ᠬᠦᠷᠡᠭᠴᠢ ᠦᠨᠢᠶᠡ Хүрэгч үнээ
310 ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠰᠠᠢᠨ ᠰᠠᠨᠠᠭᠠ ᠲᠠᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠪᠠᠶ᠋ᠢᠵᠠᠢ ᠃
ᠨᠢᠭᠡᠨ ᠡᠳᠦᠷ ᠡᠪᠦᠭᠡᠨ ᠨᠢ ᠠᠭᠤᠯᠠᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠶ᠋ᠢᠲᠠᠯᠠ ᠦᠬᠦᠮᠡᠷ ᠪᠣᠯᠤᠭᠰᠠᠨ ᠱᠠᠭᠠᠵᠠᠭᠠᠢ ᠲᠠᠭᠠᠷᠠᠯᠳᠤᠪᠠ ᠃ ᠦᠵᠡᠭᠰᠡᠨ ᠴᠢᠨᠢ ᠬᠣᠭᠣᠯᠠᠢ ᠳ᠋ᠤ᠌ ᠨᠢ ᠶᠠᠰᠤ ᠲᠡᠭᠡᠭᠯᠡᠴᠢᠬᠡᠭᠰᠡᠨ ᠪᠠᠶ᠋ᠢᠪᠠ ᠃ ᠡᠪᠦᠭᠡᠨ ᠶᠠᠰᠤ ᠶ᠋ᠢ ᠨᠢ ᠠᠪᠴᠤ ᠬᠠᠶᠠᠭᠰᠠᠨ ᠳ᠋ᠤ᠌ ᠱᠠᠭᠠᠵᠠᠭᠠᠢ ᠡᠳᠡᠭᠡᠭᠡᠳ ᠲᠤᠩ ᠪᠠᠶᠠᠷᠯᠠᠪᠠ ᠃ ᠠᠴᠢ ᠶ᠋ᠢ ᠨᠢ ᠬᠠᠷᠢᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠮᠠᠷᠭᠠᠰᠢ ᠨᠢ ᠨᠢᠭᠡ ᠬᠦᠷᠡᠭᠴᠢ ᠦᠨᠢᠶᠡ ᠠᠪᠴᠢᠷᠠᠵᠤ ᠥᠭᠴᠡᠢ ᠃ ᠲᠡᠭᠡᠭᠡᠳ ᠱᠠᠭᠠᠵᠠᠭᠠᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠲᠤ᠌ ᠄ 《 ᠲᠠᠨᠤᠰ 〈 ᠬᠦᠷᠡᠭᠴᠢ ᠦᠨᠢᠶᠡ ᠬᠥᠷ ᠬᠥᠷ〉 ᠭᠡᠵᠦ ᠬᠡᠯᠡᠪᠡᠯ ᠬᠥᠨᠥᠭ ᠬᠥᠨᠥᠭ ᠰᠦ ᠢᠪᠢᠯᠦᠨᠡ ᠃ ᠳᠠᠷᠠᠭᠠᠴᠢ ᠪᠠᠷ ᠬᠦᠴᠢᠷᠳᠡᠯ ᠲᠠᠭᠠᠷᠠᠪᠠᠯ〈 ᠱᠠᠭᠠᠵᠠᠭᠠᠢ ᠮᠢᠨᠢ ᠱᠠᠭ ᠱᠠᠭ〉 ᠭᠡᠪᠡᠯ ᠪᠢ ᠢᠷᠡᠴᠢᠬᠡᠨᠡ ᠰᠢᠦ ! 》 ᠭᠡᠳ ᠨᠢᠰᠦᠨ ᠣᠳᠴᠠᠢ ᠃
ᠬᠦᠷᠡᠭᠴᠢ ᠦᠨᠢᠶᠡ ᠨᠢ ᠦᠨᠡᠬᠡᠷ ᠰᠠᠭᠠᠭᠠᠳ ᠪᠠᠷᠠᠬᠤ ᠦᠭᠡᠢ ᠠᠷᠪᠢᠨ ᠰᠦ ᠲᠠᠢ ᠶᠤᠮ ᠰᠠᠨᠵᠠᠢ ᠃ ᠲᠡᠭᠡᠭᠡᠳ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠭᠤᠯᠠ ᠪᠠᠨ ᠡᠯᠪᠡᠭ ᠲᠣᠬᠢᠲᠠᠢ ᠠᠮᠢᠳᠤᠷᠠᠳᠠᠭ ᠪᠣᠯᠤᠯᠠ ᠃
ᠭᠡᠲᠡᠯᠡ ᠬᠠᠷᠭᠢᠰ ᠨᠣᠶᠠᠨ ᠦᠨᠢᠶᠡ ᠶ᠋ᠢ ᠨᠢ ᠪᠤᠯᠢᠶᠠᠵᠤ ᠠᠪᠠᠴᠢᠪᠠ ᠃ ᠡᠪᠦᠭᠡᠨ ᠬᠥᠭᠰᠢᠨ ᠬᠣᠶᠠᠷ ᠭᠠᠴᠢᠭᠳᠠᠬᠤ ᠳ᠋ᠤ᠌ ᠪᠠᠨ ᠤᠬᠢᠯᠠᠭᠠᠳ ᠄ 《 ᠱᠠᠭᠠᠵᠠᠭᠠᠢ ᠮᠢᠨᠢ ᠱᠠᠭ ᠱᠠᠭ ! 》 ᠭᠡᠵᠦ ᠲᠠᠭᠤᠲᠠᠯᠠ ᠃ ᠱᠠᠭᠠᠵᠠᠭᠠᠢ ᠳᠣᠣᠷᠠ ᠪᠠᠨ ᠬᠦᠷᠦᠭᠡᠳ ᠢᠷᠡᠵᠡᠢ ᠃ ᠲᠡᠭᠡᠭᠡᠳ ᠤᠴᠢᠷ ᠊ᠢ ᠨᠢ ᠰᠣᠨᠣᠰᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠰᠢᠳᠡᠮ ᠥᠭᠴᠦ ᠄ 《 ᠡᠭᠦᠨ ᠊ᠢ ᠬᠠᠷᠭᠢᠰ ᠨᠣᠶᠠᠨ ᠤ᠋ ᠳ᠋ᠤ᠌ ᠠᠪᠤᠭᠠᠳ ᠣᠴᠢ ᠃ ᠰᠢᠳᠠᠮ ᠢ᠋ᠶ᠋ᠠᠨ ᠬᠠᠭᠠᠯᠭᠠᠨ ᠤ᠋ ᠬᠢᠨᠢ ᠳᠡᠷᠭᠡᠳᠡ ᠲᠠᠯᠪᠢᠭᠠᠳ〈 ᠰᠢᠳᠠᠮ ᠮᠢᠨᠢ ᠲᠢᠱ ᠲᠢᠱ〉 ᠭᠡᠵᠦ ᠬᠡᠯᠡᠭᠡᠷᠡᠢ ! 》 ᠭᠡᠵᠦ ᠵᠢᠭᠠᠵᠤ ᠥᠭᠴᠡᠢ ᠃
ᠡᠪᠦᠭᠡᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠨᠢ ᠬᠢᠪᠡ ᠃ ᠲᠡᠭᠡᠬᠦ ᠳ᠋ᠦ᠍ ᠬᠠᠷᠭᠢᠰ ᠨᠣᠶᠠᠨ ᠪᠠᠰᠠ ᠯᠠ ᠰᠠᠢᠨ ᠶᠠᠭᠤᠮᠠ ᠪᠠᠶ᠋ᠢᠬᠤ ᠭᠡᠵᠦ ᠪᠣᠳᠣᠵᠠᠢ ᠄ 《 ᠰᠢᠲᠠᠮ ᠮᠢᠨᠢ ᠲᠢᠱ ᠲᠢᠱ 》 ᠭᠡᠰᠡᠨ ᠳ᠋ᠦ᠍ ᠥᠨᠥᠬᠢ ᠰᠢᠳᠠᠮ ᠨᠢ ᠭᠡᠨᠡᠳᠲᠡ ᠬᠡᠢ ᠡᠷᠭᠢᠯᠳᠦᠨ ᠪᠣᠰᠴᠤ ᠢᠷᠡᠭᠡᠳ ᠬᠠᠷᠭᠢᠰ ᠨᠣᠶᠠᠨ ᠊ᠢ 《 ᠲᠢᠱ ᠲᠢᠱ 》 ᠬᠢᠲᠡᠯᠡ ᠵᠣᠳᠣᠯᠠ ᠃ ᠨᠣᠶᠠᠨ ᠳᠤᠲᠠᠭᠠᠬᠤ ᠳ᠋ᠤ᠌ ᠰᠢᠳᠠᠮ ᠨᠡᠬᠡᠵᠦ ᠣᠴᠢᠭᠠᠳ ᠴᠣᠬᠢᠭᠠᠳ ᠯᠠ ᠪᠠᠶ᠋ᠢᠵᠤ ᠭᠡᠨᠡ ᠃ ᠳᠡᠮᠡᠢ ᠤᠳᠠᠯ ᠦᠭᠡᠢ ᠬᠠᠷᠭᠢᠰ ᠨᠣᠶᠠᠨ ᠤ᠋ ᠰᠢᠲᠦ ᠨᠢ ᠪᠤᠯᠭᠤᠷᠠᠪᠠ ᠂ ᠴᠢᠬᠢ ᠨᠢ ᠰᠠᠳᠠᠷᠠᠪᠠ ᠂ ᠪᠥᠭᠰᠡ ᠨᠢ ᠬᠠᠪᠤᠳᠪᠠ᠃ ᠲᠡᠭᠡᠭᠡᠳ ᠠᠷᠭᠠ ᠪᠤᠰᠤ ᠬᠦᠷᠡᠭᠴᠢ ᠦᠨᠢᠶᠡ ᠶ᠋ᠢ ᠨᠢ ᠡᠪᠦᠭᠡᠨ ᠡᠮᠡᠭᠡᠨ ᠳ᠋ᠦ᠍ ᠪᠤᠴᠠᠭᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠲᠡᠷᠡ ᠰᠢᠳᠡᠮ ᠵᠣᠳᠣᠬᠤ ᠪᠠᠨ ᠵᠣᠭᠰᠣᠵᠤ ᠭᠡᠨᠡ ᠃
ᠬᠡᠯᠡ ᠪᠢᠴᠢᠭ ᠦ᠋ᠨ ᠬᠣᠶᠠᠳᠤᠭᠠᠷ ᠣᠨ ( ᠳᠡᠭᠡᠳᠦ )
( 2012 ᠣᠨ ᠤ᠋ 5 ᠰᠠᠷᠠ ᠳ᠋ᠤ᠌ ᠠᠩᠬᠠᠳᠤᠭᠠᠷ ᠬᠡᠪ ) ᠡᠴᠡ ᠬᠠᠭᠤᠯᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠮᠢᠩᠭᠠᠳ ᠂ ᠴᠢᠮᠡᠭ
ᠬᠢᠨᠠᠭᠴᠢ ᠄ ᠲᠦᠮᠡᠳ · ᠠᠵᠠᠲᠦ