ᠠᠳᠤᠭᠤ- ᠫ ᠪᠠᠲᠠᠷᠴᠢАдуу-п · бадарч
403ᠠᠳᠤᠭᠤ
ᠫ · ᠪᠠᠲᠠᠷᠴᠢ
ᠠᠳᠤᠭᠤ — ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ
ᠮᠢᠨᠢ ᠨᠢᠭᠡ
ᠠᠳᠤᠭᠤ — ᠲᠠᠪᠤᠨ ᠠᠮᠢᠳᠤ ᠡᠷᠳᠡᠨᠢ ᠶ᠋ᠢᠨ
ᠮᠢᠨᠢ ᠨᠢᠭᠡ
ᠠᠳᠤᠭᠤ — ᠲᠠᠬᠢᠯ ᠰᠦᠯᠳᠡ ᠳ᠋ᠦ᠍ ᠮᠢᠨᠢ
ᠡᠵᠡᠨ ᠲᠡᠢ ᠪᠡᠨ ᠪᠣᠢ
ᠠᠳᠤᠭᠤ — ᠲᠠᠯᠠ ᠂ ᠬᠠᠩᠭᠠᠢ ᠂ ᠭᠣᠪᠢ
ᠭᠤᠷᠪᠠᠨ ᠨᠤᠲᠤᠭ ᠲᠤ᠌ ᠮᠢᠨᠢ ᠪᠣᠢ
ᠬᠣᠨᠢ ᠦᠬᠡᠷ ᠦ᠋ᠨ ᠪᠡᠯᠴᠢᠭᠡᠷ ᠳᠠᠬᠠᠴᠢᠵᠤ
ᠣᠶ᠋ᠢᠷᠠ ᠡᠷᠭᠢᠯᠳᠦᠬᠦ ᠦᠭᠡᠢ
ᠬᠣᠯᠠ ᠰᠡᠷᠮᠡᠭᠦᠨ ᠬᠡᠭᠡᠷᠡ ᠳ᠋ᠦ᠍
ᠦᠰᠦ ᠨᠢ ᠣᠩᠭᠣᠯᠠᠵᠤ ᠠᠲᠠᠷᠯᠠᠨ
ᠬᠣᠨᠣᠭ ᠤ᠋ᠨ ᠰᠥᠨᠢ ᠳ᠋ᠡᠭᠡᠨ ᠪᠣᠰᠤᠭᠠ
ᠵᠡᠭᠦᠷᠮᠡᠭᠯᠡᠨ ᠰᠡᠷᠡᠬᠦ
ᠬᠣᠷᠸ᠋ᠠ ᠶ᠋ᠢᠨ ᠰᠡᠷᠭᠦᠯᠡᠩ ᠠᠮᠢᠲᠠᠨ
ᠠᠳᠤᠭᠤ ᠰᠠᠢᠬᠠᠨ
ᠠᠷᠢᠭᠤᠨ ᠱᠠᠷᠢᠯ ᠊ᠢ ᠨᠢ ᠠᠲᠠᠭᠠᠲᠠᠨ ᠳ᠋ᠤ᠌
ᠬᠥᠨᠳᠡᠭᠦᠯᠬᠦ ᠦᠭᠡᠢ ᠭᠡᠬᠦ ᠳ᠋ᠡᠭᠡᠨ
ᠠᠷᠠᠳ ᠲᠦᠮᠡᠨ ᠠᠷᠭᠠ ᠪᠢᠯᠢᠭ ᠰᠡᠶ᠋ᠢᠯᠦᠨ
ᠠᠬᠠᠰ ᠳᠡᠭᠡᠳᠦᠰ ᠢ᠋ᠶ᠋ᠡᠨ ᠣᠩᠭᠣᠯᠠᠭᠰᠠᠨ
ᠭᠠᠵᠠᠷ ᠤ᠋ᠨ ᠳᠡᠭᠡᠭᠦᠷ
ᠠᠳᠤᠭᠤ ᠪᠠᠨ ᠯᠠ ᠬᠤᠷᠢᠶᠠᠵᠤ ᠲᠤᠭᠤᠷᠠᠢ ᠶ᠋ᠢᠨ
ᠮᠥᠷ ᠢ᠋ᠶ᠋ᠡᠷ ᠨᠢ ᠨᠢᠭᠤᠭᠰᠠᠨ ᠭᠡᠳᠡᠭ
ᠠᠶᠤᠯᠲᠤ ᠮᠠᠩᠭᠤᠰ ᠊ᠢ ᠳᠠᠷᠤᠬᠤ ᠦᠯᠢᠭᠡᠷ ᠲᠦ᠍
ᠪᠠᠶ᠋ᠢᠮᠠ ᠦᠭᠡᠢ ᠳᠠᠶ᠋ᠢᠨ ᠳ᠋ᠤ᠌
ᠠᠬᠠ ᠨᠠᠷ ᠊ᠢ ᠪᠡᠨ ᠬᠥᠮᠦᠨ — ᠰᠤᠮᠤ
ᠪᠣᠯᠵᠤ ᠲᠤᠯᠤᠯᠳᠤᠬᠤ ᠳ᠋ᠤ᠌
ᠠᠯᠢ ᠨᠢ ᠥᠭᠡᠳᠡ ᠲᠡᠢ ᠥᠩᠭᠡ ᠲᠡᠢ ᠪᠡᠨ
ᠲᠡᠮᠲᠡᠷᠢᠵᠦ ᠰᠠᠷᠪᠠᠶ᠋ᠢᠬᠤ ᠴᠠᠭ ᠲᠠᠭᠠᠨ
ᠠᠳᠤᠭᠤ ᠪᠠᠨ ᠯᠠ ᠬᠤᠷᠢᠶᠠᠭᠰᠠᠨ ᠮᠢᠨᠢ
ᠮᠣᠩᠭᠣᠯ ᠤ᠋ᠨ ᠪᠡᠯᠭᠡ ᠶ᠋ᠢᠨ ᠳᠡᠭᠡᠳᠦ ᠠ᠋ ᠃
ᠵᠡᠭᠡᠷᠭᠡᠨᠡ ᠪᠤᠲᠠᠷᠭᠠᠨᠠ ᠴᠤ᠌
ᠴᠡᠴᠡᠭ ᠳᠡᠯᠭᠡᠷᠡᠮᠡ ᠵᠤᠨ ᠤ᠋ ᠰᠠᠷᠠ ᠳ᠋ᠠᠭᠠᠨ
ᠵᠡᠭᠡᠭᠯᠡᠨ ᠢᠷᠠᠭᠰᠠᠨ ᠬᠤᠨ ᠭᠠᠯᠠᠭᠤᠨ ᠤ᠋
ᠳᠠᠭᠤᠨ ᠳᠣᠣᠷᠠ
ᠵᠡᠯᠡ ᠴᠢᠭᠲᠠᠨ ᠳ᠋ᠤ᠌ ᠴᠠᠬᠤᠯᠠᠵᠤ
ᠣᠮᠣᠭᠲᠠᠨ ᠴᠢᠷᠠᠯᠠᠬᠤ
ᠵᠡᠭᠡᠷᠡ ᠶ᠋ᠢᠨ ᠬᠥᠯᠲᠦ ᠤᠨᠠᠭᠠ
ᠨᠤᠭᠤᠳ ᠨᠢ ᠴᠦ᠍ ᠶᠢᠷᠲᠢᠨᠴᠦ ᠶ᠋ᠢᠨ ᠨᠢᠭᠡ ᠬᠥᠭᠡᠷᠦᠬᠦᠨ
ᠴᠢᠨᠣᠠ ᠶ᠋ᠢᠨ ᠬᠣᠶᠠᠷ ᠴᠢᠬᠢ ᠶ᠋ᠢ
ᠨᠢ ᠰᠣᠯᠪᠢᠯᠵᠠᠭᠤᠯᠤᠩᠬᠠᠨ
ᠴᠣᠮᠪᠣᠩ ᠳᠥᠷᠪᠡᠨ ᠲᠤᠭᠤᠷᠠᠢ ᠶ᠋ᠢ
ᠨᠢ ᠲᠠᠴᠢᠭᠢᠨᠠᠭᠤᠯᠤᠩᠬᠠᠨ
ᠴᠣᠷᠣᠯᠵᠠᠬᠤ ᠳᠡᠯ ᠰᠢᠭ ᠬᠥᠬᠥᠯ ᠊ᠢ
ᠨᠢ ᠰᠣᠭᠰᠣᠯᠵᠠᠭᠤᠯᠤᠩᠬᠠᠨ
ᠴᠣᠪᠣᠭᠣ ᠰᠡᠷᠭᠦᠯᠡᠩ ᠰᠦᠷᠦᠭ ᠢ᠋ᠶ᠋ᠡᠨ
ᠬᠤᠷᠢᠶᠠᠵᠤ ᠢᠷᠡᠬᠦ ᠴᠦ᠍ ᠪᠠᠬᠠᠲᠠᠢ
ᠰᠢᠷᠬᠡᠭ ᠪᠦᠷᠢ ᠨᠢ ᠡᠷᠳᠡᠨᠢ ᠠᠳᠤᠭᠤ ᠪᠠᠨ
ᠭᠡᠯᠢᠴᠢᠬᠡᠭᠡᠳ
ᠰᠢᠷᠢᠬᠢ ᠵᠦᠯᠭᠡᠨ ᠳᠡᠭᠡᠷᠡ ᠮᠣᠷᠢ
ᠶᠠᠷᠢᠯᠴᠠᠵᠤ ᠰᠠᠭᠤᠬᠤ ᠳ᠋ᠤ᠌
ᠰᠢᠨᠡᠬᠡᠨ ᠶᠡᠭᠦᠯᠡᠭᠰᠡᠨ ᠬᠦᠯᠦᠭ ᠠᠮᠠᠭᠠᠢ
ᠬᠡᠮᠡᠯᠢᠨ ᠰᠢᠯᠭᠡᠭᠡᠬᠦᠢ
ᠰᠢᠷᠢᠨ ᠭᠥᠯᠢᠮ ᠳᠡᠭᠡᠷᠡ ᠬᠥᠬᠡ ᠳᠥᠷᠥᠭᠡ
ᠬᠠᠩ ᠬᠠᠩ ᠬᠢᠬᠦ ᠨᠢ ᠳᠠᠭᠤᠳᠠᠯᠭᠠ
ᠲᠣᠷᠭᠠᠨ ᠳᠡᠯᠪᠡᠭᠡᠲᠤ ᠴᠡᠴᠡᠭ ᠊ᠢ
ᠭᠢᠰᠬᠢᠯᠡ ᠴᠦ᠍ ᠬᠤᠭᠤᠯᠳᠠᠭ ᠦᠭᠡᠢ
ᠲᠣᠭᠣᠰ ᠤ᠋ᠨ ᠬᠢ ᠮᠡᠲᠦ ᠰᠡᠭᠦᠯ ᠰᠠᠮᠪᠠᠶ᠋ᠢᠯᠠᠵᠤ
ᠪᠡᠯᠴᠢᠬᠦ ᠠᠳᠤᠭᠤᠨ ᠳ᠋ᠤ᠌ ᠮᠢᠨᠢ
ᠲᠣᠳᠣ ᠮᠠᠩᠨᠠᠢ ᠲᠣᠷᠭᠠᠨ ᠵᠢᠯᠣᠭᠣ
ᠴᠤ᠌ ᠣᠯᠠᠨ ᠪᠣᠢ
ᠲᠣᠬᠣᠮ ᠡᠮᠡᠭᠡᠯ ᠦᠭᠡᠢ ᠰᠤᠯᠠ ᠳ᠋ᠠᠭᠠᠨ
ᠵᠢᠷᠣᠭᠠ ᠴᠤ᠌ ᠪᠡᠯᠡᠨ ᠪᠣᠢ
ᠦᠷᠡ ᠪᠡᠨ ᠬᠠᠷᠠᠭᠠᠳ ᠢᠪᠢᠯᠬᠦ ᠤᠭᠤᠷᠠᠭ
ᠰᠦ ᠨᠢ ᠬᠥᠬᠦᠦᠷ ᠲᠦ᠍
ᠦᠰᠦᠴᠢᠨ ᠱᠤᠤᠭᠢᠵᠤ ᠢᠰᠤᠬᠦ ᠳ᠋ᠡᠭᠡᠨ
ᠥᠷᠥᠨᠡ ᠶ᠋ᠢᠨ ᠳᠡᠷᠡᠰᠦᠨ ᠡᠴᠡ ᠬᠠᠲᠠᠭᠤ ᠴᠤ᠌
ᠦᠷᠡᠰ ᠭᠠᠷᠭᠠᠬᠤ ᠨᠠᠶ᠋ᠢᠷ ᠤ᠋ᠨ ᠬᠢᠨ
ᠣᠶ᠋ᠢᠮᠡᠵᠤ ᠰᠣᠭᠲᠣᠭᠤᠷᠠᠬᠤ ᠨᠢ ᠦᠭᠡᠢ
ᠦᠨᠡᠬᠡᠷ ᠪᠤᠶᠠᠨᠲᠤ ᠠᠳᠤᠭᠤᠨ ᠤ᠋ ᠰᠢᠮᠡ
ᠠᠶ᠋ᠢᠷᠠᠭ ᠴᠠᠭᠠᠨ
ᠠᠷᠢᠭᠤᠨ ᠲᠤᠩᠭᠠᠯᠠᠭ ᠤᠰᠤᠨ ᠤ᠋ ᠦᠨᠦᠷ
ᠠᠪᠤᠭᠰᠠᠨ ᠠᠳᠤᠭᠤ ᠪᠠᠨ
ᠠᠷᠤ ᠠ᠋ᠴᠠ ᠨᠢ ᠪᠠᠷᠠᠳᠠᠰᠬᠢᠨ ᠣᠪᠣᠭᠠᠨ
ᠳᠡᠭᠡᠷᠡ ᠡᠴᠡ ᠠᠵᠢᠬᠤᠢ
ᠴᠠᠭᠠᠱᠢ ᠪᠠᠨ ᠴᠤᠪᠤᠬᠤ ᠠᠵᠢᠷᠭᠠ
ᠠᠵᠢᠷᠭᠠ ᠪᠠᠷ ᠠᠳᠤᠭᠤ ᠮᠢᠨᠢ
ᠬᠠᠭᠤᠴᠢᠨ ᠮᠣᠩᠭᠣᠯ ᠪᠢᠴᠢᠭ ᠢ᠋ᠶ᠋ᠡᠷ
ᠲᠠᠲᠠᠯᠠᠭᠰᠠᠨ ᠰᠢᠯᠦᠭ ᠯᠡ ᠭᠡᠯᠲᠡᠢ
ᠬᠣᠰᠢᠭᠤ ᠨᠤᠲᠤᠭ ᠠᠯᠭᠠᠰᠠᠵᠤ ᠢᠵᠢᠯᠢ ᠳ᠋ᠡᠭᠡᠨ
ᠭᠦᠶᠦᠭᠰᠡᠨ ᠨᠢ ᠳᠣᠮᠣᠭ
ᠬᠤᠷ ᠳᠡᠯ ᠢ᠋ᠶ᠋ᠡᠨ ᠨᠠᠮᠢᠷᠠᠭᠤᠯᠵᠤ
ᠢᠵᠢᠯᠢ ᠪᠡᠨ ᠦᠦᠷᠰᠡᠬᠦ ᠨᠢ ᠤᠶᠠᠩᠭᠠ
ᠬᠤᠪᠢᠰᠬᠠᠯ ᠭᠢᠯᠴᠡᠭᠰᠡᠨ ᠤᠨᠤᠭᠠ
ᠡᠨᠡ ᠠᠳᠤᠭᠤᠨ ᠰᠦᠷᠦᠭ
ᠬᠠᠤᠯᠢ ᠨᠣᠮ ᠳ᠋ᠤ᠌ ᠳᠠᠷᠬᠠᠯᠠᠮᠠ
ᠠᠮᠢᠲᠠᠨ ᠤ᠋ ᠨᠢᠭᠡᠨ ᠰᠤᠷ
ᠠᠳᠤᠭᠤ ᠰᠢᠭ᠋ ᠢ᠋ᠶ᠋ᠡᠨ ᠲᠦᠷᠭᠡᠨ ᠤᠨᠲᠠᠵᠤ
ᠰᠢᠪᠠᠭᠤ ᠰᠢᠭ᠋ ᠰᠡᠷᠡᠵᠦ
ᠠᠬᠤᠢ ᠮᠣᠩᠭᠣᠯ ᠨᠤᠲᠤᠭ ᠢ᠋ᠶ᠋ᠠᠨ ᠡᠵᠡᠨ
ᠪᠢᠳᠡ ᠬᠠᠶ᠋ᠢᠷᠠᠯᠠᠨᠠᠮ ᠃
ᠠᠭᠲᠠ ᠮᠣᠷᠢᠳ ᠤ᠋ᠨ ᠦᠦᠷᠰᠡᠬᠦ ᠳ᠋ᠦ᠍
ᠬᠤᠭᠤᠷ ᠮᠢᠨᠢ ᠬᠥᠭᠯᠡᠭᠲᠡᠵᠤ
ᠠᠷᠪᠠᠨ ᠬᠤᠷᠤᠭᠤᠨ ᠳ᠋ᠤ᠌ ᠮᠢᠨᠢ ᠠᠳᠤᠭᠤ
ᠰᠢᠭ᠋ ᠦᠦᠷᠰᠡᠨᠡᠮ
ᠠᠳᠤᠭᠤ — ᠲᠠᠪᠤᠨ ᠬᠣᠰᠢᠭᠤ ᠮᠠᠯ ᠤ᠋ᠨ
ᠨᠢᠭᠡ
ᠠᠳᠤᠭᠤ — ᠲᠠᠪᠤᠨ ᠠᠮᠢᠳᠤ ᠡᠷᠳᠡᠨᠢ ᠶ᠋ᠢᠨ
ᠨᠢᠭᠡ
ᠠᠳᠤᠭᠤ — ᠲᠠᠬᠢᠯ ᠰᠦᠯᠳᠡ ᠳ᠋ᠦ᠍ ᠮᠢᠨᠢ
ᠡᠵᠡᠨ ᠲᠡᠢ ᠪᠡᠨ ᠪᠣᠢ
ᠠᠳᠤᠭᠤ — ᠲᠠᠯᠠ ᠂ ᠬᠠᠩᠭᠠᠢ ᠂ ᠭᠣᠪᠢ
ᠨᠤᠲᠤᠭ ᠲᠤ᠌ ᠮᠢᠨᠢ ᠳᠦᠭᠦᠷᠬᠦ ᠪᠣᠯᠲᠤᠭᠠᠢ !
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠰᠠᠶ᠋ᠢᠵᠢᠷᠠᠬᠤ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠭᠠᠷᠮᠠ ᠂ ᠰᠡᠬᠡᠭᠡᠷᠡᠯ
2023/03/30