ᠮᠣᠩᠭᠣᠯ ᠭᠡᠷ ᠦ᠋ᠨ ᠢᠷᠦᠭᠡᠯМонгол гэрийн ерөөл
575ᠮᠣᠩᠭᠣᠯ ᠭᠡᠷ ᠦ᠋ᠨ ᠢᠷᠦᠭᠡᠯ
ᠢᠩᠭᠢᠭᠡᠳ ᠪᠢ ᠮᠣᠩᠭᠣᠯ ᠭᠡᠷ ᠤᠨ ᠢᠷᠦᠭᠡᠯ ᠤᠩᠰᠢᠶᠠ ᠂
ᠤᠸᠮ ᠰᠠᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ ᠂
ᠡᠩᠬᠡ ᠰᠠᠢᠬᠠᠨ ᠵᠢᠷᠭᠠᠯᠠᠩ ᠪᠣᠯᠲᠤᠭᠠᠢ ᠂
ᠵᠢᠪᠬᠤᠯᠠᠩᠲᠤ ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠳᠥᠷᠪᠡᠨ ᠲᠢᠪ ᠦ᠋ᠨ ᠳᠡᠭᠡᠷᠡ ᠂
ᠵᠠᠶᠠᠭᠠ ᠪᠤᠶᠠᠨ ᠪᠦᠷᠢᠳᠦᠭᠰᠡᠨ ᠵᠠᠭᠠᠷ ᠪᠣᠷᠪᠢᠲᠤ ᠬᠠᠭᠠᠨ ᠤ᠋ ᠵᠢᠭᠠᠵᠤ ᠲᠣᠭᠲᠠᠭᠠᠭᠰᠠᠨ ᠵᠠᠩ ᠵᠢᠷᠤᠮ ᠊ᠢ ᠳᠠᠭᠠᠵᠤ ᠂
ᠡᠵᠡᠨ ᠴᠢᠩᠭᠢᠰ ᠬᠠᠭᠠᠨ ᠤ᠋ ᠵᠣᠬᠢᠶᠠᠭᠰᠠᠨ ᠤᠯᠠᠮᠵᠢᠯᠠᠵᠤ ᠢᠷᠡᠭᠰᠡᠨ ᠶᠣᠰᠣ ᠪᠠᠷ ᠂
ᠡᠳᠦᠷ ᠦ᠋ᠨ ᠰᠠᠢᠨ ᠢ᠋ ᠦᠵᠡᠵᠦ ᠂ ᠴᠠᠭ ᠤ᠋ᠨ ᠰᠠᠢᠨ ᠢ᠋ ᠰᠣᠩᠭᠣᠵᠤ ᠂
ᠪᠤᠮᠠᠨ ᠪᠤᠶᠠᠨ ᠬᠤᠷᠢᠶᠠᠭᠴᠢ ᠂ ᠮᠢᠩᠭᠠᠨ ᠪᠤᠶᠠᠨ ᠴᠤᠭᠯᠠᠭᠴᠢ ᠂
ᠲᠦᠮᠡᠨ ᠥᠯᠵᠡᠢ ᠪᠦᠷᠢᠳᠦᠭᠴᠢ ᠂ ᠲᠦᠭᠡᠮᠡᠯ ᠣᠳᠣ ᠭᠠᠷᠠᠭ ᠤᠴᠠᠷᠠᠭᠴᠢ ᠂
ᠡᠶ᠋ᠢᠮᠦ ᠰᠠᠢᠨ ᠡᠳᠦᠷ ᠂ ᠦᠯᠵᠢᠢᠳᠦ ᠰᠠᠢᠬᠠᠨ ᠴᠠᠭ ᠲᠤ᠌ ᠂
ᠬᠥᠬᠡ ᠮᠥᠩᠭᠥᠨ ᠲᠡᠭᠷᠢ ᠶ᠋ᠢᠨ ᠡᠪᠴᠢᠭᠦᠨ ( ᠦ᠌) ᠳᠣᠣᠷᠠ ᠂
ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢᠨ ᠥᠷᠥᠴᠡᠨ ᠳᠡᠭᠡᠷᠡ ᠂
ᠬᠥᠬᠡᠷᠡᠨ ᠤᠷᠤᠰᠬᠤ ᠮᠥᠷᠡᠨ ᠦ᠌ ᠬᠥᠪᠡᠭᠡᠨ ᠳᠡᠭᠡᠷᠡ ᠂
ᠬᠥᠪᠴᠢᠨ ᠨᠣᠭᠣᠭᠠᠨ ᠮᠣᠳᠣᠳ ᠤ᠋ᠨ ᠲᠥᠪ ᠳᠤᠮᠳᠠ ᠂
ᠠᠪᠤ ᠳᠡᠭᠡᠳᠦ ᠶ᠋ᠢᠨ ᠦᠶᠡ ᠡᠴᠡ ᠪᠡᠨ ᠨᠤᠲᠤᠭᠯᠠᠭᠰᠠᠭᠠᠷ ᠢᠷᠡᠭᠰᠡᠨ ᠂
ᠠᠮᠤᠷᠯᠢᠩᠭᠤᠢ ᠰᠠᠢᠬᠠᠨ ᠡᠨᠡ ᠨᠤᠲᠤᠭ ᠳᠡᠭᠡᠷᠡ ᠂
ᠥᠷᠭᠡᠨ ᠴᠠᠭᠠᠨ ᠪᠠᠭᠤᠴᠠᠨ ᠳᠡᠭᠡᠷᠡ ᠂
ᠥᠨᠳᠥᠷ ᠰᠠᠷᠠᠭᠤᠯ ᠭᠡᠷ ᠢ᠋ ᠪᠠᠶ᠋ᠢᠭᠤᠯᠵᠤ᠂
ᠠᠮᠲᠠᠲᠤ ᠰᠠᠷᠬᠤᠳ ᠢ᠋ ᠰᠥᠩᠨᠡᠵᠦ ᠂ ᠠᠯᠠᠭ ᠢᠳᠡᠭᠡᠨ ᠢ᠋ ᠲᠠᠪᠠᠭᠯᠠᠵᠤ ᠂
ᠠᠶᠠᠯᠭᠤ ᠬᠥᠭ ᠢ᠋ ᠨᠡᠶ᠋ᠢᠯᠡᠭᠦᠯᠵᠦ ᠂ ᠠᠷᠢᠭᠤᠨ ᠴᠠᠭᠠᠨ ᠬᠬᠢᠪ ᠢ᠋ ᠂
ᠠᠰᠠᠷᠠᠯ ᠤ᠋ᠨ ᠥᠨᠳᠥᠷ ᠲᠣᠭᠣᠨᠣ ᠳ᠋ᠤ᠌ ᠴᠢᠨᠢ ᠡᠯᠭᠦᠰᠦᠭᠡᠢ !
ᠢᠷᠭᠠᠢ ᠽᠠᠨᠳᠠᠨ ᠴᠠᠭᠠᠷᠢᠭ ᠲᠠᠢ ᠂ ᠶᠠᠰᠢᠯ ᠽᠠᠨᠳᠠᠨ ᠳᠠᠭᠠᠭ ᠲᠠᠢ ᠂
ᠦᠷᠡᠯ ᠽᠠᠨᠳᠠᠨ ᠬᠦᠷᠢᠶᠡ ᠲᠡᠢ ᠂ ᠬᠦᠳᠡᠷ ᠽᠠᠨᠳᠠᠨ ᠨᠢᠷᠤᠭᠤ ᠲᠠᠢ ᠂
ᠬᠣᠶᠠᠷ ᠳᠠᠪᠬᠤᠷ ᠴᠠᠭᠠᠷᠢᠭ ᠲᠠᠢ ᠂ ᠬᠣᠲᠠ ᠮᠠᠨᠳᠤᠯ ᠰᠢᠨᠵᠢᠲᠡᠢ ᠂
ᠪᠠᠲᠤ ᠳᠥᠷᠪᠡᠨ ᠳᠠᠭᠠᠭ ᠲᠠᠢ ᠂ ᠪᠠᠳᠮᠠ ᠰᠢᠬᠦᠷ ᠰᠢᠨᠵᠢᠲᠡᠢ ᠂
ᠠᠯᠲᠠᠨ ᠬᠣᠷᠯᠣ ᠭᠣᠣᠯ ᠲᠠᠢ ᠂ ᠠᠷᠪᠠᠨ ᠡᠷᠳᠡᠨᠢ ᠶ᠋ᠢᠨ ᠰᠡᠶ᠋ᠢᠯᠪᠦᠷᠢ ᠲᠡᠢ ᠂
ᠵᠠᠨᠳᠠᠨ ( ᠼᠠᠨᠲᠠᠨ ) ᠮᠣᠳᠣ ᠶ᠋ᠢ ᠵᠠᠭᠠᠵᠤ ( ᠵᠠᠯᠭᠠᠵᠤ )᠂ ᠵᠠᠪᠰᠠᠷ ᠦᠭᠡᠢ ᠨᠡᠶ᠋ᠢᠯᠡᠭᠦᠯᠵᠦ ᠂
ᠵᠠᠭᠠᠨ ᠤ᠋ ᠵᠣ ᠪᠠᠷ ᠦᠳᠡᠵᠦ ᠬᠢᠭᠰᠡᠨ
ᠰᠡᠩᠳᠡᠩ ᠮᠣᠳᠣ ᠶ᠋ᠢ ᠰᠡᠶ᠋ᠢᠯᠵᠦ᠂ ᠰᠡᠪ ᠦᠭᠡᠢ ᠰᠠᠢᠨ ᠨᠡᠶ᠋ᠢᠯᠡᠭᠦᠯᠵᠦ ᠂
ᠵᠢᠷᠠᠨ ᠳᠥᠷᠪᠡᠨ ᠬᠤᠷᠤᠭᠤ ᠲᠠᠢ ᠂
ᠵᠢᠷᠭᠤᠭᠠᠨ ᠰᠠᠯᠠᠭᠠ ᠬᠡᠴᠡ ᠲᠡᠢ᠂
ᠨᠠᠷᠢᠨ ᠮᠢᠨᠳᠠᠰᠤᠨ ᠬᠡᠯᠬᠢᠶᠡ ᠲᠡᠢ ᠂
ᠨᠠᠷᠠ ᠰᠠᠷᠠᠨ ᠤ᠋ ᠭᠡᠷᠡᠯ ᠢ᠋ ᠰᠠᠴᠤᠷᠠᠭᠤᠯᠬᠤ ᠪᠠᠷ ᠵᠣᠬᠢᠶᠠᠭᠰᠠᠨ ᠂
ᠡᠷᠬᠢᠮ ᠬᠣᠶᠠᠷ ᠵᠢᠭᠠᠰᠤ ᠡᠯᠢᠭᠡ ᠪᠡᠷ ᠢ᠋ᠶ᠋ᠡᠨ ᠨᠡᠶ᠋ᠢᠯᠡᠭᠰᠡᠨ ᠂
ᠱ᠌ᠢᠷᠦᠨ ᠤᠯᠠᠭᠠᠨ ᠥᠩᠭᠡᠲᠡᠢ ᠂
ᠰᠢᠭᠦᠷ ᠡᠷᠳᠡᠨᠢ ᠲᠣᠭᠣᠨᠣ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ ᠃
ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠰᠡᠭᠦᠳᠡᠷ ᠰᠢᠬᠦᠷᠯᠡᠩᠬᠡᠨ ᠣᠷᠭᠣᠭᠠᠳ ᠰᠡᠭᠦᠳᠡᠷᠯᠡᠩᠭᠡᠨ ᠭᠠᠩᠬᠤᠭᠰᠠᠨ
ᠨᠠᠪᠴᠢᠲᠤ ᠽᠠᠨᠳᠠᠨ ᠮᠣᠳᠣ ᠶ᠋ᠢ ᠪᠠᠭᠤᠯᠭᠠᠵᠤ ᠂ ᠨᠠᠮ ᠭᠠᠵᠠᠷ ᠠᠪᠴᠢᠷᠠᠵᠤ ᠂
ᠨᠠᠮᠠᠭᠠ ᠰᠠᠯᠠᠭᠠ ᠶ᠋ᠢ ᠨᠢ ᠠᠷᠢᠯᠭᠠᠵᠤ ᠂ ᠨᠠᠷᠢᠨ ᠪᠦᠳᠦᠭᠦᠨ ᠢ᠋ ᠨᠢ ᠲᠡᠩᠴᠡᠭᠦᠯᠵᠦ ᠂
ᠰᠤᠮᠤ ᠰᠢᠬ ᠱᠤᠯᠤᠵᠤ ᠬᠢᠭᠰᠡᠨ ᠂ ᠰᠡᠪ ᠦᠭᠡᠢ ᠰᠠᠢᠬᠠᠨ ᠵᠦᠯᠭᠦᠵᠦ ᠬᠢᠭᠰᠡᠨ ᠂
ᠨᠠᠢ᠍ᠮᠠᠨ ᠯᠢᠩᠬᠤᠠ ᠶ᠋ᠢᠨ ᠰᠢᠨᠵᠢ ᠪᠦᠷᠢᠳᠦᠭᠰᠡᠨ ᠂ ᠨᠠᠷᠢᠨ ᠰᠠᠢᠬᠠᠨ ᠤᠨᠢᠨ ᠳ᠋ᠤ᠌ ᠪᠠᠨ ᠂
ᠤᠷᠤᠰᠤᠮᠠ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠰᠡᠭᠦᠯ ᠢ᠋ᠶ᠋ᠡᠷ ᠨᠢ ᠂
ᠤᠶᠠᠭᠠ ᠰᠦᠢ ᠶ᠋ᠢ ᠨᠢ ᠴᠢᠮᠡᠭ ᠪᠣᠯᠭᠠᠨ ᠵᠣᠬᠢᠶᠠᠭᠰᠠᠨ ᠂
ᠣᠭ᠌ᠶᠤ ᠡᠷᠳᠡᠨᠢ ᠣᠨᠢ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠬᠦᠯᠦᠭ ᠦ᠋ᠨ ᠳᠡᠯ ᠢ᠋ᠶ᠋ᠡᠷ ᠲᠠᠮᠤᠵᠤ ᠬᠢᠭᠰᠡᠨ ᠂
ᠡᠭᠡᠴᠢ ᠳᠡᠭᠦᠦ ᠨᠠᠷ ᠤ᠋ᠨ ᠭᠠᠷ ᠤ᠋ᠨ ᠲᠠᠮᠢᠷ ᠢ᠋ᠶ᠋ᠠᠷ ᠨᠡᠶ᠋ᠢᠤᠠᠬᠡᠵᠦ ᠪᠦᠲᠦᠭᠡᠭᠰᠡᠨ ᠂
ᠠᠯᠲᠠᠨ ᠵᠣᠭᠣᠰ ᠠᠷᠢᠭᠤᠨ ᠬᠬᠢᠪ ᠦ᠋ᠨ ᠴᠢᠮᠡᠭ ᠲᠡᠢ ᠂
ᠠᠯᠢᠪᠠ ᠬᠡᠰᠢᠭ ᠪᠤᠶᠠᠨ ᠬᠤᠷᠠᠭᠴᠢ ᠴᠢᠭᠲᠠᠭᠠ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠬᠠᠷᠭᠠᠢ ᠽᠠᠨᠳᠠᠨ ᠢ᠋ ᠬᠠᠭᠠᠯᠤᠨ ᠴᠠᠪᠴᠢᠵᠤ ᠂ ᠬᠠᠨᠠ ᠶ᠋ᠢᠨ ᠬᠡᠪ ᠢ᠋ ᠪᠠᠶ᠋ᠢᠭᠤᠯᠵᠤ᠂
ᠡᠷᠡ ᠰᠠᠶ᠋ᠢᠲᠠᠢ ᠬᠥᠮᠦᠨ ᠡᠪᠯᠡᠭᠦᠯᠦᠨ ᠵᠠᠰᠠᠵᠤ ᠂
ᠡᠷᠳᠡᠮ ᠰᠠᠶ᠋ᠢᠲᠠᠢ ᠮᠣᠵᠢᠩ (ᠮᠣᠳᠣᠴᠢᠨ ) ᠡᠷᠭᠢᠴᠡᠭᠦᠯᠦᠨ ᠬᠢᠭᠡᠳ ᠂
ᠡᠷᠡ ᠳᠤᠮᠳᠠ ᠶ᠋ᠢᠨ ᠪᠤᠤᠷᠠ ᠶ᠋ᠢᠨ ᠰᠢᠷᠪᠥᠰᠥ ᠪᠡᠷ ᠰᠢᠭᠦᠰᠦ ᠭᠠᠷᠲᠠᠯᠠ ᠲᠠᠲᠠᠵᠤ ᠂
ᠰᠢᠭᠦᠷᠴᠢᠯᠡᠨ ᠡᠷᠭᠢᠭᠦᠯᠵᠦ ᠂ ᠱᠦᠷᠭᠡᠴᠢᠯᠡᠨ ᠦᠳᠡᠵᠦ ᠬᠢᠭᠰᠡᠨ ᠂
ᠥᠨᠳᠥᠷ ᠶᠡᠬᠡ ᠬᠡᠮᠵᠢᠶᠡ ᠲᠡᠢ ᠂ ᠥᠯᠵᠡᠢ ᠵᠠᠩᠭᠢᠶᠠ ᠬᠡᠯᠪᠡᠷᠢ ᠲᠡᠢ ᠂
ᠠᠷᠪᠠᠨ ᠵᠢᠷᠭᠤᠭᠠᠨ ᠲᠣᠯᠣᠭᠠᠢ ᠲᠠᠢ ᠂ ᠠᠰᠤᠷᠤ ᠰᠠᠢᠬᠠᠨ ᠬᠠᠨᠠ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠠᠷᠴᠠ ᠽᠠᠨᠳᠠᠨ ᠬᠠᠭᠠᠯᠭᠠ ᠲᠠᠢ ᠂ ᠠᠭᠠᠷᠤ ᠽᠠᠨᠳᠠᠨ ᠬᠠᠲᠠᠪᠴᠢ ᠲᠠᠢ ᠂
ᠪᠠᠷᠠᠭᠤᠨ ᠬᠠᠭᠠᠯᠭᠠ ᠨᠢ ᠪᠠᠷᠰ ᠤ᠋ᠨ ᠰᠢᠨᠵᠢᠲᠡᠢ ᠂
ᠵᠡᠭᠦᠨ ᠬᠠᠭᠠᠯᠭᠠ ᠨᠢ ᠠᠷᠰᠯᠠᠨ ᠤ᠋ ᠰᠢᠨᠵᠢᠲᠡᠢ ᠂
ᠠᠪᠤᠷᠠᠯ ᠤ᠋ᠨ ᠳᠡᠭᠡᠳᠦ ᠯᠠᠮᠠ ᠪᠣᠭᠳᠠ ᠠ᠋ᠴᠠ ᠂
ᠠᠯᠪᠠᠨ ᠲᠥᠷᠥ ᠶ᠋ᠢᠨ ᠠᠮᠪᠠᠰ ᠨᠣᠶᠠᠳ ᠵᠠᠯᠠᠷᠠᠨ ᠰᠠᠭᠠᠲᠠᠳᠠᠭ ᠂
ᠬᠦᠷᠡᠯ ᠪᠣᠯᠣᠳ ᠣᠨᠢᠰᠣ ᠲᠠᠢ ᠂
ᠬᠥᠮᠦᠨ ᠪᠦᠬᠦᠨ ᠦ᠌ ᠣᠷᠣᠵᠤ ᠭᠠᠷᠳᠠᠭ ᠂
ᠬᠠᠭᠠᠯᠭᠠ ᠬᠠᠲᠠᠪᠴᠢ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠠᠬᠤᠷ ᠤ᠋ᠨ ᠬᠣᠨᠢᠨ ᠨᠣᠣᠰᠣ ᠶ᠋ᠢ ᠠᠯᠠᠭᠠ ᠳᠠᠷᠤᠮᠠ ᠵᠤᠵᠠᠭᠠᠯᠠᠵᠤ ᠂
ᠡᠩ ᠦᠭᠡᠢ ᠥᠷᠭᠡᠨ ᠬᠥᠰᠢᠭᠡᠨ ᠳᠡᠭᠡᠷᠡ ᠂
ᠡᠪ ᠢ᠋ ᠨᠢ ᠮᠡᠳᠡᠵᠦ ᠵᠤᠯᠠᠭᠠᠳ ᠂
ᠪᠦᠯᠢᠶᠡᠨ ᠤᠰᠤ ᠪᠠᠷ ᠪᠦᠷᠢᠯᠳᠦᠭᠦᠯᠵᠦ᠂
ᠪᠦᠭᠦᠳᠡ ᠶ᠋ᠢᠨ ᠭᠠᠷ ᠢ᠋ᠶ᠋ᠠᠷ ᠰᠢᠷᠢᠯᠳᠦᠭᠦᠯᠵᠦ ᠂
ᠬᠤᠷᠠ ᠶ᠋ᠢᠨ ᠤᠰᠤ ᠪᠠᠷ ᠤᠰᠤᠯᠠᠵᠤ ᠂
ᠬᠤᠷᠳᠤᠨ ᠮᠣᠷᠢ ᠪᠠᠷ ᠲᠠᠲᠠᠭᠤᠯᠵᠤ ᠂
ᠲᠡᠭᠰᠢ ᠭᠠᠵᠠᠷ ᠳᠠᠷᠤᠵᠤ ᠂ ᠳᠡᠨᠵᠢ ᠭᠠᠵᠠᠷ ᠬᠠᠲᠠᠭᠠᠭᠰᠠᠨ ᠂
ᠡᠪᠳᠡᠷᠡᠯ ᠦᠭᠡᠢ ᠪᠠᠲᠤ ᠂ ᠡᠯᠡᠭᠳᠡᠯ ᠦᠭᠡᠢ ᠪᠥᠬᠡ ᠂
ᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠢᠰᠡᠭᠡᠢ ᠶ᠋ᠢ ᠴᠢᠨᠢ
ᠬᠤᠷᠠᠭᠰᠠᠨ ᠣᠯᠠᠨ ᠠᠪᠠᠭᠠᠢ ᠪᠡᠷᠭᠡᠳ ᠬᠤᠷᠤᠭᠤᠨ ᠤ᠋ ᠤᠷᠠᠨ ᠢ᠋ ᠭᠠᠷᠭᠠᠨ ᠬᠠᠶ᠋ᠢᠴᠢᠯᠠᠵᠤ ᠂
ᠤᠬᠠᠭᠠᠨᠲᠠᠢ ᠬᠥᠮᠦᠨ ᠡᠰᠬᠡᠵᠦ᠂ ᠤᠷᠠᠨ ᠪᠡᠷᠭᠡᠳ ᠤᠷᠠᠯᠠᠨ ᠣᠶᠣᠭᠰᠠᠨ ᠂
ᠳᠡᠯᠭᠡᠬᠦ ᠳᠥᠷᠪᠡᠨ ᠳᠡᠭᠡᠪᠦᠷ ᠂ ᠪᠠᠷᠢᠬᠤ ᠨᠠᠢ᠍ᠮᠠᠨ ᠲᠤᠭᠤᠷᠭᠠ ᠶ᠋ᠢ ᠂
ᠶᠠᠪ ᠭᠡᠲᠡᠯᠡ ᠰᠠᠢᠬᠠᠨ ᠣᠶᠣᠭᠠᠳ ᠂ ᠶᠠᠭᠰᠢᠷᠠᠲᠠᠯᠠ ᠰᠠᠢᠬᠠᠨ ᠵᠣᠬᠢᠷᠠᠭᠰᠠᠨ
ᠬᠤᠨ ᠴᠠᠭᠠᠨ ᠪᠦᠷᠢᠶᠡᠰᠦ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠬᠠᠷᠠ ᠮᠣᠷᠢᠨ ᠤ᠋ ᠳᠡᠯ ᠰᠡᠭᠦᠯ ᠊ᠢ ᠬᠠᠮᠤᠭ ᠣᠯᠠᠨ ᠡᠭᠡᠴᠢ ᠳᠡᠭᠦᠦ ᠨᠠᠷ ᠤᠷᠠᠨ ᠰᠡᠮᠡᠴᠡᠵᠦ ᠂
ᠴᠢᠳᠠᠯ ᠶᠡᠬᠡᠲᠡᠢ ᠵᠠᠯᠠᠭᠤ ᠴᠢᠩᠭᠠ ᠡᠷᠴᠢᠮ ᠲᠡᠢ ᠲᠠᠮᠤᠵᠤ ᠂
ᠴᠢᠭᠢᠷᠠᠭ ᠪᠡᠶᠡ ᠲᠡᠢ ᠡᠪᠦᠭᠡᠨ ᠲᠠᠲᠠᠵᠤ ᠡᠭᠰᠢᠷᠡᠭᠦᠯᠦᠭᠰᠡᠨ ᠂
ᠲᠠᠰᠤᠷᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠪᠥᠬᠡ ᠂ ᠰᠤᠯᠠᠷᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠴᠢᠩᠭᠠ ᠂
ᠪᠠᠲᠤ ᠰᠠᠢᠬᠠᠨ ᠣᠭᠣᠰᠣᠷ ᠪᠦᠰᠡᠯᠡᠭᠦᠷ ᠂ ᠪᠠᠳᠮᠠ ᠰᠠᠢᠬᠠᠨ ᠬᠥᠯᠲᠥᠷᠭᠡ ᠂
ᠲᠠᠩᠨᠠᠶ᠋ᠢᠯᠠᠵᠤ ᠲᠠᠯᠪᠢᠬᠤ ᠡᠷᠦᠬᠡ ᠂ ᠲᠠᠲᠠᠬᠤ ᠲᠠᠪᠤᠨ ᠪᠦᠰᠡᠯᠡᠭᠦᠷ ᠂ ᠳᠠᠷᠤᠬᠤ ᠳᠠᠯᠠᠨ ᠣᠭᠣᠰᠣᠷ ᠂
ᠬᠠᠶᠠᠭᠠᠨ ᠠ᠋ᠴᠠ ᠪᠠᠨ ᠬᠠᠨᠲᠠᠷᠭᠠᠭᠰᠠᠨ ᠬᠠᠨᠠ ᠶ᠋ᠢᠨ ᠰᠢᠭᠰᠢᠷᠭᠡ ᠬᠦᠷᠲᠡᠯᠡ ᠂
ᠬᠠᠮᠲᠤ ᠪᠦᠬᠦᠨ ᠢ᠋ᠶ᠋ᠡᠷ ᠨᠢ ᠮᠢᠯᠢᠶᠠᠮᠤ !
ᠳ᠋ᠢᠰᠢᠨ ᠰᠠᠢᠬᠠᠨ ᠬᠥᠪᠡᠭᠡ ᠲᠡᠢ ᠂ ᠳᠥᠴᠢ ᠶᠢᠰᠦᠨ ᠤᠭᠠᠯᠵᠠ ᠲᠠᠢ ᠂
ᠳᠥᠷᠪᠡᠨ ᠬᠣᠰᠢᠭᠤ ᠲᠣᠲᠣᠭᠣ ᠲᠠᠢ ᠂ ᠲᠦᠮᠡᠨ ᠭᠤᠸᠠ ᠬᠤᠸᠠᠷ ᠲᠠᠢ ᠂ ᠲᠦᠮᠡᠨ ᠥᠯᠵᠡᠢ ᠬᠥᠪᠡᠭᠡ ᠲᠡᠢ ᠂
ᠲᠦᠮᠡᠨ ᠬᠥᠮᠦᠨ ᠦ᠌ ᠡᠷᠭᠦᠵᠦ ᠣᠷᠣᠵᠤ ᠭᠠᠷᠳᠠᠭ ᠲᠥᠷᠥ ᠶᠡᠬᠡᠲᠦ ᠡᠭᠦᠳᠡ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠬᠠᠨᠠ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠬᠠᠯᠢᠭᠤ ᠪᠤᠯᠠᠭᠠ ᠶ᠋ᠢᠨ ᠳᠡᠪᠢᠰᠬᠡᠷ ᠲᠡᠢ ᠂
ᠬᠠᠲᠠᠪᠴᠢ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠬᠠᠩᠪᠤ ᠲᠣᠷᠭᠠᠨ ᠬᠥᠰᠢᠭᠡ ᠲᠡᠢ ᠂
ᠡᠨᠡ ᠰᠠᠢᠬᠠᠨ ᠭᠡᠷ ᠦ᠋ᠨ ᠲᠥᠪ ᠳᠤᠮᠳᠠ ᠂
ᠪᠠᠯᠪᠠ ᠶ᠋ᠢᠨ ᠳᠠᠷᠬᠠᠨ ᠪᠠᠯᠪᠠᠵᠤ ᠬᠢᠭᠰᠡᠨ ᠂ ᠪᠠᠰᠠ ᠨᠢᠭᠡ ᠳᠠᠷᠬᠠᠨ ᠵᠠᠰᠠᠵᠤ ᠬᠢᠭᠰᠡᠨ ᠂
ᠤᠷᠠᠨ ᠳᠠᠷᠬᠠᠨ ᠤᠭᠠᠯᠵᠠᠯᠠᠵᠤ ᠬᠢᠭᠰᠡᠨ ᠂ ᠤᠬᠠᠭᠠᠨᠲᠠᠢ ᠳᠠᠷᠬᠠᠨ ᠰᠡᠢᠯᠵᠦ ᠬᠢᠭᠰᠡᠨ ᠂
ᠢᠨᠵᠢ ᠮᠠᠩᠬᠠᠨ ᠰᠢᠷᠭᠤᠭᠤᠯ ᠲᠠᠢ ᠂ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠠᠳᠠᠭᠠᠷᠢ ᠲᠠᠢ ᠂
ᠲᠣᠭᠣᠷᠢᠭ ᠲᠠᠪᠤᠨ ᠪᠦᠰᠡᠯᠡᠭᠦᠷ ᠲᠡᠢ ᠂ ᠲᠤᠯᠬᠤ ᠳᠥᠷᠪᠡᠨ ᠪᠣᠱᠣᠭ ᠲᠠᠢ ᠂
ᠵᠤᠯᠠ ᠮᠡᠲᠦ ᠮᠠᠨᠳᠤᠳᠠᠭ ᠂
ᠰᠦᠩᠻᠠᠤᠠ ᠪᠤᠷᠬᠠᠨ ᠵᠣᠬᠢᠶᠠᠭᠰᠠᠨ ᠂
ᠲᠥᠷᠥ ᠶ᠋ᠢᠨ ᠴᠢᠨᠢ ᠭᠠᠯ ᠭᠣᠯᠣᠮᠲᠠ ᠶ᠋ᠢ ᠮᠢᠯᠢᠶᠠᠮᠤ !
ᠭᠠᠩ ᠰᠢᠷᠡᠮᠦ ᠶ᠋ᠢ ᠬᠠᠶ᠋ᠢᠯᠤᠭᠤᠯᠵᠤ ᠬᠢᠭᠰᠡᠨ ᠂ ᠭᠠᠩ ᠪᠣᠯᠣᠳ ᠨᠡᠷᠡ ᠲᠡᠢ ᠂
ᠬᠦᠷᠡᠯ ᠲᠡᠮᠦᠷ ᠢ᠋ ᠬᠠᠶ᠋ᠢᠯᠤᠭᠤᠯᠵᠤ ᠬᠢᠭᠰᠡᠨ ᠂ ᠬᠦᠷᠢᠶᠡ ᠭᠠᠵᠠᠷ ᠴᠢᠳᠬᠤᠵᠤ ᠬᠢᠭᠰᠡᠨ ᠂
ᠬᠥᠮᠦᠨ ᠪᠦᠬᠦᠨ ᠦ᠌ ᠤᠮᠳᠠ ᠬᠣᠭᠣᠯᠠ ᠶ᠋ᠢ ᠲᠥᠬᠥᠭᠡᠷᠦᠩᠭᠡᠨ ᠪᠠᠵᠠᠭᠠᠬᠴᠢ ᠂
ᠬᠦᠷᠡᠯ ᠡᠷᠳᠡᠨᠢ ᠲᠣᠭᠣᠭᠠ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠰᠢᠷᠡᠮᠦ ᠭᠠᠤᠯᠢ ᠶ᠋ᠢ ᠬᠠᠶ᠋ᠢᠯᠤᠭᠤᠯᠵᠤ ᠬᠢᠭᠰᠡᠨ ᠂ ᠰᠢᠷᠠ ᠭᠠᠤᠯᠢᠨ ᠰᠢᠨᠠᠭᠠ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠠᠪᠤ ᠶ᠋ᠢᠨ ᠦᠶᠡ ᠡᠴᠡ ᠪᠡᠨ ᠪᠠᠵᠠᠭᠠᠬᠰᠠᠨ ᠂ ᠠᠷᠢᠭᠤᠨ ᠴᠠᠭᠠᠨ ᠢᠰᠡᠭᠡᠢ ᠂
ᠡᠶᠢ ( ᠡᠵᠢ ) ᠶ᠋ᠢᠨ ᠦᠶᠡ ᠡᠴᠡ ᠪᠡᠨ ᠪᠠᠵᠠᠭᠠᠬᠰᠠᠨ ᠡᠷᠢᠶᠡᠨ ᠨᠠᠪᠴᠢᠨ ᠬᠤᠸᠠᠷ ᠲᠠᠢ
ᠳᠡᠪᠢᠰᠬᠡᠷ ᠲᠣᠭᠣᠷᠢᠭᠤᠯ ᠢ᠋ ᠴᠢᠨᠢ ᠮᠢᠯᠢᠶᠠᠮᠤ !
ᠵᠠ ᠂ ᠡᠨᠡ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠬᠣᠶ᠋ᠢᠨᠠ ᠠ᠋ᠴᠠ ᠨᠢ ᠡᠬᠢᠯᠡᠨ ᠂
ᠵᠣᠣ ᠠ᠋ᠴᠠ ᠵᠠᠯᠠᠭᠰᠠᠨ ᠰᠦᠩᠺᠠᠸ᠋ᠠ ᠂ ᠵᠢᠷᠤᠮᠠᠯ ᠰᠠᠢᠬᠠᠨ ᠭᠦᠩᠭᠠᠷᠠᠪᠠ ᠂
ᠪᠠᠳᠮᠠ ᠰᠢᠭᠦᠷ ᠪᠠᠨᠳᠠᠨ ᠵᠠᠮᠰᠤ ᠂ ᠬᠣᠷᠯᠣ ᠯᠣᠮᠪᠣ ᠬᠤᠩᠬᠠ ᠳᠠᠮᠠᠷᠤ ᠂
ᠪᠣᠮᠪᠣ ᠪᠣᠯᠣᠰᠢ ᠂ ᠲᠣᠯᠢ ᠲᠣᠳᠣ ᠂ ᠬᠡᠩᠭᠡᠷᠭᠡ ᠴᠠᠩ ᠬᠬᠢᠪ ᠨᠢᠨᠳᠠᠷ᠂
ᠳᠣᠯᠣᠭᠠᠨ ᠡᠷᠳᠡᠨᠢ ᠂ ᠨᠠᠢ᠍ᠮᠠᠨ ᠲᠠᠬᠢᠯ ᠂ ᠬᠦᠷᠡᠯ ᠤᠯᠠᠭᠠᠨ ᠬᠦᠵᠢ ᠲᠡᠷᠢᠭᠦᠲᠡᠨ ᠂
ᠵᠢᠳᠠ ᠪᠣᠶ᠋ᠢᠪᠣᠷ ᠂ ᠵᠠᠪᠠᠢ ᠬᠥᠬᠥᠯ ᠂ ᠠᠷᠴᠠ ᠰᠠᠩ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠠᠭᠠᠷᠤ ᠽᠠᠨᠳᠠᠨ ᠤ᠋ ᠦᠨᠦᠷ ᠠᠩᠬᠢᠯᠤᠭᠤᠯᠤᠭᠠᠳ
ᠲᠠᠪᠤᠨ ᡂᠢ ᠳᠡᠪᠰᠡᠭ ᠲᠡᠢ ᠂ ᠲᠠᠪᠢᠨ ᠦᠶᠡ ᠲᠠᠬᠢᠯ ᠲᠠᠢ ᠂
ᠰᠡᠩᠳᠡᠩ ᠳᠥᠷᠪᠡᠨ ᠲᠤᠯᠭᠠᠭᠤᠷᠢ ᠲᠠᠢ ᠂ ᠰᠡᠶ᠋ᠢᠯᠪᠦᠷᠢ ᠡᠷᠳᠡᠨᠢ ᠶ᠋ᠢᠨ ᠲᠠᠯᠪᠢᠭᠤᠷ ᠲᠠᠢ ᠂
ᠠᠷᠪᠠᠨ ᠬᠣᠶᠠᠷ ᠯᠤᠤ ᠲᠠᠢ ᠂
ᠠᠯᠲᠠ ᠮᠥᠩᠭᠥᠨ ᠬᠤᠸᠠᠷ ᠲᠠᠢ ᠂ ᠠᠷᠴᠠ ᠭᠦᠷᠭᠦᠮ ᠦ᠋ᠨ ᠦᠨᠦᠷ ᠲᠡᠢ ᠂
ᠠᠷᠢᠶᠠᠪᠠᠯᠤ ᠶ᠋ᠢᠨ ᠴᠢᠨᠢ ᠭᠦᠩᠭᠠᠷᠠᠪᠠ ᠶ᠋ᠢ ᠠᠷᠴᠠ ᠰᠠᠩ ᠢ᠋ᠶ᠋ᠠᠷ ᠮᠢᠯᠢᠶᠠᠮᠤ !
ᠠᠪᠳᠠᠷᠠ ᠶ᠋ᠢᠨ ᠳᠣᠲᠣᠷᠠ ᠨᠢ ᠠᠷᠢᠭᠤᠨ ᠳᠠᠯᠠᠯᠭᠠ ᠂ ᠠᠯᠲᠠᠨ ᠠᠶᠠᠭᠠ ᠂ ᠰᠤᠳᠤᠷ ᠨᠣᠮ ᠂ ᠰᠤᠷᠭᠠᠯ ᠤ᠋ᠨ ᠪᠢᠴᠢᠭ ᠂ ᠱᠤᠩᠬᠤ ᠶᠤᠸᠠᠮᠪᠤᠤ ᠳᠣᠢᠭ ᠬᠡᠰᠡᠭ᠂
ᠴᠥᠮ ᠪᠦᠬᠦᠨ ᠢ᠋ᠶ᠋ᠡᠷ ᠨᠢ ᠮᠢᠯᠢᠶᠠᠮᠤ !
ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠨᠢ ᠬᠤᠷᠢᠶᠠᠭᠰᠠᠨ ᠂ ᠪᠠᠷᠰ ᠡᠷᠢᠶᠡᠨ ᠬᠡ ᠲᠡᠢ ᠂
ᠪᠠᠳᠮᠠ ᠲᠡᠭᠷᠢ ᠶ᠋ᠢᠨ ᠰᠢᠨᠵᠢᠲᠡᠢ ᠂ ᠳᠠᠯᠠᠨ ᠶᠠᠩᠵᠤ ᠶ᠋ᠢᠨ ᠲᠦᠯᠬᠢᠭᠦᠷ ᠲᠡᠢ ᠂ ᠠᠪᠲᠠᠷᠲᠠᠨ ( ᠠᠪᠳᠠᠷᠠ ᠲᠠᠨ ) ᠤ᠋ ᠳᠣᠲᠣᠷᠠ ᠂
ᠬᠠᠩᠪᠤ ᠲᠣᠷᠭᠠ ᠬᠠᠯᠢᠭᠤᠨ ᠲᠣᠷᠭᠠ ᠂ ᠬᠤᠢ ᠲᠠᠢ ᠲᠣᠷᠭᠠ ᠂ ᠬᠤᠢ ᠦᠭᠡᠢ ᠲᠣᠷᠭᠠ ᠂
ᠬᠠᠷᠠ ᠬᠦᠷᠮᠡ ᠂ ᠬᠠᠯᠢᠭᠤᠨ ᠬᠦᠷᠮᠡ ᠂ ᠥᠩᠭᠡ ᠦᠭᠡᠢ ᠬᠦᠷᠮᠡ ᠂ ᠦᠰᠦ ᠦᠭᠡᠢ ᠬᠦᠷᠮᠡ ᠂
ᠰᠠᠭᠠᠷᠢᠨ ᠭᠤᠲᠤᠯ ᠰᠡᠪᠬᠢᠨ ᠭᠤᠲᠤᠯ ᠂ ᠪᠤᠯᠢᠭᠠᠷᠢ ᠭᠤᠲᠤᠯ ᠂ ᠥᠭᠡᠳᠡᠩ ᠭᠤᠲᠤᠯ ᠂
ᠪᠤᠶ᠋ᠢᠲᠠᠭ ᠪᠣᠢᠭ ᠦ᠋ᠳ ᠬᠦᠷᠲᠡᠯᠡ ᠴᠥᠮ ᠪᠦᠷᠢᠨ ᠊ᠢ ᠨᠢ ᠮᠢᠯᠢᠶᠠᠮᠤ !
ᠬᠣᠶ᠋ᠢᠲᠤ ᠲᠠᠯᠠ ᠳ᠋ᠤ᠌ ᠨᠢ ᠪᠠᠶ᠋ᠢᠷᠢᠯᠠᠭᠤᠯᠤᠭᠰᠠᠨ ᠪᠠᠷᠠᠭᠠ ᠶᠠᠭᠤ ᠶ᠋ᠢ ᠨᠢ ᠰᠢᠨᠵᠢᠪᠡᠯ
ᠲᠣᠳᠣ ᠲᠣᠷᠭᠠᠨ ᠨᠢᠭᠤᠷ ᠲᠠᠢ ᠂ ᠲᠠᠪᠤᠨ ᠮᠥᠩᠭᠥᠨ ᠳᠠᠷᠤᠭᠤᠯᠭᠠ ᠲᠠᠢ ᠂
ᠲᠠᠩᠰᠤᠭ ᠰᠠᠢᠬᠠᠨ ᠳᠡᠷᠡ ᠶ᠋ᠢ ᠴᠢᠨᠢ ᠮᠢᠯᠢᠶᠠᠮᠤ !
ᠨᠠᠪᠴᠢ ᠲᠠᠢ ᠰᠠᠢᠬᠠᠨ ᠠᠭᠤᠯᠠ ᠶ᠋ᠢᠨ ᠨᠠᠷᠠᠨ ᠲᠠᠯᠠ ᠳ᠋ᠤ᠌ ᠨᠢ ᠂
ᠨᠠᠪᠴᠢᠯᠠᠵᠤ ᠴᠡᠴᠡᠭᠯᠡᠵᠦ ᠤᠷᠭᠤᠭᠰᠠᠨ ᠂ ᠨᠠᠷᠠᠰᠤᠨ ᠽᠠᠨᠳᠠᠨ ᠢ᠋ᠶ᠋ᠠᠷ ᠬᠢᠭᠰᠡᠨ ᠂
ᠨᠠᠷᠠᠰᠤᠨ ᠨᠠᠢ᠍ᠮᠠᠨ ᠬᠥᠯ ᠲᠡᠢ ᠂ ᠣᠷᠣ ᠶ᠋ᠢᠨ ᠰᠢᠷᠡᠭᠡ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠂
ᠠᠷᠤ ᠥᠪᠥᠷ ᠤᠷᠤᠭᠤ ᠨᠢ ᠤᠨᠵᠢᠢᠭᠰᠠᠨ ᠠᠯᠲᠠ ᠮᠥᠩᠭᠥᠨ ᠣᠷᠬᠢᠭᠤᠯ ᠲᠠᠢ ᠂
ᠲᠠᠩᠭᠤᠳ ᠴᠡᠮᠪᠡ ᠶ᠋ᠢᠨ ᠬᠤᠩᠬᠠ ᠲᠠᠢ ᠂ ᠲᠠᠵᠢ ᠮᠠᠩᠨᠤᠭ ᠤ᠋ᠨ ᠪᠦᠷᠬᠦᠭᠦᠯ ᠲᠡᠢ ᠂
ᠬᠠᠩᠪᠤ ᠲᠣᠷᠭᠠ ᠬᠠᠯᠢᠭᠤ ᠪᠤᠯᠠᠭᠠᠨ ᠬᠤᠪᠴᠠᠰᠤ ᠲᠠᠢ ᠬᠠᠮᠲᠤᠷᠠᠭᠤᠯᠤᠨ ᠬᠤᠷᠢᠶᠠᠭᠰᠠᠨ ᠂ ᠵᠢᠨᠴᠦ ᠮᠢᠨᠴᠦ ᠳᠠᠪᠤᠤ ᠲᠡᠷᠯᠢᠭ
ᠳᠠᠯᠠᠨ ᠳᠠᠪᠬᠤᠷ ᠬᠤᠪᠴᠠᠰᠤ ᠶ᠋ᠢ ᠴᠢᠨᠢ ᠳᠠᠪᠬᠤᠷᠯᠠᠭᠤᠯᠤᠨ ᠬᠤᠷᠢᠶᠠᠭᠠᠳ ᠂
ᠳᠠᠶᠠᠩ ᠬᠠᠮᠲᠤ ᠪᠠᠷ ᠨᠢ ᠮᠢᠯᠢᠶᠠᠮᠤ
ᠵᠡᠭᠦᠨ ᠬᠣᠢᠨᠠ ᠬᠤᠷᠢᠶᠠᠭᠰᠠᠨ ᠵᠦᠢᠯ ( ᠲᠠᠨ ) ᠢ᠋ ᠰᠢᠨᠵᠢᠪᠡᠯ ᠂
ᠰᠢᠨᠡ ᠪᠠᠨᠵᠠ ᠶ᠋ᠢ ᠵᠦᠰᠦᠵᠦ ᠂ ᠰᠢᠷ ᠪᠣᠳᠣᠭ ᠢ᠋ᠶ᠋ᠠᠷ ᠰᠢᠷᠲᠡᠵᠦ
ᠰᠢᠯ ᠡᠷᠳᠡᠨᠢ ᠶ᠋ᠢᠨ ᠬᠡ ᠲᠡᠢ ᠂ᠰᠢᠪᠰᠢᠭ ᠰᠠᠢᠨ ᠤ᠋ ᠰᠢᠨᠵᠢ ᠲᠡᠢ ᠥᠨᠳᠥᠷ ᠱᠦᠭᠦᠢ ᠶ᠋ᠢᠨ ᠳᠡᠭᠡᠷᠡ ᠂
ᠵᠢᠰᠦ ᠦᠵᠡᠬᠦ ᠲᠣᠯᠢ ᠂ ᠵᠡᠭᠦᠪᠴᠢ ᠶ᠋ᠢᠨ ᠬᠠᠪᠲᠠᠭᠠ ᠂ ᠵᠦᠯᠭᠦᠭᠦᠷ ᠠᠯᠴᠢᠭᠤᠷ ᠂
ᠰᠢᠯ ᠰᠢᠵᠢᠷ ᠪᠠᠭᠤᠤ ᠪᠦᠯᠡᠵᠡᠭ᠂
ᠤᠷᠤᠭᠤᠯ ᠳ᠋ᠤ᠌ ᠲᠦᠷᠬᠢᠬᠦ ᠤᠯᠠᠭᠠᠨ ᠡᠩᠭᠡᠰᠬᠡ ᠂ ᠬᠥᠮᠦᠰᠬᠡᠨ ᠳ᠋ᠦ᠍ ᠲᠦᠷᠬᠢᠬᠦ ᠬᠥᠬᠡ ᠡᠩᠭᠡᠰᠬᠡ᠂
ᠴᠢᠷᠠᠢ ᠳ᠋ᠤ᠌ ᠲᠦᠷᠬᠢᠬᠦ ᠴᠠᠭᠠᠨ ᠣ ᠴᠥᠮ ᠪᠦᠬᠦᠨ ᠢ᠋ᠶ᠋ᠡᠷ ᠨᠢ ᠮᠢᠯᠢᠶᠠᠮᠤ !
ᠱᠦᠭᠦᠢ ᠶ᠋ᠢᠨ ᠳᠣᠲᠣᠷᠠ ᠨᠢ ᠲᠣᠷᠭᠠ ᠴᠢᠰᠴᠡᠦ ᠂ ᠲᠣᠭᠣᠳᠣᠩ ᠬᠢᠯᠢᠩ ᠂ ᠰᠢᠪᠦᠭᠡ ᠰᠢᠪᠡᠭᠦᠷ ᠂ ᠰᠢᠪᠦᠭᠡ ᠵᠡᠭᠦᠦ ᠂ ᠱᠦᠭᠦᠷ ᠰᠠᠮ ᠴᠥᠮ ᠪᠦᠬᠦᠨ ᠊ᠢ ᠮᠢᠯᠢᠶᠠᠮᠤ !
ᠤᠷᠲᠤ ᠪᠠᠨᠵᠠ ᠶ᠋ᠢ ᠵᠦᠰᠦᠵᠦ ᠂ ᠤᠷᠠᠨ ᠮᠤᠵᠢᠩ ᠳᠠᠷᠬᠠᠯᠠᠵᠤ ᠂
ᠤᠭᠠᠯᠵᠠ ᠬᠤᠸᠠᠷ ᠰᠡᠢᠯᠦᠭᠰᠡᠨ ᠂ ᠸᠠᠨ ᠵᠢᠶᠠᠰᠠ ᠲᠠᠯᠪᠢᠭᠤᠷ ᠢ᠋ ᠴᠢᠨᠢ ᠮᠢᠯᠢᠶᠠᠮᠤ !
ᠥᠩᠭᠡᠲᠦ ᠮᠣᠳᠣ ᠶ᠋ᠢ ᠦᠭᠡᠯᠡᠵᠦ ᠬᠢᠭᠰᠡᠨ ᠂ ᠥᠨᠳᠥᠷ ᠮᠣᠳᠣ ᠶ᠋ᠢ ᠳᠠᠭᠠᠷᠢᠵᠤ ᠬᠢᠭᠰᠡᠨ ᠂
ᠥᠷᠥᠮᠡ ᠵᠥᠭᠡᠬᠡᠢ ᠪᠡᠨ ᠲᠠᠯᠪᠢᠨᠠ ᠭᠡᠰᠡᠨ ᠂ ᠥᠨᠳᠥᠷ ᠰᠠᠢᠬᠠᠨ ᠡᠷᠭᠢᠭᠦᠯ ᠢ᠋ ᠴᠢᠨᠢ
ᠥᠭᠡᠬᠦ ᠲᠣᠰᠣ ᠪᠠᠷ ᠮᠢᠯᠢᠶᠠᠮᠤ !
ᠠᠯᠲᠠᠨ ᠮᠥᠩᠭᠥᠨ ᠠᠶᠠᠭᠠ ᠂ ᠠᠢᠷᠠᠭ ᠤ᠋ᠨ ᠪᠦᠳᠦᠭᠦᠨ ᠲᠦᠩᠰᠡ ᠂
ᠵᠠᠪᠢᠶᠠ ᠽᠠᠨᠳᠠᠨ ᠬᠤᠨᠳᠠᠭᠠ ᠂ ᠵᠠᠩᠴᠢ ᠶ᠋ᠢᠨ ᠨᠠᠷᠢᠨ ᠱᠠᠭᠠᠵᠠᠩ ᠂
ᠰᠢᠯ ᠪᠣᠯᠣᠷ ᠱᠠᠬᠤ ᠂ ᠰᠢᠶᠠᠩ ᠶᠠ ( ᠵᠠᠭᠠᠨ ᠤ᠋ ᠰᠣᠶᠣᠭᠠ )ᠶᠠᠰᠤᠨ ᠰᠠᠪᠬᠠ ᠂
ᠢᠦᠢ ᠱᠢ ᠬᠠᠰ ᠤ᠋ᠨ ᠬᠤᠨᠳᠠᠭᠠ ᠂ ᠡᠭᠦᠯᠡᠨ ᠬᠤᠸᠠᠷ ᠲᠠᠢ ᠱᠠᠭᠠᠵᠠᠩ ᠴᠥᠮ ᠪᠦᠬᠦᠨ ᠢ᠋ᠶ᠋ᠡᠷ ᠨᠢ ᠮᠢᠯᠢᠶᠠᠮᠤ !
ᠵᠡᠰ ᠭᠠᠤᠯᠢᠨ ᠰᠢᠨᠠᠭᠠ ᠂ ᠵᠢᠵᠸᠦ ᠬᠤᠸᠠᠷ ᠲᠠᠢ ᠳᠡᠪᠦᠷᠡ ᠂
ᠠᠶᠠᠭᠠᠨ ᠰᠢᠷᠡᠭᠡᠨ ᠦ᠌ ᠠᠯᠴᠢᠭᠤᠷ ᠵᠦᠯᠭᠦᠭᠦᠷ ᠂ ᠲᠤᠯᠭᠠ ᠶ᠋ᠢᠨ ᠬᠦᠷᠢᠶᠡ ᠂ ᠲᠤᠤᠵᠤ ᠮᠠᠯᠲᠠᠭᠤᠷ ᠂
ᠪᠠᠷᠠᠭᠠᠨ ᠤ᠋ ᠵᠦᠯᠭᠦᠭᠦᠷ ᠂ ᠪᠠᠭᠪᠠᠷ ᠫᠢᠯᠠ ᠂ ᠤᠨᠠᠴᠠ ᠲᠦᠩᠫᠦᠩ ᠬᠦᠷᠲᠡᠯᠡ ᠮᠢᠯᠢᠶᠠᠮᠤ !
ᠵᠠᠭᠤᠨ ᠴᠤᠭᠤᠷᠬᠠᠢ ᠵᠦᠢᠯ ᠂ ᠵᠤᠷᠠᠵᠤ ᠬᠤᠰᠤᠬᠤ ᠬᠤᠰᠤᠭᠤᠷ ᠂
ᠨᠢᠭᠤᠷ ᠦᠵᠡᠬᠦ ᠲᠣᠯᠢ ᠂ ᠦᠨᠡᠰᠦ ᠮᠠᠯᠲᠠᠬᠤ ᠰᠢᠨᠠᠭᠠ ᠂
ᠦᠰᠦᠨ ᠦ᠌ ᠬᠢᠲᠤᠭᠠ ᠂ ᠦᠢᠯᠡ ᠶ᠋ᠢᠨ ᠬᠠᠢᠴᠢ ᠂
ᠮᠥᠩᠭᠥᠨ ᠦ᠌ ᠰᠢᠭᠢᠴᠢᠯᠡᠭᠦᠷ ᠂ ᠮᠥᠰᠥᠨ ᠦ᠌ ᠴᠠᠷᠢᠯ ᠬᠦᠷᠲᠡᠯᠡ ᠮᠢᠯᠢᠶᠠᠮᠤ !
ᠲᠡᠭ ᠳᠥᠷᠪᠡ ᠂ ᠳᠡᠩᠨᠡᠭᠡ ᠲᠤᠭ᠂ ᠲᠡᠩᠴᠡᠭᠦᠯᠵᠦ ᠬᠢᠭᠰᠡᠨ ᠰᠠᠭᠤᠯᠠᠭᠠ ᠂ ᠭᠠᠩ ᠬᠠᠪᠬᠠᠭᠠᠲᠠᠰᠤ ᠬᠦᠷᠲᠡᠯᠡ ᠮᠢᠯᠢᠶᠠᠮᠤ !
ᠨᠠᠭᠠᠬᠤ ᠢᠯᠢᠭᠦᠷ ᠂ ᠨᠠᠭᠠᠯᠲᠠ ᠶ᠋ᠢᠨ ᠰᠢᠨᠠᠭᠠ ᠂
ᠴᠣᠣᠵᠢ ᠲᠦᠯᠬᠢᠭᠦᠷ ᠂ ᠴᠣᠬᠢᠰᠬᠤᠯ ᠴᠣᠭᠤᠯᠲᠤᠪᠤᠷᠢ᠂ ᠦᠷᠦᠮ ᠬᠠᠤᠷᠠᠢ᠂ ᠂ ᠥᠷᠥᠯᠪᠢ ᠬᠠᠨᠠᠭᠠᠷᠢ ᠬᠦᠷᠲᠡᠯᠡ ᠮᠢᠯᠢᠶᠠᠮᠤ !
ᠫᠤᠤ ᠰᠠᠭᠠᠳᠠᠭ ᠂ ᠨᠤᠮᠤ ᠰᠤᠮᠤ ᠂ ᠬᠤᠭᠤᠷ ᠶᠠᠲᠤᠭᠠ ᠂ ᠰᠢᠳᠡᠷᠡ ᠲᠣᠭᠯᠠᠭᠠᠮ ᠂
ᠴᠢᠨᠣᠠ ᠶ᠋ᠢᠨ ᠬᠠᠪᠬᠠᠨ ᠳ᠋ᠤ᠌ ᠬᠦᠷᠲᠡᠯᠡ ᠮᠢᠯᠢᠶᠠᠮᠤ !
ᠬᠣᠢᠰᠢᠯᠠᠵᠤ ᠣᠴᠢᠭᠠᠳ ᠬᠣᠷᠢᠶᠠ ᠬᠦᠷᠢᠶᠡ ᠂
ᠤᠷᠤᠭᠰᠢᠯᠠᠵᠤ ᠣᠴᠢᠭᠠᠳ ᠤᠶᠠᠭᠠ ᠱᠤᠶᠠᠬ᠋ᠠ ᠂
ᠬᠤᠳᠳᠤᠭ ᠤ᠋ᠨ ᠣᠩᠭᠣᠴᠠ ᠳ᠋ᠤ᠌ ᠨᠢ ᠬᠦᠷᠲᠡᠯᠡ ᠪᠦᠷᠢᠨ ᠮᠢᠯᠢᠶᠠᠮᠤ !
ᠭᠠᠯ ᠤ᠋ᠨ ᠬᠠᠢᠴᠢ ᠂ ᠭᠠᠷ ᠤ᠋ᠨ ᠪᠠᠷᠢᠭᠤᠯ ᠂
ᠭᠠᠮᠪᠠᠨ ᠭᠠᠨᠵᠢᠩ ᠂ ᠭᠠᠩ ᠸᠠᠭᠠᠷ ᠂ᠭᠠᠪᠠ ᠬᠦᠷᠵᠡ ᠂
ᠭᠠᠰᠠᠷ ᠪᠠᠰᠠᠷ ᠤ᠋ᠨ ᠲᠠᠪᠰᠢ ( ᠭᠠᠰᠠᠷ ᠭᠡᠰᠡᠨ ᠨᠡᠷᠡ ᠲᠡᠢ ᠨᠣᠬᠠᠢ ᠶ᠋ᠢᠨ ᠴᠠᠷ ) ᠬᠦᠷᠲᠡᠯᠡ ᠮᠢᠯᠢᠶᠠᠮᠤ !
ᠵᠠ ᠂ ᠡᠨᠡ ᠭᠡᠷ ᠦ᠋ᠨ ᠡᠵᠡᠨ ᠪᠣᠯ
ᠣᠭᠣᠨᠣ ᠶ᠋ᠢᠨ ᠬᠠᠯᠵᠠᠨ ᠪᠤᠬᠠ ᠲᠠᠢ ᠂ ᠣᠩᠭᠣᠨ ᠬᠡᠭᠡᠷ ᠠᠵᠢᠷᠭᠠ ᠲᠠᠢ ᠂
ᠬᠠᠷᠠ ᠬᠠᠯᠵᠠᠨ ᠪᠤᠤᠷᠠ ᠲᠠᠢ ᠂ ᠬᠠᠮᠠᠷ ᠬᠠᠯᠵᠠᠨ ᠬᠤᠴᠠ ᠲᠠᠢ ᠂
ᠬᠥᠬᠡ ᠬᠠᠯᠲᠠᠷ ᠤᠬᠤᠨᠠ ᠲᠠᠢ ᠂
ᠬᠣᠲᠣᠭᠣᠷ ᠳᠦᠭᠦᠷᠡᠩ ᠬᠣᠨᠢ ᠲᠠᠢ ᠂ ᠠᠭᠤᠯᠠ ᠳᠦᠭᠦᠷᠡᠩ ᠠᠳᠤᠭᠤ ᠲᠠᠢ ᠂
ᠲᠠᠯᠠ ᠳᠦᠭᠦᠷᠡᠩ ᠮᠠᠯ ᠲᠠᠢ ᠂ ᠳᠡᠪᠰᠡᠭ ᠳᠦᠭᠦᠷᠡᠩ ᠮᠥᠩᠭᠥ ᠲᠡᠢ ᠂
ᠵᠢᠯ ᠢᠷᠡᠬᠦ ᠲᠤᠲᠤᠮ ᠵᠢᠷᠭᠠᠯ ᠴᠡᠩᠭᠡᠯ ᠨᠢ ᠨᠡᠮᠡᠭᠳᠡᠵᠦ ᠂
ᠣᠨ ᠢᠷᠡᠬᠦ ᠲᠤᠲᠤᠮ ᠠᠮᠢᠳᠤᠷᠠᠯ ᠠᠳᠠᠯ ᠨᠢ ᠰᠠᠶ᠋ᠢᠵᠢᠷᠠᠭᠠᠳ᠂
ᠬᠡᠷᠪᠡ ᠰᠠᠢᠬᠠᠨ ᠱᠠᠵᠢᠨ ᠢ᠋ ᠮᠠᠨᠳᠤᠭᠤᠯᠵᠤ ᠂ ᠬᠡᠮᠵᠢᠶᠡ ᠦᠭᠡᠢ ᠰᠠᠢᠬᠠᠨ ᠪᠤᠶᠠᠨ ᠦᠢᠯᠡᠳᠦᠭᠡᠳ ᠂
ᠪᠤᠮᠠᠨ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠵᠦ ᠂ ᠪᠤᠶᠠᠨ ᠤ᠋ ᠡᠵᠡᠨ ᠪᠣᠯᠤᠭᠠᠳ ᠂
ᠪᠤᠷᠬᠠᠨ ᠤ᠋ ᠡᠮᠦᠨᠡ ᠪᠤᠭᠤᠷᠤᠯ ᠴᠠᠭᠠᠨ ᠡᠪᠦᠭᠡ ᠡᠮᠡᠭᠡᠨ ᠪᠣᠯᠲᠠᠯᠠ ᠨᠠᠰᠤᠨ ᠲᠤᠷᠰᠢᠳᠠ ᠵᠢᠷᠭᠠᠬᠤ ᠪᠣᠯᠲᠤᠭᠠᠢ ᠭᠡᠵᠦ ᠢᠷᠥᠭᠡᠶᠡ !
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠲᠠ
ᠬᠢᠨᠠᠭᠴᠢ ᠄ ᠮᠥᠴᠢᠷ ᠂ ᠣᠤᠠᠬᠠᠨᠰᠣᠡ