ᠵᠢᠷᠤᠭ ᠤᠨ ᠪᠣᠷᠣ - ᠬᠠᠰᠪᠠᠷᠰ Зургийн бор - Хасбарс
394ᠵᠢᠷᠤᠭ ᠤᠨ ᠪᠣᠷᠣ
ᠬᠠᠰᠪᠠᠷᠰ ᠵᠣᠬᠢᠶᠠᠪᠠ
ᠳᠠᠷᠮᠠᠵᠠᠪ ᠪᠣᠯ ᠮᠣᠷᠢᠨ ᠳ᠋ᠤ᠌ ᠲᠤᠩ ᠳᠤᠷᠠᠲᠠᠢ ᠂ ᠰᠠᠢᠨ ᠮᠣᠷᠢ ᠦᠵᠡᠪᠡᠯ ᠰᠠᠯᠬᠤ ᠳᠤᠷᠠ ᠦᠭᠡᠢ ᠬᠥᠮᠦᠨ ᠪᠠᠶ᠋ᠢᠵᠠᠢ ᠃ ᠲᠡᠶ᠋ᠢᠮᠦ ᠡᠴᠡ ᠬᠡᠲᠦᠶ᠋ᠢᠪᠡᠷ ᠦᠭᠡᠶ᠋ᠢᠭᠦᠦ ᠶᠠᠳᠠᠭᠤ ᠪᠣᠯᠪᠠᠴᠤ ᠨᠢᠭᠡ ᠰᠠᠢᠨ ᠮᠣᠷᠢ ᠣᠯᠤᠶᠠ ᠭᠡᠵᠦ ᠶᠡᠬᠡᠯᠡ ᠬᠦᠰᠡᠵᠦ ᠪᠠᠶ᠋ᠢᠵᠠᠢ ᠃ ᠨᠢᠭᠡ ᠵᠢᠯ ᠬᠡᠭᠡᠷᠡ ᠶ᠋ᠢᠨ ᠴᠠᠭᠠᠨ ᠮᠥᠭᠥ ᠶᠡᠬᠡ ᠦᠨᠡ ᠬᠦᠷᠦᠭᠰᠡᠨ ᠳ᠋ᠦ᠍ ᠳᠠᠷᠮᠠᠵᠠᠪ ᠡᠬᠡᠨᠡᠷ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠴᠢᠯᠥᠭᠡ ᠯᠡ ᠭᠠᠷᠪᠠᠯ ᠬᠥᠳᠡᠭᠡ ᠭᠠᠷᠴᠤ ᠮᠥᠭᠥ ᠲᠡᠭᠦᠭᠰᠡᠭᠡᠷ ᠪᠠᠶ᠋ᠢᠭᠠᠳ ᠨᠡᠯᠢᠶᠡᠳ ᠴᠤᠭᠯᠠᠭᠤᠯᠵᠠᠢ ᠃ ᠲᠡᠭᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠣᠲᠣᠷ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠨᠢᠭᠡ ᠬᠢᠲᠠᠳ ᠮᠠᠶ᠋ᠢᠮᠠᠶ᠋ᠢᠴᠢᠨ ᠠ᠋ᠴᠠ ᠪᠣᠷᠣ ᠳᠠᠭᠠ ᠰᠣᠯᠢᠵᠤ ᠠᠪᠴᠠᠢ ᠃ ᠡᠨᠡ ᠪᠣᠷᠣ ᠳᠠᠭᠠ ᠨᠢ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠰᠠᠢᠨ ᠴᠤ᠌ ᠮᠣᠷᠢ ᠪᠣᠯᠵᠠᠢ ᠂ ᠮᠠᠩᠨᠠᠢ ᠲᠡᠨᠢᠭᠡᠷ ᠂ ᠮᠤᠨᠳᠠᠭᠠ ᠥᠨᠳᠥᠷ ᠂ ᠳᠡᠯ ᠰᠡᠭᠦᠯ ᠥᠳᠬᠡᠨ ᠂ ᠳᠠᠯᠤ ᠬᠠᠷᠴᠠᠭᠠ ᠥᠷᠭᠡᠨ ᠁ ᠬᠤᠷᠳᠤᠨ ᠭᠡᠳᠡᠭ ᠊ᠢ ᠨᠢ ᠨᠡᠩ ᠪᠤᠤ ᠬᠡᠯᠡ ᠂ ᠨᠢᠭᠡ ᠯᠡ ᠭᠦᠶᠦᠳᠡᠯ ᠳᠡᠭᠡᠷᠡ ᠴᠢᠨᠣᠠ ᠶ᠋ᠢ ᠭᠦᠢᠴᠡᠴᠢᠬᠡᠳᠡᠭ ᠭᠡᠨᠡ ᠃ ᠳᠠᠷᠮᠠᠵᠠᠪ ᠂ ᠮᠣᠷᠢ ᠪᠠᠨ ᠡᠷᠳᠡᠨᠢ ᠰᠢᠭ ᠬᠠᠶ᠋ᠢᠷᠠᠯᠠᠵᠤ ᠂ 《 ᠵᠢᠷᠤᠭ ᠤ᠋ᠨ ᠪᠣᠷᠣ 》 ᠭᠡᠵᠦ ᠨᠠᠷᠠᠯᠠᠪᠠ ᠃
ᠡᠨᠡ 《 ᠵᠢᠷᠤᠭ ᠤ᠋ᠨ ᠪᠣᠷᠣ 》 ᠶ᠋ᠢᠨ ᠴᠤᠤ ᠶ᠋ᠢ ᠥᠨᠳᠥᠷ ᠴᠢᠬᠢ ᠲᠡᠢ ᠦᠵᠦᠮᠦᠴᠢᠨ ᠸᠠᠩ ᠳᠣᠷᠵᠢ ᠰᠣᠨᠣᠰᠤᠭᠠᠳ ᠠᠪᠴᠠᠢ ᠃ ᠲᠡᠷᠡ ᠱᠠᠩ ᠳ᠋ᠠᠭᠠᠨ ᠲᠠᠲᠠᠬᠤ ᠭᠡᠵᠦ ᠭᠣᠴᠣᠭ ᠠᠷᠲᠠᠨᠠ ᠪᠠᠨ ᠬᠡᠳᠦ ᠤᠳᠠᠭᠠ ᠵᠠᠷᠤᠪᠠ ᠃ ᠮᠣᠷᠢᠨ ᠳ᠋ᠠᠭᠠᠨ ᠬᠠᠶ᠋ᠢᠷᠠᠲᠠᠢ ᠳᠠᠷᠮᠠᠵᠠᠪ ᠴᠤ᠌ ᠤᠳᠠᠭᠠ ᠪᠦᠷᠢ ᠡᠶ᠋ᠢᠮᠦ ᠲᠡᠶ᠋ᠢᠮᠦ ᠭᠡᠵᠦ ᠭᠤᠶᠤᠵᠤ ᠭᠤᠩᠰᠢᠭᠠᠳ ᠠᠷᠭᠠᠯᠠᠨ ᠪᠤᠴᠠᠭᠠᠵᠤ ᠪᠠᠶ᠋ᠢᠵᠠᠢ ᠃ ᠭᠡᠲᠡᠯᠡ ᠨᠢᠭᠡᠨ ᠡᠳᠦᠷ ᠳᠣᠷᠵᠢ ᠸᠠᠩ ᠤ᠋ᠨ ᠵᠤᠤᠬᠠᠨ ᠪᠣᠭᠣᠯ ᠵᠠᠮᠪᠠᠯ ᠂ ᠴᠢᠯᠥᠭᠡ ᠭᠤᠶᠤᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠳ᠋ᠠᠭᠠᠨ ᠳᠠᠷᠮᠠᠵᠠᠪ ᠤ᠋ᠨ ᠬᠢ ᠪᠡᠷ ᠳᠠᠭᠠᠷᠢᠵᠠᠢ ᠃
ᠳᠠᠷᠮᠠᠵᠠᠪ ᠲᠡᠳᠡ ᠬᠣᠶᠠᠭᠤᠯᠠ ᠪᠠᠭᠠ ᠳ᠋ᠠᠭᠠᠨ ᠨᠢᠭᠡ ᠳᠣᠣᠷᠠ ᠥᠰᠦᠭᠰᠡᠨ ᠶᠡᠬᠡ ᠳᠣᠲᠣᠨᠣ ᠤᠯᠤᠰ ᠲᠤᠯᠠ ᠵᠠᠮᠪᠠᠯ ᠄ 《 ᠳᠠᠷᠮᠠᠵᠠᠪ ᠠ᠋ ! ᠮᠠᠭᠤ ᠪᠣᠯᠵᠠᠢ ᠂ ᠳᠣᠷᠵᠢ ᠸᠠᠩ ᠬᠡᠳᠦᠨ ᠡᠳᠦᠷ ᠡᠴᠡ ( ᠵᠢᠷᠤᠭ ᠤ᠋ᠨ ᠪᠣᠷᠣ ) ᠶ᠋ᠢ ᠴᠢᠨᠢ ᠪᠤᠯᠢᠶᠠᠬᠤ ᠪᠠᠷ ᠬᠥᠮᠦᠨ ᠶᠠᠪᠤᠭᠤᠯᠬᠤ ᠭᠡᠵᠦ ᠪᠠᠶ᠋ᠢᠨᠠ 》 ᠭᠡᠵᠦ ᠬᠡᠯᠡ ᠥᠭᠭᠦᠭᠡᠳ ᠶᠠᠪᠤᠪᠠ ᠃ ᠳᠠᠷᠮᠠᠵᠠᠪ ᠰᠣᠨᠣᠰᠤᠭᠠᠳ ᠨᠢᠭᠡᠮᠦᠰᠦᠨ ᠰᠠᠨᠳᠤᠷᠴᠤ ᠠᠷᠭᠠ ᠶᠠᠳᠠᠪᠠ ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠭᠡᠨᠡᠳᠲᠡ ᠲᠡᠭᠦᠰ ᠭᠡᠳᠡᠭ ᠨᠡᠷᠡ ᠲᠡᠢ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠳᠠᠷᠮᠠᠵᠠᠪ ᠤ᠋ᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠪᠡ ᠃ ᠳᠠᠷᠮᠠᠵᠠᠪ ᠤ᠋ᠨ ᠮᠠᠭᠤ ᠮᠠᠶ᠋ᠢᠵᠢᠬᠢ ᠭᠡᠷ ᠲᠦ᠍ ᠵᠠᠬᠢᠷᠤᠭᠴᠢ ᠨᠣᠶᠠᠨ ᠢᠷᠡᠨᠡ ᠭᠡᠳᠡᠭ ᠴᠢᠨᠢ ᠭᠠᠯᠠᠪ ᠲᠤ᠌ ᠦᠭᠡᠢ ᠬᠡᠷᠡᠭ ᠰᠢᠦ ᠃ ᠳᠠᠷᠮᠠᠵᠠᠪ ᠮᠡᠨᠳᠦᠯᠡᠨ ᠵᠠᠯᠠᠭᠠᠳ ᠬᠠᠷᠠ ᠪᠣᠯᠪᠠᠴᠤ ᠴᠠᠢ ᠪᠠᠷᠢᠵᠠᠢ ᠃ ᠬᠤᠯᠤᠭᠠᠷ ᠴᠢᠬᠢ ᠲᠡᠢ ᠂ ᠬᠠᠪᠠ ᠨᠣᠬᠠᠢ ᠶ᠋ᠢᠨ ᠬᠠᠮᠠᠷ ᠲᠠᠢ ᠲᠡᠭᠦᠰ ᠵᠠᠬᠢᠷᠤᠭᠴᠢ ᠶᠡᠬᠡᠯᠡ ᠳᠣᠲᠣᠨᠣᠰᠣᠭ ᠰᠢᠭ᠋ ᠠᠭᠠᠰᠢᠯᠠᠵᠤ ᠂ ᠰᠠᠢᠨ ᠊ᠢ ᠨᠢ ᠠᠰᠠᠭᠤᠭᠠᠳ ᠄ 《 ᠳᠠᠷᠮᠠᠵᠠᠪ ᠠ᠋ ! ᠲᠠᠨ ᠰᠢᠭ᠋ ᠶᠠᠳᠠᠭᠤ ᠵᠦᠳᠡᠭᠦᠦ ᠬᠥᠮᠦᠨ ᠦᠨᠢᠶᠡ ᠮᠠᠯ ᠬᠡᠷᠡᠭ ᠲᠡᠢ ᠪᠠᠶ᠋ᠢᠬᠤ ᠠ᠋ ! ᠪᠢ ᠴᠢᠮᠠᠲᠤ ᠨᠢᠭᠡ ᠲᠤᠭᠤᠯ ᠲᠠᠢ ᠰᠠᠢᠨ ᠦᠨᠢᠶᠡ ᠥᠭᠭᠦᠶᠡ ᠂ ( ᠵᠢᠷᠤᠭ ᠤ᠋ᠨ ᠪᠣᠷᠣ ) ᠪᠠᠨ ᠨᠠᠳᠠ ᠥᠭᠴᠢᠭᠡ ᠂ ᠶᠠᠳᠠᠭᠤ ᠬᠥᠮᠦᠨ ᠴᠢᠮᠠᠲᠤ ᠲᠡᠷᠡ ᠶᠠᠮᠠᠷ ᠯᠠ ᠬᠡᠷᠡᠭ ᠪᠠᠶ᠋ᠢᠬᠤ ᠪᠣᠢ ᠳᠠ 》 ᠭᠡᠵᠦ ᠢᠷᠡᠭᠰᠡᠨ ᠰᠠᠨᠠᠭᠠ ᠪᠠᠨ ᠰᠢᠭᠤᠳ ᠬᠡᠯᠡᠪᠡ ᠃ ᠳᠠᠷᠮᠠᠵᠠᠪ ᠰᠣᠨᠣᠰᠤᠭᠠᠳ ᠪᠠᠬᠠᠨ ᠠᠭᠤᠷᠯᠠᠵᠤ ᠂ ᠳᠣᠲᠣᠷᠠ ᠪᠠᠨ ᠪᠠᠶᠠᠳ ᠨᠣᠶᠠᠳ ᠯᠠ ᠰᠠᠢᠨ ᠮᠣᠷᠢ ᠤᠨᠤᠬᠤ ᠰᠠᠯᠲᠠᠭᠠ ᠲᠠᠢ ᠶᠤᠮ ᠤᠤ ? ᠭᠡᠵᠦ ᠪᠣᠳᠣᠵᠤ ᠪᠠᠶ᠋ᠢᠲᠠᠯᠠ ᠡᠬᠡᠨᠡᠷ ᠳᠡᠯᠭᠡᠷ ᠨᠢ ᠭᠠᠷ ᠠ᠋ᠴᠠ ᠨᠢ ᠲᠠᠲᠠᠵᠤ ᠭᠠᠷᠤᠭᠠᠳ ᠄ 《 ᠮᠢᠨᠦ ᠪᠣᠳᠣᠬᠤ ᠪᠠᠷ ᠡᠨᠡ ᠮᠣᠷᠢ ᠮᠠᠨ ᠤ᠋ ᠪᠣᠯᠬᠤ ᠠ᠋ᠴᠠ ᠭᠠᠷᠴᠠᠢ ᠃ ᠲᠡᠭᠦᠰ ᠵᠠᠬᠢᠷᠤᠭᠴᠢ ᠠᠪᠠᠴᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠳᠣᠷᠵᠢ ᠸᠠᠩ ᠠᠪᠠᠴᠢᠨᠠ ᠃ ᠳᠣᠷᠵᠢ ᠸᠠᠩ ᠢᠷᠡᠪᠡᠯ ᠬᠠᠷᠢᠨ ᠣᠷᠣ ᠦᠭᠡᠢ ᠪᠡᠷ ᠪᠤᠯᠢᠶᠠᠵᠤ ᠮᠡᠳᠡᠨᠡ ᠃ ᠲᠡᠭᠡᠬᠦᠯᠡᠷ ᠨᠢᠭᠡ ᠲᠤᠭᠤᠯ ᠲᠠᠢ ᠰᠠᠢᠨ ᠦᠨᠢᠶᠡ ᠪᠡᠷ ᠲᠡᠭᠦᠰ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠥᠭᠴᠢᠭᠡᠪᠡᠯ ᠳᠡᠭᠡᠷᠡ ᠪᠢᠰᠢᠦ ? 》 ᠭᠡᠵᠦ ᠰᠢᠪᠡᠨᠡᠨ ᠬᠡᠯᠡᠪᠡ ᠃ ᠳᠠᠷᠮᠠᠵᠠᠪ ᠪᠣᠳᠣᠪᠠᠯ ᠪᠠᠰᠠ ᠵᠥᠪ ᠪᠣᠯᠬᠣᠷ ᠠᠭᠤᠷ ᠢ᠋ᠶ᠋ᠠᠨ ᠳᠠᠷᠤᠭᠠᠳ ᠣᠷᠣᠵᠤ ᠢᠷᠡᠪᠡ ᠃ ᠲᠡᠭᠦᠰ ᠵᠠᠬᠢᠷᠤᠭᠴᠢ ᠄ 《 ᠴᠢ ᠥᠭᠪᠡᠯ ᠪᠢ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠠᠪᠤᠭᠠᠳ ᠶᠠᠪᠤᠨᠠ ᠂ ᠲᠠᠨᠤᠰ ᠳᠠᠷᠠᠭᠠᠪᠠᠷ ᠣᠴᠢᠭᠠᠳ ᠲᠤᠭᠤᠯ ᠲᠠᠢ ᠦᠨᠢᠶᠡ ᠪᠡᠨ ᠠᠪᠤᠭᠠᠳ ᠢᠷᠡ 》 ᠭᠡᠵᠦ ᠳᠠᠪᠲᠠᠨ ᠬᠡᠯᠡᠪᠡ ᠃ ᠳᠠᠷᠮᠠᠵᠠᠪ ᠠᠷᠭᠠ ᠦᠭᠡᠢ ᠳᠣᠭᠣᠯᠠᠩ ᠨᠢᠯᠪᠤᠰᠤ ᠤᠨᠠᠭᠠᠨ ᠄ 《 ( ᠵᠢᠷᠤᠭ ᠤ᠋ᠨ ᠪᠣᠷᠣ ) ᠮᠢᠨᠢ ᠬᠥᠳᠡᠭᠡ ᠴᠢᠳᠥᠷ ᠲᠡᠢ ᠪᠠᠶ᠋ᠢᠨᠠ ᠂ ᠪᠢ ᠠᠪᠴᠢᠷᠠᠵᠤ ᠥᠭᠭᠦᠶᠡ 》 ᠭᠡᠳ ᠭᠠᠷᠴᠤ ᠶᠠᠪᠤᠪᠠ ᠃
ᠳᠠᠷᠮᠠᠵᠠᠪ ᠬᠥᠯ ᠳ᠋ᠦ᠍ᠨᠢ ᠳᠥᠩᠭᠡ ᠲᠡᠢ ᠰᠢᠭ ᠬᠦᠨᠳᠦ ᠭᠡᠭᠴᠢ ᠪᠡᠷ ᠠᠯᠬᠤᠭᠰᠠᠭᠠᠷ 《 ᠵᠢᠷᠤᠭ ᠤ᠋ᠨ ᠪᠣᠷᠣ 》 ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠭᠡᠳᠡ ᠬᠦᠷᠪᠡ ᠃ ᠬᠠᠶ᠋ᠢᠷᠠᠲᠠᠢ ᠮᠣᠷᠢ ᠪᠠᠨ ᠦᠵᠡᠮᠡᠭᠴᠡ ᠬᠦᠵᠦᠭᠦᠦ ᠶ᠋ᠢ ᠨᠢ ᠲᠡᠪᠡᠷᠢᠭᠡᠳ ᠳᠠᠭᠤ ᠠᠯᠲᠠᠨ ᠤᠬᠢᠯᠠᠯᠠ ᠃ 《 ᠵᠢᠷᠤᠭ ᠤ᠋ᠨ ᠪᠣᠷᠣ 》 ᠮᠢᠨᠢ ! ᠡᠨᠡ ᠡᠳᠦᠷ ᠠᠷᠠᠴᠢᠯᠠᠵᠤ ᠪᠣᠶ᠋ᠢᠵᠢᠭᠤᠯᠤᠭᠰᠠᠨ ᠡᠵᠡᠨ ᠡᠴᠡ ᠪᠡᠨ ᠰᠠᠯᠬᠤ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ ᠪᠠᠶ᠋ᠢᠨᠠᠤ ? ᠸᠠᠩ ᠨᠣᠶᠠᠳ ᠴᠢᠮᠠᠶ᠋ᠢ ᠠᠪᠠᠴᠢᠬᠤ ᠭᠡᠵᠦ ᠪᠠᠶ᠋ᠢᠨᠠ ᠃ ᠶᠢᠷᠲᠢᠨᠴᠦ ᠠ᠋ ! ᠶᠢᠷᠲᠢᠨᠴᠦ ᠂ ᠡᠨᠡ ᠶᠢᠷᠲᠢᠨᠴᠦ ᠶᠠᠮᠠᠷ ᠬᠠᠷᠠᠩᠭᠤᠢ ᠪᠣᠢ ⁈ ᠦᠭᠡᠶ᠋ᠢᠭᠦᠦ ᠶᠠᠳᠠᠭᠤ ᠪᠢᠳᠡ ᠰᠠᠢᠨ ᠮᠣᠷᠢ ᠲᠡᠵᠢᠭᠡᠵᠦ ᠤᠨᠤᠬᠤ ᠡᠷᠬᠡ ᠴᠢᠯᠥᠭᠡ ᠪᠠᠰᠠ ᠦᠭᠡᠢ ᠤᠤ ! ᠁ ᠭᠡᠵᠦ ᠭᠠᠰᠢᠭᠤᠳᠠᠨᠠ ᠃ ᠬᠥᠭᠡᠷᠦᠬᠦᠢ ᠂ 《 ᠵᠢᠷᠤᠭ ᠤ᠋ᠨ ᠪᠣᠷᠣ 》 ᠨᠢ ᠴᠦ᠍ ᠡᠵᠡᠨ ᠦ᠌ ᠪᠡᠨ ᠡᠮᠭᠡᠨᠢᠨ ᠵᠣᠪᠠᠵᠤ ᠪᠠᠶ᠋ᠢᠬᠤ ᠶ᠋ᠢ ᠮᠡᠳᠡᠭᠰᠡᠨ ᠪᠣᠯᠤᠯᠲᠠᠢ ᠂ ᠤᠨᠠᠭᠠᠨ ᠳᠠᠭᠤ ᠪᠠᠷ ᠦᠦᠷᠰᠡᠵᠦ ᠂ ᠡᠷᠡᠦ ᠪᠡᠷ ᠢ᠋ᠶ᠋ᠡᠨ ᠳᠠᠷᠮᠠᠵᠠᠪ ᠤ᠋ᠨ ᠲᠣᠬᠣᠢ ᠶ᠋ᠢ ᠱᠦᠷᠭᠦᠭᠡᠨᠡ ᠃ ᠳᠠᠷᠮᠠᠵᠠᠪ ᠨᠢᠭᠡᠨ ᠵᠡᠷᠭᠡ ᠤᠬᠢᠯᠠᠭᠠᠳ ᠬᠡᠰᠢᠭ ᠪᠡᠯᠭᠡ ᠪᠥᠭᠡᠳ ᠬᠠᠶ᠋ᠢᠷᠠᠯᠠᠬᠤ ᠲᠡᠮᠳᠡᠭ ᠭᠡᠵᠦ ᠮᠣᠷᠢᠨ ᠤ᠋ ᠪᠠᠨ ᠳᠡᠯ ᠰᠡᠭᠦᠯ ᠡᠴᠡ ᠨᠢᠭᠡ ᠬᠡᠳᠦᠨ ᠦᠰᠦ ᠠᠪᠤᠭᠠᠳ ᠵᠠᠬᠢᠷᠤᠭᠴᠢ ᠳ᠋ᠤ᠌ ᠲᠤᠰᠢᠶᠠᠪᠠ ᠃ ᠲᠡᠭᠦᠰ ᠵᠠᠬᠢᠷᠤᠭᠴᠢ ᠂ ᠳᠠᠷᠮᠠᠵᠠᠪ ᠲᠤ᠌ ᠪᠠᠶᠠᠷᠯᠠᠭᠰᠠᠨ ᠴᠤ᠌ ᠪᠢᠰᠢ ᠠᠭᠤᠷᠯᠠᠭᠰᠠᠨ ᠴᠤ᠌ ᠪᠢᠰᠢ ᠨᠢᠭᠡ ᠯᠡ ᠡᠪ ᠦᠭᠡᠢ ᠢᠨᠢᠶᠡᠭᠡᠳ ᠂ 《 ᠵᠢᠷᠤᠭ ᠤ᠋ᠨ ᠪᠣᠷᠣ 》 ᠶ᠋ᠢ ᠨᠢ ᠠᠪᠤᠭᠠᠳ ᠶᠠᠪᠤᠵᠠᠢ ᠃
ᠳᠠᠷᠮᠠᠵᠠᠪ ᠮᠣᠷᠢᠨ ᠤ᠋ ᠳᠡᠯ ᠰᠡᠭᠦᠯ ᠡᠴᠡ ᠦᠯᠡᠳᠡᠭᠡᠭᠰᠡᠨ ᠬᠡᠳᠦᠨ ᠦᠰᠦ ᠶ᠋ᠢ ᠪᠠᠷᠢᠭᠠᠳ ᠂ ᠡᠬᠡᠨᠡᠷ ᠳᠡᠯᠭᠡᠷ ᠲᠡᠢ ᠪᠡᠨ ᠬᠣᠶᠠᠭᠤᠯᠠ ᠬᠣᠶ᠋ᠢᠨᠠ ᠠ᠋ᠴᠠ ᠨᠢ 《 ( ᠵᠢᠷᠤᠭ ᠤ᠋ᠨ ᠪᠣᠷᠣ ) ᠮᠢᠨᠢ ᠬᠤᠷᠤᠢ ! ( ᠵᠢᠷᠤᠭ ᠤ᠋ᠨ ᠪᠣᠷᠣ ) ᠮᠢᠨᠢ ᠬᠤᠷᠤᠢ ! 》 ᠭᠡᠵᠦ ᠨᠢᠳᠦᠨ ᠳᠠᠯᠳᠠ ᠣᠷᠣᠲᠠᠯᠠ ᠳᠠᠭᠤᠳᠠᠨ ᠬᠣᠴᠣᠷᠪᠠ ᠃
《 ᠵᠢᠷᠤᠭ ᠤ᠋ᠨ ᠪᠣᠷᠣ 》 ᠪᠠᠨ ᠠᠪᠲᠠᠭᠠᠳ ᠬᠣᠶᠠᠷ ᠬᠣᠨᠣᠭᠰᠠᠨ ᠦᠭᠡᠢ ᠳᠣᠷᠵᠢ ᠸᠠᠩ ᠤ᠋ᠨ ᠭᠣᠴᠣᠭ ᠠᠷᠲᠠᠨᠠ ᠪᠠᠰᠠ ᠬᠣᠶᠠᠷ ᠬᠥᠮᠦᠨ ᠳᠠᠭᠠᠭᠤᠯᠤᠨ ᠮᠣᠷᠢ ᠶ᠋ᠢ ᠨᠢ ᠪᠤᠯᠢᠶᠠᠵᠤ ᠠᠪᠠᠴᠢᠬᠤ ᠪᠠᠷ ᠢᠷᠡᠵᠡᠢ ᠃ ᠲᠡᠳᠡ ᠲᠡᠭᠦᠰ ᠵᠠᠬᠢᠷᠤᠭᠴᠢ ᠠᠪᠤᠭᠠᠳ ᠶᠠᠪᠤᠯᠠ ᠭᠡᠵᠦ ᠰᠣᠨᠣᠰᠤᠮᠠᠭᠴᠠ ᠂ ᠳᠠᠷᠮᠠᠵᠠᠪ ᠊ᠢ ᠨᠢᠭᠡ ᠵᠡᠷᠭᠡ ᠰᠠᠢᠨ ᠬᠠᠷᠢᠶᠠᠭᠠᠳ ᠂ ᠦᠭᠡ ᠳᠠᠭᠤᠨ ᠦᠭᠡᠢ ᠭᠡᠷ ᠲᠦ᠋ᠨᠢ ᠪᠠᠶ᠋ᠢᠬᠰᠠᠨ ᠴᠣᠷ ᠶ᠋ᠢᠨ ᠭᠠᠭᠴᠠ ᠰᠢᠨᠡ ᠢᠰᠡᠭᠡᠢ ᠶ᠋ᠢ ᠨᠢ ᠪᠤᠯᠢᠶᠠᠨ ᠠᠪᠴᠤ ᠶᠠᠪᠤᠪᠠ ᠃ ᠸᠠᠩ ᠤ᠋ᠨ ᠵᠠᠷᠯᠢᠭ ᠢ᠋ᠶ᠋ᠠᠷ ᠢᠷᠡᠭᠰᠡᠨ ᠬᠥᠮᠦᠰ ᠊ᠢ ᠳᠠᠷᠮᠠᠵᠠᠪ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠪᠣᠢ ? ᠪᠠᠰᠠ ᠯᠠ ᠬᠣᠣᠷ ᠊ᠢ ᠨᠢ ᠠᠮᠰᠠᠭᠠᠳ ᠬᠣᠴᠣᠷᠬᠤ ᠯᠠ ᠬᠡᠷᠡᠭ ᠠ᠋ !
ᠳᠠᠷᠠᠭᠠ ᠨᠢ ᠲᠡᠭᠦᠰ ᠵᠠᠬᠢᠷᠤᠭᠴᠢ ᠶ᠋ᠢᠨ ᠥᠭᠭᠦᠭᠰᠡᠨ ᠲᠤᠭᠤᠯ ᠲᠠᠢ ᠦᠨᠢᠶᠡ ᠶ᠋ᠢ ᠲᠠᠭᠤᠵᠤ ᠠᠪᠴᠢᠷᠠᠪᠠ ᠃ ᠶᠠᠭᠤᠨ ᠤ᠋ ᠬᠢᠨᠢ ᠰᠠᠢᠨ ᠦᠨᠢᠶᠡ ᠳᠡ ! ᠰᠢᠲᠦ ᠦᠭᠡᠢ ᠪᠣᠯᠤᠭᠰᠠᠨ ᠭᠡᠭᠡᠰᠢ ᠶ᠋ᠢᠨ ᠮᠠᠯ ᠪᠠᠶ᠋ᠢᠵᠠᠢ ᠃ ᠳᠠᠷᠮᠠᠵᠠᠪ ᠦᠵᠡᠭᠡᠳ ᠰᠢᠲᠦ ᠪᠡᠨ ᠵᠠᠭᠤᠨ ᠂ ᠪᠠᠶᠠᠴᠤᠳ ᠴᠥᠮ ᠢᠩᠭᠢᠵᠦ ᠳᠠᠯᠳᠠᠭᠤᠷ ᠪᠤᠯᠢᠶᠠᠵᠤ ᠢᠯᠡ ᠪᠡᠷ ᠮᠡᠬᠡᠯᠡᠨ ᠪᠠᠶᠠᠵᠢᠳᠠᠭ ᠯᠠ ᠤᠯᠤᠰ ᠶᠤᠮ ᠪᠠᠶ᠋ᠢᠨᠠ ᠭᠡᠵᠦ ᠭᠠᠰᠢᠭᠤᠳᠠᠨ ᠬᠣᠷᠣᠰᠪᠠ ᠃ ᠲᠡᠭᠡᠭᠡᠳ ᠶᠡᠬᠡ ᠮᠠᠯ ᠊ᠢ ᠨᠢ ᠡᠪᠦᠯ ᠦ᠋ᠨ ᠢᠳᠡᠰᠢ ᠪᠣᠯᠭᠠᠪᠠ ᠃
ᠲᠤᠭᠤᠯ ᠨᠢ ᠴᠦ᠍ ᠲᠡᠷᠡ ᠡᠪᠦᠯ ᠳ᠋ᠡᠭᠡᠨ ᠦᠬᠦᠭᠡᠳ ᠳᠦᠭᠦᠷᠴᠡᠢ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠪᠠᠶᠠᠨᠰᠡᠷᠡᠩ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠰᠡᠬᠡᠭᠡᠷᠡᠯ