠᠳ ᠭᠠᠷᠤᠯᠠ ᠃
ᠦᠵᠡᠬᠦ ᠨᠢᠲᠦ ᠶ᠋ᠢ ᠨᠢ ᠯᠠᠪᠯᠠᠬᠤ ᠳᠤ
ᠥᠷ ᠦ᠋ᠨ ᠭᠡᠷᠡᠯᠲᠦ ᠴᠣᠯᠮᠣᠨ ᠮᠡᠲᠦ ᠂
ᠥᠨᠲᠥᠷ ᠪᠦᠲᠦᠭᠦᠨ ᠪᠠᠶ᠋ᠢᠲᠠᠯ ᠊ᠢ ᠨᠢ
ᠦᠵᠡᠭᠰᠡᠭᠡᠷ ᠬᠥᠮᠦᠰ ᠰᠦᠷᠲᠡᠮᠡᠷ ᠡ ᠃
ᠬᠥᠷᠪᠡᠨ ᠤᠷᠪᠠᠨ ᠭᠢᠰᠬᠢᠬᠦ ᠳ᠋ᠤᠨᠢ
ᠬᠥᠷᠥᠰᠥᠲᠦ ᠭᠠᠵᠠᠷ ᠣᠪᠣᠯᠵᠠᠨᠠ ᠂
ᠬᠦᠴᠦ ᠪᠡᠨ ᠭᠠᠷᠭᠠᠨ ᠲᠦᠯᠬᠢᠪᠡᠯ
ᠬᠦᠬᠡᠮᠳᠦᠭ ᠠᠭᠤᠯᠠ ᠴᠤ᠌ ᠰᠠᠵᠢᠯᠠᠨᠠ ᠃
ᠬᠡᠢ ᠨᠢ ᠬᠦᠷᠦᠭᠡᠳ ᠬᠠᠩᠬᠠᠶ᠋ᠢᠯᠠ
ᠬᠡᠨ ᠲᠡᠢ ᠲᠠᠭᠠᠷᠠᠬᠤ ᠪᠠᠨ ᠪᠠᠷᠤᠭᠯᠠᠯᠠ
ᠬᠡᠲᠦᠨ ᠨᠤᠭᠤᠯᠤᠬ᠋ᠠ ᠥᠩᠭᠡᠷᠡᠲᠡᠯᠡ
ᠬᠢᠴᠢᠶᠡᠯᠯᠡᠬᠦ ᠠᠷᠬ᠋ᠠ ᠪᠠᠨ ᠨᠢᠬᠲᠠᠯᠠᠯᠠ ᠃
ᠭᠠᠭᠴᠠ ᠲᠠᠲᠠᠭᠠᠳ ᠤᠨᠠᠭᠠᠶᠠ ᠭᠡᠵᠦ
ᠭᠠᠯᠵᠠᠭᠤ ᠬᠦᠴᠦ ᠨᠢ ᠪᠠᠲᠠᠷᠠᠵᠤ ᠪᠠᠶ᠋ᠢᠨᠠ ᠂
ᠭᠠᠷ ᠦ᠋ᠨ ᠦᠵᠦᠭᠦᠷ ᠰᠠᠪᠠᠴᠢᠬᠠᠶᠠ ᠭᠡᠵᠦ
ᠭᠠᠪᠰᠢᠭᠠᠢ ᠠᠷᠬ᠋ᠠ ᠪᠠᠨ ᠪᠢᠰᠢᠯᠭᠠᠵᠤ ᠪᠠᠶ᠋ᠢᠨᠠ ᠃
ᠪᠥᠬᠡ ᠶ᠋ᠢᠨ ᠵᠢᠬᠰᠠᠭᠠᠯ ᠦ᠋ᠨ ᠳᠠᠨᠳᠠ ᠠ᠋ᠴᠠ
ᠪᠦᠲᠦᠭᠦᠨ ᠬᠣᠭᠣᠯᠠᠢ ᠬᠦᠩᠭᠢᠨᠡᠨᠡ ᠂
《 ᠪᠥᠬᠡ ᠪᠡᠨ ᠳᠠᠯᠪᠢ ! 》 ᠭᠡᠵᠦ ᠴᠤᠤᠷᠢᠶᠠᠲᠤᠯᠠ
ᠪᠦᠭᠦᠲᠡᠭᠡᠷ ᠲᠠᠪᠬᠡᠷᠦᠨ ᠪᠣᠰᠤᠯᠠ ᠃
ᠠᠯᠲᠠ ᠮᠥᠩᠭᠥᠨ ᠵᠣᠲᠤᠭ ᠦ᠋ᠳ ᠨᠢ
ᠠᠭᠠᠷ ᠦ᠋ᠨ ᠨᠠᠷᠠᠨ ᠳᠤ ᠭᠢᠯᠠᠯᠵᠠᠨᠠ ᠂
ᠠᠷᠪᠠᠨ ᠥᠩᠭᠡ ᠶ᠋ᠢᠨ ᠵᠠᠩᠭᠢᠶᠠ ᠨᠢ
ᠠᠷᠰᠯᠠᠨ ᠪ ᠵᠣᠭᠲᠣᠷ ᠰᠢᠭ᠋ ᠬᠡᠶ᠋ᠢᠰᠦᠯᠡ ᠃
ᠭᠠᠩᠭᠠᠩ ᠴᠠᠭᠠᠨ ᠥᠮᠥᠲᠥ ᠨᠢ
ᠭᠠᠵᠠᠷ ᠰᠢᠭᠦᠷᠦᠨ ᠭᠦᠭᠯᠨᠷᠡᠵᠤ ᠪᠠᠶ᠋ᠢᠨᠠ ᠂
ᠭᠠᠷ ᠬᠥᠯ ᠦ᠋ᠨ ᠪᠤᠯᠴᠢᠩ ᠨᠢ
ᠭᠠᠩ ᠪᠥᠮᠪᠥᠭᠡ ᠰᠢᠭ᠌ ᠵᠠᠩᠭᠢᠷᠠᠵᠤ ᠪᠠᠶ᠋ᠢᠨᠠ ᠃
ᠡᠷᠢᠶᠡᠨ ᠪᠠᠷᠰ ᠦ᠋ᠨ ᠲᠤᠤᠬᠤᠤ
ᠡᠪᠦᠳᠦᠭ ᠊ᠢ ᠨᠢ ᠲᠡᠪᠡᠷᠢᠨ ᠬᠡᠷᠡᠯᠲᠦᠵᠦ ᠪᠠᠶ᠋ᠢᠨᠠ ᠂
ᠦᠵᠡᠬᠦ ᠬᠣᠶᠠᠷ ᠨᠢᠲᠦ ᠨᠢ
ᠥᠯᠮᠡᠢ ᠥᠭᠡᠲᠡ ᠨᠢ ᠭᠥᠯᠢᠢᠵᠦ ᠪᠠᠶ᠋ᠢᠨᠠ ᠃
ᠬᠠᠨᠠ ᠶ᠋ᠢᠨ ᠠᠷ ᠲᠠᠢ ᠭᠤᠲᠤᠯ ᠨᠢ
ᠬᠠᠭᠵᠠᠷᠠᠨᠠ ᠭᠡᠵᠦ ᠴᠤ᠌ ᠪᠠᠶ᠋ᠢᠨᠠ ᠤᠤ ᠳ᠋ᠠ ᠂
ᠬᠠᠨᠲᠠᠭᠠᠢ ᠪᠤᠭᠤ ᠶ᠋ᠢᠨ ᠰᠤᠷ ᠨᠣᠭᠲᠣ
ᠲᠠᠰᠤᠷᠠᠨᠠ ᠭᠡᠵᠦ ᠴᠤ᠌ ᠪᠠᠶ᠋ᠢᠨᠠ ᠤᠤ ᠳ᠋ᠠ ᠃
ᠬᠣᠶᠠᠷ ᠵᠢᠭᠦᠷ ᠦ᠋ᠨ ᠪᠥᠬᠡ
ᠳᠠᠷᠠᠬ᠋ᠠ ᠳᠠᠷᠠᠬ᠋ᠠ ᠪᠠᠷ ᠮᠠᠭᠰᠢᠯᠠ ᠂
ᠬᠤᠨ ᠭᠠᠯᠠᠭᠤᠨ ᠰᠥᠷᠦᠭ
ᠳᠠᠪᠳᠠᠷᠢᠵᠤ ᠪᠠᠶ᠋ᠢᠬᠤ ᠠᠲᠠᠯᠢ ᠡ ᠃
ᠭᠠᠷ ᠶ᠋ᠢᠠᠨ ᠲᠠᠪᠢᠨ ᠮᠠᠭᠰᠢᠬᠤ ᠨᠢ
ᠭᠠᠷᠤᠲᠢ ᠵᠢᠭᠦᠷ ᠶ᠋ᠢᠡᠨ ᠳᠡᠯᠭᠡᠭᠰᠡᠨ ᠰᠢᠭ᠌
ᠭᠠᠵᠠᠷ ᠲᠠᠪᠬᠡᠷᠤᠨ ᠵᠣᠭᠰᠣᠬᠤ ᠨᠢ
ᠭᠠᠯ ᠯᠤᠤ ᠪᠠᠭᠤᠬᠤ ᠮᠡᠲᠦ ᠡ ᠃
ᠠᠯᠬᠤᠵᠤ ᠭᠢᠰᠬᠢᠬᠦ ᠲᠥᠯᠥᠪ ᠨᠢ ᠨᠢᠭᠡ
ᠠᠯᠠᠭ ᠨᠢᠲᠦᠨ ᠪ ᠬᠠᠷᠠᠴᠠ ᠨᠢ ᠨᠢᠭᠡ ᠂
ᠠᠯᠲᠠ ᠮᠥᠩᠭᠥᠨ ᠵᠣᠲᠤᠭ ᠨᠢ ᠨᠢᠭᠡ
ᠠᠷᠬ᠋ᠠ ᠤᠬᠠᠭᠠᠨ ᠪᠣᠲᠣᠯᠬ᠋ᠠ ᠨᠢ ᠨᠢᠭᠡ ᠃
ᠬᠠᠮᠤᠭ ᠦ᠋ᠨ ᠲᠦᠷᠦᠭᠦᠦ ᠨᠤᠭᠤᠯᠤᠬ᠋ᠠ
ᠬᠠᠲᠠᠭᠤ ᠰᠢᠷᠦᠭᠦᠨ ᠶ᠋ᠢᠡᠷ ᠡᠬᠢᠯᠡᠨᠡ ᠂
ᠬᠠᠷᠠᠵᠤ ᠦᠵᠡᠬᠦ ᠶ᠋ᠢᠨ ᠵᠠᠪ ᠦᠭᠡᠢ
ᠬᠠᠰᠢᠷ ᠳᠣᠬᠢ ᠪᠠᠷ ᠭᠠᠷᠲᠠᠯᠠ ᠃
ᠬᠡᠢ ᠲᠠᠲᠠᠪᠠᠯ ᠬᠡᠷᠦᠵᠦ ᠴᠣᠬᠢᠨᠠ
ᠬᠡᠲᠦᠨ ᠳᠠᠪᠬᠤᠷ ᠰᠤᠭᠰᠤᠷᠴᠤ ᠴᠣᠬᠢᠨᠠ ᠂
ᠬᠢᠲᠡᠯ ᠪᠦᠬᠦᠨ ᠢᠶᠡᠨ ᠭᠠᠷᠭᠠᠵᠤ ᠴᠣᠬᠢᠨᠠ
ᠭᠡᠴᠡᠭᠦᠦ ᠭᠡᠳᠡᠭ ᠢᠶᠡᠨ ᠦᠵᠡᠭᠦᠯᠵᠦ ᠴᠣᠬᠢᠨᠠ ᠃
ᠬᠠᠷᠠᠬᠤ ᠨᠢᠲᠦ ᠶᠢ ᠯᠠᠪᠯᠠᠵᠤ ᠴᠣᠬᠢᠨᠠ
ᠬᠠᠮᠤᠭ ᠠᠷᠬ᠋ᠠ ᠪᠠᠨ ᠭᠠᠷᠭᠠᠵᠤ ᠴᠣᠬᠢᠨᠠ ᠂
ᠬᠠᠪᠢᠲᠠᠵᠤ ᠢᠷᠡᠪᠡᠯ ᠵᠠᠶ᠋ᠢᠯᠠᠵᠤ ᠴᠣᠬᠢᠨᠠ
ᠬᠠᠵᠠᠭᠤ ᠪᠠᠷ ᠨᠢ ᠭᠠᠷᠪᠠᠯ ᠲᠤᠰᠴᠤ ᠴᠣᠬᠢᠨᠠ ᠃
ᠤᠷᠭᠤᠬ᠋ᠠ ᠬᠠᠲᠠ ᠰᠢᠭ᠋ ᠵᠣᠭᠰᠣᠭᠠᠳ
ᠤᠬᠠᠬ᠋ᠠ ᠨᠢ ᠭᠠᠷᠤᠭᠰᠠᠨ ᠪᠥᠬᠡᠴᠦᠳ ᠪᠤᠢ ᠂
ᠤᠯᠠᠮ ᠬᠣᠶ᠋ᠢᠨᠠ ᠪᠠᠨ ᠴᠢᠩᠭᠠᠷᠠᠬᠤ
ᠤᠶᠠᠬ᠋ᠠ ᠪᠥᠬᠡᠴᠦᠳ ᠴᠦ᠍ ᠣᠯᠠᠨ ᠪᠤᠢ ᠃
ᠨᠠᠶ᠋ᠢᠷ ᠪᠦᠬᠦᠨ ᠳ᠋ᠦ᠍ ᠲᠡᠷᠢᠭᠦᠯᠡᠳᠡᠭ
ᠨᠡᠷᠡ ᠲᠡᠢ ᠪᠥᠬᠡᠴᠦᠳ ᠴᠦ᠍ ᠤᠯᠠᠨ ᠪᠤᠢ ᠂
ᠨᠢᠭᠡ ᠨᠢᠭᠡ ᠪᠡᠷ ᠣᠶ᠋ᠢᠴᠢᠬᠰᠠᠭᠠᠷ
ᠨᠠᠭᠤᠢ ᠰᠠᠶ᠋ᠢᠨ ᠨᠢ ᠦᠯᠡᠲᠡᠯᠡ ᠃
ᠬᠠᠯᠠᠭᠤᠨ ᠨᠥᠬᠥᠷᠯᠡᠯ ᠨᠢᠭᠡᠲᠦᠭᠡᠷ ᠭᠡᠳ
ᠠᠯᠢ ᠨᠢ ᠪᠣᠯᠪᠠᠴᠤ ᠭᠡᠴᠢᠶᠡᠵᠤ ᠂
ᠠᠬᠢᠨ ᠲᠠᠬᠢᠨ ᠨᠤᠭᠤᠯᠤᠭᠰᠠᠭᠠᠷ
ᠠᠯᠢ ᠬᠦᠴᠦᠲᠡᠢ ᠨᠢ ᠦᠯᠡᠲᠡᠯᠡ ᠃
ᠪᠢᠷᠠ ᠴᠢᠲᠠᠯ ᠲᠠᠢ ᠨᠢᠭᠡ ᠨᠢ
ᠪᠠᠷᠢᠭᠠᠳ ᠠᠪᠬᠤ ᠪᠠᠷ ᠣᠷᠣᠯᠲᠣᠯᠠ ᠂
ᠪᠠᠭᠠᠰᠢ ᠮᠡᠬᠡ ᠲᠡᠢ ᠨᠥᠭᠦᠭᠡ ᠨᠢ
ᠪᠠᠬᠠᠨ ᠥᠲᠥᠭᠡᠨ ᠡᠷᠭᠢᠯᠲᠦᠯᠡ ᠃
ᠳᠡᠮ ᠰᠠᠶ᠋ᠢᠲᠠᠢ ᠨᠢᠭᠡ ᠨᠢ
ᠳᠡᠭᠡᠭᠡ ᠬᠢᠭᠡᠳ ᠠᠮᠵᠢᠨᠠ ᠂
ᠳᠡᠮᠡᠢ ᠯᠡ ᠪᠠᠶ᠋ᠢᠬᠰᠠᠨ ᠨᠥᠭᠦᠭᠡ ᠨᠢ
ᠳᠡᠭᠡᠭᠰᠢ ᠪᠡᠨ ᠬᠠᠨᠲᠤᠭᠠᠳ ᠣᠶ᠋ᠢᠴᠢᠨᠠ ᠂
ᠵᠠᠶ᠋ᠢᠯᠠᠭᠠᠳ ᠭᠠᠷᠲᠠᠯᠠ ᠲᠦᠯᠬᠢᠨᠡ
ᠵᠠᠪ ᠢ ᠨᠢ ᠥᠭᠬᠦ ᠦᠭᠡᠢ ᠬᠥᠮᠥᠷᠢᠨᠡ ᠂
ᠵᠠᠪᠲᠤᠵᠤ ᠠᠪᠤᠪᠠᠯ ᠡᠷᠭᠢᠭᠦᠯᠦᠨᠡ
ᠵᠠᠪᠰᠢᠶᠠᠨ ᠪᠦᠬᠦᠨ ᠢᠶᠠᠨ ᠭᠠᠷᠭᠠᠨᠠ ᠃
ᠮᠥᠩᠭᠥᠨ ᠵᠣᠲᠣᠭ ᠭᠢᠯᠠᠯᠵᠠᠨᠠ
ᠮᠥᠷ ᠮᠥᠷ ᠢᠶᠠᠷ ᠲᠣᠩᠭᠣᠷᠤᠨᠠ ᠂
ᠮᠡᠬᠡ ᠪᠥᠬᠥᠨ ᠢᠶᠡᠨ ᠭᠠᠷᠭᠠᠨᠠ
ᠮᠡᠷᠭᠡᠵᠢᠯ ᠪᠥᠬᠥᠨ ᠢᠶᠡᠨ ᠭᠠᠶ᠋ᠢᠬᠠᠭᠤᠯᠤᠨᠠ ᠃
ᠲᠡᠷᠢᠭᠦᠨ ᠳᠡᠳ᠋ ᠢ ᠢᠯᠭᠠᠬᠤ
ᠲᠡᠮᠡᠴᠡᠯ ᠤᠨ ᠵᠣᠷᠢᠬ ᠬᠦᠭᠵᠢᠨᠡ ᠂
ᠲᠡᠩᠬᠡᠭᠡ ᠲᠠᠮᠢᠷ ᠨᠢ ᠡᠷᠴᠢᠯᠡᠵᠦ
ᠲᠡᠩᠴᠡᠬᠦ ᠬᠦᠴᠦᠨ ᠴᠢᠩᠭᠠᠷᠠᠨᠠ ᠃
ᠠᠤᠠᠬᠤᠭᠠᠳ ᠠᠪᠬᠤ ᠬᠦᠴᠦᠨ ᠳ᠋ᠦ᠍ᠨᠢ
ᠠᠷᠪᠠᠭᠠᠳ ᠲᠣᠪᠣᠷᠤᠤ ᠰᠤᠭᠤᠷᠠᠯᠠ᠂
ᠠᠷᠤᠨᠰᠢ ᠪᠠᠨ ᠰᠠᠵᠢᠬᠤ ᠴᠢᠲᠠᠯ ᠳ᠋ᠤᠨᠢ
ᠠᠷᠪᠠᠭᠠᠳ ᠠᠯᠬᠤᠮ ᠰᠠᠵᠢᠬᠲᠠᠯᠠ ᠃
ᠨᠥᠷᠢᠨ ᠨᠣᠴᠣᠭᠠᠳ ᠢᠷᠡᠬᠦ ᠳ᠋ᠤᠨᠢ
ᠨᠥᠭᠦᠭᠡ ᠬᠥᠯ ᠢ ᠨᠢ ᠴᠣᠬᠢᠨᠠ᠂
ᠨᠤᠭᠤᠰᠤᠯᠠᠨ ᠳᠠᠷᠤᠭᠠᠳ ᠢᠷᠡᠬᠦ ᠳ᠋ᠦ᠍ᠨᠢ
ᠨᠤᠭᠤᠯᠵᠤ ᠠᠪᠤᠭᠠᠳ ᠬᠥᠮᠥᠷᠢᠨᠡ ᠃
ᠵᠥᠭᠡᠯᠡᠨ ᠢᠷᠡᠪᠡᠯ ᠲᠠᠲᠠᠨᠠ
ᠵᠥᠷᠢᠵᠦ ᠭᠠᠷᠬᠤ ᠳ᠋ᠤᠨᠢ ᠴᠣᠬᠢᠨᠠ ᠂
ᠵᠦᠭ ᠢ ᠨᠢ ᠥᠭᠬᠦ ᠦᠭᠡᠢ ᠬᠠᠪᠰᠤᠷᠤᠨᠠ
ᠵᠥᠪ ᠪᠤᠷᠤᠭᠤ ᠪᠠᠷ ᠡᠷᠭᠢᠭᠦᠯᠦᠨᠡ ᠃
ᠭᠠᠷᠠᠬᠠ ᠠᠲᠠᠯᠢ ᠠᠤᠠᠬᠤᠵᠤ
ᠭᠠᠷ ᠤᠨ ᠦᠵᠦᠭᠦᠷ ᠡᠷᠭᠢᠭᠦᠯᠦᠨᠡ ᠂
ᠭᠠᠪᠰᠢᠭᠠᠢ ᠬᠦᠴᠦᠨ ᠴᠢᠲᠠᠯ ᠳ᠋ᠦ᠍ᠨᠢ
ᠭᠠᠵᠠᠷ ᠬᠥᠲᠡᠯᠬᠦ ᠠᠲᠠᠯᠢ ᠠ᠋ ᠃
ᠰᠤᠷᠤᠭᠰᠠᠨ ᠪᠦᠬᠦᠨ ᠢᠶᠠᠨ ᠭᠠᠷᠭᠠᠯᠠ
ᠰᠤᠭᠤᠨᠠᠭ ᠲᠠᠲᠠᠨ ᠣᠷᠣᠯᠠ ᠂
ᠰᠣᠷᠭᠣᠭ ᠤᠬᠠᠭᠠᠨ ᠢᠶᠠᠨ ᠦᠵᠡᠭᠦᠯᠦᠯᠡ
ᠰᠤᠮᠤᠲᠠᠨ ᠲᠦᠷᠭᠡᠯᠡᠨ ᠣᠷᠣᠯᠠ᠃
ᠬᠣᠭᠣᠰᠣᠨ ᠬᠦᠴᠦ ᠪᠣᠯᠬᠤ ᠴᠤ᠌ ᠪᠢᠰᠢ
ᠬᠤᠷᠴᠠ ᠱᠠᠯᠠᠮᠠᠭᠠᠢ ᠴᠢᠬᠤᠯᠠ ᠪᠠᠶ᠋ᠢᠨᠠ ᠂
ᠬᠦᠨᠲᠦᠷᠡᠭᠡ ᠡᠭᠦᠷᠭᠡ ᠪᠣᠯᠬᠤ ᠴᠤ᠌ ᠪᠢᠰᠢ
ᠬᠥᠯ ᠤᠨ ᠡᠷᠲᠡᠮ ᠭᠡᠴᠡᠭᠦᠦ ᠪᠠᠶ᠋ᠢᠨᠠ ᠃
ᠠᠷᠤ ᠳᠡᠭᠡᠭᠡ ᠠᠰ ᠳᠡᠭᠡᠭᠡ
ᠠᠷᠪᠠᠨ ᠭᠤᠷᠪᠠᠨ ᠭᠣᠬᠠ ᠲᠠᠢ ᠳᠡᠭᠡᠭᠡ ᠂
ᠠᠯᠮᠠᠰ ᠳᠡᠭᠡᠭᠡ ᠲᠡᠮᠦᠷ ᠳᠡᠭᠡᠭᠡ
ᠠᠯᠲᠠᠷᠠᠰᠢ ᠦᠭᠡᠢ ᠭᠣᠷᠬᠢ ᠳᠡᠭᠡᠭᠡ ᠃
ᠳᠠᠩ ᠳᠡᠭᠡᠭᠡ ᠳᠠᠪᠬᠤᠷ ᠳᠡᠭᠡᠭᠡ
ᠳᠠᠯᠠᠨ ᠬᠣᠶᠠᠷ ᠬᠤᠪᠢᠯᠭᠠᠨ ᠳᠡᠭᠡᠭᠡ ᠂
ᠳᠠᠷᠠᠭᠠᠯᠠᠨ ᠢᠷᠡᠬᠦ ᠴᠠᠬᠢᠯᠭᠠᠨ ᠳᠡᠭᠡᠭᠡ ᠂
ᠳᠠᠩᠴᠤ ᠭᠡᠴᠡᠭᠦᠦ ᠣᠨᠢᠰᠤᠲᠤ ᠳᠡᠭᠡᠭᠡ ᠃
ᠡᠪᠦᠳᠦᠭ ᠦᠨ ᠥᠷᠥᠭᠡᠯ ᠥᠯᠮᠡᠢ ᠥᠷᠥᠭᠡᠯ
ᠡᠭᠴᠡ ᠥᠷᠥᠭᠡᠯ ᠡᠰᠡᠷᠭᠦ ᠥᠷᠥᠭᠡᠯ ᠂
ᠡᠷᠭᠢᠵᠦ ᠬᠥᠷᠪᠡᠬᠦ ᠵᠡᠪᠡ ᠲᠡᠢ ᠥᠷᠥᠭᠡᠯ
ᠡᠪ ᠲᠡᠢ ᠢᠷᠡᠪᠡᠯ ᠳᠠᠪᠬᠤᠷ ᠥᠷᠥᠭᠡᠯ ᠃
ᠳᠡᠮ ᠪᠥᠬᠥᠨ ᠢᠶᠡᠨ ᠭᠠᠷᠭᠠᠵᠤ
ᠳᠡᠭᠡᠷᠡ ᠳᠣᠣᠷᠠ ᠨᠢ ᠣᠷᠣᠭᠰᠠᠭᠠᠷ
ᠲᠡᠷᠢᠭᠦᠨ ᠳᠡᠳ᠋ ᠨᠢ ᠰᠢᠯᠭᠠᠷᠠᠯᠠ
ᠳᠡᠰ ᠳᠠᠷᠠᠬ᠋ᠠ ᠪᠠᠷ ᠵᠣᠭᠰᠣᠯᠠ ᠃
ᠲᠡᠷᠢᠭᠦᠨ ᠪᠥᠬᠡ ᠳᠦ ᠠᠭᠲᠠ
ᠲᠡᠭᠦᠨ ᠤ ᠳᠠᠷᠠᠬ᠋ᠠ ᠷᠠᠲᠢᠣ᠋ ᠂
ᠳ᠋ᠤᠭᠠᠷ ᠲᠤ ᠣᠷᠣᠭᠰᠠᠨ ᠪᠥᠬᠡᠴᠦᠳ
ᠲᠣᠷᠬ᠋ᠠ ᠳᠤᠷᠳᠤᠩ ᠱᠠᠩᠨᠠᠪᠠ ᠃
ᠠᠪᠤᠷᠭᠤ ᠴᠣᠯᠠ ᠲᠠᠢ ᠪᠥᠬᠡᠴᠦᠳ
ᠠᠯᠬᠤᠬ᠋ᠠ ᠲᠠᠭᠠᠷᠠᠭᠤᠯᠤᠨ ᠮᠠᠭᠰᠢᠯᠠ ᠂
ᠠᠷᠤ ᠭᠠᠵᠠᠷ ᠤᠨ ᠪᠠᠭᠠᠲᠤᠷᠴᠤᠳ ᠤᠨ
ᠠᠯᠲᠠᠷ ᠨᠡᠷᠡ ᠨᠢ ᠮᠠᠨᠲᠤᠯᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠲᠤᠶᠠᠬ᠋ᠠ ᠂ ᠣᠶᠤᠨᠴᠢᠮᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠂ ᠣᠣᠬᠠᠭᠰᠣᠡ