ᠵᠠᠮ – ᠷ · ᠴᠣᠢᠨᠣᠮ Зам – Р · Чойном
266ᠵᠠᠮ
ᠥᠯᠥᠭᠡᠢ ᠶ᠋ᠢᠨ ᠶ᠋ᠢᠡᠨ ᠳᠡᠷᠭᠡᠳᠡ ᠡᠴᠡ ᠪᠢ ᠬᠣᠯᠠ ᠶ᠋ᠢᠨ ᠠᠶᠠᠨ ᠳ᠋ᠤ᠌ ᠭᠠᠷᠤᠭᠰᠠᠨ
ᠥᠩᠬᠥᠷᠢᠵᠦ᠂ ᠮᠥᠯᠬᠥᠵᠦ ᠂ ᠬᠥᠯ ᠨᠢᠴᠦᠭᠦᠨ ᠭᠢᠰᠬᠢᠵᠦ
ᠥᠰᠴᠦ ᠂ ᠳᠡᠭᠳᠡᠵᠦ ᠂ ᠥᠲᠡᠯᠵᠦ ᠂ ᠪᠥᠭᠲᠥᠶ᠋ᠢᠵᠦ
ᠥᠪᠡᠷ ᠦ᠋ᠨ ᠶ᠋ᠢᠡᠨ ᠨᠢᠭᠡᠨ ᠵᠠᠮ ᠊ᠢ ᠨᠢᠭᠡ ᠨᠠᠰᠤ ᠪᠠᠷ ᠶ᠋ᠢᠠᠨ ᠬᠡᠮᠵᠢᠵᠦ ᠶᠠᠪᠤᠨᠠ᠃
ᠨᠢᠯᠤᠭᠤᠨ ᠦᠭᠡᠢ ᠦᠨᠡᠨ ᠊ᠢ ᠬᠡᠯᠡᠳᠡᠭ ᠪᠣᠯᠬᠣᠷ
ᠰᠢᠯᠤᠭᠤᠨ ᠦᠭᠡᠢ ᠪᠠᠷᠲᠠᠭᠠᠲᠤ ᠵᠠᠮ ᠣᠨᠣᠭᠲᠠᠵᠠᠢ
ᠪᠠᠷᠲᠠᠬ᠋ᠠ ᠪᠦᠬᠦᠨ ᠳ᠋ᠦ᠍ ᠨᠢ ᠠᠮᠢ ᠨᠠᠰᠤ ᠮᠢᠨᠢ
ᠪᠠᠯᠠᠷᠠᠵᠤ ᠰᠦᠢᠷᠡᠬᠦ ᠰᠢᠬᠠᠵᠤ ᠶᠠᠪᠤᠯᠠ ᠃
ᠤᠯᠤᠰ ᠤᠯᠤᠰ ᠠ᠋ᠴᠠ ᠬᠠᠶᠠᠭᠠ ᠲᠤᠰᠠᠭᠠᠷᠯᠠᠭᠰᠠᠨ
ᠠᠭᠤᠯᠠ ᠶ᠋ᠢᠨ ᠣᠷᠣᠨ ᠪ ᠬᠢᠯᠢ ᠶ᠋ᠢᠨ ᠵᠢᠷᠤᠭ ᠰᠢᠭ᠋
ᠦᠢ ᠣᠯᠠᠨ ᠠ᠋ᠴᠠ ᠲᠤᠭᠤᠷᠭᠠ ᠲᠤᠰᠠᠭᠠᠷᠯᠠᠭᠰᠠᠨ
ᠦᠵᠡᠯ ᠪᠣᠳᠣᠯ ᠤᠨ ᠮᠢᠨᠢ ᠬᠢᠯᠢ ᠪᠣᠯᠤᠭᠰᠠᠨ
ᠠᠲᠤᠷᠢᠶᠠ ᠲᠠᠢ ᠨᠠᠷᠢᠨ ᠤᠯᠠᠭᠠᠨ ᠵᠠᠮ ᠶ᠋ᠢᠠᠷ ᠶ᠋ᠢᠠᠨ
ᠠᠮᠢᠳᠤᠷᠠᠯ ᠮᠢᠨᠢ ᠬᠦᠨᠳᠦ ᠲᠡᠷᠭᠡ ᠰᠢᠭ᠌ ᠬᠡᠯᠲᠦᠷᠢᠯᠡ
ᠠᠷᠠᠯ ᠳ᠋ᠤᠨᠢ ᠬᠠᠲᠠᠭᠰᠠᠨ ᠶᠠᠰᠤᠨ ᠭᠡᠲᠡᠷᠭᠡ ᠮᠤᠷᠢ ᠪᠣᠯᠵᠤ
ᠠᠷᠬ᠋ᠠ ᠦᠭᠡᠢ ᠪᠢ ᠪᠡᠶᠡ ᠶ᠋ᠢᠨ ᠲᠤᠶ᠋ᠢᠯ ᠳ᠋ᠤ᠌ ᠬᠦᠷᠦᠯᠡ ᠃
ᠤᠨᠠᠭᠠᠨ ᠪᠠᠬ᠋ᠠ ᠶ᠋ᠢᠨ ᠴᠡᠴᠡᠭ ᠵᠢᠮᠢᠰᠲᠦ ᠵᠠᠮ
ᠤᠰᠤ ᠭᠠᠲᠤᠯᠵᠤ ᠠᠭᠤᠯᠠ ᠳᠠᠪᠠᠭᠰᠠᠨ ᠵᠠᠮ
ᠤᠯᠠᠭᠠᠨ ᠭᠠᠯ ᠊ᠢ ᠵᠦᠰᠦᠭᠡᠳ ᠭᠠᠷᠤᠭᠰᠠᠨ ᠵᠠᠮ
ᠤᠷᠲᠤ ᠮᠢᠨᠢ ᠪᠢᠰᠢ ᠂ ᠬᠣᠶ᠋ᠢᠨᠠ ᠮᠢᠨᠢ ᠵᠣᠷᠠᠶ᠋ᠢᠵᠠᠢ ᠁
ᠠᠯᠲᠠᠨ ᠨᠠᠪᠴᠢᠰ ᠤᠨᠠᠬᠤ ᠨᠠᠮᠤᠷ ᠦ᠋ᠨ ᠣᠢ ᠳ᠋ᠤ᠌
ᠠᠮᠠᠷᠠᠭ ᠪᠢᠲᠡ ᠬᠣᠶᠠᠷ ᠦ᠋ᠨ ᠵᠠᠮ ᠰᠠᠯᠵᠤ
ᠠᠯᠬᠤᠬᠤ ᠳᠣᠳᠣᠮ ᠴᠠᠰᠤ ᠮᠥᠰᠥ ᠨᠢ ᠵᠤᠵᠠᠭᠠᠷᠠᠨ
ᠠᠮᠢᠲᠠᠨ ᠬᠥᠮᠦᠨ ᠦᠭᠡᠢ ᠵᠠᠮ ᠳ᠋ᠤ᠌ ᠪᠢ ᠭᠠᠭᠴᠠᠭᠠᠷᠲᠠᠯᠠ ᠃
ᠬᠠᠷᠠᠯᠭᠠᠨ ᠫᠣᠣᠴᠢ ᠳ᠋ᠤ᠌ ᠬᠥᠯ ᠶ᠋ᠢᠡᠨ ᠫᠤᠤᠲᠠᠭᠤᠯᠤᠭᠰᠠᠨ ᠴᠢᠨᠣᠠ
ᠬᠠᠨ ᠠᠭᠤᠯᠠᠨ ᠳ᠋ᠤ᠌ ᠰᠢᠷᠬᠠ ᠪᠠᠨ ᠬᠠᠵᠠᠯᠠᠨ ᠬᠡᠮᠢᠯᠡᠬᠦ ᠰᠢᠭ᠌
ᠬᠥᠮᠦᠨ ᠳ᠋ᠤ᠌ ᠰᠠᠶ᠋ᠢᠨ ᠶᠠᠪᠤᠭᠠᠳ ᠬᠥᠮᠦᠨ ᠡᠴᠡ ᠣᠯᠤᠭᠰᠠᠨ ᠰᠢᠷᠬᠠ ᠪᠠᠨ
ᠬᠦᠢᠲᠡᠨ ᠴᠥᠯ ᠳ᠋ᠤ᠌ ᠪᠢ ᠭᠠᠭᠴᠠ ᠪᠠᠷ ᠬᠡᠮᠢᠯᠡᠵᠤ ᠶᠠᠪᠤᠨᠠ ᠁
1974 ·6 ᠂13
《 ᠷ · ᠴᠣᠶ᠋ᠢᠨᠣᠮ ᠤᠨ ᠰᠢᠯᠦᠭ ᠵᠣᠬᠢᠶᠠᠯ ᠤᠨ ᠬᠤᠷᠢᠶᠠᠬᠤᠢ 》
— ᠤᠶᠠᠩᠭᠠ ᠶ᠋ᠢᠨ ᠰᠢᠯᠦᠭ ᠠ᠋ᠴᠠ ᠬᠠᠭᠤᠯᠪᠠ ᠃
ᠪᠢ᠊ · ᠳᠠᠮᠳᠢᠨᠰᠦ᠋ᠷᠦᠩ ᠡᠮᠬᠢᠳᠬᠡᠨ ᠨᠠᠶ᠋ᠢᠷᠠᠭᠤᠯᠪᠠ
ᠬᠠᠷᠢᠭᠤᠴᠠᠭᠰᠠᠨ ᠨᠠᠶ᠋ᠢᠷᠠᠭᠤᠯᠤᠭᠴᠢ ᠄ ᠪᠣᠷᠣᠨᠣᠳ ᠳᠣᠷᠵᠢ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠤᠨᠲᠤᠷᠮᠡ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠣᠳᠬᠠᠨᠰᠣᠠ᠂ ᠮᠥᠩᠭᠥᠨᠴᠡᠴᠡᠭ