ᠫᠯᠶᠦ᠋ᠱᠺᠢᠨ-ᠭᠣᠭᠣᠯПлюшкин-Гоголь-plushkin
470ᠫᠯᠶᠦ᠋ᠱᠺᠢᠨ
ᠭᠣᠭᠣᠯ
ᠮᠠᠨᠠᠢ ᠵᠣᠬᠢᠶᠠᠯ ᠤ᠋ᠨ ᠪᠠᠭᠠᠲᠤᠷ ᠨᠢᠭᠡ ᠬᠣᠶᠠᠷᠬᠠᠨ ᠭᠤᠳᠤᠮᠵᠢ ᠪᠠᠷ ᠬᠡᠳᠦᠬᠡᠨ ᠮᠤᠷᠤᠢᠭᠠᠳ ᠵᠣᠷᠢᠭᠰᠠᠨ ᠪᠠᠢᠰᠢᠩ ᠤ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠪᠡ᠃ ᠣᠢᠷᠠᠳᠴᠤ ᠢᠷᠡᠭᠡᠳ ᠬᠠᠷᠠᠪᠠᠯ ᠡᠨᠡ ᠪᠠᠢᠰᠢᠩ ᠪᠦᠷ ᠴᠦ᠍ ᠣᠯᠬᠢᠶᠠ ᠦᠭᠡᠢ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃ ᠬᠠᠰᠢᠶᠠ ᠪᠣᠯᠤᠨ ᠬᠠᠭᠠᠯᠭᠠ ᠨᠤᠭᠤᠳ ᠤ᠋ᠨ ᠮᠣᠳᠣᠨ ᠳ᠋ᠤ᠌ ᠬᠥᠭᠡᠴᠦ ᠰᠠᠭᠤᠵᠤ᠂ ᠠᠵᠢᠯᠴᠢᠳ ᠤ᠋ᠨ ᠭᠡᠷ ᠣᠷᠣᠨ᠂ ᠰᠠᠩ ᠬᠥᠮᠥᠷᠭᠡ᠂ ᠵᠣᠭᠣᠷᠢ ᠵᠡᠷᠭᠡ ᠬᠠᠭᠤᠴᠢᠷᠠᠨ ᠥᠮᠥᠬᠢᠷᠡᠭᠰᠡᠨ ᠪᠠᠢᠰᠢᠩ ᠤ᠋ᠳ ᠬᠠᠰᠢᠶᠠ ᠳᠦᠭᠦᠷᠡᠩ ᠪᠠᠷᠠᠭᠠᠨᠳᠠᠨ ᠬᠠᠷᠠᠭᠳᠠᠨᠠ᠃ ᠵᠡᠷᠭᠡᠯᠡᠳᠡᠭᠡ ᠬᠠᠰᠢᠶᠠ ᠨᠤᠭᠤᠳ ᠤᠷᠤᠭᠤ ᠣᠷᠣᠳᠠᠭ ᠬᠠᠭᠠᠯᠭᠠ ᠶ᠋ᠢ ᠡᠳᠡᠭᠡᠷ ᠪᠠᠢᠰᠢᠩ ᠤ᠋ᠨ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠭᠠᠷᠭᠠᠵᠠᠢ᠃
ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠡᠨᠳᠡ ᠶᠡᠬᠡ ᠯᠡ ᠬᠥᠭᠵᠢᠯᠲᠡᠢ ᠠᠮᠢᠳᠤᠷᠠᠯ ᠣᠷᠭᠢᠯᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠳᠣ ᠪᠠᠯᠠᠷᠠᠭᠰᠠᠨ ᠨᠢ ᠡᠨᠡ ᠪᠦᠭᠦᠳᠡ ᠳᠡᠭᠡᠷᠡ ᠢᠯᠡ ᠪᠠᠢᠨᠠ᠃ ᠡᠨᠳᠡ ᠠᠮᠢᠳᠤ ᠶᠠᠭᠤᠮᠠᠰ ᠤ᠋ᠨ ᠰᠢᠨᠵᠢ ᠣᠭᠲᠣ ᠠᠯᠠᠭᠠ᠂ ᠣᠩᠭᠣᠢᠵᠤ ᠪᠠᠢᠭᠠ ᠬᠠᠭᠠᠯᠭᠠ ᠴᠤ᠌ ᠠᠯᠠᠭᠠ᠂ ᠣᠷᠣᠵᠤ ᠭᠠᠷᠴᠤ ᠶᠠᠪᠤᠭᠠ ᠬᠥᠮᠦᠰ ᠴᠦ᠍ ᠦᠵᠡᠭᠳᠡᠬᠦ ᠦᠭᠡᠢ᠃ ᠰᠠᠢᠬᠠᠨ ᠲᠣᠬᠢᠯᠢᠭ ᠡᠵᠡᠩᠨᠡᠨ ᠬᠠᠮᠢᠶᠠᠷᠴᠤ ᠪᠠᠢᠭᠠ ᠶ᠋ᠢᠨ ᠲᠡᠮᠳᠡᠭ ᠴᠦ᠍ ᠣᠭᠲᠣ ᠦᠵᠡᠭᠳᠡᠬᠦ ᠦᠭᠡᠢ᠃ ᠡᠨᠳᠡᠬᠢ ᠶ᠋ᠢᠨ ᠦᠬᠡᠨᠴᠡ ᠪᠠᠢᠳᠠᠯ ᠳ᠋ᠤ᠌ ᠠᠮᠢᠳᠤᠷᠠᠯ ᠤ᠋ᠨ ᠲᠡᠮᠳᠡᠭ ᠣᠷᠣᠭᠤᠯᠬᠤ ᠭᠡᠰᠡᠨ ᠶᠦᠮ ᠰᠢᠭ ᠨᠢᠭᠡ ᠬᠥᠮᠦᠨ ᠲᠡᠷᠭᠡᠨ ᠳ᠋ᠦ᠍ ᠶᠠᠭᠤᠮᠠ ᠠᠴᠢᠵᠤ᠂ ᠳᠡᠭᠡᠷᠡ ᠡᠴᠡ ᠨᠢ ᠴᠢᠬᠢᠷᠰᠦ ᠪᠡᠷ ᠪᠦᠲᠡᠭᠡᠭᠡᠳ᠂ ᠨᠡᠭᠡᠭᠡᠯᠲᠡᠲᠡᠢ ᠭᠠᠭᠴᠠᠬᠠᠨ ᠲᠣᠮᠣ ᠬᠠᠭᠠᠯᠭᠠ ᠪᠠᠷ ᠣᠷᠣᠵᠤ ᠶᠠᠪᠤᠪᠠ᠃ ᠬᠠᠰᠢᠶᠠᠨ ᠤ᠋ ᠲᠥᠷᠥ ᠲᠡᠮᠦᠷ ᠲᠦ᠍ ᠡᠯᠭᠦᠭᠡᠰᠦᠲᠡᠢ ᠠᠪᠤᠷᠭᠤ ᠲᠣᠮᠣ ᠴᠣᠣᠵᠢ ᠪᠠᠷ ᠪᠣᠳᠣᠪᠠᠯ ᠡᠨᠡ ᠬᠠᠭᠠᠯᠭᠠ ᠰᠠᠶᠢ ᠯᠠ ᠣᠩᠭᠣᠢᠭᠰᠠᠨ ᠠ᠋ᠴᠠ ᠪᠢᠰᠢ᠂ ᠪᠤᠰᠤᠳ ᠴᠠᠭ ᠲᠤ᠌ ᠦᠷᠭᠦᠯᠵᠢ ᠲᠦᠭᠵᠢᠶᠡᠰᠦᠲᠡᠢ ᠪᠠᠢᠳᠠᠭ ᠨᠢ ᠢᠯᠡᠬᠡᠨ ᠮᠡᠳᠡᠭᠳᠡᠵᠦ ᠪᠠᠢᠯᠠ᠃ ᠨᠢᠭᠡ ᠪᠠᠢᠰᠢᠩ ᠤ᠋ᠨ ᠳᠡᠷᠭᠡᠳᠡ ᠰᠠᠶᠢ ᠶ᠋ᠢᠨ ᠢᠷᠡᠭᠰᠡᠨ ᠲᠡᠷᠭᠡᠴᠢᠨ ᠲᠡᠢ ᠨᠢᠭᠡ ᠠᠮᠢᠲᠠᠨ ᠬᠡᠷᠡᠯᠳᠦᠵᠦ ᠪᠠᠢᠭᠠ ᠶ᠋ᠢ ᠴᠢᠴᠢᠺᠦᠧ ᠳᠠᠷᠤᠢ ᠬᠠᠷᠠᠭᠠᠳ᠂ ᠡᠨᠡ ᠴᠢᠨᠢ ᠴᠣᠬᠣᠮ ᠶᠠᠮᠠᠷ ᠠᠮᠢᠲᠠᠨ ᠪᠣᠢ? ᠡᠷᠡᠭᠲᠡᠢ ᠶᠦᠮ ᠤᠤ᠂ ᠡᠮᠡᠭᠲᠡᠢ ᠶᠦᠮ ᠤᠤ? ᠭᠡᠵᠦ ᠲᠠᠨᠢᠬᠤ ᠭᠡᠳ ᠴᠥᠬᠥᠷᠡᠯᠡ᠃ ᠲᠡᠭᠦᠨ ᠦ᠌ ᠬᠤᠪᠴᠠᠰᠤ ᠪᠠᠷ ᠲᠡᠢᠮᠦ ᠬᠦᠢᠰᠦ ᠶ᠋ᠢᠨ ᠬᠥᠮᠦᠨ ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠲᠣᠩ ᠬᠡᠴᠡᠭᠦᠦ ᠪᠠᠢᠯᠠ᠃ ᠳᠡᠪᠡᠯ ᠨᠢ ᠶᠠᠭ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠢ ᠰᠢᠭ ᠪᠠᠢᠭᠰᠠᠨ ᠪᠠ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠬᠥᠳᠡᠭᠡ ᠶ᠋ᠢᠨ ᠡᠬᠡᠨᠡᠷ ᠦ᠋ᠳ ᠡᠮᠦᠰᠴᠦ ᠶᠠᠪᠤᠳᠠᠭ ᠮᠠᠯᠠᠭᠠᠢ ᠲᠠᠢ ᠠᠳᠠᠯᠢ ᠱᠣᠪᠣᠭᠣᠷ ᠶᠠᠭᠤᠮᠠ ᠲᠠᠯᠪᠢᠭᠠᠲᠠᠢ᠃ ᠵᠥᠪᠬᠡᠨ ᠬᠣᠭᠣᠯᠠᠢ ᠨᠢ ᠡᠮᠡᠭᠲᠡᠢᠴᠦᠳ ᠦ᠋ᠨ ᠬᠢ ᠡᠴᠡ ᠠᠷᠠᠢ ᠯᠠ ᠪᠦᠳᠡᠭᠢ ᠰᠥᠭᠡᠩᠭᠢ ᠰᠣᠨᠣᠰᠳᠠᠨᠠ᠃ 《ᠡᠨᠡ ᠴᠢᠨᠢ ᠡᠮᠡᠭᠲᠡᠢ ᠬᠥᠮᠦᠨ ᠪᠠᠢᠬᠤ ᠰᠢᠪ》 ᠭᠡᠵᠦ ᠴᠢᠴᠢᠺᠦᠧ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ 《ᠪᠢᠰᠢ ᠳᠡ 》 ᠭᠡᠵᠦ ᠰᠠᠨᠠᠭᠠᠳ ᠳᠠᠭᠢᠵᠤ ᠰᠠᠢᠨ ᠠᠵᠢᠭᠯᠠᠭᠠᠳ 《ᠡᠮᠡᠭᠲᠡᠢ ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ》 ᠭᠡᠵᠦ ᠬᠡᠯᠡᠪᠡ᠃ ᠬᠠᠷᠢᠨ ᠲᠡᠷᠡ ᠠᠮᠢᠲᠠᠨ ᠨᠢ ᠴᠢᠴᠢᠺᠦᠧ ᠶ᠋ᠢ ᠮᠥᠨ ᠶᠡᠬᠡ ᠰᠢᠷᠲᠡᠨ ᠬᠠᠷᠠᠨᠠ᠃ ᠴᠢᠴᠢᠺᠦᠧ ᠶ᠋ᠢ ᠪᠠᠢᠲᠤᠭᠠᠢ ᠰᠧᠯᠢᠹᠤᠨ ᠢ᠋ ᠮᠥᠨ ᠰᠠᠢᠲᠤᠷ ᠠᠵᠢᠭᠯᠠᠭᠰᠠᠨ ᠪᠥᠭᠡᠳ ᠮᠣᠷᠢᠳ ᠢ᠋ ᠰᠡᠭᠦᠯ ᠡᠴᠡ ᠨᠢ ᠬᠣᠩᠰᠢᠶᠠᠷ ᠲᠤᠨᠢ ᠬᠦᠷᠲᠡᠯᠡ ᠬᠠᠷᠠᠵᠤ ᠪᠠᠢᠭᠠ ᠪᠠᠷ ᠪᠣᠳᠣᠪᠠᠯ ᠵᠣᠴᠢᠨ ᠤ᠋ ᠢᠷᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠠᠮᠢᠲᠠᠨ ᠶᠡᠬᠡ ᠭᠠᠢᠬᠠᠭᠰᠠᠨ ᠪᠣᠯᠤᠯᠲᠠᠢ᠃ ᠪᠦᠰᠡ ᠡᠴᠡ ᠪᠡᠨ ᠵᠡᠭᠦᠭᠰᠡᠨ ᠪᠥᠭᠡᠮ ᠲᠦᠯᠬᠢᠭᠦᠷ ᠢ᠋ ᠨᠢ ᠬᠠᠷᠠᠬᠤ ᠶ᠋ᠢᠨ ᠳᠠᠭᠠᠤ ᠲᠠᠷᠢᠶᠠᠴᠢᠨ ᠢ᠋ ᠡᠯᠳᠡᠪ ᠮᠠᠭᠤᠬᠠᠢ ᠦᠭᠡ ᠪᠡᠷ ᠵᠠᠩᠨᠠᠵᠤ ᠪᠠᠢᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠴᠢᠴᠢᠺᠦᠧ 《ᠮᠥᠨ ᠳᠡ᠂ ᠨᠢᠷᠪᠠ ᠡᠮᠡᠭᠲᠡᠢ ᠰᠢᠪ ᠳᠡ 》 ᠭᠡᠵᠦ ᠳ᠋ᠦᠩᠨᠡᠪᠡ᠃
《ᠡᠮᠡᠭᠡᠨ ᠭᠤᠸᠠᠢ᠂ ᠨᠣᠶᠠᠨᠲᠠᠨ ᠶᠠᠭᠤ ᠬᠢᠵᠦ ᠪᠠᠢᠨᠠ ᠪᠣᠢ?》 ᠭᠡᠵᠦ ᠲᠡᠷᠭᠡᠨ ᠡᠴᠡ ᠪᠡᠨ ᠪᠠᠭᠤᠬᠤ ᠶ᠋ᠢᠨ ᠳᠠᠭᠠᠤ ᠴᠢᠴᠢᠺᠦᠧ ᠶ᠋ᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠨᠢᠷᠪᠠ ᠡᠮᠡᠭᠲᠡᠢ ᠠᠰᠠᠭᠤᠯᠲᠠ ᠶ᠋ᠢ ᠨᠢ ᠪᠦᠭᠦᠳᠡ ᠶ᠋ᠢ ᠨᠢ ᠰᠣᠨᠣᠰᠤᠯ ᠦᠭᠡᠢ ᠬᠥᠨᠳᠡᠯᠡᠨ ᠡᠴᠡ ᠣᠷᠣᠵᠤ:
《ᠡᠵᠡᠭᠦᠢ》 ᠭᠡᠵᠦ ᠬᠡᠯᠡᠭᠡᠳ ᠪᠠᠢᠰᠬᠢᠵᠦ ᠪᠠᠢᠭᠠᠳ ᠳᠠᠬᠢᠨ 《 ᠲᠠ ᠶᠠᠭᠤ ᠭᠡᠵᠦ ᠶᠠᠪᠤᠭᠠ ᠬᠥᠮᠦᠨ ᠪᠣᠢ?》 ᠭᠡᠵᠦ ᠠᠰᠠᠭᠤᠪᠠ᠃
《ᠠᠷᠠᠯᠵᠢᠶᠠᠨ ᠤ᠋ ᠲᠤᠬᠠᠢ ᠵᠢᠭᠠᠬᠠᠨ ᠬᠡᠷᠡᠭ ᠲᠡᠢ ᠶᠠᠪᠤᠭᠠ᠃ 》
《ᠲᠡᠭᠡᠪᠡᠯ ᠥᠷᠥᠭᠡ ᠤᠷᠤᠭᠤ ᠣᠷᠣ》 ᠭᠡᠵᠦ ᠨᠢᠷᠪᠠ ᠡᠮᠡᠭᠲᠡᠢ ᠬᠡᠯᠡᠭᠡᠳ ᠭᠤᠯᠢᠷ ᠪᠣᠯᠴᠢᠬᠠᠭᠰᠠᠨ᠂ ᠲᠣᠮᠣ ᠴᠣᠭᠣᠷᠬᠠᠢ ᠲᠠᠢ ᠬᠤᠪᠴᠠᠰᠤᠨ ᠤ᠋ ᠪᠠᠨ ᠠᠷᠤ ᠶ᠋ᠢ ᠨᠠᠰᠢ ᠬᠠᠷᠠᠭᠤᠯᠤᠨ ᠬᠠᠭᠠᠯᠭᠠ ᠶ᠋ᠢ ᠣᠩᠭᠣᠢᠯᠭᠠᠪᠠ᠃
ᠴᠢᠴᠢᠺᠦᠧ ᠵᠣᠭᠣᠷᠢ ᠳ᠋ᠤ᠌ ᠣᠷᠣᠭᠰᠠᠨ ᠰᠢᠭ᠋ ᠬᠦᠢᠲᠡᠨ ᠠᠮᠢᠰᠬᠤᠯ ᠭᠠᠷᠴᠤ ᠪᠠᠢᠭᠠ ᠥᠷᠭᠡᠨ ᠬᠠᠷᠠᠩᠭᠤᠢ ᠡᠭᠦᠳᠡᠨ ᠫᠧᠩ ᠢ᠋ ᠳᠠᠮᠵᠢᠨ ᠮᠥᠨ ᠬᠠᠪ ᠬᠠᠷᠠᠩᠭᠤᠢ ᠪᠣᠯᠪᠠᠴᠤ ᠬᠠᠭᠠᠯᠭᠠ ᠶ᠋ᠢ ᠨᠡᠭᠡᠭᠡᠵᠦ ᠴᠢᠨᠠᠳᠤ ᠭᠡᠭᠡᠨ ᠥᠷᠥᠭᠡᠨ ᠳ᠋ᠦ᠍ᠨᠢ ᠣᠷᠣᠬᠤ ᠳ᠋ᠠᠭᠠᠨ ᠲᠡᠭᠦᠨ ᠦ᠌ ᠳᠣᠲᠣᠷᠠᠬᠢ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠭᠠᠢᠬᠠᠪᠠ᠃ ᠡᠨᠡ ᠪᠠᠢᠰᠢᠩ ᠤ᠋ᠨ ᠱᠠᠯᠠ ᠶ᠋ᠢ ᠤᠨᠠᠬᠤ ᠭᠡᠵᠦ ᠰᠢᠷᠡᠭᠡ ᠰᠠᠨᠳᠠᠯᠢ ᠵᠡᠷᠭᠡ ᠪᠦᠬᠦ ᠬᠣᠭᠰᠢᠯ ᠢ᠋ ᠢᠩᠭᠢᠵᠦ ᠣᠪᠣᠭᠠᠯᠠᠪᠠ ᠤᠤ ᠭᠡᠵᠦ ᠰᠠᠨᠠᠭᠳᠠᠮᠠᠷ ᠪᠠᠢᠪᠠ᠃ ᠨᠢᠭᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠪᠳᠡᠷᠬᠡᠢ ᠰᠠᠨᠳᠠᠯᠢ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠳᠡᠷᠭᠡᠳᠡ ᠲᠠᠤᠬᠠᠢ ᠨᠢ ᠵᠣᠭᠰᠣᠴᠢᠬᠠᠭᠰᠠᠨ ᠬᠠᠭᠤᠴᠢᠨ ᠴᠠᠭ ᠲᠠᠯᠪᠢᠭᠠᠲᠠᠢ ᠪᠠᠢᠪᠠ᠃ ᠲᠡᠷᠡ ᠴᠠᠭ ᠤ᠋ᠨ ᠲᠠᠤᠬᠠᠢ ᠠ᠋ᠴᠠ ᠠᠭᠠᠯᠵᠢ ᠰᠢᠯᠦᠰᠦ ᠲᠠᠲᠠᠵᠤ ᠡᠬᠢᠯᠡᠭᠰᠡᠨ ᠬᠠᠷᠠᠭᠳᠠᠨᠠ᠃ ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠮᠥᠩᠭᠥᠨ ᠰᠠᠪᠠ ᠬᠡᠷᠡᠭᠯᠡᠯ᠂ ᠠᠷᠢᠬᠢᠨ ᠤ᠋ ᠯᠣᠩᠬᠣ ᠪᠣᠯᠤᠨ ᠬᠢᠲᠠᠳ ᠱᠠᠵᠠᠩ ᠰᠠᠪᠠ ᠵᠡᠷᠭᠡ ᠶ᠋ᠢ ᠠᠭᠤᠯᠤᠭᠰᠠᠨ ᠬᠣᠷᠭᠣ ᠶ᠋ᠢ ᠰᠢᠷᠡᠭᠡᠨ ᠳᠡᠷᠭᠡᠳᠡ ᠬᠠᠨᠠᠨ ᠳ᠋ᠤ᠌ ᠲᠤᠯᠭᠠᠨ ᠬᠥᠨᠳᠡᠯᠡᠨ ᠲᠠᠯᠪᠢᠵᠠᠢ᠃ ᠮᠥᠨ ᠲᠠᠨᠠ ᠰᠢᠭᠢᠳᠬᠡᠭᠰᠡᠨ ᠰᠢᠷᠡᠭᠡ ᠡᠨᠳᠡ ᠪᠠᠢᠭᠰᠠᠨ ᠪᠥᠭᠡᠳ ᠰᠢᠭᠢᠳᠬᠡᠭᠡ ᠨᠦ᠍ᠭᠦᠳ ᠦ᠋ᠨ ᠵᠠᠷᠢᠮ ᠨᠢ ᠬᠣᠪᠬᠣᠷᠠᠨ ᠤᠨᠠᠵᠤ᠂ ᠰᠠᠭᠤᠷᠢ ᠨᠤᠭᠤᠳ ᠨᠢ ᠬᠣᠩᠬᠣᠢᠯᠳᠤᠨ᠂ ᠴᠠᠪᠠᠤ ᠨᠢ ᠰᠢᠷᠠᠯᠠᠨ ᠦᠵᠡᠭᠳᠡᠨᠡ᠃ ᠡᠨᠡ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠯᠳᠡᠪ ᠶᠠᠭᠤᠮᠠ ᠡᠷᠢᠶᠡᠴᠢᠭᠰᠡᠨ᠂ ᠳᠡᠭᠡᠷᠡ ᠡᠴᠡ ᠨᠢ ᠥᠨᠳᠡᠭᠡᠨ ᠬᠡᠯᠪᠡᠷᠢ ᠶ᠋ᠢᠨ ᠪᠠᠷᠢᠭᠤᠯ ᠲᠠᠢ ᠨᠣᠭᠣᠭᠠᠷᠠᠭᠰᠠᠨ ᠭᠠᠨᠲᠢᠭ ᠳᠠᠷᠤᠪᠴᠢ ᠪᠠᠷ ᠳᠠᠷᠤᠭᠰᠠᠨ᠂ ᠳᠠᠪᠬᠤᠷ ᠳᠠᠪᠬᠤᠷ ᠵᠢᠵᠢᠭ ᠴᠠᠭᠠᠰᠤ᠂ ᠠᠷᠠᠰᠤᠨ ᠬᠠᠪᠲᠠᠰᠤᠲᠠᠢ ᠤᠯᠠᠭᠠᠨ ᠬᠥᠪᠡᠭᠡᠲᠡᠢ ᠡᠷᠲᠡ ᠴᠠᠭ ᠤ᠋ᠨ ᠨᠢᠭᠡ ᠪᠣᠳᠢ ᠨᠣᠮ᠂ ᠣᠢ ᠶ᠋ᠢᠨ ᠬᠤᠰᠢᠭᠠ ᠶ᠋ᠢᠨ ᠴᠢᠨᠡᠭᠡᠨ ᠪᠣᠯᠲᠠᠯᠠ ᠬᠠᠲᠠᠵᠤ ᠬᠣᠷᠴᠢᠢᠭᠰᠠᠨ ᠨᠢᠮᠪᠡᠭᠡ᠂ ᠲᠦᠰᠢᠯᠭᠡᠲᠡᠢ ᠰᠠᠨᠳᠠᠯᠢ ᠶ᠋ᠢᠨ ᠥᠷᠥᠭᠡᠰᠦᠨ ᠲᠦᠰᠢᠪᠴᠢ᠂ ᠳᠣᠲᠣᠷᠠ ᠨᠢ ᠰᠢᠩᠭᠡᠨ ᠤᠯᠠᠭᠠᠨ ᠶᠠᠭᠤᠮᠠ ᠲᠠᠢ᠂ ᠲᠡᠭᠦᠨ ᠳ᠋ᠦ᠍ᠨᠢ ᠭᠤᠷᠪᠠᠨ ᠢᠯᠠᠭᠠ ᠲᠠᠢ᠂ ᠴᠠᠭᠠᠰᠤ ᠪᠠᠷ ᠲᠠᠭᠯᠠᠭᠰᠠᠨ ᠬᠤᠨᠳᠠᠭᠠ᠂ ᠯᠠᠴᠠ ᠶ᠋ᠢᠨ ᠬᠡᠯᠲᠡᠷᠬᠡᠢ᠂ ᠬᠠᠮᠢᠭᠠ ᠠ᠋ᠴᠠ ᠲᠡᠭᠦᠭᠰᠡᠨ ᠢ᠋ ᠪᠤᠤ ᠮᠡᠳᠡ ᠳᠠᠪᠤᠤ ᠶ᠋ᠢᠨ ᠥᠭᠡᠳᠡᠰᠦ ᠨᠦ᠍ᠭᠦᠳ᠂ ᠪᠡᠬᠡᠨ ᠳ᠋ᠦ᠍ ᠵᠢᠭᠤᠷᠠᠯᠳᠤᠨ ᠬᠠᠲᠠᠭᠰᠠᠨ᠂ ᠠᠭᠤᠰᠬᠢᠨ ᠤ᠋ ᠰᠦᠷᠢᠶᠡ ᠪᠡᠷ ᠬᠠᠲᠠᠩᠭᠢᠷ ᠪᠣᠯᠤᠭᠰᠠᠨ ᠬᠥᠮᠦᠨ ᠰᠢᠭ ᠬᠣᠶᠠᠷ ᠥᠲᠥᠨ ᠦᠵᠦᠭ᠂ ᠮᠣᠰᠺᠸᠠ ᠶ᠋ᠢ ᠹᠷᠠᠨᠼᠢᠴᠤᠳ ᠤ᠋ᠨ ᠳᠣᠪᠲᠣᠯᠬᠤ ᠠ᠋ᠴᠠ ᠡᠮᠦᠨᠡ ᠡᠵᠡᠨ ᠬᠥᠮᠦᠨ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ ᠪᠣᠯᠪᠠ ᠤᠤ ᠭᠡᠮᠡᠷ ᠰᠢᠪ ᠰᠢᠷᠠ ᠪᠣᠯᠴᠢᠬᠠᠭᠰᠠᠨ ᠰᠢᠭᠢᠴᠢᠯᠡᠭᠦᠷ ᠵᠡᠷᠭᠡ ᠬᠡᠷᠡᠭ ᠲᠡᠢ ᠬᠡᠷᠡᠭ ᠦᠭᠡᠢ ᠣᠯᠠᠨ ᠶᠠᠭᠤᠮᠠ ᠬᠥᠭᠯᠡᠷᠡᠭᠰᠡᠨ ᠪᠠᠢᠯᠠ᠃
ᠬᠠᠨᠠᠨ ᠳᠡᠭᠡᠭᠦᠷ ᠡᠮᠬᠢ ᠦᠭᠡᠢ ᠰᠢᠬᠠᠴᠠᠯᠳᠤᠭᠤᠯᠤᠨ ᠡᠯᠭᠦᠭᠰᠡᠨ ᠵᠢᠷᠤᠭ ᠤ᠋ᠳ ᠪᠠᠢᠪᠠ᠂ ᠮᠣᠷᠢᠳ ᠢ᠋ᠶ᠋ᠠᠨ ᠤᠰᠤᠨ ᠳ᠋ᠤ᠌ ᠵᠢᠪᠦᠭᠦᠯᠦᠨ ᠬᠠᠰᠬᠢᠷᠤᠯᠳᠤᠨ ᠶᠠᠪᠤᠭᠰᠠᠨ᠂ ᠲᠣᠮᠣ ᠪᠥᠮᠪᠥᠷ ᠦ᠋ᠳ ᠪᠠᠷᠢᠭᠰᠠᠨ᠂ ᠭᠤᠷᠪᠠᠯᠵᠢᠨ ᠮᠠᠯᠠᠭᠠᠢ ᠲᠠᠢ ᠴᠡᠷᠢᠭ ᠦ᠋ᠳ ᠲᠡᠢ ᠶᠠᠮᠠᠷ ᠨᠢᠭᠡᠨ ᠪᠠᠢᠯᠳᠤᠭᠠᠨ ᠢ᠋ ᠬᠠᠷᠠᠭᠤᠯᠤᠭᠰᠠᠨ ᠬᠠᠭᠤᠴᠢᠷᠠᠵᠤ ᠰᠢᠷᠠᠯᠠᠭᠰᠠᠨ ᠰᠡᠢᠯᠦᠮᠡᠯ ᠬᠡᠪ ᠦ᠋ᠨ ᠤᠷᠲᠤ ᠵᠢᠷᠤᠭ ᠢ᠋ ᠬᠦᠷᠡᠯ ᠪᠣᠳᠣᠭ ᠢ᠋ᠶ᠋ᠠᠷ ᠭᠦᠪᠡᠭᠡᠯᠡᠨ ᠳᠥᠷᠪᠡᠨ ᠪᠤᠯᠤᠩ ᠳ᠋ᠤᠨᠢ ᠤᠭᠠᠯᠵᠠ ᠭᠠᠷᠭᠠᠭᠰᠠᠨ᠂ ᠰᠢᠯ ᠦᠭᠡᠢ ᠤᠯᠠᠭᠠᠨ ᠽᠠᠨᠳᠠᠨ ᠮᠣᠳᠣᠨ ᠵᠢᠶᠠᠵᠠᠨ ᠳ᠋ᠤ᠌ ᠰᠠᠭᠤᠯᠭᠠᠭᠰᠠᠨ ᠬᠠᠷᠠᠭᠳᠠᠨᠠ᠃ ᠴᠡᠴᠡᠭ ᠵᠢᠮᠢᠰ᠂ ᠵᠦᠰᠦᠮᠡᠯ ᠲᠠᠷᠪᠤᠰ᠂ ᠵᠡᠷᠯᠢᠭ ᠭᠠᠬᠠᠢ ᠶ᠋ᠢᠨ ᠲᠣᠯᠣᠭᠠᠢ᠂ ᠳᠣᠷᠣᠭᠰᠢ ᠬᠠᠷᠠᠭᠤᠯᠵᠤ ᠡᠯᠭᠦᠭᠰᠡᠨ ᠨᠤᠭᠤᠰᠤ ᠵᠡᠷᠭᠡ ᠶ᠋ᠢ ᠵᠢᠷᠤᠭᠰᠠᠨ ᠲᠣᠰᠣᠨ ᠪᠣᠳᠣᠭ ᠤ᠋ᠨ ᠲᠣᠮᠣ ᠬᠠᠷᠠ ᠵᠢᠷᠤᠭ ᠪᠠᠢᠯᠳᠤᠭᠠᠨ ᠤ᠋ ᠵᠢᠷᠤᠭ ᠤ᠋ᠨ ᠳᠡᠷᠭᠡᠳᠡ ᠪᠠᠷᠤᠭ ᠬᠠᠭᠠᠰ ᠬᠠᠨᠠ ᠡᠵᠡᠯᠡᠵᠡᠢ᠃ ᠶᠣᠷᠣᠭ ᠢ᠋ᠶ᠋ᠠᠷ ᠣᠷᠢᠶᠠᠭᠰᠠᠨ᠂ ᠲᠣᠭᠣᠰᠣᠨ ᠳ᠋ᠤ᠌ ᠳᠠᠷᠤᠭᠳᠠᠵᠤ ᠬᠦᠷᠢ ᠶ᠋ᠢᠨ ᠡᠭᠦᠷ ᠦ᠋ᠨ ᠥᠩᠭᠡᠲᠡᠢ ᠪᠣᠯᠤᠭᠰᠠᠨ ᠯᠠ ᠶ᠋ᠢᠨ ᠲᠠᠯᠪᠢᠭᠤᠷ ᠶᠠᠭ ᠲᠠᠭᠠᠵᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠡᠯᠭᠦᠭᠡᠲᠡᠢ ᠪᠠᠢᠯᠠ᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠠᠢᠬᠤ ᠡᠷᠬᠡ ᠦᠭᠡᠢ ᠡᠯᠳᠡᠪ ᠮᠤᠤᠰᠠᠢᠨ ᠶᠠᠭᠤᠮᠠ ᠥᠷᠥᠭᠡᠨ ᠦ᠌ ᠨᠢᠭᠡ ᠪᠤᠯᠤᠩ ᠳ᠋ᠤ᠌ ᠣᠪᠣᠭᠠᠯᠠᠭᠠᠰᠤᠲᠠᠢ ᠬᠠᠷᠠᠭᠳᠠᠨᠠ᠃ ᠲᠡᠳᠡᠭᠡᠷ ᠦ᠋ᠨ ᠶᠠᠭᠤ ᠪᠣᠯᠬᠤ ᠶ᠋ᠢ ᠲᠠᠨᠢᠬᠤᠶᠠ ᠪᠡᠷᠬᠡ ᠠᠵᠢ᠂ ᠤᠴᠢᠷ ᠨᠢ ᠡᠨᠡ ᠪᠦᠬᠦᠨ ᠳᠡᠭᠡᠷᠡ ᠤᠴᠢᠷ ᠦᠭᠡᠢ ᠵᠤᠵᠠᠭᠠᠨ ᠲᠣᠭᠣᠰᠣ ᠲᠣᠷᠲᠣᠭ ᠰᠠᠭᠤᠵᠤ᠂ ᠭᠠᠷ ᠬᠦᠷᠪᠡᠯ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠶᠠᠭ ᠲᠠᠪᠤᠨ ᠬᠤᠷᠤᠭᠤ ᠲᠠᠢ ᠬᠠᠷᠠ ᠪᠡᠭᠡᠯᠡᠢ ᠰᠢᠭ ᠪᠣᠯᠬᠤ ᠪᠠᠢᠯᠠ᠃ ᠡᠨᠡ ᠣᠪᠣᠭᠠᠯᠠᠭᠠᠲᠠᠢ ᠬᠣᠭ ᠳᠣᠲᠣᠷᠠ ᠠ᠋ᠴᠠ ᠮᠣᠳᠣᠨ ᠬᠦᠷᠵᠡ ᠶ᠋ᠢᠨ ᠬᠤᠭᠤᠷᠬᠠᠢ᠂ ᠬᠠᠭᠤᠴᠢᠨ ᠰᠠᠪᠢᠬᠢᠨ ᠭᠤᠲᠤᠯ ᠤ᠋ᠨ ᠥᠰᠥᠭᠡᠢ ᠯᠡ ᠲᠣᠳᠣ ᠬᠠᠷᠠᠭᠳᠠᠨᠠ᠃ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠪᠠᠢᠭᠠ ᠤᠨᠲᠠᠬᠤ ᠳ᠋ᠤ᠌ ᠡᠮᠦᠰᠳᠡᠭ ᠬᠠᠭᠤᠴᠢᠨ ᠮᠠᠯᠠᠭᠠᠢ ᠡᠨᠳᠡ ᠬᠥᠮᠦᠨ ᠠᠮᠢᠲᠠᠨ ᠪᠠᠢᠭᠠ ᠶ᠋ᠢᠨ ᠲᠡᠮᠳᠡᠭ ᠪᠣᠯᠵᠤ ᠪᠠᠢᠭᠰᠠᠨ ᠦᠭᠡᠢ ᠪᠣᠯ ᠡᠨᠡ ᠥᠷᠥᠭᠡ ᠶ᠋ᠢ ᠬᠥᠮᠦᠨ ᠰᠠᠭᠤᠳᠠᠭ ᠭᠠᠵᠠᠷ ᠭᠡᠵᠦ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠣᠳᠣᠮᠠᠷ ᠦᠭᠡᠢ ᠪᠠᠢᠪᠠ᠃
ᠴᠢᠴᠢᠺᠦᠧ ᠡᠨᠳᠡᠬᠢ ᠶᠠᠭᠤᠮᠠ ᠶ᠋ᠢ ᠭᠠᠢᠬᠠᠨ ᠬᠠᠷᠠᠵᠤ ᠠᠵᠢᠭᠯᠠᠨ ᠰᠠᠭᠤᠲᠠᠯᠠ ᠬᠠᠵᠠᠭᠤ ᠲᠠᠯᠠ ᠶ᠋ᠢᠨ ᠬᠠᠭᠠᠯᠭᠠ ᠣᠩᠭᠣᠢᠵᠤ᠂ ᠲᠦᠷᠦᠭᠦᠬᠡᠨ ᠬᠠᠰᠢᠶᠠᠨ ᠳᠣᠲᠣᠷᠠ ᠲᠠᠭᠠᠷᠠᠯᠳᠤᠭᠰᠠᠨ ᠨᠢᠷᠪᠠ ᠡᠮᠡᠭᠲᠡᠢ ᠣᠷᠣᠵᠤ ᠢᠷᠡᠯᠡ᠃ ᠴᠢᠴᠢᠺᠦᠧ ᠡᠨᠡ ᠬᠥᠮᠦᠨ ᠢ᠋ ᠬᠠᠷᠠᠬᠤ ᠲᠠᠢ ᠪᠠᠨ ᠵᠡᠷᠭᠡ᠂ ᠦᠭᠡᠢ ᠡᠨᠡ ᠴᠢᠨᠢ ᠡᠮᠡᠭᠲᠡᠢ ᠪᠢᠰᠢ ᠡᠷᠡᠭᠲᠡᠢ ᠨᠢᠷᠪᠠ ᠪᠠᠢᠬᠤ ᠰᠢᠪ᠃ ᠡᠨᠡ ᠨᠢᠷᠪᠠ ᠡᠮᠡᠭᠲᠡᠢ ᠬᠥᠮᠦᠨ ᠪᠠᠢᠭᠰᠠᠨ ᠪᠣᠯ ᠶᠠᠳᠠᠬᠤ ᠳ᠋ᠠᠭᠠᠨ ᠬᠤᠰᠤᠬᠤ ᠰᠠᠬᠠᠯ ᠦᠭᠡᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠭᠡᠲᠡᠯᠡ ᠡᠨᠡ ᠴᠢᠨᠢ ᠰᠠᠬᠠᠯ ᠢ᠋ᠶ᠋ᠠᠨ ᠬᠤᠰᠤᠳᠠᠭ ᠶᠤᠮ ᠰᠢᠭ᠋ ᠪᠠᠢᠨᠠ᠃ ᠬᠠᠷᠢᠨ ᠲᠡᠭᠡᠬᠦ ᠳ᠋ᠡᠭᠡᠨ ᠶᠡᠬᠡ ᠯᠡ ᠤᠳᠠᠵᠤ ᠬᠤᠰᠤᠳᠠᠭ ᠨᠢ ᠢᠯᠡ ᠪᠠᠢᠨᠠ᠃ ᠶᠠᠭᠠᠬᠢᠭᠠᠳ ᠪᠣᠢ ᠭᠡᠪᠡᠯ ᠬᠠᠴᠠᠷ ᠤ᠋ᠨ ᠳᠣᠣᠷᠠᠲᠤ ᠬᠡᠰᠡᠭ ᠨᠢ ᠵᠦᠴᠢᠶᠡᠨ ᠳ᠋ᠦ᠍ ᠡᠯᠭᠦᠭᠡᠰᠦᠲᠡᠢ ᠪᠠᠢᠳᠠᠭ ᠮᠣᠷᠢᠨ ᠤ᠋ ᠲᠡᠮᠦᠷ ᠱᠤᠸᠠᠵᠠ ᠰᠢᠭ᠋ ᠠᠷᠵᠠᠢᠴᠢᠬᠠᠭᠰᠠᠨ ᠪᠠᠢᠨᠠ ᠭᠡᠵᠦ ᠴᠢᠴᠢᠺᠦᠧ ᠪᠣᠳᠣᠭᠠᠳ ᠭᠠᠢᠬᠠᠭᠰᠠᠨ ᠤ᠋ ᠲᠡᠮᠳᠡᠭ ᠴᠢᠷᠠᠢ ᠳ᠋ᠤᠨᠢ ᠢᠯᠡᠷᠡᠨ᠂ ᠲᠡᠷᠡ ᠬᠥᠮᠦᠨ ᠢ᠋ ᠶᠠᠭᠤ ᠭᠡᠵᠦ ᠬᠡᠯᠡᠳᠡᠭ ᠪᠣᠯ ᠭᠡᠵᠦ ᠬᠦᠯᠢᠶᠡᠵᠦ ᠪᠠᠢᠯᠠ᠃ ᠲᠡᠷᠡ ᠬᠥᠮᠦᠨ ᠪᠠᠰᠠ ᠴᠢᠴᠢᠺᠦᠧ ᠶ᠋ᠢᠨ ᠶᠠᠭᠤ ᠬᠡᠯᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠪᠠ᠃ ᠴᠢᠴᠢᠺᠦᠧ ᠡᠢᠮᠦ ᠬᠠᠴᠢᠨ ᠬᠥᠮᠦᠨ ᠢ᠋ ᠭᠠᠢᠬᠠᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠵᠣᠷᠢᠭᠯᠠᠵᠤ:
《ᠲᠠᠨᠠᠢ ᠨᠣᠶᠠᠨᠲᠠᠨ ᠶᠠᠭᠠᠬᠢᠭᠰᠠᠨ ᠪᠣᠢ? ᠥᠷᠥᠭᠡᠨ ᠳ᠋ᠡᠭᠡᠨ ᠪᠣᠢ ᠤᠤ?》 ᠭᠡᠵᠦ ᠠᠰᠠᠭᠤᠯᠠ᠃
《ᠡᠵᠡᠨ ᠡᠨᠳᠡ ᠪᠣᠢ!》 ᠭᠡᠵᠦ ᠡᠷᠡᠭᠲᠡᠢ ᠨᠢᠷᠪᠠ ᠬᠠᠷᠢᠭᠤᠯᠪᠠ᠃
《ᠬᠠᠮᠢᠭᠠ ᠪᠠᠢᠨᠠ?》 ᠭᠡᠵᠦ ᠴᠢᠴᠢᠺᠦᠧ ᠠᠰᠠᠭᠤᠬᠤ ᠳ᠋ᠤ᠌:
《ᠡᠷᠬᠢᠮ ᠮᠢᠨᠢ᠂ ᠲᠠ ᠰᠣᠬᠣᠷ ᠶᠤᠮ ᠤᠤ ᠳᠠ ? ᠡᠵᠡᠨ ᠬᠥᠮᠦᠨ ᠪᠢ ᠪᠠᠢᠨᠠ》 ᠭᠡᠵᠦ ᠡᠷᠡᠭᠲᠡᠢ ᠨᠢᠷᠪᠠ ᠬᠠᠷᠢᠭᠤᠯᠪᠠ᠃
ᠮᠠᠨᠠᠢ ᠵᠣᠬᠢᠶᠠᠯ ᠤ᠋ᠨ ᠪᠠᠭᠠᠲᠤᠷ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠬᠤ ᠲᠠᠢ ᠪᠠᠨ ᠵᠡᠷᠭᠡ ᠡᠷᠬᠡ ᠦᠭᠡᠢ ᠭᠡᠳᠡᠷᠭᠦ ᠤᠬᠤᠷᠢᠵᠤ᠂ ᠲᠡᠷᠡ ᠬᠥᠮᠦᠨ ᠢ᠋ ᠰᠠᠢᠲᠤᠷ ᠰᠢᠷᠲᠡᠨ ᠬᠠᠷᠠᠯᠠ᠃ ᠴᠢᠴᠢᠺᠦᠧ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠥᠮᠦᠨ ᠢ᠋ ᠦᠵᠡᠵᠦ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠤᠩᠰᠢᠭᠴᠢᠳ ᠲᠠ ᠪᠢᠳᠡᠨ ᠦ᠌ ᠶᠡᠷᠦ ᠦᠵᠡᠭᠡᠳᠦᠢ ᠡᠯᠳᠡᠪ ᠬᠥᠮᠦᠨ ᠢ᠋ ᠦᠵᠡᠵᠦ ᠬᠠᠷᠠᠵᠤ ᠶᠠᠪᠤᠭᠰᠠᠨ ᠪᠣᠯᠪᠠᠴᠤ ᠡᠨᠡ ᠮᠡᠲᠦ ᠬᠥᠮᠦᠨ ᠢ᠋ ᠶᠡᠷᠦ ᠬᠠᠷᠠᠭᠠᠳᠤᠢ ᠶᠤᠮ᠃ ᠡᠨᠡ ᠬᠥᠮᠦᠨ ᠦ᠌ ᠴᠢᠷᠠᠢ ᠨᠢ ᠶᠡᠷᠦ ᠶ᠋ᠢᠨ ᠲᠤᠷᠠᠩᠬᠠᠢ ᠡᠪᠦᠭᠡᠳ ᠦ᠋ᠨ ᠴᠢᠷᠠᠢ ᠠ᠋ᠴᠠ ᠢᠯᠭᠠᠭᠳᠠᠬᠤ ᠣᠨᠴᠠ ᠶ᠋ᠢᠨ ᠰᠢᠨᠵᠢ ᠲᠡᠮᠳᠡᠭ ᠦᠭᠡᠢ ᠪᠣᠯᠪᠠᠴᠤ ᠬᠡᠲᠦᠷᠬᠡᠢ ᠡᠮᠰᠡᠭᠡᠷ ᠦ᠋ᠨ ᠤᠯᠠᠮ ᠠ᠋ᠴᠠ ᠳᠤᠤᠭᠠᠷᠬᠤ ᠳ᠋ᠠᠭᠠᠨ ᠬᠥᠮᠦᠨ ᠥᠭᠡᠳᠡ ᠰᠢᠯᠦᠰᠦ ᠪᠡᠨ ᠥᠰᠥᠷᠬᠡᠬᠦ ᠦᠭᠡᠢ ᠭᠡᠵᠦ ᠠᠮᠠ ᠪᠠᠨ ᠦᠷᠭᠦᠯᠵᠢᠳᠡ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠲᠠᠭᠯᠠᠵᠤ ᠶᠠᠪᠤᠳᠠᠭ ᠠᠵᠢ᠃ ᠭᠦᠨ ᠨᠦᠬᠡᠨ ᠡᠴᠡ ᠨᠠᠷᠢᠬᠠᠨ ᠬᠣᠩᠰᠢᠶᠠᠷ ᠴᠤᠬᠤᠢᠯᠭᠠᠵᠤ᠂ ᠡᠨᠳᠡ ᠮᠤᠤᠷ᠂ ᠳᠦᠷᠰᠦᠭᠦᠢ ᠬᠡᠦᠬᠡᠳ ᠬᠣᠷᠭᠣᠳᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠭᠡᠵᠦ ᠪᠣᠯᠭᠣᠮᠵᠢᠯᠠᠨ᠂ ᠴᠢᠬᠢ ᠪᠡᠨ ᠰᠡᠷᠲᠡᠢᠯᠭᠡᠨ ᠰᠠᠬᠠᠯ ᠢ᠋ᠶ᠋ᠠᠨ ᠬᠥᠳᠡᠯᠭᠡᠨ᠂ ᠳᠠᠢᠰᠤᠨ ᠤ᠋ ᠦᠨᠦᠷ ᠠᠪᠬᠤ ᠶ᠋ᠢ ᠤᠷᠤᠯᠳᠤᠵᠤ ᠪᠠᠢᠭᠠ ᠬᠤᠯᠤᠭᠠᠨᠠ ᠶ᠋ᠢᠨ ᠨᠢᠳᠦ ᠰᠢᠭ ᠬᠠᠷᠠᠴᠠᠲᠠᠢ ᠵᠢᠭᠠᠯᠬᠠᠨ ᠬᠣᠶᠠᠷ ᠨᠢᠳᠦ ᠨᠢ ᠥᠳᠬᠡᠨ ᠬᠥᠮᠦᠰᠬᠡᠨ ᠳᠣᠲᠣᠷᠠ ᠠ᠋ᠴᠠ ᠴᠣᠭᠲᠠᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠠᠭᠳᠠᠨᠠ᠃ ᠲᠡᠭᠦᠨ ᠦ᠌ ᠬᠤᠪᠴᠠᠰᠤ ᠨᠢ ᠪᠦᠷ ᠴᠦ᠍ ᠰᠣᠨᠢᠨ ᠪᠠᠢᠯᠠ᠃ ᠡᠩᠭᠡᠷ ᠵᠠᠭᠠᠮᠠ᠂ ᠬᠣᠶᠠᠷ ᠬᠠᠨᠴᠤᠢ ᠨᠢ ᠭᠤᠲᠤᠯ ᠤ᠋ᠨ ᠵᠤᠵᠠᠭᠠᠨ ᠪᠤᠯᠢᠭᠠᠷᠢ ᠰᠢᠭ᠋ ᠪᠣᠯᠤᠨ ᠬᠠᠷᠠᠯᠠᠨ ᠭᠢᠯᠲᠠᠭᠠᠨᠠᠵᠤ᠂ ᠡᠨᠡ ᠳᠡᠪᠡᠯ ᠢ᠋ ᠶᠠᠮᠠᠷ ᠡᠳ᠋ ᠢ᠋ᠶ᠋ᠡᠷ ᠣᠶᠣᠭᠰᠠᠨ ᠢ᠋ ᠮᠡᠳᠡᠬᠦ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃ ᠠᠷᠤ ᠶ᠋ᠢᠨ ᠬᠣᠶᠠᠷ ᠬᠣᠷᠮᠣᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠳᠥᠷᠪᠡᠨ ᠬᠣᠷᠮᠣᠢ ᠤᠨᠵᠢᠭᠢᠨᠠᠵᠤ ᠲᠡᠭᠦᠨ ᠡᠴᠡ ᠪᠥᠭᠡᠮ ᠬᠥᠪᠥᠩ ᠴᠤᠬᠤᠢᠨᠠ᠃ ᠡᠨᠡ ᠬᠥᠮᠦᠨ ᠣᠢᠮᠣᠰᠤ ᠶᠤᠮ ᠤᠤ᠂ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠶ᠋ᠢᠨ ᠰᠣᠢᠯᠲᠠ ᠶᠤᠮ ᠤᠤ᠂ ᠡᠰᠡᠬᠦᠯᠡ ᠪᠡᠯᠭᠡᠭᠦᠪᠴᠢ ᠶᠦᠮ ᠤᠤ ᠭᠡᠮᠡᠷ ᠶᠠᠭᠤᠮᠠ ᠶ᠋ᠢ ᠬᠦᠵᠦᠭᠦᠨ ᠳ᠋ᠡᠭᠡᠨ ᠡᠯᠭᠦᠭᠰᠡᠨ ᠨᠢ ᠯᠠᠪ ᠯᠠ ᠪᠦᠴᠡ ᠵᠠᠩᠭᠢᠶᠠ ᠪᠢᠰᠢ ᠪᠠᠢᠬᠤ᠃ ᠬᠡᠷᠪᠡ ᠴᠢᠴᠢᠺᠦᠧ ᠡᠢᠮᠦ ᠬᠣᠪᠴᠠᠰᠤᠲᠠᠢ ᠬᠥᠮᠦᠨ ᠢ᠋ ᠶᠠᠮᠠᠷ ᠨᠢᠭᠡᠨ ᠰᠦᠮᠡ ᠶ᠋ᠢᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠬᠠᠷᠠᠭᠰᠠᠨ ᠪᠣᠯ ᠲᠡᠭᠦᠨ ᠳ᠋ᠦ᠍ ᠯᠠᠪ ᠬᠣᠶᠠᠷ ᠺᠤᠫᠸᠢᠺᠠ ᠵᠣᠭᠣᠰ ᠥᠭᠭᠦ ᠶᠦᠮ᠃ ᠴᠢᠴᠢᠺᠦᠧ ᠶᠠᠳᠠᠭᠤ ᠬᠥᠮᠦᠨ ᠢ᠋ ᠬᠠᠷᠠᠬᠤ ᠳ᠋ᠠᠭᠠᠨ ᠬᠣᠶᠠᠷ ᠺᠤᠫᠸᠢᠺᠠ ᠥᠭᠭᠦᠯ ᠦᠭᠡᠢ ᠥᠩᠭᠡᠷᠡᠳᠡᠭ ᠦᠭᠡᠢ ᠰᠠᠢᠨ ᠰᠠᠨᠠᠭᠠᠲᠠᠢ ᠬᠥᠮᠦᠨ ᠪᠠᠢᠵᠠᠢ᠃ ᠭᠡᠲᠡᠯᠡ ᠣᠳᠣ ᠤᠷᠲᠤ ᠨᠢ ᠭᠤᠢᠯᠢᠨᠴᠢᠨ ᠪᠢᠰᠢ᠂ ᠮᠢᠩᠭᠠ ᠭᠠᠷᠤᠢ ᠠᠯᠪᠠᠲᠤ ᠶ᠋ᠢᠨ ᠰᠦᠨᠡᠰᠦ ᠶ᠋ᠢ ᠭᠠᠷ ᠲᠠᠭᠠᠨ ᠠᠳᠬᠤᠭᠰᠠᠨ ᠭᠠᠵᠠᠷ ᠤ᠋ᠨ ᠡᠵᠡᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠡᠨᠡ ᠠᠢᠯ ᠤ᠋ᠨ ᠬᠠᠳᠠᠭᠠᠯᠠᠭᠰᠠᠨ᠂ ᠴᠠᠢᠯᠭᠠᠭᠰᠠᠨ ᠴᠠᠢᠯᠭᠠᠭᠠᠳᠤᠢ ᠦᠷᠡ ᠲᠠᠷᠢᠶᠠ ᠰᠢᠭ᠋ ᠶᠡᠬᠡ ᠦᠷᠡ ᠲᠠᠷᠢᠶᠠ ᠬᠠᠳᠠᠭᠠᠯᠠᠵᠤ ᠪᠠᠢᠳᠠᠭ ᠪᠠᠶᠠᠨ ᠬᠥᠮᠦᠨ ᠡᠨᠡ ᠬᠠᠪᠢ ᠳ᠋ᠤ᠌ ᠪᠠᠢᠬᠤ ᠦᠭᠡᠢ ᠶᠦᠮ᠃ ᠡᠨᠡ ᠬᠥᠮᠦᠨ ᠦ᠌ ᠬᠣᠷᠢᠶᠠᠨ ᠳᠠᠷᠤᠵᠤ ᠪᠠᠢᠭᠠ ᠲᠠᠢ ᠠᠳᠠᠯᠢ᠂ ᠶᠣᠷᠣᠭ᠂ ᠴᠡᠮᠪᠡ᠂ ᠡᠳ᠋ᠯᠡᠭᠰᠡᠨ ᠡᠳ᠋ᠯᠡᠭᠡᠳᠦᠢ ᠨᠡᠬᠡᠢ᠂ ᠪᠣᠷᠴᠠᠯᠠᠭᠰᠠᠨ ᠵᠢᠭᠠᠰᠤ᠂ ᠨᠣᠭᠣᠭᠠ ᠵᠢᠮᠢᠰ ᠵᠡᠷᠭᠡ ᠶ᠋ᠢᠨ ᠢᠳᠡᠰᠢ ᠤᠤᠭᠤᠰᠢ ᠶ᠋ᠢᠨ ᠡᠯᠳᠡᠪ ᠶᠠᠭᠤᠮᠠ ᠪᠠᠷ ᠳᠦᠭᠦᠷᠦᠭᠰᠡᠨ ᠰᠠᠩ ᠬᠥᠮᠥᠷᠭᠡ ᠲᠡᠢ ᠬᠥᠮᠦᠨ ᠪᠠᠢᠬᠤ ᠦᠭᠡᠢ᠃ ᠬᠡᠨ ᠬᠥᠮᠦᠨ ᠡᠨᠡ ᠠᠢᠯ ᠤ᠋ᠨ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠮᠣᠳᠣᠨ ᠮᠠᠲ᠋ᠧᠷᠢᠶᠠᠯ ᠪᠠ ᠬᠡᠷᠡᠭᠯᠡᠭᠡ ᠦᠭᠡᠢ ᠰᠠᠪᠠ ᠰᠠᠭᠠᠯᠢ ᠬᠣᠷᠢᠶᠠᠨ ᠣᠪᠣᠭᠠᠯᠠᠭᠰᠠᠨ ᠬᠠᠰᠢᠶᠠ ᠤᠷᠤᠭᠤ ᠬᠠᠷᠠᠪᠠᠯ ᠬᠥᠩᠭᠡᠨ ᠬᠥᠯ ᠲᠡᠢ᠂ ᠬᠠᠳᠠᠮ ᠡᠬᠡ ᠡᠭᠡᠴᠢ ᠨᠠᠷ ᠡᠳᠦᠷ ᠪᠦᠷᠢ ᠲᠣᠭᠣᠭᠠᠴᠢ ᠨᠠᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ ᠣᠴᠢᠳᠠᠭ ᠮᠣᠰᠺᠸᠠ ᠶ᠋ᠢᠨ ᠨᠢᠭᠡ ᠮᠣᠳᠣᠨ ᠰᠠᠪᠠ ᠰᠠᠭᠠᠯᠢ ᠶ᠋ᠢᠨ ᠵᠠᠬᠠ ᠳᠡᠯᠭᠡᠭᠦᠷ ᠲᠦ᠍ ᠢᠷᠡᠴᠢᠬᠡᠭᠰᠡᠨ ᠶᠦᠮ ᠤᠤ ᠭᠡᠵᠦ ᠰᠠᠨᠠᠭᠳᠠᠨᠠ᠃ ᠡᠨᠳᠡ ᠬᠠᠷᠠᠭᠳᠠᠬᠤ ᠨᠢ ᠰᠡᠢᠯᠵᠦ᠂ ᠤᠬᠤᠵᠤ᠂ ᠵᠤᠷᠠᠵᠤ᠂ ᠬᠦᠷᠦᠵᠦ ᠬᠢᠭᠰᠡᠨ ᠮᠣᠳᠣᠨ ᠰᠠᠪᠠ ᠰᠠᠭᠠᠯᠢ ᠶᠤᠮ᠂ ᠡᠭᠦᠨ ᠦ᠌ ᠳᠣᠲᠣᠷᠠ᠂ ᠪᠠᠷᠢᠭᠤᠯᠲᠠᠢ ᠪᠠᠷᠢᠭᠤᠯ ᠦᠭᠡᠢ ᠬᠠᠪᠴᠢᠭ᠂ ᠪᠣᠷᠲᠣᠭᠣ᠂ ᠴᠣᠷᠭᠣ ᠲᠠᠢ ᠴᠣᠷᠭᠣ ᠦᠭᠡᠢ ᠳᠡᠪᠦᠷᠡ᠂ ᠤᠬᠢᠶᠠᠯᠭᠠ ᠶ᠋ᠢᠨ ᠲᠦᠩᠫᠧᠩ᠂ ᠳᠣᠷᠣᠰᠤᠨ ᠰᠠᠭᠰᠤ᠂ ᠡᠬᠡᠨᠡᠷ ᠬᠡᠦᠬᠡᠨᠴᠦᠳ ᠶᠠᠭᠤᠮᠠ ᠳᠡᠪᠲᠦᠭᠡᠳᠡᠭ ᠮᠣᠳᠣᠨ ᠰᠠᠪᠠ᠂ ᠨᠠᠷᠢᠬᠠᠨ ᠤᠯᠢᠶᠠᠰᠤ ᠪᠠᠷ ᠬᠦᠷᠦᠭᠰᠡᠨ ᠬᠠᠢᠷᠴᠠᠭ᠂ ᠦᠢᠰᠦ ᠪᠡᠷ ᠬᠦᠷᠦᠭᠰᠡᠨ ᠰᠠᠭᠰᠤ ᠵᠡᠷᠭᠡ ᠪᠠᠶᠠᠨ ᠶᠠᠳᠠᠭᠤ ᠣᠷᠣᠰ ᠬᠥᠮᠦᠰ ᠲᠦ᠍ ᠴᠢᠬᠤᠯᠠ ᠬᠡᠷᠡᠭᠴᠡᠭᠡᠲᠡᠢ ᠵᠦᠢᠯ ᠦ᠋ᠳ ᠪᠠᠢᠯᠠ᠃ ᠡᠢᠮᠦ ᠲᠣᠭᠠ ᠲᠣᠮᠰᠢ ᠦᠭᠡᠢ ᠡᠳ᠋ ᠬᠥᠷᠥᠩᠭᠡ ᠲᠡᠢ ᠫᠯᠶᠦ᠋ᠱᠺᠢᠨ ᠳ᠋ᠦ᠍ ᠳᠠᠬᠢᠭᠠᠳ ᠶᠠᠭᠤ ᠬᠡᠷᠡᠭ ᠲᠡᠢ ᠪᠣᠢ? ᠡᠳ᠋ᠯᠡᠩ ᠨᠢ ᠳᠠᠬᠢᠨ ᠨᠢᠭᠡ ᠨᠡᠮᠡᠭᠳᠡᠭᠰᠡᠨ ᠴᠦ᠍᠂ ᠬᠡᠳᠦᠨ ᠦᠶᠡ ᠵᠠᠯᠭᠠᠮᠵᠢᠯᠠᠭᠰᠠᠨ ᠴᠤ᠌ ᠡᠳ᠋ ᠬᠡᠷᠡᠭᠯᠡᠯ ᠢ᠋ ᠵᠠᠷᠤᠵᠤ ᠪᠠᠷᠠᠬᠤ ᠦᠭᠡᠢ ᠪᠣᠯᠪᠠᠴᠤ᠂ ᠡᠨᠡ ᠪᠦᠬᠦ ᠬᠣᠭᠰᠢᠯ ᠬᠥᠷᠥᠩᠭᠡ ᠳ᠋ᠡᠭᠡᠨ ᠰᠡᠳᠬᠢᠯ ᠬᠠᠩᠬᠤ ᠦᠭᠡᠢ᠂ ᠡᠳᠦᠷ ᠪᠦᠷᠢ ᠬᠠᠷᠢᠶᠠᠲᠤ ᠲᠣᠰᠬᠣᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠡᠰᠦᠵᠦ᠂ ᠭᠦᠦᠷ ᠮᠦᠦᠷ ᠵᠡᠷᠭᠡ ᠶ᠋ᠢᠨ ᠳᠣᠭᠤᠤᠷ ᠱᠠᠭᠠᠢᠵᠤ᠂ ᠬᠠᠭᠤᠴᠢᠨ ᠭᠤᠲᠤᠯ ᠤ᠋ᠨ ᠤᠯᠠ᠂ ᠳᠠᠪᠤᠤ ᠶ᠋ᠢᠨ ᠥᠭᠡᠳᠡᠰᠦ᠂ ᠬᠠᠳᠠᠭᠠᠰᠤ᠂ ᠸᠠᠭᠠᠷ ᠱᠠᠵᠠᠩ ᠤ᠋ᠨ ᠬᠠᠭᠠᠷᠬᠠᠢ ᠵᠡᠷᠭᠡ ᠶᠡᠷᠦ ᠨᠢ ᠳᠠᠭᠠᠷᠢᠯᠳᠤᠭᠰᠠᠨ ᠪᠦᠬᠦᠨ ᠢ᠋ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ᠂ ᠲᠦᠷᠦᠭᠦᠦ ᠴᠢᠴᠢᠺᠦᠧ ᠶ᠋ᠢᠨ ᠬᠠᠷᠠᠭᠰᠠᠨ ᠲᠠᠰᠤᠯᠭᠠ ᠶ᠋ᠢᠨ ᠪᠤᠯᠤᠩ ᠳ᠋ᠤ᠌ ᠣᠪᠣᠭᠠᠯᠠᠳᠠᠭ ᠪᠠᠢᠯᠠ᠃ ᠶᠠᠭᠤᠮᠠ ᠡᠷᠢᠵᠦ ᠶᠠᠪᠤᠭᠠ ᠫᠯᠶᠦ᠋ᠱᠺᠢᠨ ᠢ᠋ ᠲᠠᠷᠢᠶᠠᠴᠢᠳ ᠬᠠᠷᠠᠬᠤ ᠳ᠋ᠠᠭᠠᠨ 《ᠴᠡᠪᠡᠷᠯᠡᠭᠴᠢ ᠮᠠᠨᠢ ᠵᠡᠭᠡᠯᠢ ᠪᠡᠨ ᠱᠦᠭᠦᠷᠳᠡᠬᠦ ᠪᠡᠷ ᠭᠠᠷᠤᠯᠠ》 ᠭᠡᠵᠦ ᠶᠠᠷᠢᠯᠴᠠᠨᠠ᠃ ᠫᠯᠶᠦ᠋ᠱᠺᠢᠨ ᠦ᠌ ᠶᠠᠪᠤᠵᠤ ᠥᠩᠭᠡᠷᠡᠭᠰᠡᠨ ᠬᠣᠢᠨᠠ ᠭᠤᠳᠤᠮᠵᠢᠨ ᠤ᠋ ᠬᠣᠭ ᠨᠣᠪᠰᠢ ᠶ᠋ᠢ ᠱᠦᠭᠦᠷᠳᠡᠬᠦ ᠶᠠᠪᠤᠳᠠᠯ ᠦᠨᠡᠨ ᠳ᠋ᠡᠭᠡᠨ ᠭᠠᠷᠳᠠᠭ ᠦᠭᠡᠢ ᠪᠠᠢᠪᠠ᠃ ᠠᠶᠠᠨ ᠵᠠᠮ ᠢ᠋ᠶ᠋ᠠᠷ ᠶᠠᠪᠤᠭᠠ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠭᠤᠲᠤᠯ ᠤ᠋ᠨ ᠳᠠᠷᠤᠪᠴᠢ ᠪᠠᠨ ᠭᠡᠭᠡᠭᠰᠡᠨ ᠢ᠋ ᠮᠡᠳᠡᠬᠦ ᠲᠡᠢ ᠵᠡᠷᠭᠡ ᠯᠡ ᠲᠡᠷᠡ ᠨᠢ ᠥᠨᠥᠬᠢ ᠣᠪᠣᠭᠠᠯᠠᠭᠠᠲᠠᠢ ᠶᠠᠭᠤᠮᠠᠨ ᠳ᠋ᠤ᠌ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠣᠷᠣᠳᠠᠭ ᠪᠠᠢᠯᠠ᠃ ᠤᠰᠤᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠡᠮᠡᠭᠲᠡᠢ᠂ ᠬᠤᠳᠳᠤᠭ ᠳᠡᠭᠡᠷᠡ ᠰᠠᠭᠠᠲᠠᠵᠤ ᠥᠭᠡᠷᠡ ᠶᠠᠭᠤᠮᠠ ᠬᠠᠷᠠᠭᠠᠳ ᠲᠦᠷ ᠵᠠᠭᠤᠷᠠ ᠰᠡᠳᠬᠢᠯ ᠠᠯᠭᠠᠰᠠᠪᠠᠯ᠂ ᠫᠯᠶᠦ᠋ᠱᠺᠢᠨ ᠲᠡᠷᠡ ᠡᠮᠡᠭᠲᠡᠢ ᠶ᠋ᠢᠨ ᠬᠤᠪᠢᠩ ᠢ᠋ ᠰᠡᠮᠬᠡᠨ ᠠᠪᠤᠭᠠᠳ ᠶᠠᠪᠤᠳᠠᠭ ᠪᠠᠢᠵᠠᠢ᠃ ᠬᠠᠷᠢᠨ ᠶᠠᠭᠤᠮᠠ ᠪᠠᠨ ᠳᠣᠣᠷᠠ ᠨᠢ ᠦᠭᠡᠢᠯᠡᠵᠦ᠂ ᠫᠯᠶᠦ᠋ᠱᠺᠢᠨ ᠦ᠌ ᠬᠤᠯᠠᠭᠠᠢᠯᠠᠭᠰᠠᠨ ᠢ᠋ ᠢᠯᠡᠴᠢᠯᠡᠪᠡᠯ ᠲᠡᠭᠦᠨ ᠢ᠋ ᠦᠭᠡ ᠳᠠᠭᠤ ᠦᠭᠡᠢ ᠪᠤᠴᠠᠭᠠᠵᠤ ᠥᠭᠳᠡᠭ ᠪᠣᠯᠪᠠᠴᠤ ᠬᠡᠷᠪᠡ ᠲᠡᠭᠦᠨ ᠢ᠋ᠶ᠋ᠡᠨ ᠥᠨᠥᠬᠢ ᠣᠪᠣᠭᠠᠯᠠᠭᠰᠠᠨ ᠬᠣᠭ ᠨᠣᠪᠰᠢ ᠳ᠋ᠠᠭᠠᠨ ᠠᠪᠠᠴᠢᠭᠠᠳ ᠬᠢᠴᠢᠬᠡᠭᠰᠡᠨ ᠪᠣᠯ᠂ ᠪᠢ ᠲᠡᠢᠮᠦ ᠭᠠᠵᠠᠷ ᠠ᠋ᠴᠠ ᠲᠡᠢᠮᠦ ᠨᠡᠷᠡ ᠲᠡᠢ ᠬᠥᠮᠦᠨ ᠡᠴᠡ ᠬᠤᠳᠠᠯᠳᠤᠵᠤ ᠠᠪᠤᠭᠰᠠᠨ ᠶᠤᠮ᠂ ᠦᠭᠡᠢ ᠪᠣᠯ ᠡᠪᠦᠭᠡ ᠡᠴᠢᠭᠡ ᠶ᠋ᠢᠨ ᠮᠢᠨᠢ ᠥᠪ ᠬᠥᠷᠥᠩᠭᠡ ᠪᠣᠯᠭᠠᠵᠤ ᠨᠠᠳᠠ ᠦᠯᠡᠳᠡᠭᠡᠭᠰᠡᠨ ᠶᠠᠭᠤᠮᠠ ᠭᠡᠵᠦ ᠠᠮᠠ ᠠᠯᠲᠠᠨ ᠲᠠᠩᠭᠠᠷᠢᠭᠯᠠᠵᠤ ᠡᠵᠡᠨ ᠳ᠋ᠦ᠍ᠨᠢ ᠶᠡᠷᠦ ᠪᠤᠴᠠᠭᠠᠵᠤ ᠥᠭᠳᠡᠭ ᠦᠭᠡᠢ ᠶᠦᠮ᠃ ᠫᠯᠶᠦ᠋ᠱᠺᠢᠨ ᠭᠡᠷ ᠲᠡᠭᠡᠨ ᠪᠠᠢᠬᠤ ᠳ᠋ᠠᠭᠠᠨ ᠯᠠᠴᠠ ᠶ᠋ᠢᠨ ᠬᠡᠯᠲᠡᠷᠬᠡᠢ᠂ ᠴᠠᠭᠠᠰᠤᠨ ᠤ᠋ ᠥᠭᠡᠳᠡᠰᠦ᠂ ᠥᠳᠥ ᠰᠣᠳᠣ᠂ ᠶᠡᠷᠦ ᠨᠢᠳᠦᠨ ᠳ᠋ᠦ᠍ᠨᠢ ᠦᠵᠡᠭᠳᠡᠭᠰᠡᠨ ᠶᠠᠭᠤᠮᠠ ᠪᠦᠬᠦᠨ ᠢ᠋ ᠱᠠᠯᠠ ᠳᠡᠭᠡᠷᠡ ᠡᠴᠡ ᠲᠡᠭᠦᠵᠦ ᠰᠢᠷᠡᠭᠡᠨ ᠳᠡᠭᠡᠷᠡ᠂ ᠴᠣᠩᠬᠣᠨ ᠳᠡᠭᠡᠷᠡ ᠲᠠᠯᠪᠢᠳᠠᠭ ᠪᠠᠢᠪᠠ᠃
ᠳᠡᠭᠡᠷᠡ ᠦᠶᠡ ᠳ᠋ᠦ᠍ ᠫᠯᠶᠦ᠋ᠱᠺᠢᠨ᠂ ᠡᠬᠡᠨᠡᠷ ᠬᠡᠦᠬᠡᠳ ᠲᠡᠢ᠂ ᠶᠠᠭᠤᠮᠠᠨ ᠳ᠋ᠠᠭᠠᠨ ᠭᠠᠮᠲᠠᠢ ᠬᠥᠮᠦᠨ ᠪᠠᠢᠭᠰᠠᠨ ᠶᠤᠮ᠃ ᠬᠥᠷᠰᠢ ᠬᠥᠮᠦᠰ ᠨᠢ ᠠᠢᠯᠴᠢᠯᠠᠨ ᠢᠷᠡᠵᠦ ᠬᠣᠭᠣᠯᠠ ᠢᠳᠡᠬᠦ ᠵᠠᠭᠤᠷᠠ ᠪᠠᠨ ᠠᠵᠤ ᠠᠬᠤᠢ ᠪᠠᠨ ᠬᠡᠷᠬᠢᠨ ᠡᠵᠡᠩᠨᠡᠨ ᠬᠠᠮᠢᠶᠠᠷᠬᠤ ᠶ᠋ᠢᠨ ᠠᠷᠭᠠ ᠤᠬᠠᠭᠠᠨ ᠪᠠ ᠨᠠᠷᠢᠯᠠᠨ ᠬᠠᠮᠠᠭᠠᠯᠠᠵᠤ ᠪᠠᠢᠬᠤ ᠶ᠋ᠢᠨ ᠰᠠᠨᠠᠭᠤᠯᠭᠠ ᠰᠤᠷᠭᠠᠮᠵᠢ ᠶ᠋ᠢ ᠲᠡᠭᠦᠨ ᠢ᠋ᠶ᠋ᠡᠷ ᠵᠢᠭᠠᠯᠭᠠᠨ ᠠᠪᠳᠠᠭ ᠪᠠᠢᠵᠠᠢ᠃ ᠡᠨᠡ ᠠᠢᠯ ᠤ᠋ᠨ ᠪᠦᠬᠦ ᠠᠵᠤ ᠠᠬᠤᠢ ᠬᠡᠪ ᠦ᠋ᠨ ᠲᠦᠪᠰᠢᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠶᠠᠪᠤᠭᠳᠠᠨ ᠲᠡᠭᠡᠷᠮᠡ᠂ ᠴᠡᠮᠪᠡ ᠶ᠋ᠢᠨ ᠦᠢᠯᠡᠳᠪᠦᠷᠢ᠂ ᠮᠣᠳᠣᠨ ᠤ᠋ ᠦᠢᠯᠡᠳᠬᠡᠯ᠂ ᠡᠭᠡᠷᠡᠬᠦ ᠰᠠᠤᠷᠢ ᠮᠠᠰᠢᠨ ᠨᠤᠭᠤᠳ ᠨᠢ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠨᠳᠡᠭᠳᠡᠯ ᠦᠭᠡᠢ ᠠᠵᠢᠯᠯᠠᠵᠤ ᠪᠠᠢᠳᠠᠭ ᠪᠢᠯᠡ᠃ ᠡᠵᠡᠨ ᠬᠥᠮᠦᠨ᠂ ᠰᠢᠯᠦᠰᠦ ᠪᠡᠷ ᠢ᠋ᠶ᠋ᠡᠨ ᠲᠣᠣᠷ ᠲᠠᠲᠠᠳᠠᠭ ᠬᠥᠳᠡᠯᠮᠦᠷᠢ ᠳ᠋ᠦ᠍ ᠬᠢᠴᠢᠶᠡᠩᠭᠦᠢ ᠠᠭᠠᠯᠵᠢ ᠰᠢᠭ᠋᠂ ᠠᠵᠤ ᠠᠬᠤᠢ ᠶ᠋ᠢᠨ ᠥᠨᠴᠥᠭ ᠪᠤᠯᠤᠩ ᠤ᠋ᠨ ᠨᠢᠭᠡ ᠶ᠋ᠢ ᠴᠦ᠍ ᠣᠷᠬᠢᠭᠳᠠᠭᠤᠯᠤᠯ ᠥᠬᠡᠢ ᠪᠦᠭᠦᠳᠡ ᠶ᠋ᠢ ᠬᠡᠰᠦᠭᠦᠴᠢᠯᠡᠨ ᠡᠷᠭᠢᠵᠦ᠂ ᠡᠵᠡᠨ ᠬᠥᠮᠦᠨ ᠦ᠌ ᠬᠤᠷᠴᠠ ᠬᠠᠷᠠᠭᠠ ᠶᠠᠭᠤᠮᠠ ᠪᠦᠬᠦᠨ ᠳᠡᠭᠡᠷᠡ ᠬᠦᠷᠦᠯᠴᠡᠳᠡᠭ ᠪᠠᠢᠯᠠ᠃ ᠠᠢᠬᠤᠪᠲᠤᠷ ᠶᠡᠬᠡ ᠬᠠᠯᠠᠭᠤᠮᠰᠤᠭ ᠤ᠋ᠨ ᠲᠡᠮᠳᠡᠭ ᠫᠯᠶᠦ᠋ᠱᠺᠢᠨ ᠦ᠌ ᠴᠢᠷᠠᠢ ᠳ᠋ᠤ᠌ ᠶᠡᠷᠦ ᠦᠵᠡᠭᠳᠡᠭᠡᠳᠦᠢ ᠪᠣᠯᠪᠠᠴᠤ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠭᠡᠳᠡᠭ ᠨᠢ ᠲᠡᠭᠦᠨ ᠦ᠌ ᠨᠢᠳᠦ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠢᠯᠡᠬᠡᠨ ᠪᠠᠢᠳᠠᠭ ᠤ᠋ᠨ ᠳᠡᠭᠡᠷᠡ ᠶᠠᠭᠤᠮᠠ ᠶᠠᠷᠢᠬᠤ ᠳ᠋ᠠᠭᠠᠨ ᠨᠡᠯᠢᠶᠡᠳ ᠬᠠᠰᠢᠷ᠂ ᠤᠴᠢᠷ ᠢ᠋ ᠮᠡᠳᠡᠳᠡᠭ ᠪᠠᠢᠭᠰᠠᠨ ᠲᠤᠯᠠ ᠦᠭᠡ ᠶ᠋ᠢ ᠨᠢ ᠴᠢᠩᠨᠠᠵᠤ ᠰᠠᠭᠤᠬᠤ ᠳ᠋ᠤ᠌ ᠠᠶᠠᠲᠠᠢ ᠴᠤ᠌ ᠪᠠᠢᠳᠠᠭ ᠠᠵᠢ᠃ ᠡᠶᠡᠯᠳᠡᠭ ᠵᠥᠭᠡᠯᠡᠨ ᠵᠠᠩ ᠲᠠᠢ᠂ ᠶᠠᠷᠢᠶᠠ ᠬᠥᠭᠡᠷᠦᠭᠡ ᠲᠡᠢ ᠭᠡᠷ ᠦ᠋ᠨ ᠡᠵᠡᠭᠲᠡᠢ ᠠᠢᠯ ᠠᠢᠮᠠᠭ ᠤ᠋ᠨ ᠳᠤᠮᠳᠠ ᠪᠠᠨ ᠣᠪᠣᠭᠠ ᠨᠡᠷᠡ ᠲᠥᠷᠥ ᠲᠡᠢ ᠪᠠᠢᠭᠰᠠᠨ ᠪᠢᠯᠡ᠃ ᠵᠣᠴᠢᠳ ᠲᠤ᠌ ᠤᠷᠢᠶᠠᠯᠢᠭ ᠵᠠᠩ ᠲᠠᠢ᠂ ᠰᠢᠷᠭᠠᠯ ᠴᠠᠭᠠᠨ ᠦᠰᠦᠲᠡᠢ᠂ ᠴᠠᠩᠬᠤᠢ ᠴᠡᠴᠡᠭ ᠰᠢᠭ᠋ ᠰᠠᠢᠬᠠᠨ ᠴᠢᠷᠠᠢ ᠲᠠᠢ ᠬᠣᠶᠠᠷ ᠬᠡᠦᠬᠡᠨ ᠨᠢ ᠭᠡᠢᠴᠢᠳ ᠢ᠋ ᠤᠭᠲᠤᠵᠤ ᠭᠠᠷᠳᠠᠭ᠃ ᠭᠠᠪᠰᠢᠭᠠᠢ ᠰᠡᠷᠭᠦᠯᠡᠩ ᠵᠢᠭᠠᠯ ᠬᠦᠦ ᠨᠢ ᠢᠷᠡᠭᠰᠡᠨ ᠭᠡᠢᠴᠢᠳ ᠢ᠋ ᠡᠶᠡᠭᠦᠢᠷᠭᠡᠵᠦ ᠪᠠᠢᠭᠠ ᠡᠰᠡᠬᠦ ᠶ᠋ᠢ ᠠᠩᠬᠠᠷᠤᠯ ᠦᠭᠡᠢ ᠦᠨᠦᠰᠳᠡᠭ᠃ ᠡᠨᠡ ᠠᠢᠯ ᠤ᠋ᠨ ᠴᠣᠩᠬᠣ ᠨᠤᠭᠤᠳ ᠴᠥᠮ ᠢ᠋ᠶ᠋ᠡᠷ ᠨᠡᠭᠡᠭᠡᠯᠲᠡᠲᠡᠢ ᠪᠠᠢᠳᠠᠭ ᠪᠠ ᠪᠠᠢᠰᠢᠩ ᠤ᠋ᠨ ᠳᠡᠭᠡᠳᠦ ᠳᠠᠪᠬᠤᠷ ᠲᠤ᠌ ᠹᠷᠠᠨᠼᠢ ᠪᠠᠭᠰᠢ ᠰᠠᠭᠤᠳᠠᠭ ᠪᠠᠢᠵᠠᠢ᠂ ᠡᠨᠡ ᠪᠠᠭᠰᠢ ᠰᠠᠬᠠᠯ ᠢ᠋ᠶ᠋ᠠᠨ ᠴᠡᠪᠡᠷ ᠰᠠᠢᠬᠠᠨ ᠬᠤᠰᠤᠳᠠᠭ᠃ ᠡᠨᠡ ᠪᠠᠭᠰᠢ ᠠᠩ ᠠᠩᠨᠠᠬᠤ ᠳ᠋ᠠᠭᠠᠨ ᠮᠡᠷᠭᠡᠨ᠂ ᠬᠤᠷ ᠭᠤᠷᠭᠤᠤᠯ ᠪᠤᠶᠤ ᠨᠤᠭᠤᠰᠤ ᠶ᠋ᠢ ᠥᠪᠡᠷ ᠢ᠋ᠶ᠋ᠡᠨ ᠠᠯᠠᠵᠤ ᠠᠪᠴᠢᠷᠠᠳᠠᠭ᠂ ᠦᠭᠡᠢ ᠪᠣᠯ ᠪᠣᠷᠣ ᠰᠢᠪᠠᠭᠤᠨ ᠤ᠋ ᠥᠨᠳᠡᠭᠡ ᠲᠡᠭᠦᠵᠦ ᠠᠪᠴᠢᠷᠠᠳᠠᠭ᠃ ᠬᠠᠷᠢᠨ ᠥᠨᠳᠡᠭᠡ ᠶ᠋ᠢ ᠥᠪᠡᠷ ᠡᠴᠡ ᠨᠢ ᠥᠭᠡᠷᠡ ᠬᠥᠮᠦᠨ ᠠᠮᠠᠨ ᠳ᠋ᠠᠭᠠᠨ ᠬᠦᠷᠭᠡᠳᠡᠭ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠲᠡᠭᠦᠨ ᠢ᠋ᠶ᠋ᠡᠨ ᠲᠣᠰᠣᠨ ᠳ᠋ᠤ᠌ ᠬᠠᠭᠠᠷᠢᠭᠤᠯᠵᠤ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠢᠳᠡᠳᠡᠭ ᠪᠠᠢᠯᠠ᠃ ᠬᠣᠶᠠᠷ ᠬᠡᠦᠬᠡᠨ ᠦ᠌ ᠬᠢᠨᠢ ᠪᠠᠭᠰᠢ᠂ ᠴᠢᠭᠢᠷᠠᠭ ᠪᠡᠶᠡᠲᠡᠢ ᠬᠥᠳᠡᠭᠡ ᠶ᠋ᠢᠨ ᠡᠮᠡᠭᠲᠡᠢ ᠮᠥᠨ ᠳᠡᠭᠡᠳᠦ ᠳᠠᠪᠬᠤᠷ ᠲᠤ᠌ ᠰᠠᠭᠤᠳᠠᠭ ᠪᠠᠢᠪᠠ᠃ ᠡᠵᠡᠨ ᠭᠤᠸᠠᠢ ᠥᠪᠡᠷ ᠢ᠋ᠶ᠋ᠡᠨ ᠪᠠᠬᠠᠨ ᠬᠠᠭᠤᠴᠢᠷᠠᠭᠰᠠᠨ ᠪᠣᠯᠪᠠᠴᠤ ᠡᠪᠲᠡᠢᠬᠡᠨ ᠲᠣᠨᠣᠭ ᠪᠦᠷᠢᠨ ᠲᠡᠢ᠂ ᠬᠠᠮᠢᠭᠠ ᠪᠠᠨ ᠴᠤ᠌ ᠨᠥᠬᠥᠭᠡᠰᠦ ᠣᠷᠣᠭᠠᠳᠤᠢ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠬᠣᠭᠣᠯᠠᠨ ᠤ᠋ ᠪᠠᠨ ᠥᠷᠥᠭᠡᠨ ᠳ᠋ᠦ᠍ ᠣᠷᠣᠳᠠᠭ ᠪᠠᠢᠵᠠᠢ᠃ ᠭᠡᠲᠡᠯᠡ ᠰᠠᠢᠬᠠᠨ ᠰᠡᠳᠬᠢᠯᠲᠦ ᠡᠨᠡ ᠡᠵᠡᠨ ᠬᠥᠮᠦᠨ ᠦ᠌ ᠠᠪᠠᠭᠠᠢ ᠨᠠᠰᠤ ᠪᠠᠷᠠᠵᠤ᠂ ᠵᠠᠷᠢᠮ ᠰᠠᠩ ᠬᠥᠮᠥᠷᠭᠡ ᠪᠣᠯᠤᠨ ᠠᠪᠳᠠᠷᠠ ᠬᠣᠷᠭᠣ ᠶ᠋ᠢᠨ ᠲᠦᠯᠬᠢᠭᠦᠷ ᠵᠡᠷᠭᠡ ᠠᠷᠰᠠᠷ ᠵᠢᠵᠢᠭ ᠵᠦᠢᠯ ᠳᠡᠭᠡᠷᠡ ᠬᠠᠯᠠᠮᠵᠢ ᠪᠠᠨ ᠲᠠᠯᠪᠢᠵᠤ ᠪᠠᠢᠬᠤ ᠡᠭᠦᠷᠭᠡ ᠫᠯᠶᠦ᠋ᠱᠺᠢᠨ ᠥᠪᠡᠷ ᠲᠦ᠋ᠨᠢ ᠨᠣᠭᠳᠠᠬᠤ ᠪᠣᠯᠵᠤ᠂ ᠪᠡᠯᠪᠡᠰᠦᠨ ᠬᠣᠴᠣᠷᠤᠭᠰᠠᠨ ᠬᠥᠮᠦᠨ ᠪᠦᠭᠦᠳᠡ ᠶ᠋ᠢᠨ ᠠᠳᠠᠯᠢ᠂ ᠶᠠᠭᠤᠮᠠ ᠪᠣᠯᠭᠠᠨ ᠢ᠋ ᠢᠲᠡᠭᠡᠬᠦ ᠦᠭᠡᠢ ᠰᠠᠵᠢᠭᠴᠢ᠂ ᠤᠯᠠᠮ ᠬᠢᠨᠠᠭᠤᠷ ᠬᠠᠷᠠᠮᠴᠢ ᠪᠣᠯᠵᠠᠢ᠃ ᠡᠨᠡ ᠲᠠᠯᠠ ᠪᠠᠷ ᠫᠯᠶᠦ᠋ᠱᠺᠢᠨ ᠶᠡᠬᠡ ᠥᠬᠢᠨ ᠠᠯᠧᠺᠰᠠᠨᠳᠧᠷᠠ ᠰᠲ᠋ᠧᠫᠠᠨᠤᠧᠨᠠ ᠳ᠋ᠠᠭᠠᠨ ᠨᠠᠢᠳᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠠᠵᠢ᠃ ᠢᠩᠭᠢᠳᠡᠭ ᠦ᠋ᠨ ᠵᠥᠪ ᠨᠢ ᠬᠣᠵᠢᠮ ᠮᠡᠳᠡᠭᠳᠡᠭᠰᠡᠨ ᠶᠦᠮ᠃ ᠶᠡᠬᠡ ᠥᠬᠢᠨ ᠨᠢ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠨᠠᠰᠤ ᠪᠠᠷᠠᠭᠰᠠᠨ ᠬᠣᠢᠨᠠ ᠤᠳᠠᠯ ᠦᠭᠡᠢ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠤ᠋ ᠠᠯᠪᠠ ᠬᠠᠭᠠᠵᠤ ᠪᠠᠢᠭᠠ ᠱᠲ᠋ᠠᠪ ᠤ᠋ᠨ ᠠᠬᠠᠮᠠᠳ ᠴᠣᠯᠠᠲᠠᠢ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠶ᠋ᠢ ᠳᠠᠭᠠᠵᠤ ᠠᠷᠢᠯᠤᠭᠰᠠᠨ ᠶᠤᠮ᠃ ᠡᠴᠢᠭᠡ ᠮᠢᠨᠢ ᠴᠡᠷᠢᠭ ᠦ᠋ᠨ ᠳᠠᠷᠤᠭᠠ ᠪᠦᠭᠦᠳᠡ ᠶ᠋ᠢ ᠮᠥᠷᠥᠢ ᠲᠡᠢ ᠲᠣᠭᠯᠠᠵᠤ ᠪᠠᠢᠳᠠᠭ ᠢ᠋ᠶ᠋ᠠᠨ ᠠᠯᠳᠠᠵᠤ ᠶᠠᠪᠤᠳᠠᠭ ᠪᠦᠲᠦᠯ ᠦᠭᠡᠢ ᠬᠥᠮᠦᠰ ᠭᠡᠵᠦ ᠬᠢᠯᠢᠰᠳᠡᠭᠦᠯᠬᠦ ᠤᠴᠢᠷ ᠠ᠋ᠴᠠ ᠨᠠᠮᠠᠢ ᠡᠨᠡ ᠬᠥᠮᠦᠨ ᠲᠡᠢ ᠤᠷᠤᠭᠯᠠᠬᠤ ᠶ᠋ᠢ ᠶᠠᠭᠠᠬᠢᠭᠰᠠᠨ ᠴᠤ᠌ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠭᠡᠵᠦ ᠶᠡᠬᠡ ᠥᠬᠢᠨ ᠨᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠶᠠᠳᠠᠭᠤᠬᠠᠨ ᠲᠣᠰᠬᠣᠨ ᠤ᠋ ᠨᠢᠭᠡᠨ ᠰᠦᠮᠡ ᠳ᠋ᠦ᠍ ᠣᠴᠢᠵᠤ ᠬᠤᠷᠢᠮᠯᠠᠵᠠᠢ᠃ ᠡᠴᠢᠭᠡ ᠨᠢ ᠥᠬᠢᠨ ᠦ᠌ ᠪᠡᠨ ᠬᠣᠢᠨᠠ ᠠ᠋ᠴᠠ ᠨᠡᠬᠡᠭᠦᠯᠴᠢᠨ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ ᠲᠥᠷᠥᠭᠰᠡᠨ ᠥᠬᠢᠨ ᠢ᠋ᠶ᠋ᠡᠨ ᠨᠢᠳᠦᠨ ᠳ᠋ᠡᠭᠡᠨ ᠴᠦ᠍ ᠦᠵᠡᠬᠦ ᠦᠭᠡᠢ ᠭᠡᠵᠦ ᠲᠠᠩᠭᠠᠷᠢᠭᠯᠠᠭᠰᠠᠨ ᠶᠤᠮ᠃ ᠡᠨᠡ ᠠᠢᠯ ᠤ᠋ᠨ ᠬᠥᠮᠦᠨ ᠠᠮᠠ ᠶ᠋ᠢᠨ ᠴᠥᠭᠡᠷᠡᠬᠦ ᠳᠣᠳᠣᠮ᠂ ᠬᠠᠷᠠᠮᠴᠢ ᠰᠡᠳᠬᠢᠯ ᠦ᠋ᠨ ᠦᠨᠡᠨᠴᠢ ᠨᠥᠬᠥᠷ ᠪᠤᠭᠤᠷᠤᠯ ᠦᠰᠦ ᠣᠯᠠᠨ ᠪᠣᠯᠬᠤ ᠳᠣᠳᠣᠮ᠂ ᠡᠵᠡᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠤᠯᠠᠮ ᠬᠠᠷᠠᠮᠴᠢ ᠪᠣᠯᠵᠠᠢ᠃ ᠬᠦᠦ ᠨᠢ ᠠᠯᠪᠠ ᠬᠠᠭᠠᠬᠤ ᠴᠠᠭ ᠪᠣᠯᠬᠤ ᠳ᠋ᠤ᠌ ᠹᠷᠠᠨᠼᠢ ᠪᠠᠭᠰᠢ ᠬᠠᠯᠠᠭᠳᠠᠵᠤ ᠶᠠᠪᠤᠭᠰᠠᠨ ᠶᠤᠮ᠃ ᠥᠬᠢᠳ ᠦ᠋ᠨ ᠬᠢᠨᠢ ᠬᠥᠮᠦᠵᠢᠭᠦᠯᠦᠭᠴᠢ ᠪᠡᠷ ᠰᠠᠭᠤᠵᠤ ᠪᠠᠢᠭᠰᠠᠨ ᠡᠮᠡᠭᠲᠡᠢ᠂ ᠠᠯᠧᠺᠰᠠᠨᠳᠧᠷᠠ ᠰᠲ᠋ᠧᠫᠠᠨᠤᠧᠨᠠ ᠶ᠋ᠢ ᠬᠤᠯᠠᠭᠠᠢᠯᠠᠵᠤ ᠰᠡᠮᠬᠡᠨ ᠠᠪᠠᠴᠢᠭᠰᠠᠨ ᠬᠡᠷᠡᠭ ᠲᠦ᠍ ᠣᠷᠣᠯᠴᠠᠪᠠ ᠭᠡᠵᠦ ᠬᠥᠭᠡᠭᠡᠭᠳᠡᠨ ᠲᠣᠨᠢᠯᠤᠭᠰᠠᠨ ᠶᠤᠮ᠃ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠣᠯᠢᠭᠲᠠᠢᠬᠠᠨ ᠠᠯᠪᠠᠨ ᠲᠤᠰᠢᠶᠠᠯ ᠡᠷᠢᠬᠦ ᠭᠡᠵᠦ ᠬᠦᠦ ᠨᠢ ᠮᠣᠵᠢ ᠶ᠋ᠢᠨ ᠲᠥᠪ ᠬᠣᠷᠢᠶᠠᠨ ᠳ᠋ᠤ᠌ ᠣᠴᠢᠭᠠᠳ᠂ ᠲᠠᠮᠠᠭᠠ ᠲᠤᠰᠢᠶᠠᠯ ᠤ᠋ᠨ ᠭᠠᠵᠠᠷ ᠢ᠋ᠶ᠋ᠠᠷ ᠠᠯᠪᠠ ᠡᠷᠢᠵᠦ ᠣᠷᠣᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠳ᠋ᠤ᠌ ᠠᠯᠪᠠ ᠬᠠᠭᠠᠬᠤ ᠪᠣᠯᠵᠤ᠂ ᠬᠤᠪᠴᠠᠰᠤᠨ ᠤ᠋ ᠮᠥᠩᠭᠥ ᠢᠷᠡᠭᠦᠯᠦᠨᠡ ᠤᠤ ᠭᠡᠵᠦ ᠡᠴᠢᠭᠡ ᠳ᠋ᠡᠭᠡᠨ ᠵᠠᠬᠢᠳᠠᠯ ᠪᠢᠴᠢᠭᠰᠡᠨ ᠪᠣᠯᠪᠠᠴᠤ ᠠᠷᠠᠳ ᠤ᠋ᠨ ᠱᠣᠭ ᠦᠭᠡ ᠪᠡᠷ ᠬᠡᠯᠡᠪᠡᠯ ᠬᠠᠮᠠᠷ ᠲᠠᠮᠠᠬᠢ ᠲᠠᠲᠠᠵᠠᠢ᠃ ᠤᠳᠬᠤᠨ ᠥᠬᠢᠨ ᠨᠢ ᠡᠴᠢᠭᠡ ᠶ᠋ᠢᠨ ᠬᠠᠮᠲᠤ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠪᠠᠢᠭᠠᠳ ᠨᠠᠰᠤ ᠪᠠᠷᠠᠵᠤ᠂ ᠫᠯᠶᠦ᠋ᠱᠺᠢᠨ ᠭᠠᠭᠴᠠᠭᠠᠷ ᠬᠣᠴᠣᠷᠴᠤ ᠡᠨᠡ ᠶᠡᠬᠡ ᠬᠥᠷᠥᠩᠭᠡ ᠶ᠋ᠢ ᠮᠡᠨᠡᠭᠴᠢ᠂ ᠬᠠᠳᠠᠭᠠᠯᠠᠭᠴᠢ᠂ ᠡᠵᠡᠨ ᠡᠨᠡ ᠭᠤᠷᠪᠠᠨ ᠡᠭᠦᠷᠭᠡ ᠶ᠋ᠢ ᠪᠡᠶᠡᠯᠡᠭᠦᠯᠬᠦ ᠪᠣᠯᠤᠭᠰᠠᠨ ᠶᠤᠮ᠃ ᠬᠠᠷᠠᠮᠴᠢ ᠰᠡᠳᠬᠢᠯ ᠭᠡᠳᠡᠭ ᠪᠣᠯ ᠴᠢᠨᠣᠠ ᠰᠢᠭ᠋ ᠬᠣᠪᠳᠣᠭ ᠪᠠᠢᠳᠠᠭ᠃ ᠭᠠᠭᠴᠠ ᠪᠡᠶᠡ ᠰᠠᠭᠤᠬᠤ ᠶᠠᠪᠤᠳᠠᠯ ᠬᠥᠮᠦᠨ ᠢ᠋ ᠤᠯᠠᠮ ᠬᠣᠪᠳᠣᠭ ᠪᠣᠯᠭᠠᠵᠤ ᠬᠠᠷᠠᠮᠴᠢ ᠰᠡᠳᠬᠢᠯ ᠢ᠋ ᠬᠥᠭᠵᠢᠭᠡᠬᠦ ᠰᠠᠢᠨ ᠨᠥᠬᠥᠴᠡᠯ ᠪᠣᠯᠵᠤ ᠪᠠᠢᠯᠠ᠃ ᠫᠯᠶᠦ᠋ᠱᠺᠢᠨ ᠦ᠌ ᠤᠤᠯ ᠠ᠋ᠴᠠ ᠮᠥᠴᠢᠳᠬᠡᠨ ᠬᠥᠮᠦᠨ ᠦ᠌ ᠴᠢᠨᠠᠷ ᠨᠢ ᠴᠠᠭ ᠢᠮᠠᠭᠲᠠ ᠪᠠᠭᠠᠰᠴᠤ᠂ ᠡᠨᠡ ᠬᠦ ᠬᠥᠮᠦᠨ ᠦ᠌ ᠣᠷᠣᠨᠴᠣᠭ ᠠ᠋ᠴᠠ ᠡᠳᠦᠷ ᠢᠷᠡᠬᠦ ᠳᠣᠳᠣᠮ ᠨᠢᠭᠡ ᠬᠡᠰᠡᠭ ᠶᠠᠭᠤᠮᠠ ᠬᠣᠯᠲᠣᠷᠠᠨ ᠤᠨᠠᠵᠤ ᠪᠠᠢᠯᠠ᠃ ᠴᠡᠷᠢᠭ ᠬᠥᠮᠦᠰ ᠦ᠋ᠨ ᠲᠤᠬᠠᠢ ᠫᠯᠶᠦ᠋ᠱᠺᠢᠨ ᠦ᠌ ᠮᠠᠭᠤ ᠰᠠᠨᠠᠵᠤ ᠶᠠᠪᠤᠳᠠᠭ ᠨᠢ ᠵᠥᠪ ᠭᠡᠳᠡᠭ ᠢ᠋ ᠵᠣᠷᠢᠭᠤᠳᠠ ᠪᠠᠲᠤᠯᠠᠬᠤ ᠭᠡᠰᠡᠨ ᠶᠦᠮ ᠰᠢᠭ ᠬᠦᠦ ᠨᠢ ᠮᠥᠷᠥᠢ ᠲᠡᠢ ᠲᠣᠭᠯᠠᠵᠤ᠂ ᠪᠠᠢᠳᠠᠭ ᠢ᠋ᠶ᠋ᠠᠨ ᠠᠯᠳᠠᠪᠠ ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠡᠨᠡ ᠦᠶᠡ ᠪᠡᠷ ᠡᠴᠢᠭᠡ ᠨᠢ ᠳᠤᠭᠤᠯᠤᠭᠠᠳ ᠬᠦᠦ ᠳ᠋ᠡᠭᠡᠨ ᠬᠠᠷᠢᠶᠠᠯ ᠶᠠᠪᠤᠭᠤᠯᠵᠤ᠂ ᠲᠡᠭᠦᠨ ᠡᠴᠡ ᠬᠣᠢᠰᠢ ᠮᠢᠨᠦ ᠲᠥᠷᠥᠭᠰᠡᠨ ᠬᠦᠦ ᠳᠡᠯᠡᠬᠡᠢ ᠳᠡᠭᠡᠷᠡ ᠪᠠᠢᠭᠠ ᠡᠰᠡᠬᠦ ᠲᠤᠬᠠᠢ ᠨᠢᠭᠡ ᠴᠦ᠍ ᠤᠳᠠᠭᠠ ᠳᠤᠷᠠᠳᠤᠭᠰᠠᠨ ᠦᠭᠡᠢ᠂ ᠵᠢᠯ ᠪᠦᠷᠢ ᠪᠠᠢᠰᠢᠩ ᠤ᠋ᠨ ᠨᠢᠵᠡᠭᠡᠳ ᠴᠣᠩᠬᠣ ᠲᠦᠭᠵᠢᠭᠳᠡᠭᠰᠡᠭᠡᠷ ᠢᠷᠡᠵᠦ᠂ ᠲᠦᠷᠦᠭᠦᠬᠡᠨ ᠤᠩᠰᠢᠭᠴᠢᠳ ᠤ᠋ᠨ ᠬᠠᠷᠠᠳᠠᠭ ᠬᠣᠶᠠᠷ ᠴᠣᠩᠬᠣ ᠦᠯᠡᠳᠡᠵᠦ ᠨᠢᠭᠡ ᠶ᠋ᠢ ᠨᠢ ᠴᠠᠭᠠᠰᠤ ᠪᠠᠷ ᠪᠥᠭᠯᠡᠭᠰᠡᠨ ᠪᠠᠢᠯᠠ᠃ ᠠᠵᠤ ᠠᠬᠤᠢ ᠶ᠋ᠢᠨ ᠭᠣᠣᠯ ᠴᠢᠬᠤᠯᠠ ᠵᠦᠢᠯ ᠦ᠋ᠳ ᠠᠭᠠᠵᠢᠮ ᠢ᠋ᠶ᠋ᠠᠷ ᠠᠯᠠᠭᠠ ᠪᠣᠯᠵᠤ ᠡᠵᠡᠨ ᠬᠥᠮᠦᠨ ᠦ᠌ ᠢᠪᠴᠤᠤ ᠬᠠᠷᠠᠭᠠ ᠲᠠᠰᠤᠯᠭᠠᠨ ᠳᠣᠲᠣᠭᠤᠷ ᠢ᠋ᠶ᠋ᠠᠨ ᠲᠡᠭᠦᠳᠡᠭ ᠴᠠᠭᠠᠰᠤᠨ ᠤ᠋ ᠥᠭᠡᠳᠡᠰᠦ᠂ ᠥᠳᠥ ᠰᠣᠳᠣ ᠪᠠᠷ ᠬᠢᠵᠠᠭᠠᠷᠯᠠᠭᠳᠠᠳᠠᠭ ᠪᠣᠯᠵᠤ᠂ ᠠᠵᠤ ᠠᠬᠤᠢᠯᠠᠯ ᠠ᠋ᠴᠠ ᠦᠢᠯᠡᠳᠪᠦᠷᠢᠯᠡᠵᠦ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ ᠨᠢ ᠬᠤᠳᠠᠯᠳᠤᠵᠤ ᠠᠪᠬᠤ ᠪᠠᠷ ᠢᠷᠡᠭᠰᠡᠨ ᠬᠥᠮᠦᠰ ᠲᠡᠢ ᠦᠭᠡ ᠪᠡᠨ ᠤᠯᠠᠮ ᠠ᠋ᠴᠠ ᠤᠯᠠᠮ ᠣᠢᠯᠠᠭᠠᠯᠴᠠᠬᠤ ᠪᠠᠨ ᠪᠣᠯᠢᠵᠠᠢ᠃ ᠫᠠᠨᠽᠠᠴᠢᠨ ᠨᠠᠷ ᠲᠡᠭᠦᠨ ᠲᠡᠢ ᠦᠨᠡ ᠬᠡᠯᠡᠯᠴᠡᠨ ᠲᠣᠬᠢᠷᠠᠬᠤ ᠦᠭᠡᠢ ᠴᠥᠬᠥᠷᠡᠬᠦ ᠳ᠋ᠡᠭᠡᠨ ᠡᠨᠡ ᠴᠢᠨᠢ ᠬᠥᠮᠦᠨ ᠪᠢᠰᠢ ᠴᠢᠳᠬᠥᠷ ᠶᠦᠮ ᠠ᠋ ᠭᠡᠵᠦ ᠬᠡᠯᠡᠭᠡᠳ ᠳᠠᠬᠢᠨ ᠵᠥᠪᠯᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠶᠤᠮ᠃ ᠡᠢᠮᠦ ᠤᠴᠢᠷ ᠠ᠋ᠴᠠ ᠡᠨᠡ ᠠᠢᠯ ᠤ᠋ᠨ ᠡᠪᠡᠰᠦ ᠪᠣᠷᠳᠣᠭᠠ ᠦᠷᠡ ᠲᠠᠷᠢᠶᠠ ᠨᠢ ᠢᠯᠵᠠᠷᠠᠵᠤ᠂ ᠪᠤᠬᠠᠯᠳᠠᠨ ᠣᠪᠣᠭᠠᠯᠠᠭᠰᠠᠨ ᠡᠪᠡᠰᠦ ᠲᠠᠷᠢᠶᠠ ᠨᠢ ᠴᠠᠭᠠᠨ ᠨᠣᠭᠣᠭᠠ ᠤᠷᠭᠤᠭᠤᠯᠤᠮᠠ ᠠᠶᠠᠲᠠᠢ ᠦᠲᠦᠭ ᠪᠣᠯᠵᠤ᠂ ᠵᠣᠭᠣᠷᠢᠨ ᠳ᠋ᠠᠭᠠᠨ ᠬᠠᠳᠠᠭᠠᠯᠠᠭᠰᠠᠨ ᠭᠤᠯᠢᠷ ᠨᠢ ᠰᠦᠬᠡ ᠪᠡᠷ ᠴᠠᠪᠴᠢᠬᠤ ᠳ᠋ᠤ᠌ ᠴᠤ᠌ ᠬᠠᠭᠠᠷᠠᠮᠠᠷ ᠦᠭᠡᠢ ᠴᠢᠯᠠᠭᠤ ᠰᠢᠭ᠋ ᠬᠠᠲᠠᠭᠤ ᠪᠣᠯᠵᠠᠢ᠃ ᠳᠠᠪᠤᠤ᠂ ᠴᠡᠮᠪᠡ ᠨᠦ᠍ᠭᠦᠳ ᠨᠢ ᠦᠵᠢᠷᠡᠨ ᠭᠠᠷ ᠬᠦᠷᠬᠦ ᠲᠡᠢ ᠵᠡᠷᠭᠡ ᠴᠢᠨᠳᠠᠷᠠ ᠪᠣᠯᠤᠨ ᠪᠤᠲᠠᠷᠠᠳᠠᠭ ᠪᠠᠢᠯᠠ᠃ ᠫᠡᠯᠶᠦᠱᠺᠢᠨ᠂ ᠬᠤᠯᠠᠭᠠᠢᠴᠢ ᠵᠣᠯᠢᠭ ᠤ᠋ᠳ ᠨᠢ ᠤᠤᠭᠤᠴᠢᠬᠠᠬᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠲᠡᠮᠳᠡᠭᠯᠡᠵᠦ ᠲᠠᠯᠪᠢᠭᠰᠠᠨ ᠯᠣᠩᠬᠣ ᠲᠠᠢ ᠳᠠᠷᠠᠰᠤ᠂ ᠥᠲᠥᠨ ᠦᠵᠦᠭ᠂ ᠯᠠᠴᠠ ᠶ᠋ᠢᠨ ᠬᠡᠯᠲᠡᠷᠬᠡᠢ ᠬᠠᠮᠢᠭᠠ ᠪᠠᠢᠳᠠᠭ ᠢ᠋ ᠰᠠᠢᠨ ᠮᠡᠳᠡᠳᠡᠭ ᠡᠴᠡ ᠪᠢᠰᠢ᠂ ᠥᠭᠡᠷᠡ ᠬᠥᠷᠥᠩᠭᠡ ᠬᠣᠭᠰᠢᠯ ᠢ᠋ᠶ᠋ᠠᠨ ᠮᠠᠷᠲᠠᠳᠠᠭ ᠪᠣᠯᠵᠠᠢ᠃ ᠭᠡᠲᠡᠯᠡ ᠬᠠᠷᠢᠶᠠᠲᠤ ᠠᠯᠪᠠᠲᠤ ᠨᠠᠷ ᠠ᠋ᠴᠠ ᠲᠠᠲᠠᠵᠤ ᠠᠵᠤ ᠠᠬᠤᠢᠯᠠᠯ ᠳ᠋ᠠᠭᠠᠨ ᠣᠷᠣᠭᠤᠯᠳᠠᠭ ᠣᠷᠣᠯᠭᠠ ᠨᠢ ᠤᠷᠢᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠠᠳᠠᠯᠢ ᠬᠡᠪ ᠢ᠋ᠶ᠋ᠡᠷ ᠶᠠᠪᠤᠭᠳᠠᠵᠤ ᠪᠠᠢᠯᠠ᠃ ᠲᠠᠷᠢᠶᠠᠴᠢᠳ ᠲᠤᠰᠢᠶᠠᠳᠠᠭ ᠠᠯᠪᠠ ᠪᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠯᠡ ᠲᠤᠰᠢᠶᠠᠭᠰᠠᠭᠠᠷ ᠪᠠᠢᠪᠠ᠃ ᠲᠠᠷᠢᠶᠠᠴᠢᠨ ᠡᠮᠡᠭᠲᠡᠢ ᠤᠷᠢᠳᠤ ᠥᠭᠴᠦ ᠪᠠᠢᠭᠰᠠᠨ ᠲᠠᠢ ᠪᠠᠨ ᠠᠳᠠᠯᠢ ᠬᠡᠮᠵᠢᠶᠡᠨ ᠦ᠌ ᠰᠠᠮᠤᠷ ᠲᠤᠰᠢᠶᠠᠵᠤ᠂ ᠨᠡᠬᠡᠮᠡᠯᠴᠢ ᠬᠡᠦᠬᠡᠨ ᠤᠷᠢᠳᠤ ᠨᠡᠬᠡᠵᠦ ᠪᠠᠢᠭᠰᠠᠨ ᠲᠠᠢ ᠪᠠᠨ ᠠᠳᠠᠯᠢ ᠬᠡᠮᠵᠢᠶᠡᠨ ᠦ᠌ ᠶᠣᠷᠣᠭ ᠨᠡᠬᠡᠵᠦ ᠲᠤᠰᠢᠶᠠᠳᠠᠭ ᠪᠠᠢᠯᠠ᠃ ᠬᠠᠷᠢᠶᠠᠲᠤ ᠠᠯᠪᠠᠲᠤ ᠨᠠᠷ ᠤ᠋ᠨ ᠨᠡᠢᠯᠡᠭᠦᠯᠦᠭᠰᠡᠨ ᠶᠠᠭᠤᠮᠠ ᠪᠦᠭᠦᠳᠡ ᠶ᠋ᠢ ᠨᠢᠭᠡ ᠭᠠᠵᠠᠷ ᠲᠤ᠌ ᠣᠪᠣᠭᠠᠯᠠᠭᠰᠠᠨ ᠨᠢ ᠢᠯᠵᠠᠷᠠᠨ ᠬᠥᠭᠡᠴᠦᠷᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠫᠯᠶᠦ᠋ᠱᠺᠢᠨ ᠥᠪᠡᠷ ᠢ᠋ᠶ᠋ᠡᠨ ᠴᠦ᠍ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠢᠯᠵᠠᠷᠠᠨ ᠬᠥᠭᠡᠴᠦᠷᠡᠵᠦ ᠪᠠᠢᠯᠠ᠃
ᠠᠯᠧᠺᠰᠠᠨᠳᠧᠷᠠ ᠰᠲ᠋ᠧᠫᠠᠨᠤᠧᠨᠠ ᠳ᠋ᠤ᠌ ᠱᠲ᠋ᠠᠪ ᠤ᠋ᠨ ᠠᠬᠠᠮᠠᠳ ᠤ᠋ᠨ ᠨᠡᠭᠦᠳᠡᠯ ᠦ᠋ᠨ ᠠᠮᠢᠳᠤᠷᠠᠯ ᠨᠢ ᠠᠢᠯ ᠭᠡᠷ ᠪᠣᠯᠬᠤ ᠶ᠋ᠢᠨ ᠡᠮᠦᠨᠡ ᠰᠠᠢᠬᠠᠨ ᠰᠠᠨᠠᠭᠳᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠳᠣ ᠵᠣᠪᠠᠯᠠᠩ ᠲᠠᠢ ᠪᠣᠯᠤᠭᠰᠠᠨ ᠤᠴᠢᠷ᠂ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠥᠷᠥᠩᠭᠡ ᠡᠴᠡ ᠭᠣᠷᠢᠳᠠᠵᠤ ᠵᠢᠭᠠᠯ ᠬᠦᠦ ᠶ᠋ᠢᠨ ᠬᠠᠮᠲᠤ ᠡᠴᠢᠭᠡ ᠶ᠋ᠢᠨ ᠳ᠋ᠡᠭᠡᠨ ᠬᠣᠶᠠᠷ ᠤᠳᠠᠭᠠ ᠢᠷᠡᠭᠰᠡᠨ ᠶᠦᠮ᠃ ᠬᠠᠷᠢᠨ ᠫᠯᠶᠦ᠋ᠱᠺᠢᠨ ᠥᠬᠢᠨ ᠳ᠋ᠡᠭᠡᠨ ᠠᠭᠤᠴᠢᠯᠠᠯ ᠬᠠᠢᠷᠠᠯᠠᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠰᠢᠷᠡᠭᠡᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠨᠢᠭᠡ ᠲᠣᠪᠴᠢ ᠶ᠋ᠢ ᠠᠴᠢ ᠬᠦᠦ ᠳ᠋ᠡᠭᠡᠨ ᠲᠣᠭᠯᠠ ᠭᠡᠵᠦ ᠥᠭᠭᠦᠭᠰᠡᠨ ᠪᠣᠯᠪᠠᠴᠤ ᠥᠬᠢᠨ ᠳ᠋ᠡᠭᠡᠨ ᠬᠥᠷᠥᠩᠭᠡ ᠮᠥᠩᠭᠥ ᠥᠭᠭᠦᠯ ᠦᠭᠡᠢ ᠶᠠᠪᠤᠭᠤᠯᠵᠠᠢ᠃ ᠳᠠᠷᠠᠭᠠ ᠨᠢ ᠥᠬᠢᠨ ᠨᠢ ᠬᠣᠶᠠᠷ ᠵᠢᠭᠠᠯ ᠬᠦᠦ ᠶ᠋ᠢᠨ ᠬᠠᠮᠲᠤ ᠡᠴᠢᠭᠡ ᠳ᠋ᠡᠭᠡᠨ ᠳᠠᠬᠢᠨ ᠢᠷᠡᠵᠡᠢ᠃ ᠡᠴᠢᠭᠡ ᠶ᠋ᠢᠨ ᠡᠮᠦᠰᠴᠦ ᠶᠠᠪᠤᠭᠠ ᠲᠡᠷᠯᠢᠭ ᠨᠢ ᠭᠬᠢᠷ ᠪᠣᠯᠵᠤ ᠢᠴᠢᠮᠡᠷ ᠪᠣᠯᠤᠭᠠᠳ ᠪᠠᠢᠭᠰᠠᠨ ᠢ᠋ ᠠᠯᠧᠺᠰᠠᠨᠳᠧᠷᠠ ᠰᠲ᠋ᠧᠫᠠᠨᠤᠧᠨᠠ ᠲᠦᠷᠦᠭᠦᠦ ᠢᠷᠡᠬᠦ ᠳ᠋ᠡᠭᠡᠨ ᠬᠠᠷᠠᠭᠰᠠᠨ ᠤᠴᠢᠷ ᠴᠠᠢ ᠳ᠋ᠤ᠌ ᠢᠳᠡᠬᠦ ᠲᠠᠯᠬᠠ ᠶ᠋ᠢᠨ ᠬᠠᠮᠲᠤ ᠰᠢᠨᠡ ᠲᠡᠷᠯᠢᠭ ᠠᠪᠴᠢᠷᠠᠵᠤ ᠥᠭᠴᠡᠢ᠃ ᠫᠯᠶᠦ᠋ᠱᠺᠢᠨ ᠠᠴᠢ ᠨᠠᠷ ᠢ᠋ᠶ᠋ᠠᠨ ᠡᠷᠬᠡᠯᠡᠭᠦᠯᠵᠦ᠂ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠪᠠᠷᠠᠭᠤᠨ ᠵᠡᠭᠦᠨ ᠬᠥᠯ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠵᠤ᠂ ᠵᠢᠩᠬᠢᠨᠢ ᠮᠣᠷᠢ ᠤᠨᠤᠭᠠᠳ ᠳᠠᠪᠬᠢᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠬᠥᠯ ᠢ᠋ᠶ᠋ᠡᠨ ᠬᠥᠳᠡᠯᠭᠡᠨ ᠲᠣᠭᠯᠠᠭᠤᠯᠵᠤ᠂ ᠥᠬᠢᠨ ᠦ᠌ ᠪᠡᠨ ᠠᠪᠴᠢᠷᠠᠭᠰᠠᠨ ᠲᠠᠯᠬᠠ᠂ ᠲᠡᠷᠯᠢᠭ ᠬᠣᠶᠠᠷ ᠢ᠋ ᠨᠢ ᠠᠪᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠭᠤ ᠳ᠋ᠤᠨᠢ ᠶᠠᠭᠤ ᠴᠤ᠌ ᠥᠭᠭᠦᠯ ᠦᠭᠡᠢ ᠬᠣᠭᠣᠰᠣᠨ ᠪᠤᠴᠠᠭᠠᠵᠠᠢ᠃
ᠴᠢᠴᠢᠺᠦᠧ ᠶ᠋ᠢᠨ ᠡᠮᠦᠨᠡ ᠡᠢᠮᠦ ᠬᠠᠴᠢᠨ ᠬᠥᠮᠦᠨ ᠵᠣᠭᠰᠣᠵᠤ ᠪᠠᠢᠯᠠ!