ᠿᠦᠨ ᠲᠦ᠋ ᠶ᠋ᠢᠨ ᠪᠠᠬ᠋ᠠ ᠨᠠᠰᠤ （ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ）-ᠯᠦ᠍ ᠰᠢᠶᠦ᠋ᠨ Рүн түгийн бага нас（ Хэл бичиг – Есдүгээр дэвтэр）-Лү Шүнь
471ᠿᠦᠨ ᠲᠦ᠋ ᠶ᠋ᠢᠨ ᠪᠠᠬ᠋ᠠ ᠨᠠᠰᠤ
ᠯᠦ᠍ ᠰᠢᠶᠦ᠋ᠨ
ᠴᠡᠯᠮᠡᠭ ᠬᠥᠬᠡ ᠣᠭᠲᠠᠷᠭᠤᠢ ᠳ᠋ᠤ᠌ ᠠᠯᠲᠠᠨ ᠰᠢᠷᠠ ᠥᠩᠭᠡᠲᠦ ᠲᠡᠷᠭᠡᠯ ᠰᠠᠷᠠᠨ ᠮᠡᠯᠲᠡᠶ᠋ᠢᠭᠡᠳ ᠂ ᠲᠡᠭᠦᠨ ᠪ ᠳᠣᠣᠷᠠ ᠳᠠᠯᠠᠢ ᠶ᠋ᠢᠨ ᠡᠷᠬᠢ ᠶ᠋ᠢᠨ ᠡᠯᠡᠰᠦᠨ ᠳᠡᠭᠡᠷᠡ ᠨᠢᠲᠦ ᠠᠯᠲᠠᠮᠠ ᠦᠷᠭᠦᠯᠵᠢᠯᠡᠭᠰᠡᠨ ᠳᠠᠷᠪᠤᠰ ᠦ᠋ᠨ ᠲᠠᠷᠢᠶᠠ ᠨᠣᠭᠤᠭᠠᠷᠠᠨ ᠬᠠᠷᠠᠭᠲᠠᠨᠠ ᠃ ᠲᠡᠷᠡ ᠲᠠᠷᠢᠶᠠᠨ ᠳᠣᠮᠲᠠ ᠬᠦᠵᠦᠭᠦᠨ ᠳ᠋ᠡᠭᠡᠨ ᠮᠥᠩᠭᠥᠨ ᠣᠨᠢᠰᠣ ᠵᠡᠭᠦᠭᠰᠡᠨ ᠠᠷᠪᠠᠨ ᠨᠢᠭᠡ ᠬᠣᠶᠠᠷ ᠨᠠᠰᠤᠲᠠᠢ ᠬᠦᠦ ᠭᠠᠷ ᠲᠠᠭᠠᠨ ᠭᠠᠩ ᠰᠡᠷᠡᠭᠡ ᠪᠠᠷᠢᠭᠠᠳ ᠂ ᠨᠢᠭᠡᠨ ᠲᠣᠷᠤᠭᠤ ᠭᠡᠭᠴᠢ ᠠᠮᠢᠲᠠᠨ ᠊ᠢ ᠪᠦᠬᠦ ᠴᠢᠲᠠᠯ ᠶ᠋ᠢᠠᠷ ᠶ᠋ᠢᠠᠨ ᠬᠠᠤᠠᠬᠤᠬᠤ ᠳ᠋ᠤ᠌ ᠥᠨᠥ ᠲᠣᠷᠤᠭᠤ ᠭᠡᠲᠡᠷᠭᠦ ᠪᠤᠯᠲᠠᠨ ᠰᠠᠯᠲᠠᠭᠠᠨ ᠲᠣᠭᠤᠤᠷ ᠨᠢ ᠲᠤᠲᠠᠭᠠᠪᠠ ᠃
ᠡᠨᠡ ᠬᠦᠦ ᠪᠣᠯ ᠿᠦᠨ ᠲᠦ᠋ ᠶᠤᠮ ᠃ ᠪᠢ ᠲᠡᠭᠦᠨ ᠲᠡᠢ ᠠᠷᠪᠠᠨ ᠬᠡᠲᠦᠲᠡᠢ ᠳ᠋ᠡᠭᠡᠨ ᠲᠠᠨᠢᠯᠴᠠᠭᠰᠠᠨ ᠪᠥᠭᠡᠳ ᠣᠲᠣ ᠠ᠋ᠴᠠ ᠭᠤᠴᠢᠭᠠᠳ ᠵᠢᠯ ᠦ᠋ᠨ ᠡᠮᠦᠨᠡᠬᠢ ᠬᠡᠷᠡᠭ ᠪᠢᠯᠡ ᠃ ᠲᠡᠷᠡ ᠦᠶᠡ ᠳ᠋ᠤ᠌ ᠮᠢᠨᠦ ᠠᠪᠤ ᠪᠠᠰᠠ ᠠᠮᠢᠲᠤ ᠪᠠᠶ᠋ᠢᠬᠰᠠᠨ ᠪᠥᠭᠡᠳ ᠭᠡᠷ ᠦ᠋ᠨ ᠠᠵᠤ ᠠᠮᠢᠲᠤᠷᠠᠯ ᠴᠦ᠍ ᠵᠦᠭᠡᠷ ᠰᠠᠶ᠋ᠢᠨ ᠪᠠᠶ᠋ᠢᠬᠰᠠᠨ ᠲᠤᠯᠠ ᠪᠢ ᠪᠦᠷ ᠯᠡ ᠨᠢᠭᠡ ᠠᠭᠡ ※ (1) ᠪᠠᠶ᠋ᠢᠬᠰᠠᠨ ᠶᠤᠮ ᠂ ᠣᠩᠭᠣᠳ ᠦ᠋ᠨ ᠶᠡᠬᠡ ᠲᠠᠬᠢᠯᠬ᠋ᠠ ※(2) ᠶ᠋ᠢᠨ ᠡᠭᠡᠯᠵᠢ ᠲᠡᠷᠡ ᠵᠢᠯ ᠮᠠᠨᠠᠢ ᠳ᠋ᠤ᠌ ᠲᠠᠭᠠᠷᠠᠭᠰᠠᠨ ᠪᠠᠶ᠋ᠢᠯᠠ ᠃ ᠡᠨᠡ ᠲᠠᠬᠢᠯᠬ᠋ᠠ ᠨᠢ ᠭᠤᠴᠢᠨ ᠬᠡᠲᠦᠨ ᠵᠢᠯ ᠪᠣᠯᠤᠭᠠᠳ ᠨᠢᠭᠡ ᠡᠭᠡᠯᠵᠢ ᠲᠣᠬᠢᠶᠠᠯᠲᠤᠲᠠᠭ ᠭᠡᠬᠦ ᠲᠤᠯᠠ ᠶᠡᠬᠡ ᠯᠡ ᠡᠷᠬᠢᠮᠨᠡᠨ ᠬᠦᠨᠳᠦᠳᠬᠡᠳᠡᠭ ᠪᠠᠶ᠋ᠢᠯᠠ ᠃ ᠴᠠᠭᠠᠨ ᠰᠠᠷᠠ ᠳ᠋ᠠᠭᠠᠨ ᠡᠪᠦᠭᠡᠳ ᠦ᠋ᠨ ᠬᠥᠷᠥᠭ ᠊ᠢ ᠳᠠᠬᠢᠳᠠᠭ ᠪᠥᠭᠡᠳ ᠲᠠᠬᠢᠯᠬ᠋ᠠ ᠶ᠋ᠢᠨ ᠰᠢᠭᠦᠰᠦ ᠴᠣᠩᠬᠣᠷ ᠴᠦ᠍ ᠮᠠᠰᠢ ᠡᠯᠪᠡᠭ ᠂ ᠲᠠᠬᠢᠯᠬ᠋ᠠ ᠶ᠋ᠢᠨ ᠰᠠᠪᠠ ᠰᠠᠭᠠᠯᠢ ᠴᠦ᠍ ᠶᠡᠬᠡ ᠯᠡ ᠦᠨᠡᠲᠡᠢ ᠨᠠᠷᠢᠨ ᠵᠦᠢᠯᠡᠰ ᠪᠠᠶ᠋ᠢᠲᠠᠭ ᠂ ᠲᠠᠬᠢᠯᠬ᠋ᠠ ᠳ᠋ᠤ᠌ ᠣᠯᠠᠨ ᠴᠦ᠍ ᠬᠥᠮᠦᠨ ᠴᠤᠭᠯᠠᠲᠠᠭ ᠲᠤᠯᠠ ᠲᠠᠬᠢᠯᠬ᠋ᠠ ᠶ᠋ᠢᠨ ᠬᠡᠷᠡᠭᠰᠡᠯ ᠊ᠢ ᠬᠤᠯᠠᠭᠠᠢ ᠳ᠋ᠤ᠌ ᠠᠯᠲᠠᠬᠤ ᠡᠴᠡ ᠰᠡᠷᠡᠮᠵᠢᠯᠡᠬᠦ ᠬᠡᠷᠡᠭᠲᠡᠢ ᠪᠠᠶ᠋ᠢᠯᠠ ᠃ ᠭᠡᠲᠡᠯᠡ ᠮᠠᠨᠠᠢ ᠳ᠋ᠤ᠌ ᠭᠠᠭᠴᠠᠬᠠᠨ ᠰᠠᠷᠠ ᠶ᠋ᠢᠨ ᠬᠦᠴᠦ ( ᠥᠪᠡᠷ ᠶ᠋ᠢᠡᠨ ᠲᠠᠷᠢᠶᠠ ᠲᠠᠷᠢᠵᠤ ᠂ ᠭᠠᠭᠴᠠ ᠬᠦ ᠵᠢᠯ ᠴᠠᠭᠠᠨ ᠰᠠᠷᠠ ᠂ ᠪᠠᠶᠠᠷ ᠨᠠᠶ᠋ᠢᠷ ᠦ᠋ᠨ ᠡᠲᠦᠷ ᠪᠤᠶᠤ ᠲᠦᠷᠢᠶᠡᠰᠦ ᠬᠣᠷᠢᠶᠠᠬᠤ ᠦᠶᠡ ᠳ᠋ᠤ᠌ ᠳᠣᠭᠲᠠᠮᠠᠯ ᠬᠥᠮᠦᠨ ᠳ᠋ᠤ᠌ ᠠᠵᠢᠯ ᠬᠢᠵᠦ ᠥᠭᠳᠡᠭ ᠬᠥᠲᠡᠯᠮᠦᠷᠢ ᠬᠦᠴᠦ ᠶ᠋ᠢ ᠰᠠᠷᠠ ᠶ᠋ᠢᠨ ᠬᠦᠴᠦ ᠭᠡᠳᠡᠭ ) ᠪᠠᠶ᠋ᠢᠬᠰᠠᠨ ᠪᠥᠭᠡᠳ ᠠᠵᠢᠯ ᠨᠢ ᠲᠤᠩ ᠶᠠᠭᠠᠷᠠᠯᠲᠠᠢ ᠪᠣᠯᠤᠭᠰᠠᠨ ᠲᠤᠯᠠ ᠬᠦᠦ ᠪᠡᠨ ᠠᠪᠴᠢᠷᠠᠵᠤ ᠳᠠᠬᠢᠯᠬ᠋ᠠ ᠶ᠋ᠢᠨ ᠬᠡᠷᠡᠭᠰᠡᠯ ᠊ᠢ ᠬᠠᠷᠠᠭᠤᠯᠪᠠᠯ ᠶᠠᠮᠠᠷ ᠪᠤᠢ ᠭᠡᠵᠦ ᠠᠪᠤ ᠳ᠋ᠤ᠌ ᠬᠡᠯᠡᠵᠡᠢ ᠃
ᠠᠪᠤ ᠵᠦᠪᠰᠢᠶᠡᠷᠡᠪᠡ ᠃ ᠪᠢ ᠴᠦ ᠶᠡᠬᠡ ᠪᠠᠶᠠᠷᠯᠠᠯᠠ ᠃ ᠤᠴᠢᠷ ᠨᠢ ᠿᠦᠨ ᠲᠦ᠋ ᠭᠡᠭᠴᠢ ᠨᠡᠷᠡ ᠶ᠋ᠢ ᠬᠡᠲᠦᠶ᠋ᠢᠨᠡᠢ ᠰᠣᠨᠣᠰᠤᠭᠰᠠᠨ ᠪᠥᠭᠡᠳ ᠨᠠᠲᠠ ᠲᠠᠢ ᠨᠠᠰᠤ ᠬᠣᠷᠠᠭ ᠂ ᠦᠨᠲᠦᠷ ᠵᠢᠯ ᠲᠥᠷᠥᠭᠰᠡᠨ ᠂ ᠲᠠᠪᠤᠨ ᠮᠠᠬᠠᠪᠣᠳ ᠡᠴᠡ ᠰᠢᠷᠣᠢ ᠲᠤᠲᠠᠭᠤ ᠤᠴᠢᠷ ᠂ ᠠᠪᠤ ᠨᠢ ᠿᠦᠨ ᠲᠦ᠋ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠊ᠢ ᠪᠢ ᠮᠡᠲᠡᠨᠡ ᠃ ᠿᠦᠨ ᠲᠦ᠋ ᠪᠣᠯ ᠤᠷᠠᠬᠠ ᠲᠣᠣᠷ ᠲᠠᠯᠪᠢᠵᠤ ᠪᠣᠯᠵᠣᠮᠣᠷ ᠰᠢᠪᠠᠤᠬᠠᠢ ᠰᠠᠢᠨ ᠪᠠᠷᠢᠲᠠᠭ ᠬᠡᠦᠬᠡᠳ ᠶᠤᠮ ᠃
ᠪᠢ ᠴᠠᠭᠠᠨ ᠰᠠᠷᠠ ᠪᠣᠯᠬᠤ ᠶ᠋ᠢ ᠲᠡᠰᠴᠦ ᠶᠠᠲᠠᠨ ᠬᠦᠯᠢᠶᠡᠪᠡ ᠃ ᠴᠠᠭᠠᠨ ᠰᠠᠷᠠ ᠪᠣᠯᠵᠤ ᠿᠦᠨ ᠲᠦ᠋ ᠴᠦ᠍ ᠬᠦᠷᠦᠭᠡᠳ ᠢᠷᠡᠯᠡ ᠃ ᠠᠷᠠᠢ ᠭᠡᠵᠦ ᠵᠢᠯ ᠦ᠋ᠨ ᠡᠴᠦᠰ ᠪᠣᠯᠬᠤ ᠳ᠋ᠤ᠌ ᠨᠢᠭᠡ ᠡᠲᠦᠷ ᠿᠦᠨ ᠲᠦ᠋ ᠢᠷᠡᠭᠰᠡᠨ ᠭᠡᠵᠦ ᠡᠵᠢ ᠨᠠᠲᠠ ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠪᠢᠯᠡ ᠃ ᠪᠢ ᠲᠡᠭᠦᠨ ᠊ᠢ ᠦᠵᠡᠬᠦ ᠪᠡᠷ ᠳᠡᠪᠬᠡᠷᠦᠨ ᠭᠦᠶᠦᠵᠦ ᠣᠴᠢᠪᠠᠯ ᠂ ᠲᠡᠷᠡ ᠭᠠᠯ ᠲᠣᠭᠣᠭᠠᠨ ᠪ ᠥᠷᠥᠭᠡᠨ ᠳ᠋ᠤ᠌ ᠰᠠᠭᠤᠵᠤ ᠪᠠᠶ᠋ᠢᠵᠠᠢ ᠃ ᠪᠣᠮᠪᠣᠭᠣᠷ ᠪᠣᠷᠣ ᠴᠢᠷᠠᠢ ᠲᠠᠢ ᠂ ᠪᠢᠴᠢᠬᠠᠨ ᠢᠰᠡᠭᠡᠢ ᠮᠠᠯᠠᠭᠠᠢ ᠡᠮᠦᠰᠦᠭᠡᠳ ᠂ ᠭᠢᠯᠠᠯᠵᠠᠭᠰᠠᠨ ᠰᠠᠶ᠋ᠢᠬᠠᠨ ᠮᠥᠩᠭᠥᠨ ᠣᠨᠢᠰᠣ ᠵᠡᠭᠦᠭᠰᠡᠨ ᠬᠦᠦ ᠪᠠᠶ᠋ᠢᠯᠠ ᠃ ᠠᠪᠤ ᠨᠢ ᠲᠡᠭᠦᠨ ᠳ᠋ᠤ᠌ ᠦᠯᠡᠮᠵᠢ ᠬᠠᠶ᠋ᠢᠷᠠᠲᠠᠢ ᠭᠡᠭᠴᠢ ᠶ᠋ᠢ ᠡᠭᠦᠨ ᠡᠴᠡ ᠮᠠᠲᠠᠵᠤ ᠪᠣᠯᠬᠤ ᠪᠠᠶ᠋ᠢᠪᠠ ᠃ ᠲᠡᠭᠦᠨ ᠊ᠢ ᠦᠬᠦᠵᠦ ᠭᠡᠭᠡᠭᠲᠡᠬᠦ ᠡᠴᠡ ᠠᠶᠤᠵᠤ ᠪᠤᠷᠬᠠᠨ ᠪ ᠡᠮᠦᠨᠡ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠵᠤ ᠣᠨᠢᠰᠣ ᠪᠠᠷ ᠪᠠᠷᠢᠵᠤ ᠣᠨᠢᠰᠤᠯᠠᠭᠰᠠᠨ ᠨᠢ ᠡᠨᠡ ᠪᠠᠶ᠋ᠢᠵᠠᠢ ᠃ ᠲᠡᠷᠡ ᠬᠦᠦ ᠬᠥᠮᠦᠨ ᠡᠴᠡ ᠪᠥᠱᠦᠭᠦᠷᠬᠡᠬᠦ ᠪᠣᠯᠪᠠᠴᠤ ᠨᠠᠲᠠ ᠠ᠋ᠴᠠ ᠶᠡᠷᠦ ᠳ᠋ᠡᠭᠡᠨ ᠪᠥᠱᠦᠭᠦᠷᠭᠡᠬᠦ ᠦᠭᠡᠢ ᠂ ᠥᠭᠡᠷᠡ ᠬᠥᠮᠦᠨ ᠦᠭᠡᠢ ᠪᠣᠯᠣᠮᠠᠭᠴᠠ ᠨᠠᠲᠠ ᠲᠠᠢ ᠬᠡᠯᠡᠯᠴᠡᠬᠦ ᠲᠤᠯᠠ ᠬᠣᠶᠠᠭᠤᠯᠠ ᠬᠠᠭᠠᠰ ᠡᠲᠦᠷ ᠪᠣᠯᠣᠯ ᠦᠭᠡᠢ ᠪᠠᠷ ᠰᠠᠢᠬᠠᠨ ᠲᠠᠨᠢᠯᠴᠠᠵᠠᠢ ᠃
ᠪᠢᠲᠡ ᠲᠡᠷᠡ ᠦᠶᠡ ᠳ᠋ᠤ᠌ ᠴᠤᠬᠤᠮ ᠶᠠᠭᠤ ᠶᠠᠭᠤ ᠶᠠᠷᠢᠯᠴᠠᠭᠰᠠᠨ ᠶ᠋ᠢᠠᠨ ᠪᠦᠷ ᠮᠠᠷᠲᠠᠴᠢᠬᠠᠭᠰᠠᠨ ᠪᠥᠭᠡᠳ ᠭᠠᠭᠴᠠ ᠬᠦ ᠿᠦᠨ ᠲᠦ᠋ ᠬᠣᠲᠠᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠭᠡᠳ ᠤᠷᠢᠳ ᠡᠮᠦᠨᠡ ᠶᠡᠷᠦ ᠣᠯᠵᠤ ᠦᠵᠡᠭᠡᠲᠦᠢ ᠣᠯᠠᠨ ᠶᠠᠭᠤᠮᠠ ᠦᠵᠡᠯᠡ ᠭᠡᠵᠦ ᠶᠡᠬᠡ ᠪᠠᠶᠠᠷᠯᠠᠵᠤ ᠪᠠᠶ᠋ᠢᠬᠰᠠᠨ ᠊ᠢ ᠯᠠ ᠮᠠᠷᠲᠠᠭᠠᠲᠤᠢ ᠪᠠᠶ᠋ᠢᠨᠠ ᠃ ᠮᠠᠷᠭᠠᠰᠢ ᠨᠢ ᠪᠢ ᠲᠡᠭᠦᠨ ᠶ᠋ᠢᠡᠷ ᠪᠣᠯᠵᠣᠮᠣᠷ ᠪᠠᠷᠢᠭᠤᠯᠬᠤ ᠭᠡᠪᠡ ᠃
《 ᠣᠲᠣ ᠪᠣᠯᠬᠤ ᠦᠭᠡᠢ ᠃ ᠶᠡᠬᠡ ᠴᠠᠰᠤ ᠣᠷᠣᠪᠠᠯ ᠪᠣᠯᠤᠨᠠ ᠃ ᠮᠠᠨ ᠪ ᠲᠡᠨᠲᠡᠬᠢ ᠶ᠋ᠢᠨ ᠡᠯᠡᠰᠦᠨ ᠭᠠᠵᠠᠷ ᠴᠠᠰᠤ ᠣᠷᠣᠪᠠᠯ ᠪᠢ ᠭᠡᠰᠡᠭ ᠭᠠᠵᠠᠷ ᠦ᠋ᠨ ᠴᠠᠰᠤ ᠶ᠋ᠢ ᠱᠦᠭᠦᠷᠲᠡᠵᠦ ᠂ ᠲᠣᠮᠣ ᠬᠤᠯᠤᠰᠤᠨ ᠰᠠᠶ᠋ᠢᠯᠤᠤᠷ ᠊ᠢ ᠬᠥᠮᠥᠷᠢᠵᠦ ᠪᠣᠭᠣᠨᠢ ᠮᠣᠲᠣ ᠪᠠᠷ ᠢᠷᠮᠡᠭ ᠊ᠢ ᠨᠢ ᠲᠤᠯᠵᠤ ᠬᠥᠨᠲᠡᠶ᠋ᠢᠯᠡᠭᠡᠳ ᠲᠣᠣᠷᠡ ᠨᠢ ᠴᠣᠣᠬᠠᠯ ᠰᠠᠴᠤᠵᠤ ᠣᠷᠬᠢᠲᠠᠭ ᠶᠤᠮ ᠃ ᠪᠣᠯᠵᠣᠮᠣᠷ ᠲᠡᠷᠡ ᠴᠣᠣᠬᠠᠯ ᠊ᠢ ᠢᠲᠡᠬᠦ ᠪᠡᠷ ᠢᠷᠡᠬᠦ ᠳ᠋ᠤᠨᠢ ᠪᠢ ᠪᠣᠭᠣᠨᠢ ᠮᠣᠲᠣᠨ ᠠ᠋ᠴᠠ ᠤᠶᠠᠭᠰᠠᠨ ᠰᠢᠵᠢᠮ ᠊ᠢ ᠬᠣᠯᠠ ᠠ᠋ᠴᠠ ᠣᠭᠵᠣᠮ ᠲᠠᠲᠠᠪᠠᠯ ᠂ ᠪᠣᠯᠵᠣᠮᠣᠷ ᠦ᠋ᠳ ᠬᠤᠯᠤᠰᠤᠨ ᠰᠠᠶ᠋ᠢᠯᠤᠤᠷ ᠲᠤ ᠬᠥᠮᠥᠷᠢᠭᠳᠡᠳᠡᠭ ᠶᠤᠮ ᠃ ᠰᠡᠭᠰᠡᠭᠡᠷ ᠰᠢᠪᠠᠭᠤ ᠂ ᠬᠣᠭᠣᠯᠠᠶ᠋ᠢᠲᠦ ᠪᠣᠯᠵᠣᠮᠣᠷ ᠂ ᠬᠥᠬᠥᠭᠡ ᠪᠥᠬᠡ ᠁ ᠶᠠᠭᠤ ᠴᠤ ᠪᠦᠷ ᠪᠠᠷᠢᠬᠲᠠᠨᠠ ᠃ 》
ᠢᠩᠭᠢᠭᠡᠳ ᠪᠢ ᠪᠠᠰᠠ ᠴᠠᠰᠤ ᠣᠷᠣᠬᠤ ᠶ᠋ᠢ ᠬᠦᠰᠡᠳᠡᠭ ᠪᠠᠶ᠋ᠢᠯᠠ ᠃
ᠿᠦᠨ ᠲᠦ᠋ ᠨᠠᠲᠠ ᠄ 《 ᠣᠲᠣ ᠲᠤᠩ ᠬᠥᠢᠲᠡᠨ ᠪᠠᠶ᠋ᠢᠨᠠ ᠃ ᠴᠢ ᠵᠤᠨ ᠮᠠᠨ ᠪ ᠲᠡᠨᠲᠡ ᠣᠴᠢ ᠃ ᠪᠢᠲᠡ ᠡᠲᠦᠷ ᠲᠡᠭᠡᠨ ᠳᠠᠯᠠᠢ ᠶ᠋ᠢᠨ ᠡᠷᠬᠢ ᠳᠡᠭᠡᠷᠡ ᠣᠴᠢᠵᠤ ᠡᠮᠡᠭᠡᠨ ᠬᠤᠮᠤᠰᠤ ᠲᠡᠭᠦᠶᠡ ᠃ ᠤᠯᠠᠭᠠᠨ ᠨᠣᠭᠣᠭᠠᠨ ᠴᠦᠮ ᠪᠠᠶ᠋ᠢᠨᠠ ᠃ ᠴᠢᠤᠠᠬᠥᠷ ᠠᠶᠤᠭᠴᠢ ※(3) ᠴᠦ᠍ ᠪᠠᠶ᠋ᠢᠨᠠ · ᠠᠷᠢᠶᠠᠪᠠᠯᠤ ᠶ᠋ᠢᠨ ᠮᠣᠲᠣᠷ ᠴᠦ᠍ ᠪᠠᠶ᠋ᠢᠨᠠ ᠃ ᠦᠲᠡᠰᠢ ᠳ᠋ᠡᠭᠡᠨ ᠪᠢ ᠠᠪᠤ ᠲᠠᠢ ᠲᠠᠷᠪᠤᠰ ᠮᠠᠨᠠᠬᠤ ᠪᠡᠷ ᠣᠴᠢᠲᠠᠭ ᠂ ᠴᠢ ᠪᠠᠰᠠ ᠣᠴᠢ 》 ᠭᠡᠪᠡ ᠃
《ᠬᠤᠯᠠᠭᠠᠢ ᠳ᠋ᠤ᠌ ᠠᠯᠲᠠᠭᠤᠵᠠᠢ ᠭᠡᠵᠦ ᠮᠠᠨᠠᠲᠠᠭ ᠤᠤ ? 》
《 ᠦᠭᠡᠢ · ᠵᠠᠮ ᠦ᠋ᠨ ᠬᠥᠮᠦᠨ ᠴᠠᠩᠭᠠᠭᠠᠳ ᠨᠢᠭᠡ ᠳᠠᠷᠪᠤᠰ ᠢᠲᠡᠬᠦ ᠶ᠋ᠢ ᠮᠠᠨ ᠪ ᠲᠡᠨᠲᠡ ᠬᠤᠯᠠᠭᠠᠢ ᠳ᠋ᠤ᠌ ᠪᠣᠲᠣᠲᠠᠭ ᠦᠭᠡᠢ · ᠬᠠᠷᠢᠨ ᠭᠠᠩᠭᠢᠰᠤ · ᠵᠠᠷᠠᠬ᠋ᠠ · ᠲᠣᠷᠤᠭᠤ ᠵᠡᠷᠭᠡ ᠠᠮᠢᠲᠠᠳ ᠦ᠋ᠨ ᠰᠦᠢᠤᠠᠭᠡᠭᠦ ᠶ᠋ᠢ ᠰᠡᠷᠭᠡᠢᠯᠡᠳᠡᠭ ᠶᠤᠮ ᠃ ᠰᠠᠷᠠᠨ ᠪ ᠭᠡᠷᠡᠯ ᠳᠣᠣᠷᠠ ᠬᠠᠷ ᠬᠠᠷ ᠭᠡᠵᠦ ᠴᠢᠮᠡᠭᠡ ᠭᠠᠷᠴᠤ ᠪᠠᠶ᠋ᠢᠪᠠᠯ · ᠲᠣᠷᠤᠭᠤ ᠢᠷᠡᠵᠦ ᠲᠠᠷᠪᠤᠰ ᠬᠡᠮᠡᠯᠢᠵᠦ ᠪᠠᠶ᠋ᠢᠬᠤ ᠨᠢ ᠲᠡᠷᠡ ᠃ ᠴᠢᠩᠭᠢᠪᠡᠯ ᠰᠡᠷᠡᠭᠡ ᠪᠡᠨ ᠪᠠᠷᠢᠭᠠᠳ ᠰᠡᠮᠬᠡᠨ ᠠᠯᠬᠤᠭᠰᠠᠭᠠᠷ ᠁ 》 ᠪᠢ ᠲᠡᠷᠡ ᠦᠶᠡ ᠳ᠋ᠤ᠌ ᠲᠣᠷᠤᠭᠤ ᠭᠡᠭᠴᠢ ᠴᠣᠬᠣᠮ ᠶᠠᠮᠠᠷ ᠠᠮᠢᠲᠠᠨ ᠪᠣᠯᠬᠤ ᠶ᠋ᠢ ᠮᠡᠲᠡᠬᠦ ᠦᠭᠡᠢ — ᠣᠲᠣ ᠴᠦ᠍ ᠭᠡᠰᠡᠨ ᠮᠡᠲᠡᠬᠦ ᠦᠭᠡᠢ — ᠪᠢᠴᠢᠬᠠᠨ ᠨᠣᠬᠠᠢ ᠮᠡᠲᠦ ᠪᠥᠭᠡᠳ ᠶᠡᠬᠡ ᠯᠡ ᠬᠡᠲᠡᠷ ᠲᠣᠭᠰᠢᠨ ᠠᠮᠢᠲᠠᠨ ᠪᠠᠶ᠋ᠢᠬᠤ ᠡ ᠭᠡᠵᠦ ᠰᠠᠨᠠᠵᠤ ᠪᠠᠶ᠋ᠢᠪᠠ ᠃
《 ᠬᠥᠮᠦᠨ ᠊ᠢ ᠬᠠᠵᠠᠬᠤ ᠦᠭᠡᠢ ᠤᠤ ᠲᠡᠷᠡ ? 》
《 ᠰᠡᠷᠡᠭᠡ ᠪᠠᠶ᠋ᠢᠬᠤ ᠶᠤᠮ ᠴᠢᠨᠢ ᠃ ᠠᠯᠬᠤᠵᠤ ᠣᠴᠢᠭᠠᠳ ᠲᠣᠷᠤᠭᠤ ᠪᠠᠶ᠋ᠢᠪᠠᠯ ᠯᠠ ᠬᠠᠤᠠᠬᠤᠬᠤ ᠬᠡᠷᠡᠭᠲᠡᠢ᠃ ᠶᠡᠬᠡ ᠰᠣᠷᠭᠣᠭ ᠠᠮᠢᠲᠠᠨ ᠰᠢᠦ · ᠡᠷᠭᠢᠵᠦ ᠪᠤᠯᠲᠠᠭᠠᠳ ᠯᠠ ᠰᠠᠯᠲᠠᠭᠠᠨ ᠲᠣᠭᠤᠤᠷ ᠴᠢᠨᠢ ᠳᠤᠲᠠᠭᠠᠴᠢᠬᠠᠨᠠ ᠃ ᠳᠤᠰᠤ ᠰᠢᠭ᠋ ᠭᠢᠯᠠᠯᠵᠠᠭᠰᠠᠨ ᠦᠰᠦ ᠲᠡᠢ ᠁ 》
ᠳᠡᠯᠡᠬᠡᠢ ᠳᠡᠭᠡᠷᠡ ᠪᠠᠰᠠ ᠥᠴᠢᠨᠡᠨ ᠣᠯᠠᠨ ᠬᠠᠴᠢᠨ ᠰᠣᠨᠢᠨ ᠶᠠᠪᠤᠲᠠᠯ ᠦ᠋ᠳ ᠪᠠᠶ᠋ᠢᠲᠠᠭ ᠶᠤᠮ ᠪᠠᠶ᠋ᠢᠨᠠ ᠃ ᠳᠠᠯᠠᠢ ᠶ᠋ᠢᠨ ᠡᠷᠬᠢ ᠳᠡᠭᠡᠷᠡ ᠪᠠᠷᠤᠭ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠡᠮᠡᠭᠡᠨ ᠬᠤᠮᠤᠰᠤ ᠪᠠᠶ᠋ᠢᠲᠠᠭ ᠭᠡᠨᠡ ᠃ ᠲᠠᠷᠪᠤᠰ ᠴᠦ᠍ ᠪᠠᠰᠠ ᠡᠶ᠋ᠢᠮᠦ ᠠᠶᠤᠮᠰᠢᠬᠲᠤ ᠥᠩᠭᠡᠷᠡᠯᠲᠡ ᠲᠡᠢ ᠭᠡᠨᠡ ᠃ ᠤᠷᠢᠲᠤ ᠨᠢ ᠪᠢ ᠵᠢᠮᠢᠰ ᠦ᠋ᠨ ᠳᠡᠯᠭᠡᠬᠦᠢ ᠳᠡᠭᠡᠷᠡ ᠯᠠ ᠬᠤᠲᠠᠯᠲᠤᠲᠠᠭ ᠭᠡᠵᠦ ᠰᠠᠨᠠᠵᠤ ᠪᠠᠶ᠋ᠢᠬᠰᠠᠨ ᠶᠤᠮ ᠃
《 ᠮᠠᠨ ᠪ ᠲᠡᠨᠲᠡᠬᠢ ᠶ᠋ᠢᠨ ᠡᠯᠡᠰᠦᠨ ᠭᠠᠵᠠᠷ ᠳᠠᠯᠠᠢ ᠶ᠋ᠢᠨ ᠳᠦᠯᠬᠢᠯᠳᠡ ᠪᠣᠯᠬᠤ ᠦᠶᠡ ᠳ᠋ᠤ᠌ ᠮᠡᠯᠡᠬᠡᠢ ᠮᠡᠲᠦ ᠬᠣᠶᠠᠷ ᠬᠥᠯ ᠲᠡᠢ ᠳᠡᠪᠬᠡᠷᠭᠡ ᠵᠢᠭᠠᠰᠤ ᠵᠥᠩᠲᠡᠭᠡᠨ ᠪᠤᠢ ᠪᠣᠯᠵᠤ ᠳᠡᠪᠬᠡᠷᠴᠦ ᠯᠠ ᠪᠠᠶ᠋ᠢᠲᠠᠭ ᠶᠤᠮ ᠁ 》
ᠠ ! ᠿᠦᠨ ᠲᠦ᠋ ᠮᠢᠨᠦ ᠡᠩ ᠦ᠋ᠨ ᠨᠥᠬᠥᠳ ᠦ᠋ᠨ ᠦᠯᠦ ᠮᠡᠲᠡᠬᠦ ᠰᠣᠨᠢᠨ ᠰᠠᠶ᠋ᠢᠬᠠᠨ ᠶᠠᠭᠤᠮᠠ ᠶ᠋ᠢ ᠴᠠᠭᠯᠠᠰᠢ ᠦᠭᠡᠢ ᠣᠯᠠᠨ ᠮᠡᠳᠡᠳᠡᠭ ᠶᠤᠮ ᠪᠠᠶ᠋ᠢᠨᠠ ᠃ ᠲᠡᠲᠡ ᠶᠠᠪᠤᠲᠠᠯ ᠤᠴᠢᠷ ᠊ᠢ ᠦᠯᠦ ᠮᠡᠲᠡᠨᠡ ᠃ ᠿᠦᠨ ᠲᠦ᠋ ᠶ᠋ᠢ ᠳᠠᠯᠠᠢ ᠶ᠋ᠢᠨ ᠡᠷᠬᠢ ᠳᠡᠭᠡᠷᠡ ᠪᠠᠶ᠋ᠢᠬᠤ ᠳ᠋ᠤ᠌ ᠲᠡᠲᠡ ᠴᠥᠮ ᠨᠠᠲᠠ ᠲᠠᠢ ᠠᠲᠠᠯᠢ ᠥᠨᠲᠥᠷ ᠬᠦᠷᠢᠶᠡᠨ ᠪ ᠪᠡᠨ ᠳᠡᠭᠡᠷᠡ ᠪᠠᠶ᠋ᠢᠬ᠋ᠠ ᠳᠥᠷᠪᠡᠯᠵᠢᠨ ᠲᠩᠷᠢ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠦᠵᠡᠭᠰᠡᠨ ᠦᠭᠡᠢ ᠤᠯᠤᠰ ᠶᠤᠮ ᠃
ᠬᠠᠷᠠᠮᠰᠠᠯᠲᠠᠢ ᠨᠢ ᠴᠠᠭᠠᠨ ᠰᠠᠷᠠ ᠥᠩᠭᠡᠷᠡᠵᠦ ᠿᠦᠨ ᠲᠦ᠋ ᠬᠠᠷᠢᠬᠤ ᠪᠣᠯᠤᠯᠠ ᠃ ᠪᠢ ᠰᠠᠨᠲᠤᠷᠴᠤ ᠶᠡᠬᠡ ᠪᠡᠷ ᠤᠬᠢᠯᠠᠪᠠ ᠃ ᠲᠡᠷᠡ ᠬᠦᠦ ᠴᠦ᠍ ᠭᠠᠯ ᠲᠣᠭᠣᠭᠠᠨ ᠪ ᠥᠷᠥᠭᠡᠨ ᠳ᠋ᠤ᠌ ᠰᠢᠷᠭᠤᠵᠤ · ᠤᠬᠢᠯᠠᠭᠠᠳ ᠶᠡᠷᠦ ᠭᠠᠷᠴᠤ ᠢᠷᠡᠬᠦ ᠦᠭᠡᠢ ᠪᠠᠶ᠋ᠢᠪᠠ ᠃ ᠭᠡᠰᠡᠨ ᠴᠦ᠍ ᠠᠪᠤ ᠨᠢ ᠠᠷᠬ᠋ᠠ ᠦᠭᠡᠢ ᠳᠠᠭᠠᠭᠤᠯᠤᠭᠠᠳ ᠶᠠᠪᠤᠴᠢᠬᠠᠪᠠ ᠃ ᠳᠠᠷᠠᠬ᠋ᠠ ᠨᠢ ᠲᠡᠷᠡ ᠪᠠᠰᠠ ᠠᠪᠤ ᠪᠠᠷ ᠶ᠋ᠢᠠᠨ ᠨᠢᠭᠡ ᠪᠣᠭᠣᠲᠠᠯ ᠡᠮᠡᠭᠡᠨ ᠬᠤᠮᠤᠰᠤ · ᠬᠡᠲᠦᠨ ᠰᠢᠷᠬᠡᠭ ᠭᠣᠶᠣ ᠰᠠᠶ᠋ᠢᠬᠠᠨ ᠰᠢᠪᠠᠭᠤᠨ ᠪ ᠥᠲᠥ ᠨᠠᠲᠠ ᠢᠯᠡᠭᠡᠵᠦ ᠪᠢᠯᠡ ᠃ ᠪᠢ ᠴᠦ᠍ ᠲᠡᠭᠦᠨ ᠳ᠋ᠤ᠌ ᠨᠢᠭᠡ ᠬᠣᠶᠠᠷ ᠤᠲᠠᠬ᠋ᠠ ᠶᠠᠭᠤᠮᠠ ᠢᠯᠡᠭᠡᠭᠰᠡᠨ ᠶᠤᠮ ᠃ ᠲᠡᠭᠦᠨ ᠡᠴᠡ ᠬᠣᠶ᠋ᠢᠰᠢ ᠣᠲᠣ ᠪᠣᠯᠲᠠᠯᠠ ᠳᠠᠬᠢᠵᠤ ᠤᠴᠠᠷᠠᠭᠠᠲᠤᠢ ᠃
ᠵᠡᠭᠦᠯᠲᠡ
※(1) ᠠᠭᠡ — ᠨᠣᠶᠠᠳ ᠪᠠᠶᠠᠳ ᠦ᠋ᠨ ᠬᠡᠦᠬᠡᠳ ᠊ᠢ ᠬᠠᠭᠤᠴᠢᠨ ᠳᠤ ᠠᠭᠡ ᠭᠡᠳᠡᠭ ᠃
※(2) ᠣᠩᠭᠣᠳ ᠦ᠋ᠨ ᠶᠡᠬᠡ ᠳᠠᠬᠢᠯᠬ᠋ᠠ — ᠡᠨᠡ ᠪᠣᠯ ᠨᠢᠭᠡ ᠵᠤᠶ᠋ᠢᠯ ᠦ᠋ᠨ ᠥᠪᠡᠳᠡᠭᠰᠢ ᠶᠡᠬᠡ ᠪᠠᠶᠠᠷ ᠶᠣᠰᠣᠯᠠᠯ ᠮᠥᠨ · ᠡᠨᠡ ᠶᠣᠰᠣᠯᠠᠯ ᠊ᠢ ᠭᠡᠷ ᠭᠡᠷ ᠡᠭᠡᠯᠵᠢᠯᠡᠨ ᠬᠢᠳᠡᠭ ᠲᠤᠯᠠ ᠡᠭᠡᠯᠵᠢ ᠲᠠᠭᠠᠷᠠᠭᠰᠠᠨ ᠭᠡᠵᠡᠢ ᠃
※(3) ᠴᠢᠤᠠᠬᠥᠷ ᠠᠶᠤᠭᠴᠢ — ᠲᠣᠣᠷᠠᠬᠢ ᠠᠷᠢᠶᠠᠪᠠᠯᠤ ᠶ᠋ᠢᠨ ᠮᠣᠲᠣᠷ ᠲᠠᠢ ᠨᠢᠭᠡ ᠯᠠ ᠠᠲᠠᠯᠢ ᠴᠥᠮ ᠨᠢᠭᠡ ᠵᠤᠶ᠋ᠢᠯ ᠦ᠋ᠨ ᠭᠢᠰᠤᠬ᠋ᠠ ᠶ᠋ᠢᠨ ᠨᠡᠷᠡ ᠪᠣᠯᠤᠨᠠ ᠃
ᠢᠷᠡᠯᠲᠡ ᠄
ᠲᠠᠪᠤᠨ ᠵᠢᠯ ᠦᠨ ᠲᠦᠷᠢᠮᠳᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳᠤ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠶᠢᠰᠦᠳᠦᠭᠡᠷ ᠲᠡᠪᠳᠡᠷ ※
ᠦᠪᠦᠷ ᠮᠤᠩᠭᠤᠯ ᠤᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠦᠨ ᠬᠡᠪᠯᠡᠯ ᠦᠨ ᠬᠤᠷᠢᠶᠠ ᠨᠠᠢᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠦᠪᠦᠷ ᠮᠤᠩᠭᠤᠯ ᠤᠨ ᠰᠢᠨᠬᠤᠸᠠ ᠨᠤᠮ ᠤᠨ ᠲᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠦᠪᠦᠷ ᠮᠤᠩᠭᠤᠯ ᠤᠨ ᠮᠤᠩᠭᠤᠯ ᠪᠢᠴᠢᠭ ᠬᠡᠪᠯᠠᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠤᠨ ᠤ 5 ᠰᠠᠷᠠ ᠳᠤ ᠬᠤᠶᠠᠳᠤᠭᠠᠷ ᠬᠡᠪ ᠢ ᠬᠢᠪᠡ
1984 ᠤᠨ ᠤ 4 ᠰᠠᠷᠠ ᠳᠤ ᠲᠦᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠬᠴᠢ ᠄ ᠦᠵᠢᠶᠡᠳ · ᠡᠷᠳᠡᠨᠢᠴᠡᠴᠡᠭ
ᠬᠢᠨᠠᠬᠴᠢ ᠄ ᠣᠤᠠᠬᠠᠨᠰᠣᠠ ᠂ ᠲᠣ᠋ · ᠨᠠᠨᠲᠢᠨ
2023.3.11