ᠤᠯᠠᠭᠠᠨᠪᠠᠭᠠᠲᠤᠷ ᠠᠴᠠ ᠴᠡᠷᠡᠨᠳᠤᠯᠮᠠ ᠳ᠋ᠠᠭᠠᠨ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ - ᠷ ᠂ ᠴᠣᠢᠨᠣᠮ Улаанбаатараас цэрэндуламдаа бичсэн захидал - Р ᠂ Чойном
326ᠤᠯᠠᠭᠠᠨᠪᠠᠭᠠᠲᠤᠷ ᠠᠴᠠ ᠴᠡᠷᠡᠨᠳᠤᠯᠮᠠ ᠳ᠋ᠠᠭᠠᠨ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ
ᠠᠯᠠᠭᠬᠠᠨ ᠬᠣᠷᠸ᠋ᠠ ᠶᠢᠨ ᠣᠴᠢᠷ ᠲᠠᠨᠢᠭᠠ ᠥᠬᠡᠢ
ᠠᠷᠪᠠᠨ ᠵᠢᠷᠭᠤᠭᠠᠨ ᠨᠠᠰᠤᠨ ᠤ ᠮᠢᠨᠢ ᠵᠡᠭᠦᠳᠦ ᠰᠢᠭ᠌
ᠠᠰᠢᠲᠠᠶ᠋ᠢᠬᠠᠨ ᠲᠠᠶ᠋ᠢᠪᠤᠩ ᠬᠥᠳᠡᠭᠡ ᠲᠡᠷᠲᠡᠭᠡ ᠳᠤ
ᠠᠮᠠᠷᠠᠭᠬᠠᠨ ᠴᠢ ᠮᠢᠨᠢ ᠰᠠᠶ᠋ᠢᠨ ᠰᠠᠭᠤᠨᠠ ᠦᠦ
ᠨᠠᠭᠤᠷ ᠤᠨ ᠰᠢᠪᠠᠭᠤ ᠰᠢᠭ᠋ ᠢᠵᠢᠯᠢᠳᠦᠨ ᠳᠠᠰᠤᠭᠰᠠᠨ
ᠨᠤᠲᠤᠭ ᠦᠨ ᠵᠤᠨ ᠢ ᠰᠠᠨᠠᠨ ᠰᠠᠨᠠᠨ
ᠨᠢᠭᠤᠴᠠᠬᠠᠨ ᠭᠤᠨᠢᠭ ᠢᠶ᠋ᠠᠨ ᠭᠠᠭᠴᠠ ᠪᠠᠷ ᠶ᠋ᠢᠠᠨ ᠡᠭᠦᠷᠴᠦ
ᠨᠢᠯᠪᠤᠰᠤ ᠶᠤᠭᠠᠨ ᠤᠨᠠᠭᠠᠵᠤ ᠰᠠᠭᠤᠨᠠ ᠦᠦ
ᠰᠠᠭᠤᠭᠰᠠᠨ ᠶᠠᠪᠤᠭᠰᠠᠨ ᠳᠤᠷᠠᠰᠬᠠᠯᠲᠤ ᠭᠠᠵᠠᠷ
ᠰᠤᠮᠤ ᠶᠢᠨ ᠲᠥᠪ ᠡᠯᠦᠢ ᠬᠣᠯᠣᠶ᠋ᠢᠬᠠᠨ
ᠬᠦᠦ ᠴᠢᠨᠢ ᠲᠡᠨᠳᠡ ᠥᠬᠡᠢ ᠪᠣᠯᠬᠤ ᠪᠠᠷ
ᠬᠦᠢᠲᠡᠨ ᠪᠠᠷᠤᠭᠠᠷ ᠪᠠᠶ᠋ᠢᠭᠠ ᠪᠣᠯᠪᠠ ᠦᠦ
ᠠᠮᠠᠷᠠᠭᠯᠠᠨ ᠳᠠᠰᠤᠭᠰᠠᠨ ᠰᠡᠳᠬᠢᠯ ᠭᠡᠳᠡᠭ
ᠠᠷᠭᠠᠯᠠᠵᠤ ᠪᠣᠯᠳᠠᠭ ᠥᠬᠡᠢ ᠬᠡᠴᠡᠭᠦᠦ ᠪᠣᠯᠬᠤ ᠪᠠᠷ
ᠠᠶ᠋ᠢᠮᠠᠭ ᠠᠴᠠ ᠣᠴᠢᠲᠠᠭ ᠰᠢᠤᠳᠠᠨ ᠤ ᠵᠠᠮ ᠢ
ᠠᠮᠢᠲᠠᠨ ᠠ᠋ᠴᠠ ᠨᠢᠭᠤᠴᠠᠬᠠᠢ ᠰᠢᠷᠲᠡᠨ ᠪᠠᠶ᠋ᠢᠨᠠ ᠦᠦ
ᠵᠢᠷᠦᠬᠡ ᠵᠦᠰᠦᠭᠰᠡᠨ ᠰᠢᠨᠡᠬᠡᠨ ᠰᠢᠷᠬᠠ
ᠵᠦᠢᠷᠯᠡᠵᠦ ᠪᠣᠯᠤᠮᠠ ᠲᠡᠷᠡ ᠵᠠᠮ ᠤᠨ
ᠬᠣᠯᠠ ᠶᠢᠨ ᠦᠵᠦᠭᠦᠷ ᠲᠤ ᠪᠢ ᠴᠢᠨᠢ ᠴᠢᠮᠠᠶ᠋ᠢ
ᠬᠣᠨᠣᠨ ᠥᠨᠵᠢᠨ ᠰᠠᠨᠠᠭᠰᠠᠭᠠᠷ ᠶᠠᠪᠤᠶᠠ
ᠬᠥᠮᠦᠨ ᠤ ᠬᠥᠮᠦᠨ ᠢ ᠰᠠᠨᠠᠨᠠ ᠭᠡᠳᠡᠭ
ᠬᠦᠨᠳᠦ ᠪᠣᠯᠪᠠᠴᠤ ᠠᠮᠲᠠᠲᠠᠢ ᠪᠠᠶ᠋ᠢᠳᠠᠭ ᠢ
ᠢᠳᠡᠷ ᠨᠠᠰᠤᠨ ᠳᠠᠭᠠᠨ ᠠᠩᠵᠠᠭᠠᠷᠠᠬᠤ ᠨᠢ ᠥᠬᠡᠢ
ᠡᠶ᠋ᠢᠮᠦ ᠯᠡ ᠬᠡᠴᠡᠭᠦᠦ ᠳᠠᠰᠳᠠᠭ ᠶᠤᠮ ᠪᠠᠶ᠋ᠢᠨᠠ ᠃
ᠠᠲᠠᠷ ᠲᠠᠯᠠ ᠳ᠋ᠠᠭᠠᠨ ᠳᠤᠷᠠ ᠪᠠᠷ ᠥᠰᠦᠭᠰᠡᠨ
ᠠᠷᠠᠳ ᠰᠢᠯᠦᠭᠴᠢ ᠶ᠋ᠢᠨ ᠤᠶᠠᠬᠠᠨ ᠵᠢᠷᠦᠬᠡ
ᠠᠯᠠᠭᠬᠠᠨ ᠨᠢᠳᠦᠨ ᠳᠤ ᠴᠢᠨᠢ ᠤᠶ᠋ᠢᠵᠤ ᠤᠨᠠᠬᠤ
ᠠᠪᠤ ᠶᠢᠨ ᠦᠶᠡ ᠶᠢᠨ ᠢᠷᠦᠭᠡᠯ ᠶᠤᠮ ᠪᠠᠶ᠋ᠢᠬᠠ
ᠡᠨᠡ ᠬᠦᠷᠲᠡᠯᠡ ᠵᠣᠷᠢᠭ ᠢᠶ᠋ᠠᠷ ᠢᠶ᠋ᠠᠨ ᠶᠠᠪᠤᠭᠰᠠᠨ
ᠷᠢᠨᠴᠢᠨ ᠤ ᠬᠦᠦ ᠶᠢᠨ ᠪᠡᠶᠡ ᠰᠡᠳᠬᠢᠯ
ᠡᠷᠪᠡᠭᠡᠷ ᠬᠥᠭᠡᠷᠦᠬᠦᠨ ᠬᠥᠮᠦᠰᠬᠡᠨ ᠳᠤ ᠴᠢᠨᠢ ᠳᠡᠭᠡᠭᠡᠳᠡᠭᠦᠯᠬᠦ
ᠡᠵᠢ ᠶᠢᠨ ᠦᠶᠡ ᠶᠢᠨ ᠲᠥᠭᠡᠷᠭᠡ ᠶᠤᠮ ᠪᠠᠶ᠋ᠢᠬᠠ ᠃
ᠪᠤᠮ ᠪᠤᠵᠢᠭᠢᠨᠠᠭᠰᠠᠨ ᠬᠣᠲᠠ ᠶᠢᠨ ᠭᠠᠵᠠᠷ
ᠪᠤᠵᠠᠭᠠᠢ ᠥᠬᠢᠳ ᠤᠨ ᠳᠠᠪᠠᠯᠭᠠᠨ ᠳᠤᠮᠳᠠ
ᠵᠠᠶᠠᠭᠠᠨ ᠤ ᠡᠷᠬᠡ ᠪᠠᠷ ᠬᠣᠯᠪᠣᠭᠳᠠᠨ ᠤᠷᠤᠰᠬᠤ
ᠵᠠᠪᠢ ᠶᠢᠨ ᠠᠳᠠᠯᠢ ᠭᠠᠭᠴᠠᠭᠠᠷᠳᠠᠨ ᠶᠠᠪᠤᠬᠤ ᠳᠤ
ᠡᠷᠪᠡᠭᠡᠷ ᠬᠥᠮᠦᠰᠭᠡᠲᠠᠢ ᠴᠢᠮᠠ ᠲᠠᠢ ᠮᠢᠨᠢ
ᠡᠩ ᠵᠡᠷᠭᠡᠴᠡᠬᠦ ᠨᠢ ᠥᠬᠡᠢ ᠪᠠᠶ᠋ᠢᠨᠠ ᠂
ᠳᠦᠷᠯᠡᠭᠡᠷ ᠨᠢᠳᠦᠨ ᠠᠮᠠᠷᠠᠭ ᠲᠠᠢ ᠮᠢᠨᠢ
ᠳ᠋ᠦᠢᠵᠦ ᠬᠠᠷᠠᠭᠳᠠᠬᠤ ᠨᠢ ᠠᠯᠠᠭᠠ ᠪᠠᠶ᠋ᠢᠨᠠ ᠃
ᠳᠡᠭᠦᠵᠢᠩ ᠬᠣᠯᠠ ᠶᠢᠨ ᠴᠡᠩᠬᠡᠷ ᠠᠭᠤᠯᠠᠰ ᠢ
ᠳᠡᠭᠦᠯᠢᠭᠡᠳ ᠭᠠᠷᠬᠤ ᠴᠢᠳᠠᠯ ᠪᠠᠶ᠋ᠢᠪᠠᠴᠤ
ᠳᠤᠷᠠᠯᠠᠭᠰᠠᠨ ᠵᠣᠷᠬ᠋ᠠ ᠪᠠᠷ ᠬᠠᠶ᠋ᠢᠷᠠᠲᠤ ᠴᠢᠮᠠ ᠳᠠᠭᠠᠨ
ᠳᠠᠭᠤᠯᠠᠭᠠᠳ ᠬᠥᠷᠬᠥ ᠠᠷᠭᠠ ᠨᠢ ᠥᠬᠡᠢ ᠯᠠ ᠁
ᠠᠭᠤᠵᠢᠮ ᠬᠣᠯᠠ ᠶᠢᠨ ᠪᠤᠳᠠᠩᠲᠤ ᠬᠥᠨᠳᠡᠢ ᠶᠢ
ᠤᠭᠤᠬᠢᠯᠠᠭᠠᠳ ᠭᠠᠲᠤᠯᠬᠤ ᠲᠡᠩᠬᠡᠯ ᠪᠠᠶ᠋ᠢᠪᠠᠴᠤ
ᠤᠶᠠᠷᠠᠭᠰᠠᠨ ᠵᠣᠷᠢᠭ ᠢᠶ᠋ᠠᠷ ᠴᠢᠮᠠ ᠶᠤᠭᠠᠨ
ᠠᠭᠤᠯᠵᠠᠨ ᠲᠡᠪᠡᠷᠢᠬᠦ ᠪᠣᠯᠤᠮᠵᠢ ᠥᠬᠡᠢ ᠯᠠ ᠁
ᠠᠯᠠᠭ ᠲᠠᠢ ᠴᠣᠭᠣᠭ ᠲᠠᠢ ᠡᠨᠡᠬᠡᠨ ᠬᠣᠷᠸ᠋ᠠ ᠳᠤ
ᠠᠵᠠ ᠪᠠᠷ ᠳᠤᠲᠠᠭᠤ ᠲᠥᠷᠥᠭᠰᠡᠨ ᠶᠤᠮ ᠪᠠᠶ᠋ᠢᠯᠭᠦᠢ
ᠠᠮᠠᠷᠠᠭ ᠴᠢᠮᠠ ᠲᠠᠢ ᠪᠠᠨ ᠲᠤᠷᠠ ᠪᠠᠷ ᠵᠢᠷᠭᠠᠬᠤ
ᠠᠯᠬᠤᠮ ᠭᠠᠵᠠᠷ ᠴᠦ᠍ ᠣᠯᠳᠠᠳᠠᠭ ᠪᠣᠯᠤᠭᠠᠰᠠᠢ ᠃
ᠬᠣᠵᠢᠬᠤ ᠳᠤᠷᠠᠲᠠᠢ ᠡᠨᠡᠬᠡᠨ ᠽᠠᠮᠪᠤᠯᠢᠩ ᠳᠤ
ᠬᠣᠩᠰᠢᠶᠠᠷ ᠳᠤᠲᠠᠭᠤ ᠲᠥᠷᠥᠭᠰᠡᠨ ᠶᠤᠮ ᠪᠠᠶ᠋ᠢᠯᠭᠦᠢ
ᠬᠣᠩᠭᠣᠷ ᠴᠢᠮᠠ ᠲᠠᠢ ᠪᠠᠨ ᠬᠠᠨᠲᠠᠯᠠ ᠵᠢᠷᠭᠠᠬᠤ
ᠬᠣᠩᠬᠣᠷ ᠬᠣᠩᠭᠢᠯ ᠴᠦ᠍ ᠣᠯᠳᠠᠳᠠᠭ ᠪᠣᠯᠤᠭᠠᠰᠠᠢ ᠃
ᠵᠦᠢᠲᠡᠢ ᠢᠨᠠᠭ ᠤᠨ ᠮᠥᠷᠦᠭᠡᠰᠦᠯ ᠪᠣᠯᠵᠣ
ᠵᠦᠳᠡᠷᠡᠭᠰᠡᠨ ᠵᠦᠳᠡᠷᠡᠯ ᠢᠶ᠋ᠠᠨ ᠬᠡᠯᠡᠶᠡ ᠭᠡᠪᠡᠯ ᠭᠦ᠋
ᠵᠡᠭᠦᠨ ᠲᠡᠶ᠋ᠢᠰᠢ ᠪᠠᠨ ᠦᠯᠢᠶᠡᠬᠦ ᠰᠠᠯᠬᠢᠨ ᠳᠡᠭᠡᠷᠡ
ᠵᠢᠷᠦᠬᠡ ᠪᠠᠨ ᠲᠠᠯᠪᠢᠭᠠᠳ ᠶᠠᠪᠤᠭᠤᠯᠬᠤ ᠶᠤᠮᠰᠠᠨ
ᠨᠢᠭᠤᠴᠠᠬᠠᠨ ᠠᠮᠠᠷᠠᠭ ᠤᠨ ᠰᠠᠨᠠᠭᠠᠰᠢᠷᠠᠯ ᠢᠶ᠋ᠠᠨ
ᠨᠣᠲᠠᠯᠠᠨ ᠪᠠᠭᠲᠠᠭᠠᠨ ᠬᠡᠯᠡᠶᠡ ᠭᠡᠪᠡᠯ ᠭᠦ᠋
ᠨᠤᠲᠤᠭ ᠤᠨ ᠵᠦᠭ ᠤᠨ ᠡᠭᠦᠯᠡᠨ ᠳᠤᠨᠢ ᠪᠣᠯ
ᠨᠢᠯᠪᠤᠰᠤ ᠪᠠᠨ ᠳᠠᠶ᠋ᠢᠯᠭᠠᠭᠠᠳ ᠢᠯᠡᠭᠡᠬᠦ ᠶᠤᠮᠰᠠᠨ ᠃
ᠵᠢᠭᠠᠬᠠᠨ ᠵᠢᠷᠤᠭ ᠢ ᠴᠢᠨᠢ ᠰᠢᠷᠲᠡᠵᠦ ᠰᠠᠭᠤᠬᠤ ᠳᠤ
ᠵᠢᠷᠭᠠᠯ ᠤᠨ ᠳᠤᠮᠳᠠ ᠵᠣᠪᠠᠯᠠᠩ ᠠᠮᠲᠠᠭᠳᠠᠬᠤ ᠶᠤᠮ
ᠵᠣᠯᠭᠠᠵᠤ ᠬᠠᠶᠠ ᠴᠢᠮᠠᠶ᠋ᠢ ᠪᠠᠨ ᠵᠡᠭᠦᠳᠦᠯᠡᠬᠦ ᠳᠤ
ᠵᠣᠪᠠᠯᠠᠩ ᠤᠨ ᠳᠤᠮᠳᠠᠬᠢ ᠵᠢᠷᠭᠠᠯ ᠠᠮᠲᠠᠭᠳᠠᠬᠤ ᠶᠤᠮ
ᠡᠳᠦᠷ ᠤᠨ ᠪᠣᠳᠣᠯ ᠰᠥᠨᠢ ᠶᠢᠨ ᠵᠡᠭᠦᠳᠦ ᠪᠠᠨ
ᠥᠭᠦᠯᠡᠵᠦ ᠴᠢᠮᠠ ᠳᠠᠭᠠᠨ ᠲᠣᠭᠠᠴᠢᠶᠠ ᠭᠡᠪᠡᠯ
ᠪᠡᠶᠡ ᠰᠡᠳᠬᠢᠯ ᠤᠨ ᠵᠣᠪᠠᠯ ᠵᠢᠷᠭᠠᠯ
ᠪᠢᠴᠢᠭ ᠦᠨ ᠳᠡᠪᠲᠡᠷ ᠲᠤ ᠪᠠᠭᠲᠠᠬᠤ ᠥᠬᠡᠢ ᠶᠤᠮ ᠃
1974 ᠂ 10 ᠂ 24
《 ᠷ · ᠴᠣᠶ᠋ᠢᠨᠣᠮ ᠦ᠋ᠨ ᠰᠢᠯᠦᠭ ᠵᠣᠬᠢᠶᠠᠯ ᠦ᠋ᠨ ᠬᠤᠷᠢᠶᠠᠬᠤᠢ — 》
— ᠤᠶᠠᠩᠬ᠋ᠠ ᠶ᠋ᠢᠨ ᠰᠢᠯᠦᠭ ᠡᠴᠡ ᠬᠠᠭᠤᠯᠪᠠ ᠃
ᠪᠢ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠤᠠᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠤᠨᠤᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠣᠳᠣᠨᠭᠡᠷᠡᠯ
ᠬᠢᠨᠠᠭᠴᠢ ᠄ ᠣᠳᠣᠨᠭᠡᠷᠡᠯ