ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠬᠢᠴᠢᠶᠡᠯ – ᠠ ᠂ ᠳ᠋ᠠᠣᠲ᠋ᠠᠢ Хамаг сүүлчийн хичээл – А. Доде
6467
ᠬᠠᠮᠤᠭ ᠰᠡᠭᠦᠯᠴᠢ ᠶᠢᠨ ᠬᠢᠴᠢᠶᠡᠯ
ᠠ᠂ ᠳ᠋ᠠᠣᠲ᠋ᠠᠢ
ᠲᠡᠷᠡ ᠥᠷᠯᠥᠭᠡ ᠪᠢ᠂ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠨ ᠲᠤᠩ ᠶᠡᠬᠡ ᠬᠣᠵᠢᠳᠠᠵᠤ ᠣᠴᠢᠭᠰᠠᠨ ᠲᠤᠯᠠ ᠪᠠᠭᠰᠢ ᠬᠠᠮᠸᠯ ᠳ᠋ᠤ᠌ ᠵᠢᠮᠡᠯᠡᠭᠳᠡᠬᠦ ᠡᠴᠡ ᠪᠡᠨ ᠤᠬᠠᠭᠠᠨ ᠦᠭᠡᠢ ᠠᠶᠤᠭᠰᠠᠨ ᠪᠢᠯᠡ᠃ ᠲᠡᠷᠡ ᠡᠳᠦᠷ ᠥᠨᠥᠬᠢ ᠦᠢᠯᠡ ᠦᠭᠡ ᠶ᠋ᠢᠨ ᠬᠤᠪᠢᠯᠤᠯ ᠢ᠋ᠶ᠋ᠠᠨ ᠪᠢᠳᠡᠨ ᠡᠴᠡ ᠠᠰᠠᠭᠤᠬᠤ ᠭᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠪᠢ ᠶᠠᠳᠠᠬᠤ ᠳ᠋ᠤ᠌ ᠪᠠᠨ ᠲᠡᠭᠦᠨ ᠡᠴᠡ ᠨᠢ ᠨᠢᠭᠡ ᠶ᠋ᠢ ᠴᠦ᠍ ᠣᠯᠢᠭᠲᠠᠢᠬᠠᠨ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠲᠤᠯᠠ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠴᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠭᠠᠳᠠᠭᠤᠷ ᠶᠠᠪᠤᠵᠤ ᠵᠤᠭᠠᠴᠠᠮᠠᠷ ᠰᠠᠨᠠᠭᠳᠠᠯᠠ᠃
ᠲᠡᠷᠡ ᠡᠳᠦᠷ ᠦ᠋ᠨ ᠴᠡᠯᠮᠡᠭ ᠪᠥᠭᠡᠳ ᠳᠤᠯᠠᠭᠠᠬᠠᠨ ᠴᠤ᠌ ᠭᠡᠵᠦ ᠠ᠋! ᠶᠡᠬᠡ ᠠᠯᠠᠭ ᠪᠢᠯᠵᠤᠤᠬᠠᠢ ᠨᠤᠭᠤᠳ ᠮᠣᠳᠣᠳ ᠲᠤ᠌ ᠪᠠᠨ ᠳᠣᠩᠭᠣᠳᠬᠤ ᠨᠢ ᠶᠠᠭᠤᠲᠠᠢ ᠰᠠᠢᠬᠠᠨ ᠠᠵᠢ᠃ ᠮᠣᠳᠣ ᠵᠦᠰᠦᠬᠦ ᠦᠢᠯᠡᠳᠪᠦᠷᠢ ᠶ᠋ᠢᠨ ᠠᠷᠤ ᠶ᠋ᠢᠨ ᠵᠦᠯᠭᠡᠨ ᠳᠡᠭᠡᠷᠡ ᠪᠠᠰᠠ ᠫᠷᠦ᠋ᠰᠰᠢ ᠶ᠋ᠢᠨ ᠴᠡᠷᠢᠭ ᠪᠣᠯᠪᠠᠰᠤᠷᠠᠯ ᠬᠢᠵᠦ ᠪᠠᠢᠯᠠ᠃ ᠡᠳᠡᠭᠡᠷ ᠪᠦᠬᠦᠨ ᠨᠢ ᠨᠠᠳᠠ ᠳ᠋ᠤ᠌ ᠦᠢᠯᠡ ᠦᠭᠡ ᠶ᠋ᠢᠨ ᠬᠤᠪᠢᠯᠤᠯ ᠠ᠋ᠴᠠ ᠬᠠᠪᠢ ᠦᠭᠡᠢ ᠲᠠᠭᠠᠲᠠᠢ ᠰᠠᠨᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠪᠡᠶᠡ ᠪᠡᠨ ᠪᠠᠷᠢᠵᠤ ᠰᠤᠷᠭᠠᠭᠤᠯᠢ ᠤᠷᠤᠭᠤ ᠪᠠᠨ ᠶᠠᠭᠠᠷᠠᠨ ᠭᠦᠶᠦᠵᠦ ᠪᠢᠯᠡ᠃
ᠲᠣᠰᠬᠣᠨ ᠤ᠋ ᠵᠠᠬᠢᠷᠭᠠ ᠶ᠋ᠢᠨ ᠬᠠᠵᠠᠭᠤ ᠪᠠᠷ ᠭᠠᠷᠬᠤ ᠳ᠋ᠤ᠌ ᠵᠠᠷᠯᠠᠯ ᠤ᠋ᠨ ᠰᠠᠮᠪᠠᠷᠠ ᠶ᠋ᠢᠨ ᠳᠡᠷᠭᠡᠳᠡ ᠪᠠᠬᠠᠨ ᠤᠯᠤᠰ ᠪᠤᠵᠢᠭᠢᠨᠠᠯᠳᠤᠵᠤ ᠪᠠᠢᠯᠠ᠃ ᠣᠢᠷᠠ ᠶ᠋ᠢᠨ ᠬᠣᠶᠠᠷ ᠵᠢᠯ ᠡᠴᠡ ᠮᠠᠨ ᠤ᠋ ᠲᠣᠰᠬᠣᠨ ᠳ᠋ᠤ᠌ ᠲᠠᠷᠬᠠᠭᠳᠠᠭᠰᠠᠨ᠄ ᠲᠡᠢᠨ ᠳ᠋ᠦ᠍ ᠢᠯᠠᠭᠳᠠᠯᠠ᠂ ᠴᠡᠷᠢᠭ ᠲᠦ᠍ ᠮᠣᠷᠳᠠᠯᠠ ᠭᠡᠬᠦ ᠮᠡᠲᠦᠴᠢᠯᠡᠨ ᠴᠡᠷᠢᠭ ᠦ᠋ᠨ ᠱᠲ᠋ᠠᠪ ᠤ᠋ᠨ ᠬᠢᠨ ᠦ᠌ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠥᠯᠵᠡᠢ ᠪᠤᠰᠤ ᠶ᠋ᠢᠨ ᠵᠠᠷᠯᠠᠯ ᠮᠡᠳᠡᠭᠡ ᠨᠦ᠍ᠭᠦᠳ ᠴᠥᠮ ᠡᠨᠳᠡ ᠡᠴᠡ ᠡᠭᠦᠰᠳᠡᠭ ᠶᠦᠮ᠃
ᠪᠢ ᠠᠯᠬᠤᠬᠤ ᠵᠠᠭᠤᠷᠠ ᠪᠠᠨ᠄ 《ᠵᠠ᠂ ᠪᠠᠰᠠ ᠶᠠᠭᠤ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠪᠣᠯ ᠳᠠ ?》 ᠭᠡᠵᠦ ᠪᠣᠳᠣᠵᠤ ᠶᠠᠪᠤᠯᠠ᠃
ᠲᠡᠮᠦᠷ ᠦ᠋ᠨ ᠳᠠᠷᠬᠠᠨ ᠸᠠᠱᠢᠲ᠋ ᠭᠤᠸᠠᠢ ᠱᠠᠪᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠣᠯᠠᠨ ᠤ᠋ ᠳᠣᠲᠣᠷᠠ ᠰᠢᠬᠠᠯᠳᠤᠵᠤ ᠵᠠᠷᠯᠠᠯ ᠦᠵᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠮᠢᠨᠦ ᠭᠦᠶᠦᠵᠦ ᠶᠠᠪᠤᠭᠠ ᠶ᠋ᠢ ᠬᠠᠷᠠᠩᠭᠤᠲᠠ᠄ 《ᠪᠢᠲᠡᠭᠡᠢ ᠶᠠᠭᠠᠷᠠ ᠬᠦᠦ ᠮᠢᠨᠢ᠂ ᠴᠢ ᠶᠠᠭᠠᠬᠢᠯᠠ ᠴᠤ᠌ ᠭᠡᠰᠡᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠪᠠᠨ ᠡᠷᠲᠡ ᠬᠦᠷᠦᠨᠡ!》 ᠭᠡᠵᠦ ᠬᠠᠰᠬᠢᠷᠤᠯᠠ᠃
ᠪᠢ ᠲᠡᠭᠦᠨ ᠢ᠋ ᠨᠠᠳᠠ ᠪᠠᠷ ᠲᠣᠭᠯᠠᠵᠤ ᠪᠠᠢᠭᠠ ᠪᠠᠢᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠭᠡᠵᠦ ᠰᠠᠨᠠᠭᠠᠳ ᠪᠥᠭᠯᠡᠷᠡᠵᠦ ᠦᠬᠦᠮᠡᠷ ᠭᠦᠶᠦᠭᠰᠡᠭᠡᠷ ᠬᠠᠮᠸᠯ ᠪᠠᠭᠰᠢ ᠶ᠋ᠢᠨ ᠵᠢᠵᠢᠭᠬᠡᠨ ᠬᠠᠰᠢᠢᠠ ᠤᠷᠤᠭᠤ ᠨᠢ ᠣᠷᠣᠭᠰᠠᠨ ᠪᠠᠢᠯᠠ᠃
ᠮᠠᠨ ᠤ᠋ ᠬᠢᠨ ᠶᠡᠷᠦ ᠳ᠋ᠦ᠍ ᠪᠡᠨ ᠬᠢᠴᠢᠶᠡᠯ ᠡᠬᠢᠯᠡᠭᠰᠡᠭᠡᠷ ᠶᠡᠬᠡ ᠯᠡ ᠦᠢᠮᠡᠵᠦ ᠱᠤᠤᠭᠢᠳᠠᠭ ᠪᠥᠭᠡᠳ ᠡᠨᠡ ᠨᠢ ᠭᠤᠳᠤᠮᠵᠢᠨ ᠳ᠋ᠤ᠌ ᠬᠦᠷᠲᠡᠯᠡ ᠢᠯᠡᠬᠡᠨ ᠰᠣᠨᠣᠰᠳᠠᠳᠠᠭ ᠪᠢᠯᠡ᠃ ᠮᠠᠨ ᠤ᠋ ᠨᠥᠬᠥᠳ ᠦ᠋ᠨ ᠪᠢᠴᠢᠭ ᠦ᠋ᠨ ᠰᠢᠷᠡᠭᠡᠨ ᠦ᠌ ᠰᠢᠷᠭᠤᠭᠤᠯ ᠢ᠋ᠶ᠋ᠠᠨ ᠨᠡᠭᠡᠭᠡᠵᠦ ᠬᠠᠭᠠᠬᠤ ᠴᠢᠮᠡᠭᠡ᠂ ᠪᠢᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠢᠬᠢ ᠪᠡᠨ ᠲᠠᠭᠯᠠᠵᠤ ᠳᠡᠭᠡᠷᠡ ᠳᠠᠭᠤᠨ ᠢ᠋ᠶ᠋ᠠᠷ ᠴᠡᠭᠡᠵᠢ ᠪᠡᠷ ᠤᠩᠰᠢᠬᠤ ᠴᠢᠮᠡᠭᠡ ᠁ ᠪᠠᠰᠠ ᠪᠠᠭᠰᠢ ᠶ᠋ᠢᠨ ᠮᠢᠨᠢ ᠥᠨᠥᠬᠢ ᠪᠦᠳᠦᠭᠦᠨ ᠲᠡᠮᠦᠷ ᠱᠤᠭᠤᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠷᠡᠭᠡ ᠶ᠋ᠢ ᠳᠡᠰ ᠨᠢᠰ ᠬᠢᠲᠡᠯᠡ ᠪᠠᠯᠪᠠᠵᠤ 《ᠪᠢᠲᠡᠭᠡᠢ ᠱᠤᠤᠭᠢ! ᠪᠢᠲᠡᠭᠡᠢ ᠱᠤᠤᠭᠢ ᠁》 ᠭᠡᠬᠦ ᠳᠠᠭᠤ ᠵᠡᠷᠭᠡ ᠪᠡᠷ ᠳᠤᠭᠤᠯᠳᠠᠵᠤ ᠶᠡᠬᠡ ᠯᠡ ᠦᠢᠮᠡᠭᠡᠨ ᠲᠡᠢ ᠪᠠᠢᠳᠠᠭ ᠰᠠᠨ᠃
ᠡᠨᠡ ᠡᠳᠦᠷ ᠪᠢ ᠡᠨᠡ ᠬᠦ᠌ ᠱᠤᠤᠭᠢᠶᠠᠨ ᠢ᠋ ᠳᠠᠯᠢᠮᠳᠠᠭᠤᠯᠤᠨ ᠭᠤᠯᠭᠤᠨ ᠣᠷᠣᠵᠤ ᠠᠮᠵᠢᠬᠤ ᠭᠡᠰᠡᠨ ᠶᠦᠮ᠃ ᠭᠡᠲᠡᠯᠡ ᠡᠨᠡ ᠡᠳᠦᠷ ᠠᠩᠭᠢ ᠮᠠᠨᠢ ᠬᠠᠷᠢᠨ ᠠᠮᠠᠷᠠᠯᠲᠠ ᠶ᠋ᠢᠨ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠰᠢᠭ ᠴᠢᠪ ᠴᠢᠮᠡᠭᠡ ᠦᠭᠡᠢ ᠪᠠᠢᠪᠠ᠃ ᠭᠠᠢᠬᠠᠬᠤ ᠳ᠋ᠤ᠌ ᠪᠠᠨ ᠪᠢ ᠨᠡᠭᠡᠭᠡᠯᠲᠡᠲᠡᠢ ᠴᠣᠩᠬᠣ ᠪᠠᠷ ᠨᠢ ᠳᠣᠲᠣᠭᠰᠢ ᠱᠠᠭᠠᠢᠭᠰᠠᠨ ᠴᠢᠨᠢ ᠰᠤᠷᠤᠭᠴᠢᠳ ᠴᠥᠮ ᠥᠪᠡᠷ ᠥᠪᠡᠷ ᠦ᠋ᠨ ᠰᠠᠭᠤᠳᠠᠯ ᠳ᠋ᠤ᠌ ᠪᠠᠨ ᠰᠠᠭᠤᠴᠢᠬᠠᠭᠠᠳ ᠪᠠᠭᠰᠢ ᠬᠠᠮᠸᠯ᠂ ᠥᠨᠥᠬᠢ ᠠᠢᠬᠤᠪᠲᠤᠷ ᠲᠣᠮᠣ ᠡᠳ᠋ ᠢ᠋ᠶ᠋ᠡᠨ ᠰᠤᠭᠤᠨ ᠳ᠋ᠤ᠌ ᠪᠠᠨ ᠬᠠᠪᠴᠢᠵᠤ ᠨᠠᠭᠠᠰᠢ ᠴᠠᠭᠠᠰᠢ ᠪᠠᠨ ᠠᠯᠬᠤᠯᠠᠵᠤ ᠪᠠᠢᠯᠠ᠃ ᠪᠢ ᠬᠠᠭᠠᠯᠭᠠ ᠶ᠋ᠢ ᠨᠢ ᠠᠶᠠᠷᠬᠠᠨ ᠲᠠᠲᠠᠵᠤ ᠨᠥᠬᠥᠳ ᠦ᠋ᠨ ᠨᠢᠭᠤᠷ ᠲᠠᠯᠠ ᠠ᠋ᠴᠠ ᠦᠢᠮᠡᠭᠦᠯᠦᠯ ᠦᠭᠡᠢ ᠪᠡᠷ ᠠᠶᠠᠲᠠᠢᠬᠠᠨ ᠣᠷᠣᠵᠤ ᠰᠠᠭᠤᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠠᠯᠠᠭᠠ ᠪᠣᠯᠵᠠᠢ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠮᠢᠨᠦ ᠵᠢᠰᠦ ᠴᠢᠷᠠᠢ ᠶᠡᠷᠦ ᠨᠢ ᠶᠠᠮᠠᠷ ᠶᠠᠩᠵᠤ ᠲᠠᠢ ᠪᠠᠢᠭᠰᠠᠨ ᠭᠡᠵᠦ ᠰᠠᠨᠠᠨᠠ ᠪᠣᠢ ᠲᠠ ? ᠨᠢᠭᠤᠷ ᠮᠢᠨᠢ ᠴᠢᠰ ᠤᠯᠠᠭᠠᠨ ᠪᠣᠯᠵᠤ ᠵᠢᠷᠦᠬᠡ ᠠᠮᠠ ᠪᠠᠷ ᠭᠠᠷᠴᠢᠬᠠᠬᠤ ᠰᠢᠬᠠᠵᠠᠢ᠃
ᠭᠡᠲᠡᠯᠡ ᠶᠠᠭᠠᠬᠢᠭᠰᠠᠨ ᠴᠤ᠌ ᠦᠭᠡᠢ᠃ ᠪᠠᠭᠰᠢ ᠬᠠᠮᠸᠯ ᠨᠠᠮᠠ ᠶ᠋ᠢ ᠦᠵᠡᠭᠡᠳ᠄ 《 ᠪᠢᠴᠢᠬᠠᠨ ᠹᠷᠠᠩᠱ ᠮᠢᠨᠢ ᠪᠤᠰᠢᠭᠤᠬᠠᠨ ᠣᠷᠣᠨ ᠳ᠋ᠤ᠌ ᠪᠠᠨ ᠰᠠᠭᠤᠭᠠᠷᠠᠢ᠂ ᠴᠢᠮᠠ ᠶ᠋ᠢ ᠪᠢᠳᠡ ᠬᠦᠯᠢᠶᠡᠬᠦ ᠦᠭᠡᠢ ᠰᠢᠦ᠂ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠡᠬᠢᠯᠡᠵᠡᠭᠡᠨᠡ 》 ᠭᠡᠵᠦ ᠶᠡᠷᠦ ᠪᠤᠰᠤ ᠶ᠋ᠢᠨ ᠡᠶᠡᠯᠳᠡᠭᠬᠡᠨ ᠳᠤᠤᠭᠠᠷᠪᠠ᠃
ᠪᠢ ᠰᠡᠩᠳᠡ ᠮᠡᠩᠳᠡ ᠣᠷᠣᠨ ᠳ᠋ᠤ᠌ ᠪᠠᠨ ᠣᠴᠢᠵᠤ ᠰᠠᠨᠳᠠᠯᠢ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠮᠢᠨᠦ ᠵᠢᠷᠦᠬᠡᠨ ᠯᠤᠭᠰᠢᠯᠲᠠ ᠪᠠᠬᠠᠨ ᠨᠠᠮᠳᠠᠵᠤ ᠡᠨᠡ ᠡᠳᠦᠷ ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠶᠣᠰᠣᠯᠠᠯ ᠤ᠋ᠨ ᠭᠣᠶᠣ ᠨᠣᠭᠣᠭᠠᠨ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠡᠳ ᠬᠡ ᠤᠭᠠᠯᠵᠠ ᠲᠠᠢ ᠭᠠᠯᠰᠲ᠋ᠦᠶ᠋ᠺ ᠢ᠋ᠶ᠋ᠡᠨ ᠵᠡᠭᠦᠵᠦ ᠥᠨᠥᠬᠢ ᠬᠠᠳᠬᠤᠮᠠᠯ ᠡᠮᠵᠢᠶᠡᠷᠢ ᠲᠡᠢ ᠬᠠᠷᠠ ᠲᠣᠷᠭᠠᠨ ᠲᠣᠭᠣᠷᠴᠣᠭ ᠢ᠋ᠶ᠋ᠠᠨ ᠴᠤ᠌ ᠡᠮᠦᠰᠴᠢᠬᠡᠭᠰᠡᠨ ᠢ᠋ ᠬᠠᠷᠠᠯᠠ᠃ ᠪᠠᠭᠰᠢ ᠮᠢᠨᠢ ᠡᠨᠡ ᠬᠦ᠌ ᠳᠡᠪᠡᠯ ᠮᠠᠯᠠᠭᠠᠢ ᠪᠠᠨ ᠵᠥᠪᠬᠡᠨ ᠪᠠᠢᠴᠠᠭᠠᠭᠴᠢ ᠲᠦᠰᠢᠮᠡᠯ ᠢᠷᠡᠬᠦ ᠪᠤᠶᠤ ᠱᠠᠩᠨᠠᠯ ᠣᠯᠭᠣᠬᠤ ᠡᠳᠦᠷ ᠦ᠋ᠳ ᠲᠦ᠍ ᠯᠡ ᠡᠮᠦᠰᠳᠡᠭ ᠶᠦᠮ᠃ ᠡᠭᠦᠨ ᠢ᠋ᠶ᠋ᠡᠷ ᠴᠦ᠍ ᠦᠯᠦ ᠪᠠᠷᠠᠮ ᠡᠨᠡ ᠡᠳᠦᠷ ᠬᠢᠴᠢᠶᠡᠯ ᠦ᠋ᠨ ᠭᠡᠷ ᠶᠡᠷᠦ ᠪᠤᠰᠤ ᠶ᠋ᠢᠨ ᠲᠥᠪᠯᠡᠭᠦᠨ ᠪᠠᠢᠪᠠ᠃ ᠪᠢ ᠠᠷᠤ ᠲᠠᠯᠠ ᠶ᠋ᠢᠨ ᠬᠡᠳᠦᠨ ᠮᠥᠷ ᠢᠯᠡᠭᠦᠦ ᠰᠠᠨᠳᠠᠯᠢ ᠳᠡᠭᠡᠷᠡ ᠲᠣᠰᠬᠣᠨ ᠤ᠋ ᠬᠢᠨ ᠦ᠌ ᠨᠡᠯᠢᠶᠡᠳ ᠤᠯᠤᠰ ᠢᠷᠡᠵᠦ ᠪᠢᠳᠡᠨ ᠲᠡᠢ ᠠᠳᠠᠯᠢ ᠲᠣᠪ ᠳᠤᠭᠤᠢ ᠰᠠᠭᠤᠵᠠᠭᠠᠵᠤ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠮᠠᠰᠢ ᠶᠡᠬᠡ ᠭᠠᠢᠬᠠᠯᠠ᠃ ᠡᠭᠦᠨ ᠳ᠋ᠦ᠍ ᠭᠤᠷᠪᠠᠯᠵᠢᠨ ᠮᠠᠯᠠᠭᠠᠢ ᠲᠠᠢ ᠡᠪᠦᠭᠡᠨ ᠬᠠᠤᠰᠦ᠋᠂ ᠤᠷᠢᠳᠤ ᠶ᠋ᠢᠨ ᠲᠣᠰᠬᠣᠨ ᠤ᠋ ᠳᠠᠷᠤᠭᠠ᠂ ᠤᠷᠢᠳᠤ ᠶ᠋ᠢᠨ ᠰᠢᠤᠳᠠᠨ ᠤ᠋ ᠤᠯᠠᠭᠠᠴᠢ ᠵᠡᠷᠭᠡ ᠨᠡᠯᠢᠶᠡᠳ ᠬᠥᠮᠦᠰ ᠪᠠᠢᠯᠴᠠᠪᠠ᠃ ᠡᠳᠡ ᠴᠥᠮ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠣᠪᠠᠨᠢᠩᠭᠤᠢ ᠴᠢᠷᠠᠢ ᠲᠠᠢ ᠰᠠᠭᠤᠵᠠᠭᠠᠨᠠ᠃ ᠬᠠᠤᠰᠦ᠋ ᠭᠤᠸᠠᠢ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠡᠯᠡᠭᠳᠡᠵᠦ ᠬᠠᠭᠤᠴᠢᠷᠠᠭᠰᠠᠨ ᠠᠩᠬᠠ ᠵᠡᠷᠭᠡ ᠶ᠋ᠢᠨ ᠰᠤᠷᠬᠤ ᠪᠢᠴᠢᠭ ᠳᠡᠯᠭᠡᠵᠦ ᠳᠡᠭᠡᠷᠡ ᠨᠢ ᠪᠠᠰᠠ ᠥᠨᠥᠬᠢ ᠪᠥᠬᠡᠯᠢᠭ ᠲᠣᠮᠣ ᠭᠠᠯ ᠰᠢᠯ ᠢ᠋ᠶ᠋ᠡᠨ ᠲᠠᠯᠪᠢᠵᠠᠢ᠃
ᠪᠢ ᠡᠳᠡᠭᠡᠷ ᠰᠣᠨᠢᠷᠬᠠᠯᠲᠠᠢ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠭᠠᠢᠬᠠᠨ ᠠᠲᠠᠯᠠ ᠪᠠᠭᠰᠢ ᠬᠠᠮᠸᠯ ᠰᠠᠨᠳᠠᠯᠢ ᠳᠡᠭᠡᠷᠡ ᠪᠡᠨ ᠰᠠᠭᠤᠭᠠᠳ ᠰᠠᠶᠢᠬᠠᠨ ᠨᠠᠳᠠ ᠶᠠᠷᠢᠭᠰᠠᠨ ᠲᠠᠢ ᠪᠠᠨ ᠠᠳᠠᠯᠢ ᠪᠢᠳᠡᠨ ᠤᠷᠤᠭᠤ ᠡᠶᠡᠯᠳᠡᠭ ᠲᠥᠪᠯᠡᠭᠦᠨ ᠢ᠋ᠶ᠋ᠡᠷ᠄
《ᠬᠡᠦᠬᠡᠳ ᠦ᠋ᠳ ᠠ᠋! ᠡᠨᠡ ᠪᠣᠯ ᠪᠠᠭᠰᠢ ᠶ᠋ᠢᠨ ᠴᠢᠨᠢ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠨᠢᠭᠡ ᠬᠢᠴᠢᠶᠡᠯ᠂ ᠪᠧᠷᠯᠢᠨ ᠡᠴᠡ ᠨᠢᠭᠡᠨᠲᠡ ᠠᠯᠰᠠᠰ ᠬᠢᠭᠡᠳ ᠯᠤᠲ᠋ᠠᠷᠢᠨᠬᠢ ᠶ᠋ᠢᠨ ᠰᠤᠷᠭᠠᠭᠤᠯᠢ ᠨᠤᠭᠤᠳ ᠲᠤ᠌ ᠵᠥᠪᠬᠡᠨ ᠭᠧᠷᠮᠠᠨ ᠬᠡᠯᠡ ᠵᠢᠭᠠᠬᠤ ᠬᠡᠷᠡᠭᠲᠡᠢ ᠭᠡᠳᠡᠭ ᠲᠤᠰᠢᠶᠠᠯ ᠢᠷᠡᠵᠡᠢ᠃ ᠰᠢᠨᠡ ᠪᠠᠭᠰᠢ ᠴᠢᠨᠢ ᠮᠠᠷᠭᠠᠰᠢ ᠢᠷᠡᠨᠡ᠃ ᠡᠨᠡ ᠡᠳᠦᠷ ᠪᠣᠯ ᠹᠷᠠᠨᠼᠢ ᠬᠡᠯᠡᠨ ᠦ᠌ ᠲᠤᠬᠠᠢ ᠲᠠ ᠨᠠᠷ ᠤ᠋ᠨ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠢᠴᠢᠶᠡᠯ ᠪᠣᠯᠬᠤ ᠲᠤᠯᠠ ᠢᠯᠡᠭᠦᠬᠡᠨ ᠠᠩᠬᠠᠷᠬᠤ ᠶ᠋ᠢ ᠬᠦᠰᠡᠶᠡ》 ᠭᠡᠪᠡ᠃
ᠪᠠᠭᠰᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠨᠡ ᠬᠡᠳᠦᠨ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠡᠯᠢᠭᠡ ᠵᠢᠷᠦᠬᠡ ᠮᠢᠨᠢ ᠰᠢᠮᠰᠢᠷᠡᠵᠦ ᠪᠢᠯᠡ᠃ ᠠ᠂ ᠵᠣᠯᠢᠭ ᠤ᠋ᠳ ᠤᠤᠬᠠᠢ! ᠲᠡᠷᠡ ᠲᠣᠰᠬᠣᠨ ᠤ᠋ ᠵᠠᠬᠢᠷᠭᠠ ᠶ᠋ᠢᠨ ᠵᠠᠷᠯᠠᠯ ᠤ᠋ᠨ ᠰᠠᠮᠪᠠᠷᠠ ᠳ᠋ᠤ᠌ ᠶᠠᠭᠤᠮᠠ ᠨᠠᠭᠠᠵᠤ ᠪᠠᠢᠭᠰᠠᠨ ᠴᠢᠨᠢ ᠡᠨᠡ ᠤᠴᠢᠷ ᠶᠤᠮᠰᠠᠨᠵᠠᠢ᠃
ᠮᠢᠨᠦ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠹᠷᠠᠨᠼᠢ ᠬᠡᠯᠡᠨ ᠦ᠌ ᠬᠢᠴᠢᠶᠡᠯ ᠠ᠋!
ᠪᠢ ᠣᠳᠣᠬᠠᠨ᠂ ᠥᠭᠦᠯᠡᠪᠦᠷᠢ ᠨᠠᠢᠷᠠᠭᠤᠯᠵᠤ ᠪᠢᠴᠢᠵᠦ ᠴᠦ᠍ ᠴᠢᠳᠠᠭᠠᠳᠤᠢ ᠪᠠᠢᠬᠤ ᠳ᠋ᠤ᠌ ᠹᠷᠠᠨᠼᠢ ᠬᠡᠯᠡ ᠪᠡᠨ ᠳᠠᠬᠢᠨ ᠣᠯᠵᠤ ᠰᠤᠷᠬᠤ ᠦᠭᠡᠢ ᠨᠢ ᠠ᠋! ᠡᠭᠦᠨ ᠦ᠌ ᠤᠷᠢᠳ ᠪᠢ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠣᠷᠬᠢᠵᠤ ᠰᠢᠪᠠᠭᠤᠨ ᠤ᠋ ᠡᠭᠦᠷ ᠠᠭᠤᠳᠠᠯᠬᠤ᠂ ᠰᠡᠷ ᠭᠣᠣᠯ ᠤ᠋ᠨ ᠮᠥᠰᠥᠨ ᠳᠡᠭᠡᠷᠡ ᠲᠡᠰᠢᠬᠦ ᠵᠡᠷᠭᠡ ᠪᠡᠷ ᠳᠠᠩᠴᠤ ᠤᠬᠠᠭᠠᠨ ᠦᠭᠡᠢ ᠰᠤᠷᠤᠯᠴᠠᠵᠤ ᠳᠠ ᠁ ᠶᠠᠭᠤᠲᠠᠢ ᠴᠤ᠌ ᠬᠠᠷᠠᠮᠰᠠᠯᠲᠠᠢ ᠠᠵᠢ! ᠡᠳᠡᠭᠡᠷ ᠬᠡᠯᠡ ᠵᠦᠢ᠂ ᠲᠡᠦᠬᠡ ᠵᠡᠷᠭᠡ ᠬᠢᠴᠢᠶᠡᠯ ᠦ᠋ᠳ ᠦ᠋ᠨ ᠰᠤᠷᠬᠤ ᠪᠢᠴᠢᠭ ᠨᠠᠳᠠ ᠥᠴᠥᠭᠡᠳᠦᠷᠬᠡᠨ ᠬᠦᠷᠲᠡᠯᠡ ᠠᠪᠴᠤ ᠶᠠᠪᠤᠬᠤ ᠳ᠋ᠤ᠌ ᠬᠦᠨᠳᠦ ᠪᠥᠭᠡᠳ ᠰᠤᠷᠬᠤ ᠳ᠋ᠤ᠌ ᠲᠤᠩ ᠬᠡᠴᠡᠭᠦᠦ ᠰᠠᠨᠠᠭᠳᠠᠨ ᠠᠳᠠᠯᠠᠭᠳᠠᠵᠤ ᠪᠠᠢᠭᠰᠠᠨ ᠨᠢ ᠡᠳᠦᠭᠡ ᠬᠠᠷᠢᠨ ᠳᠣᠲᠣᠨᠣ ᠶ᠋ᠢᠨ ᠬᠠᠯᠠᠮᠵᠢᠲᠤ ᠰᠠᠢᠨ ᠨᠥᠬᠥᠷ ᠰᠢᠭ ᠪᠣᠯᠤᠭᠠᠳ ᠰᠠᠯᠵᠤ ᠶᠠᠳᠠᠮᠠ ᠪᠣᠯᠴᠢᠬᠠᠯᠠ᠃ ᠪᠠᠭᠰᠢ ᠮᠢᠨᠢ ᠴᠦ᠍ ᠪᠠᠰᠠ ᠨᠣᠮ ᠲᠠᠢ ᠮᠢᠨᠢ ᠠᠳᠠᠯᠢ ᠪᠠᠷ ᠢᠩᠭᠢᠵᠦ ᠰᠠᠨᠠᠭᠳᠠᠭᠠᠳ ᠶᠠᠪᠤᠴᠢᠬᠠᠯᠠ᠃ ᠪᠠᠭᠰᠢ ᠮᠢᠨᠢ ᠪᠢᠳᠡᠨ ᠡᠴᠡ ᠪᠡᠨ ᠰᠠᠯᠤᠯᠠ᠂ ᠳᠠᠬᠢᠨ ᠠᠭᠤᠯᠵᠠᠬᠤ ᠦᠭᠡᠢ ᠨᠢ ᠠ᠋! ᠡᠳᠡᠭᠡᠷ ᠪᠦᠬᠦᠨ ᠢ᠋ ᠪᠣᠳᠣᠬᠤ ᠳ᠋ᠤ᠌ ᠪᠠᠭᠰᠢ ᠶ᠋ᠢᠨ ᠮᠢᠨᠢ ᠨᠠᠮᠠ ᠶ᠋ᠢ ᠶᠠᠯᠠᠲᠠᠨ ᠰᠢᠳᠬᠡᠬᠦ ᠲᠡᠮᠦᠷ ᠱᠤᠭᠤᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠣᠳᠣᠳᠠᠭ ᠨᠢ ᠬᠦᠷᠲᠡᠯᠡ ᠮᠠᠷᠲᠠᠭᠳᠠᠭᠰᠠᠨ ᠪᠠᠢᠯᠠ᠃
ᠳᠠᠩᠴᠤ ᠬᠥᠭᠡᠷᠦᠬᠦᠢ!
ᠪᠠᠭᠰᠢ ᠮᠢᠨᠢ ᠡᠨᠡ ᠬᠦ᠌ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠳᠤᠷᠠᠰᠬᠠᠨ ᠲᠡᠮᠳᠡᠭᠯᠡᠬᠦ ᠶ᠋ᠢᠨ ᠲᠤᠯᠠᠳᠠ ᠶᠣᠰᠣᠯᠠᠯ ᠤ᠋ᠨ ᠭᠣᠶᠣ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠰᠡᠨ ᠶᠦᠮ ᠪᠠᠢᠵᠤ ᠯᠠ ᠳᠠ! ᠠᠷᠤ ᠲᠠᠯᠠ ᠪᠠᠷ ᠰᠠᠭᠤᠵᠠᠭᠠᠵᠤ ᠪᠠᠢᠭᠰᠠᠨ ᠨᠠᠰᠤᠲᠠᠳ ᠤ᠋ᠨ ᠢᠷᠡᠭᠰᠡᠨ ᠰᠢᠯᠲᠠᠭᠠᠨ ᠢ᠋ ᠴᠦ᠍ ᠪᠢ ᠤᠬᠠᠵᠤ ᠮᠡᠳᠡᠯᠡ᠃ ᠮᠥᠨ ᠲᠡᠳᠡ ᠠᠩᠬᠠᠨ ᠳ᠋ᠤ᠌ ᠪᠠᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠳᠡᠮᠡᠢ ᠢᠷᠡᠳᠡᠭ ᠦᠭᠡᠢ ᠳ᠋ᠦ᠍ ᠪᠡᠨ ᠬᠠᠷᠠᠮᠰᠠᠨ ᠭᠤᠲᠤᠷᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠯᠠ᠃ ᠲᠡᠳᠡ ᠮᠠᠨ ᠤ᠋ ᠪᠠᠭᠰᠢ ᠶ᠋ᠢᠨ ᠳᠥᠴᠢᠭᠡᠳ ᠵᠢᠯ ᠢᠩᠭᠢᠵᠦ ᠦᠨᠡᠨᠴᠢ ᠪᠡᠷ ᠠᠵᠢᠯᠯᠠᠭᠰᠠᠨ ᠶᠠᠪᠤᠳᠠᠯ ᠳ᠋ᠤ᠌ ᠲᠠᠯᠠᠷᠬᠠᠵᠤ ᠪᠠᠢᠭᠠ ᠪᠠᠨ᠂ ᠪᠤᠰᠤᠳ ᠤ᠋ᠨ ᠭᠠᠷ ᠲᠤ᠌ ᠣᠷᠣᠬᠤ ᠭᠡᠵᠦ ᠪᠠᠢᠭᠠ ᠡᠬᠡ ᠣᠷᠣᠨ ᠤ᠋ ᠪᠠᠨ ᠨᠤᠲᠤᠭ ᠤᠰᠤᠨ ᠳ᠋ᠤ᠌ ᠬᠠᠢᠷᠠ ᠬᠦᠨᠳᠦᠳᠬᠡᠯ ᠲᠡᠢ ᠪᠠᠢᠭᠠ ᠪᠠᠨ ᠢᠯᠡᠷᠬᠡᠢᠯᠡᠵᠦ ᠪᠠᠢᠭᠠ ᠨᠢ ᠲᠣᠳᠣᠬᠠᠨ ᠪᠠᠢᠯᠠ᠃
ᠪᠢ ᠡᠳᠡᠭᠡᠷ ᠢ᠋ ᠪᠣᠳᠣᠵᠤ ᠰᠠᠭᠤᠲᠠᠯᠠ ᠪᠠᠭᠰᠢ ᠭᠡᠨᠡᠳᠲᠡ ᠮᠢᠨᠦ ᠨᠡᠷᠡ ᠶ᠋ᠢ ᠳᠠᠭᠤᠳᠠᠬᠤ ᠨᠢ ᠰᠣᠨᠣᠰᠳᠠᠪᠠ᠃ ᠨᠣᠮ ᠢ᠋ᠶ᠋ᠠᠨ ᠴᠡᠭᠡᠵᠢ ᠪᠡᠷ ᠤᠩᠰᠢᠬᠤ ᠮᠢᠨᠦ ᠡᠭᠡᠯᠵᠢ ᠪᠣᠯᠤᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠠᠢ ᠪᠣᠭᠳᠠ ᠮᠢᠨᠢ! ᠪᠢ ᠬᠡᠷᠪᠡ ᠡᠨᠡ ᠮᠡᠲᠦ ᠶ᠋ᠢᠨ ᠰᠤᠷᠬᠤ ᠳ᠋ᠤ᠌ ᠬᠡᠴᠡᠭᠦᠦ ᠭᠡᠵᠦ ᠣᠯᠠᠨ ᠳ᠋ᠤ᠌ ᠠᠯᠳᠠᠷᠰᠢᠭᠰᠠᠨ᠂ ᠦᠢᠯᠡ ᠦᠭᠡ ᠶ᠋ᠢᠨ ᠬᠤᠪᠢᠯᠤᠯ ᠤ᠋ᠨ ᠬᠡᠷᠡᠭᠯᠡᠬᠦ ᠵᠢᠱ᠌ᠢᠶᠡ ᠨᠦ᠍ᠭᠦᠳ ᠢ᠋ ᠡᠬᠢᠨ ᠡᠴᠡ ᠨᠢ ᠠᠳᠠᠭ ᠲᠤ᠌ ᠨᠢ ᠬᠦᠷᠲᠡᠯᠡ ᠨᠢᠭᠡᠳ ᠨᠢᠭᠡ ᠦᠭᠡᠢ ᠢᠷᠠᠭᠤ ᠲᠣᠳᠣ᠂ ᠥᠴᠦᠬᠡᠨ ᠴᠦ᠍ ᠠᠯᠳᠠᠭᠠ ᠮᠠᠳᠠᠭ ᠦᠭᠡᠢ ᠶᠠᠷᠢᠭᠠᠳ ᠴᠢᠳᠠᠴᠢᠬᠠᠪᠠᠯ ᠶᠠᠮᠠᠷ ᠥᠷᠲᠡᠭ ᠭᠠᠷᠭᠠᠭᠰᠠᠨ ᠴᠤ᠌ ᠪᠢ ᠪᠦᠷ ᠳᠤᠷᠠᠲᠠᠢ᠃ ᠭᠡᠲᠡᠯᠡ ᠪᠢ ᠲᠡᠭᠦᠨ ᠦ᠌ ᠡᠬᠢᠨ ᠦ᠌ ᠬᠢᠨᠢ ᠬᠡᠳᠦᠨ ᠦᠭᠡ ᠦᠰᠦᠭ ᠳᠡᠭᠡᠷᠡ ᠣᠴᠢᠭᠠᠳ ᠪᠠᠯᠠᠷᠠᠵᠤ ᠡᠬᠢᠯᠡᠭᠰᠡᠨ ᠲᠤᠯᠠ ᠳᠣᠲᠣᠷᠠ ᠮᠢᠨᠢ ᠶᠠᠭᠠᠬᠢᠯᠠ ᠳᠠ ᠭᠡᠮᠡᠷ ᠲᠤᠩ ᠡᠪ ᠬᠠᠪᠤ ᠦᠭᠡᠢ ᠰᠠᠨᠠᠭᠳᠠᠨ ᠲᠣᠯᠣᠭᠠᠢ ᠪᠠᠨ ᠴᠤ᠌ ᠡᠷᠭᠦᠵᠦ ᠴᠢᠳᠠᠬᠤ ᠦᠭᠡᠢ ᠬᠤᠯᠮᠠᠯᠵᠠᠨ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠪᠠᠭᠰᠢ ᠨᠠᠳᠠ ᠤᠷᠤᠭᠤ ᠬᠠᠷᠠᠭᠠᠳ᠄
《ᠪᠢᠴᠢᠬᠠᠨ ᠹᠷᠠᠩᠱ ᠮᠢᠨᠢ᠂ ᠪᠠᠭᠰᠢ ᠨᠢ ᠴᠢᠮᠠ ᠶ᠋ᠢ ᠵᠢᠮᠡᠯᠡᠬᠦ ᠦᠭᠡᠢ᠂ ᠴᠢ ᠥᠪᠡᠷ ᠢ᠋ᠶ᠋ᠡᠨ ᠰᠦᠷᠡᠬᠡᠢ ᠭᠡᠮᠰᠢᠵᠦ ᠪᠠᠢᠭᠠ ᠪᠣᠯᠤᠯᠲᠠᠢ᠃ ᠡᠢᠮᠦ ᠯᠡ ᠪᠠᠢᠬᠤ ᠶᠣᠰᠣᠲᠠᠢ ᠳᠠ! ᠲᠠ ᠨᠠᠷ ᠦᠷᠭᠦᠯᠵᠢ ᠯᠡ᠄ 〈 ᠵᠠ! ᠪᠣᠯᠢᠶᠠ᠂ ᠴᠠᠭ ᠭᠡᠭᠴᠢ ᠪᠠᠢᠬᠤ ᠯᠠ᠂ ᠮᠠᠷᠭᠠᠰᠢ ᠰᠤᠷᠤᠭᠰᠠᠨ ᠴᠤ᠌ ᠣᠷᠣᠢᠲᠠᠬᠤ ᠶᠤᠮ ᠪᠢᠰᠢ〉 ᠭᠡᠵᠡᠭᠡᠳᠡᠭ ᠪᠢᠯᠡ ᠤᠤ᠃ ᠣᠳᠣ ᠪᠢᠳᠡᠨ ᠦ᠌ ᠡᠴᠦᠰ ᠦ᠋ᠨ ᠦᠷᠡ ᠳ᠋ᠦᠩ ᠢ᠋ᠶ᠋ᠡᠨ ᠦᠵᠡᠬᠦ ᠦᠭᠡᠢ ᠤᠤ᠃ ᠠ᠋ ᠳᠠ᠂ ᠲᠠ ᠨᠠᠷ ᠮᠢᠨᠢ! ᠰᠤᠷᠤᠯᠭᠠ ᠪᠠᠨ ᠦᠷᠭᠦᠯᠵᠢ ᠬᠣᠢᠰᠢ ᠪᠠᠨ ᠲᠦᠯᠬᠢᠭᠡᠳ ᠪᠠᠢᠳᠠᠭ ᠨᠢ ᠠᠯᠰᠠᠰ ᠬᠥᠮᠦᠨ ᠳ᠋ᠦ᠍ ᠪᠠᠢᠵᠤ ᠪᠣᠯᠣᠰᠢ ᠦᠭᠡᠢ ᠬᠠᠮᠤᠭ ᠤ᠋ᠨ ᠵᠣᠯ ᠪᠤᠰᠤ ᠶᠠᠪᠤᠳᠠᠯ ᠶᠤᠮ᠃ ᠬᠡᠦᠬᠡᠳ ᠦ᠋ᠳ ᠠ᠋! ᠣᠳᠣ ᠲᠡᠷᠡ ᠮᠣᠨᠳᠢ ᠨᠤᠭᠤᠳ᠄ 〈 ᠶᠠᠮᠠᠷ ᠪᠣᠢ? ᠲᠠ ᠨᠠᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠦᠭᠡ ᠬᠡᠯᠡ ᠶ᠋ᠢ ᠴᠦ᠍ ᠮᠡᠳᠡᠬᠦ ᠦᠭᠡᠢ᠂ ᠪᠢᠴᠢᠵᠦ ᠴᠦ᠍ ᠴᠢᠳᠠᠬᠤ ᠦᠭᠡᠢ ᠁ ᠪᠠᠢᠵᠤ ᠪᠡᠶᠡ ᠪᠡᠨ ᠶᠠᠭᠠᠬᠢᠵᠤ ᠹᠷᠠᠨᠼᠢ ᠬᠥᠮᠦᠨ ᠭᠡᠬᠦ ᠪᠣᠢ ᠳᠠ〉 ᠭᠡᠵᠦ ᠠᠮᠠ ᠶ᠋ᠢ ᠴᠢᠨᠢ ᠠᠪᠬᠤ ᠰᠢᠯᠲᠠᠭ ᠲᠠᠢ ᠪᠣᠯᠵᠤ ᠳᠠ᠃ ᠭᠡᠪᠡᠴᠦ ᠬᠥᠭᠡᠷᠦᠬᠦᠢ ᠵᠠᠢᠯᠠᠭᠤᠯ᠂ ᠪᠢᠴᠢᠬᠠᠨ ᠹᠷᠠᠩᠱ ᠮᠢᠨᠢ᠂ ᠭᠠᠭᠴᠠ ᠴᠢᠨᠦ ᠪᠤᠷᠤᠭᠤ ᠴᠤ᠌ ᠪᠢᠰᠢ ᠳᠡ᠂ ᠪᠢᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠨᠡᠯᠢᠶᠡᠳ ᠵᠦᠢᠯ ᠳᠡᠭᠡᠷᠡ ᠪᠡᠶᠡ ᠪᠡᠨ ᠪᠤᠷᠤᠭᠤᠰᠢᠶᠠᠬᠤ ᠬᠡᠷᠡᠭᠲᠡᠢ ᠶᠦᠮ》 ᠭᠡᠳ ᠴᠢᠨᠠᠭᠰᠢ ᠦᠷᠭᠦᠯᠵᠢᠯᠡᠨ᠄ 《ᠡᠴᠢᠭᠡ ᠡᠬᠡ ᠴᠢᠨᠢ ᠲᠠ ᠨᠠᠷ ᠤ᠋ᠨ ᠰᠤᠷᠤᠯᠭᠠ ᠶ᠋ᠢ ᠶᠡᠷᠦ ᠨᠢ ᠬᠠᠢᠬᠤᠷᠬᠤ ᠦᠭᠡᠢ᠂ ᠪᠠᠭᠠ ᠰᠠᠭᠠ ᠮᠥᠩᠭᠥ ᠵᠣᠭᠣᠰ ᠣᠯᠬᠤ ᠶ᠋ᠢᠨ ᠲᠥᠯᠥᠭᠡ ᠲᠠᠷᠢᠶᠠᠨ ᠳᠡᠭᠡᠷᠡ ᠶᠠᠪᠤᠭᠤᠯᠬᠤ ᠪᠤᠶᠤ ᠨᠡᠬᠡᠮᠡᠯ ᠦ᠋ᠨ ᠦᠢᠯᠡᠳᠪᠦᠷᠢ ᠳ᠋ᠦ᠍ ᠣᠷᠣᠭᠤᠯᠵᠤ ᠠᠵᠢᠯ ᠬᠢᠯᠭᠡᠳᠡᠭ ᠪᠢᠯᠡ ᠤᠤ? ᠲᠡᠭᠡᠪᠡᠯ ᠨᠠᠳᠠ ᠳ᠋ᠤ᠌ ᠪᠠᠰᠠ ᠪᠡᠶᠡ ᠪᠡᠨ ᠵᠢᠮᠡᠯᠡᠬᠦ ᠶᠠᠪᠤᠳᠠᠯ ᠣᠭᠲᠣ ᠦᠭᠡᠢ ᠤᠤ? ᠭᠡᠪᠡᠯ ᠪᠠᠢᠨᠠ᠃ ᠵᠥᠩᠳᠡᠭᠡᠨ ᠪᠠᠢᠨᠠ᠂ ᠪᠠᠢᠨ ᠪᠠᠢᠨ ᠬᠢᠴᠢᠶᠡᠯ ᠢ᠋ ᠴᠢᠨᠢ ᠲᠠᠰᠤᠯᠳᠠᠭᠤᠯᠵᠤ ᠴᠡᠴᠡᠭ ᠢ᠋ᠶ᠋ᠡᠨ ᠤᠰᠤᠯᠠᠭᠤᠯᠳᠠᠭ᠂ ᠵᠢᠭᠠᠰᠤᠨ ᠳ᠋ᠤ᠌ ᠶᠠᠪᠤᠨᠠ ᠭᠡᠪᠡᠯ ᠡᠳᠦᠷᠵᠢᠨ ᠴᠢᠯᠥᠭᠡ ᠲᠠᠯᠪᠢᠵᠤ ᠲᠠ ᠨᠠᠷ ᠢ᠋ᠶ᠋ᠠᠨ ᠵᠦᠭᠡᠷ ᠰᠠᠭᠤᠯᠭᠠᠳᠠᠭ ᠪᠢᠰᠢ ᠤᠤ? 》 ᠭᠡᠪᠡ᠃
ᠲᠡᠭᠡᠭᠡᠳ ᠪᠠᠭᠰᠢ ᠮᠢᠨᠢ ᠡᠨᠡ ᠲᠡᠷᠡ ᠶ᠋ᠢ ᠶᠠᠷᠢᠭᠰᠠᠭᠠᠷ ᠪᠠᠢᠭᠠᠳ ᠹᠷᠠᠨᠼᠢ ᠬᠡᠯᠡᠨ ᠦ᠌ ᠲᠤᠬᠠᠢ ᠶᠠᠷᠢᠵᠤ ᠡᠬᠢᠯᠡᠪᠡ᠃ 《ᠹᠷᠠᠨᠼᠢ ᠬᠡᠯᠡ ᠪᠣᠯ ᠳᠡᠯᠡᠬᠡᠢ ᠳᠡᠭᠡᠷᠡ ᠬᠠᠮᠤᠭ ᠤ᠋ᠨ ᠢᠷᠠᠭᠤ ᠰᠠᠢᠬᠠᠨ ᠬᠡᠯᠡ ᠪᠥᠭᠡᠳ ᠲᠣᠪᠴᠢ ᠲᠣᠳᠣᠷᠬᠠᠢ ᠬᠡᠯᠡ ᠶᠦᠮ᠃ ᠪᠢᠳᠡ ᠡᠭᠦᠨ ᠢ᠋ ᠪᠡᠨ ᠮᠠᠷᠲᠠᠯ ᠦᠭᠡᠢ ᠴᠡᠭᠡᠵᠢᠯᠡᠵᠦ ᠶᠠᠪᠤᠪᠠᠯ ᠵᠣᠬᠢᠨᠠ᠃ ᠲᠥᠷᠥ ᠤᠯᠤᠰ ᠨᠢ ᠮᠥᠬᠥᠭᠡᠳ ᠪᠤᠰᠤᠳ ᠲᠤ᠌ ᠪᠣᠭᠣᠯᠴᠢᠯᠠᠭᠳᠠᠭᠰᠠᠨ ᠠᠷᠠᠳ ᠲᠦᠮᠡᠨ ᠬᠡᠷᠪᠡ ᠲᠥᠷᠥᠯᠬᠢ ᠦᠭᠡ ᠬᠡᠯᠡ ᠪᠡᠨ ᠮᠠᠷᠲᠠᠭᠠᠳᠤᠢ ᠪᠠᠲᠤ ᠴᠡᠭᠡᠵᠢᠯᠡᠵᠦ ᠪᠠᠢᠭᠠ ᠴᠠᠭ ᠲᠤ᠌ ᠱᠣᠷᠣᠩ ᠤ᠋ᠨ ᠡᠭᠦᠳᠡᠨ ᠦ᠌ ᠲᠦᠯᠬᠢᠭᠦᠷ ᠢ᠋ ᠠᠳᠬᠤᠵᠤ ᠪᠠᠢᠭᠠ ᠲᠠᠢ ᠠᠳᠠᠯᠢ ᠶᠤᠮ ᠰᠢᠦ》 ᠭᠡᠳ ᠴᠢᠨᠠᠭᠰᠢ ᠨᠢ ᠬᠡᠯᠡᠨ ᠦ᠌ ᠵᠦᠢ ᠪᠡᠨ ᠵᠢᠭᠠᠯᠠ᠃ ᠶᠠᠭᠠᠬᠢᠭᠰᠠᠨ ᠵᠢᠭᠲᠡᠢᠬᠡᠨ ᠶᠦᠮ ᠪᠣᠢ! ᠪᠢ ᠡᠨᠡ ᠡᠳᠦᠷ ᠦ᠋ᠨ ᠵᠢᠭᠠᠭᠰᠠᠨ ᠢ᠋ ᠠᠯᠳᠠᠯ ᠦᠭᠡᠢ ᠰᠠᠢᠬᠠᠨ ᠤᠢᠯᠠᠭᠠᠴᠢᠬᠠᠯᠠ! ᠡᠨᠡ ᠡᠳᠦᠷ ᠦ᠋ᠨ ᠵᠢᠭᠠᠭᠰᠠᠨ ᠨᠢ ᠬᠢᠯᠪᠠᠷᠬᠠᠨ ᠴᠤ᠌ ᠶᠤᠮ ᠰᠢᠭ᠋᠃ ᠪᠢ ᠶᠡᠷᠦ ᠨᠢ ᠬᠢᠴᠢᠶᠡᠯ ᠢ᠋ ᠢᠩᠭᠢᠵᠦ ᠠᠩᠬᠠᠷᠤᠯᠲᠠᠢ ᠰᠣᠨᠣᠰᠳᠠᠭ ᠦᠭᠡᠢ ᠰᠠᠨ᠃ ᠪᠠᠭᠰᠢ ᠮᠢᠨᠢ ᠴᠦ᠍ ᠶᠡᠷᠦ ᠨᠢ ᠢᠩᠭᠢᠵᠦ ᠲᠣᠳᠣ ᠰᠠᠢᠬᠠᠨ ᠵᠢᠭᠠᠳᠠᠭ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠭᠰᠠᠨ ᠪᠢᠯᠡ᠃ ᠬᠠᠢᠷᠠᠲᠤ ᠪᠠᠭᠰᠢ ᠮᠢᠨᠢ ᠬᠥᠭᠡᠷᠦᠬᠦᠢ᠂ ᠪᠢᠳᠡᠨ ᠡᠴᠡ ᠪᠡᠨ ᠰᠠᠯᠬᠤ ᠶ᠋ᠢᠨ ᠤᠷᠢᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠢ ᠪᠦᠬᠦᠢ ᠮᠡᠳᠡᠯᠭᠡ ᠪᠡᠨ ᠴᠥᠮ ᠢ᠋ ᠨᠢ ᠵᠢᠭᠠᠵᠤ ᠦᠯᠦ ᠴᠢᠳᠠᠬᠤ ᠳ᠋ᠤ᠌ ᠪᠠᠨ ᠭᠤᠲᠤᠷᠠᠵᠤ ᠪᠠᠢᠭᠠ ᠪᠣᠯᠤᠯᠲᠠᠢ᠃
ᠬᠡᠯᠡᠨ ᠦ᠌ ᠵᠦᠢ ᠶ᠋ᠢᠨ ᠬᠢᠴᠢᠶᠡᠯ ᠦ᠋ᠨ ᠳᠠᠷᠠᠭᠠ ᠪᠢᠳᠡᠨ ᠳ᠋ᠦ᠍ ᠪᠠᠰᠠ ᠴᠡᠪᠡᠷ ᠪᠢᠴᠢᠯᠭᠡ ᠶ᠋ᠢᠨ ᠬᠢᠴᠢᠶᠡᠯ ᠬᠢᠪᠡ᠃ ᠮᠥᠨ ᠡᠨᠡ ᠬᠢᠴᠢᠶᠡᠯ ᠳᠡᠭᠡᠷᠡ ᠪᠠᠭᠰᠢ ᠪᠢᠳᠡᠨ ᠳ᠋ᠦ᠍ ᠦᠰᠦᠭ ᠪᠢᠴᠢᠯᠭᠡ ᠶ᠋ᠢᠨ ᠰᠢᠨᠡ ᠰᠤᠷᠬᠤ ᠪᠢᠴᠢᠭ ᠲᠦᠭᠡᠭᠡᠵᠦ ᠥᠭᠪᠡ᠃ ᠲᠡᠷᠡ ᠬᠦ᠌ ᠰᠤᠷᠬᠤ ᠪᠢᠴᠢᠭ ᠲᠦ᠍ 《ᠹᠷᠠᠨᠼᠢ》᠂ 《ᠠᠯᠰᠠᠰ 》᠂ 《ᠹᠷᠠᠨᠼᠢ》᠂ 《ᠠᠯᠰᠠᠰ》 ᠭᠡᠰᠡᠨ ᠲᠥᠭᠥᠷᠢᠭ ᠭᠣᠶᠣᠬᠠᠨ ᠦᠰᠦᠭ ᠦ᠋ᠳ ᠪᠢᠴᠢᠭᠡᠰᠦᠲᠡᠢ ᠪᠠᠢᠯᠠ᠃ ᠡᠳᠡᠭᠡᠷ ᠰᠤᠷᠬᠤ ᠪᠢᠴᠢᠭ ᠦ᠋ᠳ ᠢ᠋ ᠪᠢᠳᠡᠨ ᠦ᠌ ᠪᠢᠴᠢᠭ ᠦ᠋ᠨ ᠰᠢᠷᠡᠭᠡᠨ ᠦ᠌ ᠬᠥᠨᠳᠡᠯᠡᠨ ᠲᠡᠮᠦᠷ ᠳᠣᠲᠣᠷᠠ ᠳᠠᠷᠤᠵᠤ ᠲᠠᠯᠪᠢᠭᠰᠠᠨ ᠨᠢ ᠶᠠᠭ ᠯᠠ ᠵᠢᠵᠢᠭ ᠳᠠᠯᠪᠠᠭᠠ ᠨᠤᠭᠤᠳ ᠢ᠋ ᠬᠢᠴᠢᠶᠡᠯ ᠦ᠋ᠨ ᠭᠡᠷ ᠲᠦ᠍ ᠨᠠᠮᠢᠷᠠᠭᠤᠯᠤᠨ ᠬᠠᠳᠬᠤᠭᠰᠠᠨ ᠶᠤᠮ ᠰᠢᠭ᠋ ᠬᠠᠷᠠᠭᠳᠠᠨᠠ᠃ ᠮᠠᠨ ᠤ᠋ ᠬᠢᠨ ᠦ᠌ ᠬᠥᠮᠦᠨ ᠪᠦᠬᠦᠨ ᠰᠡᠳᠬᠢᠯ ᠲᠠᠯᠪᠢᠵᠤ ᠮᠠᠰᠢ ᠠᠩᠬᠠᠷᠤᠯᠲᠠᠢ ᠬᠢᠴᠢᠶᠡᠯᠯᠡᠵᠦ ᠪᠠᠢᠭᠠ ᠠ᠋ᠴᠠ ᠠᠩᠭᠢ ᠳ᠋ᠤ᠌ ᠴᠠᠭᠠᠰᠤ ᠱᠠᠷᠴᠢᠭᠢᠨᠠᠬᠤ ᠠ᠋ᠴᠠ ᠥᠭᠡᠷᠡ ᠴᠢᠮᠡᠭᠡ ᠠᠨᠢᠷ ᠣᠭᠲᠣ ᠦᠭᠡᠢ ᠪᠠᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠪᠠᠬᠠᠨ ᠠᠯᠲᠠᠨ ᠴᠣᠬᠣ ᠨᠢᠰᠦᠨ ᠣᠷᠣᠵᠤ ᠢᠷᠡᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠳ᠋ᠦ᠍ ᠠᠩᠬᠠᠷᠤᠯ ᠲᠠᠲᠠᠭᠳᠠᠬᠤ ᠬᠥᠮᠦᠨ ᠦᠭᠡᠢ ᠪᠠᠢᠯᠠ᠃ ᠬᠠᠮᠤᠭ ᠤ᠋ᠨ ᠵᠢᠭᠠᠬᠠᠨ ᠬᠡᠦᠬᠡᠳ ᠦ᠋ᠳ ᠬᠦᠷᠲᠡᠯᠡ ᠰᠡᠳᠬᠢᠯ ᠠᠯᠭᠠᠰᠠᠬᠤ ᠦᠭᠡᠢ ᠪᠡᠷ ᠳᠡᠪᠲᠡᠷ ᠲᠦ᠍ ᠪᠡᠨ ᠲᠠᠰᠢᠭᠤ ᠵᠢᠷᠤᠭᠠᠰᠤ ᠨᠤᠭᠤᠳ ᠢ᠋ ᠹᠷᠠᠨᠼᠢ ᠦᠰᠦᠭ ᠢ᠋ᠶ᠋ᠡᠨ ᠰᠢᠭ ᠬᠦᠨᠳᠦᠳᠬᠡᠵᠦ ᠰᠢᠮᠳᠠᠨ ᠱᠣᠭᠣᠮᠲᠠᠵᠠᠭᠠᠵᠦ ᠪᠠᠢᠯᠠ᠃ ᠪᠠᠢᠰᠢᠩ ᠤ᠋ᠨ ᠣᠷᠣᠢ ᠪᠠᠷ ᠪᠠᠢᠭᠠ ᠲᠠᠭᠲᠠᠭᠠ ᠨᠤᠭᠤᠳ ᠤ᠋ᠨ ᠭᠦᠭᠦᠭᠯᠡᠨ ᠳᠤᠤᠭᠠᠷᠴᠠᠭᠠᠬᠤ ᠶ᠋ᠢ ᠰᠣᠨᠣᠰᠤᠭᠠᠳ ᠪᠢ 《ᠲᠡᠳᠡ᠂ ᠲᠠᠭᠲᠠᠭᠠ ᠶ᠋ᠢ ᠪᠠᠰᠠ ᠻᠸᠷᠮᠠᠨ ᠬᠡᠯᠡ ᠪᠡᠷ ᠠᠯᠪᠠᠲᠠᠨ ᠳᠤᠤᠭᠠᠷᠭᠠᠬᠤ ᠶᠤᠮ ᠪᠣᠯᠪᠠ ᠤᠤ ? ᠁ ᠁》 ᠭᠡᠵᠦ ᠪᠣᠳᠣᠯᠠ᠃
ᠪᠢ ᠬᠠᠷᠠᠬᠤ ᠪᠦᠷᠢ ᠳ᠋ᠦ᠍ ᠯᠡ ᠪᠠᠭᠰᠢ ᠮᠢᠨᠢ ᠰᠠᠨᠳᠠᠯᠢ ᠳᠡᠭᠡᠷᠡ ᠪᠡᠨ ᠬᠥᠳᠡᠯᠦᠯ ᠦᠭᠡᠢ ᠰᠠᠭᠤᠵᠤ ᠡᠨᠡ ᠵᠢᠵᠢᠭᠬᠡᠨ ᠲᠠᠰᠤᠯᠭᠠᠨ ᠤ᠋ ᠠᠯᠢᠪᠠ ᠶ᠋ᠢ ᠨᠢᠳᠦᠨ ᠳ᠋ᠦ᠍ ᠪᠡᠨ ᠰᠢᠩᠭᠡᠭᠡᠵᠦ ᠠᠪᠤᠭᠠᠳ ᠶᠠᠪᠤᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠰᠢᠨᠵᠢᠨ ᠰᠢᠷᠲᠡᠵᠦ ᠪᠠᠢᠯᠠ᠃ ᠪᠣᠳᠣᠬᠤ ᠳ᠋ᠤ᠌ ᠮᠠᠨ ᠤ᠋ ᠪᠠᠭᠰᠢ ᠳᠥᠴᠢᠨ ᠵᠢᠯ ᠦ᠋ᠨ ᠲᠤᠷᠰᠢ ᠡᠨᠳᠡ ᠡᠴᠡ ᠰᠠᠯᠤᠭᠠᠳᠤᠢ ᠪᠠᠷ ᠦᠯᠦ ᠪᠠᠷᠠᠮ ᠴᠣᠩᠬᠣᠨ ᠤ᠋ ᠬᠠᠵᠠᠭᠤᠬᠠᠨ ᠳ᠋ᠤ᠌ ᠲᠡᠭᠦᠨ ᠦ᠌ ᠵᠢᠵᠢᠭᠬᠡᠨ ᠬᠠᠰᠢᠶᠠ ᠨᠢ ᠪᠠᠢᠨᠠ᠂ ᠡᠮᠦᠨᠡ ᠨᠢ ᠰᠤᠷᠤᠭᠴᠢᠳ ᠰᠠᠭᠤᠵᠠᠭᠠᠨᠠ᠂ ᠮᠥᠨ ᠤᠳᠠᠭᠠᠨ ᠵᠢᠯ ᠢ᠋ᠶ᠋ᠡᠷ ᠬᠡᠷᠡᠭᠯᠡᠭᠰᠡᠨ ᠰᠢᠷᠡᠭᠡ ᠰᠠᠨᠳᠠᠯᠢ ᠨᠤᠭᠤᠳ ᠤ᠋ᠨ ᠡᠯᠡᠭᠳᠡᠬᠦ ᠨᠢ ᠡᠯᠡᠭᠳᠡᠵᠦ᠂ ᠡᠪᠳᠡᠷᠡᠬᠦ ᠨᠢ ᠡᠪᠳᠡᠷᠡᠭᠡᠳ ᠪᠠᠢᠭᠠ ᠨᠢ ᠬᠠᠷᠠᠭᠳᠠᠨᠠ᠃ ᠬᠠᠰᠢᠶᠠᠨ ᠤ᠋ ᠬᠤᠰᠢᠭᠠ ᠶ᠋ᠢᠨ ᠮᠣᠳᠣ ᠥᠨᠳᠥᠷ ᠲᠣᠮᠣ ᠪᠣᠯᠵᠠᠢ᠃ ᠥᠪᠡᠷ ᠦ᠋ᠨ ᠬᠢᠨᠢ ᠭᠠᠷ ᠢ᠋ᠶ᠋ᠠᠷ ᠲᠠᠷᠢᠭᠰᠠᠨ ᠣᠷᠢᠶᠠᠩᠭᠤ ᠨᠢ ᠡᠳᠦᠭᠡ ᠴᠣᠩᠬᠣ ᠶ᠋ᠢ ᠣᠷᠢᠶᠠᠵᠤ ᠪᠠᠢᠰᠢᠩ ᠤ᠋ᠨ ᠣᠷᠣᠢ ᠳ᠋ᠤ᠌ ᠬᠦᠷᠪᠡ᠃ ᠬᠥᠭᠡᠷᠦᠬᠦᠢ ᠵᠠᠢᠯᠠᠭᠤᠯ ᠪᠠᠭᠰᠢ ᠮᠢᠨᠢ᠂ ᠡᠨᠡ ᠪᠦᠬᠦᠨ ᠡᠴᠡ ᠪᠡᠨ ᠬᠠᠭᠠᠴᠠᠬᠤ ᠭᠡᠵᠦ ᠪᠠᠢᠭᠠ ᠲᠤᠯᠠ ᠡᠯᠢᠭᠡ ᠡᠮᠲᠡᠷᠡᠬᠦ ᠦᠭᠡᠢ ᠪᠠᠢᠵᠤ ᠬᠡᠷᠬᠢᠨ ᠴᠢᠳᠠᠬᠤ ᠪᠢᠯᠡ! ᠮᠥᠨ ᠥᠬᠢᠨ ᠳᠡᠭᠦᠦ ᠨᠢ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠡᠢᠰᠢ ᠲᠠᠢᠰᠢ ᠶᠠᠪᠤᠵᠤ ᠡᠳ᠋ᠯᠡᠯ ᠬᠥᠷᠥᠩᠭᠡ ᠶ᠋ᠢ ᠨᠢ ᠬᠤᠷᠢᠶᠠᠬᠤ ᠴᠢᠮᠡᠭᠡ ᠳᠤᠭᠤᠯᠳᠠᠬᠤ ᠶ᠋ᠢ ᠶᠠᠭᠤᠨ ᠥᠭᠦᠯᠡᠬᠦ ᠠᠵᠢ! ᠲᠡᠳᠡ ᠮᠠᠨᠢ ᠮᠠᠷᠭᠠᠰᠢ ᠡᠨᠳᠡ ᠡᠴᠡ ᠡᠭᠦᠷᠢᠳᠡ ᠠᠩᠭᠢᠵᠢᠷᠠᠬᠤ ᠨᠢ ᠠ᠋!
ᠭᠡᠪᠡᠴᠦ ᠪᠠᠭᠰᠢ ᠳ᠋ᠤ᠌ ᠮᠠᠨᠢ ᠡᠨᠡ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠬᠢᠴᠢᠶᠡᠯ ᠢ᠋ ᠪᠦᠷᠢᠨ ᠵᠢᠭᠠᠬᠤ ᠢᠲᠡᠭᠡᠯ ᠳᠦᠭᠦᠷᠡᠩ ᠪᠠᠢᠯᠠ᠃ ᠡᠨᠡ ᠬᠢᠴᠢᠶᠡᠯ ᠦ᠋ᠨ ᠳᠠᠷᠠᠭᠠ ᠪᠠᠰᠠ ᠨᠢᠭᠡ ᠴᠠᠭ ᠲᠡᠦᠬᠡ ᠵᠢᠭᠠᠯᠠ᠃ ᠴᠢᠩᠭᠢᠭᠡᠳ ᠪᠠᠰᠠ ᠠᠩᠬᠠ ᠵᠡᠷᠭᠡ ᠶ᠋ᠢᠨ ᠠᠩᠭᠢ ᠳ᠋ᠤ᠌ ba . be . bi. Bo .bu ᠭᠡᠵᠦ ᠠᠪᠢᠶᠠ ᠵᠢᠭᠠᠪᠠ᠃ ᠠᠷᠤ ᠳ᠋ᠤ᠌ ᠰᠠᠭᠤᠭᠰᠠᠨ ᠬᠠᠤᠰᠦ᠋ ᠭᠤᠸᠠᠢ ᠬᠡᠵᠢᠶᠡᠨ ᠦ᠌ ᠭᠠᠯ ᠰᠢᠯ ᠢ᠋ᠶ᠋ᠡᠨ ᠵᠡᠭᠦᠵᠦ ᠨᠥᠭᠦᠭᠡ ᠨᠣᠮ ᠢ᠋ᠶ᠋ᠠᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠢᠲᠠᠢᠬᠠᠨ ᠪᠠᠷᠢᠵᠤ ᠲᠡᠳᠡᠨ ᠦ᠌ ᠬᠠᠮᠲᠤ ᠦᠰᠦᠭ ᠬᠣᠯᠪᠣᠵᠤ ᠰᠠᠭᠤᠨᠠ᠃ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠬᠥᠳᠡᠯᠦᠭᠰᠡᠨ ᠪᠣᠯᠤᠯᠲᠠᠢ᠂ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠬᠢᠯᠡᠵᠦ ᠪᠠᠢᠯᠠ᠃ ᠲᠡᠭᠦᠨ ᠦ᠌ ᠵᠢᠭᠲᠡᠢ ᠳᠠᠭᠤ ᠶ᠋ᠢ ᠰᠣᠨᠣᠰᠤᠭᠠᠳ ᠪᠢ ᠢᠨᠢᠶᠡᠳᠦ ᠬᠦᠷᠬᠦ ᠰᠢᠭ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠪᠠᠰᠠ ᠡᠯᠢᠭᠡ ᠡᠮᠲᠡᠷᠡᠬᠦ ᠰᠢᠭ ᠪᠠᠢᠯᠠ᠃ ᠪᠢ ᠡᠨᠡ ᠬᠦ᠌ ᠬᠠᠮᠤᠭ ᠤ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠬᠢᠴᠢᠶᠡᠯ ᠢ᠋ᠶ᠋ᠡᠨ ᠶᠠᠭᠠᠬᠢᠭᠰᠠᠨ ᠴᠤ᠌ ᠮᠠᠷᠲᠠᠬᠤ ᠦᠭᠡᠢ ᠳᠡ!
ᠭᠡᠨᠡᠳᠲᠡ ᠾᠷᠢᠰᠲ᠋ᠣᠰ ᠤ᠋ᠨ ᠰᠦᠮᠡ ᠶ᠋ᠢᠨ ᠵᠢᠩ ᠠᠷᠪᠠᠨ ᠬᠣᠶᠠᠷ ᠴᠣᠬᠢᠯᠠ᠃ ᠮᠥᠷᠭᠥᠯ ᠦ᠋ᠨ ᠵᠢᠩ ᠴᠦ᠍ ᠳᠤᠤᠭᠠᠷᠤᠯᠠ᠃ ᠭᠠᠳᠠᠨᠠ ᠫᠷᠦ᠋ᠰᠰᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠦᠷᠢᠶᠡᠨ ᠦ᠌ ᠳᠠᠭᠤᠨ ᠬᠠᠩᠭᠢᠨᠠᠨᠠ᠃ ᠲᠡᠳᠡᠨ ᠦ᠌ ᠪᠣᠯᠪᠠᠰᠤᠷᠠᠯ ᠴᠤ᠌ ᠳᠠᠭᠤᠰᠤᠭᠰᠠᠨ ᠪᠣᠯᠤᠯᠲᠠᠢ᠃ ᠪᠠᠭᠰᠢ ᠮᠠᠨᠢ ᠴᠤ᠌ ᠴᠢᠷᠠᠢ ᠨᠢ ᠵᠢᠪᠡᠬᠡᠢᠷᠡᠨ ᠪᠣᠰᠤᠯᠠ᠂ ᠪᠠᠭᠰᠢ ᠮᠢᠨᠢ ᠨᠠᠳᠠ ᠳ᠋ᠤ᠌ ᠶᠡᠷᠦ ᠡᠴᠡ ᠪᠡᠨ ᠡᠢᠮᠦ ᠬᠠᠨᠠᠭᠠᠷ ᠰᠠᠢᠬᠠᠨ ᠲᠣᠮᠣ ᠪᠡᠶᠡ ᠲᠡᠢ ᠪᠠᠢᠭᠠ ᠦᠭᠡᠢ ᠶᠦᠮ ᠰᠢᠭ ᠪᠣᠳᠣᠭᠳᠠᠯᠠ᠃
《ᠮᠢᠨᠦ ᠨᠥᠬᠥᠳ ᠨᠠᠢᠵᠠ ᠨᠠᠷ ᠠ᠋! ᠪᠢ — —》 ᠭᠡᠳ ᠪᠠᠭᠰᠢ ᠮᠠᠨᠢ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠰᠠᠮᠪᠠᠷᠠ ᠤᠷᠤᠭᠤ ᠬᠠᠨᠳᠤᠵᠤ ᠣ ᠶ᠋ᠢᠨ ᠪᠢᠷ ᠠᠪᠤᠭᠠᠳ ᠪᠠᠢᠳᠠᠭ ᠴᠢᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ 《ᠹᠷᠠᠨᠼᠢ ᠮᠠᠨᠳᠤᠲᠤᠭᠠᠢ》 ᠭᠡᠰᠡᠨ ᠬᠣᠶᠠᠷᠬᠠᠨ ᠲᠣᠮᠣ ᠦᠰᠦᠭ ᠢ᠋ ᠪᠢᠴᠢᠵᠦ ᠣᠷᠬᠢᠯᠠ᠃
ᠢᠩᠭᠢᠭᠡᠳ ᠦᠭᠡ ᠪᠡᠨ ᠬᠡᠯᠡᠵᠦ ᠭᠠᠷᠬᠤ ᠦᠭᠡᠢ ᠬᠠᠨᠠ ᠳᠥᠰᠢᠨ ᠪᠠᠬᠠᠨ ᠭᠥᠯᠢᠷᠡᠨ ᠵᠣᠭᠰᠣᠭᠰᠠᠨ ᠢ᠋ᠶ᠋ᠠᠨ᠄
《ᠰᠤᠷᠭᠠᠭᠤᠯᠢ ᠴᠤ᠌ ᠲᠠᠷᠬᠠᠯᠠ — — ᠲᠠ ᠨᠠᠷ ᠬᠠᠷᠢᠵᠠᠭᠠ ᠳᠠ!》 ᠭᠡᠰᠡᠨ ᠤᠳᠬᠠ ᠲᠠᠢ ᠳᠣᠬᠢᠶᠠ ᠥᠭᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠠᠷᠠᠨᠠ᠂ ᠥᠷᠯᠥᠭ᠂ ᠴᠸᠨ ᠬᠤᠪᠢᠰᠬᠠᠯ᠂ ᠪᠤᠤ ᠿᠦᠩ ᠬᠤᠸᠠ᠂ ᠪᠤᠤ ᠶ᠋ᠢᠨ ᠿᠦᠩ᠃
ᠬᠢᠨᠠᠭᠴᠢ ᠪᠠᠭᠰᠢ᠄ ᠮᠥᠴᠢᠷ
ᠵᠣᠬᠢᠶᠠᠯᠴᠢ ᠶᠢᠨ ᠳᠥᠭᠥᠮ ᠲᠠᠨᠢᠯᠴᠠᠭᠤᠯᠭᠠ
ᠠ᠂ ᠳ᠋ᠠᠣᠲ᠋ᠠᠢ（1840.05.13 – 1897.12.16）
ᠹᠷᠠᠨᠼᠢ ᠶ᠋ᠢᠨ ᠵᠣᠬᠢᠶᠠᠯᠴᠢ- ᠣᠯᠠᠨ ᠵᠢᠯ ᠪᠠᠭᠰᠢᠯᠠᠭᠰᠠᠨ᠃ ᠰᠤᠷᠭᠠᠭᠤᠯᠢ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠥᠩᠭᠡᠷᠡᠭᠦᠯᠦᠭᠰᠡᠨ ᠣᠨ ᠵᠢᠯ ᠤᠳ ᠨᠢ ᠬᠣᠵᠢᠮ ᠵᠣᠬᠢᠶᠠᠯ ᠳ᠋ᠤ᠌ ᠨᠢ ᠲᠣᠰᠣᠭᠰᠠᠨ ᠪᠠᠢᠳᠠᠭ᠃ ᠠᠮᠢᠳᠤᠷᠠᠯ ᠤ᠋ᠨ ᠢ᠋ᠶ᠋ᠠᠨ ᠰᠡᠭᠦᠯ ᠤᠨ ᠵᠢᠯ ᠤᠳ ᠲᠦ᠍ ᠰᠡᠳᠬᠦᠯᠴᠢ ᠪᠡᠷ ᠠᠵᠢᠯᠯᠠᠵᠠᠢ᠃