ᠭᠡᠰᠢᠭᠪᠠᠲᠤ-ᠠᠯᠳᠠᠷᠲᠤ ᠰᠢᠯᠦᠭᠴᠢ ᠪᠥᠭᠡᠳ ᠲᠡᠦᠬᠡᠴᠢХишигбат-алдарт шүлэгч бөгөөд түүхч
797ᠭᠡᠰᠢᠭᠪᠠᠲᠤ-ᠠᠯᠳᠠᠷᠲᠤ ᠰᠢᠯᠦᠭᠴᠢ ᠪᠥᠭᠡᠳ ᠲᠡᠦᠬᠡᠴᠢ
ᠭᠡᠰᠢᠭᠪᠠᠲᠤ ᠶ᠋ᠢᠨ ᠴᠣᠯᠠ ᠨᠢ ᠬᠠᠷᠠ ᠰᠠᠬᠠᠯᠲᠤ ᠭᠡᠳᠡᠭ ᠂1849 ᠣᠨ ᠳ᠋ᠤ᠌ ᠶᠡᠬᠡ ᠵᠣᠣ ᠴᠢᠭᠤᠯᠭᠠᠨ ᠤ᠋ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠱᠠᠷᠯᠢᠭ᠋ ( ᠰᠢᠷᠠ ᠡᠯᠢᠭᠡ ) ᠰᠤᠮᠤ ᠶ᠋ᠢᠨ ᠬᠣᠱᠣᠢ ᠶ᠋ᠢᠨ ᠴᠠᠶ᠋ᠢᠲᠠᠮ ᠤ᠋ᠨ ᠬᠠᠲᠠᠭᠢᠨ ᠣᠪᠣᠭᠲᠤ ᠬᠠᠷᠠᠴᠤ ᠠᠷᠠᠳ ᠷᠠᠪᠵᠠᠢ ᠶ᠋ᠢᠨ ᠭᠡᠷ ᠲᠦ᠍ ᠲᠥᠷᠥᠵᠡᠢ ᠃ ᠲᠡᠷᠡ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠨ ᠠ᠋ᠴᠠ ᠪᠠᠨ ᠡᠬᠢᠯᠡᠵᠦ᠂ ᠠᠶ᠋ᠢᠯ ᠠᠶ᠋ᠢᠮᠠᠭ ᠤ᠋ᠨ ᠢ᠋ᠶ᠋ᠠᠨ ᠪᠢᠴᠢᠭ ᠮᠡᠳᠡᠳᠡᠭ ᠬᠥᠮᠦᠰ ᠢ᠋ᠶ᠋ᠡᠷ ᠮᠣᠩᠭᠣᠯ ᠪᠢᠴᠢᠭ ᠵᠢᠭᠠᠯᠭᠠᠵᠤ ᠂ ᠰᠤᠷᠤᠭᠰᠠᠨ ᠪᠠ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠬᠢᠲᠠᠳ᠂ ᠲᠥᠪᠡᠳ ᠪᠢᠴᠢᠭ ᠊ᠢ ᠴᠦ᠍ ᠨᠡᠯᠢᠶᠡᠳ ᠡᠵᠡᠮᠰᠢᠭᠰᠡᠨ ᠪᠠᠶ᠋ᠢᠨᠠ᠃
ᠭᠡᠰᠢᠭᠪᠠᠲᠤ ᠠᠷᠪᠠᠨ ᠳᠥᠷᠪᠡᠲᠡᠢ ᠳ᠋ᠦ᠍ ᠪᠡᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠦ᠋ᠨ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠪᠠᠯᠵᠤᠤᠷ ᠤ᠋ᠨ ᠳᠠᠭᠠᠯᠲᠠ ᠵᠠᠷᠤᠴᠠ ᠶ᠋ᠢᠨ ᠠᠯᠪᠠᠨ ᠳ᠋ᠤ᠌ ᠲᠠᠲᠠᠭᠳᠠᠨ ᠵᠠᠷᠤᠴᠠᠯᠠᠭᠳᠠᠭᠠᠳ ᠰᠡᠭᠦᠯᠡᠷ ᠨᠢ ᠲᠡᠭᠦᠨ ᠦ᠌ ᠭᠠᠷ ᠳᠣᠣᠷᠠ ᠪᠢᠴᠢᠭᠡᠴᠢ ᠶ᠋ᠢᠨ ᠠᠯᠪᠠ ᠬᠢᠵᠡᠢ᠃ ᠲᠡᠷᠡ ᠭᠤᠴᠢᠭᠠᠳ ᠨᠠᠰᠤᠨ ᠠ᠋ᠴᠠ ᠡᠬᠢᠯᠡᠵᠦ᠂ ᠬᠣᠰᠢᠭᠤ ᠵᠠᠰᠠᠭ ᠪᠣᠯᠤᠨ ᠬᠦᠩ ᠨᠣᠶᠠᠳ ᠤ᠋ᠨ ᠴᠠᠯᠢᠩ ᠹᠦᠩᠯᠦ ᠶ᠋ᠢᠨ ᠮᠥᠩᠭᠥ ᠶ᠋ᠢ ᠪᠠᠭᠤᠯᠭᠠᠨ ᠠᠪᠴᠢᠷᠠᠬᠤ ᠠᠯᠪᠠᠨ ᠳ᠋ᠤ᠌ ᠵᠠᠷᠤᠭᠳᠠᠵᠤ ᠮᠣᠷᠢ ᠂ ᠯᠠᠭᠤᠰᠠ ᠵᠡᠷᠭᠡ ᠤᠨᠤᠭᠠ ᠪᠠᠷ ᠪᠡᠭᠡᠵᠢᠩ ᠬᠣᠲᠠᠨᠠ ᠠᠷᠪᠠᠭᠠᠳ ᠤᠳᠠᠭᠠ ᠣᠴᠢᠪᠠ᠃ ᠲᠠᠪᠢᠭᠠᠳ ᠨᠠᠰᠤᠨ ᠤ᠋ ᠦᠶᠡ ᠳ᠋ᠦ᠍ ᠪᠡᠨ ᠳᠣᠯᠣᠭᠠᠨ ᠪᠠᠭᠠ ᠳᠠᠭᠠᠭᠠᠮᠠᠯ ᠊ᠢ ᠵᠠᠬᠢᠷᠬᠤ ᠳᠡᠳ᠋ ᠵᠠᠷᠭᠤᠴᠢ ᠶ᠋ᠢᠨ ᠲᠤᠰᠢᠶᠠᠯ ᠳ᠋ᠤ᠌ ᠳᠠᠪᠰᠢᠵᠠᠢ᠃ ᠲᠡᠭᠦᠨ ᠦ᠌ ᠡᠨᠡ ᠬᠦ ᠲᠤᠰᠢᠶᠠᠯ ᠳ᠋ᠤ᠌ ᠪᠠᠶ᠋ᠢᠬᠰᠠᠨ ᠦᠶᠡ ᠳ᠋ᠦ᠍᠂ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠬᠣᠶᠠᠳᠠᠬᠢ ᠤᠳᠠᠭᠠᠨ ᠤ᠋ 《 ᠳᠤᠭᠤᠶ᠋ᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ 》 ᠥᠷᠨᠢᠭᠰᠡᠨ ᠳ᠋ᠦ᠍ ᠲᠡᠷᠡ ᠨᠢᠭᠤᠴᠠ ᠠᠭᠤᠯᠭᠠ ᠪᠦᠬᠦᠢ ᠰᠢᠯᠦᠭ ᠪᠢᠴᠢᠵᠦ ᠂ ᠳᠤᠭᠤᠶ᠋ᠢᠯᠠᠩ ᠤ᠋ᠨ ᠬᠢᠨ ᠳ᠋ᠦ᠍ ᠮᠠᠲᠠᠭᠳᠠᠨ ᠲᠡᠳᠡᠨ ᠦ᠌ ᠬᠡᠰᠡᠭ ᠬᠥᠮᠦᠰ ᠊ᠢ ᠠᠶᠤᠯ ᠠ᠋ᠴᠠ ᠵᠠᠶ᠋ᠢᠯᠠᠭᠤᠯᠤᠨ ᠳᠤᠲᠠᠭᠠᠯᠭᠠᠵᠤ ᠪᠠᠶ᠋ᠢᠬᠰᠠᠨ ᠪᠥᠭᠡᠳ 《 ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠳᠤᠭᠤᠶ᠋ᠢᠯᠠᠩ 》᠂ 《 ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠴᠢᠭᠤᠯᠭᠠᠨ 》 ᠭᠡᠬᠦ ᠵᠡᠷᠭᠡ ᠶ᠋ᠢᠨ ᠳᠤᠭᠤᠶ᠋ᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠊ᠢ ᠳᠠᠮᠵᠢᠭᠰᠠᠨ ᠰᠢᠯᠦᠭ ᠪᠢᠴᠢᠭᠰᠡᠨ ᠡᠴᠡ ᠪᠣᠯᠵᠤ ᠲᠤᠰᠢᠶᠠᠯ ᠢ᠋ᠶ᠋ᠠᠨ ᠬᠤᠰᠤᠭᠤᠯᠵᠠᠢ᠃ ᠲᠡᠭᠦᠨ ᠡᠴᠡ ᠬᠣᠶ᠋ᠢᠰᠢ ᠲᠡᠷᠡ ᠬᠥᠳᠡᠭᠡ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠂ ᠬᠡᠦᠬᠡᠳ ᠲᠦ᠍ ᠪᠢᠴᠢᠭ ᠵᠢᠭᠠᠠᠬᠤ ᠪᠤᠶᠤ ᠮᠠᠯ ᠬᠠᠷᠢᠭᠤᠯᠤᠨ ᠂ ᠢᠳᠡᠰᠢᠨ ᠨᠣᠭᠣᠭᠠ ᠲᠠᠷᠢᠵᠤ ᠂ ᠡᠮ ᠪᠠᠷᠢᠨ ᠂ ᠵᠣᠬᠢᠶᠠᠯ ᠪᠢᠴᠢᠵᠦ ᠠᠮᠢᠳᠤᠷᠠᠪᠠ᠃
ᠭᠡᠰᠢᠭᠪᠠᠲᠤ 1916 ᠣᠨ ᠤ᠋ ᠪᠢᠯᠢᠭ ᠦ᠋ᠨ ᠤᠯᠠᠷᠢᠯ ᠤ᠋ᠨ ᠡᠪᠦᠯ ᠦ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ18 ᠤ᠋ ᠡᠳᠦᠷ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠨᠠᠰᠤ ᠪᠠᠷᠠᠵᠠᠢ᠃
ᠭᠡᠰᠢᠭᠪᠠᠲᠤ ᠰᠢᠯᠦᠭ ᠵᠣᠬᠢᠶᠠᠯ ᠳ᠋ᠤ᠌ ᠮᠠᠰᠢ ᠠᠪᠢᠶᠠᠰ ᠲᠠᠢ ᠪᠠᠶ᠋ᠢᠵᠤ ᠂ ᠲᠠᠪᠢ ᠭᠠᠷᠤᠢ ᠵᠢᠯ ᠦ᠋ᠨ ᠵᠣᠬᠢᠶᠠᠨ ᠪᠦᠲᠦᠭᠡᠬᠦ ᠦᠢᠯᠡᠳᠦᠯᠭᠡ ᠶ᠋ᠢᠨ ᠳᠤᠮᠳᠠ ᠪᠠᠨ 《 ᠬᠣᠣᠰ ᠮᠣᠷᠢᠨ ᠤ᠋ ᠰᠠᠶ᠋ᠢᠪᠤᠷ 》᠂ 《 ᠥᠨᠳᠥᠷ ᠬᠥᠬᠡ ᠣᠭᠲᠠᠷᠭᠤᠢ 》᠂ 《 ᠡᠷᠬᠢᠮ ᠣᠯᠠᠨ ᠳᠤᠭᠤᠶ᠋ᠢᠯᠠᠩ 》᠂ 《 ᠠᠳᠠᠯᠢ ᠲᠡᠭᠰᠢ》 ᠭᠡᠬᠦ ᠮᠡᠲᠦ ᠶ᠋ᠢᠨ ᠵᠠᠭᠤ ᠰᠢᠬᠠᠮ ᠰᠢᠯᠦᠭ ᠨᠠᠶ᠋ᠢᠷᠠᠭ ᠊ᠢ ᠵᠣᠬᠢᠶᠠᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ 《 ᠠᠷᠢᠭᠤᠨ ᠲᠣᠯᠢ 》᠂ 《 ᠠᠯᠲᠠᠨ ᠲᠣᠯᠢ 》᠂ 《 ᠭᠡᠭᠡᠨ ᠲᠣᠯᠢ 》 ( ᠬᠡᠦᠬᠡᠳ ᠦ᠋ᠨ ᠰᠤᠷᠬᠤ ᠪᠢᠴᠢᠭ ᠪᠣᠯᠤᠨᠠ ) ᠪᠣᠯᠤᠨ 《 ᠡᠷᠲᠡ ᠪᠠ ᠡᠳᠦᠭᠡ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠲᠣᠪᠴᠢ 》 ᠬᠡᠮᠡᠬᠦ ᠲᠡᠦᠬᠡ ᠶ᠋ᠢᠨ ᠵᠣᠬᠢᠶᠠᠯ ᠪᠢᠴᠢᠪᠡ᠃ ᠲᠡᠭᠦᠨ ᠦ᠌ ᠡᠳᠡᠭᠡᠷ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠨᠢ ᠮᠣᠩᠭᠣᠯ ᠤ᠋ᠨ ᠰᠣᠶᠣᠯ ᠤ᠋ᠨ ᠥᠪ ᠦ᠋ᠨ ᠨᠢᠭᠡ ᠬᠡᠰᠡᠭ ᠪᠣᠯᠬᠤ ᠪᠥᠭᠡᠳ ᠣᠨᠴᠠᠭᠠᠶ᠋ᠢᠯᠠᠨ ᠥᠰᠪᠥᠷᠢ ᠪᠠᠭᠠ ᠬᠡᠦᠬᠡᠳ ᠦ᠋ᠨ ᠦᠰᠦᠭ ᠪᠢᠴᠢᠭ ᠰᠤᠷᠬᠤ ᠳ᠋ᠤ᠌ ᠵᠣᠷᠢᠭᠤᠯᠤᠭᠰᠠᠨ 《 ᠭᠦᠶᠦᠬᠡᠨ ᠤᠳᠬᠠ ᠶ᠋ᠢᠨ ᠲᠣᠯᠢ 》 ᠬᠡᠮᠡᠬᠦ ᠰᠢᠯᠦᠭ ᠦ᠋ᠨ ᠬᠡᠯᠪᠡᠷᠢ ᠪᠡᠷ ᠵᠣᠬᠢᠶᠠᠭᠰᠠᠨ ᠰᠤᠷᠬᠤ ᠪᠢᠴᠢᠭ ᠨᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠰᠣᠨᠢᠷᠬᠠᠯ ᠊ᠢ ᠲᠠᠲᠠᠭᠰᠠᠨ ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ᠌ ᠠᠷᠢᠭᠤᠨ ᠴᠠᠭᠠᠨ ᠵᠠᠩ ᠠᠭᠠᠯᠢ ᠶ᠋ᠢ ᠳᠤᠰᠬᠠᠭᠰᠠᠨ ᠣᠬᠢ ᠰᠠᠢᠨ ᠪᠦᠲᠦᠭᠡᠯ ᠪᠣᠯᠤᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠠᠭᠴᠢ ᠄ ᠲᠤᠶᠠᠭᠠ
ᠬᠢᠨᠠᠭᠴᠢ ᠄ ᠣᠳᠬᠠᠨᠰᠣᠠ