ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ - 6 Эрдэнэ тунамал нэрт судар оршив - 6
306ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ - 6
ᠬᠤᠯᠤᠭᠠᠨᠠ ᠵᠢᠯ ① ᠦ᠋ᠨ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠥᠯᠵᠡᠢ ᠲᠤ ᠰᠠᠢᠨ ᠡᠳᠦᠷ ᠲᠣᠷ ᠂
ᠬᠤᠪᠢᠲᠤ ᠰᠳ᠋ᠡᠨ᠌ᠨᠯᠤᠩ ᠨᠠᠩᠰᠤ ᠂ ᠳᠠᠶᠤᠨ ᠬᠢᠶᠡ ᠬᠣᠶᠠᠭᠤᠯᠠ ᠶ᠋ᠢ ᠂
ᠬᠠᠷᠢᠨ ᠪᠠᠰᠠ ᠮᠣᠩᠭᠣᠯ ᠳ᠋ᠤᠷ ᠤᠷᠤᠭ᠍ᠰᠢᠯᠠᠭᠤᠯᠵᠤ ᠵᠡᠳᠬᠡᠷ ᠢ᠋ ᠠᠮᠤᠷᠯᠢᠭᠤᠯᠤᠭᠠᠳ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤᠷ ᠂
ᠭᠤᠷᠪᠠᠨ ᠡᠷᠳᠡᠨᠢᠰ ᠦ᠋ᠨ ᠢᠪᠡᠭᠡᠯ ᠦ᠋ᠨ ᠬᠦᠴᠦᠨ ᠢ᠋ᠶ᠋ᠡᠷ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠳ᠋ᠤᠷ ᠬᠦᠷᠦᠭᠰᠡᠨ ᠳ᠋ᠦ᠍ᠷ ᠂
ᠠᠯᠲᠠᠨ ᠬᠠᠭᠠᠨ ᠠᠷᠢᠭᠤᠨ ᠲᠦᠷᠦᠯᠬᠢᠳᠦ ᠵᠥᠩᠭᠢᠨ ᠬᠠᠲᠤᠨ ᠬᠣᠶᠠᠷ ᠤ᠋ᠨ ᠭᠡᠭᠡᠨᠡ ᠵᠣᠯᠭᠠᠵᠤ ᠪᠦᠷ ᠦ᠋ᠨ ᠂
ᠠᠳᠠᠯᠢᠳᠬᠠᠰᠢ ᠦᠭᠡᠢ ᠪᠤᠶᠠᠨ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠰᠢᠲᠦᠭᠡᠨ ᠦ᠌ ᠪᠡᠯᠡᠭ ᠬᠢᠭᠡᠳ ᠢ᠋ ᠂
ᠠᠷᠢᠭᠤᠨ ᠪᠤᠷᠬᠠᠨ ᠨᠣᠮ ᠸᠴᠢᠷ ᠲᠦ᠍ ᠵᠠᠩᠭᠢᠶᠠ ᠲᠡᠷᠢᠭᠦᠲᠡᠨ ᠡᠯᠳᠡᠪ ᠡᠷᠳᠡᠨᠢᠰ ᠦ᠋ᠨ ᠪᠠᠯᠠᠩ ᠦ᠋ᠳ ᠢ᠋
ᠠᠪᠤᠭᠠᠳ ᠬᠠᠭᠠᠨ ᠬᠠᠲᠤᠨ ᠳ᠋ᠤᠷ ᠡᠷᠭᠦᠵᠦ ᠪᠠᠷᠢᠭᠠᠳ ᠥᠴᠢᠨ ᠠᠢᠯᠠᠳᠬᠠᠪᠠᠢ ᠃
ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠡᠨᠡ ᠵᠦᠭ ᠲᠦ᠍ᠷ ᠥᠭᠡᠳᠡ ᠪᠣᠯᠤᠶᠠ ᠭᠡᠮᠡᠨ ᠨᠢᠭᠦᠯᠡᠰᠦᠭᠰᠡᠨ ᠢ᠋ ᠂
ᠭᠠᠢᠬᠠᠮᠰᠢᠭ᠋ ᠪᠢᠬᠠᠷ ᠬᠠᠭᠠᠨ ᠤᠳᠤᠷᠢᠭᠤᠯᠰᠤᠨ ᠦᠵᠦᠭᠦᠯᠦᠭᠰᠡᠨ ᠢ᠋ ᠂
ᠭᠠᠪᠢᠶᠠ ᠲᠤ ᠪᠤᠷᠰᠠᠩ ᠬᠤᠸᠠᠷᠠᠭ ᠤ᠋ᠳ ᠪᠦᠭᠦᠳᠡᠭᠡᠷ ᠳ᠋ᠠᠮᠯᠠᠨ ᠵᠥᠪᠰᠢᠶᠡᠯᠳᠦᠭᠰᠡᠨ ᠢ᠋ ᠂
ᠬᠠᠭᠠᠨ ᠬᠠᠲᠤᠨ ᠡᠬᠢᠯᠡᠨ ᠬᠠᠮᠤᠭ ᠶᠡᠬᠡ ᠪᠠᠭᠠ ᠨᠣᠶᠠᠳ ᠲᠤᠷ ᠪᠦᠷᠢᠨ ᠲᠡᠯᠭᠡᠷᠡᠩᠬᠦᠶᠡ ᠠᠢᠯᠠᠳᠬᠠᠭᠰᠠᠨ ᠲᠤᠷᠢ ᠂
ᠬᠣᠲᠠᠯᠠᠭᠠᠷ ᠬᠠᠭᠠᠨ ᠬᠠᠲᠤᠨ ᠬᠠᠮᠤᠭ ᠪᠦᠭᠦᠳᠡᠭᠡᠷ ᠪᠡᠶᠡᠰᠴᠦ ᠪᠦᠷᠦᠨ ᠂
— — — —
①ᠤᠯᠠᠭᠠᠨ ᠡᠷᠡ ᠬᠤᠯᠤᠭᠠᠨᠠ ᠵᠢᠯ ᠂ ᠸᠠᠨ ᠯᠢ ᠶ᠋ᠢᠨ ᠳᠥᠲᠥᠭᠡᠷ ᠣᠨ (1576 ᠣᠨ ) ᠃
ᠭᠤᠷᠪᠠᠨ ᠲᠦᠮᠡᠨ ᠡᠴᠡ ᠣᠷᠳᠣᠰ ᠤ᠋ᠨ ᠰᠡᠴᠡᠨ ᠨᠣᠶᠠᠨ᠂
ᠬᠠᠷᠠᠴᠢᠨ ᠤ᠋ ᠬᠥᠨᠳᠡᠯᠡᠨ ᠬᠠᠭᠠᠨ ①᠂ ᠶᠤᠩᠰᠢᠶᠠᠪᠤ ᠶ᠋ᠢᠨ ᠳᠠᠢᠴᠢᠩ ᠨᠣᠶᠠᠨ ᠡᠬᠢᠯᠡᠨ᠂
ᠬᠤᠷᠠᠵᠤ ᠴᠢᠭᠤᠯᠤᠭᠠᠳ ᠵᠥᠪᠰᠢᠶᠡᠯᠳᠦᠵᠦ ᠂ ᠴᠠᠪᠴᠢᠶᠠᠯ ᠤ᠋ᠨ ᠰᠦᠮᠡ ᠳ᠋ᠦ᠍ᠷ ᠵᠣᠯᠭᠠᠬᠤ ᠪᠥᠭᠡᠰᠦ ᠂
ᠬᠣᠳᠣᠭ ᠲᠤ ᠳᠠᠯᠠᠢ ᠯᠠᠮᠠ ᠶ᠋ᠢ ᠤᠭᠲᠤᠭᠤᠯ ᠤ᠋ᠨ ᠪᠠᠰᠠ ᠪᠠᠷ ᠡᠨᠡ ᠡᠯᠴᠢᠰ ᠢ᠋ ᠤᠷᠢᠳ ᠶᠠᠪᠤᠭᠤᠯᠤᠷᠠ ᠬᠡᠮᠡᠯᠳᠦᠵᠦ ᠂
ᠨᠠᠩᠰᠤ ᠯᠠᠮᠠ ᠂ ᠳᠠᠶᠤᠨ ᠬᠢᠶᠡ ᠬᠣᠶᠠᠷ ᠲᠤᠷ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠰᠢᠲᠦᠭᠡᠨ ᠦ᠌ ᠪᠡᠯᠡᠭ ᠢ᠋ ᠂
ᠨᠡᠩ ᠦᠯᠡᠮᠵᠢ ᠵᠠᠭᠤᠨ ᠰᠢᠵᠢᠷ②ᠢ᠋ᠶ᠋ᠡᠷ ᠡᠭᠦᠳᠦᠭᠰᠡᠨ ᠠᠯᠲᠠᠨ ᠲᠠᠮᠠᠭᠠ ᠬᠢᠭᠡᠳ ᠢ᠋ ᠂
ᠨᠠᠷᠢᠨ ᠢ᠋ᠶ᠋ᠠᠷ ᠬᠢᠭᠰᠡᠨ ᠪᠠᠶᠠᠨ ᠤ᠋ ᠬᠤᠪᠴᠠᠳ ᠂ ᠠᠯᠲᠠᠨ ᠮᠥᠩᠭᠥᠨ ᠡᠳ᠋ ᠲᠠᠸᠠᠷ ᠣᠯᠠᠨ ᠲᠣᠭᠠᠲᠠᠨ ᠢ᠋ ᠂
ᠨᠠᠰᠤᠳᠠ ᠱᠠᠰᠢᠨ ᠢ᠋ ᠰᠠᠬᠢᠭᠴᠢ ᠪᠢᠬᠠᠷ ᠬᠠᠭᠠᠨ ᠳ᠋ᠤᠷ ᠪᠠᠶᠠᠨ ᠤ᠋ ᠴᠢᠮᠡᠭ ᠲᠠᠮᠠᠭᠠ ᠲᠡᠷᠢᠭᠦᠲᠡᠨ ᠪᠦᠷᠢᠨᠡ ᠂
ᠪᠠᠷᠠᠮᠢᠳ ᠥᠭᠯᠢᠭᠡ ᠲᠡᠷᠢᠭᠦᠲᠡᠨ ᠢ᠋ ᠪᠦᠷᠢᠳᠬᠡᠵᠦ ᠡᠯᠴᠢᠰ ᠲᠣᠷ ᠢ᠋ᠶ᠋ᠠᠨ ᠥᠭᠭᠥᠭᠡᠳ ᠂
ᠪᠠᠶᠠᠰᠬᠤᠯᠠᠩ ᠲᠤ ᠬᠠᠭᠠᠨ ᠬᠠᠲᠤᠨ ᠡᠬᠢᠯᠡᠨ ᠶᠡᠬᠡ ᠪᠠᠭᠠ ᠨᠣᠶᠠᠳ ᠪᠦᠭᠦᠳᠡᠭᠡᠷ ᠴᠢᠭᠤᠯᠤᠭᠠᠳ ᠂
— — — —
①ᠪᠠᠶᠠᠰᠬᠠᠯ ᠬᠥᠨᠳᠡᠯᠡᠨ ᠬᠠᠭᠠᠨ ᠪᠣᠯ ᠯᠦᠩ ᠴᠢᠩ ᠦ᠋ᠨ ᠵᠢᠷᠭᠤᠳᠤᠭᠠᠷ ᠣᠨ (1572 ) ᠲᠤ᠌ ᠨᠢᠭᠡᠨᠲᠡ ᠨᠠᠰᠤ ᠪᠠᠷᠠᠭᠰᠠᠨ ᠪᠢᠯᠡ ᠃ ᠡᠨᠡ ᠬᠦ᠌ ᠬᠥᠨᠳᠡᠯᠡᠨ ᠬᠠᠭᠠᠨ ᠭᠡᠳᠡᠭ ᠨᠢ ᠪᠠᠶᠠᠰᠬᠠᠯ ᠤ᠋ᠨ ᠠᠴᠢ ᠪᠠᠢᠬᠤᠨᠲᠠᠢ ᠪᠣᠯᠤᠨᠠ ᠃ ᠬᠢᠲᠠᠳ ᠪᠢᠴᠢᠭ ᠲᠦ᠍ 白洪大 ᠭᠡᠵᠦ ᠪᠢᠴᠢᠳᠡᠭ ᠃ ᠠᠰᠠᠷᠠᠯᠲᠤ ᠠᠪᠤᠭᠠᠢ ᠶ᠋ᠢᠨ ᠣᠷᠴᠢᠭᠤᠯᠤᠭᠰᠠᠨ《 ᠮᠣᠩᠭᠣᠯ ᠤ᠋ᠨ ᠵᠠᠩ ᠰᠤᠷᠲᠠᠬᠤᠨ ᠤ᠋ ᠲᠡᠮᠳᠡᠭᠯᠡᠯ 》 ᠳ᠋ᠦ᠍ ᠡᠨᠡ 白洪大 ᠭᠡᠳᠡᠭ ᠢ᠋ ᠪᠤᠬᠤᠨᠲᠠᠢ ᠭᠡᠵᠦ ᠪᠢᠴᠢᠭᠰᠡᠨ ᠨᠢ ᠪᠤᠷᠤᠭᠤ ᠪᠣᠯᠪᠠ ᠃
②《 ᠮᠧᠩ ᠬᠦ᠌ ᠶᠤᠸᠠᠨ ᠯᠢᠦ ᠵᠢᠶᠠᠨ ᠵᠧᠩ 》 ᠭᠡᠳᠡᠭ ᠪᠢᠴᠢᠭ ᠲᠦ᠍ 《 ᠰᠢᠵᠢᠷ 》 ᠭᠡᠬᠦ ᠦᠭᠡ ᠶ᠋ᠢ ᠯᠠᠩ (两 ) ᠭᠡᠵᠦ ᠣᠷᠴᠢᠭᠤᠯᠵᠠᠢ ᠃ ᠡᠯᠳᠡᠩᠳᠠᠢ ᠠᠪᠤᠭᠠᠢ ᠶ᠋ᠢᠨ 《 ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ ᠳ᠋ᠠᠬᠢ ᠵᠠᠷᠢᠮ ᠨᠡᠷᠡᠰ ᠦᠭᠡᠰ ᠦ᠋ᠨ ᠲᠤᠬᠠᠢ 》 ᠭᠡᠬᠦ ᠰᠣᠨᠢᠷᠬᠠᠯᠲᠠᠢ ᠥᠭᠦᠯᠡᠯ ᠳ᠋ᠦ᠍ 《 ᠰᠢᠵᠢᠷ 》 ᠭᠡᠳᠡᠭ ᠪᠣᠯ ᠤᠢᠭᠤᠷ ᠬᠡᠯᠡᠨ ᠦ᠌sitir ᠭᠡᠬᠦ ᠦᠭᠡ ᠶ᠋ᠢ ᠠᠪᠢᠶᠠᠴᠢᠯᠠᠨ ᠬᠡᠷᠡᠭᠯᠡᠪᠡ ᠭᠡᠰᠡᠨ ᠪᠥᠭᠡᠳ ᠨᠢᠭᠡ ᠰᠢᠵᠢᠷ ᠪᠣᠯ ᠨᠢᠭᠡ ᠯᠠᠩ ᠬᠣᠶᠠᠷ ᠴᠢᠶᠠᠨ ᠨᠠᠢ᠍ᠮᠠᠨ ᠯᠢ ᠲᠡᠢ ᠲᠡᠩᠴᠡᠨᠡ ᠭᠡᠵᠡᠢ ᠃
ᠪᠠᠷᠢᠮᠲᠠᠯᠠᠵᠤ ᠭᠤᠷᠪᠠᠨ ᠲᠦᠮᠡᠨ ᠤ ᠦᠭᠡ ᠪᠡᠯᠡᠭ ᠦ᠋ᠳ ᠢ᠋ ᠨᠢᠭᠡᠳᠬᠡᠭᠡᠳ ᠂
ᠪᠠᠰᠠ ᠪᠠᠷ ᠰᠲᠠᠭᠯᠦᠩ ᠨᠠᠩᠰᠤ ᠂ ᠳᠠᠶᠤᠨ ᠬᠢᠶᠡ ᠬᠣᠶᠠᠷ ᠲᠤᠷ ᠲᠡᠭᠰᠢ ᠪᠡᠷ ᠵᠠᠬᠢᠷᠤᠭᠠᠳ ᠂
ᠰᠡᠢᠪᠠᠷ ᠣᠳᠤᠭᠰᠠᠨ ᠬᠠᠮᠤᠭ ᠪᠤᠷᠬᠠᠳ ᠤ᠋ᠨ ᠬᠤᠷᠢᠶᠠᠩᠭᠤᠢ ᠮᠥᠨ ᠴᠢᠨᠠᠷ ᠂
ᠰᠡᠴᠡᠯᠡᠯ ᠦᠭᠡᠢ ᠵᠴᠢᠷᠠ ᠳ᠋ᠾᠠᠷᠠ ᠯᠦ᠍ᠭᠡ ᠨᠢᠭᠡᠨ ᠴᠢᠨᠠᠷ ᠲᠤ᠌ ᠂
ᠰᠢᠭᠡᠮᠦᠨᠢ ᠶ᠋ᠢᠨ ᠱᠠᠰᠢᠨ ᠤ᠋ ᠢᠯᠭᠤᠭᠰᠠᠳ ᠤ᠋ᠨ ᠴᠢᠮᠡᠭ ᠢ᠋ ᠪᠠᠷᠢᠭᠴᠢ ᠂
ᠰᠠᠭᠠᠷᠠᠯ ᠦᠭᠡᠢ ᠨᠢᠭᠦᠯᠡᠰᠬᠦᠢ ᠨᠢᠳᠦᠪᠡᠷ ᠠᠮᠢᠲᠠᠨ ᠢ᠋ ᠦᠵᠡᠭᠴᠢ ᠂
ᠬᠠᠮᠤᠭ ᠠᠮᠢᠲᠠᠨ ᠤ᠋ ᠭᠠᠭᠴᠠᠬᠦ ᠢᠲᠡᠭᠡᠯ ᠦ᠋ᠨ ᠮᠥᠨ ᠴᠢᠨᠠᠷ ᠂
ᠬᠠᠢᠷᠠᠯᠠᠨ ᠨᠢᠭᠦᠯᠡᠰᠴᠦ ᠵᠠᠯᠠᠷᠠᠬᠤᠢ ᠵᠠᠷᠯᠢᠭ ᠢ᠋ ᠰᠣᠶᠣᠷᠬᠠᠭᠠᠳ ᠂
ᠬᠠᠷᠢᠨ ᠪᠠᠰᠠ ᠬᠤᠷᠳᠤᠨᠠ ᠮᠠᠨᠤ ᠡᠯᠴᠢᠰ ᠢ᠋ ᠢᠯᠡᠭᠡᠭᠰᠡᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠂
ᠬᠠᠮᠤᠭ ᠢ᠋ᠶ᠋ᠠᠷ ᠪᠡᠶᠡᠰᠴᠦ ᠬᠣᠯᠠᠳᠠᠴᠠ ᠵᠠᠯᠪᠠᠷᠢᠨ ᠰᠥᠭᠥᠳᠪᠡ ᠪᠢᠳᠡ ᠃
ᠦᠵᠡᠭᠰᠡᠭᠡᠷ ᠲᠡᠭᠦᠯᠳᠡᠷ ᠲᠤᠰᠠ ᠲᠤ ᠶ᠋ᠢᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠪᠢᠳᠡ ᠪᠥᠭᠡᠳ ᠂
ᠦᠯᠦ ᠲᠦᠳᠡᠨ ᠴᠠᠪᠴᠢᠶᠠᠯ ᠤ᠋ᠨ ᠰᠦᠮᠡ ᠳ᠋ᠦ᠍ᠷ ᠠᠳᠠᠴᠠ ᠮᠣᠷᠳᠠᠭᠠᠳ ᠂
ᠦᠬᠡᠷ ᠵᠢᠯ ᠳ᠋ᠦ᠍ᠷ ᠬᠠᠮᠤᠭ ᠢ᠋ᠶ᠋ᠠᠷ ᠤᠭ᠍ᠲᠤᠰᠤᠭᠠᠢ ᠪᠠ ᠪᠦᠷᠢᠨ ᠂
ᠦᠨᠡᠨ ᠮᠠᠭᠠᠳ ᠳᠡᠭᠡᠳᠦ ᠯᠠᠮᠠ ᠢᠨᠠᠭᠰᠢ ᠵᠠᠯᠠᠷᠠᠨ ᠰᠣᠶᠣᠷᠬᠠᠮᠤ ᠭᠡᠮᠡᠨ ᠥᠴᠢᠭᠲᠦᠨ ᠃
ᠤᠯᠠᠭᠠᠨ ᠬᠤᠯᠤᠭᠠᠨᠠ ᠵᠢᠯ ᠦ᠋ᠨ ᠠᠷᠪᠠᠨ ᠨᠢᠭᠡᠨ ᠰᠠᠷᠠ ᠳᠠ ᠮᠥᠨ ᠣᠨ ᠳ᠋ᠤᠷ ᠢᠨᠦ ᠂
ᠥᠲᠡᠯ ᠦᠭᠡᠢ ᠶᠠᠪᠤᠭᠤᠯᠪᠠᠢ ᠮᠥᠩᠬᠡ ᠭᠠᠵᠠᠷᠠ ᠡᠯᠴᠢᠰ ᠢ᠋ᠶ᠋ᠡᠨ ᠵᠠᠬᠢᠷᠤᠭᠠᠳ ᠂
ᠦᠨᠡᠨ ᠳᠡᠭᠡᠳᠦ ᠭᠤᠷᠪᠠᠨ ᠡᠷᠳᠡᠨᠢᠰ ᠦ᠋ᠨ ᠢᠪᠡᠭᠡᠯ ᠦ᠋ᠨ ᠬᠦᠴᠦᠨ ᠢ᠋ᠶ᠋ᠡᠷ ᠂
ᠦᠯᠡᠮᠵᠢ ᠬᠤᠲᠤᠭ ᠲᠤ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠠᠳᠢᠰᠲᠢᠳ① ᠢ᠋ᠶ᠋ᠡᠷ ᠂
ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠠᠯᠲᠠᠨ ᠬᠠᠭᠠᠨ ᠤ᠋ ᠪᠤᠶᠠᠨ ᠤ᠋ ᠤᠴᠠᠷᠠᠯ ᠢ᠋ᠶ᠋ᠠᠷ ᠂
ᠲᠡᠷᠡ ᠡᠯᠴᠢᠰ ᠦᠬᠡᠷ ᠵᠢᠯ ᠦ᠋ᠨ ᠵᠢᠷᠭᠤᠭᠠᠨ ᠰᠠᠷᠠ ᠬᠦᠷᠦᠭᠰᠡᠨ ᠢ᠋ᠶ᠋ᠡᠷ ᠂
ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠭᠡᠭᠡᠨᠡ ᠵᠠᠷᠯᠢᠭ ᠤ᠋ᠨ ᠪᠢᠴᠢᠭ ᠰᠢᠲᠦᠭᠡᠨ ᠦ᠌ ᠪᠡᠯᠡᠭ ᠦ᠋ᠳ ᠢ᠋ ᠡᠷᠭᠦᠵᠦ ᠂
ᠳᠡᠭᠡᠳᠦ ᠬᠠᠭᠠᠨ ᠤ᠋ ᠡᠷᠭᠦᠭᠰᠡᠨ ᠪᠤᠶᠠᠨ ᠢ᠋ ᠪᠤᠷᠰᠠᠩ ᠬᠤᠸᠠᠷᠠᠭ ᠤ᠋ᠳ ᠬᠤᠷᠠᠭᠰᠠᠳ ᠲᠤᠷ ᠬᠦᠷᠭᠡᠵᠦ ᠂
ᠴᠢᠭᠤᠯᠭᠠᠨ ᠤ᠋ ᠴᠠᠢ ᠲᠡᠷᠢᠭᠦᠲᠡᠨ ᠥᠭᠯᠢᠭᠡ ᠪᠠᠷᠠᠮᠢᠳ ᠢ᠋ ᠵᠡᠷᠭᠡ ᠪᠡᠷ ᠬᠠᠨᠳᠠᠯᠠᠨ ᠲᠦᠭᠡᠭᠡᠵᠦ ᠂
ᠴᠢᠬᠤᠯᠠ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠳ᠋ᠤᠷ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠪᠦᠷᠢᠨᠡ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠂
ᠴᠢᠨᠳᠠᠮᠤᠨᠢ ᠡᠷᠳᠡᠨᠢ ᠮᠡᠲᠦ ᠳᠠᠯᠠᠢ ᠯᠠᠮᠠ ᠵᠠᠷᠯᠢᠭ ᠪᠣᠯᠵᠤ ᠥᠭᠦᠯᠡᠷ ᠤᠨ :
《 ᠴᠢᠳᠠᠭᠴᠢ ᠶᠡᠬᠡ ᠬᠠᠭᠠᠨ ᠮᠢᠨᠦ ᠵᠠᠷᠯᠢᠭ ᠢ᠋ ᠪᠤᠰᠤ ᠦᠯᠦ ᠪᠣᠯᠭᠠᠨ ᠵᠥᠪᠰᠢᠶᠡᠭᠰᠡᠨ ᠪᠥᠭᠡᠰᠦ ᠂
ᠪᠢ ᠪᠡᠷ ᠲᠦᠳᠡᠯ ᠦᠭᠡᠢ ᠥᠭᠡᠳᠡ ᠪᠣᠯᠰᠤᠭᠠᠢ ! 》 ᠭᠡᠮᠡᠨ ᠨᠡᠪᠲᠡᠷᠬᠡᠶᠡ ᠵᠠᠷᠯᠢᠭ ᠪᠣᠯᠤᠭᠰᠠᠨ ᠳ᠋ᠤᠷ ᠂
— — — —
① ᠰᠠᠨᠰᠺᠷᠢᠲ ᠦᠭᠡ adisdit ᠦᠨ ᠠᠪᠢᠶᠠᠴᠢᠯᠠᠭᠰᠠᠨ ᠣᠷᠴᠢᠭᠤᠯᠬᠠ ᠂ ᠢᠪᠡᠭᠡᠯ ᠂ ᠢᠷᠦᠭᠡᠯ ᠭᠡᠰᠡᠨ ᠤᠳᠬᠠ ᠲᠠᠢ ᠃
ᠪᠢᠱᠢᠷᠡᠯ ᠲᠤ ᠶᠠᠷᠯᠤᠩ ᠬᠠᠭᠠᠨ ①《 ᠲᠡᠷᠢᠭᠦᠲᠡᠨ ᠲᠥᠪᠡᠳ ᠦ᠋ᠨ ᠶᠡᠬᠡ ᠪᠠᠭᠠ ᠨᠣᠶᠠᠳ ᠢᠷᠡᠵᠦ
ᠪᠢᠰᠢᠷᠡᠬᠦᠢ ᠰᠦᠰᠦᠯᠬᠦᠢ ᠪᠡᠷ ᠬᠤᠲᠤᠭ ᠲᠤ ᠳᠠᠯᠠᠢ ᠯᠠᠮᠠ ᠳ᠋ᠤᠷ ᠮᠥᠷᠭᠥᠵᠦ ᠥᠴᠢᠨ :
《 ᠪᠢᠯᠢᠭ ᠲᠤ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠪᠠᠯᠮᠠ ᠠᠢᠯᠠᠳ ᠤᠨ ᠰᠣᠶᠣᠷᠬᠠᠮᠤ ! 》 ᠭᠡᠮᠡᠨ ᠂
《 ᠢᠮᠠᠭᠲᠠ ᠬᠠᠮᠤᠭ ᠠᠮᠢᠲᠠᠨ ᠤ᠋ ᠢᠲᠡᠭᠡᠯ ᠬᠣᠩᠰᠢᠮ ᠪᠣᠳᠢᠰᠤᠩ ᠮᠥᠨ ᠪᠥᠭᠡᠳᠡᠯᠡ
ᠢᠯᠠᠩᠭᠤᠶᠠ ᠮᠠᠨᠤ ᠲᠥᠪᠡᠳ ᠦ᠋ᠨ ᠣᠷᠣᠨ ᠤ᠋ ᠨᠣᠮᠣᠬᠠᠳᠬᠠᠬᠤᠢ ᠶᠣᠰᠣ ᠲᠤ ᠪᠦᠯᠦᠭᠡᠢ ᠂
ᠢᠲᠡᠭᠡᠯ ᠢᠯᠠᠭᠤᠭᠰᠠᠨ ᠦᠨᠳᠦᠰᠦᠨ ᠽᠣᠩᠭᠡᠪᠡ ᠪᠯᠠᠮᠠ ᠬᠢᠭᠡᠳ ᠂
ᠢᠯᠡᠳᠡ ᠳᠡᠳ᠋ ᠳᠡᠳ᠋ ᠢ᠋ᠶ᠋ᠡᠷ ᠦᠨᠳᠦᠰᠦᠯᠡᠭᠰᠡᠨ ᠷᠭᠡᠨᠳᠦᠨ ᠷᠣᠪᠠᠪᠠ ② ᠂ ᠷᠭᠡᠨᠳᠦᠨ ᠵᠠᠮᠰᠤ ③ ᠳᠡᠭᠡᠳᠦ ᠲᠥᠷᠥᠯ ᠴᠢᠨᠦ ᠂
— — — —
① ᠲᠥᠪᠡᠳ ᠦ᠋ᠨ ᠫᠠᠭ᠍ᠮᠦ᠋ᠵᠸᠠ ( ᠬᠢᠲᠠᠳ ᠪᠢᠴᠢᠭ ᠲᠦ᠍ 帕木竹 ᠭᠡᠳᠡᠭ ) ᠸᠠᠩᠲᠤ ᠤᠯᠤᠰ ᠤ᠋ᠨ ᠠᠷᠪᠠᠨ ᠨᠢᠭᠡᠳᠦᠭᠡᠷ ᠦᠶᠡ ᠶ᠋ᠢᠨ ᠸᠠᠩ ᠠᠭ᠍ᠸᠠᠩᠵᠠᠱᠢᠵᠠᠭ᠍ᠪᠠ ᠶ᠋ᠢ ᠬᠡᠯᠡᠨᠡ ᠃ ᠲᠡᠢᠮᠢᠩ ᠤᠯᠤᠰ ᠲᠡᠭᠦᠨ ᠢ᠋ ᠴᠠᠨ ᠬᠤᠸᠠ ᠸᠠᠩ 阐化王 ᠭᠡᠵᠦ ᠡᠷᠭᠦᠮᠵᠢᠯᠡᠵᠡᠢ ᠃ ᠲᠡᠭᠦᠨ ᠦ᠌ ᠰᠠᠭᠤᠭᠠᠯᠢ ᠣᠷᠳᠣᠨ ᠨᠢ ᠶᠠᠷᠯᠤᠩ ᠤ᠋ᠨ ᠭᠠᠵᠠᠷ ᠪᠠᠢᠬᠤ ᠲᠤᠯᠠ ᠶᠠᠷᠯᠦᠩ ᠬᠠᠭᠠᠨ ᠭᠡᠳᠡᠭ ᠃
② ᠠᠩᠬᠠᠳᠤᠭᠠᠷ ᠲᠥᠷᠥᠯ ᠦ᠋ᠨ ᠳᠠᠯᠠᠢ ᠯᠠᠮᠠ ᠪᠣᠯᠤᠨᠠ ᠃ 1391 ᠣᠨ ᠳ᠋ᠤ᠌ ᠮᠡᠨᠳᠦᠯᠡᠵᠦ ᠂ ᠠᠷᠪᠠᠨ ᠲᠠᠪᠤᠨ ᠨᠠᠰᠤᠨᠠ ᠭᠡᠷ ᠡᠴᠡ ᠭᠠᠷᠴᠤ ᠂ ᠬᠣᠷᠢᠨ ᠨᠢᠭᠡᠨ ᠨᠠᠰᠤᠨᠡ ᠡᠮᠦᠨᠡᠲᠦ ᠲᠥᠪᠡᠳ ᠲᠦ᠍ ᠬᠦᠷᠴᠦ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠡᠭᠦᠳᠦᠭᠴᠢ ᠬᠥᠮᠦᠨ ᠴᠥᠩᠬᠡᠪᠡ ᠶ᠋ᠢ ᠪᠠᠭᠰᠢ ᠪᠠᠷᠢᠵᠤ ᠲᠡᠭᠦᠨ ᠦ᠌ ᠨᠠᠢ᠍ᠮᠠᠳᠤᠭᠠᠷ ᠶᠡᠬᠡ ᠱᠠᠪᠢ ᠪᠣᠯᠵᠠᠢ ᠃ 1419 ᠣᠨ ᠪᠣᠯᠬᠤ ᠳ᠋ᠤ᠌ ᠬᠣᠢᠲᠤ ᠲᠥᠪᠡᠳ ᠲᠦ᠍ ᠪᠤᠴᠠᠨ ᠢᠷᠡᠵᠦ ᠪᠠᠷᠠᠰᠢ ᠯᠣᠩᠪᠣ᠌ ᠰᠦᠮᠡ ( ᠬᠢᠲᠠᠳ ᠪᠢᠴᠢᠭ ᠲᠦ᠍ 札什伦布寺 ᠭᠡᠳᠡᠭ ) ᠢ᠋ ᠪᠠᠢᠭᠤᠯᠤᠨ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠢ᠋ ᠳᠡᠯᠭᠡᠷᠡᠭᠦᠯᠪᠡ ᠃ 1474 ᠣᠨ ᠳ᠋ᠤ᠌ ᠨᠠᠶᠠᠨ ᠳᠥᠷᠪᠡᠨ ᠨᠠᠰᠤᠨᠠ ᠨᠥᠭᠴᠢᠵᠡᠢ ᠃
③ ᠬᠣᠶᠠᠳᠤᠭᠠᠷ ᠲᠥᠷᠥᠯ ᠦ᠋ᠨ ᠳᠠᠯᠠᠢ ᠯᠠᠮᠠ ᠃ 1475 ᠣᠨ ᠳ᠋ᠤ᠌ ᠮᠡᠨᠨᠳᠦᠯᠡᠪᠡ ᠃ ᠠᠷᠪᠠᠨ ᠨᠢᠭᠡᠨ ᠨᠠᠰᠤᠨᠠ ᠪᠠᠷᠠᠰᠢ ᠯᠣᠩᠪᠣ᠌ ᠰᠤᠮᠠ ᠳ᠋ᠤ᠌ ᠬᠦᠷᠴᠦ ᠲᠣᠢᠨ ᠪᠣᠯᠤᠭᠠᠳ ᠬᠣᠷᠢᠨ ᠨᠢᠭᠡᠨ ᠨᠠᠰᠤᠨᠠ ᡀᠠᠰᠠ ᠶ᠋ᠢᠨ ᠵᠧᠪᠠᠩ ( ᠬᠢᠲᠠᠳ ᠪᠢᠴᠢᠭ ᠲᠦ᠍ ᠊哲蚌ᠭᠡᠨᠡ ) ᠰᠦᠮᠡ ᠳ᠋ᠦ᠍ ᠬᠦᠷᠴᠦ ᠨᠣᠮ ᠰᠤᠷᠪᠠ ᠃ ᠲᠡᠭᠦᠨ ᠦ᠌ ᠬᠣᠢᠨᠠ ᠲᠥᠪᠡᠳ ᠦ᠋ᠨ ᠣᠯᠠᠨ ᠭᠠᠵᠠᠷ ᠢ᠋ᠶ᠋ᠠᠷ ᠶᠠᠪᠤᠵᠤ ᠱᠠᠰᠢᠨ ᠢ᠋ ᠰᠤᠷᠲᠠᠯᠴᠢᠯᠠᠪᠠ ᠃ ᠦᠳᠡᠯᠡ ᠨᠠᠰᠤᠨ ᠤ᠋ ᠦᠶᠡ ᠳ᠋ᠦ᠍ ᠵᠢᠪᠠᠩ ᠰᠦᠮᠡ᠂ ᠰᠸᠷᠠ ᠰᠦᠮᠡ (色抆寺 ) ᠵᠡᠷᠭᠡ ᠶ᠋ᠢ ᠡᠷᠬᠢᠯᠡᠪᠡ ᠃ 1542 ᠣᠨ ᠳ᠋ᠤ᠌ ᠵᠢᠷᠠᠨ ᠳᠣᠯᠣᠭᠠᠨ ᠨᠠᠰᠤᠨᠠ ᠨᠥᠭᠴᠢᠪᠡ ᠃
ᠡᠨᠡ ᠲᠥᠪᠡᠳ ᠦ᠋ᠨ ᠣᠷᠣᠨ ᠢ᠋ ᠨᠢᠭᠦᠯᠡᠰᠦᠨ ᠪᠠᠷᠢᠵᠤ ᠥᠷᠥᠰᠢᠶᠡᠭᠴᠢ ᠪᠥᠯᠦᠭᠡᠢ ᠂
ᠡᠷᠬᠡᠲᠦ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠢ᠋ ᠨᠠᠷᠠᠨ ᠮᠡᠲᠦ ᠳᠡᠯᠭᠡᠷᠡᠭᠦᠯᠵᠦ ᠰᠠᠭᠤᠨ ᠪᠥᠯᠥᠭᠡ ᠂
ᠡᠷᠭᠢᠨ ᠪᠣᠭᠳᠠ ᠲᠡᠳᠡᠨ ᠦ᠌ ᠶᠣᠰᠣᠭᠠᠷ ᠡᠨᠳᠡ ᠰᠠᠭᠤᠵᠤ ᠠᠮᠢᠲᠠᠨ ᠢ᠋ ᠳᠡᠭᠵᠢᠭᠦᠯᠦᠨ ᠰᠣᠶᠣᠷᠬᠠ !
ᠡᠨᠡᠷᠢᠩᠭᠦᠢ ᠨᠢᠭᠦᠯᠡᠰᠬᠦᠢ ᠪᠡᠷ ᠮᠠᠨᠤ ᠠᠢᠯᠠᠳᠬᠠᠭᠰᠠᠨ ᠢ᠋ ᠪᠤᠰᠤ ᠦᠯᠦ ᠪᠣᠯᠭᠠᠨ ᠰᠣᠶᠣᠷᠬᠠ ! 》
《 ᠲᠡᠷᠡ ᠮᠣᠩᠭᠣᠯ ᠤ᠋ᠨ ᠣᠷᠣᠨ ᠨᠣᠮ ᠦᠭᠡᠢ ᠬᠢᠵᠠᠭᠠᠷ ᠪᠤᠷᠬᠠᠨ ᠦᠭᠡᠢ ᠬᠠᠷᠠᠩᠭᠤᠢ ᠭᠠᠵᠠᠷᠠ ᠂
ᠲᠡᠨᠳᠡ ᠬᠥᠮᠦᠨ ᠦ᠌ ᠮᠢᠬᠠ ᠢᠳᠡᠵᠦ ᠴᠢᠰᠤᠨ ᠤᠭᠤᠵᠤ ᠶᠠᠪᠤᠭᠴᠢ ᠣᠯᠠᠨ ᠪᠤᠶᠤ ᠃
ᠲᠡᠭᠦᠪᠡᠷ ᠬᠥᠮᠦᠨ ᠪᠤᠰᠤ ᠶ᠋ᠢᠨ ᠣᠷᠣᠨ ᠳ᠋ᠤᠷ ᠠᠳᠠᠯᠢ ᠪᠤᠶᠤ ! ᠶᠠᠭᠠᠬᠢᠨ ᠥᠭᠡᠳᠡ ᠪᠣᠯᠤᠮᠤᠢ ?
ᠲᠡᠭᠦᠨ ᠦ᠌ ᠲᠤᠯᠠ ᠪᠡᠶᠡ ᠪᠡᠷ ᠨᠣᠮᠣᠬᠠᠳᠬᠠᠤᠶᠠ ᠮᠠᠰᠢ ᠪᠡᠷᠬᠡ ᠪᠤᠶᠤ ᠢ ᠡ !
ᠰᠡᠳᠬᠢᠯ ᠢ᠋ᠶ᠋ᠡᠷ ᠬᠣᠲᠠᠯᠠ ᠳ᠋ᠠᠴᠠ ᠨᠢᠭᠦᠯᠡᠰ ᠦ᠋ᠨ ᠰᠡᠳᠬᠢᠭᠳᠡᠬᠦᠢ ! 》 ᠭᠡᠮᠡᠨ ᠥᠴᠢᠭᠰᠡᠨ ᠳ᠋ᠦ᠍ᠷ ᠂
ᠰᠡᠴᠡ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠦᠵᠡᠭᠰᠡᠭᠡᠷ ᠲᠤᠰᠠ ᠳ᠋ᠤ᠌ ᠳᠠᠯᠠᠢ ᠪᠯᠠᠮᠠ ᠪᠠᠷ ᠂
ᠰᠠᠬᠠᠷᠠᠯ ᠦᠭᠡᠢ ᠲᠡᠳᠡᠨ ᠦ᠌ ᠠᠢᠯᠠᠳᠬᠠᠭᠰᠠᠨ ᠢ᠋ ᠬᠠᠷᠢᠭᠤ ᠵᠠᠷᠯᠢᠭ ᠪᠣᠯᠤᠷᠤᠨ :
《 ᠰᠠᠢᠨ ᠢᠷᠦᠭᠡᠯ ᠦ᠋ᠨ ᠬᠦᠴᠦ ᠪᠡᠷ ᠡᠩ ᠤᠷᠢᠳᠠ ᠬᠠᠭᠠᠨ ᠪᠢᠳᠡ ᠬᠣᠶᠠᠭᠤᠯᠠ ᠂
ᠤᠴᠠᠷᠠᠯᠳᠤᠵᠤ ᠵᠡᠭᠦᠨ ᠡᠲᠡᠭᠡᠳ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠳ᠋ᠤᠷ ᠪᠢ ᠲᠠᠬᠢᠯ ᠤ᠋ᠨ ᠣᠷᠣᠨ ᠪᠣᠯᠵᠤ ᠂
ᠦᠯᠡᠮᠵᠢ ᠶᠡᠬᠡ ᠬᠠᠭᠠᠨ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠪᠣᠯᠵᠤ ᠡᠷᠭᠦᠮᠵᠢᠯᠡᠨ ᠬᠦᠨᠳᠦᠯᠡᠵᠦ ᠂
ᠦᠷᠭᠦᠯᠵᠢᠳᠡ ᠵᠡᠭᠦᠨ ᠡᠲᠡᠭᠡᠳ ᠬᠠᠷᠠᠩᠭᠤᠢ ᠭᠠᠵᠠᠷᠠ ᠱᠠᠰᠢᠨ ᠢ᠋ ᠳᠡᠯᠭᠡᠷᠡᠬᠦ ᠶ᠋ᠢᠨ ᠢᠷᠦᠭᠡᠯ ᠪᠥᠯᠥᠭᠡ ᠂
ᠦᠯᠦ ᠢᠳᠬᠠᠨ ᠵᠥᠪᠰᠢᠶᠡᠷᠡᠨ ᠲᠤᠰᠠᠯᠠᠪᠠᠰᠤ ᠮᠠᠨᠤ ᠲᠠᠩᠭᠢᠬᠷᠢᠬᠯᠠᠭᠰᠠᠨ ᠠᠴᠢ ᠠᠨᠤ ᠲᠡᠷᠡ ᠪᠤᠶᠤ !》 ᠬᠡᠮᠡᠪᠡ ᠃
ᠪᠠᠰᠠ ᠱᠠᠰᠢᠨ ᠢ᠋ ᠰᠠᠬᠢᠭᠴᠢ ᠶᠡᠬᠡ ᠬᠠᠭᠠᠨ ᠢ᠋ ᠪᠡᠷ ᠂
ᠪᠢᠬᠠᠷ ᠢ᠋ ᠬᠥᠮᠦᠨ ᠦ᠌ ᠪᠡᠶᠡ ᠳ᠋ᠦ᠍ᠷ ᠤᠷᠢᠵᠤ ᠣᠷᠣᠭᠤᠯᠤᠭᠠᠳ ᠂
ᠪᠢᠰᠢᠯᠭᠠᠵᠤ ᠥᠭᠡᠳᠡ ᠪᠣᠯᠬᠤ ᠶ᠋ᠢᠨ ᠤᠴᠢᠷ ᠢ᠋ ᠳᠠᠪᠲᠠᠨ ᠠᠰᠠᠭᠤᠭᠰᠠᠨ ᠳ᠋ᠤᠷ ᠂
《ᠪᠢᠯᠢᠭ ᠲᠤ ᠳᠠᠯᠠᠢ ᠪᠯᠠᠮᠠ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷᠠ ᠰᠠᠬᠠᠷᠠᠯ ᠦᠭᠡᠢ ᠥᠭᠡᠳᠡ ᠪᠣᠯᠪᠠᠰᠤ ᠂
ᠪᠤᠷᠬᠠᠨ ᠤ᠋ ᠱᠠᠰᠢᠨ ᠢ᠋ ᠠᠬᠤᠢ ᠶᠡᠬᠡᠳᠡ ᠳᠡᠯᠭᠡᠷᠡᠭᠦᠯᠦᠮᠦᠢ !
ᠪᠤᠷᠤᠭᠤ ᠶᠠᠪᠤᠳᠠᠯ ᠲᠠᠨ ᠢ᠋ ᠤᠳᠤᠷᠢᠳᠤᠮᠤᠢ !
ᠪᠤᠳᠤᠩᠭᠤᠢ ᠨᠢᠰᠸᠠᠨᠢᠰ ① ᠤ᠋ᠨ ᠬᠠᠷᠠᠩᠭᠤᠢ ᠶ᠋ᠢ ᠨᠠᠷᠠᠨ ᠮᠡᠲᠦ ᠭᠡᠢᠭᠦᠯᠦᠮᠦᠢ !
ᠪᠣᠭᠳᠠ ᠴᠢᠮᠠᠯᠤᠬᠡ ᠪᠢ ᠨᠥᠬᠥᠴᠡᠰᠦ ! ᠳᠥᠷᠪᠡᠯ ᠦᠭᠡᠢ ᠥᠭᠡᠳᠡ ᠪᠣᠯ ! 》 ᠬᠡᠮᠡᠪᠡᠢ ᠃
ᠲᠡᠭᠦᠨ ᠦ᠌ ᠬᠣᠢᠨᠠ ᠬᠤᠲᠤᠭ ᠲᠤ᠌ ᠳᠠᠯᠠᠢ ᠯᠠᠮᠠ ᠵᠣᠣ ᠰᠢᠭᠡᠮᠦᠨᠢ ᠬᠢᠭᠡᠳ
ᠲᠠᠬᠢᠯ ᠤ᠋ᠨ ᠰᠢᠲᠦᠭᠡᠨ ᠬᠠᠮᠤᠭ ᠬᠡᠢᠳ ᠰᠦᠮᠡ ᠳ᠋ᠦ᠍ᠷ ᠦᠯᠡᠮᠵᠢ ᠲᠠᠬᠢᠯ ᠢ᠋ ᠡᠷᠭᠦᠭᠡᠳ ᠂
— — — —
①ᠰᠠᠨᠰᠺᠷᠢᠲ nisranaᠦᠭᠡ ᠶ᠋ᠢᠨ ᠣᠯᠠᠨ ᠲᠣᠭᠠ ᠪᠣᠯᠤᠨᠠ ᠃
ᠲᠡᠨᠳᠡᠴᠡ ᠥᠭᠡᠳᠡ ᠪᠣᠯᠵᠤ ᠮᠤᠷᠤᠰ ᠨᠡᠷᠡᠲᠦ ᠭᠠᠵᠠᠷᠠ ᠬᠦᠷᠴᠦ ᠢᠷᠡᠭᠡᠳ ᠳᠠᠷᠤᠢ ᠳ᠋ᠤᠷ ᠂
ᠲᠡᠭᠰᠢ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠪᠠᠯᠮᠠ ᠡᠯᠴᠢᠰ ᠢ᠋ᠶ᠋ᠡᠨ ᠢᠯᠡᠭᠡᠪᠡᠢ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠳ᠋ᠤᠷ ᠃
ᠰᠢᠷᠠ ᠳᠠᠯᠠ ᠨᠡᠷᠡᠲᠦ ᠭᠠᠵᠠᠷᠠ ᠬᠦᠷᠴᠦ ᠲᠡᠷᠡ ᠡᠯᠴᠢᠰ ᠢᠨᠦ᠂
ᠰᠢᠯᠤᠭᠤᠨ ᠪᠣᠳᠢᠰᠠᠲᠤ ᠠᠯᠲᠠᠨ ᠬᠠᠭᠠᠨ ᠳ᠋ᠤᠷ ᠠᠭᠤᠯᠵᠠᠭᠠᠳ ᠥᠴᠢᠷᠦᠨ :
《ᠰᠢᠯᠲᠠᠭᠠᠨ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠬᠤᠲᠤᠭᠲᠤ ᠳᠠᠯᠠᠢ ᠯᠠᠮᠠ ᠥᠭᠡᠳᠡ ᠪᠣᠯᠵᠤ ᠢᠷᠡᠭᠡᠳ ᠂
ᠰᠢᠮᠳᠠᠵᠤ ᠶᠡᠬᠡ ᠬᠠᠭᠠᠨ ᠤ᠋ ᠠᠮᠤᠭᠤᠯᠠᠩ ᠢ᠋ ᠠᠰᠠᠭᠤᠨ ᠮᠠᠨᠢ ᠢᠯᠡᠭᠡᠪᠡᠢ 》 ᠭᠡᠮᠡᠨ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠂
ᠲᠡᠭᠷᠢ ᠶ᠋ᠢᠨ ᠬᠥᠪᠡᠭᠦᠨ ᠰᠦᠷ ᠶᠡᠬᠡᠲᠦ ᠭᠡᠭᠡᠨ ᠠᠯᠲᠠᠨ ᠬᠠᠭᠠᠨ ᠂
ᠲᠡᠩᠰᠡᠯ ᠦᠭᠡᠢ ᠪᠤᠶᠠᠨᠲᠤ ᠳᠠᠯᠠᠢ ᠪᠯᠠᠮᠠ ᠶ᠋ᠢᠨ ᠢᠷᠡᠭᠰᠡᠨ ᠢ᠋ ᠰᠣᠨᠣᠰᠤᠭᠠᠳ ᠂
ᠳᠡᠭᠡᠳᠦ ᠪᠢᠰᠢᠷᠡᠯ ᠲᠤ ᠰᠦᠰᠦᠭ ᠢ᠋ᠶ᠋ᠡᠷ ᠮᠠᠰᠢᠳᠠ ᠪᠠᠶᠠᠰᠤᠭᠠᠳ ᠂
ᠳᠠᠷᠤᠢ ᠳ᠋ᠤᠷ ᠤᠭᠲᠤᠭᠤᠯ ᠨᠣᠶᠠᠳ ᠲᠦᠰᠢᠮᠡᠳ ᠢ᠋ᠶ᠋ᠡᠨ ᠢᠯᠡᠭᠡᠪᠡᠢ ᠦᠳᠲᠡᠷ ᠪᠥᠭᠡᠳ ᠃
ᠣᠷᠳᠣᠰ ᠲᠦᠮᠡᠨ ᠡᠴᠡ ᠰᠡᠴᠡᠨ ᠬᠣᠩ ᠲᠠᠢᠵᠢ①᠂ ᠰᠡᠴᠡᠨ ᠳᠠᠢᠴᠢᠩ ②᠂ ᠦᠵᠡᠩ ᠵᠣᠩᠳᠣᠯᠠᠢ ③ ᠡᠬᠢᠯᠡᠨ ᠂
ᠣᠬᠢ ᠲᠦᠮᠡᠨ ᠡᠴᠡ ᠨᠠᠮᠤᠲᠠᠢ ᠰᠡᠴᠡᠨ ᠬᠣᠩ ᠲᠠᠢᠵᠢ ④᠂ ᠳᠠᠶᠤᠨ ᠨᠣᠶᠠᠳ ⑤᠂ ᠪᠠᠶᠠᠭᠤᠳ ᠨᠣᠶᠠᠨ ⑥ ᠂ ᠳᠠᠢᠴᠢᠩ ᠡᠵᠡᠢ ᠡᠬᠢᠯᠡᠨ ᠂
— — — —
①ᠡᠮᠦᠨᠡ ᠬᠡᠰᠡᠭ ᠲᠦ᠍ ᠭᠠᠷᠤᠭᠰᠠᠨ ᠰᠡᠴᠡᠨ ᠨᠣᠶᠠᠨ ᠢ᠋ ᠬᠡᠯᠡᠨᠡ ᠂ ᠪᠠᠰᠠ ᠬᠤᠲᠤᠭᠲᠠᠢ ᠰᠡᠴᠡᠨ ᠬᠣᠩ ᠲᠠᠢᠵᠢ ᠭᠡᠳᠡᠭ ᠃
②ᠰᠡᠴᠡᠨ ᠳᠠᠢᠴᠢᠩ ᠭᠡᠳᠡᠭ ᠨᠢ ᠮᠡᠷᠭᠡᠨ ᠵᠢᠨᠦᠩ ᠦ᠋ᠨ ᠠᠴᠢ ᠪᠤᠷᠰᠠᠢ ᠰᠡᠴᠡᠨ ᠳᠠᠢᠴᠢᠩ ᠤ᠋ᠨ ᠳᠥᠭᠥᠮᠴᠢᠯᠡᠭᠰᠡᠨ ᠳᠠᠭᠤᠳᠠᠯᠭᠠ ᠪᠣᠯᠤᠨᠠ ᠃ ᠪᠠᠰᠠ ᠪᠣᠷᠰᠠᠢ ᠬᠠᠳᠠᠨ ᠪᠠᠭᠠᠲᠤᠷ ᠭᠡᠳᠡᠭ ᠃ 《 ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ 》 ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ ᠢ᠋ ᠦᠨᠳᠦᠰᠦᠯᠡᠪᠡᠯ ᠂ ᠪᠤᠷᠰᠠᠢ ᠰᠡᠴᠡᠨ ᠳᠠᠢᠴᠢᠩ ᠪᠣᠯ ᠭᠤᠷᠪᠠᠨ ᠬᠦᠷᠵᠡ ᠶ᠋ᠢ ᠨᠡᠪᠲᠡ ᠬᠠᠷᠪᠤᠬᠤ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠶᠤᠮ ᠭᠡᠨᠡ ᠃
③ᠮᠡᠷᠭᠡᠨ ᠵᠢᠨᠦᠩ ᠦ᠋ᠨ ᠠᠴᠢ ᠪᠠᠵᠠᠷᠠ ᠥᠵᠡᠩ ᠨᠣᠶᠠᠨ ᠤ᠋ ᠬᠥᠪᠡᠭᠦᠨ ᠃
④ᠡᠮᠦᠨᠡ ᠭᠠᠷᠤᠭᠰᠠᠨ ᠨᠠᠮᠤᠲᠠᠢ ᠰᠡᠴᠡᠨ ᠨᠣᠶᠠᠨ ᠃
⑤ᠳᠠᠶᠤᠨ ᠨᠣᠶᠠᠨ ᠭᠡᠪᠡᠯ ᠵᠦᠢ ᠲᠡᠢ ᠂ ᠳᠠᠶᠤᠨ ᠬᠠᠭᠠᠨ ᠤ᠋ ᠳᠥᠲᠥᠭᠡᠷ ᠬᠥᠪᠡᠭᠦᠨ ᠠᠷᠰᠤ ᠪᠣᠯᠣᠳ ᠤ᠋ᠨ ᠠᠴᠢ ᠂ ᠪᠠᠰᠠ ᠳᠠᠶᠤᠨ ᠬᠣᠩ ᠲᠠᠢᠵᠢ ᠭᠡᠳᠡᠭ ᠃ 《 ᠮᠣᠩᠭᠣᠯ ᠤ᠋ᠨ ᠵᠠᠩ ᠰᠤᠷᠲᠠᠬᠤᠨ ᠤ᠋ ᠲᠡᠮᠳᠡᠭᠯᠡᠯ 》 (北虏风俗 ) ᠳ᠋ᠦ᠍ 歹稚黄台吉 ᠭᠡᠳᠡᠭ ᠃ ᠡᠭᠦᠨ ᠳ᠋ᠦ᠍ 稚 ᠦᠰᠦᠭ ᠨᠢ 雅 ᠦᠰᠦᠭ ᠦ᠋ᠨ ᠡᠨᠳᠡᠭᠦᠷᠡᠯ ᠪᠣᠯᠤᠨᠠ ᠃ ᠠᠰᠠᠷᠠᠯᠲᠤ ᠠᠪᠤᠭᠠᠢ ᠡᠨᠡ ᠪᠢᠴᠢᠭ ᠢ᠋ ᠮᠣᠩᠭᠣᠯᠴᠢᠯᠠᠬᠤ ᠳ᠋ᠠᠭᠠᠨ歹稚黄台吉 ᠭᠡᠰᠡᠨ ᠢ᠋ ᠳ᠋ᠠᠢᠴᠢ ᠬᠣᠩ ᠲᠠᠢᠵᠢ ᠭᠡᠵᠦ ᠡᠨᠳᠡᠭᠦᠦ ᠣᠷᠴᠢᠭᠤᠯᠵᠠᠢ ᠃
⑥ ᠠᠯᠲᠠᠨ ᠬᠠᠭᠠᠨ ᠤ᠋ ᠬᠣᠶᠠᠳᠤᠭᠠᠷ ᠬᠥᠪᠡᠭᠦᠨ ᠪᠤᠶᠠᠨ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ᠃ ᠪᠠᠶᠠᠭᠤᠳ ᠠᠢᠮᠠᠭ ᠢ᠋ ᠮᠡᠳᠡᠵᠦ ᠰᠠᠭᠤᠭᠰᠠᠨ ᠤ᠋ ᠲᠤᠯᠠ ᠪᠠᠶᠠᠭᠤᠳ ᠨᠣᠶᠠᠨ ᠭᠡᠬᠦ ᠪᠤᠶᠤ ᠪᠠᠰᠠ ᠪᠠᠶᠠᠭᠤᠳ ᠪᠠᠭᠠᠲᠤᠷ ᠲᠠᠢᠵᠢ ᠭᠡᠳᠡᠭ ᠃
ᠣᠨᠴᠠᠯᠠᠵᠤ ᠶᠤᠩᠰᠢᠶᠠᠪᠤ ᠶ᠋ᠢᠨ ᠬᠠᠷᠠᠴᠢᠨ ᠠ᠋ᠴᠠ ᠪᠠᠷᠠᠬᠤ ᠰᠡᠴᠡᠨ ᠳᠠᠢᠴᠢᠩ ᠲᠠᠢᠵᠢ ① ᠲᠡᠷᠢᠭᠦᠯᠡᠨ ᠂
ᠤᠯᠠᠮ ᠤᠯᠠᠮ ᠵᠡᠷᠭᠡ ᠪᠡᠷ ᠳᠠᠪᠬᠤᠷᠯᠠᠵᠤ ᠤᠭᠲᠤᠭᠤᠯ ᠤ᠋ᠨ ᠢᠯᠡᠭᠡᠪᠡᠢ ᠃
ᠡᠳᠡᠭᠡᠷ ᠨᠣᠶᠠᠳ ᠰᠠᠢᠳ ᠲᠦᠰᠢᠮᠡᠳ ᠬᠣᠲᠠᠯᠠ ᠪᠦᠭᠦᠳᠡᠭᠡᠷ ᠢ᠋᠂
ᠡᠷᠳᠡᠨᠢ ᠠᠯᠲᠠᠨ ᠮᠥᠩᠭᠥᠨ ᠮᠠᠨᠳᠠᠯ ᠲᠡᠷᠢᠭᠦᠲᠡᠨ ᠪᠦᠷᠢᠨ ᠢ᠋ ᠂
ᠡᠮᠡᠭᠡᠯ ᠬᠠᠵᠠᠭᠠᠷ ᠠᠯᠲᠠᠨ ᠢ᠋ᠶ᠋ᠠᠷ ᠬᠢᠭᠰᠡᠨ ᠢ᠋ ᠮᠣᠷᠢᠨ ᠳ᠋ᠤᠷ ᠲᠣᠬᠣᠵᠤ ᠂
— — — —
①ᠠᠯᠲᠠᠨ ᠬᠠᠭᠠᠨ ᠤ᠋ ᠳᠡᠭᠦᠦ ᠪᠤᠵᠢᠳᠠᠷᠠ ᠣᠳᠬᠣᠨ ᠲᠠᠢᠵᠢ ᠶ᠋ᠢᠨ ᠠᠴᠢ ᠃
ᠡᠳ᠋ ᠲᠠᠸᠠᠷ ᠣᠯᠠᠨ ᠪᠡᠯᠡᠭ ᠪᠠᠷᠠᠮᠢᠳ ᠢ᠋ ᠥᠭᠴᠦ ᠤᠭᠲᠤᠭᠤᠯᠪᠠᠢ ᠣᠯᠠᠨ ᠵᠦᠢᠯ ᠢ᠋ ᠃
ᠳᠠᠷᠤᠢ ᠳ᠋ᠤᠷ ᠤᠷᠢᠳᠠᠬᠢ ᠤᠭᠲᠤᠭᠤᠯ ᠬᠠᠯᠠᠭᠤᠨ ᠤᠰᠤᠨ ᠨᠡᠷᠡᠲᠦ ᠭᠠᠵᠠᠷᠠ① ᠬᠦᠷᠴᠦ ᠂
ᠲᠡᠭᠦᠨ ᠡᠴᠡ ᠳᠤᠮᠳᠠᠳᠤ ᠤᠭᠲᠤᠭᠤᠯ ᠭᠦᠨ ᠡᠷᠭᠢ ᠨᠡᠷᠡᠲᠦ ᠭᠠᠵᠠᠷᠠ② ᠬᠦᠷᠴᠦ ᠂
ᠲᠡᠨᠳᠡᠴᠡ ᠰᠡᠭᠦᠯ ᠦ᠋ᠨ ᠤᠭᠲᠤᠭᠤᠯ ᠬᠠᠯᠠᠭᠤᠨ ᠤᠰᠤᠨ ᠨᠡᠷᠡᠲᠦ③ ᠭᠠᠵᠠᠷᠠ ᠬᠦᠷᠴᠦ ᠂
ᠲᠡᠭᠰᠢ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠭᠡᠭᠡᠨᠡ ᠪᠡᠯᠡᠭ ᠦ᠋ᠳ ᠢ᠋ᠶ᠋ᠡᠨ ᠡᠷᠭᠦᠭᠡᠳ ᠮᠥᠷᠭᠥᠨ ᠥᠴᠢᠪᠡᠢ :
《 ᠠᠮᠢᠲᠠᠨ ᠤ᠋ ᠬᠡᠷᠡᠭᠯᠡᠬᠦᠢ ᠲᠠᠭᠠᠯᠠᠯ ᠤ᠋ᠨ ᠬᠦᠰᠡᠯ ᠢ᠋ ᠬᠠᠩᠭᠠᠭᠴᠢ ᠴᠣᠭᠲᠤ ᠂
ᠠᠯᠢᠮᠠᠳ ᠬᠣᠶᠠᠷ ᠬᠥᠯ ᠲᠠᠨ ᠤ᠋ ᠡᠷᠭᠢᠨ ④ ᠬᠠᠮᠤᠭ ᠡᠷᠳᠡᠮ ᠦ᠋ᠨ ᠮᠥᠨ ᠴᠢᠨᠠᠷᠲᠤ᠂
ᠠᠯᠢᠨ ᠳ᠋ᠤᠷ ᠠᠯᠢᠨ ᠢ᠋ ᠲᠡᠭᠦᠨ ᠢ᠋ᠶ᠋ᠡᠷ ᠲᠤᠰᠠᠯᠠᠭᠴᠢ ᠬᠤᠪᠢᠯᠭᠠᠨ ᠪᠡᠶᠡᠲᠦ᠂
ᠠᠯᠳᠠᠷᠰᠢᠭᠰᠠᠨ ᠢᠲᠡᠭᠡᠯ ᠪᠤᠶᠠᠨ ᠳ᠋ᠤ᠌ ᠳᠠᠯᠠᠢ ᠯᠠᠮᠠ ᠲᠡᠷᠢᠭᠦᠯᠡᠨ ᠬᠤᠸᠠᠷᠠᠭ ᠤ᠋ᠳ ᠪᠦᠭᠦᠳᠡ ᠳ᠋ᠦ᠍ᠷ ᠂
— — — —
①ᠬᠥᠬᠡ ᠨᠠᠭᠤᠷ ᠮᠣᠵᠢ ᠶ᠋ᠢᠨ ᠮᠠ᠋ ᠳ᠋ᠦᠸᠧ ᠰᠢᠶᠠᠨ (玛多县 ) ᠤ᠋ ᠬᠢᠵᠠᠭᠠᠷ ᠳᠣᠲᠣᠷᠠ ᠪᠣᠢ ᠃
② ᠬᠠᠯᠠᠭᠤᠨ ᠤᠰᠤᠨ ᠠ᠋ᠴᠠ ᠵᠡᠭᠦᠨ ᠬᠣᠢᠰᠢ ᠪᠠᠢᠨᠠ ᠃ ᠬᠢᠲᠠᠳ ᠪᠢᠴᠢᠭ ᠲᠦ᠍ ᠬᠠ ᠡᠯ ᠵᠶ᠋ᠢ ᠳᠠᠪᠠᠭᠠ (哈尔吉岭 ) ᠭᠡᠨᠡ ᠃
③ᠬᠥᠬᠡ ᠨᠠᠭᠤᠷ ᠮᠣᠵᠢ ᠶ᠋ᠢᠨ ᠰᠢᠩ ᠬᠠᠢ ᠰᠢᠶᠠᠨ (兴海县 ) ᠤ᠋ ᠬᠢᠵᠠᠭᠠᠷ ᠳᠣᠲᠣᠷᠠ ᠪᠣᠢ ᠃ ᠡᠳᠦᠭᠡ ᠦᠨ ᠴᠢᠦᠸᠠᠨ (温泉 ) ᠭᠡᠨᠡ ᠃ ④ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠡᠷᠭᠦᠮᠵᠢᠯᠡᠭᠰᠡᠨ ᠨᠡᠷᠡ ᠂ ᠬᠢᠲᠠᠳ ᠪᠢᠴᠢᠭ ᠲᠦ᠍ 二足尊 ᠭᠡᠳᠡᠭ ᠂ ᠡᠨᠡ ᠨᠢ ᠬᠥᠮᠦᠨ ᠠᠮᠢᠲᠠᠨ ᠤ᠋ ᠳᠣᠲᠣᠷᠠ ᠬᠠᠮᠤᠭ ᠤ᠋ᠨ ᠡᠷᠬᠢᠮ ᠳᠡᠭᠡᠳᠦ ᠭᠡᠰᠡᠨ ᠤᠳᠬᠠ ᠲᠠᠢ ᠃
ᠠᠶᠠᠭ ᠰᠠ ᠲᠡᠬᠢᠮᠯᠢᠭ① ᠪᠤᠷᠰᠠᠩ ᠬᠤᠸᠠᠷᠠᠭ ᠤ᠋ᠳ ᠤ᠋ᠨ ᠠᠢᠮᠠᠭ ᠬᠣᠲᠠᠯᠠ ᠪᠠᠷ ᠂
ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢ ᠡᠨᠡᠷᠢᠨ ᠰᠡᠳᠬᠢᠵᠦ ᠡᠨᠡ ᠵᠦᠭ ᠳᠠᠬᠢᠨ ᠢ᠋ ᠨᠢᠭᠦᠯᠡᠰᠴᠦ ᠂
ᠠᠯᠵᠢᠶᠠᠯ ᠦᠭᠡᠢ ᠠᠮᠤᠭᠤᠯᠠᠩ ᠨᠤᠲᠠ ᠵᠣᠬᠢᠰᠲᠠᠶᠠ ᠪᠠᠷ ᠂
ᠠᠶᠠ ᠡᠨᠡ ᠵᠦᠭ ᠲᠦ᠍ᠷ ᠲᠦᠷᠪᠡᠯ ᠦᠭᠡᠢ ᠥᠭᠡᠳᠡ ᠪᠣᠯᠵᠤ ᠢᠷᠪᠡᠭᠦ ? 》 ᠭᠡᠮᠡᠨ ᠥᠴᠢᠪᠡᠰᠦ ᠂
ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠡᠢᠨ ᠭᠡᠮᠡᠨ ᠵᠠᠷᠯᠢᠭ ᠪᠣᠯᠤᠷᠤᠨ:
《 ᠭᠠᠢᠬᠠᠮᠰᠢᠭ᠋ ᠭᠤᠷᠪᠠᠨ ᠡᠷᠳᠡᠨᠢ ᠶ᠋ᠢᠨ ᠢᠪᠡᠭᠡᠯ ᠢ᠋ᠶ᠋ᠡᠷ ᠠᠮᠤᠭᠤᠯᠠᠩ ᠢ᠋ᠶ᠋ᠠᠷ ᠢᠷᠡᠪᠡ ᠪᠢᠳᠡ ᠂
ᠬᠠᠭᠠᠨ ᠬᠠᠲᠤᠨ ᠡᠬᠢᠯᠡᠨ ᠶᠡᠬᠡ ᠪᠠᠭᠠ ᠨᠣᠶᠠᠳ ᠠᠮᠤᠭᠤᠯᠠᠩ ᠠᠪᠠ ᠊ᠢ ᠠ ? 》
ᠬᠠᠮᠲᠤ ᠵᠣᠯᠭᠠᠯᠳᠤᠵᠤ ᠠᠮᠤᠭᠤᠯᠠᠩ ᠢ᠋ᠶ᠋ᠠᠨ ᠠᠰᠠᠭᠤᠯᠴᠠᠭᠰᠠᠨ ᠤ᠋ ᠬᠣᠢᠨᠠ ᠪᠠᠰ ᠊ᠢ ᠠ ᠬᠦ᠌ ᠂
ᠳᠠᠯᠠᠢ ᠯᠠᠮᠠ ᠵᠠᠷᠯᠢᠭ ᠪᠣᠯᠵᠤ ᠳᠠᠶᠤᠨ ᠬᠢᠶᠡ ᠂ ᠪᠣᠨᠪᠣ ᠰᠢᠳᠢᠩ ᠬᠡᠯᠡᠮᠦᠷᠴᠢ ᠬᠣᠶᠠᠷ ᠢ᠋ ᠂
《 ᠳᠡᠭᠡᠳᠦ ᠶᠡᠬᠡ ᠬᠠᠭᠠᠨ ᠳ᠋ᠤᠷ ᠬᠦᠷᠴᠦ ᠮᠢᠨᠦ ᠵᠠᠷᠯᠢᠭ ᠢ᠋ ᠡᠢᠨ ᠠᠢᠯᠠᠳᠬᠠ !
ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠪᠢᠳᠡ ᠬᠣᠶᠠᠷ ᠤ᠋ᠨ ᠵᠣᠯᠭᠠᠯᠳᠤᠬᠤ ᠶ᠋ᠢᠨ ᠪᠡᠯᠡᠭ ᠮᠢᠨᠦ ᠂
ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨᠠ ᠰᠠᠢᠨ ᠡᠳᠦᠷ ᠵᠣᠯᠭᠠᠯᠳᠤᠬᠤ ᠤᠴᠢᠷ ᠪᠤᠶᠤ ! 》 ᠭᠡᠮᠡᠨ ᠢᠯᠡᠭᠡᠪᠡᠢ ᠃
— — — —
① ᠪᠠᠰᠠ ᠲᠡᠬᠢᠮᠯᠢᠭ ᠠᠶᠠᠭᠠ ᠪᠤᠶᠤ ᠪᠠᠳᠢᠷ ᠠᠶᠠᠭᠠ ᠭᠡᠳᠡᠭ ᠃ ᠤᠤᠯ ᠤᠳᠬᠠ ᠨᠢ ᠯᠠᠮᠠ ᠬᠤᠸᠠᠷᠠᠭ ᠨᠠᠷ ᠥᠭᠯᠢᠭᠡ ᠴᠠᠪ ᠢ᠋ ᠬᠦᠯᠢᠶᠡᠨ ᠠᠪᠬᠤ ᠠᠶᠠᠭᠠ ᠰᠠᠪᠠ ᠶ᠋ᠢ ᠬᠡᠯᠡᠨᠡ ᠃ ᠬᠣᠵᠢᠮ ᠯᠠᠮᠠ ᠬᠤᠸᠠᠷᠠᠭ ᠢ᠋ ᠵᠢᠭᠠᠬᠤ ᠪᠣᠯᠵᠠᠢ ᠃
ᠢᠯᠡᠭᠡᠭᠰᠡᠨ ᠡᠯᠴᠢᠰ ᠨᠢᠨᠦ ᠢᠷᠡᠭᠡᠳ ᠬᠠᠭᠠᠨ ᠤ᠋ ᠭᠡᠭᠡᠨ ᠳ᠋ᠦ᠍ᠷ᠂
ᠢᠯᠡᠳᠡ ᠬᠤᠲᠤᠭ ᠲᠤ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠵᠠᠷᠯᠢᠭ ᠢ᠋ ᠪᠦᠷᠢᠨᠡ ᠠᠢᠯᠠᠳᠬᠠᠭᠰᠠᠨ ᠳ᠋ᠤᠷ ᠂
ᠢᠮᠠᠭᠲᠠ ᠬᠠᠭᠠᠨ ᠬᠠᠲᠤᠨ ᠲᠡᠷᠢᠭᠦᠲᠡᠨ ᠶᠡᠬᠡ ᠤᠯᠤᠰ ᠢ᠋ᠶ᠋ᠠᠷ ᠵᠥᠪᠰᠢᠶᠡᠵᠦ ᠪᠦᠷ ᠦ᠋ᠨ ᠂
ᠢᠯᠠᠩᠭᠤᠶᠠ ᠤ᠌ᠤ ᠪᠠᠷᠰ ᠵᠢᠯ ① ᠦ᠋ᠨ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨᠠ ᠰᠠᠢᠨ ᠡᠳᠦᠷ ᠲᠣᠷ ᠂
ᠬᠥᠬᠡ ᠨᠠᠭᠤᠷ ᠤ᠋ᠨ ᠵᠡᠭᠦᠨ ᠡᠲᠡᠭᠡᠳ ᠴᠠᠪᠴᠢᠶᠠᠯ ᠤ᠋ᠨ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠡᠲᠡᠭᠡᠳ ᠂
ᠬᠦᠨᠳᠦᠯᠡᠵᠦ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠪᠤᠶᠠᠨ ᠲᠤ ᠳᠠᠯᠠᠢ ᠯᠠᠮᠠ ᠪᠯᠠᠮᠠ ᠪᠰᠦ᠋ᠨᠳᠡᠨ᠋ᠮ ᠷᠠᠬᠪ ② ᠤ᠋ᠨ ᠬᠤᠪᠢᠯᠭᠠᠨ ᠂
ᠬᠦᠰᠡᠬᠦ ᠮᠡᠲᠦ ᠬᠠᠮᠤᠭ ᠪᠤᠷᠰᠠᠩ ᠬᠤᠸᠠᠷᠠᠭ ᠤ᠋ᠳ ᠯᠣᠬᠠ ᠬᠣᠲᠠᠯᠠ ᠪᠦᠭᠦᠳᠡᠭᠡᠷ ᠲᠣᠷ ᠂
ᠬᠦᠷᠴᠦ ᠨᠣᠮ ᠠᠯᠲᠠᠨ ᠬᠠᠭᠠᠨ ᠵᠥᠩᠭᠢᠨ ᠬᠠᠲᠤᠨ ᠲᠡᠷᠢᠭᠦᠲᠡᠨ ᠲᠠᠪᠤᠨ ᠥᠩᠭᠡ ᠤᠯᠤᠰ ᠢ᠋ᠶ᠋ᠠᠷ
ᠣᠷᠣᠢ ᠶ᠋ᠢᠨ ᠴᠢᠮᠡᠭ ᠬᠤᠲᠤᠭ ᠲᠤ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠸᠴᠢᠷᠲᠤ ᠬᠥᠯ ᠦ᠋ᠨ ᠥᠯᠮᠡᠢ ᠳ᠋ᠦ᠍ᠷ ᠂
ᠦᠨᠡᠮᠯᠡᠬᠦᠢ ᠴᠢᠩ ᠪᠢᠰᠢᠷᠡᠯ ᠢ᠋ᠶ᠋ᠡᠷ ᠮᠥᠷᠭᠥᠵᠦ ᠪᠦᠷ ᠦ᠋ᠨ ᠳᠠᠬᠢᠭᠠᠳ ᠂
ᠦᠷᠭᠦᠯᠵᠢᠳᠡ ᠣᠯᠠᠨ ᠵᠦᠢᠯ ᠳ᠋ᠦ᠍ ᠪᠠᠷᠠᠮᠢᠳ ᠢ᠋ ᠡᠷᠭᠦᠵᠦ ᠪᠠᠷᠢᠭᠠᠳ ᠠᠢᠯᠠᠳᠬᠠᠪᠠᠢ :
— — — —
① ᠰᠢᠷᠠ ᠡᠷᠡ ᠪᠠᠷᠰ ᠵᠢᠯ ᠂ ᠸᠠᠨ ᠯᠢ ᠶ᠋ᠢᠨ ᠵᠢᠷᠭᠤᠳᠤᠭᠠᠷ ᠣᠨ (1578 ᠣᠨ ) ᠃
② ᠭᠤᠲᠠᠭᠠᠷ ᠳᠠᠯᠠᠢ ᠯᠠᠮᠠ ᠪᠰᠦ᠋ᠨᠳᠡᠨ᠋ᠮ ᠷᠬᠢᠨᠮᠰᠤ ᠶ᠋ᠢᠨ ᠨᠣᠮ ᠤ᠋ᠨ ᠪᠠᠭᠰᠢ ᠶ᠋ᠢᠨ ᠨᠡᠷᠡ ᠃
《ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠬᠤᠲᠤᠭ ᠲᠤ᠌ ᠳᠠᠯᠠᠢ ᠯᠠᠮᠠ ᠡᠬᠢᠯᠡᠨ ᠬᠣᠲᠣᠯᠠ ᠪᠠᠷ ᠂
ᠬᠠᠯᠠᠭᠠᠷ ᠪᠤᠷᠰᠠᠩ ᠬᠤᠸᠠᠷᠠᠭ ᠤ᠋ᠳ ᠤ᠋ᠨ ᠠᠢᠮᠠᠭ ᠪᠦᠭᠦᠳᠡᠭᠡᠷ ᠂
ᠬᠠᠷᠢᠯ ᠮᠢᠲᠠᠯ ᠦᠭᠡᠢ ᠪᠣᠭᠳᠠ ᠰᠡᠳᠬᠢᠯ ᠢ᠋ᠶ᠋ᠡᠨ ᠦᠯᠦ ᠠᠯᠵᠠᠶᠠᠨ ᠶᠡᠷᠦ ᠪᠡᠷ ᠂
ᠬᠠᠮᠤᠭ ᠠᠮᠢᠲᠠᠨ ᠤ᠋ ᠲᠤᠰᠠ ᠶ᠋ᠢ ᠰᠡᠳᠬᠢᠵᠦ ᠠᠮᠤᠭᠤᠯᠠᠩ 》 ᠭᠡᠮᠡᠨ ᠥᠵᠢᠪᠡᠰᠦ ᠪᠡᠷ ᠂
ᠠᠰᠠᠩᠭᠢ ① ᠭᠤᠷᠪᠠᠨ ᠬᠡᠯᠡᠪ ② ᠨᠤᠭᠤᠳ ᠲᠤᠷ ᠂
ᠠᠷᠢᠭᠤᠨ ᠬᠣᠶᠠᠷ ᠴᠢᠭᠤᠯᠭᠠᠨ ᠢ᠋ ᠲᠡᠭᠦᠰᠦᠭᠰᠡᠨ ᠂
ᠠᠷᠢᠶᠠ ᠠᠢᠯᠤᠬᠢᠳᠠ ᠰᠤᠸᠠᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠂
ᠠᠳᠠᠯᠢᠳᠬᠠᠰᠢ ᠦᠭᠡᠢ ᠪᠤᠶᠠᠨ ᠳ᠋ᠤ᠌ ᠳᠠᠯᠠᠢ ᠪᠯᠠᠮᠠ ᠵᠠᠷᠯᠢᠭ ᠪᠣᠯᠤᠷ ᠤᠨ:
《 ᠳ᠋ᠡᠭᠡᠳᠦ ᠭᠤᠷᠪᠠᠨ ᠡᠷᠳᠡᠨᠢᠰ ᠦ᠋ᠨ ᠢᠪᠡᠭᠡᠯ ᠢ᠋ᠶ᠋ᠡᠷ ᠂
ᠳᠡᠩᠰᠡᠯ ᠦᠭᠡᠢ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠢ᠋ ᠳᠡᠯᠭᠡᠷᠡᠭᠦᠯᠬᠦ ᠶ᠋ᠢᠨ ᠲᠤᠯᠠ ᠂
— — — —
① ᠰᠠᠨᠰᠺᠷᠢᠲ ᠦᠭᠡ ᠂ ᠲᠣᠭᠠᠯᠠᠰᠢ ᠦᠭᠡᠢ ᠭᠡᠬᠦ ᠤᠳᠬᠠ ᠲᠠᠢ ᠃
② ᠰᠠᠨᠰᠺᠷᠢᠲ ᠦᠭᠡ Kalpa ᠭᠡᠳᠡᠭ ᠦ᠋ᠨ ᠠᠪᠢᠶᠠᠴᠢᠯᠠᠭᠰᠠᠨ ᠣᠷᠴᠢᠭᠤᠯᠭᠠ ᠂ ᠲᠣᠭᠠᠯᠠᠰᠢ ᠦᠭᠡᠢ ᠤᠷᠲᠤ ᠴᠠᠭ ᠤ᠋ᠨ ᠨᠢᠭᠡᠴᠢ ᠪᠣᠯᠤᠨᠠ ᠃ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠪᠢᠴᠢᠭ ᠲᠦ᠍ ᠲᠠᠢᠯᠪᠤᠷᠢᠯᠠᠨ ᠥᠭᠦᠯᠡᠭᠰᠡᠨ ᠨᠢ ᠂ ᠳᠥᠴᠢᠨ ᠭᠠᠵᠠᠷ ᠤ᠋ᠨ ᠳᠥᠷᠪᠡᠯᠵᠢᠨ ᠬᠣᠲᠠᠨ ᠳ᠋ᠤᠷ ᠭᠠᠢᠮᠤ ᠶ᠋ᠢᠨ ᠦᠷᠡ ᠶ᠋ᠢ ᠳᠦᠭᠦᠷᠭᠡᠵᠦ ᠂ ᠭᠤᠷᠪᠠᠨ ᠵᠢᠯ ᠦ᠋ᠨ ᠳᠣᠲᠣᠷᠠ ᠨᠢᠭᠡᠨ ᠮᠥᠬᠥᠯᠢᠭ ᠦᠷᠡ ᠠᠪᠴᠤ ᠂ ᠡᠨᠡ ᠮᠡᠲᠦᠴᠢᠯᠡᠨ ᠲᠡᠷᠡ ᠭᠠᠢᠮᠤ ᠶ᠋ᠢᠨ ᠦᠷᠡ ᠶ᠋ᠢ ᠪᠦᠭᠦᠳᠡ ᠶ᠋ᠢ ᠠᠪᠴᠤ ᠳᠠᠭᠤᠰᠬᠠᠭᠰᠠᠨ ᠴᠠᠭ ᠢ᠋ ᠨᠢᠭᠡᠨ ᠥᠴᠦᠬᠡᠨ ᠭᠠᠯᠠᠪ ᠬᠡᠮᠡᠮᠦᠢ ᠃ ᠡᠨᠡ ᠮᠡᠲᠦ ᠬᠣᠷᠢᠨ ᠥᠴᠦᠬᠡᠨ ᠭᠠᠯᠠᠪ ᠢ᠋ ᠨᠢᠭᠡᠨ ᠳᠤᠮᠳᠠ ᠭᠠᠯᠠᠪ ᠭᠡᠳ ᠂ ᠳᠥᠷᠪᠡᠨ ᠳᠤᠮᠳᠠ ᠭᠠᠯᠠᠪ ᠢ᠋ ᠨᠢᠭᠡᠨ ᠶᠡᠬᠡ ᠭᠠᠯᠠᠪ ᠭᠡᠨᠡ ᠃
ᠳᠡᠯᠡᠰᠬᠦᠢ ᠠᠯᠵᠢᠶᠠᠬᠤᠢ ᠲᠡᠷᠢᠭᠦᠲᠡᠨ ᠡᠰᠡ ᠪᠣᠯᠤᠭᠠᠳ ᠂
ᠲᠡᠭᠰᠢ ᠠᠮᠤᠭᠤᠯᠠᠩ ᠢ᠋ᠶ᠋ᠠᠷ ᠵᠣᠯᠭᠠᠯᠳᠤᠪᠠ ᠪᠢᠳᠡ 》ᠭᠡᠮᠡᠨ ᠵᠠᠷᠯᠢᠭ ᠪᠣᠯᠤᠭᠰᠠᠨ ᠳ᠋ᠤᠷ ᠂
ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠲᠠᠬᠢᠯ ᠤ᠋ᠨ ᠣᠷᠣᠨ ᠬᠣᠶᠠᠷ ᠤᠴᠠᠷᠠᠯᠳᠤᠪᠠᠢ !
ᠦᠷᠭᠦᠯᠵᠢ ᠮᠠᠰᠢ ᠰᠡᠳᠬᠡᠯ ᠦ᠋ᠨ ᠲᠠᠭᠠᠯᠠᠯ ᠠᠨᠤ ᠨᠠᠢᠷᠠᠯᠳᠤᠪᠠᠢ !
ᠦᠯᠡᠮᠵᠢ ᠮᠠᠰᠢ ᠪᠠᠶᠠᠰᠬᠤᠯᠠᠩ ᠳ᠋ᠤ᠌ ᠨᠣᠮ ᠬᠤᠷᠢᠮ ᠤ᠋ᠳ ᠢ᠋ᠶ᠋ᠠᠷ ᠴᠡᠩᠭᠡᠯᠳᠦᠪᠡᠢ !
ᠦᠵᠡᠭᠰᠡᠨ ᠪᠠ ᠰᠣᠨᠣᠰᠤᠭᠰᠠᠨ ᠠᠮᠢᠲᠠᠨ ᠪᠠᠶᠠᠰᠤᠯᠴᠠᠵᠤ ᠭᠠᠢᠬᠠᠯᠳᠤᠪᠠᠢ !
ᠲᠡᠷᠡ ᠤᠴᠢᠷ ᠲᠤᠷ ᠬᠠᠭᠠᠨ ᠤ᠋ ᠪᠡᠶᠡ ᠥᠴᠦᠬᠡᠨ ᠬᠠᠯᠠᠭᠤᠨ ᠪᠣᠯᠤᠭᠰᠠᠨ ᠳ᠋ᠤᠷ ᠂
ᠲᠡᠭᠦᠨ ᠢ᠋ ᠠᠢᠯᠠᠳᠬᠠᠬᠤ ᠶ᠋ᠢᠨ ᠲᠤᠯᠠ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠪᠠᠷ ᠂
ᠳᠠᠷᠤᠢ ᠳ᠋ᠤ᠌ ᠴᠠᠭᠯᠠᠰᠢ ᠦᠭᠡᠢ ᠪᠦᠲᠦᠭᠰᠡᠨ ᠡᠬᠡ ᠬᠠᠲᠤᠨ ᠤ᠋ ᠠᠪᠢᠰᠢᠭ᠌ ① ᠰᠣᠶᠣᠷᠬᠠᠪᠠᠢ ᠃
ᠲᠠᠭᠠᠨ ᠪᠠᠰᠠ ᠪᠤᠰᠤ ᠠᠮᠤᠷᠠᠯᠢᠩᠭᠤᠢ ᠳᠡᠯᠭᠡᠷᠡᠩᠭᠦᠶᠡ ᠡᠷᠬᠡ ᠳᠣᠭᠰᠢᠨ ᠳᠥᠷᠪᠡᠨ ᠦᠢᠯᠡᠰ ᠦ᠋ᠨ ᠠᠪᠢᠰᠢᠭ᠌ ᠥᠭᠴᠦ ᠂
ᠬᠠᠷᠢᠶᠠᠯ ᠬᠢᠭᠡᠳ ᠵᠡᠳᠬᠡᠷ ᠬᠠᠷᠢᠭᠤᠯᠬᠤ ᠶ᠋ᠢᠨ ᠲᠤᠯᠠ ᠂
① ᠰᠠᠨᠰᠺᠷᠢᠲ ᠦᠭᠡ abhicheka ᠶ᠋ᠢᠨ ᠠᠪᠢᠶᠠᠴᠢᠯᠠᠭᠰᠠᠨ ᠣᠷᠴᠢᠭᠤᠯᠠᠨᠠ ᠃ ᠮᠣᠩᠭᠣᠯ ᠰᠤᠳᠤᠷ ᠲᠤ᠌ ᠪᠠᠰᠠ ᠠᠪᠠᠰᠢᠭ᠌ ᠪᠤᠶᠤ ᠠᠪᠰᠢᠭ᠌ ᠭᠡᠵᠦ ᠪᠢᠴᠢᠳᠡᠭ ᠃ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠨᠢᠭᠡᠨ ᠵᠦᠢᠯ ᠦ᠋ᠨ ᠶᠣᠰᠣᠯᠠᠯ ᠢ᠋ ᠬᠡᠯᠡᠨᠡ ᠃ ᠡᠨᠡ ᠶᠣᠰᠣᠯᠠᠯ ᠳ᠋ᠤ᠌ ᠠᠷᠢᠭᠤᠨ ᠤᠰᠤᠨ ᠢ᠋ᠶ᠋ᠠᠷ ᠲᠡᠷᠢᠭᠦᠨ ᠢ᠋ ᠷᠠᠰᠢᠶᠠᠯᠠᠬᠤ ᠲᠤᠯᠠ ᠬᠢᠲᠠᠳ ᠪᠢᠴᠢᠭ ᠲᠦ᠍ 潘顶 ᠭᠡᠨᠡ ᠃
ᠬᠠᠮᠤᠭ ᠨᠣᠮ ᠢ᠋ ᠳᠡᠭᠵᠢᠭᠦᠯᠦᠭᠴᠢ ᠰᠠᠬᠢᠭᠤᠯᠰᠤᠳ ᠤ᠋ᠨ ᠰᠡᠳᠬᠢᠯ ᠢ᠋ ᠬᠠᠩᠭᠠᠭᠤᠯᠤᠨ ᠂
ᠭᠠᠪᠢᠶᠠ ᠲᠤᠰᠠᠲᠤ ᠭᠡᠨᠵᠤᠷ ᠰᠡᠳᠡᠨᠵᠤᠷ ᠲᠡᠷᠢᠭᠦᠲᠡᠨ ᠬᠠᠮᠤᠭ ᠨᠣᠮ ᠤ᠋ᠳ ᠢ᠋ ᠳᠠᠭᠤᠷᠢᠰᠬᠠᠭᠠᠳ ᠂
ᠭᠠᠢᠬᠠᠮᠰᠢᠭ᠋ ᠲᠡᠭᠦᠰ ᠥᠬᠢᠨ ᠲᠡᠭᠷᠢ ᠶ᠋ᠢᠨ ᠭᠳ᠋ᠤᠷᠮᠠ ① ᠣᠷᠬᠢᠵᠤ ᠪᠦᠷ ᠦ᠋ᠨ ᠂
ᠪᠠᠰᠠ ᠪᠤᠰᠤ ᠵᠡᠷᠭᠡ ᠶ᠋ᠢᠨ ᠶᠠᠪᠤᠳᠠᠯ ᠢ᠋ ᠣᠯᠠᠨ ᠦᠢᠯᠡᠳᠦᠭᠰᠡᠨ ᠤᠴᠢᠷ ᠲᠤᠷ ᠂
ᠪᠠᠶᠠᠰᠬᠤᠯᠠᠩ ᠲᠤ ᠬᠠᠭᠠᠨ ᠤ᠋ ᠬᠠᠯᠠᠭᠤᠨ ᠠᠮᠤᠷᠯᠢᠭᠰᠠᠨ ᠴᠠᠭ ᠲᠤᠷ ᠂
ᠪᠡᠶᠡ ᠬᠡᠯᠡ ᠰᠡᠳᠬᠢᠯ ᠦ᠋ᠨ ᠡᠭᠦᠳᠡᠨ ② ᠡᠴᠡ ᠦᠯᠡᠮᠵᠢ ᠮᠠᠰᠢ ᠰᠦᠰᠦᠭᠯᠡᠵᠦ ᠂
ᠪᠠᠶᠠᠰᠤᠯᠴᠠᠵᠤ ᠬᠠᠮᠤᠭ ᠶᠡᠬᠡ ᠤᠯᠤᠰ ᠪᠢᠰᠢᠷᠡᠯ ᠢ᠋ ᠡᠭᠦᠰᠬᠡᠯᠳᠦᠪᠡᠢ ᠃
— — — —
①ᠳᠣᠣᠷᠠ ᠥᠭᠦᠯᠡᠬᠦ ᠳᠣᠮᠣᠭ ᠠ᠋ᠴᠠ ᠡᠭᠦᠰᠦᠭᠰᠡᠨ ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠨᠢᠭᠡᠨ ᠵᠦᠢᠯ ᠦ᠋ᠨ ᠶᠣᠰᠣᠯᠠᠯ ᠪᠣᠯᠤᠨᠠ ᠃ ᠲᠡᠷᠡ ᠳᠣᠮᠣᠭ ᠬᠡᠮᠡᠪᠡᠰᠦ ᠂ ᠡᠷᠲᠡᠨ ᠦ᠌ ᠡᠨᠡᠳᠬᠡᠭ ᠦ᠋ᠨ ᠫᠢᠱᠧᠯᠢ ( 毗舍离) ᠤᠯᠤᠰ ᠤ᠋ᠨ ᠸᠠᠩ ᠸᠧᠮᠦ᠋ᠸᠧ ( ᠬᠢᠲᠠᠳ ᠢ᠋ᠶ᠋ᠡᠷ 维摩 ᠭᠡᠬᠦ) ᠭᠡᠭᠴᠢ ᠨᠢᠭᠡᠨ ᠡᠳᠦᠷ ᠨᠣᠮ ᠬᠤᠷᠠᠬᠤ ᠦᠶᠡ ᠳ᠋ᠦ᠍ ᠭᠡᠨᠡᠳᠲᠡ ᠨᠢᠭᠡᠨ ᠲᠡᠭᠷᠢ ᠶ᠋ᠢᠨ ᠥᠬᠢᠨ ᠦ᠌ ᠪᠡᠶᠡ ᠢᠯᠡᠷᠡᠵᠦᠬᠦᠢ ᠃ ᠲᠡᠷᠡ ᠥᠬᠢᠨ ᠣᠯᠠᠨ ᠪᠣᠳᠢᠰᠠᠳ᠋ᠸᠠ ᠨᠠᠷ ᠪᠣᠯᠤᠨ ᠶᠡᠬᠡ ᠱᠠᠪᠢ ᠨᠠᠷ ᠤ᠋ᠨ ᠪᠡᠶᠡ ᠳᠡᠭᠡᠷᠡ ᠴᠡᠴᠡᠭ ᠰᠠᠴᠤᠭᠰᠠᠨ ᠳ᠋ᠤ᠌ ᠂ᠣᠯᠠᠨ ᠪᠣᠳᠢᠰᠠᠳ᠋ᠸᠠ ᠨᠠᠷ ᠤ᠋ᠨ ᠪᠡᠶᠡ ᠳᠡᠭᠡᠷᠡ ᠬᠦᠷᠬᠦᠶᠡ ᠴᠥᠮ ᠵᠤᠯᠭᠠᠷᠠᠨ ᠤᠨᠠᠵᠤ ᠭᠠᠭᠴᠠ ᠶᠡᠬᠡ ᠱᠠᠪᠢ ᠨᠠᠷ ᠤ᠋ᠨ ᠪᠡᠶᠡ ᠳᠡᠭᠡᠷᠡ ᠬᠦᠷᠬᠦᠶᠡ ᠡᠰᠡ ᠵᠤᠯᠭᠠᠷᠠᠨ ᠤᠨᠠᠪᠠ ᠃ ᠶᠡᠬᠡ ᠱᠠᠪᠢ ᠨᠠᠷ ᠬᠡᠳᠦᠢ ᠬᠦᠪᠰᠢᠭᠦᠷᠳᠡᠨ ᠤᠨᠠᠭᠠᠶᠠ ᠭᠡᠰᠡᠨ ᠴᠦ᠍ ᠲᠡᠷᠡ ᠴᠡᠴᠡᠭ ᠮᠥᠨ ᠬᠡᠪ ᠢ᠋ᠶ᠋ᠡᠷ ᠲᠣᠭᠲᠠᠵᠤ ᠤᠨᠠᠬᠤ ᠦᠭᠡᠢ ᠃ ᠲᠡᠨᠳᠡᠴᠡ ᠲᠡᠷᠡ ᠲᠩᠷᠢ ᠶ᠋ᠢᠨ ᠥᠬᠢᠨ ᠥᠭᠦᠯᠡᠷᠦᠨ ᠄ 《 ᠭᠠᠰᠢᠭᠤᠨ ᠵᠣᠪᠠᠯᠠᠩ ᠠᠨᠤ ᠳᠠᠭᠤᠰᠤᠭᠠᠳᠤᠢ ᠲᠤᠯᠠ ᠴᠡᠴᠡᠭ ᠪᠡᠶᠡ ᠳᠡᠭᠡᠷᠡ ᠨᠠᠭᠠᠯᠳᠤᠮᠤᠢ 》 ᠭᠡᠵᠡᠢ ᠃ ᠭᠳ᠋ᠤᠷᠮᠠ ᠭᠡᠳᠡᠭ ᠨᠢ ᠲᠥᠪᠡᠳ ᠦᠭᠡ ᠪᠣᠯᠤᠨᠠ ᠂ ᠡᠭᠦᠨ ᠢ᠋ ᠪᠠᠰᠠ ᠲᠣᠷᠤᠮᠠ ᠭᠡᠵᠦ ᠪᠢᠴᠢᠳᠡᠭ ᠴᠦ᠍ ᠪᠣᠢ ᠂ ᠴᠡᠴᠡᠭ ᠪᠤᠶᠤ ᠲᠠᠬᠢᠯ ᠤ᠋ᠨ ᠪᠣᠳᠠᠰ ᠢ᠋ ᠬᠡᠯᠡᠨᠡ ᠃
②ᠪᠡᠶᠡ ᠂ ᠬᠡᠯᠡ ᠂ ᠰᠡᠳᠬᠢᠯ ᠭᠤᠷᠪᠠ ᠶ᠋ᠢ ᠭᠤᠷᠪᠠᠨ ᠡᠭᠦᠳᠡ ᠪᠤᠶᠤ ᠭᠤᠷᠪᠠᠨ ᠬᠠᠭᠠᠯᠭᠠ ᠭᠡᠨᠡ ᠃ ᠬᠥᠮᠦᠨ ᠦ᠌ ᠪᠡᠶᠡ ᠡᠷᠬᠡᠲᠡᠨ ᠂ ᠦᠭᠡ ᠬᠡᠯᠡ ᠂ ᠰᠡᠳᠬᠢᠯ ᠰᠠᠨᠠᠭᠠ ᠪᠠᠷ ᠳᠠᠮᠵᠢᠨ ᠢᠯᠡᠷᠡᠬᠦ ᠠᠯᠢᠪᠠ ᠦᠢᠯᠡ ᠬᠥᠳᠡᠯᠭᠡᠭᠡᠨ ᠢ᠋ ᠬᠡᠯᠡᠨᠡ ᠃
ᠲᠡᠷᠡ ᠴᠠᠭ ᠲᠤᠷ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠬᠤᠲᠤᠭ ᠲᠤ ᠳᠠᠯᠠᠢ ᠯᠠᠮᠠ ᠬᠢᠭᠡᠳ ᠂
ᠲᠡᠳᠡᠭᠡᠷ ᠬᠤᠪᠢᠯᠭᠠᠨ ᠯᠠᠮᠠ ᠨᠠᠷ ᠬᠠᠮᠤᠭ ᠬᠤᠸᠠᠷᠠᠭ ᠤ᠋ᠳ ᠬᠣᠲᠠᠯᠠ ᠪᠦᠭᠦᠳᠡᠭᠡᠷ ᠂
ᠲᠡᠭᠰᠢ ᠯᠤᠤᠰ ᠤ᠋ᠨ ᠳᠠᠭᠤᠨ ᠮᠡᠲᠦ ᠠᠷᠪᠠᠨ ᠵᠦᠭ ᠲᠦ᠍ᠷ ᠳᠠᠭᠤᠷᠢᠰᠳᠠᠯᠠ ᠂
ᠲᠡᠭᠦᠳᠡᠭᠡᠷᠡᠯ ᠦᠭᠡᠢ ᠭᠤᠷᠪᠠᠨ ᠭᠦᠯᠭᠡᠨ ᠨᠣᠮ ① ᠢ᠋ ᠨᠣᠮᠡᠯᠠᠵᠦ ᠢᠷᠦᠭᠡᠯ ᠢᠷᠦᠭᠡᠪᠡᠢ ᠃
ᠬᠠᠭᠠᠨ ᠬᠠᠲᠤᠨ ᠵᠠᠭᠤᠨ ᠰᠢᠵᠡᠷ ᠢ᠋ᠶ᠋ᠠᠷ ᠡᠭᠦᠳᠦᠭᠰᠡᠨ ᠠᠯᠲᠠᠨ ᠮᠠᠲᠠᠯ ᠬᠢᠭᠡᠳ ᠢ᠋ ᠂
ᠭᠠᠢᠬᠠᠮᠰᠢᠭ᠋ ᠮᠢᠩᠭᠠᠨ ᠰᠢᠵᠠᠷ ᠢ᠋ᠶ᠋ᠠᠷ ᠡᠭᠦᠳᠦᠭᠰᠡᠨ ᠮᠥᠩᠭᠥᠨ ᠲᠤᠬᠠ ᠲᠡᠷᠢᠭᠦᠲᠡᠨ ᠢ᠋ ᠂
ᠬᠠᠰ ᠪᠣᠯᠣᠷ ᠡᠯᠳᠡᠪ ᠵᠦᠢᠯ ᠡᠷᠳᠡᠨᠢᠰ ᠠᠯᠲᠠᠨ ᠮᠥᠩᠭᠥᠨ ᠣᠯᠠᠨ ᠲᠣᠭᠠᠲᠠᠨ ᠬᠤᠪᠴᠠᠳ ᠢ᠋ ᠂
ᠭᠠᠪᠢᠶᠠ ᠲᠤ ᠠᠯᠲᠠᠨ ᠡᠮᠡᠭᠡᠯ ᠬᠠᠵᠠᠭᠠᠷ ᠲᠣᠬᠣᠵᠤ ᠠᠷᠭᠤᠮᠠᠨ ᠲᠤᠮᠣᠴᠠᠭ② ᠮᠣᠷᠢᠨ ᠲᠡᠷᠢᠭᠦᠲᠡᠨ ᠢ᠋
ᠣᠯᠠᠨ ᠲᠣᠭᠠᠲᠠᠨ ᠲᠡᠮᠡᠭᠡᠨ ᠮᠣᠷᠢᠨ ᠯᠠᠭᠤᠰᠠ ᠦᠬᠡᠷ ᠬᠣᠨᠢᠨ ᠲᠣᠭᠣᠯᠠᠰᠢ ᠦᠭᠡᠢ ᠂
ᠣᠯᠠᠨ ᠢ᠋ ᠣᠨᠴᠠᠯᠠᠵᠤ ᠵᠠᠭᠤᠭᠠᠳ ᠮᠢᠩᠭᠠᠭᠠᠳ ᠲᠦᠮᠡᠨ ᠲᠣᠭᠠᠲᠠᠨ ᠢ᠋ ᠂
ᠣᠭᠣᠭᠠᠲᠠ ᠬᠡᠷᠡᠭᠯᠡᠬᠦᠢ ᠵᠦᠢᠯ ᠪᠦᠷᠢ ᠲᠠᠬᠢᠯ ᠪᠠᠷᠠᠮᠢᠳ ᠢ᠋ ᠲᠠᠪᠤᠨ ᠥᠩᠭᠡ ᠤᠯᠤᠰ ᠢ᠋ᠶ᠋ᠠᠷ ᠂
— — — —
①ᠪᠤᠷᠬᠠᠨ ᠤ᠋ ᠱᠠᠰᠢᠨ ᠤ᠋ ᠭᠤᠷᠪᠠᠨ ᠵᠦᠢᠯ ᠦ᠋ᠨ ᠨᠣᠮ ᠰᠤᠳᠤᠷ ᠢ᠋ ᠥᠭᠦᠯᠡᠵᠡᠢ ᠃ ᠬᠥᠯᠭᠡᠨ ᠭᠡᠳᠡᠭ ᠨᠢ ᠵᠥᠭᠡᠭᠡᠬᠦ ᠂ ᠲᠡᠭᠡᠭᠡᠪᠦᠷᠢᠯᠡᠬᠦ ᠭᠡᠬᠦ ᠤᠳᠬᠠ ᠲᠠᠢ ᠃ ᠪᠤᠷᠬᠠᠨ ᠤ᠋ ᠨᠣᠮ ᠰᠤᠳᠤᠷ ᠨᠢ ᠬᠥᠯᠭᠡᠨ ᠮᠡᠲᠦ ᠬᠠᠮᠤᠭ ᠠᠮᠢᠲᠠᠨ ᠢ᠋ ᠪᠤᠷᠬᠠᠨ ᠤ᠋ ᠵᠦᠭ ᠲᠦ᠍ ᠲᠡᠭᠡᠭᠡᠪᠦᠷᠢᠯᠡᠨ ᠬᠦᠷᠭᠡᠵᠦ ᠴᠢᠳᠠᠨᠠ ᠭᠡᠨᠡ ᠃
②ᠪᠠᠰᠠ ᠳᠣᠪᠣᠴᠠᠭ ᠪᠤᠶᠤ ᠲᠣᠪᠢᠴᠠᠭ ᠭᠡᠵᠦ ᠪᠢᠴᠢᠳᠡᠭ ᠃ ᠥᠷᠥᠨᠡ ᠤᠯᠤᠰ ᠣᠷᠣᠨ (西城) ᠳ᠋ᠠᠬᠢ ᠥᠨᠳᠥᠷ ᠮᠣᠷᠢ ᠶ᠋ᠢ ᠬᠡᠯᠡᠨᠡ ᠃
ᠡᠷᠭᠦᠵᠦ ᠶᠡᠷᠦ ᠡᠴᠢᠭᠡ ᠡᠬᠡ ᠲᠡᠷᠢᠭᠦᠲᠡᠨ ᠬᠠᠮᠤᠭ ᠠᠮᠢᠲᠠᠨ ᠢ᠋ ᠬᠤᠲᠤᠭ ᠤ᠋ᠨ ᠵᠦᠭ ᠢᠷᠦᠭᠡᠯᠭᠡᠪᠡᠢ᠃
ᠳᠠᠯᠠᠢ ᠯᠠᠮᠠ ᠠ᠋ᠴᠠ ᠬᠠᠭᠠᠨ ᠬᠠᠲᠤᠨ ᠬᠠᠮᠤᠭ ᠪᠦᠭᠦᠳᠡ ᠶᠡᠬᠡ ᠤᠯᠤᠰ ᠂
ᠳᠠᠷᠤᠢ ᠳ᠋ᠤ᠌ ᠱᠠᠭᠱᠠᠪᠠᠳ ① ᠰᠠᠨᠸᠠᠷ ᠤ᠋ᠨ ᠠᠴᠢ ᠲᠤᠰᠠ ᠶ᠋ᠢ ᠰᠣᠨᠣᠰᠤᠭᠠᠳ ᠂
ᠳᠡᠭᠡᠳᠦ ᠰᠤᠳᠤᠷ ᠲᠠᠷᠨᠢ ᠳᠠᠭᠤᠵᠢ ᠭᠦᠯᠭᠡᠨ ᠦ᠌ ᠤᠳᠤᠷᠢᠭᠤᠯᠰᠤᠨ ᠤᠪᠠᠳᠢᠰ② ᠪᠠ ᠂
ᠲᠡᠭᠰᠢ ᠰᠣᠨᠣᠰᠬᠤᠢ ᠰᠡᠳᠬᠢᠬᠦᠢ ᠪᠢᠰᠢᠯᠭᠠᠬᠤᠢ ᠠᠴᠢ ᠲᠤᠰᠠ ᠳ᠋ᠤ᠌ ᠣᠯᠠᠨ ᠢ᠋ ᠰᠣᠨᠣᠰᠪᠠᠢ ᠃
ᠭᠠᠢᠬᠠᠮᠰᠢᠭ᠋ ᠨᠣᠮ ᠤ᠋ᠨ ᠠᠯᠲᠠᠨ ᠬᠠᠭᠠᠨ ᠡᠬᠢᠯᠡᠨ ᠬᠣᠲᠠᠯᠠ ᠪᠦᠭᠦᠳᠡᠭᠡᠷ ᠰᠦᠰᠦᠭ ᠪᠢᠰᠢᠷᠡᠯ ᠢ᠋ ᠡᠭᠦᠰᠬᠡᠵᠦ ᠪᠦᠷ ᠦ᠋ᠨ ᠂
ᠭᠠᠳᠠᠭᠠᠳᠤ ᠣᠩᠭᠣᠳ ᠴᠡᠯᠢᠭ ③ᠣᠳ ᠤ᠋ᠨ ᠡᠨᠳᠡᠭᠦᠷᠡᠭᠰᠡᠨ ᠢ᠋ ᠲᠦᠢᠮᠡᠷᠢᠳᠦᠭᠡᠳ ᠂
ᠭᠠᠨᠢ ᠮᠤᠩᠬᠠᠭ ᠪᠥᠬᠡ ᠤᠳᠠᠭᠠᠨ ④ ᠢ᠋ ᠳᠣᠷᠣᠢᠲᠠᠭᠤᠯ ᠤ᠋ᠨ ᠤᠰᠠᠳᠬᠠᠵᠤ ᠂
ᠭᠠᠪᠢᠶᠠ ᠲᠤ ᠳᠡᠭᠡᠳᠦ ᠨᠣᠮ ᠤ᠋ᠨ ᠲᠥᠷᠥ ᠬᠡᠢᠪ ᠵᠠᠩᠭᠢᠶᠠ ᠮᠡᠲᠦ ᠪᠣᠯᠭᠠᠵᠤ ᠂
— — — —
① ᠰᠠᠨᠰᠺᠷᠢᠲ ᠦᠭᠡ ᠂ ᠶᠣᠰᠣᠨ ᠂ ᠲᠠᠩᠭᠠᠷᠢᠭ ᠭᠡᠬᠦ ᠤᠳᠬᠠ ᠲᠠᠢ ᠃
② ᠰᠠᠨᠰᠺᠷᠢᠲᠦᠭᠡ upadesa ᠶᠢ ᠠᠪᠢᠶᠠᠴᠢᠯᠠᠨ ᠣᠷᠴᠢᠭᠤᠯᠪᠠ ᠃ ᠠᠰᠠᠭᠤᠵᠤ ᠬᠠᠷᠢᠭᠤᠯᠬᠤ ᠬᠡᠯᠪᠡᠷᠢ ᠪᠡᠷ ᠨᠣᠮ ᠤ᠋ᠨ ᠤᠳᠬᠠ ᠶᠣᠰᠣᠨ ᠢ᠋ ᠲᠠᠢᠯᠪᠤᠷᠢᠯᠠᠨ ᠥᠭᠦᠯᠡᠭᠰᠡᠨ ᠨᠣᠮ ᠰᠤᠳᠤᠷ ᠢ᠋ ᠬᠡᠯᠡᠨᠡ ᠃
③ ᠪᠥᠬᠡ ᠶ᠋ᠢᠨ ᠱᠠᠰᠢᠨ ᠤ᠋ ᠰᠢᠲᠦᠭᠡᠨ ᠬᠥᠷᠥᠭ ᠢ᠋ ᠣᠩᠭᠣᠳ ᠭᠡᠨᠡ ᠃
④ ᠪᠥᠬᠡ ᠭᠡᠳᠡᠭ ᠨᠢ ᠡᠷᠡᠭᠲᠡᠢ ᠪᠥᠬᠡ ᠶ᠋ᠢ ᠬᠡᠯᠡᠨᠡ ᠂ ᠤᠳᠠᠭᠠᠨ ᠭᠡᠳᠡᠭ ᠨᠢ ᠡᠮᠡᠭᠲᠡᠢ ᠪᠥᠬᠡ ᠶ᠋ᠢ ᠬᠡᠯᠡᠨᠡ ᠃ ᠡᠨᠳᠡ 《 ᠤᠳᠠᠭᠠᠨ 》 ᠭᠡᠵᠦ ᠪᠢᠴᠢᠭᠰᠡᠨ ᠨᠢ ᠤᠲᠤᠭᠠᠨ ᠤ᠋ ᠣᠨᠳᠣᠣ ᠪᠢᠴᠢᠯᠭᠡ ᠪᠣᠯᠤᠨᠠ ᠃ ᠮᠣᠩᠭᠣᠯ ᠪᠢᠴᠢᠭ ᠦ᠋ᠨ ᠣᠯᠠᠩᠬᠢ ᠳ᠋ᠤ᠌ 《ᠢᠳᠤᠭᠠᠨ 》 ᠭᠡᠵᠦ ᠪᠢᠴᠢᠨᠡ ᠃
ᠥᠪᠡᠷ ᠦ᠋ᠨ ᠠᠯᠲᠠᠨ ᠤᠷᠤᠭ ᠠ᠋ᠴᠠ ᠪᠠᠶᠠᠭᠤᠳ ᠲᠠᠢᠵᠢ ᠶ᠋ᠢᠨ ᠬᠥᠪᠡᠭᠦᠨ ① ᠢ᠋ ᠲᠡᠷᠢᠭᠦᠯᠡᠨ ᠂
ᠦᠯᠡᠮᠵᠢ ᠠᠷᠪᠠᠨ ᠬᠣᠶᠠᠷ ᠲᠦᠮᠡᠳ ᠡᠴᠡ ᠵᠠᠭᠤᠨ ᠨᠠᠢ᠍ᠮᠠᠨ ᠲᠣᠢᠨ ᠪᠠᠨᠳᠢ ᠪᠣᠯᠭᠠᠨ ᠳᠠᠭᠠᠭᠤᠯᠵᠤ ᠂
ᠦᠨᠡᠮᠯᠡᠬᠦᠢ ᠴᠢᠩ ᠰᠡᠳᠬᠢᠯ ᠢ᠋ᠶ᠋ᠡᠷ ᠱᠠᠰᠢᠨ ᠳ᠋ᠤᠷ ᠪᠠᠲᠤᠳᠠ ᠣᠷᠣᠭᠰᠠᠨ ᠤᠴᠢᠷ ᠲᠤᠷ ᠂
ᠤᠯᠠᠮ ᠪᠠᠰᠠ ᠳᠥᠴᠢᠨ ᠲᠦᠮᠡᠨ ᠮᠣᠩᠭᠣᠯ ᠳᠠᠯᠠᠢ ᠯᠠᠮᠠ ᠶ᠋ᠢ ᠪᠢᠰᠢᠷᠡᠨ ᠲᠤᠰ ᠲᠤᠰ ᠢ᠋ᠶ᠋ᠠᠷ ᠣᠷᠣᠪᠠᠢ ᠃
ᠴᠠᠪᠴᠢᠶᠠᠯ ᠤ᠋ᠨ ᠰᠦᠮᠡ ᠳ᠋ᠦ᠍ᠷ ᠲᠠᠪᠤᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠡᠳᠦᠷ ᠤᠴᠠᠷᠠᠯᠳᠤᠵᠤ
ᠴᠠᠭᠯᠠᠰᠢ ᠦᠭᠡᠢ ᠥᠭᠯᠢᠭᠡ ᠪᠢᠷᠡᠮᠢᠳ ᠲᠡᠷᠢᠭᠦᠲᠡᠨ ᠢ᠋ ᠲᠥᠭᠡᠳᠡᠯᠡ ᠡᠷᠭᠦᠵᠦ ᠂
ᠴᠠᠭᠠᠨ ᠪᠤᠶᠠᠨ ᠤ᠋ ᠵᠦᠭ ᠲᠦ᠍ᠷ ᠦᠨᠡᠨ ᠮᠠᠭᠠᠳ ᠣᠷᠣᠵᠤ ᠂
ᠴᠠᠭᠠᠵᠢᠯᠠᠵᠤ ᠶᠡᠬᠡ ᠪᠠᠬᠠ ᠨᠣᠶᠠᠳ ᠲᠣᠰᠪᠣᠷᠢ ᠯᠠᠮᠠ ᠪᠠᠨᠳᠢ ᠪᠣᠯᠭᠠᠪᠠᠢ ᠱᠠᠰᠢᠨ ᠢ᠋ ᠡᠷᠭᠦᠮᠵᠢᠯᠡᠵᠦ ᠃
ᠭᠠᠢᠬᠠᠮᠰᠢᠭ ᠲᠤ ᠪᠣᠭᠳᠠ ᠵᠠᠷᠯᠢᠭ ᠤ᠋ᠨ ᠮᠢᠩᠭᠠᠨ ᠭᠡᠷᠡᠯ ᠢ᠋ᠶ᠋ᠡᠷ ᠂
ᠬᠠᠷᠠᠩᠭᠤᠢ ᠮᠤᠩᠬᠠᠭ ᠤ᠋ᠨ ᠣᠶᠤᠨ ᠤ᠋ ᠯᠢᠬᠠᠸᠠ ᠴᠡᠴᠡᠭ ᠢ᠋ ᠳᠡᠯᠭᠡᠷᠡᠭᠦᠯᠵᠦ ᠂
ᠬᠠᠷᠰᠢᠯᠠᠭᠴᠢ ᠲᠡᠷᠰ ᠪᠤᠷᠤᠭᠤ ᠭᠦᠮᠦᠳᠠ ᠰᠡᠴᠢᠭ ᠢ᠋ ᠥᠮᠥᠷᠢᠭᠦᠯᠦᠭᠴᠢ ᠂
ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠪᠰᠦ᠋ᠨᠳᠡᠨ᠋ᠮ ᠵᠠᠮᠰᠤ ᠪᠤᠶᠠᠨ ᠲᠤ ᠳᠠᠯᠠᠢ ᠯᠠᠮᠠ ᠲᠡᠷᠢᠭᠦᠲᠡᠨ ᠪᠰᠦ᠋ᠨᠳᠡᠨ᠋ᠮ ᠷᠠᠭᠪᠠ ᠶ᠋ᠢᠨ ᠬᠤᠪᠢᠯᠭᠠᠨ ᠯᠠᠮᠠ ᠪᠠ ᠂
— — — —
①ᠠᠯᠲᠠᠨ ᠬᠠᠭᠠᠨ ᠤ᠋ ᠠᠴᠢ ᠪᠠᠶᠠᠭᠤᠨ ᠪᠠᠭᠠᠲᠤᠷ ᠲᠠᠢᠵᠢ ᠶ᠋ᠢᠨ ᠲᠠᠪᠤᠳᠤᠭᠠᠷ ᠬᠥᠪᠡᠭᠦᠨ ᠃ ᠭᠡᠷ ᠡᠴᠡ ᠭᠠᠷᠴᠤ ᠲᠣᠢᠨ ᠪᠣᠯᠤᠭᠰᠠᠨ ᠤ᠋ ᠣᠴᠢᠷᠠ ᠲᠡᠭᠦᠨ ᠢ᠋ ᠯᠠᠮᠠ ᠲᠠᠢᠵᠢ ᠭᠡᠳᠡᠭ ᠃
ᠮᠠᠨᠵᠤᠰᠢᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠯᠠᠮᠠ ①
ᠮᠠᠰᠢ ᠣᠯᠠᠨ ᠴᠢᠭᠤᠯᠭᠠᠨ ᠪᠤᠷᠰᠠᠩ ᠬᠤᠸᠠᠷᠠᠭ ᠤ᠋ᠳ ᠤ᠋ᠨ ᠠᠢᠮᠠᠭ ᠪᠦᠬᠦᠢ ᠪᠡᠷ᠂
ᠮᠠᠩᠯᠠᠢ ᠨᠣᠮ ᠤ᠋ᠨ ᠠᠯᠲᠠᠨ ᠬᠠᠭᠠᠨ ᠲᠡᠷᠢᠭᠦᠲᠡᠨ ᠶᠡᠬᠡ ᠪᠠᠭᠠ ᠨᠣᠶᠠᠳ ᠪᠦᠭᠦᠳᠡᠭᠡᠷ ᠂
ᠮᠠᠭᠠᠳ ᠢ᠋ᠶ᠋ᠠᠷ ᠡᠷᠲᠡᠨ ᠦ᠌ ᠲᠠᠬᠢᠯ ᠤ᠋ᠨ ᠣᠷᠣᠨ ᠂ ᠥᠭᠯᠢᠭᠡ ᠶ᠋ᠢᠨ ᠡᠵᠡᠨ ᠦ᠌ ᠨᠡᠷᠡ ᠴᠣᠯᠠ ᠡᠷᠭᠦᠮᠵᠡᠭᠰᠡᠨ ᠦ᠌ ᠶᠣᠰᠣᠭᠠᠷ ᠂
ᠬᠠᠭᠠᠨ ᠡᠬᠢᠯᠡᠨ ᠬᠠᠮᠤᠭ ᠡᠵᠡᠳ ᠪᠦᠭᠦᠳᠡᠭᠡᠷ ᠬᠠᠮᠤᠭ ᠢ᠋ ᠮᠡᠳᠡᠭᠴᠢ ᠳᠠᠯᠠᠢ ᠯᠠᠮᠠ ᠳ᠋ᠤᠷ ᠂
ᠭᠠᠢᠬᠠᠮᠰᠢᠭ᠋ ᠸᠴᠢᠷᠠ ᠳ᠋ᠠᠷᠠ ᠰᠠᠢᠨ ᠴᠣᠭ ᠲᠤ ᠪᠤᠶᠠᠨ ᠲᠤ ᠳᠠᠯᠠᠢ ᠭᠡᠮᠡᠨ ᠠᠯᠳᠠᠷᠰᠢᠭᠤᠯᠵᠤ ᠠᠯᠲᠠᠨ ᠲᠠᠮᠠᠭᠠ ᠡᠷᠭᠦᠪᠡᠢ ᠃
ᠭᠠᠪᠢᠶᠠ ᠲᠤ ᠰᠳᠤᠩᠭᠦᠷ ᠦ᠋ᠨ ᠬᠤᠪᠢᠯᠭᠠᠨ ᠯᠠᠮᠠ ᠳ᠋ᠤᠷ ᠮᠠᠨᠵᠤᠰᠢᠷᠢ ᠬᠤᠲᠤᠭ ᠲᠤ ᠴᠣᠯᠠ ᠡᠷᠭᠦᠪᠡ ᠃
ᠬᠠᠯᠠᠭᠠᠷ ᠪᠰᠦ᠋ᠨᠳᠡᠨ᠋ᠮ ᠭᠷᠬᠠᠪᠠ ᠶ᠋ᠢᠨ ᠬᠤᠪᠢᠯᠭᠠᠨ ᠯᠠᠮᠠ ᠳ᠋ᠤᠷ ᠮᠠᠢᠳᠠᠷᠢ ᠬᠤᠲᠤᠭ ᠲᠤ ᠴᠣᠯᠠ ᠡᠷᠭᠦᠪᠡᠢ ᠃
ᠠᠰᠢᠩ ᠯᠠᠮᠠ ᠶ᠋ᠢ ᠡᠩ ᠤᠷᠢᠳᠠ ᠠ᠋ᠴᠠ ᠱᠠᠰᠢᠨ ᠢ᠋ ᠳᠤᠷᠠᠳᠬᠠᠯ ᠢ᠋ ᠰᠡᠳᠦᠭᠦᠯᠵᠦ ᠂
ᠠᠷᠢᠭᠤᠨ ᠪᠤᠶᠠᠨ ᠲᠤ ᠦᠢᠯᠡᠰ ᠢ᠋ ᠦᠢᠯᠡᠳᠬᠡᠪᠡ ᠬᠡᠮᠡᠵᠦ ᠡᠴᠢᠭᠡ ᠯᠠᠮᠠ ᠴᠣᠯᠠ ᠰᠣᠶᠣᠷᠬᠠᠪᠠᠢ ᠃
ᠠᠰᠤᠷᠤ ᠮᠠᠰᠢ ᠬᠤᠲᠤᠭ ᠲᠤ ᠳᠠᠯᠠᠢ ᠯᠠᠮᠠ ᠶ᠋ᠢ ᠬᠢᠴᠢᠶᠡᠵᠦ ᠵᠠᠯᠠᠭᠰᠠᠨ ᠤ᠋ ᠲᠤᠯᠠᠳᠠ ᠂
ᠠᠴᠢᠯᠠᠵᠤ ᠰᠲᠠᠭᠯᠤᠩ ᠨᠠᠩᠰᠤ ᠶ᠋ᠢ ᠳᠠᠢᠴᠢᠩ ᠳᠠᠷᠬᠠᠨ ᠨᠠᠩᠰᠤ ᠴᠣᠯᠠ ᠰᠣᠶᠣᠷᠬᠠᠪᠠᠢ ᠃
— — — —
① ᠬᠣᠶᠠᠳᠤᠭᠠᠷ ᠲᠥᠷᠥᠯ ᠦ᠋ᠨ ᠰᠥᠩᠭᠦᠷ ᠦ᠋ᠨ ᠬᠤᠪᠢᠯᠭᠠᠨ ᠯᠠᠮᠠ ᠂ ᠨᠡᠷᠡ ᠨᠢ ᠶᠣᠨᠳᠠᠨᠵᠠᠮᠰᠤ ᠭᠡᠳᠡᠭ ᠃