ᠮᠣᠩᠭᠣᠯ ᠦᠰᠦᠭ ᠮᠣᠯᠣᠷ ᠡᠷᠳᠡᠨᠢ-ᠳᠦᠷᠰᠦ ᠣᠢᠷᠠᠯᠴᠠᠭ᠎ᠠ ᠦᠭᠡᠰ-ᠪᠠ ᠫᠠ ᠠᠢᠮᠠᠭ Монгол үсэг молор эрдэнэ-дүрс ойролцоо үгс ᠰᠢᠯᠦᠭ ᠢᠷᠠᠭᠤ ᠨᠠᠢᠷᠠᠭ

ᠪᠠᠢᠭᠠᠯ ᠬᠢᠭᠡᠳ ᠪᠠᠢᠭᠠᠯᠢ

ᠪᠠᠢᠭᠠᠯ ᠨᠠᠭᠤᠷ ᠤ᠋ᠨ ᠤᠰᠤ

ᠪᠢᠯᠬᠠᠨ ᠪᠢᠯᠬᠠᠨ ᠳᠣᠨᠣᠯᠵᠠᠨ᠎ᠠ ᠂

ᠪᠠᠢᠭᠠᠯᠢ ᠳᠡᠯᠡᠬᠡᠢ ᠶ᠋ᠢᠨ ᠵᠤᠭᠠᠴᠠᠭᠴᠢᠳ

ᠪᠠᠬᠠᠳᠤᠨ ᠪᠠᠬᠠᠳᠤᠨ ᠰᠣᠨᠢᠷᠬᠠᠨ᠎ᠠ ᠃

ᠪᠠᠩᠵᠠ ᠬᠢᠭᠡᠳ ᠪᠠᠩᠵᠠᠯ

ᠵᠦᠰᠦᠭᠰᠡᠨ ᠬᠠᠪᠲᠠᠭᠠᠢ ᠮᠣᠳᠣ ᠪᠠᠷ

ᠪᠠᠩᠵᠠ ᠬᠢᠪᠡᠯ ᠰᠠᠢᠬᠠᠨ ᠂

ᠵᠤᠨ ᠤ᠋ ᠬᠠᠯᠠᠭᠤᠨ ᠡᠳᠦᠷ

ᠪᠠᠩᠵᠠᠯ ᠡᠮᠦᠰᠪᠡᠯ ᠰᠡᠷᠢᠭᠦᠬᠡᠨ ᠃

ᠪᠠᠬ᠎ᠠ ᠬᠢᠭᠡᠳ ᠪᠠᠭ᠎ᠠ

ᠪᠠᠢᠭᠠᠯᠢ ᠨᠡᠢᠭᠡᠮ ᠢ᠋ᠶ᠋ᠡᠨ ᠬᠤᠪᠢᠰᠬᠠᠬᠤ ᠪᠠᠷ

ᠪᠠᠬ᠎ᠠ ᠲᠠᠢ ᠴᠢᠷᠮᠠᠢᠬᠤ ᠰᠠᠢᠬᠠᠨ ᠂

ᠪᠠᠶᠠᠨ ᠮᠡᠳᠡᠯᠭᠡ ᠶ᠋ᠢ ᠡᠵᠡᠮᠰᠢᠬᠦ ᠪᠡᠷ

ᠪᠠᠭ᠎ᠠ ᠠ᠋ᠴᠠ ᠪᠠᠨ ᠰᠢᠮᠳᠠᠬᠤ ᠰᠠᠢᠬᠠᠨ ᠃

ᠪᠠᠭᠠᠪᠤᠷ ᠬᠢᠭᠡᠳ ᠪᠠᠭᠪᠤᠷ

ᠮᠥᠩᠭᠥᠨ ᠪᠠᠭᠠᠪᠤᠷ ᠲᠠᠢ

ᠮᠣᠷᠢᠨ ᠡᠮᠡᠭᠡᠯ ᠭᠣᠶᠣᠬᠠᠨ ᠂

ᠮᠣᠩᠭᠣᠯ ᠠᠮᠤ ᠲᠠᠢ

ᠮᠣᠳᠣᠨ ᠪᠠᠭᠪᠤᠷ ᠰᠠᠢᠬᠠᠨ ᠃

ᠪᠠᠭᠠᠰᠢ ᠬᠢᠭᠡᠳ ᠪᠠᠭᠰᠢ

ᠰᠣᠷᠲᠣᠭᠣ ᠵᠠᠯᠢ ᠲᠠᠢ

ᠠᠷᠭ᠎ᠠ ᠪᠠᠭᠠᠰᠢ ᠮᠠᠭᠤᠬᠠᠢ

ᠰᠣᠶᠣᠯ ᠡᠷᠳᠡᠮ ᠲᠡᠢ

ᠠᠷᠠᠳ ᠤ᠋ᠨ ᠪᠠᠭᠰᠢ ᠠᠴᠢᠲᠠᠢ ᠃

ᠪᠠᠭᠤᠷᠠᠢ ᠬᠢᠭᠡᠳ ᠪᠠᠭᠤᠷᠢ

ᠳᠣᠷᠣᠢ ᠪᠠᠭᠤᠷᠠᠢ ᠨᠥᠬᠥᠳ ᠢ᠋ᠶ᠋ᠡᠨ

ᠳᠠᠷᠤᠯᠠᠵᠤ ᠵᠣᠳᠣᠵᠤ ᠪᠣᠯᠬᠤ ᠦᠭᠡᠢ

ᠬᠠᠭᠤᠴᠢᠨ ᠪᠠᠷᠢᠯᠭ᠎ᠠ ᠶ᠋ᠢᠨ ᠪᠠᠭᠤᠷᠢ ᠶ᠋ᠢ

ᠬᠠᠭᠠᠯᠵᠤ ᠡᠪᠳᠡᠯᠡᠵᠦ ᠪᠣᠯᠬᠤ ᠦᠭᠡᠢ ᠃

ᠪᠠᠭᠤᠳᠠᠯ ᠬᠢᠭᠡᠳ ᠪᠣᠭᠣᠳᠠᠯ

ᠠᠰᠠᠷ ᠲᠠᠭᠲᠤ ᠲᠠᠢ

ᠬᠣᠲᠠ ᠶ᠋ᠢᠨ ᠪᠠᠭᠤᠳᠠᠯ ᠂

ᠠᠯᠠᠭ ᠪᠣᠭᠣᠳᠠᠯ ᠲᠠᠢ

ᠬᠤᠪᠴᠠᠰᠤ ᠪᠠᠷᠠᠭ᠎ᠠ ᠃

ᠪᠠᠭ ᠬᠢᠭᠡᠳ ᠪᠠᠭ᠎ᠠ

ᠨᠢᠭᠡ ᠨᠢ ᠮᠢᠨᠦ

ᠪᠠᠭ ᠤ᠋ᠨ ᠳᠠᠷᠤᠭ᠎ᠠ ᠂

ᠨᠥᠭᠥᠭᠡ ᠨᠢ ᠮᠢᠨᠦ

ᠪᠠᠭ᠎ᠠ ᠶ᠋ᠢᠨ ᠨᠠᠢᠵᠨ ᠃

ᠪᠠᠭᠪᠠᠬᠠᠢ ᠬᠢᠭᠡᠳ ᠪᠠᠭᠠᠪᠠᠭᠠᠢ

ᠬᠠᠷᠠᠩᠭᠤᠢ ᠰᠥᠨᠢ ᠨᠢᠰᠳᠡᠭ

ᠪᠠᠭᠪᠠᠬᠠᠢ ᠨᠢᠭᠡ ᠭᠠᠢᠬᠠᠮᠰᠢᠬ ᠂

ᠬᠠᠳᠠ ᠠᠭᠤᠯᠠᠨ ᠳ᠋ᠤ᠌ ᠨᠤᠲᠤᠭᠰᠢᠳᠠᠭ

ᠪᠠᠭᠠᠪᠠᠭᠠᠢ ᠬᠣᠪᠣᠷ ᠠᠮᠢᠲᠠᠨ ᠃

ᠪᠠᠷ᠎ᠠ ᠬᠢᠭᠡᠳ ᠢ᠋ᠶ᠋ᠡᠷ

ᠦᠢᠯᠡᠳᠪᠦᠷᠢ ᠵᠠᠪᠤᠳ᠋ ᠤ᠋ᠨ ᠪᠠᠷ᠎ᠠ

ᠥᠨᠳᠥᠷ ᠲᠡᠭᠷᠢ ᠶ᠋ᠢ ᠪᠠᠭᠠᠨᠠᠳᠠᠨ᠎ᠠ ᠂

ᠦᠰᠦᠭ ᠬᠡᠪᠯᠡᠯ ᠦ᠋ᠨ ᠢ᠋ᠶ᠋ᠡᠷ

ᠥᠷᠭᠡᠨ ᠮᠥᠷᠡᠨ ᠰᠢᠭ ᠮᠢᠷᠠᠯᠵᠠᠨ᠎ᠠ ᠃

ᠪᠠᠷ᠎ᠠ ᠬᠢᠭᠡᠳ ᠪᠠᠷᠠᠭ᠎ᠠ

ᠬᠣᠯᠠ ᠶ᠋ᠢᠨ ᠬᠣᠯᠠ ᠠ᠋ᠴᠠ ᠬᠠᠷᠠᠭᠳᠠᠭᠰᠠᠨ

ᠬᠣᠩᠭᠣᠷ ᠨᠤᠲᠤᠭ ᠤ᠋ᠨ ᠪᠠᠷ᠎ᠠ ᠂

ᠬᠤᠳᠠᠯᠳᠤᠭ᠎ᠠ ᠳᠡᠯᠭᠡᠭᠦᠷ ᠵᠢᠭᠲᠡᠷᠡᠭᠡᠳ

ᠬᠣᠲᠠ ᠳᠦᠭᠦᠷᠡᠩ ᠪᠠᠷᠠᠭ᠎ᠠ ᠃

ᠪᠠᠷᠰ ᠬᠢᠭᠡᠳ ᠪᠡᠷᠰᠡ

ᠠᠭᠤᠯᠠᠨ ᠳ᠋ᠤ᠌ ᠨᠤᠲᠤᠭᠰᠢᠳᠠᠭ

ᠠᠷᠰᠯᠠᠨ ᠪᠠᠷᠰ ᠲᠣᠭᠰᠢᠨ ᠂

ᠠᠪᠤ ᠶ᠋ᠢᠨ ᠨᠠᠭᠠᠳᠳᠠᠭ

ᠠᠯᠲᠠᠨ ᠪᠡᠷᠰᠡ ᠰᠠᠢᠬᠠᠨ ᠃

ᠪᠡᠬᠡ ᠬᠢᠭᠡᠳ ᠪᠡᠬᠢ

ᠪᠢᠷ ᠪᠡᠬᠡ ᠲᠡᠢ ᠨᠥᠬᠥᠷᠯᠡᠨ

ᠪᠢᠴᠢᠭ ᠰᠣᠶᠣᠯ ᠲᠠᠢ ᠲᠠᠨᠢᠯᠴᠠ ᠂

ᠪᠢᠯᠢᠭ ᠣᠶᠤᠨ ᠢ᠋ᠶ᠋ᠠᠨ ᠨᠡᠭᠡᠭᠡᠭᠳᠡᠭᠦᠯᠦᠨ

ᠪᠡᠬᠢ ᠰᠠᠭᠤᠷᠢ ᠳᠡᠯᠪᠢ ᠃

ᠪᠠᠯ ᠬᠢᠭᠡᠳ ᠪᠡᠯᠡ

ᠠᠭᠤᠯᠠᠨ ᠤ᠋ ᠡᠮᠦᠨ᠎ᠡ ᠪᠠᠯ ᠳ᠋ᠤ᠌

ᠰᠤᠷᠭᠠᠭᠤᠯᠢ ᠪᠠᠢᠭᠤᠯᠵᠤ ᠪᠠᠢᠨ᠎ᠠ ᠂

ᠣᠯᠤᠭᠰᠠᠨ ᠪᠡᠯᠡ ᠮᠥᠩᠭᠥ ᠪᠡᠨ

ᠰᠤᠷᠭᠠᠭᠤᠯᠢ ᠳ᠋ᠤ᠌ ᠨᠡᠮᠡᠷᠢᠯᠡᠬᠦ ᠪᠡᠷ ᠣᠴᠢᠨ᠎ᠠ ᠃

ᠪᠡᠯᠡᠭ ᠬᠢᠭᠡᠳ ᠪᠡᠯᠭᠡ

ᠪᠠᠷᠰ ᠵᠢᠯ ᠦ᠋ᠨ ᠡᠬᠢᠨ ᠦ᠌ ᠡᠳᠦᠷ

ᠪᠠᠭᠰᠢ ᠳ᠋ᠠᠭᠠᠨ ᠪᠡᠯᠡᠭ ᠬᠦᠷᠭᠡᠵᠡᠢ

ᠪᠠᠶᠠᠷᠯᠠᠵᠤ ᠰᠠᠭᠤᠭᠰᠠᠨ ᠪᠠᠭᠰᠢ ᠮᠢᠨᠢ

ᠪᠡᠯᠭᠡ ᠲᠡᠢ ᠦᠭᠡ ᠪᠡᠷ ᠢᠷᠦᠭᠡᠵᠡᠢ ᠃

ᠪᠢᠯᠠᠭᠤ ᠬᠢᠭᠡᠳ ᠪᠢᠯᠡᠭᠦᠦ

ᠠᠪᠤ ᠶ᠋ᠢᠨ ᠮᠢᠨᠢ ᠪᠠᠷᠢᠳᠠᠭ

ᠠᠪᠠ ᠶ᠋ᠢᠨ ᠪᠢᠯᠠᠭᠤ ᠰᠠᠢᠬᠠᠨ ᠂

ᠠᠬ᠎ᠠ ᠶ᠋ᠢᠨ ᠮᠢᠨᠢ ᠵᠠᠷᠤᠳᠠᠭ

ᠠᠷᠵᠠᠭᠠᠷ ᠪᠢᠯᠡᠭᠦᠦ ᠰᠠᠢᠬᠠᠨ ᠃

ᠪᠢᠯᠢᠭ ᠬᠢᠭᠡᠳ ᠪᠡᠯᠡᠭ

ᠣᠶᠤᠨ ᠪᠢᠯᠢᠭ ᠢ᠋ᠶ᠋ᠡᠨ ᠬᠤᠷᠴᠠᠯᠠᠭᠠᠳ

ᠣᠳᠣᠨ ᠭᠠᠷᠠᠭ ᠊ᠢ ᠰᠢᠨᠵᠢᠶ᠎ᠡ ᠂

ᠣᠯᠠᠨ ᠪᠡᠯᠡᠭ ᠢ᠋ᠶ᠋ᠡᠨ ᠠᠪᠤᠭᠠᠳ

ᠣᠢᠷ᠎ᠠ ᠰᠠᠳᠤᠨ ᠳ᠋ᠠᠭᠠᠨ ᠲᠣᠭᠣᠷᠢᠶ᠎ᠠ ᠃

ᠪᠢᠷ ᠬᠢᠭᠡᠳ ᠪᠢᠷ᠎ᠠ

ᠪᠢᠷ ᠴᠠᠭᠠᠰᠤ ᠪᠠᠨ

ᠬᠠᠢᠷᠠᠯᠠᠵᠤ ᠵᠠᠷᠤᠨ᠎ᠠ ᠂

ᠪᠢᠷ᠎ᠠ ᠴᠢᠳᠠᠯ ᠢ᠋ᠶ᠋ᠠᠨ

ᠪᠣᠯᠪᠠᠰᠤᠷᠠᠵᠤ ᠶᠠᠪᠤᠨ᠎ᠠ ᠃

ᠪᠤᠭ ᠬᠢᠭᠡᠳ ᠪᠤᠭᠤ

ᠴᠡᠯᠡᠭᠡᠷ ᠲᠠᠯ᠎ᠠ ᠳ᠋ᠠᠭᠠᠨ ᠪᠡᠯᠴᠢᠭᠡᠷ ᠲᠡᠢ

ᠪᠤᠭ ᠮᠠᠯ ᠮᠢᠨᠢ ᠰᠤᠪᠤᠳ ᠂

ᠴᠡᠩᠬᠡᠷ ᠠᠭᠤᠯᠠᠨ ᠳ᠋ᠠᠭᠠᠨ ᠨᠤᠲᠤᠭ ᠲᠠᠢ

ᠪᠤᠭᠤ ᠰᠤᠭᠤ ᠮᠢᠨᠢ ᠡᠷᠳᠡᠨᠢ ᠃

ᠪᠣᠭᠣᠮ᠎ᠠ ᠬᠢᠭᠡᠳ ᠪᠣᠭᠣᠮᠢ

ᠠᠳᠤᠭᠤ ᠮᠠᠯ ᠳ᠋ᠤ᠌ ᠳᠡᠯᠭᠡᠷᠡᠭᠰᠡᠨ

ᠪᠣᠭᠣᠮ᠎ᠠ ᠡᠪᠡᠳᠴᠢᠨ ᠬᠠᠯᠳᠠᠪᠤᠷᠢᠲᠠᠢ ᠂

ᠠᠷᠳᠠᠭ ᠲᠣᠭᠰᠢᠨ ᠊ᠢ ᠨᠠᠮᠤᠳᠬᠠᠭᠰᠠᠨ

ᠪᠣᠭᠣᠮᠢ ᠴᠠᠯᠮ᠎ᠠ ᠡᠷᠴᠢᠲᠡᠢ ᠃

ᠪᠣᠮᠪᠣ ᠬᠢᠭᠡᠳ ᠪᠤᠮᠪᠠ

ᠪᠣᠷᠤᠯᠵᠢᠨ ᠰᠦᠮ᠎ᠡ ᠶ᠋ᠢᠨ ᠪᠣᠮᠪᠣ ᠯᠠᠮ᠎ᠠ

ᠥᠨᠳᠥᠷ ᠬᠦᠵᠦᠭᠦᠦ ᠲᠡᠢ ᠪᠤᠮᠪᠠ ᠲᠠᠢ ᠂

ᠪᠤᠰᠤᠳ ᠤ᠋ᠨ ᠶᠠᠭᠤᠮ᠎ᠠ ᠶ᠋ᠢ ᠮᠡᠬᠡᠯᠡᠨ ᠠᠪᠳᠠᠭ

ᠥᠯᠥᠨ ᠬᠣᠪᠳᠣᠭ ᠵᠠᠩ ᠲᠠᠢ ᠃

ᠪᠣᠱᠣᠭ᠎ᠠ ᠬᠢᠭᠡᠳ ᠪᠣᠰᠤᠭ᠎ᠠ

ᠡᠭᠦᠳᠡᠨ ᠪᠣᠱᠣᠭ᠎ᠠ ᠠᠯᠬᠤᠭᠠᠳ

ᠡᠷᠦᠬᠡ ᠭᠡᠷ ᠲᠦ᠍ ᠨᠢ ᠣᠷᠣᠬᠤ ᠳ᠋ᠤ᠌ ᠂

ᠡᠭᠴᠡ ᠪᠣᠰᠤᠭ᠎ᠠ ᠷᠠᠳᠢᠣ᠋

ᠡᠭᠡᠰᠢᠭ ᠳᠠᠭᠤᠤ ᠪᠠᠷ ᠤᠭᠲᠤᠯ᠎ᠠ ᠃

ᠪᠣᠱᠣᠭ᠎ᠠ ᠬᠢᠭᠡᠳ ᠪᠣᠱᠣᠭ

ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠣᠱᠣᠭ᠎ᠠ ᠶ᠋ᠢ ᠠᠯᠬᠤᠭᠰᠠᠨ ᠠ᠋ᠴᠠ

ᠰᠣᠶᠣᠯ ᠤ᠋ᠨ ᠰᠠᠢᠬᠠᠨ ᠊ᠢ ᠮᠡᠳᠡᠵᠡᠢ ᠂

ᠲᠡᠭᠷᠢ ᠶ᠋ᠢᠨ ᠪᠣᠱᠣᠭ ᠊ᠢ ᠬᠦᠯᠢᠶᠡᠬᠦ

ᠲᠡᠨᠡᠭ ᠦᠵᠡᠯᠲᠡ ᠶ᠋ᠢ ᠵᠢᠭᠰᠢᠵᠡᠢ ᠃

ᠪᠣᠲᠣᠭᠣ ᠬᠢᠭᠡᠳ ᠪᠣᠳᠣᠭ

ᠲᠡᠰᠢᠵᠦ ᠶᠠᠪᠤᠭ᠎ᠠ ᠲᠡᠮᠡᠭᠡ ᠶ᠋ᠢ

ᠪᠣᠢᠯᠠᠵᠤ ᠶᠠᠪᠤᠭ᠎ᠠ ᠪᠣᠲᠣᠭᠣ ᠲᠠᠢ ᠨᠢ ᠵᠢᠷᠤᠯ᠎ᠠ ᠂

ᠳᠡᠭᠦᠦ ᠮᠢᠨᠢ ᠪᠢᠷ ᠢ᠋ᠶ᠋ᠡᠨ ᠠᠪᠤᠭᠠᠳ

ᠳᠡᠭᠡᠭᠦᠷ ᠨᠢ ᠰᠢᠷᠭᠠᠯ ᠪᠣᠳᠣᠭ ᠣᠷᠣᠭᠤᠯᠤᠯ᠎ᠠ ᠂

ᠪᠤᠲᠠ ᠬᠢᠭᠡᠳ ᠪᠣᠳᠢ

ᠥᠰᠬᠡᠭᠰᠡᠨ ᠰᠦᠷᠦᠭ ᠮᠢᠨᠢ

ᠵᠠᠭᠤᠨ ᠪᠤᠲᠠ ᠪᠠᠢᠨ᠎ᠠ ᠂

ᠦᠵᠡᠭᠰᠡᠨ ᠨᠣᠮ ᠮᠢᠨᠢ

ᠲᠦᠮᠡᠨ ᠪᠣᠳᠢ ᠪᠠᠢᠨ᠎ᠠ ᠃

ᠪᠣᠷ ᠬᠢᠭᠡᠳ ᠪᠣᠷᠣ

ᠪᠤᠯᠠᠭ ᠤ᠋ᠨ ᠤᠰᠤ

ᠪᠣᠷ ᠪᠣᠷ ᠣᠷᠭᠢᠯᠤᠨ᠎ᠠ ᠂

ᠪᠣᠷᠣ ᠲᠠᠤᠯᠠᠢ

ᠪᠤᠲᠠ ᠰᠦᠯᠵᠢᠨ ᠭᠦᠶᠦᠨ᠎ᠡ ᠃

ᠪᠣᠷᠣᠭ ᠬᠢᠭᠡᠳ ᠪᠣᠷᠣᠭ᠎ᠠ

ᠪᠣᠷᠣᠭ ᠡᠪᠡᠰᠦ

ᠰᠢᠮ᠎ᠡ ᠲᠡᠵᠢᠭᠡᠯ ᠮᠠᠭᠤ ᠂

ᠪᠣᠷᠣᠭ᠎ᠠ ᠬᠤᠷ᠎ᠠ

ᠴᠢᠭᠢᠭ ᠠᠮᠢᠯᠠᠯ ᠶᠡᠬᠡ ᠃

ᠪᠤᠭᠤ ᠬᠢᠭᠡᠳ ᠪᠠᠭᠤᠤ

ᠠᠭᠯᠠᠭ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌

ᠪᠤᠭᠤ ᠰᠤᠭᠤ ᠡᠯᠳᠡᠩ ᠪᠣᠢ ᠂

ᠠᠷᠠᠳ ᠤ᠋ᠨ ᠠᠮᠢᠳᠤᠷᠠᠯ ᠰᠠᠢᠵᠢᠷᠠᠭᠰᠠᠨ ᠠ᠋ᠴᠠ

ᠪᠠᠭᠤᠤ ᠴᠠᠭ ᠡᠯᠪᠡᠭ ᠪᠣᠢ ᠃

ᠪᠤᠭ ᠬᠢᠭᠡᠳ ᠪᠤᠬ᠎ᠠ

ᠠᠭᠤᠤ ᠨᠠᠮ ᠤ᠋ᠨ ᠠᠴᠢ ᠪᠠᠷ

ᠠᠳᠠ ᠪᠤᠭ ᠳᠠᠷᠤᠭᠳᠠᠵᠠᠢ ᠂

ᠠᠲᠠᠷ ᠲᠠᠯ᠎ᠠ ᠶ᠋ᠢᠨ ᠪᠡᠯᠴᠢᠭᠡᠷ ᠲᠦ᠍

ᠠᠯᠠᠭ ᠪᠤᠬ᠎ᠠ ᠣᠯᠠᠰᠢᠷᠠᠵᠠᠢ ᠃

ᠪᠤᠯᠠᠭ ᠬᠢᠭᠡᠳ ᠪᠤᠯᠠᠭ᠎ᠠ

ᠲᠤᠩᠭᠠᠯᠠᠭ ᠪᠤᠯᠠᠭ ᠤ᠋ᠨ ᠬᠥᠪᠡᠭᠦᠨ ᠳ᠋ᠦ᠍

ᠲᠣᠷᠭᠠᠨ ᠨᠣᠭᠣᠭᠠᠨ ᠵᠦᠯᠭᠡ ᠲᠡᠢ ᠂

ᠬᠥᠨᠳᠡᠢ ᠪᠦᠳᠦᠭᠦᠨ ᠮᠣᠳᠣᠨ ᠳ᠋ᠤ᠌

ᠬᠥᠬᠥᠲᠡᠨ ᠪᠤᠯᠠᠭ᠎ᠠ ᠠᠪᠠᠷᠢᠨ ᠪᠣᠢ ᠃

ᠪᠤᠯᠲᠤ ᠬᠢᠭᠡᠳ ᠪᠣᠯᠣᠳ

ᠪᠤᠯᠲᠤ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠥᠳᠡᠯᠦᠯᠴᠡᠵᠦ

ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠ ᠶ᠋ᠢ ᠳᠡᠮᠵᠢᠶ᠎ᠡ ᠂

ᠪᠣᠯᠣᠳ ᠲᠡᠮᠦᠷ ᠦ᠋ᠨ ᠠᠭᠤᠷᠬᠠᠢ ᠶ᠋ᠢ

ᠪᠤᠰᠢᠭᠤ ᠲᠦᠷᠭᠡᠨ ᠨᠡᠭᠡᠭᠡᠶ᠎ᠡ ᠃

ᠪᠤᠲᠠ ᠬᠢᠭᠡᠳ ᠪᠣᠳᠢ

ᠪᠥᠮᠪᠥᠷᠴᠡᠭ ᠢ᠋ᠶ᠋ᠡᠨ ᠪᠢᠳᠡ ᠬᠡᠦᠬᠡᠳ ᠲᠦ᠍ ᠥᠭᠭᠦᠶ᠎ᠡ

ᠪᠤᠲᠠ ᠪᠤᠲᠠ ᠴᠡᠴᠡᠭ ᠲᠡᠢ ᠨᠢ ᠥᠭᠭᠦᠶ᠎ᠡ ᠂

ᠪᠦᠲᠦᠭᠡᠯ ᠢ᠋ᠶ᠋ᠡᠨ ᠪᠢᠳᠡ ᠬᠡᠦᠬᠡᠳ ᠲᠦ᠍ ᠥᠭᠭᠦᠶ᠎ᠡ

ᠪᠣᠳᠢ ᠪᠣᠳᠢ ᠨᠣᠮ ᠲᠠᠢ ᠨᠢ ᠥᠭᠭᠦᠶ᠎ᠡ ᠃

ᠪᠣᠳᠣᠩ ᠬᠢᠭᠡᠳ ᠪᠤᠳᠠᠩ

ᠠᠮᠠᠰᠠᠷ ᠨᠢ ᠪᠠᠭ᠎ᠠ ᠪᠣᠳᠣᠩ ᠰᠠᠪᠠ ᠠ᠋ᠴᠠ

ᠠᠷᠢᠬᠢᠨ ᠤ᠋ ᠦᠨᠦᠷ ᠰᠡᠩᠭᠢᠨᠡᠨ᠎ᠡ ᠂

ᠠᠭᠤᠯᠠᠨ ᠤ᠋ ᠪᠤᠳᠠᠩ ᠮᠠᠨᠠᠨ

ᠠᠯᠭᠤᠷ ᠠᠶᠠᠷᠬᠠᠨ ᠲᠠᠭᠳᠠᠨ᠎ᠠ ᠃

ᠪᠦᠬᠦ ᠬᠢᠭᠡᠳ ᠪᠥᠬᠡ

ᠠᠲᠠᠨ ᠲᠡᠮᠡᠭᠡ ᠪᠦᠬᠦ ᠪᠣᠰᠬᠠᠨ

ᠠᠷᠪᠠᠨ ᠭᠠᠵᠠᠷ ᠤ᠋ᠨ ᠤᠷᠤᠯᠳᠤᠭᠠᠨ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌ ᠂

ᠠᠪᠤᠷᠭᠤ ᠪᠥᠬᠡ ᠣᠮᠣᠭ ᠪᠤᠰᠬᠠᠨ

ᠠᠰ ᠲᠤᠯᠤᠨ ᠪᠠᠷᠢᠯᠳᠤᠵᠤ ᠡᠬᠢᠯᠡᠪᠡ ᠃

ᠪᠥᠰ ᠬᠢᠭᠡᠳ ᠪᠦᠰᠡ

ᠤᠯᠠᠭᠠᠨ ᠪᠥᠰ ᠠᠪᠤᠭᠠᠳ

ᠤᠷᠲᠤ ᠲᠡᠷᠯᠢᠭ ᠣᠶᠣᠯ᠎ᠠ ᠂

ᠲᠣᠷᠭᠠᠨ ᠪᠦᠰᠡ ᠬᠢᠭᠡᠳ

ᠳᠤᠮᠳᠠᠭᠤᠷ ᠢ᠋ᠶ᠋ᠠᠨ ᠪᠦᠰᠡᠯᠡᠯ᠎ᠡ ᠃

ᠪᠦᠯᠦ ᠬᠢᠭᠡᠳ ᠪᠦᠯᠢ

ᠴᠡᠷᠢᠭ ᠲᠦ᠍ ᠮᠣᠷᠳᠠᠭᠰᠠᠨ ᠪᠦᠯᠦ ᠳᠡᠭᠦᠦ ᠮᠢᠨᠢ

ᠴᠡᠴᠡᠭ ᠦ᠋ᠨ ᠳᠤᠮᠳᠠᠭᠤᠷ ᠳᠣᠪᠲᠣᠯᠤᠭᠠᠳ ᠶᠠᠪᠤᠯ᠎ᠠ ᠂

ᠴᠡᠩᠬᠡᠷ ᠨᠤᠲᠤᠭ ᠲᠠᠢ ᠭᠡᠷ ᠪᠦᠯᠢ ᠨᠢ

ᠴᠢᠩ ᠰᠡᠳᠬᠢᠯ ᠦ᠋ᠨ ᠢᠷᠦᠭᠡᠯ ᠢ᠋ᠶ᠋ᠡᠷ ᠥᠲᠡᠯ᠎ᠡ ᠃

ᠪᠦᠲᠦᠬᠦ ᠬᠢᠭᠡᠳ ᠪᠦᠲᠡᠬᠦ

ᠪᠦᠲᠦᠬᠦ ᠶᠠᠪᠤᠳᠠᠯ

ᠪᠥᠮᠪᠥᠷᠭᠡᠨ ᠳ᠋ᠡᠭᠡᠨ ᠳᠡᠭᠡᠷ᠎ᠡ

ᠪᠦᠲᠡᠬᠦ ᠪᠢᠲᠡᠭᠦᠦ

ᠪᠦᠬᠦᠨ ᠳ᠋ᠦ᠍ ᠮᠠᠭᠤ ᠃

ᠪᠦᠳᠡᠭᠢ ᠬᠢᠭᠡᠳ ᠪᠡᠲᠡᠭᠢ

ᠰᠢᠷ᠎ᠠ ᠭᠡᠭᠡ ᠰᠤᠪᠤᠷᠠᠬᠤ ᠪᠠᠷ

ᠠᠭᠤᠯᠠᠰ ᠪᠦᠳᠡᠭᠢ ᠬᠠᠷᠠᠭᠳᠠᠳᠠᠭ ᠂

ᠰᠠᠨᠠᠭ᠎ᠠ ᠰᠡᠳᠬᠢᠯ ᠵᠣᠪᠠᠬᠤ ᠪᠠᠷ

ᠪᠡᠲᠡᠭᠢ ᠡᠪᠡᠳᠴᠢᠨ ᠣᠯᠳᠠᠭ ᠃

ᠪᠦᠷᠢᠶ᠎ᠡ ᠬᠢᠭᠡᠳ ᠪᠠᠷᠢᠶ᠎ᠠ

ᠴᠡᠴᠡᠭ ᠦ᠋ᠨ ᠶᠠᠭᠠᠨ ᠡᠭᠦᠯᠡᠰ ᠊ᠢ ᠢᠷᠠᠭᠠᠳ

ᠴᠡᠷᠢᠭ ᠦ᠋ᠨ ᠪᠦᠷᠢᠶ᠎ᠡ ᠬᠠᠩᠭᠢᠨᠠᠵᠤ ᠪᠠᠢᠨ᠎ᠠ ᠂

ᠠᠷᠠᠳ ᠴᠡᠷᠢᠭ ᠦ᠋ᠨ ᠠᠳᠬᠤᠨ ᠵᠡᠪᠰᠡᠭ

ᠠᠯᠲᠠᠨ ᠪᠠᠷᠢᠶ᠎ᠠ ᠰᠢᠭ ᠭᠢᠯᠠᠯᠵᠠᠵᠤ ᠪᠠᠢᠨ᠎ᠠ ᠃

ᠪᠦᠷ ᠬᠢᠭᠡᠳ ᠪᠦᠷᠢ

ᠤᠷᠲᠤ ᠠᠢᠯ ᠤ᠋ᠨ ᠰᠠᠴᠤᠷᠠ

ᠤᠬᠠᠭᠠᠨ ᠲᠠᠢ ᠲᠥᠷᠥᠭᠰᠡᠨ ᠬᠡᠦᠬᠡᠨ ᠂

ᠤᠰᠤ ᠭᠠᠯ ᠊ᠢ ᠪᠦᠷ ᠬᠠᠮᠵᠢᠭᠠᠳ

ᠤᠳᠠᠭ᠎ᠠ ᠪᠦᠷᠢ ᠵᠠᠷᠤᠭᠳᠠᠳᠠᠭ ᠃

ᠪᠦᠷᠬᠡ ᠬᠢᠭᠡᠳ ᠪᠦᠷᠭᠦ

ᠪᠤᠷᠭᠠᠰᠤ ᠪᠠᠷ ᠰᠦᠯᠵᠢᠵᠦ ᠭᠦᠷᠦᠭᠰᠡᠨ

ᠪᠥᠮᠪᠥᠭᠡᠷ ᠣᠷᠣᠢ ᠲᠠᠢ ᠪᠦᠷᠬᠡ ᠭᠡᠷ

ᠪᠣᠷᠣᠭᠠᠨ ᠨᠠᠷᠠ ᠶ᠋ᠢ ᠬᠠᠯᠬᠠᠯᠠᠳᠠᠭ

ᠪᠣᠮᠪᠣᠭᠣᠷ ᠪᠦᠷᠬᠦ ᠮᠠᠯᠠᠭᠠᠢ ᠃