ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ - ᠲᠠᠢᠯᠪᠤᠷᠢ ᠲᠠᠯᠪᠢᠭᠴᠢ ᠶ᠋ᠢᠨ ᠦᠭᠡ Эрдэнэ тунамал нэрт судар оршив - Тайлбар тавигчийн үг
330ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ
- ᠲᠠᠢᠯᠪᠤᠷᠢ ᠲᠠᠯᠪᠢᠭᠴᠢ ᠶ᠋ᠢᠨ ᠦᠭᠡ
《ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ 》ᠬᠡᠮᠡᠬᠦ ᠡᠨᠡ ᠨᠣᠮ ᠢ᠋ ᠪᠠᠰᠠ 《 ᠡᠷᠳᠡᠨᠢ ᠲᠣᠯᠢ ᠨᠡᠷᠡᠲᠦ ᠬᠤᠷᠢᠶᠠᠩᠭᠤᠢ ᠴᠡᠳᠢᠭ 》 ᠭᠡᠬᠦ ᠪᠤᠶᠤ 《 ᠴᠡᠭᠷᠡᠸᠡᠷᠳᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠲᠣᠭᠣᠵᠢ 》 ᠭᠡᠨᠡ ᠃ ᠡᠨᠡ ᠨᠣᠮ ᠪᠣᠯ ᠲᠠᠢᠮᠢᠩ ᠤᠯᠤᠰ ᠤ᠋ᠨ ᠦᠶᠡ ᠳ᠋ᠦ᠍ ᠮᠣᠩᠭᠣᠯ ᠤ᠋ᠨ ᠲᠦᠮᠡᠳ ᠠᠢᠮᠠᠭ ᠤ᠋ᠨ ᠡᠵᠡᠨ ᠠᠯᠲᠠᠨ ᠬᠠᠭᠠᠨ ( 1507 —1581) ᠦ᠌ ᠨᠠᠰᠤᠨ ᠲᠤᠷᠰᠢᠳᠠ ᠶ᠋ᠢᠨ ᠠᠵᠢᠯ ᠦᠢᠯᠡᠰ ᠢ᠋ ᠣᠨ ᠳᠠᠷᠠᠭᠠᠯᠠᠨ ᠲᠣᠭᠠᠴᠢᠨ ᠥᠭᠦᠯᠡᠭᠰᠡᠨ ᠨᠢᠭᠡᠨ ᠢᠵᠢ ᠲᠡᠦᠬᠡ ᠶ᠋ᠢᠨ ᠵᠣᠬᠢᠶᠠᠯ ᠪᠣᠯᠤᠨᠠ ᠃ ᠡᠭᠦᠨ ᠦ᠌ ᠳᠣᠲᠣᠷᠠ ᠂ ᠠᠯᠲᠠᠨ ᠬᠠᠭᠠᠨ ᠤ᠋ ᠪᠦᠬᠦ ᠨᠠᠰᠤᠨ ᠤ᠋ ᠦᠢᠯᠡ ᠬᠡᠷᠡᠭ ᠢ᠋ᠶ᠋ᠡᠷ ᠲᠣᠪᠴᠢ ᠪᠣᠯᠭᠠᠨ ᠂ ᠲᠦᠮᠡᠳ ᠠᠢᠮᠠᠭ ᠢ᠋ᠶ᠋ᠠᠷ ᠭᠣᠣᠯ ᠪᠣᠯᠭᠠᠭᠰᠠᠨ ᠪᠠᠷᠠᠭᠤᠨ ᠭᠠᠷᠤᠨ ᠮᠣᠩᠭᠣᠯᠴᠤᠳ ᠤ᠋ᠨ ᠤᠯᠤᠰ ᠲᠥᠷᠥ ᠂ ᠠᠵᠤ ᠠᠬᠤᠢ ᠂ ᠴᠡᠷᠢᠭ ᠦ᠋ᠨ ᠶᠠᠪᠤᠳᠠᠯ ᠪᠠ ᠲᠡᠭᠦᠨᠴᠢᠯᠡᠨ ᠮᠣᠩᠭᠣᠯ ᠤ᠋ᠨ ᠡᠯᠡ ᠠᠢᠮᠠᠭ ᠤ᠋ᠨ ᠬᠣᠭᠣᠷᠣᠨᠳᠣ ᠶ᠋ᠢᠨ ᠬᠠᠷᠢᠯᠴᠠᠭᠠ ᠬᠣᠯᠪᠣᠭᠠ ᠂ ᠲᠡᠳᠡᠨᠡᠷ ᠦ᠋ᠨ ᠭᠠᠳᠠᠭᠠᠳᠤ ᠬᠠᠷᠢᠯᠴᠠᠭᠠ ᠂ ᠵᠢᠴᠢ ᠮᠣᠩᠭᠣᠯ ᠣᠷᠣᠨ ᠪᠠ ᠲᠠᠢᠮᠢᠩ ᠤᠯᠤᠰ ᠯᠤᠭᠠ ᠬᠠᠷᠢᠯᠴᠠᠨ ᠠᠷᠠᠯᠵᠢᠶᠠ ᠨᠡᠪᠲᠡᠷᠡᠭᠰᠡᠨ ᠪᠠ ᠰᠢᠷᠠ ᠶ᠋ᠢᠨ ᠱᠠᠰᠢᠨ ᠮᠣᠩᠭᠣᠯ ᠣᠷᠣᠨᠠ ᠨᠡᠪᠲᠡᠷᠡᠨ ᠢᠷᠡᠭᠰᠡᠨ ᠥᠩᠭᠡᠷᠡᠯᠲᠡ ᠂ ᠶᠠᠪᠤᠴᠠ ᠵᠡᠷᠭᠡ ᠶ᠋ᠢ ᠨᠠᠷᠢᠪᠴᠢᠯᠠᠨ ᠲᠣᠭᠠᠴᠠᠵᠤᠬᠤᠢ᠃ ᠡᠨᠡ ᠨᠣᠮ ᠪᠣᠯ ᠮᠣᠩᠭᠣᠯ ᠲᠡᠦᠬᠡ ᠶ᠋ᠢᠨ ᠰᠤᠷᠪᠤᠯᠵᠢ ᠪᠢᠴᠢᠭ ᠦ᠋ᠨ ᠬᠥᠮᠥᠷᠭᠡ ᠳᠣᠲᠣᠷᠠᠬᠢ ᠨᠢᠭᠡᠨ ᠬᠣᠪᠣᠷ ᠴᠤᠬᠠᠭ ᠡᠷᠳᠡᠨᠢ ᠪᠣᠯᠤᠨᠠ ᠃
ᠡᠨᠡ ᠨᠣᠮ ᠢ᠋ ᠰᠢᠯᠦᠭ ᠦ᠋ᠨ ᠬᠡᠯᠪᠡᠷᠢ ᠪᠡᠷ ᠤᠷᠠᠨ ᠰᠠᠢᠬᠠᠨ ᠤᠶᠠᠩᠭᠠᠯᠠᠨ ᠪᠢᠴᠢᠭᠰᠡᠨ ᠪᠠ ᠲᠡᠭᠦᠨ ᠦ᠌ ᠦᠰᠦᠭ ᠦ᠋ᠨ ᠬᠡᠯᠪᠡᠷᠢ ᠂ ᠰᠤᠯᠠ ᠦᠭᠡ ᠳᠠᠭᠠᠪᠤᠷᠢ ᠨᠤᠭᠤᠳ ᠢ᠋ ᠬᠡᠷᠡᠭᠯᠡᠭᠰᠡᠨ ᠬᠡᠪ ᠪᠠᠢᠳᠠᠯ ᠵᠢᠴᠢ 《 ᠨᠠ 》 ᠂ 《 ᠭᠠ 》 ᠵᠡᠷᠭᠡ ᠦᠰᠦᠭ ᠲᠡᠢ ᠳᠤᠰᠤᠯ ᠨᠡᠮᠡᠵᠦ ᠳᠠᠭᠤᠳᠠᠯᠭᠠ ᠶ᠋ᠢ ᠡᠰᠡ ᠲᠣᠳᠣᠳᠬᠠᠭᠰᠠᠨ ᠨᠢ ᠬᠠᠷᠢᠨ ᠴᠤ᠌ ᠡᠷᠲᠡᠨ ᠦ᠌ ᠮᠣᠩᠭᠣᠯ ᠪᠢᠴᠢᠭ ᠦ᠋ᠨ ᠬᠡᠪ ᠰᠢᠨᠵᠢ ᠶ᠋ᠢ ᠨᠡᠯᠢᠶᠡᠳ ᠬᠠᠳᠠᠭᠠᠯᠠᠵᠠᠢ ᠃ ᠡᠭᠦᠪᠡᠷ ᠢ᠋ᠶ᠋ᠡᠨ ᠡᠨᠡ ᠨᠣᠮ ᠠᠨᠤ ᠮᠥᠨ ᠪᠠᠰᠠ ᠮᠣᠩᠭᠣᠯ ᠤ᠋ᠨ ᠬᠡᠯᠡ ᠦᠰᠦᠭ ᠦ᠋ᠨ ᠲᠡᠦᠬᠡ ᠶ᠋ᠢ ᠰᠢᠨᠵᠢᠨ ᠰᠤᠳᠤᠯᠬᠤ ᠳ᠋ᠤ᠌ ᠬᠣᠪᠣᠷ ᠴᠤᠬᠠᠭ ᠮᠠᠲ᠋ᠧᠷᠢᠶᠠᠯ ᠪᠣᠯᠵᠤ ᠂ ᠦᠰᠦᠭ ᠪᠢᠴᠢᠭ ᠦ᠋ᠨ ᠤᠬᠠᠭᠠᠨ ᠢ᠋ ᠰᠢᠨᠵᠢᠭᠴᠢ ᠨᠠᠷ ᠤ᠋ᠨ ᠠᠩᠬᠠᠷᠤᠯ ᠢ᠋ ᠲᠠᠲᠠᠵᠤ ᠪᠠᠢᠬᠤ ᠶᠤᠮ ᠃
ᠡᠨᠡ ᠬᠦ᠌ ᠨᠣᠮ ᠢ᠋ ᠴᠣᠬᠣᠮ ᠠᠯᠢ ᠦᠶᠡ ᠳ᠋ᠦ᠍ ᠵᠣᠬᠢᠶᠠᠨ ᠪᠢᠴᠢᠭᠰᠡᠨ ᠲᠤᠬᠠᠢ ᠨᠠᠷᠢᠨ ᠲᠣᠳᠣᠷᠠᠭᠤᠨ ᠲᠡᠮᠳᠡᠭᠯᠡᠯ ᠬᠠᠷᠠᠬᠠᠨ ᠥᠭᠡᠷᠡ ᠦᠭᠡᠢ ᠪᠠᠢᠭᠰᠠᠭᠠᠷ ᠃ᠬᠡᠳᠦᠢ ᠲᠡᠢᠨ ᠪᠣᠯᠪᠠᠴᠤ ᠪᠡᠳᠡ ᠡᠨᠡ ᠨᠣᠮ ᠤ᠋ᠨ ᠳᠣᠲᠣᠷᠠ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠶᠠᠪᠤᠳᠠᠯ ᠤᠴᠢᠷ ᠠ᠋ᠴᠠ ᠰᠦᠪᠡᠭᠴᠢ ᠣᠯᠵᠤ ᠮᠠᠭᠠᠳᠯᠠᠨ ᠲᠥᠰᠦᠪᠯᠡᠵᠦ ᠪᠣᠯᠬᠤ ᠶᠤᠮ ᠃ᠡᠨᠡ ᠨᠣᠮ ᠤ᠋ᠨ ᠳᠣᠲᠣᠷᠠ ᠂ ᠤᠰᠤᠨ ᠲᠠᠤᠯᠠᠢ ᠵᠢᠯ ( ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠨ ᠨᠢᠭᠡᠳᠦᠭᠡᠷ ᠣᠨ ᠂ 1603 ) ᠣᠨ ᠤ᠋ ᠤᠴᠢᠷ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠦ᠌ ᠳᠠᠷᠠᠭᠠ ᠥᠭᠦᠯᠡᠭᠰᠡᠨ ᠨᠢ ᠄
《 ᠲᠡᠭᠦᠨ ᠦ᠌ ᠬᠤᠢᠨᠠ ᠨᠠᠮᠤᠲᠠᠢ ᠰᠡᠴᠡᠨ ᠬᠠᠭᠠᠨ ᠵᠥᠩᠭᠡᠨ ᠬᠠᠲᠤᠨ ᠬᠣᠩ ᠲᠠᠢᠵᠢ ᠭᠤᠷᠪᠠᠭᠤᠯᠠ
ᠳᠡᠭᠡᠳᠦ ᠪᠣᠭᠳᠠ ᠬᠠᠭᠠᠨ ᠤ᠋ ᠲᠥᠷᠥ ᠶ᠋ᠢ ᠨᠣᠮ ᠤ᠋ᠨ ᠶᠣᠰᠣᠭᠠᠷ ᠶᠠᠪᠤᠭᠤᠯᠤᠭᠠᠳ
ᠲᠡᠭᠰᠢ ᠪᠤᠷᠬᠠᠨ ᠪᠠᠭᠰᠢ ᠶ᠋ᠢᠨ ᠨᠣᠮᠯᠠᠭᠰᠠᠨ ᠵᠠᠭᠤᠨ ᠨᠠᠢ᠍ᠮᠠᠨ ᠭᠡᠨᠵᠦᠷ ᠨᠣᠮ ᠢ᠋ ᠮᠣᠩᠭᠣᠯ ᠤ᠋ᠨ ᠬᠡᠯᠪᠡᠷᠢ
ᠲᠡᠷᠡ ᠴᠠᠭ ᠲᠤᠷ ᠰᠢᠷᠡᠭᠡᠲᠦ ᠭᠦᠰᠢ ᠴᠣᠷᠵᠢ ᠠᠶᠤᠰᠢ ᠠᠨᠠᠨᠳᠠ ᠮᠠᠨᠵᠤᠰᠢᠷᠢ ᠬᠥᠰᠢ ᠲᠡᠷᠢᠭᠦᠲᠡᠨ ᠪᠠ
ᠭᠠᠢᠬᠠᠮᠰᠢᠭ ᠭᠤᠷᠪᠠᠨ ᠲᠦᠮᠡᠨ ᠦ᠌ ᠬᠡᠯᠡᠮᠦᠷᠴᠢ ᠮᠡᠷᠭᠡᠳ ᠢ᠋ᠶ᠋ᠡᠷ
ᠬᠠᠷᠠ ᠪᠠᠷᠰ ᠵᠢᠯ ᠡᠴᠡ ᠤᠯᠠᠭᠠᠨ ᠬᠣᠨᠢᠨ ᠵᠢᠯ ᠬᠦᠷᠲᠡᠯᠡ ᠪᠡᠷ
ᠬᠠᠮᠤᠭ ᠨᠣᠮ ᠤ᠋ᠳ ᠢ᠋ ᠪᠦᠷᠢᠨ ᠲᠡᠭᠦᠰ ᠣᠷᠴᠢᠭᠤᠯᠵᠤ ᠪᠦᠷ ᠦ᠋ᠨ
ᠪᠦᠷᠢᠨ ᠭᠠᠢᠬᠠᠮᠰᠢᠭ ᠵᠣᠬᠢᠰᠲᠠᠶᠠ ᠳᠡᠪᠲᠡᠷ ᠲᠣᠷ ᠣᠷᠣᠰᠢᠭᠤᠯᠵᠤ ᠲᠠᠯᠪᠢᠪᠠᠢ 》 ᠭᠡᠵᠡᠢ ᠃
ᠳᠡᠭᠡᠷᠡ ᠳᠤᠷᠠᠳᠤᠭᠰᠠᠨ ᠬᠠᠷᠠ ᠪᠠᠷᠰ ᠵᠢᠯ ᠬᠡᠮᠡᠭᠴᠢ ᠨᠢ ᠳᠠᠷᠤᠢ ᠬᠠᠷᠠ ᠡᠷᠡ ᠪᠠᠷᠰ ᠵᠢᠯ ( ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠳᠤᠭᠠᠷ ᠣᠨ ᠂1602 ᠣᠨ ) ᠮᠥᠨ ᠪᠣᠯᠬᠤ ᠪᠠ ᠤᠯᠠᠭᠠᠨ ᠬᠣᠨᠢᠨ ᠵᠢᠯ ᠬᠡᠮᠡᠭᠴᠢ ᠨᠢ ᠤᠯᠠᠭᠠᠨ ᠡᠮᠡ ᠬᠣᠨᠢᠨ ᠵᠢᠯ ( ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠨ ᠲᠠᠪᠤᠳᠤᠭᠠᠷ ᠣᠨ 1607 ᠣᠨ ) ᠪᠣᠯᠤᠨᠠ ᠃ ᠡᠭᠦᠨᠴᠡ ᠦᠵᠡᠪᠡᠰᠦ ᠂ ᠡᠨᠡ ᠪᠢᠴᠢᠭ ᠲᠦ᠍ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠬᠠᠮᠤᠭ ᠰᠡᠭᠦᠯᠴᠢ ᠶ᠋ᠢᠨ ᠣᠨ ᠵᠢᠯ ᠨᠢ 1607 ᠣᠨ ᠪᠣᠯᠬᠤ ᠶ᠋ᠢᠨ ᠣᠴᠢᠷᠠ ᠂ ᠡᠨᠡ ᠨᠣᠮ ᠢ᠋ ᠲᠤᠭᠤᠷᠪᠢᠨ ᠪᠢᠴᠢᠭᠰᠡᠨ ᠣᠨ ᠵᠢᠯ ᠨᠢ ᠶᠠᠷᠢᠶᠠᠨ ᠦᠭᠡᠢ 1607 ᠣᠨ ᠪᠤᠶᠤ ᠡᠰᠡᠬᠦᠯᠡ ᠲᠡᠭᠦᠨᠴᠡ ᠬᠣᠢᠨᠠ ᠪᠣᠯᠤᠨᠠ ᠃ ᠴᠣᠬᠣᠮ ᠪᠣᠳᠠᠲᠠᠢ ᠠᠯᠢ ᠣᠨ ᠳ᠋ᠤᠷ ᠪᠢᠴᠢᠭᠳᠡᠭᠰᠡᠨ ᠢ᠋ ᠲᠣᠳᠣᠯᠠᠬᠤ ᠳ᠋ᠤ᠌ ᠳᠣᠣᠷᠠ ᠥᠭᠦᠯᠡᠬᠦ ᠲᠡᠦᠬᠡ ᠶ᠋ᠢᠨ ᠬᠡᠷᠡᠭ ᠶᠠᠪᠤᠳᠠᠯ ᠂ ᠪᠢᠳᠡᠨ ᠳ᠋ᠦ᠍ ᠮᠠᠭᠠᠳᠯᠠᠨ ᠲᠣᠳᠣᠯᠠᠵᠤ ᠪᠣᠯᠬᠤᠢᠴᠠ ᠪᠣᠯᠤᠯᠴᠠᠭᠠ ᠶ᠋ᠢ ᠣᠯᠭᠣᠵᠤ ᠪᠣᠯᠤᠨᠠ ᠃ ᠡᠨᠡ ᠨᠣᠮ ᠳ᠋ᠤ᠌ ᠳᠠᠶᠤᠨ ᠬᠠᠭᠠᠨ ᠂ ᠰᠠᠢᠨ ᠠᠯᠠᠭ ᠬᠠᠭᠠᠨ ᠂ ᠠᠯᠲᠠᠨ ᠬᠠᠭᠠᠨ ᠂ ᠰᠡᠩᠭᠡ ᠳᠦᠭᠦᠷᠡᠩ ᠬᠠᠭᠠᠨ ᠲᠠᠨ ᠤ᠋ ᠶᠡᠬᠡ ᠣᠷᠣ ᠵᠠᠯᠭᠠᠮᠵᠢᠯᠠᠭᠰᠠᠨ ᠣᠨ ᠵᠢᠯ ᠪᠠ ᠨᠠᠰᠤ ᠨᠥᠭᠴᠢᠭᠰᠡᠨ ᠣᠨ ᠵᠢᠯ ᠢ᠋ ᠴᠥᠮ ᠨᠠᠷᠢᠨ ᠲᠣᠳᠣᠷᠬᠠᠢ ᠲᠡᠮᠳᠡᠭᠯᠡᠭᠰᠡᠨ ᠪᠠᠢᠲᠠᠯᠠ ᠬᠠᠷᠢᠨ ᠨᠠᠮᠤᠲᠠᠢ ᠰᠡᠴᠡᠨ ᠬᠠᠭᠠᠨ ᠤ᠋ ᠲᠤᠬᠠᠢ ᠲᠡᠮᠳᠡᠭᠯᠡᠯ ᠳ᠋ᠦ᠍ᠷ ᠭᠠᠭᠴᠠ ᠲᠡᠭᠦᠨ ᠦ᠌ ᠶᠡᠬᠡ ᠣᠷᠣ ᠵᠠᠯᠭᠠᠮᠵᠢᠯᠠᠭᠰᠠᠨ ᠣᠨ ( ᠭᠠᠯ ᠨᠣᠬᠠᠢ ᠵᠢᠯ ᠂ ᠸᠠᠨ ᠯᠢ ᠶ᠋ᠢᠨ ᠠᠷᠪᠠᠨ ᠳᠥᠷᠪᠡᠳᠦᠭᠡᠷ ᠣᠨ ᠂ 1586ᠣᠨ ) ᠢ᠋ ᠲᠣᠳᠣᠯᠠᠨ ᠲᠡᠮᠳᠡᠭᠯᠡᠭᠡᠳ ᠲᠡᠭᠦᠨ ᠦ᠌ ᠨᠠᠰᠤᠨ ᠨᠥᠭᠴᠢᠭᠰᠡᠨ ᠣᠨ ᠵᠢᠯ ᠢ᠋ ᠲᠡᠮᠳᠡᠭᠯᠡᠭᠰᠡᠨ ᠦᠭᠡᠢ ᠃ ᠡᠭᠦᠨᠴᠡ ᠡᠨᠡ ᠨᠣᠮ ᠪᠣᠯ ᠨᠠᠮᠤᠲᠠᠢ ᠰᠡᠴᠡᠨ ᠬᠠᠭᠠᠨ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠭᠰᠠᠨ ᠦᠶᠡ ᠳ᠋ᠦ᠍ ᠪᠢᠴᠢᠭᠳᠡᠭᠰᠡᠨ ᠭᠡᠳᠡᠭ ᠢ᠋ ᠲᠣᠳᠣᠯᠠᠵᠤ ᠪᠣᠯᠤᠨᠠ ᠃ ᠨᠠᠮᠤᠲᠠᠢ ᠰᠡᠴᠡᠨ ᠬᠠᠭᠠᠨ ᠢ᠋ ᠬᠢᠲᠠᠳ ᠪᠢᠴᠢᠭ ᠲᠣᠷ ᠴᠧ ᠯᠢ ᠺᠧ ( 扯力克) ᠭᠡᠳᠡᠭ ᠃ 《 ᠮᠢᠩ ᠱᠢ 》 ( 明史) ᠪᠢᠴᠢᠭ ᠲᠡᠬᠢ ᠱᠧᠨ ᠽᠦᠩ ( 神宗 )ᠬᠠᠭᠠᠨ ᠤ᠋ ᠴᠡᠳᠢᠭ ᠲᠤᠷ ᠲᠡᠮᠳᠡᠭᠯᠡᠭᠰᠡᠨ ᠢ᠋ ᠦᠨᠳᠦᠰᠦᠯᠡᠪᠡᠯ ᠂ ᠨᠠᠮᠤᠲᠠᠢ ᠰᠡᠴᠡᠨ ᠬᠠᠭᠠᠨ ᠤ᠋ ᠨᠠᠰᠤᠨ ᠨᠥᠭᠴᠢᠭᠰᠡᠨ ᠣᠨ ᠪᠣᠯ ᠸᠠᠨ ᠯᠢ ( 万历 ) ᠶ᠋ᠢᠨ ᠭᠤᠴᠢᠨ ᠲᠠᠪᠤᠳᠤᠭᠠᠷ ᠣᠨ ᠤ᠋ ᠵᠤᠨ ᠤ᠋ ᠤᠯᠠᠷᠢᠯ ᠤ᠋ᠨ ᠳᠥᠲᠥᠭᠡᠷ ᠰᠠᠷᠠ ᠶ᠋ᠢᠨ ᠬᠠᠷᠠ ᠬᠤᠯᠤᠭᠠᠨᠠ ᠡᠳᠦᠷ ( ᠬᠣᠷᠢᠨ ᠤ᠋ ᠡᠳᠦᠷ ) ᠪᠣᠯᠤᠨᠠ ᠭᠡᠵᠡᠢ ᠃ ᠡᠭᠦᠨᠴᠡ ᠦᠵᠡᠪᠡᠯ ᠂ ᠡᠨᠡ ᠨᠣᠮ ᠤ᠋ᠨ ᠪᠢᠴᠢᠭᠳᠡᠭᠰᠡᠨ ᠣᠨ ᠵᠢᠯ ᠨᠢ ᠸᠠᠨ ᠯᠢ ᠶ᠋ᠢᠨ ᠭᠤᠴᠢᠨ ᠲᠠᠪᠤᠳᠤᠭᠠᠷ ᠣᠨ ᠪᠣᠯᠬᠤ 1607 ᠣᠨ ᠤ᠋ ᠬᠠᠪᠤᠷ ᠴᠠᠭ ᠪᠣᠢ ᠢᠡ ᠬᠡᠮᠡᠬᠦ ᠪᠣᠯᠤᠯᠴᠠᠭᠠ ᠮᠠᠰᠢ ᠶᠡᠬᠡ ᠪᠠᠢᠨᠠ ᠃
ᠡᠨᠡ ᠨᠣᠮ ᠢ᠋ ᠲᠤᠭᠤᠷᠪᠢᠨ ᠪᠢᠴᠢᠭᠰᠡᠨ ᠲᠡᠷᠡ ᠬᠥᠮᠦᠨ ᠥᠪᠡᠷ ᠦ᠋ᠨ ᠠᠯᠳᠠᠷ ᠨᠡᠷᠡ ᠶ᠋ᠢ ᠡᠰᠡ ᠲᠡᠮᠳᠡᠭᠯᠡᠨ ᠦᠯᠡᠳᠡᠭᠡᠭᠰᠡᠨ ᠨᠢ ᠦᠨᠡᠬᠡᠷ ᠬᠠᠷᠠᠮᠰᠠᠯᠲᠠᠢ ᠤᠴᠢᠷ ᠪᠣᠯᠠᠢ ᠃
ᠡᠨᠡ ᠪᠢᠴᠢᠭ ᠦ᠋ᠨ ᠲᠡᠦᠬᠡ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠢᠷᠡᠯᠲᠡ ᠶ᠋ᠢᠨ ᠲᠤᠬᠠᠢ ᠲᠡᠭᠦᠰᠬᠡᠯ ᠳ᠋ᠦ᠍ ᠲᠡᠮᠳᠡᠭᠯᠡᠭᠰᠡᠨ ᠨᠢ ᠄
《ᠭᠡᠭᠡᠨ ᠬᠠᠭᠠᠨ ᠬᠡᠳᠦᠢ ᠲᠣᠭᠠ ᠲᠠᠨ ᠬᠠᠲᠤᠳ ᠠᠪᠤᠭᠰᠠᠨ
ᠬᠡᠳᠦᠢ ᠲᠣᠭᠠᠲᠠᠨ ᠬᠥᠪᠡᠭᠦᠳ ᠥᠬᠢᠳ ᠢ᠋ ᠲᠥᠷᠥᠭᠦᠯᠦᠭᠰᠡᠨ
ᠬᠡᠵᠢᠶᠡᠶᠡ ᠳ᠋ᠠ ᠠᠰᠤᠷᠤ ᠲᠤᠷᠬᠠᠷᠦ ᠵᠠᠰᠠᠭ ᠴᠠᠭᠠᠵᠢ ᠪᠠᠢᠭᠤᠯᠤᠭᠰᠠᠨ
ᠬᠡᠯᠬᠦ ᠶᠡᠬᠡ ᠤᠯᠤᠰ ᠤ᠋ᠨ ᠬᠠᠭᠠᠴᠠᠭᠰᠠᠨ ᠲᠥᠷᠥ ᠶ᠋ᠢ ᠬᠠᠮᠲᠤᠳᠬᠠᠭᠰᠠᠨ
ᠲᠡᠳᠡᠭᠡᠷ ᠣᠯᠠᠨ ᠲᠣᠭᠠᠲᠠᠨ ᠶᠠᠪᠤᠳᠠᠯ ᠠ᠋ᠴᠠ ᠢᠨᠦ ᠡᠳᠦᠢ ᠲᠡᠳᠦᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠬᠣᠷᠢᠶᠠᠨ ᠪᠢᠴᠢᠭᠰᠡᠨ ᠪᠤᠶᠤ ᠃
ᠴᠡᠭᠷᠠᠸᠠᠷᠳᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠲᠥᠷᠥᠯ ᠢ᠋ ᠤᠬᠠᠭᠤᠯᠬᠤᠢ ᠡᠷᠳᠡᠨᠢ ᠲᠣᠯᠢ ᠨᠡᠷᠡᠲᠦ ᠬᠤᠷᠢᠶᠠᠩᠭᠤᠢ ᠴᠡᠳᠢᠭ ᠲᠡᠭᠦᠰᠪᠡ 》 ᠭᠡᠵᠡᠢ ᠃ ᠳᠠᠬᠢᠨ ᠪᠠᠰᠠ ᠄
《ᠦᠨᠳᠦᠰᠦᠨ ᠳᠡᠭᠡᠳᠦ ᠯᠠᠮᠠ ᠨᠠᠷ ᠲᠤᠷ ᠢ᠋ᠶ᠋ᠠᠨ ᠵᠠᠯᠪᠠᠷᠢᠮᠤᠢ
ᠦᠯᠡᠮᠵᠢ ᠪᠣᠭᠳᠠ ᠠᠯᠲᠠᠨ ᠬᠠᠭᠠᠨ ᠤ᠋ ᠨᠡᠷᠡ ᠠᠯᠳᠠᠷ ᠥᠴᠦᠬᠡᠨ ᠰᠣᠨᠣᠰᠴᠤ
ᠤᠷᠠᠨ ᠲᠠᠩᠭᠠᠷᠢᠭ ᠳᠠᠶᠤᠨ ᠬᠢᠶᠡ ᠶ᠋ᠢᠨ ᠵᠣᠬᠢᠶᠠᠭᠰᠠᠨ ᠠ᠋ᠴᠠ ᠲᠤᠭᠤᠷᠪᠢᠵᠤ
ᠤᠯᠠᠮ ᠪᠠᠰᠠ ᠬᠣᠲᠠᠯᠠ ᠳ᠋ᠠ ᠠᠯᠳᠠᠷᠰᠢᠲᠤᠭᠠᠢ ᠭᠡᠮᠡᠨ ᠪᠢᠴᠢᠪᠡ ᠪᠢ ᠰᠡᠳᠬᠢᠵᠦ
ᠲᠩᠷᠢᠯᠢᠭ ᠪᠣᠭᠳᠠ ᠠᠯᠲᠠᠨ ᠬᠠᠭᠠᠨ ᠤ᠋ ᠰᠠᠢᠨ ᠶᠠᠪᠤᠳᠠᠯ ᠤ᠋ᠨ ᠴᠡᠳᠢᠭ ᠢ᠋
ᠲᠡᠭᠦᠰ ᠪᠦᠷᠢᠨ ᠪᠢᠴᠢᠬᠦᠶᠡ ᠪᠡᠷᠬᠡ ᠳ᠋ᠡᠬᠢ ᠪᠥᠭᠡᠰᠦ ᠪᠡᠷ
ᠲᠡᠭᠦᠨᠠᠷ ᠬᠥᠪᠡᠭᠦᠳ ᠠᠯᠲᠠᠨ ᠣᠷᠤᠭᠤᠳ ᠢᠨᠦ ᠦᠵᠡᠵᠦ ᠬᠢᠴᠢᠶᠡᠲᠦᠭᠡᠢ ᠭᠡᠮᠡᠨ
ᠲᠡᠭᠦᠰᠬᠡᠵᠦ ᠡᠳᠦᠢ ᠲᠡᠳᠦᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠷ ᠳᠡᠪᠲᠡᠷ ᠲᠣᠷ ᠣᠷᠣᠰᠢᠭᠤᠯᠪᠠᠢ ᠪᠢ 》 ᠭᠡᠪᠡ ᠃
ᠳᠡᠭᠡᠷᠡ ᠰᠡᠢᠷᠡᠭᠦᠯᠦᠭᠰᠡᠨ ᠡᠨᠡ ᠬᠣᠶᠠᠷ ᠪᠠᠳᠠᠭ ᠠ᠋ᠴᠠ ᠬᠢᠨᠠᠪᠠᠰᠤ ᠂ ᠵᠣᠬᠢᠶᠠᠭᠴᠢ ᠶ᠋ᠢᠨ ᠪᠡᠶᠡ ᠡᠨᠡ ᠨᠣᠮ ᠢ᠋ᠶ᠋ᠠᠨ ᠪᠢᠴᠢᠬᠦᠢ ᠳ᠋ᠡᠭᠡᠨ ᠶᠡᠷᠦᠩᠬᠡᠢ ᠳ᠋ᠦ᠍ᠨᠢ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠮᠠᠲ᠋ᠧᠷᠢᠶᠠᠯ ᠢ᠋ ᠦᠨᠳᠦᠰᠦᠯᠡᠵᠡᠢ ᠃ ᠨᠢᠭᠡ ᠨᠢ ᠵᠣᠬᠢᠶᠠᠭᠴᠢ ᠶ᠋ᠢᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠦᠵᠡᠵᠦ ᠰᠣᠨᠣᠰᠤᠭᠰᠠᠨ ᠵᠦᠢᠯ ᠪᠣᠯᠤᠨᠠ ᠂ ᠨᠥᠭᠥᠭᠡ ᠨᠢ ᠤᠷᠠᠨ ᠲᠠᠩᠭᠠᠷᠢᠭ ᠳᠠᠶᠣᠨ ᠬᠢᠶᠡ ᠶ᠋ᠢᠨ ᠲᠤᠭᠤᠷᠪᠢᠨ ᠪᠢᠴᠢᠭᠰᠡᠨ ᠵᠣᠬᠢᠶᠠᠯ ᠪᠣᠯᠤᠨᠠ ᠃ᠪᠢᠳᠡ ᠬᠡᠳᠦᠢᠪᠡᠷ ᠤᠷᠠᠨ ᠲᠠᠩᠭᠠᠷᠢᠭ ᠳᠠᠶᠣᠨ ᠬᠢᠶᠡ ᠶ᠋ᠢᠨ ᠤᠭ ᠵᠣᠬᠢᠶᠠᠯ ᠢ᠋ ᠡᠰᠡ ᠣᠯᠵᠤ ᠦᠵᠡᠭᠰᠡᠨ ᠴᠦ᠍ ᠳᠠᠶᠣᠨ ᠬᠢᠶᠡ ᠬᠡᠮᠡᠬᠦ ᠡᠨᠡ ᠬᠥᠮᠦᠨ ᠪᠣᠯ ᠬᠠᠷᠢᠨ ᠪᠢᠳᠡᠨ ᠳ᠋ᠦ᠍ ᠠᠪᠴᠤ ᠬᠡᠯᠡᠪᠡᠯ ᠲᠠᠨᠢᠯ ᠪᠤᠰᠤ ᠬᠥᠮᠦᠨ ᠪᠤᠰᠤ ᠪᠣᠯᠠᠢ ᠃ ᠳᠠᠶᠣᠨ ᠬᠢᠶᠡ ᠪᠣᠯ ᠠᠯᠲᠠᠨ ᠬᠠᠭᠠᠨ ᠤ᠋ ᠵᠢᠷᠤᠮ ᠤ᠋ᠨ ᠬᠥᠪᠡᠭᠦᠨ ᠂ ᠤᠭ ᠤ᠋ᠨ ᠨᠡᠷᠡ ᠨᠢ ᠰᠠᠷᠠᠮᠠᠢ ᠭᠡᠳᠡᠭ ᠃ ᠳᠠᠶᠣᠨ ᠬᠢᠶᠡ ᠬᠡᠮᠡᠭᠴᠢ ᠨᠢ ᠲᠡᠭᠦᠨ ᠦ᠌ ᠲᠤᠰᠢᠶᠠᠯ ᠪᠣᠯᠤᠨᠠ ᠃ ᠬᠢᠲᠠᠳ ᠪᠢᠴᠢᠭ ᠲᠦ᠍ ᠳᠠᠶᠣᠨ ᠬᠢᠶᠡ ᠶ᠋ᠢ ᠴᠢᠶᠠ ᠲᠠᠢᠵᠢ ( 恰台吉 ) ᠭᠡᠳᠡᠭ ᠃ 《 ᠰᠠᠨ ᠶᠦᠨ ᠴᠧᠦ ᠵᠦᠢ ᠺᠠᠤ (三云筹 俎考) ᠭᠡᠬᠦ ᠪᠢᠴᠢᠭ ᠲᠡᠬᠢ ᠮᠣᠩᠭᠣᠯ ᠦᠭᠡ ᠶ᠋ᠢᠨ ᠲᠠᠢᠯᠪᠤᠷᠢ ᠠ᠋ᠴᠠ ᠬᠢᠨᠠᠨ ᠦᠵᠡᠪᠡᠯ《恰》 ᠭᠡᠳᠡᠭ ᠨᠢ 《 ᠬᠢᠶᠡ 》 ᠭᠡᠬᠦ ᠦᠭᠡ ᠶ᠋ᠢᠨ ᠠᠪᠢᠶᠠᠴᠢᠯᠠᠭᠰᠠᠨ ᠳᠠᠭᠤᠳᠠᠯᠭᠠ ᠪᠣᠯᠬᠤ ᠪᠥᠭᠡᠳ 《ᠲᠠᠢᠵᠢ ᠶ᠋ᠢᠨ ᠡᠭᠦᠳᠡᠨᠡ ᠲᠤᠰ ᠠᠢᠮᠠᠭ ᠪᠦᠯᠦᠭ ᠦ᠋ᠨ ᠶᠡᠬᠡ ᠪᠠᠭᠠ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠮᠡᠳᠡᠭᠴᠢ ᠵᠠᠷᠭᠤᠴᠢ ᠰᠠᠢᠨ ᠬᠥᠮᠦᠨ 》 ᠭᠡᠰᠡᠨ ᠤᠳᠬᠠ ᠲᠠᠢ ᠃ 《 ᠸᠠᠨ ᠯᠢ ᠡᠦ ᠬᠦᠩ ᠯᠦ᠍ 》 （ 万历武功录） ᠪᠢᠴᠢᠭ ᠲᠠᠬᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠨᠠᠮᠲᠠᠷ ᠲᠤ᠌ ᠳᠠᠶᠤᠨ ᠬᠢᠶᠡ ᠶ᠋ᠢᠨ ᠵᠡᠷᠭᠡ ᠲᠤᠱᠢᠶᠠᠯ ᠤ᠋ᠨ ᠲᠤᠬᠠᠢ ᠮᠥᠨ ᠨᠢᠭᠡᠨ ᠠᠯᠬᠤᠮ ᠲᠣᠳᠣᠯᠠᠨ ᠥᠭᠦᠯᠡᠭᠰᠡᠨ ᠲᠡᠮᠳᠡᠭᠯᠡᠯ ᠪᠣᠢ ᠃ ᠲᠡᠭᠦᠨ ᠳ᠋ᠦ᠍ ᠳᠠᠶᠤᠨ ᠬᠢᠶᠡ ᠶ᠋ᠢ ᠠᠯᠲᠠᠨ ᠬᠠᠭᠠᠨ ᠤ᠋纪纲仆 ᠭᠡᠵᠡᠢ ᠃ ᠡᠭᠦᠨ ᠢ᠋ ᠣᠳᠣ ᠶ᠋ᠢᠨ ᠦᠭᠡ ᠪᠡᠷ ᠬᠡᠯᠡᠪᠡᠯ ᠂ ᠠᠯᠲᠠᠨ ᠬᠠᠭᠠᠨ ᠤ᠋ ᠭᠡᠷ ᠦ᠋ᠨ ᠦᠢᠯᠡ ᠠᠳᠠᠯ ᠢ᠋ ᠬᠠᠮᠢᠶᠠᠷᠤᠭᠴᠢ ᠵᠠᠷᠤᠴᠠ ᠬᠥᠮᠦᠨ ᠭᠡᠰᠡᠨ ᠤᠳᠬᠠ ᠲᠠᠢ ᠃ ᠭᠡᠲᠡᠯᠡ ᠪᠢᠳᠡ ᠮᠣᠩᠭᠣᠯ ᠬᠢᠲᠠᠳ ᠰᠤᠷᠪᠤᠯᠵᠢ ᠪᠢᠴᠢᠭ ᠲᠦ᠍ ᠲᠡᠮᠳᠡᠭᠯᠡᠭᠳᠡᠭᠰᠡᠨ ᠳᠠᠶᠤᠨ ᠬᠢᠶᠡ ᠶ᠋ᠢᠨ ᠦᠢᠯᠡ ᠠᠵᠢᠯᠯᠠᠭᠠᠨ ᠠᠴᠠ ᠦᠵᠡᠪᠡᠯ ᠂ ᠡᠨᠡ ᠬᠦ᠌ ᠳᠠᠶᠤᠨ ᠬᠢᠶᠡ ᠶ᠋ᠢᠨ ᠮᠡᠳᠡᠨ ᠬᠠᠮᠢᠶᠠᠷᠬᠤ ᠦᠢᠯᠡ ᠠᠳᠠᠯ ᠠᠨᠤ ᠬᠠᠷᠢᠨ ᠴᠤ᠌ ᠠᠯᠲᠠᠨ ᠬᠠᠭᠠᠨ ᠤ᠋ ᠭᠡᠷ ᠦ᠋ᠨ ᠬᠡᠷᠡᠭ ᠶᠠᠪᠤᠳᠠᠯ ᠤ᠋ᠨ ᠲᠡᠳᠦᠢ ᠪᠡᠷ ᠦᠯᠦ ᠪᠠᠷᠠᠮ ᠂ ᠲᠡᠷᠡ ᠪᠠᠰᠠ ᠦᠷᠭᠦᠯᠵᠢ ᠠᠯᠲᠠᠨ ᠬᠠᠭᠠᠨ ᠤ᠋ ᠲᠥᠯᠥᠭᠡᠯᠡᠭᠴᠢ ᠪᠣᠯᠵᠤ ᠭᠠᠳᠠᠭᠠᠳᠤ ᠬᠠᠷᠢᠯᠴᠠᠭᠠᠨ ᠤ᠋ ᠤᠴᠢᠷ ᠶᠠᠪᠤᠳᠠᠯ ᠳ᠋ᠤ᠌ ᠣᠷᠣᠯᠴᠠᠨ ᠶᠠᠪᠤᠳᠠᠭ ᠬᠥᠮᠦᠨ ᠪᠠᠢᠵᠠᠢ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄ ᠵᠢᠶᠠ ᠵᠢᠩ (嘉靖 ) ᠦ᠋ᠨ ᠭᠤᠴᠢᠳᠤᠭᠠᠷ ᠣᠨ ( 1551 ) ᠳ᠋ᠦ᠍ ᠳᠠᠶ᠋ᠢᠲᠤᠩ (大同 ) ᠬᠣᠲᠠᠨᠠ ᠠᠳᠤᠭᠤᠨ ᠤ᠋ ᠠᠷᠠᠯᠵᠢᠶᠠ ᠪᠠᠢᠭᠤᠯᠬᠤ ᠲᠡᠷᠡ ᠬᠡᠯᠡᠯᠴᠡᠭᠡᠷ ᠲᠦ᠍ ᠪᠠ ᠯᠦᠩ ᠴᠢᠩ ( 隆庆 ) ᠦ᠋ᠨ ᠲᠠᠪᠤᠳᠤᠭᠠᠷ ᠣᠨ ( 1571 ) ᠳ᠋ᠦ᠍ ᠮᠣᠩᠭᠣᠯ ᠪᠠ ᠲᠠᠶ᠋ᠢᠮᠢᠩ ᠤᠯᠤᠰ ᠤ᠋ᠨ ᠬᠣᠭᠣᠷᠣᠨᠳᠣ ᠬᠠᠷᠢᠯᠴᠠᠨ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠨᠡᠪᠲᠡᠷᠡᠬᠦ ᠬᠠᠷᠢᠯᠴᠠᠭᠠᠨ ᠪᠠᠢᠭᠤᠯᠬᠤ ᠬᠡᠯᠡᠯᠴᠡᠭᠡᠷ ᠵᠡᠷᠭᠡ ᠳ᠋ᠦ᠍ ᠲᠡᠷᠡ ᠪᠦᠷ ᠥᠪᠡᠷ ᠦ᠋ᠨ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠪᠠᠨ ᠭᠠᠷᠭᠠᠨ ᠬᠦᠨᠳᠦ ᠴᠢᠬᠤᠯᠠ ᠦᠢᠯᠡᠳᠦᠯ ᠦᠵᠡᠭᠦᠯᠵᠦ ᠪᠠᠢᠵᠠᠢ ᠃ ᠯᠦᠩ ᠴᠢᠩ ᠦ᠋ᠨ ᠲᠠᠪᠤᠳᠤᠭᠠᠷ ᠣᠨ ᠤ᠋ ᠲᠠᠪᠤᠳᠤᠭᠠᠷ ᠰᠠᠷᠠ ᠳ᠋ᠤ᠌ ᠂ ᠮᠣᠩᠭᠣᠯ ᠪᠠ ᠳᠠᠶ᠋ᠢᠮᠢᠩ ᠤᠯᠤᠰ ᠬᠠᠷᠢᠯᠴᠠᠨ ᠵᠠᠬᠠ ᠳᠡᠯᠭᠡᠭᠦᠷ ᠨᠡᠭᠡᠭᠡᠬᠦ ᠶᠠᠪᠤᠳᠠᠯ ᠲᠣᠭᠲᠠᠭᠰᠠᠨ ᠤ᠋ ᠳᠠᠷᠠᠭᠠ ᠳᠠᠶ᠋ᠢᠮᠢᠩ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠠᠯᠲᠠᠨ ᠬᠠᠭᠠᠨ ᠢ᠋ ᠱᠦᠨ ᠡᠢ ᠸᠠᠩ (顺义王) ᠭᠡᠵᠦ ᠡᠷᠭᠦᠮᠵᠢᠯᠡᠬᠦ ᠲᠡᠷᠡ ᠦᠶᠡ ᠳ᠋ᠦ᠍ ᠲᠠᠶᠤᠨ ᠬᠢᠶᠡ ᠶ᠋ᠢᠨ ᠪᠡᠶᠡ ᠵᠠᠭᠤᠲᠤ ᠶ᠋ᠢᠨ ᠨᠣᠶᠠᠨ ᠡᠷᠭᠦᠮᠵᠢᠯᠡᠭᠳᠡᠵᠡᠢ ᠃ ᠸᠠᠨ ᠯᠢ ᠶ᠋ᠢᠨ ᠠᠩᠬᠠᠨ ᠣᠨ ( 1573 ) ᠪᠣᠯᠬᠤ ᠳ᠋ᠤ᠌ ᠨᠡᠮᠡᠵᠦ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠨ ᠪᠣᠯᠭᠠᠵᠠᠢ ᠃ ᠸᠠᠨ ᠯᠢ ᠶ᠋ᠢᠨ ᠵᠢᠷᠭᠤᠳᠤᠭᠠᠷ ᠣᠨ ( 1578 ) ᠳ᠋ᠤ᠌ ᠲᠠᠶᠤᠨ ᠬᠢᠶᠡ ᠶ᠋ᠢ ᠭᠤᠲᠠᠭᠠᠷ ᠳᠠᠯᠠᠢ ᠯᠠᠮᠠ ᠶ᠋ᠢ ᠤᠭᠲᠤᠨ ᠵᠠᠯᠠᠬᠤ ᠤᠴᠢᠷ ᠲᠤᠷ ᠭᠠᠪᠢᠶᠠ ᠵᠢᠳᠬᠦᠯ ᠦᠵᠡᠭᠦᠯᠪᠡ ᠭᠡᠮᠡᠨ ᠳᠠᠯᠠᠢ ᠯᠠᠮᠠ ᠲᠡᠭᠦᠨ ᠳ᠋ᠦ᠍ ᠤᠷᠠᠨ ᠲᠠᠩᠭᠠᠷᠢᠭ ᠴᠣᠯᠠ ᠰᠣᠶᠣᠷᠬᠠᠨ ＜ᠳ᠋ᠠᠢ ᠳᠠᠷᠬᠠᠨ ＞ ᠭᠡᠮᠡᠨ ᠡᠷᠭᠦᠮᠵᠢᠯᠡᠵᠡᠢ ᠃ ＜ᠤᠷᠠᠨ ᠲᠠᠩᠭᠠᠷᠢᠭ ＞ ᠭᠡᠬᠦ ᠦᠭᠡ ᠨᠢ ᠦᠭᠡ ᠬᠡᠯᠡ ᠳ᠋ᠦ᠍ ᠬᠤᠷᠴᠠ ᠮᠡᠷᠭᠡᠨ ᠬᠡᠮᠡᠭᠰᠡᠨ ᠤᠳᠬᠠ ᠲᠠᠢ ᠃ 《ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ 》 ᠳ᠋ᠤ᠌ ᠲᠡᠮᠳᠡᠭᠯᠡᠭᠰᠡᠨ ᠢ᠋ ᠦᠨᠳᠦᠰᠦᠯᠡᠪᠡᠯ ᠂ ᠲᠥᠪᠡᠳ ᠦ᠋ᠨ ᠬᠠᠭᠠᠨ ᠰᠷᠣᠩᠪᠴᠠᠩ ᠰᠭᠡᠮᠪᠦ (松赞干布 ) ᠨᠧᠫᠡᠯ ᠤᠯᠤᠰ ᠪᠠ ᠳᠠᠩ ᠤᠯᠤᠰ ᠠ᠋ᠴᠠ ᠪᠠᠷᠢᠪᠠᠰᠤᠨ ᠭᠦᠩᠵᠦ (拜木萨公主 ) ᠪᠠ ᠣᠳ᠋ᠮᠴᠣᠭ᠌ ᠭᠦᠩᠵᠦ (文成公主 ) ᠶ᠋ᠢ ᠵᠠᠯᠠᠷᠠ ᠶᠠᠪᠤᠭᠤᠯᠤᠭᠰᠠᠨ ᠡᠯᠴᠢᠰ ᠦ᠋ᠨ ᠳᠣᠲᠣᠷᠠ 《 ᠤᠷᠠᠨ ᠲᠠᠩᠭᠠᠷᠢᠭ 》 ᠬᠡᠮᠡᠬᠦ ᠨᠡᠷᠡᠲᠦ ᠨᠢᠭᠡᠨ ᠬᠥᠮᠦᠨ ᠪᠠᠶ᠋ᠢᠪᠠ ᠃ ᠲᠡᠷᠡ ᠦᠯᠢᠰᠢ ᠦᠭᠡᠢ ᠣᠶᠤᠨ ᠤᠬᠠᠭᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠸᠫᠡᠯ ᠦ᠋ᠨ ᠬᠠᠭᠠᠨ ᠪᠠ ᠳᠠᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠵᠣᠬᠢᠶᠠᠭᠰᠠᠨ ᠡᠯᠳᠡᠪ ᠵᠦᠢᠯ ᠦ᠋ᠨ ᠬᠠᠷᠰᠢ ᠰᠠᠭᠠᠳ ᠢ᠋ ᠢᠯᠠᠨ ᠳᠠᠪᠠᠭᠠᠳ ᠡᠨᠡ ᠬᠣᠶᠠᠷ ᠭᠦᠩᠵᠦ ᠶ᠋ᠢ ᠤᠷᠢᠳ ᠬᠣᠵᠢᠳ ᠵᠠᠯᠠᠨ ᠠᠪᠴᠢᠷᠠᠵᠤ ᠰᠷᠣᠩᠪᠴᠠᠩ ᠰᠭᠡᠮᠪᠦ ᠯᠤᠭᠠ ᠤᠷᠤᠭ ᠬᠣᠯᠪᠣᠭᠤᠯᠵᠠᠢ ᠃ ᠡᠨᠳᠡ᠂ ᠳᠠᠯᠠᠢ ᠯᠠᠮᠠ ᠲᠠᠶᠤᠨ ᠬᠢᠶᠡ ᠳ᠋ᠦ᠍ ＜ᠤᠷᠠᠨ ᠲᠠᠩᠭᠠᠷᠢᠭ ＞ ᠬᠡᠮᠡᠬᠦ ᠴᠣᠯᠠ ᠬᠠᠢᠷᠠᠯᠠᠭᠰᠠᠨ ᠨᠢ ᠬᠠᠷᠢᠨ ᠲᠠᠶᠤᠨ ᠬᠢᠶᠡ ᠶ᠋ᠢᠨ ᠡᠦᠬᠡ ᠬᠡᠯᠡᠨ ᠳ᠋ᠦ᠍ᠷ ᠬᠤᠷᠴᠠ ᠮᠡᠷᠭᠡᠨ ᠂ ᠬᠡᠯᠡᠯᠴᠡᠭᠡᠷ ᠶᠠᠷᠢᠯᠴᠠᠭᠠᠨ ᠳ᠋ᠤᠷ ᠠᠪᠢᠶᠠᠰ ᠴᠢᠳᠠᠪᠤᠷᠢ ᠲᠠᠢ ᠪᠠᠢᠳᠠᠭ ᠢ᠋ ᠨᠢ ᠲᠥᠪᠡᠳ ᠦ᠋ᠨ ᠬᠠᠭᠠᠨ ᠤ᠋ ᠲᠡᠷᠡ ᠬᠦ᠌ ᠡᠯᠴᠢ ᠯᠦ᠍ᠭᠡ ᠠᠳᠠᠯᠢᠳᠬᠠᠨ ᠥᠭᠦᠯᠡᠭᠰᠡᠨ ᠲᠡᠳᠦᠢ ᠪᠣᠢ ᠢ᠋ᠡ ᠃ ᠠᠯᠲᠠᠨ ᠬᠠᠭᠠᠨ ᠤ᠋ ᠡᠨᠡ ᠬᠦ᠌ ᠰᠢᠳᠠᠷ ᠬᠢᠶᠡ ᠪᠣᠯᠬᠤ ᠲᠠᠶᠤᠨ ᠬᠢᠶᠡ ᠶ᠋ᠢᠨ ᠲᠤᠭᠤᠷᠪᠢᠨ ᠪᠢᠴᠢᠭᠰᠡᠨ ᠲᠡᠷᠡ ᠵᠣᠬᠢᠶᠠᠯ ᠢ᠋ ᠡᠦᠲᠦ ᠪᠣᠯᠲᠠᠯᠠ ᠣᠯᠤᠭᠠᠳᠤᠢ ᠨᠢ ᠦᠨᠡᠬᠡᠷ ᠶᠡᠬᠡ ᠬᠠᠷᠠᠮᠰᠠᠯᠲᠠᠢ ᠪᠥᠭᠡᠳ ᠲᠤᠢᠯ ᠤ᠋ᠨ ᠶᠡᠬᠡ ᠬᠣᠬᠢᠷᠠᠯᠲᠠᠢ ᠬᠡᠷᠡᠭ ᠪᠣᠯᠤᠨᠠ ᠃
《ᠡᠷᠳᠡᠨᠢ ᠲᠤᠨᠤᠮᠠᠯ ᠨᠡᠷᠡᠲᠦ ᠰᠤᠳᠤᠷ ᠣᠷᠣᠰᠢᠪᠠ 》 ᠬᠡᠮᠡᠬᠦ ᠡᠨᠡ ᠨᠣᠮ ᠤ᠋ᠨ ᠪᠢᠴᠢᠯᠭᠡ ᠶ᠋ᠢᠨ ᠬᠡᠯᠪᠡᠷᠢ ᠨᠢ ᠬᠡᠳᠦᠢᠪᠡᠷ ᠰᠢᠯᠦᠭ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠨ ᠪᠦᠯᠦᠭ ᠪᠠᠳᠠᠭ ᠭᠡᠵᠦ ᠬᠤᠪᠢᠶᠠᠯ ᠦᠭᠡᠢ ᠵᠠᠯᠭᠠᠯᠳᠤᠭᠤᠯᠤᠨ ᠪᠢᠴᠢᠵᠡᠢ ᠃ ᠡᠳᠦᠭᠡ ᠮᠢᠨᠦ ᠪᠡᠶᠡ ᠂ ᠡᠨᠡ ᠨᠣᠮ ᠢ᠋ ᠬᠡᠪᠯᠡᠯ ᠳ᠋ᠦ᠍ ᠪᠡᠯᠡᠳᠬᠡᠬᠦ ᠶ᠋ᠢᠨ ᠵᠠᠭᠤᠷᠠ ᠂ ᠤᠩᠰᠢᠭᠴᠢᠳ ᠪᠠ ᠰᠤᠳᠤᠯᠤᠭᠴᠢ ᠣᠯᠠᠨ ᠤ᠋ ᠳᠥᠭᠥᠮ ᠢ᠋ ᠪᠣᠳᠣᠵᠤ ᠤᠭ ᠵᠣᠬᠢᠶᠠᠯ ᠤ᠋ᠨ ᠬᠡᠪ ᠶᠠᠩᠵᠤ ᠶ᠋ᠢ ᠪᠠᠷᠢᠮᠲᠠᠯᠠᠬᠤ ᠶ᠋ᠢᠨ ᠬᠠᠮᠲᠤ ᠪᠦᠯᠦᠭ ᠪᠠᠳᠠᠭ ᠬᠤᠪᠢᠶᠠᠯᠠᠨ ᠠᠩᠭᠢᠯᠠᠬᠤ ᠠ᠋ᠴᠠ ᠭᠠᠳᠠᠨᠠ 《 ᠨᠠ᠊ 》 ᠂ 《 ᠭᠠ᠊ 》 ᠦᠰᠦᠭ ᠲᠣᠷ ᠴᠢᠭ ᠳᠤᠰᠤᠯ ᠢ᠋ ᠬᠢᠴᠢᠶᠡᠨ ᠲᠠᠯᠪᠢᠵᠤ ᠂ ᠬᠥᠮᠦᠨ ᠦ᠌ ᠨᠡᠷᠡᠰ ᠪᠠ ᠭᠠᠵᠠᠷ ᠤ᠋ᠨ ᠨᠡᠷᠡᠰ ᠲᠡᠭᠦᠨᠴᠢᠯᠡᠨ ᠲᠡᠦᠬᠡ ᠶ᠋ᠢᠨ ᠬᠡᠷᠡᠭ ᠶᠠᠪᠤᠳᠠᠯ ᠵᠡᠷᠭᠡ ᠳ᠋ᠦ᠍ᠷ ᠪᠠᠬᠠᠨ ᠵᠡᠭᠦᠯᠲᠡ ᠲᠠᠢᠯᠪᠤᠷᠢ ᠲᠠᠯᠪᠢᠬᠤ ᠶ᠋ᠢ ᠬᠢᠴᠢᠶᠡᠪᠡᠢ ᠃ ᠮᠢᠨᠦ ᠡᠷᠳᠡᠮ ᠴᠢᠳᠠᠪᠤᠷᠢ ᠶ᠋ᠢᠨ ᠮᠡᠬᠦᠰ ᠡᠴᠡ ᠪᠣᠯᠵᠤ ᠡᠭᠦᠨ ᠳ᠋ᠦ᠍ᠷ ᠡᠰᠡ ᠤᠨᠤᠵᠤ ᠠᠯᠳᠠᠭᠰᠠᠨ ᠵᠦᠢᠯ ᠪᠠᠢᠵᠤ ᠮᠡᠳᠡᠬᠦ ᠲᠤᠯᠠ ᠡᠷᠬᠢᠮ ᠣᠯᠠᠨ ᠤᠩᠰᠢᠭᠴᠢᠳ ᠭᠡᠭᠡᠨ ᠳ᠋ᠡᠭᠡᠨ ᠲᠣᠯᠢᠳᠠᠵᠤ ᠵᠢᠭᠠᠨ ᠵᠠᠯᠠᠷᠠᠭᠤᠯᠬᠤ ᠶ᠋ᠢ ᠬᠦᠰᠡᠮᠦᠢ ᠃
ᠣᠯᠳᠣᠢ ᠪᠢ ᠡᠨᠡ ᠨᠣᠮ ᠳ᠋ᠤ᠌ ᠲᠠᠢᠯᠪᠤᠷᠢ ᠵᠡᠭᠦᠯᠲᠡ ᠲᠠᠯᠪᠢᠨ ᠬᠡᠪᠯᠡᠯ ᠳ᠋ᠦ᠍ ᠪᠡᠯᠡᠳᠬᠡᠬᠦ ᠵᠠᠭᠤᠷᠠ ᠮᠠᠰᠢ ᠣᠯᠠᠨ ᠨᠠᠢᠷᠲᠠᠢ ᠨᠥᠬᠥᠳ ᠦ᠋ᠨ ᠴᠢᠩ ᠰᠡᠳᠬᠢᠯ ᠦ᠋ᠨ ᠵᠣᠷᠢᠭᠵᠢᠭᠤᠯᠤᠯ ᠪᠠ ᠳᠡᠮᠵᠢᠯᠭᠡ ᠶ᠋ᠢ ᠬᠦᠷᠲᠡᠵᠡᠢ ᠃ ᠢᠯᠠᠩᠭᠤᠶᠠ ᠂ ᠴᠣᠢᠵᠢ ᠨᠥᠬᠥᠷ ᠣᠯᠳᠣᠢ ᠮᠢᠨᠦ ᠵᠡᠭᠦᠯᠲᠡ ᠲᠠᠢᠯᠪᠤᠷᠢ ᠵᠡᠷᠭᠡ ᠶ᠋ᠢ ᠮᠣᠩᠭᠣᠯᠴᠢᠯᠠᠨ ᠥᠭᠴᠦ ᠲᠤᠰᠠᠯᠠᠭᠰᠠᠨ ᠳ᠋ᠤ᠌ ᠪᠢ ᠴᠢᠩ ᠰᠡᠳᠬᠢᠯᠡᠴᠡ ᠪᠡᠨ ᠪᠠᠶᠠᠷᠯᠠᠨ ᠭᠦᠨ ᠲᠠᠯᠠᠷᠬᠠᠯ ᠢ᠋ᠶ᠋ᠠᠨ ᠬᠦᠷᠭᠡᠵᠦ ᠪᠠᠢᠨᠠ ᠃
ᠵᠦᠷᠤᠩᠭᠠ
1982 ᠣᠨ ᠤ᠋ ᠨᠠᠢ᠍ᠮᠠᠳᠤᠭᠠᠷ ᠰᠠᠷᠠ
ᠬᠠᠷᠠᠭᠤᠨᠠ ᠬᠠᠨ ᠤ᠋ ᠥᠯᠭᠡ ᠳ᠋ᠦ᠍