ᠠᠭᠤᠯᠠ ᠤᠰᠤᠨ ᠤ ᠠᠨᠢᠷ – ᠪ ᠂ ᠳᠠᠷᠢᠮᠠ Уул усны анир – Б ᠂ Даримаа
406ᠠᠭᠤᠯᠠ ᠤᠰᠤᠨ ᠤ ᠠᠨᠢᠷ
〔ᠮᠣᠩᠭᠣᠯ 〕 ᠪ᠂ ᠳᠠᠷᠢᠮᠠ
ᠬᠡᠳᠦᠨ ᠵᠠᠭᠤᠨ ᠤ᠋ ᠲᠣᠷᠰᠢ ᠬᠠᠲᠤᠨ ᠰᠡᠯᠡᠩᠭᠡ ᠮᠥᠷᠡᠨ ᠦ᠌ ᠤᠰᠤᠨ ᠳ᠋ᠤ᠌ ᠳᠦᠷᠢ ᠪᠡᠨ ᠳᠤᠯᠢᠳᠠᠨ ᠬᠠᠩᠬᠠᠢᠭᠰᠠᠨ ᠬᠠᠨᠠᠨ ᠬᠠᠳᠠ ᠲᠠᠢ《 ᠭᠤᠷᠪᠠᠨ ᠭᠠᠰᠠᠨᠠ》 ᠠᠭᠤᠯᠠ ᠮᠠᠨ ᠤ᠋ ᠰᠤᠮᠤ ᠶ᠋ᠢᠨ ᠲᠥᠪ ᠦ᠋ᠨ ᠡᠭᠴᠡ ᠡᠮᠦᠨᠡ ᠪᠠᠢᠳᠠᠭ ᠶᠤᠮ᠃《 ᠭᠤᠷᠪᠠᠨ ᠭᠠᠰᠠᠨᠠ》 ᠴᠠᠭᠠᠳᠤ ᠲᠠᠯᠠ ᠠ᠋ᠴᠠ ᠪᠠᠨ ᠲᠡᠢᠮᠦ ᠡᠭᠴᠡ ᠪᠢᠰᠢ᠃ ᠮᠣᠷᠢᠨ ᠬᠠᠷᠭᠤᠢ ᠵᠠᠮᠴᠢᠯᠠᠨ ᠥᠭᠰᠥᠭᠰᠡᠭᠡᠷ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠣᠷᠭᠢᠯ ᠬᠠᠨᠠᠨ ᠬᠠᠳᠠᠨ ᠤ᠋ ᠣᠷᠣᠢ ᠳ᠋ᠤ᠌ ᠭᠠᠷᠤᠨᠠ᠃ ᠵᠤᠨ ᠤ᠋ ᠴᠠᠭ ᠲᠤ᠌ ᠰᠡᠯᠡᠩᠭᠡ ᠮᠥᠷᠡᠨ ᠦ᠌ ᠬᠣᠢᠲᠤ ᠤᠷᠢᠳᠤ ᠪᠡᠶᠡ ᠳ᠋ᠦ᠍ ᠣᠷᠣᠰᠢᠬᠤ ᠬᠣᠶᠠᠷ ᠰᠤᠮᠤ ᠶ᠋ᠢᠨ ᠬᠢᠨ ᠣᠢᠷᠠ ᠲᠦᠳᠡ ᠶ᠋ᠢ ᠪᠣᠳᠣᠵᠤ ᠬᠠᠨᠠᠨ ᠬᠠᠳᠠᠨ ᠤ᠋ ᠲᠤᠰᠢᠶᠠᠬᠢ ᠣᠯᠣᠮ ᠢ᠋ᠶ᠋ᠠᠷ ᠭᠤᠶᠠ ᠣᠩᠭᠣᠴᠠ ᠬᠠᠳᠬᠤᠨ ᠨᠠᠭᠠᠰᠢ ᠴᠠᠭᠠᠱᠢ ᠵᠣᠷᠴᠢᠨᠠ᠃ ᠬᠠᠢᠯᠠᠰᠤᠨ ᠤ᠋ ᠭᠣᠣᠯ ᠤᠬᠤᠵᠤ ᠬᠢᠭᠰᠡᠨ ᠭᠤᠶᠠ ᠣᠩᠭᠣᠴᠠ ᠤᠰᠤᠨ ᠳ᠋ᠤ᠌ ᠬᠦᠯᠬᠦᠭᠦᠯᠦᠭᠰᠡᠭᠡᠷ ᠪᠠᠢᠭᠠᠳ ᠭᠥᠯᠢᠢᠭᠰᠡᠨ ᠬᠥᠬᠡ ᠥᠩᠭᠡ ᠲᠡᠢ ᠪᠣᠯᠵᠠᠢ᠃
ᠡᠨᠡ ᠣᠩᠭᠣᠴᠠᠨ ᠤ᠋ ᠡᠵᠡᠨ ᠮᠠᠨ ᠤ᠋ ᠰᠤᠮᠤ ᠶ᠋ᠢᠨ ᠬᠥᠮᠦᠨ ᠪᠠᠢᠯᠠ᠃ ᠤᠰᠤᠨ ᠤ᠋ ᠤᠷᠢᠳᠤ ᠠ᠋ᠴᠠ ᠢᠷᠡᠬᠦ ᠬᠥᠮᠦᠨ ᠪᠣᠯᠪᠠᠴᠤ ᠬᠠᠨᠠᠨ ᠬᠠᠳᠠᠨ ᠤ᠋ ᠣᠷᠣᠢ ᠳᠡᠭᠡᠷᠡ ᠡᠴᠡ ᠲᠣᠳᠣ ᠥᠩᠭᠡ ᠶ᠋ᠢᠨ ᠶᠠᠭᠤᠮᠠ ᠪᠠᠷ ᠳᠠᠯᠠᠯᠤᠨ᠄
– ᠬᠥᠶᠢ᠁ ᠪᠣᠷᠣᠭᠠ᠁ ᠳᠣᠷᠵᠢ᠁ ᠠ᠋! ᠣᠩᠭᠣᠴᠠ ᠪᠠᠨ ᠭᠠᠷᠭᠠᠭᠠᠷᠠᠢ! ᠭᠡᠵᠦ ᠬᠣᠭᠣᠯᠠᠢ ᠮᠡᠳᠡᠨ ᠬᠠᠰᠬᠢᠷᠬᠤ ᠳ᠋ᠤ᠌《 ᠭᠤᠷᠪᠠᠨ ᠭᠠᠰᠠᠨᠠ》 ᠬᠠᠪᠢ ᠶ᠋ᠢᠨ ᠠᠭᠤᠯᠠᠰ ᠴᠤᠤᠷᠢᠶᠠ ᠬᠠᠲᠠᠭᠠᠨ ᠲᠦᠷᠢᠵᠦ ᠮᠠᠨ ᠤ᠋ ᠰᠤᠮᠤ ᠶ᠋ᠢᠨ ᠬᠢᠨ ᠳ᠋ᠦ᠍ ᠲᠣᠳᠣᠬᠠᠨ ᠰᠣᠨᠣᠰᠳᠠᠨᠠ᠃ ᠤᠳᠠᠯ ᠦᠭᠡᠢ ᠰᠤᠮᠤ ᠶ᠋ᠢᠨ ᠲᠥᠪ ᠦ᠋ᠨ ᠨᠢᠭᠤᠷ ᠤ᠋ᠨ ᠭᠤᠳᠤᠮᠵᠢ ᠠ᠋ᠴᠠ ᠴᠤᠤᠶᠠᠩᠪᠤᠤ ᠴᠠᠮᠴᠠ᠂ ᠤᠯᠠᠭᠠᠨ ᠬᠦᠷᠡᠩ ᠳᠠᠯᠢᠩᠪᠤᠤ ᠶ᠋ᠢᠨ ᠥᠮᠥᠳᠥ ᠲᠡᠢ ᠥᠨᠳᠥᠷ ᠬᠥᠬᠡ ᠡᠪᠦᠭᠡᠨ ᠨᠢᠴᠦᠭᠦᠨ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠰᠢᠯᠪᠢ ᠶ᠋ᠢ ᠭᠢᠯᠠᠯᠵᠠᠭᠤᠯᠤᠨ ᠰᠠᠯ ᠰᠠᠯ ᠱᠣᠭᠰᠢᠵᠤ ᠣᠳᠤᠨᠠ᠃ ᠲᠤᠰᠠ ᠭᠤᠶᠤᠵᠤ ᠪᠠᠢᠵᠤ ᠵᠠᠪᠠᠯ ᠬᠣᠴᠢ ᠪᠠᠷ ᠨᠢ ᠳᠠᠭᠤᠳᠠᠳᠠᠭ ᠨᠢ ᠴᠦ᠍ ᠶᠠᠭᠤ ᠪᠢᠯᠡ᠃《 ᠪᠣᠷᠣᠭᠠ》 ᠭᠡᠵᠦ ᠣᠨᠴᠠᠯᠠᠨ ᠳᠠᠭᠤᠳᠠᠬᠤ ᠦᠭᠡᠢ ᠪᠣᠯ ᠨᠢᠭᠡ ᠶᠡᠬᠡ ᠣᠯᠠᠨ ᠳᠣᠷᠵᠢ ᠳᠠᠪᠬᠢᠭᠠᠳ ᠢᠷᠡᠴᠢᠬᠡᠬᠦ ᠶᠦ᠍ᠮ ᠰᠢᠭ ᠠᠭᠤᠯᠠ ᠤᠰᠤ ᠭᠠᠲᠤᠯᠤᠭᠤᠯᠤᠨ ᠴᠤᠤᠷᠢᠶᠠ ᠬᠠᠲᠠᠭᠠᠵᠤ《 ᠪᠣᠷᠣᠭᠠ ᠳᠣᠷᠵᠢ》 ᠭᠡᠵᠦ ᠲᠩᠬᠡᠬᠡ ᠮᠡᠳᠡᠨ ᠬᠠᠰᠬᠢᠷᠳᠠᠭ ᠰᠠᠨ᠃ ᠶᠡᠷᠦ ᠨᠢ ᠮᠠᠨ ᠤ᠋ ᠨᠤᠲᠤᠭ ᠤ᠋ᠨ ᠬᠢᠨ ᠬᠥᠭᠰᠢᠨ ᠵᠠᠯᠠᠭᠤ ᠦᠭᠡᠢ《 ᠪᠣᠷᠣᠭᠠ᠂ ᠪᠣᠷᠣᠭᠠ》 ᠭᠡᠯᠴᠡᠨ ᠨᠢᠭᠡ ᠯᠡ ᠠᠮᠠ ᠮᠠᠭᠤᠲᠠᠢ ᠪᠠᠢᠵᠠᠭᠠᠬᠤ᠃ ᠪᠢ ᠪᠠᠭᠠ ᠳ᠋ᠤ᠌ ᠪᠠᠨ ᠶᠠᠭᠠᠬᠢᠭᠠᠳ ᠪᠣᠷᠣᠭᠠ ᠭᠡᠳᠡᠭ ᠶᠦ᠍ᠮ ᠪᠣᠯ᠃ ᠪᠣᠷᠣᠭᠠ ᠣᠷᠣᠭᠤᠯᠳᠠᠭ ᠯᠠ ᠶᠤᠮ ᠪᠠᠢᠭᠠ ᠳᠠ ᠭᠡᠵᠦ ᠭᠠᠢᠬᠠᠨ ᠠᠢᠯ ᠤ᠋ᠨ ᠢ᠋ᠶ᠋ᠠᠨ ᠡᠮᠡᠭᠡ ᠡᠴᠡ ᠤᠴᠢᠷ ᠢ᠋ ᠠᠰᠠᠭᠤᠪᠠᠯ᠄
– ᠴᠥᠭ ᠴᠢ! ᠶᠠᠭᠠᠬᠢᠭ᠌ᠰᠠᠨ ᠦᠭᠡᠨ ᠳ᠋ᠦ᠍ ᠳᠤᠷᠠᠲᠠᠢ ᠲᠤᠷᠠᠰᠬᠠ ᠪᠣᠢ?《 ᠪᠣᠷᠣᠭᠠ 》 ᠭᠡᠵᠦ ᠬᠣᠴᠢ ᠨᠢ ᠪᠠᠢᠬᠤ ᠦᠭᠡᠢ ᠦᠦ? ᠬᠠᠷᠠ ᠨᠢᠯᠬᠠ ᠠ᠋ᠴᠠ ᠪᠠᠨ ᠬᠡᠢᠳ ᠲᠦ᠍ ᠱᠠᠪᠢᠯᠠᠭᠠᠳ ᠨᠣᠮ ᠰᠤᠷᠤᠭᠠ ᠦᠭᠡᠢ ᠶᠦ᠍ᠮ ᠭᠡᠨᠡ ᠯᠡ᠃ ᠠᠮᠠᠨ ᠤ᠋ ᠭᠠᠭᠴᠠ ᠲᠠᠷᠨᠢ ᠦᠭᠡᠢ ᠪᠠᠢᠵᠤ ᠪᠤᠷᠬᠠᠨ ᠱᠠᠰᠢᠨ ᠢ᠋ᠶ᠋ᠠᠨ ᠰᠡᠷᠭᠦᠭᠡᠨᠡ ᠭᠡᠳ ᠲᠡᠷᠡ ᠵᠢᠯ ᠦ᠋ᠨ ᠦᠢᠮᠡᠭᠡᠨ ᠢ᠋ᠶ᠋ᠡᠷ ᠡᠰᠡᠷᠭᠦᠦ ᠳᠠᠭᠠᠵᠤ ᠪᠠᠬᠠᠨ ᠳᠠᠪᠬᠢᠭ᠌ᠰᠠᠨ ᠶᠤᠮ ᠳ᠋ᠠᠭ᠃ ᠡᠨᠡ ᠳᠤᠭᠤᠳᠤᠬᠢ《 ᠳᠥᠷᠥᠭᠡ ᠬᠠᠩᠭᠢᠨᠠᠭᠤᠷ 》 ᠢ᠋ᠶ᠋ᠠᠷ ᠤᠰᠤᠴᠢᠯᠠᠵᠤ ᠨᠠᠭᠠᠰᠢ ᠴᠠᠭᠠᠱᠢ ᠨᠢ ᠵᠥᠭᠡᠭᠡᠳᠡᠭ ᠪᠠᠢᠭᠰᠠᠨ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠨᠢ ᠪᠠᠵᠠᠭᠠᠬᠤ ᠦᠭᠡᠢ ᠬᠥᠮᠦᠨ ᠢ᠋《 ᠪᠠᠷᠠᠭᠤᠨ ᠤ᠋ ᠦᠯᠡᠳᠡᠭᠳᠡᠯ 》 ᠭᠡᠬᠦ᠃ ᠳᠣᠷᠵᠢ ᠶ᠋ᠢᠨ ᠠᠪᠴᠢᠷᠠᠭᠰᠠᠨ ᠡᠰᠡᠷᠭᠦᠦ᠂ ᠪᠠᠷᠤᠨ ᠵᠠᠩᠵᠤᠨ ᠳᠣᠷᠵᠢ ᠭᠡᠵᠡᠭᠡᠳᠡᠭ ᠰᠠᠨ᠃ ᠪᠤᠷᠤᠭᠤ ᠬᠣᠢᠰᠢ ᠪᠠᠨ ᠳᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠨᠢ ᠡᠨᠡ ᠪᠣᠷᠣᠭᠠ ᠳᠣᠷᠵᠢ ᠴᠡᠯ ᠵᠠᠯᠠᠭᠤᠬᠠᠨ ᠪᠠᠢᠯᠭᠦᠢ ᠶᠠᠭᠠᠬᠢᠬᠤ ᠪᠣᠢ᠂ ᠤᠴᠢᠷ ᠵᠦᠢ ᠪᠡᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠶᠤᠮ ᠤᠤ᠂ ᠦᠭᠡᠢ ᠦᠦ? ᠶᠠᠯᠠ ᠶᠠᠩᠬᠠ ᠦᠭᠡᠢ ᠥᠩᠭᠡᠷᠡᠭᠰᠡᠨ ᠨᠢ ᠶᠡᠬᠡ ᠶᠠᠭᠤᠮᠠ᠃ ᠣᠳᠣ ᠴᠤ᠌ ᠲᠡᠷᠡ ᠦᠶᠡ ᠶ᠋ᠢ ᠮᠡᠳᠡᠬᠦ ᠬᠥᠮᠦᠨ ᠦᠭᠡᠢ ᠪᠣᠯᠵᠠᠢ᠃ ᠴᠠᠭ ᠲᠠᠭᠠᠨ ᠶᠡᠬᠡ ᠴᠦ᠍ ᠨᠢᠳᠦ ᠦᠵᠦᠭᠦᠷᠯᠡᠭᠳᠡᠭᠰᠡᠨ ᠳᠡ᠂ ᠬᠥᠭᠡᠷᠦᠬᠦᠢ ᠭᠡᠵᠦ ᠬᠠᠭᠤᠴᠢᠯᠠᠵᠤ ᠪᠢᠯᠡ᠃ ᠪᠣᠷᠣᠭᠠ ᠳᠣᠷᠵᠢ ᠭᠤᠸᠠᠢ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠶᠡᠬᠡ ᠤᠰᠤᠨ ᠤ᠋ ᠬᠥᠪᠡᠭᠡ ᠰᠠᠬᠢᠵᠤ ᠠᠯᠪᠠ ᠠᠮᠢᠨ ᠤ᠋ ᠣᠯᠠᠨ ᠴᠤ᠌ ᠬᠡᠷᠡᠭ ᠢ᠋ ᠵᠠᠯᠭᠠᠭᠤᠯᠤᠭᠰᠠᠨ ᠪᠠᠢᠵᠤ ᠳᠠᠭᠠᠷᠠᠭᠠ᠃ ᠲᠡᠭᠡᠯᠡ ᠭᠡᠳ ᠲᠡᠭᠦᠨ ᠳ᠋ᠦ᠍ ᠣᠯᠳᠠᠬᠤ ᠱᠠᠩ ᠬᠠᠷᠠᠮᠵᠢ ᠴᠠᠯᠢᠩ ᠬᠥᠯᠥᠰᠥ ᠶᠠᠭᠤ ᠴᠤ᠌ ᠪᠠᠢᠭᠠ ᠦᠭᠡᠢ᠃ ᠡᠨᠡ ᠠᠵᠢᠯ ᠢ᠋ ᠬᠢᠬᠦ ᠶ᠋ᠢᠨ ᠲᠥᠯᠥᠭᠡ ᠯᠡ ᠬᠣᠷᠸᠠ ᠳ᠋ᠤ᠌ ᠢᠷᠡᠭᠰᠡᠨ ᠶᠦ᠍ᠮ ᠰᠢᠭ ᠡᠳᠦᠷ ᠰᠥᠨᠢ ᠦᠭᠡᠢ ᠵᠢᠳᠬᠦᠨᠡ᠃ ᠪᠤᠯᠴᠢᠮᠠ ᠦᠭᠡᠢ ᠨᠠᠰᠤᠨ ᠳ᠋ᠠᠭᠠᠨ ᠬᠥᠭᠡᠷᠴᠦᠭᠯᠡᠵᠦ ᠳᠠᠪᠬᠢᠭ᠌ᠰᠠᠨ ᠤ᠋ ᠪᠠᠨ ᠦᠢᠯᠡ ᠯᠠᠢ ᠶ᠋ᠢ ᠡᠳ᠋ᠯᠡᠵᠦ ᠵᠠᠮ( ᠭᠡᠮ) ᠢ᠋ᠶ᠋ᠡᠨ ᠴᠠᠭᠠᠳᠬᠠᠵᠤ ᠪᠠᠢᠭᠰᠠᠨ ᠴᠤ᠌ ᠶᠤᠮ ᠪᠢᠯᠡ ᠤᠤ᠃ ᠡᠪᠦᠭᠡᠨ ᠪᠣᠯᠤᠭᠰᠠᠨ ᠨᠠᠰᠤᠨ ᠳ᠋ᠠᠭᠠᠨ ᠭᠠᠭᠴᠠ ᠤᠳᠠᠭᠠ ᠴᠤ᠌ ᠪᠣᠯᠪᠠ ᠶᠠᠰᠤ ᠪᠠᠨ ᠠᠮᠠᠷᠠᠭᠠᠬᠤ ᠦᠭᠡᠢ᠂ ᠪᠦᠯᠢᠶᠡᠨ ᠳᠤᠯᠠᠭᠠᠨ ᠦᠭᠡ ᠴᠦ᠍ ᠰᠣᠨᠣᠰᠤᠭᠠ ᠦᠭᠡᠢ ᠪᠠᠢᠭᠰᠠᠭᠠᠷ ᠬᠣᠷᠸᠠ ᠳ᠋ᠤ᠌ ᠶᠠᠮᠠᠷ ᠴᠤ᠌ ᠰᠦᠷ ᠳᠤᠤᠯᠢᠶᠠᠨ ᠦᠭᠡᠢ ᠢᠷᠡᠭᠰᠡᠨ ᠰᠢᠭ ᠢ᠋ᠶ᠋ᠡᠨ ᠨᠢᠭᠡ ᠯᠡ ᠰᠥᠨᠢ ᠴᠢᠮᠡᠭᠡ ᠢᠮᠡᠭᠡ ᠦᠭᠡᠢᠬᠡᠨ ᠶᠠᠪᠤᠭᠠᠳ ᠥᠭᠬᠦᠯᠡ᠃ ᠪᠣᠷᠣᠭᠠ ᠳᠣᠷᠵᠢ ᠭᠤᠸᠠᠢ ᠶ᠋ᠢ ᠨᠠᠰᠤ ᠡᠯᠡᠭᠡᠭᠰᠡᠨ ᠦ᠌ ᠳᠠᠷᠠᠭᠠ ᠵᠤᠨ ᠬᠠᠨᠠᠨ ᠬᠠᠳᠠᠨ ᠣᠯᠣᠮ ᠭᠦᠨ ᠨᠣᠭᠣᠭᠠᠨ ᠴᠦᠩᠭᠦᠭᠡᠨ ᠪᠣᠯᠵᠤ ᠬᠥᠮᠦᠨ ᠮᠠᠯ ᠣᠢᠷᠠᠳᠬᠤ ᠠᠷᠭᠠ ᠦᠭᠡᠢ ᠬᠥᠯ ᠦᠭᠡᠢ ᠶᠡᠬᠡ ᠤᠰᠤᠨ ᠴᠠᠯᠭᠢᠬᠤ ᠨᠢ ᠬᠦᠷᠲᠡᠯᠡ ᠬᠠᠲᠤᠨ ᠰᠡᠯᠡᠩᠭᠡ ᠮᠥᠷᠡᠨ ᠡᠨᠡ ᠬᠥᠮᠦᠨ ᠦ᠌ ᠯᠠᠢ ᠯᠠᠨᠴᠢᠭ ᠠ᠋ᠴᠠ ᠬᠤᠪᠢᠶᠠᠯᠴᠠᠬᠤ ᠰᠠᠨᠠᠭᠠ ᠲᠠᠢ ᠤᠷᠤᠰᠬᠠᠯ ᠢ᠋ᠶ᠋ᠠᠨ ᠲᠠᠲᠠᠵᠤ ᠪᠠᠢᠵᠠᠢ ᠳᠠ ᠭᠡᠮᠡᠷ᠁
ᠡᠵᠡᠨ ᠦᠭᠡᠢ ᠪᠣᠯᠤᠭᠰᠠᠨ ᠭᠤᠶᠠ ᠣᠩᠭᠣᠴᠠᠨ ᠤ᠋ ᠳᠣᠲᠣᠷᠠ ᠨᠣᠭᠣᠭᠠᠨ ᠵᠠᠮᠠᠭ ᠰᠢᠪᠠᠵᠤ᠂ ᠤᠰᠤᠨ ᠳ᠋ᠤ᠌ ᠢᠳᠡᠭᠳᠡᠵᠦ ᠦᠵᠢᠷᠡᠰᠢᠭᠰᠡᠨ ᠣᠯᠣᠰᠣᠨ ᠠᠷᠭᠠᠮᠵᠢᠶᠠ ᠨᠢ ᠨᠢᠭᠡ ᠰᠢᠷᠦᠭᠦᠬᠡᠨ ᠳᠠᠪᠠᠯᠭᠠᠨ ᠳ᠋ᠤ᠌ ᠲᠠᠰᠤᠷᠠᠭᠠᠳ᠂ ᠮᠥᠩᠬᠡ ᠪᠤᠰᠤ ᠶ᠋ᠢᠨ ᠬᠣᠷᠸᠠ ᠠ᠋ᠴᠠ ᠴᠢᠮᠡᠭᠡ ᠦᠭᠡᠢᠬᠡᠨ ᠶᠠᠪᠤᠴᠢᠬᠠᠭᠰᠠᠨ ᠡᠵᠡᠨ ᠰᠢᠭ ᠢ᠋ᠶ᠋ᠡᠨ ᠤᠷᠤᠰᠬᠠᠯ ᠳ᠋ᠠᠭᠠᠨ ᠲᠠᠯᠢᠢᠵᠤ ᠣᠳᠬᠤ ᠳ᠋ᠤ᠌ ᠪᠡᠯᠡᠨ ᠲᠣᠭ᠌ᠰᠢᠨ ᠳᠠᠪᠠᠯᠭᠠᠨ ᠳ᠋ᠤ᠌ ᠠᠯᠠᠭᠠᠳᠠᠭᠤᠯᠤᠨ ᠳᠠᠯᠪᠢᠯᠵᠠᠨᠠ᠃
《ᠭᠤᠷᠪᠠᠨ ᠭᠠᠰᠠᠨᠠ》 ᠶ᠋ᠢᠨ ᠳᠤᠰᠢᠶᠠᠬᠢ ᠬᠠᠨᠠᠨ ᠬᠠᠳᠠᠨ ᠤ᠋ ᠣᠷᠣᠢ ᠠ᠋ᠴᠠ ᠣᠳᠣ ᠬᠡᠨ ᠴᠦ᠍《 ᠪᠣᠷᠣᠭᠠ ᠳᠣᠷᠵᠢ ᠠ᠋᠂ ᠣᠩᠭᠣᠴᠠ ᠪᠠᠨ ᠭᠠᠷᠭᠠᠭᠠᠷᠠᠢ》 ᠭᠡᠵᠦ ᠬᠣᠭᠣᠯᠠᠢ ᠮᠡᠳᠡᠨ ᠬᠠᠰᠬᠢᠷᠬᠤ ᠪᠠᠨ ᠪᠣᠯᠢᠵᠤ᠂ ᠬᠠᠪᠢ ᠶ᠋ᠢᠨ ᠠᠭᠤᠯᠠᠰ ᠲᠡᠷᠡ ᠴᠤᠤᠷᠢᠶᠠ ᠶ᠋ᠢ ᠬᠦᠯᠢᠶᠡᠬᠦ ᠮᠡᠲᠦ ᠬᠥᠬᠡ ᠨᠣᠭᠣᠭᠠᠨ ᠤ᠋ ᠤᠨᠢᠶᠠᠷ ᠳᠤᠮᠳᠠ ᠬᠥᠯᠴᠥᠭᠦᠷᠡᠨ ᠨᠣᠵᠣᠭᠣᠷᠠᠵᠤ ᠡᠯᠦᠢ ᠬᠤᠯᠤᠢᠬᠠᠨ᠃ ᠣᠷᠴᠢᠨ ᠤ᠋ ᠡᠨᠡ ᠠᠨᠢᠷ ᠦᠭᠡᠢ ᠨᠠᠮ ᠭᠦᠮ ᠢ᠋ ᠡᠪᠳᠡᠨ ᠭᠧᠨ ᠨᠢᠭᠡᠨ《 ᠪᠣᠷᠣᠭᠠ ᠳᠣᠷᠵᠢ ᠠ᠋ 》 ᠭᠡᠵᠦ ᠬᠠᠰᠬᠢᠷᠪᠠᠯ ᠠᠭᠤᠯᠠ ᠤᠰᠤ ᠲᠡᠷᠡ ᠠᠶᠠ ᠪᠠᠷ ᠢ᠋ᠶ᠋ᠠᠨ ᠴᠤᠤᠷᠢᠶᠠ ᠬᠠᠲᠠᠭᠠᠨ ᠠᠮᠢᠯᠠᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠡᠵᠡᠨ ᠦᠭᠡᠢ ᠭᠤᠶᠠ ᠣᠩᠭᠣᠴᠠ᠂ ᠴᠤᠤᠷᠢᠶᠠ ᠦᠭᠡᠢᠯᠡᠭᠰᠡᠨ ᠠᠭᠤᠯᠠ ᠤᠰᠤ ᠴᠥᠮ ᠬᠠᠭᠤᠴᠢᠨ ᠶᠠᠩᠵᠤ ᠪᠠᠷ ᠢ᠋ᠶ᠋ᠠᠨ ᠬᠠᠷᠠᠭᠳᠠᠪᠠᠴᠤ ᠬᠡᠨ ᠳ᠋ᠦ᠍ ᠴᠦ᠍ ᠦᠯᠦ ᠠᠩᠵᠠᠭᠠᠷᠠᠭᠳᠠᠭᠰᠠᠨ ᠲᠡᠷᠡ ᠡᠪᠦᠭᠡᠨ ᠣᠳᠣ ᠠᠯᠠᠭᠠ᠃ ᠥᠴᠦᠬᠡᠨ ᠮᠠᠭᠤ ᠬᠣᠷᠣᠬᠠᠢ ᠰᠢᠪᠠᠵᠢ ᠠ᠋ᠴᠠ ᠠᠪᠤᠭᠠᠳ ᠬᠣᠷᠸᠠ ᠳ᠋ᠤ᠌ ᠢᠷᠡᠭᠰᠡᠨ ᠪᠦᠬᠦᠨ ᠥᠪᠡᠷ ᠦ᠋ᠨ ᠭᠡᠰᠡᠨ ᠣᠷᠣᠨ ᠵᠠᠢ ᠲᠠᠢ ᠪᠠᠢᠳᠠᠭ ᠠᠵᠢ᠃
ᠣᠳᠣ ᠬᠣᠶᠠᠷ ᠰᠤᠮᠤ ᠶ᠋ᠢᠨ ᠬᠢᠨ ᠤᠰᠤ ᠬᠡᠰᠦᠭᠰᠡᠨ ᠴᠠᠭ ᠲᠤ᠌ ᠬᠠᠨᠠᠨ ᠬᠠᠳᠠᠨ ᠤ᠋ ᠣᠯᠣᠮ ᠢ᠋ᠶ᠋ᠠᠷ ᠵᠠᠮ ᠲᠣᠪᠴᠢᠯᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠤ ᠬᠠᠮᠢᠭᠠ ᠬᠣᠯᠠ ᠶ᠋ᠢᠨ《 ᠳᠥᠷᠥᠭᠡ ᠬᠠᠩᠭᠢᠨᠠᠭᠤᠷ 》 ᠤ᠋ᠨ ᠪᠢᠷᠸᠠᠵᠠ ᠪᠠᠷ ᠵᠣᠷᠴᠢᠨ ᠲᠣᠭᠣᠷᠢᠭᠤ ᠵᠠᠮ ᠢ᠋ᠶ᠋ᠠᠷ ᠢᠷᠡᠵᠦ ᠣᠴᠢᠳᠠᠭ ᠪᠣᠯᠤᠭᠰᠠᠨ ᠶᠤᠮ ᠳᠠ᠃
ᠠᠩᠬᠠ ᠲᠤᠮᠲᠠᠳᠤ ᠶᠢᠨ ᠡᠪᠦᠯ ᠦᠨ ᠠᠮᠠᠷᠠᠯᠲᠠ ᠶᠢᠨ ᠳᠠᠰᠬᠠᠯ
< ᠠᠮᠲᠠᠷᠬᠠᠨ ᠤᠩᠰᠢᠬᠤᠢ > ᠠᠴᠠ ᠬᠠᠭᠤᠯᠤᠨ ᠪᠢᠴᠢᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠡᠷᠡᠯᠴᠢᠮᠡᠭ
ᠬᠢᠨᠠᠭᠴᠢ᠄ ᠲᠤᠭ᠍ᠴᠢ ᠰᠠᠷᠠᠨᠠ