ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ -  3 Эрдэнэ тунамал нэрт судар оршив - 3 ᠲᠡᠦᠬᠡ ᠰᠣᠶᠣᠯ

       ᠬᠥᠬᠡ ᠮᠣᠷᠢᠨ ᠵᠢᠯ① ᠡᠰᠡᠨ ᠲᠥᠭᠡᠯ ᠬᠠᠷᠢᠵᠤ ᠪᠠᠭᠤᠭᠰᠠᠨ ᠠᠵᠤᠭᠤ ᠃ 

       ᠪᠠᠷᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠢ᠋ᠶ᠋ᠡᠷ ᠰᠠᠩ ᠲᠣᠢᠨ ᠴᠠᠭᠠᠨ ᠬᠡᠷᠲᠡᠢ ᠳ᠋ᠦ᠍ᠷ ᠬᠤᠷᠠᠵᠤ ᠂ 

       ᠪᠠᠰᠠᠪᠠᠷ ᠠᠯᠲᠠᠨ ᠬᠠᠭᠠᠨ ᠂ ᠨᠣᠶᠠᠨ ᠳᠡᠷ᠎ᠡ ᠵᠢᠨᠦᠩ② ᠂ ᠬᠦᠨᠳᠦᠯᠡᠨ ᠬᠠᠭᠠᠨ ᠭᠤᠷᠪᠠᠭᠤᠯᠠ ᠂ 

— — — —  

① ᠵᠢᠶᠠ ᠵᠢᠩ ᠦ᠋ᠨ ᠬᠣᠷᠢᠨ ᠳᠥᠷᠪᠡᠳᠦᠭᠡᠷ ᠣᠨ (1545 ᠣᠨ ) ᠠ᠋ᠴᠠ ᠵᠢᠶᠠ ᠵᠢᠩ ᠦ᠋ᠨ ᠭᠤᠴᠢᠳᠤᠭᠠᠷ ᠣᠨ ( 1551 ᠣᠨ ) ᠬᠦᠷᠲᠡᠯᠡᠬᠢ ᠬᠣᠭᠣᠷᠣᠨᠳᠣ ᠬᠥᠬᠡ ᠮᠣᠷᠢᠨ ᠵᠢᠯ ᠭᠡᠵᠦ ᠦᠭᠡᠢ ᠶᠦ᠍ᠮ ᠃ ᠡᠨᠳᠡ ᠬᠡᠯᠡᠭᠰᠡᠨ ᠬᠥᠬᠡ ᠮᠣᠷᠢᠨ ᠵᠢᠯ ᠭᠡᠳᠡᠭ ᠨᠢ ᠬᠥᠬᠡ ᠡᠮ᠎ᠡ ᠮᠣᠭᠠᠢ ᠵᠢᠯ (ᠵᠢᠶᠠ ᠵᠢᠩ ᠦ᠋ᠨ ᠬᠣᠷᠢᠨ ᠳᠥᠷᠪᠡᠳᠦᠭᠡᠷ ᠣᠨ ᠂ 1545 ᠣᠨ ) ᠪᠤᠶᠤ ᠡᠰᠡᠬᠦᠯ᠎ᠡ ᠤᠯᠠᠭᠠᠨ ᠡᠷ᠎ᠡ ᠮᠣᠷᠢᠨ ᠵᠢᠯ ( ᠵᠢᠶᠠ ᠵᠢᠩ ᠦ᠋ᠨ ᠬᠣᠷᠢᠨ ᠲᠠᠪᠤᠳᠤᠭᠠᠷ ᠣᠨ ᠂ 1546 ᠣᠨ ） ᠊ᠢ ᠡᠨᠳᠡᠭᠦᠷᠡᠨ  ᠲᠡᠮᠳᠡᠭᠯᠡᠭᠰᠡᠨ ᠪᠣᠯᠤᠯᠲᠠᠢ ᠃ 

②ᠮᠡᠷᠭᠡᠨ ᠵᠢᠨᠦᠩ ᠦ᠋ᠨ ᠶᠡᠬᠡ ᠬᠥᠪᠡᠭᠦᠨ ᠃ ᠬᠢᠲᠠᠳ ᠪᠢᠴᠢᠭ ᠲᠦ᠍能言大儿吉能 ᠭᠡᠬᠦ ᠪᠤᠶᠤ ᠳᠥᠭᠥᠮᠴᠢᠯᠡᠨ吉能 ᠭᠡᠵᠦ ᠪᠢᠴᠢᠳᠡᠭ ᠃ 《 ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ 》 ᠳ᠋ᠤ᠌ ᠨᠣᠶᠠᠨ ᠳᠡᠷ᠎ᠡ ᠮᠣᠷᠢᠨ ᠵᠢᠯᠲᠡᠢ ( ᠵᠢᠶᠠ ᠵᠢᠩ ᠦ᠋ᠨ ᠲᠡᠷᠢᠭᠦᠨ ᠣᠨ ᠂ 1522 ᠣᠨ ) ᠂ ᠭᠤᠴᠢ ᠶᠢᠰᠦᠨ ᠨᠠᠰᠤᠨ ᠳ᠋ᠠᠭᠠᠨ ᠴᠠᠭᠠᠨ ᠪᠡᠴᠢᠨ ᠵᠢᠯ ( ᠵᠢᠶᠠ ᠵᠢᠩ ᠦ᠋ᠨ ᠭᠤᠴᠢ ᠶᠢᠰᠦᠳᠦᠭᠡᠷ ᠣᠨ ᠂ 1560 ᠣᠨ ) ᠵᠢᠨᠦᠩ ᠰᠠᠭᠤᠵᠤ ᠬᠣᠷᠢᠨ ᠭᠤᠷᠪᠠᠨ ᠵᠢᠯ ᠪᠣᠯᠤᠭᠠᠳ ᠲᠠᠪᠢᠨ ᠭᠤᠷᠪᠠᠨ ᠨᠠᠰᠤᠨ ᠳ᠋ᠠᠭᠠᠨ ᠬᠥᠬᠡ ᠨᠣᠬᠠᠢ ᠵᠢᠯ ( ᠸᠠᠨ ᠯᠢ ᠶ᠋ᠢᠨ ᠬᠣᠶᠠᠳᠤᠭᠠᠷ ᠣᠨ ᠂ 1574 ᠣᠨ ) ᠬᠠᠯᠢᠪᠠᠢ ᠭᠡᠳᠡᠭ ᠃ ᠭᠡᠲᠡᠯ᠎ᠡ 1560 ᠣᠨ ᠠ᠋ᠴᠠ 1574 ᠣᠨ ᠬᠦᠷᠲᠡᠯ᠎ᠡ ᠠᠷᠪᠠᠨ ᠲᠠᠪᠤᠨ ᠵᠢᠯ ᠲᠡᠳᠦᠢ ᠡᠴᠡ ᠪᠤᠰᠤ ᠬᠣᠷᠢᠨ ᠭᠤᠷᠪᠠᠨ ᠵᠢᠯ ᠪᠤᠰᠤ ᠃ ᠲᠡᠭᠦᠨ ᠦ ᠬᠠᠯᠢᠭᠰᠠᠨ ᠣᠨ ᠨᠢ ᠮᠥᠨ ᠴᠦ᠍ ᠬᠢᠲᠠᠳ ᠪᠢᠴᠢᠭ ᠲᠡᠢ ᠠᠳᠠᠯᠢ ᠦᠭᠡᠢ ᠃ 《 ᠸᠠᠨ ᠯᠢ ᠡᠦ ᠬᠦᠩ ᠯᠦ᠍ 》 ᠪᠢᠴᠢᠭ ᠲᠠᠬᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠴᠠᠳᠢᠭ ᠲᠤ᠌ ᠲᠡᠮᠳᠡᠭᠯᠡᠭᠰᠡᠨ ᠢ᠋ ᠦᠨᠳᠦᠰᠦᠯᠡᠪᠡᠯ ᠨᠣᠶᠠᠨ ᠳᠡᠷ᠎ᠡ ᠵᠢᠨᠦᠩ ᠯᠦᠩ ᠴᠢᠩ (隆庆) ᠦ᠋ᠨ ᠵᠢᠷᠭᠤᠳᠤᠭᠠᠷ ᠣᠨ ᠤ᠋ ᠭᠤᠷᠪᠠᠳᠤᠭᠠᠷ ᠰᠠᠷ᠎ᠠ ᠶ᠋ᠢᠨ ᠰᠢᠨᠢᠨ ᠭᠤᠷᠪᠠᠨ ᠤ᠋ ᠡᠳᠦᠷ ᠬᠠᠯᠢᠵᠠᠢ ᠃ ᠬᠢᠨᠠᠪᠠᠰᠤ ᠮᠡᠷᠭᠡᠨ ᠵᠢᠨᠦᠩ ᠨᠢ ᠶ᠋ᠢᠶᠠ ᠵᠢᠩ ᠦ᠋ᠨ ᠬᠣᠷᠢᠨ ᠨᠢᠭᠡᠳᠦᠭᠡᠷ ᠣᠨ ( 1542 ) ᠲᠤᠷ ᠬᠠᠯᠢᠵᠤ ᠨᠣᠶᠠᠨ ᠳᠡᠷ᠎ᠡ ᠨᠢ ᠵᠢᠶᠠ ᠵᠢᠩ ᠦ᠋ᠨ ᠬᠣᠷᠢᠨ ᠭᠤᠷᠪᠠᠳᠤᠭᠠᠷ ᠣᠨ ( 1544 ) ᠳ᠋ᠦ᠍ ᠬᠣᠷᠢᠨ ᠭᠤᠷᠪᠠᠨ ᠨᠠᠰᠤᠨ ᠳ᠋ᠠᠭᠠᠨ ᠵᠢᠨᠦᠩ ᠰᠠᠭᠤᠵᠤ ᠂ ᠬᠣᠷᠢ ᠶᠢᠰᠦᠨ ᠣᠨ ᠪᠣᠯᠤᠭᠠᠳ ᠯᠦᠩ ᠴᠢᠩ ᠦ᠋ᠨ ᠵᠢᠷᠭᠤᠳᠤᠭᠠᠷ ᠣᠨ ( 1572 )7 ᠳ᠋ᠤ᠌ ᠬᠠᠯᠢᠭᠰᠠᠨ ᠪᠣᠯᠤᠯᠲᠠᠢ ᠃  

       ᠪᠠᠭᠠᠲᠤᠷ ᠳᠦᠭᠦᠷᠡᠩ ᠰᠡᠩᠭᠡ①   ᠨᠣᠶᠠᠨ ᠢ᠋ᠶ᠋ᠠᠷ ᠴᠡᠷᠢᠭ ᠢ᠋ ᠤᠳᠤᠷᠢᠳᠴᠤ ᠂ 

       ᠪᠠᠷᠠᠭᠤᠨ ᠭᠤᠷᠪᠠᠨ ᠲᠦᠮᠡᠨ ᠬᠢᠲᠠᠳ ᠤᠯᠤᠰ ᠲᠤᠷ ᠰᠢᠷᠠ ᠳᠠᠯᠠ ᠨᠡᠷᠡᠲᠦ ᠰᠦᠪᠡ ② ᠳ᠋ᠦ᠍ᠷ ᠣᠷᠣᠵᠤ ᠂  

— — — — 

① ᠬᠡᠳᠡᠳ ᠪᠢᠴᠢᠭ ᠲᠦ᠍ 辛爱 ᠪᠤᠶᠤ僧格 ᠭᠡᠳᠡᠭ ᠃ ᠠᠯᠲᠠᠨ ᠬᠠᠭᠠᠨ ᠤ᠋ ᠠᠬᠠᠮᠠᠳ ᠬᠥᠪᠡᠭᠦᠨ ᠪᠣᠯᠬᠤ ᠲᠤᠯᠠ ᠬᠣᠩ ᠲᠠᠢᠵᠢ ᠭᠡᠬᠦ ᠪᠤᠶᠤ ᠬᠢᠲᠠᠳ ᠪᠢᠴᠢᠭ ᠲᠦ᠍ ᠪᠠᠰᠠ ᠬᠤᠸᠠᠩ ᠲᠠᠢ ᠶ᠋ᠢ （黄台吉） ᠭᠡᠳᠡᠭ ᠃ ᠠᠯᠲᠠᠨ ᠬᠠᠭᠠᠨ  ᠬᠠᠯᠢᠭᠰᠠᠨ ᠤ᠋ ᠬᠣᠢᠨ᠎ᠠ ᠬᠠᠭᠠᠨ ᠣᠷᠣ ᠵᠠᠯᠭᠠᠮᠵᠢᠯᠠᠵᠤ ᠰᠡᠴᠡᠨ ᠬᠠᠭᠠᠨ ᠭᠡᠵᠦ ᠠᠯᠳᠠᠷᠰᠢᠵᠠᠢ ᠃ ᠬᠢᠲᠠᠳ ᠪᠢᠴᠢᠭ ᠲᠦ᠍ ᠡᠭᠦᠨ ᠢ᠋ ᠠᠪᠢᠶᠠᠴᠢᠯᠠᠨ ᠴᠢ ᠴᠢᠩ ᠬᠠ 《气庆哈》 ᠭᠡᠵᠦ ᠲᠡᠮᠳᠡᠭᠯᠡᠵᠡᠢ ᠃ ᠭᠣᠣ  ᠸᠸᠨ ᠲᠧ （高文德）ᠨᠠᠷ ᠤ᠋ᠨ ᠨᠠᠢᠷᠠᠭᠤᠯᠤᠭᠰᠠᠨ《 ᠮᠧᠳᠡᠩ ᠬᠦ᠌  ᠱᠢ ᠰᠢ 》 （蒙古世系） ᠭᠡᠬᠦ ᠪᠢᠴᠢᠭ ᠦ᠋ᠨ ᠬᠦᠰᠦᠨᠦᠭ ᠠᠷᠪᠠᠨ ᠲᠠᠪᠤ ᠳ᠋ᠤ᠌ 黄台吉，辛爱，僧格 ᠭᠡᠰᠡᠨ ᠢ᠋ ᠠᠯᠲᠠᠨ ᠬᠠᠭᠠᠨ ᠤ᠋ ᠭᠤᠷᠪᠠᠨ ᠬᠥᠪᠡᠭᠦᠨ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠪᠤᠷᠤᠭᠤ ᠪᠣᠯᠵᠠᠢ ᠃ 

② ᠵᠢᠶᠠ ᠵᠢᠩ ᠦ᠋ᠨ ᠬᠣᠷᠢᠳᠤᠭᠠᠷ ᠣᠨ （ 1541 ） ᠦ᠌ ᠳᠣᠯᠣᠳᠤᠭᠠᠷ ᠰᠠᠷ᠎ᠠ ᠳ᠋ᠤ᠌ ᠠᠯᠲᠠᠨ ᠬᠠᠭᠠᠨ ᠱᠢ ᠲᠢᠶᠠᠨ ᠵᠢᠦᠸᠠᠢ（石天爵 ） ᠺᠧᠨᠴᠠᠢ（肯切） ᠨᠠᠷ ᠢ᠋ ᠡᠯᠴᠢᠨ ᠢ᠋ᠶ᠋ᠡᠷ ᠲᠣᠮᠢᠯᠠᠨ ᠳᠠ ᠲᠦᠩ ᠪᠤᠭᠤᠮᠳᠠᠨ᠎ᠠ ᠣᠴᠢᠭᠤᠯᠵᠤ ᠬᠠᠷᠢᠯᠴᠠᠨ ᠠᠷᠠᠯᠵᠢᠶ᠎ᠠ ᠨᠡᠪᠲᠡᠷᠡᠬᠦ ᠶᠠᠪᠤᠳᠠᠯ ᠢ᠋ ᠰᠠᠨᠠᠭᠠᠴᠢᠯᠠᠨ 《 ᠬᠢᠵᠠᠭᠠᠷ ᠤ᠋ᠨ ᠢᠷᠭᠡᠨ ᠪᠣᠭᠣᠮᠲᠠ ᠶ᠋ᠢᠨ ᠳᠣᠲᠣᠷ᠎ᠠ ᠲᠠᠷᠢᠶ᠎ᠠ ᠲᠣᠮᠣᠰᠤ ᠲᠠᠷᠢᠵᠤ ᠂ ᠮᠣᠩᠭᠣᠯᠴᠤᠳ ᠪᠣᠭᠣᠮᠲᠠ ᠶ᠋ᠢᠨ ᠭᠠᠳᠠᠨ᠎ᠠ ᠠᠳᠤᠭᠤ ᠮᠠᠯ ᠮᠠᠯᠵᠢᠨ ᠠᠮᠢᠳᠤᠷᠠᠵᠤ 》 ᠂ ᠬᠠᠷᠢᠯᠴᠠᠨ ᠦᠯᠦ ᠬᠠᠯᠳᠠᠬᠤ ᠡᠪ ᠨᠠᠢᠷᠠᠮᠳᠠᠭᠤ ᠣᠷᠣᠰᠢᠨ ᠶᠠᠪᠤᠬᠤᠢ ᠶ᠋ᠢ ᠪᠡᠶᠡᠯᠡᠭᠳᠡᠭᠦᠯᠦᠶ᠎ᠡ ᠭᠡᠵᠡᠢ ᠃ ᠭᠡᠲᠡᠯ᠎ᠡ ᠲᠠᠢᠮᠢᠩ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠡᠨᠡ ᠬᠦ᠌ ᠰᠠᠨᠠᠭᠠᠴᠢᠯᠠᠬ᠎ᠠ ᠶ᠋ᠢ ᠡᠰᠡ ᠵᠥᠪᠰᠢᠶᠡᠬᠦ ᠪᠡᠷ ᠦᠯᠦ ᠪᠠᠷᠠᠮ ᠬᠠᠷᠢᠨ ᠡᠯᠴᠢᠨ ᠪᠣᠯᠤᠭᠰᠠᠨ ᠺᠧᠨᠴᠠᠢ ᠶ᠋ᠢ ᠪᠠᠷᠢᠪᠴᠢᠯᠠᠨ ᠬᠣᠷᠢᠬᠤ ᠶ᠋ᠢᠨ ᠵᠡᠷᠭᠡᠪᠡᠷ ᠶᠡᠬᠡ ᠮᠥᠩᠭᠥ ᠭᠠᠷᠭᠠᠨ ᠠᠯᠲᠠᠨ ᠬᠠᠭᠠᠨ ᠤ᠋ ᠲᠡᠷᠢᠭᠦᠨ ᠢ᠋ ᠬᠤᠳᠠᠯᠳᠤᠨ ᠠᠪᠬᠤ ᠭᠡᠵᠦ ᠵᠠᠷ  ᠲᠤᠩᠬᠠᠭ ᠲᠠᠷᠬᠠᠭᠠᠵᠤ ᠪᠠᠢᠯ᠎ᠠ ᠃ ᠲᠡᠭᠦᠨ ᠦ᠌ ᠬᠣᠢᠨ᠎ᠠ ᠮᠥᠨ ᠳᠠᠷᠠᠭ᠎ᠠ ᠵᠢᠯ ᠦ᠋ᠨ ᠢᠯᠡᠭᠦᠦ ᠲᠠᠪᠤᠨ ᠰᠠᠷ᠎ᠠ ᠳ᠋ᠤ᠌ ᠠᠯᠲᠠᠨ ᠬᠠᠭᠠᠨ ᠳᠠᠬᠢᠨ ᠡᠯᠴᠢᠨ ᠲᠣᠮᠢᠯᠠᠨ ᠱᠢ ᠲᠢᠶᠠᠨ  ᠵᠢᠦᠸᠠᠢ ᠨᠠᠷ ᠢ᠋ ᠪᠤᠭᠤᠮᠳᠠᠨ᠎ᠠ ᠣᠷᠣᠭᠤᠯᠵᠤ ᠮᠥᠨ ᠡᠪ ᠨᠠᠢᠷᠠᠮᠳᠠᠭᠤ ᠪᠣᠯᠬᠤ ᠶᠠᠪᠤᠳᠠᠯ ᠢ᠋ ᠳᠠᠬᠢᠨ ᠨᠢᠭᠡ ᠤᠳᠠᠭ᠎ᠠ ᠰᠠᠨᠠᠭᠠᠴᠢᠯᠠᠪᠠ ᠃ ᠭᠡᠲᠡᠯ᠎ᠡ ᠳᠠᠢᠮᠢᠩ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠡᠨᠡ ᠬᠦ᠌ ᠱᠠᠭᠠᠷᠳᠠᠯᠭ᠎ᠠ ᠶ᠋ᠢ ᠡᠰᠡ ᠵᠥᠪᠰᠢᠶᠡᠷᠡᠬᠦ ᠪᠡᠷ ᠦᠯᠦ ᠪᠠᠷᠠᠮ ᠱᠢ ᠲᠢᠶᠠᠨ  ᠵᠢᠦᠸᠠᠢ᠂  ᠺᠧᠨᠴᠠᠢ ᠨᠠᠷ ᠢ᠋ ᠠᠯᠠᠭᠠᠳ ᠲᠡᠷᠢᠭᠦᠨ ᠢ᠋ ᠣᠭᠲᠣᠯᠤᠨ ᠵᠠᠬ᠎ᠠ ᠬᠢᠵᠠᠭᠠᠷ ᠤ᠋ᠨ ᠢᠷᠭᠡᠨ ᠳ᠋ᠦ᠍ᠷ ᠦᠵᠡᠭᠦᠯᠵᠡᠢ ᠃ ᠡᠨᠡ ᠤᠴᠢᠷ ᠢ᠋ ᠰᠣᠨᠣᠰᠤᠭᠰᠠᠨ ᠳᠠᠷᠤᠢ ᠠᠯᠲᠠᠨ ᠬᠠᠭᠠᠨ ᠶᠡᠬᠡᠳᠡ ᠬᠢᠯᠢᠩᠯᠡᠨ ᠵᠢᠯ ᠳᠠᠷᠠᠭᠠᠯᠠᠨ ᠴᠡᠷᠢᠭ ᠭᠠᠷᠭᠠᠵᠤ ᠬᠢᠲᠠᠳ ᠭᠠᠵᠠᠷ ᠢ᠋ ᠤᠤᠯᠭᠠᠯᠠᠨ ᠳᠤᠪᠠᠳᠣᠯᠵᠤ ᠳᠠᠢᠮᠢᠩ ᠤᠯᠤᠰ ᠠ᠋ᠴᠠ ᠥᠰᠢᠯ ᠥᠰᠢᠨ ᠬᠢᠰᠠᠯ ᠭᠢᠰᠡᠬᠦ ᠪᠣᠯᠵᠠᠢ ᠃ ᠡᠨᠡ ᠤᠳᠠᠬ᠎ᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠪᠣᠯ ᠵᠢᠶᠠ ᠵᠢᠩ ᠦ᠋ᠨ ᠬᠣᠷᠢ ᠶᠢᠰᠦᠳᠦᠭᠡᠷ ᠣᠨ （ 1550 ᠣᠨ ） ᠤ᠋ ᠨᠠᠮᠤᠷ ᠤ᠋ᠨ ᠨᠠᠢ᠍ᠮᠠᠳᠤᠭᠠᠷ ᠰᠠᠷ᠎ᠠ ᠳ᠋ᠤ᠌ ᠪᠣᠯᠤᠭᠰᠠᠨ ᠪᠢᠯᠡ ᠃ ᠲᠤᠰ ᠵᠢᠯ ᠦ᠋ᠨ ᠡᠰᠢ ᠡᠷᠬᠡᠲᠡᠨ ᠨᠢ ᠴᠠᠭᠠᠨ ᠨᠣᠬᠠᠢ ᠪᠣᠯᠬᠤ ᠶ᠋ᠢᠨ ᠲᠤᠯᠠ ᠲᠡᠦᠬᠡ ᠪᠢᠴᠢᠭ ᠲᠦ᠍ ᠡᠭᠦᠨ ᠢ᠋ ᠴᠠᠭᠠᠨ ᠨᠣᠬᠠᠢ ᠵᠢᠯ ᠦ᠋ᠨ ᠬᠤᠪᠢᠰᠤᠯ ᠭᠡᠳᠡᠭ ᠃ 《 ᠮᠢᠩ ᠱᠢ ᠵᠢᠢ ᠱᠢ ᠹᠧᠨ ᠮᠦᠸᠧ ) (明史纪事本末 ) ᠭᠡᠬᠦ ᠪᠢᠴᠢᠭ ᠦ᠋ᠨ ᠠᠯᠲᠠᠨ ᠤ᠋ ᠠᠯᠪᠠ ᠪᠠᠷᠢᠯᠭ᠎ᠠ ᠭᠡᠬᠦ ᠪᠦᠯᠦᠭ ᠳᠠᠬᠢ ᠵᠢᠶᠠ ᠵᠢᠩ ᠦ᠋ᠨ ᠬᠣᠷᠢ ᠵᠢᠰᠦᠨ ᠣᠨ ᠤ᠋ ᠨᠠᠮᠤᠷ ᠤ᠋ᠨ ᠨᠠᠢ᠍ᠮᠠᠳᠤᠭᠠᠷ ᠰᠠᠷ᠎ᠠ ᠶ᠋ᠢᠨ ᠲᠡᠮᠳᠡᠭᠯᠡᠯ ᠦ᠋ᠨ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠄  ᠠᠯᠲᠠᠨ ᠢ᠋ᠶ᠋ᠠᠷ ᠰᠢᠦᠸᠠᠨ ᠹᠦ ᠶ᠋ᠢ ᠳᠠᠪᠠᠭᠠᠳ ᠵᠢᠢ ᠵᠧᠦ ᠪᠣᠭᠣᠮᠲᠠ (蓟州塞 ) ᠪᠠᠷ ᠶᠠᠪᠤᠵᠤ ᠮᠣᠯᠲᠣᠰᠢ ᠬᠠᠭᠠᠯᠭ᠎ᠠ (古北口 ) ᠪᠠᠷ ᠣᠷᠣᠵᠤ ᠢᠷᠡᠭᠡᠳ ᠱᠦᠨ ᠡᠢ (顺义 ) ᠶ᠋ᠢ ᠪᠦᠰᠡᠯᠡᠨ ᠨᠢᠭᠡᠨ  ᠠᠮᠢᠰᠬᠤᠭ᠎ᠠ ᠪᠠᠷ ᠰᠢᠭᠤᠳ ᠳᠣᠲᠣᠭᠰᠢ ᠣᠷᠣᠵᠤ ᠢᠷᠡᠪᠡᠢ ᠃ ᠰᠢᠷ᠎ᠠ ᠪᠠᠷᠰ ᠡᠳᠦᠷ᠎ᠡ ᠲᠦᠩ ᠵᠧᠦ (通州 ) ᠶ᠋ᠢ ᠰᠢᠬᠠᠮᠳᠠᠭᠤᠯᠤᠨ ᠮᠢ ᠶᠦᠨ (密云 ) ᠂ ᠰᠠᠨ ᠧ ( 三河) ᠂ ᠴᠠᠩ ᠫᠢᠩ (昌平 ) ᠵᠡᠷᠭᠡ ᠣᠯᠠᠨ ᠭᠠᠵᠠᠷ ᠊ᠢ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠪᠡᠢ ᠃ ᠴᠠᠭᠠᠭᠴᠢᠨ ᠮᠣᠭᠠᠢ ᠡᠳᠦᠷ᠎ᠡ ᠨᠡᠶ᠋ᠢᠰᠯᠡᠯ ᠬᠣᠲᠠᠨ᠎ᠠ ᠣᠢᠷᠠᠲᠤᠨ ᠢᠷᠡᠪᠡᠢ ᠃ ᠬᠠᠷ᠎ᠠ ᠮᠣᠷᠢᠨ ᠡᠳᠦᠷ ᠠᠯᠲᠠᠨ ᠢ᠋ᠶ᠋ᠠᠷ ᠠᠯᠪᠠ ᠪᠠᠷᠢᠬᠤ ᠬᠡᠮᠡ ᠭᠤᠶᠤᠭᠰᠠᠨ᠎ᠠ ᠣᠷᠳᠣᠨ ᠤ᠋ ᠰᠠᠢᠳ ᠲᠦᠰᠢᠮᠡᠯ ᠨᠠᠷ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠤᠷᠠᠨ ᠵᠥᠪᠯᠡᠯᠳᠦᠪᠡᠢ᠃ ᠬᠠᠷᠠᠭᠴᠢᠨ ᠬᠣᠨᠢᠨ ᠡᠳᠦᠷ᠎ᠡ ᠠᠯᠲᠠᠨ ᠨᠠᠷ ᠬᠠᠭᠠᠨ ᠤ᠋ ᠣᠩᠭᠣᠨ ᠯᠤᠭ᠎ᠠ ᠬᠠᠯᠳᠠᠵᠤ ᠰᠢ ᠱᠠᠨ ( 西山 ) ᠂ ᠯᠢᠶᠠᠩ ᠰᠢᠶᠠᠩ (良乡 )᠎ᠠᠴᠠ ᠪᠠᠷᠠᠭᠤᠨᠳᠠᠬᠢ ᠭᠠᠵᠠᠷ ᠢ᠋ ᠤᠤᠯᠭᠠᠯᠠᠨ ᠪᠤᠯᠢᠶᠠᠭᠠᠳ ᠳᠠᠷᠤᠢ ᠵᠡᠭᠦᠨᠰᠢ ᠣᠳᠬᠤᠶ᠎ᠠ ᠨᠡᠢᠰᠯᠡᠯ ᠬᠣᠲᠠ ᠲᠦᠭᠰᠢᠭᠦᠷᠢ᠎ᠡᠴᠡ ᠮᠤᠯᠲᠤᠷᠠᠪᠠᠢ 》 ᠭᠡᠵᠡᠢ ᠃ ᠳᠡᠭᠡᠷ᠎ᠡ ᠥᠭᠦᠯᠡᠭᠰᠡᠨ ᠲᠡᠮᠳᠡᠭᠯᠡᠯ ᠊ᠢ ᠦᠨᠳᠦᠰᠦᠯᠡᠨ ᠠᠯᠲᠠᠨ ᠬᠠᠭᠠᠨ ᠤ᠋ ᠴᠡᠷᠢᠭ ᠣᠷᠣᠭᠰᠠᠨ ᠵᠠᠮ ᠱᠤᠭᠤᠮ ᠊ᠢ ᠨᠠᠷᠢᠪᠴᠢᠯᠠᠨ ᠰᠢᠨᠵᠢᠪᠡᠰᠦ ᠂ ᠰᠢᠷ᠎ᠠ ᠲᠠᠯ᠎ᠠ ᠭᠡᠳᠡᠭ ᠨᠢ ᠳᠠᠷᠤᠢ 黄花坪 ᠭᠡᠬᠦ ᠭᠠᠵᠠᠷ ᠢ᠋ ᠵᠢᠭᠠᠭᠰᠠᠨ ᠪᠢᠯᠡ ᠃ 

       ᠬᠠᠷᠢᠳᠠᠨ ᠳᠠᠢᠰᠤᠨ ᠢ᠋ ᠳᠣᠪᠲᠣᠯᠤᠨ ᠣᠳᠬᠤᠢ ᠶ᠋ᠢ ᠢᠨᠤ ᠮᠡᠳᠡᠭᠡᠳ 

       ᠬᠠᠷᠠ ᠬᠢᠲᠠᠳ ᠤ᠋ᠨ ᠪᠠᠢᠷᠢ ᠭᠠᠷᠴᠤ ᠰᠦᠪᠡ ᠶ᠋ᠢᠨ ᠠᠮᠰᠠᠷ ᠬᠠᠭᠠᠭᠰᠠᠨ ᠳ᠋ᠤᠷ ᠂ 

       ᠬᠠᠲᠠᠭᠤ ᠶᠡᠬᠡ ᠬᠦᠴᠦᠲᠦ ᠰᠡᠩᠭᠡ ᠨᠣᠶᠠᠨ ᠪᠡᠶ᠎ᠡ ᠪᠡᠷ ᠤᠷᠢᠤᠠᠴᠤ ᠳᠠᠷᠤᠭᠠᠳ 

       ᠭᠠᠢᠬᠠᠮᠰᠢᠭ ᠶᠡᠬᠡ ᠣᠯᠵᠠ ᠲᠠᠯᠠᠬ᠎ᠠ ᠠᠪᠤᠭᠠᠳ ᠬᠠᠷᠢᠨ ᠪᠠᠰᠠᠬᠦ ᠂ 

       ᠲᠠᠶ᠋ᠢᠮᠢᠩ ᠬᠠᠭᠠᠨ ᠤ᠋ ᠬᠣᠲᠠ ① ᠶ᠋ᠢᠨ ᠭᠠᠳᠠᠨ᠎ᠠ ᠬᠦᠷᠴᠦ ᠡᠬᠢᠯᠡᠭᠡᠳ ᠂ 

— — — — 

① ᠲᠠᠢᠮᠢᠩ ᠤᠯᠤᠰ ᠤ᠋ᠨ ᠨᠡᠢᠰᠯᠡᠯ ᠬᠣᠲᠠ ᠶ᠋ᠢ ᠵᠢᠭᠠᠵᠤ ᠪᠣᠢ ᠂ ᠣᠳᠣ ᠶ᠋ᠢᠨ ᠪᠡᠭᠡᠵᠢᠩ ᠃  

       ᠳᠠᠢᠯᠠᠯᠳᠤᠨ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠢ᠋ ᠠᠨᠤ ᠰᠠᠮᠰᠢᠶᠠᠭᠠᠳ ᠂ 

       ᠳᠠᠬᠢ ᠶᠡᠬᠡ ᠤᠯᠤᠰ ᠪᠠᠶᠠᠰᠬᠤᠯᠠᠩ ᠲᠠᠶ᠎ᠠ ᠣᠯᠵᠠ ᠣᠯᠤᠭᠠᠳ ᠂ 

       ᠲᠠᠲᠠᠵᠤ ᠠᠯᠲᠠᠨ  ᠵᠢᠯᠤᠭᠤᠪᠠᠨ ᠵᠠᠯᠠᠷᠠᠵᠤ ᠲᠤᠰ ᠲᠤᠰ ᠪᠦᠷᠢ ᠪᠠᠭᠤᠪᠠᠢ ᠃ 

       ᠬᠣᠢᠨᠠ ᠢᠨᠤ ᠬᠢᠲᠠᠳ ᠤ᠋ᠨ ᠲᠠᠢᠮᠢᠩ ᠬᠠᠭᠠᠨ ᠶᠠᠩᠬᠤᠴᠠᠭ① ᠨᠡᠷᠡᠲᠦ ᠬᠥᠮᠦᠨ ᠢ᠋ᠶ᠋ᠡᠷ ᠂ 

       ᠬᠣᠲᠠᠯᠠ ᠶ᠋ᠢᠨ ᠡᠷᠭᠢᠨ ᠠᠯᠲᠠᠨ ᠬᠠᠭᠠᠨ ᠤ᠋ ᠨᠡᠷ᠎ᠡ ᠠᠯᠳᠠᠷ ᠠ᠋ᠴᠠ ᠡᠮᠢᠶᠡᠵᠦ ᠂ 

       ᠬᠣᠣᠷ ᠲᠠᠨ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠨ ᠬᠢᠳᠵᠤ ᠪᠠᠷᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠ ᠂ 

       ᠬᠤᠳᠠᠯ ᠳ᠋ᠤ᠌ ②ᠨᠡᠷ᠎ᠡ ᠱᠠᠩ ᠠᠪᠤᠯᠴᠠᠵᠤ ᠢᠨᠠᠭᠰᠢ ᠴᠢᠨᠠᠭᠰᠢ ᠵᠤᠬᠢᠶᠤᠪᠠᠰᠤ ᠰᠠᠢᠨ ᠪᠤᠶᠤ ᠂ 

       ᠬᠡᠮᠡᠵᠦ ᠢᠯᠡᠭᠡᠭᠰᠡᠨ ᠡᠯᠴᠢ ᠯᠦᠭᠡ ᠠᠳᠤᠭᠤᠴᠢ ③ᠨᠡᠷᠡᠲᠦ ᠬᠥᠮᠦᠨ ᠢ᠋ ᠢᠯᠡᠭᠡᠭᠡᠳ ᠂ 

       ᠬᠡᠷᠡᠮ ᠦ᠋ᠨ ᠭᠠᠳᠠᠨ᠎ᠠ ᠶᠡᠬᠡ ᠴᠡᠷᠢᠭ ᠢ᠋ᠶ᠋ᠡᠨ ᠠᠪᠤᠭᠠᠳ ᠡᠬᠢᠯᠡᠵᠦ ᠂ 

— — — — 

①ᠵᠠᠩ ᠶᠠᠨ ᠸᠸᠨ ( 张彦文 ) ᠦ᠌ ᠣᠨᠳᠣᠣ ᠨᠡᠷ᠎ᠡ ᠃ 《ᠸᠠᠨ ᠯᠢ ᠡᠦ ᠬᠦᠩ ᠯᠦ᠍ 》 ᠪᠢᠴᠢᠭ ᠲᠠᠬᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠴᠠᠳᠢᠭ ᠢ᠋ ᠦᠨᠳᠦᠰᠦᠯᠡᠪᠡᠯ ᠂ ᠵᠠᠩ ᠶᠠᠨ ᠸᠸᠨ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠲᠤ᠌ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠣᠢᠨ᠎ᠠ ᠬᠢᠲᠠᠳ ᠤ᠋ᠨ ᠭᠠᠵᠠᠷ ᠲᠤ᠌ ᠵᠢᠭᠤᠲᠠᠨ ᠣᠴᠢᠭᠠᠳ ᠬᠡᠯᠡᠮᠦᠷᠴᠢ ᠪᠣᠯᠪᠠ ᠃ ᠵᠢᠶᠠ ᠵᠢᠩ ᠦ᠋ᠨ ᠳᠥᠴᠢᠳᠦᠭᠡᠷ ᠣᠨ (1561 ᠣᠨ) ᠳ᠋ᠤ᠌ ᠳᠠᠬᠢᠨ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠵᠢᠭᠤᠲᠠᠨ ᠢᠷᠡᠵᠦ ᠨᠡᠷ᠎ᠡ ᠪᠡᠨ ᠬᠠᠯᠠᠨ ᠶᠠᠩ ᠬᠤ᠌ ᠴᠠᠩ (羊忽厂 ) ᠭᠡᠵᠡᠢ ᠃ 

②ᠬᠤᠳᠠᠯᠳᠤᠭ᠎ᠠ ᠶ᠋ᠢᠨ ᠬᠠᠭᠤᠴᠢᠨ ᠪᠢᠴᠢᠯᠭᠡ ᠃ 

③ ᠬᠢᠲᠠᠳ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠦ᠍ ᠶᠠ ᠲᠧᠦ ᡁᠢ (丫头智 ) ᠭᠡᠵᠦ ᠪᠢᠴᠢᠳᠡᠭ ᠃ 

       ᠬᠡᠯᠡᠯᠴᠡᠵᠦ ᠭᠤᠷᠪᠠᠨ ᠲᠦᠮᠡᠨ ᠢ᠋ᠶ᠋ᠡᠷ ᠲᠤᠰ ᠪᠦᠷᠢ ᠮᠣᠷᠳᠠᠭᠠᠳ ᠰᠢᠬᠠᠵᠤ᠂ 

       ᠬᠡᠲᠦᠷᠬᠡᠶ᠎ᠡ ᠶᠡᠬᠡ ᠰᠠᠩ ᠲᠠᠲᠠᠯᠭ᠎ᠠ ᠠᠪᠴᠤ ᠪᠠᠭᠤᠭᠰᠠᠨ ᠠᠵᠤᠭᠤ ᠃ ① 

       ᠬᠠᠷᠢᠵᠤ ᠪᠠᠭᠤᠭᠠᠳ ᠰᠡᠴᠡ ᠦᠯᠦ ᠤᠳᠠᠨ ᠳᠠᠷᠤᠢ ᠳ᠋ᠤᠷ ᠴᠠᠭᠠᠨ ᠭᠠᠬᠠᠢ ᠵᠢᠯ᠎ᠡ ② 

       ᠬᠠᠷᠢᠲᠠᠨ ᠬᠢᠲᠠᠳ ᠤ᠋ᠨ ᠪᠢᠯᠠᠨ ᠵᠠᠭᠤᠨ ᠣᠮᠣᠭ ᠲᠠᠨ③ ᠯᠠᠪᠠ ④᠂ ᠢᠪᠠᠩ ⑤ ᠂ ᠪᠢᠴᠢᠭᠡᠴᠢ⑥ ᠂ 

       ᠬᠠᠭᠠᠨ ᠤ᠋ ᠡᠵᠡᠨ ᠦ᠌ ᠨᠡᠷ᠎ᠡ ᠠᠯᠳᠠᠷᠢ ᠰᠣᠨᠣᠰᠴᠤ ᠰᠡᠴᠡᠰᠭᠠᠯᠤ ᠲᠤᠨᠪᠠᠩ᠂ 

       ᠬᠠᠷᠠ ᠬᠢᠲᠠᠳ ᠤ᠋ᠨ ᠯᠢ ᠨᠥᠭᠡᠴᠢ ᠲᠠᠲᠠᠯᠭ᠎ᠠ ⑦ ᠲᠡᠷᠢᠭᠦᠲᠡᠨ ᠨᠣᠶᠠᠳ ᠢᠨᠤ ᠣᠷᠣᠵᠤ ᠢᠷᠡᠭᠡᠳ᠂ 

— — — — 

① ᠬᠡᠯᠡᠯᠴᠡᠭᠡᠷ ᠢ᠋ ᠳᠠᠮᠵᠢᠨ ᠬᠢᠲᠠᠳ ᠮᠣᠩᠭᠣᠯ ᠬᠣᠶᠠᠷ ᠲᠠᠯ᠎ᠠ ᠪᠠᠷ ᠢ᠋ᠶ᠋ᠠᠨ ᠠᠳᠤᠭᠤᠨ ᠠᠷᠠᠯᠵᠢᠶ᠎ᠠ ᠨᠡᠭᠡᠭᠡᠬᠦ ᠪᠡᠷ ᠲᠣᠭᠲᠠᠵᠠᠢ᠃ ᠵᠢᠶᠠ ᠵᠢᠩ ᠦ᠋ᠨ  ᠭᠤᠴᠢᠳᠤᠭᠠᠷ ᠣᠨ （1551 ） ᠦ᠌ ᠳᠣᠯᠣᠳᠤᠭᠠᠷ ᠰᠠᠷ᠎ᠠ ᠳ᠋ᠤ᠌ ᠳᠠ ᠲᠦᠩ᠂ ᠰᠢᠦᠸᠠᠨ ᠹᠦ᠂ ᠶᠠᠨ ᠰᠦᠢ᠂ ᠨᠢᠩᠰᠢᠶᠠ ᠵᠡᠷᠭᠡ ᠭᠠᠵᠠᠷ ᠲᠤ᠌ ᠤᠷᠢᠳ ᠬᠣᠵᠢᠳ ᠠᠳᠤᠭᠤᠨ ᠠᠷᠠᠯᠵᠢᠶ᠎ᠠ ᠨᠡᠭᠡᠭᠡᠬᠦ ᠪᠣᠯᠵᠤ ᠂ ᠠᠯᠲᠠᠨ ᠤ᠋ ᠲᠠᠯ᠎ᠠ ᠠ᠋ᠴᠠ ᠳᠠ ᠲᠦᠩ ᠳ᠋ᠦ᠍ 447 ᠮᠣᠷᠢ ᠬᠤᠳᠠᠯᠳᠤᠵᠤ 44032 ᠯᠠᠩ ᠮᠥᠩᠭᠥ ᠂ 11740 ᠪᠦᠬᠦᠯᠢ ᠪᠥᠰ  ᠪᠠ ᠬᠡᠮᠡᠷᠯᠢᠭ  ᠣᠯᠵᠠᠢ ᠃ ᠭᠡᠲᠡᠯ᠎ᠡ ᠡᠨᠡ ᠬᠦ᠌ ᠠᠷᠠᠯᠵᠢᠶ᠎ᠠ ᠨᠢ ᠳᠡᠮᠡᠢ ᠤᠳᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠃ ᠤᠴᠢᠷ  ᠶᠠᠭᠤᠨ ᠭᠡᠪᠡᠯ ᠂ ᠭᠠᠭᠴᠠ ᠠᠳᠤᠭᠤ ᠮᠣᠷᠢᠨ ᠤ᠋  ᠠᠷᠠᠯᠵᠢᠶ᠎ᠠ ᠲᠡᠳᠦᠢ ᠪᠣᠯᠬᠣᠷ᠂ ᠮᠣᠩᠭᠣᠯ ᠳ᠋ᠤ᠌ ᠭᠠᠭᠴᠠ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠬᠥᠮᠦᠰ ᠨᠢ   《 ᠰᠠᠶᠢ  ᠠᠳᠤᠭᠤ ᠮᠣᠷᠢ ᠪᠠᠷ ᠠᠷᠠᠯᠵᠢᠶ᠎ᠠ ᠬᠢᠵᠦ ᠴᠢᠳᠠᠬᠤ ᠠ᠋ᠴᠠ  ᠪᠢᠰᠢ᠂ ᠶᠠᠳᠠᠭᠤ ᠵᠦᠳᠡᠩᠭᠢ ᠨᠢ ᠭᠠᠭᠴᠠ ᠦᠬᠡᠷ  ᠦᠬᠡᠷ ᠬᠣᠨᠢᠳ ᠪᠠᠢᠬᠤ ᠲᠡᠳᠦᠢ 》 ᠲᠤᠯᠠ ᠦᠬᠡᠷ ᠬᠣᠨᠢᠳ ᠢ᠋ᠶ᠋ᠠᠷ ᠠᠮᠤ ᠪᠤᠳᠠᠭ᠎ᠠ ᠰᠣᠯᠢᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠯ᠎ᠠ᠃ ᠲᠠᠢᠮᠢᠩ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ   ᠡᠨᠡ ᠶᠠᠪᠤᠳᠠᠯ ᠢ᠋ ᠦᠯᠦ ᠵᠥᠪᠰᠢᠶᠡᠷᠡᠬᠦ ᠲᠤᠯᠠ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠬᠦ ᠶᠠᠪᠤᠳᠠᠯ ᠠᠶᠠᠨᠳᠠᠭᠠᠨ ᠡᠭᠦᠰᠴᠦ  ᠪᠠᠢᠵᠠᠢ᠃ ᠡᠭᠦᠨ ᠢ᠋ ᠠᠯᠲᠠᠨ ᠬᠠᠭᠠᠨ ᠪᠠᠰᠠ ᠬᠣᠷᠢᠭᠯᠠᠨ ᠵᠣᠭᠰᠣᠭᠠᠬᠤ ᠠᠷᠭ᠎ᠠ ᠦᠭᠡᠢ  ᠪᠣᠯᠵᠠᠢ᠃ ᠲᠠᠢᠮᠢᠩ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ  ᠡᠨᠡ ᠶᠠᠪᠤᠳᠠᠯ ᠢ᠋ ᠦᠯᠦ ᠵᠥᠪᠱᠢᠶᠡᠷᠡᠬᠦ᠌ ᠲᠤᠯᠠ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠬᠦ ᠶᠠᠪᠤᠳᠠᠯ ᠠᠶᠠᠨᠳᠠᠭᠠᠨ ᠡᠭᠦᠰᠴᠦ ᠪᠠᠢᠵᠠᠢ ᠃ ᠡᠭᠦᠨ ᠢ᠋ ᠠᠯᠲᠠᠨ ᠬᠠᠭᠠᠨ ᠪᠠᠰᠠ ᠬᠣᠷᠢᠭ᠍ᠯᠠᠨ ᠵᠣᠭ᠍ᠰᠤᠭᠠᠬᠤ ᠠᠷᠭ᠎ᠠ ᠦᠭᠡᠢ ᠪᠣᠯᠵᠠᠢ ᠃ ᠲᠠᠢᠮᠢᠩ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ᠎ᠠᠴᠠ ᠠᠯᠲᠠᠨ ᠨᠠᠷ ᠢ᠋ 《 ᠡᠷᠲᠡ ᠢᠨᠤ ᠠᠷᠠᠯᠵᠢᠶ᠎ᠠ ᠬᠢᠵᠦ ᠣᠷᠣᠢ ᠪᠣᠯᠪᠠᠰᠤ ᠳᠡᠭᠡᠷᠡᠮᠳᠡᠵᠦ 》 ᠦᠨᠡᠨᠬᠦ ᠴᠢᠩ ᠰᠠᠨᠠᠭ᠎ᠠ ᠦᠭᠡᠢ ᠭᠡᠵᠦ ᠮᠥᠨ ᠣᠨ ᠤ᠋  ᠠᠷᠪᠠᠨ ᠬᠣᠶᠠᠳᠤᠭᠠᠷ ᠰᠠᠷ᠎ᠠ ᠳ᠋ᠤ᠌ ᠠᠳᠤᠭᠤᠨ ᠠᠷᠠᠯᠵᠢᠷ᠎ᠠ ᠶ᠋ᠢ  ᠵᠣᠭᠰᠣᠭᠠᠬᠤ ᠵᠠᠷᠯᠢᠭ ᠭᠠᠷᠭᠠᠵᠠᠢ᠃ 

② ᠴᠠᠭᠠᠨ ᠡᠮ᠎ᠡ ᠭᠠᠬᠠᠢ ᠵᠢᠯ ᠂ ᠵᠢᠶᠠ ᠵᠢᠩ ᠦ᠋ᠨ ᠭᠤᠴᠢᠳᠤᠭᠠᠷ  ᠣᠨ （ 1551 ᠣᠨ ）᠃ 

③ ᠪᠢᠯᠠᠨ ᠭᠡᠬᠦ ᠨᠢ ᠪᠠᠢ ᠯᠢᠶᠠᠨ ( 白莲 ) ᠭᠡᠬᠦ ᠬᠢᠲᠠᠳ ᠦᠭᠡ ᠶ᠋ᠢ ᠠᠪᠢᠶᠠᠴᠢᠯᠠᠨ ᠲᠡᠮᠳᠡᠭᠯᠡᠭᠰᠡᠨ ᠪᠣᠯᠤᠮᠤᠢ ᠃  ᠵᠠᠭᠤᠨ ᠣᠮᠣᠭ ᠲᠠᠨ  （ ᠣᠪᠣᠭ ᠲᠠᠨ ） ᠭᠡᠬᠦ ᠨᠢ ᠬᠢᠲᠠᠳ ᠤ᠋ᠨ百姓 ᠭᠡᠬᠦ ᠶ᠋ᠢ ᠣᠷᠴᠢᠭᠤᠯᠤᠨ ᠪᠢᠴᠢᠵᠡᠢ᠃ ᠪᠢᠯᠠᠨ ᠵᠠᠭᠤᠨ ᠣᠮᠣᠭ ᠲᠠᠨ ᠭᠡᠳᠡᠭ ᠨᠢ ᠪᠠᠢ ᠯᠢᠶᠠᠨ ᠱᠠᠰᠢᠨᠲᠠᠨ ᠢ᠋ ᠵᠢᠭᠠᠮᠤᠢ ᠃ 

④ ᠪᠠᠢ ᠯᠢᠶᠠᠨ ᠱᠠᠰᠢᠨ ᠤ᠋ ᠲᠦᠷᠦᠭᠦᠦ ᠴᠢᠦ  ᠹᠦ （丘富  ） ᠶ᠋ᠢᠨ ᠮᠣᠩᠭᠣᠯ ᠨᠡᠷ᠎ᠡ ᠃ ᠴᠢᠦ ᠹᠦ ᠭᠡᠳᠡᠭ ᠨᠢ ᠳᠠ ᠲᠦᠩ ᠽᠦᠸᠧ ᠸᠧᠢ （大同左卫 ） ᠶ᠋ᠢᠨ ᠬᠥᠮᠦᠨ ᠂ ᠴᠣᠯᠠ ᠨᠢ ᠴᠢᠦ ᠯᠤᠤ  ᠽᠦ᠍ (丘老祖 ) ᠭᠡᠳᠡᠭ ᠃ ᠵᠢᠶᠠ ᠵᠢᠩ ᠦ᠋ᠨ ᠭᠤᠴᠢᠳᠤᠭᠠᠷ ᠣᠨ ( 1551 ᠣᠨ ） ᠳ᠋ᠤ᠌  ᠠᠯᠲᠠᠨ ᠬᠠᠭᠠᠨ ᠤ᠋ ᠳᠡᠷᠭᠡᠳᠡ ᠵᠢᠭᠤᠲᠠᠨ ᠢᠷᠵᠡᠢ ᠃  《 ᠸᠠᠨ ᠯᠢ ᠡᠦ  ᠬᠦᠩ ᠯᠦ᠍ 》 ᠪᠢᠴᠢᠭ ᠲᠠᠬᠢ ᠠᠯᠲᠠᠨ ᠤ᠋  ᠴᠠᠳᠢᠭ ᠲᠤᠷ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠄ 《 ᠴᠢᠦ ᠹᠦ ᠳ᠋ᠦ᠍ᠷ ᠨᠢᠭᠡᠨ ᠳᠡᠭᠦᠦ ᠪᠥᠯᠥᠭᠡ᠂ ᠨᠡᠷ᠎ᠡ ᠢᠨᠤ ᠴᠢᠦ ᠲᠦᠩ  （丘仝 ） ᠬᠡᠮᠡᠮᠦᠢ ᠃ ᠤᠷᠠᠴᠤᠤᠯ ᠤ᠋ᠨ ᠦᠢᠯᠡ ᠶ᠋ᠢ ᠴᠢᠳᠠᠬᠤ  ᠲᠤᠯᠠ ᠠᠯᠲᠠᠨ ᠳ᠋ᠤᠷ ᠠᠰᠠᠷ ᠭᠡᠷ ᠭᠤᠷᠪᠠᠨ ᠢ᠋ ᠪᠠᠢᠭᠤᠯᠵᠤ ᠦᠭᠭᠦᠭᠰᠡᠨ ᠢᠨᠤ ᠠᠭᠤᠢ ᠰᠦᠷᠯᠢᠭ ᠪᠥᠭᠡᠳ ᠦᠵᠡᠰᠬᠦᠯᠡᠩ ᠪᠣᠯᠠᠢ ᠃ ᠪᠠᠰᠠ ᠬᠥᠯᠭᠡ ᠣᠩᠭᠣᠴᠠ ᠨᠢᠭᠡᠨ ᠢ᠋  ᠦᠢᠯᠡᠳᠴᠦ ᠭᠣᠣᠯ ᠤ᠋ᠨ  ᠪᠠᠷᠠᠭᠤᠨ᠎ᠠ ᠪᠦᠬᠦᠢ ᠴᠡᠷᠢᠭ ᠢ᠋ ᠵᠡᠭᠦᠨᠰᠢ ᠭᠡᠲᠦᠯᠭᠡᠵᠦ ᠴᠢᠳᠠᠪᠠᠢ ᠃  ᠪᠠᠰᠠ ᠲᠠᠷᠢᠶᠠᠯᠠᠩ ᠤ᠋ᠨ  ᠪᠠᠭᠠᠵᠢ ᠦᠢᠯᠡᠳᠦᠨ  ᠲᠠᠷᠢᠶ᠎ᠠ ᠲᠣᠮᠣᠰᠤᠨ ᠢ᠋  ᠳᠠᠷᠢᠪᠠᠢ ᠃ ᠠᠯᠲᠠᠨ ᠶᠡᠬᠡᠳᠡ ᠪᠠᠶᠠᠷᠯᠠᠨ ᠴᠢᠦ  ᠹᠦ ᠯᠤᠭ᠎ᠠ ᠳᠣᠲᠣᠨᠣ ᠨᠥᠬᠥᠷ ᠪᠣᠯᠤᠭᠠᠳ ᠲᠡᠭᠦᠨ ᠦ᠌ ᠨᠡᠷ᠎ᠡ ᠶ᠋ᠢ ᠶᠡᠬᠡ ᠯᠠᠪᠠ ᠭᠡᠮᠡᠨ ᠬᠠᠯᠠᠵᠤ ᠥᠭᠪᠡᠢ 》 ᠭᠡᠵᠡᠢ᠃ ᠶᠡᠬᠡ ᠯᠠᠪᠠ ᠭᠡᠰᠡᠨ ᠨᠢ ᠶᠡᠬᠡ ᠬᠤᠤᠱᠠᠩ ᠭᠡᠰᠡᠨ ᠦᠭᠡ ᠪᠣᠯᠬᠤ ᠪᠥᠭᠡᠳ ᠪᠠᠰᠠ  ᠯᠤᠤ ᠽᠦ᠍  （老祖 ） ᠭᠡᠬᠦ ᠴᠣᠯᠠ ᠶ᠋ᠢᠨ ᠤᠳᠬᠠᠴᠢᠯᠠᠭᠰᠠᠨ ᠣᠷᠴᠢᠭᠤᠯᠭ᠎ᠠ ᠪᠣᠯᠤᠨ᠎ᠠ ᠃ 

⑤ ᠪᠠᠢ ᠯᠢᠶᠠᠨ ᠮᠠᠰᠢᠨ ᠤ᠋  ᠲᠦᠷᠦᠭᠦᠦ ᠵᠣᠣ ᠴᠢᠤᠸᠠᠨ  （赵全 ） ᠤ᠋  ᠣᠨᠳᠣᠣ ᠨᠡᠷ᠎ᠡ ᠪᠣᠯᠤᠨ᠎ᠠ ᠃ ᠵᠣᠣ ᠴᠢᠤᠸᠠᠨ ᠭᠡᠳᠡᠭ ᠨᠢ ᠮᠥᠨ ᠳᠠ ᠲᠦᠩ ᠽᠦᠸᠧ ᠸᠧᠢ ᠶ᠋ᠢᠨ ᠬᠥᠮᠦᠨ ᠃ ᠲᠡᠷᠡ ᠵᠢᠶᠠ ᠵᠢᠩ ᠦ᠋ᠨ ᠭᠤᠴᠢᠨ ᠭᠤᠷᠪᠠᠳᠤᠭᠠᠷ ᠣᠨ  （1554 ᠣᠨ ） ᠳ᠋ᠤ᠌ ᠠᠮᠢ ᠵᠢᠭᠤᠲᠠᠨ ᠮᠣᠩᠭᠣᠯ ᠳ᠋ᠤ᠌ ᠳᠤᠲᠠᠭᠠᠨ ᠢᠷᠡᠵᠦ ᠴᠢᠦ  ᠹᠦ ᠯᠤᠭ᠎ᠠ ᠬᠠᠮᠲᠤ ᠪᠠᠶᠠᠨᠲᠠᠯ᠎ᠠ  （丰州川 ） ᠳ᠋ᠤ᠌ ᠨᠤᠲᠤᠭᠰᠢᠪᠠ ᠃  《 ᠸᠠᠨ ᠯᠢ ᠡᠤ ᠬᠦᠩ ᠯᠦ᠍ 》 ᠪᠢᠴᠢᠭ ᠲᠠᠬᠢ ᠠᠯᠲᠠᠨ ᠤ᠋  ᠴᠠᠳᠢᠭ ᠲᠤ᠌ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠄ 《 ᠴᠢᠦ ᠹᠦ ᠪᠡᠷ ᠵᠣᠣ ᠴᠢᠤᠸᠠᠨ ᠢ᠋ ᠳᠠᠭᠠᠭᠤᠯᠤᠨ ᠠᠯᠲᠠᠨ ᠯᠤᠭ᠎ᠠ ᠪᠠᠷᠠᠭᠠᠳᠠᠭᠤᠯᠪᠠᠢ᠃ ᠵᠣᠣ ᠴᠢᠤᠸᠠᠨ ᠲᠡᠷᠡ ᠳᠠᠷᠤᠢ ᠠᠯᠲᠠᠨ ᠢ᠋ ᠲᠡᠭᠷᠢ ᠶ᠋ᠢᠨ ᠬᠤᠪᠢ ᠬᠡᠰᠢᠭ ᠪᠦᠬᠦᠢ ᠬᠥᠮᠦᠨ ᠲᠤᠯᠠ ᠡᠵᠡᠨ ᠬᠠᠭᠠᠨ ᠬᠡᠮᠡ ᠡᠷᠭᠦᠪᠡᠰᠦ ᠵᠣᠬᠢᠮᠤᠢ 》 ᠭᠡᠵᠡᠢ ᠃ ᠡᠭᠦᠪᠡᠷ ᠦᠯᠦ ᠪᠠᠷᠠᠮ ᠵᠣᠣ ᠴᠢᠤᠸᠠᠨ ᠬᠢᠭᠡᠳ ᠯᠢ ᠽᠢ ᠰᠢᠨ (李自馨 ) ᠬᠣᠶᠠᠭᠤᠯᠠ ᠡᠳᠦᠷ   ᠰᠥᠨᠢ ᠦᠭᠡᠢ ᠮᠣᠩᠭᠣᠯ ᠢ᠋ ᠤᠳᠤᠷᠢᠳᠤᠨ ᠬᠣᠲᠠ ᠶ᠋ᠢ  ᠪᠠᠢᠯᠳᠤᠨ ᠠᠪᠬᠤ ᠂ ᠵᠠᠷ ᠵᠡᠪᠰᠡᠭ ᠦᠢᠯᠡᠳᠦᠨ ᠢᠦᠢ ᠶᠠᠩ  （渔阳 ） ᠂ ᠶᠦᠨ ᠵᠦᠩ (云中) ᠂ ᠱᠠᠩ ᠬᠦ᠌ (上谷 ) ᠶ᠋ᠢᠨ ᠣᠯᠠᠨ ᠭᠠᠵᠠᠷ ᠢ᠋ ᠪᠤᠯᠢᠶᠠᠨ ᠠᠪᠤᠨ᠎ᠠ ᠭᠡᠵᠦ ᠦᠭᠡ ᠲᠠᠷᠬᠠᠭᠠᠵᠠᠢ ᠃ ᠡᠨᠡ ᠨᠢ ᠴᠢᠪ ᠬᠡᠮᠡ ᠠᠯᠲᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ᠷ ᠨᠡᠢᠴᠡᠵᠡᠢ ᠃ ᠵᠢᠶᠠ ᠵᠢᠩ ᠦ᠋ᠨ ᠳᠥᠴᠢᠨ ᠬᠣᠶᠠᠳᠤᠭᠠᠷ ᠣᠨ ᠤ᠋  ᠠᠷᠪᠠᠳᠤᠭᠠᠷ ᠰᠠᠷ᠎ᠠ ᠵᠣᠣ ᠴᠢᠤᠸᠠᠨ ᠬᠢᠭᠡᠳ ᠯᠢ ᠽᠢ ᠰᠢᠨ ᠨᠠᠷ ᠠᠯᠲᠠ  ᠪᠠ ᠰᠡᠩᠭᠡ ᠲᠠᠨ ᠤ᠋  ᠠᠷᠪᠠᠨ ᠲᠦᠮᠡ ᠢᠯᠡᠭᠦᠦ ᠮᠣᠷᠢᠲᠠᠨ ᠢ᠋ ᠳᠠᠭᠠᠭᠤᠯᠤᠨ ᠂ ᠴᠢᠶᠠᠩ ᠽᠢ ᠯᠢᠩ (墙子岭) ᠳᠠᠪᠠᠭᠠᠨ ᠢ᠋ᠶ᠋ᠠᠷ ᠲᠦᠩ ᠵᠧᠦ (通州)᠂ ᠱᠦᠨ ᠢ (顺义) ᠂ ᠫᠢᠩ ᠬᠦ᠌(平谷) ᠶ᠋ᠢᠨ ᠣᠯᠠᠨ ᠭᠠᠵᠠᠷ ᠲᠤ᠌  ᠣᠷᠣᠵᠤ᠂ ᠠᠳᠤᠭᠤ ᠮᠠᠯ ᠪᠤᠯᠢᠶᠠᠭᠰᠠᠨ ᠨᠢ ᠲᠣᠭ᠎ᠠ ᠲᠣᠮᠰᠢ ᠦᠭᠡᠢ  ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ  ᠲᠠᠢᠮᠢᠩ ᠤ᠋ᠨ ᠨᠡᠢᠰᠯᠡᠯ ᠬᠣᠲᠠᠬᠦᠷᠲᠡᠯ᠎ᠡ ᠶᠡᠬᠡᠳᠡ ᠰᠣᠴᠢᠪᠠᠢ ᠃ ᠪᠤᠴᠠᠭᠰᠠᠨ ᠤ᠋ ᠬᠠᠢᠨ᠎ᠠ ᠂  ᠠᠯᠲᠠᠨ  ᠬᠠᠭᠠᠨ ᠶᠡᠬᠡᠳᠡ ᠪᠠᠶᠠᠷᠯᠠᠨ ᠵᠣᠣ ᠴᠢᠤᠸᠠᠨ ᠢ᠋  ᠪᠠᠭᠠᠲᠤᠷ ᠬᠢᠶ᠎ᠡ ᠭᠡᠵᠦ ᠴᠣᠯᠠ ᠰᠣᠶᠣᠷᠬᠠᠵᠤ ᠬᠢᠲᠠᠳ ᠢᠷᠭᠡᠨ ᠲᠦᠮᠡ ᠢᠯᠡᠭᠦᠦ ᠶ᠋ᠢ ᠲᠡᠭᠦᠨ ᠳ᠋ᠦ᠍ ᠮᠡᠳᠡᠭᠦᠯᠪᠡ ᠃  ᠵᠢᠶᠠ ᠵᠢᠩ ᠦ᠋ᠨ ᠳᠥᠴᠢᠨ ᠭᠤᠷᠪᠠᠳᠤᠭᠠᠷ ᠣᠨ ( 1564 ) ᠦ᠌  ᠶᠢᠰᠦᠳᠦᠭᠡᠷ ᠰᠠᠷ᠎ᠠ ᠳ᠋ᠤ᠌᠂ ᠵᠣᠣ ᠴᠢᠤᠸᠠᠨ ᠳᠡᠢᠯᠦᠭᠰᠡᠨ ᠳ᠋ᠡᠭᠡᠨ  ᠨᠡᠩᠳᠡ ᠡᠷᠡᠮᠰᠢᠨ ᠲᠠᠪᠤᠨ ᠮᠢᠩᠭ᠎ᠠ ᠢᠯᠡᠭᠦᠦ ᠮᠣᠷᠢᠲᠠᠨ ᠢ᠋ ᠳᠠᠢᠴᠢᠯᠠᠨ ᠰᠦᠸᠧ ᠵᠧᠦ  （朔州 ） ᠵᠡᠷᠭᠡ ᠭᠠᠵᠠᠷ ᠲᠤ᠌  ᠳᠣᠲᠣᠭᠰᠢᠯᠠᠨ ᠣᠷᠣᠭᠠᠳ  ᠭᠤᠸᠠᠩ ᠯᠢᠩ ᠸᠠᠩ  （广灵王 ） ᠤ᠋ᠨ  ᠣᠷᠳᠣᠨ ᠳ᠋ᠠᠬᠢ ᠵᠢᠶᠠ ᠡᠢ ᠪᠢᠨ （贾仪宾 ） ᠦ᠌ ᠡᠬᠡᠨᠡᠷ  ᠢᠦᠢ ᠴᠢᠩ ᠵᠢᠶᠦ᠋ᠨ ᠵᠢᠶᠦ᠋ᠨ  （余庆郡郡 ） ᠢ᠋ ᠪᠤᠯᠢᠶᠠᠨ ᠣᠯᠵᠤ ᠡᠬᠡᠨᠡᠷ ᠪᠣᠯᠭᠠᠪᠠ ᠃ ᠡᠭᠦᠨᠴᠡ ᠠᠯᠲᠠᠨ ᠬᠠᠭᠠᠨ ᠲᠡᠭᠦᠨ ᠢ᠋  ᠢᠪᠠᠩ ᠲᠠᠪᠤᠨᠠᠩ ᠭᠡᠵᠦ ᠡᠷᠭᠦᠮᠵᠢᠯᠡᠪᠡ ᠃ ᠢᠪᠡᠭ ᠭᠡᠳᠡᠭ ᠨᠢ 仪宾 ᠶ᠋ᠢ ᠠᠪᠢᠶᠠᠴᠢᠯᠠᠨ ᠲᠡᠮᠳᠡᠭᠯᠡᠭᠰᠡᠨ ᠪᠠ  ᠲᠠᠪᠤᠨᠠᠩ ᠭᠡᠳᠡᠭ ᠨᠢ ᠤᠳᠬᠠᠴᠢᠯᠠᠨ ᠣᠷᠴᠢᠭᠤᠯᠤᠭᠰᠠᠨ ᠦᠭᠡ ᠪᠣᠯᠤᠨ᠎ᠠ ᠂ ᠴᠥᠮ ᠬᠠᠭᠠᠨ ᠤ᠋  ᠬᠦᠷᠭᠡᠨ ᠢ᠋ ᠬᠡᠯᠡᠵᠦ ᠪᠣᠢ᠃ 

⑥ ᠪᠠᠢ ᠯᠢᠶᠠᠨ ᠱᠠᠰᠢᠨ ᠤ᠋ ᠲᠦᠷᠦᠭᠦᠦ ᠯᠢ ᠽᠢ ᠰᠢᠨ ᠦ᠌  ᠮᠣᠩᠭᠣᠯ ᠨᠡᠷ᠎ᠡ ᠂ ᠯᠢ ᠽᠢ ᠰᠢᠨ ᠪᠣᠯ ᠵᠢᠶᠠ ᠵᠢᠩ ᠦ᠋ᠨ ᠭᠤᠴᠢᠨ ᠭᠤᠷᠪᠠᠳᠤᠭᠠᠷ ᠣᠨ （ 1554) ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠭᠠᠵᠠᠷ ᠳᠤᠲᠠᠭᠠᠨ ᠢᠷᠡᠭᠰᠡᠨ ᠬᠣᠢᠨ᠎ᠠ ᠴᠢᠦ ᠹᠦ ᠂ ᠵᠣᠣ ᠴᠢᠤᠸᠠᠨ ᠲᠠᠢ ᠬᠠᠮᠲᠤ ᠪᠠᠶᠠᠨᠲᠠᠯ᠎ᠠ ᠳ᠋ᠤ᠌ ᠨᠤᠲᠤᠭᠯᠠᠨ ᠰᠠᠭᠤᠵᠠᠢ ᠃ ᠲᠡᠷᠡ ᠦᠰᠦᠭ ᠲᠠᠨᠢᠵᠤ ᠪᠢᠴᠢᠭ ᠮᠡᠲᠦ  ᠲᠤᠯᠠ ᠪᠠᠭ᠎ᠠ ᠪᠢᠴᠢᠭᠡᠴᠢ ᠭᠡᠰᠡᠨ ᠮᠣᠩᠭᠣᠯ ᠨᠡᠷ᠎ᠡ ᠣᠯᠵᠠᠢ᠃ 《 ᠰᠠᠨ ᠶᠦᠨ ᠴᠦ᠍ ᠵᠢᠦᠢ ᠺᠡᠤ  》 ᠪᠢᠴᠢᠭ ᠲᠡᠬᠢ ᠮᠣᠩᠭᠣᠯ ᠦᠭᠡ ᠶ᠋ᠢᠨ ᠲᠠᠢᠯᠪᠤᠷᠢ ᠠ᠋ᠴᠠ ᠦᠵᠡᠪᠡᠯ ᠲᠠᠢᠮᠢᠩ ᠤ᠋ᠨ ᠦᠶ᠎ᠡ ᠳ᠋ᠦ᠍ ᠬᠢᠲᠠᠳ ᠦᠰᠦᠭ ᠪᠢᠴᠢᠭ ᠮᠡᠳᠡᠳᠡᠭ ᠬᠥᠮᠦᠨ ᠢ᠋ ᠪᠢᠴᠢᠭᠡᠴᠢ ᠪᠤᠶᠤ ᠮᠣᠩᠭᠣᠯ ᠦᠰᠦᠭ ᠪᠢᠴᠢᠭ ᠮᠡᠳᠡᠳᠡᠭ ᠬᠥᠮᠦᠨ ᠢ᠋ ᠪᠠᠭᠰᠢ ᠭᠡᠳᠡᠭ ᠠᠵᠠᠢ᠃ 

⑦ ᠯᠢ  ᠨᠥᠭᠡᠴᠢ ᠪᠣᠯ ᠲᠠᠢᠮᠢᠩ ᠤ᠋ᠨ ᠤᠷᠤᠭᠤᠯ ᠴᠡᠷᠢᠭ᠂ ᠤᠤᠯ ᠨᠡᠷ᠎ᠡ ᠨᠢ ᠯᠢᠦ ᠰᠧ （刘四 ） ᠭᠡᠳᠡᠭ᠃   《 ᠸᠠᠨ ᠯᠢ ᠡᠤ ᠬᠦᠩ ᠯᠦ᠍ 》 ᠪᠢᠴᠢᠭ ᠲᠠᠬᠢ ᠠᠯᠲᠠᠨ ᠤ᠋  ᠴᠠᠳᠢᠭ ᠲᠤ᠌ ᠪᠠᠢᠭ᠎ᠠ ᠵᠢᠶᠠ ᠵᠢᠩ ᠦ᠋ᠨ ᠳᠥᠴᠢᠳᠦᠭᠡᠷ ᠣᠨ （ 1561 ᠣᠨ ） ᠤ᠋ ᠲᠡᠮᠳᠡᠭᠯᠡᠯ ᠢ᠋ ᠦᠨᠳᠦᠰᠦᠯᠡᠪᠡᠯ ᠂ ᠯᠢᠦ ᠰᠧ ᠭᠡᠭᠴᠢ ᠪᠣᠯ ᠯᠤᠤ ᠢᠩ （老营) ᠭᠠᠵᠠᠷ ᠤ᠋ᠨ ᠵᠠᠩᠵᠤᠨ ᠯᠢ ᠢᠩ ᠯᠦ᠍ (李应禄) ᠶ᠋ᠢᠨ ᠴᠡᠷᠢᠭ ᠪᠠᠢᠵᠠᠢ᠃ ᠨᠥᠭᠥᠭᠡ ᠨᠡᠷ᠎ᠡ ᠨᠢ ᠯᠢᠦ ᠲᠢᠶᠠᠨ ᠴᠢ (刘天麒)ᠭᠡᠳᠡᠭ ᠃ ᠲᠡᠷᠡ ᠯᠢ ᠢᠩ ᠯᠦ᠍ ᠶ᠋ᠢᠨ ᠬᠠᠷᠭᠢᠰ ᠬᠠᠲᠠᠭᠤ ᠶ᠋ᠢᠨ ᠳᠡᠭᠡᠷ᠎ᠡ ᠪᠠᠰᠠ ᠴᠡᠷᠢᠭ ᠦ᠋ᠨ ᠴᠠᠯᠢᠩ  ᠬᠦᠨᠡᠰᠦ ᠶ᠋ᠢ ᠮᠡᠬᠡᠯᠡᠨ ᠬᠣᠨᠵᠢᠭᠰᠠᠨ ᠶᠠᠪᠤᠳᠠᠯ ᠳ᠋ᠤ᠌ ᠤᠨᠲᠤᠭᠤᠴᠠᠨ ᠂ ᠳᠠᠷᠤᠢ ᠵᠢᠶᠠ ᠵᠢᠩ ᠦ᠋ᠨ ᠳᠥᠴᠢᠳᠦᠭᠡᠷ ᠣᠨ  （ 1561 ᠣᠨ ) ᠳ᠋ᠤ᠌᠂ ᠴᠧᠨ ᠱᠢ ᠰᠢᠶᠠᠨ （陈世贤 ） ᠂ ᠸᠠᠩ ᠴᠢ  （王骐) ᠨᠠᠷ ᠯᠤᠭ᠎ᠠ ᠬᠣᠯᠪᠣᠭᠠᠯᠠᠨ ᠯᠢ ᠢᠩ ᠯᠦ᠍ ᠶ᠋ᠢ  ᠠᠯᠠᠭᠠᠳ ᠭᠡᠷ ᠦ᠋ᠨ ᠬᠥᠮᠦᠨ ᠵᠠᠭᠤ ᠭᠤᠴᠢ ᠢᠯᠡᠭᠦᠦ ᠶ᠋ᠢ  ᠳᠠᠭᠠᠭᠤᠯᠤᠨ ᠶᠠᠩ ᠵᠢᠶᠣᠤ ᠱᠠᠨ (羊角山)ᠠᠭᠤᠯᠠ ᠪᠠᠷ ᠳᠤᠲᠠᠭᠠᠨ ᠭᠠᠷᠴᠤ ᠠᠯᠲᠠᠨ ᠤ᠋ ᠳᠡᠷᠭᠡᠳᠡ ᠬᠦᠷᠦᠭᠡᠳ ᠨᠡᠷ᠎ᠡ ᠪᠡᠨ ᠬᠠᠯᠠᠵᠤ ᠯᠢᠦ ᠼᠠᠨ ᠵᠢᠶᠠᠩ(刘参将) ᠭᠡᠵᠡᠢ ᠃ ᠲᠡᠭᠦᠨ ᠦ᠌ ᠬᠣᠢᠨ᠎ᠠ ᠂ ᠵᠣᠣ ᠴᠢᠤᠸᠠᠨ ᠂ ᠯᠢ ᠽᠢ ᠰᠢᠨ ᠂  ᠵᠣᠣ ᠯᠦᠩ  （赵龙 ）᠂ ᠸᠠᠩ ᠲᠢᠩ ᠹᠦ （王廷辅 ） ᠨᠠᠷ ᠯᠤᠭ᠎ᠠ ᠬᠠᠮᠲᠤᠪᠠᠷ ᠮᠣᠩᠭᠣᠯ ᠴᠡᠷᠢᠭ ᠲᠦᠮᠡ ᠢᠯᠡᠭᠦᠦ ᠶ᠋ᠢ ᠳᠠᠭᠠᠭᠤᠯᠤᠨ ᠬᠢᠲᠠᠳ ᠭᠠᠵᠠᠷ ᠲᠤ᠌ ᠣᠷᠣᠭᠠᠳ ᠶᠦᠨ ᠶᠠᠩ  （云阳 ） ᠵᠡᠷᠭᠡ ᠲᠠᠪᠢ ᠢᠯᠡᠭᠦᠦ ᠴᠠᠢᠵᠠ ᠶ᠋ᠢ ᠡᠪᠳᠡᠨ ᠳᠠᠢᠯᠠᠵᠤ᠂ ᠮᠢᠩᠭ᠎ᠠ ᠵᠢᠷᠭᠤᠭᠠᠨ ᠵᠠᠭᠤ ᠢᠯᠡᠭᠦᠦ ᠬᠥᠮᠦᠨ ᠢᠷᠭᠡᠨ ᠢ᠋ ᠪᠤᠯᠢᠶᠠᠨ ᠠᠳᠤᠭᠤ ᠮᠠᠯ ᠳᠣᠯᠣᠭᠠᠨ ᠮᠢᠩᠭ᠎ᠠ ᠨᠠᠢ᠍ᠮᠠᠨ ᠶᠠᠭᠤ ᠢᠯᠡᠭᠦᠦ ᠶ᠋ᠢ  ᠪᠤᠯᠢᠶᠠᠨ  ᠠᠪᠠᠴᠢᠪᠠ᠃ ᠠᠯᠲᠠᠨ ᠲᠡᠳᠡᠭᠡᠷ ᠪᠤᠯᠢᠶᠠᠨ ᠣᠯᠵᠠᠯᠠᠭᠳᠠᠭᠰᠠᠳ ᠪᠠ ᠬᠢᠲᠠᠳ ᠭᠠᠵᠠᠷ ᠠ᠋ᠴᠠ ᠳᠠᠢᠵᠢᠨ ᠵᠢᠭᠤᠲᠠᠭᠰᠠᠨ ᠬᠣᠶᠠᠷ ᠮᠢᠩᠭ᠎ᠠ ᠢᠯᠡᠭᠦᠦ ᠢᠷᠭᠡᠨ ᠢ᠋ ᠯᠢᠦ ᠰᠧ ᠳ᠋ᠦ᠍ ᠮᠡᠳᠡᠭᠦᠯᠪᠡᠢ ᠃ ᠯᠢ ᠨᠥᠭᠡᠴᠢ ᠪᠣᠯ ᠯᠢᠦ ᠼᠠᠨ ᠵᠢᠶᠠᠩ   （刘参将 ） ᠤ᠋ᠨ ᠮᠣᠩᠭᠣᠯ ᠣᠷᠴᠢᠭᠤᠯᠭ᠎ᠠ᠃ ᠲᠠᠲᠠᠯᠭ᠎ᠠ ᠭᠡᠳᠡᠭ ᠦᠰᠦᠭ ᠪᠣᠯ ᠲᠤᠤᠳᠠᠩ ᠤ᠋ᠨ ᠡᠨᠳᠡᠭᠦᠷᠡᠯ᠂ ᠲᠤᠬᠠᠢ ᠶ᠋ᠢᠨ ᠦᠶ᠎ᠡ ᠶ᠋ᠢᠨ ᠮᠣᠩᠭᠣᠯᠴᠤᠳ ᠬᠢᠯᠢ ᠬᠢᠵᠠᠭᠠᠷ ᠳᠠᠬᠢ ᠬᠢᠲᠠᠳ ᠤ᠋ᠨ ᠶᠡᠬᠡ ᠨᠣᠶᠠᠳ ᠢ᠋ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠲᠤᠤᠳᠠᠩ ᠨᠣᠶᠠᠨ ᠭᠡᠳᠡᠭ᠃