ᠳᠠᠯᠠᠨᠲᠠᠢ ᠡᠪᠦᠭᠡᠨДалантай өвгөн ᠳᠣᠮᠣᠭ ᠦᠯᠢᠭᠡᠷ

  ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠳᠠᠯᠠᠨ ᠤᠯᠠᠭᠠᠨ ᠦᠬᠡᠷ ᠲᠡᠢ ᠂ ᠳᠡᠯᠢᠭᠦᠦ ᠤᠯᠠᠭᠠᠨ ᠪᠤᠬ᠎ᠠ ᠲᠠᠢ ᠳᠠᠯᠠᠨᠲᠠᠢ ᠭᠡᠳᠡᠭ ᠡᠪᠦᠭᠡᠨ ᠪᠠᠢᠭᠰᠠᠨ ᠭᠡᠨ᠎ᠡ ᠃ ᠲᠡᠭᠦᠨ ᠳ᠋ᠦ᠍ ᠲᠤᠨᠲᠠᠢ ᠂ ᠪᠢᠨᠳᠠᠢ ᠂ ᠬᠠᠨᠲᠠᠢ ᠂ ᠲᠡᠨᠲᠡᠢ ᠂ ᠣᠨᠲᠠᠢ ᠭᠡᠬᠦ ᠲᠠᠪᠤᠨ ᠠᠬ᠎ᠠ ᠲᠠᠢ ᠭᠡᠨ᠎ᠡ ᠃
ᠨᠢᠭᠡᠨ ᠡᠳᠦᠷ ᠳᠠᠯᠠᠨᠲᠠᠢ ᠡᠪᠦᠭᠡᠨ ᠳᠠᠯᠠᠨ ᠤᠯᠠᠭᠠᠨ ᠦᠬᠡᠷ ᠢ᠋ᠶ᠋ᠡᠨ ᠤᠰᠤᠯᠠᠭᠠᠳ ᠵᠣᠭᠰᠣᠵᠤ ᠪᠠᠢᠵᠠᠢ ᠃ ᠲᠡᠭᠡᠭᠰᠡᠨ ᠴᠢᠨᠢ ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ ᠠᠷᠵᠠᠭᠠᠷ ᠬᠠᠷ᠎ᠠ ᠮᠠᠩᠭᠤᠰ ᠬᠦᠷᠴᠦ ᠢᠷᠡᠭᠰᠡᠨ ᠭᠡᠨ᠎ᠡ ᠃ ᠮᠠᠩᠭᠤᠰ ᠄ 《 ᠴᠢ ᠳᠠᠯᠠᠨ ᠤᠯᠠᠭᠠᠨ ᠦᠬᠡᠷ ᠲᠦ᠍ ᠪᠡᠨ ᠬᠠᠢᠷᠠᠲᠠᠢ ᠤᠤ? ᠳᠡᠯᠢᠭᠦᠦ ᠤᠯᠠᠭᠠᠨ ᠪᠤᠬᠠᠨ ᠳ᠋ᠤ᠌ ᠪᠠᠨ ᠬᠠᠢᠷᠠᠲᠠᠢ ᠶᠤᠮ ᠤᠤ? ᠳᠠᠯᠠᠨ ᠳᠠᠪᠬᠤᠷ ᠬᠠᠷᠪᠢᠩ ᠳ᠋ᠤ᠌ ᠪᠠᠨ ᠬᠠᠢᠷᠠᠲᠠᠢ ᠶᠤᠮ ᠤᠤ? 》 ᠭᠡᠵᠡᠢ ᠃ ᠡᠨᠡ ᠦᠶ᠎ᠡ ᠳ᠋ᠦ᠍ ᠳᠠᠯᠠᠨᠲᠠᠢ ᠡᠪᠦᠭᠡᠨ ᠄ 《 ᠪᠢ ᠳᠠᠯᠠᠨ ᠤᠯᠠᠭᠠᠨ ᠦᠬᠡᠷ ᠲᠦ᠍ ᠪᠡᠨ ᠴᠦ᠍ ᠬᠠᠢᠷᠠᠲᠠᠢ ᠂ ᠳᠡᠯᠢᠭᠦᠦ ᠤᠯᠠᠭᠠᠨ ᠪᠤᠬᠠᠨ ᠳ᠋ᠤ᠌ ᠪᠠᠨ ᠴᠤ᠌ ᠬᠠᠢᠷᠠᠲᠠᠢ ᠂ ᠳᠠᠯᠠᠨ ᠳᠠᠪᠬᠤᠷ ᠬᠠᠷᠪᠢᠩ ᠢ᠋ ᠮᠢᠨᠢ ᠢᠳᠡ ᠳ᠋ᠠ ᠂ ᠮᠢᠨᠦ ᠳᠠᠯᠠᠨ ᠳᠠᠪᠬᠤᠷ ᠬᠠᠷᠪᠢᠩ ᠢ᠋ ᠲᠤᠨᠲᠠᠢ ᠭᠤᠸᠠᠢ ᠶ᠋ᠢᠨ ᠲᠣᠩᠭᠣᠷᠠᠭ ᠡᠴᠡ ᠥᠭᠡᠷ᠎ᠡ ᠶᠠᠭᠤ ᠴᠤ᠌ ᠳᠠᠭᠠᠭᠠᠳᠠᠭ ᠦᠭᠡᠢ ᠶᠦ᠍ᠮ ᠰᠢᠦ ᠳ᠋ᠠ! 》 ᠭᠡᠵᠡᠢ ᠃ ᠲᠤᠨᠲᠠᠢ ᠭᠤᠸᠠᠢ ᠄ 《 ᠮᠢᠨᠦ ᠲᠣᠩᠭᠣᠷᠠᠭ ᠢ᠋ ᠪᠢᠨᠳᠠᠢ ᠭᠤᠸᠠᠢ ᠶ᠋ᠢᠨ ᠪᠢᠯᠡᠭᠦᠦ ᠪᠡᠷ ᠪᠢᠯᠡᠭᠦᠳᠡᠬᠦ ᠎ᠡᠴᠡ ᠨᠠᠭᠠᠰᠢ ᠶᠠᠭᠤ ᠴᠤ᠌ ᠳᠠᠭᠠᠭᠠᠳᠠᠭ ᠦᠭᠡᠢ ᠶᠦ᠍ᠮ ᠰᠢᠦ! 》 ᠭᠡᠬᠦ ᠳ᠋ᠦ᠍ ᠮᠠᠩᠭᠤᠰ ᠪᠢᠨᠳᠠᠢ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠣᠴᠢᠭᠠᠳ ᠄ 《 ᠪᠢᠯᠡᠭᠦᠦ ᠪᠡᠨ ᠥᠭᠭᠦᠭᠡᠴᠢ! 》 ᠭᠡᠵᠡᠢ ᠃ ᠪᠢᠨᠳᠠᠢ ᠭᠤᠸᠠᠢ ᠄ 《 ᠮᠢᠨᠦ ᠪᠢᠯᠡᠭᠦᠦ ᠶ᠋ᠢ ᠬᠠᠨᠲᠠᠢ ᠭᠤᠸᠠᠢ ᠶ᠋ᠢᠨ ᠬᠠᠰᠠᠭ  ᠲᠡᠷᠭᠡᠨ ᠡᠴᠡ ᠥᠭᠡᠷ᠎ᠡ ᠶᠠᠭᠤᠮ᠎ᠠ ᠳᠠᠭᠠᠭᠠᠳᠠᠭ ᠦᠭᠡᠢ ᠰᠢᠦ! 》 ᠭᠡᠬᠦ ᠳ᠋ᠦ᠍ ᠮᠠᠩᠭᠤᠰ ᠬᠠᠨᠲᠠᠢ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠣᠴᠢᠭᠠᠳ ᠄ 《 ᠬᠠᠨᠲᠠᠢ ᠭᠤᠸᠠᠢ ᠂ ᠬᠠᠰᠠᠭ ᠲᠡᠷᠭᠡ ᠪᠡᠨ ᠥᠭᠭᠦᠭᠡᠴᠢ! 》 ᠭᠡᠪᠡ ᠃ ᠬᠠᠨᠲᠠᠢ ᠭᠤᠸᠠᠢ ᠄ 《 ᠮᠢᠨᠦ ᠬᠠᠰᠠᠭ ᠲᠡᠷᠭᠡ ᠶ᠋ᠢ ᠲᠡᠨᠲᠡᠢ ᠭᠤᠸᠠᠢ ᠶ᠋ᠢᠨ ᠲᠣᠮᠣ ᠴᠠᠭᠠᠨ ᠠᠵᠢᠷᠭᠠᠨ ᠡᠴᠡ ᠥᠭᠡᠷ᠎ᠡ ᠶᠠᠭᠤᠮ᠎ᠠ ᠬᠥᠳᠡᠯᠭᠡᠵᠦ ᠳᠡᠢᠯᠳᠡᠭ ᠦᠭᠡᠢ ᠶᠦ᠍ᠮ ᠰᠢᠦ! 》 ᠭᠡᠯ᠎ᠡ ᠃ ᠮᠠᠩᠭᠤᠰ ᠲᠡᠨᠲᠡᠢ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠣᠴᠢᠭᠠᠳ ᠄ 《 ᠲᠡᠨᠲᠡᠢ ᠭᠤᠸᠠᠢ ᠂ ᠲᠣᠮᠣ ᠴᠠᠭᠠᠨ ᠠᠵᠢᠷᠭ᠎ᠠ ᠪᠠᠨ ᠥᠭᠭᠦᠭᠡᠴᠢ! 》 ᠭᠡᠵᠡᠢ ᠃ ᠲᠡᠨᠲᠡᠢ ᠭᠤᠸᠠᠢ ᠄ 《 ᠮᠢᠨᠦ ᠠᠵᠢᠷᠭ᠎ᠠ ᠶ᠋ᠢ ᠣᠨᠲᠠᠢ ᠭᠤᠸᠠᠢ ᠶ᠋ᠢᠨ ᠤᠷᠲᠤ ᠬᠤᠰᠤᠨ ᠤᠷᠭᠠᠨ ᠡᠴᠡ ᠥᠭᠡᠷ᠎ᠡ ᠶᠠᠭᠤᠮ᠎ᠠ ᠪᠠᠷ ᠪᠠᠷᠢᠭᠳᠠᠳᠠᠭ ᠦᠭᠡᠢ ᠶᠦ᠍ᠮ ᠰᠢᠦ! 》 ᠭᠡᠵᠡᠢ ᠃ ᠣᠨᠲᠠᠢ ᠭᠤᠸᠠᠢ ᠄ 《 ᠮᠢᠨᠦ ᠬᠤᠰᠤᠨ ᠤᠷᠭ᠎ᠠ ᠭᠠᠳᠠᠭᠠᠳᠤ ᠳᠠᠯᠠᠢ ᠶ᠋ᠢᠨ ᠴᠠᠭᠠᠳᠤ ᠵᠠᠬ᠎ᠠ ᠳ᠋ᠤ᠌ ᠪᠣᠢ 》 ᠭᠡᠯ᠎ᠡ ᠃ ᠮᠠᠩᠭᠤᠰ ᠄ 《 ᠲᠡᠭᠡᠪᠡᠯ ᠶᠠᠭᠠᠬᠢᠵᠤ ᠠᠪᠳᠠᠭ ᠪᠣᠢ? 》 ᠭᠡᠬᠦ ᠳ᠋ᠦ᠍ ᠣᠨᠲᠠᠢ ᠭᠤᠸᠠᠢ ᠄ 《 ᠬᠦᠵᠦᠭᠦᠨ ᠡᠴᠡ ᠪᠡᠨ ᠲᠣᠮᠣ ᠴᠢᠯᠠᠭᠤ ᠵᠡᠭᠦᠭᠡᠳ ᠳᠠᠯᠠᠢ ᠶ᠋ᠢ ᠭᠠᠲᠤᠯᠵᠤ ᠠᠪᠳᠠᠭ ᠶᠤᠮ ᠰᠢᠦ ! 》 ᠭᠡᠬᠦ ᠳ᠋ᠦ᠍ ᠮᠠᠩᠭᠤᠰ ᠲᠡᠷᠡ ᠶᠣᠰᠣᠭᠠᠷ ᠠᠪᠬᠤ ᠭᠡᠵᠦ ᠳᠠᠯᠠᠢ ᠤᠷᠤᠭᠤ ᠣᠷᠣᠭᠠᠳ ᠵᠢᠪᠴᠦ ᠦᠬᠦᠵᠡᠢ ᠃

ᠢᠩᠭᠢᠭᠡᠳ ᠳᠠᠯᠠᠨᠲᠠᠢ ᠡᠪᠦᠭᠡᠨ ᠠᠬ᠎ᠠ ᠳᠡᠭᠦᠦ ᠬᠡᠳᠦᠭᠦᠯᠡ ᠪᠡᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠭᠰᠠᠨ ᠭᠡᠨ᠎ᠡ ᠃

　　　ᠦᠰᠦᠭ ᠬᠠᠲᠠᠭᠰᠠᠨ ᠨᠢ ᠄　ᠮᠥᠩᠭᠦᠨᠴᠡᠴᠡᠭ
　　　ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄　ᠮᠥᠩᠭᠦᠨᠴᠡᠴᠡᠭ
　　　ᠬᠢᠨᠠᠭᠴᠢ ᠪᠠᠭᠰᠢ ᠄　ᠣᠳᠤᠨᠭᠡᠷᠡᠯ