ᠳᠡᠯᠭᠡᠷ ᠦᠨ ᠴᠢᠪᠠᠭᠠᠨᠴᠠ – ᠳ · ᠪᠠᠲᠤᠪᠠᠶᠠᠷ Дэлгэрийн чавганц – Д ᠂ Батбаяр
491ᠳᠡᠯᠭᠡᠷ ᠦᠨ ᠴᠢᠪᠠᠭᠠᠨᠴᠠ
[ ᠮᠣᠩᠭᠣᠯ ] ᠳ · ᠪᠠᠲᠤᠪᠠᠶᠠᠷ
ᠳᠡᠯᠭᠡᠷ ᠭᠡᠵᠦ ᠰᠠᠯᠬᠢ ᠲᠣᠭᠲᠠᠬᠤ ᠭᠠᠵᠠᠷ ᠦᠭᠡᠢ ᠨᠢᠭᠡᠨ ᠬᠥᠨᠲᠡᠢ ᠃ ᠡᠯᠡ ᠬᠥᠨᠲᠡᠢ ᠶ᠋ᠢ ᠴᠢᠩᠬ᠋ᠠ ᠭᠣᠣᠯᠯᠠᠵᠤ ᠬᠠᠷᠠᠭᠲᠠᠬᠤ ᠰᠠᠭᠤᠷᠢᠨ ᠊ᠢ ᠳᠡᠯᠭᠡᠷ ᠦ᠋ᠨ ᠰᠠᠭᠤᠷᠢᠨ ᠭᠡᠳᠡᠭ ᠃ ᠨᠢᠭᠡ ᠨᠢᠭᠡ ᠶ᠋ᠢᠨ ᠶ᠋ᠢᠡᠨ ᠨᠥᠮᠥᠷᠢ ᠳᠤ ᠬᠣᠷᠭᠣᠲᠠᠭᠰᠠᠨ ᠶᠤᠮ ᠰᠢᠭ᠋ ᠶ᠋ᠢᠡᠨ ᠣᠶ᠋ᠢᠷᠠᠬᠠᠨ ᠬᠡᠲᠦᠨ ᠰᠢᠪᠠᠷ ᠪᠠᠶ᠋ᠢᠰᠢᠩ ᠦ᠋ᠨ ᠨᠥᠮᠥᠷᠢ ᠨᠥᠭᠡᠯᠭᠡ ᠪᠡᠷ ᠭᠠᠭᠴᠠ ᠨᠢᠭᠡ ᠪᠡᠷ ᠶ᠋ᠢᠡᠨ ᠪᠠᠭᠤᠭᠰᠠᠨ ᠲᠣᠭᠠᠲᠠᠢ ᠬᠡᠲᠦᠨ ᠭᠡᠷ ᠃ ᠮᠡᠲᠡᠭᠡᠵᠢ ᠣᠷᠣᠨ ᠰᠠᠭᠤᠷᠢ ᠶ᠋ᠢᠨ ᠣᠩᠭᠣᠳ ᠶᠠᠭᠤᠮᠠ ᠬᠣᠶ᠋ᠢᠨᠠ ᠬᠥᠮᠦᠨ ᠪᠦᠭᠦᠲᠡ ᠤᠷᠤᠭᠤ ᠬᠤᠴᠠᠵᠤ ᠳᠠᠪᠬᠢᠳᠠᠭ ᠠᠷᠪᠠᠭᠠᠳ ᠵᠤᠯᠪᠢᠩ ᠨᠣᠬᠠᠰ ᠪᠤᠢ ᠃ ᠡᠨᠡ ᠨᠣᠬᠠᠰ ᠊ᠢ ᠵᠠᠷᠢᠮ ᠳᠤ ᠪᠠᠨ ᠵᠠᠩᠲᠤᠷᠴᠤ ᠠᠮᠢᠬᠠᠨ ᠵᠠᠭᠤᠷᠠ ᠪᠠᠨ ᠬᠠᠷᠢᠶᠠᠵᠤ ᠂ ᠵᠠᠷᠢᠮ ᠳᠤ ᠪᠠᠨ ᠶᠠᠰᠤ ᠬᠠᠶᠠᠵᠤ ᠥᠭᠴᠦ ᠶᠠᠪᠤᠲᠠᠭ ᠬᠥᠮᠦᠨ ᠪᠣᠯ ᠳᠡᠯᠭᠡᠷ ᠦ᠋ᠨ ᠴᠢᠪᠠᠭᠠᠨᠴᠠ ᠬᠡᠮᠡᠨ ᠨᠡᠷᠡᠯᠡᠭᠳᠡᠴᠢᠭᠡᠭᠰᠡᠨ ᠭᠠᠭᠴᠠ ᠪᠡᠶᠡ ᠡᠮᠡᠭᠡᠨ ᠂ ᠡᠲᠡᠨ ᠪ ᠬᠢ ᠭᠡᠵᠦ ᠬᠠᠮᠤᠭ ᠦ᠋ᠨ ᠵᠡᠭᠦᠨ ᠵᠠᠬᠠ ᠶ᠋ᠢᠨ ᠪᠠᠶ᠋ᠢᠰᠢᠩ ᠦ᠋ᠨ ᠡᠮᠦᠨᠡ ᠨᠢᠭᠡᠨ ᠬᠠᠷᠠ ᠭᠡᠷ ᠪᠤᠢ ᠃ ᠬᠡᠲᠦᠢ ᠳᠤ ᠴᠤ᠌ ᠪᠠᠭᠤᠭᠰᠠᠨ ᠶᠤᠮ ᠪᠢᠯᠡ ᠃ ᠯᠠᠪ ᠯᠠ ᠪᠠᠭᠤᠭᠰᠠᠨ ᠠ᠋ᠴᠠ ᠬᠣᠶ᠋ᠢᠰᠢ ᠵᠥᠭᠡᠭᠡᠵᠦ ᠪᠠᠭᠤᠵᠤ ᠪᠠᠶ᠋ᠢᠬᠤ ᠶ᠋ᠢ ᠨᠢ ᠬᠡᠨ ᠴᠤ᠌ ᠬᠠᠷᠠᠬ᠋ᠠ ᠦᠭᠡᠢ ᠭᠡᠯᠴᠡᠨᠡ ᠃ ᠭᠡᠷ ᠳᠣᠲᠣᠷᠠ ᠪᠠᠨ ᠪᠠᠷᠠᠭᠤᠨ ᠬᠠᠶᠠᠭᠠᠨ ᠠ᠋ᠴᠠ ᠬᠣᠶ᠋ᠢᠮᠣᠷ ᠦ᠋ᠨ ᠶ᠋ᠢᠠᠨ ᠠᠪᠲᠠᠷᠠ ᠶ᠋ᠢ ᠬᠦᠷᠲᠡᠯᠡ ᠨᠥᠬᠥᠭᠡᠰᠦ ᠲᠡᠢ ᠲᠠᠮᠫᠤᠤ ᠬᠠᠭᠤᠴᠢᠨ ᠳᠡᠪᠡᠯ ᠦ᠋ᠨ ᠬᠠᠭᠤᠯᠬ᠋ᠠ ᠪᠠᠷ ᠬᠢᠭᠰᠡᠨ ᠤᠭᠤᠲᠠ ᠰᠠᠪᠠ ᠠᠷᠭᠠᠯ ᠵᠢᠯ ᠦ᠋ᠨ ᠵᠢᠯ ᠳᠤ ᠯᠠ ᠬᠤᠷᠢᠶᠠᠯᠲᠠ ᠲᠠᠢ ᠬᠠᠷᠠᠭᠲᠠᠨᠠ ᠃
ᠬᠡᠨ ᠪ ᠬᠢᠨ ᠪ ᠤᠲᠤᠮ ᠦ᠋ᠨ ᠬᠡᠨ ᠭᠡᠭᠴᠢ ᠶ᠋ᠢᠨ ᠦᠷᠡ ᠰᠠᠲᠤ ᠭᠡᠭᠴᠢ ᠶ᠋ᠢ ᠮᠡᠲᠡᠬᠦ ᠬᠥᠮᠦᠨ ᠪᠠᠶ᠋ᠢᠲᠤᠭᠠᠢ ᠵᠢᠩᠬᠢᠨᠢ ᠨᠡᠷᠡ ᠶ᠋ᠢ ᠨᠢ ᠴᠤ᠌ ᠮᠡᠲᠡᠬᠦ ᠬᠥᠮᠦᠨ ᠡᠨᠡ ᠬᠠᠪᠢ ᠶ᠋ᠢᠨ ᠬᠢᠨ ᠳᠤ ᠦᠭᠡᠢ ᠃ ᠴᠦᠮ ᠯᠡ ᠳᠡᠯᠭᠡᠷ ᠦ᠋ᠨ ᠴᠢᠪᠠᠭᠠᠨᠴᠠ ᠭᠡᠨᠡ ᠃ ᠲᠡᠷᠡ ᠴᠤ᠌ ᠪᠤᠤ ᠬᠡᠯᠡ ᠂ ᠠᠶ᠋ᠢᠯ ᠬᠤᠨᠠᠷ ᠠ᠋ᠴᠠ ᠣᠯᠤᠭᠰᠠᠨ ᠰᠢᠬᠢᠷ ᠵᠢᠮᠢᠰ ᠶ᠋ᠢᠡᠨ ᠭᠠᠭᠴᠠᠭᠠᠷ ᠢᠳᠡᠴᠢᠭᠡᠭᠰᠡᠨ ᠬᠡᠦᠬᠡᠳ ᠊ᠢ 《 ᠳᠡᠯᠭᠡᠷ ᠤᠨ ᠴᠢᠪᠠᠭᠠᠨᠴᠠ ᠰᠢᠭ᠋ ᠭᠠᠭᠴᠠᠭᠠᠷ ᠵᠠᠶᠠᠬ᠋ᠠ ᠲᠠᠢ ᠠᠮᠢᠲᠠᠨ ᠰᠢᠦ 》 ᠬᠡᠮᠡᠨ ᠵᠠᠩᠨᠠᠵᠤ ᠂ ᠲᠡᠭᠦᠨ ᠡᠴᠡ ᠪᠡᠨ ᠡᠭᠦᠲᠦᠨ ᠄
— ᠬᠥᠭᠡᠷᠦᠬᠦᠢ ᠳ᠋ᠡ ᠂ ᠬᠡᠨ ᠴᠤ᠌ ᠢᠯᠭᠠᠬ᠋ᠠ ᠶᠠᠭᠤ ᠪᠠᠶ᠋ᠢᠬᠤ ᠪᠤᠢ ᠃ ᠳᠡᠯᠭᠡᠷ ᠣᠷᠣᠪᠠᠯ ᠴᠠᠢ ᠶ᠋ᠢᠨ ᠰᠦ᠋ ᠥᠭᠬᠦ ᠶᠤᠮᠰᠠᠨ ᠃
— ᠶᠠᠭᠠᠬᠢᠬᠤ ᠶᠤᠮ ᠂ ᠵᠣᠯᠢᠬ ᠃ ᠲᠡᠭᠡᠵᠦ ᠪᠠᠶ᠋ᠢᠭᠠᠳ ᠲᠡᠷᠡ ᠴᠢᠨᠢ ᠶᠡᠬᠡ ᠴᠢᠮᠡᠭ ᠃ ᠰᠢᠷᠠ ᠪᠤᠲᠠᠬ᠋ᠠ ᠢᠳᠡᠳᠡᠭ ᠦᠭᠡᠢ ᠶᠤᠮ ᠴᠢᠨᠢ ᠭᠡᠬᠦ ᠴᠢᠨᠢ ᠶᠠᠭᠤ ᠪᠢᠯᠡ ᠃
— ᠵᠣᠬᠢᠲᠠᠭ ᠦᠭᠡᠢ ᠪᠣᠯ ᠪᠠᠰᠠ ᠬᠢᠷᠢ ᠰᠢᠦ ᠳ᠋ᠠ ᠃
— ᠶᠠᠮᠠᠷ ᠶᠠᠭᠤᠮᠠ ᠳᠤ ᠪᠠᠨ ᠵᠣᠬᠢᠬᠤ ᠦᠭᠡᠢ ᠪᠠᠶ᠋ᠢᠬᠤ ᠪᠤᠢ ᠃ ᠠᠮᠢᠨ ᠳᠤ ᠪᠠᠨ ᠴᠢᠮᠠᠷᠬᠠᠵᠤ ᠯᠠ ᠪᠠᠶ᠋ᠢᠬᠤ ᠦᠭᠡᠢ ᠦᠦ ᠂ ᠮᠠᠭᠤ ᠮᠥᠷᠲᠡᠯᠡ ᠪᠡᠨ ᠶᠡᠬᠡ ᠶᠠᠩᠵᠤ ᠶ᠋ᠢᠨ ᠴᠢᠪᠠᠭᠠᠨᠴᠠ ᠡ ᠃ ᠳᠡᠯᠭᠡᠷ ᠪᠠᠬ᠋ᠠ ᠰᠤᠷᠭᠠᠭᠤᠯᠢ ᠪᠠᠶ᠋ᠢᠭᠤᠯᠬᠤ ᠭᠡᠰᠡᠨ ᠊ᠢ ᠳᠤᠭᠤᠯᠴᠢᠬᠠᠭᠠᠳ ᠶᠡᠬᠡ ᠳᠤᠷᠠ ᠦᠭᠡᠶ᠋ᠢᠴᠡᠵᠦ ᠪᠠᠶ᠋ᠢᠨᠠ ᠭᠡᠨᠡ ᠡ ᠃
— ᠲᠡᠭᠦᠨ ᠳᠤ ᠶᠠᠮᠠᠷ ᠬᠠᠮᠢᠶᠠ ᠪᠠᠶ᠋ᠢᠨᠠ ᠃
— ᠬᠠᠮᠢᠶᠠ ᠪᠠᠶ᠋ᠢᠯᠭᠦᠢ ᠶᠠᠭᠠᠬᠢᠬᠤᠪ ᠃ ᠠᠶ᠋ᠢᠯ ᠬᠤᠨᠠᠷ ᠪᠠᠭᠤᠭᠠᠳ ᠂ ᠬᠥᠮᠦᠨ ᠠᠮᠢᠲᠠᠨ ᠣᠯᠠᠰᠢᠷᠠᠭᠠᠳ ᠢᠷᠡᠬᠦ ᠪᠡᠷ ᠶ᠋ᠢᠡᠨ ᠣᠶ᠋ᠢᠷᠠ ᠬᠠᠪᠢ ᠶ᠋ᠢᠨ ᠠᠷᠭᠠᠯ ᠊ᠢ ᠲᠡᠭᠦᠴᠢᠬᠡᠨᠡ ᠭᠡᠵᠦ ᠮᠠᠭᠤ ᠰᠠᠨᠠᠭᠠᠯᠠᠵᠤ ᠪᠠᠶ᠋ᠢᠬᠤ ᠦᠭᠡᠢ ᠦᠦ ᠃
— ᠬᠥᠮᠦᠨ ᠪ ᠰᠢᠨᠤᠯ ᠭᠡᠳᠡᠭ ᠨᠢᠭᠡ ᠠᠰᠠᠴᠢᠬᠤ ᠪᠠᠷ ᠶ᠋ᠢᠠᠨ ᠡᠪᠡᠰᠦᠨ ᠪ ᠲᠦᠢᠮᠡᠷ ᠯᠡ ᠭᠡᠰᠡᠨ ᠦᠭᠡ ᠃ ᠨᠠᠰᠤ ᠪᠠᠷ ᠶ᠋ᠢᠠᠨ ᠥᠷᠲᠡᠭᠡᠳ ᠪᠠᠷᠠᠬᠤ ᠦᠭᠡᠢ ᠠᠷᠭᠠᠯ ᠲᠠᠢ ᠪᠠᠶ᠋ᠢᠵᠤ ᠠᠷᠭᠠᠯ ᠭᠤᠶᠤᠬᠤ ᠪᠠᠷ ᠵᠢᠭᠡᠯᠡᠭᠦᠯᠦᠨᠡ ᠭᠡᠳᠡᠭ ᠭᠡᠨᠡ ᠃
— ᠲᠡᠷᠡ ᠴᠤ᠌ ᠬᠠᠷᠢᠨ ᠲᠡᠭᠡᠳᠡᠭ ᠶᠤᠮ ᠃ ᠠᠷᠭᠠᠯ ᠳᠡᠭᠡᠷᠡ ᠪᠡᠨ ᠴᠤ᠌ ᠬᠠᠷᠠᠮ ᠪᠠᠶ᠋ᠢᠬ᠋ᠠ ᠃
— ᠬᠠᠷᠠᠮ ᠶ᠋ᠢᠠᠷ ᠪᠠᠷᠠᠬᠤ ᠤᠤ ᠂ ᠲᠡᠭᠡᠭᠡᠳ ᠰᠢᠨᠤᠯ ᠲᠠᠢ ᠶ᠋ᠢ ᠨᠢ ᠶᠠᠭᠠᠬᠢᠨᠠ ᠭᠡ ᠃ ᠡᠲᠦᠷ ᠥᠨᠵᠢᠨᠡ ᠭᠡᠵᠦ ᠪᠠᠶ᠋ᠢᠬᠤ ᠦᠭᠡᠢ ᠰᠢᠦ ᠃ ᠲᠣᠪᠲᠤ ᠠᠷᠭᠠᠯ ᠲᠡᠭᠦᠵᠦ ᠪᠠᠶ᠋ᠢᠲᠠᠭ ᠶᠤᠮ ᠪᠢᠯᠡ ᠃
— ᠠᠷᠭᠠᠯ ᠦ᠋ᠨ ᠬᠢᠨᠢ ᠰᠠᠶ᠋ᠢᠬᠠᠨ ᠊ᠢ ᠶᠠᠭᠠᠬᠢᠨᠠ ᠭᠡ ᠃ ᠪᠠᠷᠤᠭ ᠲᠦᠯᠡᠬᠦ ᠳᠤ ᠬᠠᠶ᠋ᠢᠷᠠᠨ ᠭᠡᠮᠡᠷ ᠬᠥᠬᠡ ᠠᠷᠭᠠᠯ ᠪᠠᠶ᠋ᠢᠲᠠᠭ ᠶᠤᠮ ᠃
— ᠬᠥᠮᠦᠨ ᠳᠤ ᠬᠣᠷᠮᠣᠶ᠋ᠢᠲᠠᠨ ᠠᠷᠭᠠᠯ ᠥᠭᠴᠢᠭᠡᠭᠡᠳ 《 ᠶᠠᠭᠠᠬᠢᠬᠰᠠᠨ ᠵᠢᠭᠠᠬᠠᠨ ᠥᠭᠬᠦ ᠶᠤᠮ 》 ᠭᠡᠬᠦ ᠪᠡᠷ 《 ᠮᠢᠨᠦ ᠭᠠᠭᠴᠠ ᠭᠠᠭᠴᠠᠭᠠᠷ ᠨᠢ ᠲᠡᠭᠦᠭᠰᠡᠨ ᠶᠠᠭᠤᠮᠠ ᠶ᠋ᠢ ᠴᠢ ᠪᠥᠭᠡᠮ ᠶ᠋ᠢᠡᠷ ᠨᠢ ᠠᠪᠬᠤ ᠭᠡᠬᠦ ᠴᠢᠨᠢ ᠶᠠᠭᠤ ᠶᠤᠮ 》 ᠭᠡᠵᠦ ᠵᠠᠩᠨᠠᠭᠠᠳ ᠢᠯᠡᠭᠦᠦ ᠥᠭᠳᠡᠭ ᠦᠭᠡᠢ ᠶᠤᠮ ᠭᠡᠨᠡ ᠡ ᠃
— ᠥᠭᠬᠦ ᠬᠥᠮᠦᠨ ᠳᠤ ᠪᠡᠨ ᠲᠡᠭᠡᠳᠡᠭ ᠶᠤᠮ ᠭᠡᠰᠡᠨ ᠃ ᠥᠭᠬᠦ ᠦᠭᠡᠢ ᠬᠥᠮᠦᠨ ᠳᠤ ᠪᠡᠨ ᠪᠣᠯ ᠴᠤ᠌《 ᠬᠥᠮᠦᠨ ᠪᠦᠯᠢ ᠣᠯᠠᠨ ᠲᠠᠢ ᠠᠶ᠋ᠢᠯ ᠲᠠᠨ ᠪ ᠬᠢ ᠂ ᠲᠦᠯᠡᠬᠦ ᠠᠷᠭᠠᠯ ᠶ᠋ᠢᠠᠨ ᠲᠡᠭᠦᠬᠦ ᠳᠤ ᠶᠠᠭᠠᠬᠢᠲᠠᠭ ᠶᠤᠮ 》 ᠭᠡᠳ ᠥᠭᠳᠡᠭ ᠦᠭᠡᠢ ᠶᠤᠮ ᠃ ᠵᠠ ᠲᠡᠭᠡᠭᠡᠳ ᠲᠩᠷᠢ ᠶ᠋ᠢᠨ ᠰᠠᠶ᠋ᠢᠬᠠᠨ ᠳᠤ ᠪᠣᠯ ᠴᠤ᠌ ᠬᠡᠨ ᠭᠤᠸᠠᠢ ᠶ᠋ᠢ ᠴᠤ᠌ ᠬᠣᠷᠮᠣᠢ ᠬᠣᠭᠣᠰᠣᠨ ᠪᠤᠴᠠᠭᠠᠬᠤ ᠦᠭᠡᠢ ᠪᠠᠶ᠋ᠢᠬᠠ ᠃
— ᠬᠠᠯᠲᠠᠷ ᠦ᠋ᠨ ᠬᠢᠨ ᠯᠠ ᠳᠤᠷᠠ ᠪᠠᠷ ᠠᠪᠲᠠᠭ ᠪᠠᠶ᠋ᠢᠬᠤ ᠳ᠋ᠠ ᠃
— ᠲᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤᠪ ᠃ ᠬᠠᠯᠲᠠᠷ ᠯᠠ ᠡᠨᠡ ᠴᠢᠪᠠᠭᠠᠨᠴᠠ ᠶ᠋ᠢ ᠲᠡᠵᠢᠭᠡᠵᠦ ᠪᠠᠶ᠋ᠢᠬ᠋ᠠ ᠶᠤᠮ ᠴᠢᠨᠢ ᠃
— ᠠᠬᠠ ᠳᠡᠭᠦᠦ ᠶᠤᠮ ᠦᠦ ?
— ᠦᠭᠡᠢ ᠡ ᠂ ᠦᠭᠡᠢ ᠃ ᠶᠠᠮᠠᠷ ᠶᠠᠭᠤᠮᠠ ᠠᠬᠠ ᠳᠡᠭᠦᠦ ᠪᠠᠶ᠋ᠢᠬᠤ ᠪᠤᠢ ᠃
— ᠦᠭᠡᠢ ᠲᠡᠭᠡᠭᠡᠳ ᠮᠥᠨ ᠪᠡᠶᠡ ᠰᠠᠶ᠋ᠢᠲᠠᠢ ᠴᠢᠪᠠᠭᠠᠨᠴᠠ ᠰᠢᠦ ᠂ ᠬᠠᠮᠢᠬ᠋ᠠ ᠪᠠᠶ᠋ᠢᠬ᠋ᠠ ᠬᠥᠬᠡ ᠦᠨᠲᠦᠷ ᠦ᠋ᠨ ᠠᠷᠤ ᠳᠤ ᠯᠠ ᠠᠷᠤᠭ ᠡᠭᠦᠷᠴᠢᠭᠡᠭᠰᠡᠨ ᠶᠠᠪᠤᠵᠤ ᠪᠠᠶ᠋ᠢᠲᠠᠭ ᠶᠤᠮ ᠰᠢᠦ ᠳ᠋ᠠ ᠃
— ᠰᠢᠨᠤᠭ ᠨᠢ ᠯᠡ ᠲᠡᠷᠡ ᠵᠡᠷᠭᠡ ᠲᠡᠢ ᠁ ᠪᠠᠶ᠋ᠢᠬᠤ ᠦᠭᠡᠢ ᠦᠦ ᠃ ᠬᠣᠶ᠋ᠢᠲᠤ ᠶ᠋ᠢᠨ ᠲᠠᠯᠠ ᠶ᠋ᠢᠨ ᠬᠢᠨᠢ ᠬᠣᠶᠠᠷ ᠰᠢᠪᠠᠷ ᠪᠠᠶ᠋ᠢᠰᠢᠩ ᠦ᠋ᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠢᠨᠢ ᠲᠡᠷᠡ ᠴᠢᠪᠠᠭᠠᠨᠴᠠ ᠶ᠋ᠢᠨ ᠬᠢ ᠭᠡᠵᠦ ᠪᠠᠶ᠋ᠢᠬ᠋ᠠ ᠰᠢᠦ ᠃ ᠦᠷᠭᠦᠯᠵᠢ ᠴᠣᠣᠵᠢ ᠲᠠᠢ ᠪᠠᠶ᠋ᠢᠲᠠᠭ ᠃ ᠠᠶᠠᠭᠦᠢ ᠪᠣᠯ ᠲᠡᠷᠡ ᠳᠣᠲᠣᠷᠠ ᠠ᠋ᠴᠠ ᠪᠦᠷᠢᠨ ᠬᠡᠷᠡᠭᠰᠡᠯ ᠲᠡᠢ ᠲᠠᠪᠤᠨ ᠬᠠᠨᠠ ᠲᠠᠢ ᠭᠡᠷ ᠭᠠᠷᠬᠤ ᠪᠤᠢ ᠃
ᠠᠷᠠᠢ ᠴᠤ᠌ ᠳ᠋ᠠ ᠬᠥᠭᠡᠷᠦᠬᠦᠢ ᠃
— ᠵᠠ ᠲᠠ ᠨᠠᠷ ᠬᠠᠷᠠᠵᠤ ᠯᠠ ᠪᠠᠶ᠋ᠢᠭᠠᠷᠠᠢ ᠃ ᠲᠡᠷᠡ ᠬᠠᠪᠢ ᠶ᠋ᠢᠨ ᠬᠢᠨ ᠲᠡᠭᠡᠵᠦ ᠶᠠᠷᠢᠲᠠᠭ ᠶᠤᠮ ᠃ ᠣᠷᠣ ᠲᠠᠢ ᠯᠠ ᠪᠠᠶ᠋ᠢᠵᠤ ᠁ ᠭᠡᠬᠦᠴᠢᠯᠡᠨ ᠨᠢᠭᠡ ᠭᠡᠰᠡᠭ ᠯᠡ ᠲᠡᠷᠡ ᠴᠢᠪᠠᠭᠠᠨᠴᠠ ᠶ᠋ᠢᠨ ᠲᠤᠬᠠᠢ ᠶᠠᠷᠢᠶᠠ ᠪᠣᠯᠣᠭᠰᠠᠨ ᠶ᠋ᠢᠠᠨ ᠲᠥᠲᠡᠬᠡᠨ ᠵᠠᠮᠬᠠᠷᠠᠵᠤ ᠪᠠᠶ᠋ᠢᠬ᠋ᠠ ᠦᠭᠡ ᠶ᠋ᠢ ᠦᠭᠡᠶ᠋ᠢᠯᠡᠬᠦ ᠴᠤ᠌ ᠦᠭᠡᠢ ᠨᠢᠭᠡ ᠭᠡᠰᠡᠭ ᠲᠡᠭᠡᠨ ᠲᠠᠭ ᠴᠢᠭ᠌ ᠪᠣᠯᠤᠨᠠ ᠃ ᠬᠠᠷᠢᠨ ᠬᠣᠲᠠ ᠬᠦᠷᠢᠶᠡᠨ ᠡᠴᠡ ᠠᠬᠠ ᠳᠡᠭᠦᠦ ᠂ ᠲᠥᠷᠥᠯ ᠰᠠᠲᠤᠨ ᠳᠤ ᠪᠡᠨ ᠵᠣᠯᠭᠠᠬᠤ ᠪᠠᠷ ᠢᠷᠡᠭᠰᠡᠨ ᠤᠯᠤᠰ ᠬᠣᠶᠠᠷ ᠭᠤᠷᠪᠠ ᠬᠣᠨᠣᠭᠰᠠᠨ ᠪ ᠪᠠᠨ ᠳᠠᠷᠠᠬ᠋ᠠ 《 ᠦᠭᠡᠢ ᠂ ᠥᠨᠥ ᠳᠡᠯᠭᠡᠷ ᠦ᠋ᠨ ᠴᠢᠪᠠᠭᠠᠨᠴᠠ ᠠᠮᠢᠲᠤ ᠤᠤ 》 ᠬᠡᠮᠡᠨ ᠠᠰᠠᠭᠤᠵᠤ 《 ᠠᠮᠢᠲᠤ ᠪᠠᠷ ᠪᠠᠷᠠᠬᠤ ᠤᠤ ᠂ ᠤᠷᠵᠢᠲᠤᠷᠬᠠᠨ ᠠᠷᠭᠠᠯ ᠶ᠋ᠢᠠᠨ ᠲᠡᠭᠦᠭᠡᠳ ᠯᠡ ᠶᠠᠪᠤᠵᠤ ᠪᠠᠶ᠋ᠢᠬ᠋ᠠ ᠬᠠᠷᠠᠭᠲᠠᠨᠠ ᠪᠢᠯᠡ 》 ᠭᠡᠬᠦ ᠪᠡᠷ ᠭᠠᠶ᠋ᠢᠬᠠᠨ ᠲᠡᠭᠦᠨ ᠪ ᠲᠤᠬᠠᠢ ᠡᠯᠲᠡᠪ ᠊ᠢ ᠰᠣᠨᠢᠷᠬᠠᠨ ᠶᠠᠷᠢᠶᠠ ᠥᠲᠥᠭᠡᠨ 《 ᠴᠠᠭᠠᠨᠠ ᠪᠠᠨ ᠶᠡᠬᠡ ᠶᠠᠭᠤᠮᠠ ᠲᠠᠢ ᠴᠢᠪᠠᠭᠠᠨᠴᠠ ᠭᠡᠨᠡ ᠡ 》 ᠭᠡᠰᠡᠨ ᠶᠠᠷᠢᠶᠠᠨ ᠳᠤ ᠲᠤᠯᠤᠭᠠᠳ ᠵᠣᠭᠰᠣᠲᠠᠭ ᠪᠠᠶ᠋ᠢᠯᠠ᠃
ᠡᠶ᠋ᠢᠮᠦᠷᠬᠦᠦ ᠶᠠᠩᠵᠤ ᠪᠠᠷ ᠣᠨ ᠵᠢᠯ ᠦ᠋ᠨ ᠪᠣᠱᠣᠬ᠋ᠠ ᠡᠯᠡᠭᠡᠵᠡᠭᠡᠵᠤ ᠪᠠᠶ᠋ᠢᠲᠠᠯᠠ ᠨᠢᠭᠡᠨ ᠡᠲᠦᠷ ᠄
— ᠨᠥᠭᠦᠭᠡ ᠮᠠᠭᠤ ᠳᠡᠯᠭᠡᠷ ᠦ᠋ᠨ ᠴᠢᠪᠠᠭᠠᠨᠴᠠ ᠦᠬᠦᠭᠰᠡᠨ ᠭᠡᠨᠡ !
— ᠶᠠᠭᠤ ? ᠮᠠᠭᠤ ᠳᠠᠷᠢᠰᠦ᠋ᠷᠦᠩ ᠭᠤᠸᠠᠢ ᠨᠢ ᠤᠤ ᠳ᠋ᠠ ? ᠬᠥᠭᠡᠷᠦᠬᠦᠢ ᠵᠠᠶ᠋ᠢᠯᠠᠭᠤᠯ ! ᠶᠠᠭᠠᠬᠢᠭᠠᠳ ᠲᠡᠷᠡ ᠴᠢᠨᠢ ᠭᠡᠪ ᠭᠡᠨᠡᠤᠠᠲᠡᠬᠡᠨ ᠁
— ᠨᠠᠰᠤ ᠨᠢ ᠯᠠ ᠪᠣᠯᠣᠭᠰᠠᠨ ᠪᠠᠶ᠋ᠢᠯᠭᠦᠢ ᠂ ᠤᠷᠢᠲᠤ ᠡᠲᠦᠷ ᠨᠢ ᠠᠷᠭᠠᠯ ᠶ᠋ᠢᠠᠨ ᠲᠡᠭᠦᠭᠡᠳ ᠯᠠ ᠶᠠᠪᠤᠵᠤ ᠪᠠᠶ᠋ᠢᠬᠰᠠᠨ ᠶᠤᠮ ᠭᠡᠨᠡ ᠃
— ᠳᠠᠷᠢᠰᠦ᠋ᠷᠦᠩ ᠭᠡᠳᠡᠭ ᠪᠠᠶ᠋ᠢᠬᠰᠠᠨ ᠶᠤᠮ ᠤᠤ ᠃
— ᠲᠡᠶ᠋ᠢᠮᠦ ᠃
— ᠬᠡᠲᠦ ᠬᠦᠷᠪᠡ ᠡ ᠂ ᠵᠠᠶ᠋ᠢᠯᠠᠭᠤᠯ ᠃
— ᠨᠠᠶᠠ ᠯᠠ ᠰᠢᠬᠠᠭᠰᠠᠨ ᠬᠥᠮᠦᠨ ᠳ᠋ᠡ ᠃
— ᠠᠷᠠᠢ ᠴᠤ᠌ ᠬᠦᠷᠦᠭᠡ ᠦᠭᠡᠢ ᠡ ᠂ ᠮᠠᠨ ᠪ ᠨᠠᠭᠠᠴᠤ ᠠᠬᠠ ᠲᠠᠢ ᠴᠢᠴᠠᠤ ᠶᠤᠮ ᠭᠡᠨᠡ ᠃ ᠤᠭ ᠨᠢ ᠡᠨᠡ ᠤᠷᠠᠨᠰᠤᠲᠤ ᠶ᠋ᠢᠨ ᠴᠠᠭᠠ᠊ᠣ᠋ᠪᠣᠭᠠᠨ ᠪ ᠬᠥᠮᠦᠨ ᠪᠠᠶ᠋ᠢᠬ᠋ᠠ ᠶᠤᠮ ᠃
— ᠦᠷᠡ ᠬᠡᠦᠬᠡᠳ ᠭᠡᠵᠦ ᠶᠠᠭᠤᠮᠠ ᠪᠠᠶ᠋ᠢᠲᠠᠭ ᠦᠭᠡᠢ ᠶᠤᠮ ᠦᠦ ?
— ᠶᠠᠭᠤ ᠪᠠᠶ᠋ᠢᠬᠤ ᠪᠤᠢ ᠳ᠋ᠡ ᠃ ᠨᠠᠰᠤ ᠪᠠᠷ ᠶ᠋ᠢᠠᠨ ᠭᠠᠭᠴᠠᠭᠠᠷ ᠶᠠᠪᠤᠭᠰᠠᠨ ᠠᠮᠢᠲᠠᠨ ᠴᠢᠨᠢ ᠁
— ᠬᠡᠩ ! ᠮᠠᠨ ᠪ ᠬᠢ ᠨᠢᠭᠡ ᠵᠢᠭᠠᠬᠠᠨ ᠠᠷᠭᠠᠯ ᠵᠢᠭᠡᠯᠡᠴᠢᠭᠡᠭᠡᠳ ᠥᠭᠭᠦᠭᠡ ᠦᠭᠡᠢ ᠪᠠᠶ᠋ᠢᠬᠰᠠᠨ ᠶᠤᠮ ᠰᠠᠨ ᠃ ᠲᠡᠭᠦᠨ ᠊ᠢ ᠴᠢᠨᠢ ᠣᠲᠣ ᠶᠠᠭᠠᠬᠢᠨᠠ ?
— ᠬᠠᠯᠲᠠᠷ ᠦ᠋ᠨ ᠳᠤ ᠯᠠ ᠥᠭᠴᠢᠭᠡᠬᠦ ᠦᠭᠡᠢ ᠦᠦ ᠃
— ᠬᠠᠯᠲᠠᠷ ᠦ᠋ᠨ ᠳᠤ ᠲᠣᠭᠣᠵᠤ ᠠᠪᠬᠤ ᠦᠭᠡᠢ ᠪᠠᠶ᠋ᠢᠯᠭᠦᠢ ᠃ ᠵᠦᠭᠡᠷ ᠂ ᠬᠠᠯᠲᠠᠷ ᠲᠤ ᠬᠡᠯᠡᠳᠡᠭ ᠨᠢ ᠶᠠᠭᠤ ᠶᠤᠮ ᠭᠡᠬᠦ ᠡᠴᠡ ᠃
— ᠶᠠᠭᠤ ᠂ ᠲᠣᠭᠣᠬᠤ ᠦᠭᠡᠢ ᠭᠡᠵᠦ ᠵᠢᠭᠠᠬᠠᠨ ᠳᠤ ᠪᠠᠨ ᠯᠠ ᠲᠡᠮᠡᠭᠡ ᠠᠷᠭᠠᠯ ᠰᠢᠦ ᠳ᠋ᠡ ᠃
— ᠭᠡᠯᠡ ᠴᠤ᠌ ᠭᠡᠰᠡᠨ ᠴᠢᠨᠦ ᠭᠠᠭᠴᠠ ᠲᠡᠮᠡᠭᠡ ᠠᠷᠭᠠᠯ ᠶ᠋ᠢᠠᠷ ᠬᠣᠲᠣᠶ᠋ᠢᠬᠤ ᠪᠠᠷ ᠦᠭᠡᠢ ᠪᠣᠯᠣᠭᠰᠠᠨ ᠭᠡᠨᠡ ᠡ ᠃
— ᠵᠢᠭᠠᠯ ᠠᠷᠭᠠᠯ ᠊ᠢ ᠲᠡᠲᠡᠨ ᠪ ᠬᠢ ᠠᠪᠤᠬ᠋ᠠ ᠤᠤ ?
— ᠲᠡᠲᠡ ᠴᠤ᠌ ᠠᠪᠤᠯᠭᠦᠢ ᠳ᠋ᠠ ᠃
— ᠠᠪᠬᠤ ᠪᠠᠷ ᠪᠠᠷᠠᠬᠤ ᠤᠤ ᠂ ᠲᠤᠩ ᠪᠡᠷᠬᠡ ᠬᠥᠭᠰᠢᠨ ᠪᠠᠶ᠋ᠢᠬᠰᠠᠨ ᠪᠠᠶ᠋ᠢᠨᠠ ᠰᠢᠦ ᠳ᠋ᠡ ᠃ ᠥᠩᠭᠡᠷᠡᠬᠦ ᠡᠴᠡ ᠠᠷᠪᠠᠭᠠᠳ ᠬᠣᠨᠣᠭ ᠦ᠋ᠨ ᠡᠮᠦᠨᠡ ᠶᠤᠮ ᠪᠠᠶ᠋ᠢᠬᠤ ᠳ᠋ᠡ ᠃ ᠰᠤᠮᠤ ᠶ᠋ᠢᠨ ᠳᠠᠷᠤᠬ᠋ᠠ ᠲᠠᠢ ᠠᠭᠤᠯᠵᠠᠭᠠᠳ 《 ᠨᠠᠮᠠ ᠶ᠋ᠢ ᠦᠬᠦᠬᠦ ᠪᠡᠷ ᠮᠠᠨ ᠪ ᠬᠢ ᠡᠴᠡ ᠬᠥᠮᠦᠨ ᠳᠤ ᠬᠡᠷᠡᠭᠲᠡᠢ ᠶᠠᠭᠤᠮᠠ ᠭᠠᠷᠪᠠᠯ ᠴᠦᠮ ᠊ᠢ ᠨᠢ ᠬᠠᠯᠲᠠᠷ ᠦ᠋ᠨ ᠳᠤ ᠥᠭᠭᠦᠭᠡᠷᠡᠢ ᠂ ᠬᠠᠯᠲᠠᠷ ᠦ᠋ᠨ ᠬᠢ ᠯᠠ ᠠᠪᠬᠤ ᠤᠴᠢᠷ ᠲᠠᠢ ᠶᠤᠮ 》 ᠭᠡᠰᠡᠨ ᠭᠡᠨᠡ ᠃
— ᠦᠭᠡᠢ ᠶᠡᠷᠦ !
— ᠲᠡᠭᠡᠭᠡᠳ ᠥᠨᠥ ᠭᠡᠷ ᠦ᠋ᠨ ᠬᠢᠨᠢ ᠬᠣᠶ᠋ᠢᠲᠤᠬᠢ ᠴᠣᠣᠵᠢ ᠲᠠᠢ ᠪᠠᠶ᠋ᠢᠰᠢᠩ ᠠ᠋ᠴᠠ ᠶᠠᠭᠤ ᠭᠠᠷᠴᠤ ᠪᠤᠢ ᠳ᠋ᠠ ?
— ᠠᠷᠭᠠᠯ !
— ᠬᠠ ! ᠬᠠ ! ᠬᠠ !
— ᠦᠭᠡᠢ ᠮᠥᠨ !
— 《 ᠮᠦᠩᠭᠦᠰᠡᠬᠦ 》 ᠴᠤ᠌ ᠶᠠᠭᠤᠮᠠ ᠦᠭᠡᠢ ᠃ ᠲᠤᠩ ᠪᠡᠷᠬᠡ ᠬᠥᠭᠰᠢᠨ ᠪᠠᠶ᠋ᠢᠵᠠᠢ ᠃
— ᠪᠡᠷᠬᠡ ᠪᠡᠷ ᠪᠠᠷᠠᠬᠤ ᠤᠤ ?
— ᠬᠠᠯᠲᠠᠷ ᠊ᠢ ᠴᠢᠮᠠ ᠰᠢᠭ᠋ ᠣᠯᠠᠨ ᠨᠢᠯᠬᠠ ᠬᠡᠦᠬᠡᠳ ᠲᠡᠢ ᠬᠥᠮᠦᠨ ᠰᠤᠷᠭᠠᠭᠤᠯᠢ ᠳᠤ ᠠᠷᠭᠠᠯ ᠦ᠋ᠨ ᠭᠡᠷᠡ ᠬᠢ ᠃ ᠬᠡᠲᠦᠨ ᠴᠠᠭᠠᠰᠤ ᠨᠢ ᠴᠢᠮᠠ ᠳᠤ ᠬᠡᠷᠡᠭᠲᠡᠢ ᠃ ᠲᠡᠭᠦᠬᠦ ᠶ᠋ᠢ ᠨᠢ ᠪᠢ ᠲᠡᠭᠦᠭᠡᠳ ᠥᠭᠭᠦᠮᠡᠭᠴᠡ 》 ᠭᠡᠵᠦ ᠶᠡᠬᠡ ᠭᠤᠶᠤᠲᠠᠭ ᠃ ᠨᠠᠭᠠᠲᠤᠬᠢ ᠨᠢ ᠬᠠᠯᠠᠭᠠᠲᠠᠭ ᠦᠭᠡᠢ ᠪᠠᠶ᠋ᠢᠬᠰᠠᠨ ᠶᠤᠮ ᠭᠡᠨᠡ ᠃
— ᠬᠡᠩ ! ᠲᠡᠭᠦᠯᠭᠡᠵᠦ ᠯᠡ ᠪᠠᠶ᠋ᠢᠬᠤ ᠦᠭᠡᠢ ᠃
— ᠨᠠᠰᠤᠲᠠᠢ ᠶᠠᠭᠤᠮᠠ ᠲᠤᠶ᠋ᠢᠯᠲᠠᠴᠢᠬᠠᠨᠠ ᠡ ᠭᠡᠵᠦ ᠰᠠᠨᠠᠬ᠋ᠠ ᠪᠢᠵᠡ ᠃
— ᠲᠡᠭᠡᠭᠰᠡᠨ ᠴᠢᠨᠢ ᠬᠠᠯᠲᠠᠷ ᠦ᠋ᠨ ᠨᠡᠷᠡ ᠳᠡᠭᠡᠷᠡ ᠭᠡᠷᠡ ᠬᠢᠵᠦ ᠂ ᠬᠡᠲᠦᠨ ᠲᠥᠭᠥᠷᠢᠭ ᠊ᠢ ᠨᠢ ᠠᠪᠤᠭᠠᠳ ᠰᠤᠷᠭᠠᠭᠤᠯᠢ ᠶ᠋ᠢᠨ ᠬᠣᠶᠠᠷ ᠵᠢᠭᠠᠯ ᠦ᠋ᠨ ᠨᠡᠷᠡ ᠳᠡᠭᠡᠷᠡ ᠬᠠᠲᠠᠭᠠᠯᠠᠭᠤᠯᠴᠢᠬᠠᠭᠰᠠᠨ ᠭᠡᠨᠡ ᠰᠢᠦ ᠳ᠋ᠠ ᠃
— ᠲᠡᠷᠡ ᠡ ᠬᠥ ᠃
— ᠡᠨᠡ ᠵᠢᠯ ᠳᠠᠬᠢᠭᠠᠳ ᠪᠠᠰᠠ ᠰᠤᠷᠭᠠᠭᠤᠯᠢ ᠲᠠᠢ ᠭᠡᠷᠡ ᠬᠢᠴᠢᠭᠡᠭᠰᠡᠨ ᠪᠠᠶ᠋ᠢᠨᠠ ᠭᠡᠨᠡ ᠃
— ᠬᠠᠯᠲᠠᠷ ᠦ᠋ᠨ ᠬᠢ ᠯᠠ ᠲᠡᠭᠦᠵᠦ ᠥᠭᠬᠦ ᠪᠣᠯᠵᠠᠢ ᠳ᠋ᠠ ᠃
— ᠲᠡᠭᠦᠭᠡᠳ ᠪᠠᠶ᠋ᠢᠬᠤ ᠶᠠᠭᠤ ᠪᠠᠶ᠋ᠢᠬᠤ ᠪᠤᠢ ᠃ ᠪᠡᠯᠡᠨ ᠪᠠᠶ᠋ᠢᠬ᠋ᠠ ᠶᠤᠮ ᠴᠢᠨᠢ ᠃
— ᠳᠤᠲᠠᠳᠠᠭ ᠶᠤᠮ ᠭᠡᠯᠡ ᠭᠡᠬᠦ ᠳᠤ ᠬᠠᠯᠲᠠᠷ ᠦ᠋ᠨ ᠬᠡᠲᠦᠨ ᠬᠡᠦᠬᠡᠳ ᠭᠠᠷᠭᠠᠬᠤ ᠦᠭᠡᠢ ᠡ ᠃ ᠲᠡᠲᠡ ᠴᠢᠨᠢ ᠴᠤᠬᠤᠮ ᠪᠡᠷᠬᠡ ᠠᠵᠢᠯᠲᠠᠢ ᠬᠡᠦᠬᠡᠳ ᠦ᠋ᠳ ᠪᠠᠶ᠋ᠢᠨᠠ ᠡ ᠃
— ᠲᠡᠷᠡ ᠮᠠᠭᠤ ᠬᠥᠭᠰᠢᠨ ᠪ ᠯᠡ ᠠᠴᠢ ᠳ᠋ᠠ ᠃
— ᠰᠦᠷᠡᠬᠡᠢ ᠬᠥᠮᠦᠨ ᠃ ᠲᠡᠷᠡ ᠵᠢᠯ ᠦ᠋ᠨ ᠥᠨᠥ ᠴᠠᠰᠤ ᠪᠢᠲᠡᠭᠦᠦ ᠳᠠᠷᠤᠴᠢᠬᠠᠳᠠᠭ ᠡᠪᠦᠯ ᠴᠤ᠌ ᠳᠠᠷᠢ ᠭᠤᠸᠠᠢ ᠶ᠋ᠢᠨ ᠵᠢᠭᠠᠯ ᠠᠷᠭᠠᠯ ᠴᠤ᠌ ᠨᠡᠯᠢᠶᠡᠳ ᠠᠮᠢᠲᠠᠨ ᠪ ᠠᠮᠢᠨ ᠳᠤ ᠣᠷᠣᠭᠰᠠᠨ ᠪᠠᠶ᠋ᠢᠨᠠ ᠃
— ᠲᠡᠭᠡᠬᠦ ᠳᠤ ᠴᠤ᠌ ᠬᠥᠭᠡᠷᠦᠬᠦᠢ ᠬᠠᠷᠠᠮ ᠦᠭᠡᠢ ᠥᠭᠭᠦᠭᠰᠡᠨ ᠃
— ᠮᠦᠨ ᠴᠤ᠌ ᠶᠡᠬᠡ ᠠᠷᠭᠠᠯ ᠬᠤᠷᠢᠶᠠᠭᠰᠠᠨ ᠪᠠᠶ᠋ᠢᠨᠠ ᠭᠡᠨᠡ ᠰᠢᠦ ᠂ ᠳᠡᠯᠭᠡᠷ ᠦ᠋ᠨ ᠰᠠᠭᠤᠷᠢᠨ ᠪ ᠡᠵᠡᠨ ᠨᠢ ᠬᠡᠷᠡᠭᠰᠡᠬᠦ ᠪᠡᠨ ᠪᠠᠶ᠋ᠢᠴᠢᠬᠠᠭᠰᠠᠨ ᠮᠠᠭᠤ ᠰᠠᠶ᠋ᠢᠨ ᠰᠢᠪᠠᠷ ᠫᠧᠩ ᠦ᠋ᠳ ᠊ᠢ ᠣᠩᠭᠣᠷᠬᠠᠢ ᠴᠣᠭᠣᠷᠬᠠᠢ ᠶ᠋ᠢ ᠨᠢ ᠰᠢᠷᠢ ᠠᠲᠠᠰᠬᠠ ᠪᠠᠷ ᠪᠥᠭᠯᠡᠵᠦ ᠪᠠᠶ᠋ᠢᠭᠠᠳ ᠴᠦᠮ ᠊ᠢ ᠨᠢ ᠠᠷᠭᠠᠯ ᠶ᠋ᠢᠠᠷ ᠳᠦᠭᠦᠷᠭᠡᠴᠢᠭᠡᠭᠰᠡᠨ ᠪᠠᠶ᠋ᠢᠬᠰᠠᠨ ᠭᠡᠨᠡ ᠃
— ᠲᠡᠭᠦᠨ ᠪ ᠴᠢᠨᠢ ᠬᠦᠴᠦᠨ ᠳᠤ ᠯᠠ ᠲᠡᠷᠡ ᠬᠠᠪᠢ ᠶ᠋ᠢᠨ ᠬᠢᠨ ᠭᠠᠯ ᠠᠯᠲᠠᠬ᠋ᠠ ᠦᠭᠡᠢ ᠳ᠋ᠡ ᠬᠡᠮᠡᠨ ᠱᠤᠤᠭᠢᠵᠠᠭᠠᠵᠤ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠶ᠋ᠢᠰᠢ ᠭᠠᠲᠠᠨᠠ ᠪᠠᠨ ᠶᠡᠬᠡᠬᠡᠨ ᠠᠷᠭᠠᠯ ᠬᠤᠷᠢᠶᠠᠭᠰᠠᠨ ᠠᠶ᠋ᠢᠯ ᠊ᠢ 《 ᠴᠠᠭᠠᠲᠤᠬᠢ ᠴᠢᠨᠢ ᠴᠤ᠌ ᠠᠷᠭᠠᠯ ᠲᠦᠯᠡᠰᠢᠨ ᠳᠤ ᠪᠠᠨ ᠳᠠᠷᠢ ᠴᠢᠪᠠᠭᠠᠨᠴᠠ ᠭᠡᠰᠡᠨ ᠦᠭᠡ 》 ᠭᠡᠬᠦ ᠶᠠᠷᠢᠶᠠ ᠡᠲᠦᠭᠡ ᠪᠠᠶ᠋ᠢᠬᠤ ᠠᠵᠢ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠳᠠᠪᠰᠢᠯᠲᠦ
ᠬᠢᠨᠠᠭᠴᠢ ᠄ ᠴᠣᠯᠮᠣᠨᠲᠦᠶᠠᠭᠠ ᠪᠠᠭ᠍ᠰᠢ