ᠱᠠᠭᠠᠵᠠᠩᠲᠤ ᠶ᠋ᠢᠨ ᠳᠠᠪᠠᠬ᠋ᠠ Шаазантын даваа
401ᠱᠠᠭᠠᠵᠠᠩᠲᠤ ᠶ᠋ᠢᠨ ᠳᠠᠪᠠᠬ᠋ᠠ
ᠡᠷᠲᠡ ᠤᠷᠢᠲᠤ ᠴᠠᠭ ᠲᠤ ᠭᠡᠨᠡ ᠃ ᠨᠢᠭᠡ ᠬᠥᠮᠦᠨ ᠬᠣᠲᠠ ᠠ᠋ᠴᠠ ᠬᠣᠶᠠᠷ ᠰᠠᠭᠰᠤ ᠱᠠᠭᠠᠵᠠᠩ ᠰᠠᠪᠠ ᠬᠤᠲᠠᠯᠲᠤᠨ ᠠᠪᠤᠭᠠᠳ ᠡᠯᠵᠢᠭᠡᠨ ᠳᠤ ᠠᠴᠢᠵᠤ ᠭᠡᠷ ᠲᠦ ᠪᠡᠨ ᠬᠠᠷᠢᠬᠤ ᠪᠠᠷ ᠶᠠᠪᠤᠭᠰᠠᠨ ᠭᠡᠨᠡ ᠃
ᠦᠲᠡ ᠶ᠋ᠢᠨ ᠦᠶᠡ ᠪᠡᠷ ᠨᠢᠭᠡᠨ ᠪᠠᠭᠤᠲᠠᠯ ᠳᠤ ᠬᠦᠷᠴᠦ ᠠᠮᠤᠰᠬᠢᠪᠡ ᠃ ᠬᠥᠮᠦᠰ ᠲᠡᠭᠦᠨ ᠳᠤ ᠄《 ᠠᠴᠢᠶᠠ ᠴᠢᠨᠢ ᠬᠠᠵᠠᠶ᠋ᠢᠴᠢᠬᠠᠵᠠᠢ ᠂ ᠵᠠᠰᠠᠭᠠᠷᠠᠢ ! 》 ᠭᠡᠵᠦ ᠰᠠᠨᠠᠭᠤᠯᠤᠭᠰᠠᠨ ᠳᠤ ᠲᠡᠷᠡ ᠄ 《 ᠪᠠᠶ᠋ᠢᠰᠬᠢᠭᠡᠳ ᠮᠡᠲᠡᠶᠡ ᠂ ᠣᠲᠣ ᠬᠣᠷᠢᠨ ᠬᠡᠲᠦᠬᠡᠨ ᠭᠠᠵᠠᠷ ᠪᠠᠶ᠋ᠢᠨᠠ ᠂ ᠭᠡᠮ ᠦᠭᠡᠢ 》 ᠭᠡᠳ ᠡᠯᠵᠢᠭᠡ ᠪᠡᠨ ᠬᠥᠲᠥᠯᠵᠦ ᠠᠵᠢᠬ ᠴᠦ᠍ ᠦᠭᠡᠢ ᠴᠢᠨᠠᠭᠰᠢ ᠶᠠᠪᠤᠯᠠ ᠃
ᠠᠷᠪᠠᠨ ᠬᠡᠲᠦᠨ ᠭᠠᠵᠠᠷ ᠶᠠᠪᠤᠭᠠᠳ ᠨᠢᠭᠡᠨ ᠬᠥᠮᠦᠨ ᠲᠡᠢ ᠤᠴᠠᠷᠠᠪᠠ ᠃ ᠡᠨᠡ ᠬᠥᠮᠦᠨ ᠮᠥᠨ ᠄ 《 ᠠᠴᠢᠶᠠ ᠴᠢᠨᠢ ᠬᠠᠵᠠᠶ᠋ᠢᠴᠢᠬᠠᠵᠠᠢ ᠂ ᠵᠠᠰᠠᠭᠠᠷᠠᠢ ! 》 ᠭᠡᠰᠡᠨ ᠳᠤ ᠲᠡᠷᠡ ᠪᠠᠰᠠ ᠄《 ᠪᠠᠶ᠋ᠢᠰᠬᠢᠭᠡᠳ ᠮᠡᠲᠡᠶᠡ ᠂ ᠣᠲᠣ ᠠᠷᠪᠠᠭᠤᠬᠠᠨ ᠭᠠᠵᠠᠷ ᠪᠠᠶ᠋ᠢᠨᠠ ᠂ ᠭᠡᠮ ᠦᠭᠡᠢ 》 ᠭᠡᠵᠦ ᠬᠡᠯᠡᠭᠡᠳ ᠣᠶ᠋ᠢᠰᠢᠶᠠᠭᠰᠠᠨ ᠴᠦ᠍ ᠦᠭᠡᠢ ᠶᠠᠪᠤᠵᠠᠢ ᠃
ᠲᠡᠭᠡᠭᠡᠳ ᠳᠡᠮᠡᠢ ᠬᠡᠲᠦᠨ ᠭᠠᠵᠠᠷ ᠶᠠᠪᠤᠭᠰᠠᠨ ᠦᠭᠡᠢ ᠠᠴᠢᠶᠠ ᠨᠢ ᠤᠯᠠᠮ ᠬᠠᠵᠠᠶ᠋ᠢᠯᠠ ᠃ ᠨᠢᠭᠡᠨ ᠡᠪᠦᠭᠡᠨ ᠦᠵᠡᠭᠡᠳ ᠄ 《 ᠠᠶᠠᠨᠴᠢᠨ ᠭᠤᠸᠠᠢ ᠂ ᠠᠴᠢᠶᠠ ᠪᠠᠨ ᠬᠤᠷᠲᠤᠨ ᠵᠠᠰᠠᠭᠠᠷᠠᠢ ! 》 ᠭᠡᠰᠡᠨ ᠳᠤ ᠲᠡᠷᠡ ᠪᠠᠰᠠ ᠯᠠ ᠄ 《 ᠪᠠᠶ᠋ᠢᠰᠬᠢᠭᠡᠳ ᠮᠡᠲᠡᠶᠡ ᠂ ᠣᠲᠣ ᠬᠡᠲᠦᠬᠡᠨ ᠭᠠᠵᠠᠷ ᠪᠠᠶ᠋ᠢᠨᠠ ᠂ ᠭᠡᠮ ᠦᠭᠡᠢ 》 ᠭᠡᠳ ᠬᠠᠶ᠋ᠢᠬᠤᠷᠤᠭᠰᠠᠨ ᠴᠦ᠍ ᠦᠭᠡᠢ ᠶᠠᠪᠤᠭᠰᠠᠭᠠᠷ ᠪᠠᠶ᠋ᠢᠪᠠ ᠃
ᠤᠲᠠᠯ ᠦᠭᠡᠢ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠦᠷᠦᠭᠰᠡᠨ ᠳᠤ ᠭᠦᠢᠯᠡᠰᠦ ᠲᠡᠭᠦᠵᠦ ᠪᠠᠶ᠋ᠢᠬᠰᠠᠨ ᠡᠮᠡᠭᠲᠡᠢᠴᠦᠳ ᠲᠡᠭᠦᠨ ᠊ᠢ ᠦᠵᠡᠮᠡᠭᠴᠡ ᠢᠨᠢᠶᠡᠯᠲᠦᠵᠡᠭᠡᠪᠡ ᠃ ᠲᠡᠭᠡᠭᠡᠳ ᠨᠢᠭᠡᠨ ᠡᠮᠡᠭᠲᠡᠢ ᠄ 《 ᠠᠶᠠᠨᠴᠢ ᠠᠪᠤᠭᠠᠢ ! ᠠᠴᠢᠶᠠ ᠪᠠᠨ ᠬᠠᠷᠠᠭᠠᠴᠢ ! 》 ᠭᠡᠵᠦ ᠬᠠᠰᠬᠢᠷᠪᠠ ᠃ ᠲᠡᠷᠡ ᠬᠥᠮᠦᠨ ᠮᠥᠨ ᠯᠡ ᠤᠭ ᠶᠣᠰᠣ ᠪᠠᠷ ᠶ᠋ᠢᠠᠨ ᠄ 《 ᠭᠡᠮ ᠦᠭᠡᠢ ᠂ ᠪᠠᠶ᠋ᠢᠰᠬᠢᠭᠡᠳ ᠮᠡᠲᠡᠶᠡ 》 ᠭᠡᠵᠦ ᠬᠡᠯᠡᠲᠡᠯᠡ ᠠᠴᠢᠶᠠ ᠨᠢ ᠶᠠᠭᠠᠬᠢᠬᠤ ᠶ᠋ᠢᠨ ᠴᠦ᠍ ᠵᠠᠪ ᠦᠭᠡᠢ ᠬᠥᠯᠪᠡᠷᠢᠭᠡᠳ① ᠤᠨᠠᠵᠠᠢ ᠃
ᠱᠠᠭᠠᠵᠠᠩ ᠰᠠᠪᠠ ᠫᠢᠩᠭᠠᠷ ᠫᠠᠩᠭᠠᠷ ᠳᠤᠤᠭᠠᠷᠴᠤ ᠬᠡᠮᠬᠡᠳᠡᠭ ᠪᠣᠯᠤᠯᠠ ᠃ ᠠᠶᠠᠨᠴᠢᠨ ᠠᠪᠤᠭᠠᠢ ᠦᠭᠡ ᠳᠠᠭᠤᠨ ᠦᠭᠡᠢ ᠮᠡᠯᠡᠷᠡᠨ ᠵᠣᠭᠰᠣᠨᠠ ᠃
ᠲᠡᠭᠡᠭᠡᠳ ᠬᠡᠮᠬᠡᠷᠬᠡᠢ ᠱᠠᠭᠠᠵᠠᠩ ᠶ᠋ᠢᠠᠨ ᠲᠡᠷᠡ ᠳᠠᠪᠠᠭᠠᠨ ᠳᠡᠭᠡᠷᠡ ᠣᠷᠬᠢᠬᠰᠠᠨ ᠲᠤᠯᠠ ᠲᠡᠷᠡ ᠳᠠᠪᠠᠬ᠋ᠠ ᠶ᠋ᠢ 《 ᠱᠠᠭᠠᠵᠠᠩᠲᠤ ᠶ᠋ᠢᠨ ᠳᠠᠪᠠᠬ᠋ᠠ 》 ᠭᠡᠵᠦ ᠨᠡᠷᠡᠯᠡᠬᠦ ᠪᠣᠯᠤᠭᠰᠠᠨ ᠭᠡᠨᠡ ᠃
① ᠬᠥᠯᠪᠡᠷᠢᠬᠦ — ᠬᠠᠵᠠᠶ᠋ᠢᠨ ᠬᠡᠯᠪᠡᠷᠢᠬᠦ ᠂ ᠭᠤᠯᠭᠤᠷᠢᠨ ᠤᠨᠠᠬᠤ
ᠬᠣᠶᠠᠲᠤᠭᠠᠷ ᠣᠨ ᠪ ᠳᠣᠣᠷᠠᠳᠤ ᠬᠤᠭᠤᠴᠠᠭᠠᠨ ᠪ ᠤᠩᠰᠢᠬᠤ ᠪᠢᠴᠢᠭ ᠡᠴᠡ ᠬᠠᠭᠤᠯᠪᠠ ᠃
ᠬᠠᠭᠤᠯᠤᠭᠰᠠᠨ ᠨᠢ ᠄ ᠮᠢᠩᠭᠠᠳ · ᠴᠢᠮᠡᠭ
ᠬᠢᠨᠠᠭᠰᠠᠨ ᠨᠢ ᠄ ᠳ᠋ᠦ᠋ᠩ ᠹᠸᠩ