ᠥᠭᠡᠯᠦᠨ ᠡᠬᠡ ᠶᠢᠨ ᠰᠤᠷᠭᠠᠯ Өөлөн эхийн сургааль
293ᠥᠭᠡᠯᠦᠨ ᠡᠬᠡ ᠶᠢᠨ ᠰᠤᠷᠭᠠᠯ
ᠶᠢᠰᠦᠭᠡᠢ ᠪᠠᠭᠠᠲᠤᠷ ᠦ᠋ᠨ ᠨᠥᠭᠦᠭᠡ ᠭᠡᠷᠭᠡᠢ ᠰᠣᠴᠢᠭᠡᠯ ᠡᠬᠡ ᠡᠴᠡ ᠲᠦᠷᠦᠭᠰᠡᠨ ᠪᠡᠭᠳᠡᠷ ᠂ ᠪᠡᠯᠭᠦᠲᠡᠢ ᠬᠣᠶᠠᠷ ᠬᠡᠦᠬᠡᠳ ᠪᠣᠯ ᠲᠣᠩ ᠠᠯᠢᠶᠠ ᠶᠣᠮ ᠃ ᠲᠡᠲᠡ ᠬᠣᠶᠠᠷ ᠲᠡᠮᠦᠵᠢᠨ ᠂ ᠬᠠᠰᠠᠷ ᠠ᠋ᠴᠠ ᠨᠠᠰᠤ ᠪᠠᠬ᠋ᠠ ᠪᠠᠶ᠋ᠢᠲᠠᠯᠠ ᠲᠡᠲᠡᠨ ᠲᠡᠢ ᠵᠡᠷᠭᠡ ᠨᠣᠴᠣᠯᠲᠤᠨ ᠥᠷᠭᠦᠯᠵᠢ ᠨᠠᠭᠠᠲᠤᠮ ᠲᠣᠭᠯᠠᠭᠠᠮ ᠊ᠢ ᠨᠢ ᠪᠣᠯᠢᠶᠠᠯᠲᠤᠨ ᠲᠡᠮᠡᠴᠡᠳᠡᠭ ᠃ ᠡᠭᠦᠨ ᠳᠦ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠲᠣᠩ ᠲᠠᠬ᠋ᠠ ᠦᠭᠡᠢ ᠪᠣᠯᠪᠠᠴᠤ ᠡᠬᠡ ᠶ᠋ᠢᠨ ᠨᠢᠭᠤᠷ ᠊ᠢ ᠬᠠᠷᠠᠵᠤ ᠦᠩᠭᠡᠷᠡᠭᠦᠯᠵᠦ ᠪᠠᠶ᠋ᠢᠯᠠ ᠃
ᠨᠢᠭᠡᠨ ᠡᠲᠦᠷ ᠂ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠨᠢᠭᠡ ᠪᠣᠯᠵᠤᠮᠤᠷ ᠬᠠᠷᠪᠤᠵᠤ ᠠᠯᠠᠭᠰᠠᠨ ᠳᠦ ᠪᠡᠬ᠋ᠲᠡᠷ ᠪᠡᠯᠭᠦᠲᠡᠢ ᠬᠣᠶᠠᠷ ᠬᠦᠶᠦᠵᠦ ᠢᠷᠡᠭᠡᠳ ᠪᠤᠯᠢᠶᠠᠵᠤ ᠠᠪᠤᠪᠠ ᠃ ᠲᠡᠮᠦᠵᠢᠨ ᠄
《 ᠡᠲᠡ ᠳᠠᠩᠴᠢ ᠬᠡᠲᠦᠷᠡᠵᠦ ᠪᠠᠶ᠋ᠢᠨᠠ ! 》 ᠭᠡᠰᠡᠨ ᠳᠦ ᠬᠠᠰᠠᠷ ᠄
《 ᠭᠣᠣᠯ ᠊ᠢ ᠨᠢ ᠰᠤᠭᠤᠯᠬᠤ ᠶᠤᠮᠰᠠᠨ ! 》 ᠭᠡᠪᠡ ᠃ ᠪᠡᠭᠳᠡᠷ ᠪᠡᠯᠭᠦᠲᠡᠢ ᠬᠣᠶᠠᠷ ᠣᠶ᠋ᠢᠰᠢᠶᠠᠬᠤ ᠴᠦ᠍ ᠦᠭᠡᠢ ᠣᠤᠠᠪᠠ ᠃
ᠮᠠᠷᠭᠠᠰᠢ ᠨᠢ ᠲᠡᠮᠦᠵᠢᠨ ᠂ ᠬᠠᠰᠠᠷ ᠂ ᠪᠡᠭᠳᠡᠷ ᠂ ᠪᠡᠯᠭᠦᠲᠡᠢ ᠲᠥᠷᠪᠡᠭᠥᠯᠡ ᠣᠨᠤᠨ ᠮᠥᠷᠡᠨ ᠪ ᠡᠷᠬᠢ ᠲᠡᠭᠡᠷᠡ ᠬᠠᠮᠲᠤ ᠰᠠᠭᠤᠵᠤ ᠵᠢᠭᠠᠰᠤ ᠬᠥᠬᠢᠳᠡᠭᠰᠡᠨ ᠳᠦ ᠂ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠦ᠋ᠨ ᠬᠦᠬᠢ ᠳᠦ ᠨᠢᠭᠡᠨ ᠴᠠᠶ᠋ᠢᠪᠤᠷ ᠵᠢᠭᠠᠰᠤ ᠣᠷᠤᠪᠠ ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠊ᠢ ᠬᠦᠲᠡᠯᠬᠦ ᠡᠴᠡ ᠡᠮᠦᠨᠡ ᠪᠡᠭᠳᠡᠷ ᠪᠡᠯᠭᠦᠲᠡᠢ ᠭᠦᠶᠦᠨ ᠪᠣᠰᠴᠤ ᠬᠦᠬᠢ ᠡᠴᠡ ᠪᠣᠯᠢᠶᠠᠵᠦ ᠠᠪᠤᠪᠠ ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠡᠨᠡ ᠤᠲᠠᠬ᠋ᠠ ᠲᠡᠰᠴᠦ ᠦᠯᠦ ᠴᠢᠲᠠᠨ ᠂ ᠭᠡᠷ ᠲᠤ ᠪᠡᠨ ᠬᠠᠷᠢᠭᠠᠳ ᠥᠭᠡᠯᠦᠨ ᠡᠬᠡ ᠳᠦ ᠄
《 ᠪᠡᠭᠳᠡᠷ ᠪᠡᠯᠭᠦᠲᠡᠢ ᠬᠣᠶᠠᠷ ᠥᠷᠭᠦᠯᠵᠢ ᠪᠢᠲᠡᠨ ᠊ᠢ ᠳᠠᠷᠤᠯᠠᠨᠠ ᠂ ᠥᠴᠥᠭᠡᠲᠦᠷ ᠨᠢᠭᠡ ᠪᠣᠯᠵᠤᠮᠤᠷ ᠬᠠᠷᠪᠤᠵᠤ ᠠᠯᠠᠭᠰᠠᠨ ᠊ᠢ ᠲᠡᠲᠡ ᠬᠣᠶᠠᠷ ᠪᠣᠯᠢᠶᠠᠵᠦ ᠠᠪᠤᠪᠠ ᠂ ᠡᠨᠡ ᠡᠲᠦᠷ ᠨᠢᠭᠡ ᠴᠠᠶ᠋ᠢᠪᠤᠷ ᠵᠢᠭᠠᠰᠤ ᠬᠦᠭᠢᠲᠠᠵᠦ ᠣᠯᠤᠭᠰᠠᠨ ᠊ᠢ ᠪᠠᠰᠠ ᠲᠡᠲᠡᠨ ᠬᠣᠶᠠᠷ ᠪᠣᠯᠢᠶᠠᠵᠦ ᠠᠪᠤᠪᠠ 》 ᠭᠡᠵᠦ ᠵᠠᠭᠠᠯᠲᠤᠪᠠ ᠃ ᠥᠭᠡᠯᠦᠨ ᠡᠬᠡ ᠲᠡᠲᠡᠨ ᠪ ᠦᠭᠡ ᠶ᠋ᠢ ᠰᠡᠤᠠᠬᠢᠯ ᠲᠠᠯᠪᠢᠨ ᠰᠣᠨᠤᠰᠴᠦ ᠪᠠᠷᠠᠭᠠᠳ ᠂ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠲᠤ ᠡᠶᠡᠯᠳᠡᠭ ᠪᠥᠭᠡᠳ ᠲᠥᠪᠯᠡᠭᠦᠨ ᠶ᠋ᠢᠡᠷ ᠄
《 ᠲᠠ ᠨᠠᠷ ᠴᠦᠮ ᠨᠢᠭᠡ ᠡᠴᠢᠭᠡ ᠶ᠋ᠢᠨ ᠬᠡᠦᠬᠡᠳ ᠪᠠᠶ᠋ᠢᠲᠠᠯᠠ ᠶᠠᠭᠤᠨ ᠳᠦ ᠴᠢᠩᠭᠢᠵᠦ ᠬᠡᠷᠡᠯᠲᠦᠬᠦ ᠪᠤᠢ ? ᠣᠲᠣ ᠲᠠ ᠨᠠᠷ ᠰᠡᠭᠦᠲᠡᠷ ᠡᠴᠡ ᠪᠡᠨ ᠥᠭᠡᠷᠡ ᠨᠥᠬᠥᠷ ᠦᠭᠡᠢ ᠂ ᠰᠡᠭᠦᠯ ᠡᠴᠡ ᠪᠡᠨ ᠥᠭᠡᠷᠡ ᠳᠠᠰᠢᠭᠤᠷ ᠦᠭᠡᠢ ᠪᠠᠶ᠋ᠢᠬᠤ ᠪᠠᠨ ᠮᠡᠲᠡᠬᠦ ᠶᠣᠰᠣᠲᠠᠢ ᠃ ᠲᠠ ᠠᠬᠠ ᠳᠡᠭᠦᠦ ᠨᠠᠷ ᠬᠣᠭᠤᠷᠤᠨᠲᠦ ᠪᠠᠨ ᠡᠶᠡ ᠡᠪ ᠦᠭᠡᠢ ᠂ ᠡᠪᠲᠡᠷᠡᠨ ᠮᠠᠭᠤᠲᠠᠯᠴᠠᠪᠠᠯ ᠲᠠᠲ᠋ᠠᠷ ᠨᠠᠷ ᠬᠢᠭᠡᠳ ᠲᠠᠶ᠋ᠢᠴᠢᠭᠤᠳ ᠠ᠋ᠴᠠ ᠥᠰᠢᠶᠡ ᠪᠡᠨ ᠶᠠᠭᠠᠬᠢᠨ ᠠᠪᠬᠤ ᠪᠢᠯᠡ ? ᠲᠠᠷᠬᠠᠵᠤ ᠪᠣᠲᠠᠷᠠᠭᠰᠠᠨ ᠤᠯᠤᠰ ᠶ᠋ᠢᠠᠨ ᠶᠠᠭᠠᠬᠢᠨ ᠴᠤᠭᠯᠠᠭᠤᠯᠬᠤ ᠪᠢᠯᠡ ? ᠲᠠ ᠨᠠᠷ ᠪᠠᠬ᠋ᠠ ᠪᠢᠰᠢ ᠰᠢᠦ ᠂ ᠤᠴᠢᠷ ᠶᠠᠪᠤᠲᠠᠯ ᠊ᠢ ᠮᠡᠲᠡᠬᠦ ᠶᠣᠰᠣᠲᠠᠢ ᠃ ᠤᠷᠢᠲᠤ ᠶ᠋ᠢᠨ ᠠᠯᠤᠨ ᠭᠤᠸ᠋ᠠ ᠡᠮᠡᠭᠡ ᠶ᠋ᠢᠨ ᠬᠡᠦᠬᠡᠳ ᠶ᠋ᠢᠡᠨ ᠰᠤᠷᠭᠠᠭᠰᠠᠨ ᠦᠯᠢᠭᠡᠷ ᠊ᠢ ᠰᠠᠨᠠᠵᠤ ᠪᠠᠶ᠋ᠢᠬᠤ ᠬᠡᠷᠡᠭᠲᠡᠢ 》 ᠭᠡᠪᠡ ᠃
ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠡᠬᠡ ᠶ᠋ᠢᠨ ᠶ᠋ᠢᠡᠨ ᠦᠭᠡ ᠶ᠋ᠢ ᠦᠯᠦ ᠲᠣᠭᠤᠮᠰᠤᠷᠯᠡᠨ ᠄
《 ᠠᠯᠠᠭᠰᠠᠨ ᠪᠣᠯᠵᠤᠮᠤᠷ ᠊ᠢ ᠪᠤᠯᠢᠶᠠᠲᠠᠯᠠ ᠬᠥᠬᠢᠳᠡᠭᠰᠡᠨ ᠵᠢᠭᠠᠰᠤ ᠶ᠋ᠢ ᠡᠵᠡᠷᠬᠡᠭᠯᠡᠭᠡᠳ ᠪᠠᠶ᠋ᠢᠲᠠᠭ ᠬᠥᠮᠦᠰ ᠲᠡᠢ ᠶᠠᠭᠠᠬᠢᠨ ᠬᠠᠮᠲᠤ ᠠᠮᠢᠲᠤᠷᠠᠬᠤ ᠪᠤᠢ ! 》 ᠭᠡᠳ ᠡᠭᠦᠲᠡ ᠶ᠋ᠢ ᠬᠦᠴᠦᠲᠡᠢ ᠬᠠᠶᠠᠵᠤ ᠭᠠᠷᠪᠠ ᠃
ᠲᠡᠭᠡᠲᠡᠯᠡ ᠪᠡᠭᠳᠡᠷ ᠶᠠᠭ ᠲᠣᠪᠤᠴᠠᠭ ᠰᠠᠭᠤᠭᠠᠳ ᠨᠠᠢ᠍ᠮᠠᠨ ᠰᠢᠷᠬ᠋ᠠ ᠮᠣᠷᠢ ᠬᠢᠭᠡᠳ ᠨᠢᠭᠡ ᠣᠭᠤᠲᠤᠷ ᠬᠣᠩᠭᠣᠷ ᠮᠣᠷᠢ ᠪᠠᠨ ᠬᠠᠷᠢᠭᠤᠯᠵᠤ ᠪᠠᠶ᠋ᠢᠯᠠ ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠡᠬᠡ ᠳᠦ ᠪᠡᠨ ᠵᠠᠭᠠᠯᠲᠤᠭᠠᠳ ᠦᠨᠡᠨ ᠶ᠋ᠢᠡᠨ ᠣᠯᠣᠯ ᠦᠭᠡᠢ ᠭᠡᠲᠡᠷᠭᠦ ᠬᠡᠯᠡᠭᠳᠡᠭᠡᠳ ᠠᠭᠤᠷ ᠶ᠋ᠢᠠᠨ ᠭᠠᠷᠭᠠᠬᠤ ᠭᠠᠵᠠᠷ ᠦᠭᠡᠢ ᠪᠠᠶ᠋ᠢᠬᠰᠠᠨ ᠲᠤᠯᠠ ᠪᠡᠭᠳᠡᠷ ᠭᠠᠭᠴᠠᠭᠠᠷ ᠰᠠᠭᠤᠵᠤ ᠪᠠᠶ᠋ᠢᠬᠤ ᠶ᠋ᠢ ᠬᠠᠷᠠᠭᠠᠳ ᠂ ᠲᠣᠬᠢᠶᠠᠯ ᠪᠣᠯᠪᠠ ᠭᠡᠵᠦ ᠨᠢᠭᠡ ᠨᠢ ᠡᠮᠦᠨᠡ ᠠ᠋ᠴᠠ ᠨᠢᠭᠡ ᠨᠢ ᠬᠣᠶ᠋ᠢᠨᠠ ᠠ᠋ᠴᠠ ᠰᠡᠮᠡᠬᠡᠷ ᠰᠣᠮᠤ ᠪᠠᠨ ᠣᠨᠢᠯᠠᠨ ᠣᠴᠢᠪᠠ ᠃ ᠪᠡᠭᠳᠡᠷ ᠲᠡᠲᠡ ᠬᠣᠶᠠᠷ ᠦ᠋ᠨ ᠲᠦᠷᠢ ᠪᠠᠶ᠋ᠢᠲᠠᠯ ᠶᠡᠷᠦ ᠪᠣᠰᠦ ᠶ᠋ᠢ ᠦᠵᠡᠭᠡᠳ ᠠᠮᠢ ᠶ᠋ᠢ ᠨᠢ ᠬᠣᠷᠤᠭᠠᠬᠤ ᠭᠡᠵᠦ ᠪᠠᠶ᠋ᠢᠬᠤ ᠶ᠋ᠢ ᠲᠦᠰᠦᠪᠯᠡᠨ ᠮᠡᠲᠡᠵᠦ ᠄
《 ᠲᠠᠲ᠋ᠠᠷ ᠨᠠᠷ ᠬᠢᠭᠡᠳ ᠲᠠᠶ᠋ᠢᠴᠢᠭᠤᠳ ᠠ᠋ᠴᠠ ᠥᠰᠢᠶᠡ ᠪᠡᠨ ᠠᠪᠴᠤ ᠴᠢᠲᠠᠭᠠᠲᠤᠢ ᠂ ᠲᠠᠷᠬᠠᠵᠤ ᠪᠤᠲᠠᠷᠠᠭᠰᠠᠨ ᠤᠯᠤᠰ ᠶ᠋ᠢᠠᠨ ᠴᠤᠭᠯᠠᠭᠤᠯᠵᠤ ᠳᠡᠶ᠋ᠢᠯᠦᠭᠡᠳᠦᠢ ᠪᠠᠶ᠋ᠢᠲᠠᠯᠠ ᠲᠠ ᠬᠣᠶᠠᠷ ᠶᠠᠭᠠᠬᠢᠨ ᠨᠠᠮᠠ ᠶ᠋ᠢ ᠨᠢᠲᠦᠨ ᠪ ᠰᠣᠷᠮᠤᠤᠰᠤ ᠂ ᠠᠮᠠᠨ ᠪ ᠪᠥᠭᠡᠯᠵᠢᠰᠦ ᠪᠣᠯᠭᠠᠵᠤ ᠪᠠᠶ᠋ᠢᠬ᠋ᠠ ᠪᠤᠢ ? ᠣᠲᠣ ᠰᠡᠭᠦᠲᠡᠷ ᠡᠴᠡ ᠥᠭᠡᠷᠡ ᠨᠥᠬᠥᠷ ᠦᠭᠡᠢ ᠂ ᠰᠡᠭᠦᠯ ᠡᠴᠡ ᠥᠭᠡᠷᠡ ᠲᠠᠰᠢᠭᠤᠷ ᠦᠭᠡᠢ ᠪᠠᠶ᠋ᠢᠲᠠᠯᠠ ᠲᠠ ᠶᠠᠭᠤᠨ ᠳᠦ ᠢᠩᠭᠢᠵᠦ ᠠᠬᠠ ᠳᠡᠭᠦᠦ ᠰᠠᠲᠤᠨ ᠶ᠋ᠢᠠᠨ ᠬᠢᠲᠤᠬᠤ ᠶᠤᠮ ? 》 ᠭᠡᠵᠦ ᠬᠡᠯᠡᠭᠡᠳ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠊ᠢ ᠬᠠᠷᠠᠭᠰᠠᠨ ᠴᠢᠨᠢ ᠬᠣᠶᠠᠭᠤᠯᠠ ᠶᠠᠭ ᠯᠠ ᠰᠣᠨᠣᠰᠤᠭᠰᠠᠨ ᠦᠭᠡᠢ ᠰᠢᠭ᠌ ᠰᠤᠮᠤ ᠪᠠᠨ ᠣᠨᠢᠯᠠᠭᠰᠠᠨ ᠬᠡᠪ ᠶ᠋ᠢᠡᠷ ᠣᠶ᠋ᠢᠷᠠᠲᠤᠵᠤ ᠢᠷᠡᠯᠡ ᠃ ᠪᠡᠭᠳᠡᠷ ᠶᠠᠭᠤ ᠬᠡᠯᠡᠭᠰᠡᠨ ᠴᠦ᠍ ᠨᠢᠭᠡᠨᠲᠡ ᠲᠤᠰᠠ ᠪᠣᠯᠬᠤ ᠦᠭᠡᠢ ᠶ᠋ᠢ ᠮᠡᠲᠡᠵᠦ ᠄
《 ᠪᠡᠭᠳᠡᠷ ᠨᠠᠮᠠ ᠶ᠋ᠢ ᠬᠣᠷᠣᠭᠠᠭᠰᠠᠨ ᠴᠦ᠍ ᠶᠠᠭᠠᠬᠢᠬᠤᠪ ᠂ ᠪᠡᠯᠭᠦᠲᠡᠢ ᠶ᠋ᠢ ᠮᠢᠨᠢ ᠪᠢᠲᠡᠭᠡᠢ ᠬᠥᠨᠦᠭᠡᠭᠲᠦᠨ ᠂ ᠪᠡᠯᠭᠦᠲᠡᠢ ᠶ᠋ᠢ ᠬᠥᠨᠥᠭᠡᠪᠡᠯ ᠭᠠᠯ ᠭᠣᠯᠣᠮᠲᠠ ᠮᠢᠨᠢ ᠲᠠᠰᠤᠷᠠᠨᠠ ! 》 ᠭᠡᠵᠦ ᠬᠡᠯᠡᠭᠡᠳ ᠵᠠᠪᠢᠯᠤᠨ ᠰᠠᠭᠤᠵᠤ ᠬᠦᠯᠢᠶᠡᠪᠡ ᠃ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠪᠡᠭᠲᠡᠷ ᠦ᠋ᠨ ᠦᠭᠡ ᠶ᠋ᠢ ᠰᠣᠨᠣᠰᠤᠯ ᠦᠭᠡᠢ ᠬᠣᠶ᠋ᠢᠨᠠ ᠤᠷᠲᠤ ᠠ᠋ᠴᠠ ᠬᠠᠷᠪᠤᠵᠤ ᠣᠤᠠᠪᠠ ᠁
ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠨᠤᠮᠤ ᠰᠤᠮᠤ ᠪᠠᠨ ᠭᠡᠷ ᠦ᠋ᠨ ᠭᠠᠲᠠᠨᠠ ᠣᠷᠬᠢᠵᠤ ᠭᠡᠷ ᠲᠦ ᠪᠡᠨ ᠣᠷᠣᠭᠰᠠᠨ ᠳᠦ ᠂ ᠥᠭᠡᠯᠦᠨ ᠡᠬᠡ ᠲᠡᠲᠡᠨ ᠪ ᠴᠢᠷᠠᠢ ᠶ᠋ᠢ ᠬᠠᠷᠠᠮᠠᠭᠴᠠ ᠳᠠᠷᠤᠢ ᠤᠴᠢᠷ ᠊ᠢ ᠮᠡᠲᠡᠪᠡ ᠃ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠳᠣᠲᠣᠷᠠ ᠪᠤᠴᠠᠯᠤᠨ ᠦᠭᠡ ᠪᠡᠨ ᠬᠡᠯᠡᠵᠦ ᠭᠠᠷᠬᠤ ᠦᠭᠡᠢ ᠪᠣᠯᠪᠠ ᠃ 《 ᠦᠭᠡᠢ ᠂ ᠡᠨᠡ ᠬᠠᠨᠢ ᠪᠠᠨ ᠬᠠᠵᠠᠵᠤ ᠢᠵᠢᠯᠢ ᠪᠡᠨ ᠢᠳᠡᠭᠴᠢ ᠬᠣᠶᠠᠷ ᠮᠠᠩᠭᠤᠰ ᠊ᠢ ᠡᠷᠦᠬᠡ ᠭᠡᠷ ᠡᠴᠡ ᠥᠯᠲᠡᠨ ᠬᠥᠭᠡᠭᠡᠵᠦ ᠂ ᠦᠵᠡᠬᠦ ᠨᠢᠲᠦᠨ ᠪ ᠳᠠᠯᠳᠠ ᠣᠷᠣᠭᠤᠯᠬᠤ ᠶᠤᠮᠰᠠᠨ ! 》 ᠡᠷᠭᠢᠭᠡᠳ ᠨᠢᠭᠡ ᠪᠣᠲᠣᠬᠤᠯᠠ ᠄ 《 ᠢᠩᠭᠢᠵᠦ ᠬᠢᠬᠦ ᠨᠢ ᠶᠠᠭᠤᠨ ᠲᠤᠰᠠ ᠂ ᠭᠠᠭᠴᠠ ᠥᠰᠢᠶᠡᠲᠡᠨ ᠊ᠢ ᠪᠠᠶᠠᠷᠯᠠᠭᠤᠯᠬᠤ ᠲᠡᠲᠦᠢ ᠪᠢᠵᠡ ! ᠡᠨᠡ ᠴᠥᠮ ᠡᠩ ᠦ᠋ᠨ ᠡᠲᠦᠷ ᠲᠦ ᠮᠢᠨᠦ ᠴᠢᠩᠲᠠᠯᠠᠨ ᠰᠤᠷᠭᠠᠭᠰᠠᠨ ᠦᠭᠡᠢ ᠶ᠋ᠢᠨ ᠭᠡᠮ ᠪᠤᠶᠤ ! 》 ᠭᠡᠵᠦ ᠡᠪᠴᠢᠭᠦᠦ ᠪᠡᠨ ᠰᠢᠭᠠᠨ ᠤᠲᠠᠲᠠᠯᠠ ᠪᠡᠭᠲᠡᠷᠡᠨ ᠪᠠᠶ᠋ᠢᠵᠤ ᠄
《 ᠬᠠᠨᠢ ᠪᠠᠨ ᠪᠠᠷᠠᠭᠰᠠᠳ
ᠢᠵᠢᠯᠢ ᠪᠡᠨ ᠢᠳᠡᠭᠰᠡᠳ
ᠬᠠᠯᠠᠭᠤᠨ ᠬᠡᠪᠡᠯᠢ ᠡᠴᠡ ᠭᠠᠷᠬᠤ ᠳᠦ ᠪᠠᠨ
ᠬᠠᠷᠠ ᠨᠥᠵᠢ ᠠᠤᠠᠬᠤᠵᠤ ᠲᠦᠷᠦᠭᠰᠡᠨ ᠪᠢᠯᠡ ᠃
ᠬᠠᠷᠪᠢᠰᠤ ᠪᠠᠨ ᠬᠠᠵᠠᠬᠤ
ᠬᠠᠲᠠᠷ ᠨᠣᠬᠠᠢ ᠮᠡᠲᠦ
ᠬᠠᠲᠠᠨ ᠳᠦ ᠲᠣᠪᠲᠤᠯᠬᠤ
ᠬᠠᠷᠴᠠᠭᠠᠢ ᠰᠢᠪᠠᠭᠤ ᠮᠡᠲᠦ
ᠠᠭᠤᠷ ᠶ᠋ᠢᠠᠨ ᠳᠠᠷᠤᠨ ᠶᠠᠲᠠᠬᠤ
ᠣᠮᠤᠭᠲᠤ ᠠᠷᠰᠯᠠᠨ ᠮᠡᠲᠦ
ᠠᠮᠢᠲᠤ ᠪᠠᠷ ᠵᠠᠯᠭᠢᠬᠤ
ᠠᠶᠤᠯᠲᠤ ᠮᠠᠩᠭᠤᠰ ᠮᠡᠲᠦ
ᠰᠡᠭᠦᠲᠡᠷ ᠶ᠋ᠢᠡᠨ ᠳᠤᠪᠳᠤᠯᠠᠬᠤ
ᠱᠣᠩᠬᠣᠷ ᠰᠢᠪᠠᠭᠤ ᠮᠡᠲᠦ
ᠰᠡᠮᠡᠬᠡᠷ ᠵᠠᠯᠭᠢᠬᠤ
ᠴᠤᠷᠬᠠ ᠵᠢᠭᠠᠰᠤ ᠮᠡᠲᠦ
ᠪᠣᠲᠤᠭᠤ ᠶ᠋ᠢᠨ ᠪᠣᠷᠪᠢ ᠶ᠋ᠢ ᠬᠠᠵᠠᠬᠤ
ᠪᠤᠤᠷᠠ ᠮᠡᠲᠦ
ᠪᠣᠷᠤᠭᠠᠨᠲᠤ ᠡᠲᠦᠷ ᠵᠠᠪᠰᠢᠬᠤ
ᠴᠢᠨᠣᠠ ᠮᠡᠲᠦ
ᠬᠡᠦᠬᠡᠳ ᠦᠷᠡ ᠪᠡᠨ
ᠭᠡᠯᠢᠨ ᠶᠠᠲᠠᠵᠤ
ᠨᠢᠲᠤᠯᠤᠨ ᠢᠲᠡᠬᠦ
ᠨᠢᠭᠦᠯᠲᠦ ᠠᠩᠭᠢᠷ ᠮᠡᠲᠦ
ᠬᠡᠪᠲᠡᠰᠢ ᠶ᠋ᠢ ᠬᠥᠲᠡᠯᠭᠡᠪᠡᠯ
ᠭᠡᠲᠡᠷᠭᠦ ᠲᠣᠪᠲᠤᠯᠵᠤ
ᠴᠥᠯᠪᠡᠨ ᠢᠲᠡᠬᠦ
ᠴᠥᠭᠡᠪᠦᠷᠢ ᠴᠢᠨᠣᠠ ᠮᠡᠲᠦ
ᠳᠠᠭᠤ ᠶ᠋ᠢ ᠰᠣᠨᠣᠰᠪᠠᠯ
ᠳᠠᠭᠠᠷᠢᠨ ᠣᠷᠣᠵᠤ
ᠪᠠᠷᠢᠵᠤ ᠢᠲᠡᠬᠦ
ᠪᠠᠷᠰ ᠮᠡᠲᠦ ᠠᠮᠢᠲᠠᠳ ᠲᠠᠨ ᠊ᠢ ᠶᠠᠭᠠᠬᠢᠬᠤ ᠪᠢᠯᠡ ᠪᠢ! 》 ᠭᠡᠵᠦ ᠨᠢᠭᠡᠨ ᠵᠡᠷᠭᠡ ᠬᠠᠷᠢᠶᠠᠵᠤ ᠳᠣᠲᠣᠷᠠ ᠨᠢ ᠰᠠᠶᠢ ᠪᠠᠬᠠᠨ ᠠᠭᠤᠵᠢᠷᠠᠵᠤ ᠄
《 ᠰᠡᠭᠦᠲᠡᠷ ᠡᠴᠡ ᠥᠭᠡᠷᠡ ᠨᠥᠬᠥᠷ ᠦᠭᠡᠢ
ᠰᠡᠭᠦᠯ ᠡᠴᠡ ᠥᠭᠡᠷᠡ ᠲᠠᠰᠢᠭᠤᠷ ᠦᠭᠡᠢ
ᠲᠠᠶ᠋ᠢᠴᠢᠭᠤᠳ ᠠ᠋ᠴᠠ ᠥᠰᠢᠶᠡ ᠪᠡᠨ ᠶᠠᠭᠠᠬᠢᠵᠤ ᠠᠪᠤᠨᠠ?
ᠲᠠᠷᠬᠠᠭᠰᠠᠨ ᠤᠯᠤᠰ ᠶ᠋ᠢᠠᠨ ᠶᠠᠭᠠᠬᠢᠵᠤ ᠴᠤᠭᠯᠠᠭᠤᠯᠤᠨᠠ? ᠭᠡᠵᠦ ᠪᠠᠶ᠋ᠢᠲᠠᠯᠠ ᠲᠠ ᠨᠠᠷ ᠶᠠᠭᠤᠨ ᠳᠦ ᠢᠩᠭᠢᠵᠦ ᠥᠪᠡᠷ ᠵᠠᠭᠤᠷᠠ ᠪᠠᠨ ᠬᠣᠷᠣᠭᠠᠵᠤ ᠦᠰᠲᠡᠨ ᠳᠦ ᠲᠤᠰᠠᠯᠠᠬᠤ ᠬᠡᠷᠡᠭ ᠦᠢᠯᠡᠤᠠᠬᠦ ᠪᠤᠢ! 》 ᠭᠡᠵᠦ ᠬᠡᠯᠡᠭᠡᠳ ᠂ ᠥᠭᠡᠯᠦᠨ ᠡᠬᠡ ᠵᠠᠪᠢᠯᠤᠨ ᠰᠠᠭᠤᠵᠤ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠊ᠢ ᠤᠷᠲᠤ ᠪᠠᠨ ᠰᠥᠭᠥᠤᠠᠬᠡᠨ ᠄
《 ᠲᠡᠮᠦᠵᠢᠨ ᠡ ᠂ ᠤᠷᠢᠲᠤ ᠠᠯᠤᠨ ᠭᠤᠸ᠋ᠠ ᠡᠮᠡᠭᠡ ᠲᠠᠪᠤᠨ ᠬᠡᠦᠬᠡᠳ ᠶ᠋ᠢᠡᠨ ᠬᠡᠷᠬᠢᠨ ᠰᠤᠷᠭᠠᠭᠰᠠᠨ ᠊ᠢ ᠴᠡᠭᠡᠵᠢᠯᠡᠵᠦ ᠪᠠᠶ᠋ᠢᠨᠠ ᠤᠤ? 》 ᠭᠡᠵᠦ ᠠᠰᠠᠭᠤᠪᠠ ᠃ ᠲᠡᠮᠦᠵᠢᠨ ᠲᠣᠯᠣᠭᠠᠢ ᠪᠠᠨ ᠪᠥᠬᠥᠶ᠋ᠢᠨ ᠄
《 ᠬᠠᠷᠢᠯᠴᠠᠨ ᠡᠪᠲᠡᠷᠡᠨ ᠮᠠᠭᠤᠲᠠᠯᠴᠠᠵᠤ ᠭᠠᠭᠴᠠ ᠭᠠᠭᠴᠠ ᠪᠠᠷ ᠰᠠᠯᠪᠠᠯ ᠨᠢᠵᠡᠭᠡᠳ ᠮᠥᠰᠥᠨ ᠮᠡᠲᠦ ᠬᠡᠨ ᠬᠥᠮᠦᠨ ᠳᠦ ᠬᠢᠯᠪᠠᠷᠬᠠᠨ ᠳᠡᠢᠯᠦᠭᠳᠡᠨᠡ ᠂ ᠡᠶᠡ ᠡᠪ ᠶ᠋ᠢᠡᠷ ᠨᠢᠭᠡᠲᠦᠨ ᠪᠦᠯᠬᠦᠮᠲᠡᠵᠦ ᠶᠠᠪᠤᠪᠠᠯ ᠬᠠᠮᠲᠤ ᠪᠠᠭᠯᠠᠭᠰᠠᠨ ᠲᠠᠪᠤᠨ ᠮᠥᠰᠥᠨ ᠮᠡᠲᠦ ᠬᠡᠨ ᠬᠥᠮᠦᠨ ᠳᠦ ᠬᠢᠯᠪᠠᠷ ᠦᠯᠦ ᠳᠡᠢᠯᠦᠭᠳᠡᠨᠡ ᠭᠡᠵᠡᠢ! 》
ᠥᠭᠡᠯᠦᠨ ᠡᠬᠡ ᠪᠠᠰᠠ ᠬᠠᠰᠠᠷ ᠠ᠋ᠴᠠ ᠄
《 ᠬᠠᠰᠠᠷ ᠡ ᠂ ᠪᠣᠲᠠᠨᠴᠠᠷ ᠡᠪᠦᠭᠡ ᠬᠣᠵᠢᠮ ᠨᠢ ᠶᠠᠭᠠᠬᠢᠬᠰᠠᠨ ᠪᠢᠯᠡ ? 》 ᠭᠡᠵᠦ ᠠᠰᠠᠭᠤᠪᠠ ᠃ ᠬᠠᠰᠠᠷ ᠨᠠᠮ ᠳᠠᠭᠤ ᠪᠠᠷ ᠄
《 ᠠᠯᠤᠨ ᠭᠤᠸ᠋ᠠ ᠡᠮᠡᠭᠡ ᠦᠭᠡᠢ ᠪᠣᠯᠤᠭᠰᠠᠨ ᠪ ᠬᠣᠶ᠋ᠢᠨᠠ ᠪᠦᠬᠦᠨᠦᠲᠠᠢ ᠂ ᠪᠡᠯᠭᠦᠨᠦᠲᠡᠢ ᠂ ᠪᠤᠬᠠ ᠬᠠᠲᠠᠬᠢ ᠂ ᠪᠣᠭᠲᠣ ᠰᠠᠯᠵᠢ ᠳᠥᠷᠪᠡᠭᠦᠯᠡ ᠡᠬᠡ ᠶ᠋ᠢᠨ ᠶ᠋ᠢᠡᠨ ᠦᠭᠡ ᠶ᠋ᠢ ᠥᠲᠡᠭᠡᠷᠦᠨ ᠳᠡᠭᠦᠦ ᠪᠣᠲᠠᠨᠴᠠᠷ ᠊ᠢ ᠤᠷᠤᠭ ᠲᠤ ᠦᠯᠦ ᠲᠣᠭᠠᠴᠠᠨ ᠭᠠᠭᠴᠠᠭᠠᠷ ᠊ᠢ ᠶᠠᠪᠤᠭᠤᠯᠪᠠ ᠃ ᠬᠣᠵᠢᠮ ᠨᠢ ᠲᠡᠲᠡ ᠬᠡᠲᠦᠭᠦᠯᠡ ᠳᠡᠭᠦᠦ ᠪᠡᠨ ᠭᠠᠭᠴᠠᠭᠠᠷ ᠊ᠢ ᠰᠢᠬᠠᠵᠤ ᠶᠠᠪᠤᠭᠤᠯᠤᠭᠰᠠᠨ ᠳᠦ ᠪᠠᠨ ᠭᠡᠮᠰᠢᠵᠦ ᠲᠡᠭᠦᠨ ᠊ᠢ ᠡᠷᠢᠵᠦ ᠠᠪᠴᠢᠷᠠᠪᠠ ᠂ ᠲᠡᠭᠡᠭᠡᠳ ᠠᠬᠠ ᠳᠡᠭᠦᠦ ᠬᠣᠭᠣᠷᠣᠨᠲᠣ ᠪᠠᠨ ᠡᠶᠡ ᠡᠪ ᠶ᠋ᠢᠠᠨ ᠨᠢᠭᠡᠲᠦᠨ ᠪᠦᠯᠬᠦᠮᠲᠡᠵᠦ ᠠᠶ᠋ᠢᠮᠠᠭ ᠤᠭᠰᠠᠬ᠋ᠠ ᠪᠠᠨ ᠮᠠᠨᠲᠤᠭᠤᠯᠵᠤ ᠶᠠᠪᠤᠵᠠᠢ 》 ᠭᠡᠵᠡᠢ ᠃
ᠢᠩᠭᠢᠭᠡᠳ ᠥᠭᠡᠯᠦᠨ ᠡᠬᠡ ᠶ᠋ᠢᠨ ᠠᠭᠤᠷ ᠰᠠᠶᠢ ᠲᠠᠶ᠋ᠢᠤᠠᠬᠤᠷᠠᠵᠤ ᠂ ᠲᠡᠮᠦᠵᠢᠨ ᠬᠠᠰᠠᠷ ᠬᠣᠶᠠᠷ ᠲᠤ ᠄
《 ᠲᠠ ᠬᠣᠶᠠᠷ ᠡᠨᠡ ᠬᠡᠯᠡᠭᠰᠡᠨ ᠦᠭᠡ ᠪᠡᠨ ᠪᠠᠲᠤ ᠴᠡᠭᠡᠵᠢᠯᠡᠵᠦ ᠂ ᠬᠣᠶ᠋ᠢᠰᠢᠲᠠ ᠠᠬᠠ ᠳᠡᠭᠦᠦ ᠬᠣᠭᠣᠷᠣᠨᠲᠣ ᠪᠠᠨ
ᠡᠶᠡ ᠡᠪ ᠶ᠋ᠢᠠᠨ ᠨᠢᠭᠡᠤᠠᠴᠦ
ᠡᠭᠦᠷᠢᠲᠡ ᠪᠦᠯᠬᠦᠮᠲᠡᠵᠦ ᠶᠠᠪᠤ
ᠦᠬᠡᠷ ᠦ᠋ᠨ ᠬᠣᠶᠠᠷ ᠡᠪᠡᠷ ᠮᠡᠲᠦ
ᠥᠨᠢᠲᠡ ᠪᠤᠤ ᠬᠠᠭᠠᠴᠠ
ᠤᠨᠠᠭᠰᠠᠨ ᠭᠠᠵᠠᠷ ᠲᠤ ᠨᠢ ᠡᠷᠭᠦᠵᠦ
ᠤᠷᠤᠭᠤᠲᠠᠭᠰᠠᠨ ᠭᠠᠵᠠᠷ ᠲᠤ ᠨᠢ ᠲᠠᠲᠠᠵᠤ ᠶᠠᠪᠤ
ᠳᠤᠤᠭᠠᠷᠪᠠᠯ ᠳᠠᠭᠤ ᠨᠡᠮᠡᠵᠦ
ᠳᠤᠭᠲᠤᠷᠪᠠᠯ ᠬᠦᠴᠦ ᠨᠡᠮᠡᠵᠦ ᠶᠠᠪᠤ 》 ᠭᠡᠵᠦ ᠰᠤᠷᠭᠠᠵᠤ ᠵᠠᠬᠢᠵᠠᠢ ᠃