ᠮᠥᠯᠵᠢᠯ ᠳᠦ ᠮᠢᠩᠭᠠᠨ ᠠᠷᠭᠠ ᠲᠠᠢ – ᠬᠠᠰᠪᠠᠷᠰ Мөлжилд мянган аргатай – Хасбарс
483ᠮᠥᠯᠵᠢᠯ ᠳᠦ ᠮᠢᠩᠭᠠᠨ ᠠᠷᠭᠠ ᠲᠠᠢ
ᠳᠠᠷᠮᠠᠵᠠᠪ ᠡᠨᠡ ᠬᠡᠳᠦᠨ ᠡᠳᠦᠷ ᠲᠣᠩ ᠤᠷᠮᠠ ᠦᠭᠡᠢ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠪᠠᠶ᠋ᠢᠪᠠ ᠃ ᠤᠴᠢᠷ ᠨᠢ ᠶᠣᠰᠢ ᠭᠡᠳᠡᠭ ᠪᠠᠶᠠᠨ ᠤ᠋ ᠳ᠋ᠤ᠌ ᠨᠢᠭᠡ ᠪᠢᠷᠠᠭᠤ ᠪᠠᠷ ᠵᠢᠷᠭᠤᠭᠠᠨ ᠰᠠᠷᠠ ᠬᠦᠴᠦ ᠶᠠᠪᠤᠭᠠᠳ ᠭᠠᠷᠴᠤ ᠢᠷᠡᠬᠦ ᠦᠶᠡ ᠳ᠋ᠦ᠍ ᠶᠣᠰᠢ ᠪᠠᠶᠠᠨ ᠄ 《 ᠴᠢᠮᠠᠲᠤ ᠥᠭᠬᠦ ᠭᠡᠰᠡᠨ ᠪᠢᠷᠠᠭᠤ ᠰᠢᠪᠠᠷᠳᠠᠭᠠᠳ ᠦᠬᠦᠴᠢᠬᠡᠵᠡᠢ 》 ᠭᠡᠳ ᠶᠠᠭᠤ ᠴᠤ᠌ ᠥᠭᠭᠦᠭᠰᠡᠨ ᠦᠭᠡᠢ ᠃
ᠶᠣᠰᠢ ᠪᠠᠶᠠᠨ ᠤ᠋ ᠬᠠᠷᠭᠢᠰ ᠲᠤ᠌ ᠳᠠᠷᠮᠠᠵᠠᠪ ᠲᠤᠶ᠋ᠢᠯ ᠢ᠋ᠶ᠋ᠠᠷ ᠬᠣᠷᠣᠰᠴᠤ ᠰᠠᠭᠤᠲᠠᠯᠠ ᠂ ᠲᠡᠳᠡᠨ ᠦ᠌ ᠬᠢᠨ ᠡᠴᠡ ᠵᠢᠷᠠ ᠳᠠᠯᠠᠨ ᠭᠠᠵᠠᠷ ᠬᠣᠯᠠ ᠰᠠᠭᠤᠵᠤ ᠪᠠᠶ᠋ᠢᠬᠤ ᠬᠣᠶᠠᠷ ᠮᠢᠩᠭᠠ ᠭᠠᠷᠤᠢ ᠬᠣᠨᠢ ᠲᠠᠢ ᠵᠠᠭᠤ ᠭᠠᠷᠤᠢ ᠦᠬᠡᠷ ᠲᠡᠢ ᠣᠤᠠᠰᠥ᠋ᠷᠦᠩ ᠭᠡᠳᠡᠭ ᠪᠠᠶᠠᠨ ᠲᠡᠭᠦᠨ ᠊ᠢ ᠬᠦᠴᠦ ᠬᠥᠯᠥᠰᠥᠯᠡᠵᠦ ᠠᠪᠬᠤ ᠪᠠᠷ ᠡᠷᠢᠵᠦ ᠢᠷᠡᠪᠡ ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠶᠠᠳᠠᠭᠤ ᠬᠥᠮᠦᠨ ᠪᠠᠶᠠᠳ ᠨᠣᠶᠠᠳ ᠊ᠢ ᠡᠷᠢᠵᠦ ᠬᠦᠴᠦ ᠶᠠᠪᠤᠵᠤ ᠠᠮᠢ ᠵᠠᠭᠤᠳᠠᠭ ᠠ᠋ᠴᠠ ᠪᠢᠰᠢ ᠂ ᠪᠠᠶᠠᠳ ᠨᠣᠶᠠᠳ ᠶᠠᠳᠠᠭᠤ ᠬᠥᠮᠦᠨ ᠊ᠢ ᠡᠷᠢᠵᠦ ᠣᠴᠢᠳᠠᠭ ᠤᠴᠢᠷ ᠲᠤᠩ ᠬᠣᠪᠣᠷ ᠪᠢᠯᠡ ᠃ ᠣᠤᠠᠰᠥ᠋ᠷᠦᠩ ᠳᠠᠷᠮᠠᠵᠠᠪ ᠲᠠᠢ ᠠᠭᠤᠯᠵᠠᠭᠠᠳ ᠂ ᠪᠦᠳᠦᠭᠦᠨ ᠬᠠᠮᠠᠷ ᠢ᠋ᠶ᠋ᠠᠨ ᠰᠡᠷᠲᠡᠯᠵᠡᠭᠦᠯᠦᠨ ᠂ ᠵᠡᠷᠲᠡᠭᠡᠷ ᠨᠢᠳᠦ ᠪᠡᠨ ᠠᠨᠢᠪᠴᠢᠵᠤ ᠂ ᠨᠢᠭᠡ ᠰᠣᠨᠢᠬᠠᠨ ᠢᠨᠢᠶᠡᠭᠡᠳ ᠳᠠᠷᠮᠠᠵᠠᠪ ᠊ᠢ ᠬᠥᠯᠥᠰᠥᠯᠡᠵᠦ ᠬᠣᠨᠢ ᠬᠠᠷᠢᠭᠤᠯᠠᠭᠤᠯᠬᠤ ᠰᠠᠨᠠᠭᠠ ᠪᠠᠨ ᠬᠡᠯᠡᠪᠡ ᠃ ᠵᠠᠯᠭᠠᠭᠠᠳ ᠪᠠᠰᠠ ᠰᠡᠷᠪᠡᠭᠡᠷ ᠰᠠᠬᠠᠯ ᠢ᠋ᠶ᠋ᠠᠨ᠄ 《 ᠴᠢ ᠨᠠᠳᠠᠳᠤ ᠵᠢᠷᠭᠤᠭᠠᠨ ᠰᠠᠷᠠ ᠬᠦᠴᠦ ᠶᠠᠪᠤᠵᠤ ᠥᠭᠪᠡᠯ ᠪᠢ ᠲᠠᠪᠢᠨ ᠬᠣᠨᠢ ᠥᠭᠴᠦ ᠰᠠᠭᠠᠯᠭᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠵᠤᠨ ᠨᠠᠮᠤᠷ ᠤ᠋ᠨ ᠨᠣᠣᠰᠣ ᠶ᠋ᠢ ᠨᠢ ᠪᠠᠰᠠ ᠪᠦᠷ ᠥᠭᠭᠦᠨᠡ ᠃ ᠳᠡᠭᠡᠷᠡ ᠨᠢ ᠪᠠᠰᠠ ᠨᠢᠭᠡ ᠪᠦᠬᠦᠯᠢ ᠪᠥᠰ ᠂ ᠨᠢᠭᠡ ᠵᠦᠢᠷᠡᠢ ᠰᠢᠨᠡ ᠪᠤᠯᠢᠭᠠᠷᠢᠨ ᠭᠤᠲᠤᠯ ᠥᠭᠭᠦᠨᠡ 》 ᠭᠡᠵᠦ ᠶᠡᠬᠡ ᠯᠡ ᠳᠣᠲᠣᠨᠣᠰᠣᠭ ᠬᠡᠯᠡᠪᠡ ᠃ ᠳᠠᠷᠮᠠᠵᠠᠪ ᠠᠷᠪᠠᠨ ᠬᠡᠳᠦᠨ ᠵᠢᠯ ᠪᠤᠰᠤᠳ ᠤ᠋ᠨ ᠬᠣᠨᠢ ᠦᠬᠡᠷ ᠊ᠢ ᠬᠠᠷᠢᠭᠤᠯᠤᠨ ᠵᠠᠷᠤᠭᠳᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠡᠶ᠋ᠢᠮᠦ ᠬᠥᠩᠭᠡᠨ ᠵᠠᠩ ᠲᠠᠢ ᠪᠠᠶᠠᠨ ᠊ᠢ ᠶᠡᠷᠦ ᠣᠯᠵᠤ ᠦᠵᠡᠭᠰᠡᠨ ᠦᠭᠡᠢ ᠃ ᠲᠡᠭᠦᠨ ᠊ᠢ ᠶᠣᠨᠲᠣᠨ ᠯᠠᠮᠠ ᠪᠠ ᠶᠣᠰᠢ ᠪᠠᠶᠠᠨ ᠲᠠᠢ ᠠᠳᠠᠯᠢᠳᠬᠠᠵᠤ ᠦᠵᠡᠪᠡᠯ ᠵᠦᠭᠡᠷ ᠰᠢᠭ ᠬᠥᠮᠦᠨ ᠪᠣᠯᠬᠣᠷ ᠡᠨᠡ ᠯᠠᠪ ᠰᠠᠢᠨ ᠬᠥᠮᠦᠨ ᠪᠣᠯᠤᠯᠲᠠᠢ ᠭᠡᠵᠦ ᠪᠣᠳᠣᠭᠠᠳ ᠂ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠵᠥᠪᠰᠢᠶᠡᠷᠡᠵᠦ ᠂ ᠭᠡᠷ ᠢ᠋ᠶ᠋ᠡᠨ ᠠᠪᠤᠨ ᠣᠤᠠᠰᠥ᠋ᠷᠦᠩ ᠦ᠋ᠨ ᠭᠠᠳᠠᠨᠠ ᠪᠠᠭᠤᠪᠠ ᠃
ᠳᠠᠷᠮᠠᠵᠠᠪ ᠡᠭᠦᠳᠡᠨ ᠳ᠋ᠦ᠍ ᠨᠢ ᠢᠷᠡᠵᠦ ᠪᠠᠭᠤᠬᠤ ᠲᠠᠢ ᠵᠡᠷᠭᠡ ᠣᠤᠠᠰᠥ᠋ᠷᠦᠩ ᠶᠡᠬᠡ ᠯᠡ ᠬᠥᠩᠭᠡᠨ ᠱᠦᠩᠭᠡᠨ ᠮᠠᠶᠢᠬ ᠭᠠᠷᠭᠠᠵᠤ ᠭᠡᠷ ᠲᠦ᠋ᠨᠢ ᠢᠷᠡᠭᠡᠳ ᠵᠡᠷᠲᠡᠭᠡᠷ ᠨᠢᠳᠦ ᠪᠡᠨ ᠠᠨᠢᠪᠠᠯᠵᠠᠭᠤᠯᠤᠭᠰᠠᠭᠠᠷ ᠄ 《 ᠳᠠᠷᠮᠠᠵᠠᠪ ᠠ᠋ ! ᠡᠨᠡ ᠵᠢᠯ ᠮᠠᠨ ᠤ᠋ ᠬᠣᠨᠢᠨ ᠤ᠋ ᠲᠠᠷᠭᠤ ᠮᠠᠭᠤ ᠂ ᠰᠠᠭᠠᠭᠠᠳ ᠪᠠᠰᠠ ᠰᠦ ᠭᠠᠷᠬᠤ ᠴᠤ᠌ ᠦᠭᠡᠢ ᠃ ᠲᠡᠭᠡᠬᠦᠯᠡᠷ ᠬᠣᠨᠢᠨ ᠤ᠋ ᠣᠷᠣᠨ ᠳ᠋ᠤ᠌ ᠪᠢ ᠴᠢᠮᠠᠲᠤ ᠭᠤᠷᠪᠠᠨ ᠰᠠᠢᠨ ᠦᠨᠢᠶᠡ ᠥᠭᠭᠦᠶᠡ ᠂ ᠪᠣᠯᠤᠨᠠ ᠤᠤ ? 》 ᠭᠡᠵᠡᠢ ᠃ ᠶᠠᠮᠠᠷ ᠵᠡᠷᠭᠡ ᠶ᠋ᠢᠨ ᠭᠤᠷᠪᠠᠨ ᠰᠠᠢᠨ ᠦᠨᠢᠶᠡ ᠪᠣᠯᠪᠠᠴᠤ ᠲᠠᠪᠢᠨ ᠬᠣᠨᠢ ᠶ᠋ᠢ ᠶᠠᠭᠠᠬᠢᠵᠤ ᠭᠦᠢᠴᠡᠬᠦ ᠪᠣᠢ ! ᠲᠡᠭᠡᠪᠡᠯ ᠬᠠᠪᠤᠷ ᠨᠠᠮᠤᠷ ᠤ᠋ᠨ ᠨᠣᠣᠰᠣ ᠶ᠋ᠢ ᠨᠢ ᠪᠠᠰᠠ ᠣᠯᠵᠤ ᠠᠪᠬᠤ ᠦᠭᠡᠢ ᠪᠣᠯᠵᠠᠢ ᠭᠡᠵᠦ ᠳᠠᠷᠮᠠᠵᠠᠪ ᠪᠠᠬᠠᠨ ᠲᠠᠲᠠᠭᠠᠯᠵᠠᠵᠤ ᠪᠠᠶ᠋ᠢᠬᠤ ᠶ᠋ᠢ ᠣᠤᠠᠰᠥ᠋ᠷᠦᠩ ᠦᠵᠡᠭᠡᠳ ᠂ ᠪᠠᠰᠠ ᠨᠢᠭᠡ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠢᠨᠢᠶᠡᠵᠦ ᠄ 《 ᠳᠡᠭᠦᠦ ᠮᠢᠨᠢ ᠠ᠋ ᠂ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠮᠤᠷ ᠪᠠᠶ᠋ᠢᠭᠠᠷᠠᠢ ᠂ ᠴᠢᠮᠠ ᠰᠢᠬ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠮᠦᠨ ᠊ᠢ ᠪᠢ ᠶᠠᠭᠠᠬᠢᠪᠠᠴᠤ ᠭᠣᠮᠣᠳᠠᠭᠠᠬᠤ ᠦᠭᠡᠢ ᠶᠦ᠍ᠮ 》 ᠭᠡᠯᠡ ᠃ ᠣᠤᠠᠰᠥ᠋ᠷᠦᠩ ᠡᠶ᠋ᠢᠮᠦ ᠰᠠᠢᠬᠠᠨ ᠦᠭᠡ ᠬᠡᠯᠡᠭᠡᠳ ᠪᠠᠶ᠋ᠢᠬᠤ ᠪᠣᠯᠬᠣᠷ ᠳᠠᠷᠮᠠᠵᠠᠪ ᠠᠷᠭᠠ ᠦᠭᠡᠢ ᠬᠦᠯᠢᠶᠡᠵᠦ ᠠᠪᠤᠭᠠᠳ ᠂ ᠮᠠᠷᠭᠠᠲᠠ ᠠ᠋ᠴᠠ ᠨᠢ ᠬᠣᠨᠢ ᠬᠠᠷᠢᠭᠤᠯᠵᠤ ᠡᠬᠢᠯᠡᠯᠡ ᠃ ᠬᠡᠳᠦᠨ ᠬᠣᠨᠣᠭ ᠪᠣᠯᠤᠭᠰᠠᠨ ᠦᠭᠡᠢ ᠳᠠᠷᠮᠠᠵᠠᠪ ᠲᠤ᠌ ᠣᠤᠠᠰᠥ᠋ᠷᠦᠩ ᠦ᠋ᠨ ᠬᠢᠨ ᠭᠤᠷᠪᠠᠨ ᠦᠨᠢᠶᠡ ᠪᠡᠨ ᠰᠠᠯᠭᠠᠵᠤ ᠥᠬ᠋ᠪᠡ ᠃ ᠠᠶᠠ ! ᠨᠢᠭᠡ ᠨᠢ ᠬᠣᠶᠠᠷ ᠬᠥᠬᠥ ᠨᠢ ᠲᠠᠲᠠᠭᠤ ᠬᠦᠷᠡᠭᠴᠢ ᠦᠨᠢᠶᠡ ᠂ ᠨᠢᠭᠡ ᠨᠢ ᠰᠢᠳᠦᠯᠡᠩ ᠭᠤᠨᠵᠢᠨ ᠦᠨᠢᠶᠡ ᠂ ᠂ ᠪᠠᠰᠠ ᠨᠢᠭᠡ ᠨᠢ ᠬᠥᠮᠦᠨ ᠳ᠋ᠦ᠍ ᠣᠷᠣᠮᠠᠷ ᠠᠭᠠᠰᠢ ᠲᠠᠢ ᠤᠯᠠᠭᠴᠢ ᠦᠨᠢᠶᠡ ᠪᠠᠶ᠋ᠢᠵᠠᠢ ᠂ ᠳᠠᠷᠮᠠᠵᠠᠪ ᠤ᠋ᠨ ᠡᠬᠡᠨᠡᠷ ᠳᠡᠯᠭᠡᠷ ᠤᠯᠠᠭᠴᠢ ᠦᠨᠢᠶᠡ ᠶ᠋ᠢ ᠨᠢ ᠰᠠᠭᠠᠬᠤ ᠭᠡᠳ ᠳᠡᠷᠭᠡᠳᠡ ᠨᠢ ᠣᠴᠢᠭᠠᠳ ᠰᠠᠭᠤᠲᠠᠯᠠ ᠰᠦᠨ ᠰᠠᠭᠤᠯᠠᠭᠠ ᠶ᠋ᠢ ᠨᠢ ᠲᠡᠶ᠋ᠢᠷᠦᠨ ᠶᠠᠪᠤᠭᠤᠯᠤᠭᠠᠳ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠨᠢ ᠦᠰᠦᠷᠦᠨ ᠭᠠᠷᠪᠠ ᠃ ᠤᠶᠠᠭᠠᠳ ᠰᠠᠭᠠᠬᠤ ᠭᠡᠰᠡᠨ ᠴᠢᠨᠢ ᠪᠡᠶᠡ ᠳ᠋ᠡᠭᠡᠨ ᠳᠡᠭᠡᠰᠦ ᠬᠠᠯᠠᠭᠠᠬᠤ ᠦᠭᠡᠢ ᠃ ᠬᠦᠷᠡᠭᠴᠢ ᠦᠨᠢᠶᠡ ᠨᠢ ᠲᠤᠭᠤᠯ ᠢ᠋ᠶ᠋ᠠᠨ ᠵᠦᠳᠡᠭᠦᠦ ᠪᠠᠶ᠋ᠢᠨᠠ ᠂ ᠰᠢᠳᠦᠯᠡᠩ ᠭᠤᠨᠵᠢᠨ ᠠ᠋ᠴᠠ ᠨᠢᠭᠡ ᠯᠡ ᠠᠶᠠᠭᠠ ᠰᠦ ᠭᠠᠷᠤᠨᠠ ᠃ ᠳᠠᠷᠮᠠᠵᠠᠪ ᠤ᠋ᠨ ᠨᠢᠭᠡ ᠭᠡᠷ ᠳᠥᠷᠪᠡᠨ ᠠᠮᠠ ᠬᠥᠮᠦᠨ ᠡᠲᠦᠶ᠋ᠢᠬᠡᠨ ᠰᠦ ᠪᠡᠷ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ ⁉ ᠲᠡᠳᠡ ᠲᠤᠩ ᠶᠡᠬᠡ ᠲᠥᠪᠡᠭᠳᠡᠪᠡ ᠃ ᠣᠤᠠᠰᠥ᠋ᠷᠦᠩ ᠦ᠋ᠨ ᠳ᠋ᠦ᠍ ᠶᠠᠪᠤᠬᠤ ᠪᠠᠨ ᠪᠠᠶ᠋ᠢᠴᠢᠬᠠᠶᠠ ᠭᠡᠬᠦ ᠳ᠋ᠦ᠍ ᠲᠡᠶ᠋ᠢᠮᠦ ᠬᠣᠯᠠ ᠭᠠᠵᠠᠷ ᠠ᠋ᠴᠠ ᠨᠡᠭᠦᠭᠡᠳ ᠢᠷᠡᠴᠢᠬᠡᠵᠡᠢ ᠃ ᠲᠡᠷᠭᠡ ᠦᠬᠡᠷ ᠦᠭᠡᠢ ᠶᠠᠳᠠᠭᠤ ᠳᠠᠷᠮᠠᠵᠠᠪ ᠲᠤ᠌ ᠨᠡᠭᠦᠵᠦ ᠪᠠᠭᠤᠬᠤ ᠪᠣᠯ ᠮᠠᠰᠢ ᠪᠡᠷᠬᠡ ᠬᠡᠷᠡᠭ ᠰᠢᠦ ᠂ ᠡᠪᠳᠡᠷᠬᠡᠢ ᠬᠠᠨᠠ ᠰᠠᠯᠲᠠᠷᠬᠠᠢ ᠪᠦᠷᠢᠶᠡᠰᠦ ᠶ᠋ᠢ ᠡᠪᠯᠡᠭᠦᠯᠦᠭᠡᠳ ᠲᠠᠯᠪᠢᠬᠤ ᠳ᠋ᠤ᠌ ᠬᠣᠶᠠᠷ ᠡᠳᠦᠷ ᠣᠷᠣᠨᠠ ᠃ ᠳᠠᠬᠢᠭᠠᠳ ᠪᠣᠳᠣᠪᠠᠯ ᠡᠨᠳᠡ ᠡᠴᠡ ᠭᠠᠷᠤᠭᠰᠠᠨ ᠴᠤ᠌ ᠪᠤᠰᠤᠳ ᠲᠤ᠌ ᠬᠦᠴᠦ ᠶᠠᠪᠤᠵᠤ ᠵᠠᠷᠤᠭᠳᠠᠬᠤ ᠯᠠ ᠬᠡᠷᠡᠭ ᠠ᠋ ᠃ ᠬᠠᠮᠤᠭ ᠰᠡᠭᠦᠯ ᠳ᠋ᠦ᠍ᠨᠢ ᠡᠬᠡᠨᠡᠷ ᠳᠡᠯᠭᠡᠷ ᠲᠡᠢ ᠪᠡᠨ ᠵᠥᠪᠯᠡᠭᠡᠳ ᠂ ᠣᠤᠠᠰᠥ᠋ᠷᠦᠩ ᠊ᠢ ᠡᠷᠢᠵᠦ ᠂ ᠰᠠᠢᠨ ᠦᠨᠢᠶᠡ ᠥᠭᠭᠦᠭᠡᠴᠢ ᠭᠡᠵᠦ ᠭᠤᠶᠤᠪᠠ ᠃ ᠣᠤᠠᠰᠥ᠋ᠷᠦᠩ ᠰᠣᠨᠣᠰᠤᠭᠠᠳ ᠮᠥᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠡᠷᠲᠡᠭᠡᠷ ᠨᠢᠳᠦ ᠪᠡᠨ ᠠᠨᠢᠪᠴᠢᠨ ᠂ ᠬᠢ ᠬᠢ ᠭᠡᠵᠦ ᠢᠨᠢᠶᠡᠯᠡ ᠃ ᠶᠠᠮᠠᠷ ᠤᠴᠢᠷ ᠠ᠋ᠴᠠ ᠶᠤᠮ ᠪᠤᠤ ᠮᠡᠳᠡ ᠂ ᠳᠠᠷᠮᠠᠵᠠᠪ ᠲᠡᠭᠦᠨ ᠦ᠌ ᠡᠨᠡ ᠵᠠᠩᠰᠢᠯ ᠳ᠋ᠤ᠌ ᠡᠨᠡ ᠤᠳᠠᠭᠠ ᠲᠤᠩ ᠶᠡᠬᠡ ᠳᠤᠷᠠ ᠦᠭᠡᠶ᠋ᠢᠴᠡᠪᠡ ᠃ ᠶᠠᠭ ᠯᠠ ᠣᠤᠠᠰᠥ᠋ᠷᠦᠩ ᠨᠢᠳᠦᠨ ᠦ᠌ ᠠᠨᠢᠯᠲᠠ ᠳ᠋ᠠᠭᠠᠨ ᠶᠠᠮᠠᠷ ᠨᠢᠭᠡᠨ ᠵᠡᠪᠡ ᠨᠢᠭᠤᠵᠤ ᠂ ᠢᠨᠢᠶᠡᠳᠦᠨ ᠳ᠋ᠡᠭᠡᠨ ᠶᠠᠮᠠᠷ ᠨᠢᠭᠡᠨ ᠬᠢᠲᠤᠭᠠ ᠡᠪᠦᠷᠯᠡᠭᠡᠳ ᠵᠢᠷᠦᠬᠡ ᠶ᠋ᠢ ᠨᠢ ᠣᠭᠲᠣᠯᠬᠤ ᠭᠡᠵᠦ ᠪᠠᠶ᠋ᠢᠬᠤ ᠰᠢᠬᠠᠭᠤ ᠰᠠᠨᠠᠭᠳᠠᠵᠠᠢ ᠃ ᠣᠤᠠᠰᠥ᠋ᠷᠦᠩ ᠪᠠᠬᠠᠨ ᠤᠳᠠᠰᠬᠢᠭᠡᠳ ᠄ 《 ᠮᠠᠨ ᠤ᠋ ᠡᠬᠡᠨᠡᠷ ᠊ᠢ ᠪᠢ ᠂ ᠵᠦᠭᠡᠷ ᠰᠢᠭ ᠊ᠢ ᠨᠢ ᠢᠯᠭᠠᠵᠤ ᠥᠭ ᠭᠡᠵᠦ ᠬᠡᠯᠡᠭᠰᠡᠨ ᠶᠦ᠍ᠮ ᠂ ᠬᠠᠷᠢᠨ ᠲᠡᠶ᠋ᠢᠮᠦ ᠮᠠᠭᠤ ᠶ᠋ᠢ ᠥᠭᠴᠢᠭᠡᠪᠡ ᠤᠤ ? ᠪᠣᠯᠵᠠᠢ ᠂ ᠳᠠᠬᠢᠨ ᠳᠠᠬᠢᠨ ᠢᠯᠭᠠᠭᠠᠳ ᠶᠠᠷᠰᠢᠭ ᠃ ᠰᠦ ᠴᠠᠭᠠ ᠴᠢᠨᠢ ᠳᠤᠲᠠᠭᠳᠠᠪᠠᠯ ᠭᠡᠷ ᠡᠴᠡ ᠰᠢᠭᠤᠳ ᠠᠪᠠᠴᠢᠭᠠᠳ ᠢᠳᠡᠴᠢᠬᠡ 》 ᠭᠡᠵᠦ ᠬᠡᠯᠡᠪᠡ ᠃ ᠰᠠᠢᠨ ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠤᠭᠰᠠᠨ ᠠ᠋ᠴᠠ ᠶᠤᠮ ᠤᠤ ? ᠳᠤᠷᠠ ᠦᠭᠡᠢᠴᠡᠭᠰᠡᠨ ᠡᠴᠡ ᠶᠦ᠍ᠮ ᠤᠤ ᠪᠤᠤ ᠮᠡᠳᠡ ᠃ ᠳᠠᠷᠮᠠᠵᠠᠪ ᠶᠠᠭᠤ ᠴᠤ᠌ ᠬᠡᠯᠡᠭᠰᠡᠨ ᠦᠭᠡᠢ ᠳᠤᠭᠤᠢ ᠭᠠᠷᠤᠭᠠᠳ ᠶᠠᠪᠤᠪᠠ ᠃ ᠣᠤᠠᠰᠥ᠋ᠷᠦᠩ ᠪᠠᠰᠠ ᠯᠠ ᠬᠢ ᠬᠢ ᠭᠡᠭᠰᠡᠭᠡᠷ ᠬᠣᠶ᠋ᠢᠨᠠ ᠠ᠋ᠴᠠ ᠨᠢ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠄ 《 ᠳᠠᠷᠮᠠᠵᠠᠪᠠ᠋ ! ᠠᠬᠠ ᠨᠢ ᠪᠢ ᠴᠢᠮᠠᠲᠤ ᠰᠠᠢᠨ ᠬᠠᠷᠠ ᠮᠣᠷᠢ ᠪᠠᠨ ᠥᠭᠴᠦ ᠤᠨᠤᠭᠤᠯᠤᠶᠠ ᠂ ᠪᠡᠶᠡ ᠳ᠋ᠦ᠍ ᠴᠢᠨᠢ ᠠᠮᠤᠷ ᠦᠭᠡᠢ ᠤᠤ ᠳᠠ ᠂ ᠮᠠᠲᠠᠪᠠᠤ ⁉ 》 ᠭᠡᠯᠡ ᠃ ᠣᠤᠠᠰᠥ᠋ᠷᠦᠩ ᠦ᠋ᠨ ᠬᠡᠯᠡᠭᠰᠡᠨ《 ᠰᠦ ᠴᠠᠭᠠ ᠳᠤᠲᠠᠭᠳᠠᠪᠠᠯ ᠭᠡᠷ ᠡᠴᠡ ᠠᠪᠠᠴᠢᠵᠤ ᠢᠳᠡᠭᠡᠷᠡᠢ ! 》 ᠭᠡᠰᠡᠨ ᠨᠢ ᠬᠣᠵᠢᠮᠳᠠᠭᠠᠳ ᠣᠷᠣ ᠦᠭᠡᠢ ᠬᠣᠭᠣᠰᠣᠨ ᠦᠭᠡ ᠲᠡᠳᠦᠢ ᠪᠣᠯᠵᠠᠢ ᠃ ᠡᠬᠢᠨ ᠦ᠌ ᠬᠡᠳᠦᠨ ᠡᠳᠦᠷ ᠪᠠᠭᠠ ᠰᠠᠭᠠ ᠥᠭᠴᠦ ᠪᠠᠶ᠋ᠢᠬᠰᠠᠨ ᠢ᠋ᠶ᠋ᠠᠨ ᠬᠡᠳᠦᠨ ᠡᠳᠦᠷ ᠥᠩᠭᠡᠷᠡᠮᠡᠭᠴᠡ ᠣᠴᠢᠬᠤ ᠪᠣᠯᠭᠠᠨ ᠡᠬᠡᠨᠡᠷ ᠨᠢ ᠄ 《 ᠠᠢ ! ᠶᠠᠭᠤ ᠪᠠᠨ ᠥᠭᠳᠡᠭ ᠪᠢᠯᠡ ? ᠮᠠᠨ ᠳ᠋ᠤ᠌ ᠪᠠᠰᠠ ᠬᠦᠷᠦᠯᠴᠡᠬᠦ ᠦᠭᠡᠢ ᠪᠠᠶ᠋ᠢᠨᠠ ᠰᠢᠦ ᠂ ᠬᠣᠵᠢᠮ ᠳ᠋ᠠᠭᠠᠨ ᠮᠡᠳᠡ ᠳᠠ 》 ᠭᠡᠵᠦ ᠬᠡᠯᠡᠭᠡᠳ ᠪᠤᠴᠠᠭᠠᠳᠠᠭ ᠪᠣᠯᠤᠯᠠ ᠃ ᠦᠨᠡᠨ ᠳ᠋ᠡᠭᠡᠨ ᠲᠡᠶ᠋ᠢᠮᠦ ᠪᠢᠰᠢ ᠂ ᠢᠳᠡᠭᠡᠳ ᠪᠠᠷᠠᠬᠤ ᠦᠭᠡᠢ ᠨᠣᠬᠠᠢ ᠳ᠋ᠠᠭᠠᠨ ᠬᠦᠷᠲᠡᠯᠡ ᠥᠭᠴᠦ ᠪᠠᠶ᠋ᠢᠬᠰᠠᠨ ᠶᠤᠮ ᠃
ᠣᠤᠠᠰᠥ᠋ᠷᠦᠩ ᠦ᠋ᠨ ᠬᠣᠨᠢ ᠶ᠋ᠢ ᠬᠠᠷᠢᠭᠤᠯᠤᠭᠠᠳ ᠳᠠᠷᠮᠠᠵᠠᠪ ᠳᠥᠷᠪᠡᠨ ᠰᠠᠷᠠ ᠪᠣᠯᠪᠠ ᠃ ᠨᠢᠭᠡᠨ ᠡᠳᠦᠷ ᠳᠠᠷᠮᠠᠵᠠᠪ ᠊ᠢ ᠣᠤᠠᠰᠥ᠋ᠷᠦᠩ ᠳᠠᠭᠤᠳᠠᠨ ᠠᠪᠠᠴᠢᠵᠤ ᠂ ᠳᠡᠪᠦᠷᠡ ᠲᠡᠢ ᠴᠠᠢ ᠪᠠᠨ ᠡᠮᠦᠨᠡ ᠨᠢ ᠲᠠᠯᠪᠢᠵᠤ ᠥᠭᠭᠦᠭᠡᠳ ᠂ ᠮᠥᠨ ᠯᠡ ᠬᠢ ᠬᠢ ᠢᠨᠢᠶᠡᠭᠰᠡᠭᠡᠷ᠄ 《 ᠳᠠᠷᠮᠠᠵᠠᠪ ᠠ᠋ ᠂ ᠣᠷᠴᠢᠮ ᠪᠡᠶᠡ ᠲᠤᠩ ᠮᠠᠭᠤ ᠪᠠᠶ᠋ᠢᠨᠠ ᠂ ᠨᠣᠮᠣᠬᠠᠨ ᠮᠣᠷᠢ ᠦᠭᠡᠢ ᠪᠡᠷ ᠪᠣᠯᠬᠤ ᠦᠭᠡᠢ ᠂ ᠴᠢᠨᠦ ᠤᠨᠤᠵᠤ ᠪᠠᠶ᠋ᠢᠬᠤ ᠨᠣᠮᠣᠬᠠᠨ ᠬᠠᠷᠠ ᠶ᠋ᠢ ᠰᠣᠯᠢᠬᠤ ᠰᠠᠨᠠᠭᠠᠲᠠᠢ ᠴᠢᠮᠠᠶ᠋ᠢ ᠳᠠᠭᠤᠳᠠᠭᠰᠠᠨ ᠶᠤᠮ ᠂ ᠣᠷᠣᠨ ᠳ᠋ᠤᠨᠢ ᠨᠢᠭᠡ ᠰᠠᠢᠨ ᠬᠣᠯᠠ ᠮᠣᠷᠢ ᠥᠭᠴᠦ ᠤᠨᠤᠭᠤᠯᠤᠶᠠ 》 ᠭᠡᠵᠦ ᠬᠡᠯᠡᠪᠡ ᠃ ᠣᠤᠠᠰᠥ᠋ᠷᠦᠩ ᠦ᠋ᠨ ᠪᠡᠶᠡ ᠮᠠᠭᠤ ᠪᠢᠰᠢ ᠭᠡᠳᠡᠭ ᠊ᠢ ᠳᠠᠷᠮᠠᠵᠠᠪ ᠮᠡᠳᠡᠨᠡ ᠂ ᠭᠡᠲᠡᠯᠡ ᠮᠣᠷᠢᠨ ᠤ᠋ ᠡᠵᠡᠨ ᠨᠢ ᠮᠣᠷᠢ ᠪᠠᠨ ᠠᠪᠬᠤ ᠭᠡᠵᠦ ᠪᠠᠶ᠋ᠢᠬᠤ ᠳ᠋ᠤ᠌ ᠬᠦᠴᠦ ᠬᠥᠯᠥᠰᠥᠨ ᠦ᠌ ᠬᠥᠮᠦᠨ ᠶᠠᠭᠤ ᠪᠠᠨ ᠳᠤᠤᠭᠠᠷᠬᠤ ᠪᠣᠢ ! ᠥᠨᠥ ᠬᠣᠯᠠ ᠮᠣᠷᠢ ᠶ᠋ᠢ ᠨᠢ ᠪᠠᠷᠢᠪᠠ ᠃ 《 ᠰᠠᠢᠨ ᠬᠣᠯᠠ ᠮᠣᠷᠢ 》 ᠭᠡᠳᠡᠭ ᠨᠢ ᠶᠠᠮᠠᠷ ᠮᠣᠷᠢ ᠪᠣᠢ ? ᠭᠡᠪᠡᠯ ᠠᠳᠤᠭᠤᠴᠢᠨ ᠬᠥᠮᠦᠨ ᠤᠨᠤᠵᠤ ᠳᠡᠶ᠋ᠢᠯᠳᠡᠭ᠋ ᠦᠭᠡᠢ ᠠᠶ᠋ᠢᠬᠤᠪᠲᠤᠷ ᠮᠠᠭᠤ ᠵᠠᠩ ᠲᠠᠢ ᠡᠮᠨᠢᠭ ᠪᠠᠶ᠋ᠢᠵᠠᠢ ᠃ ᠳᠠᠷᠮᠠᠵᠠᠪ ᠤᠨᠤᠬᠤ ᠪᠠᠷ ᠬᠡᠳᠦᠢ ᠣᠷᠣᠯᠳᠣᠭᠠᠳ ᠪᠣᠯᠤᠭᠰᠠᠨ ᠦᠭᠡᠢ ᠂ ᠬᠠᠷᠢᠨ ᠥᠨᠥ 《 ᠰᠠᠢᠨ ᠬᠣᠯᠠ ᠮᠣᠷᠢᠨ 》 ᠳ᠋ᠤᠨᠢ ᠮᠠᠩᠨᠠᠢ ᠶ᠋ᠢᠨ ᠠᠷᠠᠰᠤ ᠪᠠᠨ ᠵᠤᠯᠭᠠᠷᠠᠲᠠᠯᠠ ᠴᠠᠪᠴᠢᠭᠳᠠᠵᠤ ᠪᠢᠯᠡ ᠃ ᠢᠩᠬᠢᠭᠰᠡᠨ ᠴᠢᠨᠢ ᠳᠠᠷᠮᠠᠵᠠᠪ ᠨᠢᠭᠡᠮᠦᠰᠦᠨ ᠴᠡᠭᠡᠵᠢ ᠳᠦᠭᠦᠷᠴᠦ ᠂ 《 ᠰᠠᠢᠨ ᠬᠣᠯᠠ ᠮᠣᠷᠢᠨ 》 ᠳ᠋ᠤᠨᠢ ᠴᠤ᠌ ᠠᠭᠤᠷᠯᠠᠵᠠᠢ ᠂ ᠡᠵᠡᠨ ᠦ᠌ ᠬᠢᠨᠢ ᠬᠤᠯᠵᠢᠨ ᠬᠠᠷᠭᠢᠰ ᠲᠤ᠌ ᠴᠤ᠌ ᠠᠭᠤᠷᠯᠠᠵᠠᠢ ᠃ ᠪᠠᠷᠢᠵᠤ ᠪᠠᠶ᠋ᠢᠬᠰᠠᠨ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠥᠨᠥ 《 ᠰᠠᠢᠨ ᠬᠣᠯᠠ ᠮᠣᠷᠢ 》 ᠶ᠋ᠢ ᠨᠢ ᠬᠦᠴᠦᠲᠡᠢ ᠬᠡᠳᠦ ᠭᠤᠶᠠᠳᠠᠭᠰᠠᠨ ᠳ᠋ᠤ᠌ ᠲᠠᠰᠢᠭᠤᠷ ᠦᠵᠦᠭᠦᠷᠳᠡᠵᠦ ᠲᠣᠰᠤᠭᠠᠳ ᠂ ᠮᠣᠷᠢᠨ ᠤ᠋ ᠬᠢᠨᠢ ᠮᠠᠩᠨᠠᠢ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠬᠡᠭᠵᠡ ᠴᠣᠬᠢᠴᠢᠬᠠᠪᠠ ᠃ ᠣᠷᠣᠢ ᠨᠢ ᠣᠤᠠᠰᠥ᠋ᠷᠦᠩ ᠮᠣᠷᠢᠨ ᠤ᠋ ᠪᠠᠨ ᠮᠠᠩᠨᠠᠢ ᠶ᠋ᠢ ᠦᠵᠡᠭᠡᠳ ᠄ 《 ᠳᠠᠷᠮᠠᠵᠠᠪ ᠠ᠋ ! ᠡᠨᠡ ᠪᠣᠯ ᠮᠢᠨᠦ ᠬᠠᠶ᠋ᠢᠷᠠᠲᠠᠢ ᠮᠣᠷᠢ ᠰᠢᠦ ᠂ ᠬᠠᠶ᠋ᠢᠷᠠᠲᠠᠢ ᠮᠣᠷᠢ ᠶ᠋ᠢ ᠮᠢᠨᠢ ᠭᠤᠶᠠᠳᠠᠬᠤ ᠠ᠋ᠴᠠ ᠡᠵᠡᠨ ᠊ᠢ ᠨᠢ ᠭᠤᠶᠠᠳᠠᠪᠠᠯ ᠳᠡᠭᠡᠷᠡ ᠶᠦ᠍ᠮ ᠂ ᠴᠢᠮᠠ ᠰᠢᠬ ᠡᠶ᠋ᠢᠮᠦ ᠬᠥᠮᠦᠨ ᠊ᠢ ᠪᠢ ᠵᠠᠷᠤᠵᠤ ᠴᠢᠳᠠᠬᠤ ᠦᠭᠡᠢ 》 ᠭᠡᠵᠦ ᠬᠡᠯᠡᠭᠡᠳ ᠂ ᠮᠣᠷᠢ ᠪᠠᠨ ᠪᠤᠯᠢᠶᠠᠵᠤ ᠠᠪᠤᠪᠠ ᠃ ᠳᠠᠷᠮᠠᠵᠠᠪ ᠳᠥᠷᠪᠡᠨ ᠰᠠᠷᠠ ᠶᠠᠪᠤᠭᠰᠠᠨ ᠬᠦᠴᠦ ᠬᠥᠯᠥᠰᠥ ᠪᠡᠨ ᠠᠪᠬᠤ ᠭᠡᠰᠡᠨ ᠳ᠋ᠦ᠍ ᠣᠤᠠᠰᠥ᠋ᠷᠦᠩ ᠂ 《 ᠪᠢ ᠴᠢᠮᠠ ᠠ᠋ᠴᠠ ᠮᠣᠷᠢ ᠶ᠋ᠢ ᠭᠤᠶᠠᠳᠠᠯᠠ ᠭᠡᠵᠦ ᠲᠥᠯᠥᠭᠡᠰᠦ ᠠᠪᠬᠤ ᠦᠭᠡᠢ ᠪᠠᠶ᠋ᠢᠬᠤ ᠶ᠋ᠢ ᠥᠷᠥᠰᠢᠶᠡᠯᠡ ᠭᠡᠵᠦ ᠪᠣᠳᠣ ᠠ᠋ 》 ᠭᠡᠳ ᠶᠠᠭᠤ ᠴᠤ᠌ ᠥᠭᠭᠦᠭᠰᠡᠨ ᠦᠭᠡᠢ ᠃ ᠳᠠᠷᠮᠠᠵᠠᠪ ᠡᠨᠡ ᠦᠶᠡ ᠳ᠋ᠦ᠍ ᠰᠠᠶᠢ ᠣᠤᠠᠰᠥ᠋ᠷᠦᠩ ᠦ᠋ᠨ ᠬᠤᠶ᠋ᠢᠬᠤᠷ ᠠᠷᠭᠠ ᠶ᠋ᠢ ᠮᠡᠳᠡᠵᠡᠢ ᠃ ᠣᠤᠠᠰᠥ᠋ᠷᠦᠩ ᠳᠠᠷᠮᠠᠵᠠᠪ ᠊ᠢ ᠵᠦᠭᠡᠷ ᠵᠠᠷᠤᠬᠤ ᠶ᠋ᠢᠨ ᠲᠥᠯᠥᠭᠡ ᠡᠲᠦᠶ᠋ᠢᠴᠢᠨᠡᠭᠡᠨ ᠠᠷᠭᠠ ᠭᠠᠷᠭᠠᠭᠰᠠᠨ ᠪᠠᠶ᠋ᠢᠵᠠᠢ ᠃ ᠵᠡᠷᠭᠡᠯᠡᠳᠡᠭᠡ ᠠᠶ᠋ᠢᠯ ᠤ᠋ᠨ ᠠᠯᠲᠠᠨᠭᠡᠷᠡᠯ ᠭᠡᠳᠡᠭ ᠡᠪᠦᠭᠡᠨ ᠡᠨᠡ ᠶᠠᠪᠤᠳᠠᠯ ᠊ᠢ ᠮᠡᠳᠡᠭᠡᠳ ᠂ ᠳᠠᠷᠮᠠᠵᠠᠪ ᠊ᠢ ᠭᠡᠷ ᠲᠡᠭᠡᠨ ᠳᠠᠭᠤᠳᠠᠨ ᠠᠪᠴᠢᠷᠠᠵᠤ ᠄ 《 ᠬᠦᠦ ᠮᠢᠨᠢ ! ᠡᠨᠡ ᠮᠠᠭᠤ ᠴᠠᠭ ᠲᠤ᠌ ᠲᠡᠳᠡᠨ ᠲᠡᠢ ᠶᠣᠰᠣ ᠬᠡᠯᠡᠯᠴᠡᠭᠡᠳ ᠦᠨᠡᠨ ᠢ᠋ᠶ᠋ᠡᠨ ᠣᠯᠬᠤ ᠦᠭᠡᠢ ᠶᠦ᠍ᠮ ᠰᠢᠦ ᠂ ᠠᠷᠭᠠᠯᠠᠵᠤ ᠪᠠᠶ᠋ᠢᠭᠠᠳ ᠡᠳᠦᠷ ᠢ᠋ᠶ᠋ᠡᠨ ᠭᠦᠢᠴᠡᠭᠡᠵᠦ ᠪᠥᠰ ᠪᠣᠯᠤᠨ ᠭᠤᠲᠤᠯ ᠢ᠋ᠶ᠋ᠠᠨ ᠣᠯᠬᠤ ᠶ᠋ᠢ ᠪᠣᠳᠣᠭᠠᠷᠠᠢ ! ᠠᠪᠤ ᠨᠢ ᠬᠡᠯᠡᠯᠴᠡᠵᠦ ᠥᠭᠭᠦᠶᠡ 》 ᠭᠡᠪᠡ ᠃ ᠳᠠᠷᠮᠠᠵᠠᠪ ᠪᠣᠳᠣᠬᠤ ᠳ᠋ᠤ᠌ ᠡᠪᠦᠭᠡᠨ ᠦ᠌ ᠦᠭᠡ ᠵᠥᠪ ᠪᠣᠯᠬᠣᠷ ᠳᠤᠷᠠᠲᠠᠢ ᠬᠦᠯᠢᠶᠡᠪᠡ ᠃ ᠠᠯᠲᠠᠨᠭᠡᠷᠡᠯ ᠡᠪᠦᠭᠡᠨ ᠳᠠᠬᠢᠨ ᠳᠠᠬᠢᠨ ᠣᠴᠢᠵᠤ ᠬᠡᠯᠡᠯᠴᠡᠵᠦ ᠭᠣᠶᠣᠭᠰᠠᠭᠠᠷ ᠪᠠᠶ᠋ᠢᠭᠠᠳ ᠡᠳᠦᠷ ᠢ᠋ᠶ᠋ᠡᠨ ᠭᠦᠢᠴᠡᠭᠡᠪᠡᠯ ᠪᠥᠰ ᠪᠣᠯᠤᠨ ᠭᠤᠲᠤᠯ ᠊ᠢ ᠤᠭ ᠬᠡᠪ ᠢ᠋ᠶ᠋ᠡᠷ ᠨᠢ ᠥᠭᠬᠦ ᠪᠡᠷ ᠬᠡᠯᠡᠯᠴᠡᠨ ᠲᠣᠬᠢᠷᠠᠵᠠᠢ ᠃ ᠳᠠᠷᠮᠠᠵᠠᠪ ᠡᠷᠭᠢᠭᠡᠳ ᠣᠴᠢᠬᠤ ᠳ᠋ᠤ᠌ ᠣᠤᠠᠰᠥ᠋ᠷᠦᠩ ᠮᠥᠨ ᠯᠡ ᠪᠦᠳᠦᠭᠦᠨ ᠬᠠᠮᠠᠷ ᠢ᠋ᠶ᠋ᠠᠨ ᠰᠡᠷᠲᠡᠯᠵᠡᠭᠦᠯᠵᠦ ᠂ ᠵᠡᠷᠲᠡᠭᠡᠷ ᠨᠢᠳᠦ ᠪᠡᠨ ᠠᠨᠢᠪᠴᠢᠨ ᠄ 《 ᠳᠠᠷᠮᠠᠵᠠᠪ ᠠ᠋ ! ᠪᠢ ᠴᠢᠮᠠ ᠶ᠋ᠢ ᠵᠠᠷᠤᠬᠤ ᠳᠤᠷᠠ ᠦᠭᠡᠢ ᠪᠢᠰᠢ ᠰᠢᠦ ᠂ ᠴᠢ ᠮᠢᠨᠦ ᠮᠣᠷᠢ ᠶ᠋ᠢ ᠴᠣᠬᠢᠭᠰᠠᠨ ᠠ᠋ᠴᠠ ᠪᠢ ᠪᠠᠬᠠᠨ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠶᠦ᠍ᠮ ᠂ ᠬᠣᠵᠢᠮ ᠰᠠᠢᠨ ᠶᠠᠪᠤᠭᠠᠷᠠᠢ ᠳᠠ 》 ᠭᠡᠵᠡᠢ ᠃ ᠳᠠᠷᠮᠠᠵᠠᠪ ᠲᠡᠭᠦᠨ ᠦ᠌ ᠡᠨᠡ ᠬᠠᠷᠭᠢᠰ ᠵᠠᠩ ᠂ ᠬᠤᠶ᠋ᠢᠬᠤᠷ ᠢᠨᠢᠶᠡᠳᠦ ᠶ᠋ᠢ ᠦᠵᠡᠬᠦ ᠪᠠᠰᠠ ᠳᠤᠷᠠ ᠦᠭᠡᠢ ᠲᠤᠯᠠ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠰᠢᠭ ᠳᠤᠭᠤᠢ ᠶᠠᠪᠤᠪᠠ ᠃ ᠪᠣᠯᠵᠣᠭᠰᠠᠨ ᠬᠤᠭᠤᠴᠠᠭᠠ ᠲᠡᠭᠦᠰᠬᠦ ᠡᠳᠦᠷ ᠤᠯᠠᠮ ᠣᠶ᠋ᠢᠷᠠᠲᠤᠯᠠ ᠃ ᠳᠠᠷᠮᠠᠵᠠᠪ ᠪᠥᠰ ᠪᠣᠯᠤᠨ ᠭᠤᠲᠤᠯ ᠢ᠋ᠶ᠋ᠠᠨ ᠣᠯᠬᠤ ᠭᠡᠵᠦ ᠪᠠᠶᠠᠷᠯᠠᠨ ᠶᠠᠪᠤᠨᠠ ᠃ ᠭᠡᠲᠡᠯᠡ ᠣᠤᠠᠰᠥ᠋ᠷᠦᠩ ᠦ᠋ᠨ ᠦᠷᠴᠢᠭᠢᠷ ᠴᠢᠷᠠᠢ ᠠ᠋ᠴᠠ ᠶᠡᠷᠦ ᠵᠢᠬᠡᠭᠦᠨ ᠪᠠᠶ᠋ᠢᠲᠠᠯ ᠲᠠᠰᠤᠷᠠᠬᠤ ᠦᠭᠡᠢ ᠪᠣᠯᠵᠤ ᠂ ᠳᠠᠷᠮᠠᠵᠠᠪ ᠲᠠᠢ ᠠᠭᠤᠯᠵᠠᠬᠤ ᠪᠦᠷᠢ ᠥᠭᠡᠳᠡ ᠡᠴᠡ ᠨᠢ ᠬᠣᠷᠣᠰᠤᠯ ᠲᠠᠢ ᠪᠠᠷ ᠰᠢᠷᠳᠡᠨᠡ ᠃ ᠨᠢᠭᠡᠨ ᠪᠣᠷᠣᠭᠠᠨ ᠰᠠᠯᠬᠢ ᠲᠠᠢ ᠡᠳᠦᠷ ᠂ ᠣᠤᠠᠰᠥ᠋ᠷᠦᠩ ᠳᠠᠷᠮᠠᠵᠠᠪ ᠲᠤ᠌ ᠠᠷᠭᠠ ᠦᠭᠡᠢ ᠮᠠᠭᠤ ᠡᠴᠡᠩᠬᠡᠢ ᠮᠣᠷᠢ ᠥᠭᠭᠦᠭᠡᠳ ᠬᠡᠭᠡᠷᠡ ᠭᠠᠷᠭᠠᠪᠠ ᠃ ᠬᠡᠭᠡᠷᠡ ᠭᠠᠷᠤᠭᠠᠳ ᠤᠳᠠᠭᠰᠠᠨ ᠦᠭᠡᠢ ᠥᠨᠥ ᠮᠣᠷᠢ ᠨᠢ ᠤᠨᠤᠬᠤ ᠶ᠋ᠢ ᠪᠠᠶ᠋ᠢᠲᠤᠭᠠᠢ ᠬᠥᠲᠥᠯᠦᠭᠡᠳ ᠴᠦ᠍ ᠶᠠᠪᠤᠬᠤ ᠦᠭᠡᠢ ᠪᠣᠯᠪᠠ ᠃ ᠮᠢᠩᠭᠠ ᠭᠠᠷᠤᠢ ᠬᠣᠨᠢᠳ ᠊ᠢ ᠪᠣᠷᠣᠭᠠᠨ ᠰᠠᠯᠬᠢᠨ ᠤ᠋ ᠳᠤᠮᠳᠠᠭᠤᠷ ᠶᠠᠪᠠᠭᠠᠨ ᠢ᠋ᠶ᠋ᠠᠷ ᠬᠤᠷᠢᠶᠠᠬᠤ ᠭᠡᠳᠡᠭ ᠬᠢᠯᠪᠠᠷ ᠤᠤ ᠳᠠ ! ᠳᠠᠷᠮᠠᠵᠠᠪ ᠬᠡᠴᠢᠨᠡᠨ ᠴᠢᠷᠮᠠᠶ᠋ᠢᠭᠠᠳ ᠪᠠᠰᠠ ᠪᠣᠯᠤᠭᠰᠠᠨ ᠦᠭᠡᠢ ᠭᠤᠷᠪᠠᠨ ᠵᠠᠭᠤ ᠰᠢᠬᠠᠮ ᠬᠣᠨᠢ ᠲᠠᠰᠤᠯᠤᠨ ᠣᠷᠬᠢᠵᠠᠢ ᠃ ᠣᠷᠣᠢ ᠨᠢ ᠣᠷᠣᠵᠤ ᠢᠷᠡᠮᠡᠭᠴᠡ ᠴᠠᠢ ᠴᠦ᠍ ᠤᠤᠭᠤᠭᠰᠠᠨ ᠦᠭᠡᠢ ᠡᠷᠢᠬᠦ ᠪᠡᠷ ᠭᠠᠷᠪᠠ ᠃ ᠲᠡᠷᠡ ᠰᠥᠨᠢ ᠨᠢ ᠶᠠᠭ ᠰᠠᠢᠬᠠᠨ ᠭᠠᠷ ᠭᠠᠷᠭᠠᠭᠠᠳ ᠦᠵᠡᠬ᠋ᠲᠡᠬᠦ ᠦᠭᠡᠢ ᠲᠡᠶ᠋ᠢᠮᠦ ᠬᠠᠷᠠᠩᠭᠤᠢ ᠰᠥᠨᠢ ᠲᠠᠭᠠᠷᠠᠵᠠᠢ ᠃ ᠳᠠᠷᠮᠠᠵᠠᠪ ᠡᠨᠡ ᠬᠣᠲᠠ ᠠ᠋ᠴᠠ ᠲᠡᠷᠡ ᠬᠣᠲᠠ ᠥᠭᠡᠳᠡ ᠤᠨᠠᠵᠤ ᠳᠤᠰᠤᠭᠰᠠᠭᠠᠷ ᠰᠥᠨᠢᠵᠢᠨ ᠡᠷᠢᠭᠡᠳ ᠂ ᠮᠠᠷᠭᠠᠲᠠ ᠨᠢ ᠵᠦᠳᠡᠭᠦᠦ ᠣᠯᠵᠠᠢ ᠃
ᠣᠤᠠᠰᠥ᠋ᠷᠦᠩ ᠬᠡᠷᠪᠡ ᠢᠩᠭᠢᠵᠦ ᠬᠠᠷᠢᠭᠤᠯᠠᠭᠤᠯᠳᠠᠭ ᠶᠤᠮ ᠪᠣᠯ ᠶᠠᠮᠠᠷ ᠬᠡᠷᠡᠭ ᠴᠦ᠍ ᠭᠠᠷᠴᠤ ᠮᠡᠳᠡᠨᠡ ᠃ ᠳᠠᠷᠮᠠᠵᠠᠪ ᠬᠡᠳᠦᠨ ᠠᠷᠪᠠᠨ ᠬᠣᠨᠢ ᠶ᠋ᠢ ᠨᠢ ᠭᠡᠭᠡᠭᠡᠳ ᠂ ᠨᠢᠭᠡᠨ ᠨᠠᠰᠤᠨ ᠳ᠋ᠠᠭᠠᠨ ᠵᠠᠷᠤᠭᠳᠠᠭᠠᠳ ᠲᠥᠯᠥᠵᠦ ᠪᠠᠷᠠᠬᠤ ᠦᠭᠡᠢ ᠥᠷᠢ ᠳ᠋ᠦ᠍ ᠴᠦ᠍ ᠣᠷᠣᠵᠤ ᠮᠡᠳᠡᠨᠡ ᠃ ᠡᠶ᠋ᠢᠮᠦ ᠭᠡᠷ ᠲᠦ᠍ ᠳᠠᠷᠮᠠᠵᠠᠪ ᠶᠠᠭᠠᠬᠢᠵᠤ ᠶᠠᠪᠤᠬᠤ ᠪᠣᠢ ! ᠠᠷᠭᠠ ᠦᠭᠡᠢ ᠣᠤᠠᠰᠥ᠋ᠷᠦᠩ ᠦ᠋ᠨ ᠬᠢᠨ ᠡᠴᠡ ᠰᠠᠯᠵᠤ ᠭᠠᠷᠬᠤ ᠪᠠᠨ ᠬᠡᠯᠡᠯᠡ ᠃ ᠣᠤᠠᠰᠥ᠋ᠷᠦᠩ ᠰᠣᠨᠣᠰᠤᠭᠠᠳ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠢᠨᠢᠶᠡᠵᠦ ᠄ 《 ᠳᠠᠷᠮᠠᠵᠠᠪ ᠠ᠋ ! ᠣᠳᠣ ᠪᠢ ᠭᠠᠷᠭᠠᠬᠤ ᠭᠡᠵᠦ ᠪᠠᠶ᠋ᠢᠬ᠋ᠠ ᠪᠢᠰᠢ ᠰᠢᠦ ᠂ ᠴᠢ ᠥᠪᠡᠰᠦᠪᠡᠨ ᠭᠠᠷᠬᠤ ᠭᠡᠵᠦ ᠪᠠᠶ᠋ᠢᠬ᠋ᠠ ᠲᠤᠯᠠ ᠪᠢ ᠶᠠᠮᠠᠷ ᠠᠷᠭᠠ ᠪᠠᠶ᠋ᠢᠨᠠ ᠳᠠ ᠂ ᠲᠡᠭᠡᠪᠡᠯ ᠡᠳᠦᠷ ᠬᠣᠨᠣᠭ ᠢ᠋ᠶ᠋ᠠᠨ ᠬᠦᠢᠴᠡᠭᠡᠭᠰᠡᠨ ᠦᠭᠡᠢ ᠪᠣᠯᠬᠣᠷ ᠬᠦᠴᠦ ᠬᠥᠯᠥᠰᠥ ᠶ᠋ᠢ ᠴᠢᠨᠢ ᠤᠤᠯ ᠶᠣᠰᠣᠭᠠᠷ ᠥᠭᠴᠦ ᠴᠢᠳᠠᠬᠤ ᠦᠭᠡᠢ 》 ᠭᠡᠳ ᠡᠮᠦᠰᠬᠦ ᠡᠴᠡ ᠥᠩᠭᠡᠷᠡᠭᠰᠡᠨ ᠨᠢᠭᠡ ᠵᠦᠢᠷᠡᠢ ᠬᠠᠭᠤᠴᠢᠨ ᠭᠤᠲᠤᠯ ᠬᠠᠶᠠᠵᠤ ᠥᠭᠴᠡᠢ ᠃ ᠳᠠᠷᠮᠠᠵᠠᠪ ᠦᠵᠡᠭᠡᠳ ᠠᠭᠤᠷᠯᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠠᠭᠤᠷᠯᠠᠵᠤ ᠂ ᠡᠭᠦᠳᠡ ᠶ᠋ᠢ ᠨᠢ ᠫᠠᠰ ᠬᠢᠲᠡᠯᠡ ᠬᠠᠶᠠᠵᠤ ᠭᠠᠷᠴᠤ ᠢᠷᠡᠭᠡᠳ ᠂ ᠬᠤᠰᠢᠭᠤᠨ ᠸᠠᠩ ᠳ᠋ᠤ᠌ ᠵᠠᠷᠭᠤ ᠬᠢᠬᠦ ᠪᠡᠷ ᠣᠴᠢᠶᠠ ᠭᠡᠵᠦ ᠪᠣᠳᠣᠵᠠᠢ ᠃ ᠡᠨᠡ ᠪᠣᠳᠣᠯ ᠊ᠢ ᠪᠡᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠪᠤᠯᠴᠠᠭᠰᠠᠨ ᠡᠪᠦᠭᠡᠨ ᠠᠯᠲᠠᠨᠭᠡᠷᠡᠯ ᠳ᠋ᠡᠭᠡᠨ ᠬᠡᠯᠡᠬᠦ ᠪᠡᠷ ᠣᠴᠢᠪᠠ ᠃ ᠡᠪᠦᠭᠡᠨ ᠠᠯᠲᠠᠨᠭᠡᠷᠡᠯ ᠰᠣᠨᠣᠰᠤᠭᠠᠳ ᠂ ᠤᠷᠲᠤ ᠰᠠᠨᠠᠭᠠ ᠠᠯᠳᠠᠵᠤ ᠄ 《 ᠬᠦᠦ ᠮᠢᠨᠢ ᠣᠳᠣ ᠪᠣᠯ ᠡᠪᠦᠯ ᠬᠠᠪᠤᠷ ᠨᠡᠶ᠋ᠢᠯᠡᠭᠡᠳ ᠵᠤᠨ ᠦᠭᠡᠢ ᠪᠣᠯᠵᠤ ᠂ ᠥᠩᠭᠡ ᠮᠥᠩᠭᠥ ᠨᠡᠶ᠋ᠢᠯᠡᠭᠡᠳ ᠬᠠᠤᠯᠢ ᠦᠭᠡᠢ ᠪᠣᠯᠤᠭᠰᠠᠨ ᠴᠠᠭ ᠰᠢᠦ ᠂ ᠮᠠᠨ ᠰᠢᠬ ᠶᠠᠳᠠᠭᠤ ᠬᠥᠮᠦᠨ ᠦ᠌ ᠦᠭᠡ ᠶ᠋ᠢ ᠬᠡᠨ ᠰᠣᠨᠣᠰᠬᠤ ᠪᠣᠢ ? ᠬᠠᠷᠢᠨ ᠴᠢ ᠡᠷᠭᠢᠭᠡᠳ ᠪᠤᠷᠤᠭᠤᠳᠠᠵᠤ ᠮᠡᠳᠡᠬᠦ ᠶᠦ᠍ᠮ 》 ᠭᠡᠵᠡᠢ ᠃ ᠳᠠᠷᠮᠠᠵᠠᠪ ᠤᠴᠢᠷ ᠊ᠢ ᠨᠢ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠠᠯᠲᠠᠨᠭᠡᠷᠡᠯ ᠡᠪᠦᠭᠡᠨ ᠬᠤᠰᠢᠭᠤᠨ ᠳ᠋ᠤ᠌ ᠭᠠᠷᠤᠭᠠᠳ ᠳᠡᠮᠡᠢ ᠤᠳᠠᠭᠠᠳᠤᠢ ᠨᠢᠭᠡ ᠦᠯᠢᠭᠡᠷ ᠊ᠢ ᠬᠡᠯᠡᠵᠦ ᠥᠬ᠋ᠪᠡ ᠃
ᠡᠨᠡ ᠬᠤᠰᠢᠭᠤᠨ ᠳ᠋ᠤ᠌ ᠨᠢᠭᠡᠨ ᠶᠡᠬᠡ ᠪᠠᠭᠠᠲᠤᠷ ᠬᠥᠮᠦᠨ ᠪᠠᠶ᠋ᠢᠪᠠ ᠭᠡᠨᠡ ᠃ ᠭᠡᠷ ᠶᠠᠳᠠᠭᠤ ᠪᠣᠯᠬᠣᠷ ᠬᠥᠮᠦᠨ ᠳ᠋ᠦ᠍ ᠵᠠᠷᠤᠭᠳᠠᠵᠤ ᠪᠠᠶ᠋ᠢᠵᠠᠢ ᠃ ᠪᠠᠶᠠᠨ ᠨᠢ ᠬᠡᠲᠦᠷᠬᠡᠢ ᠶᠡᠬᠡ ᠳᠠᠷᠤᠯᠠᠬᠤ ᠳ᠋ᠤ᠌ ᠲᠡᠰᠴᠦ ᠶᠠᠳᠠᠬᠤ ᠳ᠋ᠠᠭᠠᠨ ᠬᠤᠰᠢᠭᠤᠨ ᠸᠠᠩ ᠳ᠋ᠠᠭᠠᠨ ᠣᠴᠢᠵᠤ ᠵᠠᠭᠠᠯᠳᠤᠪᠠ ᠃ ᠶᠠᠭᠠᠬᠢᠵᠤ ᠬᠡᠯᠡᠭᠰᠡᠨ ᠴᠦ᠍ ᠲᠡᠷᠡ ᠪᠠᠭᠠᠲᠤᠷ ᠡᠷᠡ ᠶ᠋ᠢᠨ ᠵᠥᠪ ᠪᠣᠯᠬᠣᠷ ᠬᠤᠰᠢᠭᠤᠨ ᠸᠠᠩ ᠨᠢ ᠲᠡᠷᠡ ᠪᠠᠶᠠᠨ ᠊ᠢ ᠪᠤᠷᠤᠭᠤᠳᠠᠭᠤᠯᠬᠤ ᠪᠠᠷ ᠰᠢᠢᠳᠦᠯᠡ ᠃ ᠭᠡᠲᠡᠯᠡ ᠲᠡᠷᠡ ᠵᠠᠭᠠᠯᠳᠤᠭᠳᠠᠭᠰᠠᠨ ᠪᠠᠶᠠᠨ ᠂ ᠸᠠᠩ ᠳ᠋ᠠᠭᠠᠨ ᠄ 《 ᠸᠠᠩ ᠮᠢᠨᠢ ᠂ ᠲᠠ ᠮᠢᠨᠦ ᠠᠪᠤ ᠶ᠋ᠢ ᠲᠠᠨᠢᠬᠤ ᠪᠢᠵᠡ ! 》 ᠭᠡᠵᠦ ᠬᠡᠯᠡᠪᠡ ᠃ 《 ᠲᠠᠨ ᠤ᠋ ᠠᠪᠤ ᠶ᠋ᠢᠨ ᠠᠯᠳᠠᠷ ᠬᠡᠨ ᠪᠢᠯᠡ ? 》 ᠭᠡᠵᠦ ᠬᠤᠰᠢᠭᠤᠨ ᠸᠠᠩ ᠠᠰᠠᠭᠤᠬᠤ ᠳ᠋ᠤ᠌ ᠥᠨᠥᠬᠢ ᠪᠠᠶᠠᠨ ᠶᠡᠬᠡᠯᠡ ᠢᠨᠢᠶᠡᠭᠡᠳ ᠄ 《 ᠨᠢᠭᠤᠷ ᠲᠠᠭᠠᠨ ᠰᠡᠪᠬᠡ ᠲᠡᠢ ᠂ ᠨᠢᠷᠤᠭᠤᠪᠲᠤᠷ ᠪᠡᠶᠡ ᠲᠡᠢ ᠂ ᠵᠢᠩᠭᠢᠷ ᠵᠢᠩᠭᠢᠷ ᠳᠠᠭᠤᠨ ᠲᠠᠢ ᠂ ᠲᠠᠪᠢᠨᠲᠠᠢ ᠭᠡᠳᠡᠭ ᠴᠣᠯᠠ ᠲᠠᠢ 》 ᠭᠡᠵᠦ ᠬᠠᠷᠢᠭᠤᠯᠪᠠ ᠃ ᠭᠡᠬᠦ ᠳ᠋ᠦ᠍ ᠸᠠᠩ ᠨᠢ ᠄ 《 ᠠ ! ᠲᠠᠨᠢᠯ ᠦᠭᠡᠢ ᠳᠡ ᠂ ᠲᠠᠨᠤᠰ ᠭᠠᠷᠴᠤ ᠪᠠᠶ᠋ᠢᠭᠠᠷᠠᠢ ᠂ ᠮᠠᠷᠭᠠᠰᠢ ᠰᠢᠳᠬᠡᠶᠡ 》 ᠭᠡᠳ ᠮᠠᠷᠭᠠᠲᠠ ᠨᠢ ᠪᠠᠭᠠᠲᠤᠷ ᠡᠷᠡ ᠶ᠋ᠢ ᠬᠣᠣᠷᠯᠠᠪᠠ ᠭᠡᠨᠡ ᠃ ᠲᠡᠷᠡ ᠪᠠᠶᠠᠨ ᠤ᠋ ᠦᠭᠡ ᠪᠣᠯ ᠸᠠᠩ ᠳ᠋ᠠᠭᠠᠨ ᠬᠡᠰᠡᠭ ᠲᠡᠢ ᠶᠤᠸᠠᠮᠪᠤᠤ ᠥᠭᠬᠦ ᠭᠡᠵᠦ ᠬᠡᠯᠡᠭᠰᠡᠨ ᠪᠠᠶ᠋ᠢᠵᠠᠢ ᠃
ᠠᠯᠲᠠᠨᠭᠡᠷᠡᠯ ᠡᠪᠦᠭᠡᠨ ᠰᠠᠶᠢ ᠬᠡᠯᠡᠵᠦ ᠪᠠᠷᠠᠲᠠᠯᠠ ᠪᠠᠰᠠ ᠨᠢᠭᠡ ᠲᠠᠨᠢᠯ ᠡᠪᠦᠭᠡᠨ ᠣᠷᠣᠵᠤ ᠢᠷᠡᠪᠡ ᠃ ᠨᠡᠷᠡ ᠨᠢ ᠴᠢᠮᠡᠳ ᠭᠡᠳᠡᠭ ᠂ ᠮᠥᠨ ᠴᠦ᠍ ᠶᠠᠳᠠᠭᠤ ᠬᠥᠮᠦᠨ ᠪᠢᠯᠡ ᠃ ᠲᠡᠷᠡ ᠂ ᠳᠠᠷᠮᠠᠵᠠᠪ ᠤ᠋ᠨ ᠮᠡᠬᠡᠯᠡᠭᠳᠡᠭᠰᠡᠨ ᠊ᠢ ᠰᠣᠨᠣᠰᠤᠭᠠᠳ ᠄ 《 ᠮᠥᠯᠵᠢᠯ ᠳ᠋ᠦ᠍ ᠮᠢᠩᠭᠠᠨ ᠠᠷᠭᠠ ᠲᠠᠢ ᠭᠡᠳᠡᠭᠴᠢᠯᠡᠨ ᠣᠤᠠᠰᠥ᠋ᠷᠦᠩ ᠪᠣᠯ ᠪᠦᠷ ᠢᠩᠭᠢᠵᠦ ᠵᠥᠭᠡᠯᠡᠨ ᠬᠤᠶ᠋ᠢᠬᠤᠷ ᠠᠷᠭᠠ ᠪᠠᠷ ᠪᠠᠶᠠᠵᠢᠭᠰᠠᠨ ᠬᠥᠮᠦᠨ ᠶᠦ᠍ᠮ ᠰᠢᠦ 》 ᠭᠡᠯᠡ ᠃ ᠳᠠᠷᠮᠠᠵᠠᠪ ᠡᠪᠴᠢᠭᠦᠦ ᠪᠡᠨ ᠰᠢᠭᠠᠵᠤ ᠄ 《 ᠡᠨᠡ ᠶᠢᠷᠲᠢᠨᠴᠦ ᠦᠨᠡᠬᠡᠷ ᠨᠠᠷᠠᠨ ᠪᠠᠶ᠋ᠢᠭᠠᠳ ᠬᠠᠷᠠᠩᠭᠤᠢ 》 ᠭᠡᠵᠦ ᠬᠠᠰᠬᠢᠷᠴᠤ ᠬᠡᠯᠡᠪᠡ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠪᠠᠶᠠᠨᠰᠡᠷᠡᠩ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠪᠠᠶᠠᠷᠴᠡᠴᠡᠭ · ᠣᠤᠠᠬᠣᠨᠴᠡᠴᠡᠭ