ᠭᠡᠭᠦᠦ ᠪᠠᠷᠢᠬᠤ ᠶᠢᠨ ᠢᠷᠦᠭᠡᠯ Гүү барихын ерөөл
309ᠭᠡᠭᠦᠦ ᠪᠠᠷᠢᠬᠤ ᠶᠢᠨ ᠢᠷᠦᠭᠡᠯ
ᠬᠥᠬᠡ ᠮᠥᠩᠭᠥᠨ ᠣᠭᠲᠠᠷᠭᠤᠢ ᠠᠴᠠ ᠨᠠᠭᠠᠭᠤᠷ
ᠬᠥᠪᠥᠯᠵᠡᠨ ᠨᠡᠭᠦᠵᠦ ᠪᠠᠢᠭᠠ
ᠬᠥᠪᠰᠥᠭᠡᠷ ᠪᠠᠷᠠᠭᠠᠨ ᠡᠭᠦᠯᠡᠨ ᠳᠤᠮᠳᠠ ᠠᠴᠠ
ᠬᠦᠷᠴᠢᠭᠢᠨᠡᠨ ᠳᠤᠤᠭᠠᠷᠬᠤ
ᠬᠦᠢᠲᠡᠨ ᠬᠠᠯᠠᠭᠤᠨ ᠬᠢᠨ ᠦ ᠬᠦᠴᠦ ᠪᠡᠷ
ᠬᠥᠪᠥᠷᠡᠨ ᠴᠢᠳᠭᠤᠬᠤ ᠪᠣᠷᠣᠭᠠᠨ ᠤ ᠴᠢᠭᠢᠭ ᠢᠶᠡᠷ
ᠬᠥᠬᠡᠷᠡᠵᠦ ᠤᠷᠭᠤᠵᠤ ᠴᠡᠴᠡᠭᠯᠡᠵᠦ ᠨᠠᠪᠴᠢᠯᠠᠭᠰᠠᠨ
ᠬᠥᠬᠡ ᠨᠣᠭᠣᠭᠠᠨ ᠤ ᠰᠢᠮᠡ ᠨᠢ ᠳᠡᠯᠭᠡᠷᠡᠭᠰᠡᠨ
ᠬᠥᠭᠵᠢᠯᠲᠡᠢ ᠰᠠᠢᠬᠠᠨ ᠵᠤᠨ ᠤ ᠴᠠᠭ ᠲᠤ
ᠦᠵᠦᠭᠦᠷ ᠬᠤᠷᠴᠠ ᠲᠠᠢ ᠵᠠᠰᠠᠭᠰᠠᠨ
ᠦᠨᠳᠦᠰᠦᠨ ᠲᠣᠯᠣᠭᠠᠢ ᠲᠠᠢ ᠭᠠᠳᠠᠰᠤ ᠪᠠᠨ
ᠤᠷᠠᠨ ᠵᠠᠯᠠᠭᠤ ᠮᠤᠨᠠ ᠪᠠᠷ ᠢᠶᠠᠨ
ᠤᠳᠠᠭᠠ ᠳᠠᠷᠠᠭᠠᠯᠠᠨ ᠴᠣᠬᠢᠵᠤ ᠰᠢᠭᠠᠭᠠᠳ
ᠭᠤᠨᠠᠨ ᠰᠢᠷᠠ ᠶᠢᠨ ᠰᠢᠷ ᠢᠶᠡᠷ
ᠭᠤᠷᠮᠤᠰᠤᠯᠠᠵᠤ ᠡᠷᠴᠢᠯᠡᠭᠰᠡᠨ
ᠭᠤᠨᠠᠭᠠᠷ ᠤᠷᠲᠤ ᠵᠡᠯᠡ ᠪᠡᠨ
ᠭᠤᠴᠢ ᠰᠢᠬᠠᠮ ᠡᠷᠡᠴᠦᠳ ᠦᠨ ᠬᠦᠴᠦ ᠪᠡᠷ
ᠭᠤᠯᠵᠢᠢᠬᠤ ᠦᠭᠡᠢ ᠪᠣᠯᠲᠠᠯᠠ ᠴᠢᠩᠭᠠᠯᠠᠭᠠᠳ
ᠠᠷᠤ ᠬᠥᠨᠳᠡᠢ ᠳᠦᠭᠦᠷᠡᠩ ᠪᠡᠯᠴᠢᠭᠡᠷᠯᠡᠭᠰᠡᠨ
ᠠᠢ ᠲᠦᠮᠡᠨ ᠠᠳᠤᠭᠤ ᠶᠢ ᠪᠠᠨ
ᠠᠳᠤᠭᠤᠴᠢᠨ ᠵᠠᠯᠠᠭᠤᠴᠤᠳ ᠨᠢ
ᠠᠵᠢᠷᠭᠠ ᠠᠵᠢᠷᠭᠠ ᠪᠠᠷ ᠨᠢ ᠴᠤᠭᠯᠠᠭᠤᠯᠵᠤ ᠢᠷᠡᠬᠦ ᠳᠦ
ᠲᠠᠲᠠᠯ ᠰᠠᠢᠲᠠᠢ ᠵᠠᠯᠠᠭᠤᠰ ᠨᠢ
ᠲᠠᠩᠨᠠᠢ ᠰᠠᠢᠲᠠᠢ ᠤᠷᠭᠠ ᠪᠠᠨ ᠪᠠᠷᠢᠵᠤ
ᠲᠠᠰᠤᠷᠠᠬᠤ ᠦᠭᠡᠢ ᠰᠠᠢᠨ ᠬᠤᠢᠪᠢ ᠪᠠᠨ ᠤᠶᠠᠵᠤ
ᠲᠠᠪᠠᠷᠴᠠᠭᠯᠠᠬᠤ ᠦᠭᠡᠢ ᠰᠠᠢᠨ ᠮᠣᠷᠢ ᠪᠠᠨ ᠤᠨᠤᠵᠤ
ᠬᠥᠭᠡᠭᠡᠪᠡᠯ ᠣᠷᠣᠭᠠᠯᠠᠳᠠᠭ
ᠬᠥᠳᠡᠯᠪᠡᠯ ᠵᠢᠷᠤᠭᠠᠯᠳᠠᠭ
ᠬᠥᠭᠡᠷᠦᠬᠦᠨ ᠡᠰᠬᠦᠯᠡᠩ ᠤᠨᠠᠭᠠ
ᠣᠢᠲᠠᠯᠠ ᠤᠷᠭᠠᠯᠠᠵᠤ
ᠴᠣᠢᠯᠠᠲᠠᠯᠠ ᠰᠠᠭᠤᠯᠭᠠᠵᠤ
ᠣᠷᠢᠯᠠᠭᠤᠯᠤᠨ ᠴᠢᠷᠠᠯᠠᠭᠤᠯᠵᠤ
ᠣᠯᠠᠨ ᠵᠠᠯᠠᠭᠤᠰ ᠢᠶᠠᠷ ᠨᠣᠴᠣᠭᠤᠯᠬᠤ ᠳᠤ
ᠡᠷᠡ ᠲᠡᠢ ᠭᠡᠰᠡᠨ ᠨᠢ ᠨᠣᠴᠣᠵᠤ
ᠡᠪᠲᠡᠢ ᠭᠡᠰᠡᠨ ᠨᠢ ᠨᠣᠭᠲᠣᠯᠠᠵᠤ
ᠡᠩᠨᠡᠵᠦ ᠢᠷᠠᠢᠭᠰᠠᠨ ᠴᠢᠭᠲᠠ ᠪᠠᠷ ᠴᠢᠭᠲᠠᠯᠠᠵᠤ
ᠡᠷᠴᠢᠯᠡᠵᠦ ᠨᠡᠢᠳᠬᠡᠭᠰᠡᠨ ᠣᠭᠣᠰᠣᠷ ᠢᠶᠠᠷ
ᠡᠷᠦᠰᠬᠡᠨ ᠲᠠᠲᠠᠵᠤ ᠤᠶᠠᠭᠠᠳ
ᠡᠷᠭᠢᠵᠦ ᠶᠠᠭᠠᠬᠢᠬᠤ ᠶᠢ ᠨᠢ ᠬᠠᠷᠠᠪᠠᠯ
ᠠᠲᠠᠷ ᠲᠠᠷᠭᠤᠨ ᠤᠨᠠᠭᠠᠨ ᠨᠤᠭᠤᠳ
ᠠᠷᠤ ᠲᠡᠰᠢ ᠪᠡᠨ ᠵᠠᠬᠠᠯᠠᠵᠤ
ᠤᠷᠤᠭᠰᠢ ᠪᠠᠨ ᠤᠬᠤᠰᠬᠢᠵᠤ
ᠤᠷᠤᠭᠤᠯ ᠠᠮᠠ ᠪᠠᠨ ᠱᠣᠲᠣᠷᠴᠤ
ᠤᠷᠲᠤ ᠵᠡᠯᠡ ᠪᠡᠨ ᠴᠢᠪᠬᠠᠳᠠᠭᠤᠯᠵᠤ
ᠶᠠᠩᠨᠠᠢᠵᠤ ᠭᠡᠳᠡᠷᠡᠭᠡ ᠵᠠᠬᠠᠯᠠᠭᠠᠳ
ᠶᠠᠩᠭᠤᠷᠬᠠᠵᠤ ᠬᠠᠵᠠᠭᠤ ᠪᠠᠷ ᠢᠶᠠᠨ ᠣᠢᠴᠢᠭᠠᠳ
ᠶᠠᠭᠠᠬᠢᠭ᠌ᠰᠠᠨ ᠴᠦ᠍ ᠨᠣᠮᠣᠬᠠᠷᠠᠬᠤ ᠰᠢᠨᠵᠢ ᠦᠭᠡᠢ ᠪᠠᠶᠢᠯᠠ᠃
ᠳᠣᠭᠰᠢᠷᠠᠨ ᠡᠮᠨᠢᠭᠰᠢᠭᠰᠡᠨ ᠭᠡᠭᠦᠦ ᠨᠦᠭᠦᠳ
ᠳᠡᠷᠭᠡᠳᠡᠭᠦᠷ ᠳᠠᠭᠠᠷᠢᠨ ᠭᠠᠷᠴᠤ
ᠳᠡᠮᠡᠢ ᠴᠣᠢᠯᠠᠨ ᠳᠠᠪᠬᠢᠬᠤ ᠳᠤ
ᠬᠠᠰᠢᠷ ᠰᠠᠢᠨ ᠠᠵᠢᠷᠭᠠ
ᠬᠠᠷᠠᠵᠤ ᠠᠵᠢᠭᠯᠠᠨ ᠲᠠᠨᠢᠭᠠᠳ
ᠬᠠᠩᠭᠢᠨᠠᠨ ᠦᠦᠷᠰᠡᠵᠦ ᠢᠨᠴᠠᠭᠠᠭᠠᠳ
ᠳᠡᠯᠡᠨ ᠦ ᠪᠡᠨ ᠬᠢᠯᠭᠠᠰᠤ ᠶᠢ
ᠳᠡᠭᠡᠭᠰᠢ ᠨᠢ ᠱᠠᠰᠢᠷᠯᠠᠭᠤᠯᠵᠤ
ᠳᠥᠷᠪᠡᠨ ᠲᠤᠭᠤᠷᠠᠢ ᠪᠠᠷ ᠢᠶᠠᠨ
ᠳᠡᠯᠡᠬᠡᠢ ᠶᠢ ᠣᠩᠭᠢᠯᠠᠭᠰᠠᠭᠠᠷ
ᠬᠦᠷᠴᠦ ᠭᠦᠢᠴᠡᠨ ᠣᠴᠢᠭᠠᠳ
ᠬᠥᠵᠦᠭᠦᠦ ᠲᠠᠯᠪᠢᠨ ᠡᠷᠭᠢᠭᠦᠯᠵᠦ
ᠬᠦᠢ ᠰᠦᠷᠦᠭ ᠢᠵᠢᠯᠢ ᠳᠦ ᠪᠡᠨ
ᠬᠥᠭᠡᠭᠡᠨ ᠣᠷᠣᠭᠤᠯᠵᠤ ᠢᠷᠡᠬᠦ ᠳᠦ
ᠬᠦᠴᠦᠲᠦ ᠵᠣᠯᠪᠣᠭᠠᠲᠤ ᠵᠠᠯᠠᠭᠤᠴᠤᠳ
ᠬᠥᠳᠡᠷ ᠬᠤᠷᠳᠤᠨ ᠮᠣᠷᠢ ᠪᠠᠨ ᠤᠨᠤᠭᠠᠳ
ᠬᠥᠪᠦᠯᠵᠡᠭᠰᠡᠨ ᠤᠷᠲᠤ ᠤᠷᠭᠠ ᠪᠠᠨ ᠪᠠᠷᠢᠭᠠᠳ
ᠬᠥᠭᠡᠭᠡᠵᠦ ᠭᠦᠢᠴᠡᠵᠦ ᠤᠷᠭᠠᠯᠠᠭᠠᠳ
ᠬᠦᠴᠦ ᠮᠡᠳᠡᠨ ᠲᠣᠭᠲᠠᠭᠠᠭᠠᠳ
ᠨᠣᠴᠣᠵᠤ ᠪᠠᠷᠢᠵᠤ᠂ ᠨᠣᠭᠲᠣᠯᠠᠵᠤ ᠠᠪᠤᠭᠠᠳ
ᠴᠢᠬᠢᠳᠡᠵᠦ ᠪᠠᠢᠵᠤ ᠴᠢᠭᠲᠠᠯᠠᠵᠤ ᠴᠢᠳᠦᠷᠯᠡᠭᠡᠳ
ᠠᠪᠠᠭᠠᠢ ᠪᠦᠰᠡᠭᠦᠢᠴᠦᠳ
ᠠᠭᠠᠷᠤ ᠽᠠᠨᠳᠠᠨ ᠬᠤᠪᠢᠨ ᠪᠠᠷᠢᠵᠤ
ᠠᠲᠠᠷ ᠡᠮᠨᠢᠭ ᠭᠡᠭᠦᠦᠨ ᠦ ᠬᠥᠯ ᠳᠦ
ᠠᠶᠤᠮᠰᠢᠭ ᠦᠭᠡᠢ ᠰᠤᠷᠮᠠᠭ ᠰᠠᠭᠤᠵᠤ
ᠠᠷᠪᠢᠨ ᠡᠪᠯᠢᠭ ᠰᠦ ᠶᠢ ᠨᠢ
ᠠᠮᠠᠰᠠᠷ ᠪᠢᠯᠬᠠᠲᠠᠯᠠ ᠰᠠᠭᠠᠭᠠᠳ
ᠰᠢᠷᠠ ᠶᠢᠨ ᠰᠢᠷᠢ ᠶᠢ
ᠰᠢᠷᠠ ᠤᠰᠤᠯᠠᠵᠤ ᠪᠣᠯᠭᠠᠭᠠᠳ
ᠱᠠᠭᠯᠠᠵᠤ ᠣᠶᠣᠭᠠᠳ
ᠤᠶᠠᠪᠠᠯ ᠬᠠᠷᠠ ᠲᠠᠢ
ᠤᠳᠬᠤᠪᠠᠯ ᠬᠣᠪᠣᠭᠣ ᠲᠠᠢ
ᠤᠷᠲᠤ ᠪᠦᠯᠢᠭᠦᠷ ᠲᠡᠢ
ᠠᠭᠤᠳᠠᠮ ᠢᠷᠤᠭᠠᠷ ᠲᠠᠢ
ᠲᠣᠮᠣ ᠬᠥᠬᠥᠷᠢᠨ ᠳᠦ
ᠲᠣᠩᠭᠣᠢᠯᠭᠠᠵᠤ ᠶᠡᠭᠦᠯᠡᠭᠡᠳ
ᠲᠣᠭᠠᠯᠠᠵᠤ ᠪᠦᠯᠢᠭᠡᠳ
ᠲᠣᠷᠳᠠᠵᠤ ᠢᠰᠬᠡᠭᠡᠳ
ᠰᠠᠭᠭᠠᠵᠤ ᠬᠡᠭᠡᠰᠦᠷᠡᠭᠡᠳ ᠭᠠᠷᠬᠤ ᠳᠤ
ᠰᠠᠪᠠ ᠲᠣᠷᠬᠠᠨ ᠳᠤ ᠲᠠᠰᠤᠯᠤᠭᠠᠳ
ᠲᠣᠮᠣ ᠵᠣᠭᠣᠷᠢᠨ ᠳᠤ ᠬᠤᠷᠢᠶᠠᠭᠠᠳ
ᠠᠢᠷᠠᠭ ᠪᠡᠯᠡᠳᠬᠦ ᠲᠥᠯᠥᠪᠯᠡᠭᠡ ᠪᠡᠨ
ᠠᠬᠢᠨ ᠳᠠᠬᠢᠨ ᠳᠠᠪᠠᠭᠤᠯᠤᠭᠠᠳ
ᠨᠣᠭᠲᠠᠨ ᠤ ᠠᠢᠷᠠᠭ ᠦᠯᠡᠳᠡᠭᠡᠭᠡᠳ
ᠨᠠᠮᠤᠷ ᠤᠨ ᠰᠡᠷᠢᠭᠦᠨ ᠴᠦ᠍ ᠪᠣᠯᠤᠯᠠ
ᠨᠣᠭᠣᠭᠠᠨ ᠤ ᠰᠥᠯ ᠴᠦ᠍ ᠬᠠᠲᠠᠯᠠ
ᠴᠠᠭ ᠤᠨ ᠵᠢᠮᠠ ᠶᠢ ᠳᠠᠭᠠᠵᠤ
ᠴᠠᠭᠠᠨ ᠬᠢᠷᠠᠭᠤ ᠴᠦ᠍ ᠤᠨᠠᠯᠠ
ᠨᠠᠰᠤ ᠵᠢᠭᠳᠡᠷᠡᠭᠰᠡᠨ ᠤᠨᠠᠭᠠᠨ ᠨᠤᠭᠤᠳ
ᠨᠠᠷᠠᠨ ᠳᠤ ᠰᠢᠷᠠᠯᠠᠵᠤ ᠬᠦᠴᠦ ᠨᠢ ᠪᠥᠬᠡᠵᠢᠭᠡᠳ
ᠨᠠᠰᠤᠵᠢᠵᠤ ᠬᠥᠭᠰᠢᠷᠡᠭᠰᠡᠨ ᠭᠡᠭᠦᠦ ᠨᠦᠭᠦᠳ
ᠬᠠᠵᠠᠵᠤ ᠬᠠᠭᠠᠷᠢᠬᠤ ᠭᠡᠳ
ᠬᠠᠪᠢᠲᠠᠭᠤᠯᠬᠤ ᠴᠦ᠍ ᠳᠤᠷᠠ ᠦᠭᠡᠢ ᠪᠣᠯᠤᠯᠠ
ᠰᠢᠷᠠ ᠨᠠᠮᠤᠷ ᠤᠨ ᠰᠡᠭᠦᠯᠴᠢ ᠪᠡᠷ
ᠰᠢᠢᠳᠴᠦ ᠲᠣᠪᠯᠠᠭᠰᠠᠨ ᠡᠳᠦᠷ
ᠪᠤᠮᠤᠨ ᠰᠦᠷᠦᠭ ᠮᠢᠯᠢᠶᠠᠭᠰᠠᠨ
ᠪᠣᠯᠣᠳ ᠡᠷᠳᠡᠨᠢ ᠲᠡᠮᠳᠡᠭ ᠢᠶᠡᠨ
ᠤᠲᠤᠭᠠ ᠦᠭᠡᠢ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠳᠤ
ᠠᠭᠤᠰᠬᠢ ᠮᠡᠲᠦ ᠤᠯᠠᠭᠠᠨ ᠪᠣᠯᠭᠠᠭᠠᠳ
ᠰᠣᠷᠭᠣᠭ ᠬᠥᠭᠡᠷᠦᠬᠦᠨ ᠤᠨᠠᠭᠠᠨ ᠤ
ᠰᠣᠭᠣ ᠬᠣᠶᠠᠷ ᠴᠢᠬᠢ ᠶᠢ ᠨᠢ
ᠰᠣᠯᠵᠢᠷ ᠪᠣᠯᠲᠠᠯᠠ ᠮᠤᠰᠬᠢᠵᠤ
ᠬᠥᠪᠴᠢ ᠨᠢᠮᠭᠡᠨ ᠴᠠᠪᠢ ᠶᠢ ᠨᠢ
ᠬᠥᠨᠳᠡᠭᠦᠷ ᠪᠣᠯᠲᠠᠯᠠ ᠪᠠᠵᠠᠵᠤ
ᠬᠥᠳᠡᠯᠭᠡᠬᠦ ᠦᠭᠡᠢ ᠪᠠᠲᠤ ᠪᠠᠷᠢᠭᠠᠳ
ᠬᠥᠷᠥᠰᠥ ᠶᠢ ᠨᠢ ᠭᠢᠯᠠᠢᠲᠠᠯᠠ ᠬᠠᠭᠠᠷᠢᠭᠠᠳ
ᠠᠢᠷᠠᠭ ᠨᠡᠷᠡ ᠲᠡᠢ ᠠᠷᠢᠭᠤᠨ ᠴᠢᠨᠠᠷ ᠲᠠᠢ
ᠠᠰᠢᠳᠠ ᠶᠢᠨ ᠪᠡᠯᠡᠭ ᠲᠦ ᠢᠳᠡᠭᠡᠨ ᠦ ᠪᠡᠨ
ᠷᠠᠰᠢᠶᠠᠨ ᠪᠣᠯᠤᠭᠰᠠᠨ ᠳᠡᠭᠡᠵᠢ ᠶᠢ
ᠪᠠᠷᠢᠭᠤᠯ ᠰᠡᠨᠵᠢ ᠰᠠᠢᠲᠠᠢ
ᠪᠠᠭᠲᠠᠭᠠᠮᠵᠢ ᠣᠷᠣᠴᠠ ᠶᠡᠬᠡ ᠲᠡᠢ ᠰᠠᠪᠤᠩ ᠳᠤ
ᠪᠢᠯᠬᠠᠵᠤ ᠴᠠᠯᠭᠢᠲᠠᠯᠠ ᠳᠦᠭᠦᠷᠭᠡᠭᠡᠳ
ᠪᠢᠷᠠ ᠲᠠᠢ ᠬᠣᠶᠠᠷ ᠨᠢ ᠳᠠᠮᠵᠢᠯᠠᠵᠤ
ᠣᠷᠣᠨ ᠭᠡᠷ ᠦᠨ ᠢᠶᠡᠨ ᠬᠣᠢᠮᠤᠷ ᠰᠥᠩᠨᠡᠭᠡᠳ
ᠣᠯᠠᠨ ᠦᠶᠡ ᠳᠦ ᠥᠪᠯᠡᠵᠦ ᠬᠠᠳᠠᠭᠠᠯᠠᠭᠰᠠᠨ
ᠤᠬᠠᠵᠤ ᠤᠷᠠᠯᠠᠵᠤ ᠬᠢᠭᠡᠳ
ᠤᠭᠠᠯᠵᠠ ᠬᠡ ᠲᠡᠢ ᠪᠤᠳᠤᠭᠰᠠᠨ
ᠦᠨᠳᠦᠰᠦ ᠴᠠᠷᠠᠰᠤᠨ ᠬᠤᠯᠠᠨ ᠨᠤᠭᠤᠳ ᠢᠶᠠᠨ
ᠤᠭᠢᠶᠠᠵᠤ ᠠᠷᠴᠢᠵᠤ ᠴᠡᠪᠡᠷᠯᠡᠭᠡᠳ
ᠴᠠᠭᠠᠰᠤ ᠰᠢᠭ᠋ ᠨᠢᠮᠭᠡᠨ
ᠴᠠᠰᠤ ᠰᠢᠭ᠋ ᠴᠠᠭᠠᠨ
ᠬᠡ ᠨᠢ ᠲᠣᠪᠣᠭᠣᠷ᠂ ᠳᠠᠭᠤᠤ ᠨᠢ ᠰᠢᠩᠭᠡᠨ
ᠭᠠᠩᠭᠠᠷ ᠱᠠᠭᠠᠵᠠᠩ ᠬᠤᠯᠠᠨ ᠨᠤᠭᠤᠳ
ᠭᠠᠷᠭᠠᠵᠤ ᠪᠠᠰᠠ ᠠᠪᠴᠢᠷᠠᠭᠠᠳ
ᠪᠠᠷᠰ ᠠᠷᠰᠯᠠᠨ ᠬᠠᠳᠬᠤᠵᠤ
ᠪᠠᠵᠠᠭᠠᠵᠤ ᠤᠷᠠᠯᠠᠭᠰᠠᠨ ᠪᠦᠲᠡᠭᠡᠯᠭᠡ ᠲᠡᠢ
ᠪᠠᠬᠢᠮ ᠳᠣᠷᠢᠭᠤᠨ ᠬᠥᠯᠲᠡᠢ
ᠪᠠᠨᠳᠠᠩ ᠰᠢᠷᠡᠭᠡᠨ ᠳᠡᠭᠡᠷᠡ ᠥᠷᠢᠵᠦ
ᠪᠠᠷᠢᠬᠤ ᠠᠮᠠᠰᠠᠷ ᠲᠠᠢ ᠳᠦᠭᠦᠷᠭᠡᠭᠡᠳ
ᠬᠣᠯᠠ ᠶᠢᠨ ᠵᠣᠴᠢᠳ ᠣᠢᠷᠠ ᠶᠢᠨ ᠨᠥᠬᠥᠳ
ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠵᠦ
ᠠᠵᠤ ᠠᠮᠢᠳᠤᠷᠠᠯ ᠢᠶᠠᠨ ᠬᠦᠦᠷᠨᠢᠯᠳᠦᠵᠦ
ᠠᠵᠠ ᠵᠢᠷᠭᠠᠯ ᠢᠶᠠᠨ ᠢᠷᠦᠭᠡᠵᠦ
ᠠᠶᠠ ᠳᠠᠭᠤ ᠪᠠᠨ ᠡᠷᠭᠦᠵᠦ
ᠬᠥᠭᠵᠢᠮ ᠬᠤᠭᠤᠷ ᠢᠶᠠᠨ ᠡᠭᠡᠰᠢᠭᠯᠡᠵᠦ
ᠬᠥᠭᠵᠢᠯᠲᠡᠢ ᠰᠠᠢᠬᠠᠨ ᠨᠠᠢᠷᠠᠯᠠᠭᠰᠠᠨ ᠶᠤᠮ ᠪᠢᠵᠡ ᠡ᠃