ᠴᠠᠬᠠᠷ ᠨᠠᠢ᠍ᠮᠠᠨ ᠬᠣᠰᠢᠭᠤЦахар найман хошуу
425ᠴᠠᠬᠠᠷ ᠨᠠᠢ᠍ᠮᠠᠨ ᠬᠣᠰᠢᠭᠤ
ᠬᠦᠷᠳᠦ ᠬᠡᠶ᠋ᠢᠰᠦᠮᠡᠷ ᠰᠠᠯᠬᠢᠨ ᠠ᠋
ᠬᠥᠪᠴᠢ ᠲᠡᠰᠦᠷᠡᠮᠡᠷ ᠬᠦᠢᠲᠡᠨ ᠠ᠋
ᠬᠦᠴᠦᠷᠬᠡᠭ ᠡᠵᠡᠨ ᠦ᠌ ᠬᠦᠨᠳᠦ ᠵᠠᠷᠯᠢᠭ ᠢ᠋ᠶ᠋ᠠᠷ
ᠬᠡᠳᠦ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠮᠣᠷᠳᠠᠨᠠ ᠳ᠋ᠠ
ᠨᠤᠮᠤ ᠭᠠᠵᠢᠮᠠᠷ ᠨᠣᠶ᠋ᠢᠲᠠᠨ ᠠ᠋
ᠨᠣᠭᠲᠣ ᠴᠠᠩᠲᠤᠮᠠᠷ ᠬᠦᠢᠲᠡᠨ ᠠ᠋
ᠨᠣᠶᠠᠨ ᠤ᠋ ᠵᠠᠷᠯᠢᠭ ᠬᠠᠲᠠᠭᠤ ᠪᠠᠢᠨᠠ
ᠨᠤᠲᠤᠭ ᠠ᠋ᠴᠠ ᠪᠠᠨ ᠰᠠᠯᠵᠤ ᠮᠣᠷᠳᠠᠨᠠ ᠳ᠋ᠠ
ᠠᠷᠠᠰᠤᠨ ᠰᠠᠭᠠᠳᠠᠭ ᠢ᠋ ᠮᠢᠨᠢ ᠪᠠᠷᠢᠭᠠᠳ
ᠠᠯᠢᠶᠠ ᠦᠷᠡ ᠮᠢᠨᠢ ᠢᠨᠢᠶᠡᠨᠡ ᠳ᠋ᠠ
ᠠᠯᠤᠰ ᠲᠤ᠌ ᠮᠣᠷᠳᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠠᠪᠠ ᠳ᠋ᠤ᠌ ᠭᠠᠷᠬᠤ ᠭᠡᠵᠦ ᠪᠠᠶᠠᠷᠯᠠᠨᠠ ᠃
ᠬᠦᠳᠡᠷ ᠬᠤᠶᠠᠭ ᠢ᠋ᠶ᠋ᠠᠨ ᠡᠮᠦᠰᠬᠦ ᠳ᠋ᠦ᠍
ᠬᠥᠭᠰᠢᠨ ᠡᠵᠢ ᠮᠢᠨᠢ ᠤᠶᠠᠷᠠᠨᠠ
ᠬᠥᠳᠡᠭᠡ ᠨᠤᠲᠤᠭ ᠠ᠋ᠴᠠ ᠪᠠᠨ ᠰᠠᠯᠤᠭᠠᠳ ᠶᠠᠪᠤᠪᠠᠯ
ᠬᠦᠦ ᠮᠢᠨᠢ ᠬᠡᠵᠢᠶᠡ ᠪᠤᠴᠠᠶᠠ ᠳ᠋ᠠ ᠃
ᠠᠭᠲᠠ ᠬᠦᠯᠦᠭ ᠲᠡᠭᠡᠨ ᠮᠣᠷᠳᠠᠬᠤ ᠳ᠋ᠤ᠌
ᠠᠮᠠᠷᠠᠭ ᠬᠣᠩᠭᠣᠷ ᠮᠢᠨᠢ ᠭᠤᠲᠤᠷᠠᠨᠠ
ᠠᠷᠤ ᠳᠡᠨᠵᠢᠨ ᠳᠡᠭᠡᠷᠡ ᠭᠠᠭᠴᠠᠭᠠᠷ ᠬᠣᠴᠣᠷᠴᠤ
ᠠᠯᠴᠢᠭᠤᠷ ᠵᠠᠨ ᠳᠠᠯᠠᠯᠵᠤ ᠵᠣᠭᠰᠣᠨᠠ
ᠥᠨᠳᠥᠷ ᠰᠠᠷᠠᠯ ᠮᠣᠷᠢ ᠮᠢᠨᠢ
ᠦᠦᠷᠰᠡᠨ ᠦᠦᠷᠰᠡᠨ ᠢᠨᠴᠠᠭᠠᠨᠠ
ᠥᠪᠡᠷᠦᠨ ᠤᠨᠠᠭᠠ ᠠ᠋ᠴᠠ ᠪᠠᠨ ᠰᠠᠯᠵᠤ
ᠡᠵᠡᠨ ᠦ᠌ ᠴᠡᠷᠢᠭ ᠲᠦ᠍ ᠮᠣᠷᠳᠠᠨᠠ ᠃
ᠵᠠᠬᠠ ᠬᠢᠵᠠᠭᠠᠷ ᠤ᠋ᠨ ᠭᠠᠵᠠᠷ
ᠵᠠᠬᠢᠳᠠᠯ ᠴᠢᠮᠡᠭᠡ ᠨᠡᠪᠲᠡᠷᠡᠬᠦ ᠦᠭᠡᠢ
ᠵᠠᠯᠠᠭᠤ ᠨᠠᠰᠤᠨ ᠤ᠋ ᠠᠯᠲᠠᠨᠯᠢᠩᠬᠤᠠ
ᠵᠠᠭᠤᠢ ᠬᠡᠳᠦᠨ ᠵᠢᠯ ᠬᠦᠯᠢᠶᠡᠯᠡ ᠳ᠋ᠠ ᠃
ᠥᠲᠡᠯᠦᠭᠰᠡᠨ ᠪᠤᠭᠤᠷᠤᠯ ᠡᠵᠢ ᠴᠢᠨᠢ
ᠦᠷᠡ ᠪᠡᠨ ᠰᠠᠨᠠᠮᠠᠨᠵᠢᠨ ᠤᠬᠢᠯᠠᠨᠠ
ᠥᠰᠪᠥᠷᠢ ᠶ᠋ᠢᠨ ᠪᠠᠭᠠ ᠬᠦᠦ ᠴᠢᠨᠢ
ᠥᠪᠡᠷᠦᠨ ᠡᠴᠢᠭᠡ ᠪᠡᠨ ᠠᠰᠠᠭᠤᠨᠠ ᠃
ᠴᠠᠢ ᠪᠠᠨ ᠤᠤᠭᠤᠪᠠᠴᠤ ᠵᠠᠩᠭᠢᠷᠠᠨᠠ
ᠴᠢᠪᠠᠭᠠ ᠪᠠᠨ ᠢᠳᠡᠪᠡᠴᠦ ᠬᠠᠳᠠᠭᠠᠯᠠᠨᠠ
ᠴᠢᠪᠠᠭᠠᠨᠴᠠ ᠪᠤᠭᠤᠷᠤᠯ ᠡᠵᠢ ᠴᠢᠨᠢ
ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠪᠠᠨ ᠳᠤᠷᠠᠰᠤᠨᠠ ᠃
ᠥᠭᠡᠬᠦ ᠪᠡᠨ ᠢᠳᠡᠪᠡᠴᠦ ᠴᠠᠷᠴᠠᠭᠠᠨᠠ
ᠦᠬᠡᠷ ᠢ᠋ᠶ᠋ᠡᠨ ᠠᠯᠠᠪᠠᠴᠤ ᠦᠯᠡᠳᠡᠭᠡᠨᠡ
ᠥᠲᠡᠯᠦᠭᠰᠡᠨ ᠪᠤᠭᠤᠷᠤᠯ ᠡᠵᠢ ᠴᠢᠨᠢ
ᠡᠳᠦᠷ ᠦ᠋ᠨ ᠡᠳᠦᠷ ᠲᠡᠭᠡᠨ ᠬᠦᠯᠢᠶᠡᠨᠡ ᠃
ᠪᠣᠷᠣᠭᠠᠨ ᠣᠷᠣᠪᠠᠯ ᠨᠣᠷᠬᠤ ᠶᠤᠮ ᠦᠦ
ᠪᠤᠳᠠᠩ ᠲᠠᠲᠠᠪᠠᠯ ᠲᠥᠭᠡᠷᠢᠬᠦ ᠶᠦ᠍ᠮ ᠦᠦ
ᠪᠣᠳᠣᠵᠤ ᠰᠠᠨᠠᠬᠤ ᠪᠤᠭᠤᠷᠤᠯ ᠡᠵᠢ ᠴᠢᠨᠢ
ᠪᠤᠷᠬᠠᠨ ᠳ᠋ᠤ᠌ ᠪᠠᠨ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠨᠠ ᠃
ᠰᠠᠯᠬᠢᠨ ᠬᠥᠳᠡᠯᠪᠡᠯ ᠵᠢᠩᠭᠢᠨᠡᠬᠦ ᠶᠦ᠍ᠮ ᠦᠦ
ᠴᠠᠰᠤ ᠰᠢᠭᠤᠷᠪᠠᠯ ᠪᠡᠭᠡᠷᠡᠬᠦ ᠶᠦ᠍ᠮ ᠦᠦ
ᠰᠢᠪᠰᠢᠵᠦ ᠰᠠᠨᠠᠬᠤ ᠬᠥᠭᠰᠢᠨ ᠡᠵᠢ ᠴᠢᠨᠢ
ᠱᠠᠭᠵᠠᠮᠤᠨᠢ ᠪᠤᠷᠬᠠᠨ ᠳ᠋ᠤ᠌ ᠪᠠᠨ ᠳᠠᠭᠠᠳᠬᠠᠨᠠ ᠃
ᠲᠤᠯᠤᠨ ᠨᠠᠭᠤᠷ ᠮᠦᠭᠳᠡᠨ ᠬᠣᠯᠠ ᠪᠠᠢᠨᠠ
ᠳᠣᠯᠣᠭᠠᠨ ᠮᠢᠩᠭᠠᠨ ᠮᠣᠳᠣ ᠪᠠᠢᠨᠠ
ᠳᠣᠲᠣᠨᠣ ᠠᠮᠠᠷᠠᠭ ᠢ᠋ᠶ᠋ᠠᠨ ᠡᠷᠢᠵᠦ ᠣᠴᠢᠬᠤ ᠪᠠᠷ
ᠳᠣᠲᠣᠷᠠ ᠪᠠᠨ ᠪᠣᠳᠣᠭᠠᠳ ᠰᠢᠭᠤᠳᠤᠯᠠ
ᠠᠮᠪᠠᠨ ᠬᠣᠲᠠ(1) ᠴᠠᠬᠠᠷ ᠠ᠋ᠴᠠ ᠬᠣᠯᠠ ᠪᠠᠢᠨᠠ
ᠠᠷᠪᠠᠨ ᠮᠢᠩᠭᠠᠨ ᠮᠣᠳᠣ ᠪᠠᠢᠨᠠ
ᠠᠮᠠᠷᠠᠭ ᠬᠣᠩᠭᠣᠷ ᠢ᠋ᠶ᠋ᠠᠨ ᠡᠷᠢᠵᠦ ᠣᠴᠢᠬᠤ ᠪᠠᠷ
ᠠᠯᠲᠠᠨᠯᠢᠩᠬᠤᠠ ᠰᠢᠭᠤᠳᠤᠯᠠ ᠃
ᠬᠦᠯᠦᠭ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠯᠠ
ᠬᠥᠯᠥᠨ ᠪᠣᠶ᠋ᠢᠷ ᠵᠦᠭ ᠴᠢᠭᠯᠡᠯᠡ
ᠬᠥᠭᠰᠢᠨ ᠡᠵᠢ ᠪᠣᠯᠤᠨ ᠪᠢᠴᠢᠬᠠᠨ ᠬᠦᠦ ᠨᠢ
ᠬᠥᠳᠡᠭᠡ ᠲᠠᠯᠠ ᠳ᠋ᠠᠭᠠᠨ ᠬᠣᠴᠣᠷᠤᠯᠠ ᠃
ᠠᠭᠲᠠ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠯᠠ
ᠠᠮᠪᠠᠨ ᠬᠣᠲᠠ ᠵᠦᠭ ᠴᠢᠭᠯᠡᠯᠡ
ᠠᠯᠲᠠᠨᠯᠢᠩᠬᠤᠠ ᠨᠤᠲᠤᠭ ᠠ᠋ᠴᠠ ᠪᠠᠨ ᠰᠠᠯᠵᠤ
ᠠᠶᠠᠨ ᠵᠠᠮ ᠢ᠋ᠶ᠋ᠠᠨ ᠬᠥᠭᠡᠭᠡᠯᠡ ᠃
ᠲᠠᠭᠠᠷᠠᠭᠰᠠᠨ ᠪᠦᠭᠦᠳᠡ ᠡᠴᠡ ᠠᠰᠠᠭᠤᠬᠤᠯᠠᠷ
ᠲᠠᠨᠢᠳᠠᠭ ᠭᠡᠵᠦ ᠪᠠᠶ᠋ᠢᠳᠠᠭ ᠦᠭᠡᠢ
ᠲᠠᠯᠠ ᠶ᠋ᠢᠨ ᠳᠤᠮᠳᠠ ᠲᠡᠨᠦᠵᠦ ᠶᠠᠪᠤᠳᠠᠭ
ᠠᠯᠲᠠᠨᠯᠢᠩᠬᠤᠠ ᠬᠥᠭᠡᠷᠦᠬᠦᠢ ᠳ᠋ᠠ ᠃
ᠬᠡᠯᠡᠯᠴᠡᠭᠰᠡᠨ ᠪᠦᠭᠦᠳᠡ ᠡᠴᠡ ᠰᠤᠷᠠᠭᠯᠠᠬᠤᠯᠠᠷ
ᠬᠡᠨ ᠠᠯᠢᠨ ᠴᠤ᠌ ᠭᠡᠳ ᠲᠠᠨᠢᠳᠠᠭ ᠦᠭᠡᠢ
ᠬᠡᠭᠡᠷᠡ ᠲᠠᠯᠠ ᠪᠠᠷ ᠬᠡᠰᠦᠵᠦ ᠶᠠᠪᠤᠳᠠᠭ
ᠠᠯᠲᠠᠨᠯᠢᠩᠬᠤᠠ ᠬᠥᠭᠡᠷᠦᠬᠦᠢ ᠳ᠋ᠠ ᠃
ᠬᠦᠯᠦᠭ ᠮᠣᠷᠢ ᠶᠤᠭᠠᠨ ᠠᠯᠳᠠᠴᠢᠬᠠᠯᠠ
ᠬᠥᠨᠳᠡᠢ ᠲᠠᠯᠠ ᠪᠠᠷ ᠡᠷᠢᠵᠦ ᠶᠠᠪᠤᠨᠠ
ᠬᠥᠮᠦᠨ ᠦ᠌ ᠮᠣᠷᠢ ᠲᠠᠢ ᠨᠡᠶ᠋ᠢᠯᠡᠵᠦ ᠵᠣᠭᠰᠣᠭᠠᠳ
ᠬᠦᠵᠦᠭᠦᠦ ᠪᠡᠨ ᠰᠦᠯᠢᠯᠡᠨ ᠢᠵᠢᠯᠢᠰᠢᠨᠡ ᠃
ᠦᠷᠢᠶᠡ ᠮᠣᠷᠢ ᠶᠤᠭᠠᠨ ᠠᠯᠳᠠᠴᠢᠬᠠᠯᠠ
ᠥᠷᠭᠡᠨ ᠲᠠᠯᠠ ᠪᠠᠷ ᠡᠷᠢᠵᠦ ᠶᠠᠪᠤᠨᠠ
ᠥᠭᠡᠷᠡ ᠬᠥᠮᠦᠨ ᠦ᠌ ᠮᠣᠷᠢ ᠲᠠᠢ ᠨᠡᠶ᠋ᠢᠯᠡᠵᠦ ᠵᠣᠭᠰᠣᠭᠠᠳ
ᠦᠰᠦ ᠪᠡᠨ ᠦᠨᠦᠷᠲᠦᠨ ᠢᠵᠢᠯᠢᠰᠢᠨᠡ ᠃
ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠪᠠᠷᠢᠭᠠᠳ ᠬᠦᠷᠬᠦᠯᠡᠷ
ᠲᠡᠷᠡ ᠴᠦ᠍ ᠮᠣᠷᠢ ᠬᠠᠷᠢᠨ ᠬᠤᠯᠮᠠᠯᠵᠠᠨᠠ
ᠲᠠᠰᠢᠶᠠ ᠳᠡᠭᠡᠷᠡ ᠨᠢ ᠳᠠᠷᠤᠭᠠᠳ ᠲᠠᠯᠪᠢᠭᠰᠠᠨ
ᠲᠠᠮᠠᠭᠠ ᠶ᠋ᠢ ᠨᠢ ᠦᠵᠡᠭᠡᠳ ᠲᠠᠨᠢᠯᠠ ᠳ᠋ᠠ ᠃
ᠠᠰᠲᠠᠭᠠᠨ ᠬᠥᠮᠦᠨ ᠦ᠌ ᠮᠣᠷᠢ ᠪᠢᠰᠢ
ᠠᠮᠠᠷᠠᠭ ᠤ᠋ᠨ ᠮᠢᠨᠢ ᠤᠨᠤᠭᠰᠠᠨ ᠮᠣᠷᠢ ᠪᠠᠶ᠋ᠢᠨᠠ
ᠠᠯᠳᠠᠭᠰᠠᠨ ᠮᠣᠷᠢᠨ ᠤ᠋ ᠪᠠᠨ ᠰᠠᠢᠨ ᠢ᠋ᠶ᠋ᠠᠷ
ᠠᠯᠲᠠᠨᠯᠢᠩᠬᠤᠠ ᠬᠣᠩᠭᠣᠷ ᠲᠠᠢ ᠪᠠᠨ ᠤᠴᠠᠷᠠᠯᠠ ᠃
ᠮᠠᠨᠳᠤᠵᠤ ᠭᠠᠷᠬᠤ ᠨᠠᠷᠠ ᠶ᠋ᠢ
ᠮᠠᠨᠠᠨ ᠪᠤᠳᠠᠩ ᠪᠦᠷᠬᠦᠨᠡ
ᠮᠠᠨ ᠤ᠋ ᠨᠤᠲᠤᠭ ᠴᠠᠬᠠᠷ ᠨᠠᠢ᠍ᠮᠠᠨ ᠬᠣᠰᠢᠭᠤ ᠴᠢᠨᠢ
ᠡᠨᠳᠡ ᠡᠴᠡ ᠬᠡᠳᠦᠢ ᠬᠣᠯᠠ ᠪᠣᠯ ᠳᠠ ᠃
ᠤᠷᠭᠤᠵᠤ ᠭᠠᠷᠬᠤ ᠨᠠᠷᠠᠨ ᠢ᠋
ᠤᠨᠢᠶᠠᠷ ᠬᠦᠳᠡᠩ ᠪᠦᠷᠬᠦᠨᠡ
ᠥᠪᠡᠷ ᠦ᠋ᠨ ᠨᠤᠲᠤᠭ ᠴᠠᠬᠠᠷ ᠨᠠᠢ᠍ᠮᠠᠨ ᠬᠣᠰᠢᠭᠤ ᠴᠢᠨᠢ
ᠡᠨᠳᠡ ᠡᠴᠡ ᠬᠡᠳᠦᠢ ᠬᠣᠯᠠ ᠪᠣᠯ ᠳᠠ ᠃
ᠱᠠᠭᠠᠵᠠᠭᠠᠢ ᠰᠢᠪᠠᠭᠤ ᠪᠣᠯᠤᠭᠠᠰᠠᠢ
ᠱᠠᠭᠰᠢᠵᠤ ᠨᠢᠰᠦᠭᠡᠳ ᠬᠦᠷᠬᠦ ᠦᠭᠡᠢ ᠤᠤ ᠳ᠋ᠠ
ᠱᠠᠭᠠᠵᠠᠭᠠᠢ ᠰᠢᠪᠠᠭᠤ ᠪᠢᠰᠢ ᠲᠤᠯᠠ
ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠠᠭᠠᠨ ᠭᠠᠭᠴᠠᠭᠠᠷ ᠠ᠋ ᠃
ᠡᠯᠢᠶᠡ ᠰᠢᠪᠠᠭᠤ ᠪᠣᠯᠤᠭᠠᠰᠠᠢ
ᠡᠷᠭᠢᠵᠦ ᠨᠢᠰᠦᠭᠡᠳ ᠪᠤᠴᠠᠬᠤ ᠦᠭᠡᠢ ᠤᠤ ᠳ᠋ᠠ
ᠡᠯᠢᠶᠡ ᠰᠢᠪᠠᠭᠤ ᠪᠢᠰᠢ ᠲᠤᠯᠠ
ᠡᠵᠡᠨ ᠦ᠌ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠠ᠋ ᠃
ᠳᠠᠭᠤᠤ ᠶ᠋ᠢ ᠨᠢ ᠰᠣᠨᠣᠰᠬᠤ ᠳ᠋ᠤ᠌ ᠳᠤᠯᠠᠭᠠᠬᠠᠨ ᠠ᠋
ᠳᠦᠷᠰᠦ ᠶ᠋ᠢ ᠨᠢ ᠪᠠᠷᠠᠯᠠᠬᠤ ᠳ᠋ᠤ᠌ ᠬᠠᠯᠠᠭᠤᠬᠠᠨ ᠠ᠋
ᠳᠣᠲᠣᠨᠣ ᠠᠮᠠᠷᠠᠭ ᠢ᠋ᠶ᠋ᠠᠨ ᠡᠷᠢᠭᠰᠡᠭᠡᠷ ᠪᠠᠶ᠋ᠢᠭᠠᠳ
ᠳᠣᠪᠣ ᠶ᠋ᠢᠨ ᠳᠡᠭᠡᠷᠡ ᠠᠭᠤᠯᠵᠠᠯᠠ ᠃
ᠪᠣᠭᠣᠳᠠᠯ ᠬᠡᠶ᠋ᠢᠰᠬᠦ ᠨᠢ ᠪᠣᠳᠠᠲᠠᠢ
ᠪᠣᠯᠪᠠᠷᠬᠠᠨ ᠪᠡᠶᠡ ᠨᠢ ᠡᠪᠲᠡᠢ
ᠪᠣᠳᠣᠵᠤ ᠰᠠᠨᠠᠭᠰᠠᠨ ᠠᠯᠲᠠᠨᠯᠢᠩᠬᠤᠠ ᠲᠠᠢ ᠪᠠᠨ
ᠪᠣᠶ᠋ᠢᠲᠠ ᠭᠠᠵᠠᠷ ᠠᠭᠤᠯᠵᠠᠯᠠ ᠃
ᠠᠩᠴᠢᠨ ᠬᠣᠲᠠ(2) ᠠ᠋ᠴᠠ ᠠᠪᠤᠭᠰᠠᠨ
ᠠᠯᠲᠠᠨ ᠶᠠᠴᠠᠷ(3) ᠬᠣᠣᠰ ᠢ᠋ᠶ᠋ᠠᠷ
ᠠᠪᠤ ᠪᠣᠯᠤᠨ ᠮᠥᠮᠥ ᠬᠣᠶᠠᠷ ᠲᠤ᠌ ᠮᠢᠨᠢ
ᠪᠡᠯᠡᠭ ᠪᠣᠯᠭᠠᠵᠤ ᠥᠭᠭᠦᠭᠡᠷᠡᠢ ᠳ᠋ᠠ ᠃
ᠠᠪᠤ ᠮᠥᠮᠥ ᠮᠢᠨᠢ ᠠᠰᠠᠭᠤᠪᠠᠯ
ᠠᠮᠤᠷ ᠮᠡᠨᠳᠦ ᠪᠠᠶ᠋ᠢᠨᠠ ᠭᠡᠵᠦ ᠬᠡᠯᠡᠵᠦ ᠥᠭ ᠳ᠋ᠠ
ᠠᠯᠪᠠᠨ ᠴᠡᠷᠢᠭ ᠦ᠋ᠨ ᠠᠳᠤᠭᠤ ᠠᠳᠤᠭᠤᠯᠠᠭᠰᠠᠨ
ᠠᠩᠭᠠ ᠦᠷᠡ ᠨᠢ ᠬᠥᠭᠡᠷᠦᠬᠦᠢ ᠳ᠋ᠠ ᠃
ᠮᠦᠭᠳᠡᠨ ᠬᠣᠲᠠ ᠠ᠋ᠴᠠ ᠠᠪᠤᠭᠰᠠᠨ
ᠮᠥᠩᠭᠥᠨ ᠶᠠᠴᠠᠷ ᠬᠣᠣᠰ ᠢ᠋ᠶ᠋ᠠᠷ ᠠ᠋
ᠮᠥᠮᠥ ᠪᠣᠯᠤᠨ ᠠᠪᠤ ᠬᠣᠶᠠᠷ ᠲᠤ᠌ ᠮᠢᠨᠢ
ᠪᠡᠯᠡᠭ ᠪᠣᠯᠭᠠᠵᠤ ᠥᠭᠭᠦᠭᠡᠷᠡᠢ ᠳ᠋ᠠ ᠃
ᠠᠪᠤ ᠮᠥᠮᠥ ᠮᠢᠨᠢ ᠠᠰᠠᠭᠤᠪᠠᠯ
ᠮᠡᠨᠳᠦ ᠰᠠᠢᠨ ᠪᠠᠶ᠋ᠢᠨᠠ ᠭᠡᠵᠦ ᠬᠡᠯᠡᠵᠦ ᠥᠭ ᠳ᠋ᠠ
ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠠᠭᠲᠠ ᠶ᠋ᠢ ᠠᠳᠤᠭᠤᠯᠠᠭᠰᠠᠨ
ᠮᠠᠭᠤ ᠦᠷᠡ ᠨᠢ ᠬᠥᠭᠡᠷᠦᠬᠦᠢ ᠳ᠋ᠠ ᠃
ᠴᠠᠬᠠᠷ ᠯᠢᠭᠳᠡᠨ ᠬᠠᠭᠠᠨ ᠮᠠᠨᠵᠤ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠂ ᠴᠠᠬᠠᠷ ᠠᠷᠠᠳ ᠲᠦᠮᠡᠨ ᠴᠢᠩ ᠤᠯᠤᠰ ᠤ᠋ᠨ ᠳᠠᠷᠤᠯᠠᠯ ᠊ᠢ ᠡᠰᠡᠷᠭᠦᠴᠡᠬᠦ ᠪᠡᠷ1675 ᠣᠨ ᠳ᠋ᠤ᠌ ᠪᠣᠰᠤᠯᠭᠠ ᠭᠠᠷᠭᠠᠭᠰᠠᠨ ᠶᠤᠮ ᠃ ᠴᠢᠩ ᠤᠯᠤᠰ ᠤ᠋ᠨ ᠵᠠᠰᠠᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠴᠠᠬᠠᠷ ᠠᠷᠠᠳ ᠲᠦᠮᠡᠨ ᠦ᠌ ᠲᠤᠰ ᠤᠳᠠᠭᠠ ᠶ᠋ᠢᠨ ᠪᠣᠰᠤᠯᠭᠠ ᠶ᠋ᠢ ᠳᠠᠷᠤᠩᠭᠤᠶ᠋ᠢᠯᠠᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠨ ᠂ ᠪᠠᠰᠠ ᠲᠡᠳᠡᠨᠦᠰ ᠦ᠋ᠨ ᠲᠡᠮᠡᠴᠡᠯ ᠦ᠋ᠨ ᠬᠦᠴᠦᠨ ᠊ᠢ ᠰᠠᠷᠨᠢᠭᠤᠯᠤᠨ ᠪᠤᠲᠠᠷᠠᠭᠤᠯᠬᠤ ᠲᠥᠷᠥ ᠶ᠋ᠢᠨ ᠪᠣᠳᠣᠯᠭᠠ ᠬᠡᠷᠡᠭᠵᠢᠭᠦᠯᠵᠦ ᠂ ᠴᠠᠬᠠᠷ ᠤ᠋ᠨ ᠮᠣᠩᠭᠣᠯᠴᠤᠳ ᠊ᠢ ᠰᠢᠨᠵᠢᠶᠠᠩ ᠮᠣᠵᠢ ᠪᠠ ᠬᠥᠯᠥᠨ ᠪᠣᠶ᠋ᠢᠷ ᠵᠡᠷᠭᠡ ᠬᠢᠯᠢ ᠬᠢᠵᠠᠭᠠᠷ ᠣᠷᠣᠨ ᠳ᠋ᠤ᠌ ᠴᠦᠯᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠪᠠᠶ᠋ᠢᠨᠠ ᠃
ᠲᠤᠰ ᠳᠠᠭᠤᠤ ᠴᠠᠬᠠᠷ ᠤ᠋ᠨ ᠮᠣᠩᠭᠣᠯᠴᠤᠳ ᠴᠢᠩ ᠤᠯᠤᠰ ᠤ᠋ᠨ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠥᠯᠥᠨ ᠪᠣᠶ᠋ᠢᠷ ᠲᠤ᠌ ᠮᠣᠷᠳᠠᠭᠰᠠᠨ ᠲᠡᠦᠬᠡᠨ ᠳᠡᠭᠡᠷᠡᠬᠢ ᠡᠨᠡ ᠭᠤᠨᠢᠭᠲᠤ ᠶᠠᠪᠤᠳᠠᠯ ᠊ᠢ ᠳᠠᠭᠤᠯᠠᠭᠰᠠᠨ ᠪᠠᠶ᠋ᠢᠨᠠ ᠃
ᠲᠠᠶ᠋ᠢᠯᠪᠤᠷᠢ
1. ᠠᠮᠪᠠᠨ ᠬᠣᠲᠠ — ᠣᠳᠣ ᠶ᠋ᠢᠨ ᠬᠠᠶ᠋ᠢᠯᠠᠷ ᠬᠣᠲᠠ
2. ᠠᠩᠴᠢᠨ ᠬᠣᠲᠠ — ᠴᠢᠴᠢᠬᠠᠷ ᠬᠣᠲᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠪᠠᠶ᠋ᠢᠲᠠᠭ ᠨᠢᠭᠡᠨ ᠪᠠᠭᠠ ᠬᠣᠲᠠ ᠂ ᠣᠳᠣ ᠬᠢᠲᠠᠳ ᠢ᠋ᠶ᠋ᠠᠷ ᠠᠩ ᠠᠩ ᠰᠢ ᠭᠡᠵᠦ ᠬᠡᠯᠡᠨᠡ ᠃
3. ᠶᠠᠴᠠᠷ — ᠰᠢᠳᠦᠨ ᠦ᠌ ᠰᠢᠪᠡᠭᠦᠷ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠠᠵᠠᠵᠠᠶᠠᠭᠠ᠂ ᠭᠠᠷᠮ ᠠ᠋
ᠬᠢᠨᠠᠭᠴᠢ ᠄ ᠣᠳᠬᠠᠨᠰᠸ᠋ᠠ