ᠭᠠᠮᠠᠯ- ᠨᠡᠷᠡᠲᠦ ᠪᠢᠴᠢᠭ ᠤᠨ ᠬᠥᠮᠦᠨ ᠪᠥᠭᠡᠳ ᠰᠢᠯᠦᠭᠴᠢГамал-нэрт бичгийн хүн бөгөөд шүлэгч
568ᠭᠠᠮᠠᠯ
— ᠨᠡᠷᠡᠲᠦ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠪᠥᠭᠡᠳ ᠰᠢᠯᠦᠭᠴᠢ
ᠭᠠᠮᠠᠯ ᠤ᠋ᠨ ᠨᠥᠭᠥᠭᠡ ᠨᠡᠷᠡ ᠨᠢ ᠳᠤᠭᠠᠷᠰᠦ᠋ᠷᠦᠩ ᠭᠡᠳᠡᠭ ᠂ ᠬᠠᠪᠠᠬᠠᠴᠢᠨ ᠣᠪᠣᠭ ᠲᠠᠢ ᠂1871 ᠣᠨ ᠳ᠋ᠤ᠌ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠰᠢᠯᠢ ᠶ᠋ᠢᠨ ᠭᠣᠣᠯ ᠤ᠋ᠨ ᠴᠢᠭᠤᠯᠭᠠᠨ ᠤ᠋ ᠦᠵᠦᠮᠦᠴᠢᠨ ᠵᠡᠭᠦᠨ ᠬᠤᠰᠢᠭᠤᠨ ᠤ᠋ ᠠᠭᠡ ᠶ᠋ᠢᠨ ᠰᠤᠮᠤ ( ᠣᠳᠣ ᠶ᠋ᠢᠨ ᠡᠷᠢᠶᠡᠨᠭᠤᠪᠢ ᠰᠤᠮᠤ ) ᠶ᠋ᠢᠨ ᠬᠠᠢᠷᠠ ᠶ᠋ᠢᠨ ᠵᠠᠯᠠᠨ ᠵᠡᠷᠭᠡ ᠲᠡᠢ ᠬᠡᠦᠬᠡᠨ ( ᠪᠠᠰᠠ ᠪᠠᠪᠠ ᠭᠡᠳᠡᠭ ) ᠭᠡᠳᠡᠭ ᠮᠠᠯᠴᠢᠨ ᠤ᠋ ᠭᠡᠷ ᠲᠦ᠍ ᠲᠥᠷᠥᠵᠡᠢ ( ᠵᠠᠷᠢᠮ ᠨᠣᠮ ᠳ᠋ᠤ᠌ ᠬᠠᠪᠠᠬᠠᠴᠢᠨ ᠣᠪᠣᠭ ᠤ᠋ᠨ ᠪᠣᠷᠣ ᠮᠡᠢᠷᠡᠨ ᠦ᠌ ᠭᠡᠷ ᠲᠦ᠍ ᠲᠥᠷᠥᠪᠡ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠪᠣᠢ ) ᠃
ᠭᠠᠮᠠᠯ ᠳᠣᠯᠣᠭᠠᠨ ᠨᠠᠰᠤᠨ ᠠᠴᠠ ᠪᠠᠨ ᠡᠬᠢᠯᠡᠵᠦ ᠵᠠᠬᠢᠷᠤᠭᠴᠢ ᠯᠣᠪᠰᠠᠩᠳᠣᠨᠳᠣᠪ ᠢ᠋ᠶ᠋ᠠᠷ ᠮᠣᠩᠭᠣᠯ ᠪᠢᠴᠢᠭ ᠵᠢᠭᠠᠯᠭᠠᠵᠤ ᠂ ᠤᠯᠠᠮ ᠢ᠋ᠶ᠋ᠠᠷ ᠴᠠᠭᠠᠷᠠᠭᠠᠳ ᠡᠷᠲᠡᠨ ᠦ᠌ ᠨᠣᠮ ᠪᠢᠴᠢᠭ ᠊ ᠢ ᠨᠡᠯᠢᠶᠡᠳ ᠤᠩᠰᠢᠵᠤ ᠂ ᠤᠷᠠᠨ ᠬᠡᠯᠡᠯᠭᠡ ᠶ᠋ᠢ ᠨᠢ ᠲᠡᠮᠳᠡᠭᠯᠡᠨ ᠠᠪᠬᠤ ᠶ᠋ᠢᠨ ᠬᠠᠮᠲᠤ ᠠᠷᠠᠳ ᠤ᠋ᠨ ᠠᠮᠠᠨ ᠵᠣᠬᠢᠶᠠᠯ ᠊ ᠢ ᠰᠣᠨᠢᠷᠬᠠᠨ ᠂ ᠬᠣᠯᠪᠣᠭᠠ ᠂ ᠵᠦᠢᠷ ᠰᠡᠴᠡᠨ ᠦᠭᠡᠰ ᠊ ᠢ ᠴᠤᠭᠯᠠᠭᠤᠯᠵᠤ ᠪᠠᠢᠪᠠ ᠃ ᠡᠨᠡ ᠨᠢ ᠲᠡᠭᠦᠨ ᠦ᠌ ᠰᠢᠯᠦᠭ ᠵᠣᠬᠢᠶᠠᠯ ᠪᠢᠴᠢᠬᠦ ᠳ᠋ᠦ᠍ ᠰᠠᠭᠤᠷᠢ ᠪᠣᠯᠵᠤ ᠥᠭᠴᠡᠢ ᠃
ᠭᠠᠮᠠᠯ ᠠᠷᠪᠠᠨ ᠳᠣᠯᠣᠭᠠᠲᠠᠢ ᠳ᠋ᠤ᠌ ᠪᠠᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠰᠤᠷᠬᠤ ᠪᠢᠴᠢᠭᠡᠴᠢ ᠪᠣᠯᠵᠤ ᠂ ᠠᠷᠪᠠᠨ ᠨᠠᠢ᠍ᠮᠠᠲᠠᠢ ᠳ᠋ᠤ᠌ ᠪᠠᠨ ᠬᠣᠰᠢᠭᠤ ᠶᠠᠮᠤᠨ ᠤ᠋ ᠵᠢᠩᠬᠢᠨᠢ ᠪᠢᠴᠢᠭᠡᠴᠢ ᠪᠣᠯᠵᠤ ᠂ ᠬᠣᠷᠢᠨ ᠨᠢᠭᠡᠲᠡᠢ ᠳ᠋ᠦ᠍ ᠪᠡᠨ ᠠᠭᠡ ᠶ᠋ᠢᠨ ᠰᠤᠮᠤᠨ ᠤ᠋ ᠵᠠᠩᠭᠢ ᠪᠣᠯᠵᠤ ᠂ ᠰᠡᠭᠦᠯᠡᠷ ᠨᠢ ᠪᠠᠰᠠ ᠬᠣᠰᠢᠭᠤ ᠵᠠᠩᠭᠢ ᠂ ᠬᠣᠰᠢᠭᠤ ᠮᠡᠢᠷᠡᠨ ᠦ᠌ ᠲᠤᠰᠢᠶᠠᠯ ᠳ᠋ᠤ᠌ ᠲᠠᠪᠰᠢᠨ ᠂ ᠭᠤᠴᠢᠨ ᠳᠣᠯᠣᠭᠠᠲᠠᠢ ᠳ᠋ᠤ᠌ ᠪᠠᠨ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠪᠣᠯᠤᠭᠰᠠᠨ ᠪᠠᠢᠨᠠ ᠃ ᠲᠡᠷᠡ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠳ᠋ᠤ᠌ ᠪᠠᠢᠭᠰᠠᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠪᠠᠨ ᠬᠣᠰᠢᠭᠤ ᠨᠡᠢᠲᠡ ᠶ᠋ᠢᠨ ᠲᠥᠯᠥᠭᠡ ᠬᠠᠷᠢ ᠳ᠋ᠤ᠌ ᠥᠭᠬᠦ ᠪᠢᠴᠢᠭ ᠬᠠᠷᠠ ᠂ ᠵᠠᠷᠭᠤ ᠵᠠᠭᠠᠯᠳᠤᠯᠭᠠ ᠂ ᠠᠴᠠᠨ ( ᠬᠣᠶᠠᠷ ᠬᠣᠰᠢᠭᠤ ᠪᠤᠶᠤ ᠬᠣᠶᠠᠷ ᠠᠢᠮᠠᠭ ᠤ᠋ᠨ ᠪᠣᠳᠠᠲᠤ ᠵᠥᠷᠢᠴᠡᠯ ᠢ᠋ ᠰᠢᠢᠳᠪᠦᠷᠢᠯᠡᠬᠦ ᠳ᠋ᠦ᠍ ᠬᠤᠷᠠᠯ ᠬᠢᠳᠡᠭ ᠴᠢᠭᠤᠯᠭᠠᠨ ) ᠂ ᠭᠡᠷᠡᠴᠢ ᠮᠥᠷᠭᠥᠭᠦᠯᠬᠦ ᠵᠡᠷᠭᠡ ᠠᠯᠢ ᠣᠯᠠᠨ ᠴᠢᠬᠤᠯᠠ ᠵᠦᠢᠯᠡᠰ ᠦᠨ ᠡᠬᠡ ᠨᠣᠣᠷᠠᠭ ᠢ᠋ ᠪᠢᠴᠢᠳᠡᠭ ᠪᠠᠢᠭᠰᠠᠨ ᠪᠥᠭᠡᠳ ᠡᠳᠡᠭᠡᠷ ᠪᠢᠴᠢᠭ ᠬᠠᠷᠠ ᠨᠢ ᠶᠣᠰᠣ ᠤᠴᠢᠷ ᠢ᠋ ᠲᠤᠰᠢᠶᠠᠭᠰᠠᠨ ᠢ᠋ᠶ᠋ᠠᠷ ᠲᠣᠳᠣᠷᠬᠠᠢ ᠂ ᠠᠪᠴᠠᠯᠳᠤᠯᠭᠠ ᠰᠠᠢᠲᠠᠢ ᠪᠣᠯᠬᠣᠷ 《ᠲᠡᠮᠦᠷ ᠰᠤᠮᠤ 》 ᠭᠡᠵᠦ ᠨᠡᠷᠡ ᠠᠯᠳᠠᠷᠰᠢᠪᠠ ᠃
ᠭᠠᠮᠠᠯ ᠪᠣᠯ ᠵᠠᠩ ᠠᠪᠤᠷᠢ ᠨᠣᠮᠣᠬᠠᠨ ᠳᠥᠯᠭᠡᠨ ᠪᠥᠭᠡᠳ ᠠᠮᠢᠳᠤᠷᠠᠯ ᠳ᠋ᠤ᠌ ᠪᠠᠨ ᠡᠭᠡᠯ ᠪᠣᠷᠣᠭᠵᠢᠭᠤᠨ ᠬᠥᠮᠦᠨ ᠪᠢᠯᠡ ᠃ ᠲᠡᠷᠡ ᠠᠵᠢᠯ ᠤ᠋ᠨ ᠴᠢᠯᠥᠭᠡ ᠪᠡᠷ ᠢ᠋ᠶ᠋ᠡᠨ ᠭᠡᠷ ᠨᠤᠲᠤᠭ ᠲᠤ᠌ ᠪᠠᠨ ᠬᠠᠷᠢᠪᠠᠯ ᠠᠷᠠᠳ ᠤ᠋ᠨ ᠭᠡᠷ ᠢ᠋ᠶ᠋ᠡᠷ ᠲᠣᠭᠣᠷᠢᠨ ᠨᠠᠭᠠᠳᠴᠤ ᠂ ᠰᠣᠨᠢᠨ ᠱᠣᠭ ᠶᠠᠷᠢᠵᠤ ᠨᠠᠷᠭᠢᠳᠠᠭ ᠃ ᠲᠡᠷᠡ ᠵᠠᠷᠢᠮ ᠹᠧᠣᠳᠠᠯ ᠨᠣᠶᠠᠳ ᠤ᠋ᠨ ᠬᠠᠷᠭᠢᠰ ᠰᠢᠨᠤᠬᠠᠢ ᠶᠠᠪᠤᠳᠠᠯ ᠢ᠋ ᠠᠷᠠᠳ ᠤ᠋ᠨ ᠳᠤᠮᠳᠠ ᠲᠣᠭᠠᠴᠢᠨ ᠶᠠᠷᠢᠳᠠᠭ ᠪᠠ ᠴᠢᠨᠠᠭᠰᠢᠯᠠᠭᠠᠳ ᠵᠠᠷᠢᠮ ᠨᠣᠶᠠᠳ ᠢ᠋ ᠬᠤᠷᠴᠠ ᠦᠭᠡ ᠪᠡᠷ ᠳᠠᠭᠠᠷᠢᠭᠤᠯᠵᠤ ᠬᠡᠯᠡᠳᠡᠭ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ ᠪᠠᠰᠠ ᠵᠠᠷᠭᠤ ᠵᠠᠭᠠᠯᠳᠤᠯᠭᠠ ᠬᠢᠵᠦ ᠡᠰᠡᠷᠭᠦᠴᠡᠳᠡᠭ ᠪᠠᠢᠪᠠ ᠃ ᠭᠠᠮᠠᠯ ᠬᠡᠳᠦᠢᠪᠡᠷ ᠵᠠᠬᠢᠷᠤᠭᠴᠢ ᠬᠥᠮᠦᠨ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠡᠵᠡᠷᠬᠡᠭ ᠬᠠᠷᠭᠢᠰ ᠢ᠋ ᠵᠢᠭᠰᠢᠨ ᠂ ᠡᠭᠡᠯ ᠠᠷᠠᠳ ᠢ᠋ ᠦᠷᠦ ᠡᠪᠡᠳᠴᠦ ᠬᠠᠷᠭᠢᠰ ᠬᠡᠷᠴᠡᠭᠡᠢ ᠬᠠᠷᠠ ᠰᠢᠷᠠ ᠹᠧᠣᠳᠠᠯ ᠤ᠋ᠳ ᠢ᠋ ᠡᠰᠡᠷᠭᠦᠴᠡᠭᠰᠡᠨ 《 ᠵᠠᠩᠵᠤᠨ ᠴᠡᠷᠢᠭ ᠦᠨ ᠪᠣᠰᠤᠯᠭᠠ 》 ᠬᠡᠮᠡᠬᠦ ᠠᠷᠠᠳ ᠤ᠋ᠨ ᠪᠣᠰᠤᠯᠭᠠ ᠶ᠋ᠢ ᠳᠡᠮᠵᠢᠵᠦ ᠪᠠᠢᠯᠠ ᠃
ᠭᠠᠮᠠᠯ 1924 ᠣᠨ ᠪᠣᠯᠲᠠᠯᠠ ᠬᠣᠰᠢᠭᠤ ᠵᠠᠬᠢᠷᠤᠭᠴᠢ ᠶ᠋ᠢᠨ ᠲᠤᠰᠢᠶᠠᠯ ᠳ᠋ᠤ᠌ ᠪᠠᠢᠭᠰᠠᠨ ᠪᠥᠭᠡᠳ ᠮᠥᠨ ᠵᠢᠯ ᠳ᠋ᠦ᠍ ᠲᠤᠰᠢᠶᠠᠯ ᠠᠴᠠ ᠪᠠᠨ ᠴᠢᠯᠥᠭᠡᠯᠡᠭᠳᠡᠵᠦ ᠭᠡᠷ ᠨᠤᠲᠤᠭ ᠲᠤ᠌ ᠪᠠᠨ ᠬᠠᠷᠢᠭᠠᠳ ᠡᠭᠡᠯ ᠠᠷᠠᠳ ᠤ᠋ᠨ ᠶᠣᠰᠣᠭᠠᠷ ᠠᠵᠤ ᠲᠥᠷᠥᠨ ᠠᠮᠢᠳᠤᠷᠠᠪᠠ᠃
1932 ᠣᠨ ᠳ᠋ᠤ᠌ ᠭᠠᠮᠠᠯ ᠡᠪᠡᠳᠴᠢᠨ ᠢ᠋ᠶ᠋ᠡᠷ ᠨᠠᠰᠤ ᠪᠠᠷᠠᠵᠠᠢ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠮᠥᠩᠭᠦᠨᠴᠴᠡᠭ ᠂ ᠠᠵᠠᠵᠠᠶᠠᠭᠠ
ᠬᠢᠨᠠᠭᠴᠢ ᠄ ᠣᠳᠣᠨᠭᠡᠷᠡᠯ