ᠭᠡᠷ ᠦᠨ ᠢᠷᠦᠭᠡᠯ Гэрийн ерөөл ᠢᠷᠥᠭᠡᠯ ᠮᠠᠭᠲᠠᠭᠠᠯ

ᠬᠠᠩᠭᠠᠢ ᠶᠢᠨ ᠮᠣᠳᠣ ᠶᠢ ᠬᠠᠷᠤᠭᠤᠯᠳᠠᠵᠤ ᠬᠢᠭᠰᠡᠨ
ᠬᠠᠰᠢᠷ ᠮᠤᠵᠢᠶᠠᠩ ᠤᠷᠠᠯᠠᠵᠤ ᠬᠢᠭᠰᠡᠨ
ᠨᠠᠷᠠᠰᠤ ᠮᠣᠳᠣ ᠶᠢ ᠨᠠᠭᠠᠵᠤ ᠬᠢᠭᠰᠡᠨ
ᠨᠢᠮᠭᠡᠨ ᠮᠣᠳᠣ ᠶᠢ ᠨᠡᠢᠯᠡᠭᠦᠯᠵᠦ ᠬᠢᠭᠰᠡᠨ
ᠮᠠᠭᠠᠵᠢᠨ ᠪᠤᠳᠤᠭ ᠢ ᠨᠠᠢᠷᠠᠭᠤᠯᠵᠦ ᠬᠢᠭᠰᠡᠨ
ᠮᠠᠶᠢᠭ᠋ ᠤᠨ ᠬᠡ ᠶᠢ ᠨᠢ ᠲᠣᠬᠢᠷᠠᠭᠤᠯᠵᠤ ᠬᠢᠭᠰᠡᠨ
ᠰᠠᠯᠬᠢᠨ ᠰᠠᠮᠪᠠᠷ᠎ᠠ ᠬᠠᠭᠠᠯᠭ᠎ᠠ ᠲᠠᠢ
ᠰᠠᠯᠭᠠᠵᠤ ᠲᠠᠯᠪᠢᠳᠠᠭ ᠨᠤᠭᠤᠰᠤ ᠲᠠᠢ
ᠲᠠᠪ ᠬᠢᠵᠤ ᠬᠠᠭᠠᠭᠳᠠᠳᠠᠭ
ᠲᠣᠷᠬᠢᠵᠤ ᠨᠡᠭᠡᠭᠡᠭᠳᠡᠳᠡᠭ
ᠬᠠᠭᠠᠯᠭ᠎ᠠ ᠲᠠᠢ ᠶᠤᠮ  ᠪᠠᠢᠨ᠎ᠠ᠃
ᠣᠷᠭᠢᠯ ᠰᠠᠷᠢᠳᠠᠭ ᠤᠨ ᠣᠶᠣᠭᠠᠷᠢ ᠪᠠᠷ
ᠣᠢ ᠬᠥᠪᠴᠢ ᠶᠢᠨ ᠬᠠᠶᠠᠭ᠎ᠠ ᠪᠠᠷ
ᠣᠪᠣᠯᠵᠠᠨ ᠴᠠᠯᠭᠢᠵᠤ ᠤᠷᠤᠰᠤᠭᠰᠠᠨ
ᠣᠷᠬᠣᠨ᠂ ᠰᠡᠯᠡᠩᠭᠡ
ᠣᠨᠣᠨ᠂   ᠬᠡᠷᠦᠯᠦᠨ ᠦ ᠬᠥᠪᠡᠭᠡ ᠪᠡᠷ
ᠰᠢᠷᠢᠩᠭᠢ ᠰᠢᠭᠤᠢ ᠳᠤ ᠤᠷᠭᠤᠭᠰᠠᠨ
ᠰᠢᠪᠡᠷ ᠭᠠᠩᠭᠠᠨ ᠪᠤᠷᠭᠠᠰᠤᠨ ᠳᠤᠮᠳᠠ ᠠᠴᠠ
ᠰᠢᠯᠢᠵᠦ ᠰᠠᠢᠨ ᠢ ᠨᠢ ᠰᠣᠩᠭᠣᠵᠤ ᠣᠯᠤᠭᠠᠳ
ᠰᠢᠷᠦᠭᠦᠨ ᠢᠷ ᠲᠡᠢ
ᠰᠢᠩᠭᠡᠨ ᠳᠠᠭᠤᠤ ᠲᠠᠢ
ᠰᠢᠨᠡᠬᠡᠨ ᠬᠠᠩᠭᠢᠨᠠᠭᠤᠷ ᠰᠦᠬᠡ ᠪᠡᠷ
ᠰᠢᠷᠪᠢ ᠲᠠᠰᠤ ᠴᠠᠪᠴᠢᠵᠤ ᠠᠪᠤᠭᠠᠳ
ᠨᠣᠭᠣᠭᠠᠨ ᠬᠠᠯᠢᠰᠤ᠎ ᠎ ᠶ᠋ᠢ ᠨᠢ ᠴᠡᠪᠡᠷᠯᠡᠭᠡᠳ
ᠨᠣᠢᠲᠠᠨ ᠴᠢᠬᠢ ᠶ᠋ᠢ ᠨᠢ ᠬᠠᠲᠠᠭᠠᠭᠠᠳ
ᠡ ᠰᠡᠪᠡ  ᠶ᠋ᠢ ᠨᠢ ᠳᠠᠷᠤᠭᠠᠳ
ᠥᠨᠳᠥᠷ  ᠪᠣᠭᠣᠨᠢ᠎ ᠎ ᠶ᠋ᠢ ᠨᠢ ᠰᠡᠴᠡᠭᠤᠯᠵᠤ
ᠥᠯᠵᠡᠢ ᠤᠲᠠᠰᠤᠨ ᠨᠢᠳᠦ ᠲᠠᠭᠠᠷᠠᠭᠤᠯᠵᠤ
ᠥᠷᠥᠮᠳᠡᠵᠦ ᠴᠣᠭᠣᠯᠤᠭᠰᠠᠨ
ᠥᠴᠥᠬᠡᠨ ᠨᠠᠷᠢᠨ ᠨᠦᠬᠡ ᠪᠡᠷ
ᠥ ᠦᠭᠡᠢ ᠵᠦᠰᠦᠭᠰᠡᠨ
ᠥᠷᠭᠡᠨ ᠤᠷᠲᠤ ᠦᠳᠡᠷᠢ ᠶᠢ
ᠥᠭᠡᠳᠡ ᠨᠢ ᠰᠦᠪᠡᠯᠡᠵᠦ ᠭᠠᠷᠭᠠᠭᠠᠳ
ᠡᠪᠦᠳᠦᠭᠯᠡᠵᠦ ᠳᠠᠷᠤᠵᠤ  ᠪᠠᠢᠭᠠᠳ
ᠥᠨᠳᠡᠢᠵᠦ ᠤᠭᠵᠠᠷᠠᠵᠤ
ᠵᠠᠬᠠᠯᠠᠵᠤ ᠴᠢᠩᠭᠠᠭᠠᠵᠤ
ᠴᠢᠩᠭᠠᠷᠠᠭᠤᠯᠵᠤ ᠦᠳᠡᠵᠦ
ᠴᠠᠭᠠᠨ᠎ᠠ ᠨᠠᠭᠠᠨ᠎ᠠ ᠨᠢ ᠲᠣᠪᠴᠢᠯᠠᠵᠤ ᠦᠳᠡᠭᠰᠡᠨ
ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠠᠶᠠᠯᠢᠭ ᠴᠠᠭᠠᠨ ᠬᠠᠨ᠎ᠠ ᠶᠤᠮ  ᠪᠠᠢᠨ᠎ᠠ᠃
ᠭᠠᠯ ᠤᠨ ᠭᠡᠷᠡᠯ ᠢ ᠭᠠᠳᠠᠭᠰᠢ ᠨᠢ ᠪᠠᠳᠠᠷᠠᠭᠠᠭᠰᠠᠨ
ᠨᠠᠷᠠᠨ ᠤ ᠭᠡᠷᠡᠯ ᠢ ᠨᠠᠰᠢ ᠨᠢ ᠭᠡᠢᠭᠦᠯᠦᠭᠰᠡᠨ
ᠵᠦᠢᠮᠡᠯ ᠬᠤᠰᠤᠨ ᠲᠣᠭᠣᠨᠣ ᠲᠠᠢ
ᠵᠦᠰᠦᠮᠡᠯ ᠴᠤᠭᠤᠯᠪᠤᠷᠢ ᠤᠨᠢ ᠲᠠᠢ
ᠳᠠᠯᠪᠠᠭ᠎ᠠ ᠨᠠᠪᠴᠢᠲᠤ ᠪᠠᠭᠠᠨ᠎ᠠ ᠲᠠᠢ

ᠲᠠᠢᠯᠠᠵᠤ ᠲᠣᠭᠲᠠᠭᠠᠭᠰᠠᠨ ᠰᠢᠯ ᠲᠡᠢ
ᠤᠬᠠᠭᠠᠨ ᠭᠠᠷᠭᠠᠵᠤ ᠤᠷᠠᠯᠠᠭᠰᠠᠨ
ᠤᠭᠠᠯᠵᠠ ᠭᠠᠷᠭᠠᠵᠤ ᠬᠡᠭᠡᠯᠡᠭᠰᠡᠨ
ᠤᠨᠢ᠂ ᠲᠣᠭᠣᠨᠣ᠂ ᠪᠠᠭᠠᠨ᠎ᠠ ᠲᠠᠢ ᠶᠤᠮ  ᠪᠠᠢᠨ᠎ᠠ᠃
ᠤᠯᠠᠭᠠᠨ ᠪᠤᠭᠤᠷᠤᠯ ᠵᠣᠭᠳᠣᠷ
ᠤᠨᠠᠭᠠᠨ ᠮᠣᠷᠢᠨ ᠤ ᠳᠡᠯ ᠢᠶᠡᠷ
ᠤᠷᠠᠯᠠᠵᠤ ᠬᠢᠭᠰᠡᠨ ᠴᠢᠭᠲᠠᠭ᠎ᠠ ᠨᠢ
ᠪᠠᠷᠢᠭᠰᠠᠨ ᠭᠡᠷ ᠲᠦ ᠪᠡᠨ ᠰᠦᠯᠳᠡ ᠨᠢ ᠪᠣᠯᠵᠤ
ᠪᠠᠴᠢᠮᠳᠠᠭᠤᠯᠤᠭᠰᠠᠨ ᠰᠠᠯᠬᠢᠨ ᠳᠤ
ᠠᠷᠭᠠᠮᠵᠢ ᠪᠣᠯᠳᠠᠭ ᠶᠤᠮ  ᠪᠠᠢᠨ᠎ᠠ᠃
ᠢᠳᠡᠪᠬᠢᠲᠡᠢ ᠠᠵᠢᠯᠴᠢᠨ ᠤ ᠭᠠᠷ ᠢᠶᠠᠷ
ᠡᠷᠴᠢᠮᠲᠦ ᠮᠣᠲ᠋ᠣᠷ ᠤᠨ ᠬᠦᠴᠦ ᠪᠡᠷ
ᠢᠰᠡᠭᠡᠢᠯᠡᠬᠦ ᠹᠠᠪᠷᠢᠺ ᠲᠤ
ᠡᠪᠯᠡᠭᠦᠯᠵᠦ ᠵᠤᠯᠤᠵᠤ
ᠡᠷᠭᠢᠭᠦᠯᠵᠦ ᠳᠠᠷᠤᠵᠤ ᠬᠢᠭᠰᠡᠨ ᠢᠰᠡᠭᠡᠢ ᠶᠢ
ᠡ ᠭᠠᠷᠭᠠᠯ ᠦᠭᠡᠢ ᠬᠠᠢᠴᠢᠯᠠᠵᠤ
ᠥᠭᠡᠳᠡᠰᠦ ᠭᠠᠷᠭᠠᠯ ᠦᠭᠡᠢ ᠵᠦᠢᠵᠦ
ᠥᠷᠯᠥᠭᠡ ᠦᠳᠡᠰᠢ ᠶᠢᠨ ᠵᠠᠪᠤᠨ ᠳᠤ ᠣᠶᠣᠭᠠᠳ
ᠬᠤᠢᠨ᠎ᠠ ᠤᠷᠢᠳᠤ ᠠᠴᠠ ᠪᠠᠨ ᠵᠥᠷᠢᠭᠦᠯᠵᠦ ᠨᠥᠮᠦᠷᠭᠡᠭᠰᠡᠨ ᠳᠡᠭᠡᠪᠦᠷ
ᠬᠣᠶᠠᠷ ᠬᠠᠲᠠᠪᠴᠢᠨ ᠠᠴᠠ ᠪᠠᠨ ᠡᠬᠢᠯᠡᠵᠦ ᠪᠠᠷᠢᠭᠰᠠᠨ ᠲᠤᠭᠤᠷᠭ᠎ᠠ ᠨᠢ
ᠬᠣᠯᠠ ᠵᠥᠷᠢᠵᠦ ᠡᠯᠪᠡᠭᠳᠡᠭᠰᠡᠨ ᠦᠭᠡᠢ
ᠬᠣᠪᠣᠷᠳᠠᠨ ᠳᠤᠲᠠᠵᠤ ᠪᠠᠭᠠᠳᠠᠯ ᠦᠭᠡᠢ ᠲᠠᠭᠠᠷᠠᠵᠠᠢ᠃
ᠬᠣᠷᠰᠢᠶ᠎ᠠ ᠬᠤᠳᠠᠯᠳᠤᠭᠠᠨ ᠤ ᠭᠠᠵᠠᠷ ᠠᠴᠠ
ᠲᠣᠭᠠᠯᠠᠵᠤ ᠮᠸᠲ᠋ᠷᠯᠡᠨ ᠦᠵᠡᠭᠡᠳ

ᠲᠣᠯᠣᠭᠠᠢᠵᠤ ᠡᠪᠬᠡᠭᠰᠡᠨ ᠶᠠᠩᠪᠤᠤ ᠠᠪᠴᠤ
ᠲᠠᠰᠢᠶᠠᠯᠳᠤᠵᠤ ᠡᠰᠬᠡᠭᠡᠳ
ᠲᠠᠭᠠᠷᠠᠭᠤᠯᠵᠤ ᠣᠶᠣᠭᠠᠳ
ᠳᠠᠪᠬᠤᠷᠯᠠᠵᠤ ᠨᠥᠮᠦᠷᠭᠡᠭᠰᠡᠨ ᠪᠦᠷᠢᠶᠡᠰᠦ ᠲᠡᠢ
ᠲᠠᠲᠠᠵᠤ ᠴᠢᠩᠭᠠᠯᠠᠭᠰᠠᠨ ᠪᠦᠰᠡᠯᠡᠭᠦᠷ ᠲᠡᠢ ᠶᠤᠮ  ᠪᠠᠢᠨ᠎ᠠ᠃
ᠡᠳᠦᠷ ᠨᠢ ᠭᠤᠷᠪᠠᠯᠵᠢᠨ
ᠥᠨᠴᠥᠭ ᠨᠢ ᠳᠥᠷᠪᠡᠯᠵᠢᠨ ᠡᠷᠦᠬᠡ ᠪᠡᠨ
ᠥᠭᠡᠳᠡ ᠨᠢ ᠡᠷᠭᠦᠵᠦ ᠲᠠᠯᠪᠢᠭᠠᠳ
ᠲᠦᠯᠬᠢᠵᠦ ᠳᠡᠭᠡᠭᠰᠢᠯᠡᠭᠦᠯᠦᠭᠡᠳ
ᠲᠡᠭᠰᠢᠯᠡᠵᠦ ᠲᠠᠭᠠᠷᠠᠭᠤᠯᠤᠭᠠᠳ
ᠰᠠᠶ᠋ᠢᠬᠠᠨ ᠬᠠᠳᠤᠭᠰᠠᠨ ᠰᠢᠨᠡᠬᠡᠨ ᠣᠭᠣᠰᠣᠷ  ᠨᠢ
ᠰᠠᠭᠠᠷᠠᠵᠤ ᠠᠯᠳᠠᠷᠠᠬᠤ ᠦᠭᠡᠢ
ᠰᠠᠯᠬᠢᠨ ᠳᠤ ᠳᠡᠷᠪᠡᠬᠦ ᠦᠭᠡᠢ
ᠰᠠᠢᠨ ᠠᠴᠠ ᠰᠠᠢᠨ ᠤᠶᠠᠭᠠᠳ
ᠠᠭᠠᠭᠢᠮ᠎ᠠ ᠬᠠᠯᠠᠭᠤᠨ ᠳᠤ  ᠨᠠᠷᠠ ᠨᠡᠪᠲᠡᠷᠡᠬᠦ ᠦᠭᠡᠢ
ᠠᠭᠠᠳᠠᠷ ᠪᠣᠷᠣᠭᠠᠨ ᠳᠤ ᠤᠰᠤ ᠨᠡᠪᠲᠡᠷᠡᠬᠦ ᠦᠭᠡᠢ
ᠠᠶᠤᠯᠲᠠᠢ ᠬᠦᠢᠲᠡᠨ ᠳᠤ ᠵᠢᠪᠠᠷ ᠨᠡᠪᠲᠡᠷᠡᠬᠦ ᠦᠭᠡᠢ

ᠠᠶᠠᠲᠠᠢ  ᠰᠠᠢᠬᠠᠨ ᠪᠦᠷᠢᠶᠡᠰᠦ ᠲᠡᠢ ᠪᠣᠯᠵᠠᠢ᠃
ᠡᠷᠢᠶᠡᠨ ᠳᠠᠪᠤᠤ ᠶᠢ ᠡᠪᠳᠡᠵᠦ ᠡᠰᠬᠡᠭᠡᠳ
ᠡᠪᠯᠡᠭᠦᠯᠵᠦ ᠣᠶᠣᠭᠠᠳ ᠡᠮᠵᠢᠵᠦ ᠶᠠᠩᠵᠤᠯᠠᠭᠠᠳ
ᠡᠷᠢᠶᠡᠯᠡᠵᠦ ᠥᠯᠵᠡᠢᠯᠡᠭᠰᠡᠨ ᠬᠥᠰᠢᠭᠡ᠎ ᠪᠡᠨ 

ᠡᠷᠭᠢᠨ ᠲᠣᠭᠣᠷᠢᠨ ᠳᠤ ᠨᠢ ᠲᠠᠲᠠᠵᠤ ᠲᠠᠭᠠᠷᠠᠭᠤᠯᠤᠭᠠᠳ

ᠲᠠᠩᠨᠠᠢᠯᠠᠵᠤ ᠰᠢᠷᠡᠭᠡ ᠳᠦ
ᠲᠠᠩᠭᠤᠳ ᠴᠡᠩᠮᠡ ᠪᠡᠷ ᠡᠮᠵᠢᠭᠰᠡᠨ
ᠲᠠᠪᠤ ᠵᠢᠷᠭᠤᠭᠠᠨ ᠳᠡᠪᠢᠰᠬᠡᠷ ᠢᠶᠡᠨ
ᠲᠠᠯ᠎ᠠ ᠪᠦᠷᠢ ᠡᠴᠡ ᠨᠢ ᠠᠭᠤᠯᠵᠠᠭᠤᠯᠵᠤ ᠳᠡᠪᠢᠰᠦᠭᠡᠳ
ᠥᠩᠭᠡᠯᠡᠭᠰᠡᠨ ᠴᠠᠭᠠᠨ ᠣᠷᠣᠨ ᠨᠤᠭᠤᠳ
ᠥᠳᠦᠨ ᠵᠤᠵᠠᠭᠠᠨ ᠳᠡᠷᠡᠨ ᠨᠦᠭᠦᠳ
ᠨᠡᠬᠡᠮᠡᠯ ᠰᠠᠢᠬᠠᠨ ᠪᠦᠲᠡᠭᠡᠯᠭᠡ ᠨᠦᠭᠦᠳ
ᠤᠷᠳᠤᠭᠤᠷ ᠨᠢ ᠲᠠᠲᠠᠭᠰᠠᠨ ᠬᠥᠰᠢᠭᠡᠨ ᠨᠦᠭᠦᠳ
ᠤᠭᠢᠶᠠᠵᠤ ᠢᠩᠳᠡᠦᠳᠡᠭᠰᠡᠨ ᠳᠠᠪᠤᠤᠨ ᠨᠤᠭᠤᠳ
ᠲᠣᠷᠭ᠎ᠠ ᠮᠠᠩᠨᠤᠭ ᠬᠥᠨᠵᠢᠯᠡ ᠨᠦᠭᠦᠳ
ᠲᠣᠯᠣᠭᠠᠢ ᠪᠣᠭᠣᠳᠠᠭ ᠠᠯᠴᠢᠭᠤᠷ ᠤᠳ
ᠲᠣᠬᠢᠷᠠᠭᠤᠯᠵᠤ ᠲᠠᠲᠠᠭᠰᠠᠨ ᠠᠷᠤᠪᠴᠢ ᠲᠠᠢ ᠶᠤᠮ  ᠪᠠᠢᠨ᠎ᠠ᠃
ᠳᠣᠲᠣᠷᠯᠠᠵᠤ ᠭᠠᠳᠠᠷᠯᠠᠭᠰᠠᠨ ᠥᠩᠭᠡᠴᠡᠨ ᠨᠦᠭᠦᠳ
ᠲᠣᠨᠣᠭ ᠶᠠᠩᠵᠤ ᠲᠣᠪᠣᠷᠤᠤ ᠬᠠᠳᠠᠭᠠᠰᠤᠲᠠᠢ
ᠲᠣᠮᠣ ᠰᠠᠢᠬᠠᠨ ᠬᠦᠷᠢᠨ ᠠᠪᠳᠠᠷ᠎ᠠ ᠳᠡᠭᠡᠷ᠎ᠡ
ᠲᠣᠭᠲᠠᠭᠠᠵᠤ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠵᠦᠢᠯ ᠡᠴᠡ ᠴᠢᠨᠢ
ᠲᠣᠢᠮᠦ ᠲᠠᠢ ᠭᠠᠭᠴᠠ ᠬᠣᠶᠠᠷ ᠢ ᠬᠡᠯᠡᠪᠡᠯ
ᠲᠣᠯᠣᠭᠠᠢ ᠨᠢᠭᠤᠷ᠎ ᠢᠶᠠᠨ ᠬᠠᠷᠠᠳᠠᠭ
ᠲᠣᠭᠣᠷᠢᠭᠤᠯᠵᠤ ᠬᠤᠪᠴᠠᠰᠤ ᠪᠠᠨ ᠵᠠᠰᠠᠳᠠᠭ
ᠲᠣᠮᠣ ᠵᠢᠵᠢᠭ ᠲᠣᠯᠢ ᠲᠠᠢ ᠶᠤᠮ  ᠪᠠᠢᠨ᠎ᠠ᠃
ᠨᠠᠭᠠᠵᠤ ᠬᠢᠭᠰᠡᠨ ᠨᠠᠷᠢᠯᠠᠵᠤ ᠤᠷᠠᠯᠠᠭᠰᠠᠨ ᠵᠢᠶᠠᠵᠠᠨ ᠳᠤ ᠨᠢ
ᠨᠠᠮ ᠵᠠᠰᠠᠭ ᠤᠨ ᠤᠳᠤᠷᠢᠳᠤᠭᠴᠢᠳ
ᠨᠠᠢᠵᠠ ᠠᠨᠳᠠ ᠨᠥᠬᠥᠳ ᠨᠢ
ᠠᠪᠤ᠂ ᠡᠵᠢ᠂ ᠠᠬ᠎ᠠ ᠳᠡᠭᠦᠦ ᠨᠢ
ᠠᠯᠠᠭ ᠬᠣᠩᠭᠣᠷ ᠦᠷᠡᠰ ᠦᠨ ᠬᠢ ᠨᠢ ᠵᠢᠷᠤᠭ ᠬᠥᠷᠥᠭ ᠢ
ᠠᠯᠤᠰ ᠡᠭᠦᠷᠢᠳᠡ ᠶᠢᠨ ᠳᠤᠷᠠᠰᠬᠠᠯ ᠪᠣᠯᠭᠠᠨ ᠬᠠᠳᠠᠭᠠᠯᠠᠭᠰᠠᠨ ᠶᠤᠮ  ᠪᠠᠢᠨ᠎ᠠ᠃