ᠮᠥᠰᠥᠯᠡᠮᠵᠢ ᠶᠢᠨ ᠦᠨᠦᠷ ᠲᠠᠢ ᠪᠠᠭᠠ ᠨᠠᠰᠤ – ᠨᠠ ᠂ ᠬᠥᠬᠡᠰᠢᠭᠤᠢ Мөслөмжийн үнэртэй бага нас – На ᠂ Хөхшгуй
428ᠮᠥᠰᠥᠯᠡᠮᠵᠢ ᠶᠢᠨ ᠦᠨᠦᠷ ᠲᠠᠢ ᠪᠠᠭᠠ ᠨᠠᠰᠤ
ᠨᠠ᠊᠂ ᠬᠦᠬᠡᠰᠢᠭᠤᠢ
ᠠᠩᠭᠢᠷ ᠪᠠᠭᠠ ᠶ᠋ᠢᠨ ᠮᠥᠷᠥᠭᠡᠳᠦᠯ ᠳᠤᠷᠠᠰᠤᠯ ᠳ᠋ᠤ᠌ ᠮᠢᠨᠢ ᠠᠷᠢᠯᠤᠰᠢ ᠦᠭᠡᠢ ᠬᠣᠴᠣᠷᠤᠭᠰᠠᠨ ᠨᠢᠭᠡ ᠰᠠᠢᠬᠠᠨ ᠦᠨᠦᠷ ᠪᠠᠶ᠋ᠢᠳᠠᠭ ᠨᠢ ᠮᠥᠰᠥᠯᠡᠮᠵᠢ ᠶ᠋ᠢᠨ ᠦᠨᠦᠷ ᠪᠣᠯᠬᠤ ᠪᠢᠯᠡ ᠃ ᠲᠡᠷᠡ ᠦᠨᠦᠷ ᠪᠠᠭᠠ ᠨᠠᠰᠤ ᠶ᠋ᠢ ᠮᠢᠨᠢ ᠠᠷᠭᠠᠳᠠᠵᠤ ᠂ ᠨᠠᠮᠠ ᠶ᠋ᠢ ᠪᠠᠯ ᠪᠤᠷᠠᠮ ᠮᠡᠲᠦ ᠡᠷᠭᠢᠴᠡᠭᠦᠯᠦᠯ ᠳ᠋ᠦ᠍ ᠪᠠᠶ᠋ᠢᠨ ᠳᠠᠬᠢᠨ ᠲᠠᠲᠠᠵᠤ ᠣᠷᠣᠭᠤᠯᠳᠠᠭ ᠰᠠᠨ ᠃
ᠪᠠᠭᠠ ᠨᠠᠰᠤ ᠪᠠᠨ ᠪᠢ ᠶᠠᠭᠷᠠᠢ ᠣᠢ ᠰᠢᠭᠤᠢ ᠶ᠋ᠢᠨ ᠲᠠᠯᠠᠪᠠᠢ ᠭᠡᠬᠦ ᠶᠠᠳᠠᠭᠤᠯᠢᠭ ᠮᠥᠷᠲᠡᠭᠡᠨ ᠪᠠᠯᠠᠷᠯᠢᠭ ᠭᠠᠵᠠᠷ ᠥᠩᠭᠡᠷᠡᠭᠡᠭᠰᠡᠨ ᠪᠢᠯᠡ ᠃ ᠲᠡᠷᠡ ᠭᠠᠵᠠᠷ ᠨᠢ ᠬᠣᠲᠣᠭᠣᠷ ᠭᠠᠵᠠᠷ ᠪᠣᠯᠬᠣᠷ ᠭᠠᠳᠠᠨᠠᠬᠢ ᠬᠥᠮᠦᠰ ᠮᠠᠨ ᠤ᠋ ᠠᠶ᠋ᠢᠯ ᠢ᠋ ᠶᠠᠭᠷᠠᠢ ᠬᠣᠲᠣᠭᠣᠷ ᠭᠡᠵᠦ ᠪᠢᠳᠡᠨ ᠢ᠋《 ᠶᠠᠭᠷᠠᠢ ᠬᠣᠲᠣᠭᠣᠷ ᠤ᠋ᠨ ᠤᠯᠤᠰ 》 ᠭᠡᠵᠦ ᠬᠡᠯᠡᠳᠡᠭ ᠃ ᠬᠡᠵᠢᠶᠡ ᠬᠣᠶ᠋ᠢᠨᠠ ᠨᠢ ᠪᠢ ᠥᠪᠡᠷ ᠦ᠋ᠨ ᠪᠢᠴᠢᠭ ᠦ᠋ᠨ ᠥᠷᠥᠭᠡ ᠪᠡᠨ 《 ᠶᠠᠭᠷᠠᠢ ᠬᠣᠲᠣᠭᠣᠷ 》 ᠢᠷᠠᠭᠤ ᠨᠠᠢᠷᠠᠭ ᠤ᠋ᠨ ᠥᠷᠥᠭᠡ ᠭᠡᠵᠦ ᠨᠡᠷᠡᠶ᠋ᠢᠳᠦᠭᠰᠡᠨ ᠮᠢᠨᠢ ᠪᠠᠭᠠ ᠨᠠᠰᠤ ᠪᠠᠨ ᠳᠤᠷᠠᠳᠬᠠᠬᠤ ᠶ᠋ᠢᠨ ᠲᠥᠯᠥᠭᠡ ᠶᠦ᠍ᠮ ᠃
ᠠᠩᠬᠠ ᠤᠳᠠᠭᠠ ᠬᠣᠰᠢᠭᠤ ᠪᠠᠯᠭᠠᠰᠤ ᠣᠷᠣᠭᠰᠠᠨ ᠮᠢᠨᠢ ᠪᠠᠷᠤᠭ ᠶᠢᠰᠦᠨ ᠨᠠᠰᠤᠲᠠᠢ ᠲᠡᠷᠡ ᠵᠢᠯ ᠦ᠋ᠨ ᠵᠤᠨ ᠰᠢᠭ᠋ ᠰᠠᠨᠠᠭᠳᠠᠵᠤ ᠪᠠᠶ᠋ᠢᠨᠠ᠃ ᠡᠵᠢ ᠬᠤᠰᠢᠭᠤᠨ ᠤ᠋ ᠡᠮᠨᠡᠯᠭᠡ ᠶ᠋ᠢᠨ ᠬᠣᠷᠢᠶᠠᠨ ᠳ᠋ᠤ᠌ ᠡᠪᠡᠳᠴᠢᠨ ᠦᠵᠡᠭᠦᠯᠬᠦ ᠪᠡᠷ ᠢᠷᠡᠬᠦ ᠳ᠋ᠦ᠍ ᠪᠡᠨ ᠨᠠᠮᠠᠶ᠋ᠢ ᠳᠠᠷᠤᠭᠠᠰᠤ ᠭᠡᠵᠦ ᠪᠣᠳᠣᠭᠰᠠᠨ ᠦᠭᠡᠢ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ ᠨᠢ ᠨᠠᠳᠠ ᠳ᠋ᠤ᠌ ᠭᠠᠳᠠᠨᠠᠬᠢ ᠶᠢᠷᠲᠢᠨᠴᠦ ᠶ᠋ᠢ ᠲᠠᠨᠢᠵᠤ 《 ᠨᠢᠳᠦ ᠨᠡᠭᠡᠭᠡᠭᠰᠡᠨ 》 ᠪᠠᠶᠠᠷᠲᠤ ᠶᠠᠪᠤᠳᠠᠯ ᠪᠣᠯᠵᠠᠢ ᠃ ᠲᠡᠷᠡ ᠤᠳᠠᠭᠠ ᠪᠢ ᠬᠣᠰᠢᠭᠤ ᠪᠠᠯᠭᠠᠰᠤ ᠭᠡᠳᠡᠭ ᠴᠢᠨᠢ ᠮᠠᠨ ᠤ᠋ ᠬᠣᠷᠢᠭᠠᠳ ᠡᠷᠦᠬᠡ ᠲᠡᠢ ᠬᠣᠲᠣᠭᠣᠷ ᠤ᠋ᠨ ᠠᠶ᠋ᠢᠯ ᠠ᠋ᠴᠠ ᠬᠢᠵᠠᠭᠠᠷ ᠦᠭᠡᠢ ᠶᠡᠬᠡ ᠭᠡᠳᠡᠭ ᠢ᠋ ᠭᠠᠶ᠋ᠢᠬᠠᠭᠰᠠᠨ ᠮᠥᠷᠲᠡᠭᠡᠨ ᠭᠤᠷᠪᠠᠨ ᠮᠥᠩᠭᠥ ᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠬᠡᠰᠡᠭ ᠮᠥᠰᠥᠯᠡᠮᠵᠢ ᠣᠯᠵᠤ ᠠᠩᠬᠠ ᠤᠳᠠᠭᠠ ᠮᠥᠰᠥᠯᠡᠮᠵᠢ ᠶ᠋ᠢᠨ ᠠᠮᠲᠠ ᠶ᠋ᠢ ᠮᠡᠳᠡᠷᠡᠭᠰᠡᠨ ᠶᠦ᠍ᠮ ᠃
ᠴᠠᠭᠠᠨ ᠰᠢᠷ ᠲᠡᠢ ᠮᠣᠳᠣᠨ ᠳᠡᠪᠰᠡᠭ ᠳᠡᠭᠡᠷᠡ ᠪᠡᠨ ᠤᠯᠠᠭᠠᠨ ᠦᠰᠦᠭ ᠲᠡᠢ ᠂ ᠴᠠᠰᠤ ᠴᠠᠭᠠᠨ ᠬᠥᠪᠥᠩ ᠪᠦᠲᠡᠭᠡᠯᠭᠡ ᠲᠡᠢ ᠮᠥᠰᠥᠯᠡᠮᠵᠢ ᠶ᠋ᠢᠨ ᠬᠠᠶ᠋ᠢᠷᠴᠠᠭ ᠢ᠋ ᠨᠡᠭᠡᠭᠡᠬᠦ ᠦᠶᠡ ᠶ᠋ᠢᠨ ᠲᠡᠷᠡ ᠦᠨᠦᠷ ᠢ᠋ ᠶᠠᠭᠤ ᠭᠡᠵᠦ ᠰᠠᠨᠠᠨᠠ ? ᠣᠳᠣ ᠪᠣᠯᠲᠠᠯᠠ ᠠᠭᠤᠰᠬᠢ ᠵᠢᠷᠦᠬᠡᠨ ᠳ᠋ᠦ᠍ ᠰᠡᠩᠭᠢᠨᠡᠵᠦ ᠪᠠᠶ᠋ᠢᠮᠠᠷ ᠰᠠᠨᠠᠭᠳᠠᠨᠠ ᠂ ᠬᠣᠭᠣᠯᠠᠢ ᠠᠮᠠᠨ ᠳ᠋ᠤ᠌ ᠠᠮᠲᠠᠭᠳᠠᠵᠤ ᠪᠠᠶ᠋ᠢᠮᠠᠷ ᠪᠣᠳᠣᠭᠳᠠᠨᠠ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠰᠡᠷᠢᠭᠦᠨ ᠰᠢᠬᠢᠷᠯᠢᠭ ᠮᠥᠷᠲᠡᠭᠡᠨ ᠠᠩᠬᠢᠯᠤᠮᠠ ᠦᠨᠦᠷ ᠪᠢᠯᠡ ? ᠲᠡᠷᠡ ᠦᠶᠡ ᠳ᠋ᠦ᠍ ᠨᠠᠳᠠ ᠠ᠋ᠴᠠ ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠬᠠᠮᠤᠭ ᠠᠮᠲᠠᠲᠠᠢ ᠶᠠᠭᠤᠮᠠ ᠶᠠᠭᠤ ᠭᠡᠪᠡᠯ ᠪᠢ ᠯᠠᠪ ᠮᠥᠰᠥᠯᠡᠮᠵᠢ ᠭᠡᠵᠦ ᠬᠠᠷᠢᠭᠤᠯᠵᠤ ᠂ ᠬᠣᠵᠢᠮ ᠥᠭᠡᠯᠡᠢ ᠪᠣᠯᠪᠠᠯ ᠶᠠᠮᠠᠷ ᠠᠵᠢᠯ ᠬᠢᠨᠡ ᠭᠡᠵᠦ ᠠᠰᠠᠭᠤᠪᠠᠯ ᠯᠠᠪ 《 ᠮᠥᠰᠥᠯᠡᠮᠵᠢ ᠬᠤᠳᠠᠯᠳᠤᠭᠴᠢ 》 ᠪᠣᠯᠤᠨᠠ ᠭᠡᠵᠦ ᠯᠡ ᠬᠡᠯᠡᠬᠦ ᠪᠠᠶ᠋ᠢᠭᠰᠠᠨ ᠃
ᠠᠭᠠᠭᠢᠮᠠ ᠵᠤᠨ ᠤ᠋ ᠬᠠᠯᠠᠭᠤᠨ ᠳ᠋ᠤ᠌ ᠮᠣᠳᠣᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠵᠣᠭᠰᠣᠭᠠᠳ ᠨᠢᠭᠡ ᠬᠡᠰᠡᠭ ᠮᠥᠰᠥᠯᠡᠮᠵᠢ ᠪᠡᠨ ᠬᠡᠳᠦᠨ ᠲᠠᠯᠠ ᠠ᠋ᠴᠠ ᠨᠢ ᠳᠣᠯᠢᠶᠠᠵᠤ ᠬᠠᠶ᠋ᠢᠯᠴᠢᠬᠠᠬᠤ ᠪᠣᠢ ᠂ ᠪᠠᠷᠠᠭᠳᠠᠴᠢᠬᠠᠬᠤ ᠪᠣᠢ ᠭᠡᠵᠦ ᠬᠠᠶ᠋ᠢᠷᠠᠯᠠᠨ ᠬᠠᠷᠠᠮᠨᠠᠨ ᠪᠠᠶ᠋ᠢᠭᠰᠠᠨ ᠵᠢᠭᠠᠯ ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠦᠰᠦᠨ ᠲᠣᠯᠢ ᠨᠢ ᠭᠡᠭᠡᠭᠳᠡᠵᠦ ᠂ ᠰᠠᠨᠴᠢᠭ ᠤ᠋ᠨ ᠦᠰᠦ ᠨᠢ ᠴᠠᠢᠭᠠᠳ ᠂ ᠥᠩᠭᠡᠷᠡᠭᠰᠡᠨ ᠦ᠌ ᠡᠨᠡ ᠬᠦ᠌ ᠳᠤᠷᠠᠰᠤᠯ ᠢ᠋ ᠪᠢᠴᠢᠵᠦ ᠰᠠᠭᠤᠨᠠ ᠭᠡᠵᠦ ᠥᠩᠭᠡᠷᠡᠬᠦ ᠬᠣᠷᠸᠠ ᠶ᠋ᠢᠨ ᠵᠢᠮᠡ ᠴᠦ᠍ ᠶᠦ᠍ᠮ ᠤᠤ ᠳᠠ ?
ᠲᠡᠷᠡ ᠤᠳᠠᠭᠠ ᠶ᠋ᠢᠨ ᠢᠳᠡᠭᠰᠡᠨ ᠮᠥᠰᠥᠯᠡᠮᠵᠢ ᠶ᠋ᠢᠨ ᠴᠠᠭᠠᠰᠤ ᠪᠠᠨ ᠪᠢ ᠭᠡᠷ ᠲᠦ᠍ ᠪᠡᠨ ᠠᠪᠠᠴᠢᠵᠤ ᠂ ᠨᠢᠭᠡ ᠳᠡᠪᠲᠡᠷ ᠦ᠋ᠨ ᠵᠠᠭᠠᠭ ᠲᠤ᠌ ᠬᠢᠭᠡᠳ ᠪᠠᠶ᠋ᠢᠨ ᠪᠠᠶ᠋ᠢᠨ ᠭᠠᠷᠭᠠᠵᠤ ᠦᠨᠦᠷᠲᠦᠳᠡᠭ ᠪᠠᠶ᠋ᠢᠭᠰᠠᠨ ᠢ᠋ᠶ᠋ᠠᠨ ᠣᠳᠣ ᠡᠷᠭᠢᠴᠡᠭᠦᠯᠵᠦ ᠪᠣᠳᠣᠭᠠᠳ ᠢᠨᠢᠶᠡᠳᠦ ᠴᠦ᠍ ᠬᠦᠷᠦᠮᠡᠷ ᠂ ᠤᠶᠠᠷᠠᠯ ᠴᠤ᠌ ᠲᠥᠷᠥᠮᠡᠷ ᠠ᠋ !
ᠬᠥᠮᠦᠨ ᠦ᠌ ᠪᠠᠭᠠ ᠨᠠᠰᠤ ᠭᠡᠵᠦ ᠶᠣᠰᠣᠲᠠᠢ ᠪᠤᠷᠬᠠᠨ ᠤ᠋ ᠱᠠᠩᠨᠠᠭᠰᠠᠨ ᠠᠯᠲᠠᠨ ᠬᠣᠷᠣᠮ ᠪᠠᠶ᠋ᠢᠵᠡᠢ ᠰᠢᠦ !
ᠮᠢᠨᠦ ᠬᠡᠦᠬᠡᠨ ᠪᠠᠭᠠ ᠳ᠋ᠤ᠌ ᠪᠠᠨ ᠠᠶᠠᠭᠠ ᠠᠯᠳᠠᠬᠤ ᠳ᠋ᠤ᠌ ᠰᠡᠷᠡᠮᠡ ᠦᠭᠡᠢ ᠲᠡᠶ᠋ᠢᠮᠤ ᠪᠥᠬᠡ ᠤᠨᠲᠠᠭᠰᠠᠨ ᠪᠠᠶ᠋ᠢᠲᠠᠯᠠ ᠪᠠᠨ ᠭᠡᠷ ᠦ᠋ᠨ ᠠᠷᠤ ᠪᠠᠷ ᠭᠠᠷᠬᠤ 《 ᠮᠥᠰᠥᠯᠡᠮᠵᠢ ᠂ ᠴᠠᠰᠤᠮᠠᠭ 》 ᠭᠡᠬᠦ ᠳᠠᠭᠤᠨ ᠳ᠋ᠤ᠌ ᠭᠡᠳᠡᠭᠡᠯᠡᠭᠦᠯᠦᠭᠰᠡᠨ ᠶᠦ᠍ᠮ ᠰᠢᠭ ᠤᠷᠪᠠᠩᠬᠢᠨ ᠰᠡᠷᠢᠵᠦ ᠂ ᠥᠪᠡᠷ ᠦ᠋ᠨ ᠳᠡᠷᠡ ᠳᠣᠣᠷᠠᠬᠢ ᠵᠠᠶ᠋ᠢᠷ ᠮᠥᠩᠭᠥ ᠪᠡᠨ ᠠᠪᠤᠭᠠᠳ ᠭᠦᠶᠦᠵᠦ ᠭᠠᠷᠳᠠᠭ ᠪᠠᠢᠭᠰᠠᠨ ᠨᠢ ᠲᠡᠷᠡ ᠵᠢᠯ ᠦ᠋ᠨ ᠤᠴᠢᠷ ᠰᠢᠭ᠋ ᠰᠠᠨᠠᠭᠳᠠᠪᠠᠴᠤ ᠥᠩᠭᠡᠷᠡᠭᠡᠳ ᠪᠠᠰᠠ ᠬᠣᠷᠢᠭᠠᠳ ᠵᠢᠯ ᠪᠣᠯᠵᠤ ᠪᠠᠶ᠋ᠢᠨᠠ ᠃ ᠨᠢᠳᠤᠨᠤᠨ ᠵᠤᠨ ᠤ᠋ ᠠᠮᠠᠷᠠᠯᠲᠠ ᠳ᠋ᠤ᠌ ᠢᠷᠡᠬᠦ ᠳ᠋ᠦ᠍ ᠪᠡᠨ ᠬᠡᠦᠬᠡᠨ ᠮᠢᠨᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠮᠥᠰᠥᠯᠡᠮᠵᠢ ᠶ᠋ᠢ ᠨᠢᠭᠡ ᠰᠦᠯᠢᠶᠣᠣ ᠤᠭᠤᠲᠠ ᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠠᠳᠠ ᠳ᠋ᠤ᠌ : 《 ᠠᠪᠤ ᠠ᠋ ! ᠣᠳᠣ ᠶ᠋ᠢᠨ ᠮᠥᠰᠥᠯᠡᠮᠵᠢ ᠶ᠋ᠢᠨ ᠠᠮᠲᠠ ᠨᠢ ᠮᠢᠨᠦ ᠪᠠᠭᠠ ᠳ᠋ᠤ᠌ ᠪᠠᠨ ᠢᠳᠡᠵᠦ ᠪᠠᠶ᠋ᠢᠭᠰᠠᠨ ᠮᠥᠰᠥᠯᠡᠮᠵᠢ ᠶ᠋ᠢᠨ ᠠᠮᠲᠠ ᠶ᠋ᠢ ᠬᠣᠯᠠ ᠬᠦᠷᠬᠦ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠵᠤ ᠪᠠᠶ᠋ᠢᠨᠠ᠂ ᠢᠲᠡᠭᠡᠬᠦ ᠦᠭᠡᠢ ᠪᠣᠯ ᠲᠠ ᠨᠢᠭᠡ ᠢᠳᠡᠵᠦ ᠦᠵᠡ ᠠ᠋ 》 ᠭᠡᠳ ᠨᠠᠳᠠ ᠳ᠋ᠤ᠌ ᠨᠢᠭᠡ ᠪᠠᠷᠢᠭᠤᠯᠤᠭᠰᠠᠨ ᠢ᠋ ᠨᠢ ᠪᠢ ᠦᠨᠡᠬᠡᠷ ᠠᠷᠭᠠᠯᠠᠵᠤ ᠪᠠᠶ᠋ᠢᠵᠤ ᠢᠳᠡᠵᠦ ᠪᠠᠷᠠᠭᠠᠭᠰᠠᠨ ᠶᠤᠮ ᠃
ᠴᠠᠭ ᠦᠶᠡ ᠬᠤᠪᠢᠷᠠᠬᠤ ᠶ᠋ᠢ ᠳᠠᠭᠠᠭᠠᠳ ᠶᠠᠭᠤ ᠪᠦᠬᠦᠨ ᠬᠤᠪᠢᠷᠠᠵᠠᠢ ᠃ ᠪᠠᠭᠠ ᠶ᠋ᠢᠨ ᠦᠶᠡ ᠶ᠋ᠢᠨ ᠬᠣᠶᠠᠷ ᠭᠤᠷᠪᠠᠨ ᠮᠥᠩᠭᠥ ᠶ᠋ᠢᠨ ᠮᠥᠰᠥᠯᠡᠮᠵᠢ ᠣᠳᠣ ᠨᠢᠭᠡ ᠬᠣᠶᠠᠷ ᠲᠥᠭᠥᠷᠢᠭ ᠪᠣᠯᠤᠨ ᠥᠰᠴᠦ ᠂ ᠳᠠᠷᠤᠮᠠᠯᠯᠠᠭᠰᠠᠨ ᠵᠢᠷᠤᠭ ᠲᠠᠢ ᠴᠠᠭᠠᠰᠤ ᠪᠠᠷ ᠭᠠᠷ ᠢ᠋ᠶ᠋ᠠᠷ ᠪᠠᠬᠠᠯᠠᠳᠠᠭ ᠪᠠᠶ᠋ᠢᠭᠰᠠᠨ ᠠ᠋ᠴᠠ ᠪᠠᠨ ᠰᠦᠯᠢᠶᠣᠣ ᠤᠭᠤᠲᠠᠨ ᠳ᠋ᠤ᠌ ᠮᠠᠰᠢᠨ ᠢ᠋ᠶ᠋ᠠᠷ ᠰᠠᠪᠠᠯᠠᠳᠠᠭ ᠪᠣᠯᠵᠠᠢ ᠃ ᠭᠡᠲᠡᠯᠡ ᠤᠤᠯ ᠤ᠋ᠨ ᠲᠡᠷᠡ ᠬᠦ᠌ ᠰᠠᠢᠬᠠᠨ ᠦᠨᠦᠷ ᠂ ᠰᠠᠢᠬᠠᠨ ᠠᠮᠲᠠ ᠨᠢ ᠴᠠᠭ ᠦᠶᠡ ᠶ᠋ᠢᠨ ᠤᠷᠤᠰᠬᠠᠯ ᠢ᠋ ᠳᠠᠭᠠᠭᠠᠳ ᠮᠢᠨᠦ ᠵᠠᠯᠠᠭᠤ ᠨᠠᠰᠤ ᠰᠢᠭ᠋ ᠪᠦᠷ ᠣᠷᠣ ᠳᠣᠷᠣ ᠦᠭᠡᠢ ᠤᠷᠤᠰᠤᠨ ᠠᠷᠢᠯᠵᠠᠢ ᠃
ᠪᠠᠭᠠ ᠶ᠋ᠢᠨ ᠦᠶᠡ ᠶ᠋ᠢᠨ ᠮᠥᠰᠥᠯᠡᠮᠵᠢ ᠶ᠋ᠢᠨ ᠦᠨᠦᠷ ᠠᠮᠲᠠ ᠶ᠋ᠢ ᠬᠣᠶᠠᠷ ᠦᠶᠡ ᠶ᠋ᠢᠨ ᠬᠥᠮᠦᠨ ᠥᠪᠡᠷ ᠥᠪᠡᠷ ᠦ᠋ᠨ ᠳᠤᠷᠠᠰᠤᠯ ᠮᠥᠷᠥᠭᠡᠳᠦᠯ ᠳᠣᠲᠣᠷᠠ ᠪᠠᠨ ᠯᠠ ᠡᠳ᠋ᠯᠡᠳᠡᠭ ᠪᠣᠯᠤᠭᠰᠠᠨ ᠢ᠋ ᠨᠡᠶ᠋ᠢᠬᠡᠮ ᠦ᠋ᠨ ᠬᠥᠭᠵᠢᠯᠲᠡ ᠭᠡᠬᠦ ᠤᠤ ? ᠤᠬᠤᠷᠢᠯᠲᠠ ᠭᠡᠬᠦ ᠤᠤ ?
ᠮᠢᠨᠦ ᠮᠥᠰᠥᠯᠡᠮᠵᠢ ᠶ᠋ᠢᠨ ᠦᠨᠦᠷ ᠲᠡᠢ ᠪᠠᠭᠠ ᠨᠠᠰᠤ ᠶ᠋ᠢ ᠨᠠᠳᠠ ᠠ᠋ᠴᠠ ᠬᠡᠨ ᠪᠤᠯᠢᠶᠠᠵᠤ ᠠᠪᠠᠴᠢᠭᠰᠠᠨ ᠪᠢᠯᠡ ? ᠮᠢᠨᠦ ᠬᠡᠦᠬᠡᠨ ᠦ᠌ ᠡᠷᠢᠵᠦ ᠰᠤᠷᠠᠵᠤ ᠪᠠᠶ᠋ᠢᠭᠠ ᠮᠥᠰᠥᠯᠡᠮᠵᠢ ᠶ᠋ᠢᠨ ᠲᠡᠷᠡ ᠰᠠᠢᠬᠠᠨ ᠦᠨᠦᠷ ᠠᠮᠲᠠ ᠶ᠋ᠢ ᠬᠡᠨ ᠥᠭᠡᠷᠡᠲᠦᠭᠦᠯᠦᠭᠰᠡᠨ ᠪᠢᠯᠡ ?
ᠮᠥᠰᠥᠯᠡᠮᠵᠢ ᠪᠤᠶᠤ ᠮᠢᠨᠦ ᠮᠥᠰᠥᠯᠡᠮᠵᠢ ᠶ᠋ᠢᠨ ᠦᠨᠦᠷ ᠲᠡᠢ ᠪᠠᠭᠠ ᠨᠠᠰᠤ ᠮᠥᠷᠥᠭᠡᠳᠦᠯ ᠳᠤᠷᠠᠰᠤᠯ ᠳ᠋ᠤ᠌ ᠮᠢᠨᠢ ᠴᠡᠯ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠬᠥᠬᠡᠷᠡᠪᠡᠴᠦ ᠂ ᠦᠰᠦ ᠭᠡᠵᠢᠭᠡᠨ ᠳ᠋ᠦ᠍ ᠪᠠᠭᠤᠬᠤ ᠥᠯ ᠪᠤᠭᠤᠷᠤᠯ ᠬᠢᠷᠠᠭᠤ ᠪᠣᠯᠤᠨ ᠦᠨᠡᠨ ᠬᠤᠳᠠᠯ ᠢ᠋ ᠨᠢ ᠣᠯᠬᠤ ᠦᠭᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠡᠷᠢᠶᠡᠨ ᠪᠠᠷᠠᠭᠠᠨ ᠮᠢᠨᠦ ᠰᠡᠳᠬᠢᠯ ᠦ᠋ᠨ ᠠᠲᠠᠷ ᠲᠤ᠌ ᠡᠯᠡᠰᠦ ᠰᠢᠭ ᠰᠢᠭᠤᠷᠤᠨᠠ ᠃
ᠠᠩᠬᠠ ᠲᠤᠮᠲᠠᠳᠤ ᠶᠢᠨ ᠡᠪᠦᠯ ᠦᠨ ᠠᠮᠠᠷᠠᠯᠲᠠ ᠶᠢᠨ ᠳᠠᠰᠬᠠᠯ
< ᠠᠮᠲᠠᠷᠬᠠᠨ ᠤᠩᠰᠢᠬᠤᠢ > ᠠᠴᠠ ᠬᠠᠭᠤᠯᠤᠨ ᠪᠢᠴᠢᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠸᠠ
ᠬᠢᠨᠠᠭᠴᠢ᠄ ᠴᠣᠯᠮᠣᠨᠲᠤᠶᠠᠭᠠ ᠪᠠᠭ᠍ᠰᠢ