ᠭᠡᠷ ᠮᠢᠯᠢᠶᠠᠬᠤ ᠢᠷᠦᠭᠡᠯ Гэр мялаах ерөөл ᠢᠷᠥᠭᠡᠯ ᠮᠠᠭᠲᠠᠭᠠᠯ

ᠲᠦᠮᠡᠨ ᠥᠯᠵᠡᠢ ᠪᠦᠷᠢᠳᠦᠭᠰᠡᠨ
ᠲᠥᠷᠥ ᠤᠯᠤᠰ ᠢ ᠪᠠᠲᠤᠳᠬᠠᠭᠰᠠᠨ
ᠲᠡᠭᠦᠰ ᠶᠡᠬᠡ ᠵᠢᠷᠭᠠᠯ ᠤᠨ
ᠲᠦᠪᠰᠢᠨ ᠰᠠᠢᠨ ᠡᠳᠦᠷ ᠭᠡᠵᠦ
ᠰᠠᠷ᠎ᠠ ᠶᠢᠨ ᠰᠠᠢᠨ ᠢ ᠰᠠᠭᠠᠳᠠᠨ ᠬᠦᠯᠢᠶᠡᠵᠦ
ᠡᠳᠦᠷ ᠦᠨ ᠰᠠᠢᠨ ᠢ ᠥᠨᠵᠢᠨ ᠬᠦᠯᠢᠶᠡᠵᠦ
ᠥᠨᠥᠳᠥᠷ ᠦᠨ ᠡᠳᠦᠷ ᠢ
ᠡᠭᠦᠷᠢᠳᠡ ᠶᠢᠨ ᠲᠡᠦᠬᠡᠲᠦ ᠰᠠᠢᠨ ᠡᠳᠦᠷ ᠭᠡᠵᠦ
ᠥᠨᠳᠥᠷ ᠳᠡᠨᠵᠢ ᠳᠡᠭᠡᠷ᠎ᠡ
ᠥᠷᠭᠥᠭᠡ ᠪᠡᠨ ᠪᠠᠷᠢᠵᠤ ᠪᠠᠢᠭ᠎ᠠ ᠶᠤᠮ ᠪᠠᠢᠨ᠎ᠠ
ᠪᠠᠷᠢᠭᠰᠠᠨ ᠭᠠᠵᠠᠷ ᠢ ᠰᠢᠨᠵᠢᠯᠡᠵᠦ
ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯ᠎ᠠ ᠠᠴᠠ ᠨᠢ ᠬᠠᠷᠠᠪᠠᠯ
ᠪᠠᠷᠰ ᠠᠷᠰᠯᠠᠩ ᠤᠨ ᠰᠢᠨᠵᠢ ᠲᠡᠢ
ᠪᠠᠢᠷᠢ ᠪᠠᠢᠳᠠᠯ ᠢ ᠠᠵᠢᠭᠯᠠᠪᠠᠯ
ᠪᠠᠳᠮ᠎ᠠ ᠯᠢᠩᠬᠤ᠎ᠠ ᠴᠡᠴᠡᠭ ᠰᠢᠭ
ᠪᠠᠳᠠᠷᠠᠵᠤ ᠳᠡᠯᠭᠡᠷᠡᠮᠡᠷ ᠭᠠᠵᠠᠷ ᠲᠤ
ᠪᠠᠷᠢᠭᠰᠠᠨ ᠶᠤᠮ ᠪᠠᠢᠨ᠎ᠠ᠃
ᠨᠠᠢ᠍ᠮᠠᠨ ᠲᠠᠯ᠎ᠠ ᠤᠷᠤᠭᠤ ᠨᠢ ᠤᠶᠠᠭᠰᠠᠨ
ᠨᠠᠶᠠᠨ ᠬᠣᠶᠠᠷ ᠣᠭᠣᠰᠣᠷ ᠲᠠᠢ
ᠲᠠᠰᠢᠶ᠎ᠠ ᠵᠥᠷᠢᠭᠦᠯᠭᠡ ᠪᠦᠷᠢ ᠶᠢ
ᠳᠠᠷᠤᠵᠤ ᠤᠶᠠᠭᠰᠠᠨ
ᠳᠠᠯᠠᠨ ᠬᠣᠶᠠᠷ ᠣᠭᠣᠰᠣᠷ ᠲᠠᠢ
ᠳᠠᠯᠠᠢ ᠴᠠᠭᠠᠨ ᠥᠷᠭᠥᠭᠡ ᠪᠠᠢᠨ᠎ᠠ᠃
ᠣᠷᠤᠯᠴᠠᠭᠤᠯᠵᠤ ᠬᠢᠭᠰᠡᠨ ᠵᠦᠢᠯ ᠦᠳ ᠢ
ᠣᠨᠴᠠᠯᠠᠵᠤ ᠵᠠᠷᠢᠮ ᠢ ᠳᠤᠷᠠᠳᠪᠠᠯ᠂
ᠬᠣᠢᠳᠤ ᠬᠠᠩᠭᠠᠢ ᠶᠢᠨ ᠪᠤᠷᠭᠠᠰᠤ ᠪᠠᠷ
ᠬᠠᠪᠢᠷᠭ᠎ᠠ ᠶᠠᠭᠤ ᠶᠢ ᠨᠢ ᠬᠢᠭᠰᠡᠨ
ᠬᠠᠨᠳᠠᠭᠠᠢ ᠪᠤᠭᠤ ᠶᠢᠨ ᠵᠣᠭᠣᠭ ᠢᠶᠠᠷ
ᠨᠠᠭᠠᠨ᠎ᠠ ᠴᠠᠭᠠᠨ᠎ᠠ ᠠᠴᠠ ᠲᠣᠪᠴᠢᠯᠠᠭᠰᠠᠨ
ᠬᠠᠨ᠎ᠠ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠤᠷᠢᠳᠤ ᠬᠠᠩᠭᠠᠢ ᠶᠢᠨ ᠮᠣᠳᠣ ᠪᠠᠷ
ᠤᠨᠢ ᠶᠠᠭᠤ ᠶᠢ ᠨᠢ ᠬᠢᠭᠰᠡᠨ
ᠤᠨᠠᠭ᠎ᠠ ᠳᠠᠭᠠᠨ ᠤ ᠬᠢᠯᠭᠠᠰᠤ ᠪᠠᠷ
ᠰᠠᠭᠠᠯᠳᠤᠷᠭ᠎ᠠ ᠶᠠᠭᠤ ᠶᠢ ᠨᠢ ᠬᠢᠭᠰᠡᠨ
ᠤᠨᠢ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠬᠠᠩᠭᠠᠢ ᠶᠢᠨ ᠮᠣᠳᠣ ᠶᠢ ᠬᠠᠭᠠᠯᠵᠤ ᠬᠢᠭᠰᠡᠨ
ᠬᠠᠷᠠᠭᠤᠯ ᠤᠨ ᠢᠷ ᠢᠶᠡᠷ ᠥᠭᠡᠯᠡᠵᠦ ᠬᠢᠭᠰᠡᠨ
ᠬᠠᠮᠤᠭ ᠠᠮᠢᠲᠠᠨ ᠢ ᠬᠠᠱᠠᠩ ᠲᠣᠭᠲᠠᠭᠠᠭᠰᠠᠨ
ᠬᠠᠭᠠᠯᠭ᠎ᠠ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠬᠤᠰᠤ ᠮᠣᠳᠣ ᠶᠢ ᠴᠠᠪᠴᠢᠵᠤ ᠬᠢᠭᠰᠡᠨ
ᠬᠤᠷᠤᠤ ᠳᠠᠭ᠎ᠠ ᠶᠢ ᠥᠷᠥᠮᠳᠡᠵᠦ ᠬᠢᠭᠰᠡᠨ
ᠨᠠᠷᠠᠨ ᠤ ᠭᠡᠷᠡᠯ ᠢ
ᠨᠠᠰᠢ ᠣᠷᠣᠭᠤᠯᠤᠭᠴᠢ

ᠭᠠᠯ ᠤᠨ ᠭᠡᠷᠡᠯ ᠢ
ᠭᠠᠳᠠᠭᠰᠢ ᠳᠡᠯᠭᠡᠷᠡᠭᠦᠯᠦᠭᠴᠢ
ᠬᠣᠷᠯᠣ ᠡᠷᠳᠡᠨᠢ ᠶᠢᠨ ᠰᠢᠨᠵᠢᠲᠡᠢ
ᠲᠣᠭᠣᠨᠣ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠳᠠᠯᠠᠢ ᠴᠠᠭᠠᠨ ᠳᠡᠭᠡᠪᠦᠷ ᠲᠡᠢ
ᠳᠠᠷᠠᠭᠠᠷ ᠴᠠᠭᠠᠨ ᠲᠤᠭᠤᠷᠭ᠎ᠠ ᠲᠠᠢ
ᠬᠣᠰᠢᠯᠠᠩ ᠬᠢᠯᠭᠠᠰᠤᠨ ᠪᠦᠰᠡᠯᠡᠭᠦᠷ ᠲᠡᠢ
ᠲᠠᠩᠨᠠᠢ ᠰᠢᠷᠢᠭᠡᠰᠦ ᠲᠡᠢ ᠡᠭᠦᠳᠡ ᠲᠡᠢ
ᠤᠭᠠᠯᠵᠠ ᠰᠢᠷᠢᠭᠡᠰᠦ ᠲᠡᠢ ᠡᠷᠦᠬᠡ ᠲᠡᠢ
ᠴᠥᠮ ᠪᠦᠷᠢᠨ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠣᠷᠣᠭ᠎ᠠ ᠮᠣᠷᠢᠨ ᠤ ᠳᠡᠯ ᠢᠶᠡᠷ
ᠣᠷᠢᠶᠠᠨ ᠲᠣᠮᠵᠢ ᠬᠢᠭᠰᠡᠨ
ᠣᠷᠣᠭᠰᠠᠨ ᠪᠤᠤᠷ᠎ᠠ ᠶᠢᠨ ᠵᠣᠭᠳᠣᠷ ᠢᠶᠠᠷ
ᠣᠶᠣᠵᠤ ᠰᠢᠷᠵᠢ ᠬᠢᠭᠰᠡᠨ
ᠣᠭᠲᠠᠷᠭᠤᠢ ᠶᠢᠨ ᠰᠠᠯᠬᠢ ᠲᠠᠢ
ᠲᠡᠮᠡᠴᠡᠯᠳᠦᠨ ᠪᠠᠢᠳᠠᠭ
ᠣᠭᠣᠰᠣᠷ ᠪᠦᠴᠡ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠥᠷᠭᠡᠨ ᠡᠭᠦᠳᠡ ᠶᠢ ᠨᠢ ᠡᠷᠭᠦᠵᠦ ᠣᠷᠣᠭᠠᠳ
ᠥᠨᠳᠥᠷ ᠪᠣᠱᠣᠭ᠎ᠠ ᠶᠢ ᠨᠢ ᠠᠯᠬᠤᠵᠤ ᠣᠷᠣᠭᠠᠳ
ᠪᠠᠷᠠᠭᠤᠨ ᠠᠪᠳᠠᠷ᠎ᠠ ᠶᠢ ᠨᠢ ᠨᠡᠭᠡᠭᠡᠵᠦ ᠦᠵᠡᠪᠡᠯ
ᠪᠠᠷᠰ ᠤᠨ ᠠᠷᠠᠰᠤ᠂
ᠪᠠᠭᠠᠪᠠᠭᠠᠢ᠂ ᠴᠢᠨᠣ᠎ᠠ
ᠦᠨᠡᠭᠡ᠂ ᠪᠤᠯᠠᠭ᠎ᠠ
ᠬᠢᠷᠰᠠ᠂ ᠮᠠᠨᠤᠤᠯ
ᠬᠥᠳᠡᠷ ᠦᠨ ᠠᠷᠠᠰᠤ ᠬᠦᠷᠲᠡᠯ᠎ᠡ
ᠴᠥᠮ ᠪᠦᠷᠢᠨ. ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠵᠡᠭᠦᠨ ᠠᠪᠳᠠᠷ᠎ᠠ ᠶᠢ
ᠨᠡᠭᠡᠭᠡᠵᠦ ᠦᠵᠡᠪᠡᠯ
ᠵᠦᠢᠯ ᠪᠦᠷᠢ ᠶᠢᠨ ᠡᠷᠳᠡᠨᠢ
ᠵᠦᠰᠦᠮᠡᠯ ᠲᠣᠷᠭ᠎ᠠ
ᠰᠢᠬᠠᠮᠠᠯ ᠴᠠᠢ
ᠨᠡᠬᠡᠮᠡᠯ ᠪᠠᠷᠠᠭ᠎ᠠ ᠬᠦᠷᠲᠡᠯ᠎ᠡ
ᠴᠥᠮ ᠪᠦᠷᠢᠨ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠬᠣᠢᠳᠤ ᠠᠪᠳᠠᠷ᠎ᠠ ᠶᠢ ᠨᠡᠭᠡᠭᠡᠵᠦ ᠦᠵᠡᠪᠡᠯ
ᠬᠤᠢ ᠪᠠᠷ ᠲᠣᠷᠭ᠎ᠠ
ᠬᠠᠩᠵᠠ ᠪᠠᠷ ᠴᠠᠢ
ᠬᠤᠯᠤᠰᠤᠨ ᠯᠢᠩᠪᠦ
ᠬᠤᠭᠤᠷ ᠶᠠᠲᠤᠭ᠎ᠠ
ᠪᠢᠷ ᠶᠠᠩ ᠲᠠᠢ
ᠪᠢᠴᠢᠭ ᠳᠠᠩᠰᠠ
ᠱᠠᠭ᠎ᠠ ᠰᠢᠲᠠᠷ᠎ᠠ
ᠱᠠᠭ᠎ᠠ ᠶᠢᠨ ᠰᠤᠮᠤ
ᠡᠷ᠎ᠡ ᠶᠢᠨ ᠵᠣᠳᠣᠭ
ᠡᠪ ᠦᠨ ᠴᠠᠪᠠᠤ
ᠬᠤᠷᠳᠤᠨ ᠮᠣᠷᠢᠨ ᠤ ᠬᠤᠰᠤᠭᠤᠷ

ᠬᠤᠷ᠎ᠠ ᠰᠡᠭᠦᠯᠡᠨ ᠦ ᠪᠣᠭᠣᠯᠲᠠ ᠬᠦᠷᠲᠡᠯ᠎ᠡ
ᠴᠥᠮ ᠪᠦᠷᠢᠨ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠲᠠᠩᠭᠤᠳ ᠴᠡᠩᠮᠡᠨ ᠡᠮᠵᠢᠶᠡᠷᠢ ᠲᠡᠢ
ᠲᠠᠪᠤᠨ ᠳᠠᠪᠬᠤᠷ ᠭᠤᠳᠤᠰ ᠲᠠᠢ᠃
ᠲᠠᠰᠢ ᠮᠠᠩᠨᠤᠭ ᠬᠥᠨᠵᠢᠯᠡ ᠲᠡᠢ
ᠲᠠᠩᠰᠤᠭ ᠰᠠᠢᠬᠠᠨ ᠣᠷᠣ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠲᠡᠭᠦᠨ ᠦ ᠳᠠᠭᠠᠤ ᠳᠤ ᠠᠪᠳᠠᠷ᠎ᠠ ᠶᠢ ᠨᠡᠭᠡᠭᠡᠵᠦ ᠦᠵᠡᠪᠡᠯ
ᠨᠢᠭᠤᠷ ᠤᠨ ᠲᠣᠯᠢ
ᠨᠢᠳᠦᠨ ᠦ ᠰᠢᠯ
ᠰᠢᠳᠦᠨ ᠦ ᠱᠤᠸᠠᠵᠠ
ᠱᠦᠭᠦᠷ ᠰᠠᠮ
ᠠ᠋ ᠰᠠᠪᠠᠨ ᠬᠦᠷᠲᠡᠯ᠎ᠡ
ᠴᠥᠮ ᠪᠦᠷᠢᠨ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠣᠷᠣᠨ ᠤ ᠳᠡᠭᠡᠳᠦ ᠲᠠᠯ᠎ᠠ ᠶᠢᠨ  ᠬᠠᠢᠷᠴᠠᠭ ᠳᠡᠭᠡᠷ᠎ᠡ
ᠤᠶᠤᠬᠤ ᠤᠲᠠᠰᠤ
ᠤᠭᠳᠤᠯᠬᠤ  ᠬᠠᠢᠴᠢ
ᠣᠯᠠᠨ ᠵᠦᠢᠯ ᠦᠨ ᠶᠠᠭᠤᠮ᠎ᠠ
ᠴᠥᠮ ᠪᠦᠷᠢᠨ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠬᠠᠷ᠎ᠠ ᠬᠢᠯᠢᠩ ᠬᠥᠪᠡᠭᠡ ᠲᠡᠢ
ᠬᠠᠩᠪᠤ ᠲᠣᠷᠭᠠᠨ ᠬᠥᠰᠢᠭ ᠲᠡᠢ
ᠬᠠᠨᠠᠨ ᠬᠡ ᠰᠢᠷᠢᠭᠡᠰᠦ ᠲᠡᠢ
ᠲᠠᠯ᠎ᠠ ᠶᠢᠨ ᠲᠠᠪᠤᠨ ᠲᠣᠭᠣᠷᠢᠭᠤᠯᠭ᠎ᠠ ᠲᠠᠢ
ᠴᠥᠮ ᠪᠦᠷᠢᠨ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠲᠥᠷᠥ ᠶᠢᠨ ᠳᠥᠷᠪᠡᠨ ᠲᠣᠲᠣᠭᠣ ᠲᠠᠢ
ᠲᠡᠮᠦᠷ ᠳᠥᠷᠪᠡᠨ ᠰᠢᠷ ᠲᠡᠢ
ᠭᠠᠩ ᠬᠤᠶᠠᠭ ᠴᠠᠭᠠᠷᠢᠭ ᠲᠠᠢ
ᠭᠠᠯ ᠤᠨ ᠲᠤᠯᠭ᠎ᠠ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠪᠠᠯᠪᠠ ᠶᠢᠨ ᠳᠠᠷᠬᠠᠨ ᠪᠠᠯᠪᠠᠵᠤ ᠬᠢᠭᠰᠡᠨ
ᠬᠠᠰ ᠤᠨ ᠳᠠᠷᠬᠠᠨ ᠬᠠᠳᠤᠵᠤ ᠬᠢᠭᠰᠡᠨ
ᠬᠠᠢᠴᠢ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃
ᠣᠷᠣᠰ ᠤᠨ ᠳᠠᠷᠬᠠᠨ ᠣᠪ ᠢ ᠨᠢ ᠣᠯᠤᠭᠰᠠᠨ
ᠮᠣᠩᠭᠣᠯ ᠤᠨ ᠳᠠᠷᠬᠠᠨ ᠮᠠᠶ᠋ᠢᠭ ᠢ ᠨᠢ ᠣᠯᠤᠭᠰᠠᠨ
ᠲᠡᠮᠦᠷ ᠦᠨ ᠳᠠᠷᠬᠠᠨ ᠲᠥᠭᠡ ᠴᠢᠭᠢ ᠶᠢ ᠨᠢ ᠲᠣᠬᠢᠷᠠᠭᠤᠯᠤᠭᠰᠠᠨ
ᠳᠥᠷᠪᠡᠨ ᠬᠥᠯᠲᠡᠢ ᠰᠢᠷᠡᠭᠡ ᠰᠢᠭ
ᠳᠥᠷᠪᠡᠯᠵᠢᠨ ᠵᠣᠣ ᠲᠠᠢ ᠮᠣᠷᠢ ᠰᠢᠭ᠋
ᠰᠢᠷᠡᠭᠡ ᠪᠥᠬᠡᠲᠡᠢ ᠲᠡᠮᠡᠭᠡ ᠰᠢᠭ
ᠭᠠᠢᠬᠠᠮᠰᠢᠭ᠌ᠲᠤ ᠽᠠᠨᠳᠠᠨ ᠡᠷᠭᠢᠭᠦᠯᠭᠡ
ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ
ᠭᠠᠷ ᠳᠠᠩᠬᠤ
ᠭᠠᠯ ᠤᠨ ᠰᠢᠯᠡᠭᠡᠪᠦᠷ
ᠬᠤᠤ ᠳᠣᠩᠪᠤ
ᠬᠤᠪᠢᠩ ᠭᠥᠨᠵᠢᠶ᠎ᠡ
ᠬᠣᠭᠣᠯᠠᠨ ᠤ ᠲᠦᠮᠫᠡᠨ
ᠢᠳᠡᠭᠡᠨ ᠦ ᠲᠠᠪᠠᠭ
ᠬᠦᠷᠲᠡᠯ᠎ᠡ ᠴᠥᠮ ᠪᠦᠷᠢᠨ᠂ ᠲᠡᠭᠦᠨ ᠢ ᠮᠢᠯᠢᠶᠠᠶ᠎ᠠ᠃