ᠬᠦᠩ ᠦ᠋ᠨ ᠵᠣᠣ ᠶ᠋ᠢᠨ ᠭᠡᠭᠡᠨ ᠦ᠌ ᠠᠯᠲᠠᠨ ᠰᠤᠷᠭᠠᠯ ᠣᠷᠣᠰᠢᠪᠠ1-6Гүнгийн жуугийн гэгээний алтан сургаал оршивой ᠲᠣᠷᠭᠠᠨ ᠵᠢᠯᠣᠭᠣ

  ᠨᠢᠭᠡᠳᠦᠭᠡᠷ ᠪᠦᠯᠦᠭ ᠰᠤᠷᠭᠠᠯ ᠰᠢᠯᠦᠭ

   ᠵᠢᠷᠭᠤᠭ᠎ᠠ

 

ᠠᠷᠪᠠᠨ ᠬᠠᠷ᠎ᠠ ᠨᠢᠭᠦᠯ ᠢᠨᠤ ᠠᠩᠬ᠎ᠠ ᠶᠡᠬᠡ ᠬᠢᠯᠢᠨᠴᠡ ᠂

ᠠᠮᠢᠲᠠᠨ ᠊ᠢ ᠠᠯᠠᠬᠤᠢ ᠶ᠋ᠢ ᠮᠡᠲᠡᠭᠰᠡᠭᠡᠷ ᠪᠠᠶ᠋ᠢᠲᠠᠯ᠎ᠡ ᠂

ᠠᠷᠤ ᠥᠪᠥᠷ ᠣᠷᠣᠨ ᠪᠦᠬᠦᠢ ᠶ᠋ᠢ ᠠᠵᠢᠭᠯᠠᠵᠤ ᠦᠵᠡᠪᠡᠯ᠂

ᠠᠮᠢᠵᠢᠭᠤᠯ ᠠᠷᠭ᠎ᠠ ᠦᠭᠡᠢ ᠶᠣᠰᠣ ᠮᠡᠲᠦ ᠪᠣᠯᠵᠤᠬᠤᠢ ᠃

 

ᠴᠠᠭ ᠤ᠋ᠨ ᠥᠩᠭᠡ ᠨᠡᠶ᠋ᠢᠲᠡ ᠶ᠋ᠢᠨ ᠶᠣᠰᠣ ᠲᠡᠶ᠋ᠢᠮᠦ ᠮᠡᠲᠦ ᠪᠣᠯᠬᠤᠯ᠎ᠠ ᠂

ᠴᠠᠭᠠᠨ ᠬᠠᠷ᠎ᠠ ᠦᠢᠯᠡ ᠶ᠋ᠢᠨ ᠦᠷ᠎ᠡ ᠣᠷᠬᠢᠭᠳᠠᠬᠤ ᠬᠠᠮᠢᠭ᠎ᠠ ᠂

ᠴᠠᠷᠬᠢᠷᠠᠲᠠᠯ᠎ᠠ ᠬᠤᠷᠢᠶᠠᠬᠤ ᠡᠷᠯᠢᠭ ᠬᠠᠭᠠᠨ ᠤ᠋ ᠡᠯᠴᠢ ᠨᠠᠷ ᠂

ᠴᠠᠯᠮ᠎ᠠ ᠪᠠᠷ ᠠᠪᠠᠴᠢᠬᠤ ᠶ᠋ᠢ ᠬᠤᠳᠠᠯ ᠭᠡᠮᠡᠨ ᠰᠠᠨᠠᠬᠤ ‍ᠤᠤ?

 

ᠡᠨᠡ ᠭᠠᠵᠠᠷ ᠠᠯᠠᠬᠤᠢ ᠳ᠋ᠤᠷ ᠶᠣᠰᠣ ᠪᠣᠯᠵᠤ ᠢᠲᠡᠭᠡᠭᠰᠡᠨ ᠂

ᠡᠷᠯᠢᠭ ᠬᠠᠭᠠᠨ ᠳ᠋ᠤᠷ ᠵᠤᠯᠭᠤᠬᠤᠢ ᠳ᠋ᠤᠷ ᠢᠷᠣ᠎ᠠ ᠪᠣᠯᠵᠤ ᠢᠯᠡᠷᠡᠭᠡᠳ ᠂

ᠡᠷᠯᠢᠭ ᠰᠦᠨᠡᠰᠦ ᠶ᠋ᠢ ᠰᠢᠮᠰᠢᠷᠡᠲᠡᠯ᠎ᠡ ᠳᠦᠯᠢᠵᠦ ᠂

ᠡᠷᠭᠢᠨ ᠳ᠋ᠡᠭᠡᠨ ᠲᠦᠮᠡᠨ ᠺᠠᠯᠠᠪ ᠠᠯᠠᠭᠳᠠᠬᠤ ᠬᠤᠳᠠᠯ ‍ᠤᠤ ᠃

 

ᠨᠢᠭᠡᠨ ᠡᠳᠦᠷ ᠨᠢᠭᠡᠨ ᠠᠮᠢ ᠲᠠᠰᠤᠯᠤᠬᠰᠠ ᠬᠢᠯᠢᠨᠴᠡ ᠂

ᠨᠢᠭᠡᠨ ᠰᠠᠷ᠎ᠠ ᠲᠦᠮᠡ ᠪᠣᠯᠵᠤ ᠠᠷᠪᠢᠵᠢᠬᠤ  ᠶ᠋ᠢ ᠪᠤᠲᠤᠪᠠᠯ᠎ᠡ ᠂

ᠨᠢᠭᠡᠨ ᠵᠢᠯᠲᠤᠷ ᠪᠤᠮ ᠤ᠋ᠨ ᠲᠣᠭ᠎ᠠ ᠬᠦᠷᠬᠦ ᠠᠮᠢᠨ ᠬᠠᠷᠢᠭᠤ ᠶ᠋ᠢ ᠂

ᠨᠢᠭᠡᠨ ᠨᠠᠰᠤᠨ ᠤ᠋ ᠠᠷᠪᠢᠵᠢᠯ ᠳ᠋ᠤᠷ ᠬᠡᠳᠦᠢ ᠠᠮᠢᠨ ᠊ᠢ ᠲᠥᠯᠥᠮᠦᠢ ᠃

 

ᠠᠮᠠᠨ ᠳ᠋ᠠᠭᠠᠨ ᠢᠳᠡᠬᠦᠢ ᠳ᠋ᠦ᠍ᠷ ᠠᠮᠲᠠ ᠰᠢᠮᠳᠠ ᠬᠡᠲᠦᠶ᠋ᠢᠬᠡᠨ ᠂

ᠠᠮᠢᠨ ᠢ᠋ᠶ᠋ᠠᠷ ᠳᠥᠯᠥᠬᠦᠢ ᠳ᠋ᠦ᠍ᠷ ᠦᠢᠯᠡ ᠶ᠋ᠢᠨ ᠦᠷ᠎ᠡ ᠬᠡᠲᠦᠶ᠋ᠢᠪᠡᠢ ᠂

ᠠᠰᠠᠭᠤᠬᠤᠢ ᠶ᠋ᠢᠨ ᠰᠡᠳᠬᠢᠯ ᠦᠭᠡᠢ ᠦᠬᠦᠭᠰᠡᠨ ᠦ᠌ ᠲᠠᠷᠤᠶ᠋ᠢᠬᠠᠨ ᠂

ᠠᠶᠤᠯᠲᠤ ᠡᠷᠯᠢᠭ ᠬᠠᠭᠠᠨ ᠲᠣᠭᠠᠴᠠᠬᠤ ᠮᠠᠭᠠᠳ ᠪᠣᠢ ᠃

 

ᠬᠡᠰᠡᠭᠯᠡᠭᠡᠳ ᠢᠳᠡᠬᠦᠢ ᠳ᠋ᠦ᠍ᠷ ᠬᠣᠨᠢᠨ ᠮᠢᠬ᠎ᠠ ᠪᠣᠯᠪᠠᠴᠤ ᠂

ᠬᠢᠴᠢᠶᠡᠭᠡᠳ ᠬᠡᠯᠡᠯᠴᠡᠪᠡᠯ ᠥᠪᠡᠷ ᠦ᠋ᠨ ᠮᠢᠬ᠎ᠠ ᠶ᠋ᠢ ᠢᠳᠡᠮᠦᠢ ᠂

ᠬᠡᠯᠲᠦᠷᠢᠬᠦ ᠪᠡᠷᠬᠡ ᠦᠢᠯᠡ ᠶ᠋ᠢᠨ ᠪᠣᠯᠪᠠᠰᠤᠷᠠᠯ ᠢᠷᠡᠬᠦᠢ ᠳ᠋ᠦ᠍ᠷ ᠂

ᠭᠡᠷᠴᠢᠭᠲᠡᠬᠦ ᠵᠣᠪᠠᠯᠠᠩ ᠠᠨᠤ ᠡᠭᠦᠨ ᠡᠴᠡ ᠦᠯᠡᠮᠵᠢ ᠃

 

ᠭᠡᠭᠡᠨ ᠪᠣᠭᠳᠠ ᠶ᠋ᠢ ᠵᠠᠯᠠᠬᠤᠢ ᠳ᠋ᠤᠷ ᠮᠠᠰᠢ ᠰᠠᠢᠬᠠᠨ ᠰᠦᠰᠦᠭᠯᠡᠨ ᠂

ᠬᠢᠴᠢᠶᠡᠵᠦ ᠡᠷᠭᠦᠨ ᠲᠠᠬᠢᠯ ᠰᠢᠭᠦᠰᠦ ᠪᠡᠨ ᠪᠠᠷᠢᠵᠤ ᠂

ᠭᠡᠷᠦᠨ ᠥᠯᠵᠡᠢ ᠪᠯᠠᠮ᠎ᠡ ᠶ᠋ᠢᠨ ᠠᠳᠢᠰ ᠬᠦᠷᠦᠯᠴᠡᠬᠦ ᠶ᠋ᠢᠨ ᠤᠷᠢᠳᠠ ᠂

ᠭᠡᠮᠲᠦᠭᠦᠯᠦᠭᠰᠡᠨ ᠬᠣᠨᠢᠨ ᠤ᠋ ᠬᠣᠶᠠᠷ ᠲᠠᠯ᠎ᠠ ᠶ᠋ᠢ ᠡᠪᠳᠡᠮᠦᠢ ᠃

 

ᠨᠢᠭᠡᠨ ᠬᠥᠮᠦᠨ  ᠢ᠋ ᠠᠯᠠᠬᠤᠯ᠎ᠠ ᠬᠥᠭᠡᠷᠦᠬᠦᠶ᠋ᠢᠯᠡᠨ ᠵᠣᠪᠠᠬᠤ ᠂

ᠨᠢᠭᠡᠨ ᠬᠣᠨᠢ ᠶ᠋ᠢ ᠠᠯᠬᠤᠯ᠎ᠠ ᠢᠳᠡᠨ᠎ᠡ ᠭᠡᠮᠡᠨ ᠪᠠᠶᠠᠰᠬᠤ ᠂

ᠨᠡᠶ᠋ᠢᠯᠡᠭᠦᠯᠦᠨ ᠪᠣᠳᠣᠬᠤᠯ᠎ᠠ ᠠᠮᠢ ᠴᠢᠰᠤ ᠠᠳᠠᠯᠢ ᠂

ᠨᠢᠭᠦᠯ ᠢ᠋ᠶ᠋ᠡᠨ ᠰᠢᠨᠤᠯ ᠢ᠋ᠶ᠋ᠠᠷ ᠬᠠᠯᠬᠠᠯᠠᠭᠰᠠᠨ ᠴᠢᠨᠠᠷ ᠮᠥᠨ ᠃

 

ᠬᠥᠮᠦᠨ ᠢᠨᠤ ᠬᠣᠣᠷᠯᠠᠯ ᠣᠯᠠᠨ ᠬᠡᠷᠴᠡᠭᠡᠢ ᠶ᠋ᠢ ᠠᠯᠠᠮᠤᠢ ᠂

ᠬᠥᠭᠡᠷᠦᠬᠦᠢ ᠲᠡᠷᠡ ᠬᠣᠨᠢ ᠰᠢᠮ᠎ᠡ ᠲᠣᠰᠣ ᠪᠠᠭᠠᠰᠤ ᠪᠠᠨ ᠦᠵᠡᠭᠰᠡᠭᠡᠷ ᠂

ᠬᠥᠨᠥᠭᠡᠵᠦ ᠠᠯᠠᠬᠤᠢ ᠳ᠋ᠤᠷ ᠬᠥᠭᠡᠷᠦᠬᠦᠢ ᠪᠤᠰᠤ ᠪᠣᠯᠤᠭᠴᠢ ᠂

ᠬᠥᠮᠦᠨ ᠦ᠌ ᠰᠡᠳᠬᠢᠯ ᠴᠣᠬᠣᠮ ᠳ᠋ᠠᠭᠠᠨ ᠮᠠᠰᠢ ᠮᠤᠩᠬᠠᠭ ᠪᠢᠰᠢ ‍ᠤᠤ ?

 

ᠪᠠᠰᠠ ᠬᠤᠶ᠋ᠢᠲᠤ ᠶ᠋ᠢᠨ ᠵᠣᠪᠠᠯᠠᠩ ᠪᠠ ᠪᠣᠯᠪᠠᠰᠤᠷᠠᠯ ᠪᠠᠶ᠋ᠢᠲᠤᠭᠠᠢ ᠂

ᠪᠠᠷᠢᠮ ᠳᠡᠭᠡᠷ᠎ᠡ ᠨᠠᠰᠤ ᠪᠤᠶᠠᠨ ᠮᠠᠰᠢ ᠣᠬᠣᠷ ᠪᠣᠯᠤᠮᠤᠢ ᠂

ᠪᠠᠶᠠᠨ ᠶᠡᠬᠡᠰ ᠪᠯᠠᠮ᠎ᠡ ᠨᠣᠶᠠᠳ ᠨᠠᠰᠤ ᠠᠬᠤᠷ ᠪᠣᠯᠤᠭᠴᠢ ᠂

ᠪᠠᠶᠠᠷ ᠨᠠᠶ᠋ᠢᠷ ᠤ᠋ᠨ ᠠᠯᠠᠭ ᠨᠢᠳᠦᠨ ᠶᠡᠬᠡᠲᠦᠭᠰᠡᠨ ᠰᠢᠯᠲᠠᠭᠠᠨ᠃

 

ᠠᠪᠤᠷᠠᠯ ᠤ᠋ᠨ ᠣᠷᠣᠨ ᠪᠣᠯᠬᠤ ᠭᠠᠵᠠᠷ ᠮᠥᠷ ᠊ᠢ ᠣᠯᠤᠭᠴᠢᠳ ᠂

ᠠᠷᠢᠭᠤᠨ ᠴᠠᠭᠠᠨ ᠪᠤᠶᠠᠨᠲᠠᠨ ᠊ᠢ ᠬᠥᠪᠡᠭᠦᠨᠴᠢᠯᠡᠨ ᠲᠡᠳᠬᠦᠬᠦ ᠂

ᠠᠷᠪᠠᠨ ᠨᠢᠭᠦᠯ ᠦᠢᠯᠡᠳᠦᠭᠴᠢ ᠶ᠋ᠢ ᠳᠠᠶ᠋ᠢᠰᠤᠨ ᠪᠣᠯᠭᠠᠨ ᠳᠠᠷᠤᠬᠤ ᠂

ᠠᠮᠠᠯᠠᠭᠰᠠᠨ ᠲᠠᠩᠭᠠᠷᠠᠬ ᠨᠢ ᠬᠠᠷᠢᠨ ᠲᠡᠶ᠋ᠢᠮᠦ ᠪᠥᠯᠥᠭᠡ᠃

 

ᠦᠯᠢᠭᠡᠷᠯᠡᠨ ᠪᠣᠳᠣᠪᠠᠰᠤ ᠪᠠᠶᠠᠷ ᠨᠠᠶ᠋ᠢᠷ ᠬᠡᠮᠡᠭᠴᠢ ᠂

ᠦᠯᠡᠮᠵᠢᠬᠡᠨ ᠪᠢᠯᠢᠭ ᠵᠣᠷᠢᠭ ᠵᠣᠬᠢᠶᠠᠬᠤ ᠪᠠᠶ᠋ᠢᠲᠤᠭᠠᠢ ᠂

ᠦᠬᠡᠷ ᠬᠣᠨᠢ ᠠᠯᠠᠭᠰᠠᠨ ᠤ᠋ ᠶᠡᠬᠡ ᠨᠢᠭᠦᠯ ᠳᠡᠯᠭᠡᠵᠦ ᠂

ᠥᠯᠵᠡᠢ ᠪᠤᠰᠤ ᠵᠣᠪᠠᠯᠠᠩ ᠤ᠋ᠨ ᠲᠦᠮᠡᠨ ᠢᠷᠣ᠎ᠠ ᠶ᠋ᠢ ᠦᠵᠡᠮᠦᠢ ᠃

 

ᠪᠣᠳᠢᠰᠠᠳ᠋ᠸ᠎ᠠ ᠺᠤᠮᠪᠤ ᠯᠦᠩᠷᠦᠪ ᠨᠢᠭᠡᠨ ᠬᠣᠷᠣᠬᠠᠢ ᠠᠯᠠᠭᠰᠠᠨ   ᠊ᠢ ᠂

ᠪᠣᠯᠪᠠᠰᠤᠷᠠᠨ ᠲᠡᠷᠢᠭᠦᠨ ᠢ᠋ᠶ᠋ᠡᠨ ᠣᠭᠲᠣᠯᠤᠭᠰᠠᠨ ᠪᠠᠶ᠋ᠢᠲᠠᠯ᠎ᠡ ᠂

ᠪᠣᠯᠬᠢ ᠪᠢᠳᠡᠨ ᠦ᠌ ᠦᠬᠡᠷ ᠬᠣᠨᠢ ᠠᠯᠠᠭᠰᠠᠨ ᠤ᠋ ᠬᠡᠯᠢᠨᠴᠡ ᠂

ᠪᠤᠯᠲᠠᠷᠢᠬᠤ ᠮᠠᠰᠢ ᠪᠡᠷᠬᠡ ᠲᠣᠯᠣᠭᠠᠢ ᠪᠠᠷ ᠲᠥᠯᠥᠮᠦᠢ ᠃

 

ᠣᠪᠣᠭᠠᠨ ᠤ᠋ ᠡᠵᠡᠳ ᠯᠤᠤᠰ ᠊ᠢ ᠤᠯᠠᠭᠠᠨ ᠢ᠋ᠶ᠋ᠠᠷ ᠳᠠᠬᠢᠵᠤ ᠂

ᠣᠷᠣᠨ ᠨᠤᠲᠤᠭ ᠥᠯᠵᠡᠢ ᠪᠣᠯᠬᠤ ᠶ᠋ᠢᠨ ᠰᠠᠢᠬᠠᠨ ᠲᠠᠬᠢᠯ ᠬᠡᠮᠡᠵᠦ ᠂

ᠤᠭ ᠤ᠋ᠨ ᠴᠢᠨᠠᠷ ᠮᠢᠬ᠎ᠠ ᠴᠢᠰᠤ ᠬᠠᠷᠰᠢᠯᠠᠯᠲᠠᠢ ᠲᠤᠯᠠᠳᠠ ᠂

ᠤᠷᠪᠠᠭᠤᠯᠤᠨ ᠬᠢᠯᠢᠩᠯᠡᠵᠦ ᠬᠣᠣᠷᠯᠠᠯ ᠬᠢᠬᠦ ᠶᠣᠰᠣᠲᠠᠢ ᠃

 

ᠰᠢᠲᠦᠭᠡᠨ ᠦ᠌ ᠪᠤᠷᠬᠠ ᠯᠤᠤᠰ ᠊ᠢ ᠲᠠᠬᠢᠬᠤ ᠪᠠᠷ ᠰᠢᠯᠲᠠᠭᠯᠠᠨ ᠂

ᠰᠢᠨᠤᠯ ᠳᠤᠷ᠎ᠠ ᠪᠡᠶᠡᠰ ᠢᠨᠤ ᠢᠳᠡᠬᠦᠢ ᠪᠡᠨ ᠰᠠᠨᠠᠵᠤ ᠂

ᠰᠢᠯᠵᠢᠯ ᠦᠭᠡᠢ ᠮᠠᠭᠤ ᠦᠢᠯᠡ ᠶ᠋ᠢᠨ ᠥᠯᠵᠡᠢ ᠪᠤᠰᠤ ᠶ᠋ᠢᠨ ᠬᠠᠷᠢᠭᠤᠯᠠᠯ ᠃

ᠰᠢᠲᠦᠪᠡᠴᠦ ᠴᠢᠳᠠᠯ ᠦᠭᠡᠢ ᠬᠡᠷᠡᠭ ᠦᠭᠡᠢ ᠬᠡᠮᠡᠮᠦᠢ ᠃

 

ᠥᠭᠦᠯᠡᠬᠦ ᠬᠦᠰᠡᠬᠦ ᠨᠢ ᠰᠦᠰᠦᠭ ᠲᠠᠬᠢᠯ ᠪᠣᠯᠪᠠᠴᠤ ᠂

ᠥᠩᠭᠡᠯᠡᠬᠦ ᠢᠳᠡᠬᠦ ᠨᠢ ᠪᠡᠶ᠎ᠡ ᠪᠡᠶᠡᠰ ᠪᠣᠯᠬᠤᠯ᠎ᠠ ᠂

ᠦᠨᠡᠨ ᠳ᠋ᠡᠭᠡᠨ ᠢᠳᠡᠰᠢ ᠪᠡᠨ ᠪᠡᠯᠡᠲᠦᠭᠰᠡᠨ ᠤᠴᠢᠷ ᠊ᠢ ᠂

ᠦᠢᠯᠡ ᠶ᠋ᠢᠨ ᠪᠤᠷᠬᠠᠨ ᠲᠡᠭᠷᠢ ᠶ᠋ᠢ ᠬᠠᠭᠤᠷᠴᠤ ᠪᠣᠯᠬᠤ ‍ᠤᠤ?

 

ᠢᠯᠡᠳᠲᠡ ᠪᠡᠷ ᠠᠯᠠᠪᠠᠯ ᠦᠢᠯᠡ ᠪᠣᠯᠵᠤ ᠲᠥᠯᠥᠮᠦᠢ ᠂

ᠢᠳᠡᠯ ᠦᠭᠡᠢ ᠣᠷᠬᠢᠪᠠᠯ ᠲᠠᠬᠢᠯ ᠪᠣᠯᠵᠤ ᠪᠣᠯᠤᠮᠤᠢ ᠂

ᠢᠲᠡᠭᠡᠵᠦ ᠰᠠᠨᠠᠪᠠᠯ ᠠᠪᠤᠷᠠᠵᠤ ᠭᠠᠷᠤᠮᠤᠢ ᠂

ᠢᠯᠡᠷᠭᠡᠶ᠋ᠢᠯᠡᠨ ᠪᠣᠳᠣᠪᠠᠯ ᠦᠢᠯᠡ ᠪᠣᠯᠵᠤ ᠪᠣᠯᠤᠮᠤᠢ ᠃

 

ᠤᠳᠬ᠎ᠠ ᠬᠡᠷᠡᠭ ᠰᠢᠢᠳᠪᠦᠷᠢ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠂

ᠤᠴᠢᠷ ᠦᠭᠡᠢ ᠶᠠᠳᠠᠭᠤᠰ ᠢ᠋ᠶ᠋ᠠᠷ ᠦᠬᠡᠷ ᠬᠣᠨᠢ ᠨᠢᠲᠤᠯᠭᠠᠨ ᠂

ᠣᠰᠣᠯ ᠦᠢᠯᠡ ᠬᠤᠷᠢᠶᠠᠬᠤ ᠨᠢᠭᠡᠨ ᠪᠡᠶ᠎ᠡ ᠶ᠋ᠢᠨ ᠬᠢᠯᠢᠨᠴᠡ ᠂

ᠤᠷᠰᠢᠭ ᠵᠣᠪᠠᠯ ᠠᠷᠪᠢᠳᠬᠠᠵᠤ ᠡᠵᠡᠨ ᠣᠯᠠᠨ ᠪᠣᠯᠤᠮᠤᠢ ᠃

 

ᠪᠠᠶ᠋ᠢᠲᠠᠭ ᠨᠣᠣᠰᠣ ᠶ᠋ᠢ ᠵᠤᠯᠭᠠᠭᠠᠵᠤ ᠭᠡᠷ ᠢ᠋ᠶ᠋ᠡᠨ ᠪᠦᠷᠢᠬᠦ ᠂

ᠪᠠᠭᠠᠰᠤ ᠶ᠋ᠢ ᠬᠤᠷᠢᠶᠠᠵᠤ ᠬᠦᠢᠲᠡᠨ ᠢ᠋ᠶ᠋ᠡᠨ ᠬᠠᠯᠬᠠᠯᠠᠬᠤ ᠂

ᠪᠠᠰᠠ ᠰᠢᠮ᠎ᠡ ᠲᠣᠰᠣ ᠶ᠋ᠢ ᠠᠨᠤ ᠰᠠᠭᠠᠵᠤ ᠤᠤᠭᠤᠭᠠᠳ ᠂

ᠪᠠᠷᠢᠨ ᠳᠡᠭᠡᠷ᠎ᠡ ᠠᠯᠠᠬᠤ ᠠᠨᠤ ᠳᠠᠩᠴᠤ ᠬᠥᠭᠡᠷᠦᠬᠦᠢ ᠪᠢᠰᠢ ‍ᠤᠤ ?

 

ᠦᠨᠢᠶᠡᠨ ᠦ᠌ ᠳᠠᠯᠠᠩ ᠠ᠋ᠴᠠ ᠴᠠᠭᠠᠨ ᠰᠦᠨ ᠊ᠢ ᠠᠪᠤᠭᠠᠳ ᠂

ᠦᠷᠡᠰ ᠊ᠢ ᠬᠤᠳᠠᠯᠳᠤᠵᠤ ᠠᠯᠲᠠ ᠮᠥᠩᠭᠥ ᠪᠣᠯᠭᠠᠭᠠᠳ ᠂

ᠦᠰᠦᠭᠰᠡᠨ ᠦ᠌ ᠴᠢᠳᠠᠯ ᠬᠦᠴᠦ ᠶ᠋ᠢ ᠪᠠᠷᠠᠲᠠᠯ᠎ᠠ ᠡᠳ᠋ᠯᠡᠭᠡᠳ ᠂

ᠦᠳᠡᠯᠡᠬᠦᠯ᠎ᠡ ᠠᠯᠠᠬᠤ ᠠᠨᠤ ᠳᠠᠩᠴᠤ ᠬᠥᠭᠡᠷᠦᠬᠦᠢ ᠪᠤᠰᠤ ‍ᠤᠤ ?

 

ᠠᠷᠢᠭᠤᠨ ᠰᠦᠨ ᠊ᠢ ᠬᠥᠬᠥᠭᠦᠯᠦᠭᠰᠡᠨ ᠠᠴᠢ ᠦᠷᠡᠰ ᠊ᠢ ᠪᠣᠳᠣᠪᠠᠯ ᠂

ᠠᠴᠢ ᠦᠷᠡᠰ ᠪᠢᠳᠡᠨ ᠊ᠢ ᠴᠦ᠍ ᠠᠯᠠᠪᠠᠰᠤ ᠵᠣᠬᠢᠮᠤᠢ ᠂

ᠠᠪᠤ ᠡᠵᠢ ᠮᠡᠲᠦ ᠬᠦᠨᠳᠦ ᠬᠡᠰᠢᠭ ᠊ᠢ ᠬᠦᠷᠲᠡᠭᠡᠳ ᠂

ᠠᠴᠢᠯᠠᠬᠤ ᠶ᠋ᠢᠨ ᠬᠠᠷᠢᠭᠤ ᠳ᠋ᠤᠷ ᠠᠯᠠᠬᠤ ᠠᠨᠤ ᠬᠥᠭᠡᠷᠦᠬᠦᠢ ᠃

 

ᠬᠢᠲᠤᠭ᠎ᠠ ᠪᠠᠨ ᠲᠦᠷᠦᠬᠦᠢ ᠳ᠋ᠦ᠍ᠷ ᠵᠣᠷᠢᠭ ᠠᠨᠤ ᠴᠢᠩᠭᠠᠬᠠᠨ ᠂

ᠬᠢᠷᠬᠢᠷᠡᠵᠦ ᠦᠬᠦᠬᠦᠢ ᠳ᠋ᠦ᠍ᠷ ᠵᠢᠷᠦᠬᠡ ᠢᠨᠤ ᠪᠤᠯᠭᠢᠯᠠᠨ ᠂

ᠬᠡᠷᠴᠢᠯᠡᠵᠦ ᠢᠳᠡᠬᠦᠢ ᠳ᠋ᠦ᠍ᠷ ᠰᠢᠨᠤᠯ ᠳᠤᠷ᠎ᠠ ᠶᠡᠬᠡᠬᠡᠨ ᠂

ᠬᠡᠯᠪᠡᠯᠵᠡᠨ ᠦᠬᠦᠬᠦᠢ ᠳ᠋ᠦ᠍ᠷ ᠲᠡᠷᠡ ᠵᠣᠪᠠᠯ ᠊ᠢ ᠦᠵᠡᠮᠦᠢ ᠃

 

ᠬᠦᠨᠳᠦ ᠲᠡᠮᠦᠷ ᠡᠭᠦᠷᠦᠭᠡᠳ ᠠᠭᠤᠯᠠ ᠲᠠᠯ᠎ᠠ ᠶ᠋ᠢ ᠬᠡᠰᠦᠵᠦ ᠂

ᠬᠥᠨᠥᠭᠡᠬᠦ ᠠᠮᠢ ᠠᠨᠤ ᠨᠢᠭᠡᠨ ᠬᠣᠶᠠᠷ ᠪᠣᠯᠪᠠᠴᠤ᠂

ᠬᠥᠳᠡᠭᠡ ᠳ᠋ᠦ᠍ ᠦᠵᠡᠭᠲᠡᠭᠰᠡᠨ ᠲᠦᠮᠡ ᠮᠢᠩᠭ᠎ᠠ ᠶ᠋ᠢᠨ ᠲᠣᠭ᠎ᠠ ᠶ᠋ᠢ ᠂

ᠬᠦᠨᠳᠦ ᠨᠢᠭᠦᠯ ᠬᠤᠷᠢᠶᠠᠬᠤ ᠬᠢᠯᠢᠨᠴᠡ ᠠᠨᠤ ᠴᠣᠬᠣᠮ ᠮᠥᠨ ᠃

 

ᠦᠨᠡᠭᠡᠨ ᠦ᠌ ᠠᠷᠠᠰᠤ ᠶ᠋ᠢ ᠬᠤᠳᠠᠯᠳᠤᠪᠠᠰᠤ ᠬᠡᠳᠦᠨ ᠯᠠᠩ ᠂

ᠦᠢᠯᠡ ᠶ᠋ᠢᠨ ᠦᠷ᠎ᠡ ᠶ᠋ᠢᠨ ᠪᠣᠯᠪᠠᠰᠤᠷᠠᠯ ᠊ᠢ ᠪᠣᠳᠣᠪᠠᠰᠤ ᠪᠤᠮᠠᠨ ᠯᠠᠩ ᠂

ᠥᠷᠥᠭ ᠪᠤᠰᠤ ᠶ᠋ᠢᠨ ᠠᠮᠢᠨ ᠢ᠋ᠶ᠋ᠠᠷ ᠳᠥᠯᠥᠬᠦᠢ ᠳ᠋ᠦ᠍ᠷ ᠬᠦᠷᠬᠦᠯ᠎ᠡ ᠂

ᠦᠯᠡᠮᠵᠢᠳᠡ ᠵᠣᠪᠠᠬᠤ ᠶ᠋ᠢ ᠬᠡᠮᠵᠢᠬᠦ ᠠᠷᠭ᠎ᠠ ᠦᠭᠡᠢ ᠯᠡ ᠃

 

ᠦᠢᠯᠡ ᠪᠡᠷ ᠦᠷᠡᠵᠢᠭᠰᠡᠨ ᠪᠥᠭᠡᠰᠦ ᠰᠢᠷᠬᠡ ᠶ᠋ᠢᠨ ᠲᠡᠳᠦᠢ ᠴᠦ᠍ ᠂

ᠦᠵᠡᠭᠰᠡᠭᠡᠷ ᠨᠢᠰᠠᠯᠠᠵᠤ ᠠᠯᠠᠬᠤᠢ ᠳ᠋ᠤᠷ ᠬᠢᠯᠪᠠᠷᠬᠠᠨ ᠂

ᠦᠵᠡᠭᠳᠡᠬᠦ ᠳᠦᠷᠰᠦ ᠢᠨᠤ ᠬᠡᠳᠦᠢ ᠪᠠᠭ᠎ᠠ ᠪᠣᠯᠪᠠᠴᠤ᠂

ᠥᠷᠢ ᠢᠨᠤ ᠰᠣᠯᠢᠬᠤᠢ ᠳ᠋ᠤᠷ ᠠᠮᠢ ᠨᠠᠰᠤ ᠠᠳᠠᠯᠢ᠃

 

ᠥᠴᠦᠬᠡᠨ ᠬᠠᠵᠠᠭᠰᠠᠨ ᠊ᠢ ᠠᠯᠠᠬᠤᠢ ᠳ᠋ᠤᠷ ᠬᠦᠷᠪᠡᠯ ᠂

ᠦᠬᠡᠷ ᠬᠣᠨᠢ ᠢᠳᠡᠭᠰᠡᠨ ᠊ᠢ ᠶᠠᠭᠠᠬᠢᠪᠠᠰᠤ ᠵᠣᠬᠢᠮᠤᠢ ?

ᠥᠪᠡᠷ ᠢ᠋ᠶ᠋ᠡᠨ ᠲᠡᠲᠦᠶ᠋ᠢᠬᠡᠨ ᠴᠦ᠍ ᠠᠯᠠᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠪᠠᠯ ᠂

ᠦᠵᠡᠲᠡᠯ᠎ᠡ ᠶᠡᠬᠡ ᠨᠢᠭᠦᠯ ᠬᠣᠭᠣᠰᠣᠳᠠᠵᠤ ᠪᠣᠯᠬᠤ ‍ᠤᠤ ?

 

  ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠦᠯᠵᠡᠶ᠋ᠢᠪᠠᠭᠠᠲᠤᠷ

  ᠬᠢᠨᠠᠭᠰᠠᠨ ᠨᠢ ᠄ ᠰᠡᠬᠡᠭᠡᠷᠡᠯ