ᠨᠢᠭᠤᠴᠠ ᠳᠦᠰᠢᠭ – ᠤᠷᠠᠩᠭᠣᠸᠠ Нууц түшиг – Урангоо
706ᠨᠢᠭᠤᠴᠠ ᠳᠦᠰᠢᠭ
ᠤᠷᠠᠩᠭᠤᠸᠠ
ᠡᠵᠢ ᠮᠢᠨᠢ ᠭᠤᠴᠢᠨ ᠵᠢᠯ ᠤᠨ ᠡᠮᠤᠨᠡ ᠨᠢᠳᠦ ᠪᠠᠨ ᠠᠪᠤᠭᠤᠯᠤᠭᠰᠠᠨ ᠪᠢᠯᠡ᠃ ᠨᠢᠳᠦ ᠪᠠᠨ ᠠᠪᠤᠭᠤᠯᠬᠤ ᠬᠡᠵᠥ᠍ ᠮᠡᠰᠡ ᠵᠠᠰᠠᠯ ᠬᠢᠭᠥ ᠳ᠋ᠡᠭᠡᠨ ᠮᠢᠨᠴᠥᠭᠥᠷᠡᠭᠥᠯᠭᠥ ᠡᠮ ᠢ ᠦᠩᠭᠡᠷᠡᠥ ᠬᠡᠷᠡᠭᠯᠡᠭᠰᠡᠨ ᠡᠴᠡ ᠪᠣᠯᠵᠤ ᠴᠢᠬᠢᠨ ᠤ ᠰᠣᠨᠣᠷ ᠵᠢᠡᠨ ᠠᠯᠳᠠᠪᠠ᠃ ᠰᠡᠭᠦᠯᠴᠢ ᠵᠢᠨ ᠵᠢᠯ ᠤᠳ ᠲᠦ ᠰᠢᠳᠦ ᠨᠢ ᠴᠤ᠌ ᠪᠦᠷ ᠤᠨᠠᠵᠤ ᠪᠠᠷᠠᠪᠠ᠃ ᠬᠡᠳᠦᠢᠪᠡᠷ ᠢᠩᠬᠢᠵᠥ᠍ ᠠᠪᠤᠭᠤᠯᠳᠠᠭ ᠵᠢᠡᠨ ᠠᠪᠤᠭᠤᠯᠵᠤ ᠤᠨᠠᠭᠠᠳᠠᠭ ᠵᠢᠡᠨ ᠤᠨᠠᠭᠠᠵᠤ ᠪᠠᠢᠭᠰᠠᠨ ᠴᠤ᠌ ᠡᠵᠢ ᠮᠢᠨᠢ《 ᠡᠮᠲᠡᠷᠡᠳᠡᠭ ᠨᠢ ᠡᠮᠳᠡᠷᠡᠵᠥ᠍ ᠬᠠᠭᠠᠷᠠᠳᠠᠭ ᠨᠢ ᠬᠠᠭᠠᠷᠠᠵᠤ ᠯᠠ ᠪᠠᠢᠭ᠂ ᠦᠯᠡᠳᠡᠭᠰᠡᠨ ᠪᠢ ᠠᠮᠢᠳᠤᠷᠠᠳᠠᠭ ᠵᠢᠡᠨ ᠠᠮᠢᠳᠤᠷᠠᠵᠤ ᠯᠠ ᠪᠠᠢᠶᠠ! 》 ᠭᠡᠵᠦ ᠵᠣᠷᠢᠭ ᠵᠢᠡᠨ ᠢᠯᠡᠳᠭᠡᠬᠥ ᠮᠡᠳᠥ᠍ ᠠᠵᠢᠭ ᠴᠤ᠌ ᠦᠭᠡᠢ ᠬᠥᠷᠥᠨᠡ ᠭᠡᠰᠡᠨ ᠭᠠᠵᠠᠷ ᠳᠠᠭᠠᠨ ᠭᠥᠷᠴᠥ᠍᠂ ᠬᠡᠯᠡᠨᠡ ᠭᠡᠰᠡᠨ ᠦᠭᠡ ᠪᠠᠨ ᠬᠡᠯᠡᠵᠦ ᠥᠨᠥ᠍ ᠵᠢᠯ ᠨᠠᠶᠠᠨ ᠳᠤᠯᠤᠭᠠᠳᠠᠬᠢ ᠵᠢᠯ ᠵᠢᠡᠨ ᠤᠭᠲᠤᠪᠠ᠃ ᠨᠢᠭᠡ ᠬᠥᠮᠥᠨ ᠤ ᠲᠣᠯᠣᠭᠠᠢ ᠲᠣᠭᠣᠷᠢᠭ᠍ᠰᠠᠨ ᠭᠤᠷᠪᠠᠨ ᠭᠣᠣᠯ ᠡᠷᠬᠡᠲᠡᠨ ᠨᠢ ᠪᠦᠷ ᠬᠠᠰᠤᠭᠳᠠᠴᠢᠬᠠᠬᠤ ᠳᠦ ᠦᠯᠡᠳᠡᠭᠰᠡᠨ ᠨᠢ ᠵᠥᠪᠬᠡᠨ ᠰᠠᠨᠠᠭᠠ ᠰᠡᠳᠬᠢᠯ ᠯᠠ ᠪᠣᠯᠣᠨᠠ ᠭᠡᠵᠦ ᠪᠢ ᠪᠣᠳᠣᠨᠠ᠃
《 ᠬᠡᠨ ᠨᠢ ᠮᠢᠨᠤ ᠠᠮᠢ ᠨᠠᠰᠤᠨ ᠡᠴᠡ ᠤᠷᠪᠠᠶᠠ ᠭᠡᠪᠡᠯ ᠤᠷᠪᠠ᠂ ᠪᠢ ᠯᠠ ᠤᠷᠪᠠᠬᠤ ᠦᠭᠡᠢ! 》 ᠭᠡᠵᠤ ᠪᠠᠲᠤ ᠦᠨᠡᠨᠴᠢ ᠰᠡᠳᠬᠢᠯ ᠵᠢᠡᠨ ᠢᠯᠡᠳᠬᠡᠵᠦ ᠪᠠᠢᠨᠠ ᠬᠡᠮᠡᠷ ᠪᠠᠢᠳᠠᠭ ᠲᠡᠷᠡ ᠶᠡᠬᠡ ᠵᠣᠷᠢᠭ ᠰᠠᠨᠠᠭᠠᠨ ᠤ ᠨᠢᠭᠤᠴᠠ ᠵᠢ ᠭᠠᠢᠬᠠᠵᠤ ᠯᠠ ᠪᠠᠢᠳᠠᠭ᠃ ᠲᠡᠭᠡᠬᠦ ᠳᠦ ᠡᠵᠢ ᠮᠢᠨᠢ ᠲᠡᠷᠡ ᠶᠡᠬᠡ ᠵᠣᠷᠢᠭ ᠰᠠᠨᠠᠭᠠ ᠪᠠᠨ ᠨᠠᠳᠠ ᠳᠦ ᠤᠯᠠᠮ ᠨᠢᠭᠡ ᠪᠠᠷᠳᠠᠮᠨᠠᠭᠤᠯᠤᠶᠠ ᠭᠡᠰᠡᠨ ᠶᠤᠮ ᠰᠢᠭ ᠦᠢᠷᠡ ᠳᠤ ᠬᠦᠬᠡᠬᠤᠳᠠᠨᠠ ᠢᠷᠡᠵᠦ ᠮᠢᠨᠤ ᠬᠠᠵᠠᠭᠤ ᠳᠦ ᠬᠡᠳᠦ ᠬᠣᠨᠣᠭ ᠰᠠᠭᠤᠪᠠ᠃ ᠪᠢ ᠬᠠᠷᠠᠭᠠᠳ ᠪᠠᠢᠬᠤ ᠳᠦ᠂ ᠮᠢᠨᠤ ᠡᠵᠢ ᠵᠢᠨ ᠠᠮᠢᠳᠤᠷᠠᠯ ᠤᠨ ᠪᠦᠭᠥᠢᠯᠡ ᠠᠭᠤᠯᠭᠠ ᠨᠢ ᠮᠠᠨᠢ ᠲᠣᠭᠠᠯᠠᠬᠤ ᠪᠣᠯᠴᠢᠬᠠᠭᠰᠠᠨ ᠯᠠ ᠪᠠᠢᠪᠠ᠃ ᠥᠷᠯᠥᠭᠡ ᠦᠳᠡᠰᠢ ᠪᠣᠯᠭᠠᠨ ᠮᠠᠨᠢ ᠲᠣᠭᠠᠯᠠᠵᠤ᠂ ᠮᠠᠨᠢ ᠲᠣᠭᠠᠯᠠᠬᠤ ᠪᠦᠷᠢ ᠡᠷᠯᠢᠭ ᠲᠦ ᠶᠠᠪᠤᠭᠰᠠᠨ ᠬᠠᠢᠷᠠᠲᠤ ᠬᠥᠮᠥᠰ ᠤᠨ ᠵᠢᠡᠨ ᠵᠥᠪ ᠵᠠᠮ ᠳᠠᠭᠠᠨ ᠶᠠᠪᠤᠬᠤ ᠵᠢ ᠨᠢ ᠳᠠᠭᠠᠳᠬᠠᠵᠤ᠂ ᠦᠯᠡᠳᠡᠵᠦ ᠪᠠᠢᠭᠠ ᠬᠠᠢᠷᠠᠲᠤ ᠬᠥᠮᠥᠰ ᠤᠨ ᠵᠢᠡᠨ ᠰᠠᠢᠬᠠᠨ ᠠᠮᠢᠳᠤᠷᠠᠬᠤ ᠵᠢ ᠨᠢ ᠵᠠᠯᠪᠠᠷᠢᠨᠠ᠃
ᠵᠠᠯᠪᠠᠷᠢᠵᠤ ᠭᠠᠷᠤᠭᠰᠠᠨ ᠵᠢᠡᠨ ᠨᠠᠳᠠ ᠳᠦ《 ᠠᠢ ᠳ᠋ᠠ᠂ ᠪᠢ ᠴᠤ᠌ ᠰᠠᠢᠬᠠᠨ ᠪᠠᠢᠨᠠ᠂ ᠬᠡᠳᠦᠨ ᠬᠡᠦᠬᠡᠳ ᠤᠨ ᠢᠶᠠᠨ ᠠᠴᠢ ᠪᠠᠷ ᠦᠵᠡᠳᠡᠭ ᠦᠭᠡᠢ ᠰᠠᠢᠬᠠᠨ ᠢᠶᠠᠨ ᠦᠵᠡᠵᠦ ᠪᠠᠢᠨᠠ᠃ ᠶᠡᠬᠡ ᠬᠣᠲᠠ ᠵᠢ ᠴᠤ᠌ ᠦᠵᠡᠴᠢᠭᠡᠯᠡ᠂ ᠢᠳᠡᠭᠰᠡᠨ ᠦᠭᠡᠢ ᠰᠠᠢᠬᠠᠨ ᠰᠠᠢᠬᠠᠨ ᠬᠣᠭᠣᠯᠠ ᠪᠤᠳᠠᠭᠠ ᠵᠢ ᠴᠤ᠌ ᠢᠳᠡᠵᠤ ᠯᠠ ᠪᠠᠢᠨᠠ᠂ ᠲᠠᠪᠬᠤᠷ ᠲᠠᠪᠬᠤᠷ ᠲᠣᠷᠭᠠ ᠳᠤᠷᠳᠤᠩ ᠢᠶᠠᠷ ᠬᠤᠪᠴᠠᠰᠤᠯᠠᠵᠤ ᠯᠠ ᠪᠠᠢᠨᠠ᠃ ᠥᠩᠭᠡᠷᠡᠭᠰᠡᠨ ᠳᠦ ᠬᠠᠲᠤᠨ ᠨᠣᠶᠠᠨ ᠰᠠᠶᠢ ᠡᠢᠮᠦ ᠰᠠᠢᠬᠠᠨ ᠠᠮᠢᠳᠤᠷᠠᠯ ᠢ ᠡᠳ᠋ᠯᠡᠬᠦ ᠡᠴᠡ ᠪᠢᠰᠢ ᠡᠩ ᠤᠨ ᠬᠥᠮᠥᠨ ᠢᠩᠬᠢᠵᠤ ᠪᠣᠯᠬᠤ ᠶᠤᠮ ᠤᠤ? ᠵᠡᠭᠦᠳᠦᠯᠡᠵᠦ ᠴᠤ᠌ ᠴᠢᠳᠠᠬᠤ ᠦᠭᠡᠢ᠃ ᠠᠢ ᠳ᠋ᠠ ᠬᠥᠭᠡᠷᠦᠬᠦᠢ᠂ ᠠᠪᠠᠢ ᠴᠢᠨᠢ ᠭᠡᠵᠦ ᠶᠠᠮᠠᠷ ᠴᠤ᠌ ᠪᠤᠶᠠᠨ ᠦᠭᠡᠢ ᠬᠥᠮᠥᠨ ᠶᠤᠮ ᠪᠢᠯᠡ? ᠨᠠᠰᠤ ᠪᠠᠷ ᠢᠶᠠᠨ ᠵᠣᠪᠠᠵᠤ ᠵᠦᠳᠡᠷᠡᠵᠦ ᠯᠠ ᠶᠠᠪᠤᠯᠠ᠂ ᠲᠡᠭᠡᠭᠡᠳ ᠪᠠᠰᠠ ᠣᠬᠣᠷ ᠨᠠᠰᠤᠯᠠᠯᠠ᠂ ᠭᠡᠴᠡᠭᠥᠥ ᠶᠤᠮ ᠠ᠋᠁ ᠶᠠᠳᠠᠬᠤ ᠳᠤ ᠨᠢᠭᠡ ᠰᠢᠨᠡ ᠬᠤᠪᠴᠠᠰᠤ ᠴᠤ᠌ ᠡᠮᠦᠰᠴᠦ ᠠᠮᠵᠢᠭ᠍ᠰᠠᠨ ᠦᠭᠡᠢ ᠡ᠁ ᠭᠡᠶᠡ ᠳᠠᠬᠢᠵᠤ ᠢᠷᠡᠭᠰᠡᠨ ᠲᠡᠷᠡ ᠬᠠᠷᠢᠨ ᠰᠠᠢᠬᠠᠨ ᠠᠮᠢᠳᠤᠷᠠᠵᠤ ᠪᠠᠢᠨᠠ᠁》 ᠭᠡᠪᠡ᠃《 ᠳᠠᠬᠢᠵᠤ ᠢᠷᠡᠭᠰᠡᠨ 》 ᠭᠡᠬᠦ ᠦᠭᠡ ᠵᠢ ᠰᠣᠨᠣᠰᠤᠭᠠᠳ ᠪᠢ ᠰᠣᠴᠢᠵᠤ《 ᠮᠢᠨᠤ ᠠᠪᠠᠢ ᠳᠠᠬᠢᠵᠤ ᠢᠷᠡᠭᠰᠡᠨ ᠶᠤᠮ ᠤᠤ? ᠬᠠᠮᠢᠭᠠ ᠪᠠᠢᠭᠠ ᠶᠤᠮ? ᠶᠠᠭᠠᠬᠢᠭᠠᠳ ᠨᠠᠳᠠ ᠳᠤ ᠬᠡᠯᠡᠳᠡᠭ ᠦᠭᠡᠢ ᠶᠤᠮ? 》 ᠭᠡᠪᠡᠯ᠂《 ᠠᠴᠢ ᠬᠡᠦᠬᠡᠨ ᠴᠢᠨᠢ ᠳᠠᠷᠤᠢ ᠠᠪᠠᠢ ᠴᠢᠨᠢ ᠶᠤᠮ᠃ ᠠᠪᠠᠢ ᠴᠢᠨᠢ ᠶᠠᠪᠤᠬᠤ ᠦᠶᠡ ᠳ᠋ᠡᠭᠡᠨ ᠨᠠᠳᠠ ᠳᠤ ᠬᠡᠯᠡᠭᠰᠡᠨ᠄〈 ᠴᠢ ᠮᠠᠨ ᠤ ᠴᠠᠬᠠᠷ ᠤᠨ ᠡᠭᠦᠳᠡᠨ ᠳᠤ ᠨᠠᠰᠤ ᠪᠠᠷ ᠢᠶᠠᠨ ᠵᠢᠳᠬᠦᠯᠡ᠂ ᠪᠢ ᠨᠢᠳᠦ ᠨᠢᠭᠤᠷ ᠢᠶᠠᠨ ᠠᠯᠳᠠᠵᠤ ( ᠠᠪᠤ ᠬᠣᠶᠠᠷ ᠨᠢᠳᠦᠨ ᠤ ᠬᠠᠷᠠᠭᠠ ᠪᠡᠨ ᠠᠯᠳᠠᠭᠰᠠᠨ ᠶᠤᠮ ) ᠴᠢᠮᠠ ᠳᠤ ᠶᠠᠮᠠᠷ ᠴᠤ᠌ ᠳᠥᠰᠢᠭ ᠪᠣᠯᠣᠭᠰᠠᠨ ᠦᠭᠡᠢ᠂ ᠡᠷᠡ ᠬᠥᠮᠥᠨ ᠪᠣᠯᠣᠭᠠᠳ ᠬᠡᠷᠡᠭ ᠴᠤ᠌ ᠦᠭᠡᠢ ᠶᠤᠮ ᠪᠠᠢᠨᠠ᠂ ᠬᠤᠷᠳᠤᠨ ᠰᠢᠭ᠋ ᠦᠬᠢᠨ ᠪᠣᠯᠵᠤ ᠲᠥᠷᠥᠭᠡᠳ ᠴᠢᠮᠠᠶ᠋ᠢ ᠠᠰᠠᠷᠠᠶᠠ! 〉 ᠭᠡᠵᠦ ᠬᠡᠯᠡᠭᠰᠡᠨ ᠶᠤᠮ ᠰᠢᠤ ! ᠪᠢ ᠮᠡᠳᠡᠵᠥ ᠪᠠᠢᠨᠠ᠂ ᠠᠪᠠᠢ ᠴᠢᠨᠢ ᠦᠭᠡᠨ ᠳ᠋ᠡᠭᠡᠨ ᠭᠥᠷᠳᠡᠭ ᠭᠥᠮᠥᠨ ᠶᠤᠮ᠃ ᠦᠨᠡᠭᠡᠷ ᠬᠠᠷᠢᠨ ᠠᠬᠠ ᠴᠢᠨᠢ ᠬᠤᠷᠢᠮ ᠬᠢᠭᠡᠳ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠬᠡᠦᠬᠡᠳ ᠲᠠᠢ ᠪᠣᠯᠣᠯᠠ᠃ ᠪᠢ ᠬᠡᠦᠬᠡᠨ ᠦᠷᠡ ᠪᠠᠢᠬᠤ ᠭᠡᠭᠴᠢ ᠵᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠬᠡᠳᠦᠨ ᠰᠠᠷᠠ ᠪᠠᠷ ᠪᠣᠳᠣᠵᠤ ᠪᠣᠳᠣᠭᠠᠳ〈 ᠡᠷᠳᠡᠨᠢᠬᠤᠸᠠᠷ〉 ᠭᠡᠰᠡᠨ ᠨᠡᠷᠡ ᠪᠡᠯᠡᠳᠬᠡᠭᠰᠡᠨ ᠶᠤᠮ᠃ ᠭᠠᠷᠤᠭᠠᠳ ᠢᠷᠡᠭᠰᠡᠨ ᠨᠢ ᠦᠨᠡᠭᠡᠷ ᠬᠡᠦᠬᠡᠨ ᠦᠷᠡ ᠪᠠᠢᠵᠤ ᠮᠢᠨᠤ ᠡᠷᠳᠡᠨᠢᠴᠢᠯᠡᠵᠥ᠍ ᠪᠡᠯᠡᠳᠬᠡᠭᠰᠡᠨ ᠨᠡᠷᠡ ᠵᠢ ᠨᠠᠰᠤ ᠪᠠᠷ ᠢᠶᠠᠨ ᠪᠡᠶᠡ ᠳᠤ ᠪᠠᠨ ᠠᠪᠴᠤ ᠶᠠᠪᠤᠬᠤ ᠢᠷᠦᠭᠡᠯ ᠲᠠᠢ ᠬᠥᠮᠥᠨ ᠨᠢ ᠪᠠᠢᠪᠠ᠃ ᠴᠢ ᠬᠠᠷᠠ! ᠨᠠᠳᠠ ᠳᠤ ᠭᠤᠴᠢ ᠳᠥᠴᠢᠨ ᠠᠴᠢ ᠵᠢᠭᠡ ᠨᠠᠷ ᠪᠠᠢᠨᠠ! ᠡᠷᠳᠡᠨᠢᠬᠤᠸᠠᠷ ᠯᠠ ᠨᠠᠳᠠ ᠳᠦ ᠬᠠᠮᠤᠭ ᠡᠴᠡ ᠤᠯᠠᠨ ᠤᠲᠠᠰᠤ ᠢᠷᠡᠭᠦᠯᠵᠦ᠂ ᠤᠳᠠᠵᠤ ᠲᠦᠳᠡᠯ ᠦᠭᠡᠢ ᠦᠵᠡᠭᠥ ᠪᠠᠷ ᠢᠷᠡᠵᠦ᠂ ᠢᠷᠡᠬᠦ ᠵᠢᠨ ᠪᠣᠯᠭᠠᠨ ᠨᠠᠮᠠᠶ᠋ᠢ ᠠᠰᠠᠷᠠᠭᠠᠳ ᠶᠠᠪᠤᠳᠠᠭ ᠶᠤᠮ᠃ ᠲᠡᠷᠡ ᠠᠪᠠᠢ ᠴᠢᠨᠢ ᠪᠢᠰᠢ ᠭᠡᠵᠦ ᠦᠦ? ᠶᠠᠭ ᠮᠥᠨ! ᠪᠡᠶᠡ ᠮᠠᠭᠤᠳᠠᠭᠠᠳ ᠪᠣᠯᠬᠤ ᠦᠭᠡᠢ ᠪᠣᠯ ᠡᠷᠳᠡᠨᠢᠬᠤᠸᠠᠷ ᠢᠷᠡᠵᠦ ᠨᠠᠮᠠᠶ᠋ᠢ ᠨᠢᠭᠡ ᠰᠠᠢᠨ ᠰᠣᠷᠣᠭᠤᠯᠳᠠᠭᠠᠳ ᠭᠠᠷᠪᠠᠯ ᠪᠦᠷ ᠰᠠᠢᠬᠠᠨ ᠪᠣᠯᠴᠢᠬᠠᠳᠠᠭ ᠶᠤᠮ᠁》 ᠭᠡᠪᠡ᠃
ᠰᠡᠳᠬᠢᠯ ᠤᠨ ᠳᠥᠰᠢᠭ ᠭᠡᠵᠦ ᠦᠨᠡᠨ ᠳᠡᠬᠡᠨ ᠲᠥᠭᠥᠮᠬᠡᠨ ᠯᠠ ᠠᠵᠢ᠃ ᠤᠷᠳᠤ ᠨᠠᠰᠤᠯᠠᠬᠤ ᠵᠢᠨ ᠨᠢᠭᠤᠴᠠ ᠴᠤ᠌ ᠲᠡᠢᠮᠦ ᠶᠠᠷᠰᠢᠭ ᠲᠠᠢ ᠶᠠᠭᠤᠮᠠ ᠪᠢᠰᠢ ᠯᠠ ᠪᠠᠢᠨᠠ᠃
ᠠᠩᠬᠠ ᠲᠤᠮᠲᠠᠳᠤ ᠶᠢᠨ ᠡᠪᠦᠯ ᠦᠨ ᠠᠮᠠᠷᠠᠯᠲᠠ ᠶᠢᠨ ᠳᠠᠰᠬᠠᠯ
< ᠠᠮᠲᠠᠷᠬᠠᠨ ᠤᠩᠰᠢᠬᠤᠢ > ᠠᠴᠠ ᠬᠠᠭᠤᠯᠤᠨ ᠪᠢᠴᠢᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠭᠡᠷᠡᠯᠴᠢᠮᠡᠭ