ᠬᠡᠦᠬᠡᠳ ᠣᠨᠢᠰᠤᠭᠠ ᠬᠣᠶᠠᠷ – ᠣᠷᠣᠰᠢᠯ ᠤᠨ ᠣᠷᠣᠨ ᠳᠤ Хүүхэд оньсого хоёр – Оршлын оронд
552ᠬᠡᠦᠬᠡᠳ ᠣᠨᠢᠰᠤᠭᠠ ᠬᠣᠶᠠᠷ – ᠣᠷᠣᠰᠢᠯ ᠤᠨ ᠣᠷᠣᠨ ᠳᠤ
ᠠᠵᠢᠯ ᠤᠨ ᠵᠠᠪ ᠴᠢᠯᠥᠭᠡ ᠶᠡᠬᠡᠲᠡᠢ ᠡᠪᠦᠯ ᠦᠨ ᠡᠷᠢᠨ ᠪᠤᠶᠤ ᠵᠢᠯ ᠴᠠᠭᠠᠨ ᠰᠠᠷᠠ ᠪᠣᠯᠬᠤ ᠪᠦᠷᠢ ᠮᠠᠨ ᠤ ᠬᠡᠦᠬᠡᠳ ᠳᠡᠭᠦᠦ ᠨᠠᠷ ᠭᠡᠷ ᠤᠨ ᠨᠠᠰᠤᠲᠠᠨ ᠂ ᠠᠬᠠᠰ ᠵᠠᠬᠠᠰ ᠢᠶ᠋ᠠᠨ ᠲᠣᠭᠣᠷᠢᠵᠤ ᠰᠠᠭᠤᠭᠠᠳ 《 ᠣᠨᠢᠰᠣᠭᠠ ᠬᠤᠳᠠᠯᠳᠤᠬᠤ ᠳᠠᠭᠤᠤ 》① ᠪᠠᠨ ᠳᠠᠭᠤᠯᠠᠵᠠᠭᠠᠨ ᠣᠨᠢᠰᠣᠭᠠ ᠲᠠᠭᠠᠯᠴᠠᠬᠤ ᠬᠠᠴᠢᠨ ᠰᠣᠨᠢᠷᠬᠠᠯ ᠲᠠᠢ ᠨᠠᠶ᠋ᠢᠷ ᠨᠠᠭᠠᠳᠤᠮ ᠢᠶ᠋ᠠᠨ ᠡᠬᠢᠯᠡᠳᠡᠭ ᠪᠢᠯᠡ ᠃ ᠨᠠᠭᠠᠳᠤᠮ ᠳᠤ ᠲᠠᠲᠠᠭᠳᠠᠵᠤ ᠣᠷᠣᠭᠰᠠᠨ ᠣᠨᠢᠰᠤᠭᠠᠴᠢᠨ ᠪᠦᠬᠦᠨ ᠣᠨᠢᠰᠣᠭᠠ ᠬᠤᠳᠠᠯᠳᠤᠭᠴᠢ ᠶ᠋ᠢᠨ ᠬᠤᠳᠠᠯᠳᠤᠬᠤ ᠣᠨᠢᠰᠣᠭᠠ ᠶ᠋ᠢ ᠲᠠᠶ᠋ᠢᠯᠬᠤ ᠭᠡᠳ ᠤᠷᠤᠭᠤᠯ ᠲᠣᠮᠪᠣᠶ᠋ᠢᠯᠭᠠᠨ ᠨᠢᠳᠦ ᠲᠣᠳᠣᠶ᠋ᠢᠯᠭᠠᠵᠤ ᠨᠠᠮ ᠵᠢᠮ ᠪᠣᠳᠣᠯᠭᠠᠰᠢᠷᠠᠨ ᠰᠠᠭᠤᠭᠰᠠᠨ ᠲᠡᠷᠡ ᠨᠢᠭᠡ ᠭ᠌ᠱᠠᠨ ᠳᠤ ᠬᠥᠭᠡᠷᠦᠬᠦᠨ ᠲᠡᠳᠡᠨ ᠦ ᠰᠠᠨᠠᠭᠠᠨ ᠤ ᠶᠢᠷᠲᠢᠨᠴᠦ ᠳᠤ ᠬᠡᠴᠢᠨᠡᠨ ᠣᠯᠠᠨ ᠤᠷᠠᠨ ᠳᠦᠷᠰᠦᠯᠢᠭ ᠪᠣᠳᠠᠰ ᠤᠨ ᠳᠦᠷᠢ ᠢᠯᠡᠷᠡᠵᠦ ᠵᠠᠪᠳᠤᠳᠠᠭ ᠢ ᠥᠭᠦᠯᠡᠵᠦ ᠢᠯᠡᠳᠬᠡᠬᠦ ᠳᠤ ᠨᠡᠭᠡᠷᠡᠨ ᠪᠡᠷᠬᠡᠲᠡᠢ ᠶᠤᠮ ᠃ ᠣᠨᠢᠰᠣᠭᠠ ᠲᠠᠭᠠᠯᠴᠠᠭᠠᠨ ᠳᠤ ᠳᠡᠶ᠋ᠢᠯᠵᠦ ᠭᠠᠷᠤᠭᠠᠳ ᠪᠠᠶᠠᠷᠯᠠᠵᠤ ᠬᠥᠭᠡᠷᠳᠡᠭ ᠨᠢ ᠬᠡᠳᠦᠢ ᠪᠠᠶ᠋ᠢᠨᠠ ᠭᠡᠬᠦ ᠳᠦ ᠲᠠᠪᠤᠨ ᠣᠨᠢᠰᠣᠭᠠ ᠲᠠᠭᠠᠵᠤ ᠳᠡᠶ᠋ᠢᠯᠬᠦ ᠦᠭᠡᠢ ᠪᠡᠷ 《 ᠬᠤᠳᠠᠯᠳᠤᠭᠳᠠᠭᠠᠳ 》 ᠭᠡᠮᠰᠢᠵᠦ ᠪᠠᠶ᠋ᠢᠳᠠᠭ ᠨᠢ ᠴᠤ᠌ ᠮᠤᠩ ᠦᠭᠡᠢ ᠶᠤᠮ ᠃ ᠢᠯᠠᠩᠭᠤᠶᠠ ᠣᠨᠢᠰᠣᠭᠠ ᠬᠤᠳᠠᠯᠳᠤᠭᠴᠢ ᠶ᠋ᠢᠨ ᠬᠣᠷᠣᠰᠬᠠᠨ ᠳᠠᠭᠤᠯᠠᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠬᠣᠷᠣ ᠬᠥᠳᠡᠯᠳᠡᠭ ᠢ ᠨᠢ ᠳᠦᠷᠰᠦᠯᠡᠬᠦ ᠳᠦ ᠨᠡᠩ ᠬᠡᠴᠡᠭᠦᠦ ᠪᠠᠶ᠋ᠢᠳᠠᠭ ᠪᠢᠯᠡ ᠃ ᠬᠥᠷ ᠨᠠᠶ᠋ᠢᠷ ᠢᠶ᠋ᠠᠨ ᠬᠥᠷᠥᠭᠡᠬᠦ ᠦᠭᠡᠢ ᠶ᠋ᠢᠨ ᠲᠥᠯᠥᠭᠡ ᠳᠠᠭᠤᠴᠢᠨ ᠡᠷᠭᠢᠭᠡᠳ ᠄
① ᠡᠨᠡ ᠨᠢ ᠣᠨᠢᠰᠣᠭᠠ ᠲᠠᠭᠠᠯᠭᠠᠬᠤ ᠬᠥᠮᠦᠨ ᠡᠴᠡ ᠬᠣᠯᠪᠣᠭᠠ ᠶ᠋ᠢᠨ ᠠᠶᠠ ᠪᠠᠷ ᠬᠡᠯᠡᠳᠡᠭ ᠬᠡᠪᠰᠢᠮᠡᠯ ᠤᠷᠠᠨ ᠬᠡᠯᠡᠯᠭᠡ ᠪᠣᠯᠤᠨᠠ ᠃ 《 ᠳᠠᠭᠤᠤ 》 ᠭᠡᠵᠦ ᠪᠠᠶ᠋ᠢᠪᠠᠴᠤ ᠲᠤᠰᠬᠠᠢ ᠠᠶᠠᠯᠭᠤ ᠭᠡᠵᠦ ᠪᠠᠶ᠋ᠢᠳᠠᠭ ᠦᠭᠡᠢ ᠃ ᠰᠢᠯᠢ ᠶ᠋ᠢᠨ ᠭᠣᠣᠯ ᠠᠶ᠋ᠢᠮᠠᠭ ᠤᠨ ᠵᠠᠷᠢᠮ ᠬᠣᠰᠢᠭᠤ ᠂ ᠵᠠᠷᠤᠳ ᠂ ᠠᠷᠤ ᠬᠣᠷᠴᠢᠨ ᠢᠶ᠋ᠠᠷ ᠦᠯᠡᠳᠡᠭᠳᠡᠵᠦ ᠪᠠᠶ᠋ᠢᠨᠠ ᠃ ᠥᠭᠡᠯᠡᠳ ᠦᠨ ᠬᠢᠨ ᠡᠭᠦᠨ ᠢ 《 ᠶᠠᠨᠳᠠᠭᠠ 》 ᠭᠡᠵᠦ ᠬᠡᠯᠡᠳᠡᠭ ᠃
《 ᠵᠠ ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ
ᠵᠠᠯᠭᠠᠭᠠᠳ ᠪᠠᠰᠠ ᠲᠠᠭᠠᠯᠴᠠᠶᠠ ᠳ᠋ᠠ ᠃
ᠵᠠᠪᠠᠯ ᠨᠠᠮᠠ ᠶ᠋ᠢ ᠳᠡᠶ᠋ᠢᠯᠬᠦ ᠪᠡᠷ
ᠴᠢ ᠤᠬᠠᠭᠠᠨ ᠢᠶ᠋ᠠᠨ ᠬᠤᠷᠴᠠᠯᠠ ᠳ᠋ᠠ ᠃
ᠤᠯᠠᠨ ᠤᠯᠠᠨ ᠲᠠᠭᠠᠯᠴᠠᠵᠤ
ᠣᠢ ᠤᠬᠠᠭᠠᠨ ᠢᠶ᠋ᠠᠨ ᠨᠡᠮᠡᠶᠡ ᠃
ᠳᠠᠬᠢᠨ ᠳᠠᠬᠢᠨ ᠲᠠᠭᠠᠯᠴᠠᠵᠤ
ᠳᠠᠯᠠᠢ ᠮᠡᠷᠭᠡᠨ ᠪᠣᠯᠤᠶᠠ! 》ᠭᠡᠵᠦ ᠳᠠᠭᠤᠯᠠᠪᠠᠯ ᠤᠬᠢᠯᠠᠵᠤ ᠪᠠᠶ᠋ᠢᠬᠰᠠᠨ 《 ᠤᠶ᠋ᠢᠯᠠᠩᠬᠠᠢ 》 ᠳᠣᠣᠷᠠ ᠪᠠᠨ ᠤᠷᠮᠠᠰᠢᠨ ᠢᠨᠢᠶᠡᠵᠦ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠨ ᠳᠠᠬᠢᠭᠠᠳ ᠯᠠ ᠲᠠᠭᠠᠯᠴᠠᠭᠠᠨ ᠳᠤ ᠣᠷᠣᠯᠴᠠᠵᠤ ᠬᠥᠭᠡᠷᠳᠡᠭ ᠰᠠᠨ ᠃ ᠣᠨᠢᠰᠣᠭᠠᠨ ᠲᠠᠭᠠᠯᠴᠠᠭᠠᠨ ᠳᠤ ᠵᠣᠷᠢᠬ ᠮᠣᠬᠣᠵᠤ ᠣᠬᠣᠷᠢᠬᠤ ᠬᠡᠦᠬᠡᠳ ᠭᠡᠵᠦ ᠶᠡᠷᠦ ᠪᠠᠶ᠋ᠢᠳᠠᠭ ᠦᠭᠡᠢ ᠳᠡᠭᠡᠷᠡ ᠪᠠᠨ ᠬᠠᠷᠢᠨ ᠬᠡᠳᠦᠢ ᠳᠡᠶ᠋ᠢᠯᠦᠭᠳᠡᠬᠦ ᠳᠣᠳᠣᠮ ᠲᠡᠳᠦᠢ ᠠᠲᠠᠭᠠ ᠲᠠᠢ ᠂ ᠪᠠᠬᠠᠲᠠᠢ ᠣᠷᠣᠵᠤ ᠨᠠᠭᠠᠳᠤᠮ ᠲᠠᠷᠬᠠᠭᠰᠠᠨ ᠤ ᠬᠣᠶ᠋ᠢᠨᠠ ᠠᠷᠪᠢᠨ ᠠᠷᠪᠢᠨ ᠣᠨᠢᠰᠣᠭᠠ ᠰᠤᠷᠴᠤ ᠴᠡᠭᠡᠵᠢᠯᠡᠵᠦ ᠠᠪᠬᠤ ᠪᠠᠷ ᠮᠡᠷᠡᠶ᠋ᠢᠨ ᠴᠢᠷᠮᠠᠶ᠋ᠢᠳᠠᠭ ᠪᠠᠶ᠋ᠢᠬᠰᠠᠨ ᠃ ᠲᠠᠭᠠᠯᠴᠠᠵᠤ ᠬᠠᠯᠠᠮᠰᠢᠭᠠᠳ ᠭᠠᠯ ᠬᠥᠭ ᠳᠡᠭᠡᠷᠡ ᠪᠠᠨ ᠣᠷᠣᠬᠤ ᠦᠶᠡᠰ ᠡᠪᠦᠭᠡᠳ ᠬᠥᠭᠰᠢᠳ ᠬᠡᠦᠬᠡᠳ ᠱᠤᠬᠠᠳ ᠶᠡᠬᠡ ᠪᠠᠭᠠ ᠦᠭᠡᠢ ᠪᠦᠭᠦᠳᠡ ᠬᠥᠳᠡᠯᠦᠯᠴᠡᠳᠡᠭ ᠨᠢ ᠬᠥᠳᠡᠭᠡ ᠶ᠋ᠢᠨ ᠣᠨᠢᠰᠣᠭᠠᠨ ᠲᠠᠭᠠᠯᠴᠠᠭᠠᠨ ᠳᠤ ᠦᠷᠭᠦᠯᠵᠢ ᠭᠠᠷᠳᠠᠭ ᠬᠥᠭᠵᠢᠶᠡᠨ ᠲᠠᠢ ᠦᠵᠡᠭᠳᠡᠯ ᠶᠤᠮ ᠃ ᠰᠣᠶᠣᠯ ᠤᠨ ᠠᠮᠢᠳᠤᠷᠠᠯ ᠢᠶ᠋ᠠᠷ ᠶᠠᠳᠠᠮᠠᠭ ᠥᠩᠭᠡᠷᠡᠭᠰᠡᠨ ᠦ ᠬᠥᠳᠡᠭᠡ ᠨᠤᠲᠤᠭ ᠢᠶ᠋ᠠᠷ ᠣᠨᠢᠰᠣᠭᠠ ᠲᠠᠭᠠᠯᠴᠠᠬᠤ ᠨᠠᠭᠠᠳᠤᠮ ᠥᠷᠭᠡᠨ ᠳᠡᠯᠭᠡᠷᠡᠵᠦ ᠪᠠᠶ᠋ᠢᠬᠰᠠᠨ ᠪᠥᠭᠡᠳ ᠣᠳᠣ ᠴᠤ᠌ ᠭᠡᠰᠡᠨ ᠵᠠᠷᠢᠮ ᠭᠠᠵᠠᠷ ᠣᠷᠣᠨ ᠢᠶ᠋ᠠᠷ ᠤᠯᠠᠮᠵᠢᠯᠠᠨ ᠶᠠᠪᠤᠭᠳᠠᠭᠰᠠᠭᠠᠷ ᠪᠠᠶ᠋ᠢᠨᠠ ᠃ ᠣᠨᠢᠰᠣᠭᠠ ᠪᠣᠯ ᠬᠡᠦᠬᠡᠳ ᠲᠤ ᠬᠠᠮᠤᠭ ᠠ᠋ᠴᠠ ᠣᠶ᠋ᠢᠷᠠ ᠳᠣᠲᠣᠨᠣ ᠪᠠᠶ᠋ᠢᠳᠠᠭ ᠭᠡᠰᠡᠨ ᠢ ᠣᠨᠢᠰᠣᠭᠠᠨ ᠲᠠᠭᠠᠯᠴᠠᠭᠠᠨ ᠠ᠋ᠴᠠ ᠲᠣᠳᠣᠷᠬᠠᠢ ᠣᠯᠵᠤ ᠮᠡᠳᠡᠳᠡᠭ ᠃
ᠲᠡᠭᠡᠪᠡᠯ ᠣᠨᠢᠰᠣᠭᠠ ᠶᠠᠭᠠᠬᠢᠭᠠᠳ ᠬᠡᠦᠬᠡᠳ ᠲᠤ ᠡᠳᠦᠢ ᠣᠶ᠋ᠢᠷᠠ ᠳᠣᠲᠣᠨᠣ ᠬᠠᠴᠢᠨ ᠰᠣᠨᠢᠷᠬᠠᠯᠲᠠᠢ ᠪᠠᠶ᠋ᠢᠳᠠᠭ ᠶᠤᠮ ᠪᠤᠢ? ᠭᠡᠪᠡᠯ ᠂ ᠡᠭᠦᠨ ᠢ ᠣᠨᠢᠰᠣᠭᠠ ᠶ᠋ᠢᠨ ᠤᠷᠠᠯᠢᠬ ᠤᠨ ᠣᠨᠴᠠᠯᠢᠬ ᠠ᠋ᠴᠠ ᠪᠣᠯᠤᠭᠰᠠᠨ ᠭᠡᠵᠦ ᠦᠵᠡᠬᠦ ᠶᠣᠰᠣᠲᠠᠢ ᠃
ᠬᠡᠦᠬᠡᠳ 《 ᠡᠯᠳᠡᠪ ᠦᠨ ᠶᠠᠭᠤᠮᠠᠨ ᠳᠤ ᠳᠤᠷᠠᠯᠠᠵᠤ 》 ᠰᠣᠨᠢᠷᠬᠠᠯ ᠲᠥᠷᠥᠭᠡᠳ ᠶᠡᠬᠡ ᠬᠥᠮᠦᠨ ᠡᠴᠡ ᠬᠡᠵᠢᠶᠡᠳᠡ ᠡᠨᠡ ᠲᠡᠷᠡ ᠶ᠋ᠢ ᠠᠰᠠᠭᠤᠨ ᠰᠤᠷᠠᠵᠤ 《 ᠶᠠᠭᠠᠬᠢᠭᠠᠳ ᠶᠤᠮ ᠪᠤᠢ? 》 ᠭᠡᠰᠡᠨ ᠠᠰᠠᠭᠤᠯᠲᠠ ᠶ᠋ᠢ ᠭᠡᠲᠦ ᠳᠠᠪᠰᠢᠭᠤᠯᠵᠤ ᠲᠠᠯᠪᠢᠳᠠᠭ ᠵᠠᠩ ᠲᠠᠢ ᠪᠢᠯᠡ ᠃ ᠭᠡᠲᠦ ᠳᠠᠪᠲᠠᠨ ᠠᠰᠠᠭᠤᠬᠤ ᠰᠢᠯᠭᠠᠯᠲᠠ ᠶ᠋ᠢ ᠳᠠᠭᠠᠭᠠᠳᠠᠭ ᠦᠭᠡᠢ ᠬᠡᠷᠡᠭ ᠪᠣᠳᠠᠰ ᠪᠣᠯ ᠲᠡᠳᠡᠨ ᠳᠦ ᠲᠡᠶ᠋ᠢᠮᠦ ᠰᠣᠨᠢᠷᠬᠠᠯᠲᠠᠢ ᠰᠠᠨᠠᠭᠳᠠᠳᠠᠭ ᠦᠭᠡᠢ ᠃ ᠬᠡᠦᠬᠡᠳ ᠦᠨ ᠡᠨᠡ ᠵᠠᠩ ᠢᠶ᠋ᠠᠷ ᠣᠨᠢᠰᠣᠭᠠ ᠶ᠋ᠢ ᠰᠢᠨᠵᠢᠪᠡᠯ ᠂ ᠣᠨᠢᠰᠣᠭᠠ ᠶ᠋ᠢᠨ ᠪᠢᠲᠡᠭᠦᠦ ᠪᠠᠷ ᠥᠭᠦᠯᠡᠳᠡᠭ ᠤᠷᠠᠯᠢᠬ ᠤᠨ ᠣᠨᠴᠠᠯᠢᠬ ᠨᠢ ᠬᠡᠦᠬᠡᠳ ᠦᠨ ᠠᠩᠬᠠᠷᠤᠯ ᠰᠣᠨᠢᠷᠬᠠᠯ ᠢ ᠶᠡᠬᠡᠳᠡ ᠲᠠᠲᠠᠳᠠᠭ ᠪᠠᠶ᠋ᠢᠨᠠ ᠃ ᠣᠨᠢᠰᠣᠭᠠ ᠨᠢ ᠣᠨᠢᠰᠤᠯᠠᠬᠤᠨ ᠪᠠ ᠣᠨᠢᠰᠤᠯᠠᠭᠳᠠᠬᠤᠨ ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠲᠠᠶ᠋ᠢᠯᠬᠤᠨ ᠪᠠ ᠲᠠᠶ᠋ᠢᠯᠤᠭᠳᠠᠬᠤᠨ ᠬᠣᠶᠠᠷ ᠢᠶ᠋ᠠᠷ ᠪᠦᠷᠢᠯᠳᠦᠵᠦ ᠪᠠᠶ᠋ᠢᠳᠠᠭ ᠃ ᠣᠨᠢᠰᠣᠭᠠ ᠶ᠋ᠢᠨ ᠭᠣᠣᠯ ᠰᠠᠨᠠᠭᠠ ᠪᠣᠯᠬᠤ ᠣᠨᠢᠰᠤᠯᠠᠭᠳᠠᠬᠤᠨ ᠂ ᠨᠢ ᠶᠡᠷᠦ ᠡᠴᠡ ᠨᠢᠭᠤᠴᠠ ᠪᠢᠲᠡᠭᠦᠦ ᠪᠠᠶ᠋ᠢᠳᠠᠭ ᠲᠤᠯᠠ ᠬᠥᠮᠦᠰ ᠢ ᠲᠠᠭᠠᠵᠤ ᠪᠣᠳᠣᠭᠤᠯᠬᠤ ᠰᠢᠨᠵᠢᠲᠡᠢ ᠃ ᠭᠡᠪᠡᠴᠦ ᠣᠨᠢᠰᠤᠯᠠᠭᠳᠠᠬᠤᠨ ( ᠲᠠᠶ᠋ᠢᠯᠤᠭᠳᠠᠬᠤᠨ ) ᠨᠢ ᠭᠣᠣᠯ ᠭᠣᠣᠯ ᠣᠨᠴᠠᠯᠢᠬ ᠰᠢᠨᠵᠢ ᠶ᠋ᠢᠨ ᠢᠶ᠋ᠠᠨ ᠢᠯᠡᠳᠬᠡᠮᠵᠢ ᠪᠣᠯᠤᠭᠰᠠᠨ ᠣᠨᠢᠰᠤᠯᠠᠬᠤᠨ ( ᠲᠠᠶ᠋ᠢᠯᠬᠤᠨ ) ᠳᠤ ᠣᠨᠢᠰᠤᠯᠠᠭᠳᠠᠨ ᠪᠢᠲᠡᠭᠦᠯᠡᠭᠳᠡᠵᠦ ᠪᠠᠶ᠋ᠢᠭᠠ ᠤᠴᠢᠷ ᠠ᠋ᠴᠠ ᠬᠥᠮᠦᠰ ᠦᠵᠡᠭᠳᠡᠯ ᠢᠶ᠋ᠡᠷ ᠨᠢ ᠳᠠᠮᠵᠢᠨ ᠮᠥᠨ ᠴᠢᠨᠠᠷ ᠤᠨ ᠶᠠᠭᠤᠮᠠ ᠶ᠋ᠢ ᠨᠢ ᠣᠯᠵᠤ ᠠᠪᠳᠠᠭ ᠃ ᠡᠭᠦᠨ ᠡᠴᠡ ᠨᠢ ᠦᠵᠡᠪᠡᠯ ᠣᠨᠢᠰᠣᠭᠠ ᠶ᠋ᠢ ᠪᠠᠰᠠ ᠢᠯᠡ ᠰᠢᠨᠵᠢᠲᠡᠢ ᠭᠡᠵᠦ ᠬᠡᠯᠡᠵᠦ ᠪᠣᠯᠤᠨᠠ ᠃ ᠲᠡᠷᠡ ᠨᠢ ᠢᠯᠡ ᠪᠠ ᠪᠢᠲᠡᠭᠦᠦ ᠬᠣᠶᠠᠷ ᠤᠨ ᠬᠤᠪᠢᠰᠤᠩᠭᠤᠢ ᠬᠠᠷᠢᠴᠠᠭᠠ ᠪᠠᠷ ᠪᠦᠷᠢᠯᠳᠦᠵᠦ ᠪᠠᠶ᠋ᠢᠳᠠᠭ ᠃ ᠣᠨᠢᠰᠣᠭᠠ ᠲᠠᠭᠠᠯᠴᠠᠵᠤ ᠪᠠᠶ᠋ᠢᠭᠠ ᠬᠡᠦᠬᠡᠳ 《 ᠶᠠᠭᠠᠬᠢᠭᠠᠳ ᠶᠤᠮ ᠪᠤᠢ? 》 ᠭᠡᠵᠦ ᠠᠮᠠᠨ ᠳᠡᠭᠡᠷᠡ ᠪᠠᠨ ᠠᠰᠠᠭᠤᠭᠠ ᠦᠭᠡᠢ ᠪᠣᠯᠪᠠᠴᠤ ᠤᠷᠤᠭᠤᠯ ᠲᠣᠮᠪᠣᠶ᠋ᠢᠯᠭᠠᠨ ᠲᠣᠷᠮᠣᠩ ᠲᠣᠷᠮᠣᠩ ᠬᠠᠷᠠᠵᠤ ᠬᠡᠷᠬᠢᠨ ᠲᠠᠶ᠋ᠢᠯᠬᠤ ᠪᠠᠨ ᠪᠣᠳᠣᠵᠤ ᠰᠠᠭᠤᠬᠤ ᠵᠠᠭᠤᠷᠠ ᠪᠠᠨ ᠢᠩᠭᠢᠵᠦ ᠠᠰᠠᠭᠤᠬᠤ ᠶᠠᠪᠤᠴᠠ ᠶ᠋ᠢ ᠥᠪᠡᠷ ᠦᠨ ᠡᠷᠬᠡ ᠦᠭᠡᠢ ᠥᠩᠭᠡᠷᠡᠭᠡᠵᠦ ᠪᠠᠶ᠋ᠢᠳᠠᠭ ᠶᠤᠮ ᠃ ᠬᠡᠦᠬᠡᠳ ᠦᠨ 《 ᠠᠰᠠᠭᠤᠯᠲᠠ ᠲᠠᠯᠪᠢᠨ ᠬᠠᠷᠢᠭᠤᠯᠲᠠ ᠣᠯᠬᠤ 》 ᠰᠡᠳᠬᠢᠬᠦᠢ ᠶ᠋ᠢᠨ ᠡᠨᠡᠬᠦ ᠬᠥᠳᠡᠯᠭᠡᠭᠡᠨ ᠨᠢ ᠣᠨᠢᠰᠣᠭᠠ ᠶ᠋ᠢᠨ ᠢᠯᠡᠳᠬᠡᠬᠦ ᠠᠷᠭᠠ ᠶ᠋ᠢᠨ ᠤᠷᠠᠨ ᠰᠡᠳᠬᠢᠮᠵᠢ ᠶ᠋ᠢ ᠳᠠᠭᠠᠨ ᠪᠤᠢ ᠪᠣᠯᠵᠤ ᠬᠥᠭᠵᠢᠳᠡᠭ ᠪᠠᠶ᠋ᠢᠨᠠ ᠃
ᠣᠨᠢᠰᠣᠭᠠ ᠶ᠋ᠢᠨ ᠰᠠᠨᠠᠭᠠ ᠤᠷᠠᠨ ᠪᠥᠭᠡᠳ ᠢᠯᠡᠳᠬᠡᠮᠵᠢ ᠪᠠᠶᠠᠯᠢᠬ ᠶᠤᠮ ᠃ ᠣᠨᠢᠰᠣᠭᠠ ᠶ᠋ᠢᠨ ᠣᠨᠢᠰᠤᠯᠠᠭᠳᠠᠬᠤᠨ ᠢ ᠶᠠᠭᠤᠨ ᠤ ᠡᠮᠦᠨᠡ ᠵᠦᠢᠷᠯᠡᠨ ᠳᠦᠷᠰᠦᠯᠡᠵᠦ ᠢᠯᠡᠳᠬᠡᠳᠡᠭ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄
ᠬᠠᠭᠤᠷᠠᠢ ᠮᠣᠳᠣ ᠬᠤᠨᠴᠢᠨ ᠳᠠᠭᠤ ᠲᠠᠢ
ᠬᠤᠯᠤᠰᠤᠨ ᠰᠢᠷᠭᠠ ᠤᠨᠠᠭᠠᠨ ᠳᠠᠭᠤ ᠲᠠᠢ
( ᠬᠤᠭᠤᠷ)
ᠤᠯᠠᠨ ᠳᠤ ᠠᠰᠢᠬᠲᠠᠢ ᠬᠡ
ᠣᠶᠤᠨ ᠢ ᠨᠡᠭᠡᠭᠡᠭᠳᠡᠭᠦᠯᠳᠡᠭ ᠬᠡ
ᠲᠦᠮᠡᠨ ᠳᠦ ᠠᠰᠢᠬᠲᠠᠢ ᠬᠡ
ᠲᠥᠷᠥ ᠶ᠋ᠢ ᠮᠠᠨᠳᠤᠭᠤᠯᠳᠠᠭ ᠬᠡ
( ᠪᠢᠴᠢᠭ)
ᠭᠠᠬᠠᠢ ᠶ᠋ᠢᠨ ᠭᠡᠳᠡᠰᠦ ᠲᠡᠢ
ᠭᠠᠯᠠᠭᠤᠨ ᠬᠦᠵᠦᠭᠦᠦ ᠲᠡᠢ
( ᠳᠡᠪᠦᠷᠡ)
ᠭᠡᠬᠦ ᠵᠡᠷᠭᠡ ᠪᠡᠷ ᠲᠠᠶ᠋ᠢᠯᠤᠭᠳᠠᠬᠤ ᠬᠡᠷᠡᠭ ᠪᠣᠳᠠᠰ ᠢᠶ᠋ᠠᠨ ᠥᠭᠡᠷᠡ ᠨᠢᠭᠡ ᠵᠦᠢᠯ ᠦᠨ ᠬᠡᠷᠡᠭ ᠪᠣᠳᠠᠰ ᠤᠨ ᠰᠢᠨᠵᠢ ᠪᠠᠶ᠋ᠢᠳᠠᠯ ᠣᠨᠴᠠᠯᠢᠬ ᠢᠶ᠋ᠠᠷ ᠤᠷᠠᠯᠢᠬ ᠢᠶ᠋ᠠᠷ ᠳᠦᠷᠰᠦᠯᠡᠵᠦ ᠭᠠᠷᠭᠠᠳᠠᠭ ᠃ ᠲᠡᠭᠡᠪᠡᠯ
ᠣᠲᠣᠯᠠᠢ ᠮᠣᠳᠣᠨ ᠳᠡᠭᠡᠷᠡ
ᠳᠣᠲᠣᠯᠠᠢ ᠰᠢᠪᠠᠭᠤ
( ᠬᠤᠷᠤᠭᠤᠪᠴᠢ)
ᠭᠡᠬᠦᠴᠢᠯᠡᠨ ᠬᠣᠶᠠᠷ ᠶᠠᠭᠤᠮᠠᠨ ᠤ ᠬᠣᠭᠣᠷᠣᠨᠳᠣᠬᠢ ᠬᠣᠯᠪᠣᠭᠳᠠᠯ ᠪᠦᠬᠦᠢ ᠰᠢᠨᠵᠢ ᠳᠦᠷᠰᠦ ᠪᠡᠷ ᠢᠯᠡᠳᠬᠡᠳᠡᠭ ᠃ ᠪᠠᠰᠠ
ᠡᠷᠢᠶᠡᠨ ᠪᠠᠶ᠋ᠢᠬᠤ ᠨᠢ ᠪᠠᠷᠰ ᠰᠢᠭ᠋
ᠡᠪᠡᠷ ᠲᠡᠢ ᠪᠠᠶ᠋ᠢᠬᠤ ᠨᠢ ᠪᠤᠭᠤ ᠰᠢᠭ᠋
ᠨᠣᠭᠣᠭᠠᠨ ᠪᠠᠶ᠋ᠢᠬᠤ ᠨᠢ ᠲᠣᠷᠭᠠ ᠰᠢᠭ᠋
ᠨᠤᠲᠤᠭ ᠢᠶ᠋ᠠᠨ ᠮᠠᠭᠲᠠᠬᠤ ᠨᠢ ᠳᠠᠭᠤᠴᠢᠨ ᠰᠢᠭ᠋
( ᠭᠣᠯᠢᠶᠠ)
ᠡᠳᠦᠷ ᠦᠨ ᠭᠡᠭᠡ ᠲᠡᠢ ᠳᠦ ᠨᠥᠬᠥᠴᠡᠭᠡᠳ ᠭᠦᠶᠦᠨᠡ
ᠦᠳᠡᠰᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳᠤ ᠰᠠᠯᠤᠭᠠᠳ ᠤᠳᠤᠨᠠ
( ᠰᠡᠭᠦᠳᠡᠷ)
ᠭᠡᠵᠦ ᠬᠡᠷᠡᠭ ᠪᠣᠳᠠᠰ ᠰᠢᠨᠵᠢ ᠪᠠᠶ᠋ᠢᠳᠠᠯ ᠳᠦᠷᠰᠦ ᠶ᠋ᠢ ᠰᠢᠭᠤᠳ ᠤᠷᠠᠯᠠᠨ ᠳᠦᠷᠰᠦᠯᠡᠵᠦ ᠢᠯᠡᠳᠬᠡᠳᠡᠭ ᠃ ᠢᠯᠡᠳᠬᠡᠬᠦ ᠠᠷᠭᠠ ᠳ᠋ᠠᠬᠢ ᠪᠠᠰᠠ ᠨᠢᠭᠡ ᠴᠢᠬᠤᠯᠠ ᠠᠷᠭᠠ ᠪᠠᠷᠢᠯ ᠨᠢ ᠭᠡᠪᠡᠯ ᠣᠨᠢᠰᠤᠯᠠᠬᠤᠨ ᠪᠡ ᠣᠨᠢᠰᠤᠯᠠᠭᠳᠠᠬᠤᠨ ( ᠲᠠᠶ᠋ᠢᠯᠬᠤᠨ ᠪᠡ ᠲᠠᠶ᠋ᠢᠯᠤᠭᠳᠠᠬᠤᠨ ) ᠤ ᠬᠣᠭᠣᠷᠣᠨᠳᠣ ᠡᠰᠡᠷᠭᠦ ᠲᠡᠰᠡᠷᠭᠦ ᠰᠢᠨᠵᠢ ᠴᠢᠨᠠᠷ ᠤᠨ ᠵᠥᠷᠢᠴᠡᠯ ᠮᠥᠷᠭᠥᠯᠳᠦᠭᠡᠨ ᠭᠠᠷᠭᠠᠵᠤ ᠥᠭᠦᠯᠡᠬᠦ ᠪᠡᠷ ᠣᠨᠢᠰᠣᠭᠠ ᠪᠦᠲᠦᠭᠡᠬᠦ ᠶᠠᠪᠤᠳᠠᠯ ᠪᠣᠯᠤᠨᠠ ᠃ ᠵᠢᠱ᠌ᠢᠶᠡᠯᠡᠪᠡᠯ ᠄
ᠠᠮᠢ ᠦᠭᠡᠢ ᠪᠠᠶ᠋ᠢᠭᠠᠳ ᠳᠠᠭᠤ ᠲᠠᠢ
ᠠᠶ᠋ᠢᠯ ᠪᠢᠰᠢ ᠪᠠᠶ᠋ᠢᠭᠠᠳ ᠭᠡᠷ ᠲᠡᠢ
ᠯᠠᠮᠠ ᠪᠢᠰᠢ ᠪᠠᠶ᠋ᠢᠭᠠᠳ ᠨᠣᠮ ᠲᠠᠢ
ᠡᠮᠡ ᠪᠢᠰᠢ ᠪᠠᠶ᠋ᠢᠭᠠᠳ ᠵᠡᠭᠦᠦ ᠲᠡᠢ
( ᠡᠭᠡᠰᠢᠭᠲᠦ ᠬᠠᠶ᠋ᠢᠷᠴᠠᠭ)
ᠡᠷᠢᠶᠡᠨ ᠪᠠᠶ᠋ᠢᠨᠠ ᠪᠠᠷᠰ ᠶᠤᠮ ᠤᠤ? ᠪᠠᠰᠠ ᠪᠢᠰᠢ
ᠤᠩᠰᠢᠭᠠᠳ ᠪᠠᠶ᠋ᠢᠨᠠ ᠨᠣᠮ ᠶᠤᠮ ᠤᠤ? ᠪᠠᠰᠠ ᠪᠢᠰᠢ
ᠤᠬᠢᠯᠠᠭᠠᠳ ᠪᠠᠶ᠋ᠢᠨᠠ ᠬᠡᠦᠬᠡᠨ ᠶᠤᠮ ᠤᠤ? ᠪᠠᠰᠠ ᠪᠢᠰᠢ
( ᠵᠥᠭᠡᠢ)
ᠭᠡᠬᠦ ᠮᠡᠲᠦ ᠃ ᠵᠠᠷᠢᠮ ᠳ᠋ᠠᠭᠠᠨ ᠂
ᠬᠠᠲᠠᠷᠢᠬᠤ ᠳᠤ ᠬᠥᠯᠥᠰᠥ ᠦᠭᠡᠢ
ᠬᠠᠳᠬᠤᠬᠤ ᠳᠤ ᠴᠢᠰᠤ ᠦᠭᠡᠢ
( ᠮᠠᠰᠢᠨ ᠲᠡᠷᠭᠡ)
ᠠᠪᠤ ᠶ᠋ᠢᠨ ᠬᠢᠭᠰᠡᠨ ᠬᠤᠪᠢᠩ ᠢ ᠬᠥᠮᠥᠷᠴᠥ ᠪᠣᠯᠳᠠᠭ ᠦᠭᠡᠢ
( ᠬᠤᠳᠳᠤᠭ)
ᠭᠡᠵᠦ ᠬᠡᠷᠡᠭ ᠪᠣᠳᠠᠰ ᠤᠨ ᠭᠣᠣᠯ ᠰᠢᠨᠵᠢ ᠴᠢᠨᠠᠷ ᠪᠠᠶ᠋ᠢᠳᠠᠯ ᠢ ᠦᠭᠡᠶ᠋ᠢᠰᠬᠡᠯ ᠢᠶ᠋ᠡᠷ ᠢᠯᠡᠳᠬᠡᠵᠦ ᠣᠨᠢᠰᠣᠭᠠ ᠪᠦᠲᠦᠭᠡᠳᠡᠭ ᠃ ᠣᠨᠢᠰᠣᠭᠠ ᠶ᠋ᠢᠨ ᠰᠠᠨᠠᠭᠠ ᠶ᠋ᠢ ᠶᠠᠮᠠᠷ ᠠᠷᠭᠠ ᠪᠠᠷ ᠢᠯᠡᠳᠬᠡᠪᠡᠴᠦ ᠂ ᠣᠨᠢᠰᠣᠭᠠ ᠲᠠᠭᠠᠵᠤ ᠡᠬᠢᠯᠡᠮᠡᠭᠴᠡ ᠲᠠᠶ᠋ᠢᠯᠤᠭᠳᠠᠬᠤ ᠬᠡᠷᠡᠭ ᠪᠣᠳᠠᠰ ᠤᠴᠢᠷ ᠶᠠᠪᠤᠳᠠᠯ ᠢ ᠳᠦᠷᠰᠦᠯᠡᠨ ᠢᠯᠡᠳᠬᠡᠵᠦ ᠪᠠᠶ᠋ᠢᠭᠠ ᠲᠡᠷᠡ ᠬᠡᠷᠡᠭ ᠪᠣᠳᠠᠰ ᠤᠨ ᠠᠮᠢᠳᠤᠯᠢᠬ ᠳᠦᠷᠢ ᠨᠢ ᠬᠡᠦᠬᠡᠳ ᠦᠨ ᠠᠩᠬᠠᠷᠤᠯ ᠢ ᠬᠦᠴᠦᠲᠡᠢ ᠲᠠᠲᠠᠳᠠᠭ ᠢᠶ᠋ᠠᠷ ᠬᠡᠦᠬᠡᠳ ᠦᠳ ᠰᠣᠨᠣᠰᠤᠭᠠᠳ 《 ᠬᠠᠷᠠᠭᠳᠠᠭᠰᠠᠨ 》 ᠡᠨᠡ ᠬᠡᠷᠡᠭ ᠪᠣᠳᠠᠰ ᠤᠨ ᠬᠡᠯᠪᠡᠷᠢ ᠳᠦᠷᠰᠦ ᠣᠨᠴᠠᠯᠢᠬ ᠰᠢᠨᠵᠢ ᠶ᠋ᠢ ᠳᠠᠮᠵᠢᠨ ᠂ ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ ᠣᠨᠢᠰᠤᠯᠠᠬᠤᠨ ᠪᠠ ᠣᠨᠢᠰᠤᠯᠠᠭᠳᠠᠬᠤᠨ ( ᠲᠠᠶ᠋ᠢᠯᠬᠤᠨ ᠪᠠ ᠲᠠᠶ᠋ᠢᠯᠤᠭᠳᠠᠬᠤᠨ ) ᠤ ᠬᠣᠭᠣᠷᠣᠨᠳᠣᠬᠢ ᠳᠦᠷᠰᠦᠯᠢᠭ ᠤᠷᠠᠨ ᠬᠣᠯᠪᠣᠭᠠ ᠪᠠᠷ ᠳᠡᠮᠵᠢᠵᠦ ᠪᠠᠶ᠋ᠢᠭᠠᠳ ᠣᠨᠢᠰᠣᠭᠠ ᠶ᠋ᠢᠨ ᠰᠠᠨᠠᠭᠠ ᠶ᠋ᠢ ᠡᠷᠢᠵᠦ ᠤᠬᠤᠴᠢᠯᠠᠳᠠᠭ ᠃ ᠢᠩᠭᠢᠭᠡᠳ ᠣᠨᠢᠰᠣᠭᠠ ᠶ᠋ᠢᠨ ᠢᠯᠡ ᠡᠴᠡ ᠪᠢᠲᠡᠭᠦᠦ ᠳᠦ ᠣᠷᠣᠬᠤ ᠶᠠᠪᠤᠴᠠ ᠶ᠋ᠢ ᠥᠩᠭᠡᠷᠡᠭᠡᠵᠦ 《 ᠶᠠᠭᠠᠬᠢᠭᠠᠳ ᠶᠤᠮ ᠪᠤᠢ? 》 ᠭᠡᠵᠦ ᠬᠠᠴᠢᠷᠬᠠᠨ ᠰᠣᠨᠢᠷᠬᠠᠬᠤ ᠳᠤᠷᠠ ᠪᠠᠬᠠ ᠪᠠᠨ ᠪᠦᠷᠢᠨ ᠬᠠᠩᠭᠠᠳᠠᠭ ᠃ ᠣᠨᠢᠰᠣᠭᠠ ᠨᠢ ᠡᠨᠡ ᠮᠡᠲᠦ ᠪᠡᠷ ᠬᠥᠮᠦᠰ ᠦᠨ ᠲᠠᠨᠢᠯᠲᠠ ᠶ᠋ᠢ ᠭᠥᠢᠬᠡᠨ ᠡᠴᠡ ᠭᠦᠨ ᠂ ᠰᠠᠷᠠᠯ ᠡᠴᠡ ᠣᠶᠤᠨ ᠤ ᠵᠦᠭ ᠳᠠᠪᠰᠢᠭᠤᠯᠬᠤ ᠴᠢᠳᠠᠯ ᠲᠠᠢ ᠲᠤᠯᠠ ᠂ ᠲᠡᠭᠦᠨ ᠢ 《 ᠣᠶᠤᠨ ᠲᠦᠯᠬᠢᠭᠦᠷ 》 ᠭᠡᠵᠦ ᠬᠡᠯᠡᠬᠦ ᠳᠦ ᠪᠤᠷᠤᠭᠤᠳᠠᠬᠤ ᠭᠠᠵᠠᠷ ᠦᠭᠡᠢ ᠪᠢᠵᠡ ᠃ ᠬᠡᠦᠬᠡᠳ ᠦᠨ ᠣᠨᠢᠰᠣᠭᠠᠨ ᠳᠤ ᠳᠤᠷᠠᠲᠠᠢ ᠪᠠᠬᠠᠲᠠᠢ ᠪᠠᠶ᠋ᠢᠳᠠᠭ ᠤᠨ ᠬᠠᠮᠤᠭ ᠤᠨ ᠭᠣᠣᠯ ᠰᠢᠯᠲᠠᠭᠠᠨ ᠨᠢ ᠡᠭᠦᠨ ᠳᠦ ᠣᠷᠣᠰᠢᠨᠠ ᠃ ᠣᠨᠢᠰᠣᠭᠠ ᠪᠠᠰᠠ ᠶᠦᠮᠦᠷᠯᠢᠭ ᠶᠣᠭᠲᠠ ᠂ ᠣᠬᠣᠷ ᠠᠪᠰᠠᠷᠬᠠᠨ ᠂ ᠰᠢᠯᠦᠭᠯᠡᠭᠦᠨ ᠤᠷᠤᠰᠤᠮᠠ ᠰᠠᠶ᠋ᠢᠬᠠᠨ ᠬᠡᠯᠡᠯᠭᠡ ᠲᠠᠢ ᠂ ᠴᠡᠭᠡᠵᠢᠯᠡᠵᠦ ᠲᠣᠭᠲᠠᠭᠠᠬᠤ ᠳᠤ ᠳᠥᠭᠥᠮ ᠂ ᠲᠡᠶ᠋ᠢᠮᠦ ᠠᠮᠠᠷᠬᠠᠨ ᠮᠠᠷᠲᠠᠭᠳᠠᠵᠤ ᠬᠠᠶᠠᠭᠳᠠᠳᠠᠭ ᠦᠭᠡᠢ ᠰᠠᠢᠨᠲᠠᠢ ᠪᠣᠯᠬᠣᠷ ᠬᠡᠦᠬᠡᠳ ᠦᠨ ᠳᠤᠷᠠ ᠪᠠᠬᠠ ᠶ᠋ᠢ ᠬᠢᠯᠪᠠᠷᠬᠠᠨ ᠪᠤᠯᠢᠶᠠᠳᠠᠭ ᠪᠢᠯᠡ ᠃
ᠮᠣᠩᠭᠣᠯᠴᠤᠳ ᠠᠮᠠᠨ ᠵᠣᠬᠢᠶᠠᠯ ᠲᠠᠢ ᠪᠣᠯᠤᠭᠰᠠᠨ ᠲᠡᠷᠡ ᠴᠠᠭ ᠠ᠋ᠴᠠ ᠪᠠᠨ ᠡᠬᠢᠯᠡᠭᠡᠳ ᠣᠨᠢᠰᠣᠭᠠ ᠪᠠᠷ ᠣᠶᠤᠨ ᠤ ᠨᠡᠭᠡᠭᠡᠯᠲᠡ ᠶ᠋ᠢᠨ ᠬᠤᠷᠴᠠ ᠵᠡᠪᠰᠡᠭ ᠢᠶ᠋ᠡᠨ ᠪᠣᠯᠭᠠᠭᠰᠠᠭᠠᠷ ᠢᠷᠡᠭᠰᠡᠨ ᠪᠠ ᠶᠠᠳᠠᠷᠠᠯ ᠵᠦᠳᠡᠷᠡᠯ ᠢᠶ᠋ᠠᠨ ᠲᠠᠶ᠋ᠢᠯᠬᠤ ᠤᠷᠠᠨ ᠰᠣᠨᠢᠷᠬᠠᠯ ᠤᠨ ᠵᠤᠭᠠ ᠪᠣᠯᠭᠠᠵᠤ ᠪᠠᠶ᠋ᠢᠬᠰᠠᠨ ᠢᠶ᠋ᠠᠷ ᠦᠯᠦ ᠪᠠᠷᠠᠨ ᠲᠡᠭᠦᠪᠡᠷ ᠬᠡᠦᠬᠡᠳ ᠳᠡᠭᠦᠦ ᠨᠠᠷ ᠢᠶ᠋ᠠᠨ ᠬᠥᠮᠦᠵᠢᠭᠦᠯᠵᠦ ᠰᠣᠨᠢᠷᠬᠠᠯ ᠢ ᠨᠢ ᠬᠥᠭᠵᠢᠭᠡᠨ ᠂ ᠣᠢ ᠤᠬᠠᠭᠠᠨ ᠢ ᠨᠢ ᠲᠡᠩᠰᠡᠵᠦ ᠤᠷᠠᠯᠠᠨ ᠰᠡᠳᠬᠢᠬᠦ ᠴᠢᠳᠠᠪᠤᠷᠢ ᠶ᠋ᠢ ᠨᠢ ᠨᠡᠮᠡᠭᠳᠡᠭᠦᠯᠵᠦ ᠪᠠᠶ᠋ᠢᠵᠠᠢ ᠃ ᠣᠨᠢᠰᠣᠭᠠ ᠶ᠋ᠢᠨ ᠳᠣᠲᠣᠷᠠ ᠬᠥᠮᠦᠨ ᠲᠠᠢ ᠦᠷᠭᠦᠯᠵᠢ ᠬᠠᠷᠢᠴᠠᠭᠠ ᠭᠠᠷᠳᠠᠭ ᠪᠠᠶ᠋ᠢᠭᠠᠯᠢ ᠶᠢᠷᠲᠢᠨᠴᠦ ᠶ᠋ᠢᠨ ᠠᠮᠢ ᠲᠠᠢ ᠠᠮᠢ ᠦᠭᠡᠢ ᠲᠦᠮᠡᠨ ᠪᠣᠳᠠᠰ ᠂ ᠠᠵᠤ ᠠᠮᠢᠳᠤᠷᠠᠯ ᠤᠨ ᠬᠡᠷᠡᠭᠰᠡᠯ ᠂ ᠠᠵᠢᠯ ᠦᠢᠯᠡᠰ ᠲᠤᠰᠬᠠᠭᠳᠠᠭᠰᠠᠨ ᠢᠶ᠋ᠠᠷ ᠂ ᠣᠨᠢᠰᠣᠭᠠ ᠲᠠᠭᠠᠯᠴᠠᠭᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠬᠡᠦᠬᠡᠳ ᠦᠨ ᠢᠶ᠋ᠡᠨ ᠢᠯᠭᠠᠨ ᠲᠠᠨᠢᠬᠤ ᠴᠢᠳᠠᠪᠤᠷᠢ ᠶ᠋ᠢ ᠳᠡᠭᠡᠭᠰᠢᠯᠡᠭᠦᠯᠵᠦ ᠪᠠᠶ᠋ᠢᠭᠠᠯᠢ ᠪᠠ ᠨᠡᠶ᠋ᠢᠭᠡᠮ ᠦᠨ ᠲᠤᠬᠠᠢ ᠥᠷᠭᠡᠨ ᠮᠡᠳᠡᠯᠭᠡ ᠶ᠋ᠢ ᠣᠯᠭᠣᠵᠤ ᠪᠠᠶ᠋ᠢᠬᠰᠠᠨ ᠶᠤᠮ ᠃
ᠣᠨᠢᠰᠣᠭᠠ ᠨᠢ ᠬᠥᠮᠦᠨ ᠦ ᠨᠡᠶ᠋ᠢᠭᠡᠮ ᠲᠠᠢ ᠰᠠᠯᠤᠰᠢ ᠦᠭᠡᠢ ᠬᠣᠯᠪᠣᠭᠠ ᠲᠠᠢ ᠤᠴᠢᠷ ᠠ᠋ᠴᠠ ᠬᠥᠮᠦᠨ ᠦ ᠨᠡᠶ᠋ᠢᠭᠡᠮ ᠦᠨ ᠬᠥᠭᠵᠢᠬᠦ ᠶ᠋ᠢ ᠳᠠᠭᠠᠵᠤ ᠬᠥᠭᠵᠢᠨ ᠂ ᠨᠡᠶ᠋ᠢᠭᠡᠮ ᠦᠨ ᠦᠢᠯᠡᠳᠪᠦᠷᠢᠯᠡᠯ ᠦᠨ ᠬᠦᠴᠦᠨ ᠦ ᠬᠥᠭᠵᠢᠯ ᠂ ᠨᠡᠶ᠋ᠢᠭᠡᠮ ᠦᠨ ᠶᠣᠰᠣ ᠰᠤᠷᠲᠠᠬᠤᠨ ᠤ ᠬᠤᠪᠢᠷᠠᠯ ᠂ ᠰᠣᠶᠣᠯ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠥᠭᠵᠢᠯ ᠪᠠᠳᠠᠷᠠᠯ ᠣᠨᠢᠰᠣᠭᠠ ᠶ᠋ᠢᠨ ᠳᠣᠲᠣᠷᠠ ᠨᠡᠯᠢᠶᠡᠳ ᠲᠦᠷᠭᠡᠨ ᠲᠤᠰᠬᠠᠭᠳᠠᠳᠠᠭ ᠃
ᠣᠨᠢᠰᠣᠭᠠ ᠪᠣᠯ ᠠᠮᠠ ᠪᠠᠷ ᠵᠣᠬᠢᠶᠠᠭᠳᠠᠬᠤ ᠪᠠ ᠪᠢᠴᠢᠭ ᠢᠶ᠋ᠡᠷ ᠵᠣᠬᠢᠶᠠᠭᠳᠠᠬᠤ ᠬᠣᠶᠠᠷ ᠵᠠᠮ ᠢᠶ᠋ᠠᠷ ᠬᠥᠭᠵᠢᠳᠡᠭ ᠪᠠᠶ᠋ᠢᠨᠠ ᠃ ᠮᠣᠩᠭᠣᠯ ᠤᠨ ᠪᠢᠴᠢᠭ ᠦᠨ ᠬᠥᠮᠦᠰ ᠡᠷᠲᠡ ᠳᠡᠭᠡᠷᠡ ᠦᠶᠡᠰ ᠡᠴᠡ ᠣᠨᠢᠰᠣᠭᠠ ᠵᠣᠬᠢᠶᠠᠵᠤ ᠪᠠᠶ᠋ᠢᠬᠰᠠᠨ ᠲᠡᠦᠬᠡ ᠲᠡᠢ ᠂ ᠡᠭᠦᠨ ᠳᠦ ᠶᠡᠬᠡ ᠵᠣᠬᠢᠶᠠᠯᠴᠢ ᠢᠨᠵᠠᠨᠨᠠᠰᠢ ᠂ ᠰᠢᠯᠦᠭᠴᠢ ᠲᠦᠢᠩᠺᠡᠷ ᠤᠯᠠᠨ ᠠᠷᠪᠢᠨ ᠣᠨᠢᠰᠣᠭᠠ ᠵᠣᠬᠢᠶᠠᠵᠤ ᠥᠪ ᠬᠥᠷᠥᠩᠭᠡ ᠶ᠋ᠢᠨ ᠬᠤᠪᠢ ᠪᠠᠷ ᠮᠠᠨ ᠳᠤ ᠦᠯᠡᠳᠡᠭᠡᠭᠰᠡᠨ ᠢ ᠣᠨᠴᠣᠭᠣᠶ᠋ᠢᠯᠠᠨ ᠲᠡᠮᠳᠡᠭᠯᠡᠭᠦᠰᠢᠲᠡᠢ ᠃ ᠲᠡᠳᠡᠭᠡᠷ ᠨᠢ ᠥᠨᠥᠳᠥᠷ ᠦᠨ ᠬᠥᠮᠦᠰ ᠦᠨ ᠰᠤᠷᠴᠤ ᠰᠤᠳᠤᠯᠤᠨ ᠵᠠᠯᠭᠠᠮᠵᠢᠯᠠᠨ ᠬᠥᠭᠵᠢᠭᠦᠯᠬᠦ ᠨᠠᠨᠳᠢᠨ ᠬᠥᠷᠥᠩᠭᠡ ᠪᠣᠯᠵᠤ ᠪᠠᠶ᠋ᠢᠨᠠ ᠃ ᠪᠢᠳᠡ ᠣᠨᠢᠰᠣᠭᠠ ᠪᠠᠷ ᠳᠠᠮᠵᠢᠨ ᠦᠨᠳᠦᠰᠦᠲᠡᠨ ᠦ ᠪᠠᠨ ᠡᠷᠲᠡᠨ ᠦ ᠠᠵᠤ ᠠᠮᠢᠳᠤᠷᠠᠯ ᠂ ᠵᠠᠩ ᠠᠭᠠᠯᠢ ᠂ ᠱᠠᠰᠢᠨ ᠰᠤᠷᠲᠠᠬᠤᠨ ᠂ ᠰᠣᠶᠣᠯ ᠪᠣᠯᠪᠠᠰᠤᠷᠠᠯ ᠤᠨ ᠪᠠᠶ᠋ᠢᠳᠠᠯ ᠢ ᠣᠶ᠋ᠢᠯᠠᠭᠠᠵᠤ ᠪᠣᠯᠬᠤ ᠪᠥᠭᠡᠳ ᠨᠤᠲᠤᠭ ᠤᠰᠤ ᠂ ᠪᠠᠶ᠋ᠢᠭᠠᠯᠢ ᠨᠡᠶ᠋ᠢᠭᠡᠮ ᠦᠨ ᠣᠷᠴᠢᠨ ᠲᠣᠭᠣᠷᠢᠨ ᠠᠳᠠᠯᠢ ᠦᠭᠡᠢ ᠡᠴᠡ ᠪᠣᠯᠵᠤ ᠂ ᠬᠡᠷᠡᠭ ᠪᠣᠳᠠᠰ ᠤᠴᠢᠷ ᠶᠠᠪᠤᠳᠠᠯ ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠲᠤᠰᠬᠠᠭᠰᠠᠨ ᠣᠨᠢᠰᠣᠭᠠ ᠨᠢ ᠴᠤ᠌ ᠬᠣᠭᠣᠷᠣ ᠬᠣᠭᠣᠷᠣᠨᠳᠣ ᠪᠠᠨ ᠠᠳᠠᠯᠢ ᠦᠭᠡᠢ ᠭᠡᠳᠡᠭ ᠢ ᠮᠡᠳᠡᠵᠦ ᠪᠣᠯᠤᠨᠠ ᠃ ᠨᠢᠭᠡ ᠯᠡ ᠵᠦᠢᠯ ᠦᠨ ᠶᠠᠭᠤᠮᠠ ᠶ᠋ᠢ ᠣᠷᠳᠣᠰ ᠲᠦ ᠢᠩᠭᠢᠵᠦ ᠬᠡᠯᠡᠳᠡᠭ ᠪᠣᠯ ᠣᠶ᠋ᠢᠷᠠᠳ ᠲᠤ ᠂ ᠬᠥᠬᠡᠨᠠᠭᠤᠷ ᠲᠤ ᠲᠡᠭᠡᠵᠦ ᠬᠡᠯᠡᠳᠡᠭ ᠃ ᠰᠢᠯᠢ ᠶ᠋ᠢᠨ ᠭᠣᠣᠯ ᠤᠨ ᠮᠠᠯᠵᠢᠬᠤ ᠣᠷᠣᠨ ᠳᠤ ᠮᠣᠩᠭᠣᠯ ᠭᠡᠷ ᠂ ᠮᠠᠯ ᠠᠵᠤ ᠠᠬᠤᠢ ᠶ᠋ᠢᠨ ᠲᠤᠬᠠᠢ ᠣᠨᠢᠰᠣᠭᠠ ᠡᠯᠪᠡᠭ ᠳᠡᠯᠪᠡᠭ ᠪᠠᠶ᠋ᠢᠬᠤ ᠳᠤ ᠬᠣᠷᠴᠢᠨ ᠮᠡᠲᠦ ᠶ᠋ᠢᠨ ᠲᠠᠷᠢᠶᠠᠯᠠᠬᠤ ᠂ ᠬᠠᠭᠠᠰ ᠲᠠᠷᠢᠶᠠᠯᠠᠬᠤ ᠬᠠᠭᠠᠰ ᠮᠠᠯᠵᠢᠬᠤ ᠣᠷᠣᠨ ᠳᠤ ᠡᠶ᠋ᠢᠮᠦ ᠣᠨᠢᠰᠣᠭᠠ ᠴᠥᠭᠡᠨ ᠂ ᠬᠠᠷᠢᠨ ᠲᠠᠪᠤᠨ ᠲᠠᠷᠢᠶᠠ ᠂ ᠨᠣᠭᠣᠭᠠ ᠴᠠᠭᠠ ᠶ᠋ᠢ ᠢᠯᠡᠳᠬᠡᠭᠰᠡᠨ ᠲᠠᠷᠢᠶᠠᠯᠠᠬᠤ ᠠᠮᠢᠳᠤᠷᠠᠯ ᠤᠨ ᠠᠭᠤᠯᠭᠠ ᠲᠠᠢ ᠵᠦᠢᠯ ᠣᠯᠠᠨ ᠃
ᠰᠣᠶᠣᠯ ᠤᠨ ᠥᠪ ᠪᠣᠯᠵᠤ ᠪᠠᠶ᠋ᠢᠭᠠ ᠠᠭᠤᠯᠭᠠ ᠪᠠᠶᠠᠯᠢᠬ ᠤᠷᠠᠯᠢᠬ ᠰᠡᠪᠡᠭᠦᠨ ᠮᠣᠩᠭᠣᠯ ᠣᠨᠢᠰᠣᠭᠠ ᠂ ᠲᠡᠭᠦᠨ ᠦ ᠬᠣᠵᠢᠮ ᠤᠨ ᠰᠢᠨᠡ ᠬᠥᠭᠵᠢᠯ ᠳᠦ ᠵᠤᠵᠠᠭᠠᠯᠢᠬ ᠰᠢᠮᠡᠲᠦ ᠬᠥᠷᠥᠰᠥ ᠰᠢᠷᠣᠢ ᠪᠣᠯᠵᠤ ᠥᠭᠬᠦ ᠨᠢ ᠳᠠᠮᠵᠢᠬ ᠦᠭᠡᠢ ᠃
ᠪᠠᠭᠠᠴᠤᠳ ᠬᠡᠦᠬᠡᠳ ᠪᠣᠯ ᠮᠠᠨ ᠤ ᠬᠣᠶ᠋ᠢᠴᠢ ᠦᠶᠡ ᠂ ᠠᠯᠤᠰ ᠢᠷᠡᠭᠡᠳᠦᠢ ᠶ᠋ᠢᠨ ᠪᠦᠲᠦᠭᠡᠨ ᠪᠠᠶ᠋ᠢᠭᠤᠯᠤᠭᠴᠢ ᠶᠤᠮ ᠃ ᠲᠡᠳᠡᠨ ᠢ ᠡᠷᠳᠡᠮ ᠮᠡᠳᠡᠯᠭᠡ ᠲᠡᠢ ᠪᠦᠲᠦᠭᠡᠨ ᠪᠠᠶ᠋ᠢᠭᠤᠯᠤᠭᠴᠢ ᠪᠣᠯᠭᠠᠨ ᠬᠥᠮᠦᠵᠢᠭᠦᠯᠬᠦ ᠳᠦ ᠵᠠᠷᠢᠮ ᠮᠡᠳᠡᠯᠭᠡ ᠂ ᠶᠣᠰᠣ ᠮᠣᠷᠠᠯ ᠤᠨ ᠵᠦᠢᠯ ᠢ ᠲᠡᠳᠡᠨ ᠦ ᠳᠤᠷᠠᠲᠠᠢ ᠪᠠᠬᠠᠲᠠᠢ ᠦᠢᠯᠡ ᠠᠵᠢᠯᠯᠠᠭᠠ ᠪᠠᠷ ᠳᠠᠮᠵᠢᠨ ᠣᠯᠭᠣᠵᠤ ᠪᠣᠯᠳᠠᠭ ᠃ ᠣᠨᠢᠰᠣᠭᠠ ᠲᠠᠭᠠᠯᠴᠠᠭᠠ ᠨᠢ ᠵᠥᠪᠬᠡᠨ ᠨᠢᠭᠡ ᠬᠡᠳᠦᠨ ᠵᠦᠢᠯ ᠦᠨ ᠬᠡᠷᠡᠭ ᠪᠣᠳᠠᠰ ᠢ ᠲᠠᠨᠢᠭᠤᠯᠵᠤ ᠮᠡᠳᠡᠯᠭᠡ ᠣᠯᠭᠣᠬᠤ ᠲᠡᠳᠦᠢ ᠪᠡᠷ ᠵᠣᠭᠰᠣᠬᠤ ᠦᠭᠡᠢ ᠂ ᠪᠠᠰᠠ ᠴᠤ᠌ ᠪᠠᠶ᠋ᠢᠭᠠᠯᠢ ᠶ᠋ᠢᠨ ᠪᠡ ᠨᠡᠶ᠋ᠢᠭᠡᠮ ᠦᠨ ᠣᠷᠴᠢᠨ ᠲᠣᠭᠣᠷᠢᠨ ᠳᠤ ᠰᠡᠳᠬᠢᠯ ᠲᠠᠯᠪᠢᠬᠤ ᠂ ᠶᠠᠮᠠᠷ ᠨᠢᠭᠡᠨ ᠬᠡᠷᠡᠭ ᠪᠣᠳᠠᠰ ᠢ ᠠᠵᠢᠬᠯᠠᠵᠤ ᠰᠢᠨᠵᠢᠯᠡᠬᠦ ᠰᠠᠢᠨ ᠰᠠᠶ᠋ᠢᠬᠠᠨ ᠰᠣᠳᠣᠯᠣᠩᠭᠤᠢ ᠣᠪᠣᠷ ᠰᠤᠷᠲᠠᠯ ᠲᠠᠢ ᠪᠣᠯᠭᠠᠵᠤ ᠴᠢᠳᠠᠬᠤ ᠴᠢᠬᠤᠯᠠ ᠠᠷᠭᠠ ᠪᠣᠯᠬᠤ ᠶᠤᠮ ᠃ ᠲᠡᠭᠦᠨᠴᠢᠯᠡᠨ ᠪᠠᠭᠠᠴᠤᠳ ᠬᠡᠦᠬᠡᠳ ᠢ ᠬᠠᠷᠠ ᠪᠠᠭᠠ ᠠ᠋ᠴᠠ ᠨᠢ ᠤᠯᠤᠰ ᠣᠷᠣᠨ ᠂ ᠦᠨᠳᠦᠰᠦᠲᠡᠨ ᠦ ᠬᠤᠪᠢ ᠵᠠᠶᠠᠭᠠᠨ ᠤ ᠰᠢᠨᠡ ᠰᠢᠨᠡ ᠠᠰᠠᠭᠤᠳᠠᠯ ᠲᠠᠰᠢ ᠲᠠᠲᠠᠵᠤ ᠂ ᠲᠠᠰᠤᠷᠠᠰᠢ ᠦᠭᠡᠢ ᠪᠤᠢ ᠪᠣᠯᠵᠤ ᠪᠠᠶ᠋ᠢᠭᠠ ᠰᠢᠨᠡ ᠰᠢᠨᠡ ᠬᠡᠷᠡᠭ ᠪᠣᠳᠠᠰ ᠢ ᠵᠠᠳᠠᠯᠤᠨ ᠰᠢᠨᠵᠢᠬᠦ ᠵᠠᠩᠰᠢᠯ ᠲᠠᠢ ᠪᠣᠯᠭᠠᠨ ᠰᠤᠷᠴᠤ ᠰᠤᠳᠤᠯᠬᠤ ᠤᠷᠮᠠ ᠪᠠᠬᠠ ᠶ᠋ᠢ ᠨᠢ ᠲᠠᠲᠠᠬᠤ ᠂ ᠰᠡᠳᠬᠢᠬᠦᠢ ᠶ᠋ᠢ ᠨᠢ ᠬᠥᠭᠵᠢᠭᠦᠯᠵᠦ ᠂ ᠤᠷᠠᠯᠠᠨ ᠰᠡᠳᠬᠢᠬᠦ ᠴᠢᠳᠠᠪᠤᠷᠢ ᠶ᠋ᠢ ᠨᠢ ᠨᠡᠮᠡᠭᠳᠡᠭᠦᠯᠬᠦ ᠪᠠ ᠤᠷᠠᠨ ᠪᠠᠶᠠᠯᠢᠬ ᠲᠥᠷᠥᠯᠬᠢ ᠮᠣᠩᠭᠣᠯ ᠬᠡᠯᠡ ᠪᠡᠨ ᠰᠠᠢᠨ ᠡᠵᠡᠮᠰᠢᠬᠦ ᠳᠦ ᠪᠦᠷ ᠠᠰᠢᠬᠲᠠᠢ ᠶᠤᠮ ᠃
ᠮᠠᠨ ᠤ ᠵᠣᠬᠢᠶᠠᠭᠴᠢ ᠨᠠᠷ ᠣᠳᠣᠬᠢ ᠦᠢᠯᠡᠳᠪᠦᠷᠢᠯᠡᠯ ᠦᠨ ᠬᠦᠴᠦ ᠂ ᠰᠣᠶᠣᠯ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠂ ᠰᠠᠢᠨ ᠰᠠᠶ᠋ᠢᠬᠠᠨ ᠵᠠᠩ ᠮᠣᠷᠠᠯ ᠢ ᠲᠤᠰᠬᠠᠭᠰᠠᠨ ᠰᠢᠨᠡ ᠰᠢᠨᠡ ᠣᠨᠢᠰᠣᠭᠠ ᠨᠤᠭᠤᠳ ᠢ ᠵᠣᠬᠢᠶᠠᠵᠤ ᠂ ᠬᠡᠦᠬᠡᠳ ᠦᠨ ᠰᠤᠷᠬᠤ ᠪᠢᠴᠢᠭ ᠂ ᠰᠣᠨᠢᠨ ᠰᠡᠳᠭᠦᠯ ᠳᠡᠭᠡᠷᠡ ᠦᠷᠭᠦᠯᠵᠢ ᠣᠷᠣᠭᠤᠯᠵᠤ ᠥᠭᠪᠡᠯ ᠲᠣᠩ ᠠᠴᠢ ᠲᠤᠰᠠ ᠲᠠᠢ ᠪᠣᠯᠬᠤ ᠪᠢᠯᠡ ᠃ ᠪᠢᠳᠡ ᠣᠨᠢᠰᠣᠭᠠ ᠬᠡᠦᠬᠡᠳ ᠬᠣᠶᠠᠷ ᠤᠨ ᠬᠠᠷᠢᠴᠠᠭᠠ ᠶ᠋ᠢ ᠤᠯᠠᠮ ᠨᠢᠬᠲᠠᠷᠠᠭᠤᠯᠵᠤ ᠣᠨᠢᠰᠣᠭᠠ ᠶ᠋ᠢᠨ ᠪᠠᠶ᠋ᠢᠯᠳᠤᠭᠠᠨᠴᠢ ᠂ ᠬᠥᠮᠦᠵᠢᠭᠦᠯᠦᠭᠴᠢ ᠦᠢᠯᠡᠳᠦᠯ ᠢ ᠭᠦᠢᠴᠡᠳ ᠪᠠᠳᠠᠷᠠᠭᠤᠯᠤᠨ ᠦᠷᠡ ᠬᠡᠦᠬᠡᠳ ᠢᠶ᠋ᠡᠨ ᠤᠯᠠᠮ ᠤᠢ ᠤᠬᠠᠭᠠᠨ ᠲᠠᠢ ᠂ ᠰᠡᠴᠡᠨ ᠰᠡᠷᠭᠦᠯᠡᠩ ᠂ ᠬᠤᠷᠴᠠ ᠮᠡᠷᠭᠡᠨ ᠪᠣᠯᠭᠠᠨ ᠬᠥᠮᠦᠵᠢᠭᠦᠯᠵᠦ ᠮᠠᠷᠭᠠᠰᠢ ᠶ᠋ᠢᠨ ᠰᠠᠢᠨ ᠰᠠᠶ᠋ᠢᠬᠠᠨ ᠤ ᠲᠥᠯᠥᠭᠡ ᠳᠠᠪᠰᠢᠨ ᠳᠡᠭᠦᠯᠢᠬᠦ ᠳ᠋ᠦ᠍ᠨᠢ ᠬᠠᠳᠠᠨ ᠪᠥᠬᠡ ᠣᠶᠤᠨ ᠰᠠᠨᠠᠭᠠᠨ ᠤ ᠵᠢᠭᠦᠷ ᠤᠷᠭᠤᠭᠤᠯᠵᠤ ᠥᠭᠬᠦ ᠳᠦ ᠬᠦᠴᠦᠯᠡᠶᠡ ᠃
ᠨᠢᠮᠠ
1980 —1985.9 ᠪᠡᠭᠡᠵᠢᠩ ᠳᠦ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ: ᠮᠢᠩᠭᠠᠳ ᠴᠢᠮᠡᠭ᠂ ᠬᠠᠳᠠᠴᠢ ᠤᠷᠠᠨᠠ
ᠬᠢᠨᠠᠭ᠍ᠴᠢ : ᠬᠠᠷᠠᠨᠤᠳ ᠲᠤᠶᠠᠭᠠ