ᠪᠥᠮᠪᠥᠯᠡᠢ ᠳ᠋ᠡᠭᠡᠨ ᠪᠢᠴᠢᠭᠰᠡᠨ ᠨᠢᠭᠡᠨ ᠬᠤᠪᠢ ᠵᠠᠬᠢᠳᠠᠯ ᠪᠠ ᠬᠠᠷᠢᠭᠤ ᠵᠠᠬᠢᠳᠠᠯБөмбөлойдээ бичсэн нэгэн хувь захидал ба хариу захидал
1699ᠪᠥᠮᠪᠥᠯᠡᠢ ᠳ᠋ᠡᠭᠡᠨ ᠪᠢᠴᠢᠭᠰᠡᠨ ᠨᠢᠭᠡᠨ ᠬᠤᠪᠢ ᠵᠠᠬᠢᠳᠠᠯ
ᠮᠢᠨᠦ ᠨᠢᠭᠡ ᠮᠠᠭᠤ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ
ᠰᠠᠢᠨ ᠰᠠᠭᠤᠵᠤ ᠪᠠᠢᠨᠠ ᠤᠤ ?
ᠤᠤᠯ ᠨᠢ ᠪᠢ ᠴᠢᠮᠠ ᠶ᠋ᠢ ᠬᠠᠶᠠ ᠨᠢᠭᠡ ᠣᠷᠬᠢᠭᠠᠳ ᠭᠤᠷᠪᠠ ᠲᠠᠪᠤ ᠬᠣᠨᠣᠭᠠᠳ ᠯᠠ ᠢᠷᠡᠳᠡᠭ ᠪᠠᠢᠭᠰᠠᠨ᠃ ᠲᠡᠭᠡᠬᠦ ᠳ᠋ᠦ᠍ ᠴᠢ ᠶᠠᠮᠠᠷ ᠶᠡᠬᠡ ᠪᠠᠶᠠᠷᠯᠠᠳᠠᠭ ᠪᠠᠢᠯᠠ ᠭᠡᠵᠦ᠂ ᠨᠠᠮᠠᠶ᠋ᠢ ᠲᠣᠭᠣᠷᠢᠭᠠᠳ ᠦᠰᠦᠷᠴᠦ ᠳᠡᠭᠳᠡᠭᠡᠳ ᠯᠡ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠶᠠᠭᠠ ᠶ᠋ᠢ ᠲᠣᠭᠣᠷᠢᠭᠠᠳ ᠴᠠᠬᠢᠯᠵᠤ ᠭᠦᠶᠦᠭᠡᠳ ᠪᠥᠭᠡᠮ ᠪᠠᠶᠠᠷ ᠪᠣᠯᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠴᠢ ᠴᠡᠭᠡᠵᠢᠯᠡᠵᠦ ᠪᠠᠢᠨᠠ ᠤᠤ ? ᠭᠡᠬᠦ ᠳ᠋ᠦ᠍ ᠡᠨᠡ ᠤᠳᠠᠭᠠ ᠴᠢ ᠮᠠᠭᠤ ᠡᠵᠡᠨ ᠢ᠋ ᠪᠡᠨ ᠣᠷᠬᠢᠭᠠᠳ᠂ ᠦᠭᠡᠢ ᠮᠠᠭᠤ 《ᠡᠵᠢ 》 ᠶ᠋ᠢ ᠪᠡᠨ ᠣᠷᠬᠢᠭᠠᠳ ᠴᠤ᠌ ᠭᠡᠬᠦ ᠤᠤ ᠳ᠋ᠠ᠂ ᠶᠠᠭᠠᠬᠢᠭᠰᠠᠨ ᠤᠳᠠᠭᠠᠨ ᠬᠣᠨᠣᠭ ᠢ᠋ᠶ᠋ᠠᠷ ᠶᠠᠪᠤᠬᠤ ᠨᠢ ᠪᠣᠢ! ᠬᠠᠷᠢᠵᠤ ᠢᠷᠡᠯ ᠦᠭᠡᠢ ᠪᠦᠷ ᠲᠠᠪᠢᠨ ᠵᠢᠷᠭᠤᠭᠠ ᠬᠣᠨᠣᠴᠢᠬᠠᠯᠠ ᠰᠢᠲᠠ᠂ ᠭᠡᠷ ᠦ᠋ᠨ ᠡᠭᠦᠳᠡ ᠬᠠᠶᠠᠭᠠ᠂ ᠬᠣᠷᠢᠶᠠ ᠬᠠᠰᠢᠶᠠ ᠬᠣᠭᠣᠰᠣᠳᠠᠭᠠᠳ ᠰᠡᠳᠬᠢᠯ ᠨᠢᠭᠡ ᠯᠡ ᠡᠵᠡᠭᠦᠢ᠂ ᠤᠷᠢᠳᠤ ᠰᠥᠨᠢ ᠪᠢ ᠪᠠᠰᠠ ᠯᠠ ᠴᠢᠮᠠ ᠶ᠋ᠢ ᠵᠡᠭᠦᠳᠦᠯᠡᠵᠦ ᠬᠣᠨᠣᠯᠠ᠂ ᠴᠢᠨᠦ ᠨᠥᠭᠦᠭᠡ ᠬᠣᠨᠢᠴᠢᠨ ᠬᠠᠯᠲᠠᠷ ᠬᠣᠶᠠᠷ ᠨᠣᠬᠠᠢ ᠨᠠᠢᠵᠠ ᠨᠢ᠂ ᠠ ᠲᠡᠢᠮᠦ᠂ ᠪᠠᠰᠠ ᠪᠣᠭᠵᠣ ᠤᠨᠠᠭᠠ ᠳᠡᠭᠦᠦ ᠲᠡᠢ ᠨᠢ᠂ ᠪᠢᠳᠡ ᠬᠡᠳᠦ ᠥᠨᠥ ᠲᠠᠩᠳᠠ ᠣᠴᠢᠵᠤ ᠠᠷᠭᠠᠯ ᠲᠡᠭᠦᠳᠡᠭ ᠳᠠᠷᠠᠰᠤᠲᠠᠢ ᠭᠣᠣᠯ ᠳ᠋ᠠᠭᠠᠨ ᠯᠠ ᠪᠢ ᠠᠷᠭᠠᠯ ᠢ᠋ᠶ᠋ᠠᠨ ᠲᠡᠭᠦᠭᠡᠳ ᠲᠠ ᠬᠡᠳᠦ ᠨᠠᠮᠠᠶ᠋ᠢ ᠲᠣᠭᠣᠷᠢᠭᠠᠳ ᠲᠠᠭᠤᠯᠴᠠᠵᠤ ᠨᠠᠭᠠᠳᠴᠤ ᠪᠠᠢᠨᠠ ᠭᠡᠵᠦ ᠵᠡᠭᠦᠳᠦᠯᠡᠯᠡ᠃ ᠭᠡᠬᠦ ᠳ᠋ᠦ᠍ ᠴᠢᠮᠠ ᠶ᠋ᠢ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠪᠢᠳᠡ ᠬᠡᠳᠦ ᠳᠠᠷᠠᠰᠤᠲᠠᠢ ᠭᠣᠣᠯ ᠳ᠋ᠤ᠌ ᠪᠠᠨ ᠣᠴᠢᠭᠠ ᠦᠭᠡᠢ ᠪᠦᠲᠦᠨ ᠬᠣᠶᠠᠷ ᠰᠠᠷᠠ ᠪᠣᠯᠤᠭᠰᠠᠨ ᠪᠠᠢᠨᠠ ᠪᠢᠯᠡ᠂ ᠳᠡᠷᠡᠰᠦᠨ ᠳ᠋ᠦ᠍ ᠣᠯᠠᠨ ᠲᠠᠤᠯᠠᠢ ᠠᠮᠢᠳᠤᠷᠠᠳᠠᠭ ᠪᠠᠢᠭᠰᠠᠨ ᠰᠢᠲᠠ᠂ ᠬᠠᠶᠠ ᠨᠢᠭᠡ ᠳᠡᠷᠡᠰᠦᠨ ᠦ᠌ ᠨᠥᠮᠥᠷᠢ ᠡᠴᠡ ᠲᠠᠤᠯᠠᠢ ᠶ᠋ᠢᠨ ᠪᠥᠵᠥᠩ ᠪᠣᠰᠤᠭᠠᠳ ᠳᠠᠪᠬᠢᠬᠤ ᠳ᠋ᠤ᠌ ᠨᠢ ᠬᠣᠨᠢᠴᠢᠨ ᠲᠠ ᠬᠣᠶᠠᠷ ᠭᠠᠷᠭᠠᠭᠠᠳ ᠲᠠᠭᠤᠴᠢᠬᠠᠳᠠᠭ ᠪᠠᠢᠭᠰᠠᠨ᠃ ᠪᠥᠮᠪᠥᠯᠡᠢ ᠭᠡᠵᠦ ᠶᠣᠰᠣᠲᠠᠢ ᠨᠢᠭᠡ ᠬᠥᠭᠡᠷᠦᠬᠦᠨ ᠱᠣᠭᠲᠠᠢ ᠠᠮᠢᠲᠠᠨ ᠰᠢᠦ! ᠤᠭ ᠨᠢ ᠪᠢ ᠴᠢᠮᠠ ᠶ᠋ᠢ ᠪᠠᠶᠠᠷᠯᠠᠭᠤᠯᠬᠤ ᠯᠠ ᠭᠡᠵᠦ ᠳᠠᠷᠠᠰᠤᠲᠠᠢ ᠭᠣᠣᠯ ᠳ᠋ᠤ᠌ ᠣᠴᠢᠵᠤ ᠠᠷᠭᠠᠯ ᠲᠡᠭᠦᠬᠦ ᠳᠤᠷᠠᠲᠠᠢ ᠪᠠᠢᠭᠰᠠᠨ ᠪᠠᠢᠨᠠ ᠪᠢᠯᠡ᠂ ᠲᠡᠭᠡᠭᠡᠳ ᠦᠳᠡ ᠪᠣᠯᠬᠤ ᠪᠠᠷ ᠲᠠ ᠬᠡᠳᠦ ᠲᠠᠩᠳᠠ ᠯᠠ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠡᠭᠦᠳᠡ ᠪᠡᠷ ᠬᠥᠨᠳᠡᠯᠡᠨ ᠭᠤᠯᠳᠤ ᠦᠭᠡᠢ ᠬᠡᠪᠲᠡᠴᠢᠬᠡᠭᠰᠡᠨ ᠦᠳᠡᠯᠡᠵᠦ ᠪᠠᠢᠳᠠᠭ ᠪᠠᠢᠭᠰᠠᠨ᠃ ᠴᠢᠮᠠ ᠶ᠋ᠢ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠴᠢᠨᠦ ᠨᠥᠭᠦᠭᠡ ᠨᠣᠭᠣᠭᠠᠨ ᠬᠡᠪᠢᠰ ᠦ᠋ᠨ ᠳᠡᠪᠢᠰᠬᠡᠷ ᠯᠡ ᠡᠵᠡᠭᠦᠢᠷᠡᠵᠦ ᠬᠠᠷᠠᠭᠳᠠᠬᠤ ᠪᠣᠯᠤᠯᠠ᠂ ᠪᠠᠰᠠ ᠴᠢᠨᠦ ᠤᠰᠤᠨ ᠤ᠋ ᠰᠠᠪᠠ᠂ ᠤᠰᠤ ᠬᠣᠭᠣᠯᠠᠨ ᠤ᠋ ᠰᠠᠪᠠ ᠭᠡᠵᠦ ᠶᠠᠷᠢᠬᠤ ᠠ᠋ᠴᠠ ᠲᠠ ᠬᠡᠳᠦ ᠶ᠋ᠢᠨ ᠲᠦᠩᠫᠧᠨ ᠳ᠋ᠦ᠍ ᠴᠢᠨᠦᠬᠢ ᠯᠡ ᠬᠠᠮᠤᠭ ᠤ᠋ᠨ ᠴᠡᠪᠡᠷᠬᠡᠨ ᠪᠠᠢᠳᠠᠭ ᠪᠠᠢᠭᠰᠠᠨ ᠳ᠋ᠠ᠂ ᠡᠵᠢ ᠨᠢ ᠴᠢᠨᠦ ᠶᠠᠭᠤᠮᠠ ᠶ᠋ᠢ ᠪᠦᠭᠦᠳᠡ ᠶ᠋ᠢ ᠨᠢ ᠬᠤᠷᠢᠶᠠᠭᠠᠳ ᠴᠠᠭᠠᠰᠢ ᠪᠠᠨ ᠲᠠᠯᠪᠢᠴᠢᠬᠠᠯᠠ᠂ ᠶᠠᠭᠠᠬᠢᠬᠤᠪ ᠳ᠋ᠠ! ᠭᠡᠨᠡᠳᠲᠡᠬᠡᠨ ᠪᠠᠰᠠ ᠨᠢᠭᠡ ᠴᠢᠮᠠ ᠲᠠᠢ ᠠᠳᠠᠯᠢ ᠡᠬᠡ ᠡᠴᠡ ᠪᠡᠨ ᠲᠥᠭᠡᠷᠢᠯᠳᠦᠵᠦ ᠥᠨᠥᠴᠢᠷᠡᠵᠦ ᠬᠣᠴᠣᠷᠤᠭᠰᠠᠨ ᠬᠥᠭᠡᠷᠦᠬᠦᠢ ᠠᠮᠢᠲᠠᠨ ᠬᠦᠷᠦᠭᠡᠳ ᠢᠷᠡᠬᠦ ᠶᠤᠮ ᠪᠣᠯ ᠬᠡᠷᠡᠭᠯᠡᠬᠦ ᠯᠡ ᠪᠠᠢᠬᠤ ᠳ᠋ᠠ᠃ ᠣᠯᠠᠨ ᠬᠥᠮᠦᠰ ᠡᠵᠢ ᠶ᠋ᠢ ᠨᠢ ᠬᠡᠭᠡᠷᠡ ᠶ᠋ᠢᠨ ᠠᠮᠢᠲᠠᠨ ᠢ᠋ᠶ᠋ᠠᠷ ᠦᠷᠡ ᠪᠡᠨ ᠪᠤᠤ ᠬᠢ ᠯᠡ ᠭᠡᠳᠡᠭ ᠶᠦ᠍ᠮ᠂ ᠲᠡᠳᠡ ᠨᠠᠷ ᠮᠢᠨᠦ ᠰᠡᠳᠬᠢᠯ ᠢ᠋ ᠶᠠᠭᠠᠬᠢᠵᠤ ᠣᠢᠯᠠᠭᠠᠬᠤ ᠪᠣᠢ ᠳ᠋ᠠ᠃ ᠵᠢᠩᠬᠢᠨᠢ ᠬᠠᠢᠷᠠ ᠡᠨᠡᠷᠢᠯ ᠭᠡᠳᠡᠭ ᠴᠢᠨᠢ ᠬᠥᠮᠦᠨ ᠦ᠌ ᠵᠢᠷᠦᠬᠡᠨ ᠦ᠌ ᠤᠭ ᠠ᠋ᠴᠠ ᠯᠠ ᠣᠨᠳᠣᠷᠴᠤ ᠭᠠᠷᠳᠠᠭ ᠶᠤᠮ ᠪᠢᠯᠡ᠂ ᠲᠡᠭᠡᠬᠦᠯᠡᠷ ᠬᠥᠭᠡᠷᠦᠬᠦᠢ ᠥᠯᠥᠰᠴᠦ ᠲᠠᠭᠠᠷᠠᠵᠤ ᠪᠡᠭᠡᠷᠡᠵᠦ ᠪᠠᠢᠭᠠ ᠠᠮᠢᠲᠠᠨ ᠭᠣᠣᠯᠳᠠᠨ ᠢ᠋ ᠦᠷᠦ ᠡᠪᠡᠳᠬᠦ ᠦᠭᠡᠢ ᠬᠥᠮᠦᠨ ᠭᠡᠵᠦ ᠴᠥᠭᠡᠬᠡᠨ ᠯᠡ ᠪᠠᠢᠬᠤ᠃ ᠢᠩᠭᠢᠭᠡᠳ ᠶᠠᠷᠢᠬᠤᠯᠠᠷ ᠴᠢᠨᠦ ᠨᠠᠳᠠᠳᠤ ᠠᠩᠬᠠ ᠢᠷᠡᠭᠰᠡᠨ ᠲᠡᠷᠡ ᠦᠶᠡ ᠰᠠᠨᠠᠭᠳᠠᠬᠤ ᠶᠤᠮ᠂ ᠨᠢᠭᠡ ᠵᠢᠪ ᠵᠢᠭᠠᠬᠠᠨ ᠨᠢᠷᠠᠢ ᠠᠮᠢᠲᠠᠨ ᠰᠦ᠋ ᠪᠡᠨ ᠱᠣᠪ ᠱᠣᠪ ᠤᠤᠭᠤᠴᠢᠬᠠᠭᠠᠳ ᠯᠠ ᠡᠭᠡᠭᠡ ᠯᠡ ᠮᠢᠨᠦ ᠰᠡᠭᠦᠯ ᠶᠤᠮ ᠰᠢᠭ ᠠᠷᠤ ᠠ᠋ᠴᠠ ᠰᠠᠯᠤᠯ ᠦᠭᠡᠢ ᠳᠠᠭᠠᠭᠠᠳ ᠭᠦᠶᠦᠳᠡᠭ ᠪᠠᠢᠭᠰᠠᠨ ᠰᠢᠳᠡ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠪᠢ ᠴᠢᠮᠠᠶ᠋ᠢ ᠣᠷᠬᠢᠵᠤ ᠶᠠᠪᠤᠬᠤ ᠶᠡᠬᠡ ᠳᠤᠷᠠ ᠦᠭᠡᠢ᠂ ᠬᠠᠶᠠ ᠨᠢᠭᠡ ᠠᠷᠭᠠ ᠦᠭᠡᠢ ᠭᠠᠳᠠᠭᠰᠢ ᠪᠠᠨ ᠭᠠᠷᠬᠤ ᠪᠠᠷ ᠢ᠋ᠶ᠋ᠠᠨ ᠯᠠ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠭᠡᠷ ᠲᠡᠭᠡᠨ ᠬᠠᠷᠢᠳᠠᠭ ᠪᠠᠢᠯᠠ᠂ ᠤᠴᠢᠷ ᠨᠢ ᠪᠢ ᠴᠢᠮᠠᠶ᠋ᠢ ᠰᠦ᠋ ᠪᠡᠨ ᠴᠠᠭ ᠴᠠᠭ ᠣᠯᠵᠤ ᠤᠤᠭᠤᠬᠤ ᠦᠭᠡᠢ ᠡᠴᠡ ᠠᠶᠤᠨᠠ᠂ ᠡᠰᠡᠬᠦᠯᠡ ᠪᠦᠷ ᠬᠡᠲᠦᠷᠡᠲᠡᠯᠡ ᠤᠤᠭᠤᠴᠢᠬᠠᠭᠠᠳ ᠭᠡᠳᠡᠰᠦ ᠭᠦᠵᠡᠭᠡ ᠨᠢ ᠡᠪᠡᠳᠴᠢᠬᠡᠬᠦ ᠪᠣᠢ ᠭᠡᠵᠦ ᠵᠣᠪᠠᠨᠠ᠃ ᠪᠦᠷ ᠰᠠᠨᠠᠭᠠ ᠠᠮᠤᠷ ᠶᠠᠪᠤᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠠᠢᠯᠠ᠃ ᠶᠠᠭ ᠯᠠ ᠬᠥᠬᠥᠭᠦᠯ ᠬᠡᠦᠬᠡᠳ ᠲᠡᠢ ᠡᠵᠢ ᠰᠢᠭ ᠪᠠᠢᠯᠠ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠯᠡ ᠮᠠᠭᠤ 《ᠡᠵᠢ 》 ᠨᠢ ᠪᠥᠮᠪᠥᠯᠡᠢ ᠪᠡᠨ ᠮᠠᠰᠢ ᠲᠣᠷᠨᠢᠭᠤᠨ ᠥᠰᠬᠡᠵᠦ ᠴᠢᠳᠠᠭᠰᠠᠨ ᠳ᠋ᠠᠭᠠᠨ ᠯᠠ ᠶᠡᠬᠡ ᠪᠠᠶᠠᠷᠯᠠᠳᠠᠭ ᠶᠤᠮ᠃ ᠮᠢᠨᠦ ᠪᠥᠮᠪᠥᠯᠡᠢ ᠴᠢᠨᠢ ᠭᠠᠭᠴᠠ ᠴᠤ᠌ ᠤᠳᠠᠭᠠ ᠡᠪᠡᠳᠴᠢᠨ ᠲᠠᠬᠤᠯ ᠬᠦᠷᠴᠦ ᠦᠵᠡᠭᠡ ᠦᠭᠡᠢ ᠳ᠋ᠠ᠂ ᠰᠡᠷᠭᠦᠯᠡᠩ ᠭᠡᠳᠡᠭ ᠢ᠋ ᠨᠢ ᠴᠦ᠍ ᠶᠠᠭᠠᠬᠢᠨᠠ᠃ ᠬᠡᠭᠡᠷᠡ ᠶ᠋ᠢᠨ ᠠᠮᠢᠲᠠᠨ ᠪᠠᠢᠵᠤ ᠨᠡᠷᠡ ᠪᠡᠨ ᠬᠦᠷᠲᠡᠯᠡ ᠴᠡᠭᠡᠵᠢᠯᠡᠴᠢᠬᠡᠨᠡ ᠭᠡᠵᠦ ᠪᠣᠳᠣᠬᠤ ᠪᠠᠷ ᠰᠦ ᠬᠣᠭᠣᠯᠠᠨ ᠤ᠋ ᠪᠠᠨ ᠴᠠᠭ ᠢ᠋ ᠪᠣᠯ ᠨᠠᠳᠠ ᠪᠠᠷ ᠵᠢᠭᠠᠯᠭᠠᠬᠤ ᠬᠡᠷᠡᠭ ᠨᠡᠩ ᠴᠦ᠍ ᠠᠯᠠᠭᠠ᠃ ᠶᠣᠰᠣᠲᠠᠢ ᠨᠢᠭᠡ ᠮᠤᠨᠳᠠᠭ ᠠᠮᠢᠲᠠᠨ ᠪᠠᠢᠭᠰᠠᠨ ᠳ᠋ᠠ! ᠪᠢᠳᠡ ᠬᠡᠳᠦ ᠥᠷᠯᠥᠭᠡ ᠪᠣᠯᠭᠠᠨ ᠬᠣᠨᠢ ᠪᠠᠨ ᠪᠡᠯᠴᠢᠭᠡᠷ ᠲᠦ᠍ ᠨᠢ ᠭᠠᠷᠭᠠᠴᠢᠬᠠᠭᠠᠳ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠳ᠋ᠠᠭᠠᠨ ᠬᠣᠨᠢᠴᠢᠨ ᠲᠠ ᠬᠣᠶᠠᠷ ᠲᠠᠩᠳᠠ ᠤᠷᠤᠯᠳᠤᠵᠤ ᠨᠠᠭᠠᠳᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠴᠢ ᠴᠡᠭᠡᠵᠢᠯᠡᠵᠦ ᠪᠠᠢᠨᠠ ᠤᠤ ? ᠲᠡᠷᠡ ᠦᠶᠡ ᠳ᠋ᠦ᠍ ᠴᠢ ᠲᠠᠩᠳᠠ ᠬᠣᠨᠢᠴᠢᠨ ᠳ᠋ᠤ᠌ ᠪᠠᠨ ᠨᠠᠢᠷ ᠲᠠᠯᠪᠢᠳᠠᠭ᠂ ᠶᠠᠭᠠᠬᠢᠭᠠᠳ ᠶᠤᠮ ᠪᠣᠯ! ᠲᠡᠭᠡᠭᠡᠳ ᠬᠣᠨᠢᠴᠢᠨ ᠮᠠᠨᠢ ᠥᠪᠡᠷ ᠢ᠋ᠶ᠋ᠡᠨ ᠲᠦᠷᠦᠭᠦᠯᠡᠭᠰᠡᠨ ᠶᠤᠮ ᠰᠢᠭ ᠨᠢᠭᠡ ᠶᠡᠬᠡ ᠪᠠᠶᠠᠷᠯᠠᠭᠠᠳ ᠬᠥᠭᠡᠷᠦᠭᠡᠳ ᠭᠦᠶᠦᠳᠡᠭ ᠪᠠᠢᠭᠰᠠᠨ ᠰᠢᠳᠡ᠂ ᠤᠭ ᠨᠢ ᠴᠢ ᠦᠨᠡᠬᠡᠷ ᠬᠣᠨᠢᠴᠢᠨ ᠢ᠋ᠶ᠋ᠠᠨ ᠪᠠᠶᠠᠷᠯᠠᠭᠤᠯᠬᠤ ᠭᠡᠵᠦ ᠨᠠᠢᠷ ᠲᠠᠯᠪᠢᠳᠠᠭ ᠪᠠᠢᠭᠰᠠᠨ ᠪᠣᠯ ᠤᠤ ? ᠶᠡᠬᠡ ᠯᠡ ᠱᠣᠭᠲᠠᠢ ᠪᠠᠢᠳᠠᠭ᠃ ᠪᠢᠳᠡ ᠬᠡᠳᠦ ᠪᠠᠰᠠ ᠬᠤᠳᠳᠤᠭ ᠳᠡᠭᠡᠷᠡ ᠣᠴᠢᠵᠤ ᠮᠠᠯ ᠢ᠋ᠶ᠋ᠠᠨ ᠤᠰᠤᠯᠠᠳᠠᠭ᠃ ᠴᠢ ᠬᠤᠳᠳᠤᠭ ᠳᠡᠭᠡᠷᠡ ᠣᠴᠢᠬᠤ ᠶᠡᠬᠡ ᠳᠤᠷᠠᠲᠠᠢ ᠪᠠᠢᠭᠰᠠᠨ᠃ ᠪᠠᠰᠠ ᠨᠢᠭᠡ ᠤᠳᠠᠭᠠ ᠬᠤᠳᠳᠤᠭ ᠳᠡᠭᠡᠷᠡ ᠪᠠᠢᠭᠰᠠᠨ ᠬᠣᠨᠢᠨ ᠰᠦᠷᠦᠭ ᠢ᠋ᠶ᠋ᠡᠨ ᠪᠤᠲᠠᠷᠠᠲᠠᠯᠠ ᠲᠠᠭᠤᠭᠠᠳ ᠠᠯᠠᠭᠠ ᠪᠣᠯᠳᠠᠭ ᠰᠢᠲᠠ᠃ ᠪᠢ ᠴᠢᠮᠠᠶ᠋ᠢ ᠬᠠᠷᠠᠭᠠᠳ ᠪᠣᠭᠰᠢᠲᠠᠯᠠ ᠪᠠᠨ ᠢᠨᠢᠶᠡᠭᠡᠳ ᠬᠣᠴᠣᠷᠤᠭᠰᠠᠨ᠃ ᠬᠡᠷᠪᠡ ᠲᠡᠷᠡ ᠦᠶᠡ ᠳ᠋ᠦ᠍ ᠬᠣᠶᠠᠷ ᠨᠣᠬᠠᠢ ᠨᠢ ᠬᠣᠨᠢ ᠪᠠᠨ ᠲᠣᠭᠣᠭᠰᠠᠨ ᠪᠣᠯ ᠪᠢ ᠶᠠᠭᠠᠬᠢᠵᠤ ᠠᠭᠤᠷᠯᠠᠬᠤ ᠪᠠᠢᠭᠰᠠᠨ ᠶᠤᠮ ᠪᠣᠯ! ᠭᠡᠬᠦ ᠳ᠋ᠦ᠍ ᠪᠡᠨ ᠮᠠᠭᠤ 《ᠡᠵᠢ ᠨᠢ ᠪᠥᠮᠪᠥᠯᠠᠢ ᠳ᠋ᠤ᠌ ᠪᠠᠨ ᠭᠠᠭᠴᠠ ᠴᠤ᠌ ᠤᠳᠠᠭᠠ ᠠᠭᠤᠷᠯᠠᠵᠤ ᠦᠵᠡᠭᠡ ᠦᠭᠡᠢ ᠳ᠋ᠠ! ᠢᠩᠭᠢᠭᠡᠳ ᠬᠠᠮᠢᠭᠠ ᠶᠠᠪᠤᠭᠰᠠᠨ ᠴᠤ᠌ ᠨᠢᠭᠡ ᠦᠯᠢᠭᠡᠷ ᠪᠣᠯᠤᠭᠰᠠᠨ ᠬᠡᠳᠦᠨ ᠶᠠᠭᠤᠮᠠ ᠬᠡᠯᠬᠢᠶᠡᠯᠳᠦᠵᠦ ᠶᠠᠪᠤᠭᠰᠠᠭᠠᠷ ᠪᠠᠢᠵᠤ ᠪᠢᠳᠡ ᠬᠡᠳᠦ ᠴᠢᠨᠢ ᠪᠦᠲᠦᠨ ᠬᠣᠶᠠᠷ ᠵᠢᠯ ᠢ᠋ ᠳᠤᠭᠤᠯᠤᠯᠠ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠮᠠᠭᠤ ᠡᠵᠢ ᠨᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠠᠵᠠ ᠦᠭᠡᠢ ᠶᠤᠮ ᠳ᠋ᠠ ⁈
ᠲᠡᠷᠡ ᠰᠥᠨᠢ ᠴᠢᠨᠦ ᠡᠨᠳᠡᠯ ᠳ᠋ᠦ᠍ ᠤᠴᠠᠷᠠᠭᠰᠠᠨ ᠴᠢᠮᠡᠭᠡ ᠲᠡᠷᠡᠬᠡᠨ ᠬᠣᠷᠣᠮ ᠳ᠋ᠤ᠌ ᠨᠠᠮᠠ ᠶ᠋ᠢ ᠨᠢᠯᠪᠤᠰᠤᠨ ᠳᠠᠯᠠᠢ ᠳ᠋ᠤ᠌ ᠵᠢᠪᠦᠭᠦᠯᠦᠯᠡ᠃ 《ᠡᠵᠢ 》 ᠨᠢ ᠴᠢᠮᠠ ᠶ᠋ᠢ ᠬᠠᠮᠠᠭᠠᠯᠠᠭᠰᠠᠭᠠᠷ ᠬᠠᠢᠷᠠᠯᠠᠭᠰᠠᠭᠠᠷ ᠪᠠᠢᠵᠤ ᠵᠢᠩᠬᠢᠨᠢ ᠬᠠᠮᠠᠭᠠᠯᠠᠬᠤ ᠶᠣᠰᠣᠲᠠᠢ ᠴᠠᠭ ᠲᠤ᠌ ᠨᠢ ᠳᠡᠷᠭᠡᠳᠡ ᠴᠢᠨᠢ ᠪᠠᠢᠵᠤ ᠴᠢᠳᠠᠭᠠ ᠦᠭᠡᠢ ᠳ᠋ᠦ᠍ ᠪᠠᠨ ᠯᠠ ᠪᠡᠶᠡ ᠪᠡᠨ ᠵᠢᠮᠡᠯᠡᠬᠦ ᠶᠦ᠍ᠮ᠂ ᠬᠡᠷᠪᠡ ᠲᠡᠷᠡ ᠡᠳᠦᠷ ᠬᠦᠷᠢᠶᠡᠨ ᠦ᠌ ᠪᠡᠨ ᠡᠭᠦᠳᠡ ᠶ᠋ᠢ ᠬᠠᠭᠠᠭᠰᠠᠨ ᠪᠣᠯ ᠴᠢ ᠭᠠᠷᠴᠤ ᠶᠠᠪᠤᠭᠠᠳ ᠲᠥᠭᠡᠷᠢᠬᠦ ᠤᠴᠢᠷ ᠦᠭᠡᠢ ᠯᠡ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡᠴᠢᠯᠡᠨ ᠲᠠᠨᠢᠬᠤ ᠦᠭᠡᠢ ᠠᠢᠯ ᠤ᠋ᠨ ᠭᠠᠳᠠᠨᠠ ᠣᠴᠢᠵᠤ ᠠᠢᠯ ᠤ᠋ᠨ ᠨᠣᠬᠠᠢ ᠳ᠋ᠤ᠌ ᠬᠠᠵᠠᠭᠳᠠᠬᠤ ᠤᠴᠢᠷ ᠨᠡᠩ ᠴᠦ᠍ ᠪᠠᠢᠬᠤ ᠦᠭᠡᠢ᠃ ᠬᠥᠭᠡᠷᠦᠬᠦᠢ ᠳᠡ᠂ ᠮᠢᠨᠦ ᠨᠢᠭᠡ ᠠᠮᠢᠲᠠᠨ ᠨᠢ! ᠤᠭ ᠠ᠋ᠴᠠ ᠪᠠᠨ ᠪᠢ ᠴᠢᠮᠠ ᠳ᠋ᠤ᠌ ᠪᠤᠷᠤᠭᠤ ᠲᠠᠢ ᠯᠠ ᠶᠠᠪᠤᠭᠰᠠᠨ ᠶᠤᠮ᠂ ᠬᠥᠮᠦᠨ ᠦ᠌ ᠭᠠᠷ ᠲᠤ᠌ ᠥᠰᠦᠭᠰᠡᠨ ᠶᠤᠮ ᠪᠣᠯᠬᠣᠷ ᠥᠪᠡᠷ ᠦ᠋ᠨ ᠭᠡᠰᠡᠨ ᠵᠡᠷᠯᠢᠭ ᠴᠢᠨᠠᠷ ᠢ᠋ᠶ᠋ᠠᠨ ᠮᠠᠷᠲᠠᠵᠤ ᠣᠷᠬᠢᠭᠰᠠᠨ ᠴᠠᠭᠠᠬᠠᠨ ᠠᠮᠢᠲᠠᠨ ᠶᠤᠮ ᠳ᠋ᠠ! ᠠᠢᠯ ᠤ᠋ᠨ ᠨᠣᠬᠠᠢ ᠶ᠋ᠢ ᠥᠪᠡᠷ ᠦ᠋ᠨ ᠬᠣᠶᠠᠷ ᠨᠠᠢᠵᠠ ᠰᠢᠬ ᠢ᠋ᠶ᠋ᠡᠨ ᠠᠨᠳᠠᠭᠤᠷᠠᠴᠢᠬᠠᠳᠠᠭ ᠪᠠᠢᠵᠠᠢ᠃ ᠴᠢᠮᠠ ᠶ᠋ᠢ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ ᠮᠠᠭᠤ ᠬᠠᠯᠲᠠᠷ ᠨᠣᠬᠠᠢ ᠨᠢ ᠡᠳᠦᠷᠵᠢᠨ ᠠᠯᠠᠭᠠ ᠪᠠᠢᠵᠤ ᠪᠠᠢᠵᠤ ᠢᠷᠡᠭᠰᠡᠨ᠂ ᠴᠢᠮᠠ ᠶ᠋ᠢ ᠡᠷᠢᠭᠡᠳ ᠬᠠᠮᠢᠭᠠ ᠴᠤ᠌ ᠶᠠᠪᠤᠭᠰᠠᠨ ᠪᠣᠯ ? ᠪᠠᠰᠠ ᠮᠠᠭᠤ ᠬᠥᠭᠰᠢᠨ ᠮᠤᠤᠷ ᠨᠢ ᠪᠠᠢᠨ ᠪᠠᠢᠨ ᠭᠠᠷᠴᠤ ᠣᠷᠣᠭᠠᠳ ᠯᠠ ᠶᠡᠬᠡ ᠯᠡ ᠲᠠᠪᠲᠤᠷ ᠠᠯᠳᠠᠳᠠᠭ ᠪᠠᠢᠯᠠ᠃ ᠶᠠᠭᠤ ᠴᠤ᠌ ᠭᠡᠰᠡᠨ ᠴᠢᠨᠦ ᠮᠠᠭᠤ ᠬᠡᠳᠦᠨ ᠨᠠᠢᠵᠠ ᠴᠢᠨᠢ 《ᠡᠵᠢ 》 ᠲᠡᠢ ᠨᠢ ᠠᠳᠠᠯᠢᠬᠠᠨ ᠴᠢᠮᠠ ᠳ᠋ᠤ᠌ ᠵᠠᠬᠢᠳᠠᠯ ᠪᠢᠴᠢᠵᠦ ᠴᠢᠳᠠᠭᠠ ᠦᠭᠡᠢ ᠴᠦ᠍ ᠭᠡᠰᠡᠨ ᠴᠢᠮᠠ ᠶ᠋ᠢ ᠶᠡᠬᠡ ᠯᠡ ᠳᠤᠷᠠᠰᠴᠤ ᠪᠠᠢᠨᠠ ᠭᠡᠳᠡᠭ ᠢ᠋ ᠨᠢ ᠡᠵᠢ ᠨᠢ ᠡᠨᠳᠡ ᠡᠴᠡ ᠳᠠᠮᠵᠢᠭᠤᠯᠵᠤ ᠪᠠᠢᠨᠠ ᠰᠢᠦ! ᠣᠳᠣ 《ᠡᠵᠢ 》 ᠨᠢ ᠤᠭ ᠤ᠋ᠨ ᠬᠢ ᠰᠢᠬ ᠢ᠋ᠶ᠋ᠡᠨ ᠤᠬᠢᠯᠠᠵᠤ ᠤᠨᠵᠢᠭᠠᠳ ᠭᠤᠨᠢᠵᠤ ᠰᠠᠭᠤᠬᠤ ᠪᠠᠨ ᠪᠣᠯᠢᠭᠰᠠᠨ᠂ ᠤᠴᠢᠷ ᠨᠢ ᠮᠢᠨᠦ ᠪᠥᠮᠪᠥᠯᠠᠢ ᠴᠢᠨᠢ ᠪᠢᠳᠡ ᠬᠡᠳᠦ ᠶ᠋ᠢ ᠪᠡᠨ ᠣᠷᠬᠢᠵᠤ ᠶᠠᠪᠤᠭᠠ ᠦᠭᠡᠢ ᠶᠤᠮ ᠪᠠᠢᠨᠠ ᠪᠢᠯᠡ᠃ ᠶᠡᠷᠦᠨᠢ ᠲᠡᠭᠡᠭᠡᠳ ᠬᠠᠢᠷᠠᠲᠠᠢ ᠬᠥᠮᠦᠨ ᠨᠢ ᠬᠠᠢᠷᠠᠲᠠᠢ ᠬᠥᠮᠦᠰ ᠢ᠋ᠶ᠋ᠡᠨ ᠬᠡᠵᠢᠶᠡ ᠴᠦ᠍ ᠣᠷᠬᠢᠳᠠᠭ ᠦᠭᠡᠢ᠂ ᠬᠠᠷᠢᠨ ᠲᠡᠭᠦᠨ ᠦ᠌ ᠪᠡᠨ ᠵᠢᠷᠦᠬᠡᠨ ᠳ᠋ᠦ᠍ ᠥᠨᠢᠳᠡ ᠦᠯᠡᠳᠡᠳᠡᠭ ᠶᠤᠮ ᠭᠡᠨᠡ ᠪᠢᠯᠡ᠃ ᠦᠨᠡᠬᠡᠷ ᠮᠢᠨᠦ ᠪᠥᠮᠪᠥᠯᠠᠢ ᠴᠢᠨᠢ 《ᠡᠵᠢ 》 ᠶᠢᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠳ᠋ᠦ᠍ ᠥᠨᠢᠳᠡ ᠦᠯᠡᠳᠡᠭᠰᠡᠨ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠶᠤᠮ ᠳ᠋ᠠ!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠪᠠᠶᠠᠨᠰᠡᠷᠡᠩ
ᠦᠰᠦᠭ ᠬᠠᠲᠠᠭᠴᠢ ᠄ ᠠᠵᠠᠵᠠᠶᠠᠭᠠ
ᠬᠢᠨᠠᠭᠴᠢ ᠄ ᠮᠥᠩᠭᠥᠨᠴᠡᠴᠡᠭ ᠭᠠᠷᠮᠠ
ᠪᠥᠮᠪᠥᠯᠠᠢ ᠶᠢᠨ ᠬᠠᠷᠢᠭᠤ ᠵᠠᠬᠢᠳᠠᠯ
ᠪᠥᠮᠪᠥᠯᠠᠢ ᠶᠢᠨ ᠬᠠᠷᠢᠭᠤ ᠵᠠᠬᠢᠳᠠᠯ
— ᠪᠥᠮᠪᠥᠯᠠᠢ ᠳ᠋ᠤ᠌ ᠪᠢᠴᠢᠭᠰᠡᠨ ᠪᠢᠴᠢᠯᠯᠢᠭ ᠢ᠋ ᠦᠵᠡᠭᠡᠳ
ᠭ·ᠰᠠᠶ᠋ᠢᠨᠠ
ᠤᠶᠠᠬᠠᠨ《 ᠡᠵᠢ 》 ᠶ᠋ᠢᠨ ᠨᠢᠯᠪᠤᠰᠤ ᠲᠠᠢ ᠵᠠᠬᠢᠳᠠᠯ ᠢ᠋ ᠬᠣᠷᠢᠶᠠᠨ ᠣᠯᠤᠯᠠ
ᠤᠷᠢᠬᠠᠨ ᠬᠠᠪᠤᠷ ᠤ᠋ᠨ ᠤᠯᠠᠭᠠᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠤᠩᠰᠢᠨ ᠳᠠᠭᠤᠰᠬᠠᠯᠠ
ᠣᠯᠠᠨ ᠰᠠᠢᠬᠠᠨ ᠡᠳᠦᠷ ᠬᠣᠨᠣᠭ ᠦ᠋ᠳ ᠨᠢᠳᠦᠨ ᠳ᠋ᠦ᠍ ᠢᠯᠡᠷᠡᠯᠡ
ᠤᠬᠠᠭᠠᠨ ᠦᠭᠡᠢ ᠬᠠᠨᠢᠯᠠᠭᠰᠠᠨ ᠬᠡᠳᠦᠨ ᠠᠨᠳᠠ ᠪᠠᠨ ᠡᠩᠰᠡᠷᠡᠲᠡᠯᠡ ᠰᠠᠨᠠᠯᠠ ᠃
ᠣᠶᠤᠲᠠᠨ ᠡᠵᠡᠨ ᠦ᠌ ᠥᠭᠭᠢᠶᠡᠮᠦᠷ ᠬᠠᠶ᠋ᠢᠷᠠᠨ ᠳ᠋ᠤ᠌ ᠤᠭᠵᠢᠭᠤᠯᠵᠤ ᠦᠰᠦᠯᠡ
ᠣᠨᠴᠠᠭᠠᠢ ᠬᠠᠷᠠᠭᠠᠯᠵᠠᠯ ᠲᠠᠢ ᠨᠣᠭᠣᠭᠠᠨ ᠬᠡᠪᠢᠰ ᠢ᠋ᠶ᠋ᠡᠷ ᠥᠯᠥᠭᠡᠶ᠋ᠢᠲᠡᠭᠦᠯᠵᠦ ᠲᠣᠷᠨᠢᠯᠠ
ᠤᠷᠢᠲᠠᠢ ᠳᠠᠪᠬᠢᠳᠠᠭ 《 ᠬᠣᠨᠢᠴᠢᠨ 》 ᠨᠠᠶ᠋ᠢᠵᠠ ᠲᠠᠢ ᠪᠠᠨ ᠤᠷᠤᠯᠳᠤᠵᠤ ᠪᠣᠶ᠋ᠢᠵᠢᠯᠠ
ᠤᠨᠲᠠᠩᠬᠠᠢ ᠵᠥᠭᠡᠯᠡᠨ ᠰᠢᠷᠠ ᠮᠤᠤᠷ ᠲᠠᠢ ᠪᠠᠨ ᠬᠠᠨᠢᠰᠴᠦ ᠵᠢᠷᠭᠠᠯᠠ ᠃
ᠦᠭᠡᠶ᠋ᠢᠯᠡᠵᠦ ᠭᠡᠩᠰᠡᠷᠡᠭ᠍ᠰᠡᠨ《 ᠬᠠᠯᠲᠠᠷ 》 ᠠᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠊ᠢ ᠣᠶ᠋ᠢᠯᠠᠭᠠᠯᠠ
ᠦᠳᠡ ᠶ᠋ᠢᠨ ᠨᠣᠶ᠋ᠢᠷ ᠲᠠᠢ ᠡᠭᠦᠳᠡᠨ ᠡᠮᠦᠨᠡᠬᠢ ᠠᠮᠠᠷᠠᠯᠲᠠ ᠪᠠᠨ ᠳᠤᠷᠠᠰᠤᠯᠠ
ᠥᠨᠳᠥᠷ ᠳᠠᠷᠠᠰᠤᠲᠠᠢ ᠭᠣᠣᠯ ᠤ᠋ᠨ ᠢ᠋ᠶ᠋ᠠᠨ ᠦᠷᠭᠦᠭ᠍ᠰᠡᠨ ᠲᠠᠤᠯᠠᠢ ᠪᠠᠨ ᠡᠷᠭᠢᠴᠡᠭᠦᠯᠦᠯᠡ
ᠥᠯᠥᠰᠴᠦ ᠤᠮᠳᠠᠭᠠᠰᠬᠤ ᠶ᠋ᠢᠨ ᠡᠷᠢᠨ ᠳ᠋ᠦ᠍ ᠤᠭᠵᠢᠭᠤᠷ ᠤ᠋ᠨ ᠰᠠᠪᠠ ᠪᠠᠨ ᠴᠤ᠌ ᠰᠠᠨᠠᠯᠠ ᠃
ᠪᠥᠮᠪᠥᠯᠠᠢ ᠭᠡᠰᠡᠨ ᠨᠡᠷᠡ ᠲᠡᠢ ᠥᠨᠥᠴᠢᠨ ᠢᠨᠵᠠᠭᠠ ᠴᠢᠨᠢ ᠰᠠᠢᠨ ᠪᠠᠶ᠋ᠢᠨᠠ !
ᠪᠣᠭᠵᠣ ᠤᠨᠠᠭᠠ ᠪᠠᠨ ᠳᠠᠭᠠᠭᠤᠯᠤᠭᠰᠠᠨ ᠪᠤᠯᠪᠠᠷᠠᠢ ᠡᠵᠡᠨ ᠮᠢᠨᠢ ᠰᠠᠢᠨ ᠪᠠᠶ᠋ᠢᠨᠠ ᠤᠤ?
ᠪᠤᠷᠬᠠᠨ ᠤ᠋ ᠭᠠᠵᠠᠷ ᠢᠷᠡᠭᠰᠡᠨ ᠬᠥᠭᠡᠷᠦᠬᠦᠨ ᠠᠮᠢᠲᠠᠨ ᠴᠢᠨᠢ ᠰᠠᠢᠨ ᠪᠠᠶ᠋ᠢᠨᠠ !
ᠪᠤᠶᠠᠨ ᠤ᠋ ᠬᠡᠰᠢᠭ ᠬᠤᠷᠤᠶ᠋ᠢᠯᠠᠭᠰᠠᠨ 《 ᠪᠤᠶᠠᠨᠲᠤ ᠢᠵᠢ 》 ᠮᠢᠨᠢ ᠰᠠᠢᠨ ᠪᠠᠶ᠋ᠢᠨᠠ ᠤᠤ?
ᠡᠭᠦᠳᠡ ᠪᠡᠨ ᠪᠡᠬᠢᠯᠢᠭ ᠤᠶᠠᠭᠰᠠᠨ ᠪᠣᠯ ᠭᠡᠵᠦ ᠥᠩᠭᠡᠷᠡᠦ ᠪᠢᠲᠡᠭᠡᠢ ᠵᠣᠪᠠᠭᠠᠷᠠᠢ ! 《 ᠢᠵᠢ ᠮᠢᠨᠢ 》
ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠰᠤᠷᠠᠭ ᠊ᠢ ᠬᠠᠶ᠋ᠢᠬᠤ ᠪᠠᠷ ᠥᠪᠡᠷ ᠢ᠋ᠶ᠋ᠡᠨ ᠪᠢ ᠶᠠᠪᠤᠭᠰᠠᠨ ᠶᠤᠮ
ᠡᠨᠡᠬᠡᠨ ᠽᠠᠮᠪᠤᠯᠢᠩ ᠠ᠋ᠴᠠ ᠶᠠᠪᠤᠬᠤ ᠳᠤᠷᠠ ᠦᠭᠡᠢ ᠡᠷᠭᠢᠭᠡᠳ ᠪᠤᠴᠠᠭᠠᠳ ᠳᠠᠪᠬᠢᠭᠰᠠᠨ ᠶᠤᠮ
ᠡᠷᠯᠢᠭ ᠨᠣᠮᠣᠨ ᠬᠠᠨ ᠤ᠋ ᠡᠯᠴᠢ ᠶ᠋ᠢᠨ ᠨᠣᠬᠠᠢ ᠳ᠋ᠤ᠌ ᠬᠠᠭᠤᠷᠲᠠᠭᠰᠠᠨ ᠶᠤᠮ ᠃
ᠡᠬᠡᠰᠢᠭ ᠳᠣᠯᠣᠭᠠᠨ ᠠᠪᠢᠶᠠ ᠲᠠᠢ ᠲᠠᠮᠤᠴᠢ ᠶ᠋ᠢᠨ ᠲᠠᠯᠠ ᠳ᠋ᠤ᠌ ᠪᠠᠨ ᠲᠠᠯᠠᠷᠬᠠᠨᠠᠮ !
ᠡᠪ ᠦ᠋ᠨ ᠲᠠᠩᠰᠤᠭ ᠠᠮᠢᠳᠤᠷᠠᠯ ᠲᠠᠢ 《 ᠮᠣᠩᠭᠣᠯ ᠢᠵᠢ 》 ᠳ᠋ᠦ᠍ ᠪᠡᠨ ᠰᠥᠬᠥᠷᠡᠨᠡᠮ !
ᠡᠷᠭᠢᠬᠦ ᠲᠥᠷᠥᠯ ᠪᠠᠶ᠋ᠢᠲᠠᠭ ᠪᠣᠯ ᠦᠷᠡ ᠴᠢᠨᠢ ᠪᠣᠯᠵᠤ ᠵᠠᠶᠠᠭᠠᠶᠠ !
ᠡᠪᠬᠡᠷᠡᠵᠦ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ ᠊ᠢ ᠮᠢᠨᠢ ᠡᠪᠯᠡᠭᠦᠯᠵᠦ ᠣᠶ᠋ᠢᠯᠠᠭᠠᠵᠤ ᠠᠪᠤᠭᠠᠷᠠᠢ !
ᠡᠷᠬᠡ ᠬᠣᠩᠭᠣᠷ ᠪᠥᠮᠪᠥᠯᠠᠢ ᠠ᠋ᠴᠠ
ᠡᠪᠦᠳᠦᠭ ᠰᠥᠭᠥᠳᠦᠨ ᠮᠥᠷᠭᠥᠮᠦ !
ᠦᠵᠡᠰᠬᠦᠯᠡᠩ ᠪᠣᠯᠭᠠᠭᠴᠢ ᠤᠰᠤᠨ ᠲᠠᠤᠯᠠᠢ ᠵᠢᠯ
ᠦᠵᠡᠮᠵᠢᠲᠦ ᠦᠨᠡᠨ ᠦ᠌ ᠭᠠᠵᠠᠷ ᠠ᠋ᠴᠠ ᠢᠯᠡᠭᠡᠪᠡ ᠃
ᠰᠠᠶ᠋ᠢᠨᠬᠤᠷᠠᠬᠤ ᠥᠷᠦᠭᠡᠨᠡ
2023.3.23
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠳᠤᠨᠭᠡᠷᠡᠯ
ᠦᠰᠦᠭ ᠬᠠᠳᠠᠭᠴᠢ ᠄ ᠠᠵᠠᠵᠠᠶᠠᠭᠠ
ᠬᠢᠨᠠᠭᠴᠢ ᠄ ᠮᠥᠩᠭᠦᠨᠴᠡᠴᠡᠭ ᠂ ᠣᠳᠤᠨᠭᠡᠷᠡᠯ