ᠡᠪᠦᠭᠡ ᠯᠢ ᠰᠧ ᠭᠤᠸᠠᠩ ᠦ᠋ᠨ ᠪᠠᠭᠠ ᠨᠠᠰᠤ （ ᠬᠡᠯᠡ ᠪᠢᠴᠢᠭ – ᠶᠢᠰᠦᠳᠦᠭᠡᠷ ᠳᠡᠪᠲᠡᠷ） Өвөө ли се гуангийн бага нас（ Хэл бичиг – Есдүгээр дэвтэр）
1224ᠡᠪᠦᠭᠡ ᠯᠢ ᠰᠧ ᠭᠤᠸᠠᠩ ᠦ᠋ᠨ ᠪᠠᠭᠠ ᠨᠠᠰᠤ
ᠡᠪᠦᠭᠡ ᠯᠢ ᠰᠧ ᠭᠤᠸᠠᠩ ᠪᠣᠯ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠭᠠᠵᠠᠷ ᠰᠢᠨᠵᠢᠯᠡᠭᠡᠨ ᠦ᠌ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠰᠢᠯᠭᠠᠷᠠᠭᠰᠠᠨ ᠡᠷᠳᠡᠮᠲᠡᠨ ᠶᠦ᠍ᠮ ᠃
ᠭᠡᠪᠡᠴᠦ ᠡᠬᠡ ᠣᠷᠣᠨ ᠤ᠋ ᠥᠷᠨᠢᠯ ᠬᠥᠭᠵᠢᠯ ᠪᠠ ᠰᠢᠨᠡ ᠳᠤᠮᠳᠠᠳᠤ ᠤᠯᠤᠰ ᠤ᠋ᠨ ᠪᠠᠭᠠᠴᠤᠳ ᠲᠠ ᠨᠠᠷ ᠤ᠋ᠨ ᠵᠣᠯ ᠵᠢᠷᠭᠠᠯ ᠤ᠋ᠨ ᠲᠥᠯᠥᠭᠡ ᠭᠠᠵᠠᠷ ᠳᠡᠯᠡᠬᠡᠢ ᠶ᠋ᠢ ᠡᠷᠬᠡᠰᠢᠶᠡᠯ ᠳ᠋ᠡᠭᠡᠨ ᠣᠷᠣᠭᠤᠯᠬᠤ ᠪᠠᠷ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠡᠮᠡᠴᠡᠭᠰᠡᠨ ᠯᠢ ᠰᠧ ᠭᠤᠸᠠᠩ ᠡᠪᠦᠭᠡ ᠶ᠋ᠢᠨ ᠪᠠᠭᠠ ᠨᠠᠰᠤ ᠪᠣᠯ ᠵᠣᠯ ᠵᠢᠷᠭᠠᠯ ᠦᠭᠡᠢ ᠪᠠᠭᠠ ᠨᠠᠰᠤ ᠶᠤᠮᠰᠠᠨ ᠃
ᠲᠡᠷᠡ ᠬᠠᠷᠠᠬᠠᠨ ᠪᠠᠭᠠ ᠨᠠᠰᠤ ᠪᠠᠨ ᠢᠯᠵᠢᠷᠡᠨ ᠳᠣᠷᠣᠶ᠋ᠢᠲᠠᠭᠰᠠᠨ ᠴᠢᠩ ᠤᠯᠤᠰ ᠤ᠋ᠨ ᠨᠣᠶᠠᠷᠬᠠᠯ ᠤ᠋ᠨ ᠦᠶᠡ ᠳ᠋ᠦ᠍ ᠥᠨᠭᠭᠡᠷᠡᠭᠦᠯᠦᠭᠰᠡᠨ ᠪᠢᠯᠡ ᠃
ᠯᠢ ᠰᠧ ᠭᠤᠸᠠᠩ ᠡᠪᠦᠭᠡ ᠂ 1889 ᠣᠨ ᠤ᠋ ᠠᠷᠪᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠵᠢᠷᠭᠤᠭᠠᠨ ᠤ᠋ ᠡᠳᠦᠷ ᠂ ᠬᠤᠪᠧᠢ ᠮᠣᠵᠢ ᠶ᠋ᠢᠨ ᠬᠤᠸᠠᠩ ᠭᠠᠩ ᠰᠢᠶᠠᠨ ᠤ᠋ ᠾᠦᠢ ᠯᠦᠩ ᠱᠠᠨ ᠪᠠᠯᠭᠠᠰᠤ ᠭᠡᠰᠡᠨ ᠠᠭᠤᠯᠠᠨ ᠲᠣᠰᠬᠣᠨ ᠳ᠋ᠤ᠌ ᠮᠡᠨᠳᠦᠯᠡᠵᠡᠢ ᠃ ᠲᠡᠭᠦᠨ ᠦ᠌ ᠡᠪᠦᠭᠡ ᠡᠴᠢᠭᠡ ᠪᠣᠯᠤᠨ ᠡᠮᠡᠭᠡ ᠡᠬᠡ ᠨᠢ ᠪᠦᠷ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠪᠠᠶ᠋ᠢᠬᠰᠠᠨ ᠪᠥᠭᠡᠳ ᠲᠡᠷᠡ ᠦᠶᠡ ᠳ᠋ᠦ᠍ ᠂ ᠭᠡᠷ ᠨᠢ ᠲᠤᠶ᠋ᠢᠯ ᠤ᠋ᠨ ᠶᠠᠳᠠᠭᠤ ᠂ ᠬᠦᠴᠢᠷ ᠵᠣᠪᠠᠯᠠᠩᠲᠠᠢ ᠠᠮᠢᠳᠤᠷᠠᠵᠤ ᠪᠠᠶ᠋ᠢᠵᠠᠢ ᠃ ᠡᠪᠦᠭᠡ ᠡᠴᠢᠭᠡ ᠨᠢ ᠠᠯᠢ ᠡᠷᠲᠡ ᠨᠠᠰᠤ ᠨᠥᠭᠴᠢᠭᠰᠡᠨ ᠪᠣᠯᠬᠣᠷ ᠡᠮᠡᠭᠡ ᠡᠬᠡ ᠨᠢ ᠠᠪᠤ ᠶ᠋ᠢ ᠨᠢ ᠳᠠᠭᠠᠭᠤᠯᠤᠨ ᠂ ᠪᠤᠳᠠᠭᠠ ᠭᠤᠶᠤᠨ ᠲᠡᠨᠦᠭᠦᠴᠢᠯᠡᠭᠰᠡᠭᠡᠷ ᠬᠤᠪᠧᠢ ᠮᠣᠵᠢ ᠶ᠋ᠢᠨ ᠬᠤᠸᠠᠩ ᠭᠠᠩ ᠰᠢᠶᠠᠨ ᠤ᠋ ᠾᠦᠢ ᠯᠦᠩ ᠱᠠᠨ ᠳ᠋ᠤ᠌ ᠬᠦᠷᠦᠭᠡᠳ ᠡᠪᠳᠡᠷᠬᠡᠢ ᠰᠦᠮᠡ ᠳ᠋ᠦ᠍ ᠨᠤᠲᠤᠭᠰᠢᠨ ᠰᠠᠭᠤᠪᠠ ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠮᠥᠨ ᠰᠢᠯᠭᠠᠭᠤᠯᠢ ᠶ᠋ᠢᠨ ᠳᠦᠷᠢᠮ ᠶᠠᠪᠤᠭᠤᠯᠵᠤ ᠪᠠᠶ᠋ᠢᠬᠰᠠᠨ ᠪᠣᠯᠬᠣᠷ ᠯᠢ ᠰᠧ ᠭᠤᠸᠠᠩ ᠤ᠋ᠨ ᠠᠪᠤ ᠨᠢ ᠡᠳᠦᠷ ᠲᠡᠭᠡᠨ ᠲᠦᠯᠡᠭᠡ ᠬᠠᠳᠤᠵᠤ ᠬᠤᠳᠠᠯᠳᠤᠨ ᠂ ᠦᠳᠡᠰᠢ ᠳ᠋ᠡᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠰᠤᠷᠤᠯᠴᠠᠭᠰᠠᠭᠠᠷ ᠬᠣᠵᠢᠮ ᠨᠢ ᠣᠶᠤᠲᠠᠨ ᠪᠣᠯᠵᠤ ᠂ ᠶᠡᠬᠡᠬᠡᠨ ᠰᠦᠮᠡ ᠳ᠋ᠦ᠍ ᠬᠡᠳᠦᠨ ᠰᠤᠷᠤᠭᠴᠢ ᠡᠯᠰᠡᠭᠡᠳ ᠪᠢᠴᠢᠭ ᠵᠢᠭᠠᠵᠤ ᠪᠠᠶ᠋ᠢᠵᠠᠢ ᠃
ᠯᠢ ᠰᠧ ᠭᠤᠸᠠᠩ ᠤᠤᠯ ᠨᠢ ᠯᠢ ᠵᠦᠩ ᠺᠦᠢ ᠭᠡᠳᠡᠭ ᠪᠠᠶ᠋ᠢᠵᠠᠢ ᠃ ᠶᠠᠭᠠᠬᠢᠭᠠᠳ ᠯᠢ ᠰᠧ ᠭᠤᠸᠠᠩ ᠪᠣᠯᠴᠢᠬᠠᠪᠠ ᠳᠠ ? ᠭᠡᠪᠡᠯ ᠂ ᠪᠠᠰᠠ ᠨᠢᠭᠡ ᠦᠯᠢᠭᠡᠷ ᠲᠠᠢ ᠶᠤᠮ ᠰᠢᠦ ᠃
ᠵᠦᠩ ᠺᠦᠢ ᠲᠠᠪᠤ ᠂ ᠵᠢᠷᠭᠤᠭᠠᠨ ᠨᠠᠰᠤᠨ ᠠ᠋ᠴᠠ ᠪᠠᠨ ᠡᠬᠢᠯᠡᠭᠡᠳ ᠲᠦᠯᠡᠭᠡ ᠲᠦᠯᠡᠰᠢ ᠲᠡᠭᠦᠵᠦ ᠭᠡᠷ ᠲᠡᠭᠡᠨ ᠲᠤᠰᠠ ᠪᠣᠯᠳᠠᠭ ᠠᠵᠢ ᠃ ᠲᠡᠷᠡ ᠡᠳᠦᠷ ᠲᠡᠭᠡᠨ ᠪᠣᠯ ᠡᠬᠡ ᠪᠡᠨ ᠬᠠᠪᠰᠤᠷᠤᠨ ᠠᠵᠢᠯᠯᠠᠵᠤ ᠦᠳᠡᠰᠢ ᠨᠢ ᠠᠬᠠ ᠨᠠᠷ ᠲᠠᠢ ᠪᠠᠨ ᠲᠣᠰᠣᠨ ᠳ᠋ᠧᠩ ᠦ᠋ᠨ ᠳᠣᠣᠷᠠ ᠰᠠᠭᠤᠵᠤ ᠰᠤᠷᠤᠯᠴᠠᠳᠠᠭ ᠪᠠᠶ᠋ᠢᠪᠠ ᠃ ᠠᠷᠪᠠᠨ ᠬᠣᠶᠠᠷ ᠨᠠᠰᠤᠯᠠᠯᠠ ᠃ ᠡᠵᠢ ᠨᠢ ᠬᠤᠷᠢᠮᠯᠠᠬᠤ ᠳ᠋ᠠᠭᠠᠨ ᠡᠮᠦᠰᠦᠭᠰᠡᠨ ᠨᠢᠭᠡ ᠵᠠᠬᠠ ᠬᠤᠪᠴᠠᠰᠤ ᠪᠠᠷ ᠢ᠋ᠶ᠋ᠠᠨ ᠬᠦᠦ ᠳ᠋ᠡᠭᠡᠨ ᠬᠥᠪᠥᠩ ᠳᠡᠪᠡᠯ ᠬᠢᠵᠦ ᠡᠮᠦᠰᠬᠡᠨ ᠂ ᠵᠡᠷᠭᠡᠯᠡᠳᠡᠭᠡ ᠭᠡᠷ ᠡᠴᠡ ᠪᠡᠨ ᠵᠠᠮ ᠤ᠋ᠨ ᠵᠣᠭᠣᠰ ᠵᠢᠭᠡᠯᠡᠭᠡᠳ ᠂ ᠲᠡᠭᠦᠨ ᠊ᠢ ᠦᠴᠠᠩ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠢᠯᠭᠠᠭᠤᠯᠪᠠ ᠃
ᠵᠦᠩ ᠺᠦᠢ ᠲᠡᠷᠢᠭᠦᠨ ᠳ᠋ᠦ᠍ ᠰᠢᠯᠭᠠᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠰᠢᠯᠭᠠᠯᠲᠠ ᠶ᠋ᠢ ᠬᠠᠮᠢᠶᠠᠷᠴᠤ ᠪᠠᠶ᠋ᠢᠬᠰᠠᠨ ᠪᠠᠭᠰᠢ ᠨᠠᠷ ᠨᠢ ᠲᠡᠭᠦᠨ ᠊ᠢ ᠶᠠᠳᠠᠭᠤ ᠬᠡᠦᠬᠡᠳ ᠭᠡᠵᠦ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠠᠪᠬᠤ ᠳᠤᠷᠠ ᠦᠭᠡᠢ ᠪᠠᠶ᠋ᠢᠪᠠ ᠃ ᠠᠵᠠ ᠪᠠᠷ ᠲᠡᠷᠡ ᠰᠤᠷᠭᠠᠭᠤᠯᠢ ᠶ᠋ᠢᠨ ᠨᠢᠭᠡ ᠪᠠᠭᠰᠢ ᠨᠢ ᠬᠠᠷᠢᠨ ᠵᠦᠩ ᠺᠦᠢ ᠶ᠋ᠢᠨ ᠠᠪᠤ ᠶ᠋ᠢᠨ ᠬᠢᠨᠢ ᠰᠤᠷᠤᠭᠴᠢ ᠪᠠᠶ᠋ᠢᠬᠰᠠᠨ ᠲᠤᠯᠠ ᠭᠣᠣᠯ ᠬᠠᠷᠢᠭᠤᠴᠠᠵᠤ ᠪᠠᠶ᠋ᠢᠬᠰᠠᠨ ᠪᠠᠭᠰᠢ ᠨᠠᠷ ᠲᠤ᠌ ᠄ 《 ᠵᠦᠩ ᠺᠦᠢ ᠪᠣᠯ ᠮᠢᠨᠦ ᠪᠠᠭᠰᠢ ᠶ᠋ᠢᠨ ᠬᠦᠦ ᠂ ᠰᠡᠴᠡᠨ ᠰᠡᠷᠭᠦᠯᠡᠩ ᠂ ᠰᠤᠷᠤᠯᠭᠠ ᠳ᠋ᠠᠭᠠᠨ ᠴᠢᠷᠮᠠᠶ᠋ᠢᠯᠲᠠ ᠲᠠᠢ ᠬᠡᠦᠬᠡᠳ ᠶᠦ᠍ᠮ ᠂ ᠲᠡᠭᠦᠨ ᠊ᠢ ᠠᠪᠴᠢᠬᠠ 》 ᠭᠡᠵᠦ ᠭᠤᠶᠤᠵᠠᠢ ᠃ ᠵᠦᠩ ᠺᠦᠢ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠪᠠ ᠃
ᠡᠨᠡ ᠰᠤᠷᠭᠠᠭᠤᠯᠢ ᠰᠤᠷᠤᠭᠴᠢ ᠠ᠋ᠴᠠ ᠰᠤᠷᠤᠯᠭᠠ ᠶ᠋ᠢᠨ ᠰᠦᠢᠳᠬᠡᠯ ᠪᠠ ᠬᠣᠭᠣᠯᠠᠨ ᠤ᠋ ᠮᠥᠩᠭᠥ ᠠᠪᠳᠠᠭ ᠦᠭᠡᠢ ᠪᠥᠭᠡᠳ ᠰᠠᠷᠠ ᠪᠦᠷᠢ ᠳᠣᠯᠣᠭᠠᠨ ᠯᠠᠩ ᠮᠥᠩᠭᠥ ᠥᠭᠳᠡᠭ ᠃ ᠦᠴᠠᠩ ᠤ᠋ᠨ ᠳᠡᠭᠡᠳᠦ ᠵᠡᠷᠭᠡ ᠶ᠋ᠢᠨ ᠪᠠᠭᠠ ᠰᠤᠷᠭᠠᠭᠤᠯᠢ ᠰᠠᠷᠠ ᠳ᠋ᠤ᠌ ᠨᠢᠭᠡ ᠤᠳᠠᠭᠠ ᠰᠢᠯᠭᠠᠯᠲᠠ ᠬᠢᠵᠦ ᠂ ᠲᠦᠷᠦᠭᠦᠦ ᠲᠠᠪᠤᠨ ᠨᠡᠷᠡ ᠳ᠋ᠦ᠍ ᠣᠷᠣᠭᠰᠠᠳ ᠊ᠢ ᠠᠩᠭ᠌ᠯᠢ ᠂ ᠠᠮᠧᠷᠢᠺᠠ ᠂ ᠹᠷᠠᠨᠼᠢ ᠂ ᠭᠧᠷᠮᠠᠨ ᠪᠤᠶᠤ ᠶᠠᠫᠣᠨ ᠤᠯᠤᠰ ᠲᠤ᠌ ᠬᠦᠷᠭᠡᠵᠦ ᠰᠤᠷᠤᠯᠴᠠᠭᠤᠯᠳᠠᠭ ᠪᠠᠶ᠋ᠢᠵᠠᠢ ᠃ ᠵᠦᠩ ᠺᠦᠢ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠭᠤᠷᠪᠠᠨ ᠰᠠᠷᠠ ᠳᠠᠷᠠᠭᠠᠯᠠᠨ ᠲᠡᠷᠢᠭᠦᠨ ᠨᠡᠷᠡ ᠳ᠋ᠦ᠍ ᠣᠷᠣᠭᠰᠠᠨ ᠪᠣᠯᠪᠠᠴᠤ ᠰᠤᠷᠭᠠᠭᠤᠯᠢ ᠨᠢ ᠶᠠᠳᠠᠭᠤ ᠬᠡᠦᠬᠡᠳ ᠊ᠢ ᠲᠣᠭᠣᠬᠤ ᠦᠭᠡᠢ ᠪᠣᠯᠬᠣᠷ ᠲᠡᠭᠦᠨ ᠊ᠢ ᠮᠥᠨ ᠯᠡ ᠭᠠᠳᠠᠭᠠᠳᠤ ᠳ᠋ᠤ᠌ ᠬᠦᠷᠭᠡᠵᠦ ᠰᠤᠷᠤᠯᠴᠠᠭᠤᠯᠬᠤ ᠦᠭᠡᠢ ᠪᠠᠶ᠋ᠢᠪᠠ ᠃ ᠲᠡᠭᠦᠨ ᠦ᠌ ᠠᠭᠤᠷ ᠨᠢ ᠬᠦᠷᠴᠦ ᠣᠷᠭᠣᠴᠢᠬᠠᠪᠠ ᠃ ᠭᠡᠪᠡᠴᠦ ᠰᠤᠷᠭᠠᠭᠤᠯᠢ ᠨᠢ ᠲᠡᠭᠦᠨ ᠊ᠢ ᠪᠠᠷᠢᠵᠤ ᠠᠪᠴᠢᠷᠠᠭᠠᠳ ᠂ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠰᠤᠷᠤᠯᠭᠠ ᠶ᠋ᠢᠨ ᠰᠦᠢᠳᠬᠡᠯ ᠂ ᠬᠣᠭᠣᠯᠠᠨ ᠤ᠋ ᠰᠦᠢᠳᠬᠡᠯ ᠪᠠ ᠬᠣᠷᠢᠨ ᠨᠢᠭᠡᠨ ᠯᠠᠩ ᠨᠥᠬᠥᠪᠥᠷᠢ ᠮᠥᠩᠭᠥ ᠲᠥᠯᠥᠭᠦᠯᠬᠦ ᠭᠡᠪᠡ ᠃ ᠲᠡᠷᠡ ᠶᠠᠮᠠᠷ ᠵᠣᠭᠣᠰ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠥᠯᠥᠬᠦ ᠪᠢᠯᠡ ? ᠢᠩᠭᠢᠭᠡᠳ ᠭᠤᠷᠪᠠᠨ ᠰᠠᠷᠠ ᠳᠠᠷᠠᠭᠠᠯᠠᠨ ᠪᠦᠷ ᠲᠡᠷᠢᠭᠦᠨ ᠨᠡᠷᠡ ᠳ᠋ᠦ᠍ ᠰᠢᠯᠭᠠᠭᠤᠯᠤᠭᠰᠠᠨ ᠪᠠᠶ᠋ᠢᠲᠠᠯᠠ ᠶᠠᠭᠤᠨ ᠳ᠋ᠤ᠌ ᠭᠠᠳᠠᠭᠠᠳᠤ ᠳ᠋ᠤ᠌ ᠬᠦᠷᠭᠡᠵᠦ ᠰᠤᠷᠤᠯᠴᠠᠭᠤᠯᠬᠤ ᠦᠭᠡᠢ ᠪᠣᠢ ? ᠭᠡᠵᠦ ᠰᠤᠷᠭᠠᠭᠤᠯᠢ ᠠ᠋ᠴᠠ ᠪᠠᠨ ᠲᠤᠯᠭᠠᠨ ᠠᠰᠠᠭᠤᠪᠠ ᠃ ᠰᠤᠷᠭᠠᠭᠤᠯᠢ ᠨᠢ ᠶᠣᠰᠣ ᠦᠭᠡᠢ ᠪᠣᠯᠪᠠᠴᠤ ᠡᠷᠬᠡ ᠪᠡᠷ ᠢ᠋ᠶ᠋ᠡᠨ ᠳᠠᠷᠤᠵᠤ ᠪᠠᠶ᠋ᠢᠭᠠᠳ ᠲᠡᠭᠦᠨ ᠊ᠢ ᠳᠠᠬᠢᠨ ᠢᠯᠡᠭᠦᠦ ᠨᠢᠭᠡ ᠵᠢᠯ ᠰᠤᠷᠤᠯᠴᠠᠭᠤᠯᠤᠭᠠᠳ ᠶᠠᠫᠣᠨ ᠳ᠋ᠤ᠌ ᠬᠦᠷᠭᠡᠵᠡᠢ ᠃
ᠵᠦᠩ ᠺᠦᠢ ᠤᠯᠤᠰ ᠠ᠋ᠴᠠ ᠭᠠᠷᠴᠤ ᠶᠠᠫᠣᠨ ᠳ᠋ᠤ᠌ ᠣᠴᠢᠬᠤ ᠪᠠᠲᠤᠯᠠᠪᠤᠷᠢ ᠶ᠋ᠢᠨ ᠬᠦᠰᠦᠨᠦᠭ ᠲᠠᠭᠯᠠᠬᠤ ᠳ᠋ᠠᠭᠠᠨ ᠲᠡᠷᠡ ᠂ ᠨᠡᠷᠡ ᠪᠢᠴᠢᠳᠡᠭ ᠭᠠᠵᠠᠷ ᠨᠢ ᠨᠠᠰᠤ ᠪᠠᠨ ᠪᠢᠴᠢᠴᠢᠬᠡᠵᠡᠢ ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠡᠶ᠋ᠢᠮᠦ ᠨᠢᠭᠡ ᠬᠦᠰᠦᠨᠦᠭ ᠊ᠢ ᠠᠪᠬᠤ ᠳ᠋ᠤ᠌ ᠴᠤ᠌ ᠵᠣᠭᠣᠰ ᠣᠷᠣᠳᠠᠭ ᠶᠤᠮ ᠃ ᠲᠡᠷᠡ ᠳᠠᠬᠢᠵᠤ ᠠᠪᠬᠤ ᠵᠣᠭᠣᠰ ᠦᠭᠡᠢ ᠳ᠋ᠡᠭᠡᠨ ᠠᠷᠭᠠ ᠪᠤᠰᠤ ᠠᠷᠪᠠᠨ ᠳᠥᠷᠪᠡ ᠭᠡᠵᠦ ᠪᠢᠴᠢᠭᠰᠡᠨ ᠦᠰᠦᠭ ᠊ᠢ ᠨᠢ ᠯᠢ ᠭᠡᠵᠦ ᠵᠠᠰᠠᠭᠰᠠᠨ ᠴᠢᠨᠢ ᠯᠢ ᠰᠧ ᠭᠡᠰᠡᠨ ᠪᠣᠯᠴᠢᠬᠠᠪᠠ ᠃ ᠭᠡᠪᠡᠴᠦ ᠤᠩᠰᠢᠭᠠᠳ ᠦᠵᠡᠬᠦᠯᠡᠷ 《 ᠯᠢ ᠰᠧ 》 ᠭᠡᠳᠡᠭ ᠨᠢ ᠳᠠᠩᠴᠢ ᠰᠣᠨᠣᠰᠪᠤᠷᠢ ᠦᠭᠡᠢ ᠪᠣᠯᠬᠣᠷ ᠳᠥᠷᠪᠡᠨ ᠵᠦᠭ ᠲᠦ᠍ ᠪᠦᠷ ᠭᠡᠭᠡᠨ ᠰᠠᠷᠠᠭᠤᠯ ᠭᠡᠪᠡᠯ ᠬᠠᠷᠢᠨ ᠨᠡᠯᠢᠶᠡᠳ ᠡᠪᠯᠢᠭ ᠮᠥᠷᠲᠡᠭᠡᠨ ᠤᠳᠬᠠ ᠠᠭᠤᠯᠭᠠ ᠲᠠᠢ ᠰᠢᠭ᠋ ᠰᠠᠨᠠᠭᠳᠠᠵᠤ ᠂ ᠠᠷᠤ ᠳ᠋ᠤᠨᠢ 《 ᠭᠤᠸᠠᠩ 》 ᠦᠰᠦᠭ ᠨᠡᠮᠡᠪᠡ ᠃ ᠡᠨᠡ ᠪᠣᠯ 《 ᠯᠢ ᠰᠧ ᠭᠤᠸᠠᠩ 》 ᠭᠡᠳᠡᠭ ᠨᠡᠷᠡ ᠶ᠋ᠢᠨ ᠢᠷᠡᠯᠲᠡ ᠮᠥᠨ ᠃
ᠯᠢ ᠰᠧ ᠭᠤᠸᠠᠩ ᠪᠠᠭᠠ ᠳ᠋ᠠᠭᠠᠨ ᠶᠠᠮᠠᠷ ᠴᠤ᠌ ᠣᠶᠤᠨ ᠤ᠋ ᠨᠠᠭᠠᠳᠤᠮ ᠳ᠋ᠤ᠌ ᠣᠷᠣᠯᠴᠠᠵᠤ ᠥᠨᠭᠭᠡᠷᠡᠭᠰᠡᠨ ᠦᠭᠡᠢ ᠪᠥᠭᠡᠳ ᠬᠥᠮᠦᠨ ᠦ᠌ ᠵᠢᠯᠣᠭᠣᠳᠤᠯᠭᠠ ᠶ᠋ᠢᠨ ᠳᠣᠣᠷᠠ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠠᠵᠢᠯᠯᠠᠭᠠ ᠳ᠋ᠤ᠌ ᠴᠤ᠌ ᠣᠷᠣᠯᠴᠠᠵᠤ ᠥᠨᠭᠭᠡᠷᠡᠭᠰᠡᠨ ᠦᠭᠡᠢ ᠪᠢᠯᠡ ᠃ ᠭᠡᠪᠡᠴᠦ ᠲᠡᠷᠡ ᠬᠠᠷᠠᠬᠠᠨ ᠪᠠᠭᠠ ᠠ᠋ᠴᠠ ᠪᠠᠨ ᠪᠠᠶ᠋ᠢᠭᠠᠯᠢ ᠳᠡᠯᠡᠬᠡᠢ ᠳ᠋ᠦ᠍ ᠬᠠᠶ᠋ᠢᠷᠠᠲᠠᠢ ᠪᠠᠶ᠋ᠢᠲᠠᠭ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠨ ᠣᠶᠤᠨ ᠲᠠᠷᠢᠬᠢ ᠪᠠᠨ ᠬᠥᠳᠡᠯᠭᠡᠨ ᠰᠡᠳᠬᠢᠵᠦ ᠪᠣᠳᠣᠬᠤ ᠂ ᠥᠪᠡᠷ ᠢ᠋ᠶ᠋ᠡᠨ ᠭᠠᠷ ᠬᠥᠳᠡᠯᠦᠨ ᠬᠢᠵᠦ ᠣᠷᠣᠯᠳᠣᠬᠤ ᠳᠤᠷᠠᠲᠠᠢ ᠪᠠᠶ᠋ᠢᠲᠠᠭ ᠃ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠵᠢᠭᠠᠰᠤᠨ ᠭᠥᠬᠢ ᠬᠢᠵᠦ ᠪᠠᠶ᠋ᠢᠬᠰᠠᠨ ᠂ ᠵᠢᠭᠠᠰᠤ ᠭᠥᠬᠢᠳᠡᠬᠦ ᠠᠷᠭᠠ ᠳᠠᠮ ᠊ᠢ ᠰᠤᠳᠤᠯᠵᠤ ᠪᠠᠶ᠋ᠢᠬᠰᠠᠨ ᠃ ᠲᠡᠷᠡ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡ ᠪᠡᠷ ᠵᠢᠭᠠᠰᠤ ᠭᠥᠬᠢᠳᠡᠪᠡᠯ ᠪᠤᠰᠤᠳ ᠬᠡᠦᠬᠡᠳ ᠡᠴᠡ ᠪᠦᠷ ᠠᠷᠪᠢᠨ ᠭᠥᠬᠢᠳᠡᠳᠡᠭ ᠃ ᠨᠠᠭᠤᠷ ᠲᠤ᠌ ᠣᠷᠣᠵᠤ ᠯᠢᠩᠬᠤᠠ ᠶ᠋ᠢᠨ ᠦᠨᠳᠦᠰᠦ ᠲᠡᠭᠦᠬᠦ ᠳ᠋ᠡᠭᠡᠨ ᠲᠡᠷᠡ ᠰᠢᠪᠠᠷ ᠳᠣᠲᠣᠷᠠᠬᠢ ᠤᠷᠭᠤᠭᠰᠠᠨ ᠪᠠᠶ᠋ᠢᠲᠠᠯ ᠊ᠢ ᠨᠢ ᠨᠠᠷᠢᠨ ᠠᠵᠢᠭᠯᠠᠵᠤ ᠂ ᠪᠤᠰᠤᠳ ᠬᠡᠦᠬᠡᠳ ᠡᠴᠡ ᠠᠷᠪᠢᠨ ᠪᠥᠭᠡᠳ ᠰᠠᠢᠨ ᠲᠡᠭᠦᠳᠡᠭ ᠃ ᠬᠥᠬᠡ ᠮᠥᠷᠡᠨ ᠳᠡᠭᠡᠷᠡ ᠶᠠᠪᠤᠵᠤ ᠪᠠᠶ᠋ᠢᠬ᠋ᠠ ᠬᠥᠯᠭᠡ ᠣᠩᠭᠣᠴᠠ ᠪᠠ ᠶᠡᠬᠡ ᠪᠠᠭᠠ ᠮᠣᠳᠣᠨ ᠣᠩᠭᠣᠴᠠ ᠶ᠋ᠢ ᠦᠵᠡᠭᠡᠳ ᠲᠡᠷᠡ ᠭᠡᠷ ᠲᠡᠭᠡᠨ ᠬᠠᠷᠢᠮᠠᠭᠴᠠ ᠪᠠᠨ ᠨᠢᠮᠭᠡᠨ ᠴᠠᠭᠠᠨ ᠲᠡᠮᠦᠷ ᠊ᠢ ᠬᠠᠶ᠋ᠢᠴᠢᠯᠠᠨ ᠪᠢᠴᠢᠬᠠᠨ ᠣᠩᠭᠣᠴᠠ ᠬᠢᠴᠢᠬᠡᠳᠡᠭ ᠃ ᠬᠣᠲᠠ ᠶ᠋ᠢᠨ ᠪᠠᠶᠠᠴᠤᠳ ᠤ᠋ᠨ ᠬᠡᠦᠬᠡᠳ ᠴᠠᠭᠠᠨ ᠰᠠᠷᠠ ᠳ᠋ᠤ᠌ ᠬᠤᠸᠠᠷᠲᠤ ᠳ᠋ᠧᠩ ᠬᠤᠳᠠᠯᠳᠤᠵᠤ ᠠᠪᠴᠤ ᠪᠠᠶ᠋ᠢᠬᠤ ᠶ᠋ᠢ ᠦᠵᠡᠭᠡᠳ ᠲᠡᠷᠡ ᠬᠤᠯᠤᠰᠤ ᠣᠭᠲᠣᠯᠤᠨ ᠠᠪᠴᠤ ᠬᠤᠰᠤᠵᠤ ᠱᠤᠯᠤᠵᠤ ᠪᠠᠶ᠋ᠢᠭᠠᠳ ᠶᠡᠬᠡ ᠰᠠᠢᠬᠠᠨ ᠬᠤᠸᠠᠷᠲᠤ ᠳ᠋ᠧᠩ ᠬᠢᠴᠢᠬᠡᠳᠡᠭ ᠂ ᠲᠡᠭᠦᠨ ᠦ᠌ ᠳᠣᠲᠣᠷᠠ ᠨᠢ ᠵᠤᠯᠠ ᠠᠰᠠᠭᠠᠪᠠᠯ ᠂ ᠭᠡᠷᠡᠯᠲᠦᠨ ᠳᠤᠸᠠᠯᠠᠭᠠᠳ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠳ᠋ᠧᠩ ᠡᠴᠡ ᠪᠠᠰᠠ ᠦᠵᠡᠮᠵᠢᠲᠡᠢ ᠨᠠᠷᠢᠯᠢᠭ ᠪᠠᠶ᠋ᠢᠯᠠ ᠃
ᠭᠡᠪᠡᠴᠦ ᠡᠳᠡᠭᠡᠷ ᠊ᠢ ᠪᠦᠷ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠰᠡᠳᠬᠢᠵᠦ ᠣᠷᠣᠯᠳᠣᠭᠰᠠᠨ ᠶᠤᠮ ᠰᠢᠦ ᠃ ᠣᠯᠠᠨ ᠤᠳᠠᠭᠠᠨ ᠤ᠋ ᠲᠤᠷᠰᠢᠯᠲᠠ ᠨᠢ ᠪᠠᠰᠠ ᠢᠯᠠᠭᠳᠠᠵᠤ ᠪᠢᠯᠡ ᠃ ᠬᠠᠭᠤᠴᠢᠨ ᠨᠡᠶ᠋ᠢᠭᠡᠮ ᠳ᠋ᠦ᠍ ᠵᠢᠭᠠᠯ ᠬᠡᠦᠬᠡᠳ ᠦ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠲᠤᠬᠠᠢ ᠰᠤᠳᠤᠯᠤᠯ ᠪᠠ ᠳᠤᠷᠠ ᠪᠠᠬᠠ ᠶ᠋ᠢ ᠬᠡᠨ ᠬᠥᠮᠦᠨ ᠬᠠᠯᠠᠮᠵᠢᠯᠠᠨ ᠳᠡᠮᠵᠢᠬᠦ ᠠᠵᠢ!
ᠭᠡᠪᠡᠴᠦ ᠡᠬᠡ ᠣᠷᠣᠨ ᠤ᠋ ᠪᠠᠨ ᠭᠠᠵᠠᠷ ᠰᠢᠨᠵᠢᠯᠡᠭᠡᠨ ᠦ᠌ ᠤᠶ᠋ᠢᠯᠡᠰ ᠲᠦ᠍ ᠭᠠᠪᠢᠶᠠ ᠵᠢᠳᠬᠦᠯ ᠢ᠋ᠶ᠋ᠡᠨ ᠦᠵᠡᠭᠦᠯᠵᠦ ᠂ ᠡᠨᠡ ᠪᠡᠶᠡ ᠪᠡᠨ ᠵᠣᠷᠢᠭᠤᠯᠤᠭᠰᠠᠨ ᠮᠠᠨ ᠤ᠋ ᠯᠢ ᠰᠧ ᠭᠤᠸᠠᠩ ᠡᠪᠦᠭᠡ ᠪᠣᠯ ᠶᠠᠭ ᠡᠶ᠋ᠢᠮᠦ ᠵᠢᠷᠭᠠᠯ ᠦᠭᠡᠢ ᠪᠠᠭᠠ ᠨᠠᠰᠤᠨ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠲᠤᠶᠠᠭᠠᠲᠤ ᠣᠷᠭᠢᠯ ᠊ᠢ ᠵᠣᠷᠢᠭᠰᠠᠨ ᠪᠢᠯᠡ ᠃
ᠢᠷᠡᠯᠲᠡ ᠄
2023.3.2
ᠲᠠᠪᠤᠨ ᠵᠢᠯ ᠦᠨ ᠲᠦᠷᠢᠮᠳᠦ ᠪᠠᠭᠠ ᠰᠤᠷᠭᠠᠭᠤᠯᠢ ᠳᠤ ᠦᠵᠡᠬᠦ ᠬᠡᠯᠡ ᠪᠢᠴᠢᠭ ᠶᠢᠰᠦᠳᠦᠭᠡᠷ ᠲᠡᠪᠳᠡᠷ ※
ᠦᠪᠦᠷ ᠮᠤᠩᠭᠤᠯ ᠤᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠦᠨ ᠬᠡᠪᠯᠡᠯ ᠦᠨ ᠬᠤᠷᠢᠶᠠ ᠨᠠᠶ᠋ᠢᠷᠠᠭᠤᠯᠤᠨ ᠬᠡᠪᠯᠡᠭᠦᠯᠪᠡ
ᠦᠪᠦᠷ ᠮᠤᠩᠭᠤᠯ ᠤᠨ ᠰᠢᠨᠬᠤᠸᠠ ᠨᠤᠮ ᠤᠨ ᠲᠡᠯᠭᠡᠭᠦᠷ ᠲᠠᠷᠬᠠᠭᠠᠪᠠ
ᠦᠪᠦᠷ ᠮᠤᠩᠭᠤᠯ ᠤᠨ ᠮᠤᠩᠭᠤᠯ ᠪᠢᠴᠢᠭ ᠬᠡᠪᠯᠠᠬᠦ ᠦᠢᠯᠡᠳᠪᠦᠷᠢ ᠬᠡᠪᠯᠡᠪᠡ
1981 ᠤᠨ ᠤ 5 ᠰᠠᠷᠠ ᠳᠤ ᠬᠤᠶᠠᠳᠤᠭᠠᠷ ᠬᠡᠪ ᠢ ᠬᠢᠪᠡ
1984 ᠤᠨ ᠤ 4 ᠰᠠᠷᠠ ᠳᠤ ᠲᠦᠷᠪᠡᠳᠦᠭᠡᠷ ᠤᠳᠠᠭᠠ ᠶ᠋ᠢᠨ ᠬᠡᠪᠯᠡᠯ ᠡᠴᠡ ᠰᠣᠩᠭᠣᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠶᠤᠨᠴᠡᠴᠡᠭ᠂ ᠦᠵᠢᠶᠡᠳ · ᠡᠷᠳᠡᠨᠢᠴᠡᠴᠡᠭ
ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣᠠ ᠂ ᠲᠣ᠋ · ᠨᠠᠨᠲᠢᠨ
2023.3.2