ᠨᠢᠳᠦ – ᠳ ᠂ ᠪᠥᠷᠢᠨᠲᠤᠭᠲᠠᠬᠤ Нүд – Д ᠂ Бүрэнтогтох
521ᠨᠢᠳᠦ
ᠳ ᠂ ᠪᠥᠷᠢᠨᠲᠤᠭᠲᠠᠬᠤ
ᠬᠢᠯᠢ ᠶ᠋ᠢᠨ ᠴᠡᠷᠢᠭ ᠲᠦ᠍ ᠭᠢᠯᠠᠷᠠᠭᠤᠯᠵᠤ ᠶᠠᠪᠤᠭᠰᠠ ᠪᠢᠯᠢᠭᠲᠦ ᠨᠢᠭᠡ ᠤᠳᠠᠭᠠᠨ ᠤ ᠭᠠᠯ ᠤᠨ ᠠᠶᠤᠯ ᠠ᠋ᠴᠠ ᠪᠤᠰᠤᠳ ᠢ ᠠᠪᠤᠷᠠᠬᠤ ᠶ᠋ᠢᠨ ᠲᠥᠯᠥᠭᠡ ᠬᠠᠷᠠᠭᠠ ᠪᠠᠨ ᠠᠯᠳᠠᠭᠰᠠᠨ ᠶᠤᠮ᠃ ᠲᠡᠷᠡ ᠬᠠᠷᠠᠬᠠᠨ ᠪᠠᠭᠠ ᠠ᠋ᠴᠠ ᠪᠠᠨ ᠥᠨᠥᠴᠢᠨ ᠥᠰᠦᠭᠰᠡᠨ ᠲᠤᠯᠠ ᠬᠥᠳᠡᠭᠡ ᠪᠠᠶ᠋ᠢᠭᠠ ᠠᠬᠠ ᠲᠠᠢ ᠪᠠᠨ ᠨᠢᠭᠡ ᠬᠦᠷᠢᠶᠡᠨ ᠳ᠋ᠦ᠍ ᠠᠮᠢᠳᠤᠷᠠᠳᠠᠭ᠃ ᠠᠬᠠ ᠪᠡᠷᠭᠡᠨ ᠡᠴᠡ ᠪᠡᠨ ᠬᠣᠶᠠᠷ ᠬᠦᠦ ᠨᠢᠭᠡ ᠥᠬᠢᠨ ᠲᠡᠢ᠃ ᠠᠬᠠ ᠨᠢ ᠮᠠᠯ ᠲᠠᠷᠢᠶᠠ ᠭᠡᠳ ᠠᠵᠢᠯ ᠣᠯᠠᠨ ᠲᠤᠯᠠ ᠲᠡᠭᠦᠨ ᠢ ᠲᠠᠭᠠᠵᠤ ᠬᠠᠷᠠᠭᠠᠯᠵᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠲᠡᠷᠡ ᠬᠠᠷᠢᠨ ᠲᠡᠮ ᠰᠡᠷᠡᠯ ᠢᠶ᠋ᠡᠨ ᠲᠦᠰᠢᠵᠦ ᠬᠠᠷᠠᠭᠠ ᠲᠠᠢ ᠬᠥᠮᠦᠨ ᠡᠴᠡ ᠳᠣᠣᠷᠠ ᠦᠭᠡᠢ ᠠᠬᠠ ᠪᠡᠷᠭᠡᠨ ᠳ᠋ᠡᠭᠡᠨ ᠲᠤᠰᠠ ᠪᠣᠯᠵᠤ ᠴᠠᠢ ᠤᠰᠤ ᠴᠢᠨᠠᠵᠤ ᠂ ᠠᠴᠢ ᠬᠡᠦᠬᠡᠳ ᠢᠶ᠋ᠡᠨ ᠡᠨᠡᠷᠢᠨ ᠬᠠᠷᠠᠭᠠᠯᠵᠠᠭᠰᠠᠭᠠᠷ ᠣᠯᠠᠨ ᠵᠢᠯ ᠢ ᠲᠤᠭᠤᠯᠵᠤ ᠢᠷᠡᠭᠰᠡᠨ ᠪᠠᠶ᠋ᠢᠪᠠ᠃
ᠣᠳᠣ ᠶᠡᠬᠡ ᠠᠴᠢ ᠬᠦᠦ ᠬᠦᠳᠡᠷ ᠨᠢ ᠬᠤᠰᠢᠭᠤᠨ ᠳ᠋ᠤ᠌ ᠠᠯᠪᠠᠯᠠᠵᠤ ᠂ ᠠᠴᠢ ᠥᠬᠢᠨ ᠴᠡᠯᠮᠡᠭ ᠨᠢ ᠰᠤᠮᠤᠨ ᠤ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠭᠰᠢᠯᠠᠵᠤ ᠂ ᠪᠠᠭᠠ ᠠᠴᠢ ᠬᠦᠦ ᠪᠤᠨᠳᠤᠭᠤᠷ ᠨᠢ ᠶᠡᠬᠡ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠡᠮᠨᠡᠯᠭᠡ ᠶ᠋ᠢᠨ ᠤᠬᠠᠭᠠᠨ ᠰᠤᠷᠴᠤ ᠪᠠᠶ᠋ᠢᠭᠠ ᠠᠵᠢ᠃ ᠶᠡᠬᠡ ᠠᠴᠢ ᠨᠢ ᠭᠡᠷ ᠲᠡᠭᠡᠨ ᠢᠷᠡᠬᠦ ᠪᠣᠯᠭᠠᠨ ᠳ᠋ᠤ᠌ ᠲᠡᠭᠦᠨ ᠳ᠋ᠦ᠍ ᠠᠪᠴᠢᠷᠠᠭᠰᠠᠨ ᠶᠠᠭᠤᠮᠠ ᠪᠠᠨ ᠭᠠᠷᠳᠠᠭᠤᠯᠤᠭᠠᠳ ᠯᠡ ᠢᠯᠡᠭᠦᠦ ᠳᠤᠲᠠᠭᠤ ᠦᠬᠡ ᠥᠬᠡᠢ ᠶᠠᠭᠠᠷᠠᠤᠬᠠᠨ ᠯᠡ ᠶᠠᠪᠤᠳᠠᠭ᠃ ᠠᠴᠢ ᠥᠬᠢᠨ ᠨᠢ ᠴᠦ᠍ ᠬᠠᠶᠠ ᠬᠠᠶᠠ ᠲᠥᠷᠬᠥᠮᠴᠢᠯᠡᠵᠦ ᠢᠷᠡᠭᠡᠳ ᠬᠤᠪᠴᠠᠰᠤ ᠬᠤᠨᠠᠷ ᠢ ᠨᠢ ᠤᠬᠢᠶᠠᠵᠤ ᠰᠣᠯᠢᠭᠠᠳ ᠯᠡ ᠭᠡᠷ ᠲᠦ᠍ ᠪᠡᠨ ᠬᠠᠷᠢᠳᠠᠭ᠃ ᠴᠣᠷ ᠤᠨ ᠭᠠᠭᠴᠠ ᠪᠣᠨᠲᠣᠭᠣᠷ ᠨᠢ ᠲᠠᠷᠬᠠᠯᠲᠠ ᠶ᠋ᠢᠨ ᠬᠤᠭᠤᠴᠠᠭᠠᠨ ᠳ᠋ᠠᠭᠠᠨ ᠲᠡᠭᠦᠨ ᠦ ᠬᠣᠶᠠᠷ ᠲᠠᠰᠤᠯᠭᠠ ᠭᠡᠷ ᠢ ᠪᠦᠯᠢᠶᠡᠰᠬᠡᠨ ᠶᠠᠷᠢᠶᠠ ᠬᠦᠷ ᠪᠣᠯᠵᠤ ᠶᠢᠷᠲᠢᠨᠴᠦ ᠳᠡᠯᠡᠬᠡᠢ ᠶ᠋ᠢᠨ ᠰᠣᠨᠢᠨ ᠭᠠᠶ᠋ᠢᠬᠠᠮᠰᠢᠭ ᠢ ᠬᠥᠭᠡᠷᠦᠬᠦᠢ ᠠᠪᠠᠭᠠ ᠳ᠋ᠠᠭᠠᠨ ᠦᠭᠡ ᠬᠡᠯᠡ ᠪᠡᠷ ᠵᠢᠷᠤᠭᠯᠠᠵᠤ ᠦᠵᠡᠭᠦᠯᠳᠡᠭ᠃ ᠪᠠᠰᠠ ᠠᠪᠠᠭᠠ ᠪᠠᠨ ᠳᠠᠭᠠᠭᠤᠯᠤᠨ ᠬᠠᠯᠠᠭᠤᠨ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠣᠷᠣᠨ ᠭᠡᠷ ᠢ ᠨᠢ ᠴᠡᠪᠡᠷᠯᠡᠵᠦ ᠵᠠᠷᠤᠵᠤ ᠪᠠᠷᠢᠳᠠᠭ ᠶᠠᠭᠤᠮᠠ ᠬᠡᠤᠮᠠ ᠶ᠋ᠢ ᠨᠢ ᠵᠢᠷᠤᠮ ᠭᠣᠷᠢᠮ ᠳᠠᠢ ᠲᠠᠯᠪᠢᠳᠠᠭ ᠠ᠋ᠴᠠ ᠪᠣᠨᠲᠣᠭᠣᠷ ᠢᠶ᠋ᠠᠨ ᠪᠠᠶ᠋ᠢᠭᠠ ᠪᠠᠷ ᠯᠠ ᠪᠢᠯᠢᠭᠲᠦ ᠬᠠᠷᠠᠭᠠ ᠳᠠᠢ ᠰᠢᠭ᠋ ᠪᠠᠶᠠᠷᠯᠠᠵᠤ ᠪᠠᠶ᠋ᠢᠳᠠᠭ᠃
ᠪᠤᠨᠳᠤᠭᠤᠷ ᠨᠢ ᠪᠠᠭᠠ ᠠ᠋ᠴᠠ ᠪᠡᠨ ᠤᠬᠠᠭᠠᠯᠢᠭ ᠂ ᠦᠷᠭᠦᠯᠵᠢ ᠲᠡᠭᠦᠨ ᠲᠠᠢ ᠬᠠᠨᠢ ᠪᠣᠯᠵᠤ ᠤᠨᠲᠠᠳᠠᠭ ᠠ᠋ᠴᠠ ᠠᠪᠠᠭᠠ ᠨᠢ ᠬᠦᠵᠦᠭᠦᠨ ᠳᠡᠭᠡᠷᠡᠬᠢ ᠦᠷᠢᠯ ᠦᠨ ᠴᠢᠨᠡᠭᠡᠨ ᠪᠣᠷᠣ ᠮᠡᠩᠭᠡ ᠶ᠋ᠢ ᠨᠢ ᠲᠡᠮᠲᠡᠷᠢᠵᠦ ᠄ 《 ᠮᠢᠨᠦ ᠪᠣᠨᠲᠣᠭᠣᠷ ᠤᠨ ᠤᠬᠠᠭᠠᠨ ᠨᠢ ᠪᠦᠷ ᠡᠭᠥᠨ ᠳ᠋ᠡᠭᠡᠨ ᠪᠣᠢ ᠰᠢᠦ ! 》 ᠭᠡᠳ ᠯᠡ ᠥᠬᠥᠭᠡᠷᠳᠡᠳᠡᠭ ᠃ ᠪᠤᠨᠳᠤᠭᠤᠷ ᠨᠢ ᠲᠡᠭᠦᠨ ᠦ ᠠᠯᠢᠪᠠ ᠰᠠᠶ᠋ᠢᠨ ᠰᠠᠶ᠋ᠢᠬᠠᠨ ᠬᠦᠰᠡᠯ ᠡᠷᠡᠮᠡᠯᠵᠡᠯ ᠦᠨ ᠭᠡᠷᠡᠯ ᠭᠡᠭᠡ ᠨᠢ ᠪᠣᠯᠳᠠᠭ ᠠ᠋ᠴᠠ ᠲᠡᠷᠡ ᠣᠯᠳᠠᠭ ᠵᠢᠭᠠᠬᠠᠨ ᠲᠡᠳᠬᠦᠪᠦᠷᠢ ᠪᠡᠨ ᠪᠤᠨᠳᠤᠭᠤᠷ ᠲᠠᠭᠠᠨ ᠯᠠ ᠵᠠᠷᠤᠴᠠᠭᠤᠯᠳᠠᠭ ᠪᠠᠶ᠋ᠢᠪᠠ᠃ ᠤᠳᠠᠭᠠ ᠪᠣᠯᠭᠠᠨ ᠪᠤᠨᠳᠤᠭᠤᠷ ᠢᠶ᠋ᠠᠨ ᠬᠠᠷᠢᠵᠤ ᠢᠷᠡᠬᠦ ᠳ᠋ᠤ᠌ ᠨᠢ ᠬᠥᠯ ᠦᠨ ᠴᠢᠮᠡᠭᠡ ᠂ ᠠᠮᠢᠰᠬᠤᠬᠤ ᠠᠶ᠋ᠢᠵᠠᠮ ᠢᠶ᠋ᠠᠷ ᠨᠢ ᠪᠠᠷᠤᠭᠯᠠᠵᠤ ᠂ ᠣᠶ᠋ᠢᠷᠠᠳᠴᠤ ᠢᠷᠡᠬᠦ ᠪᠠᠷ ᠨᠢ ᠦᠨᠦᠷ ᠢᠶ᠋ᠡᠷ ᠨᠢ ᠲᠠᠨᠢᠵᠤ ᠂ ᠲᠡᠭᠦᠨ ᠵᠦᠭ ᠢᠶ᠋ᠡᠨ ᠥᠨᠳᠡᠯᠵᠡᠳᠡᠭ ᠶᠤᠮ᠃ ᠪᠤᠨᠳᠤᠭᠤᠷ ᠴᠤ᠌ ᠠᠪᠠᠭᠠ ᠳ᠋ᠠᠭᠠᠨ ᠬᠠᠶ᠋ᠢᠷᠠᠲᠠᠢ᠃ ᠨᠢᠭᠡ ᠤᠳᠠᠭᠠ ᠠᠪᠠᠭᠠ ᠨᠢ ᠬᠠᠯᠠᠭᠤᠨ ᠤᠰᠤᠨ ᠳ᠋ᠤ᠌ ᠭᠠᠷ ᠢᠶ᠋ᠠᠨ ᠬᠠᠯᠠᠭᠠᠭᠰᠠᠨ ᠳ᠋ᠤ᠌ ᠡᠯᠢᠭᠡ ᠨᠢ ᠡᠮᠲᠡᠷᠡᠵᠤ ᠂ ᠬᠡᠦᠬᠡᠳ ᠦᠨ ᠴᠠᠶ᠋ᠢᠯᠭᠠᠨ ᠰᠡᠳᠬᠢᠯᠭᠡ ᠪᠡᠷ 《 ᠠᠪᠠᠭᠠ ᠳ᠋ᠠᠭᠠᠨ ᠪᠢ ᠨᠢᠭᠡ ᠨᠢᠳᠦ ᠪᠡᠨ ᠥᠭᠭᠦᠨᠡ ! 》 ᠬᠡᠵᠤ ᠳᠠᠭᠤ ᠲᠠᠯᠪᠢᠨ ᠤᠬᠢᠯᠠᠭᠰᠠᠨ ᠪᠠᠶ᠋ᠢᠪᠠ᠁
ᠪᠤᠨᠳᠤᠭᠤᠷ ᠨᠢ ᠲᠥᠪᠡᠳ ᠲᠤ᠌ ᠡᠮᠨᠡᠯᠭᠡ ᠶ᠋ᠢᠨ ᠤᠬᠠᠭᠠᠨ ᠤ ᠰᠤᠳᠤᠯᠬᠤ ᠰᠤᠷᠤᠭᠴᠢ ᠪᠤᠯᠵᠤ ᠬᠣᠶᠠᠷ ᠬᠤᠭᠤᠴᠠᠭᠠ ᠬᠠᠷᠢᠵᠤ ᠢᠷᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠪᠢᠯᠢᠭᠲᠦ ᠶ᠋ᠢᠨ ᠰᠡᠳᠬᠢᠯ ᠳ᠋ᠦ᠍ ᠤᠶ᠋ᠢᠳᠬᠠᠷ ᠤᠨ ᠮᠠᠨᠠᠨ ᠪᠦᠷᠬᠦᠵᠦ ᠠᠬᠠ ᠪᠡᠷᠭᠡᠨ ᠳ᠋ᠦ᠍ ᠪᠡᠨ ᠬᠣᠭᠣᠯᠠ ᠴᠠᠢ ᠬᠢᠬᠦ ᠪᠡᠨ ᠣᠰᠣᠯᠳᠠᠬᠤ ᠪᠤᠯᠵᠤ ᠢᠳᠡᠰᠢ ᠤᠤᠭᠤᠰᠢ ᠠ᠋ᠴᠠ ᠭᠠᠷᠬᠤ ᠬᠡᠮᠵᠢᠶᠡᠨ ᠳ᠋ᠦ᠍ ᠬᠦᠷᠴᠡᠢ᠃ ᠪᠤᠳᠤᠯ ᠵᠡᠭᠦᠳᠦᠨ ᠳ᠋ᠦ᠍ ᠨᠢ ᠴᠡᠷᠢᠭ ᠲᠦ᠍ ᠪᠠᠶ᠋ᠢᠬᠤ ᠦᠶᠡ ᠶ᠋ᠢᠨ ᠬᠢᠨᠢ ᠲᠥᠪᠡᠳ ᠦᠨ ᠪᠤᠳᠠᠯᠠᠩ ᠣᠷᠳᠣᠨ ᠪᠣᠯᠤᠨ ᠥᠩᠭᠡᠲᠦ ᠲᠠᠷᠴᠤᠭ ᠨᠠᠮᠢᠷᠠᠭᠰᠠᠨ ᠴᠠᠰᠤᠲᠤ ᠥᠨᠳᠥᠷ ᠠᠭᠤᠯᠠᠰ ᠬᠠᠷᠠᠭᠳᠠᠨᠠ᠃ ᠡᠨᠡᠬᠦ ᠡᠭᠦᠯᠡᠨ ᠳ᠋ᠦ᠍ ᠰᠢᠷᠭᠤᠭᠰᠠᠨ ᠠᠰᠬᠠ ᠬᠠᠳᠠᠨ ᠳ᠋ᠤ᠌ ᠪᠤᠨᠳᠤᠭᠤᠷ ᠨᠢ ᠲᠡᠭᠦᠨ ᠦ ᠨᠢᠳᠦ ᠶ᠋ᠢ ᠵᠠᠰᠠᠬᠤ 《 ᠡᠷᠳᠡᠨᠢ 》 ᠤᠯᠬᠤ ᠪᠠᠷ ᠮᠠᠴᠤᠵᠤ ᠪᠠᠶ᠋ᠢᠬᠤ ᠪᠠᠷ ᠵᠡᠭᠦᠳᠦᠯᠡᠨᠡ᠃ ᠲᠡᠭᠡᠬᠦ ᠪᠣᠯᠭᠠᠨ ᠳ᠋ᠠᠭᠠᠨ ᠰᠣᠴᠢᠨ ᠰᠡᠷᠢᠭᠡᠳ ᠡᠳᠦᠷ ᠰᠥᠨᠢ ᠶ᠋ᠢ ᠢᠯᠭᠠᠬᠤ ᠪᠠᠷ ᠭᠠᠳᠠᠭᠰᠢ ᠰᠣᠨᠣᠷ ᠴᠢᠩᠨᠠᠨᠠ᠃ ᠲᠡᠷᠡ ᠵᠠᠯᠠᠭᠤ ᠨᠠᠰᠤ ᠪᠠᠨ ᠳᠤᠷᠠᠰᠤᠭᠠᠳ ᠬᠠᠮᠠᠷ ᠪᠤᠷᠭᠢᠬᠤ ᠳ᠋ᠤ᠌ ᠪᠠᠨ ᠪᠠᠶ᠋ᠢᠯᠳᠤᠭᠴᠢᠳ ᠤᠨ ᠬᠢᠨᠢ ᠄ 《 ᠰᠠᠪᠠᠭᠠ ᠦᠭᠡᠢ ᠤᠴᠢᠷ ᠲᠤ᠌ ᠰᠠᠷᠮᠠᠭᠴᠢᠵᠤ ᠠᠮᠢ ᠴᠥᠯᠡᠨ ᠭᠠᠯ ᠵᠦᠭ ᠢᠶ᠋ᠡᠨ ᠳᠠᠭᠠᠷᠢᠭᠠᠳ ᠂ ᠶᠣᠰᠣᠲᠠᠢ ᠦᠬᠡᠷ ᠲᠡᠨᠡᠭ ! 》 ᠬᠡᠵᠤ ᠥᠪᠡᠷ ᠢ ᠨᠢ ᠪᠤᠷᠤᠭᠤᠳᠬᠠᠵᠤ ᠪᠠᠶ᠋ᠢᠭᠰᠠᠨ ᠢ ᠪᠤᠳᠤᠵᠤ ᠬᠥᠮᠦᠨ ᠦ ᠠᠮᠢᠳᠤᠷᠠᠯ ᠳ᠋ᠤ᠌ ᠨᠢᠭᠦᠯ ᠪᠤᠶᠠᠨ ᠵᠡᠷᠭᠡᠴᠡᠨ ᠪᠠᠶ᠋ᠢᠳᠠᠭ ᠢ ᠲᠤᠩᠭᠠᠨᠠ᠃ ᠲᠡᠷᠡ ᠨᠠᠮ ᠵᠢᠮ ᠦᠨ ᠳᠤᠮᠳᠠ ᠠ᠋ᠴᠠ ᠪᠣᠨᠲᠣᠭᠣᠷ ᠤᠨ ᠢᠶ᠋ᠠᠨ ᠬᠥᠯ ᠦᠨ ᠴᠢᠮᠡᠭᠡ ᠶ᠋ᠢ ᠭᠣᠷᠢᠳᠠᠨ ᠂ ᠵᠢᠷᠦᠬᠡ ᠰᠡᠳᠬᠢᠯ ᠳ᠋ᠦ᠍ ᠨᠢ ᠭᠦᠨ ᠰᠢᠩᠭᠡᠭᠰᠡᠨ ᠡᠩᠬᠦᠷᠡᠢ ᠦᠨᠦᠷ ᠢ ᠨᠢ ᠡᠷᠢᠨᠡ ᠃
ᠨᠢᠭᠡ ᠡᠳᠦᠷ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠶ᠋ᠢᠭᠠ ᠶᠡᠬᠡ ᠠᠴᠢ ᠨᠢ ᠶᠠᠭᠠᠷᠠᠤᠬᠠᠨ ᠬᠠᠷᠢᠵᠤ ᠢᠷᠡᠭᠡᠳ ᠠᠪᠤ ᠡᠵᠢ ᠲᠡᠢ ᠪᠡᠨ ᠤᠴᠢᠷ ᠵᠥᠪᠳᠡᠭᠰᠡᠨ ᠢᠶ᠋ᠠᠨ ᠰᠢᠭᠤᠳ ᠯᠠ ᠠᠪᠠᠭᠠ ᠶ᠋ᠢᠨ ᠢᠶ᠋ᠠᠨ ᠭᠡᠷ ᠲᠦ᠍ ᠣᠷᠣᠵᠤ ᠄
— ᠠᠪᠠᠭᠠ ᠠ᠋ ᠂ ᠪᠢᠳᠡ ᠬᠣᠶᠠᠷ ᠲᠥᠪᠡᠳ ᠥᠭᠡᠳᠡ ᠨᠢᠰᠬᠦ ᠴᠢᠬᠤᠯᠠ ᠲᠠᠢ ᠪᠣᠯᠤᠯᠠ᠃ ᠬᠤᠪᠴᠠᠰᠤ ᠬᠤᠨᠠᠷ ᠢ ᠴᠢᠨᠢ ᠬᠠᠯᠠᠵᠤ ᠥᠭᠭᠦᠶᠡ ᠭᠡᠳ ᠶᠠᠭᠠᠷᠠᠵᠤ ᠡᠬᠢᠯᠡᠪᠡ᠃ ᠵᠡᠭᠦᠳᠦ ᠵᠥᠩ ᠢᠶ᠋ᠠᠨ ᠰᠡᠵᠢᠭᠯᠡᠭᠰᠡᠨ ᠠᠪᠠᠭᠠ ᠨᠢ᠄
— ᠪᠤᠨᠳᠤᠭᠤᠷ ᠮᠢᠨᠢ ᠵᠦᠭᠡᠷ ᠪᠢᠵᠡ ? ᠭᠡᠳ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠡᠪᠡ᠃
— ᠪᠤᠨᠳᠤᠭᠤᠷ ᠴᠢᠨᠢ ᠵᠦᠭᠡᠷ ᠡ ᠭᠡᠳ ᠶᠡᠬᠡ ᠠᠴᠢ ᠨᠢ ᠣᠯᠠᠨ ᠦᠭᠡ ᠶᠠᠷᠢᠭᠰᠠᠨ ᠥᠬᠡᠢ ᠲᠡᠭᠦᠨ ᠢ ᠲᠡᠷᠭᠡᠨ ᠳ᠋ᠡᠭᠡᠨ ᠰᠠᠭᠤᠯᠭᠠᠭᠠᠳ ᠮᠣᠷᠳᠠᠬᠤ ᠳ᠋ᠤ᠌ ᠠᠬᠠ ᠪᠡᠷᠭᠡᠨ ᠨᠢ ᠲᠡᠳᠡᠨ ᠦ ᠠᠷᠤ ᠠ᠋ᠴᠠ ᠨᠢ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠵᠤ ᠪᠠᠶ᠋ᠢᠪᠠ᠃
ᠬᠣᠶᠠᠭᠤᠯᠠ ᠠᠶ᠋ᠢᠮᠠᠭ ᠲᠤ᠌ ᠬᠦᠷᠴᠦ ᠨᠢᠰᠬᠡᠯ ᠳ᠋ᠦ᠍ ᠭᠠᠷᠤᠭᠰᠠᠨ ᠪᠢᠯᠢᠭᠲᠦ 《 ᠡᠨᠡ ᠬᠦᠦ ᠨᠠᠮᠠ ᠶ᠋ᠢ ᠬᠤᠳᠠᠯ ᠬᠡᠯᠡᠵᠦ ᠪᠠᠶ᠋ᠢᠨᠠ ᠳ᠋ᠠ ᠂ ᠪᠤᠨᠳᠤᠭᠤᠷ ᠮᠢᠨᠢ ᠮᠠᠭᠠᠳ ᠤᠴᠢᠷ ᠭᠠᠷᠤᠭᠰᠠᠨ ᠁ 》 ᠬᠡᠵᠤ ᠳᠣᠲᠣᠷᠠ ᠨᠢ ᠬᠠᠷᠠᠩᠭᠤᠶ᠋ᠢᠯᠠᠵᠤ ᠠᠴᠢ ᠬᠦᠦ ᠠ᠋ᠴᠠ ᠪᠠᠨ 《 ᠪᠤᠨᠳᠤᠭᠤᠷ ᠮᠢᠨᠢ ᠵᠦᠭᠡᠷ ᠪᠢᠵᠡ ? 》 ᠬᠡᠵᠤ ᠪᠠᠶ᠋ᠢᠨ ᠪᠠᠶ᠋ᠢᠨ ᠠᠰᠠᠭᠤᠵᠤ ᠯᠠ ᠪᠠᠶ᠋ᠢᠯᠠ᠃ ᠳᠡᠳᠡ ᠨᠢᠰᠬᠡᠯ ᠡᠴᠡ ᠪᠠᠭᠤᠨ ᠲᠣᠭᠲᠠᠭᠰᠠᠨ ᠭᠠᠵᠠᠷ ᠢᠶ᠋ᠠᠨ ᠬᠦᠷᠬᠦ ᠳ᠋ᠦ᠍ ᠪᠢᠯᠢᠭᠲᠦ ᠦᠪᠡᠷ ᠤᠨ ᠰᠠᠷᠠᠯ ᠢᠶ᠋ᠠᠷ ᠢᠶ᠋ᠠᠨ ᠡᠮᠨᠡᠯᠭᠡ ᠪᠣᠯᠬᠤ ᠶ᠋ᠢ ᠮᠡᠳᠡᠷᠡᠵᠦ ᠪᠠᠶ᠋ᠢᠲᠠᠯᠠ ᠲᠥᠪᠡᠳ ᠬᠡᠯᠡ ᠲᠡᠢ ᠨᠢᠭᠡ ᠪᠦᠰᠡᠭᠦᠢ ᠲᠡᠷᠡ ᠬᠣᠶᠠᠷ ᠲᠠᠢ ᠮᠡᠨᠳᠦᠯᠡᠨ ᠄
— ᠠᠯᠢ ᠨᠢ ᠪᠤᠨᠳᠤᠭᠤᠷ ᠤᠨ ᠠᠪᠠᠭᠠ ᠨᠢ ᠪᠤᠢ ? ᠬᠡᠵᠤ ᠲᠠᠨᠢᠯᠴᠠᠭᠠᠳ ᠪᠢᠯᠢᠭᠲᠦ ᠳ᠋ᠤ᠌ ᠭᠦᠨ ᠶᠣᠰᠣ ᠬᠢᠵᠦ ᠬᠠᠳᠠᠭ ᠲᠡᠳᠡᠨ ᠵᠣᠯᠭᠠᠯᠠ ᠃ ᠲᠡᠷᠡ ᠪᠦᠰᠡᠭᠦᠢ ᠶ᠋ᠢᠨ ᠳᠠᠭᠤ ᠬᠡᠳᠦᠨ ᠬᠤᠪᠢ ᠶ᠋ᠢᠨ ᠤᠶᠠᠷᠠᠩᠭᠤᠢ ᠰᠣᠨᠣᠰᠳᠠᠭᠰᠠᠨ ᠳ᠋ᠤ᠌ ᠪᠢᠯᠢᠭᠲᠦ ᠪᠤᠳᠤᠯ ᠤᠯᠠᠮ ᠬᠥᠨᠲᠥᠷᠦᠨ 《 ᠪᠤᠨᠳᠤᠭᠤᠷ ᠮᠢᠨᠢ ᠶᠠᠭᠠᠬᠢᠭᠰᠠᠨ ᠪᠤᠯ ? ᠶᠠᠮᠠᠷ ᠬᠡᠷᠡᠭ ᠭᠠᠷᠴᠢᠬᠠᠭᠰᠠᠨ ᠪᠤᠯ ? 》 ᠬᠡᠵᠤ ᠵᠢᠷᠦᠬᠡ ᠳᠥᠭᠰᠢᠭᠰᠡᠭᠡᠷ ᠠᠴᠢ ᠬᠦᠦ ᠪᠡᠷ ᠢᠶ᠋ᠡᠨ ᠵᠠᠮᠴᠢᠯᠠᠭᠤᠯᠤᠨ ᠨᠢᠭᠡ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠯᠠ᠃ ᠲᠡᠭᠡᠵᠦ ᠡᠯᠳᠡᠪ ᠢ ᠪᠣᠳᠣᠨ ᠰᠠᠭᠤᠵᠤ ᠪᠠᠶ᠋ᠢᠲᠠᠯᠠ ᠪᠠᠷᠭᠢᠯ ᠬᠣᠭᠣᠯᠠᠢ ᠲᠠᠢ ᠨᠢᠭᠡ ᠬᠥᠮᠦᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠭᠡᠳ ᠠᠴᠢ ᠬᠦᠦ ᠲᠡᠢ ᠨᠢ ᠲᠠᠨᠢᠯᠴᠠᠵᠤ ᠨᠢᠲᠤ ᠰᠤᠯᠢᠬᠤ ᠮᠡᠰᠡ ᠵᠠᠰᠠᠯ ᠤᠨ ᠭᠡᠷᠡ ᠪᠢᠴᠢᠭ ᠲᠦ᠍ ᠭᠠᠷ ᠤᠨ ᠦᠰᠦᠭ ᠵᠢᠷᠤᠬᠤ ᠲᠤᠬᠠᠢ ᠶᠠᠷᠢᠶᠠ ᠪᠣᠯᠵᠤ ᠡᠬᠢᠯᠡᠪᠡ᠃ ᠡᠭᠦᠨ ᠢ ᠰᠣᠨᠣᠰᠤᠮᠠᠭᠴᠠ ᠪᠢᠯᠢᠭᠲᠦ ᠶ᠋ᠢᠨ ᠳᠣᠲᠣᠷᠠ ᠨᠢᠭᠡᠯᠡ ᠬᠠᠷᠠᠯᠠᠵᠤ ᠄
— ᠪᠤᠨᠳᠤᠭᠤᠷ ᠮᠢᠨᠢ ᠠ᠋ ᠭᠡᠳ ᠳᠠᠭᠤ ᠲᠠᠯᠪᠢᠨ ᠤᠬᠢᠯᠠᠯᠠ ! ᠠᠴᠢ ᠬᠦᠦ ᠪᠣᠯᠤᠨ ᠡᠮᠴᠢ ᠰᠤᠪᠢᠯᠠᠭᠴᠢ ᠰᠠᠨᠳᠤᠷᠤᠨ ᠲᠡᠭᠦᠨ ᠢ ᠠᠷᠭᠠᠳᠠᠵᠤ ᠪᠠᠶ᠋ᠢᠲᠠᠯᠠ ᠨᠢᠰᠬᠡᠯ ᠦᠨ ᠪᠠᠭᠤᠳᠠᠯ ᠳ᠋ᠤ᠌ ᠠᠬᠠ ᠪᠣᠯᠤᠨ ᠠᠪᠠᠭᠠ ᠪᠠᠨ ᠲᠤᠰᠬᠤ ᠪᠠᠷ ᠵᠠᠮ ᠵᠥᠷᠢᠭᠰᠡᠨ ᠪᠣᠨᠲᠣᠭᠣᠷ ᠨᠢ ᠲᠥᠪᠯᠡᠭᠦᠨ ᠭᠡᠭᠴᠢ ᠲᠥᠪᠡᠳ ᠵᠠᠯᠠᠭᠤ ᠲᠠᠢ ᠬᠠᠮᠲᠤ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠵᠤ ᠢᠷᠡᠯᠡ᠃ ᠪᠤᠨᠳᠤᠭᠤᠷ ᠠᠬᠠ ᠲᠠᠢ ᠪᠠᠨ ᠦᠭᠡ ᠴᠦ᠍ ᠰᠣᠯᠢᠵᠤ ᠠᠮᠵᠢᠯ ᠦᠭᠡᠢ ᠤᠬᠢᠯᠠᠵᠤ ᠪᠠᠶ᠋ᠢᠭᠠ ᠠᠪᠠᠭᠠ ᠪᠠᠨ ᠲᠡᠪᠡᠷᠢᠨ ᠄
— ᠠᠪᠠᠭᠠ ᠠ᠋ ᠂ ᠪᠢ ᠡᠨᠳᠡ ᠪᠠᠶ᠋ᠢᠨᠠ ᠂ ᠪᠢ ᠡᠨᠳᠡ ᠪᠠᠶ᠋ᠢᠨᠠ ᠰᠢᠦ ! ᠭᠡᠵᠦ ᠨᠢᠯᠪᠤᠰᠤ ᠤᠨᠠᠭᠠᠭᠰᠠᠨ ᠢᠶ᠋ᠠᠨ᠄
— ᠬᠣᠷᠢᠨ ᠵᠢᠯ ᠦᠨ ᠡᠮᠦᠨᠡ ᠲᠠ ᠭᠠᠯ ᠤᠨ ᠠᠶᠤᠯ ᠠ᠋ᠴᠠ ᠨᠢᠭᠡ ᠲᠥᠪᠡᠳ ᠬᠡᠦᠬᠡᠳ ᠢ ᠠᠪᠤᠷᠠᠭᠰᠠᠨ ᠪᠢᠰᠢ ᠤᠤ ? ᠲᠡᠷᠡ ᠬᠦᠦ ᠴᠢᠨᠢ ᠨᠠᠳᠠ ᠲᠠᠢ ᠬᠠᠮᠲᠤ ᠰᠤᠳᠤᠯᠬᠤ ᠰᠤᠷᠤᠭᠴᠢ ᠪᠣᠯᠴᠢᠬᠠᠭᠰᠠᠨ᠃ ᠣᠳᠣ ᠲᠡᠭᠦᠨ ᠦ ᠠᠪᠤ ᠨᠢ ᠠᠭᠤᠰᠬᠢᠨ ᠥᠮᠡᠨ ᠦ ᠰᠡᠭᠦᠯᠴᠢ ᠶ᠋ᠢᠨ ᠬᠤᠭᠤᠴᠠᠭᠠ ᠪᠤᠯᠵᠤ ᠬᠡᠷᠡᠭᠴᠡᠭᠡ ᠲᠡᠢ ᠡᠷᠬᠡᠲᠡᠨ ᠢᠶ᠋ᠡᠨ ᠪᠤᠶᠠᠨ ᠤ ᠦᠢᠯᠡᠰ ᠲᠦ᠍ ᠡᠷᠭᠦᠬᠦ ᠪᠡᠷ ᠪᠣᠯᠵᠤ ᠠᠮᠢᠰᠬᠤᠯ ᠬᠤᠷᠢᠶᠠᠬᠤ ᠠ᠋ᠴᠠ ᠪᠠᠨ ᠡᠮᠦᠨᠡ ᠬᠦᠦ ᠶ᠋ᠢ ᠨᠢ ᠠᠪᠤᠷᠠᠭᠰᠠᠨ ᠠᠴᠢᠲᠤ ᠬᠥᠮᠦᠨ ᠪᠣᠯᠬᠣ ᠲᠠᠨ ᠲᠠᠢ ᠠᠭᠤᠯᠵᠠᠵᠤ ᠨᠢᠳᠦ ᠪᠡᠨ ᠬᠠᠨᠳᠢᠪᠯᠠᠬᠤ ᠪᠠᠷ ᠲᠠᠨ ᠢ ᠳᠠᠭᠤᠳᠠᠭᠰᠠᠨ ᠶᠤᠮ ᠭᠡᠪᠡ᠃
ᠠᠪᠠᠭᠠ ᠶ᠋ᠢ ᠨᠢ ᠢᠷᠡᠬᠦ ᠪᠠᠷ ᠬᠠᠳᠠᠭ ᠲᠠᠢ ᠵᠣᠯᠭᠠᠭᠰᠠᠨ ᠲᠥᠪᠡᠳ ᠪᠦᠰᠡᠭᠦᠢ ᠪᠣᠨᠲᠣᠭᠣᠷ ᠲᠠᠢ ᠬᠠᠮᠲᠤ ᠤᠷᠤᠵᠤ ᠢᠷᠡᠭᠰᠡᠨ ᠵᠠᠯᠠᠭᠤ ᠶ᠋ᠢᠨ ᠵᠦᠭ᠄
— ᠮᠢᠨᠦ ᠬᠦᠦ ᠂ ᠪᠤᠷᠬᠠᠨ ᠰᠡᠳᠬᠢᠯ ᠲᠡᠢ ᠠᠴᠢᠲᠤ ᠬᠥᠮᠦᠨ ᠳ᠋ᠡᠭᠡᠨ ᠶᠣᠰᠣᠯᠠᠨ ᠮᠥᠷᠭᠥ ! ᠬᠡᠵᠤ ᠨᠢᠯᠪᠤᠰᠤ ᠪᠠᠨ ᠰᠡᠮ ᠰᠡᠮ ᠠᠷᠴᠢᠵᠤ ᠪᠠᠶ᠋ᠢᠪᠠ᠃ ᠨᠠᠷᠢᠨ ᠤᠴᠢᠷ ᠢ ᠣᠶ᠋ᠢᠯᠠᠭᠠᠭᠰᠠᠨ ᠥᠷᠥᠭᠡᠨ ᠳ᠋ᠦ᠍ ᠪᠠᠶ᠋ᠢᠭᠠ ᠡᠮᠴᠢ ᠰᠤᠪᠢᠯᠠᠭᠴᠢ ᠶ᠋ᠢᠨ ᠰᠡᠳᠬᠢᠯ ᠨᠢ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠬᠥᠳᠡᠯᠵᠦ ᠲᠤᠩᠭᠠᠯᠠᠭ ᠠᠯᠠᠭ ᠮᠡᠯᠮᠡᠢ ᠳ᠋ᠤ᠌ ᠨᠢ ᠬᠠᠶ᠋ᠢᠷᠠ ᠶ᠋ᠢᠨ ᠵᠠᠶ᠋ᠢᠷ ᠮᠡᠯᠲᠡᠭᠡᠨᠡᠪᠡ᠃
ᠡᠨᠡ ᠦᠶᠡ ᠳ᠋ᠦ᠍ ᠠᠪᠠᠭᠠ ᠶ᠋ᠢᠨ ᠬᠢᠨᠢ ᠰᠡᠳᠬᠢᠯ ᠳ᠋ᠦ᠍ ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠬᠤᠪᠢᠯᠭᠠᠨ ᠭᠡᠷᠡᠯ ᠰᠠᠴᠤᠷᠠᠨ ᠬᠠᠷᠠᠭᠳᠠᠭᠰᠠᠨ ᠰᠢᠭ᠋ ᠪᠣᠯᠵᠤ ᠬᠥᠮᠦᠨ ᠡᠷᠳᠡᠨᠢ ᠪᠤᠯᠤᠭᠰᠠᠨ ᠠᠴᠢ ᠬᠦᠦ ᠶ᠋ᠢᠨ ᠢᠶ᠋ᠡᠨ ᠠᠮᠢᠳᠤ ᠮᠡᠨᠳᠦᠬᠡᠨ ᠪᠠᠶ᠋ᠢᠭᠠ ᠶ᠋ᠢ ᠳᠠᠭᠤ ᠦᠨᠦᠷ ᠢᠶ᠋ᠡᠷ ᠨᠢ ᠮᠡᠳᠡᠷᠡᠵᠦ ᠰᠡᠳᠬᠢᠯ ᠳᠣᠭᠳᠣᠯᠬᠤ ᠳ᠋ᠤ᠌ ᠪᠠᠨ ᠬᠦᠵᠦᠭᠦᠨ ᠳᠡᠭᠡᠷᠡᠬᠢ ᠬᠥᠭᠡᠷᠦᠬᠦᠨ ᠪᠤᠷᠤ ᠮᠡᠩᠭᠡ ᠶ᠋ᠢ ᠨᠢ ᠵᠥᠭᠡᠯᠡᠨ ᠵᠥᠭᠡᠯᠡᠨ ᠲᠡᠮᠲᠡᠷᠢᠭᠡᠳ ᠤᠬᠢᠯᠠᠵᠤ ᠯᠡ ᠪᠠᠶ᠋ᠢᠯᠠ ᠁
ᠠᠩᠬᠠ ᠳᠤᠮᠳᠠᠳᠤ ᠶ᠋ᠢᠨ ᠡᠪᠦᠯ ᠤᠨ ᠠᠮᠠᠷᠠᠯᠲᠠ ᠶ᠋ᠢᠨ < ᠠᠮᠲᠠᠷᠬᠠᠨ ᠤᠩᠰᠢᠬᠤᠢ > ᠡᠴᠡ ᠬᠠᠭᠤᠯᠤᠨ ᠪᠢᠴᠢᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠴᠤᠯᠮᠤᠨᠲᠤᠶᠠᠭᠠ
ᠬᠢᠨᠠᠭ᠍ᠴᠢ᠄ ᠳᠠᠪᠰᠢᠯᠲᠤ᠂ ᠲᠤᠭ᠍ᠴᠢ ᠰᠠᠷᠠᠨᠠ