ᠬᠦᠩ ᠦ᠋ᠨ ᠵᠣᠣ ᠶ᠋ᠢᠨ ᠭᠡᠭᠡᠨ ᠦ᠌ ᠠᠯᠲᠠᠨ ᠰᠤᠷᠭᠠᠯ ᠣᠷᠣᠰᠢᠪᠠ1-7Гүнгийн жуугийн гэгээний алтан сургаал оршивой
247ᠬᠦᠩ ᠦ᠋ᠨ ᠵᠣᠣ ᠶ᠋ᠢᠨ ᠭᠡᠭᠡᠨ ᠦ᠌ ᠠᠯᠲᠠᠨ ᠰᠤᠷᠭᠠᠯ ᠣᠷᠣᠰᠢᠪᠠ1-7
ᠨᠢᠭᠡᠳᠦᠭᠡᠷ ᠪᠦᠯᠦᠭ ᠰᠤᠷᠭᠠᠯ ᠰᠢᠯᠦᠭ
ᠳᠣᠯᠣᠭᠠ
ᠲᠠᠷᠭᠤᠨ ᠪᠯᠠᠮᠡ ᠶ᠋ᠢᠨ ᠬᠡᠯᠡᠬᠦ ᠨᠢ ᠰᠠᠪᠠᠭᠠ ᠦᠭᠡᠢ ᠦᠭᠡᠰ ᠮᠥᠨ ᠂
ᠲᠠᠨ ᠤ᠋ ᠪᠡᠶᠡᠰ ᠦᠢᠯᠡᠳᠬᠦᠢ ᠳ᠋ᠦ᠍ᠷ ᠠᠵᠢᠭ ᠦᠭᠡᠢ ᠠᠴᠢ ᠮᠥᠨ ᠂
ᠲᠠᠮᠤ ᠶ᠋ᠢᠨ ᠡᠷᠯᠢᠭ ᠢᠷᠡᠬᠦᠢ ᠳ᠋ᠦ᠍ᠷ ᠰᠢᠯᠵᠢᠯ ᠦᠭᠡᠢ ᠰᠢᠯᠲᠠᠭ ᠮᠥᠨ ᠂
ᠲᠠᠨᠢᠬᠤ ᠬᠥᠮᠦᠨ ᠦᠵᠡᠬᠦᠢ ᠳ᠋ᠦ᠍ᠷ ᠦᠢᠯᠡ ᠦᠷᠡ ᠶ᠋ᠢᠨ ᠨᠣᠮᠯᠠᠯ ᠮᠥᠨ᠃
ᠠᠰᠢᠭ ᠲᠡᠭᠦᠰ ᠡᠷᠳᠡᠨᠢ ᠮᠡᠲᠦ ᠬᠥᠮᠦᠨ ᠪᠡᠶᠡ ᠶ᠋ᠢ ᠣᠯᠪᠠᠴᠤ ᠂
ᠠᠷᠪᠠᠨ ᠬᠠᠷᠠ ᠶ᠋ᠢᠨ ᠮᠠᠭᠤ ᠦᠢᠯᠡ ᠵᠢᠭᠦᠷᠰᠦ ᠪᠡᠷ ᠬᠤᠳᠠᠯᠳᠤᠨ ᠂
ᠠᠷᠪᠠᠨ ᠨᠠᠢ᠍ᠮᠠᠨ ᠲᠠᠮᠤ ᠶ᠋ᠢᠨ ᠵᠦᠭ ᠲᠦ᠍ᠷ ᠤᠷᠪᠠᠯᠲᠠ ᠦᠭᠡᠢ ᠭᠦᠶᠦᠭᠴᠢ ᠂
ᠠᠶᠠ ᠶᠠᠮᠪᠠᠷ ᠤᠴᠢᠷ ᠢ᠋ᠶ᠋ᠠᠷ ᠪᠦᠬᠡᠵᠢᠭᠰᠡᠨ ᠵᠢᠷᠦᠬᠡ ᠪᠣᠢ ᠃
ᠪᠦᠷᠢᠯᠭᠦᠢ ᠳ᠋ᠦ᠍ᠷ ᠴᠤᠯᠤᠶ᠋ᠢᠲᠠᠵᠤ ᠡᠪᠲᠡᠷᠡᠭᠰᠡᠨ ᠵᠢᠷᠦᠬᠡ ᠶ᠋ᠢ ᠂
ᠪᠦᠲᠦᠭᠡᠵᠦ ᠵᠠᠰᠠᠬᠤ ᠳ᠋ᠤᠷ ᠠᠷᠭᠠ ᠦᠭᠡᠢ ᠪᠣᠯᠪᠠᠴᠤ ᠂
ᠪᠥᠭᠡᠷᠡᠩᠬᠡᠢ ᠬᠠᠭᠠᠰ ᠵᠢᠷᠤᠮ ᠦᠯᠡᠳᠡᠭᠰᠡᠨ ᠵᠢᠷᠦᠬᠡ ᠶ᠋ᠢ ᠂
ᠪᠥᠭᠡᠴᠢᠯᠡᠨ ᠪᠣᠯᠬᠤ ᠪᠣᠯᠪᠠ ᠤᠤ ᠭᠡᠮᠡᠨ ᠬᠡᠳᠦᠨ ᠦᠭᠡ ᠪᠢᠴᠢᠪᠡᠢ ᠃
ᠦᠢᠯᠡ ᠶ᠋ᠢᠨ ᠦᠷᠡ ᠶ᠋ᠢᠨ ᠪᠣᠯᠪᠠᠰᠤᠷᠠᠯ ᠨᠠᠷᠢᠨ ᠨᠢᠭᠲᠠ ᠤᠴᠢᠷ ᠪᠣᠢ ᠂
ᠦᠨᠡᠨ ᠬᠤᠳᠠᠯ ᠮᠠᠭᠠᠳ ᠦᠭᠡᠢ ᠲᠠᠮᠰᠢᠶᠠᠯᠠᠨ ᠰᠠᠨᠠᠵᠤ ᠂
ᠦᠬᠦᠬᠦᠢ ᠳ᠋ᠦ᠍ᠷ ᠰᠦᠨᠡᠰᠦ ᠪᠡᠨ ᠠᠮᠢᠳᠤ ᠳ᠋ᠤᠷ ᠪᠡᠶᠡ ᠪᠡᠨ ᠂
ᠦᠨᠳᠦᠰᠦ ᠦᠭᠡᠢ ᠬᠠᠷᠠᠯᠠᠭᠤᠯᠤᠨ ᠶᠠᠮᠪᠠᠷ ᠤᠴᠢᠷ ᠪᠣᠳᠣᠨᠠᠮ ᠃
ᠬᠡᠲᠦᠷᠬᠡᠶ᠋ᠢᠶᠡ ᠨᠠᠶ᠋ᠢᠷᠠᠭᠤᠯᠤᠭᠰᠠᠨ ᠬᠦᠴᠦᠨ ᠲᠡᠭᠦᠰ ᠬᠣᠣᠷ ᠊ᠢ ᠂
ᠭᠡᠴᠢ ᠶ᠋ᠢᠨ ᠲᠡᠳᠦᠢ ᠪᠣᠯᠪᠠᠴᠤ ᠨᠢᠭᠡᠨ ᠪᠡᠶᠡ ᠶ᠋ᠢᠨ ᠠᠶᠤᠯ ᠂
ᠭᠡᠮᠰᠢᠯ ᠦᠭᠡᠢ ᠦᠢᠯᠡᠳᠦᠭᠰᠡᠨ ᠨᠢᠭᠦᠯ ᠪᠠᠭᠠ ᠪᠣᠯᠪᠠᠴᠤ ᠂
ᠬᠡᠲᠦᠲᠡᠭᠡᠳ ᠠᠷᠪᠢᠳᠬᠠᠬᠤᠢ ᠳ᠋ᠤᠷ ᠲᠦᠮᠡᠨ ᠲᠥᠷᠥᠯ ᠦ᠋ᠨ ᠬᠣᠬᠢᠷᠠᠯ᠃
ᠨᠢᠭᠤᠷ ᠪᠠ ᠲᠣᠯᠣᠭᠠᠢ ᠳ᠋ᠤ᠌ ᠡᠰᠡ ᠬᠦᠷᠬᠦ ᠪᠣᠯᠪᠠᠴᠤ᠂
ᠨᠢᠭᠡᠨ ᠪᠡᠶᠡ ᠶ᠋ᠢ ᠪᠦᠷᠬᠦᠭᠰᠡᠨ ᠴᠦ᠍ ᠳᠡᠪᠡᠯ ᠢᠨᠤ ᠳᠤᠯᠠᠭᠠᠬᠠᠨ ᠂
ᠨᠢᠳᠦᠨ ᠦᠵᠡᠯ ᠶᠡᠷᠦ ᠶ᠋ᠢᠨ ᠪᠠᠶ᠋ᠢᠳᠠᠯ ᠠᠳᠠᠯᠢ ᠮᠡᠲᠦ ᠪᠣᠯᠪᠠᠴᠤ ᠂
ᠨᠢᠭᠦᠯ ᠢ᠋ᠶ᠋ᠡᠨ ᠲᠡᠪᠴᠢᠪᠡᠰᠦ ᠪᠤᠷᠬᠠᠨ ᠪᠣᠯᠬᠤ ᠶ᠋ᠢᠨ ᠰᠢᠯᠲᠠᠭᠠᠨ᠃
ᠪᠤᠷᠬᠠᠨ ᠱᠠᠰᠢᠨ ᠳᠡᠯᠭᠡᠷᠡᠭᠰᠡᠨ ᠡᠨᠡ ᠣᠷᠣᠨᠠ ᠲᠥᠷᠥᠭᠡᠳ ᠂
ᠪᠤᠶᠠᠨ ᠨᠣᠮ ᠊ᠢ ᠦᠢᠯᠡᠳᠬᠦᠶᠡ ᠦᠵᠡᠯ ᠭᠦᠢᠴᠡᠳ ᠪᠠᠶ᠋ᠢᠲᠠᠯᠠ ᠂
ᠪᠤᠷᠤᠭᠤ ᠦᠵᠡᠯ ᠮᠠᠭᠤ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ ᠡᠴᠡ ᠴᠦ᠍ ᠂
ᠪᠤᠭᠤ ᠪᠣᠯᠵᠤ ᠠᠭᠤᠯᠠᠨ ᠳ᠋ᠤᠷ ᠭᠦᠶᠦᠭᠰᠡᠨ ᠴᠦ᠍ ᠳᠡᠭᠡᠷᠡ ᠃
ᠰᠠᠨᠠᠯ ᠦᠭᠡᠢ ᠰᠠᠮᠠᠭᠤᠨ ᠢ᠋ᠶ᠋ᠠᠷ ᠰᠠᠭᠠᠲᠠᠵᠤ ᠰᠠᠭᠤᠪᠠᠯ ᠂
ᠰᠠᠢᠬᠢ ᠶᠡᠬᠡ ᠦᠢᠯᠡ ᠶ᠋ᠢᠨ ᠵᠠᠶᠠᠭᠠ ᠭᠡᠨᠡᠳᠲᠡ ᠬᠦᠷᠴᠦ ᠢᠷᠡᠮᠦᠢ ᠂
ᠰᠠᠯᠤᠯᠲᠠ ᠦᠭᠡᠢ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠦᠬᠦᠬᠦᠢ ᠳ᠋ᠦ᠍ᠷ ᠬᠦᠷᠪᠡᠯ ᠂
ᠰᠠᠨᠠᠪᠠᠴᠤ ᠬᠣᠵᠢᠳᠠᠭᠠᠳ ᠰᠠᠢᠬᠢ ᠳ᠋ᠠᠭᠠᠨ ᠤᠳᠤᠮᠤᠢ᠃
ᠵᠠᠷᠢᠮ ᠪᠠᠰᠠ ᠦᠬᠦᠯ ᠦᠭᠡᠢ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠰᠢᠨᠠᠯᠭᠠᠨ ᠂
ᠵᠠᠰᠠᠯ ᠭᠦᠷᠢᠮ ᠪᠯᠠᠮᠡ ᠪᠠᠭᠰᠢ ᠶ᠋ᠢ ᠰᠢᠲᠦᠬᠦᠢ ᠳ᠋ᠦ᠍ᠷ ᠬᠦᠷᠦᠭᠡᠳ ᠂
ᠵᠠᠯᠪᠠᠷᠢᠵᠤ ᠰᠦᠰᠦᠭ ᠶᠡᠬᠡ ᠨᠢᠭᠦᠯ ᠳ᠋ᠡᠭᠡᠨ ᠭᠡᠮᠰᠢᠭᠡᠳ ᠂
ᠵᠠᠰᠠᠷᠠᠵᠤ ᠪᠤᠶᠠᠨ ᠴᠢᠨᠠᠷ ᠦᠨᠡᠨ ᠪᠠᠶ᠋ᠢᠨᠠ ᠬᠡᠮᠡᠮᠦᠢ ᠃
ᠭᠡᠮᠰᠢᠭᠰᠡᠭᠡᠷ ᠡᠪᠡᠳᠴᠢᠨ ᠠᠨᠠᠵᠤ ᠰᠦᠰᠦᠭ ᠪᠠᠯᠠᠷᠬᠠᠢ ᠪᠣᠯᠤᠭᠠᠳ ᠂
ᠬᠡᠳᠦᠨ ᠮᠠᠯ ᠳ᠋ᠤᠷ ᠰᠣᠬᠣᠷ ᠳᠣᠭᠣᠯᠠᠩ ᠪᠠᠶ᠋ᠢᠨᠠ ᠤᠤ ᠭᠡᠮᠡᠨ ᠠᠰᠠᠭᠤᠭᠠᠳ ᠂
ᠬᠡᠷᠡᠯᠳᠦᠵᠦ ᠮᠢᠨᠦ ᠴᠢᠨᠦ ᠶᠠᠷᠰᠢᠭ ᠭᠡᠮᠡᠨ ᠴᠤᠤᠭᠢᠯᠳᠤᠨ ᠂
ᠬᠡᠳᠡᠷ ᠪᠯᠠᠮᠡ ᠠᠭᠤᠷᠯᠠᠨᠠ ᠬᠦᠷᠭᠡ ᠬᠦᠷᠭᠡ ᠬᠡᠮᠡᠵᠦᠬᠦᠢ᠃
ᠭᠠᠶ᠋ᠢᠲᠤ ᠡᠪᠡᠳᠴᠢᠨ ᠲᠠᠭᠠᠷᠠᠵᠤ ᠬᠠᠮᠤᠭ ᠶᠠᠭᠤᠮᠠ ᠪᠠᠷᠠᠪᠠ ᠂
ᠭᠠᠰᠠᠯᠠᠯᠴᠠᠨ ᠠᠪᠠ ᠬᠦᠷᠦᠭᠡ ᠬᠤᠯᠠᠭᠠᠢ ᠬᠤᠳᠠᠯ ᠦᠢᠯᠡᠳᠦᠨ ᠂
ᠭᠠᠰᠠᠯᠠᠩᠲᠤ ᠦᠢᠯᠡ ᠶ᠋ᠢᠨ ᠨᠢᠭᠦᠯ ᠪᠠᠰᠠ ᠳᠠᠬᠢᠨ ᠰᠡᠯᠪᠢᠵᠦ ᠂
ᠭᠠᠯᠲᠤᠷᠢᠬᠤ ᠭᠠᠵᠠᠷ ᠦᠭᠡᠢ ᠭᠠᠯ ᠳ᠋ᠤᠷ ᠪᠠᠶ᠋ᠢᠨᠠ ᠰᠢᠦ ᠬᠠᠶ᠋ᠢᠷᠠᠬᠠᠨ ᠃
ᠰᠠᠨᠳᠤᠷᠬᠤ ᠵᠣᠪᠠᠯᠠᠩ ᠢ᠋ᠶ᠋ᠠᠷ ᠰᠢᠬᠠᠭᠳᠠᠵᠤ ᠪᠣᠯᠪᠠᠰᠤ ᠂
ᠰᠠᠬᠢᠯ ᠪᠦᠬᠦᠢ ᠪᠯᠠᠮᠡ ᠪᠦᠬᠦᠨ ᠊ᠢ ᠪᠠᠭᠰᠢ ᠪᠣᠯᠭᠠᠨ ᠵᠠᠯᠪᠠᠷᠢᠮᠤᠢ ᠂
ᠰᠠᠭᠠᠳ ᠦᠭᠡᠢ ᠡᠩᠬᠡ ᠮᠡᠨᠳᠦ ᠵᠢᠷᠭᠠᠯᠠᠩ ᠲᠠᠢ ᠪᠣᠯᠪᠠᠰᠤ ᠂
ᠰᠠᠢᠬᠢ ᠲᠤᠶ᠋ᠢᠮᠤᠬ ᠡᠨᠡ ᠮᠤᠬᠤᠷ ᠬᠡᠮᠡᠯᠳᠦᠵᠦ ᠭᠣᠯᠣᠮᠤᠢ ᠃
ᠡᠮᠭᠡᠨᠢᠵᠦ ᠵᠣᠪᠠᠪᠠᠰᠤ ᠰᠦᠰᠦᠭ ᠶᠡᠬᠡ ᠳᠤᠷᠠᠲᠠᠢ ᠂
ᠡᠩᠬᠡ ᠠᠮᠤᠷ ᠵᠢᠷᠭᠠᠪᠠᠰᠤ ᠠᠳᠠᠭ ᠮᠠᠭᠤ ᠴᠢᠨᠠᠷ ᠲᠠᠢ ᠂
ᠡᠭᠡᠯ ᠪᠠᠯᠠᠢ ᠲᠥᠭᠡᠷᠢᠭᠰᠡᠨ ᠡᠨᠡ ᠴᠥᠪ ᠦ᠋ᠨ ᠠᠷᠠᠳ ᠲᠤᠷ ᠂
ᠡᠨᠡ ᠬᠠᠷᠠ ᠲᠣᠯᠣᠭᠠᠢ ᠠᠨᠤ ᠳᠡᠮᠡᠢ ᠬᠡᠷᠡᠭ ᠦᠭᠡᠢ ᠯᠡ᠃
ᠡᠨᠡ ᠮᠡᠲᠦ ᠪᠡᠶᠡ ᠶ᠋ᠢ ᠣᠯᠵᠤ ᠡᠳ᠋ᠯᠡᠬᠦ ᠦᠭᠡᠢ ᠪᠣᠯᠪᠠᠰᠤ ᠂
ᠡᠷᠳᠡᠨᠢᠰ ᠊ᠢ ᠬᠤᠷᠢᠶᠠᠪᠠᠴᠤ ᠪᠤᠰᠤᠳ ᠬᠥᠮᠦᠨ ᠡᠲᠯᠡᠮᠦᠢ ᠂
ᠡᠳ᠋ ᠮᠠᠯ ᠊ᠢ ᠬᠤᠷᠢᠶᠠᠪᠠᠴᠤ ᠨᠣᠬᠠᠢ ᠰᠢᠪᠠᠭᠤᠨ ᠢᠳᠡᠰᠢ ᠂
ᠡᠴᠦᠰ ᠲᠡᠭᠡᠨ ᠰᠠᠢᠬᠢ ᠶᠡᠬᠡ ᠣᠷᠴᠢᠯᠠᠩ ᠬᠣᠭᠣᠰᠣᠨ᠃
ᠪᠤᠶᠠᠨ ᠨᠣᠮ ᠤ᠋ᠨ ᠦᠢᠯᠡᠰ ᠳᠡᠭᠡᠷᠡ ᠰᠢᠨᠵᠢᠯᠡᠵᠦ ᠦᠵᠡᠪᠡᠯ ᠂
ᠪᠤᠯᠠᠩᠭᠢᠷᠲᠤ ᠤᠰᠤᠨ ᠬᠢᠭᠡᠳ ᠰᠢᠷᠣᠢ ᠴᠤ᠌ ᠬᠠᠶ᠋ᠢᠷᠠᠲᠠᠢ ᠂
ᠪᠤᠷᠤᠭᠤ ᠨᠢᠭᠦᠯ ᠦᠢᠯᠡᠳᠬᠦᠢ ᠳ᠋ᠦ᠍ᠷ ᠡᠨᠡ ᠪᠡᠶᠡ ᠲᠡᠷᠢᠭᠦᠯᠡᠨ ᠂
ᠪᠣᠳᠠᠲᠠᠶᠠ ᠠᠯᠲᠠ ᠮᠥᠩᠭᠥ ᠳᠡᠮᠡᠢ ᠬᠠᠶ᠋ᠢᠷᠠᠨ ᠦᠭᠡᠢ ᠯᠡ ᠃
ᠠᠷᠢᠭᠤᠨ ᠡᠷᠲᠡ ᠶ᠋ᠢᠨ ᠥᠭᠯᠢᠭᠡ ᠪᠡᠷ ᠤᠴᠠᠷᠠᠭᠰᠠᠨ ᠬᠡᠰᠢᠭ ᠊ᠢ ᠂
ᠠᠴᠢ ᠲᠡᠭᠦᠰ ᠪᠤᠶᠠᠨ ᠨᠣᠮ ᠳ᠋ᠤᠷ ᠵᠠᠷᠤᠪᠠᠰᠤ ᠵᠣᠬᠢᠰᠲᠠᠢ ᠂
ᠠᠳᠠᠭᠯᠠᠪᠠᠰᠤ ᠡᠨᠡ ᠪᠡᠶᠡ ᠡᠳ᠋ᠯᠡᠬᠦ ᠦᠭᠡᠢ ᠨᠢᠭᠡᠨ ᠵᠦᠢᠯ ᠂
ᠠᠪᠳᠠᠷᠠᠯᠠᠭᠠᠳ ᠬᠠᠷᠠᠮᠨᠠᠵᠤ ᠦᠬᠦᠬᠦ ᠢᠨᠤ ᠭᠤᠲᠤᠮᠰᠢᠭ᠃
ᠠᠮᠢ ᠪᠡᠶᠡ ᠢᠯᠡᠭᠦᠴᠡ ᠬᠤᠪᠢ ᠦᠭᠡᠢ ᠵᠠᠷᠢᠮ ᠦ᠋ᠳ ᠂
ᠠᠴᠢ ᠦᠷᠡ ᠬᠥᠪᠡᠭᠦᠨ ᠳ᠋ᠦ᠍ᠷ ᠦᠭᠭᠦᠮᠦᠢᠡ ᠬᠡᠮᠡᠮᠦᠢ ᠂
ᠠᠪᠤ ᠡᠵᠢ ᠪᠡᠶᠡ ᠶ᠋ᠢ ᠢᠨᠤ ᠲᠥᠷᠥᠬᠦ ᠦᠨᠡᠨ ᠪᠣᠯᠪᠠᠴᠤ᠂
ᠠᠯᠤᠰ ᠬᠣᠶ᠋ᠢᠲᠤ ᠶ᠋ᠢᠨ ᠦᠢᠯᠡ ᠶ᠋ᠢ ᠢᠨᠤ ᠵᠠᠰᠠᠬᠤ ᠦᠨᠡᠨ ᠪᠡᠷᠬᠡ ᠯᠡ᠃
ᠥᠪᠡᠷᠦᠨ ᠪᠡᠶᠡ ᠶ᠋ᠢᠨ ᠪᠤᠶᠠᠨ ᠢ᠋ᠶ᠋ᠠᠷ ᠤᠴᠠᠷᠠᠭᠰᠠᠨ ᠬᠡᠰᠢᠭ ᠊ᠢ ᠂
ᠥᠪᠡᠷ ᠢ᠋ᠶ᠋ᠡᠨ ᠡᠳ᠋ᠯᠡᠬᠦᠢ ᠳ᠋ᠦ᠍ᠷ ᠦᠨᠡᠨ ᠪᠡᠷᠬᠡ ᠪᠠᠶ᠋ᠢᠲᠠᠯᠠ ᠂
ᠥᠭᠡᠷᠡ ᠪᠤᠰᠤᠳ ᠲᠤᠷ ᠦᠯᠡᠳᠡᠭᠡᠵᠦ ᠡᠳ᠋ᠯᠡᠬᠦᠢ ᠶ᠋ᠢ ᠰᠡᠳᠬᠢᠭᠴᠢ ᠂
ᠦᠨᠳᠦᠰᠦᠯᠡᠭᠰᠡᠨ ᠮᠥᠩᠬᠡ ᠪᠠᠶᠠᠨ ᠴᠤᠯᠤ ᠲᠡᠨᠡᠭ ᠠᠵᠤᠭᠤ᠃
ᠡᠨᠳᠡᠭᠦᠷᠡᠯ ᠪᠣᠯᠬᠤᠢ ᠶ᠋ᠢ ᠠᠨᠤ ᠤᠬᠠᠭᠠᠨᠲᠠᠨ ᠮᠡᠳᠡᠯᠲᠡᠢ ᠂
ᠡᠷᠲᠡᠬᠡᠨ ᠢ᠋ᠶ᠋ᠡᠷ ᠪᠤᠶᠠᠨ ᠨᠣᠮ ᠳ᠋ᠤᠷ ᠵᠠᠷᠤᠪᠠᠰᠤ ᠬᠣᠨᠵᠢᠮᠤᠢ ᠂
ᠡᠯᠪᠡᠭ ᠪᠤᠶᠠᠨ ᠪᠣᠯᠪᠠᠴᠤ ᠪᠠᠷ ᠡᠳ᠋ᠯᠡᠬᠦ ᠦᠭᠡᠢ ᠪᠥᠭᠡᠰᠦ ᠂
ᠡᠭᠡᠯ ᠶᠠᠳᠠᠭᠤ ᠦᠭᠡᠢ ᠢᠨᠤ ᠱᠠᠭᠠᠷᠳᠠᠬᠤ ᠠᠵᠤᠭᠤ᠃
ᠭᠡᠨᠡᠮᠵᠢᠯᠡᠨ ᠥᠪᠡᠷ ᠢ᠋ᠶ᠋ᠡᠨ ᠪᠤᠶᠠᠨ ᠰᠢᠲᠦᠬᠦ ᠪᠠᠶ᠋ᠢᠲᠤᠭᠠᠢ ᠂
ᠬᠡᠶ᠋ᠢᠳ ᠰᠦᠮᠡ ᠶ᠋ᠢᠨ ᠳᠠᠮᠵᠠ ᠨᠡᠮᠡᠷᠢ ᠮᠠᠨᠵᠠ ᠷᠠᠴᠠ ᠭᠡᠬᠦᠯᠡ ᠂
ᠬᠡᠯᠪᠡᠯᠵᠡᠨ ᠲᠤᠯᠬᠢᠷᠠᠵᠦ ᠡᠯᠳᠡᠪ ᠢ᠋ᠶ᠋ᠡᠷ ᠰᠢᠯᠲᠠᠭᠯᠠᠨ ᠂
ᠬᠡᠵᠢᠶᠡᠳᠡ ᠰᠢᠨᠠᠯᠭᠠᠳᠠᠭ ᠭᠠᠶ᠋ᠢᠲᠤ ᠰᠦᠮᠡ ᠬᠡᠮᠡᠮᠦᠢ᠃
ᠪᠠᠰᠠ ᠵᠠᠷᠢᠮ ᠦᠨᠡᠨ ᠴᠢᠩᠳᠠ ᠰᠦᠰᠦᠭ ᠳᠤᠷᠠ ᠦᠭᠡᠢ ᠪᠡᠷ ᠂
ᠪᠠᠶᠠᠨ ᠭᠡᠮᠡᠨ ᠠᠯᠳᠠᠷᠰᠢᠭᠰᠠᠨ ᠨᠡᠷᠡ ᠳ᠋ᠡᠭᠡᠨ ᠢᠴᠢᠵᠦ ᠂
ᠪᠠᠭᠠ ᠰᠠᠭᠠ ᠪᠤᠶᠠᠨ ᠨᠣᠮ ᠊ᠢ ᠦᠨᠡᠷᠬᠡᠵᠦ ᠦᠢᠯᠡᠳᠦᠨ ᠂
ᠪᠠᠲᠤ ᠶᠡᠬᠡ ᠪᠤᠶᠠᠨ ᠢ᠋ᠶ᠋ᠠᠨ ᠴᠢᠨᠠᠷ ᠪᠠᠭᠠ ᠪᠣᠯᠭᠠᠮᠤᠢ᠃
ᠴᠢᠩᠳᠠ ᠪᠤᠶᠠᠨ ᠦᠢᠯᠡᠳᠬᠦᠢ ᠳ᠋ᠦ᠍ᠷ ᠢᠰᠢᠭᠡ ᠬᠠᠶ᠋ᠢᠷᠠᠲᠠᠢ ᠪᠣᠯᠪᠠᠴᠤ ᠂
ᠴᠢᠨᠣᠠ ᠨᠣᠬᠠᠢ ᠢᠳᠡᠬᠦᠢ ᠳ᠋ᠦ᠍ᠷ ᠪᠤᠯᠲᠤ ᠡᠵᠡᠨ ᠦᠭᠡᠢ ᠯᠡ ᠂
ᠴᠢᠳᠠᠯ ᠦᠭᠡᠢ ᠳᠡᠭᠡᠷᠡ ᠪᠠᠰᠠ ᠴᠢᠨᠠᠷ ᠦᠭᠡᠢ ᠰᠡᠳᠬᠢᠯ ᠪᠠᠶ᠋ᠢᠨ ᠂
ᠴᠢᠩᠭᠠᠯᠠᠵᠤ ᠵᠠᠰᠠᠯᠲᠠᠢᠡ ᠬᠥᠮᠦᠨ ᠦ᠌ ᠨᠡᠷᠡ ᠶ᠋ᠢ ᠵᠡᠭᠦᠭᠴᠢᠳ ᠃
ᠪᠤᠶᠠᠨ ᠢ᠋ᠶ᠋ᠠᠷ ᠣᠯᠤᠭᠰᠠᠨ ᠊ᠢ ᠪᠤᠶᠠᠨ ᠵᠦᠭ ᠲᠦ᠍ᠷ ᠵᠠᠷᠤᠪᠠᠯ ᠂
ᠪᠤᠰᠠᠨᠢᠵᠤ ᠬᠠᠰᠤᠭᠳᠠᠬᠤ ᠶᠣᠭᠲᠠ ᠦᠭᠡᠢ ᠴᠢᠨᠠᠷ ᠪᠣᠢ ᠂
ᠪᠤᠷᠤᠭᠤᠯᠠᠵᠤ ᠬᠠᠷᠠᠮᠨᠠᠵᠤ ᠠᠷᠪᠢᠵᠢᠪᠠᠢ ᠬᠡᠮᠡᠭᠴᠢ ᠂
ᠪᠤᠴᠠᠯᠤᠭᠰᠠᠨ ᠳᠦᠷᠢ ᠪᠡᠷ ᠰᠢᠷᠭᠢᠬᠦ ᠲᠡᠮᠳᠡᠭ ᠲᠡᠷᠡ ᠰᠢᠦ ᠃
ᠠᠶᠠ ᠭᠤᠷᠪᠠᠨ ᠡᠷᠳᠡᠨᠢ ᠪᠡᠷ ᠮᠢᠨᠢ ᠡᠨᠡ ᠴᠥᠪ ᠦ᠋ᠨ ᠬᠥᠮᠦᠨ ᠳ᠋ᠦ᠍ᠷ ᠂
ᠠᠷᠪᠠᠨ ᠶᠡᠬᠡ ᠨᠢᠭᠦᠯ ᠳ᠋ᠡᠭᠡᠨ ᠰᠢᠨᠤᠬᠠᠶ᠋ᠢᠷᠠᠨ ᠬᠡᠲᠦᠷᠡᠭᠡᠳ ᠂
ᠠᠪᠤ ᠶ᠋ᠢᠨ ᠬᠡᠰᠢᠭ ᠪᠠᠭᠠᠳᠠᠭᠠᠳ ᠠᠷᠪᠢᠯᠠᠬᠤ ᠶ᠋ᠢ ᠰᠠᠨᠠᠵᠤ ᠂
ᠠᠪᠠ ᠬᠦᠷᠦᠭᠡ ᠰᠦᠷᠲᠦ ᠴᠢᠩᠭᠠ ᠬᠦᠨᠳᠦ ᠨᠢᠭᠦᠯ ᠦᠢᠯᠡᠳᠦᠨᠡ ᠃
ᠨᠢᠭᠡᠨ ᠲᠠᠤᠯᠠᠢ ᠠᠯᠠᠪᠠᠰᠤ ᠲᠠᠪᠢᠨ ᠵᠣᠭᠣᠰ ᠪᠣᠯᠪᠠᠴᠤ᠂
ᠨᠢᠭᠦᠯ ᠢᠨᠤ ᠠᠷᠪᠢᠵᠢᠬᠤᠢ ᠳ᠋ᠤᠷ ᠲᠦᠮᠡᠨ ᠲᠥᠷᠥᠯ ᠦ᠋ᠨ ᠬᠣᠬᠢᠷᠠᠯ ᠂
ᠨᠢᠭᠡᠨ ᠦᠨᠡᠭᠡ ᠠᠯᠠᠬᠤᠢ ᠳ᠋ᠤᠷ ᠮᠢᠩᠭᠠᠨ ᠵᠣᠭᠣᠰ ᠪᠣᠯᠪᠠᠴᠤ᠂
ᠨᠢᠭᠡᠨ ᠨᠠᠰᠤᠨ ᠲᠡᠵᠢᠭᠡᠯ ᠳ᠋ᠦ᠍ᠷ ᠬᠣᠣᠷ ᠪᠣᠯᠵᠤ ᠴᠢᠳᠠᠮᠤᠢ᠃
ᠦᠵᠡᠯ ᠳᠡᠭᠡᠷᠡ ᠮᠢᠩᠭᠠᠨ ᠵᠣᠭᠣᠰ ᠣᠯᠤᠭᠰᠠᠨ ᠮᠡᠲᠦ ᠪᠣᠯᠪᠠᠴᠤ᠂
ᠦᠢᠯᠡ ᠶ᠋ᠢᠨ ᠦᠷᠡ ᠶ᠋ᠢ ᠢᠯᠭᠠᠬᠤ᠊ᠢ ᠳ᠋ᠤᠷ ᠲᠦᠮᠡᠨ ᠯᠠᠩ ᠤ᠋ᠨ ᠭᠠᠷᠤᠵᠠ ᠂
ᠦᠳᠲᠡᠷ ᠵᠠᠭᠤᠷᠠ ᠵᠠᠷᠤᠬᠤ᠊ᠢ ᠳ᠋ᠤᠷ ᠵᠣᠭᠣᠰ ᠮᠡᠲᠦ ᠪᠣᠯᠪᠠᠴᠤ᠂
ᠦᠬᠦᠬᠦᠶᠡ ᠰᠦᠨᠡᠰᠦᠨ ᠳ᠋ᠦ᠍ᠷ ᠡᠷᠯᠢᠭ ᠢᠨᠤ ᠲᠡᠷᠡ ᠪᠣᠢ᠃
ᠵᠠᠯᠢᠬᠠᠢ ᠪᠠ ᠪᠠᠯᠠᠢ ᠪᠠᠷ ᠴᠠᠯᠴᠢᠯᠠᠬᠰᠠᠨ ᠦᠭᠡᠰ ᠲᠣᠷ ᠂
ᠵᠠᠰᠠᠭ ᠬᠢᠭᠡᠳ ᠲᠠᠶ᠋ᠢᠵᠢ ᠨᠣᠶᠠᠳ ᠲᠦᠰᠢᠮᠡᠳ ᠪᠠ ᠡᠯᠴᠢ ᠨᠠᠷ ᠂
ᠵᠠᠰᠠᠷᠠᠵᠤ ᠲᠤᠯᠢᠤᠠᠬᠤᠢ ᠶ᠋ᠢ ᠲᠠᠭᠠᠯᠠᠯ ᠢ᠋ᠶ᠋ᠠᠷ ᠪᠣᠯᠲᠤᠭᠠᠢ ᠂
ᠵᠠᠩᠭᠤᠷᠠᠵᠤ ᠬᠢᠯᠢᠩᠯᠡᠬᠦᠢ ᠪᠦᠬᠦᠨ ᠡᠴᠡ ᠭᠤᠶᠤᠶᠠ ᠃
ᠠᠮᠢᠯᠠᠭᠤᠯᠵᠤ ᠪᠢᠴᠢᠭᠰᠡᠨ ᠨᠢ᠄ ᠥᠯᠵᠡᠢᠪᠠᠭᠠᠲᠤᠷ
ᠬᠢᠨᠠᠵᠤ ᠦᠵᠡᠭᠰᠡᠨ ᠨᠢ᠄ ᠰᠡᠬᠡᠭᠡᠷᠡᠯ