ᠲᠠᠭᠲᠠᠭ᠎ᠠ- ᠳ ᠰᠡᠩᠭᠡ Тагтаа-д· сэнгэ ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ

  ᠳ · ᠰᠡᠩᠭᠡ

 

ᠲᠠᠭᠲᠠᠭᠠᠨ ᠳ᠋ᠤ᠌ ᠪᠦᠷᠭᠦᠳ ᠦ᠋ᠨ ᠬᠦᠴᠦᠨ ᠪᠠᠶ᠋ᠢᠬ᠋᠎ᠠ ᠦᠭᠡᠢ 

ᠲᠠᠭᠲᠠᠭᠠᠨ ᠳ᠋ᠤ᠌ ᠱᠣᠩᠬᠣᠷ ᠤ᠋ᠨ ᠵᠣᠷᠢᠭ ᠪᠠᠶ᠋ᠢᠬ᠋᠎ᠠ ᠦᠭᠡᠢ

ᠲᠠᠭᠲᠠᠭ᠎ᠠ ᠠᠯᠲᠠᠨ ᠭᠤᠷᠭᠤᠤᠯᠳᠠᠢ ᠰᠢᠭ᠋ ᠳᠠᠭᠤᠯᠠᠭ᠎ᠠ ᠦᠭᠡᠢ

ᠲᠠᠭᠲᠠᠭ᠎ᠠ ᠦᠨᠡᠨ ᠪᠠ ᠠᠮᠢᠳᠤᠷᠠᠯ ᠲᠠᠢ ᠨᠡᠶ᠋ᠢᠯᠡᠭᠡ ᠦᠭᠡᠢ

ᠭᠡᠪᠡᠴᠦ ᠤᠯᠠᠢ ᠦᠵᠡᠬᠦ ᠶ᠋ᠢ ᠬᠦᠰᠡᠳᠡᠭ ᠦᠭᠡᠢ  ᠳ᠋ᠦ᠍ ᠨᠢ

ᠭᠡᠮ ᠦᠭᠡᠢ ᠳᠠᠷᠤᠤ ᠵᠠᠩ ᠲᠠᠢ ᠳ᠋ᠤ᠌ ᠨᠢ

ᠭᠡᠷ ᠬᠥᠮᠦᠨ ᠬᠣᠶᠠᠷ ᠲᠤ᠌ ᠣᠶ᠋ᠢᠷ᠎ᠠ ᠪᠠᠶ᠋ᠢᠲᠠᠭ ᠲᠤ᠌ ᠨᠢ

ᠭᠡᠷᠡᠯᠲᠦ ᠴᠠᠭᠠᠨ ᠲᠠᠭᠳᠠᠭᠠᠨ ᠳ᠋ᠤ᠌ ᠬᠥᠮᠦᠨ ᠳᠤᠷᠠᠲᠠᠢ

ᠲᠠᠭᠲᠠᠭ᠎ᠠ ᠬᠥᠭᠡᠷᠦᠬᠦᠨ ᠂ ᠲᠠᠭᠲᠠᠭ᠎ᠠ ᠨᠣᠮᠣᠬᠠᠨ

ᠲᠠᠩᠳᠠ ᠣᠯᠠᠭᠤᠯᠠ ᠂ ᠲᠠᠩᠳᠠ ᠲᠠᠶ᠋ᠢᠪᠤᠩ ᠃

 

ᠲᠠᠭᠲᠠᠭ᠎ᠠ — ᠡᠩᠬᠡ ᠲᠠᠶ᠋ᠢᠪᠤᠩ ᠤ᠋ᠨ ᠪᠡᠯᠭᠡ ᠲᠡᠮᠳᠡᠭ  

ᠲᠠᠭᠲᠠᠭ᠎ᠠ —ᠡᠷᠬᠡ ᠴᠢᠯᠥᠭᠡᠨ ᠦ᠌ ᠪᠡᠯᠭᠡ ᠲᠡᠮᠳᠡᠭ  

ᠲᠠᠭᠲᠠᠭ᠎ᠠ — ᠳᠤᠷᠠᠯᠠᠯ ᠵᠢᠷᠭᠠᠯ ᠤ᠋ᠨ ᠪᠡᠯᠭᠡ ᠲᠡᠮᠳᠡᠭ 

ᠲᠠᠭᠲᠠᠭ᠎ᠠ — ᠰᠠᠢᠨ ᠰᠠᠢᠬᠠᠨ ᠤ᠋ ᠪᠡᠯᠭᠡ ᠲᠡᠮᠳᠡᠭ  

ᠬᠥᠬᠡ ᠴᠡᠩᠬᠡᠷ ᠣᠭᠲᠠᠷᠭᠤᠢ ᠶ᠋ᠢᠨ ᠭᠦᠨ ᠳ᠋ᠦ᠍  

ᠬᠥᠪᠦᠨ ᠬᠥᠭᠡᠷᠦᠨ ᠨᠢᠰᠴᠦ ᠶᠠᠪᠤᠬᠤ ᠳ᠋ᠤ᠌ ᠪᠠᠨ  

ᠬᠥᠮᠦᠨ ᠦ᠌ ᠭᠠᠷ ᠲᠤ᠌ ᠪᠠᠷᠢᠭᠳᠠᠭᠰᠠᠨ ᠦᠭᠡᠢ  

ᠬᠦᠰᠡᠯ ᠰᠡᠳᠬᠢᠯ ᠳ᠋ᠦ᠍ ᠨᠢ ᠣᠷᠣᠰᠢᠵᠤ ᠪᠠᠶ᠋ᠢᠨ᠎ᠠ ᠃

ᠲᠠᠭᠲᠠᠭ᠎ᠠ ᠬᠥᠭᠡᠷᠦᠬᠦᠨ ᠂ ᠲᠠᠭᠲᠠᠭ᠎ᠠ ᠨᠣᠮᠣᠬᠠᠨ

ᠲᠠᠩᠳᠠ ᠮᠥᠷᠥᠭᠡᠳᠦᠯ ᠂ ᠲᠠᠩᠳᠠ ᠡᠷᠡᠮᠡᠯᠵᠡᠯ ᠃

 

ᠬᠠᠯᠳᠠᠰᠢ ᠦᠭᠡᠢ ᠪᠠᠷᠢᠭᠳᠠᠰᠢ ᠦᠭᠡᠢ ᠰᠠᠢᠬᠠᠨ ᠲᠠᠭᠲᠠᠭ᠎ᠠ ᠶ᠋ᠢ  

ᠬᠠᠮᠤᠭ ᠲᠦᠷᠦᠭᠦᠨ ᠳ᠋ᠦ᠍ ᠬᠥᠮᠦᠨ ᠦ᠌ ᠭᠠᠷ ᠲᠤ᠌

ᠬᠠᠪᠤᠲᠠᠢ ᠵᠢᠷᠭᠠᠯᠲᠠᠢ ᠵᠥᠪᠯᠡᠯᠲᠦ ᠶ᠋ᠢᠨ ᠤᠯᠤᠰ ᠲᠦᠮᠡᠨ ᠳ᠋ᠦ᠍

ᠬᠠᠶ᠋ᠢᠷᠠᠲᠤ ᠯᠧᠨᠢᠨ ᠂ ᠰᠲ᠋ᠠᠯᠢᠨ ᠬᠣᠶᠠᠷ ᠪᠠᠷᠢᠵᠤ ᠥᠭᠭᠦᠯ᠎ᠡ ᠃

ᠬᠠᠨ ᠪᠦᠷᠭᠦᠳ ᠦ᠋ᠨ ᠳᠠᠯᠠᠪᠴᠢ ᠪᠠᠷ ᠵᠢᠭᠦᠷ ᠬᠢᠵᠦ

ᠬᠠᠷᠴᠠᠭᠠᠢ ᠱᠣᠩᠬᠣᠷ ᠤ᠋ᠨ ᠵᠣᠷᠢᠭ ᠢ᠋ᠶ᠋ᠠᠷ ᠵᠢᠷᠦᠬᠡ ᠬᠢᠵᠦ

ᠠᠯᠲᠠᠨ ᠭᠤᠷᠭᠤᠤᠯᠳᠠᠢ ᠶ᠋ᠢᠨ ᠳᠠᠭᠤ ᠪᠠᠷ ᠬᠣᠭᠣᠯᠠᠢ ᠬᠢᠵᠦ

ᠠᠮᠢᠳᠤᠷᠠᠯ ᠦᠨᠡᠨ ᠬᠣᠶᠠᠷ ᠢ᠋ᠶ᠋ᠠᠷ ᠬᠦᠴᠦ ᠶ᠋ᠢ ᠨᠢ ᠰᠡᠯᠪᠢᠯ᠎ᠡ ᠃

ᠲᠠᠭᠲᠠᠭ᠎ᠠ ᠬᠦᠴᠦ ᠲᠡᠢ ᠂ ᠲᠠᠭᠲᠠᠭ᠎ᠠ ᠵᠣᠷᠢᠭ ᠲᠠᠢ

ᠲᠠᠩᠳᠠ ᠬᠥᠮᠦᠨ ᠲᠡᠢ ᠂ ᠲᠠᠩᠳᠠ ᠣᠯᠠᠨ ᠲᠠᠢ ᠃

 

ᠠᠶᠤᠩᠭ᠎ᠠ ᠳᠡᠯᠪᠡᠷᠡᠬᠦ ᠪᠠᠷᠠᠭᠠᠨ ᠡᠭᠦᠯᠡᠰ  ᠦ᠋ᠨ ᠡᠰᠡᠷᠭᠦ

ᠠᠲ᠋ᠣᠮ ᠢ᠋ᠶ᠋ᠠᠷ ᠴᠡᠨᠡᠭᠯᠡᠭᠰᠡᠨ ᠭᠠᠯᠲᠤ ᠪᠥᠮᠪᠥᠭᠡ ᠶ᠋ᠢᠨ ᠡᠰᠡᠷᠭᠦ

ᠠᠶᠤᠯ ᠨᠥᠮᠥᠷᠦᠭᠰᠡᠨ ᠴᠠᠰᠤᠲᠤ ᠳᠠᠶ᠋ᠢᠨ ᠤ᠋ ᠡᠰᠡᠷᠭᠦ

ᠠᠷᠠᠳ ᠲᠦᠮᠡᠨ ᠦ᠌ ᠤᠷᠢᠶ᠎ᠠ ᠶ᠋ᠢ ᠬᠤᠰᠢᠭᠤᠨ ᠳ᠋ᠤ᠌ ᠪᠠᠨ ᠵᠠᠭᠤᠵᠤ

ᠬᠤᠨ ᠴᠠᠭᠠᠨ ᠲᠠᠭᠲᠠᠭ᠎ᠠ ᠵᠢᠭᠦᠷ ᠢ᠋ᠶ᠋ᠡᠨ ᠳᠡᠯᠭᠡᠨ

ᠬᠤᠷᠳᠤᠨ ᠵᠣᠷᠢᠭᠲᠤ ᠳᠠᠪᠢᠯᠲᠠ ᠪᠠᠷ ᠡᠭᠦᠯᠡᠰ ᠊ᠢ ᠢᠷᠠᠭᠰᠠᠭᠠᠷ

ᠬᠤᠷᠴᠠ ᠲᠤᠩᠭᠠᠯᠠᠭ ᠨᠠᠷᠠᠨ ᠤ᠋ ᠭᠡᠷᠡᠯ ᠊ᠢ ᠲᠤᠰᠬᠠᠨ

ᠬᠤᠳᠠᠯ ᠪᠠ ᠭᠦᠳᠬᠡᠯ ᠊ᠢ ᠢᠯᠠᠨ ᠨᠢᠰᠴᠦ ᠶᠠᠪᠤᠨ᠎ᠠ ᠲᠠᠭᠲᠠᠭ᠎ᠠ ᠬᠦᠴᠦ ᠲᠡᠢ ᠂ ᠲᠠᠭᠲᠠᠭ᠎ᠠ ᠢᠯᠠᠨ᠎ᠠ !

ᠲᠠᠩᠳᠠ ᠪᠢᠳᠡᠨ ᠲᠡᠢ ᠂ ᠲᠠᠩᠳᠠ ᠠᠯᠳᠠᠷᠠᠰᠢ !

 

   ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠰᠡᠴᠡᠨᠴᠢᠮᠡᠭ

   ᠬᠢᠨᠠᠭᠴᠢ ᠄ ᠣᠤᠠᠬᠠᠨᠰᠣ ‍ᠠ᠋