ᠰᠡᠤᠠᠬᠢᠯ ᠳᠤ ᠬᠣᠨᠣᠭᠰᠢᠬᠰᠠᠨ ᠭ · ᠴᠢᠩᠪᠠᠭᠠᠲᠤᠷ ᠦ᠋ᠨ ᠲᠤᠬᠠᠢ ᠳᠤᠷᠠᠰᠤᠮᠵᠢ - ᠣᠶᠤᠨᠭᠡᠷᠡᠯ Сэтгэлд хоногшихсон Г · Чинбаатарын тухай дурсамж - Оюунгэрэл
608ᠰᠡᠤᠠᠬᠢᠯ ᠳᠤ ᠬᠣᠨᠣᠭᠰᠢᠬᠰᠠᠨ ᠭ · ᠴᠢᠩᠪᠠᠭᠠᠲᠤᠷ ᠦ᠋ᠨ ᠲᠤᠬᠠᠢ ᠳᠤᠷᠠᠰᠤᠮᠵᠢ
ᠣᠶᠤᠨᠭᠡᠷᠡᠯ
ᠭ · ᠴᠢᠩᠪᠠᠭᠠᠲᠤᠷ ᠭᠡᠬᠦ ᠬᠥᠮᠦᠨ ᠦ᠌ ᠠᠯᠳᠠᠷ ᠊ᠢ ᠲᠤᠭᠤᠯᠬᠤ ᠪᠦᠷᠢ ᠣᠯᠠᠩᠬᠢ ᠷᠠᠳᠢᠣ᠋ ᠰᠣᠨᠣᠰᠤᠭᠴᠢ ᠪᠤᠶᠤ ᠲᠧᠯᠸᠢᠰ ᠦᠵᠡᠭᠴᠢ ᠪᠦᠬᠦᠨ ᠦ᠌ ᠰᠡᠳᠬᠢᠯ ᠳ᠋ᠦ᠍ ᠬᠣᠨᠣᠭᠰᠢᠭᠰᠠᠨ ᠬᠠᠯᠠᠭᠤᠨ ᠳᠣᠲᠣᠨᠣ ᠬᠥᠮᠦᠨ ᠦ᠌ ᠨᠢᠭᠡ ᠭᠡᠳᠡᠭ ᠲᠦ᠍ ᠡᠷᠡᠭᠡᠯᠵᠡᠭᠡ ᠦᠭᠡᠢ ᠪᠠᠶ᠋ᠢᠨᠠ ᠃ ᠮᠢᠨᠦ ᠬᠤᠪᠢ ᠳ᠋ᠤ᠌ 《 ᠦᠳᠡᠰᠢ ᠶ᠋ᠢᠨ ᠴᠢᠯᠥᠭᠡ 》 ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠳ᠋ᠦ᠍ ᠴᠢᠩᠪᠠᠭᠠᠲᠤᠷ ᠤ᠋ᠨ ᠴᠡᠭᠡᠯᠬᠡᠨ ᠬᠣᠭᠣᠯᠠᠢ ᠲᠠᠢ ᠨᠢ ᠲᠠᠨᠢᠯᠴᠠᠭᠰᠠᠨ ᠴᠠᠭ ᠠ᠋ᠴᠠ ᠡᠬᠢᠯᠡᠵᠦ ᠂ ᠲᠡᠭᠦᠨ ᠦ᠌ ᠮᠡᠳᠡᠯᠭᠡ ᠭᠦᠨ ᠂ ᠲᠤᠬᠠᠶ᠋ᠢᠯᠠᠭᠰᠠᠨ ᠠᠵᠢᠯ ᠳ᠋ᠠᠭᠠᠨ ᠴᠠᠭᠠᠷᠠᠭᠰᠠᠨ ᠂ ᠠᠪᠢᠶᠠᠰᠯᠢᠭ ᠂ ᠱᠣᠭ ᠶᠦᠮᠦᠷᠯᠢᠭ ᠂ ᠤᠬᠠᠭᠠᠯᠢᠭ ᠬᠥᠲᠥᠯᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠥᠲᠥᠯᠦᠭᠳᠡᠵᠦ ᠦᠷᠭᠦᠯᠵᠢ ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠳ᠋ᠦ᠍ᠨᠢ ᠣᠷᠣᠯᠴᠠᠬᠤ ᠪᠣᠯᠤᠭᠰᠠᠨ ᠮᠥᠷᠲᠡᠭᠡᠨ ᠠᠯᠪᠠᠨ ᠭᠡᠷ ᠦ᠋ᠨ ᠬᠢᠨᠢ ᠤᠲᠠᠰᠤ ᠪᠠᠷ ᠬᠠᠷᠢᠯᠴᠠᠬᠤ ᠪᠣᠯᠤᠭᠰᠠᠨ ᠪᠤᠶᠤ ᠵᠠᠬᠢᠳᠠᠯ ᠴᠢᠮᠡᠭᠡ ᠶ᠋ᠢᠨ ᠬᠣᠯᠪᠣᠭᠠ ᠲᠠᠢ ᠪᠣᠯᠤᠯᠴᠠᠭᠰᠠᠨ ᠪᠠᠶ᠋ᠢᠯᠠ ᠃ ᠭ · ᠴᠢᠩᠪᠠᠭᠠᠲᠤᠷ ᠦᠨᠡᠨ ᠳ᠋ᠡᠭᠡᠨ ᠨᠠᠰᠤ ᠪᠠᠷ ᠨᠠᠳᠠ ᠳ᠋ᠤ᠌ ᠳᠡᠭᠦᠦ ᠪᠣᠯᠳᠠᠭ ᠴᠤ᠌ ᠮᠡᠳᠡᠯᠭᠡ ᠰᠣᠶᠣᠯ ᠢ᠋ᠶ᠋ᠠᠷ ᠨᠠᠳᠠ ᠳ᠋ᠤ᠌ ᠪᠠᠭᠰᠢ ᠪᠣᠯᠳᠠᠭ ᠶᠤᠮ ᠃2003 ᠣᠨ ᠤ᠋ ᠵᠤᠨ ᠤ᠋ ᠰᠡᠭᠦᠯᠴᠢ ᠶ᠋ᠢᠨ 《 ᠦᠳᠡᠰᠢ ᠶ᠋ᠢᠨ ᠴᠢᠯᠥᠭᠡ 》 ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠪᠡᠷ ᠭᠠᠷᠠᠭ ᠤ᠋ᠨ ᠳᠥᠷᠪᠡᠨ ᠦ᠌ 《 ᠥᠯᠵᠡᠢ ᠵᠠᠩᠭᠠ 》 ᠳ᠋ᠤᠭᠠᠷ ᠲᠤ᠌ ᠤᠷᠠᠳ ᠤ᠋ᠨ ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠬᠡᠪᠴᠢᠶᠡᠨ ᠳ᠋ᠦ᠍ ᠵᠠᠭᠤ ᠭᠠᠷᠤᠢ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠪᠠᠷ ᠠᠷᠠᠳ ᠤ᠋ᠨ ᠳᠤᠮᠳᠠ ᠳᠡᠯᠭᠡᠷᠡᠵᠦ ᠳᠠᠭᠤᠯᠠᠭᠳᠠᠭᠰᠠᠨ 《 ᠪᠤᠷᠮᠠ 》 ᠭᠡᠬᠦ ᠮᠢᠨᠦ ᠴᠤᠭᠯᠠᠭᠤᠯᠵᠤ ᠡᠮᠬᠢᠳᠬᠡᠭᠰᠡᠨ ᠳᠠᠭᠤᠤ ᠶ᠋ᠢ ᠮᠢᠨᠢ ᠨᠡᠪᠲᠡᠷᠡᠭᠦᠯᠦᠨ ᠨᠠᠮᠠᠶ᠋ᠢ ᠪᠠᠶᠠᠰᠬᠠᠵᠤ ᠪᠠᠶ᠋ᠢᠯᠠ ᠃ ᠰᠣᠨᠣᠰᠤᠭᠴᠢ ᠲᠦᠮᠡᠨ ᠦ᠌ ᠰᠣᠨᠣᠷ ᠊ᠢ ᠮᠢᠯᠢᠶᠠᠵᠤ ᠂ ᠲᠡᠭᠦᠨ ᠡᠴᠡ ᠰᠡᠭᠦᠯ ᠢ᠋ᠶ᠋ᠡᠷ ᠮᠢᠨᠦ ᠪᠢᠴᠢᠭᠰᠡᠨ 《 ᠵᠢᠷ ᠦ᠋ᠨ ᠨᠢᠭᠡᠨ ᠪᠠᠯ ᠠᠭᠤᠯᠠ ᠶ᠋ᠢᠨ ᠦᠵᠡᠮᠵᠢ 》 ᠭᠡᠬᠦ ᠨᠠᠶ᠋ᠢᠷᠠᠭᠤᠯᠤᠯ ᠤ᠋ᠨ ᠬᠡᠰᠡᠭ ᠪᠤᠰᠠᠭ ᠠ᠋ᠴᠠ 《 ᠦᠳᠡᠰᠢ ᠶ᠋ᠢᠨ ᠴᠢᠯᠥᠭᠡ 》 ᠰᠢᠭᠤᠳ ᠨᠡᠪᠲᠡᠷᠡᠭᠦᠯᠭᠡ ᠪᠡᠷ ᠰᠣᠨᠣᠰᠤᠭᠴᠢ ᠲᠦᠮᠡᠨ ᠳ᠋ᠡᠭᠡᠨ ᠲᠤᠭᠤᠯᠠᠭᠠᠵᠤ ᠪᠠᠶ᠋ᠢᠬᠰᠠᠨ ᠪᠢᠯᠡ ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ 《 ᠴᠢᠨᠣᠠ 》 ᠶ᠋ᠢᠨ ᠨᠡᠷᠡ ᠶ᠋ᠢ ᠶᠠᠭᠤᠨ ᠳ᠋ᠤ᠌ ᠪᠤᠷᠤᠭᠤᠯᠵᠤ ᠳᠠᠭᠤᠳᠠᠳᠠᠭ ᠤ᠋ᠨ ᠲᠤᠬᠠᠢ ᠷᠠᠳᠢᠣ᠋ ᠶ᠋ᠢᠨ ᠢ᠋ᠶ᠋ᠡᠨ ᠴᠡᠩᠬᠡᠷ ᠳᠣᠯᠭᠢᠶᠠᠨ ᠢ᠋ᠶ᠋ᠠᠷ ᠬᠠᠯᠠᠭᠤᠬᠠᠨ ᠵᠣᠭᠣᠭᠳᠠᠵᠤ ᠪᠠᠶ᠋ᠢᠬᠰᠠᠨ ᠢ᠋ᠶ᠋ᠠᠨ ᠪᠣᠳᠣᠪᠠᠯ ᠦᠨᠡᠬᠡᠷ ᠰᠠᠢᠬᠠᠨ ᠶᠤᠮ ᠃ ᠮᠥᠨᠴᠦ ᠡᠨᠡ ᠨᠠᠰᠤᠨ ᠳ᠋ᠠᠭᠠᠨ ᠳᠠᠬᠢᠭᠠᠳ ᠣᠯᠳᠠᠰᠢ ᠦᠭᠡᠢ ᠰᠠᠢᠬᠠᠨ ᠳᠤᠷᠠᠰᠤᠮᠵᠢ ᠪᠠᠶ᠋ᠢᠵᠤ ᠳᠠ ᠃ ᠲᠡᠮᠡᠭᠡ ᠮᠣᠷᠢᠨ ᠤ᠋ ᠢᠮ ᠲᠠᠮᠠᠭᠠᠨ ᠲᠤᠬᠠᠢ ᠠᠯᠳᠠᠭ ᠤᠨᠤᠭ ᠵᠣᠭᠣᠭ ᠨᠡᠮᠡᠷᠢᠯᠡᠵᠦ ᠪᠠᠶ᠋ᠢᠬᠰᠠᠨ ᠢ᠋ᠶ᠋ᠠᠨ ᠰᠠᠨᠠᠬᠤ ᠳ᠋ᠤ᠌ ᠰᠡᠳᠬᠢᠯ ᠳ᠋ᠦ᠍ ᠳᠤᠯᠠᠭᠠᠬᠠᠨ ᠰᠠᠨᠠᠭᠳᠠᠬᠤ ᠶᠤᠮ ᠃ ᠤᠷᠭᠤᠮᠠᠯ ᠤ᠋ᠨ ᠲᠤᠬᠠᠢ ᠂ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢᠨ ᠲᠤᠬᠠᠢ ᠠᠯᠢ ᠣᠯᠠᠨ ᠵᠣᠭᠣᠭ ᠳᠡᠯᠭᠡᠵᠦ ᠪᠠᠶ᠋ᠢᠬᠰᠠᠨ ᠪᠠ 《 ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠨᠠᠢ᠍ᠮᠠᠨ ᠠᠮᠲᠠᠲᠤ ᠢᠳᠡᠭᠡᠨ 》 ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠶᠡᠷᠦ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢᠨ ᠲᠤᠬᠠᠢ ᠣᠯᠠᠨ ᠠᠷᠪᠢᠨ ᠵᠦᠢᠯᠡᠰ ᠊ᠢ ᠭ · ᠴᠢᠩᠪᠠᠭᠠᠲᠤᠷ ᠪᠠᠭᠰᠢ ᠠ᠋ᠴᠠ ᠪᠠᠨ ᠰᠤᠷᠴᠤ ᠮᠡᠳᠡᠵᠦ ᠲᠡᠮᠳᠡᠭᠯᠡᠯ ᠬᠢᠵᠦ ᠪᠠᠶ᠋ᠢᠬᠰᠠᠨ ᠢ᠋ᠶ᠋ᠠᠨ ᠲᠣᠳᠣᠬᠠᠨ ᠰᠠᠨᠠᠵᠤ ᠪᠠᠶ᠋ᠢᠨᠠ ᠃
ᠭ · ᠴᠢᠩᠪᠠᠭᠠᠲᠤᠷ ᠤ᠋ᠨ 《 ᠠᠯᠲᠠᠨ ᠲᠠᠪᠤ 》 ᠰᠦᠯᠵᠢᠶᠡ ᠳ᠋ᠦ᠍ ᠂ ᠮᠢᠨᠦ ᠪᠢᠴᠢᠵᠦ ᠥᠭᠭᠦᠭᠰᠡᠨ ᠤᠷᠠᠳ ᠤ᠋ᠨ ᠬᠣᠶ᠋ᠢᠲᠤ ᠬᠤᠰᠢᠭᠤᠨ ᠤ᠋ ᠬᠡᠪᠴᠢᠶᠡᠨ ᠳ᠋ᠡᠬᠢ ᠨᠡᠷᠡ ᠲᠡᠢ ᠳᠠᠷᠬᠠᠨ ᠂ ᠨᠡᠷᠡ ᠲᠡᠢ ᠣᠶᠣᠳᠠᠯᠴᠢᠨ ᠂ ᠨᠡᠷᠡ ᠲᠡᠢ ᠪᠥᠬᠡᠴᠢᠨ ᠁ ᠭᠡᠬᠦ ᠮᠡᠲᠦ ᠶ᠋ᠢᠨ ᠵᠠᠭᠤᠨ ᠠᠰᠠᠭᠤᠯᠲᠠ ᠶ᠋ᠢᠨ ᠬᠠᠷᠢᠭᠤᠯᠲᠠ ᠶ᠋ᠢ ᠬᠠᠳᠠᠭᠠᠯᠠᠵᠤ ᠪᠣᠢ ᠭᠡᠵᠦ ᠭ · ᠴᠢᠩᠪᠠᠭᠠᠲᠤᠷ ᠨᠠᠳᠠ ᠳ᠋ᠤ᠌ ᠨᠢᠭᠤᠷ ᠤᠴᠠᠷᠠᠨ ᠶᠠᠷᠢᠵᠤ ᠪᠠᠶ᠋ᠢᠬᠰᠠᠨ ᠪᠥᠭᠡᠳ ᠨᠠᠳᠠ ᠳ᠋ᠤ᠌ ᠳᠥᠷᠪᠡᠨ ᠴᠤᠪᠤᠷᠠᠯ ᠨᠣᠮ ᠳᠤᠷᠠᠰᠬᠠᠯ ᠪᠣᠯᠭᠠᠨ ᠪᠡᠯᠭᠡᠯᠡᠵᠦ ᠪᠠᠶ᠋ᠢᠬᠰᠠᠨ ᠊ᠢ ᠰᠠᠨᠠᠵᠤ ᠪᠠᠶ᠋ᠢᠨᠠ᠃ ᠭᠡᠨᠡᠳᠲᠡ ᠴᠢᠩᠪᠠᠭᠠᠲᠤᠷ ᠪᠠᠭᠰᠢ ᠶ᠋ᠢᠨ ᠮᠥᠩᠬᠡ ᠪᠤᠰᠤ ᠶ᠋ᠢ ᠦᠵᠡᠭᠦᠯᠦᠭᠰᠡᠨ ᠲᠡᠷᠡ ᠭᠱᠠᠨ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠴᠤᠪᠤᠷᠠᠯ ᠨᠣᠮ ᠳᠡᠭᠡᠷᠡ ᠨᠢ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠤᠭᠤᠯᠳᠠᠭ ᠦᠭᠡᠢ ᠶᠦ᠍ᠮ ᠳᠡ ᠭᠡᠵᠦ ᠬᠠᠷᠠᠮᠰᠠᠵᠤ ᠪᠠᠶ᠋ᠢᠯᠠ ᠃ ᠶᠠᠭ ᠬᠡᠯᠡᠪᠡᠯ ᠲᠡᠷᠡ ᠥᠴᠦᠬᠡᠨ ᠬᠠᠷᠠᠮᠰᠠᠯ ᠪᠣᠯ ᠬᠤᠪᠢ ᠶ᠋ᠢᠨ ᠬᠠᠷᠠᠮᠰᠠᠯ ᠰᠢᠳᠡ ! ᠡᠶ᠋ᠢᠮᠦ ᠰᠠᠢᠬᠠᠨ ᠰᠣᠶᠣᠯ ᠤ᠋ᠨ ᠵᠢᠳᠬᠦᠯᠲᠡ ᠪᠡᠨ ᠠᠯᠳᠠᠭᠰᠠᠨ ᠶᠠᠪᠤᠳᠠᠯ ᠨᠢ ᠴᠢᠩᠪᠠᠭᠠᠲᠤᠷ ᠊ᠢ ᠪᠢᠰᠢᠷᠡ ᠬᠠᠶ᠋ᠢᠷᠠᠯᠠᠲᠠᠭ ᠠᠷᠠᠳ ᠲᠦᠮᠡᠨ ᠳᠠᠶᠠᠭᠠᠷ ᠤ᠋ᠨ ᠬᠠᠷᠠᠮᠰᠠᠯ ᠪᠠᠶ᠋ᠢᠵᠤ ᠲᠠᠭᠠᠷᠠᠨᠠ ᠃ ᠭᠡᠪᠡᠴᠦ ᠪᠢᠳᠡ ᠬᠠᠷᠠᠮᠰᠠᠯ ᠢ᠋ᠶ᠋ᠠᠨ ᠬᠦᠴᠦᠨ ᠪᠣᠯᠭᠠᠵᠤ ᠥᠪᠡᠷ ᠥᠪᠡᠷ ᠦ᠋ᠨ ᠴᠢᠳᠠᠳᠠᠭ ᠮᠡᠳᠡᠳᠡᠭ ᠵᠦᠢᠯᠡᠰ ᠢ᠋ᠶ᠋ᠡᠨ ᠨᠡᠶ᠋ᠢᠭᠡᠮ ᠨᠠᠶ᠋ᠢᠲᠠ ᠳ᠋ᠤ᠌ ᠨᠡᠮᠡᠷᠢ ᠬᠠᠨᠳᠢᠪ ᠪᠣᠯᠭᠠᠨ ᠡᠷᠭᠦᠬᠦ ᠨᠢ ᠬᠠᠮᠤᠭ ᠠ᠋ᠴᠠ ᠴᠢᠬᠤᠯᠠ ᠶᠠᠪᠤᠳᠠᠯ ᠪᠠᠶ᠋ᠢᠵᠤ ᠲᠠᠭᠠᠷᠠᠨᠠ ᠃
ᠭ · ᠴᠢᠩᠪᠠᠭᠠᠲᠤᠷ ᠥᠪᠡᠷ ᠦ᠋ᠨ ᠠᠵᠢᠯ ᠦᠢᠯᠡᠰ ᠲᠡᠭᠡᠨ ᠭᠢᠯᠠᠯᠵᠠᠲᠠᠯᠠ ᠠᠵᠢᠯᠯᠠᠳᠠᠭ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠨ ᠪᠤᠰᠤᠳ ᠤ᠋ᠨ ᠨᠠᠶ᠋ᠢᠲᠠᠵᠤ ᠭᠤᠶᠤᠭᠰᠠᠨ ᠶᠠᠪᠤᠳᠠᠯ ᠳ᠋ᠤ᠌ ᠴᠤ᠌ ᠲᠤᠩ ᠨᠢᠭᠲᠠ ᠬᠢᠨᠠᠮᠠᠭᠠᠢ ᠬᠠᠨᠳᠤᠳᠠᠭ ᠲᠤᠩ ᠬᠢᠴᠢᠶᠡᠩᠭᠦᠢ ᠬᠠᠷᠭᠤᠴᠠᠯᠭᠠ ᠲᠠᠢ ᠬᠥᠮᠦᠨ ᠪᠠᠶ᠋ᠢᠯᠠ ᠃ ᠪᠢ ᠨᠢᠭᠡ ᠤᠳᠠᠭᠠ ᠠᠷᠠᠳ ᠤ᠋ᠨ ᠳᠠᠭᠤᠤ ᠴᠤᠭᠯᠠᠭᠤᠯᠬᠤ ᠶ᠋ᠢᠨ ᠳᠤᠮᠳᠠ ᠪᠠᠨ ᠭ · ᠴᠢᠩᠪᠠᠭᠠᠲᠤᠷ ᠪᠠᠭᠰᠢ ᠳ᠋ᠤ᠌ ᠨᠢᠭᠡᠨ ᠰᠢᠩᠭᠡᠯᠲᠡ ᠶ᠋ᠢᠨ ᠪᠦᠰᠡ ᠥᠭᠴᠦ ᠳᠠᠭᠤᠨ ᠤ᠋ ᠠᠶᠠᠯᠭᠤ ᠶ᠋ᠢ ᠨᠢ ᠨᠣᠲ ᠢ᠋ᠶ᠋ᠠᠷ ᠲᠡᠮᠳᠡᠭᠯᠡᠭᠦᠯᠵᠦ ᠥᠭᠬᠦ ᠶ᠋ᠢ ᠨᠠᠶ᠋ᠢᠲᠠᠭᠰᠠᠨ ᠪᠠᠶ᠋ᠢᠯᠠ ᠃ ᠨᠥᠭᠥᠭᠡ ᠨᠠᠶ᠋ᠢᠵᠠ ᠨᠢ ᠺᠢᠨᠣ᠋ ᠲᠣᠭᠯᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠭᠤᠨ ᠤ᠋ ᠪᠦᠰᠡ ᠨᠢ ᠭᠡᠭᠡᠭᠳᠡᠴᠢᠬᠡᠵᠡᠢ ᠭᠡᠵᠦ ᠨᠠᠳᠠᠳᠤ ᠲᠤᠩ ᠡᠪ ᠦᠭᠡᠢᠳᠡᠭᠰᠡᠨ ᠪᠠᠶ᠋ᠢᠲᠠᠯ ᠢ᠋ᠶ᠋ᠠᠨ ᠬᠡᠯᠡᠵᠦ ᠪᠠᠶ᠋ᠢᠬᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠮᠢᠨᠢ ᠲᠣᠳᠣᠬᠠᠨ ᠪᠠᠶ᠋ᠢᠨᠠ ᠃ ᠲᠡᠭᠦᠨ ᠡᠴᠡ ᠬᠣᠶ᠋ᠢᠰᠢ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠪᠤᠷ ᠨᠠᠨᠳᠢᠨ ᠴᠠᠭ ᠮᠥᠴᠡ ᠶ᠋ᠢ ᠪᠤᠤ ᠯᠠ ᠭᠠᠷᠤᠵᠠᠳᠠᠭᠤᠯᠤᠶᠠ ᠭᠡᠮᠡᠨ ᠤᠲᠠᠰᠤ ᠴᠤ᠌ ᠴᠥᠭᠡᠨ ᠵᠠᠯᠭᠠᠬᠤ ᠪᠣᠯᠤᠭᠰᠠᠨ ᠮᠥᠷᠲᠡᠭᠡᠨ ᠵᠠᠬᠢᠳᠠᠯ ᠴᠢᠮᠡᠭᠡ ᠴᠦ᠍ ᠪᠢᠴᠢᠬᠦ ᠪᠡᠨ ᠪᠠᠢᠴᠢᠭᠰᠠᠨ ᠶᠤᠮ ᠃
ᠲᠡᠷᠡ ᠮᠥᠷᠲᠡᠭᠡᠨ ᠭ · ᠴᠢᠩᠪᠠᠭᠠᠲᠤᠷ 《 ᠮᠥᠩᠭᠥᠨ ᠮᠣᠳᠣ 》 ᠭᠡᠬᠦ ᠰᠠᠢᠬᠠᠨ ᠨᠡᠪᠲᠡᠷᠡᠭᠦᠯᠭᠡ ᠬᠢᠵᠦ ᠥᠷᠭᠡᠨ ᠣᠯᠠᠨ ᠲᠦᠮᠡᠨ ᠳ᠋ᠡᠭᠡᠨ ᠶᠤᠸᠠᠨ ᠤ᠋ ᠳᠡᠭᠡᠳᠦ ᠨᠡᠶ᠋ᠢᠰᠯᠡᠯ ᠦ᠋ᠨ ᠰᠣᠶᠣᠯ ᠲᠡᠦᠬᠡ ᠶ᠋ᠢᠨ ᠤᠯᠠ ᠮᠥᠷ ᠊ᠢ ᠲᠠᠨᠢᠭᠤᠯᠵᠤ ᠣᠶ᠋ᠢᠯᠠᠭᠠᠭᠤᠯᠵᠤ ᠪᠠᠶ᠋ᠢᠬᠰᠠᠨ ᠊ᠢ ᠳᠤᠷᠠᠰᠤᠨ ᠰᠠᠨᠠᠭᠠᠯᠵᠠᠵᠤ ᠪᠠᠶ᠋ᠢᠨᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠤᠠᠬᠠᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠱᠠᠭᠰᠠᠯ ᠂ ᠣᠤᠠᠬᠠᠨᠰᠣ ᠠ᠋