ᠭᠣᠷᠺᠢ ᠶ᠋ᠢᠨ ᠰᠤᠷᠤᠯᠴᠠᠬᠤ ᠣᠪᠣᠷ（ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ）Горкины суралцах овор（ Хэл бичиг – Есдүгээр дэвтэр）
842ᠭᠣᠷᠺᠢ ᠶ᠋ᠢᠨ ᠰᠤᠷᠤᠯᠴᠠᠬᠤ ᠣᠪᠣᠷ
ᠣᠷᠣᠰ ᠤ᠋ᠨ ᠦᠭᠡᠭᠦᠦ ᠠᠨᠭᠭᠢ ᠶ᠋ᠢᠨ ᠠᠭᠤᠤ ᠶᠡᠬᠡ ᠵᠣᠬᠢᠶᠠᠯᠴᠢ ᠭᠣᠷᠺᠢ ᠂ ᠣᠯᠠᠨ ᠲᠦᠮᠡᠨ ᠦ᠌ ᠳᠤᠷᠠ ᠪᠠᠬᠠ ᠶ᠋ᠢ ᠲᠠᠲᠠᠭᠰᠠᠨ 《 ᠡᠬᠡ 》 ᠂ 《 ᠰᠠᠯᠬᠢᠴᠢ ᠰᠢᠪᠠᠭᠤ 》 ᠮᠡᠲᠦ ᠶ᠋ᠢᠨ ᠮᠠᠰᠢ ᠣᠯᠠᠨ ᠰᠢᠯᠢᠳᠡᠭ ᠵᠣᠬᠢᠶᠠᠯ ᠦ᠋ᠳ ᠊ᠢ ᠪᠦᠲᠦᠭᠡᠪᠡ ᠃ ᠲᠡᠷᠡ ᠶᠠᠭᠠᠬᠢᠭᠠᠳ ᠡᠶ᠋ᠢᠮᠦ ᠶᠡᠬᠡ ᠡᠷᠳᠡᠮ ᠴᠢᠳᠠᠪᠤᠷᠢ ᠲᠠᠢ ᠪᠣᠯᠤᠭᠰᠠᠨ ᠪᠣᠢ ? ᠭᠣᠷᠺᠢ ᠶᠡᠬᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠡᠭᠦᠳᠡ ᠶ᠋ᠢ ᠠᠯᠬᠤᠬᠤ ᠪᠠᠶ᠋ᠢᠲᠤᠭᠠᠢ ᠳᠤᠮᠳᠠᠳᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠴᠤ᠌ ᠣᠷᠣᠭᠰᠠᠨ ᠦᠭᠡᠢ ᠂ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠣᠶᠠᠷᠬᠠᠨ ᠵᠢᠯ ᠰᠤᠷᠤᠯᠴᠠᠭᠰᠠᠨ ᠶᠤᠮ ᠃ ᠲᠡᠭᠦᠨ ᠦ᠌ ᠡᠷᠳᠡᠮ ᠴᠢᠳᠠᠪᠤᠷᠢ ᠪᠣᠯ ᠪᠦᠷ ᠥᠪᠡᠷᠲᠡᠭᠡᠨ ᠰᠢᠷᠭᠠᠭᠤ ᠰᠤᠷᠤᠯᠴᠠᠭᠰᠠᠨ ᠠ᠋ᠴᠠ ᠢᠷᠡᠭᠰᠡᠨ ᠶᠤᠮ ᠃
ᠭᠣᠷᠺᠢ ᠨᠢᠭᠡᠨ ᠮᠣᠳᠣᠨ ᠳᠠᠷᠬᠠᠨ ᠤ᠋ ᠭᠡᠷ ᠲᠦ᠍ ᠲᠥᠷᠥᠭᠰᠡᠨ ᠪᠥᠭᠡᠳ ᠬᠠᠷᠠᠬᠠᠨ ᠪᠠᠭᠠ ᠠ᠋ᠴᠠ ᠪᠠᠨ ᠠᠪᠤ ᠡᠵᠢ ᠪᠡᠨ ᠠᠯᠳᠠᠵᠤ ᠂ ᠬᠥᠮᠦᠨ ᠦ᠌ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠡᠨᠦᠭᠦᠴᠢᠯᠡᠵᠦ ᠶᠠᠪᠤᠵᠠᠢ ᠃ ᠲᠡᠷᠡ ᠭᠡᠭᠡᠭᠳᠡᠮᠡᠯ ᠣᠷᠬᠢᠭᠳᠠᠮᠠᠯ ᠮᠤᠤᠰᠠᠶ᠋ᠢᠨ ᠶᠠᠭᠤᠮᠠ ᠲᠡᠭᠦᠵᠦ ᠂ ᠪᠤᠰᠤᠳ ᠤ᠋ᠨ ᠱᠠᠪᠢ ᠪᠣᠯᠵᠤ ᠂ ᠪᠠᠶᠠᠴᠤᠳ ᠲᠤ᠌ ᠦᠨᠡ ᠬᠦᠴᠦ ᠦᠭᠡᠢ ᠬᠠᠷᠠ ᠠᠵᠢᠯ ᠬᠢᠵᠦ ᠬᠦᠨᠳᠦ ᠬᠡᠴᠡᠭᠦᠦ ᠳᠠᠷᠤᠯᠠᠯ ᠳᠣᠷᠣᠮᠵᠢᠯᠠᠯ ᠊ᠢ ᠭᠦᠢᠴᠡᠳ ᠠᠮᠰᠠᠪᠠ ᠃ ᠭᠡᠲᠡᠯᠡ ᠭᠣᠷᠺᠢ ᠠᠮᠢᠳᠤᠷᠠᠯ ᠤ᠋ᠨ ᠪᠡᠷᠬᠡ ᠵᠣᠪᠠᠯᠠᠩ ᠠ᠋ᠴᠠ ᠪᠣᠯᠵᠤ ᠵᠣᠷᠢᠭ ᠮᠣᠬᠣᠭᠰᠠᠨ ᠦᠭᠡᠢ ᠂ ᠬᠠᠷᠭᠢᠰ ᠬᠠᠷᠠᠩᠭᠤᠢ ᠨᠡᠶ᠋ᠢᠭᠡᠮ ᠳ᠋ᠦ᠍ ᠡᠪᠦᠳᠦᠭ ᠨᠤᠭᠤᠷᠠᠭᠰᠠᠨ ᠦᠭᠡᠢ ᠂ ᠬᠠᠷᠢᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠯᠠᠰᠢᠷᠠᠯ ᠦᠭᠡᠢ ᠰᠢᠷᠭᠠᠭᠤ ᠰᠤᠷᠤᠯᠴᠠᠵᠤ ᠪᠠᠶ᠋ᠢᠬᠰᠠᠨ ᠶᠤᠮ ᠃
ᠭᠣᠷᠺᠢ ᠠᠷᠪᠠᠨ ᠬᠣᠶᠠᠷ ᠂ ᠭᠤᠷᠪᠠ ᠲᠠᠢ ᠳ᠋ᠠᠭᠠᠨ ᠤᠨᠭᠭᠤᠴᠠᠨ ᠳᠡᠭᠡᠷᠡ ᠠᠶᠠᠭᠠ ᠰᠢᠨᠠᠭᠠ ᠤᠬᠢᠶᠠᠬᠤ ᠠᠵᠢᠯ ᠬᠢᠵᠦ ᠪᠠᠶ᠋ᠢᠪᠠ ᠃ ᠤᠨᠭᠭᠤᠴᠠᠨ ᠳᠡᠭᠡᠷᠡᠬᠢ ᠲᠣᠭᠣᠭᠠᠴᠢ ᠨᠢ ᠬᠠᠷᠢᠨ ᠨᠣᠮ ᠤᠨᠭᠰᠢᠬᠤ ᠳᠤᠷᠠᠲᠠᠢ ᠬᠥᠮᠦᠨ ᠪᠠᠶ᠋ᠢᠬᠰᠠᠠ ᠪᠥᠭᠡᠳ ᠨᠢᠭᠡ ᠠᠪᠳᠠᠷᠠ ᠨᠣᠮ ᠲᠠᠢ ᠪᠠᠶ᠋ᠢᠯᠠ ᠃ ᠴᠢᠯᠥᠭᠡ ᠵᠠᠪ ᠭᠠᠷᠤᠮᠠᠭᠴᠠ ᠭᠣᠷᠺᠢ ᠶ᠋ᠢ ᠬᠠᠵᠠᠭᠤ ᠳ᠋ᠠᠭᠠᠨ ᠰᠠᠭᠤᠯᠭᠠᠵᠤ ᠨᠣᠮ ᠤᠨᠭᠰᠢᠭᠤᠯᠤᠨ ᠰᠣᠨᠣᠰᠳᠠᠭ ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠭᠣᠷᠺᠢ ᠨᠣᠮ ᠤᠨᠭᠰᠢᠬᠤ ᠪᠠᠬᠠ ᠦᠭᠡᠢ ᠪᠠᠶ᠋ᠢᠵᠠᠢ ᠃ ᠨᠢᠭᠡ ᠤᠳᠠᠭᠠ ᠲᠡᠷᠡ ᠂ ᠲᠣᠭᠣᠭᠠᠴᠢ ᠳ᠋ᠤ᠌ ᠨᠣᠮ ᠤᠨᠭᠰᠢᠵᠤ ᠥᠭᠴᠦ ᠪᠠᠶ᠋ᠢᠭᠠᠤᠠ ᠤᠰᠤᠴᠢᠨ ᠂ ᠤᠨᠭᠭᠤᠴᠠᠴᠢᠨ ᠪᠣᠯᠤᠨ ᠠᠶᠠᠨᠴᠢᠳ ᠤ᠋ᠨ ᠤᠨᠭᠭᠤᠴᠠᠨ ᠳᠡᠭᠡᠷᠡ ᠫᠠᠢ ᠨᠠᠭᠠᠳᠴᠤ ᠂ ᠦᠯᠢᠭᠡᠷ ᠶᠠᠷᠢᠵᠤ ᠂ ᠳᠠᠭᠤᠤ ᠳᠠᠭᠤᠯᠠᠵᠤ ᠪᠠᠶ᠋ᠢᠬᠤ ᠶ᠋ᠢ ᠦᠵᠡᠭᠡᠳ ᠪᠠᠬᠠᠷᠬᠠᠨ ᠂ ᠤᠨᠭᠰᠢᠵᠤ ᠪᠠᠶ᠋ᠢᠬᠰᠠᠠ ᠨᠣᠮ ᠢ᠋ᠶ᠋ᠠᠨ ᠬᠠᠶᠠᠭᠠᠳ ᠶᠠᠪᠤᠴᠢᠬᠠᠬᠤ ᠵᠠᠪᠳᠤᠵᠠᠢ ᠃ ᠲᠣᠭᠣᠭᠠᠴᠢ ᠲᠡᠭᠦᠨ ᠦ᠌ ᠰᠠᠨᠠᠭᠠ ᠶ᠋ᠢ ᠮᠡᠳᠡᠭᠡᠳ ᠄ 《 ᠬᠥᠮᠦᠨ ᠰᠡᠴᠡᠨ ᠮᠤᠨᠭᠬᠠᠭ ᠭᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠢᠯᠭᠠᠭᠠ ᠲᠠᠢ ᠶᠤᠮ ᠂ ᠵᠠᠷᠢᠮ ᠬᠥᠮᠦᠨ ᠨᠡᠯᠢᠶᠡᠳ ᠰᠡᠴᠡᠨ ᠂ ᠵᠠᠷᠢᠮ ᠨᠢ ᠰᠡᠴᠡᠨ ᠪᠢᠰᠢ ᠂ ᠵᠠᠷᠢᠮ ᠨᠢ ᠱᠠᠯ ᠲᠡᠨᠡᠭ ᠪᠠᠶ᠋ᠢᠲᠠᠭ ᠃ ᠰᠡᠴᠡᠨ ᠰᠡᠷᠭᠦᠯᠡᠩ ᠪᠣᠯᠤᠶᠠ ᠭᠡᠪᠡᠯ ᠨᠣᠮ ᠢᠯᠡᠭᠦᠦ ᠦᠵᠡᠬᠦ ᠬᠡᠷᠡᠭᠲᠡᠢ ᠰᠢᠦ 》 ᠭᠡᠵᠦ ᠬᠡᠯᠡᠪᠡ ᠃ ᠭᠣᠷᠺᠢ ᠡᠨᠡ 《 ᠪᠠᠭᠰᠢ 》 ᠶ᠋ᠢᠨ ᠢ᠋ᠶ᠋ᠡᠨ ᠴᠢᠩᠭᠠ ᠪᠥᠭᠡᠳ ᠬᠠᠯᠠᠭᠤᠨ ᠳᠣᠲᠣᠨᠣ ᠰᠤᠷᠭᠠᠯ ᠊ᠢ ᠰᠣᠨᠣᠰᠤᠭᠰᠠᠨ ᠠ᠋ᠴᠠ ᠬᠣᠶ᠋ᠢᠰᠢ ᠤᠰᠤᠴᠢᠨ ᠂ ᠤᠨᠭᠭᠤᠴᠠᠴᠢᠨ ᠂ ᠠᠶᠠᠨᠴᠢᠳ ᠲᠠᠢ ᠨᠠᠭᠠᠳᠴᠤ ᠪᠠᠨ ᠪᠣᠯᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ ᠂ ᠡᠨᠳᠡ ᠲᠡᠨᠳᠡ ᠭᠦᠶᠦᠵᠦ ᠨᠠᠭᠠᠳᠴᠤ ᠪᠠᠨ ᠴᠤ᠌ ᠪᠣᠯᠢᠪᠠ ᠃ ᠲᠡᠷᠡ ᠡᠳᠦᠷ ᠪᠦᠷᠢ ᠥᠷᠯᠥᠭᠡᠨ ᠡᠴᠡ ᠣᠷᠣᠢ ᠪᠣᠯᠲᠠᠯᠠ ᠠᠵᠢᠯᠯᠠᠭᠠᠳ ᠦᠬᠦᠨ ᠶᠠᠳᠠᠷᠠᠭᠰᠠᠨ ᠪᠠᠶ᠋ᠢᠲᠠᠯᠠ ᠴᠢᠯᠥᠭᠡ ᠵᠠᠪ ᠣᠯᠤᠮᠠᠭᠴᠠ ᠲᠣᠭᠣᠭᠠᠴᠢ ᠲᠠᠢ ᠪᠠᠨ ᠴᠣᠭ ᠨᠣᠮ ᠤᠩᠰᠢᠭᠰᠠᠭᠠᠷ ᠪᠠᠶ᠋ᠢᠭᠠᠤᠠ ᠂ ᠨᠣᠮ ᠤᠩᠰᠢᠬᠤ ᠰᠠᠢᠨ ᠳᠠᠳᠬᠠᠯ ᠲᠠᠢ ᠪᠣᠯᠵᠠᠢ ᠃
ᠬᠣᠵᠢᠮ ᠨᠢ ᠂ ᠭᠣᠷᠺᠢ ᠨᠢᠭᠡ ᠵᠢᠵᠢᠭ ᠫᠦᠰᠡᠨ ᠳ᠋ᠦ᠍ ᠠᠵᠢᠯᠯᠠᠬᠤ ᠪᠣᠯᠪᠠ ᠃ ᠲᠡᠷᠡ ᠡᠳᠦᠷ ᠪᠦᠷᠢ ᠲᠦᠯᠡᠰᠢ ᠮᠣᠳᠣ ᠪᠠᠵᠠᠭᠠᠬᠤ ᠂ ᠭᠠᠵᠠᠷ ᠱᠦᠭᠦᠷᠳᠡᠬᠦ ᠂ ᠬᠤᠪᠴᠠᠰᠤ ᠤᠬᠢᠶᠠᠬᠤ ᠵᠡᠷᠭᠡ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠠᠵᠢᠯ ᠬᠢᠵᠦ ᠲᠤᠶ᠋ᠢᠯ ᠢ᠋ᠶ᠋ᠠᠷ ᠵᠦᠳᠡᠷᠡᠵᠦ ᠪᠠᠶ᠋ᠢᠯᠠ ᠃ ᠨᠢᠭᠡᠨᠲᠡ ᠨᠣᠮ ᠤᠩᠰᠢᠬᠤ ᠰᠠᠢᠨ ᠳᠠᠳᠬᠠᠯ ᠲᠠᠢ ᠪᠣᠯᠤᠭᠰᠠᠨ ᠪᠣᠯᠬᠣᠷ ᠪᠠᠭᠠ ᠯᠠ ᠴᠢᠯᠥᠭᠡ ᠲᠡᠢ ᠪᠣᠯ ᠨᠣᠮ ᠤᠩᠰᠢᠵᠤ ᠪᠠᠶ᠋ᠢᠪᠠ ᠃ ᠨᠢᠭᠡ ᠣᠷᠣᠢ ᠂ ᠫᠦᠰᠡᠨ ᠦ᠌ ᠡᠵᠡᠨ ᠱᠠᠰᠢᠨ ᠤ᠋ ᠲᠢᠩᠬᠢᠮ ᠳ᠋ᠦ᠍ ᠮᠥᠷᠭᠥᠯ ᠬᠢᠬᠦ ᠪᠡᠷ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠶᠠᠪᠤᠭᠰᠠᠨ ᠪᠣᠯᠬᠣᠷ ᠭᠣᠷᠺᠢ ᠭᠠᠭᠴᠠᠭᠠᠷ ᠭᠠᠯ ᠲᠣᠭᠣᠭᠠᠨ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠨᠣᠮ ᠤᠩᠰᠢᠪᠠ ᠃ ᠲᠡᠷᠡ ᠤᠩᠰᠢᠭᠰᠠᠭᠠᠷ ᠪᠠᠶ᠋ᠢᠭᠠᠤᠠ ᠠᠮᠲᠠᠨ ᠳ᠋ᠤᠨᠢ ᠣᠷᠣᠭᠠᠳ ᠶᠠᠭ ᠥᠭᠡᠷᠡ ᠨᠢᠭᠡ ᠶᠢᠷᠲᠢᠨᠴᠦ ᠳ᠋ᠦ᠍ ᠣᠴᠢᠴᠢᠬᠠᠭᠰᠠᠨ ᠶᠤᠮ ᠰᠢᠭ᠋ ᠪᠣᠯᠵᠤ ᠂ ᠣᠷᠴᠢᠨ ᠲᠣᠭᠣᠷᠢᠨ ᠤ᠋ ᠪᠠᠨ ᠠᠯᠢᠪᠠ ᠶ᠋ᠢ ᠴᠥᠮ ᠮᠠᠷᠲᠠᠴᠢᠬᠠᠪᠠ ᠃ ᠭᠡᠷ ᠦ᠋ᠨ ᠡᠵᠡᠨ ᠨᠢ ᠪᠤᠴᠠᠵᠤ ᠢᠷᠡᠭᠡᠳ ᠡᠭᠦᠳᠡᠨ ᠦ᠌ ᠬᠣᠩᠬᠣ ᠪᠠᠨ ᠳᠤᠤᠭᠠᠷᠭᠠᠬᠤ ᠳ᠋ᠤ᠌ ᠬᠣᠩᠬᠣ ᠶ᠋ᠢ ᠬᠡᠨ ᠳᠤᠤᠭᠠᠷᠭᠠᠵᠤ ᠪᠠᠶ᠋ᠢᠬᠤ ᠂ ᠶᠠᠭᠤᠨ ᠳ᠋ᠤ᠌ ᠳᠤᠤᠭᠠᠷᠭᠠᠵᠤ ᠪᠠᠶ᠋ᠢᠬᠤ ᠶ᠋ᠢ ᠭᠣᠷᠺᠢ ᠲᠡᠷᠡ ᠳᠣᠣᠷᠠ ᠪᠠᠨ ᠰᠡᠷᠡᠵᠦ ᠮᠡᠳᠡᠭᠰᠡᠨ ᠦᠭᠡᠢ ᠪᠣᠯᠬᠣᠷ ᠡᠭᠦᠳᠡ ᠪᠡᠨ ᠳᠠᠷᠤᠢ ᠨᠡᠭᠡᠭᠡᠵᠦ ᠥᠭᠭᠦᠭᠰᠡᠨ ᠦᠭᠡᠢ ᠪᠢᠯᠡ ᠃ ᠭᠡᠷ ᠦ᠋ᠨ ᠡᠵᠡᠨ ᠨᠢ ᠣᠷᠣᠵᠤ ᠢᠷᠡᠭᠡᠳ ᠲᠡᠭᠦᠨ ᠦ᠌ ᠪᠦᠬᠦᠯᠢ ᠯᠡ ᠶ᠋ᠢ ᠰᠢᠲᠠᠭᠠᠭᠠᠳ ᠪᠠᠷᠠᠴᠢᠬᠠᠬᠤ ᠰᠢᠬᠠᠭᠰᠠᠨ ᠊ᠢ ᠦᠵᠡᠭᠡᠳ ᠴᠡᠭᠡᠵᠢ ᠪᠡᠨ ᠳᠡᠯᠪᠡᠷᠡᠲᠡᠯᠡ ᠠᠭᠤᠷᠯᠠᠵᠤ ᠭᠣᠷᠺᠢ ᠶ᠋ᠢ ᠨᠢᠳᠦ ᠨᠢᠭᠤᠷ ᠦᠭᠡᠢ ᠬᠠᠷᠢᠶᠠᠭᠠᠳ ᠄ 《 ᠡᠭᠦᠨ ᠡᠴᠡ ᠬᠣᠶ᠋ᠢᠰᠢ ᠨᠣᠮ ᠦᠵᠡᠵᠦ ᠪᠣᠯᠬᠤ ᠦᠭᠡᠢ 》 ᠭᠡᠵᠦ ᠵᠠᠩᠳᠤᠷᠪᠠ ᠃ ᠡᠶ᠋ᠢᠮᠦ ᠪᠠᠶ᠋ᠢᠲᠠᠯ ᠳᠣᠣᠷᠠ ᠭᠣᠷᠺᠢ ᠠᠷᠭᠠ ᠪᠤᠰᠤ ᠳᠠᠯᠳᠠᠭᠤᠷ ᠨᠣᠮ ᠦᠵᠡᠬᠦ ᠪᠣᠯᠵᠠᠢ ᠃
ᠡᠨᠡ ᠬᠠᠷᠭᠢᠰ ᠬᠡᠷᠴᠡᠭᠡᠢ ᠂ ᠲᠡᠨᠡᠭ ᠮᠤᠩᠬᠠᠭ ᠭᠡᠷ ᠦ᠋ᠨ ᠡᠵᠡᠨ ᠡᠮᠡᠭᠲᠡᠢ ᠂ ᠭᠣᠷᠺᠢ ᠶ᠋ᠢᠨ ᠰᠥᠨᠢ ᠨᠣᠮ ᠦᠵᠡᠬᠦ ᠶ᠋ᠢ ᠬᠣᠷᠢᠭᠯᠠᠬᠤ ᠶ᠋ᠢᠨ ᠲᠥᠯᠥᠭᠡ ᠤᠨᠲᠠᠬᠤ ᠠ᠋ᠴᠠ ᠡᠮᠦᠨᠡ ᠨᠢᠭᠡ ᠵᠢᠭᠠᠬᠠᠨ ᠮᠣᠳᠣ ᠪᠠᠷ ᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠥᠨᠳᠥᠷ ᠪᠣᠭᠣᠨᠢ ᠶ᠋ᠢ ᠬᠡᠮᠵᠢᠭᠡᠳ ᠲᠡᠷᠡ ᠮᠣᠳᠣ ᠪᠠᠨ ᠨᠢᠭᠤᠭᠠᠳ ᠲᠠᠯᠪᠢᠴᠢᠬᠠᠳᠠᠭ ᠃ ᠳᠠᠷᠠᠭᠠ ᠡᠳᠦᠷ ᠨᠢ ᠲᠡᠷᠡ ᠮᠣᠳᠣ ᠪᠠᠷ ᠢ᠋ᠶ᠋ᠠᠨ ᠬᠡᠮᠵᠢᠭᠡᠳ ᠂ ᠯᠡ ᠨᠢ ᠬᠡᠷᠪᠡ ᠪᠣᠭᠣᠨᠢ ᠪᠣᠯᠴᠢᠬᠠᠭᠰᠠᠨ ᠪᠠᠶ᠋ᠢᠪᠠᠯ ᠭᠣᠷᠺᠢ ᠶ᠋ᠢ ᠬᠠᠷᠢᠶᠠᠵᠤ ᠵᠣᠳᠣᠳᠠᠭ ᠂ ᠰᠡᠭᠦᠯ ᠳ᠋ᠡᠭᠡᠨ ᠯᠡ ᠪᠡᠨ ᠠᠪᠤᠭᠠᠳ ᠶᠠᠪᠤᠴᠢᠬᠠᠬᠤ ᠪᠣᠯᠵᠠᠢ ᠃ ᠭᠣᠷᠺᠢ ᠳ᠋ᠤ᠌ ᠯᠠ ᠠᠪᠬᠤ ᠵᠣᠭᠣᠰ ᠦᠭᠡᠢ ᠪᠣᠯᠬᠣᠷ ᠲᠡᠷᠡ ᠠᠷᠭᠠ ᠪᠣᠳᠣᠵᠤ ᠨᠢᠭᠡ ᠪᠢᠴᠢᠬᠠᠨ ᠳ᠋ᠧᠩ ᠬᠢᠵᠡᠢ ᠃ ᠲᠡᠷᠡ ᠬᠠᠶ᠋ᠢᠯᠵᠤ ᠴᠠᠷᠴᠠᠭᠰᠠᠨ ᠯᠠ ᠶ᠋ᠢᠨ ᠲᠣᠰᠣ ᠶ᠋ᠢ ᠪᠠᠭᠠ ᠪᠠᠭᠠ ᠪᠠᠷ ᠴᠤᠭᠯᠠᠭᠤᠯᠤᠨ ᠭᠤᠸᠨᠨᠲ᠋ᠧᠦ ᠶ᠋ᠢᠨ ᠬᠠᠶ᠋ᠢᠷᠴᠠᠭ ᠳᠣᠲᠣᠷᠠ ᠬᠢᠵᠦ ᠂ ᠳᠡᠭᠡᠷᠡ ᠨᠢ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠪᠡᠨ ᠲᠠᠬᠢᠯ ᠤ᠋ᠨ ᠲᠣᠰᠣᠨ ᠠ᠋ᠴᠠ ᠪᠠᠭᠠ ᠰᠠᠭᠠ ᠳᠤᠰᠤᠯᠭᠠᠭᠠᠳ ᠂ ᠤᠲᠠᠰᠤ ᠪᠠᠷ ᠳ᠋ᠧᠩ ᠦ᠋ᠨ ᠭᠣᠣᠯ ᠬᠢᠪᠡ ᠃ ᠭᠡᠷ ᠦ᠋ᠨ ᠡᠵᠡᠨ ᠨᠢ ᠶᠢᠰᠦᠨ ᠰᠦᠪᠡ ᠪᠡᠨ ᠳᠡᠯᠪᠡᠷᠡᠲᠡᠯᠡ ᠢᠳᠡᠵᠦ ᠤᠤᠭᠤᠭᠠᠳ ᠭᠠᠬᠠᠢ ᠰᠢᠭ᠋ ᠤᠨᠲᠠᠭᠰᠠᠨ ᠤ᠋ ᠳᠠᠷᠠᠭᠠ ᠂ ᠭᠣᠷᠺᠢ ᠥᠨᠥᠬᠢ ᠪᠢᠴᠢᠬᠠᠨ ᠳ᠋ᠧᠩ ᠢ᠋ᠶ᠋ᠡᠨ ᠠᠰᠠᠭᠠᠵᠤ ᠵᠤᠤᠬᠠᠨ ᠤ᠋ ᠬᠠᠵᠠᠭᠤ ᠳ᠋ᠤ᠌ ᠰᠡᠳᠬᠢᠯ ᠲᠠᠯᠪᠢᠨ ᠨᠣᠮ ᠦᠵᠡᠳᠡᠭ ᠃ ᠪᠢᠴᠢᠬᠠᠨ ᠳ᠋ᠧᠩ ᠡᠴᠡ ᠬᠡᠲᠦᠶ᠋ᠢᠪᠡᠷ ᠬᠠᠮᠠᠷ ᠭᠠᠳᠠᠮᠠ ᠦᠨᠦᠷ ᠭᠠᠷᠴᠤ ᠂ ᠬᠠᠷᠠ ᠤᠲᠤᠭᠠᠨ ᠳ᠋ᠤᠨᠢ ᠲᠣᠯᠣᠭᠠᠢ ᠲᠦᠷᠦᠭᠦᠦ ᠡᠪᠡᠳᠪᠡᠴᠦ ᠂ ᠭᠣᠷᠺᠢ ᠣᠭᠲᠣ ᠬᠠᠶ᠋ᠢᠬᠤᠷᠤᠯ ᠦᠭᠡᠢ ᠪᠡᠷ ᠦᠷ ᠴᠠᠶ᠋ᠢᠲᠠᠯᠠ ᠨᠣᠮ ᠦᠵᠡᠳᠡᠭ ᠪᠠᠶ᠋ᠢᠵᠠᠢ ᠃
ᠭᠣᠷᠺᠢ ᠨᠠᠰᠤ ᠪᠠᠭᠠ ᠂ ᠰᠣᠶᠣᠯ ᠤ᠋ᠨ ᠬᠡᠮᠵᠢᠶᠡ ᠳᠣᠣᠷᠠ ᠪᠣᠯᠬᠣᠷ ᠨᠣᠮ ᠤᠩᠰᠢᠬᠤ ᠦᠶᠡ ᠳ᠋ᠦ᠍ ᠦᠷᠭᠦᠯᠵᠢ ᠣᠶ᠋ᠢᠯᠠᠭᠠᠬᠤ ᠦᠭᠡᠢ ᠦᠭᠡ ᠥᠭᠦᠯᠡᠪᠦᠷᠢ ᠂ ᠮᠠᠳᠠᠭ ᠲᠠᠢ ᠠᠰᠠᠭᠤᠳᠠᠯ ᠦ᠋ᠳ ᠲᠣᠬᠢᠶᠠᠯᠳᠤᠳᠠᠭ ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠠᠷᠢᠬᠢ ᠪᠠᠨ ᠬᠥᠳᠡᠯᠭᠡᠨ ᠲᠤᠩᠭᠠᠨ ᠪᠣᠳᠣᠬᠤ ᠠ᠋ᠴᠠ ᠭᠠᠳᠠᠨᠠ ᠪᠤᠰᠤᠳ ᠠ᠋ᠴᠠ ᠠᠰᠠᠭᠤᠵᠤ ᠵᠢᠭᠠᠯᠭᠠᠳᠠᠭ ᠃ ᠨᠢᠭᠡ ᠤᠳᠠᠭᠠ ᠲᠡᠷᠡ 《 ᠾᠦᠩᠨᠦ 》 ᠭᠡᠳᠡᠭ ᠦᠰᠦᠭ ᠦ᠋ᠨ ᠤᠳᠬᠠ ᠶ᠋ᠢ ᠶᠠᠭᠠᠬᠢᠵᠤ ᠪᠣᠳᠣᠭᠰᠠᠨ ᠴᠤ᠌ ᠮᠡᠳᠡᠬᠦ ᠦᠭᠡᠢ ᠪᠣᠯᠬᠣᠷ ᠤᠷᠢᠳᠠᠪᠠᠷ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠬᠦᠦ ᠡᠴᠡ ᠠᠰᠠᠭᠤᠪᠠ ᠃ ᠦᠵᠡᠰᠡ ᠂ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠶᠠᠪᠤᠵᠤ ᠪᠢᠴᠢᠭ ᠦᠵᠡᠭ᠍ᠰᠡᠨ ᠥᠨᠥᠬᠢ ᠴᠢᠨᠢ ᠪᠠᠰᠠ ᠮᠡᠳᠡᠬᠦ ᠦᠭᠡᠢ ᠪᠠᠶ᠋ᠢᠵᠠᠢ ᠃ ᠭᠣᠷᠺᠢ ᠨᠢᠭᠡ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠠ᠋ᠴᠠ ᠠᠰᠠᠭᠤᠪᠠ ᠃ ᠲᠡᠷᠡ ᠠᠮᠢᠲᠠᠨ 《 ᠾᠦᠩᠨᠦ 》 ᠭᠡᠳᠡᠭ ᠦᠰᠦᠭ ᠊ᠢ ᠲᠠᠶ᠋ᠢᠯᠪᠤᠷᠢᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠮᠥᠷᠲᠡᠭᠡᠨ ᠭᠣᠷᠺᠢ ᠶ᠋ᠢ ᠨᠢᠭᠡ ᠰᠠᠢᠨ ᠬᠠᠷᠢᠶᠠᠪᠠ ᠃ ᠭᠣᠷᠺᠢ ᠠᠰᠠᠭᠤᠭᠰᠠᠭᠠᠷ ᠶᠠᠪᠤᠵᠤ ᠡᠮ ᠦ᠋ᠨ ᠫᠦᠰᠡ ᠶ᠋ᠢᠨ ᠨᠢᠭᠡ ᠠᠵᠢᠯᠲᠠᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠲᠡᠷᠡ ᠠᠵᠢᠯᠲᠠᠨ《 ᠾᠦᠩᠨᠦ 》 ᠶ᠋ᠢᠨ ᠢᠷᠡᠯ ᠡᠭᠦᠰᠦᠯ ᠊ᠢ ᠲᠣᠪ ᠲᠣᠳᠣᠷᠬᠠᠢ ᠲᠠᠶ᠋ᠢᠯᠪᠤᠷᠢᠯᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠭᠣᠷᠺᠢ ᠶᠡᠬᠡ ᠪᠠᠶᠠᠷᠯᠠᠵᠤ ᠂ ᠮᠡᠳᠡᠬᠦ ᠦᠭᠡᠢ ᠠᠰᠠᠭᠤᠳᠠᠯ ᠲᠤᠯᠭᠠᠷᠠᠪᠠᠯ ᠂ ᠦᠷᠭᠦᠯᠵᠢ ᠲᠡᠭᠦᠨ ᠡᠴᠡ ᠠᠰᠠᠭᠤᠵᠤ ᠵᠢᠭᠠᠯᠭᠠᠳᠠᠭ ᠪᠣᠯᠵᠠᠢ᠃
ᠢᠷᠡᠯᠲᠡ ᠄
ᠲᠠᠪᠤᠨ ᠵᠢᠯ ᠦᠨ ᠲᠦᠷᠢᠮᠳᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳᠤ ᠦᠵᠡᠬᠦ
ᠬᠡᠯᠡ ᠪᠢᠴᠢᠭ ᠶᠢᠰᠦᠳᠦᠭᠡᠷ ᠲᠡᠪᠳᠡᠷ ※
ᠦᠪᠦᠷ ᠮᠤᠩᠭᠤᠯ ᠤᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠦᠨ ᠬᠡᠪᠯᠡᠯ ᠦᠨ ᠬᠤᠷᠢᠶᠠ ᠨᠠᠢᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠦᠪᠦᠷ ᠮᠤᠩᠭᠤᠯ ᠤᠨ ᠰᠢᠨᠬᠤᠸᠠ ᠨᠤᠮ ᠤᠨ ᠲᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠦᠪᠦᠷ ᠮᠤᠩᠭᠤᠯ ᠤᠨ ᠮᠤᠩᠭᠤᠯ ᠪᠢᠴᠢᠭ ᠬᠡᠪᠯᠠᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠤᠨ ᠤ 5 ᠰᠠᠷᠠ ᠳᠤ ᠬᠤᠶᠠᠳᠤᠭᠠᠷ ᠬᠡᠪ ᠢ ᠬᠢᠪᠡ
1984 ᠤᠨ ᠤ 4 ᠰᠠᠷᠠ ᠳᠤ ᠲᠦᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠬᠴᠢ ᠄ ᠪᠣᠷᠵᠢᠭᠢᠨ᠂ ᠨᠠᠷᠠᠩᠭᠡᠷᠡᠯ
ᠬᠢᠨᠠᠬᠴᠢ ᠄ ᠣᠤᠠᠬᠠᠨᠰᠣᠠ ᠂ ᠲᠣ᠋ · ᠨᠠᠨᠲᠢᠨ
2023.3.1