ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠮᠠᠭᠲᠠᠭᠠᠯ- ᠢᠷᠦᠭᠡᠯᠴᠢ ᠳ ∙ ᠡᠩᠬᠡᠲᠦᠪᠰᠢᠨTavan khoshuu malyn magtaal. Yeröölch D.EnkhtüvshinТаван хошуу малын магтаал. Ерөөлч Д.Энхтүвшин
4526ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ ᠮᠠᠭᠲᠠᠭᠠᠯ
ᠢᠷᠦᠭᠡᠯᠴᠢ᠄ ᠳ᠂ ᠡᠩᠬᠡᠲᠦᠪᠰᠢᠨ
ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠰᠦᠯᠳᠡ ᠡᠷᠳᠡᠨᠢ ᠪᠣᠯᠤᠭᠰᠠᠨ
ᠮᠠᠯᠴᠢᠨ ᠲᠦᠮᠡᠨ ᠦ᠌ ᠪᠠᠶᠠᠷ ᠵᠢᠪᠬᠤᠯᠠᠩ ᠪᠣᠯᠤᠭᠰᠠᠨ
ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠰᠦᠷᠦᠭ ᠦ᠋ᠨ ᠢ᠋ᠶ᠋ᠡᠨ ᠮᠠᠭᠲᠠᠭᠠᠯ ᠢ᠋
ᠲᠠ ᠪᠦᠬᠦᠨ ᠳ᠋ᠡᠭᠡᠨ ᠰᠣᠨᠢᠷᠬᠠᠭᠤᠯᠤᠨ ᠬᠡᠯᠡᠶᠡ!
ᠬᠣᠨᠢᠨ ᠰᠦᠷᠦᠭ ᠡᠴᠡ ᠪᠡᠨ ᠡᠬᠢᠯᠡᠶᠡ
ᠬᠣᠷᠣᠭᠠ ᠬᠣᠲᠠ ᠪᠠᠨ ᠴᠢᠮᠡᠭᠯᠡᠭᠰᠡᠨ
ᠬᠣᠩᠬᠣᠷ ᠳᠦᠭᠦᠷᠡᠩ ᠪᠢᠯᠬᠠᠭᠰᠠᠨ
ᠬᠣᠩᠬᠣᠷ ᠰᠦ ᠨᠢ ᠮᠡᠯᠲᠡᠯᠵᠡᠭᠰᠡᠨ
ᠬᠣᠭᠣᠷᠮᠠᠭ ᠲᠠᠷᠠᠭ ᠨᠢ ᠳᠡᠯᠭᠡᠷᠡᠭᠰᠡᠨ
ᠬᠣᠲᠠᠯᠠᠨ ᠢᠷᠡᠵᠦ ᠬᠤᠷᠠᠨ ᠵᠣᠭᠰᠣᠳᠠᠭ
ᠬᠣᠨᠳᠣᠨ ᠴᠠᠭᠠᠨ ᠵᠢᠰᠦᠲᠡᠢ
ᠬᠣᠨᠢᠨ ᠣᠯᠠᠨ ᠰᠦᠷᠦᠭ ᠢ᠋ ᠴᠢᠨᠢ
ᠬᠤᠷᠠᠭᠠᠯᠠᠨ ᠲᠥᠯᠯᠡᠬᠦ ᠦᠶᠡ ᠳ᠋ᠦ᠍
ᠬᠠᠭᠤᠷᠠᠢ ᠪᠠᠭᠤᠴᠠ ᠶ᠋ᠢ ᠨᠢ ᠪᠠᠢᠵᠠᠭᠠᠭᠰᠠᠨ
ᠬᠤᠵᠢᠷ ᠱᠦ ᠶ᠋ᠢ ᠨᠢ ᠳᠡᠪᠢᠰᠦᠭᠰᠡᠨ
ᠬᠠᠰᠢᠶᠠ ᠬᠣᠷᠣᠭᠠ ᠶ᠋ᠢ ᠵᠠᠰᠠᠭᠰᠠᠨ
ᠬᠠᠯᠠᠭᠤᠴᠠᠨ ᠳᠤᠯᠠᠭᠠᠨ ᠬᠡᠪᠲᠡᠯᠭᠡ ᠲᠡᠢ
ᠬᠦᠷᠦᠪᠡ ᠨᠢᠯᠬᠠ ᠶ᠋ᠢᠨ ᠲᠠᠰᠤᠯᠭᠠ ᠲᠠᠢ
ᠡᠪᠦᠯ ᠵᠤᠨ ᠤ᠋ ᠪᠡᠯᠡᠳᠬᠡᠯ ᠲᠡᠢ
ᠤᠰᠤ ᠨᠢ ᠬᠥᠯᠳᠡᠳᠡᠭ ᠦᠭᠡᠢ ᠬᠤᠳᠳᠤᠭ ᠲᠠᠢ
ᠠᠨᠠᠭᠠᠬᠤ ᠤᠬᠠᠭᠠᠨ ᠤ᠋ ᠡᠮᠨᠡᠯᠭᠡ ᠲᠡᠢ
ᠠᠵᠢᠯᠯᠠᠬᠤ ᠬᠡᠮᠵᠢᠶᠡᠨ ᠦ᠌ ᠵᠢᠵᠢᠭᠦᠷ ᠲᠡᠢ
ᠬᠥᠪᠥᠩ ᠵᠥᠭᠡᠯᠡᠨ ᠨᠣᠣᠰᠣ ᠪᠠᠷ ᠢ᠋ᠶ᠋ᠠᠨ
ᠬᠥᠷᠥᠰᠥᠯᠢᠭ ᠵᠤᠵᠠᠭᠠᠨ ᠠᠷᠠᠰᠤ ᠪᠠᠷ ᠢ᠋ᠶ᠋ᠠᠨ
ᠬᠥᠯᠳᠡᠭᠦᠦ ᠲᠦᠭᠦᠬᠡᠢ ᠡᠳ᠋ ᠢ᠋ᠶ᠋ᠡᠷ ᠢ᠋ᠶ᠋ᠡᠨ
ᠦᠢᠯᠡᠳᠪᠦᠷᠢ ᠠᠷᠠᠳ ᠲᠦᠮᠡᠨ ᠦ᠌ ᠪᠡᠨ
ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠭᠰᠠᠨ
ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠤᠭᠤᠴᠠ ᠲᠠᠢ
ᠬᠠᠳᠤᠭᠤᠷ ᠳᠦᠭᠦᠷᠡᠩ ᠰᠡᠭᠦᠯ ᠲᠡᠢ
ᠬᠠᠯᠠᠭᠤᠨ ᠳᠤᠯᠠᠭᠠᠨ ᠢᠯᠴᠢ ᠲᠡᠢ
ᠬᠠᠮᠤᠭ ᠤ᠋ᠨ ᠴᠢᠬᠤᠯᠠ ᠠᠰᠢᠭ ᠲᠠᠢ
ᠣᠪᠣᠭᠠ ᠲᠣᠯᠣᠭᠠᠢᠳ ᠪᠦᠷᠬᠦᠭᠰᠡᠨ
ᠣᠯᠠᠨ ᠵᠠᠭᠤ ᠪᠠᠷ ᠰᠠᠭᠤᠷᠢᠯᠠᠭᠰᠠᠨ
ᠣᠢᠷᠠ ᠬᠣᠯᠠ ᠶ᠋ᠢᠨ ᠬᠠᠷᠠᠭᠤᠯᠤᠭᠠ ᠲᠠᠢ
ᠤᠰᠤᠨ ᠵᠠᠮ ᠤ᠋ᠨ ᠪᠡᠯᠴᠢᠭᠡᠷ ᠲᠡᠢ
ᠳᠠᠭᠠᠨᠠ ᠨᠣᠭᠣᠭᠠ ᠨᠢ ᠬᠠᠩᠬᠤᠯᠤᠭᠰᠠᠨ
ᠲᠠᠷᠢᠶᠠ ᠪᠤᠳᠠᠭᠠ ᠰᠢᠭ᠋ ᠦᠷᠡᠵᠢᠭᠰᠡᠨ
ᠲᠠᠩᠰᠤᠭ ᠪᠠᠶᠠᠨ ᠰᠦᠷᠦᠭ ᠨᠢ
ᠬᠣᠨᠢᠨ ᠰᠦᠷᠦᠭ ᠪᠢᠯᠡ᠃
ᠢᠮᠠᠭᠠᠨ ᠰᠦᠷᠦᠭ ᠢ᠋ ᠨᠢ ᠬᠡᠯᠡᠪᠡᠯ᠄
ᠬᠠᠲᠠᠭᠠ ᠮᠢᠩᠭᠠᠯᠢᠭ ᠵᠢᠰᠦᠲᠡᠢ
ᠭᠠᠩᠭᠠᠩ ᠬᠡᠭᠡᠨᠴᠢᠷ ᠮᠠᠶᠢᠭᠲᠠᠢ
ᠬᠣᠨᠢᠨ ᠳ᠋ᠤ᠌ ᠨᠢ ᠬᠠᠨᠢ ᠲᠠᠢ
ᠬᠣᠲᠠᠨ ᠳ᠋ᠤ᠌ ᠨᠢ ᠪᠠᠷᠠ ᠲᠠᠢ
ᠰᠡᠯᠡᠮᠡ ᠵᠠᠢᠳᠠᠩ ᠡᠪᠡᠷ ᠲᠡᠢ
ᠰᠡᠢᠳᠡᠩ ᠪᠣᠰᠤᠭᠠ ᠴᠢᠬᠢ ᠲᠡᠢ
ᠰᠢᠩᠭᠡᠨ ᠨᠠᠷᠢᠬᠠᠨ ᠳᠠᠭᠤ ᠲᠠᠢ
ᠤᠭᠤᠷᠠᠭ ᠰᠦ ᠪᠡᠷ ᠢ᠋ᠶ᠋ᠡᠨ ᠠᠷᠪᠢᠩᠬᠠᠨ
ᠢᠬᠡᠷᠡ ᠭᠣᠣᠯᠳᠠᠭᠤ ᠢᠰᠢᠭᠡᠯᠡᠳᠡᠭ
ᠰᠤᠪᠤᠳ ᠤ᠋ᠨ ᠡᠷᠳᠡᠨᠢ ᠰᠢᠭ ᠨᠣᠯᠤᠤᠷ ᠲᠠᠢ
ᠰᠢᠭᠤᠷᠬᠠᠢ ᠬᠥᠩᠭᠡᠨ ᠬᠥᠳᠡᠯᠭᠡᠭᠡᠨ ᠲᠡᠢ
ᠬᠣᠨᠢ ᠶ᠋ᠢ ᠨᠢ ᠪᠠᠭᠠᠬᠠᠨ ᠳᠠᠭᠠᠭᠤᠯᠤᠮᠲᠠᠭᠠᠢ
ᠬᠣᠷᠣᠭᠠᠨ ᠤ᠋ ᠮᠤᠬᠤᠷ ᠢ᠋ ᠡᠵᠡᠯᠡᠮᠡᠲᠡᠭᠡᠢ
ᠨᠥᠬᠥᠳ ᠢ᠋ ᠵᠢᠭᠠᠬᠠᠨ ᠭᠠᠳᠠᠭᠤᠷᠯᠠᠮᠲᠠᠭᠠᠢ
ᠨᠥᠮᠥᠷᠢ ᠶ᠋ᠢ ᠲᠦᠷᠭᠡᠨ ᠣᠯᠣᠮᠲᠠᠭᠠᠢ
ᠠᠰᠬᠠ ᠬᠠᠳᠠᠨ ᠳ᠋ᠤ᠌ ᠨᠢ ᠠᠪᠠᠷᠢᠮᠠᠲᠠᠭᠠᠢ
ᠠᠮᠲᠠᠲᠤ ᠤᠷᠭᠤᠮᠠᠯ ᠳ᠋ᠤ᠌ ᠨᠢ ᠰᠢᠯᠢᠮᠲᠡᠬᠡᠢ
ᠳᠤᠯᠠᠭᠠᠨ ᠬᠠᠰᠢᠶᠠᠨ ᠳ᠋ᠤ᠌ ᠪᠠᠢᠷᠢᠯᠠᠭᠰᠠᠨ
ᠡᠷᠳᠡᠨᠢᠲᠦ ᠪᠠᠶᠠᠨ ᠰᠦᠷᠦᠭ ᠨᠢ
ᠢᠮᠠᠭᠠᠨ ᠰᠦᠷᠦᠭ ᠪᠢᠯᠡ᠃
ᠦᠬᠡᠷ ᠮᠥᠷᠭᠥᠳᠡᠭ ᠦᠭᠡᠢ
ᠦᠨᠢᠶᠡ ᠰᠤᠪᠠᠢᠷᠠᠭᠤᠯᠳᠠᠭ ᠦᠭᠡᠢ
ᠲᠤᠭᠤᠯᠭᠠ ᠬᠦᠵᠦᠭᠦᠦ ᠨᠢ ᠪᠦᠳᠦᠭᠦᠷᠡᠭᠰᠡᠨ
ᠲᠣᠬᠣᠮ ᠢ᠋ᠶ᠋ᠠᠷ ᠨᠢ ᠪᠦᠷᠵᠦᠢᠭᠰᠡᠨ
ᠪᠥᠭᠡᠷᠡᠩᠬᠡᠢ ᠡᠪᠡᠷ ᠲᠡᠢ
ᠪᠥᠭᠲᠦᠭᠡᠷ ᠰᠡᠷᠪᠡᠭᠡ ᠲᠡᠢ
ᠲᠤᠷᠠᠵᠤ ᠡᠴᠢᠵᠦ ᠶᠠᠳᠠᠷᠠᠭᠠ ᠦᠭᠡᠢ
ᠲᠤᠭᠤᠯ ᠮᠢᠬᠠ ᠪᠠᠨ ᠪᠠᠷᠠᠭᠠ ᠦᠭᠡᠢ
ᠤᠭᠲᠤᠨ ᠢᠷᠡᠵᠦ ᠤᠷᠤᠮᠳᠠᠵᠤ ᠮᠥᠭᠡᠷᠡᠳᠡᠭ
ᠤᠯᠠᠭᠠᠨ ᠬᠦᠷᠡᠩ ᠪᠤᠬᠠᠨ ᠤ᠋ ᠮᠠᠨᠢ
ᠤᠤᠯ ᠢᠵᠢᠯᠢ ᠰᠦᠷᠦᠭ ᠨᠢ ᠭᠡᠪᠡᠯ᠄
ᠰᠡᠪᠡᠭ ᠰᠠᠢᠲᠠᠢ ᠰᠠᠷᠯᠤᠭ ᠨᠤᠭᠤᠳ
ᠰᠠᠢᠬᠠᠨ ᠪᠡᠶᠡ ᠲᠡᠢ ᠬᠠᠢᠨᠤᠭ ᠨᠤᠭᠤᠳ
ᠰᠠᠮᠨᠠᠨ ᠠᠪᠳᠠᠭ ᠭᠦᠪᠦᠷ ᠲᠡᠢ
ᠰᠠᠢᠨ ᠤᠭᠰᠠᠭᠠᠨ ᠤ᠋ ᠦᠨᠢᠶᠡ ᠨᠦ᠍ᠭᠦᠳ
ᠷᠠᠰᠢᠶᠠᠨ ᠪᠤᠯᠠᠭ ᠰᠦ ᠪᠡᠷ ᠢ᠋ᠶ᠋ᠡᠨ
ᠠᠷᠠᠳ ᠲᠦᠮᠡᠨ ᠢ᠋ ᠪᠡᠨ ᠬᠠᠩᠭᠠᠭᠰᠠᠨ
ᠠᠷᠠᠰᠤ ᠰᠢᠷᠢ ᠪᠡᠷ ᠵᠤᠵᠠᠭᠠᠨ
ᠠᠰᠢᠭ ᠰᠢᠮᠡ ᠪᠡᠷ ᠶᠡᠬᠡᠬᠡᠨ
ᠰᠠᠯᠠᠭᠠ ᠳᠥᠷᠪᠡᠨ ᠲᠤᠭᠤᠷᠠᠢ ᠲᠠᠢ
ᠰᠠᠬᠤᠯᠠᠭ ᠠᠷᠪᠢᠨ ᠬᠥᠭᠡᠪᠦᠷ ᠲᠡᠢ
ᠲᠡᠷᠭᠡᠨ ᠳ᠋ᠦ᠍ ᠣᠷᠣᠪᠠᠯ ᠲᠡᠩᠬᠡᠯ ᠲᠡᠢ
ᠲᠡᠷᠰᠬᠦᠳ ᠨᠢ ᠬᠥᠳᠡᠯᠪᠡᠯ ᠶᠠᠳᠠᠷᠠᠭᠠ ᠲᠠᠢ
ᠵᠠᠭᠠᠨ ᠠ᠋ᠴᠠ ᠳᠤᠲᠠᠬᠤ ᠦᠭᠡᠢ ᠴᠢᠳᠠᠯ ᠲᠠᠢ
ᠵᠢᠭᠠᠰᠤᠨ ᠠ᠋ᠴᠠ ᠳᠤᠲᠠᠬᠤ ᠦᠭᠡᠢ ᠤᠰᠤᠴᠢᠨ
ᠵᠠᠮ ᠲᠠᠭᠠᠷᠠᠪᠠᠯ ᠴᠤᠪᠤᠳᠠᠭ
ᠵᠠᠯᠬᠠᠭᠤ ᠨᠢ ᠬᠦᠷᠪᠡᠯ ᠬᠡᠪᠲᠡᠳᠡᠭ
ᠬᠡᠭᠡᠷᠡ ᠶ᠋ᠢᠨ ᠪᠡᠯᠴᠢᠭᠡᠷ ᠲᠦ᠍ ᠬᠡᠪᠲᠡᠩᠬᠡᠢ
ᠬᠡᠯᠡ ᠪᠡᠨ ᠣᠷᠢᠶᠠᠵᠤ ᠢᠳᠡᠮᠡᠬᠡᠢ
ᠨᠠᠨᠵᠢᠨ ᠱᠣᠭᠣᠭᠠᠨ ᠡᠪᠡᠷ ᠲᠡᠢ
ᠨᠠᠷᠢᠨ ᠭᠣᠶᠣᠮᠰᠣᠭ ᠰᠡᠭᠦᠯ ᠲᠡᠢ
ᠬᠦᠵᠦᠭᠦᠦ ᠰᠡᠷᠪᠡᠭᠡ ᠨᠢ ᠲᠡᠪᠬᠡᠢᠭᠰᠡᠨ
ᠬᠥᠬᠥ ᠳᠠᠯᠢᠩ ᠨᠢ ᠰᠡᠷᠪᠡᠢᠭᠰᠡᠨ
ᠬᠦᠳᠡᠷ ᠴᠢᠬᠢᠷᠡᠭ ᠰᠢᠨᠵᠢ ᠲᠡᠢ
ᠲᠥᠭᠡᠷᠢᠵᠦ ᠶᠡᠷᠦ ᠦᠵᠡᠭᠡ ᠦᠭᠡᠢ
ᠲᠥᠯ ᠶᠡᠷᠦᠳᠡᠭᠡᠨ ᠠᠯᠳᠠᠳᠠᠭ ᠦᠭᠡᠢ
ᠴᠤᠪᠤᠨ ᠢᠷᠡᠭᠡᠳ ᠴᠤᠭᠯᠠᠷᠠᠨ ᠰᠠᠭᠠᠯᠠᠭᠠᠳᠠᠭ
ᠰᠦᠨ ᠳᠠᠯᠠᠢ ᠰᠦᠷᠦᠭ ᠦ᠋ᠨ ᠳᠡᠭᠡᠵᠢ ᠨᠢ
ᠦᠬᠡᠷ ᠰᠦᠷᠦᠭ ᠠ᠋ !
ᠠᠪᠤ ᠶ᠋ᠢᠨ ᠬᠦᠦ ᠶ᠋ᠢᠨ ᠤᠨᠤᠭᠠ ᠪᠣᠯᠤᠭᠰᠠᠨ
ᠠᠷᠠᠳ ᠤ᠋ᠨ ᠨᠠᠭᠠᠳᠤᠮ ᠤ᠋ᠨ ᠴᠢᠮᠡᠭ ᠪᠣᠯᠤᠭᠰᠠᠨ
ᠠᠵᠠ ᠬᠡᠢᠮᠣᠷᠢ ᠶ᠋ᠢᠨ ᠬᠢᠨᠢ ᠲᠩᠷᠢ ᠪᠣᠯᠤᠭᠰᠠᠨ
ᠠᠳᠤᠭᠤᠨ ᠰᠦᠷᠦᠭ ᠢ᠋ ᠨᠢ ᠬᠡᠯᠡᠪᠡᠯ᠄
ᠬᠥᠭᠡᠪᠦᠷᠯᠡᠨ ᠳᠡᠯᠯᠡᠭᠰᠡᠨ ᠠᠳᠤᠭᠤ ᠨᠤᠭᠤᠳ
ᠬᠦᠷᠦᠪᠡ ᠨᠢᠯᠬᠠ ᠤᠨᠠᠭᠠ ᠨᠤᠭᠤᠳ
ᠬᠥᠭᠰᠢᠨ ᠵᠠᠯᠠᠭᠤ ᠭᠡᠭᠦᠦ ᠮᠣᠷᠢᠳ
ᠤᠶᠠᠳᠠᠭ ᠭᠦᠶᠦᠳᠡᠭ ᠬᠦᠯᠦᠭ ᠨᠦ᠍ᠭᠦᠳ
ᠤᠷᠭᠠ ᠴᠢᠩᠭᠠ ᠮᠣᠷᠢ ᠨᠤᠭᠤᠳ
ᠠᠭᠳᠠᠯᠠᠨ ᠬᠥᠩᠭᠡᠯᠡᠭᠰᠡᠨ ᠦᠷᠢᠶᠡ ᠨᠦ᠍ᠭᠦᠳ
ᠠᠪᠬᠠᠯᠵᠢ ᠰᠡᠷᠭᠦᠯᠡᠩ ᠪᠠᠢᠳᠠᠰᠤ ᠨᠤᠭᠤᠳ
ᠰᠢᠨᠠ ᠰᠠᠢᠲᠠᠢ ᠭᠡᠭᠦᠦ ᠨᠦ᠍ᠭᠦᠳ
ᠰᠢᠨᠡ ᠪᠡᠷ ᠰᠤᠷᠭᠠᠭᠰᠠᠨ ᠳᠠᠭᠠ ᠨᠤᠭᠤᠳ
ᠡᠪᠯᠡᠭᠦᠯᠦᠨ ᠨᠡᠢᠯᠡᠭᠦᠯᠪᠡᠯ ᠡᠷᠡ ᠶ᠋ᠢᠨ ᠬᠡᠢᠮᠣᠷᠢ
ᠠᠳᠤᠭᠤᠨ ᠰᠦᠷᠦᠭ ᠨᠢ ᠪᠦᠷᠢᠳᠳᠡᠭ ᠶᠦᠮ ᠪᠠᠢᠨᠠ
ᠡᠯᠮᠢᠭ ᠳᠣᠭᠰᠢᠨ ᠢ᠋ ᠨᠢ ᠰᠤᠷᠭᠠᠵᠤ ᠪᠠᠢᠶᠠ
ᠡᠳ᠋ᠯᠡᠨ ᠣᠨᠣᠭᠤᠯᠭᠠ ᠶ᠋ᠢ ᠨᠢ ᠦᠵᠡᠭᠦᠯᠵᠦ ᠪᠠᠢᠶᠠ
ᠵᠠᠷᠢᠮ ᠨᠢᠭᠡ ᠮᠣᠷᠢᠳ ᠤ᠋ᠨ ᠢ᠋ᠶ᠋ᠠᠨ
ᠵᠠᠩ ᠶᠠᠪᠤᠳᠠᠯ ᠠ᠋ᠴᠠ ᠨᠢ ᠬᠡᠯᠡᠪᠡᠯ
ᠰᠡᠳᠬᠢᠯ ᠰᠡᠷᠭᠦᠭᠡᠮᠡ ᠠᠯᠬᠤᠭᠤᠯᠤᠭᠰᠠᠨ
ᠰᠠᠩᠰᠠᠯᠠᠨ ᠪᠠᠢᠵᠤ ᠵᠢᠷᠣᠭᠠᠯᠠᠭᠰᠠᠨ
ᠬᠠᠵᠠᠭᠠᠷ ᠳᠠᠷᠤᠮᠠ ᠲᠡᠮᠡᠦᠯᠦᠭᠰᠡᠨ
ᠬᠠᠳᠠᠨ ᠳᠡᠭᠡᠷᠡ ᠳᠤᠭᠲᠤᠷᠤᠭᠰᠠᠨ
ᠬᠠᠲᠠᠷᠢᠨ ᠡᠷᠭᠢᠵᠦ ᠠᠷᠠᠯᠵᠠᠭᠰᠠᠨ
ᠬᠠᠳᠠ ᠲᠠᠢ ᠭᠠᠵᠠᠷ ᠭᠠᠩ ᠲᠠᠢ ᠶᠤᠮ ᠰᠢᠭ᠋
ᠬᠠᠷᠠᠩᠭᠤᠢ ᠰᠥᠨᠢ ᠳ᠋ᠧᠩᠯᠦ ᠲᠡᠢ ᠶᠦᠮ ᠰᠢᠭ
ᠬᠠᠵᠠᠭᠠᠷ ᠪᠤᠯᠢᠶᠠᠮᠠ ᠠᠭᠰᠤᠮ ᠴᠤ᠌ ᠪᠣᠢ
ᠪᠤᠷᠤᠭᠤ ᠵᠥᠪ ᠦᠭᠡᠢ ᠨᠣᠮᠣᠬᠠᠨ ᠴᠤ᠌ ᠪᠣᠢ
ᠪᠤᠯᠭᠢᠨ ᠴᠠᠮᠨᠠᠳᠠᠭ ᠡᠷᠭᠢᠴᠡᠭᠡ ᠴᠦ᠍ ᠪᠣᠢ
ᠵᠠ ᠲᠡᠷᠡ ᠪᠦᠭᠦᠳᠡ ᠶ᠋ᠢ ᠨᠢ ᠲᠣᠭᠠᠴᠢᠵᠤ
ᠶᠠᠭᠠᠬᠢᠵᠤ ᠪᠠᠷᠠᠬᠤ ᠪᠣᠢ᠃
ᠲᠡᠮᠡᠭᠡᠨ ᠰᠦᠷᠦᠭ ᠢ᠋ᠶ᠋ᠡᠨ ᠮᠠᠭᠲᠠᠶᠠ᠄
ᠵᠠᠩ ᠰᠠᠢᠲᠠᠢ ᠵᠠᠯᠠᠭᠤ ᠨᠠᠰᠤᠲᠠᠢ
ᠨᠣᠣᠰᠣ ᠰᠠᠢᠲᠠᠢ ᠨᠣᠮᠣᠬᠠᠨ ᠲᠥᠯᠥᠪ
ᠰᠢᠷᠡᠭᠡ ᠲᠡᠭᠰᠢᠬᠡᠨ ᠪᠦᠬᠦ ᠲᠡᠢ
ᠰᠢᠯᠢ ᠪᠡᠷ ᠳᠦᠭᠦᠷᠡᠩ ᠵᠣᠭᠳᠣᠷ ᠲᠠᠢ
ᠰᠢᠯᠢᠮᠡᠯ ᠰᠠᠢᠬᠠᠨ ᠨᠣᠣᠰᠣ ᠲᠠᠢ
ᠰᠢᠯᠢᠨ ᠲᠤᠩᠭᠠᠯᠠᠭᠬᠠᠨ ᠨᠢᠳᠦ ᠲᠡᠢ
ᠰᠢᠮᠡ ᠰᠦ ᠪᠡᠷ ᠢ᠋ᠶ᠋ᠡᠨ ᠠᠷᠪᠢᠩᠬᠠᠨ
ᠥᠨᠳᠥᠷ ᠭᠤᠸᠠᠯᠢᠭ ᠴᠣᠭᠴᠠ ᠲᠠᠢ
ᠥᠷᠭᠡᠨ ᠵᠤᠵᠠᠭᠠᠨ ᠲᠠᠪᠠᠬᠠᠢ ᠲᠠᠢ
ᠥᠪᠡᠷᠲᠡᠭᠡᠨ ᠪᠥᠮᠪᠥᠯᠵᠡᠩᠬᠡᠨ ᠰᠡᠭᠦᠯ ᠲᠡᠢ
ᠡᠪᠦᠯ ᠦ᠋ᠨ ᠬᠦᠢᠲᠡᠨ ᠳ᠋ᠦ᠍ ᠲᠡᠰᠪᠦᠷᠢᠲᠡᠢ
ᠥᠯ ᠬᠣᠭᠣᠯᠠ ᠳᠠᠭᠠᠭᠠᠬᠤ ᠳ᠋ᠤ᠌ ᠪᠠᠨ ᠰᠠᠢᠨ
ᠠᠯᠲᠠᠨ ᠰᠢᠷᠭᠠᠯ ᠵᠢᠰᠦᠲᠡᠢ
ᠠᠯᠤᠰ ᠤ᠋ᠨ ᠬᠣᠯᠠ ᠪᠠᠷ ᠪᠡᠯᠴᠢᠭᠡᠷ ᠲᠡᠢ
ᠠᠢᠯ ᠬᠣᠲᠠ ᠪᠠᠨ ᠨᠡᠭᠦᠯᠭᠡᠳᠡᠭ
ᠠᠷᠭᠠᠯ ᠤᠰᠤ ᠪᠠᠨ ᠲᠠᠲᠠᠳᠠᠭ
ᠬᠠᠰᠢᠶᠠ ᠬᠣᠷᠣᠭᠠ ᠬᠠᠳᠤᠯᠠᠩ ᠪᠣᠷᠳᠣᠭᠠ
ᠬᠠᠮᠤᠭ ᠠᠵᠢᠯ ᠢ᠋ ᠨᠤᠭᠤᠯᠵᠤ ᠥᠭᠳᠡᠭ
ᠠᠴᠢ ᠲᠤᠰᠠ ᠶ᠋ᠢ ᠨᠢ ᠦᠨᠡᠯᠡᠭᠡᠳ ᠪᠠᠷᠠᠬᠤ ᠦᠭᠡᠢ
ᠠᠰᠢᠭ ᠰᠢᠮᠡ ᠶ᠋ᠢ ᠨᠢ ᠮᠠᠭᠲᠠᠭᠠᠳ ᠪᠠᠷᠠᠬᠤ ᠦᠭᠡᠢ
ᠰᠢᠷᠡᠭᠡ ᠰᠠᠢᠬᠠᠨ ᠰᠢᠯᠢᠳᠡᠭ ᠠᠳᠠ ᠨᠤᠭᠤᠳ
ᠰᠢᠯᠢ ᠪᠡᠨ ᠱᠦᠷᠭᠦᠭᠰᠡᠨ ᠪᠣᠭᠣᠷᠤᠨ ᠲᠠᠢᠯᠤᠭ ᠨᠤᠭᠤᠳ
ᠦᠢ ᠣᠯᠠᠨ ᠢᠩᠭᠡ
ᠦᠶᠡ ᠶ᠋ᠢᠨ ᠣᠯᠠᠨ ᠪᠣᠲᠣᠭᠣ ᠲᠣᠷᠣᠮ
ᠡᠶᠡᠯᠳᠡᠨ ᠨᠡᠢᠯᠡᠭᠰᠡᠨ ᠲᠡᠨᠢᠭᠡᠷ ᠭᠣᠪᠢ ᠶ᠋ᠢᠨ
ᠲᠩᠷᠢᠯᠢᠭ ᠰᠠᠢᠬᠠᠨ ᠲᠡᠮᠡᠭᠡᠨ ᠰᠦᠷᠦᠭ ᠮᠢᠨᠢ
ᠪᠦᠷᠢᠳᠳᠡᠭ ᠶᠦᠮ ᠪᠠᠢᠨᠠ᠃
ᠲᠡᠩᠬᠡᠭᠡ ᠴᠢᠳᠠᠯ ᠢ᠋ ᠨᠢ ᠰᠠᠭᠤᠯᠭᠠᠵᠤ ᠪᠠᠢ
ᠲᠡᠰᠪᠦᠷᠢ ᠬᠠᠲᠠᠭᠤᠵᠢᠯ ᠢ᠋ ᠨᠢ ᠣᠯᠭᠣᠵᠤ ᠪᠠᠢ
ᠬᠠᠮᠠᠷ ᠠᠮᠠ ᠶ᠋ᠢ ᠨᠢ ᠬᠠᠢᠷᠠᠯᠠᠵᠤ ᠪᠠᠢ
ᠬᠠᠴᠢ ᠶ᠋ᠢᠨ ᠬᠣᠮᠲᠠᠢ ᠤᠨᠤᠵᠤ ᠡᠳ᠋ᠯᠡᠵᠦ ᠪᠠᠢ
ᠲᠠᠭᠠᠯᠠᠯ ᠲᠠᠢ ᠪᠡᠯᠴᠢᠭᠡᠷ ᠲᠦ᠋ᠨᠢ ᠭᠠᠷᠭᠠᠵᠤ ᠪᠠᠢ
ᠲᠠᠷᠭᠤ ᠬᠦᠴᠦ ᠶ᠋ᠢ ᠨᠢ ᠠᠬᠢᠭᠤᠯᠵᠤ ᠪᠠᠢ
ᠲᠠᠪᠠᠲᠠᠢ ᠰᠠᠢᠬᠠᠨ ᠤᠰᠤᠯᠠᠵᠤ ᠪᠠᠢ
ᠵᠤᠨᠵᠢᠨ ᠨᠠᠮᠤᠷᠵᠢᠨ ᠣᠲᠣᠷᠯᠠᠵᠤ
ᠵᠤᠵᠠᠭᠠᠨ ᠲᠠᠷᠭᠤ ᠶ᠋ᠢ ᠨᠢ ᠠᠬᠢᠭᠤᠯᠵᠤ
ᠡᠪᠦᠯᠵᠢᠨ ᠬᠠᠪᠤᠷᠵᠢᠨ ᠠᠷᠠᠴᠢᠯᠠᠵᠤ
ᠦᠨᠡᠲᠡᠢ ᠲᠠᠷᠭᠤ ᠶ᠋ᠢ ᠨᠢ ᠣᠷᠣᠭᠤᠯᠵᠤ
ᠠᠷᠪᠢᠨ ᠪᠠᠶᠠᠨ ᠰᠦᠷᠦᠭ ᠢ᠋ᠶ᠋ᠡᠨ
ᠠᠷᠪᠠᠢ ᠪᠤᠳᠠᠭᠠ ᠰᠢᠭ᠋ ᠥᠰᠬᠡᠵᠦ
ᠲᠣᠭᠣᠭᠠ ᠲᠣᠭᠣᠭᠠ ᠪᠠᠷ ᠰᠦ ᠪᠡᠨ ᠬᠥᠭᠡᠷᠦᠭᠦᠯᠵᠦ
ᠲᠣᠰᠣ ᠥᠷᠥᠮᠡ ᠠᠷᠪᠢᠨᠲᠠᠢ
ᠬᠤᠪᠢᠩ ᠬᠤᠪᠢᠩ ᠢ᠋ᠶ᠋ᠠᠷ ᠠᠢᠷᠠᠭ ᠢ᠋ᠶ᠋ᠠᠨ ᠰᠥᠩᠨᠡᠵᠦ
ᠬᠤᠪᠢᠩ ᠢ᠋ᠶ᠋ᠠᠷ ᠳᠦᠭᠦᠷᠡᠩ ᠨᠤᠭᠤᠷᠠᠭᠠ ᠪᠠᠨ ᠲᠣᠭᠣᠷᠢᠭᠤᠯᠵᠤ
ᠠᠵᠢᠯᠯᠠᠭᠠᠨ ᠤ᠋ ᠰᠠᠢᠨ ᠢ᠋ᠶ᠋ᠠᠷ ᠠᠪᠤᠷᠭᠤ ᠮᠠᠯᠴᠢᠨ ᠪᠣᠯᠵᠤ
ᠪᠠᠶᠠᠯᠢᠭ ᠶᠡᠬᠡ ᠪᠦᠲᠦᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠭᠠᠲᠤᠷ ᠮᠠᠯᠴᠢᠨ ᠪᠣᠯᠵᠤ
ᠳᠡᠭᠵᠢᠨ ᠬᠥᠭᠵᠢᠨ ᠶᠠᠪᠤᠬᠤ ᠶ᠋ᠢᠨ
ᠳᠡᠭᠡᠭᠰᠢ ᠴᠠᠰᠢ ᠪᠠᠨ ᠥᠷᠨᠢᠬᠦ ᠶ᠋ᠢᠨ
ᠥᠯᠵᠡᠢ ᠪᠡᠯᠭᠡᠲᠦ ᠢᠷᠦᠭᠡᠯ ᠢ᠋
ᠥᠷᠭᠡᠨ ᠣᠯᠠᠨ ᠮᠠᠯᠴᠢᠨ ᠲᠦᠮᠡᠨ ᠳ᠋ᠡᠭᠡᠨ
ᠥᠭᠡᠳᠡ ᠥᠭᠡᠳᠡ ᠪᠡᠨ
ᠳᠡᠭᠡᠭᠰᠢ ᠲᠡᠭᠡᠭᠡᠰᠢ ᠪᠡᠨ ᠳᠡᠪᠰᠢᠭᠦᠯᠦᠨ ᠪᠠᠷᠢᠶᠠ
ᠬᠤᠷᠤᠢ! ᠬᠤᠷᠤᠢ! ᠬᠤᠷᠤᠢ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠵᠢᠷᠠᠨᠲᠠᠢ
ᠦᠰᠦᠭ ᠬᠠᠲᠠᠭᠴᠢ᠄ ᠵᠢᠷᠠᠨᠲᠠᠢ
ᠬᠢᠨᠠᠭᠴᠢ᠄ ᠬᠦᠩᠭᠠᠷ᠂ ᠤᠤᠭᠠᠨᠵᠢᠳ
ᠠᠳᠤᠭᠤᠨ ᠤ ᠪᠡᠶᠡ ᠶᠢᠨ ᠡᠯᠡ ᠡᠷᠬᠡᠲᠡᠨ ᠦ ᠨᠡᠷᠡᠢᠳᠦᠯ
