ᠶᠢᠷᠲᠢᠨᠴᠦ ᠶᠢᠨ ᠭᠤᠷᠪᠠ – ᠱ ᠂ ᠪᠤᠶᠠᠨᠲᠣᠭᠲᠠᠬᠤ ᠡᠮᠬᠢᠤᠠᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ < ᠣᠷᠣᠰᠢᠯ ᠤᠨ ᠣᠷᠣᠨ ᠳᠤ – 5> Ертөнцийн гурав – Ш᠂ Буянтогтох эмхиохэн найруулав < Оршлын оронд – 5>
305ᠣᠷᠣᠰᠢᠯ ᠤᠨ ᠣᠷᠣᠨ ᠳᠤ – 5
ᠲᠠᠪᠤ ᠂ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠠᠭᠤᠯᠭᠠ ᠪᠠ ᠦᠢᠯᠡᠳᠦᠯ ᠤᠨ ᠲᠤᠬᠠᠢ
1. ᠮᠣᠩᠭᠣᠯ ᠠᠷᠠᠳ ᠤᠨ ᠠᠮᠠᠨ ᠢᠷᠠᠭᠤ ᠨᠠᠶ᠋ᠢᠷᠠᠭ ᠪᠣᠯᠬᠤ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠠᠬᠤᠭᠤᠯᠤᠭᠰᠠᠨ ᠠᠭᠤᠯᠭᠠ ᠠ᠋ᠴᠠ ᠨᠢ ᠠᠪᠴᠤ ᠦᠵᠡᠪᠡᠯ ᠮᠠᠰᠢ ᠥᠷᠭᠡᠨ ᠳᠡᠯᠭᠡᠷ ᠪᠠᠶ᠋ᠢᠳᠠᠭ ᠪᠢᠯᠡ ᠃ ᠣᠳᠣ ᠶ᠋ᠢᠨ ᠭᠠᠷ ᠲᠤ᠌ ᠣᠯᠳᠠᠭᠰᠠᠨ ᠪᠠᠷᠢᠮᠲᠠ ᠠ᠋ᠴᠠ ᠦᠵᠡᠪᠡᠯ ᠂ ᠪᠣᠳᠠᠲᠤ ᠠᠮᠢᠲᠠᠨ ᠪᠣᠳᠠᠰ ᠢ ᠵᠢᠭᠠᠭᠰᠠᠨ ᠪᠣᠳᠠᠲᠤ ᠠᠭᠤᠯᠭᠠ ᠪᠠ ᠲᠤᠷᠰᠢᠯᠭᠠ ᠰᠤᠷᠭᠠᠮᠵᠢ ᠶ᠋ᠢ ᠥᠭᠦᠯᠡᠭᠰᠡᠨ ᠬᠡᠶ᠋ᠢᠰᠪᠦᠷᠢ ᠠᠭᠤᠯᠭᠠ ᠭᠡᠵᠦ ᠬᠣᠶᠠᠷ ᠵᠦᠢᠯ ᠢᠶ᠋ᠠᠷ ᠬᠤᠪᠢᠶᠠᠵᠤ ᠪᠣᠯᠤᠨᠠ ᠃
(1) ᠪᠣᠳᠠᠲᠤ ᠠᠭᠤᠯᠭᠠ ᠨᠢ ᠳᠠᠷᠤᠢ ᠣᠷᠴᠢᠯᠠᠩ ᠶᠢᠷᠲᠢᠨᠴᠦ ᠳᠡᠭᠡᠷᠡ ᠣᠷᠣᠰᠢᠨ ᠲᠣᠭᠲᠠᠨᠢᠵᠤ ᠪᠠᠶ᠋ᠢᠭᠠ ᠡᠪᠡᠰᠦ ᠤᠷᠭᠤᠮᠠᠯ ᠂ ᠬᠥᠮᠦᠨ ᠠᠮᠢᠲᠠᠨ ᠂ ᠡᠳ᠌ᠯᠡᠯ ᠬᠡᠷᠡᠭᠰᠡᠯ ᠂ ᠵᠠᠰᠠᠯ ᠵᠢᠮᠰᠡᠭ ᠂ ᠢᠳᠡᠭᠡᠨ ᠤᠮᠳᠠᠭᠠᠨ ᠂ ᠬᠡᠷᠡᠭ ᠦᠵᠡᠭᠳᠡᠯ ᠂ ᠦᠢᠯᠡ ᠬᠥᠳᠡᠯᠦᠯ ᠂ ᠥᠩᠭᠡ ᠵᠢᠰᠦᠮ ᠁ ᠤᠨ ᠲᠤᠬᠠᠢ ᠰᠢᠭᠤᠳ ᠲᠤᠰᠬᠠᠨ ᠥᠭᠦᠯᠡᠭᠰᠡᠨ ᠢ ᠬᠡᠯᠡᠨᠡ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄
ᠠᠮᠢᠲᠠᠨ ᠤᠷᠭᠤᠮᠠᠯ ᠤᠨ ᠲᠤᠬᠠᠢ
ᠡᠷᠡ ᠪᠠᠨ ᠡᠵᠡᠯᠡᠭᠰᠡᠨ ᠡᠮᠡ ᠲᠣᠭᠰᠢᠨ
ᠡᠮᠡᠭᠡᠯ ᠢᠶ᠋ᠠᠨ ᠬᠥᠩᠭᠡᠯᠡᠭᠰᠡᠨ ᠮᠣᠷᠢ ᠲᠣᠭᠰᠢᠨ
ᠡᠵᠡᠨ ᠢᠶ᠋ᠠᠨ ᠠᠶᠤᠯᠭᠠᠭᠰᠠᠨ ᠲᠦᠰᠢᠮᠡᠯ ᠲᠣᠭᠰᠢᠨ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠲᠣᠭᠰᠢᠨ )
ᠵᠠᠰᠠᠯ ᠡᠳ᠋ᠯᠡᠯ ᠤᠨ ᠲᠤᠬᠠᠢ
ᠰᠠᠭᠠᠳᠠᠭ ᠨᠤᠮᠤ ᠡᠷᠡ ᠶ᠋ᠢᠨ ᠵᠢᠮᠰᠡᠭ
ᠰᠠᠭᠯᠠᠭᠠᠷ ᠮᠣᠳᠣ ᠲᠠᠯᠠ ᠶ᠋ᠢᠨ ᠵᠢᠮᠰᠡᠭ
ᠰᠠᠨᠵᠢᠯᠭᠠ ᠰᠦᠢᠬᠡ ᠡᠮᠡ ᠶ᠋ᠢᠨ ᠵᠢᠮᠰᠡᠭ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠵᠢᠮᠰᠡᠭ )
ᠬᠡᠷᠡᠭ ᠦᠢᠯᠡ ᠶ᠋ᠢᠨ ᠲᠤᠬᠠᠢ
ᠯᠠᠮᠠ ᠯᠠᠮᠠ ᠶ᠋ᠢᠨ ᠯᠠᠮᠠᠳᠠᠬᠤ ᠨᠢ ᠣᠨᠴᠣᠭᠣᠢ
ᠯᠠᠩᠲᠤᠤ ᠵᠡᠭᠡᠲᠤ ᠶ᠋ᠢᠨ ᠲᠤᠰᠤᠯᠲᠠ ᠨᠢ ᠣᠨᠴᠣᠭᠣᠢ
ᠯᠠᠩᠭᠤᠸᠠ ᠰᠢᠭᠤᠸᠠ ᠶ᠋ᠢᠨ ᠠᠮᠲᠠ ᠨᠢ ᠣᠨᠴᠣᠭᠣᠢ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠣᠨᠴᠣᠭᠣᠢ )
ᠥᠩᠭᠡ ᠵᠢᠰᠦᠮ ᠦ᠋ᠨ ᠲᠤᠬᠠᠢ
ᠵᠢᠪᠠᠷ ᠲᠠᠢ ᠲᠩᠷᠢ ᠶ᠋ᠢᠨ ᠬᠠᠶᠠᠬ᠋ᠠ ᠤᠯᠠᠭᠠᠨ
ᠵᠢᠷᠭᠠᠯ ᠲᠠᠢ ᠬᠠᠲᠤᠨ ᠪ ᠬᠠᠴᠠᠷ ᠤᠯᠠᠭᠠᠨ
ᠵᠢᠷᠲᠠᠭᠠᠢ ᠬᠥᠮᠦᠨ ᠪ ᠨᠢᠲᠦ ᠤᠯᠠᠭᠠᠨ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠤᠯᠠᠭᠠᠨ)
ᠭᠡᠬᠦ ᠮᠡᠲᠦ ᠪᠡᠷ ᠪᠣᠲᠠᠲᠤ ᠠᠭᠤᠯᠬ᠋ᠠ ᠲᠠᠢ ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ ᠨᠢ ᠪᠥᠬᠥ ᠪᠠᠷᠢᠮᠲᠠ ᠵᠢᠱ᠌ᠢᠶᠡᠨ ᠪ ᠶᠡᠬᠡᠩᠬᠢ ᠪᠠᠶ᠋ᠢᠷᠢ ᠶ᠋ᠢ ᠡᠵᠡᠯᠡᠵᠦ ᠪᠠᠶ᠋ᠢᠨᠠ ᠃
(2) ᠬᠡᠶ᠋ᠢᠰᠪᠦᠷᠢ ᠠᠭᠤᠯᠬ᠋ᠠ ᠭᠡᠳᠡᠭ ᠨᠢ ᠨᠡᠶ᠋ᠢᠭᠡᠮ ᠪᠠ ᠠᠮᠢᠲᠤᠷᠠᠯ ᠠ᠋ᠴᠠ ᠲᠠᠨᠢᠵᠤ ᠣᠯᠤᠭᠰᠠᠨ ᠦᠵᠡᠯᠲᠡ ᠲᠠᠨᠢᠯᠲᠠ ᠂ ᠲᠤᠷᠰᠢᠯᠬ᠋ᠠ ᠰᠤᠷᠭᠠᠮᠵᠢ ᠂ ᠡᠷᠲᠡᠮ ᠮᠡᠲᠡᠯᠭᠡ ᠂ ᠬᠠᠷᠢᠴᠠᠬ᠋ᠠ ᠬᠣᠯᠪᠣᠬ᠋ᠠ ᠂ ᠰᠠᠶ᠋ᠢᠨ ᠮᠠᠭᠤ ᠂ ᠰᠢᠨᠵᠢ ᠴᠢᠨᠠᠷ ᠁ ᠭᠡᠬᠦ ᠮᠡᠲᠦ ᠶ᠋ᠢᠨ ᠲᠤᠬᠠᠢ ᠮᠡᠲᠡᠭᠦᠯᠵᠦ ᠰᠤᠷᠭᠠᠬᠤ ᠡᠭᠦᠲᠡᠨ ᠡᠴᠡ ᠶᠤᠰᠤᠴᠢᠯᠠᠨ ᠶᠠᠷᠢᠬᠰᠠᠨ ᠊ᠢ ᠬᠡᠯᠡᠨᠡ ᠃ ᠡᠭᠦᠨ ᠪ ᠲᠤᠬᠠᠢ ᠬᠡᠲᠦᠨ ᠵᠢᠱ᠌ᠢᠶᠡ ᠳᠠᠲᠠᠪᠠᠯ ᠄
ᠰᠠᠶ᠋ᠢᠨ ᠮᠠᠭᠤ ᠰᠢᠨᠵᠢ ᠴᠢᠨᠠᠷ ᠦ᠋ᠨ ᠲᠤᠬᠠᠢ
ᠥᠩᠭᠡ ᠵᠢᠰᠦ ᠶ᠋ᠢ ᠲᠠᠨᠢᠬᠰᠠᠨ ᠨᠢ ᠰᠠᠶ᠋ᠢᠨ
ᠥᠪᠡᠷ ᠪᠤᠰᠤᠳ ᠊ᠢ ᠰᠢᠨᠵᠢᠭᠰᠡᠨ ᠨᠢ ᠰᠠᠶ᠋ᠢᠨ
ᠦᠨᠡᠨ ᠬᠤᠲᠠᠯ ᠊ᠢ ᠢᠯᠭᠠᠭᠰᠠᠨ ᠨᠢ ᠰᠠᠶ᠋ᠢᠨ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠰᠠᠶ᠋ᠢᠨ)
ᠬᠠᠷᠢᠴᠠᠬ᠋ᠠ ᠬᠣᠯᠪᠣᠬ᠋ᠠ ᠶ᠋ᠢᠨ ᠲᠤᠬᠠᠢ
ᠣᠨᠢᠰᠣ ᠲᠦᠯᠬᠢᠭᠦᠷ ᠦ᠋ᠨ ᠬᠡᠯᠬᠢᠶᠡ ᠨᠢᠭᠡ
ᠣᠭᠣᠯᠢ ᠰᠦᠬᠡ ᠶ᠋ᠢᠨ ᠲᠡᠮᠦᠷ ᠨᠢᠭᠡ
ᠣᠨᠣᠯ ᠦᠢᠯᠡᠲᠦᠯᠭᠡ ᠶ᠋ᠢᠨ ᠬᠣᠯᠪᠣᠬ᠋ᠠ ᠨᠢᠭᠡ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠨᠢᠭᠡ)
ᠲᠤᠷᠰᠢᠯᠬ᠋ᠠ ᠰᠤᠷᠭᠠᠮᠵᠢ ᠪᠠ ᠮᠡᠲᠡᠯᠭᠡ ᠰᠤᠷᠭᠠᠯ ᠦ᠋ᠨ ᠲᠤᠬᠠᠢ
ᠲᠥᠪᠰᠢᠨ ᠰᠢᠲᠤᠷᠭᠤ ᠶ᠋ᠢ ᠪᠠᠷᠢᠬᠴᠢᠳ ᠦ᠋ᠨ ᠡᠶᠡ ᠵᠥᠭᠡᠯᠡᠨ
ᠲᠥᠷᠥᠯᠬᠢ ᠮᠠᠭᠤ ᠰᠠᠨᠠᠭᠠᠲᠠᠨ ᠪ ᠠᠶᠠ ᠵᠥᠭᠡᠯᠡᠨ
ᠲᠥᠪ ᠪᠤᠰᠤ ᠮᠠᠭᠤ ᠡᠬᠡᠨᠡᠷ ᠦ᠋ᠨ ᠬᠡᠯᠡ ᠵᠥᠭᠡᠯᠡᠨ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠵᠥᠭᠡᠯᠡᠨ)
ᠦᠵᠡᠯᠲᠡ ᠲᠠᠨᠢᠯᠲᠠ ᠶ᠋ᠢᠨ ᠲᠤᠬᠠᠢ
ᠡᠴᠢᠭᠡ ᠮᠠᠭᠤᠲᠤ ᠶ᠋ᠢᠨ ᠬᠣᠷᠣᠬ᠋ᠠ ᠬᠥᠢᠲᠡᠨ
ᠡᠬᠡ ᠮᠠᠭᠤᠲᠤ ᠶ᠋ᠢᠨ ᠬᠣᠭᠣᠯᠠ ᠬᠥᠢᠲᠡᠨ
ᠡᠪ ᠮᠠᠭᠤᠲᠤ ᠶ᠋ᠢᠨ ᠴᠢᠷᠠᠢ ᠬᠥᠢᠲᠡᠨ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠬᠥᠢᠲᠡᠨ)
᠁ ᠁ ᠭᠡᠬᠦ ᠮᠡᠲᠦ ᠪᠡᠷ ᠬᠡᠶ᠋ᠢᠰᠪᠦᠷᠢ ᠤᠴᠢᠷ ᠶᠣᠰᠣ ᠶ᠋ᠢ ᠦᠭᠦᠯᠡᠭᠰᠡᠨ ᠲᠤᠬᠠᠢ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠨᠢ ᠨᠡᠯᠢᠶᠡᠳ ᠣᠯᠠᠨ ᠪᠠᠶ᠋ᠢᠭᠠ ᠪᠣᠯᠪᠠᠴᠤ ᠂ ᠪᠣᠳᠠᠲᠤ ᠠᠭᠤᠯᠭᠠ ᠶ᠋ᠢᠨ ᠲᠤᠬᠠᠢ ᠦᠭᠦᠯᠡᠭᠰᠡᠨ ᠵᠢᠱ᠌ᠢᠶᠡ ᠪᠠᠷᠢᠮᠲᠠ ᠲᠠᠢ ᠬᠠᠷᠢᠴᠠᠭᠤᠯᠵᠤ ᠦᠵᠡᠪᠡᠯ ᠂ ᠲᠣᠭᠠᠨ ᠤ ᠲᠠᠯᠠ ᠪᠠᠷ ᠳᠤᠲᠠᠭᠤ ᠪᠠᠶ᠋ᠢᠨᠠ ᠃ ᠡᠨᠡ ᠨᠢ ᠬᠥᠮᠦᠰ ᠦᠨ ᠰᠡᠳᠬᠢᠬᠦᠢ ᠶ᠋ᠢᠨ ᠬᠥᠭᠵᠢᠯᠲᠡ ᠨᠢ ᠪᠣᠳᠠᠲᠠᠢ ᠠ᠋ᠴᠠ ᠬᠡᠶ᠋ᠢᠰᠪᠦᠷᠢ ᠥᠭᠡᠳᠡ ᠬᠥᠭᠵᠢᠭᠰᠡᠨ ᠲᠡᠢ ᠬᠣᠯᠪᠣᠭᠠ ᠲᠠᠢ ᠪᠢᠯᠡ ᠃
2. 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠦᠵᠡᠭᠦᠯᠦᠭᠰᠡᠨ ᠦᠢᠯᠡᠳᠦᠯ ᠨᠥᠯᠥᠭᠡ ᠡᠴᠡ ᠠᠪᠴᠤ ᠦᠵᠡᠪᠡᠯ ᠂ ᠬᠥᠮᠦᠰ ᠲᠦ ᠠᠮᠢᠳᠤᠷᠠᠯ ᠪᠠ ᠨᠠᠶ᠋ᠢᠬᠡᠮ ᠵᠡᠷᠭᠡ ᠣᠯᠠᠨ ᠲᠠᠯᠠ ᠶ᠋ᠢᠨ ᠮᠡᠳᠡᠯᠭᠡ ᠶ᠋ᠢ ᠤᠯᠠᠮᠵᠢᠯᠠᠵᠤ ᠂ ᠰᠠᠶ᠋ᠢᠨ ᠢ ᠰᠤᠷᠭᠠᠵᠤ ᠮᠠᠭᠤ ᠶ᠋ᠢ ᠴᠡᠭᠡᠷᠯᠡᠭᠦᠯᠬᠦ ᠦᠢᠯᠡᠳᠦᠯ ᠲᠡᠢ ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠬᠡᠯᠡ ᠪᠠ ᠤᠳᠬᠠ ᠵᠣᠬᠢᠶᠠᠯ ᠢ ᠨᠦᠯᠥᠭᠡᠯᠡᠨ ᠂ ᠵᠣᠬᠢᠬᠤ ᠬᠡᠮᠵᠢᠶᠡᠨ ᠦ ᠦᠢᠯᠡᠳᠦᠯ ᠢᠶ᠋ᠡᠨ ᠪᠠᠳᠠᠷᠠᠭᠤᠯᠤᠭᠰᠠᠨ ᠪᠠᠶ᠋ᠢᠨᠠ ᠃
(1) 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠨᠢ ᠬᠥᠮᠦᠰ ᠲᠤ ᠣᠯᠠᠨ ᠵᠤᠶ᠋ᠢᠯ ᠤᠨ ᠮᠡᠳᠡᠯᠭᠡ ᠶ᠋ᠢ ᠤᠯᠠᠮᠵᠢᠯᠠᠬᠤ ᠦᠢᠯᠡᠳᠦᠯ ᠲᠡᠢ ᠃ ᠤᠯᠠᠮᠵᠢᠯᠠᠬᠤ ᠳ᠋ᠠᠭᠠᠨ ᠬᠡᠷᠡᠭ ᠪᠣᠳᠠᠰ ᠤᠨ ᠭᠠᠳᠠᠷ ᠪᠠᠶ᠋ᠢᠳᠠᠯ ᠲᠥᠯᠥᠪ ᠂ ᠦᠩᠭᠡ ᠵᠢᠰᠦᠮ ᠡᠴᠡ ᠳᠣᠲᠣᠭᠠᠳᠤ ᠪᠦᠲᠦᠴᠡ ᠂ ᠬᠠᠷᠢᠴᠠᠭᠠ ᠬᠣᠯᠪᠣᠭᠠ ᠂ ᠴᠢᠨᠠᠷ ᠴᠢᠨᠰᠠᠭᠠ ᠳ᠋ᠤᠨᠢ ᠬᠦᠷᠲᠡᠯᠡ ᠵᠠᠳᠠᠯᠤᠨ ᠶᠠᠷᠢᠬᠤ ᠪᠠ ᠨᠠᠶ᠋ᠢᠬᠡᠮ ᠂ ᠠᠮᠢᠳᠤᠷᠠᠯ ᠤᠨ ᠳᠤᠮᠳᠠ ᠲᠣᠬᠢᠶᠠᠯᠳᠤᠭᠰᠠᠨ ᠬᠡᠷᠡᠭ ᠤᠴᠢᠷ ᠂ ᠲᠤᠷᠰᠢᠯᠭᠠ ᠰᠤᠷᠭᠠᠮᠵᠢ ᠶ᠋ᠢ ᠦᠭᠦᠯᠡᠨ ᠶᠠᠷᠢᠬᠤ ᠂ ᠬᠥᠮᠦᠰ ᠲᠤ ᠰᠤᠷᠭᠠᠯ ᠦᠭᠡ ᠶ᠋ᠢ ᠰᠢᠭᠤᠳ ᠬᠡᠯᠡᠬᠦ ᠪᠢᠰᠢ ᠂ ᠬᠠᠷᠢᠨ ᠳᠠᠮ ᠢᠶ᠋ᠠᠷ ᠤᠯᠠᠮᠵᠢᠯᠠᠨ ᠰᠤᠷᠭᠠᠳᠠᠭ ᠃
(2) 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠨᠢ ᠤᠳᠬᠠ ᠵᠣᠬᠢᠶᠠᠯ ᠤᠨ ᠲᠥᠷᠥᠯ ᠵᠦᠢᠯ ᠢ ᠣᠯᠠᠰᠢᠷᠠᠭᠤᠯᠵᠤ ᠂ ᠠᠭᠤᠯᠭᠠ ᠶ᠋ᠢ ᠪᠠᠶᠠᠯᠢᠬᠵᠢᠭᠤᠯᠤᠨ ᠂ ᠰᠢᠯᠦᠭ ᠦᠨ ᠬᠡᠯᠪᠡᠷᠢ ᠪᠠ ᠰᠲ᠋ᠸᠯ ᠵᠢᠴᠢ ᠰᠢᠯᠦᠭ ᠦᠨ ᠲᠣᠯᠣᠭᠠᠢ ᠰᠡᠭᠦᠯ ᠬᠣᠯᠪᠣᠬᠤ ᠶᠣᠰᠣᠨ ᠢ ᠴᠢᠩᠭᠠᠯᠠᠵᠤ ᠂ ᠰᠢᠯᠦᠭ ᠦ᠋ᠨ ᠬᠥᠭᠵᠢᠯᠲᠡ ᠳᠤ ᠦᠢᠯᠡᠲᠦᠯ ᠦᠵᠡᠭᠦᠯᠵᠡᠢ ᠂ ᠮᠥᠨ ᠴᠤ᠌ ᠪᠤᠰᠤᠳ ᠲᠥᠷᠥᠯ ᠦ᠋ᠨ ᠪᠢᠴᠢᠭ᠌ ᠦ᠋ᠨ ᠵᠣᠬᠢᠶᠠᠯ ᠪᠠ ᠠᠮᠠᠨ ᠵᠣᠬᠢᠶᠠᠯ ᠦ᠋ᠨ ᠬᠥᠭᠵᠢᠯᠲᠡ ᠳᠤ ᠪᠠᠰᠠ ᠦᠢᠯᠡᠲᠦᠯ ᠲᠡᠢ ᠃
《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠨᠢ ᠪᠡᠶᠡ ᠪᠡᠨ ᠳᠠᠭᠠᠭᠠᠭᠰᠠᠨ ᠨᠢᠭᠡ ᠲᠥᠷᠥᠯ ᠦ᠋ᠨ ᠵᠣᠬᠢᠶᠠᠯ ᠪᠣᠯᠤᠭᠰᠠᠨ ᠶ᠋ᠢᠠᠷ ᠦᠯᠦ ᠪᠠᠷᠠᠮ ᠭᠤᠷᠪᠠᠨ ᠮᠥᠷ ᠶ᠋ᠢᠡᠷ ᠪᠦᠷᠢᠯᠳᠦᠭᠰᠡᠨ ᠰᠢᠨᠡ ᠰᠢᠯᠦᠭ ᠦ᠋ᠨ ᠬᠡᠯᠪᠡᠷᠢ ᠶ᠋ᠢ ᠤᠲᠤᠷᠢᠲᠤᠨ ᠭᠠᠷᠭᠠᠵᠠᠢ ᠃ ᠮᠥᠨ ᠴᠤ᠌ ᠰᠢᠯᠦᠭ ᠦ᠋ᠨ ᠬᠣᠯᠪᠣᠴᠠ ᠂ ᠬᠡᠮᠵᠢᠶᠡ ᠶ᠋ᠢ ᠵᠢᠭᠳᠡ ᠪᠣᠯᠭᠠᠬᠤ ᠲᠠᠯᠠ ᠪᠠᠷ ᠴᠢᠬᠤᠯᠠ ᠦᠢᠯᠡᠲᠦᠯ ᠦᠵᠡᠭᠦᠯᠪᠡ ᠃
《 ᠪᠣᠷᠣᠭᠠᠨ ᠬᠤᠷᠠ ᠪᠠᠷ ᠤᠮᠲᠠᠯᠠᠭᠰᠠᠨ ᠤᠷᠭᠤᠮᠠᠯ ᠰᠠᠶ᠋ᠢᠬᠠᠨ
ᠪᠤᠯᠪᠠᠷᠠᠢ ᠴᠡᠴᠡᠭ ᠶ᠋ᠢᠡᠷ ᠴᠢᠮᠡᠭᠯᠡᠭᠰᠡᠨ ᠴᠡᠴᠡᠷᠯᠢᠭ ᠰᠠᠶ᠋ᠢᠬᠠᠨ
ᠪᠤᠮᠠᠨ ᠡᠷᠲᠡᠨᠢ ᠶ᠋ᠢ ᠡᠵᠡᠮᠰᠢᠭᠰᠡᠨ ᠵᠠᠯᠠᠭᠤ ᠰᠠᠶ᠋ᠢᠬᠠᠨ
ᠪᠣᠯᠪᠠᠰᠤᠨ ᠰᠤᠷᠲᠠᠯ ᠊ᠢ ᠡᠷᠬᠢᠮᠯᠡᠭᠰᠡᠨ ᠬᠡᠦᠬᠡᠨ ᠰᠠᠶ᠋ᠢᠬᠠᠨ
ᠥᠪᠡᠷ ᠦ᠋ᠨ ᠦᠨᠲᠦᠰᠦᠲᠡᠨ ᠪ ᠦᠭᠡ ᠪᠡᠨ ᠬᠡᠯᠡᠪᠡᠯ ᠰᠠᠶ᠋ᠢᠬᠠᠨ
ᠥᠰᠪᠥᠷᠢ ᠪᠠᠬ᠋ᠠ ᠳ᠋ᠠᠭᠠᠨ ᠴᠢᠷᠮᠠᠶ᠋ᠢᠨ ᠰᠤᠷᠤᠯᠴᠠᠪᠠᠯ ᠰᠠᠶ᠋ᠢᠬᠠᠨ
ᠡᠪᠦᠭᠡ ᠳᠡᠭᠡᠳᠦᠰ ᠦ᠋ᠨ ᠨᠤᠲᠤᠭ ᠶ᠋ᠢᠠᠨ ᠬᠠᠶ᠋ᠢᠷᠠᠯᠠᠪᠠᠯ ᠰᠠᠶ᠋ᠢᠬᠠᠨ
ᠡᠷᠡᠨ ᠴᠠᠭ ᠳᠠᠭᠠᠨ ᠦᠢᠯᠡᠰ ᠪᠦᠲᠦᠭᠡᠪᠡᠯ ᠰᠠᠶ᠋ᠢᠬᠠᠨ 》(1)
ᠭᠡᠬᠦ ᠮᠡᠲᠦ ᠶ᠋ᠢᠨ ᠰᠢᠨᠡ ᠪᠡᠷ ᠵᠣᠬᠢᠶᠠᠭᠲᠠᠵᠤ ᠪᠠᠶ᠋ᠢᠬ᠋ᠠ ᠰᠢᠯᠦᠭ ᠦ᠋ᠳ ᠨᠢ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠠᠲᠠᠯᠢ ᠦᠭᠡ ᠪᠡᠷ ᠰᠡᠭᠦᠯ ᠬᠣᠯᠪᠣᠲᠠᠭ ᠶᠣᠰᠣ ᠠ᠋ᠴᠠ ᠳᠠᠭᠠᠨ ᠰᠤᠷᠤᠯᠴᠠᠭᠰᠠᠨ ᠪᠠᠶ᠋ᠢᠨᠠ ᠃
ᠮᠣᠩᠭᠣᠯ ᠠᠷᠠᠳ ᠦ᠋ᠨ ᠳᠠᠭᠤᠤ ᠶ᠋ᠢᠨ ᠲᠡᠭᠦᠪᠦᠷᠢ ᠶ᠋ᠢ ᠱᠦᠭᠦᠨ ᠦᠵᠡᠪᠡᠯ ᠂ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠬᠡᠯᠪᠡᠷᠢ ᠶ᠋ᠢ ᠦᠨᠲᠦᠰᠦᠯᠡᠨ ᠵᠣᠬᠢᠶᠠᠭᠰᠠᠨ ᠳᠠᠭᠤᠤ ᠦᠯᠡᠮᠵᠢ ᠬᠠᠷᠠᠭᠲᠠᠨᠠ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄ 《 ᠮᠣᠩᠭᠣᠯ ᠠᠷᠠᠳ ᠦ᠋ᠨ ᠮᠢᠩᠭᠠᠨ ᠳᠠᠭᠤᠤ 》 ᠳ᠋ᠡᠬᠢ 《 ᠵᠢᠷᠠᠨ ᠰᠠᠶ᠋ᠢᠬᠠᠨ 》 ᠪᠠ 《 ᠠᠷᠵᠠᠢ ᠪᠣᠷᠵᠠᠢ ᠬᠠᠭᠠᠨ 》 ᠬᠡᠮᠡᠬᠦ ᠨᠣᠮ ᠳ᠋ᠡᠬᠢ 《 ᠵᠢᠮᠰᠡᠭ 》 ᠵᠡᠷᠭᠡ ᠶ᠋ᠢᠨ ᠳᠠᠭᠤᠤ ᠨᠤᠭᠤᠳ ᠊ᠢ ᠳᠤᠷᠠᠳᠴᠤ ᠪᠣᠯᠤᠨᠠ ᠃ ᠡᠨᠡ ᠨᠢ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠠᠷᠠᠳ ᠦ᠋ᠨ ᠳᠠᠭᠤᠤ ᠳᠤ ᠦᠵᠡᠭᠦᠯᠦᠭᠰᠡᠨ ᠦᠢᠯᠡᠲᠦᠯ ᠪᠣᠯᠤᠨᠠ ᠃ ᠡᠭᠦᠨ ᠶ᠋ᠢᠡᠷ ᠦᠯᠦ ᠪᠠᠷᠠᠮ ᠵᠦᠢᠷ ᠰᠡᠴᠡᠨ ᠦᠭᠡ ᠶ᠋ᠢᠨ ᠬᠥᠭᠵᠢᠯᠲᠡ ᠳᠤ ᠴᠤ᠌ ᠦᠢᠯᠡᠲᠦᠯ ᠲᠡᠢ ᠪᠢᠯᠡ ᠃
(3) ᠬᠡᠯᠡᠨ ᠵᠦᠢ ᠶ᠋ᠢᠨ ᠡᠭᠦᠲᠡᠨ ᠡᠴᠡ ᠠᠪᠴᠤ ᠦᠵᠡᠪᠡᠯ ᠂ ᠦᠭᠡᠰ ᠦ᠋ᠨ ᠰᠠᠩ ᠊ᠢ ᠪᠠᠶᠠᠯᠢᠬᠵᠢᠭᠤᠯᠵᠤ ᠂ ᠥᠭᠦᠯᠡᠪᠦᠷᠢ ᠶ᠋ᠢ ᠡᠷᠴᠢᠮᠲᠡᠢ ᠪᠥᠭᠡᠳ ᠣᠨᠣᠪᠴᠢᠲᠠᠢ ᠂ ᠣᠬᠣᠷ ᠠᠪᠰᠠᠷᠬᠠᠨ ᠨᠠᠶ᠋ᠢᠷᠠᠭᠤᠯᠬᠤ ᠪᠠ ᠨᠠᠶ᠋ᠢᠷᠠᠭᠤᠯᠬ᠋ᠠ ᠶ᠋ᠢᠨ ᠵᠦᠢ ᠶ᠋ᠢᠨ ᠲᠠᠯᠠ ᠪᠠᠷ ᠴᠤ᠌ ᠴᠢᠬᠤᠯᠠ ᠦᠢᠯᠡᠲᠦᠯ ᠲᠡᠢ ᠃
(4) ᠠᠷᠠᠳ ᠣᠯᠠᠨ ᠊ᠢ ᠪᠤᠷᠬᠠᠨ ᠱᠠᠰᠢᠨ ᠪ ᠨᠣᠮᠯᠠᠯ ᠠ᠋ᠴᠠ ᠰᠡᠩᠬᠡᠷᠡᠭᠦᠯᠦᠨ ᠳᠠᠭᠤᠳᠠᠵᠤ᠂ ᠭᠡᠭᠡᠨ ᠰᠠᠷᠠᠭᠤᠯ ᠵᠦᠭ ᠬᠥᠲᠥᠯᠦᠨ ᠂ ᠡᠷᠲᠡᠮ ᠨᠣᠮ ᠊ᠢ ᠬᠢᠴᠢᠶᠡᠲᠦᠭᠡᠢ ᠬᠡᠮᠡᠨ ᠤᠷᠢᠶᠠᠯᠠᠭᠰᠠᠨ ᠦᠢᠯᠡᠲᠦᠯ ᠲᠡᠢ ᠃ ᠵᠢᠱ᠌ᠢᠶᠡᠯᠡᠪᠡᠯ ᠂ ᠱᠠᠰᠢᠨ ᠪ ᠨᠣᠮᠯᠠᠯ ᠳᠤ ᠮᠤᠩᠬᠠᠷᠠᠵᠤ ᠪᠠᠶ᠋ᠢᠬᠰᠠᠨ ᠠᠷᠠᠳ ᠣᠯᠠᠨ ᠳᠤ ᠄
ᠬᠡᠭᠡᠯᠢ ᠢᠳᠡᠳᠡᠭ ᠡᠴᠡ ᠨᠣᠶᠠᠨ ᠬᠡᠴᠡᠭᠦᠦ
ᠬᠡᠷᠡᠭ ᠲᠠᠲᠠᠲᠠᠭ ᠠ᠋ᠴᠠ ᠯᠤᠶ᠋ᠢᠪᠠᠷᠴᠢᠨ ᠬᠡᠴᠡᠭᠦᠦ
ᠬᠡᠩᠰᠢᠭᠦᠦ ᠢᠳᠡᠳᠡᠭ ᠡᠴᠡ ᠯᠠᠮᠠ ᠬᠡᠴᠡᠭᠦᠦ
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠬᠡᠴᠡᠭᠦᠦ )
ᠭᠡᠬᠦ ᠮᠡᠲᠦ ᠪᠡᠷ ᠯᠠᠮᠠ ᠶ᠋ᠢᠨ ᠮᠥᠨ ᠴᠢᠨᠠᠷ ᠊ᠢ ᠲᠠᠨᠢᠭᠤᠯᠤᠨ ᠶᠠᠷᠢᠵᠤ ᠂ ᠱᠠᠰᠢᠨ ᠪ ᠨᠣᠮᠯᠠᠯ ᠪᠠ ᠮᠤᠩᠬᠠᠷᠠᠯ ᠠ᠋ᠴᠠ ᠰᠡᠩᠬᠡᠷᠡᠭᠦᠯᠦᠨ ᠳᠠᠭᠤᠳᠠᠵᠤ ᠄
《 ᠡᠳ᠋ ᠦᠭᠡᠢ ᠬᠥᠮᠦᠨ ᠪ ᠠᠪᠲᠠᠷᠠ ᠪᠠᠷᠠᠭᠠᠨ
ᠡᠴᠢᠭᠡ ᠦᠭᠡᠢ ᠬᠥᠮᠦᠨ ᠪ ᠡᠯᠢᠭᠡ ᠪᠠᠷᠠᠭᠠᠨ
ᠡᠷᠲᠡᠮ ᠦᠭᠡᠢ ᠬᠥᠮᠦᠨ ᠪ ᠲᠠᠷᠢᠬᠢ ᠪᠠᠷᠠᠭᠠᠨ 》
( ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠᠨ ᠪᠠᠷᠠᠭᠠᠨ)
ᠭᠡᠬᠦ ᠮᠡᠲᠦ ᠪᠡᠷ ᠡᠷᠲᠡᠮ ᠨᠣᠮ ᠰᠤᠷᠬᠤ ᠶ᠋ᠢ ᠴᠢᠬᠤᠯᠠᠴᠢᠯᠠᠨ ᠂ ᠠᠷᠠᠳ ᠣᠯᠠᠨ ᠊ᠢ ᠪᠦᠷᠬᠦᠭ ᠬᠠᠷᠠᠩᠭᠤᠢ ᠮᠤᠩᠬᠠᠷᠠᠯ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠭᠡᠭᠡᠨ ᠰᠠᠷᠠᠭᠤᠯ ᠰᠡᠩᠬᠡᠷᠡᠭᠦᠯᠦᠯ ᠵᠦᠭ ᠬᠥᠲᠥᠯᠦᠭᠰᠡᠨ ᠪᠠᠶ᠋ᠢᠨᠠ ᠃ ᠡᠨᠡ ᠨᠢ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠦᠵᠡᠭᠦᠯᠦᠭᠰᠡᠨ ᠦᠢᠯᠡᠲᠦᠯ ᠦ᠋ᠨ ᠲᠣᠶ᠋ᠢᠮᠣ ᠪᠠᠶ᠋ᠢᠲᠠᠯ ᠪᠣᠯᠤᠨᠠ ᠃
ᠪᠢᠲᠡ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠠᠭᠤᠯᠬ᠋ᠠ ᠪᠠ ᠦᠢᠯᠡᠲᠦᠯ ᠊ᠢ ᠶᠠᠷᠢᠬᠤ ᠶ᠋ᠢ ᠳᠠᠭᠠᠯᠳᠤᠭᠤᠯᠤᠨ ᠲᠡᠭᠦᠨ ᠪ ᠨᠠᠵᠠᠭᠠᠢ ᠪᠤᠶᠤ ᠬᠢᠵᠠᠭᠠᠷ ᠲᠠᠢ ᠲᠠᠯᠠ ᠶ᠋ᠢ ᠵᠢᠭᠠᠬᠠᠨ ᠲᠣᠶ᠋ᠢᠮᠣᠴᠢᠯᠠᠨ ᠶᠠᠷᠢᠶᠠ ! 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠣᠯᠲᠠᠭᠰᠠᠨ ᠪᠠᠷᠢᠮᠲᠠ ᠵᠢᠱ᠌ᠢᠶᠡ ᠶ᠋ᠢ ᠨᠢᠬᠲᠠᠯᠠᠨ ᠰᠢᠨᠵᠢᠯᠡᠪᠡᠰᠦ ᠳᠠᠪᠰᠢᠩᠭᠤᠢ ᠠᠭᠤᠯᠬ᠋ᠠ ᠲᠠᠢ ᠪᠠᠷᠢᠮᠲᠠ ᠵᠢᠱ᠌ᠢᠶᠡ ᠨᠢ ᠶᠡᠬᠡᠩᠬᠢ ᠲᠣᠬ᠋ᠠ ᠶ᠋ᠢ ᠡᠵᠡᠯᠡᠬᠦ ᠪᠣᠯᠪᠠᠴᠤ ᠂ ᠵᠣᠬᠢᠶᠠᠭᠰᠠᠨ ᠴᠠᠭ ᠦᠶᠡ ᠶ᠋ᠢᠨ ᠬᠢᠵᠠᠭᠠᠷᠯᠠᠯ ᠠ᠋ᠴᠠ ᠪᠣᠯᠵᠤ ᠵᠠᠷᠢᠮ ᠴᠥᠭᠡᠨ ᠲᠣᠭᠠᠨ ᠪ ᠪᠠᠲᠠᠭ ᠦ᠋ᠳ ᠲᠤ ᠹᠸᠤᠲᠠᠯ ᠨᠡᠶ᠋ᠢᠭᠡᠮ ᠦ᠋ᠨ ᠦᠵᠡᠯ ᠰᠠᠨᠠᠬ᠋ᠠ ᠶ᠋ᠢ ᠬᠥᠭᠡᠷᠭᠡᠲᠡᠵᠦ ᠂ ᠡᠷᠡᠭᠲᠡᠢ ᠶ᠋ᠢᠨ ᠳᠡᠭᠡᠷᠡᠩᠭᠦᠢ ᠦᠵᠡᠯ ᠊ᠢ ᠰᠤᠷᠲᠠᠯᠴᠢᠯᠠᠨ ᠂ ᠡᠮᠡᠭᠲᠡᠢᠴᠦᠳ ᠦ᠋ᠨ ᠪᠠᠶ᠋ᠢᠷᠢ ᠰᠠᠭᠤᠷᠢ ᠶ᠋ᠢ ᠡᠷᠡᠭᠲᠡᠢ ᠬᠥᠮᠦᠨ ᠡᠴᠡ ᠨᠢᠭᠡ ᠲᠡᠰ ᠳᠣᠣᠷᠠ ᠪᠠᠶ᠋ᠢᠯᠭᠠᠬᠤ ᠪᠤᠶᠤ ᠡᠯᠲᠡᠪ ᠬᠣᠶᠠᠷ ᠶ᠋ᠢᠠᠷ ᠳᠣᠷᠣᠮᠵᠢᠯᠠᠨ ᠦᠭᠦᠯᠡᠭᠰᠡᠨ ᠵᠢᠱ᠌ᠢᠶᠡ ᠪᠠᠷᠢᠮᠲᠠ ᠴᠤ᠌ ᠪᠤᠢ ᠃ ᠮᠥᠨ ᠴᠤ᠌ ᠪᠤᠷᠬᠠᠨ ᠱᠠᠰᠢᠨ ᠪ ᠭᠦᠨ ᠨᠥᠯᠥᠭᠡ ᠡᠴᠡ ᠪᠣᠯᠵᠤ ᠂ ᠱᠠᠰᠢᠨ ᠰᠤᠷᠲᠠᠬᠤᠨ ᠊ᠢ ᠲᠠᠭᠠᠰᠢᠶᠠᠨ ᠂ ᠥᠨᠲᠥᠷ ᠶ᠋ᠢᠡᠷ ᠦᠨᠡᠯᠡᠨ ᠶᠠᠷᠢᠬᠰᠠᠨ ᠵᠦᠢᠯ ᠦ᠋ᠳ ᠬᠠᠷᠠᠭᠲᠠᠨᠠ ᠃ ᠡᠲᠡᠭᠡᠷ ᠨᠢ ᠪᠦᠷ ᠲᠡᠭᠦᠨ ᠊ᠢ ᠵᠣᠬᠢᠶᠠᠨ ᠪᠦᠲᠦᠭᠡᠭᠰᠡᠨ ᠠᠷᠠᠳ ᠲᠦᠮᠡᠨ ᠪ ᠠᠮᠢᠲᠤᠷᠠᠵᠤ ᠪᠠᠶ᠋ᠢᠬᠰᠠᠨ ᠴᠠᠭ ᠦᠶᠡ ᠲᠡᠢ ᠬᠣᠯᠪᠣᠬ᠋ᠠ ᠲᠠᠢ ᠪᠢᠯᠡ ᠃ ᠡᠭᠦᠨ ᠡᠴᠡ ᠪᠢᠲᠡ 《 ᠶᠢᠷᠲᠢᠨᠴᠦ ᠶ᠋ᠢᠨ ᠭᠤᠷᠪᠠ 》 ᠶ᠋ᠢᠨ ᠵᠣᠬᠢᠶᠠᠭᠲᠠᠨ ᠳᠡᠯᠭᠡᠷᠡᠭᠰᠡᠨ ᠴᠠᠭ ᠦᠶᠡ ᠶ᠋ᠢᠨ ᠲᠤᠬᠠᠢ ᠮᠡᠲᠡᠯᠭᠡ ᠶ᠋ᠢ ᠣᠯᠵᠤ ᠪᠣᠯᠤᠨᠠ ᠃ ᠲᠡᠶ᠋ᠢᠮᠦ ᠪᠣᠯᠬᠣᠷ ᠂ ᠡᠶ᠋ᠢᠮᠦᠷᠬᠦ ᠨᠠᠵᠠᠭᠠᠢ ᠠᠭᠤᠯᠬ᠋ᠠ ᠲᠠᠢ ᠪᠠᠷᠢᠮᠲᠠ ᠶ᠋ᠢ ᠴᠤ᠌ ᠤᠮᠲᠤᠭᠠᠶ᠋ᠢᠯᠠᠯ ᠦᠭᠡᠢ ᠪᠡᠷ ᠴᠤᠭᠯᠠᠭᠤᠯᠵᠤ ᠡᠮᠬᠢᠤᠠᠬᠡᠪᠡᠯ ᠵᠣᠬᠢᠨᠠ ᠃
ᠲᠠᠶ᠋ᠢᠯᠪᠤᠷᠢ ᠄
(1)《 ᠥᠪᠥᠷ ᠮᠣᠩᠭᠣᠯ ᠦ᠋ᠨ ᠵᠠᠯᠠᠭᠤᠴᠤᠳ 》 ᠦ᠋ᠨ 83 ᠣᠨ ᠪ 3 ᠬᠤᠭᠤᠴᠠᠬ᠋ᠠ ᠳ᠋ᠠᠬᠢ ᠰᠤᠷᠲᠠᠯ ᠦ᠋ᠨ ᠰᠢᠯᠦᠭ ᠡᠴᠡ ᠃
ᠱ ᠂ ᠪᠤᠶᠠᠨᠲᠣᠭᠲᠣᠬᠤ
1985 .1 .10 ᠯᠠᠨᠵᠸᠦ ᠬᠣᠲᠠᠨᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠶᠤᠨᠲᠤᠨᠠᠯ ᠂ ᠳ᠋ᠦ᠋ᠩ ᠹᠧᠩ ᠂ ᠬᠠᠷᠠᠨᠤᠳ ᠲᠤᠶᠠᠭᠠ ᠂ ᠮᠢᠩᠭᠠᠳ ᠴᠢᠮᠡᠭ
ᠬᠢᠨᠠᠭᠴᠢ ᠄ ᠮᠢᠩᠭᠠᠳ ᠴᠢᠮᠡᠭ ᠂ ᠬᠠᠷᠠᠨᠤᠳ ᠲᠤᠶᠠᠭᠠ