ᠮᠠᠩᠬᠠᠨ ᠬᠠᠢᠯᠠᠰᠤ – ᠷᠠᠳᠨᠠᠪᠠᠽᠠᠷ Манхан хайлс – Раднаабазар
380 ᠷᠠᠳᠨᠠᠪᠠᠽᠠᠷ
1. ᠵᠤᠭᠠ
ᠮᠠᠩᠬᠠᠨ ᠬᠠᠠᠢᠯᠠᠰᠤ ᠶ᠋ᠢᠨ ᠴᠡᠴᠡᠭ ᠊ᠢ ᠵᠤᠭᠠ ᠭᠡᠳᠡᠭ
ᠮᠥᠴᠢᠷ ᠳᠦᠭᠦᠷᠡᠩ ᠳᠡᠯᠭᠡᠷᠡᠵᠦ ᠰᠢᠪᠠᠤᠬᠠᠢ ᠰᠢᠷᠭᠤᠬᠤ ᠵᠠᠢ ᠦᠭᠡᠢ
ᠰᠠᠭᠤᠳᠠᠯ ᠪᠦᠷᠢ ᠳ᠋ᠤ᠌ ᠢᠬᠴᠤᠷᠠᠬᠰᠠᠨ ᠨᠢᠮᠭᠡᠨ ᠳᠡᠯᠪᠢ ᠲᠡᠢ
ᠰᠠᠯᠠᠭᠠ ᠪᠣᠯᠭᠠᠨ ᠠᠳᠠᠯᠢᠬᠠᠨ ᠰᠠᠬᠤᠯᠢᠭ ᠵᠤᠵᠠᠭᠠᠨ ᠰᠠᠭᠤᠳᠠᠯ ᠲᠠᠢ ᠃
ᠵᠤᠭᠠ ᠂ ᠮᠠᠩᠬᠠᠨ ᠨᠤᠲᠤᠭ ᠦ᠋ᠨ ᠲᠡᠷᠢᠭᠦᠯᠡᠭᠴᠢ ᠴᠡᠴᠡᠭ
ᠵᠤᠭᠠ ᠂ ᠮᠣᠩᠭᠣᠯ ᠣᠷᠣᠨ ᠤ᠋ ᠲᠠᠩᠰᠤᠭ ᠦᠵᠡᠮᠵᠢ
ᠵᠤᠭᠠ ᠂ ᠮᠠᠩᠬᠠᠨ ᠭᠠᠵᠠᠷ ᠤ᠋ᠨ ᠨᠣᠭᠣᠭᠠᠨ ᠬᠦᠷᠮᠡ
ᠵᠤᠭᠠ ᠂ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠰᠢᠮᠡ ᠲᠡᠢ ᠬᠣᠭᠣᠯᠠ ᠃
2. ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ
ᠬᠤᠶ᠋ᠢᠴᠢ ᠦᠶᠡ ᠪᠡᠨ ᠭᠡᠵᠦ ᠤᠷᠢᠳ ᠢ᠋ᠶ᠋ᠠᠷ ᠵᠤᠭᠠ ᠪᠠᠨ ᠳᠡᠯᠭᠡᠷᠡᠭᠦᠯᠦᠭᠡᠳ
ᠬᠣᠵᠢᠮ ᠬᠤᠶ᠋ᠢᠨᠡ ᠰᠠᠶᠢ ᠨᠠᠪᠴᠢᠯᠠᠳᠠᠭ ᠨᠢ ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ
ᠢᠷᠡᠭᠡᠳᠦᠢ ᠮᠠᠷᠭᠠᠰᠢ ᠪᠠᠨ ᠭᠡᠵᠦ ᠡᠮᠦᠨᠡ ᠨᠢ ᠦᠷᠡ ᠪᠡᠨ ᠪᠣᠯᠪᠠᠰᠤᠷᠠᠭᠤᠯᠤᠭᠠᠳ
ᠠᠯᠢ ᠰᠡᠭᠦᠯ ᠳ᠋ᠦ᠍ᠨᠢ ᠰᠠᠶᠢ ᠨᠠᠬᠢᠶᠠᠯᠠᠳᠠᠭ ᠨᠢ ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠠ᠋ ᠃
ᠬᠠᠪᠤᠷ ᠤ᠋ᠨ ᠬᠠᠭᠰᠠᠷᠠᠭᠠᠨ ᠳ᠋ᠤ᠌ ᠭᠠᠩᠳᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠬᠠᠨᠤᠭᠰᠠᠨ ᠪᠣᠷᠣᠭᠠᠨ ᠳ᠋ᠤ᠌ ᠤᠰᠤᠲᠤᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ᠌ ᠨᠠᠷᠠᠰᠢᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠬᠠᠷᠠ ᠰᠢᠭᠤᠷᠭᠠᠨ ᠳ᠋ᠤ᠌ ᠨᠠᠶ᠋ᠢᠭᠤᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠃
ᠭᠡᠷ ᠦ᠋ᠨ ᠨᠢᠷᠤᠭᠤ ᠬᠢᠪᠡᠯ ᠨᠠᠷᠠᠰᠤᠨ ᠮᠣᠳᠣ ᠠ᠋ᠴᠠ ᠪᠡᠬᠢ
ᠬᠠᠰᠠᠭ ᠤ᠋ᠨ ᠬᠦᠷᠳᠦ ᠬᠢᠪᠡᠯ ᠬᠠᠪᠲᠠᠰᠤᠨ ᠲᠡᠮᠦᠷ ᠡᠴᠡ ᠬᠠᠲᠠᠭᠤ
ᠰᠢᠷᠡᠭᠡᠨ ᠨᠢᠭᠤᠷ ᠬᠢᠪᠡᠯ ᠤᠰᠤᠨ ᠵᠢᠷᠤᠭ ᠤ᠋ᠨ ᠬᠤᠸᠠᠷ ᠲᠠᠢ
ᠰᠢᠳᠠᠮ ᠪᠢᠯᠠᠭᠤ ᠬᠢᠪᠡᠯ ᠭᠠᠵᠢᠬᠤ ᠦᠭᠡᠢ ᠪᠠᠲᠤ ᠴᠢᠨᠠᠷ ᠲᠠᠢ ᠃
ᠥᠨᠳᠥᠷ ᠨᠠᠰᠤᠯᠠᠭᠰᠠᠨ ᠴᠤ᠌ ᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠵᠠᠷᠠᠬᠤ ᠦᠭᠡᠢ
ᠤᠨᠠᠭᠠᠵᠤ ᠬᠠᠶᠠᠭᠰᠠᠨ ᠴᠤ᠌ ᠠᠮᠠᠷᠬᠠᠨ ᠦᠵᠢᠷᠡᠬᠦ ᠦᠭᠡᠢ
ᠤᠶᠠᠭᠠ ᠪᠣᠯᠭᠠᠵᠤ ᠵᠠᠷᠤᠪᠠᠯ ᠤᠳᠠ ᠶ᠋ᠢ ᠠᠷᠪᠠ ᠡᠯᠡᠭᠡᠨᠡ
ᠥᠯᠥᠭᠡᠢ ᠪᠣᠯᠭᠠᠵᠤ ᠬᠡᠷᠡᠭᠯᠡᠪᠡᠯ ᠦᠷᠡ ᠶ᠋ᠢ ᠮᠢᠩᠭᠠ ᠥᠰᠬᠡᠨᠡ ᠃
ᠤᠨᠵᠢᠯᠭᠠ ᠪᠠᠷ ᠨᠢ ᠰᠠᠭᠰᠤ ᠭᠦᠷᠦᠪᠡᠯ ᠬᠥᠮᠦᠰ ᠦ᠋ᠨ ᠱᠠᠭᠰᠢᠯ
ᠤᠵᠢᠷᠬ᠋ᠠ ᠪᠠᠷ ᠨᠢ ᠡᠮᠡᠭᠡᠯ ᠵᠣᠬᠢᠶᠠᠪᠠᠯ ᠡᠷᠡᠴᠦᠦᠯ ᠦ᠋ᠨ ᠰᠠᠶ᠋ᠢᠮᠰᠡᠷᠡᠯ
ᠬᠣᠵᠤᠤᠯᠠ ᠶ᠋ᠢ ᠨᠢ ᠬᠢᠰᠠ ᠳ᠋ᠤ᠌ ᠬᠢᠪᠡᠯ ᠨᠡᠭᠦᠷᠡᠰᠦᠨ ᠦ᠌ ᠬᠤᠪᠢᠯᠭᠠᠨ
ᠬᠠᠯᠢᠰᠤ ᠶ᠋ᠢ ᠨᠢ ᠵᠤᠤᠬᠠᠨ ᠳ᠋ᠤ᠌ ᠬᠢᠪᠡᠯ ᠮᠣᠳᠣᠨ ᠤ᠋ ᠣᠷᠣᠨᠴᠣᠭ ᠃
ᠮᠠᠶ᠋ᠢᠵᠢᠬᠢ ᠤᠷᠭᠤᠭᠰᠠᠨ ᠢ᠋ᠶ᠋ᠠᠷ ᠨᠢ ᠠᠨᠵᠢᠰᠤᠨ ᠪᠥᠬᠡ ᠬᠢᠳᠡᠭ
ᠮᠥᠬᠡᠷᠤᠤ ᠰᠠᠯᠠᠭᠠ ᠪᠠᠷ ᠨᠢ ᠦᠬᠡᠷ ᠦ᠋ᠨ ᠪᠤᠭᠤᠯᠠᠭᠠ ᠬᠢᠳᠡᠭ
ᠢᠲᠠᠭᠠᠷ ᠪᠡᠶᠡ ᠪᠡᠷ ᠨᠢ ᠲᠡᠷᠭᠡᠨ ᠠᠷᠠᠯ ᠬᠢᠳᠡᠭ
ᠮᠠᠲᠠᠶ᠋ᠢᠬᠰᠠᠨ ᠰᠠᠯᠠᠭᠠ ᠪᠠᠷ ᠨᠢ ᠴᠢᠷᠭᠠ ᠶ᠋ᠢᠨ ᠬᠢᠲᠤᠭᠠ ᠬᠢᠳᠡᠭ ᠃
ᠠᠰᠬᠠᠨ ᠳᠠᠩᠰᠠ ᠪᠠᠷ ᠨᠢ ᠠᠨᠵᠢᠰᠤᠨ ᠤᠯᠠ ᠬᠢᠳᠡᠭ
ᠠᠷᠤᠨᠰᠢ ᠰᠠᠯᠠᠭᠠ ᠲᠠᠢ ᠪᠠᠷ ᠨᠢ ᠠᠨᠵᠢᠰᠤᠨ ᠪᠠᠷᠢᠭᠤᠯ ᠬᠢᠳᠡᠭ
ᠢᠳᠡ ᠪᠡᠷ ᠨᠢ ᠵᠦᠰᠦᠭᠡᠳ ᠠᠨᠵᠢᠰᠤᠨ ᠰᠤᠮᠤ ᠬᠢᠳᠡᠭ
ᠠᠯᠠᠭᠠᠨ ᠳᠥᠷᠪᠡᠯᠵᠢᠯᠡᠭᠡᠳ ᠠᠨᠵᠢᠰᠤᠨ ᠳᠥᠷᠪᠡᠯᠵᠢ ᠬᠢᠳᠡᠭ ᠃
ᠠᠷᠪᠠᠭᠠᠷ ᠰᠠᠯᠠᠭᠠ ᠲᠠᠢ ᠪᠠᠷ ᠨᠢ ᠡᠪᠡᠰᠦᠨ ᠠᠴᠠ ᠬᠢᠨᠡ
ᠠᠳᠬᠤᠨ ᠭᠤᠷᠪᠠᠯᠵᠢᠨ ᠢ᠋ᠶ᠋ᠠᠷ ᠨᠢ ᠱᠠᠬᠠᠢ ᠶ᠋ᠢᠨ ᠬᠡᠯᠪᠡᠷᠢ ᠬᠢᠨᠡ
ᠣᠨᠴᠠᠭᠠᠢ ᠰᠠᠯᠠᠭᠠ ᠪᠠᠷ ᠨᠢ ᠮᠢᠯᠠᠭᠠ ᠶ᠋ᠢᠨ ᠡᠰᠢ ᠬᠢᠨᠡ
ᠤᠭ ᠳᠡᠯᠳᠡᠦ ᠪᠡᠷ ᠨᠢ ᠳᠡᠭᠡᠰᠦᠨ ᠦ᠌ ᠱᠦᠷᠭᠦᠭᠡᠯᠭᠡ ᠬᠢᠨᠡ ᠃
ᠬᠠᠪᠤᠷ ᠦ᠋ᠨ ᠡᠬᠢᠨ ᠳ᠋ᠦ᠍ ᠠᠯᠲᠠᠨ ᠪᠠᠮᠪᠤ ᠶ᠋ᠢ ᠰᠦᠷᠦᠭ ᠢ᠋ᠶ᠋ᠡᠷ ᠪᠤᠶ᠋ᠢᠵᠢᠭᠤᠯᠤᠨᠠ
ᠬᠠᠪᠤᠷᠵᠢᠶᠠ ᠶ᠋ᠢᠨ ᠭᠠᠴᠢᠭ ᠲᠤ᠌ ᠪᠣᠯᠵᠣᠮᠣᠷ ᠰᠢᠪᠠᠭᠤ ᠶ᠋ᠢ ᠠᠰᠠᠷᠠᠨ ᠲᠡᠵᠢᠭᠡᠨᠡ
ᠬᠠᠪᠤᠷ ᠤ᠋ᠨ ᠬᠠᠷᠠᠰᠤ ᠳ᠋ᠤ᠌ ᠡᠪᠡᠰᠦᠨ ᠲᠡᠵᠢᠭᠡᠯᠲᠡᠨ ᠦ᠌ ᠰᠢᠷᠣᠢ ᠶ᠋ᠢ ᠲᠣᠭᠣᠨᠠ
ᠬᠠᠯᠠᠭᠤᠨ ᠨᠠᠮᠤᠷ ᠲᠤ᠌ ᠠᠳᠤᠭᠤᠰᠤ ᠠᠮᠢᠲᠠᠨ ᠤ᠋ ᠬᠣᠷᠣᠬᠠᠢ ᠶ᠋ᠢ ᠬᠥᠭᠡᠭᠡᠨᠡ ᠃
ᠨᠠᠪᠴᠢ ᠮᠥᠴᠢᠷ ᠨᠢ ᠡᠪᠡᠰᠦᠨ ᠲᠡᠵᠢᠭᠡᠯᠲᠡᠨ ᠦ᠌ ᠰᠢᠮᠡᠲᠡᠢ ᠬᠣᠭᠣᠯᠠ
ᠨᠠᠷᠢᠨ ᠨᠠᠮᠠᠭᠠ ᠨᠢ ᠴᠦ᠍ ᠠᠳᠤᠭᠤᠰᠤ ᠠᠮᠢᠲᠠᠨ ᠤ᠋ ᠲᠠᠩᠰᠤᠭ ᠲᠡᠵᠢᠭᠡᠯ
ᠮᠠᠩᠬᠠ ᠶ᠋ᠢ ᠨᠤᠶ᠋ᠢᠷᠰᠤᠭᠤᠯᠵᠥ ᠰᠢᠪᠠᠭᠤ ᠶ᠋ᠢ ᠨᠤᠲᠤᠭᠰᠢᠭᠤᠯᠤᠭᠠᠳ ᠰᠡᠬᠥᠶ᠋ᠢᠨ ᠰᠦᠨᠳᠡᠷᠯᠡᠨᠡ
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠪᠦᠬᠦᠯᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠨᠤᠲᠤᠭ ᠤ᠋ᠨ ᠡᠷᠳᠡᠨᠢ ᠃
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠮᠠᠶ᠋ᠢᠵᠢᠬᠢ ᠨᠢ ᠪᠣᠯᠪᠠᠴᠤ ᠶᠠᠰᠤ ᠬᠠᠲᠠᠭᠤ ᠮᠣᠳᠣ
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠬᠠᠶ᠋ᠢᠵᠢᠬᠢ ᠨᠢ ᠪᠣᠯᠪᠠᠴᠤ ᠬᠡᠷᠡᠭᠰᠡᠯ ᠪᠦᠷᠢᠨ ᠮᠣᠳᠣ
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠦᠷᠡ ᠪᠡᠨ ᠡᠷᠭᠦᠵᠦ ᠤᠷᠭᠤᠭᠰᠠᠨ ᠰᠣᠳᠣᠨ ᠮᠣᠳᠣ
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠢᠷᠡᠭᠡᠳᠦᠢ ᠪᠡᠨ ᠲᠠᠨᠢᠵᠤ ᠤᠷᠭᠤᠭᠰᠠᠨ ᠰᠤᠤᠲᠤ ᠮᠣᠳᠣ ᠃
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠦᠷᠡ ᠨᠢ ᠲᠠᠰᠤᠷᠠᠬᠤ ᠦᠭᠡᠢ ᠥᠷᠯᠥᠭ ᠮᠣᠳᠣ
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠦᠨᠳᠦᠰᠦ ᠨᠢ ᠢᠯᠵᠠᠷᠠᠬᠤ ᠦᠭᠡᠢ ᠰᠢᠳᠢᠲᠦ ᠮᠣᠳᠣ
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠥᠩᠭᠡ ᠨᠢ ᠬᠤᠪᠢᠷᠠᠬᠤ ᠦᠭᠡᠢ ᠬᠤᠪᠢᠯᠭᠠᠨ ᠮᠣᠳᠣ
ᠮᠠᠩᠬᠠᠨ ᠬᠠᠶ᠋ᠢᠯᠠᠰᠤ ᠂ ᠴᠢᠨᠠᠷ ᠨᠢ ᠬᠤᠪᠢᠰᠬᠤ ᠦᠭᠡᠢ ᠠᠷᠰᠢ ᠶ᠋ᠢᠨ ᠮᠣᠳᠣ ᠃
2011. 6. 29
ᠦᠰᠦᠭ ᠠᠮᠢᠯᠠᠭᠤᠯᠤᠬᠴᠢ ᠄ ᠪᠠᠲᠥᠰᠥ᠋ᠷᠥᠩ
ᠬᠢᠨᠠᠬᠴᠢ ᠪᠠᠬᠰᠢ ᠄ ᠤᠤᠨᠬᠠᠨᠰᠤᠠ ᠂ ᠢᠷᠡᠬᠡᠲᠥᠢ ᠂ ᠤᠤᠨᠬᠤᠨᠴᠡᠴᠡᠭ