ᠡᠮᠡᠭᠡ ᠶ᠋ᠢᠨ ᠲᠣᠭᠣᠳᠠᠭ Эмгийн тоодог
2721ᠵᠤᠨ ᠤ᠋ ᠠᠮᠠᠷᠠᠯᠲᠠ ᠳ᠋ᠤ᠌ ᠡᠪᠦᠭᠡ ᠡᠮᠡᠭᠡ ᠶ᠋ᠢᠨ ᠳ᠋ᠡᠭᠡᠨ ᠣᠴᠢᠯᠠ
ᠮᠢᠨᠦ ᠡᠮᠡᠭᠡ ᠡᠪᠦᠭᠡ ᠭᠡᠵᠦ ᠨᠠᠮᠠ ᠶ᠋ᠢ ᠯᠡ ᠬᠠᠷᠠᠭᠰᠠᠨ ᠤᠯᠤᠰ ᠪᠠᠢᠭᠠ ᠳᠠ ᠃ ᠬᠢᠴᠢᠶᠡᠯ ᠬᠤᠷᠳᠤᠨ ᠳᠠᠭᠤᠰᠤᠭᠠᠰᠠᠢ ! ᠡᠵᠢ ᠦᠭᠡᠢ ᠬᠥᠭᠡᠷᠦᠬᠦᠨ ᠴᠠᠭᠠᠨ ᠪᠣᠲᠣᠭᠣ ᠪᠠᠢᠭᠠ ᠂ ᠨᠠᠮᠠ ᠶ᠋ᠢ ᠤᠭᠵᠢᠵᠤ ᠪᠠᠢᠭᠠᠳ ᠲᠡᠮᠡᠭᠡ ᠪᠣᠯᠭᠠᠵᠤ ᠠᠪᠤᠭᠠᠷᠠᠢ ᠭᠡᠰᠡᠨ ᠂ ᠰᠠᠢᠬᠠᠨ ᠴᠠᠭᠠᠨ ᠠᠳᠠ ᠪᠣᠯᠭᠠᠵᠤ ᠤᠨᠤᠭᠠᠳ ᠶᠠᠪᠤᠵᠤ ᠥᠭᠭᠦᠨᠡ ᠳᠡ ᠃ ᠡᠮᠡᠭᠡ ᠡᠪᠦᠭᠡ ᠳ᠋ᠦ᠍ ᠪᠡᠨ ᠣᠴᠢᠬᠤ ᠳ᠋ᠤ᠌ ᠡᠦᠲᠦ ᠬᠣᠶᠠᠷ ᠬᠣᠨᠣᠭ ᠦᠯᠡᠳᠡᠵᠦ ᠪᠠᠢᠨᠠ᠃ ᠴᠠᠭ ᠶᠠᠭᠠᠬᠢᠭᠰᠠᠨ ᠶᠠᠪᠤᠵᠤ ᠥᠭᠳᠡᠭ ᠦᠭᠡᠢ ᠶᠦᠮ ᠪᠣᠢ !
ᠲᠦᠷ — ᠲᠦᠷ —
ᠲᠦᠷᠳ᠋ — ᠫᠠᠰ
ᠲᠦᠷᠳ᠋ —
— ᠡᠪᠦᠭᠡ ᠠ᠋ ᠡᠮᠡᠭᠡ ᠠ᠋ ᠂ ᠪᠢ ᠢᠷᠡᠯᠡ ᠃
—ᠵᠠ ᠂ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠢᠳᠡᠵᠦ ᠤᠤᠭᠤᠬᠤ ᠶᠠᠭᠤᠮᠠ ᠶ᠋ᠢ ᠨᠢ ᠪᠡᠯᠡᠳᠦᠭᠡᠳ ᠥᠷᠥᠭᠡᠳ ᠲᠠᠯᠪᠢᠴᠢᠬᠠᠭᠰᠠᠨ ᠂ ᠭᠠᠷᠤᠶᠠ ᠳᠠ ᠃
— ᠦ ᠂ ᠡᠮᠡᠭᠡ ᠡᠪᠦᠭᠡ ᠬᠣᠶᠠᠷ ᠨᠠᠮᠠ ᠶ᠋ᠢ ᠣᠷᠬᠢᠭᠠᠳ ᠶᠠᠪᠤᠴᠢᠬᠠᠵᠠᠢ ᠃ ᠴᠠᠭᠠᠨ ᠠ᠋ ᠂ ᠴᠢ ᠬᠤᠷᠳᠤᠨ ᠲᠣᠮᠣ ᠪᠣᠯᠤᠭᠠᠷᠠᠢ ᠬᠣᠶᠠᠭᠤᠯᠠ ᠪᠠᠨ ᠲᠡᠷᠡ ᠴᠡᠩᠬᠡᠷᠲᠦᠭᠡᠳ ᠪᠠᠢᠭᠠ ᠠᠭᠤᠯᠠᠰ ᠤ᠋ᠨ ᠴᠠᠭᠠᠨᠠ ᠶᠠᠭᠤ ᠪᠠᠢᠳᠠᠭ ᠢ᠋ ᠨᠢ ᠶᠠᠪᠤᠵᠤ ᠦᠵᠡᠨᠡ ᠰᠢᠦ ᠃
ᠣᠷᠣᠢ ᠪᠣᠯᠤᠯᠠ ᠃ ᠡᠮᠡᠭᠡ ᠡᠪᠦᠭᠡ ᠬᠣᠶᠠᠷ ᠠᠯᠠᠭᠠ ᠠ᠋ ! ᠴᠢ ᠳᠠᠬᠢᠭᠠᠳ ᠥᠯᠥᠰᠦᠭᠡᠳ ᠪᠠᠢᠭᠠ ᠶᠤᠮ ᠤᠤ ?
ᠶᠠᠭᠠᠬᠢᠭᠰᠠᠨ ᠤᠳᠠᠪᠠ ?
—ᠴᠠᠭᠠᠨ ᠲᠠ ᠬᠣᠶᠠᠷ ᠶᠠᠭᠤ ᠬᠢᠵᠦ ᠡᠳᠦᠷ ᠢ᠋ ᠠᠪᠤᠪᠠ ᠳᠠ ?
—ᠡᠨᠡ ᠴᠠᠭᠠᠨ ᠴᠢᠨᠢ ᠶᠣᠰᠣᠲᠠᠢ ᠴᠠᠳᠬᠤ ᠪᠠᠨ ᠮᠡᠳᠡᠬᠦ ᠦᠭᠡᠢ ᠢᠳᠡᠬᠦ ᠶᠦᠮ ᠠ᠋ ᠃
— ᠠ᠋ ᠂ ᠬᠦᠦ ᠮᠢᠨᠢ ᠡᠵᠢ ᠦᠭᠡᠢ ᠠᠮᠢᠲᠠᠨ ᠴᠢᠨᠢ ᠦᠷᠭᠦᠯᠵᠢ ᠯᠡ ᠥᠯᠥᠰᠬᠦᠯᠡᠩ ᠪᠠᠢᠳᠠᠭ ᠶᠤᠮ ᠠ᠋ ᠬᠥᠭᠡᠷᠦᠬᠦᠢ ! ᠴᠠᠭᠠᠨ ᠢ᠋ᠶ᠋ᠠᠨ ᠰᠠᠢᠨ ᠤᠭᠵᠢᠵᠤ ᠪᠠᠢᠭᠠᠷᠠᠢ !
— ᠦ ᠂ ᠨᠥᠭᠦᠭᠡ ᠮᠠᠭᠤ ᠨᠣᠮᠣᠬᠠᠨ ᠬᠦᠷᠡᠩ ᠭᠤᠨᠵᠢ ᠠᠯᠠᠭᠠ ᠠ᠋ ! ᠥᠴᠥᠭᠡᠳᠦᠷ ᠡᠴᠡ ᠪᠣᠲᠣᠭᠣᠯᠠᠬᠤ ᠶᠠᠩᠵᠤ ᠮᠠᠶᠢᠭ ᠣᠷᠣᠭᠠᠳ ᠪᠠᠢᠭᠰᠠᠨ ᠂ ᠰᠢᠯᠢᠷᠡᠭᠡᠳ ᠠᠷᠢᠯᠵᠠᠢ ᠳᠠ ! ᠬᠥᠭᠡᠷᠦᠬᠦᠢ ᠮᠢᠨᠢ ᠪᠣᠲᠣᠭᠣ ᠪᠠᠨ ᠲᠦᠯᠬᠢᠵᠦ ᠳᠡᠢᠯᠳᠡᠭ ᠪᠣᠯᠪᠠ ᠤᠤ ? ᠂ ᠶᠠᠪᠤᠵᠤ ᠮᠥᠷ ᠤᠯᠠ ᠶ᠋ᠢ ᠨᠢ ᠣᠯᠵᠤ ᠠᠪᠴᠢᠷᠠᠬᠤ ᠦᠭᠡᠢ ᠪᠣᠯ ᠬᠡᠴᠡᠭᠦᠳᠡᠬᠦ ᠪᠣᠢ ᠃
—ᠬᠠᠷᠢᠨ ᠭᠡᠮ ᠂ ᠲᠡᠭᠡᠪᠡᠯ ᠪᠢ ᠯᠡ ᠶᠠᠪᠤᠬᠤ ᠠ᠋ᠴᠠ ᠂ ᠲᠦᠷᠭᠡᠨ ᠮᠣᠷᠳᠠᠬᠤ ᠦᠭᠡᠢ ᠪᠣᠯ ᠡᠨᠡ ᠮᠢᠬᠠᠨ ᠰᠡᠭᠦᠯ ᠪᠣᠰᠤᠭᠠᠳ ᠵᠢᠭᠤᠲᠠᠴᠢᠬᠠᠪᠠᠯ ᠡᠷᠢᠯ ᠳ᠋ᠦ᠍ ᠶᠠᠪᠤᠬᠤ ᠳ᠋ᠤ᠌ ᠬᠠᠷᠢᠨ ᠰᠠᠭᠠᠳ ᠪᠣᠯᠤᠨᠠ ᠃
— ᠬᠥᠶᠢ ᠂ ᠪᠢ ᠰᠡᠷᠡᠭᠰᠡᠨ ᠰᠢᠦ ᠂ ᠨᠠᠮᠠ ᠶ᠋ᠢ ᠣᠷᠬᠢᠬᠤ ᠦᠭᠡᠢ ᠰᠢᠦ !
—ᠠ᠋ ᠂ ᠮᠢᠨᠦ ᠮᠠᠭᠤ ᠬᠦᠦ ᠂ ᠦᠭᠡᠢ ᠂ ᠴᠢ ᠴᠢᠨᠢ ᠳᠠᠰᠬᠠᠯ ᠳᠠᠭᠠᠭᠠᠯᠭᠠᠪᠤᠷᠢ ᠲᠠᠢ ᠭᠡᠰᠡᠨ ᠪᠢᠰᠢ ᠤᠤ !
— ᠬᠢᠴᠢᠬᠡᠭᠰᠡᠨ ᠂ ᠡᠪᠦᠭᠡ ᠶ᠋ᠢ ᠳᠠᠭᠠᠵᠤ ᠨᠢᠯᠬᠠ ᠪᠣᠲᠣᠭᠣ ᠦᠵᠡᠮᠡᠷ ᠪᠠᠢᠨᠠ ᠃
—ᠵᠠ ᠵᠠ ᠂ ᠮᠢᠨᠦ ᠤᠨᠤᠳᠠᠭ ᠴᠠᠪᠢᠳᠠᠷ ᠬᠦᠷᠡᠩ ᠠᠭᠠᠰᠢ ᠲᠠᠢ ᠵᠣᠯᠢᠭ ᠪᠠᠢᠭᠠ ᠶᠤᠮ ᠂ ᠡᠮᠡᠭᠡ ᠶ᠋ᠢᠨ ᠴᠢᠨᠢ 《ᠲᠣᠷᠭᠠᠨ ᠬᠠᠮᠠᠷ 》 ᠢ᠋ ᠨᠢ ᠲᠣᠬᠣᠰᠢᠯᠠᠭᠠᠳ ᠬᠣᠶᠠᠭᠤᠯᠠ ᠰᠤᠨᠳᠠᠯᠠᠳᠠᠵᠤ ᠦᠵᠡᠶᠡ᠃
— ᠬᠥᠶᠢ ᠂ ᠬᠡᠦᠬᠡ ᠠ᠋ ᠡᠪᠦᠭᠡ ᠪᠡᠨ ᠳᠠᠭᠠᠨᠠ ᠳᠠᠭᠠᠨᠠ ᠭᠡᠵᠦ ᠤᠷᠪᠠᠢᠵᠤ ᠪᠠᠢᠵᠤ ᠭᠠᠷᠴᠤ ᠢᠷᠡᠴᠢᠬᠡᠭᠡᠳ ᠲᠠ ᠬᠠᠷᠢᠨ ᠪᠡᠯᠴᠢᠭᠡᠷ ᠦ᠋ᠨ ᠵᠠᠬᠠ ᠴᠤ᠌ ᠬᠦᠷᠬᠦ ᠦᠭᠡᠢ ᠤᠨᠲᠠᠴᠢᠬᠠᠬᠤ ᠶᠤᠮ ᠪᠣᠯ ᠭᠠᠷᠴᠤ ᠢᠷᠡᠭᠰᠡᠨ ᠦ᠌ ᠬᠡᠷᠡᠭ ᠶᠠᠭᠤ ᠪᠠᠢᠬᠤᠪ ᠃
— ᠵᠠ᠂ ᠰᠡᠷᠡᠴᠢᠬᠡᠪᠡ ᠤᠤ ? ᠲᠡᠷᠡ ᠬᠠᠢᠯᠠᠰᠤᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠶᠠᠭᠤ ᠪᠠᠢᠨᠠ ? ᠠᠶᠠᠷᠬᠠᠨ ᠳᠥᠭᠥᠶᠡ ᠃
—ᠡᠬᠡ ᠠᠮᠢᠲᠠᠨ ᠴᠢᠨᠢ ᠦᠷᠡ ᠵᠤᠯᠵᠠᠭᠠ ᠪᠠᠨ ᠬᠠᠷᠠᠮᠯᠠᠳᠠᠭ ᠶᠤᠮ ᠃
—ᠨᠢᠯᠬᠠ ᠪᠣᠲᠣᠭᠣ ᠪᠠᠨ ᠬᠠᠶᠠᠴᠢᠬᠠᠭᠠᠳ ᠲᠡᠰᠢᠴᠢᠬᠡᠳᠡᠭ ᠡᠨᠡ ᠶᠣᠰᠣᠲᠠᠢ ᠮᠠᠭᠤ ᠲᠡᠮᠡᠭᠡ ᠪᠠᠢᠨᠠ ᠳᠠ ᠂ ᠡᠪᠦᠭᠡ ᠠ᠋ !
—ᠬᠡᠦᠬᠡ ᠠ᠋ ᠂ ᠬᠣᠶᠠᠭᠤᠯᠠ ᠪᠠᠨ ᠡᠨᠳᠡ ᠡᠴᠡ ᠬᠣᠯᠠᠳᠠᠶᠠ ᠂ ᠡᠨᠡ ᠮᠠᠭᠤ ᠬᠦᠷᠡᠩ ᠭᠤᠨᠵᠢ ᠬᠥᠮᠦᠨ ᠡᠴᠡ ᠪᠣᠲᠣᠭᠣ ᠪᠠᠨ ᠬᠠᠷᠠᠮᠯᠠᠵᠤ ᠪᠠᠢᠭᠠ ᠤᠬᠠᠭᠠᠨ ᠨᠢ ᠂ ᠪᠢᠳᠡᠨ ᠢ᠋ ᠬᠣᠯᠠᠳᠠᠮᠠᠭᠴᠠ ᠯᠠ ᠲᠡᠰᠢᠭᠡᠳ ᠢᠷᠡᠨᠡ ᠂ ᠲᠡᠷᠡ ᠪᠤᠴᠠᠭᠠᠳ ᠢᠷᠡᠵᠦ ᠪᠠᠢᠭᠠ ᠪᠢᠵᠡ ᠃
—ᠵᠠ ᠵᠠ ᠂ ᠬᠣᠶᠠᠷ ᠶᠠᠰᠤ ᠮᠡᠨᠳᠦ ᠰᠠᠯᠤᠭᠰᠠᠨ ᠨᠢ ᠶᠠᠭᠠᠬᠢᠮᠤᠢ ᠂ ᠪᠦᠷ ᠰᠡᠳᠬᠢᠯ ᠠᠮᠠᠷᠠᠯᠠ ᠃
ᠭᠤᠸᠠ ᠭᠤᠸᠠ —
—ᠵᠠ ᠂ ᠡᠨᠡ ᠬᠡᠷᠢᠶᠡ ᠰᠡᠷᠵᠢᠮ ᠭᠠᠷᠤᠭᠰᠠᠨ ᠤᠤ ᠶᠠᠭᠠᠬᠢᠭᠰᠠᠨ ᠶᠤᠮ ᠂ ᠨᠢᠭᠡ ᠯᠡ ᠶᠠᠭᠤᠮᠠ ᠬᠡᠯᠡᠭᠡᠳ ᠪᠠᠢᠨᠠ ᠳᠠ᠂ ᠰᠠᠢᠨ ᠶᠠᠭᠤᠮᠠ ᠦᠵᠡᠭᠦᠯᠬᠦ ᠦᠭᠡᠢ ᠪᠣᠢ !
— ᠡᠪᠦᠭᠡ ᠠ᠋ ! ᠦᠵᠡᠶᠡ ᠂ ᠦᠵᠡᠶᠡ ! ᠡᠪᠦᠭᠡ ᠠ᠋ ᠂
ᠶᠠᠪᠤᠶᠠ ᠯᠠ ᠳᠠ ᠃
— ᠵᠧ ᠂ ᠰᠠᠶᠢ ᠭᠠᠷᠴᠤ ᠶᠠᠪᠤᠨᠠ ᠃ ᠲᠡᠷᠡ ᠬᠠᠪᠢ ᠳ᠋ᠤ᠌ ᠯᠠ ᠨᠢᠭᠡ ᠶᠠᠭᠤᠮᠠ ᠪᠠᠢᠨᠠ ᠳᠠ᠃ ᠠ᠋ ᠂ ᠬᠥᠭᠡᠷᠦᠬᠦᠢ ! ᠵᠡᠭᠡᠷᠡ ᠶᠢᠨ ᠢᠨᠵᠠᠭᠠ ᠬᠠᠷᠠᠴᠢᠬᠠᠵᠠᠢ ᠃ ᠡᠨᠡ ᠬᠡᠷᠢᠶᠡ ᠵᠢᠭᠠᠵᠤ ᠥᠭᠭᠦᠭᠡ ᠦᠭᠡᠢ ᠪᠣᠯ ᠴᠢ ᠪᠢᠳᠡ ᠬᠣᠶᠠᠷ ᠪᠠᠢᠲᠤᠭᠠᠢ ᠬᠡᠭᠡᠷᠡ ᠶᠢᠨ ᠠᠷᠢᠶᠠᠲᠠᠨ ᠴᠤ᠌ ᠣᠯᠵᠤ ᠦᠵᠡᠳᠡᠭ ᠦᠭᠡᠢ ᠶᠦᠮ ᠳᠡ᠃ ᠴᠢ ᠳᠥᠭᠥᠭᠡᠳ ᠦᠵᠡ ᠳᠡ᠃ ᠴᠢᠮᠠ ᠲᠠᠢ ᠬᠠᠷᠠᠴᠠ ᠲᠤᠯᠭᠠᠷᠠᠪᠠᠯ ᠪᠣᠰᠴᠤ ᠵᠢᠭᠤᠲᠠᠨᠠ᠂ ᠦᠭᠡᠢ ᠪᠣᠯ ᠴᠠᠭᠠᠳᠤᠬᠢ ᠴᠢᠨᠢ ᠪᠠᠷᠰ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠭᠢᠰᠬᠢᠵᠦ ᠪᠠᠢᠭᠰᠠᠨ ᠴᠤ᠌ ᠪᠣᠰᠬᠤ ᠦᠭᠡᠢ᠃ ᠲᠠᠱ — ᠲᠠᠱ —
ᠠ— ᠰᠢᠪᠠᠭᠤ ᠮᠢᠨᠢ ᠨᠢᠯᠬᠠ ᠠᠮᠢᠲᠠᠨ ᠢ᠋ ᠵᠢᠭᠠᠵᠤ ᠥᠭᠴᠦ ᠪᠠᠷᠢᠭᠤᠯᠬᠤ ᠶᠠᠮᠠᠷ ᠰᠠᠢᠨ ᠪᠠᠢᠬᠤᠪ ᠂ ᠵᠢᠰᠦ ᠴᠢᠨᠢ ᠬᠠᠷᠠ ᠴᠤ᠌ ᠰᠡᠳᠬᠢᠯ ᠴᠢᠨᠢ ᠴᠠᠭᠠᠨ ᠪᠠᠢᠭ ! ᠥᠭᠡᠷᠡ ᠬᠣᠭᠣᠯᠠ ᠣᠯᠵᠤ ᠢᠳᠡ ᠳᠠ !
— ᠡᠪᠦᠭᠡ ᠠ᠋ ᠂ ᠨᠠᠭᠠᠳᠤ ᠰᠢᠪᠠᠭᠤ ᠴᠢᠨᠢ ᠣᠢᠯᠠᠭᠠᠳᠠᠭ ᠶᠤᠮ ᠤᠤ ?
—ᠰᠠᠢᠨ ᠣᠢᠯᠠᠭᠠᠯ ᠦᠭᠡᠢ ᠶᠠᠭᠠᠬᠢᠬᠤᠪ ᠂ ᠮᠠᠭᠤ ᠬᠡᠯᠡᠵᠦ ᠵᠠᠩᠨᠠᠪᠠᠯ ᠪᠦᠷ ᠥᠰᠢᠶᠡᠷᠬᠡᠨᠡ ᠪᠢᠵᠡ ! ᠬᠣᠶᠠᠭᠤᠯᠠ ᠪᠠᠨ ᠪᠣᠲᠣᠭᠣᠯᠠᠭᠰᠠᠨ ᠭᠤᠨᠵᠢ ᠤᠷᠤᠭᠤ ᠪᠠᠨ ᠳᠥᠭᠥᠶᠡ ᠳᠡ !
— ᠡᠵᠢ ᠨᠢ ᠡᠨᠡ ᠢᠨᠵᠠᠭᠠ ᠶ᠋ᠢ ᠶᠠᠭᠠᠬᠢᠵᠤ ᠣᠯᠳᠠᠭ ᠪᠠᠢᠨᠠ ᠡᠪᠦᠭᠡ ᠠ᠋ !
— ᠣᠷᠣᠢ ᠪᠦᠷᠦᠢ ᠪᠡᠷ ᠢᠷᠡᠭᠡᠳ ᠯᠡ ᠬᠡᠳᠦ ᠬᠡᠳᠦ ᠳᠤᠤᠭᠠᠷᠬᠤ ᠪᠠᠷ ᠯᠠ ᠪᠣᠰᠤᠭᠠᠳ ᠪᠠᠢᠨᠠ᠃ ᠣᠷᠬᠢᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ ᠶᠡᠬᠡ ᠬᠣᠯᠠᠳᠠᠬᠤ ᠦᠭᠡᠢ ᠪᠡᠨ ᠮᠡᠳᠡᠨᠡ ᠲᠡᠷᠡ ᠴᠢᠨᠢ ᠂
—ᠥ ᠲᠡᠢᠮᠦ ᠤᠤ !
ᠸᠠ ᠦ —
— ᠡᠪᠦᠭᠡ ᠠ᠋ ᠰᠠᠶᠢ ᠶᠠᠭᠤᠨ ᠰᠢᠪᠠᠭᠤ ᠶᠠᠭᠠᠬᠢᠭᠠᠳ ᠪᠠᠢᠭᠰᠠᠨ ᠪᠣᠢ ?
— ᠠ ᠂ ᠲᠡᠷᠡ ᠰᠢᠪᠠᠭᠤ ᠶ᠋ᠢ ᠴᠢᠨᠢ ᠲᠣᠭᠣᠳᠠᠭ ᠭᠡᠳᠡᠭ ᠶᠦᠮ ᠃ ᠡᠮᠡᠭᠡ ᠶᠢᠨ ᠴᠢᠨᠢ ᠲᠣᠭᠣᠳᠠᠭ ᠯᠠ ᠳᠠ !
— ᠡᠮᠡᠭᠡ ᠶᠢᠨ ᠲᠣᠭᠣᠳᠠᠭ ᠠ᠋ ? ᠶᠠᠭᠠᠬᠢᠬᠤ ᠪᠠᠷ ᠢ᠋ᠶ᠋ᠠᠨ ᠡᠮᠡᠭᠡ ᠶᠢᠨ ᠲᠣᠭᠣᠳᠠᠭ ᠪᠣᠯᠳᠠᠭ ᠶᠤᠮ ?
—ᠬᠠᠢ ᠂ ᠬᠡᠨ ᠮᠡᠳᠡᠯᠡ ᠂ ᠡᠮᠡᠭᠡ ᠴᠢᠨᠢ ᠯᠡ ᠮᠢᠨᠦ ᠲᠣᠭᠣᠳᠠᠭ ᠂ ᠮᠢᠨᠦ ᠲᠣᠭᠣᠳᠠᠭ ᠯᠠ ᠭᠡᠳ ᠪᠠᠢᠳᠠᠭ ᠶᠤᠮ ᠃ ᠪᠠᠰᠠ ᠴᠤ᠌ ᠦᠨᠡᠨ ᠶᠦᠮ ᠤᠤ ᠳᠠ ! ᠡᠮᠡᠭᠡ ᠴᠢᠨᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠲᠡᠮᠡᠭᠡ ᠤᠰᠤᠯᠠᠪᠠᠯ ᠲᠡᠷᠡ ᠬᠣᠶᠠᠷ ᠲᠣᠭᠣᠳᠠᠭ ᠠᠶᠤᠵᠤ ᠰᠣᠴᠢᠬᠤ ᠴᠤ᠌ ᠦᠭᠡᠢ ᠲᠡᠮᠡᠭᠡ ᠲᠡᠢ ᠴᠣᠭ ᠣᠩᠭᠣᠴᠠᠨ ᠠ᠋ᠴᠠ ᠤᠰᠤ ᠤᠤᠭᠤᠭᠠᠳ ᠶᠠᠪᠤᠳᠠᠭ ᠭᠡᠰᠡᠨ ᠂ ᠲᠣᠭᠣᠳᠠᠭ ᠴᠢᠨᠢ ᠶᠡᠬᠡ ᠰᠣᠷᠭᠣᠭ ᠂ ᠬᠥᠮᠦᠨ ᠣᠢᠷᠠᠳᠪᠠᠯ ᠦᠨᠡᠬᠡᠷ ᠯᠡ ᠳᠡ ᠂ ᠬᠡᠨ ᠬᠣᠣᠷ ᠬᠦᠷᠭᠡᠬᠦ ᠦᠭᠡᠢ ᠡᠭᠡᠯᠢᠲᠡᠢ ᠶ᠋ᠢ ᠮᠡᠳᠡᠭᠡᠳ ᠪᠠᠢᠳᠠᠭ ᠤᠬᠠᠭᠠᠯᠢᠭ ᠰᠢᠪᠠᠭᠤ ᠶᠤᠮ ᠯᠠ ᠳᠠ !
—ᠲᠡᠭᠡᠪᠡᠯ ᠲᠡᠷᠡ ᠬᠣᠶᠠᠷ ᠲᠣᠭᠣᠳᠠᠭ ᠶᠠᠭᠠᠬᠢᠭᠠᠳ ᠲᠡᠮᠡᠭᠡ ᠨᠦ᠍ᠭᠦᠳ ᠦ᠋ᠨ ᠡᠮᠦᠨᠡ ᠬᠣᠢᠨᠠ ᠨᠢ ᠨᠢᠰᠬᠦ ᠴᠦ᠍ ᠦᠭᠡᠢ ᠬᠣᠯᠠᠳᠠᠬᠤ ᠴᠤ᠌ ᠦᠭᠡᠢ ᠨᠠᠪᠰᠠᠭᠠᠨᠠᠭᠠᠳ ᠪᠠᠢᠳᠠᠭ ᠶᠤᠮ ᠳᠠ ?
— ᠥᠨᠳᠡᠭᠡ ᠨᠢ ᠮᠥᠨ ᠲᠡᠷᠡ ᠠᠪᠳᠠᠷᠠ ᠰᠢᠭ᠋ ᠬᠥᠬᠡ ᠬᠠᠳᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠪᠠᠢᠭᠠ ᠶᠤᠮ ᠪᠠᠢᠬᠤ ᠨᠢ᠂ ᠲᠡᠮᠡᠭᠡ ᠨᠦ᠍ᠭᠦᠳ ᠢᠳᠡᠰᠢᠯᠡᠵᠦ ᠶᠠᠪᠤᠭᠰᠠᠭᠠᠷ ᠲᠡᠷᠡ ᠣᠷᠣᠢ ᠳᠡᠭᠡᠷᠡ ᠭᠠᠷᠤᠮᠠᠷ ᠪᠣᠯᠬᠤ ᠪᠠᠷ ᠨᠢ ᠡᠨᠡ ᠲᠣᠭᠣᠳᠠᠭ ᠤ᠋ᠳ ᠬᠣᠯᠠᠳᠠᠭᠤᠯᠵᠤ ᠪᠠᠢᠭᠠ ᠨᠢ ᠲᠡᠷᠡ ᠃ ᠶᠡᠷᠦ ᠨᠢ ᠰᠢᠪᠠᠭᠤᠳ ᠰᠢᠷᠬᠠᠳᠤᠭᠰᠠᠨ ᠶᠤᠮ ᠰᠢᠭ᠋ ᠳᠠᠯᠠᠪᠴᠢ ᠪᠠᠨ ᠴᠢᠷᠴᠦ ᠭᠦᠶᠦᠭᠰᠡᠭᠡᠷ ᠡᠭᠦᠷ ᠡᠴᠡ ᠠᠷᠢᠶᠠᠲᠠᠨ ᠢ᠋ ᠬᠣᠯᠠᠳᠠᠭᠤᠯᠳᠠᠭ ᠯᠠ ᠳᠠ ! ᠥᠨᠳᠡᠭᠡ ᠵᠤᠯᠵᠠᠭᠠ ᠪᠠᠨ ᠬᠠᠢᠷᠠᠯᠠᠬᠤ ᠦᠭᠡᠢ ᠠᠮᠢᠲᠠᠨ ᠭᠡᠵᠦ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠪᠠᠢᠬᠤ ᠶᠣᠰᠣ ᠦᠭᠡᠢ ᠃ ᠵᠠ ᠲᠡᠭᠡᠭᠡᠳ ᠶᠠᠭᠤ ᠴᠤ᠌ ᠭᠡᠰᠡᠨ ᠮᠠᠭᠤ ᠰᠠᠢᠨ ᠲᠡᠮᠡᠭᠡᠳ ᠢ᠋ ᠬᠠᠭᠤᠷᠤᠭᠠᠳ ᠴᠢᠳᠠᠴᠢᠬᠠᠯᠠ ᠃ ᠬᠠ ᠬᠠ — ᠬᠠ ᠬᠠ —
— ᠬᠠᠯᠲᠠᠷ ᠵᠤᠰᠠᠭ ᠮᠢᠨᠢ ᠢᠷᠡᠭᠰᠡᠨ ᠦᠭᠡᠢ ᠂ ᠬᠡᠭᠡᠷᠡ ᠢᠰᠢᠭᠡᠯᠡᠭᠡᠳ ᠬᠣᠴᠣᠷᠴᠢᠬᠠᠬᠤ ᠰᠢᠭ᠋ ᠪᠣᠯᠤᠯᠠ ᠃ ᠢᠰᠢᠭᠡ ᠶ᠋ᠢ ᠨᠢ ᠠᠮᠢᠲᠠᠨ ᠢᠳᠡᠴᠢᠬᠡᠭᠰᠡᠨ ᠪᠠᠢᠬᠤ ᠪᠣᠢ ᠂ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠮᠥᠷ ᠢ᠋ᠶ᠋ᠡᠷ ᠨᠢ ᠶᠠᠪᠤᠭᠠᠳ ᠢᠷᠡᠶᠡ ᠂ ᠶᠣ — ᠶᠣ ᠶᠣ — ᠶᠣ —
— ᠡᠮᠡᠭᠡ ᠠ᠋ ᠂ ᠪᠢ ᠴᠣᠭ ᠶᠠᠪᠤᠶᠠ ᠂
—ᠲᠡᠭᠡ ᠠ᠋ ᠂ ᠲᠡᠭᠡ ᠬᠡᠳᠦᠨ ᠠᠭᠠᠷᠤᠤᠯ ᠡᠪᠦᠷᠲᠦᠯᠡᠭᠡᠳ ᠠᠪ ᠂ ᠬᠦᠯᠬᠦᠵᠦ ᠶᠠᠪᠤᠪᠠᠯ ᠥᠯᠥᠰᠴᠦ ᠴᠠᠩᠭᠠᠬᠤ ᠦᠭᠡᠢ ᠃ ᠮᠠᠢ — ᠮᠠᠢ —
— ᠬᠥᠭᠡᠷᠦᠬᠦᠢ ᠂ ᠮᠠᠭᠤ ᠬᠠᠯᠲᠠᠷ ᠮᠢᠨᠢ ᠡᠨᠳᠡ ᠪᠠᠢᠨᠠ ᠂ ᠢᠰᠢᠭᠡ ᠪᠡᠨ ᠰᠠᠢᠬᠠᠨ ᠴᠠᠳᠬᠠᠴᠢᠬᠠᠵᠠᠢ ᠃
— ᠬᠥᠶᠢ ᠂ ᠬᠡᠦᠬᠡ ᠠ᠋ ᠂ ᠡᠨᠡ ᠡᠵᠡᠭᠦᠢ ᠭᠣᠪᠢ ᠭᠠᠵᠠᠷ ᠶᠠᠭᠤ ᠪᠠᠨ ᠦᠵᠡᠴᠢᠬᠡᠭᠡᠳ ᠲᠡᠭᠡᠲᠡᠯᠡ ᠪᠡᠨ ᠰᠠᠯᠵᠤ ᠬᠠᠭᠠᠴᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠴᠢᠬᠠᠪᠠ ?
—ᠦᠨᠡᠭᠡ ᠂ ᠡᠮᠡᠭᠡ ᠠ᠋ ᠂ ᠵᠣᠭᠰᠣᠭᠠᠷᠠᠢ ! ᠡᠮᠡᠭᠡ ᠠ᠋ ᠦᠨᠡᠭᠡ ᠲᠡᠷᠡ ᠬᠠᠳᠠᠨ ᠠ᠋ᠴᠠ ᠨᠢᠭᠡ ᠶᠠᠭᠤᠮᠠ ᠪᠥᠮᠪᠥᠷᠢᠭᠦᠯᠦᠭᠡᠳ ᠬᠠᠶᠠᠴᠢᠬᠠᠬᠤ ᠰᠢᠭ᠋ ᠪᠣᠯᠤᠯᠠ ᠂ ᠶᠠᠭᠤ ᠶᠤᠮ ᠪᠣᠯ ᠠ᠋ ?
—ᠢᠰᠢ ᠴᠠᠪᠠᠰᠤ ! ᠲᠡᠷᠡ ᠮᠠᠭᠤ ᠴᠢᠨᠢ ᠲᠣᠭᠣᠳᠠᠭ ᠤ᠋ᠨ ᠮᠢᠨᠢ ᠥᠨᠳᠡᠭᠡ ᠶ᠋ᠢ ᠥᠩᠬᠥᠷᠢᠭᠦᠯᠵᠡᠢ ᠳᠡ ᠃ ᠪᠦᠲᠦᠨ ᠪᠠᠢᠬᠤ ᠵᠠᠶᠠᠭᠠ ᠪᠠᠢᠬᠤ ᠨᠢ ᠤᠤ ? ᠣᠴᠢᠵᠤ ᠦᠵᠡᠶᠡ ᠃
—ᠦᠨᠡᠭᠡ ᠭᠡᠳᠡᠭ ᠴᠢᠨᠢ ᠲᠣᠭᠣᠳᠠᠭ ᠤ᠋ᠨ ᠥᠨᠳᠡᠭᠡᠨ ᠳ᠋ᠦ᠍ ᠴᠣᠬᠣᠮ ᠳᠤᠷᠠᠲᠠᠢ ᠠᠮᠢᠲᠠᠨ ᠂ ᠭᠡᠬᠦ ᠳ᠋ᠦ᠍ ᠪᠡᠨ ᠲᠣᠭᠣᠳᠠᠭ ᠤ᠋ᠨ ᠥᠨᠳᠡᠭᠡ ᠨᠢ ᠰᠦᠷᠡᠬᠡᠢ ᠬᠠᠲᠠᠭᠤ ᠡᠳ᠋ ᠪᠣᠯᠬᠣᠷ ᠦᠨᠡᠭᠡ ᠬᠡᠳᠦᠢ ᠳᠤᠷᠠᠲᠠᠢ ᠪᠣᠯᠪᠠᠴᠤ ᠶᠠᠭᠠᠬᠢᠵᠤ ᠴᠤ᠌ ᠬᠠᠵᠠᠵᠤ ᠮᠠᠭᠠᠵᠢᠭᠠᠳ ᠴᠤ᠌ ᠬᠠᠭᠠᠯᠵᠤ ᠪᠠᠯᠪᠠᠯᠠᠵᠤ ᠳᠡᠢᠯᠬᠦ ᠶᠠᠭᠤᠮᠠ ᠪᠢᠰᠢ ᠃ ᠲᠡᠭᠡᠬᠦ ᠪᠡᠷ ᠦᠨᠡᠭᠡ ᠴᠢᠨᠢ ᠪᠠᠰᠠ ᠠᠷᠭᠠ ᠲᠠᠢ ᠶᠠᠭᠤᠮᠠ ᠪᠣᠯᠬᠣᠷ ᠢ᠋ᠶ᠋ᠠᠨ ᠲᠣᠭᠣᠳᠠᠭ ᠤ᠋ᠨ ᠥᠨᠳᠡᠭᠡ ᠶ᠋ᠢ ᠥᠨᠳᠥᠷ ᠳᠡᠭᠡᠷᠡ ᠡᠴᠡ ᠥᠩᠬᠥᠷᠢᠭᠦᠯᠵᠦ ᠪᠠᠢᠭᠰᠠᠭᠠᠷ ᠮᠣᠳᠣ ᠴᠢᠯᠠᠭᠤᠨ ᠳ᠋ᠤ᠌ ᠮᠥᠷᠭᠥᠭᠦᠯᠵᠦ ᠨᠢᠴᠠᠯᠤᠭᠠᠳ ᠳᠣᠯᠢᠶᠠᠴᠢᠬᠠᠳᠠᠭ ᠃ ᠥᠨᠳᠡᠭᠡ ᠪᠡᠨ ᠣᠯᠬᠤ ᠨᠢ ᠴᠦ᠍ ᠣᠯᠴᠢᠬᠠᠯᠠ ᠃ ᠣᠳᠣ ᠬᠠᠷᠢᠨ ᠶᠠᠭᠠᠬᠢᠵᠤ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠢᠬᠤ ᠦᠭᠡᠢ ᠰᠢᠭ ᠡᠭᠦᠷ ᠲᠦ᠍ ᠨᠢ ᠠᠪᠠᠴᠢᠳᠠᠭ ᠪᠢᠯᠡ !
ᠴᠢᠪ ᠪᠠᠢ ! ᠬᠥᠮᠦᠨ ᠦ᠌ ᠦᠨᠦᠷ ᠣᠷᠣᠪᠠᠯ ᠭᠣᠯᠣᠭᠠᠳ ᠬᠠᠶᠠᠴᠢᠬᠠᠳᠠᠭ ᠶᠤᠮ ᠰᠢᠦ ᠳᠡ!
— ᠡᠮᠡᠭᠡ ᠠ᠋ ! ᠡᠮᠡᠭᠡ ᠠ᠋ ᠂ ᠬᠠᠷᠠᠭᠠᠴᠢ !
—ᠦ ! ᠬᠥᠭᠡᠷᠦᠬᠦᠢ ! ᠮᠢᠨᠦ ᠬᠣᠶᠠᠷ ᠲᠣᠭᠣᠳᠠᠭ ᠮᠠᠨᠤᠰ ᠲᠤ᠌ ᠶᠣᠰᠣᠲᠠᠢ ᠰᠠᠢᠨ ᠶᠠᠭᠤᠮᠠ ᠪᠣᠯᠤᠯᠠ ᠭᠡᠳ ᠮᠥᠷᠭᠥᠵᠦ ᠪᠠᠢᠨᠠ ᠰᠢᠦ ᠳᠡ !
—ᠮᠢᠨᠦ ᠬᠦᠦ ! ᠭᠣᠪᠢ ᠴᠢᠨᠢ ᠪᠠᠰᠠ ᠯᠠ ᠴᠢᠨᠦ ᠨᠢᠭᠡ ᠤᠩᠰᠢᠵᠤ ᠰᠤᠳᠤᠯᠬᠤ ᠨᠣᠮ ᠶᠤᠮ ᠰᠢᠦ ᠳᠡ !