ᠦᠦᠷ ᠶ᠋ᠢᠡᠷ ᠪᠢᠴᠢᠭᠰᠡᠨ ᠰᠢᠯᠦᠭ — ᠷ · ᠴᠣᠢᠨᠣᠮ Үүрээр бичсэн шүлэг — Р · Чойном
644ᠦᠦᠷ ᠶ᠋ᠢᠡᠷ ᠪᠢᠴᠢᠭᠰᠡᠨ ᠰᠢᠯᠦᠭ
ᠦᠦᠷ ᠶ᠋ᠢᠡᠷ ᠂ ᠮᠢᠨᠦ ᠬᠣᠰᠢᠭᠤ
ᠦᠨᠦᠰᠦᠯᠲᠡ ᠳᠤ ᠴᠤᠴᠠᠬ᠋ᠠ ᠶᠤᠮ ᠤᠤ ᠂
ᠦᠵᠦᠭ ᠪᠡᠬᠡ ᠬᠣᠶᠠᠷ ᠮᠢᠨᠢ
ᠦᠷᠭᠡᠯᠡᠨ ᠨᠣᠵᠣᠭᠣᠷᠠᠬ᠋ᠠ ᠶᠤᠮ ᠤᠤ ᠃
ᠠᠷᠠᠳ ᠰᠢᠯᠦᠭᠴᠢ ᠶ᠋ᠢᠨ ᠵᠢᠷᠦᠬᠡ
ᠠᠮᠠᠷᠠᠭ ᠦ᠋ᠨ ᠡᠪᠦᠷ ᠲᠤ ᠦᠯᠡᠲᠡᠭᠡ ᠤᠤ ᠂
ᠠᠷᠲᠠᠭ ᠣᠩᠭᠣᠨ ᠦᠭᠡᠰ ᠨᠢ
ᠠᠶ᠋ᠢᠯ ᠦ᠋ᠨ ᠭᠡᠷ ᠲᠤ ᠬᠣᠴᠣᠷᠤᠬ᠋ᠠ ᠦᠦ ᠃
ᠬᠡᠯᠬᠢᠶᠡ ᠭᠡᠰᠡᠨ ᠰᠢᠯᠦᠭ
ᠬᠡᠴᠡᠭᠦᠦ ᠴᠦ᠍ ᠪᠣᠯᠤᠭᠰᠠᠨ ᠪᠠᠶ᠋ᠢᠬᠤ ᠰᠢᠭ᠋
ᠬᠡᠯᠡᠶᠡ ᠭᠡᠰᠡᠨ ᠦᠭᠡ
ᠬᠡᠷᠡᠭ ᠦᠭᠡᠢ ᠴᠤ᠌ ᠪᠣᠯᠤᠭᠰᠠᠨ ᠪᠠᠶ᠋ᠢᠬᠤ ᠰᠢᠭ᠋ ᠃
ᠤᠷᠲᠤ ᠬᠣᠶ᠋ᠢᠲᠤ ᠠᠶ᠋ᠢᠯ ᠦ᠋ᠳ ᠦ᠋ᠨ
ᠤᠷᠲᠤ ᠬᠣᠰᠢᠭᠤᠲᠤ ᠨᠤᠭᠤᠳ ᠪᠠᠶ᠋ᠢᠲᠤᠭᠠᠢ
ᠤᠯᠢᠨ ᠬᠤᠴᠠᠲᠠᠭ ᠨᠣᠬᠠᠢ ᠬᠦᠷᠲᠡᠯᠡ
ᠤᠨᠲᠠᠵᠤ ᠪᠠᠶ᠋ᠢᠲᠠᠭ ᠴᠠᠭ ᠶ᠋ᠢᠠᠷ
ᠬᠠᠶ᠋ᠢᠷᠠᠲᠠᠢ ᠮᠢᠨᠦ ᠠᠮᠠᠷᠠᠭ ᠪᠦᠰᠡᠭᠦᠢ
ᠬᠠᠷᠠᠩᠭᠤᠢ ᠲᠩᠷᠢ ᠵᠡᠭᠦᠨ ᠬᠣᠶ᠋ᠢᠲᠤ ᠳᠡᠭᠡᠪᠦᠷ ᠊ᠢ
ᠬᠠᠤᠠᠬᠤᠵᠤ ᠴᠣᠭᠣᠯᠤᠭᠰᠠᠨ ᠴᠣᠯᠮᠣᠨ ᠣᠲᠣ
ᠪᠢᠲᠡ ᠭᠤᠷᠪᠠ ᠯᠠ ᠤᠨᠲᠠᠬ᠋ᠠ ᠦᠭᠡᠢ ᠪᠠᠶ᠋ᠢᠪᠠ
ᠪᠡᠶᠡ ᠪᠡᠶᠡ ᠪᠡᠨ ᠭᠡᠷᠡᠴᠢᠯᠡᠨ ᠦᠯᠡᠲᠡᠪᠡ ᠃
ᠲᠡᠨᠲᠡ ᠡᠨᠲᠡ ᠶᠠᠭᠤ ᠴᠤ᠌ ᠬᠡᠯᠴᠡᠭᠰᠡᠨ
ᠲᠩᠷᠢ ᠶ᠋ᠢᠨ ᠴᠣᠯᠮᠣᠨ ᠬᠡᠨ ᠳᠤ ᠴᠤ᠌ ᠬᠡᠯᠡᠬᠦ ᠦᠭᠡᠢ
ᠠᠮᠠ ᠬᠠᠯᠠᠭᠠᠳ ᠶᠠᠭᠠᠬᠢᠵᠤ ᠴᠤ᠌ ᠬᠠᠭᠤᠴᠢᠯᠠᠭᠰᠠᠨ
ᠠᠮᠠᠷᠠᠭ ᠪᠦᠰᠡᠭᠦᠢ ᠮᠢᠨᠢ ᠬᠥᠮᠦᠨ ᠳᠤ ᠶᠠᠷᠢᠬᠤ ᠦᠭᠡᠢ
ᠬᠠᠷᠢᠨ ᠪᠢ ᠯᠠ ᠰᠢᠯᠦᠭ ᠲᠡᠭᠡᠨ ᠬᠡᠯᠡᠨᠡ
ᠬᠠᠶ᠋ᠢᠷᠠᠲᠤ ᠨᠠᠶ᠋ᠢᠵᠠ ᠨᠤᠭᠤᠳ ᠲᠠᠭᠠᠨ ᠤᠩᠰᠢᠵᠤ ᠥᠭᠭᠦᠨᠡ
ᠨᠥᠭᠥᠭᠡᠲᠦᠷ ᠨᠢ ᠪᠣᠯᠬᠤ ᠳᠤ ᠨᠢᠭᠤᠴᠠ ᠵᠠᠲᠠᠷᠠᠵᠤ
ᠨᠥᠬᠥᠷ ᠳᠠᠶ᠋ᠢᠰᠤᠨ ᠬᠣᠶᠠᠷ ᠢᠯᠭᠠᠭᠲᠠᠬᠤ ᠪᠠᠨ ᠪᠣᠯᠢᠨᠠ ᠃
ᠶᠠᠭᠠᠬᠢᠬᠤ ᠪᠤᠢ ! ᠲᠠᠬᠢᠯᠠ ᠭᠡᠳ ᠪᠢᠲᠡᠨ ᠪ
ᠶᠠᠰᠤ ᠮᠢᠬᠠᠨ ᠠ᠋ᠴᠠ ᠬᠣᠷᠣᠬᠤ ᠪᠢᠰᠢ
ᠬᠠᠲᠠᠨ ᠳᠡᠯᠡᠬᠡᠢ ᠳᠤ ᠪᠢᠲᠡᠨ ᠬᠣᠶᠠᠷ
ᠬᠠᠶ᠋ᠢᠷᠠᠯᠠᠭᠰᠠᠨ ᠬᠠᠶ᠋ᠢᠷᠠ ᠪᠠᠷ ᠶ᠋ᠢᠠᠨ ᠪᠠᠬᠠᠷᠬᠠᠨᠠ ᠃
ᠬᠣᠩᠭᠣᠷ ᠪᠦᠰᠡᠭᠦᠢ ᠶ᠋ᠢᠨ ᠳᠡᠭᠡᠷᠡ ᠡᠴᠡ
ᠡᠭᠦᠯᠡ ᠮᠠᠨᠠᠨ ᠰᠢᠭ᠋ ᠨᠥᠮᠥᠷᠴᠦ
ᠬᠣᠷᠢᠨ ᠨᠢᠭᠡᠲᠦᠭᠡᠷ ᠵᠠᠭᠤᠨ ᠶ᠋ᠢᠠᠷ
ᠥᠷᠢᠯ ᠦ᠋ᠨ ᠪᠥᠮᠪᠥᠭᠡ ᠰᠠᠴᠤᠭᠰᠠᠨ
ᠬᠠᠯᠬᠠ ᠶ᠋ᠢᠨ ᠰᠢᠯᠦᠭᠴᠢ ᠮᠢᠬᠠᠨ ᠪᠣᠲᠠ
ᠬᠠᠲᠠᠭᠤ ᠵᠥᠭᠡᠯᠡᠨ ᠶᠡᠬᠡ ᠶ᠋ᠢ ᠦᠵᠡᠭᠰᠡᠨ
ᠬᠠᠩᠭᠠᠢ ᠂ ᠭᠣᠪᠢ ᠂ ᠬᠥᠮᠦᠨ ᠪ ᠂ ᠥᠪᠡᠷ ᠦ᠋ᠨ ᠳᠤ
ᠬᠠᠶ᠋ᠢᠷᠠ ᠠ᠋ᠴᠠ ᠪᠤᠰᠤᠳ ᠊ᠢ ᠨᠢ ᠲᠠᠶ᠋ᠢᠯᠵᠤ ᠦᠵᠡᠭᠰᠡᠨ ᠃
ᠨᠠᠮᠤᠷ ᠦ᠋ᠨ ᠬᠠᠷᠠᠴᠠ ᠰᠢᠭ᠋ ᠮᠠᠯ ᠦ᠋ᠨ ᠬᠠᠷᠠᠴᠠ ᠲᠠᠢ
ᠨᠠᠭᠠᠯᠢᠩᠬᠠᠢ ᠠᠮᠠᠷᠠᠭ ᠶ᠋ᠢᠠᠨ ᠬᠣᠵᠢᠮ ᠪᠢ
ᠮᠣᠩᠭᠣᠯ ᠰᠢᠯᠦᠭ ᠶ᠋ᠢᠡᠷ ᠵᠠᠯᠠᠭᠤ ᠬᠡᠪ ᠶ᠋ᠢᠡᠷ ᠨᠢ
ᠮᠣᠷᠢᠲᠠᠨ ᠠᠷᠠᠳ ᠲᠠᠭᠠᠨ ᠦᠯᠡᠲᠡᠭᠡᠨᠡ !
1974 .7.3
《 ᠷ · ᠴᠣᠶ᠋ᠢᠨᠣᠮ ᠤᠨ ᠰᠢᠯᠦᠭ ᠵᠣᠬᠢᠶᠠᠯ ᠤᠨ ᠬᠤᠷᠢᠶᠠᠬᠤᠢ — 》
— ᠤᠶᠠᠩᠭᠠ ᠶ᠋ᠢᠨ ᠰᠢᠯᠦᠭ ᠠ᠋ᠴᠠ ᠬᠠᠭᠤᠯᠪᠠ ᠃
ᠪᠢ᠊ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠳᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠣᠨᠣᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠴᠣᠭᠵᠢᠷᠭᠠᠯ
ᠬᠢᠨᠠᠭᠴᠢ ᠄ ᠣᠳᠬᠠᠨᠰᠣᠠ