ᠰᠡᠳᠬᠢᠯ ᠊ᠢ ᠠᠮᠠᠷᠠᠭᠠᠭᠴᠢ ᠬᠡᠮᠡᠬᠦ ᠰᠤᠷᠭᠠᠯ – ᠷᠠᠪᠵᠠᠢ Сэтгэлийг амраагч хэмээх сургаал – Равжай
1334ᠰᠡᠳᠬᠢᠯ ᠊ᠢ ᠠᠮᠠᠷᠠᠭᠠᠭᠴᠢ ᠬᠡᠮᠡᠬᠦ ᠰᠤᠷᠭᠠᠯ
ᠰᠡᠳᠬᠢᠯ ᠊ᠢ ᠠᠮᠠᠷᠠᠭᠠᠭᠴᠢ ᠬᠡᠮᠡᠬᠦ ᠰᠤᠷᠭᠠᠯ ①
ᠷᠠᠪᠵᠠᠢ
ᠤᠮ ᠰᠠᠶ᠋ᠢᠨ ᠠᠮᠤᠭᠤᠯᠠᠩ ᠪᠣᠯᠲᠤᠭᠠᠢ ᠃
ᠰᠡᠤᠠᠬᠢᠯ ᠊ᠢ ᠠᠮᠠᠷᠠᠭᠠᠭᠴᠢ ᠰᠣᠨᠢᠨ ᠰᠠᠶ᠋ᠢᠬᠠᠨ ᠬᠠᠭᠤᠷᠮᠠᠭ ᠦᠭᠡᠢ
ᠢᠲᠡᠭᠡᠯᠲᠦ ᠭᠤᠷᠪᠠᠨ ᠡᠷᠲᠡᠨᠢ ᠶ᠋ᠢ ᠳᠤᠷᠠᠰᠰᠤᠭᠠᠢ ᠃ ᠲᠡᠭᠦᠨ ᠪ
ᠰᠡᠭᠦᠯ ᠳ᠋ᠤᠷ ᠢᠨᠠᠭᠯᠠᠭᠰᠠᠨ ᠨᠥᠬᠥᠷ ᠴᠢᠮᠠ ᠳᠤ ᠪᠠᠨ
ᠵᠠᠬᠢᠬᠤ ᠮᠢᠨᠦ ᠪᠣᠯᠪᠠᠰᠤ ᠃
ᠨᠠᠷᠠᠨ ᠪ ᠭᠡᠷᠡᠯ ᠬᠤᠷᠴᠠ ᠪᠣᠯᠬᠤ ᠳᠤ
ᠡᠭᠦᠯᠡ ᠦᠭᠡᠢ ᠪᠣᠯᠪᠠᠯ ᠨᠡᠩ ᠰᠠᠶ᠋ᠢᠨ ᠃
ᠨᠠᠰᠤᠨ ᠪ ᠪᠠᠬ᠋ᠠ ᠳᠤ ᠡᠷᠲᠡᠮ ᠰᠤᠷᠬᠤ ᠳᠤ
ᠵᠠᠯᠬᠠᠭᠤ ᠦᠭᠡᠢ ᠪᠣᠯᠪᠠᠯ ᠳᠠᠩᠴᠤ ᠰᠠᠶ᠋ᠢᠨ ᠃
ᠨᠣᠮ ᠦᠭᠡᠢ ᠬᠤᠸᠠᠷᠠᠭ ᠭᠡᠵᠢᠭᠡ ᠦᠭᠡᠢ ᠡᠴᠡ ᠪᠢᠰᠢ ᠶᠠᠭᠤᠪᠢ② ᠃
ᠨᠣᠮᠣᠢ ᠵᠠᠩᠲᠠᠢ ᠬᠥᠮᠦᠨ ᠬᠣᠵᠢᠲᠠᠬᠤ ᠠ᠋ᠴᠠ ᠪᠤᠰᠤ ᠶᠠᠭᠤᠪᠢ ᠃
ᠨᠣᠷᠤᠭᠰᠠᠨ ᠬᠠᠲᠠᠭ ᠪᠡᠯᠡᠭ᠋ ᠲᠤᠷ ᠶᠠᠪᠤᠲᠠᠭ ᠦᠭᠡᠢ ᠃
ᠨᠣᠶᠠᠨ ᠦᠭᠡᠢ ᠠᠯᠪᠠᠲᠤ ᠴᠤᠤᠭᠢᠶᠠᠨ ᠲᠠᠰᠤᠷᠠᠲᠠᠭ ᠦᠭᠡᠢ ᠃
ᠰᠠᠯ ᠣᠩᠭᠣᠴᠠ ᠪᠠᠶ᠋ᠢᠪᠠᠴᠤ
ᠰᠡᠯᠢᠬᠦ ᠤᠰᠤᠴᠢ ᠬᠡᠷᠡᠭᠲᠡᠢ ᠃
ᠰᠠᠨᠠᠬ᠋ᠠ ᠴᠢᠲᠠᠯ ᠪᠠᠶ᠋ᠢᠪᠠᠴᠤ
ᠰᠠᠶ᠋ᠢᠨ ᠨᠥᠬᠥᠷ ᠡᠴᠡ ᠵᠥᠪᠰᠢᠯᠲᠡᠢ ᠃
ᠡᠮᠴᠢ ᠪᠠᠶ᠋ᠢᠲᠤᠭᠠᠢ ᠳᠣᠮᠴᠢ ᠴᠢᠪᠡᠯ ③ ᠲᠤᠰᠠᠲᠠᠢ᠃
ᠨᠣᠶᠠᠨ ᠪᠠᠶ᠋ᠢᠲᠤᠭᠠᠢ ᠨᠣᠬᠠᠢ ᠴᠢᠪᠡᠯ ᠥᠮᠥᠭ ᠃
ᠬᠠᠲᠠᠨ ᠳᠡᠭᠡᠷᠡ ᠰᠡᠢᠯᠦᠭᠰᠡᠨ ᠪᠢᠴᠢᠭ᠌
ᠨᠢᠲᠦᠲᠡᠢ ᠬᠥᠮᠦᠨ ᠳᠤ ᠭᠡᠷᠡᠴᠢ ᠃
ᠬᠠᠯᠠᠮᠵᠢᠯᠠᠭᠰᠠᠨ ᠦᠭᠡ
ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠳᠤ ᠤᠲᠤᠮᠵᠢ ④᠃
ᠥᠭᠡᠬᠦ ᠲᠡᠢ ᠲᠠᠷᠭᠤᠨ ᠪᠢᠰᠢ ᠪᠣᠯᠪᠠᠴᠤ
ᠡᠴᠡᠩᠬᠡᠢ ᠮᠣᠷᠢ ᠴᠢᠪᠡᠯ ᠤᠨᠤᠯᠬ᠋ᠠ ᠃
ᠤᠷᠤᠭ ᠡᠯᠢᠭᠡᠨ ᠲᠥᠷᠥᠯ ᠪᠢᠰᠢ ᠪᠣᠯᠪᠠᠴᠤ
ᠢᠲᠡᠭᠡᠯᠲᠡᠢ ᠨᠥᠬᠥᠷ ᠲᠤᠰᠠᠲᠠᠢ ᠃
ᠪᠠᠯᠠᠷ ᠰᠢᠭᠤᠢ ᠮᠣᠲᠣᠨ ᠳᠤ
ᠰᠠᠷᠮᠠᠭᠴᠢᠨ ᠳᠠᠮᠵᠢᠬᠤ ᠳᠤ ᠠᠮᠤᠷ ⑤ ᠃
ᠪᠠᠬ᠋ᠠ ᠰᠠᠬ᠋ᠠ ᠡᠷᠲᠡᠮ
ᠨᠡᠮᠡᠷᠢ ᠠᠪᠬᠤ ᠳᠤ ᠬᠡᠷᠡᠭᠲᠡᠢ ᠃
ᠦᠵᠡᠭᠰᠡᠨ ᠡᠷᠲᠡᠮ ᠶ᠋ᠢᠡᠨ ᠮᠠᠷᠲᠠᠭᠰᠠᠨ ᠬᠥᠮᠦᠨ
ᠪᠤᠶᠠᠨ ᠶ᠋ᠢᠠᠨ ᠦᠭᠡᠶ᠋ᠢᠷᠡᠬᠦ ⑥ ᠶ᠋ᠢᠨ ᠲᠡᠮᠲᠡᠭ ᠃
ᠦᠯᠢᠭᠡᠷ ᠦᠭᠡᠢ ᠡᠰᠭᠡᠭᠰᠡᠨ ᠮᠠᠯᠠᠭᠠᠢ
ᠡᠳ᠋ ᠡᠪᠲᠡᠬᠦ ᠶ᠋ᠢᠨ ᠰᠢᠨᠵᠢ ᠃
ᠶᠡᠬᠡ ᠬᠥᠮᠦᠨ ᠳᠤ ᠳᠠᠷᠤᠭᠤᠯᠬ᠋ᠠ ᠪᠠᠶ᠋ᠢᠲᠤᠭᠠᠢ
ᠪᠤᠷᠬᠠᠨ ᠳᠤ ᠴᠢᠪᠡᠯ ᠠᠬᠠᠮᠠᠳ ᠪᠤᠢ ᠃
ᠡᠩ ᠦ᠋ᠨ ᠬᠥᠮᠦᠨ ᠳᠤ ᠰᠤᠷᠭᠠᠯ ᠪᠠᠶ᠋ᠢᠲᠤᠭᠠᠢ
ᠡᠵᠡᠨ ᠳᠤ ᠴᠢᠪᠡᠯ ᠶᠣᠰᠣ ᠪᠤᠢ ᠃
ᠨᠣᠬᠠᠢ ᠴᠢᠪᠡᠯ ᠰᠡᠭᠦᠯᠲᠡᠢ ᠨᠢ ᠰᠠᠶ᠋ᠢᠬᠠᠨ ᠃
ᠭᠤᠶ᠋ᠢᠷᠠᠨᠴᠢ ᠴᠢᠪᠡᠯ ᠶᠣᠰᠣᠲᠠᠢ ᠨᠢ ᠰᠠᠶ᠋ᠢᠬᠠᠨ ᠃
ᠠᠷᠰᠯᠠᠨ ᠪᠠᠭᠠᠲᠤᠷ ᠴᠢᠪᠡᠯ
ᠭᠠᠯ ᠠ᠋ᠴᠠ ᠴᠣᠴᠢᠲᠠᠭ ᠃
ᠬᠥᠮᠦᠨ ᠰᠠᠶ᠋ᠢᠨ ᠴᠢᠪᠡᠯ
ᠨᠢᠭᠡ ᠶᠠᠭᠤᠮᠠᠨ ᠳᠤ ᠭᠡᠨᠡᠳᠡᠳᠡᠭ ᠃
ᠵᠣᠷᠢᠬ ᠶ᠋ᠢᠠᠷ ᠪᠣᠯᠬᠤ ᠠ᠋ᠴᠠ
ᠰᠡᠷᠡᠮᠵᠢ ᠪᠡᠷ ᠪᠣᠯᠬᠤ ᠨᠢ ᠣᠯᠠᠨ ᠃
ᠵᠣᠪᠠᠭᠰᠠᠨ ᠶ᠋ᠢᠠᠷ ᠪᠣᠯᠬᠤ ᠠ᠋ᠴᠠ
ᠠᠷᠬ᠋ᠠ ᠪᠠᠷ ᠪᠣᠯᠬᠤ ᠨᠢ ᠠᠮᠤᠷ ᠃
ᠭᠦᠴᠦᠯᠡᠭᠰᠡᠨ ᠡᠴᠡ ᠡᠪ ᠊ᠢ ᠣᠯᠪᠠᠯ ᠬᠢᠮᠲᠠ ᠃
ᠬᠡᠷᠡᠯᠳᠦᠭᠰᠡᠨ ᠡᠴᠡ ᠤᠴᠢᠷ ᠶ᠋ᠢᠠᠨ ᠬᠡᠯᠡᠪᠡᠯ ᠰᠢᠯᠤᠭᠤᠨ ᠃
ᠴᠣᠯ ᠮᠣᠲᠣᠨ ᠬᠡᠩᠭᠡᠷᠭᠡ ᠬᠡᠲᠦᠢ ᠶᠡᠬᠡ ᠴᠢᠪᠡᠯ
ᠳᠡᠮᠡᠢ ᠶᠡᠬᠡ ᠰᠠᠶ᠋ᠢᠬᠠᠨ ᠳᠠᠭᠤᠨ ᠭᠠᠷᠤᠨᠠ ᠭᠡᠵᠦ ᠦᠦ ᠃
ᠴᠢᠬᠤᠯ ᠮᠤᠩᠬᠠᠭ ᠬᠥᠮᠦᠨ ᠪᠠᠶᠠᠨ ᠴᠢᠪᠡᠯ
ᠠᠷᠬ᠋ᠠ ᠲᠠᠢ ᠬᠥᠮᠦᠨ ᠪ ᠢᠲᠡᠰᠢ ᠪᠤᠢ ᠊ᠶᠠ ᠃
ᠬᠥᠮᠦᠨ ᠰᠠᠶ᠋ᠢᠨ ᠴᠢᠪᠡᠯ
ᠭᠠᠭᠴᠠᠭᠠᠷ ᠪᠦᠭᠦᠲᠡ ᠶ᠋ᠢ ᠶᠠᠭᠠᠬᠢᠨ ᠳᠡᠶ᠋ᠢᠯᠬᠦ ᠃
ᠲᠣᠩᠭᠣᠷᠠᠭ ᠦ᠋ᠨ ᠢᠷ ᠬᠤᠷᠴᠠ ᠴᠢᠪᠡᠯ
ᠴᠢᠯᠠᠭᠤ ᠶ᠋ᠢ ᠶᠠᠭᠠᠬᠢᠨ ᠳᠠᠭᠠᠭᠠᠬᠤ ᠪᠤᠢ ᠃
ᠢᠰᠡᠭᠡᠢ ᠳᠡᠪᠡᠯᠲᠡᠢ ᠬᠥᠮᠦᠨ
ᠠᠯᠲᠠᠨ ᠮᠠᠯᠠᠭᠠᠢ ᠡᠮᠦᠰᠪᠡᠯ ᠲᠡᠶ᠋ᠢᠮᠦ ᠠᠶᠠᠲᠠᠢ ᠭᠡᠵᠦ ᠦᠦ ᠃
ᠡᠩ ᠦ᠋ᠨ ᠳᠣᠣᠷᠠᠳᠤ ᠬᠥᠮᠦᠨ
ᠳᠡᠭᠡᠪᠦᠷ ᠵᠠᠩᠨᠠᠪᠠᠯ ᠬᠡᠷᠡᠭ ᠴᠤ᠌ ᠦᠭᠡᠢ ᠶᠠᠪᠤᠲᠠᠯ ᠳ᠋ᠠᠭ ᠃
ᠮᠣᠲᠣ ᠪᠠᠷ ᠰᠡᠶ᠋ᠢᠯᠦᠬ᠋ᠰᠡᠨ ᠪᠠᠷᠰ ᠠ᠋ᠴᠠ
ᠬᠡᠨ ᠠᠶᠤᠬᠤ ᠪᠤᠢ ᠃
ᠮᠤᠶ᠋ᠢᠬᠤᠷ ⑦ ᠶ᠋ᠢᠠᠷ ᠤᠯᠤᠰ ᠊ᠢ ᠰᠥᠷᠴᠦ
ᠬᠡᠨ ᠡᠴᠡ ᠳᠡᠭᠡᠷᠡ ᠭᠠᠷᠬᠤ ᠪᠤᠢ ᠃
ᠠᠯᠲᠠᠷ ᠲᠠᠢ ᠬᠤᠯᠠᠭᠠᠶ᠋ᠢᠴᠢ ᠶ᠋ᠢ ᠶᠠᠪᠤᠪᠠᠯ
ᠰᠥᠨᠢ ᠪᠠᠶ᠋ᠢᠲᠤᠭᠠᠢ ᠂ ᠡᠲᠦᠷ ᠴᠢᠪᠡᠯ ᠬᠠᠷᠠᠲᠠᠮᠤᠢ ᠃
ᠠᠲᠠᠭᠠᠴᠢ ᠬᠥᠮᠦᠨ ᠊ᠢ ᠮᠡᠲᠡᠪᠡᠯ
ᠮᠤᠤᠬᠠᠢ ⑧ ᠪᠠᠶ᠋ᠢᠲᠤᠭᠠᠢ ᠂ ᠰᠠᠶ᠋ᠢᠬᠠᠨ ᠵᠠᠩᠨᠠᠪᠠᠴᠤ ᠦᠯᠦ ᠦᠨᠡᠮᠰᠢᠮᠦᠢ ᠃
ᠰᠠᠶ᠋ᠢᠬᠠᠨ ᠴᠢᠷᠠᠢ ᠶ᠋ᠢ ᠲᠥᠭᠡᠨᠡᠪᠡᠯ
ᠨᠢᠭᠡᠨ ᠨᠠᠰᠤᠨ ᠳᠤ ᠪᠠᠯᠠᠷᠠᠬᠤ ᠦᠭᠡᠢ ᠃
ᠰᠠᠶ᠋ᠢᠨ ᠶᠠᠪᠤᠲᠠᠯ ᠊ᠢ ᠠᠯᠲᠠᠪᠠᠯ
ᠮᠠᠭᠤ ᠨᠡᠷᠡ ᠤᠯᠠᠷᠢᠬᠤ ᠦᠭᠡᠢ ⑨ ᠃
ᠠᠷᠪᠠᠨ ᠬᠣᠶᠠᠷ ᠴᠠᠭ ᠦ᠋ᠨ ᠤᠯᠠᠷᠢᠯ
ᠬᠠᠯᠠᠭᠤᠨ ᠲᠠᠢ ᠬᠦᠢᠲᠡᠨ ᠲᠡᠢ ᠃
ᠠᠵᠤ ᠲᠥᠷᠥᠬᠦ ᠬᠥᠮᠦᠨ ᠪ ᠶᠠᠪᠤᠲᠠᠯ
ᠡᠨᠲᠡ ᠲᠡᠨᠲᠡ ᠪᠡᠨ ᠵᠢᠮᠡᠲᠡᠢ ⑩᠃
ᠥᠩᠭᠡ ᠲᠡᠢ ᠪᠣᠯᠪᠠᠴᠤ ᠲᠣᠷᠬ᠋ᠠ ᠮᠠᠩᠨᠤᠭ
ᠡᠯᠡᠬᠦ ᠳᠤ ᠪᠡᠨ ᠬᠠᠷᠭᠠᠨᠠ ᠪᠤᠲᠠᠨ ᠪ ᠲᠣᠭᠯᠠᠭᠠᠮ ᠃
ᠥᠨᠢᠷ ᠣᠯᠠᠨ ᠪᠣᠯᠪᠠᠴᠤ
ᠡᠪ ᠦᠭᠡᠢ ᠪᠣᠯᠪᠠᠰᠤ
ᠥᠨᠥᠴᠢᠨ ᠬᠥᠮᠦᠨ ᠪ ᠡᠯᠡᠭ ᠃
ᠦᠵᠡᠯ ᠶᠠᠪᠤᠲᠠᠯ ᠰᠠᠨᠠᠬ᠋ᠠ ᠲᠠᠭᠠᠷᠠᠪᠠᠯ
ᠭᠠᠭᠴᠠ ᠬᠥᠮᠦᠨ ᠴᠢᠪᠡᠯ ᠨᠥᠬᠥᠷ ᠃
ᠦᠭᠡ ᠦᠭᠡ ᠪᠡᠨ ᠡᠰᠡ ᠳᠠᠭᠠᠪᠠᠯ
ᠣᠯᠠᠨ ᠬᠥᠮᠦᠨ ᠴᠢᠪᠡᠯ ᠳᠠᠶ᠋ᠢᠰᠤᠨ ᠃
ᠤᠨᠤᠭᠰᠠᠨ ᠮᠣᠷᠢ ᠭᠡᠵᠢᠭᠡ ⑪ ᠪᠡᠨ ᠬᠦᠷᠪᠡᠯ
ᠡᠰᠡ ᠦᠷᠭᠦᠪᠡᠰᠦ ᠢᠰᠬᠦᠯᠬᠦ ᠃
ᠤᠲᠠᠭᠠᠨ ᠬᠠᠨᠢᠯᠠᠭᠰᠠᠨ ᠨᠥᠬᠥᠷ
ᠠᠭᠤᠷ ᠶ᠋ᠢᠠᠨ ᠬᠦᠷᠪᠡᠯ
ᠡᠰᠡ ᠨᠣᠴᠣᠯᠲᠤᠪᠠᠴᠤ ᠬᠡᠷᠡᠯᠲᠦᠬᠦ ᠃
ᠤᠰᠤ ᠶᠡᠬᠡ ᠴᠢᠪᠡᠯ
ᠡᠪᠦᠯ ᠴᠠᠭ ᠲᠤ ᠮᠥᠰᠥ ᠪᠣᠯᠬᠤ ᠃
ᠤᠬᠠᠭᠠᠨ ᠶᠡᠬᠡ ᠴᠢᠪᠡᠯ
ᠥᠲᠡᠯᠬᠦ ᠴᠠᠭ ᠲᠤ ᠮᠣᠯᠬᠢ ⑫ ᠪᠣᠯᠬᠤ ᠃
ᠵᠠᠯᠠᠭᠤ ᠨᠠᠰᠤ ᠥᠩᠭᠡᠷᠡᠭᠰᠡᠨ ᠪ ᠬᠣᠶ᠋ᠢᠨᠠ ᠡᠷᠲᠡᠮ ᠰᠤᠷᠬᠤ ᠳᠤ ᠪᠡᠷᠬᠡ ᠃
ᠤᠰᠤᠨ ᠪ ᠦᠶᠡᠷ ᠥᠩᠭᠡᠷᠡᠭᠰᠡᠨ ᠪ ᠬᠣᠶ᠋ᠢᠨᠠ ᠪᠤᠴᠠᠵᠤ ᠶᠤᠭᠠᠨ ⑬ ᠢᠷᠡᠬᠦ ᠠᠵᠢ ᠃
ᠴᠢᠨᠡᠭᠡ ᠲᠡᠢ ᠬᠥᠮᠦᠨ ⑭ ᠣᠯᠵᠠᠨ ᠪ ᠲᠥᠯᠥᠭᠡ ᠬᠣᠪᠲᠣᠭ ᠵᠠᠩᠨᠠᠪᠠᠰᠤ ᠵᠣᠬᠢᠬᠤ ᠤᠤ ᠃
ᠴᠢᠬᠢᠲᠡᠢ ᠭᠥᠷᠥᠭᠡᠰᠦ ⑮ ᠲᠡᠮᠡᠭᠡ ᠮᠡᠲᠦ ᠬᠡᠪᠲᠡᠵᠦ ᠪᠣᠰᠴᠤ ᠪᠠᠶ᠋ᠢᠪᠠᠰᠤ ᠶᠠᠩᠵᠤᠲᠠᠢ ᠭᠡᠵᠦ ᠦᠦ ᠃
ᠲᠤᠭᠤᠯᠭᠠᠨ ᠵᠢᠲᠠ ᠰᠢᠨᠲᠠᠷᠠᠬᠤ ᠠᠨᠤ ᠲᠦᠷᠭᠡᠨ ᠃
ᠲᠤᠶ᠋ᠢᠯᠪᠤᠷᠢ ᠦᠭᠡᠢ ᠬᠥᠮᠦᠨ ᠤᠷᠪᠠᠵᠤ ᠪᠤᠴᠠᠬᠤ ᠠᠨᠤ ᠣᠯᠠᠨ ᠃
ᠮᠤᠷᠤᠢ ᠰᠤᠮᠤ ᠶ᠋ᠢ ᠵᠠᠯᠠᠪᠠᠯ ᠪᠠᠢ ⑯ ᠣᠨᠣᠬᠤ ᠠᠨᠤ ᠱᠠᠯᠠᠪ ᠃
ᠮᠤᠩᠬᠠᠭ ᠬᠥᠮᠦᠨ ᠊ᠢ ᠲᠣᠷᠲᠠᠪᠠᠯ ⑰ ᠮᠠᠯ ᠬᠠᠷᠢᠭᠤᠯᠬᠤ ᠳᠤ ᠬᠢᠮᠠᠭᠠᠲᠠᠢ ᠃
ᠪᠣᠯᠤᠭᠠᠲᠤᠢ ᠲᠦᠭᠦᠬᠡᠢ ᠮᠢᠬᠠ ᠬᠣᠲᠣᠭᠣᠲᠣᠨ ᠳᠤ ᠭᠡᠮ ᠲᠡᠢ ᠃
ᠪᠣᠯᠵᠣᠬ᠋ᠠ ᠦᠭᠡᠢ ᠣᠯᠠᠨ ᠦᠭᠡ ᠨᠥᠬᠥᠷ ᠲᠤ ᠬᠠᠯᠠ ᠲᠠᠢ ᠃
ᠰᠠᠶ᠋ᠢᠨ ᠮᠣᠷᠢ ᠂ ᠦᠬᠡᠷ ᠰᠢᠭ᠌ ᠮᠥᠭᠡᠷᠡᠪᠡᠯ ᠲᠣᠩ ᠵᠦᠳᠡᠭ ⑱ ᠃
ᠰᠠᠶ᠋ᠢᠨ ᠨᠣᠶᠠᠨ ᠶᠠᠭᠤᠮᠠᠨ ᠪ ᠲᠡᠷᠢᠭᠦᠨ ᠳᠤ ᠠᠭᠠᠰᠢᠯᠠᠪᠠᠯ ᠲᠣᠩ ᠢᠴᠢᠭᠦᠷᠢᠲᠡᠢ ᠃
ᠬᠥᠯᠥᠭ ᠮᠣᠷᠢ ᠴᠤ᠌ ᠶᠠᠭᠠᠬᠢᠨ ᠦᠬᠡᠷ ᠰᠢᠭ᠌ ᠮᠥᠭᠡᠷᠡᠬᠦ ᠠᠵᠢ ᠃
ᠬᠥᠮᠦᠨ ᠰᠠᠶ᠋ᠢᠲᠠᠢ ᠨᠣᠶᠠᠨ ᠴᠤ᠌ ᠤᠴᠢᠷ ᠦᠭᠡᠢ ᠶᠠᠭᠠᠬᠢᠨ ᠠᠭᠠᠰᠢᠯᠠᠬᠤ ᠠᠵᠢ ᠃
ᠭᠠᠩ ᠲᠡᠮᠦᠷ ᠮᠣᠲᠣ ᠮᠡᠲᠦ ᠬᠤᠪᠠᠬᠠᠶ᠋ᠢᠷᠠᠪᠠᠴᠤ ᠶᠠᠩᠵᠤᠲᠠᠢ ᠃
ᠭᠠᠪᠢᠶᠠᠲᠠᠢ ᠶᠠᠪᠤᠭᠰᠠᠨ ᠬᠥᠮᠦᠨ ᠥᠲᠡᠯᠪᠡᠴᠦ ᠬᠦᠨᠲᠦᠲᠡᠢ ᠃
ᠬᠠᠲᠠᠷᠢᠶᠠ ᠰᠠᠶ᠋ᠢᠲᠠᠢ ᠮᠣᠷᠢ ᠴᠣᠬᠣᠷ ᠴᠢᠪᠡᠯ ᠦᠨᠡᠲᠡᠢ ᠃
ᠬᠠᠷᠢᠨ ᠦᠨᠡᠨ ᠦᠭᠡ ᠲᠡᠢ ᠬᠥᠮᠦᠨ ᠪᠦᠰᠡᠭᠦᠢ ᠴᠢᠪᠡᠯ ᠬᠡᠯᠡᠯᠴᠡᠭᠦᠰᠢᠲᠡᠢ ᠃
ᠪᠠᠭᠰᠢᠷᠠᠵᠤ ᠪᠠᠶ᠋ᠢᠬᠴᠢ ᠮᠣᠲᠣ ᠨᠠᠪᠴᠢᠯᠠᠬᠤ ᠳᠤᠰᠤᠮᠠ ᠶᠠᠩᠵᠤᠲᠠᠢ ᠃
ᠪᠠᠶᠠᠨ ᠪᠣᠯᠬᠤ ᠬᠥᠮᠦᠨ ᠪᠠᠬ᠋ᠠ ᠰᠠᠬ᠋ᠠ ᠶᠠᠭᠤᠮᠠ ᠶ᠋ᠢ ᠬᠤᠷᠢᠶᠠᠭᠰᠠᠭᠠᠷ ᠪᠦᠲᠦᠳᠡᠭ ᠃
ᠣᠯᠠᠨ ᠲᠠᠢ ᠪᠠᠲᠤ ᠰᠠᠭᠤᠶᠠ ᠭᠡᠪᠡᠯ ᠪᠡᠶᠡ ᠪᠡᠨ ᠰᠡᠷᠡᠮᠵᠢᠯᠡ ᠃
ᠤᠬᠠᠭᠠᠨ ᠲᠠᠢ ᠰᠡᠴᠡᠨ ᠶᠠᠪᠤᠶᠠ ᠭᠡᠪᠡᠯ ᠤᠤᠠᠬᠠ ᠲᠠᠢ ᠨᠢᠭᠡ ᠦᠭᠡ ᠴᠢᠪᠡᠯ ᠣᠯᠵᠠ ᠪᠤᠢ ᠃
ᠪᠣᠯᠭᠣᠮᠵᠢᠯᠠᠯ ᠦᠭᠡᠢ ᠬᠡᠯᠡᠭᠰᠡᠨ ᠦᠭᠡ ᠪᠤᠯᠵᠠᠭᠠᠷᠠᠬᠤ ᠳᠤ ᠲᠥᠪᠡᠭᠲᠡᠢ ᠃
ᠪᠣᠲᠣᠯ ᠦᠭᠡᠢ ᠵᠥᠪᠰᠢᠭᠰᠡᠨ ᠵᠥᠪᠰᠢᠯ ᠡᠪᠲᠡᠷᠡᠬᠦ ᠳᠤ ᠪᠡᠨ ᠬᠡᠪᠡᠷᠡᠭ ᠃
ᠰᠡᠭᠦᠯ ᠦᠭᠡᠢ ᠲᠣᠭᠣᠰ ᠯᠤᠤ ᠶ᠋ᠢᠨ ᠳᠠᠭᠤᠨ ᠰᠣᠨᠣᠰᠪᠠᠴᠤ ᠰᠢᠬᠦᠷᠯᠡᠬᠦ ᠠᠷᠬ᠋ᠠ ᠦᠭᠡᠢ ᠃
ᠰᠦᠰᠦᠭ ᠦᠭᠡᠢ ᠱᠠᠪᠢ ᠳᠤ ᠦᠨᠡᠨ ᠦᠭᠡ ᠬᠡᠯᠡᠪᠡᠴᠦ ᠠᠪᠬᠤ ᠶ᠋ᠢᠨ ᠬᠤᠪᠢ ᠦᠭᠡᠢ᠃
ᠳᠡᠷᠡᠰᠦᠨ ᠪ ᠠᠮᠲᠠ ᠭᠠᠰᠢᠭᠤᠨ ᠪᠣᠯᠪᠠᠴᠤ ᠨᠠᠶ᠋ᠢᠷ ᠬᠤᠷᠢᠮ ᠳᠤ ᠴᠢᠮᠡᠭ ᠲᠡᠢ ᠃
ᠳᠠᠪᠤᠰᠤᠨ ᠪ ᠠᠮᠲᠠ ᠱᠣᠷᠪᠣᠭ ᠪᠣᠯᠪᠠᠴᠤ ᠢᠲᠡᠭᠡᠨ ᠪ ᠠᠮᠲᠠᠨ ᠳᠤ ᠨᠠᠶ᠋ᠢᠷ ᠲᠠᠢ ᠃
ᠦᠨᠡᠨ ᠦᠭᠡ ᠬᠠᠲᠠᠭᠤ ᠪᠣᠯᠪᠠᠴᠤ ᠬᠡᠲᠦ ᠶ᠋ᠢᠨ ᠶᠠᠪᠤᠲᠠᠯ ᠳᠤ ᠲᠤᠰᠠ ᠲᠠᠢ ᠃
ᠪᠠᠭᠠᠰᠤ ᠰᠢᠭᠡᠰᠦ ᠡᠰᠡ ᠭᠠᠷᠪᠠᠰᠤ ᠪᠡᠶᠡ ᠳᠤ ᠡᠪᠡᠤᠠᠴᠢᠨ ᠪᠣᠯᠬᠤ ᠃
ᠪᠠᠬ᠋ᠠ ᠰᠠᠬ᠋ᠠ ᠭᠣᠮᠣᠲᠠᠯ ᠊ᠢ ᠡᠰᠡ ᠢᠯᠡᠴᠢᠯᠡᠪᠡᠰᠦ ᠰᠡᠤᠠᠬᠢᠯ ᠳᠤ ᠵᠣᠪᠠᠯᠠᠩ ᠪᠣᠯᠬᠤ ᠃
ᠮᠣᠷᠢ ᠤᠨᠤᠬᠤ ᠬᠥᠮᠦᠨ ᠳᠤ ᠵᠢᠯᠣᠭᠣ ᠬᠡᠷᠡᠭᠲᠡᠢ ᠃
ᠪᠢᠴᠢᠭ᠌ ᠡᠷᠲᠡᠮ ᠰᠤᠷᠬᠤ ᠬᠥᠮᠦᠨ ᠳᠤ ᠰᠠᠮᠪᠠᠬ᠋ᠠ ᠬᠡᠷᠡᠭᠲᠡᠢ ᠃
ᠤᠷᠲᠤ ᠮᠣᠲᠣ ᠣᠭᠲᠣᠯᠬᠤ ᠬᠥᠮᠦᠨ ᠳᠤ ᠬᠢᠷᠥᠭᠡ ᠬᠡᠷᠡᠭᠲᠡᠢ ᠃
ᠤᠯᠤᠰ ᠣᠯᠠᠨ ᠲᠠᠢ ᠬᠠᠨᠢᠯᠠᠬᠤ ᠬᠥᠮᠦᠨ ᠳᠤ ᠰᠡᠷᠡᠮᠵᠢ ᠨᠥᠬᠥᠷ ᠪᠣᠯᠬᠤ ᠃
ᠡᠷᠲᠡᠨ ᠪ ᠮᠣᠩᠭᠣᠯᠴᠤᠳ ᠦ᠋ᠨ ᠬᠡᠯᠡᠭᠰᠡᠨ ᠦᠯᠢᠭᠡᠷ ᠪᠣᠯᠪᠠᠰᠤ
ᠰᠠᠷᠠᠭᠤᠯ ᠲᠠᠯᠠ ᠪᠠᠶ᠋ᠢᠪᠠᠴᠤ ᠰᠢᠪᠠᠷ ᠊ᠢ ᠠᠨᠤ ᠮᠡᠲᠡᠭᠡᠷᠡᠢ ᠃
ᠰᠠᠶ᠋ᠢᠬᠠᠨ ᠢᠨᠠᠭ ᠪᠠᠶ᠋ᠢᠪᠠᠴᠤ ᠰᠠᠨᠠᠬ᠋ᠠ ᠶ᠋ᠢ ᠠᠨᠤ ᠲᠠᠨᠢᠭᠠᠷᠠᠢ ᠃
ᠡᠯᠢᠭᠡᠨ ᠠᠭᠤᠯᠠ ᠪᠠᠶ᠋ᠢᠪᠠᠴᠤ ᠭᠣᠣ ᠵᠢᠯᠠᠬ᠋ᠠ ᠶ᠋ᠢ ᠮᠡᠲᠡᠯ ᠦᠭᠡᠢ ᠪᠢᠲᠡᠭᠡᠢ ᠳᠠᠪᠬᠢ ᠃
ᠢᠨᠠᠭ ᠠᠮᠠᠷᠠᠭ ᠪᠣᠯᠪᠠᠴᠤ ᠢᠲᠡᠭᠡᠯ ᠊ᠢ ᠣᠯᠣᠯ ᠦᠭᠡᠢ ᠦᠭᠡ ᠪᠤᠤ ᠬᠡᠯᠡ ᠃
ᠰᠢᠪᠠᠭᠤ ᠶ᠋ᠢ ᠲᠣᠣᠷ ᠠ᠋ᠴᠠ ᠠᠯᠲᠠᠪᠠᠯ ᠪᠠᠷᠢᠬᠤ ᠳᠤ ᠪᠡᠷᠬᠡᠲᠡᠢ ᠃
ᠰᠢᠭᠤᠳ ᠦᠭᠡ ᠠᠯᠲᠠᠪᠠᠯ ᠪᠠᠯᠠᠯᠬᠤ ᠳᠤ ᠪᠡᠷᠬᠡᠲᠡᠢ ᠃
ᠨᠡᠭᠦᠷᠡᠰᠦ ᠶ᠋ᠢ ᠵᠦᠯᠭᠦᠵᠦ ᠬᠡᠴᠢᠨᠡᠭᠡᠨ ᠥᠩᠭᠡ ᠭᠠᠷᠬᠤ ᠪᠤᠢ ᠃
ᠨᠢᠭᠦᠯᠲᠦ ᠬᠥᠮᠦᠨ ᠊ᠢ ᠥᠮᠥᠭᠡᠷᠡᠵᠦ ᠶᠠᠭᠤᠨ ᠵᠥᠪ ᠪᠣᠯᠬᠤ ᠪᠤᠢ ᠃
ᠠᠪᠠ ᠳᠤ ᠲᠡᠵᠢᠭᠡᠭᠰᠡᠨ ᠨᠣᠬᠠᠢ ᠶ᠋ᠢ ᠲᠤᠬᠢᠷᠬᠤ ᠳᠤ ᠬᠤᠴᠠᠨ ᠳᠠᠪᠬᠢᠬᠤ ᠃
ᠠᠰᠢᠲᠠ ᠰᠡᠤᠠᠬᠢᠯ ᠲᠠᠭᠠᠷᠠᠵᠤ ᠬᠠᠨᠢᠯᠠᠭᠰᠠᠨ ᠨᠥᠬᠥᠷ ᠦᠭᠡ ᠠᠰᠠᠭᠤᠬᠤ ᠳᠤ ᠤᠷᠮᠠ ᠲᠠᠢ ᠪᠢᠰᠢ ᠦᠦ ᠃
ᠡᠭᠦᠷᠢᠲᠡ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠨᠢᠲᠦ ᠶ᠋ᠢ ᠰᠣᠬᠣᠯᠪᠠᠯ ᠰᠡᠯᠪᠢᠬᠦ ᠳᠤ ᠪᠡᠷᠬᠡᠲᠡᠢ ᠃
ᠦᠨᠡᠨ ᠢᠨᠠᠭ ᠰᠠᠨᠠᠵᠤ ᠶᠠᠪᠤᠭᠰᠠᠨ ᠨᠥᠬᠥᠷ ᠊ᠢ ᠭᠦᠤᠠᠬᠡᠵᠦ ᠬᠡᠯᠡᠪᠡᠰᠦ ᠪᠤᠴᠠᠬᠤ ᠳᠤ ᠪᠡᠷᠬᠡᠲᠡᠢ ᠃
ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠬᠥᠮᠦᠨ ᠊ᠢ ᠪᠥᠭᠡᠯᠵᠢᠬᠦ ᠳᠤ
ᠦᠷᠮᠦᠭ ⑲ ᠳᠡᠪᠡᠯ ᠲᠡᠢ ᠬᠥᠮᠦᠨ ᠴᠢᠪᠡᠯ ᠵᠢᠭᠰᠢᠬᠦ ᠃
ᠦᠨᠡᠨ ᠰᠠᠨᠠᠭᠰᠠᠨ ᠨᠥᠬᠥᠷ ᠪᠡᠶᠡ ᠪᠡᠨ ᠬᠠᠷᠠᠲᠠᠬᠤ ᠶ᠋ᠢ ᠮᠡᠲᠡᠪᠡᠯ ᠨᠢᠯᠬᠠᠰ ᠴᠢᠪᠡᠯ ᠭᠣᠮᠣᠲᠠᠮᠤᠢ ᠃
ᠲᠣᠯᠢ ᠲᠤᠩᠭᠠᠯᠠᠭ ᠪᠣᠯᠪᠠᠴᠤ ᠬᠬᠢᠷᠲᠦᠪᠡᠰᠦ ᠴᠢᠷᠠᠢ ᠦᠯᠦ ᠦᠵᠡᠭᠳᠡᠮᠦᠢ ᠃
ᠲᠣᠩ ᠢᠨᠠᠭ ᠬᠥᠮᠦᠨ ᠳᠣᠲᠣᠷᠠ ᠪᠠᠨ ᠬᠠᠷᠠ ᠰᠠᠨᠠᠬ᠋ᠠ ᠲᠠᠢ ᠪᠣᠯ ᠦᠯᠦ ᠲᠠᠭᠠᠷᠠᠯᠴᠠᠮᠤᠢ ᠃
ᠭᠠᠯ ᠦ᠋ᠨ ᠳᠣᠲᠣᠷᠠ ᠰᠡᠷᠢᠭᠦᠨ ᠦᠭᠡᠢ ᠃ ᠬᠠᠷᠰᠢ ᠥᠰᠲᠡᠨ ᠪ ᠳᠣᠲᠣᠷᠠ ᠠᠮᠠᠷᠠᠭ ᠦᠭᠡᠢ ᠃
ᠭᠠᠯ ᠊ᠢ ᠤᠨᠲᠠᠷᠠᠭᠠᠬᠤ ᠳᠤ ᠤᠰᠤ ᠬᠡᠷᠡᠭᠲᠡᠢ ᠃
ᠥᠰᠢᠶᠡ ᠶ᠋ᠢ ᠠᠷᠢᠯᠭᠠᠬᠤ ᠳᠤ ᠳᠤᠰᠠ ᠬᠡᠷᠡᠭᠲᠡᠢ ᠭᠡᠨᠡ ᠃
ᠬᠣᠶᠠᠷ ᠬᠥᠮᠦᠨ ᠤᠰᠤ ᠶ᠋ᠢ ᠰᠦᠨ ᠶ᠋ᠢᠡᠷ ᠰᠦᠯᠡᠭᠰᠡᠨ ᠮᠡᠲᠦ ᠨᠡᠶ᠋ᠢᠯᠡᠪᠡᠰᠦ
ᠨᠥᠬᠥᠷ ᠬᠥᠮᠦᠨ ᠳᠤ ᠬᠠᠷᠠᠲᠠᠯᠴᠠᠪᠠᠰᠤ ᠴᠢᠷᠠᠶ᠋ᠢᠯᠴᠠᠪᠠᠴᠤ ᠨᠢᠭᠡᠨ ᠠᠲᠠᠯᠢ ᠪᠣᠯᠤᠯᠴᠠᠮᠤᠢ ᠃
ᠤᠰᠤ ᠬᠠᠷᠠ ᠴᠢᠪᠡᠯ ᠰᠦᠨ ᠪ ᠥᠩᠭᠡ ᠶ᠋ᠢ ᠦᠯᠦ ᠬᠠᠷᠠᠯᠠᠭᠤᠯᠤᠮᠤᠢ ᠃
ᠰᠦᠨ ᠴᠠᠭᠠᠨ ᠭᠡᠵᠦ ᠤᠰᠤᠨ ᠠ᠋ᠴᠠ ᠦᠯᠦ ᠢᠯᠭᠠᠷᠠᠮᠤᠢ ᠃
ᠤᠰᠤ ᠴᠤ᠌ ᠰᠦᠨ ᠊ᠢ ᠠᠷᠪᠢᠤᠠᠬᠠᠮᠤᠢ ᠃
ᠰᠦᠨ ᠴᠤ᠌ ᠤᠰᠤ ᠶ᠋ᠢ ᠴᠠᠭᠠᠨ ᠪᠣᠯᠭᠠᠮᠤᠢ ᠃
ᠮᠠᠭᠠᠳ ᠰᠠᠨᠠᠬ᠋ᠠ ᠨᠡᠶ᠋ᠢᠯᠡᠪᠡᠯ ᠬᠠᠷᠠᠲᠠᠢ ᠴᠠᠶ᠋ᠢᠷᠠᠭᠤ ⑳ ᠬᠣᠶᠠᠷ ᠬᠥᠮᠦᠨ ᠴᠢᠪᠡᠯ
ᠪᠡᠶᠡ ᠪᠡᠶᠡ ᠶ᠋ᠢᠨ ᠰᠡᠤᠠᠬᠢᠯ ᠊ᠢ ᠬᠠᠷᠠᠮᠤᠢ ᠃
ᠰᠡᠤᠠᠬᠢᠯ ᠶ᠋ᠢᠡᠨ ᠬᠠᠷᠠᠯᠴᠠᠵᠤ ᠦᠭᠡ ᠦᠭᠡ ᠪᠡᠨ ᠰᠣᠨᠣᠰᠪᠠᠰᠤ
ᠪᠡᠶᠡ ᠪᠡᠶᠡᠨ ᠳᠤ ᠪᠡᠨ ᠭᠠᠮᠲᠠᠢ ᠪᠣᠯᠤᠮᠤᠢ ᠃
ᠡᠪ ᠲᠠᠩᠭᠠᠷᠢᠬ ᠲᠠᠢ ᠬᠣᠶᠠᠷ ᠬᠥᠮᠦᠨ
ᠬᠥᠭᠰᠢᠨ ᠵᠠᠯᠠᠭᠤ ᠬᠣᠶᠠᠷ ᠪᠣᠯᠪᠠᠴᠤ ᠬᠠᠨᠢᠯᠠᠵᠤ ᠪᠣᠯᠤᠮᠤᠢ ᠃
ᠬᠥᠭᠰᠢᠨ ᠢᠨᠤ ᠵᠠᠯᠠᠭᠤ ᠳᠤ ᠪᠠᠨ ᠰᠠᠨᠠᠬ᠋ᠠ ᠪᠠᠨ ᠦᠯᠦ ᠬᠠᠷᠠᠮᠨᠠᠮᠤᠢ ᠃
ᠵᠠᠯᠠᠭᠤ ᠠᠨᠤ ᠬᠥᠭᠰᠢᠨ ᠳᠤ ᠪᠡᠨ ᠠᠯᠢ ᠪᠦᠷᠢ ᠶ᠋ᠢ ᠦᠯᠦ ᠨᠢᠭᠤᠮᠤᠢ ᠃
ᠮᠡᠷᠭᠡᠨ ᠮᠤᠩᠬᠠᠭ ᠬᠣᠶᠠᠷ ᠬᠥᠮᠦᠨ ᠴᠢᠪᠡᠯ ᠬᠠᠨᠢᠯᠠᠵᠤ ᠪᠣᠯᠤᠮᠤᠢ ᠃
ᠮᠡᠷᠭᠡᠨ ᠢᠨᠤ ᠮᠤᠩᠬᠠᠭ ᠦ᠋ᠨ ᠤᠷᠮᠠ ᠶ᠋ᠢ ᠲᠡᠵᠢᠭᠡᠨ ᠶᠠᠪᠤᠵᠤ ᠨᠥᠬᠥᠷ ᠲᠡᠢ ᠪᠣᠯᠤᠮᠤᠢ ᠃
ᠮᠤᠩᠬᠠᠭ ᠠᠨᠤ ᠮᠡᠷᠭᠡᠨ ᠪ ᠪᠡᠨ ᠲᠠᠭᠠᠯᠠᠯ ᠊ᠢ ᠣᠯᠵᠤ ᠶᠠᠪᠤᠭᠰᠠᠭᠠᠷ ᠤᠬᠠᠭᠠᠨ ᠲᠠᠢ ᠪᠣᠯᠤᠮᠤᠢ ᠃
ᠰᠦᠨ ᠭᠠᠰᠢᠯᠪᠠᠯ ᠤᠰᠤ ᠶ᠋ᠢ ᠰᠦᠯᠡᠵᠦ ᠦᠯᠦ ᠪᠣᠯᠤᠮᠤᠢ ᠃
ᠰᠠᠨᠠᠬ᠋ᠠ ᠵᠥᠷᠢᠪᠡᠯ ᠮᠡᠷᠭᠡᠨ ᠴᠢᠪᠡᠯ ᠮᠤᠩᠬᠠᠭ ᠲᠠᠢ ᠬᠠᠨᠢᠯᠠᠬᠤ ᠪᠠᠶ᠋ᠢᠲᠤᠭᠠᠢ ᠬᠠᠷᠢᠨ ᠡᠪᠲᠡᠷᠡᠯᠴᠡᠮᠦᠢ ᠃
ᠤᠰᠤ ᠬᠠᠷᠠ ᠴᠢᠪᠡᠯ ᠰᠦᠨ ᠲᠡᠢ ᠨᠡᠶ᠋ᠢᠯᠡᠵᠦ ᠪᠣᠯᠤᠮᠤᠢ ᠃
ᠬᠥᠮᠦᠨ ᠮᠤᠩᠬᠠᠭ ᠴᠢᠪᠡᠯ ᠮᠡᠷᠭᠡᠨ ᠲᠡᠢ ᠬᠠᠨᠢᠯᠠᠵᠤ ᠪᠣᠯᠤᠮᠤᠢ ᠃
ᠰᠦᠨ ᠴᠠᠭᠠᠨ ᠴᠢᠪᠡᠯ ᠭᠠᠰᠢᠯᠪᠠᠯ ᠢᠵᠠᠮᠠᠭ ㉑ ᠃
ᠮᠡᠷᠭᠡᠨ ᠰᠠᠶ᠋ᠢᠨ ᠴᠢᠪᠡᠯ ᠭᠠᠭᠴᠠᠭᠠᠷᠲᠠᠪᠠᠯ ᠥᠨᠥᠴᠢᠨ ᠃
ᠮᠡᠷᠭᠡᠨ ᠬᠥᠮᠦᠨ ᠳᠤ ᠴᠤ᠌ ᠨᠥᠬᠥᠷ ᠬᠡᠷᠡᠭᠲᠡᠢ ᠃
ᠮᠤᠩᠬᠠᠭ ᠬᠥᠮᠦᠨ ᠳᠤ ᠴᠤ᠌ ᠳᠦᠰᠢᠭ ᠬᠡᠷᠡᠭᠲᠡᠢ ᠃
ᠮᠤᠩᠬᠠᠭ ᠶ᠋ᠢᠠᠨ ᠲᠡᠤᠠᠬᠦᠬᠦ ᠦᠭᠡᠢ ᠮᠡᠷᠭᠡᠳ ᠠᠯᠲᠠᠷ ᠦᠭᠡᠢ ᠪᠣᠯᠤᠮᠤᠢ ᠃
ᠳᠦᠰᠢᠭ ᠶ᠋ᠢᠡᠨ ᠬᠠᠷᠠᠲᠠᠬᠤ ᠮᠤᠩᠬᠠᠭ ᠥᠭᠡᠲᠡᠯᠡᠬᠦ ᠴᠠᠭ ᠦᠭᠡᠢ ᠪᠣᠯᠤᠮᠤᠢ ᠃
ᠨᠥᠬᠥᠷ ᠦᠭᠡᠢ ᠮᠡᠷᠭᠡᠳ ᠊ᠢ ᠰᠠᠶ᠋ᠢᠨ ᠭᠡᠬᠦ ᠦᠦ ᠃
ᠠᠴᠢᠲᠠᠨ ᠶ᠋ᠢᠠᠨ ᠬᠠᠷᠠᠲᠠᠬᠤ ᠮᠤᠩᠬᠠᠭ ᠥᠭᠡᠲᠡᠯᠡᠨᠡ ᠭᠡᠵᠦ ᠦᠦ ᠃
ᠴᠢᠢᠲᠡᠮ ㉒ ᠤᠲᠠᠬᠤ ᠳᠤ ᠪᠠᠨ ᠭᠠᠰᠢᠯᠲᠠᠭ ᠃
ᠬᠥᠮᠦᠨ ᠤᠲᠠᠭᠠᠨ ᠳᠤ ᠪᠠᠨ ᠤᠶ᠋ᠢᠤᠠᠬᠤ ᠃
ᠤᠲᠠᠬᠤ ᠦᠭᠡᠢ ᠡᠪ ᠶ᠋ᠢᠡᠷ ᠶᠠᠭᠤᠨ ᠬᠢᠬᠦ ᠪᠤᠢ ᠃
ᠪᠠᠲᠤ ᠦᠭᠡᠢ ᠵᠠᠩ ᠶ᠋ᠢᠠᠷ ᠶᠠᠭᠤᠨ ᠬᠢᠬᠦ ᠪᠤᠢ ᠃
ᠣᠯᠠᠨ ᠠᠪ ᠵᠠᠩ ㉓ ᠲᠠᠢ ᠬᠥᠮᠦᠨ ᠊ᠢ ᠰᠠᠶ᠋ᠢᠬᠠᠨ ᠭᠡᠳᠡᠭ ᠦᠦ ᠃
ᠤᠷᠪᠠᠯᠲᠠ ᠦᠭᠡᠢ ᠪᠠᠲᠤ ᠬᠥᠮᠦᠨ ᠊ᠢ ᠮᠠᠭᠤᠬᠠᠢ ᠭᠡᠳᠡᠭ ᠦᠦ ᠃
ᠬᠣᠶᠠᠷ ᠮᠤᠩᠬᠠᠭ ᠰᠠᠯᠪᠠᠰᠤ ᠮᠤᠩᠬᠠᠭ ᠭᠡᠬᠦ ᠲᠤᠯᠠ ᠬᠥᠮᠦᠨ ᠵᠢᠭᠰᠢᠬᠦ ᠢᠨᠤ ᠪᠠᠬ᠋ᠠ ᠃
ᠬᠣᠶᠠᠷ ᠮᠡᠷᠭᠡᠳ ᠰᠠᠯᠪᠠᠰᠤ ᠮᠡᠷᠭᠡᠨ ᠭᠡᠬᠦ ᠲᠤᠯᠠ ᠮᠠᠭᠤᠲᠠᠵᠤ ᠠᠯᠲᠠᠷ ᠦᠭᠡᠢ ᠪᠣᠯᠤᠮᠤᠢ ᠃
ᠮᠤᠩᠬᠠᠭ ᠲᠠᠢ ᠡᠪ ᠊ᠢ ᠣᠯᠵᠤ ᠬᠠᠨᠢᠯᠠᠵᠤ ᠴᠢᠲᠠᠬᠤ ᠮᠡᠷᠭᠡᠳ ᠠᠰᠢᠭᠦᠢ ᠃
ᠮᠡᠷᠭᠡᠳ ᠊ᠢ ᠳᠦᠰᠢᠭᠰᠡᠨ ᠮᠤᠩᠬᠠᠭ ᠠᠰᠢᠭᠦᠢ ᠃
ᠮᠡᠷᠭᠡᠳ ᠡᠴᠡ ᠳᠠᠶ᠋ᠢᠵᠢᠭᠠᠳ ㉔ᠲᠦᠮᠡᠨ ᠮᠤᠩᠬᠠᠭ ᠲᠠᠢ ᠬᠠᠨᠢᠯᠠᠬᠤ ᠬᠥᠮᠦᠨ ᠡᠴᠡ
ᠣᠷᠣ ᠭᠠᠭᠴᠠᠭᠠᠷ ᠶᠠᠪᠤᠬᠤ ᠮᠡᠷᠭᠡᠳ ᠠᠰᠢᠭᠦᠢ ᠃
ᠬᠣᠶᠠᠷ ᠲᠦᠰᠢᠮᠡᠳ ᠡᠪᠲᠡᠢ ᠪᠣᠯᠪᠠᠯ ᠬᠠᠭᠠᠨ ᠊ᠢ ᠴᠤ᠌ ᠴᠢᠲᠠᠬᠤ ᠃
ᠬᠣᠶᠠᠷ ᠬᠠᠭᠠᠨ ᠡᠪᠲᠡᠢ ᠪᠣᠯᠪᠠᠯ ᠳᠠᠶᠠᠩ ᠤᠯᠤᠰ ᠠᠮᠤᠭᠤᠯᠠᠩ ᠃
ᠡᠪ ᠦᠭᠡᠢ ᠬᠣᠶᠠᠷ ᠬᠠᠭᠠᠨ ᠊ᠢ ᠳᠠᠶ᠋ᠢᠳᠤᠵᠤ ᠪᠠᠶ᠋ᠢᠬᠤ ᠳᠤ
ᠡᠪᠲᠡᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠨᠢᠭᠡᠨ ᠡᠪᠦᠷ ᠲᠤ ᠪᠡᠨ ᠠᠮᠤᠷᠬᠠᠨ ᠬᠡᠪᠲᠡᠵᠡᠭᠡᠮᠦᠢ ᠃
ᠡᠪᠲᠡᠢ ᠬᠣᠶᠠᠷ ᠬᠠᠭᠠᠨ ᠪ ᠭᠦᠷᠦᠨ ᠠᠮᠤᠭᠤᠯᠠᠩ ᠪᠠᠶ᠋ᠢᠬᠤ ᠳᠤ
ᠡᠪ ᠦᠭᠡᠢ ᠵᠠᠯᠠᠭᠤ ᠬᠥᠪᠡᠭᠦᠨ ᠬᠡᠦᠬᠡᠨ ᠬᠣᠶᠠᠷ ᠨᠢᠭᠡᠨ ᠨᠢᠭᠡᠨ ᠶ᠋ᠢᠡᠨ ᠠᠯᠠᠯᠴᠠᠬᠤ ᠭᠡᠵᠦ ᠪᠠᠶ᠋ᠢᠮᠤᠢ ᠃
ᠡᠪᠲᠡᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠡᠪ ᠦ᠋ᠨ ᠬᠦᠴᠦᠨ ᠳᠤ ᠵᠢᠷᠭᠠᠭᠰᠠᠨ ᠪᠤᠢ ᠵᠠ ᠃
ᠡᠪ ᠦᠭᠡᠢ ᠬᠣᠶᠠᠷ ᠬᠠᠭᠠᠨ ᠬᠦᠰᠡᠯ ᠡᠷᠲᠡᠮ ᠶᠠᠭᠤ ᠪᠠᠷ ᠳᠤᠲᠠᠭᠠᠳ ᠵᠣᠪᠠᠭᠰᠠᠨ ᠤᠴᠢᠷ ᠊ᠢ ᠪᠣᠲᠣ ᠃
ᠵᠢᠭᠦᠷ ᠬᠡᠷᠡᠭ ᠦᠭᠡᠢ ᠰᠢᠪᠠᠭᠤ ᠨᠢᠭᠡ ᠴᠤ᠌ ᠦᠭᠡᠢ ᠃
ᠡᠪ ᠬᠡᠷᠡᠭ᠋ ᠦᠭᠡᠢ ᠬᠥᠮᠦᠨ ᠨᠢᠭᠡ ᠴᠤ᠌ ᠦᠭᠡᠢ ᠃
ᠮᠣᠩᠭᠣᠯᠴᠤᠳ ᠶᠡᠬᠡ ᠳᠤ ᠴᠤ᠌ ᠡᠪ ᠬᠡᠷᠡᠭᠲᠡᠢ ᠂ ᠪᠠᠬ᠋ᠠ ᠳᠤ ᠴᠤ᠌ ᠡᠪ ᠬᠡᠷᠡᠭᠲᠡᠢ ᠭᠡᠵᠡᠢ᠃
ᠶᠡᠬᠡᠰ ᠊ᠢ ᠡᠰᠡ ᠬᠦᠨᠳᠦᠯᠡᠭᠰᠡᠨ ᠬᠥᠮᠦᠨ ᠰᠠᠮᠠᠭᠤᠷᠠᠬᠤ ᠶ᠋ᠢᠨ ᠰᠢᠨᠵᠢ ᠃
ᠡᠪ ᠊ᠢ ᠡᠰᠡ ᠪᠣᠲᠣᠭᠰᠠᠨ ᠶᠡᠬᠡᠰ ᠂ ᠬᠥᠩᠭᠡᠷᠡᠬᠦ ᠶ᠋ᠢᠨ ᠰᠢᠨᠵᠢ ᠃
ᠵᠠᠭᠠᠨ ᠂ ᠰᠠᠷᠮᠠᠭᠴᠢᠨ ᠂ ᠲᠠᠤᠯᠠᠢ ᠂ ᠰᠢᠪᠠᠭᠤ ᠡᠪᠲᠡᠢ ᠪᠣᠯᠤᠭᠠᠳ ᠰᠣᠨᠢᠨ ᠦᠯᠢᠭᠡᠷ ᠪᠣᠯᠤᠭᠰᠠᠨ ᠊ᠢ ᠪᠣᠲᠣ ᠃
ᠴᠠᠰᠤᠲᠤ ᠠᠭᠤᠯᠠ ᠶ᠋ᠢᠨ ᠴᠠᠭᠠᠨ ᠠᠷᠰᠯᠠᠨ
ᠬᠠᠷᠠ ᠰᠢᠷᠭᠤᠯᠵᠢᠨ ᠳᠤ ᠪᠠᠷᠢᠬᠲᠠᠭᠰᠠᠨ ᠊ᠢ ᠦᠵᠡ ᠃
ᠬᠣᠶᠠᠷ ᠡᠪᠲᠡᠢ ᠬᠥᠮᠦᠨ ᠂ ᠪᠤᠰᠤ ᠬᠥᠮᠦᠨ ᠪ ᠦᠭᠡ ᠶ᠋ᠢ ᠪᠡᠶᠡ ᠪᠠᠶᠠᠨ ᠳᠤ ᠪᠠᠨ ᠪᠤᠤ ᠨᠢᠭᠤ ᠃
ᠪᠡᠶᠡ ᠪᠡᠶᠡᠨ ᠪ ᠦᠭᠡ ᠶ᠋ᠢ ᠪᠤᠰᠤᠳ ᠲᠤ ᠪᠤᠤ ᠬᠡᠯᠡ᠃
ᠨᠣᠶ᠋ᠢᠷ ᠶ᠋ᠢᠠᠨ ᠴᠢᠲᠠᠬᠤ ᠦᠭᠡᠢ ᠪᠣᠯᠪᠠᠯ ᠮᠠᠨᠠᠬ᠋ᠠ ᠪᠤᠤ ᠮᠠᠨᠠ ᠃
ᠡᠪ ᠶ᠋ᠢᠡᠨ ᠴᠢᠲᠠᠬᠤ ᠦᠭᠡᠢ ᠪᠣᠯᠪᠠᠯ ᠶᠠᠭᠠᠷᠠᠵᠤ ᠪᠢᠲᠡᠭᠡᠢ ᠬᠠᠨᠢᠯᠠ ᠃
ᠡᠪ ᠪᠤᠢ ᠦᠭᠡᠢ ᠶ᠋ᠢ ᠮᠡᠲᠡᠶᠡ ᠭᠡᠪᠡᠯ
ᠨᠢᠭᠡ ᠨᠢᠭᠡᠨ ᠶ᠋ᠢᠡᠨ ᠵᠣᠪᠠᠬᠤ ᠴᠠᠭ ᠲᠤ ᠳᠤᠰᠠ ᠪᠤᠢ ᠦᠭᠡᠢ ᠶ᠋ᠢ ᠦᠵᠡ ᠃
ᠠᠮᠠᠷᠠᠭ ᠮᠥᠨ ᠪᠤᠰᠤ ᠶ᠋ᠢ ᠲᠠᠨᠢᠶᠠ ᠭᠡᠪᠡᠯ
ᠪᠡᠶᠡ ᠪᠠᠶᠠᠨ ᠠ᠋ᠴᠠ ᠪᠠᠨ ᠰᠡᠵᠢᠭᠯᠡᠬᠦ ᠂ ᠦᠯᠦ ᠰᠡᠵᠢᠭᠯᠡᠬᠦ ᠶ᠋ᠢ ᠠᠵᠢᠬᠯᠠ ᠃
ᠮᠣᠩᠭᠣᠯ ᠦ᠋ᠨ ᠦᠭᠡ ᠂ ᠢᠨᠠᠭ ᠬᠥᠮᠦᠨ ᠪ ᠪᠠᠭᠠᠬᠤ ᠨᠢ ᠴᠢᠪᠡᠯ ᠰᠠᠶ᠋ᠢᠬᠠᠨ
ᠥᠰᠢᠶᠡᠲᠡᠢ ᠬᠥᠮᠦᠨ ᠪ ᠢᠨᠢᠶᠡᠬᠦ ᠨᠢ ᠴᠢᠪᠡᠯ ᠮᠤᠤᠬᠠᠢ ᠭᠡᠳᠡᠭ᠃
ᠢᠨᠠᠭ ᠪᠣᠯᠪᠠᠯ ᠡᠪᠲᠡᠢ ᠶᠠᠪᠤᠬᠤ ᠬᠡᠷᠡᠭᠲᠡᠢ ᠃
ᠥᠰᠢᠶᠡᠲᠡᠢ ᠪᠣᠯᠪᠠᠯ ᠳᠤᠭᠤᠢ ᠰᠠᠭᠤᠬᠤ ᠬᠡᠷᠡᠭᠲᠡᠢ ᠃
ᠤᠷᠢᠲᠤ ᠲᠠᠩᠭᠤᠳ ᠦ᠋ᠨ ᠦᠯᠢᠭᠡᠷ ᠂ ᠬᠥᠮᠦᠨ ᠪ ᠰᠡᠤᠠᠬᠢᠯ ᠦ᠋ᠨ ᠨᠤᠮᠤ ᠶ᠋ᠢ ᠡᠭᠡᠭᠦᠯᠬᠦ ᠳᠤ
ᠥᠪᠡᠷ ᠦ᠋ᠨ ᠰᠡᠤᠠᠬᠢᠯ ᠦ᠋ᠨ ᠬᠥᠪᠴᠢ ᠶ᠋ᠢ ᠬᠢᠴᠢᠶᠡ ᠭᠡᠵᠡᠢ ᠃
ᠮᠡᠰᠡᠨ ᠪ ᠰᠢᠷᠬᠠ ᠡᠳᠡᠭᠡᠷᠡᠳᠡᠭ᠂ ᠦᠭᠡᠨ ᠪ ᠰᠢᠷᠬᠠ ᠡᠳᠡᠭᠡᠷᠡᠳᠡᠭ ᠦᠭᠡᠢ ᠃
ᠴᠡᠭᠡᠵᠢᠨ ᠪ ᠳᠣᠲᠣᠷᠠ ᠭᠠᠯ ᠪᠠᠲᠠᠷᠠᠪᠠᠴᠤ ᠬᠠᠮᠠᠷ ᠶ᠋ᠢᠠᠷ ᠤᠲᠤᠬ᠋ᠠ ᠶ᠋ᠢ ᠨᠢ ᠪᠤᠤ ᠭᠠᠷᠬ᠋ᠠ ᠃
ᠳᠠᠶ᠋ᠢᠰᠤᠨ ᠠᠮᠠᠷᠠᠭ ᠠᠯᠢᠨ ᠳᠤ ᠴᠢᠪᠡᠯ
ᠦᠭᠡᠨ ᠪ ᠴᠥᠭᠡᠨ ᠂ ᠵᠠᠩ ᠦ᠋ᠨ ᠵᠥᠭᠡᠯᠡᠨ ᠬᠡᠷᠡᠭᠲᠡᠢ ᠃
ᠳᠠᠶ᠋ᠢᠰᠤᠨ ᠪ ᠳᠡᠷᠭᠡᠳᠡ ᠠᠮᠠᠷᠠᠭ ᠶ᠋ᠢᠠᠨ ᠪᠢᠲᠡᠭᠡᠢ ᠮᠠᠭᠲᠠ ᠃
ᠢᠨᠠᠭ ᠦ᠋ᠨ ᠳᠡᠷᠭᠡᠳᠡ ᠳᠠᠶ᠋ᠢᠰᠤᠨ ᠶ᠋ᠢᠠᠨ ᠪᠢᠲᠡᠭᠡᠢ ᠨᠢᠭᠤ ᠃
ᠰᠠᠨᠠᠬ᠋ᠠ ᠨᠡᠶ᠋ᠢᠯᠡᠪᠡᠰᠦ ᠦᠬᠦᠭᠰᠡᠨ ᠬᠥᠮᠦᠨ ᠪ ᠦᠭᠡ ᠶ᠋ᠢ ᠴᠢᠪᠡᠯ
ᠠᠮᠢᠲᠤ ᠬᠥᠮᠦᠨ ᠬᠡᠷᠡᠭᠯᠡᠮᠦᠢ ᠃
ᠰᠡᠤᠠᠬᠢᠯ ᠨᠢ ᠬᠣᠭᠣᠷᠣᠨᠲᠣ ᠪᠠᠨ ᠪᠤᠷᠤᠭᠤᠤᠠᠪᠠᠯ
ᠬᠣᠶᠠᠷ ᠠᠮᠢᠲᠤ ᠬᠥᠮᠦᠨ ᠴᠤ᠌ ᠦᠯᠦ ᠲᠠᠭᠠᠷᠠᠮᠤᠢ ᠃
ᠬᠣᠣᠷ ᠨᠢ ᠪᠠᠬ᠋ᠠ ᠪᠣᠯᠪᠠᠯ
ᠰᠢᠷᠠ ᠣᠭᠣᠲᠣᠨᠠ ᠴᠢᠪᠡᠯ ᠨᠢᠲᠦᠨ ᠳᠤ ᠳᠤᠯᠠᠭᠠᠨ ᠃
ᠬᠠᠶ᠋ᠢᠷᠠ ᠨᠢ ᠪᠠᠬ᠋ᠠ ᠪᠣᠯᠪᠠᠯ
ᠡᠴᠢᠭᠡ ᠡᠬᠡ ᠳᠤ ᠴᠢᠪᠡᠯ ᠭᠣᠮᠣᠲᠠᠯᠲᠠᠢ ᠃
ᠬᠣᠯᠠ ᠶ᠋ᠢᠨ ᠶᠠᠭᠤᠮᠠᠨ ᠳᠤ ᠰᠠᠶ᠋ᠢᠨ ᠴᠤ᠌ ᠪᠤᠢ ᠂ ᠮᠠᠭᠤᠬᠠᠢ ᠴᠤ᠌ ᠪᠤᠢ ᠃
ᠬᠣᠭᠣᠷᠣᠨᠲᠣ ᠶ᠋ᠢᠨ ᠶᠠᠭᠤᠮᠠᠨ ᠳᠤ ᠦᠨᠡᠨ ᠴᠤ᠌ ᠪᠤᠢ ᠂ ᠬᠤᠲᠠᠯ ᠴᠤ᠌ ᠪᠤᠢ ᠃
ᠬᠣᠶᠠᠷ ᠪᠣᠲᠣᠯ ᠳᠤ ᠪᠣᠯᠬᠤ ᠴᠤ᠌ ᠪᠤᠢ ᠂ ᠪᠣᠯᠬᠤ ᠦᠭᠡᠢ ᠴᠤ᠌ ᠪᠤᠢ ᠃
ᠡᠳ᠋ ᠮᠠᠯ ᠦᠭᠡᠢ ᠬᠥᠮᠦᠨ ᠦᠨᠡᠨ ᠦᠭᠡ ᠬᠡᠯᠡᠪᠡᠴᠦ
ᠬᠡᠷᠡᠭᠰᠡᠬᠦ ᠦᠭᠡᠢ ᠴᠠᠭ ᠪᠣᠯᠵᠣᠬᠤᠢ ᠃
ᠮᠠᠨᠵᠤ ᠵᠠᠩ ᠦᠭᠡᠢ ᠬᠥᠮᠦᠨ ᠭᠠᠭᠴᠠᠭᠠᠷᠲᠠᠬᠤ ᠴᠠᠭ ᠪᠣᠯᠵᠣᠬᠤᠢ ᠃
ᠪᠤᠭᠤ ᠶ᠋ᠢᠨ ᠡᠪᠡᠷ ᠤᠷᠲᠤ ᠴᠢᠪᠡᠯ ᠮᠣᠲᠣᠨ ᠳᠤ ᠶᠠᠭᠠᠬᠢᠨ ᠣᠷᠢᠶᠠᠯᠲᠤᠬᠤ ᠪᠤᠢ ᠃
ᠪᠤᠷᠤᠭᠤ ᠶᠠᠪᠤᠲᠠᠯ ᠣᠯᠠᠨ ᠴᠢᠪᠡᠯ ᠥᠪᠡᠷ ᠶ᠋ᠢᠡᠨ ᠶᠠᠭᠠᠬᠢᠨ ᠮᠡᠲᠡᠬᠦ ᠪᠤᠢ ᠃
ᠪᠤᠰᠤᠳ ᠬᠥᠮᠦᠨ ᠪ ᠭᠡᠮ ᠊ᠢ ᠤᠲᠤᠵᠤ ᠰᠠᠭᠤᠬᠤ ᠪᠠᠨ ᠪᠠᠶ᠋ᠢᠭᠠᠰᠠᠢ ᠃
ᠪᠡᠶᠡ ᠪᠡᠨ ᠥᠮᠥᠭᠡᠷᠡᠬᠦ ᠶ᠋ᠢ ᠤᠷᠢᠲᠠᠪᠠᠴᠤ ᠦᠭᠡ ᠬᠡᠯᠡᠬᠦ ᠶ᠋ᠢ ᠬᠣᠵᠢᠲᠠᠭᠠᠰᠠᠢ ᠃
ᠡᠨᠡ ᠵᠢᠯ ᠥᠩᠭᠡᠷᠡᠭᠰᠡᠨ ᠪ ᠬᠣᠶ᠋ᠢᠨᠠ ᠬᠣᠶ᠋ᠢᠲᠤ ᠵᠢᠯ ᠶᠠᠭᠤᠨ ᠳᠤ ᠡᠰᠡ ᠢᠷᠡᠬᠦ ᠪᠤᠢ ᠃
ᠮᠠᠭᠤ ᠦᠭᠡ ᠬᠡᠯᠡᠭᠰᠡᠨ ᠬᠣᠶ᠋ᠢᠨᠠ ᠬᠠᠷᠢᠭᠤ ᠶᠠᠭᠤᠨ ᠳᠤ ᠡᠰᠡ ᠢᠷᠡᠬᠦ ᠪᠤᠢ ᠃
ᠨᠣᠮᠣᠬᠠᠨ ᠶᠠᠪᠤᠬᠤ ᠶᠡᠬᠡᠲᠡᠪᠡᠯ ᠨᠣᠬᠠᠢ ᠮᠡᠲᠦ ᠱᠣᠭᠯᠠᠭᠲᠠᠬᠤ ᠃
ᠳᠣᠭᠰᠢᠨ ᠶᠠᠪᠤᠬᠤ ᠤᠷᠢᠲᠠᠪᠠᠯ ᠬᠥᠮᠦᠨ ᠪ ᠭᠠᠷ ᠲᠤᠷ ᠨᠣᠴᠣᠭᠲᠠᠬᠤ ᠃
ᠥᠲᠡᠯᠵᠦ ᠬᠥᠮᠦᠨ ᠪ ᠭᠠᠷ ᠲᠤ ᠣᠷᠣᠬᠤ ᠴᠠᠭ ᠲᠤ ᠤᠴᠠᠭᠠᠷ ᠵᠠᠩ ᠬᠡᠷᠡᠭ ᠦᠭᠡᠢ ᠃
ᠦᠭᠡᠶ᠋ᠢᠷᠡᠵᠦ ᠭᠤᠶᠤᠵᠤ ᠢᠲᠡᠬᠦ ᠴᠠᠭ ᠲᠦ ᠬᠡᠲᠡᠷ ᠦᠭᠡ ᠬᠡᠷᠡᠭ ᠦᠭᠡᠢ ᠃
ᠤᠰᠤ ᠶ᠋ᠢ ᠳᠡᠭᠡᠭᠰᠢ ᠤᠷᠤᠰᠬᠠᠵᠤ ᠦᠯᠦ ᠪᠣᠯᠬᠤ ᠃
ᠨᠠᠰᠤ ᠶ᠋ᠢ ᠮᠥᠩᠬᠡᠷᠡᠭᠦᠯᠵᠦ ᠦᠯᠦ ᠪᠣᠯᠬᠤ ᠃
ᠲᠠᠷᠢᠶᠠᠨ ᠳᠤ ᠳᠤᠰᠠ ᠦᠭᠡᠢ ᠬᠠᠭᠤᠷᠠᠢ ᠭᠣᠣ ᠤᠬᠤᠵᠤ ᠶᠠᠮᠪᠠᠷ ㉕ ᠳᠤᠰᠠ ᠠᠵᠢ ᠃
ᠡᠭᠦᠷᠢᠲᠡ ᠳᠤᠰᠠ ᠦᠭᠡᠢ ᠪᠣᠯᠪᠠᠯ ᠶᠡᠬᠡ ᠯᠡ ᠵᠢᠷᠭᠠᠵᠤ ᠶᠠᠭᠤᠨᠠᠢ ᠬᠡᠷᠡᠭ᠃
ᠬᠥᠮᠦᠨ ᠣᠯᠠᠨ ᠪᠣᠯᠪᠠᠴᠤ ᠦᠬᠦᠬᠦ ᠪᠡᠨ ᠮᠡᠲᠡᠬᠦ ᠢᠨᠤ ᠴᠥᠭᠡᠨ ᠃
ᠤᠬᠠᠭᠠᠨᠲᠠᠨ ᠣᠯᠠᠨ ᠪᠣᠯᠪᠠᠴᠤ ᠬᠣᠶ᠋ᠢᠲᠤ ᠪᠠᠨ ᠰᠠᠨᠠᠬᠤ ᠠᠨᠤ ᠪᠡᠷᠬᠡ ᠃
ᠨᠢᠭᠡᠨ ᠬᠥᠮᠦᠨ ᠪ ᠠᠴᠢ ᠦᠷᠡ ᠪᠠᠶ᠋ᠢᠲᠤᠭᠠᠢ ᠶᠢᠷᠲᠢᠨᠴᠦ ᠴᠢᠪᠡᠯ ᠶᠠᠭᠤᠨ ᠮᠥᠩᠬᠡᠷᠡᠬᠦ ᠪᠤᠢ ᠃
ᠡᠨᠡ ᠨᠠᠰᠤ ᠶ᠋ᠢ ᠢᠮᠠᠭᠲᠠ ᠪᠣᠲᠣᠵᠤ ᠭᠡᠴᠢᠨᠡᠬᠡᠨ ᠬᠡᠷᠡᠭ ᠪᠦᠲᠦᠬᠦ ᠪᠤᠢ ᠃
ᠡᠭᠦᠷᠢᠲᠡ ᠶ᠋ᠢᠨ ᠳᠤᠰᠠ ᠶ᠋ᠢ ᠪᠣᠲᠣᠪᠠᠯ ᠪᠤᠷᠬᠠᠨ ᠲᠩᠷᠢ ᠶ᠋ᠢᠨ ᠨᠣᠮ ᠊ᠢ ᠬᠢᠴᠢᠶᠡᠭᠡᠷᠡᠢ ᠃
ᠮᠠᠭᠤ ᠬᠦᠦ ᠮᠢᠨᠢ ᠂ ᠶᠢᠷᠲᠢᠨᠴᠦ ᠶ᠋ᠢᠨ ᠬᠠᠷᠠ ᠬᠥᠮᠦᠨ ㉖ ᠪ ᠶᠣᠰᠣ ᠶ᠋ᠢ
ᠭᠣᠣᠯᠲᠠᠵᠤ ᠥᠭᠦᠯᠡᠪᠡᠢ ᠪᠢ ᠴᠢᠮᠠ ᠳᠤ ᠪᠠᠨ ᠃ ᠬᠡᠮᠡᠵᠦᠬᠦᠢ ᠃
① ᠲᠤᠰ ᠬᠢᠴᠢᠶᠡᠯ ᠊ᠢ 《 ᠮᠣᠩᠭᠣᠯ ᠤᠷᠠᠨ ᠵᠣᠬᠢᠶᠠᠯ ᠦ᠋ᠨ ᠳᠡᠭᠡᠵᠢ ᠵᠠᠭᠤᠨ ᠪᠢᠯᠢᠭ᠌ ᠣᠷᠣᠰᠢᠪᠠᠢ ( ᠳᠥᠲᠥᠭᠡᠷ ᠳᠡᠪᠲᠡᠷ ) 》
( ᠥᠪᠥᠷ ᠮᠣᠩᠭᠣᠯ ᠦ᠋ᠨ ᠠᠷᠠᠳ ᠦ᠋ᠨ ᠬᠡᠪᠯᠡᠯ ᠦ᠋ᠨ ᠬᠣᠷᠢᠶᠠ ᠂ 1982 ᠣᠨ ᠪ ᠬᠣᠶᠠᠲᠠᠬᠢ ᠬᠡᠪᠯᠡᠯ ) ᠡᠴᠡ ᠰᠣᠩᠭᠣᠪᠠ ᠃
②ᠶᠠᠭᠤᠪᠢ— ᠶᠠᠭᠤ ᠪᠤᠢ
③ᠴᠢᠪᠠᠯ— ᠪᠣᠯᠪᠠᠴᠤ
④ᠣᠳᠣᠮᠵᠢ—ᠤᠲᠤᠯᠭᠠ ᠭᠡᠵᠦ ᠬᠠᠨᠢᠶᠠᠳᠤ ᠲᠠᠭᠰᠢᠭᠤᠷ ᠢ ᠵᠠᠰᠠᠬᠤ ᠪᠠ ᠠᠭᠠᠷ ᠢ ᠠᠷᠢᠭᠤᠳᠬᠠᠬᠤ ᠪᠠᠷ ᠰᠢᠲᠠᠭᠠᠳᠠᠭ ᠦᠨᠦᠷᠲᠦ ᠡᠮ ᠪᠤᠶᠤ ᠬᠦᠵᠢ ᠶᠢ ᠬᠡᠯᠡᠨᠡ᠃ ᠬᠢᠴᠢᠶᠡᠯ ᠳᠦ ᠤᠲᠤᠮᠵᠢ ᠶᠢ ᠰᠡᠷᠡᠮᠵᠢ ᠭᠡᠬᠦ ᠤᠳᠬᠠ ᠪᠠᠷ ᠬᠡᠷᠡᠭᠯᠡᠵᠡᠢ ᠃
⑤ᠠᠮᠤᠷ— ᠠᠮᠠᠷ
⑥ ᠦᠭᠡᠶ᠋ᠢᠭᠦᠷᠡᠬᠦ — ᠦᠭᠡᠶ᠋ᠢᠷᠡᠬᠦ
⑦ ᠮᠤᠶ᠋ᠢᠬᠤᠷ— ᠠᠷᠭᠠ ᠰᠠᠮᠪᠠᠭᠠ ᠮᠠᠭᠤᠲᠠᠢ᠂ ᠬᠠᠷᠠ ᠬᠦᠴᠦ ᠪᠡᠷ ᠵᠢᠳᠬᠦᠬᠦ᠃
⑧ ᠮᠤᠤᠬᠠᠢ— ᠮᠠᠭᠤᠬᠠᠢ
⑨ ᠤᠯᠠᠷᠢᠬᠤ ᠦᠭᠡᠢ— ᠬᠤᠪᠢᠷᠠᠬᠤ ᠦᠭᠡᠢ᠂ ᠪᠠᠷᠠᠭᠳᠠᠬᠤ ᠦᠭᠡᠢ᠃
⑩ ᠵᠢᠮᠡᠲᠡᠢ— ᠵᠢᠮᠡ ᠲᠡᠢ
⑪ ᠭᠡᠵᠢᠭᠡ— ᠭᠡᠳᠡᠭᠡ
⑫ ᠮᠣᠯᠬᠢ— ᠪᠣᠯᠬᠢ᠂ ᠮᠣᠬᠣᠭᠤ
⑬ ᠶᠤᠭᠠᠨ— ᠶᠠᠭᠤ ᠪᠠᠨ
⑭ ᠴᠢᠨᠡᠭᠡ ᠲᠡᠢ ᠬᠥᠮᠥᠨ— ᠬᠦᠷᠦᠩᠭᠡ ᠬᠣᠭᠰᠢᠯ ᠲᠠᠢ ᠬᠥᠮᠥᠨ
⑮ ᠴᠢᠬᠢᠲᠡᠢ ᠭᠥᠷᠥᠭᠡᠰᠦ— ᠨᠢᠭᠡ ᠵᠦᠢᠯ ᠦᠨ ᠵᠡᠷᠯᠢᠭ ᠠᠳᠤᠭᠤ᠃ ᠬᠤᠯᠠᠨ ᠲᠠᠢ ᠠᠳᠠᠯᠢᠪᠲᠤᠷ ᠪᠣᠯᠪᠠᠴᠤ ᠴᠢᠬᠢ ᠨᠢ ᠲᠡᠭᠦᠨ ᠤ ᠬᠢ ᠡᠴᠡ ᠲᠣᠮᠣ
⑯ ᠪᠠᠢ— ᠫᠠᠢ
⑰ ᠲᠣᠷᠳᠠᠬᠣ— ᠶᠠᠳᠠᠭᠤ ᠵᠦᠳᠡᠭᠦᠦ᠂ ᠶᠠᠳᠠᠷ ᠳᠣᠷᠣᠢ ᠬᠥᠮᠥᠨ ᠠᠮᠢᠲᠠᠨ ᠢ ᠠᠰᠠᠷᠠᠵᠤ ᠰᠤᠪᠢᠯᠠᠬᠤ᠂ ᠲᠡᠵᠢᠭᠡᠵᠦ ᠠᠷᠠᠴᠢᠯᠠᠬᠤ
⑱ ᠵᠦᠳᠡᠭ— ᠠᠷᠠᠢ ᠶᠠᠳᠠᠭᠰᠠᠨ᠂ ᠨᠣᠮᠣᠢ ᠳᠣᠷᠣᠢ᠂
⑲ ᠥᠷᠮᠥᠭ—ᠨᠣᠣᠰᠣ᠂ ᠣᠯᠣᠰᠤ ᠵᠡᠷᠭᠡ ᠪᠡᠷ ᠨᠡᠬᠡᠬ᠋ᠰᠡᠨ ᠨᠢᠭᠡ ᠵᠦᠢᠯ ᠦᠨ ᠪᠦᠳᠦᠭᠦᠯᠢᠭ ᠪᠠᠷᠠᠭᠠ
⑳ ᠴᠠᠶ᠋ᠢᠷᠠᠭᠤ — ᠴᠠᠶ᠋ᠢᠯᠭᠠᠨ
㉑ ᠢᠵᠠᠮᠠᠭ — ᠰᠢᠩᠭᠡᠨ ᠶᠠᠭᠤᠮᠠᠨ ᠳᠤ ᠪᠦᠲᠦᠨ ᠠᠭᠤᠰᠬᠤ ᠦᠭᠡᠢ ᠪᠥᠭᠡᠮᠨᠡᠷᠡᠵᠦ ᠬᠥᠪᠬᠦ ᠵᠦᠢᠯ
㉒ ᠴᠢᠢᠳᠠᠮ — ᠤᠰᠤᠨ ᠳᠤ ᠰᠦ᠋᠂ ᠠᠶ᠋ᠢᠷᠠᠭ ᠵᠡᠷᠭᠡ ᠶᠢ ᠪᠢᠴᠢᠬᠠᠨ ᠬᠣᠯᠢᠵᠤ ᠴᠡᠭᠡᠬᠡᠨ ᠪᠣᠯᠭᠠᠭᠰᠠᠨ ᠤᠮᠳᠠ
㉓ ᠠᠪ ᠵᠠᠩ — ᠡᠯᠳᠡᠪ ᠮᠠᠭᠤ ᠵᠠᠩ
㉔ ᠳᠠᠶ᠋ᠢᠵᠢᠬᠤ — ᠳᠠᠶ᠋ᠢᠰᠤᠩᠨᠠᠨ ᠤᠷᠪᠠᠬᠤ
㉕ ᠶᠠᠮᠪᠠᠷ — ᠶᠠᠮᠠᠷ
㉖ ᠬᠠᠷᠠ ᠬᠥᠮᠥᠨ —ᠯᠠᠮᠠ ᠪᠤᠰᠤ ᠬᠥᠮᠥᠨ
ᠠᠯᠪᠠᠨ ᠵᠢᠷᠤᠮ ᠤᠨ ᠰᠤᠷᠭᠠᠨ ᠬᠥᠮᠦᠵᠢᠯ ᠦᠨ ᠬᠡᠯᠡ ᠪᠢᠴᠢᠭ ᠤᠩᠰᠢᠬᠤ ᠪᠢᠴᠢᠭ ᠨᠠᠢ᠍ᠮᠠᠳᠤᠭᠠᠷ ᠣᠨ〈 ᠳᠡᠭᠡᠳᠦ〉
2016 ᠣᠨ ᠪ 6 ᠰᠠᠷᠠ ᠬᠣᠶᠠᠳᠤᠭᠠᠷ ᠬᠡᠪ ᠡᠴᠡ ᠬᠠᠭᠤᠯᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠮᠢᠩᠭᠠᠳ ᠂ ᠴᠢᠮᠡᠭ
ᠬᠢᠨᠠᠭᠴᠢ ᠪᠠᠭᠰᠢ ᠄ ᠲᠥᠮᠡᠳ ᠂ ᠭᠦᠨᠴᠢᠨᠵᠠᠪ