ᠡᠷᠡᠬᠡᠢ ᠮᠡᠷᠭᠡᠨ- ᠳᠣᠮᠣᠭ ᠦᠯᠢᠭᠡᠷЭрхий мэргэн
973ᠡᠷᠡᠬᠡᠢ ᠮᠡᠷᠭᠡᠨ- ᠳᠣᠮᠣᠭ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠡᠨᠡ ᠬᠣᠷᠸ᠋ᠠ ᠳᠡᠯᠡᠬᠡᠢ ᠳ᠋ᠦ᠍ ᠳᠣᠯᠣᠭᠠᠨ ᠨᠠᠷᠠ ᠭᠠᠷᠤᠭᠠᠳ ᠂ ᠭᠠᠩ ᠭᠠᠴᠢᠭ ᠪᠣᠯᠵᠤ ᠂ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠤᠯᠠᠶ᠋ᠢᠷᠠᠭᠠᠳ ᠂ ᠤᠰᠤ ᠮᠥᠷᠡᠨ ᠰᠢᠷᠭᠢᠭᠡᠳ ᠂ ᠤᠷᠭᠤᠮᠠᠯ ᠮᠣᠳᠣ ᠬᠠᠲᠠᠭᠠᠳ ᠂ ᠠᠭᠠᠭᠢᠮᠠ ᠬᠠᠯᠠᠭᠤᠨ ᠪᠣᠯᠵᠤ ᠂ ᠠᠮᠢᠲᠠᠨ ᠬᠥᠮᠦᠨ ᠠᠳᠤᠭᠤ ᠮᠠᠯ ᠬᠠᠷᠠᠩᠭᠤᠳᠤᠭᠠᠳ ᠂ ᠪᠠᠶ᠋ᠢᠵᠤ ᠰᠠᠭᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠭᠠᠮᠰᠢᠭ ᠨᠢᠭᠤᠷᠯᠠᠵᠠᠢ ᠭᠡᠨᠡ ᠃ ᠡᠨᠡ ᠨᠤᠲᠤᠭ ᠤ᠋ᠨ ᠬᠢᠨ ᠠᠶᠤᠯ ᠨᠢᠭᠤᠷᠯᠠᠭᠰᠠᠨ ᠡᠨᠡ ᠭᠠᠮᠰᠢᠭ ᠠ᠋ᠴᠠ ᠬᠡᠷᠬᠢᠨ ᠶᠠᠭᠠᠬᠢᠵᠤ ᠠᠩᠭᠢᠵᠢᠷᠠᠬᠤ ᠲᠤᠬᠠᠢ ᠪᠠᠨ ᠤᠳᠠᠲᠠᠯᠠ ᠵᠥᠪᠯᠡᠯᠳᠦᠭᠡᠳ ᠲᠡᠷᠡ ᠨᠤᠲᠤᠭ ᠲᠤ᠌ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠠᠷᠪᠤᠳᠠᠭ ᠂ ᠬᠠᠷᠪᠤᠭᠰᠠᠨ ᠢ᠋ᠶ᠋ᠠᠨ ᠤᠨᠤᠳᠠᠭ ᠡᠷᠡᠬᠡᠢ ᠮᠡᠷᠭᠡᠨ ᠭᠡᠵᠦ ᠬᠠᠪᠤᠲᠠᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠪᠠᠶ᠋ᠢᠲᠠᠭ ᠭᠡᠳᠡᠭ ᠊ᠢ ᠣᠯᠵᠤ ᠳᠣᠭᠣᠯᠵᠠᠢ ᠭᠡᠨᠡ ᠃ ᠢᠩᠭᠢᠭᠡᠳ ᠲᠡᠳᠡ ᠡᠷᠡᠬᠡᠢ ᠮᠡᠷᠭᠡᠨ ᠲᠡᠢ ᠠᠭᠤᠯᠵᠠᠭᠠᠳ ᠢᠩᠭᠢᠵᠦ ᠬᠡᠯᠡᠯᠡ ᠃ 《 ᠡᠷᠬᠢᠮ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠲᠠ ᠣᠯᠠᠨ ᠪᠢᠳᠡᠨ ᠊ᠢ ᠰᠣᠨᠣᠰᠴᠤ ᠠᠶ᠋ᠢᠯᠠᠳ ᠠ᠋ ! ᠣᠭᠲᠠᠷᠭᠤᠢ ᠳ᠋ᠤ᠌ ᠭᠠᠷᠤᠭᠰᠠᠨ ᠡᠨᠡ ᠣᠯᠠᠨ ᠨᠠᠷᠠ ᠶ᠋ᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠲᠠᠨ ᠠ᠋ᠴᠠ ᠥᠭᠡᠷᠡ ᠬᠡᠨ ᠴᠦ᠍ ᠬᠠᠷᠪᠤᠵᠤ ᠤᠰᠠᠳᠬᠠᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠨᠡ ᠃ ᠲᠠ ᠲᠡᠳᠡᠨ ᠊ᠢ ᠤᠰᠠᠳᠬᠠᠵᠤ ᠠᠷᠠᠳ ᠣᠯᠠᠨ ᠪᠢᠳᠡᠨ ᠊ᠢ ᠠᠶᠤᠯ ᠵᠣᠪᠠᠯᠠᠩ ᠠ᠋ᠴᠠ ᠠᠪᠤᠷᠠᠵᠤ ᠥᠭᠭᠦᠨᠡ ᠦᠦ ?》 ᠭᠡᠵᠦ ᠭᠤᠶᠤᠵᠠᠢ ᠭᠡᠨᠡ ᠃ ᠡᠷᠡᠬᠡᠢ ᠳᠦ ᠪᠡᠨ ᠡᠷᠴᠢᠲᠡᠢ ᠂ ᠡᠯᠢᠭᠡᠨ ᠳ᠋ᠦ᠍ ᠪᠡᠨ ᠰᠥᠰᠥᠲᠡᠢ ᠂ ᠵᠠᠯᠠᠭᠤ ᠨᠠᠰᠤᠲᠠᠢ ᠂ ᠬᠠᠯᠠᠭᠤᠨ ᠴᠢᠰᠤᠲᠠᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠡᠭᠦᠨ ᠊ᠢ ᠰᠣᠨᠣᠰᠤᠭᠠᠳ ᠶᠡᠬᠡ ᠯᠡ ᠪᠠᠷᠳᠠᠮᠨᠠᠨ ᠢᠩᠭᠢᠵᠦ ᠬᠡᠯᠡᠯᠡ ᠃ 《ᠳᠣᠯᠣᠭᠠᠨ ᠨᠠᠷᠠ ᠶ᠋ᠢ ᠪᠢ ᠳᠣᠯᠣᠭᠠᠨ ᠰᠤᠮᠤ ᠪᠠᠷ ᠨᠢᠭᠡ ᠨᠢᠭᠡ ᠬᠠᠷᠪᠤᠭᠠᠳ ᠤᠨᠤᠵᠤ ᠤᠰᠠᠳᠬᠠᠨᠠ ᠃ ᠬᠡᠷᠪᠡ ᠴᠢᠳᠠᠬᠤ ᠦᠭᠡᠢ ᠬᠥᠮᠦᠨ ᠪᠣᠯ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠣᠭᠲᠣᠯᠤᠭᠠᠳ ᠂ ᠡᠷᠡ ᠬᠥᠮᠦᠨ ᠢ᠋ᠶ᠋ᠡᠨ ᠪᠠᠶ᠋ᠢᠭᠠᠳ ᠂ ᠬᠠᠷᠠ ᠤᠰᠤ ᠤᠤᠭᠤᠳᠠᠭ ᠦᠭᠡᠢ ᠂ ᠬᠠᠭᠳᠠ ᠡᠪᠡᠰᠦ ᠢᠳᠡᠳᠡᠭ ᠦᠭᠡᠢ ᠂ ᠬᠠᠷᠠᠩᠭᠤᠢ ᠨᠦᠬᠡᠨ ᠳ᠋ᠦ᠍ ᠢᠴᠡᠭᠡᠳ ᠂ ᠦᠨᠳᠦᠰᠦ ᠨᠣᠭᠣᠭᠠ ᠪᠠᠷ ᠬᠣᠭᠣᠯᠠᠯᠠᠨ ᠂ ᠥᠯ ᠴᠠᠩᠭᠠᠭᠠ ᠭᠠᠷᠭᠠᠳᠠᠭ ᠠᠮᠢᠲᠠᠨ ᠪᠣᠯᠤᠨᠠ ᠃ ᠲᠡᠭᠡᠭᠡᠳ ᠪᠢ ᠡᠷᠡ ᠬᠥᠮᠦᠨ ᠦ᠌ ᠣᠯᠵᠠ ᠪᠣᠯᠵᠤ ᠶᠠᠪᠤᠨᠠ ᠳᠠ ! 》 ᠢᠩᠭᠢᠵᠦ ᠠᠮᠠ ᠠᠯᠳᠠᠵᠤ ᠠᠨᠳᠠᠭᠠᠢ ᠲᠠᠩᠭᠠᠷᠢᠭ ᠲᠠᠯᠪᠢᠵᠤ ᠭᠡᠨᠡ ᠃ ᠲᠡᠭᠡᠭᠡᠳ ᠡᠷᠡᠬᠡᠢ ᠮᠡᠷᠭᠡᠨ ᠳᠣᠷᠣᠨᠠᠲᠤ ᠠ᠋ᠴᠠ ᠥᠷᠥᠨᠡᠲᠦ ᠬᠦᠷᠲᠡᠯᠡᠬᠢ ᠣᠭᠲᠠᠷᠭᠤᠢ ᠳ᠋ᠤ᠌ ᠴᠤᠪᠤᠷᠠᠭᠰᠠᠨ ᠳᠣᠯᠣᠭᠠᠨ ᠨᠠᠷᠠ ᠶ᠋ᠢ ᠵᠡᠭᠦᠨ ᠡᠴᠡ ᠨᠢ ᠡᠬᠢᠯᠡᠨ ᠬᠠᠷᠪᠤᠭᠠᠳ ᠤᠨᠤᠵᠤ ᠭᠠᠷᠴᠠᠢ ᠭᠡᠨᠡ ᠃ ᠵᠢᠷᠭᠤᠭᠠᠨ ᠨᠠᠷᠠ ᠶ᠋ᠢ ᠳᠠᠷᠠᠭᠠᠯᠠᠨ ᠵᠢᠷᠭᠤᠭᠠᠨ ᠰᠤᠮᠤ ᠪᠠᠷ ᠤᠰᠠᠳᠬᠠᠭᠠᠳ ᠳᠣᠯᠣᠳᠠᠬᠢ ᠰᠤᠮᠤ ᠪᠠᠨ ᠰᠤᠮᠤᠯᠠᠨ ᠰᠡᠭᠦᠯᠴᠢ ᠶ᠋ᠢᠨ ᠭᠠᠭᠴᠠ ᠨᠠᠷᠠ ᠤᠷᠤᠭᠤ ᠬᠠᠷᠪᠤᠬᠤ ᠪᠠᠷ ᠱᠠᠭᠠᠶ᠋ᠢᠨ ᠰᠢᠪᠰᠢᠵᠦ ᠪᠠᠶ᠋ᠢᠭᠠᠳ ᠬᠠᠷᠪᠤᠯᠠ ᠃ ᠲᠡᠭᠡᠲᠡᠯᠡ ᠱᠤᠩᠭᠤᠨ ᠨᠢᠰᠬᠦ ᠰᠤᠮᠤᠨ ᠤ᠋ ᠤᠷᠳᠤᠭᠤᠷ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠬᠠᠯᠢᠨ ᠳᠡᠭᠦᠯᠢᠨ ᠨᠢᠰᠴᠦ ᠢᠷᠡᠭᠡᠳ ᠰᠡᠭᠦᠯ ᠢ᠋ᠶ᠋ᠡᠨ ᠰᠡᠳᠡ ᠲᠠᠲᠠᠭᠤᠯᠤᠨ ᠨᠢᠰᠦᠨ ᠣᠳᠤᠯᠠ ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠶ᠋ᠢᠰᠢ ᠬᠠᠷᠢᠶᠠᠴᠠᠢ ᠶ᠋ᠢᠨ ᠰᠡᠭᠦᠯ ᠬᠣᠶᠠᠷ ᠰᠠᠯᠠᠭᠠ ᠪᠣᠯᠴᠢᠬᠠᠭᠰᠠᠨ ᠭᠡᠨᠡ ᠃ ᠬᠠᠷᠢᠨ ᠥᠨᠥᠬᠢ ᠰᠡᠭᠦᠯᠴᠢ ᠶ᠋ᠢᠨ ᠨᠠᠷᠠ ᠬᠠᠷᠪᠤᠭᠠᠴᠢ ᠠ᠋ᠴᠠ ᠠᠶᠤᠭᠠᠳ ᠪᠠᠷᠠᠭᠤᠨ ᠠᠭᠤᠯᠠ ᠶ᠋ᠢᠨ ᠴᠠᠭᠠᠭᠤᠷ ᠪᠠᠷᠤᠰᠬᠢᠭᠡᠳ ᠳᠠᠯᠳᠠ ᠣᠷᠣᠴᠢᠬᠠᠵᠠᠢ ᠭᠡᠨᠡ ᠃ ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠶ᠋ᠢ ᠬᠠᠯᠬᠠᠯᠠᠵᠤ ᠰᠠᠭᠠᠳ ᠪᠣᠯᠤᠯᠠ ᠭᠡᠵᠦ ᠶᠡᠬᠡ ᠯᠡ ᠪᠠᠴᠢᠮᠳᠠᠨ ᠮᠣᠷᠢᠨ ᠳ᠋ᠤ᠌ ᠪᠠᠨ ᠄ 《 ᠬᠠᠷᠤᠢ ᠪᠦᠷᠦᠢ ᠪᠣᠯᠬᠤ ᠠ᠋ᠴᠠ ᠡᠮᠦᠨᠡ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠶ᠋ᠢ ᠭᠦᠢᠴᠡᠬᠦ ᠶᠣᠰᠣᠲᠠᠢ ! 》 ᠭᠡᠵᠦ ᠲᠤᠰᠢᠶᠠᠭᠰᠠᠨ ᠳ᠋ᠤ᠌ ᠮᠣᠷᠢ ᠡᠵᠡᠨ ᠳ᠋ᠦ᠍ ᠪᠡᠨ ᠄ 《 ᠬᠡᠷᠪᠡ ᠪᠢ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠶ᠋ᠢ ᠬᠠᠷᠠ ᠪᠦᠷᠦᠢ ᠪᠣᠯᠲᠠᠯᠠ ᠬᠥᠭᠡᠭᠡᠭᠡᠳ ᠭᠦᠢᠴᠡᠬᠦ ᠦᠭᠡᠢ ᠪᠣᠯ ᠬᠥᠯ ᠮᠥᠴᠢ ᠶ᠋ᠢ ᠮᠢᠨᠢ ᠣᠭᠲᠣᠯᠤᠭᠠᠳ ᠬᠥᠳᠡᠭᠡ ᠬᠡᠭᠡᠷᠡ ᠭᠠᠵᠠᠷ ᠬᠠᠶᠠᠭᠠᠷᠠᠢ ! ᠡᠷᠡ ᠬᠥᠮᠦᠨ ᠦ᠌ ᠴᠢᠮᠡᠭ ᠡᠮᠡᠭᠡᠯᠲᠦ ᠬᠦᠯᠦᠭ ᠢ᠋ᠶ᠋ᠡᠨ ᠪᠣᠯᠢᠭᠠᠳ ᠡᠩᠬᠦᠯ ᠲᠦᠩᠬᠦᠯ ᠡᠵᠡᠭᠦᠢ ᠭᠠᠵᠠᠷ ᠢ᠋ᠶ᠋ᠠᠷ ᠠᠮᠢᠳᠤᠷᠠᠬᠤ ᠪᠣᠯᠤᠨᠠ ᠪᠢ ! 》 ᠢᠩᠭᠢᠵᠦ ᠠᠮᠠ ᠪᠠᠷᠳᠠᠮ ᠠᠨᠲᠠᠭᠠᠶ᠋ᠢᠯᠠᠵᠠᠢ ᠭᠡᠨᠡ ᠃ ᠢᠩᠭᠢᠭᠡᠳ ᠲᠡᠷᠡ ᠬᠣᠶᠠᠷ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠶ᠋ᠢ ᠬᠥᠭᠡᠭᠡᠭᠡᠳ ᠬᠠᠷᠢᠭᠤ ᠦᠭᠡᠢ ᠭᠦᠢᠴᠡᠬᠦ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠬᠠᠷᠢᠶᠠᠴᠠᠢ ᠰᠢᠪᠠᠭᠤ ᠬᠠᠰᠢ ᠶᠠᠰᠢ ᠬᠠᠮᠢᠶᠠ ᠦᠭᠡᠢ ᠬᠠᠯᠲᠤ ᠪᠤᠯᠲᠤ ᠦᠰᠦᠷᠦᠭᠡᠳ ᠠᠷᠠᠢ ᠭᠦᠢᠴᠡᠭᠲᠡᠯ ᠦᠭᠡᠢ ᠵᠢᠭᠤᠲᠠᠭᠰᠠᠭᠠᠷ ᠬᠠᠷᠤᠢ ᠪᠦᠷᠦᠢ ᠪᠣᠯᠵᠤ ᠬᠠᠷᠢᠶᠠᠴᠠᠢ ᠶ᠋ᠢ ᠭᠦᠢᠴᠡᠯ ᠦᠭᠡᠢ ᠠᠯᠳᠠᠵᠤ ᠣᠷᠬᠢᠵᠠᠢ ᠃ ᠡᠨᠡ ᠶᠠᠪᠤᠳᠠᠯ ᠳ᠋ᠤ᠌ ᠠᠭᠤᠷᠯᠠᠭᠰᠠᠨ ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠴᠠᠭᠠ ᠠᠯᠠᠭ ᠮᠣᠷᠢᠨ ᠤ᠋ ᠪᠠᠨ ᠤᠷᠲᠤ ᠬᠣᠶᠠᠷ ᠬᠥᠯ ᠊ᠢ ᠨᠢ ᠣᠭᠲᠣᠯᠤᠭᠠᠳ ᠂ ᠡᠵᠡᠭᠦᠢ ᠬᠡᠭᠡᠷᠡ ᠬᠠᠶᠠᠴᠢᠬᠠᠵᠠᠢ ᠭᠡᠨᠡ ᠃ ᠬᠠᠶᠠᠭᠳᠠᠭᠰᠠᠨ ᠮᠣᠷᠢ ᠡᠩᠬᠦᠯ ᠲᠦᠩᠬᠦᠯ ᠡᠵᠡᠭᠦᠢ ᠭᠠᠵᠠᠷ ᠢ᠋ᠶ᠋ᠠᠷ ᠠᠮᠢᠳᠤᠷᠠᠭᠰᠠᠭᠠᠷ ᠤᠷᠲᠤ ᠬᠣᠶᠠᠷ ᠬᠥᠯ ᠨᠢ ᠪᠣᠭᠣᠨᠢ ᠠᠯᠠᠭᠳᠠᠭᠠ ᠪᠣᠯᠤᠨ ᠬᠤᠪᠢᠷᠠᠵᠠᠢ ᠭᠡᠨᠡ ᠃ ᠡᠷᠡᠬᠡᠢ ᠮᠡᠷᠭᠡᠨ ᠥᠪᠡᠷ ᠢ᠋ᠶ᠋ᠡᠨ ᠡᠷᠡ ᠬᠥᠮᠦᠨ ᠦ᠌ ᠲᠠᠩᠭᠠᠷᠢᠭ ᠶᠣᠰᠣᠭᠠᠷ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠣᠭᠲᠣᠯᠵᠤ ᠬᠠᠶᠠᠭᠠᠳ ᠂ ᠡᠷᠡ ᠬᠥᠮᠦᠨ ᠢ᠋ᠶ᠋ᠡᠨ ᠪᠠᠶ᠋ᠢᠭᠠᠳ ᠂ ᠬᠠᠷᠠ ᠤᠰᠤ ᠤᠤᠭᠤᠳᠠᠭ ᠦᠭᠡᠢ ᠂ ᠬᠠᠭᠳᠠ ᠡᠪᠡᠰᠦ ᠢᠳᠡᠳᠡᠭ ᠦᠭᠡᠢ ᠲᠠᠷᠪᠠᠭᠠ ᠪᠣᠯᠤᠭᠠᠳ ᠡᠷᠭᠢ ᠨᠦᠬᠡᠯᠡᠵᠦ ᠣᠷᠣᠭᠠᠳ ᠬᠠᠷᠠᠩᠭᠤᠢ ᠨᠦᠬᠡᠨ ᠳ᠋ᠦ᠍ ᠠᠮᠢᠳᠤᠷᠠᠳᠠᠭ ᠪᠣᠯᠤᠭᠰᠠᠨ ᠭᠡᠨᠡ ᠃
ᠬᠡᠦᠬᠡᠳ ᠦ᠋ᠳ ᠠ᠋ ! ᠲᠠᠷᠪᠠᠭᠠᠨ ᠤ᠋ ᠰᠠᠷᠪᠠᠭᠤ ᠳᠥᠷᠪᠡᠨ ᠬᠤᠷᠤᠭᠤ ᠲᠠᠢ ᠪᠠᠶ᠋ᠢᠲᠠᠭ ᠤ᠋ᠨ ᠤᠴᠢᠷ ᠲᠡᠷᠡ ᠭᠡᠨᠡ ᠃
ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠦᠯᠡᠲᠡᠭᠰᠡᠨ ᠴᠣᠷᠢ ᠶ᠋ᠢᠨ ᠭᠠᠭᠴᠠ ᠨᠠᠷᠠ ᠬᠠᠷᠪᠤᠭᠠᠴᠢ ᠠ᠋ᠴᠠ ᠠᠶᠤᠭᠠᠳ ᠠᠭᠤᠯᠠ ᠶ᠋ᠢᠨ ᠴᠠᠭᠠᠭᠤᠷ ᠣᠷᠣᠴᠢᠬᠠᠭᠰᠠᠨ ᠤᠴᠢᠷ ᠠ᠋ᠴᠠ ᠡᠳᠦᠷ ᠰᠥᠨᠢ ᠡᠭᠡᠯᠵᠢᠯᠡᠨ ᠰᠣᠯᠢᠭᠳᠠᠳᠠᠭ ᠪᠣᠯᠵᠠᠢ ᠃
ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠲᠠᠷᠪᠠᠭᠠ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠮᠠᠷᠲᠠᠭᠠᠳ ᠥᠷᠯᠥᠭᠡ ᠣᠷᠣᠢ ᠶ᠋ᠢᠨ ᠨᠠᠷᠠᠨ ᠢ᠋ᠶ᠋ᠠᠷ ᠤᠲᠤᠵᠤ ᠪᠠᠶ᠋ᠢᠵᠤ ᠨᠠᠷᠠ ᠶ᠋ᠢ ᠬᠠᠷᠪᠤᠨᠠ ᠳᠠ ᠭᠡᠵᠦ ᠨᠦᠬᠡᠨ ᠡᠴᠡ ᠪᠡᠨ ᠭᠠᠷᠳᠠᠭ ᠪᠣᠯᠤᠭᠰᠠᠨ ᠭᠡᠨᠡ ᠃
ᠡᠷᠡᠬᠡᠢ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠶ᠋ᠢᠨ ᠲᠤᠬᠠᠢ ᠦᠯᠢᠭᠡᠷ ᠡᠶ᠋ᠢᠨ ᠬᠦ ᠲᠡᠭᠦᠰᠴᠦ ᠪᠠᠶ᠋ᠢᠨᠠ ᠃ ᠪᠠᠷᠳᠠᠮ ᠤᠩᠭᠢᠷᠠᠭᠠ ᠵᠠᠩ ᠶᠠᠮᠠᠷ ᠶᠡᠬᠡ ᠪᠠᠯᠠᠭ ᠲᠠᠢ ᠪᠠᠶ᠋ᠢᠲᠠᠭ ᠊ᠢ ᠨᠢ ᠦᠦᠬᠡ ᠲᠡᠦᠬᠡ ᠡᠴᠡ ᠨᠢ ᠦᠵᠡᠵᠦ ᠤᠬᠠᠭᠠᠷᠠᠵᠤ ᠮᠡᠳᠡᠯᠡ ᠪᠢᠳᠡ ᠃ ᠬᠡᠴᠢᠨᠡᠭᠡᠨ ᠶᠡᠬᠡ ᠲᠡᠭᠦᠰ ᠲᠡᠭᠦᠯᠳᠡᠷ ᠠᠪᠢᠶᠠᠰ ᠲᠠᠢ ᠴᠤ᠌ ᠭᠡᠰᠡᠨ ᠳᠥᠯᠭᠡᠨ ᠳᠠᠷᠤᠤ ᠵᠠᠩ ᠳᠠᠯᠠᠢ ᠶᠡᠬᠡ ᠤᠬᠠᠭᠠᠨ ᠲᠠᠢ ᠶᠠᠪᠤᠬᠤ ᠨᠢ ᠬᠥᠮᠦᠨ ᠦ᠌ ᠡᠷᠬᠢᠮ ᠳᠡᠭᠡᠳᠦ ᠡᠷᠳᠡᠮ ᠶᠦ᠍ᠮ ᠰᠢᠦ ᠬᠡᠦᠬᠡᠳ ᠦ᠋ᠳ ᠮᠢᠨᠢ ᠠ᠋ !
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠮᠥᠩᠭᠦᠨᠴᠡᠴᠡᠭ
ᠦᠰᠦᠭ ᠬᠠᠲᠠᠭᠰᠠᠨ ᠨᠢ ᠄ ᠮᠥᠩᠭᠦᠨᠴᠡᠴᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠮᠥᠴᠢᠷ