ᠰᠡᠲᠦᠪᠲᠦ ᠳᠠᠭᠠᠷᠢᠯᠴᠠᠭᠠ Сэдэвт дайралцаа
574ᠰᠡᠲᠦᠪᠲᠦ ᠳᠠᠭᠠᠷᠢᠯᠴᠠᠭᠠ - ᠳᠦᠷᠪᠡ
ᠠ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠠᠩᠬᠠᠳᠤᠭᠠᠷ ᠭᠠᠯᠪᠠ ᠶ᠋ᠢ ᠶᠠᠮᠠᠷ ᠪᠣᠷᠬᠠᠨ ᠡᠵᠡᠯᠡᠪᠡ ᠳ᠋ᠠ ?
ᠠᠷᠰᠢ ᠽᠠᠨᠲᠠᠨ ᠮᠣᠲᠣ ᠨᠢ ᠶᠠᠮᠠᠷ ᠭᠠᠵᠠᠷ ᠤᠷᠭᠤᠪᠠ ᠳ᠋ᠠ ?
ᠠᠷᠢᠶᠠᠪᠠᠯᠤ ᠶ᠋ᠢᠨ ᠵᠢᠷᠭᠤᠭᠠᠨ ᠯᠤᠩ ᠊ᠢ ᠶᠠᠮᠠᠷ ᠬᠥᠮᠦᠨ ᠴᠢᠨᠢ ᠵᠣᠬᠢᠶᠠᠪᠠ ᠳ᠋ᠠ ?
ᠠᠯᠠᠵᠤ ᠠᠪᠤᠷᠠᠬᠤ ᠶᠣᠰᠣᠨ ᠊ᠢ ᠶᠠᠮᠠᠷ ᠪᠣᠷᠬᠠᠨ ᠡᠭᠦᠰᠬᠡᠪᠡ ᠳ᠋ᠠ ?
ᠡ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠠᠩᠬᠠᠳᠤᠭᠠᠷ ᠭᠠᠯᠪᠠ ᠶ᠋ᠢ ᠠᠶ᠋ᠢᠰᠢᠮᠲ᠋ᠢᠷᠢ ᠪᠣᠷᠬᠠᠨ ᠡᠵᠡᠯᠡᠪᠡ ᠂
ᠠᠷᠰᠢ ᠽᠠᠨᠲᠠᠨ ᠮᠣᠲᠣ ᠴᠢᠨᠢ ᠠᠰᠠᠷ ᠬᠤᠷᠮᠤᠰᠲᠠ ᠳᠦ ᠤᠷᠭᠤᠵᠠᠢ ᠃
ᠠᠷᠢᠶᠠᠪᠠᠯᠤ ᠶ᠋ᠢᠨ ᠵᠢᠷᠭᠤᠭᠠᠨ ᠯᠤᠩ ᠊ᠢ ᠵᠢᠷᠨᠠᠶ᠋ᠢᠰᠠᠩ ᠪᠣᠷᠬᠠᠨ ᠵᠣᠬᠢᠶᠠᠪᠠ ᠂
ᠠᠯᠠᠵᠤ ᠠᠪᠤᠷᠠᠬᠤ ᠶᠣᠰᠣᠨ ᠊ᠢ ᠮᠠᠶ᠋ᠢᠯ ᠪᠣᠷᠬᠠᠨ ᠡᠭᠦᠰᠬᠡᠪᠡ ᠃
ᠠ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠬᠣᠶᠠᠲᠤᠭᠠᠷ ᠭᠠᠯᠪᠠ ᠶ᠋ᠢ ᠶᠠᠮᠠᠷ ᠪᠣᠷᠬᠠᠨ ᠡᠵᠡᠯᠡᠪᠡ ᠳ᠋ᠠ ?
ᠬᠣᠪᠣᠯ ᠡᠷᠲᠡᠨᠢ ᠶ᠋ᠢᠨ ᠶᠠ ᠶᠠ ᠬᠤᠯᠤ ᠶᠠᠮᠠᠷ ᠭᠠᠵᠠᠷ ᠤᠷᠭᠤᠪᠠ ᠳ᠋ᠠ ?
ᠬᠤ᠌ ᠬᠠᠨ ᠵᠢᠩᠲᠧ ᠰᠠᠶ᠋ᠢᠨ ᠡᠷᠡ ᠶᠠᠮᠠᠷ ᠭᠠᠵᠠᠷ ᠮᠡᠨᠲᠦᠯᠡᠪᠡ ?
ᠬᠣᠣᠷ ᠶᠡᠬᠡᠲᠡᠢ ᠪᠠ ᠸᠠᠩ ᠶᠠᠮᠠᠷ ᠭᠠᠵᠠᠷ ᠬᠠᠰᠢᠬᠲᠠᠪᠠ ᠳ᠋ᠠ ?
ᠡ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠬᠣᠶᠠᠲᠤᠭᠠᠷ ᠭᠠᠯᠪᠠ ᠶ᠋ᠢ ᠬᠣᠨᠢᠴᠢᠨ ᠭᠠᠪᠬᠠ ᠡᠵᠡᠯᠡᠪᠡ ᠂
ᠬᠣᠪᠣᠯ ᠡᠷᠲᠡᠨᠢ ᠶ᠋ᠢᠨ ᠶᠠ ᠶᠠ ᠬᠤᠯᠤ ᠲᠩᠷᠢ ᠶ᠋ᠢᠨ ᠣᠷᠲᠣᠨ ᠳᠦ ᠤᠷᠭᠤᠵᠠᠢ ᠃
ᠬᠤ᠌ ᠬᠠᠨ ᠵᠢᠩᠲᠧ ᠰᠠᠶ᠋ᠢᠨ ᠡᠷᠡ ᠠᠷᠤ ᠭᠠᠵᠠᠷ ᠮᠡᠨᠲᠦᠯᠡᠵᠡᠢ ᠂
ᠬᠣᠣᠷ ᠶᠡᠬᠡᠲᠡᠢ ᠪᠠ ᠸᠠᠩ ᠡᠦ ᠵᠢᠶᠠᠩ ᠮᠥᠷᠡᠨ ᠳᠦ ᠬᠠᠰᠢᠬᠲᠠᠪᠠ ᠃
ᠠ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠭᠤᠷᠪᠠᠲᠤᠭᠠᠷ ᠭᠠᠯᠪᠠ ᠶ᠋ᠢ ᠶᠠᠮᠠᠷ ᠪᠣᠷᠬᠠᠨ ᠡᠵᠡᠯᠡᠪᠡ ᠳ᠋ᠠ ?
ᠭᠣᠷᠪᠠᠨ ᠨᠡᠭᠦᠲᠡᠯ ᠦ᠋ᠨ ᠭᠠᠵᠠᠷ ᠦᠵᠡᠳᠡᠭ ᠭᠠᠭᠴᠠ ᠨᠢᠲᠦᠲᠡᠢ ᠬᠡᠨ ᠲᠡᠷᠡ ᠪᠤᠢ ?
ᠭᠤᠸ᠋ᠠ ᠸᠠᠩ ᠦ᠋ᠨ ᠵᠡᠷᠭᠡ ᠳ᠋ᠦ ᠭᠠᠷᠴᠤ ᠡᠵᠡᠨ ᠶ᠋ᠢᠡᠨ ᠲᠡᠳᠬᠦᠭᠰᠡᠨ ᠶᠠᠮᠠᠷ ᠬᠥᠮᠦᠨ ᠳ᠋ᠠ ?
ᠭᠣᠷᠪᠠᠨ ᠶᠢᠷᠲᠢᠨᠴᠦ ᠶ᠋ᠢ ᠬᠤᠲᠠᠯ ᠬᠡᠯᠡᠵᠦ ᠶᠠᠪᠤᠲᠠᠭ ᠶᠠᠮᠠᠷ ᠨᠡᠷᠡ ᠲᠡᠢ ᠬᠤᠲᠠᠯᠴᠢ ᠪᠤᠢ ?
ᠡ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠭᠤᠷᠪᠠᠲᠤᠭᠠᠷ ᠭᠠᠯᠪᠠ ᠶ᠋ᠢ ᠭᠠᠪᠴᠢᠭᠡ ᠪᠣᠷᠬᠠᠨ ᠡᠵᠡᠯᠡᠪᠡ ᠰᠢᠦ ᠂
ᠭᠣᠷᠪᠠᠨ ᠨᠡᠭᠦᠲᠡᠯ ᠦ᠋ᠨ ᠭᠠᠵᠠᠷ ᠦᠵᠡᠳᠡᠭ ᠭᠠᠭᠴᠠ ᠨᠢᠲᠦᠲᠡᠢ ᠳᠤᠸᠠ ᠰᠣᠬᠣᠷ ᠃
ᠭᠤᠸ᠋ᠠ ᠸᠠᠩ ᠦ᠋ᠨ ᠵᠡᠷᠭᠡ ᠳᠦ ᠭᠠᠷᠴᠤ ᠡᠵᠡᠨ ᠶ᠋ᠢᠡᠨ ᠲᠡᠳᠬᠦᠭᠰᠡᠨ ᠮᠤᠬᠤᠯᠠᠢ ᠰᠢᠦ ᠂
ᠭᠣᠷᠪᠠᠨ ᠶᠢᠷᠲᠢᠨᠴᠦ ᠳᠦ ᠬᠤᠲᠠᠯ ᠬᠡᠯᠡᠵᠦ ᠶᠠᠪᠤᠲᠠᠭ ᠪᠠᠯᠭᠠᠨᠰᠠᠩ ᠭᠡᠳᠡᠭ ᠬᠤᠲᠠᠯᠴᠢ ᠰᠢᠦ ᠃
ᠠ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠳᠥᠷᠪᠡᠳᠦᠭᠡᠷ ᠭᠠᠯᠪᠠ ᠶ᠋ᠢ ᠶᠠᠮᠠᠷ ᠪᠣᠷᠬᠠᠨ ᠡᠵᠡᠯᠡᠪᠡ ᠳ᠋ᠠ ?
ᠳᠡᠯᠡᠬᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠲᠤᠭ ᠦ᠋ᠳ ᠊ᠢ ᠶᠠᠮᠠᠷ ᠡᠵᠡᠨ ᠳᠡᠭᠡᠭᠰᠢᠯᠡᠪᠡ ᠳ᠋ᠠ ?
ᠲᠦᠷᠦᠭᠰᠡᠨ ᠡᠴᠢᠭᠡ ᠪᠡᠨ ᠲᠠᠨᠢᠬᠰᠠᠨ ᠦᠭᠡᠢ ᠬᠠᠷᠪᠤᠵᠤ ᠠᠯᠠᠭᠰᠠᠨ ᠬᠡᠨ ᠲᠡᠷᠡ ᠪᠤᠢ ?
ᠲᠠᠪᠤᠨ ᠮᠥᠰᠥ ᠶ᠋ᠢᠨ ᠰᠤᠷᠭᠠᠯ ᠶ᠋ᠢᠠᠷ ᠬᠡᠦᠬᠡᠳ ᠶ᠋ᠢᠡᠨ ᠰᠤᠷᠭᠠᠭᠰᠠᠨ ᠬᠡᠨ ᠲᠡᠷᠡ ᠪᠤᠢ ?
ᠡ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠳᠥᠷᠪᠡᠳᠦᠭᠡᠷ ᠭᠠᠯᠪᠠ ᠶ᠋ᠢ ᠲᠡᠮᠰᠢᠭ ᠪᠣᠷᠬᠠᠨ ᠡᠵᠡᠯᠡᠪᠡ ᠰᠢᠦ ᠂
ᠳᠡᠯᠡᠬᠡᠢ ᠶᠢᠷᠲᠢᠨᠴᠦ ᠶ᠋ᠢᠨ ᠲᠤᠭ ᠦ᠋ᠳ ᠊ᠢ ᠥᠭᠡᠲᠡᠢ ᠬᠠᠭᠠᠨ ᠳᠡᠭᠰᠢᠯᠡᠪᠡ ᠰᠢᠦ ᠃
ᠲᠦᠷᠦᠭᠰᠡᠨ ᠡᠴᠢᠭᠡ ᠪᠡᠨ ᠲᠠᠨᠢᠬᠰᠠᠨ ᠦᠭᠡᠢ ᠬᠠᠷᠪᠤᠵᠤ ᠠᠯᠠᠭᠰᠠᠨ ᠰᠢᠤᠸᠠᠢ ᠳ᠋ᠢᠩ ᠱᠠᠨ ᠂
ᠲᠠᠪᠤᠨ ᠮᠥᠰᠥ ᠶ᠋ᠢᠨ ᠰᠤᠷᠭᠠᠯ ᠶ᠋ᠢᠠᠷ ᠬᠡᠦᠬᠡᠳ ᠶ᠋ᠢᠡᠨ ᠰᠤᠷᠭᠠᠭᠰᠠᠨ ᠠᠯᠤᠩᠭᠤᠸ᠋ᠠ ᠡᠬᠡ ᠰᠢᠦ ᠃
ᠠ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠣᠲᠣ ᠦᠶᠡ ᠶ᠋ᠢᠨ ᠭᠠᠯᠪᠠ ᠶ᠋ᠢ ᠶᠠᠮᠠᠷ ᠪᠣᠷᠬᠠᠨ ᠡᠵᠡᠯᠡᠪᠡ ᠳ᠋ᠠ ?
ᠣᠸᠮ ᠮᠠ ᠨᠢ ᠪᠠᠳ ᠮᠠ ᠬᠣᠩ ᠊ᠢ ᠶᠠᠮᠠᠷ ᠭᠡᠭᠡᠨ ᠲᠣᠭᠲᠠᠭᠠᠪᠠ ᠳ᠋ᠠ ?
ᠤᠤᠲᠠᠢ ᠶ᠋ᠢᠨ ᠲᠠᠪᠤᠨ ᠠᠭᠤᠯᠠ ᠶ᠋ᠢ ᠶᠠᠮᠠᠷ ᠠᠮᠢᠲᠠᠨ ᠰᠠᠵᠢᠯᠠᠭᠤᠯᠪᠠ ᠳ᠋ᠠ ?
ᠡᠪᠡᠰᠦᠨ ᠡᠮ ᠊ᠢ ᠡᠭᠦᠳᠦᠭᠰᠡᠨ ᠶᠠᠮᠠᠷ ᠨᠡᠷᠡ ᠲᠡᠢ ᠪᠣᠷᠬᠠᠨ ᠳ᠋ᠠ ?
ᠡ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠣᠲᠣ ᠦᠶᠡ ᠶ᠋ᠢᠨ ᠭᠠᠯᠪᠠ ᠶ᠋ᠢ ᠱᠠᠭᠵᠠᠲ᠋ᠢᠸ᠋ᠠ ᠪᠣᠷᠬᠠᠨ ᠡᠵᠡᠯᠡᠪᠡ ᠂
ᠣᠸᠮ ᠮᠠ ᠨᠢ ᠪᠠᠳ ᠮᠠ ᠬᠣᠩ ᠊ᠢ ᠮᠠᠶ᠋ᠢᠲᠠᠷ ᠪᠣᠷᠬᠠᠨ ᠲᠣᠭᠲᠠᠭᠠᠪᠠ ᠃
ᠤᠤᠲᠠᠢ ᠶ᠋ᠢᠨ ᠲᠠᠪᠤᠨ ᠠᠭᠤᠯᠠ ᠶ᠋ᠢ ᠴᠢᠯᠠᠭᠤᠨ ᠪᠠᠴᠢᠨ ᠰᠠᠵᠢᠯᠠᠭᠤᠯᠪᠠ ᠂
ᠡᠪᠡᠰᠦᠨ ᠡᠮ ᠊ᠢ ᠡᠭᠦᠳᠦᠭᠰᠡᠨ ᠣᠲᠠᠴᠢ ᠪᠣᠷᠬᠠᠨ ᠭᠡᠳᠡᠭ ᠰᠢᠦ ᠃
ᠠ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠤᠰᠤᠨ ᠪ ᠳᠡᠭᠡᠭᠦᠷ ᠭᠦᠶᠦᠭᠡᠳ ᠶᠠᠪᠤᠲᠠᠭ ᠶᠠᠮᠠᠷ ᠨᠡᠷᠡ ᠲᠡᠢ ᠪᠠᠭᠠᠲᠤᠷ ᠳ᠋ᠠ ?
ᠡᠭᠦᠯᠡ ᠬᠥᠯᠥᠭᠯᠡᠵᠦ ᠶᠢᠷᠲᠢᠨᠴᠦ ᠶ᠋ᠢ ᠲᠣᠭᠣᠷᠢᠲᠠᠭ ᠶᠠᠮᠠᠷ ᠨᠡᠷᠡ ᠲᠡᠢ ᠪᠣᠷᠬᠠᠨ ᠪᠤᠢ ?
ᠤᠷᠠᠨ ᠬᠣᠩᠰᠢᠶᠠᠷ ᠲᠠᠯᠪᠢᠭᠠᠳ ᠬᠦᠢ ᠪᠠᠭᠰᠢ ᠪᠠᠨ ᠬᠡᠨ ᠮᠡᠬᠡᠯᠡᠪᠡ ᠳ᠋ᠠ ?
ᠡᠬᠡᠨᠡᠷ ᠠᠪᠤᠪᠠᠯ ᠠᠯᠠᠲᠠᠭ ᠬᠦᠢ ᠴᠠᠭᠠᠨ ᠴᠢᠷᠠᠢ ᠲᠠᠢ ᠬᠡᠨ ᠲᠡᠷᠡ ᠳ᠋ᠠ ?
ᠡ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠤᠰᠤᠨ ᠪ ᠳᠡᠭᠡᠭᠦᠷ ᠭᠦᠶᠦᠭᠡᠳ ᠶᠠᠪᠤᠲᠠᠭ ᠠᠮᠢᠨᠪᠦᠬᠡ ᠪᠠᠭᠠᠲᠤᠷ ᠰᠢᠦ ᠂
ᠡᠭᠦᠯᠡ ᠬᠥᠯᠥᠭᠯᠡᠭᠡᠳ ᠶᠢᠷᠲᠢᠨᠴᠦ ᠶ᠋ᠢ ᠲᠣᠭᠣᠷᠢᠲᠠᠭ ᠪᠤᠳᠢᠰᠠᠳᠤᠡ ᠪᠣᠷᠬᠠᠨ ᠰᠢᠦ ᠃
ᠤᠷᠠᠨ ᠬᠣᠩᠰᠢᠶᠠᠷ ᠲᠠᠯᠪᠢᠭᠠᠳ ᠪᠠᠭᠰᠢ ᠪᠠᠨ ᠮᠡᠬᠡᠯᠡᠭᠰᠡᠨ ᠵᠦ᠍ ᠪᠠ ᠵᠢᠶᠸ ᠂
ᠡᠬᠡᠨᠡᠷ ᠠᠪᠤᠪᠠᠯ ᠠᠯᠠᠲᠠᠭ ᠴᠢᠨᠢ ᠴᠠᠭᠠᠨ ᠴᠢᠷᠠᠢ ᠲᠠᠢ ᠯᠦᠸᠧ ᠴᠸᠩ ᠰᠢᠦ ᠃
ᠠ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠭᠠᠯᠪᠠᠷᠠᠭᠴᠢ ᠽᠠᠨᠲᠠᠨ ᠮᠣᠲᠣ ᠭᠠᠵᠠᠷ ᠦ᠋ᠨ ᠬᠠᠮᠢᠬ᠋ᠠ ᠨᠢ ᠤᠷᠭᠤᠪᠠ ᠳ᠋ᠠ ?
ᠭᠠᠶ᠋ᠢᠬᠠᠮᠰᠢᠬᠲᠤ ᠳᠥᠷᠪᠡᠨ ᠦᠨᠲᠦᠰᠦ ᠨᠢ ᠶᠠᠮᠠᠷ ᠣᠷᠲᠣᠨ ᠳᠦ ᠲᠤᠯᠪᠠ ᠳ᠋ᠠ ?
ᠭᠣᠣᠯ ᠦ᠋ᠨ ᠰᠠᠶ᠋ᠢᠬᠠᠨ ᠰᠠᠯᠠᠭᠠᠨ ᠳ᠋ᠤᠨᠢ ᠶᠠᠮᠠᠷ ᠰᠢᠪᠠᠭᠤ ᠡᠭᠦᠷᠯᠡᠪᠡ ᠳ᠋ᠠ ?
ᠭᠤᠯᠢᠷ ᠠᠲᠠᠯᠢ ᠮᠢᠬᠠ ᠶ᠋ᠢ ᠨᠢ ᠶᠠᠮᠠᠷ ᠪᠣᠷᠬᠠᠨ ᠵᠣᠭᠣᠭᠯᠠᠪᠠ ?
ᠭᠤᠯᠪᠠᠶ᠋ᠢᠵᠦ ᠬᠡᠪᠲᠡᠭᠰᠡᠨ ᠪᠡᠶᠡ ᠶ᠋ᠢ ᠨᠢ ᠶᠠᠮᠠᠷ ᠮᠡᠷᠭᠡᠨ ᠬᠠᠷᠪᠤᠪᠠ ᠳ᠋ᠠ ?
ᠭᠣᠷᠪᠠᠨ ᠰᠠᠶ᠋ᠢᠬᠠᠨ ᠥᠨᠲᠡᠭᠡ ᠶ᠋ᠢ ᠨᠢ ᠶᠠᠮᠠᠷ ᠠᠮᠢᠲᠠᠨ ᠵᠠᠯᠭᠢᠪᠠ ᠳ᠋ᠠ ?
ᠭᠤᠴᠢᠨ ᠵᠢᠷᠭᠤᠭᠠᠨ ᠵᠢᠭᠦᠷ ᠰᠣᠲᠣ ᠶ᠋ᠢ ᠨᠢ ᠶᠠᠮᠠᠷ ᠰᠠᠩ ᠳᠦ ᠲᠠᠲᠠᠪᠠ ᠳ᠋ᠠ ?
ᠭᠠᠷᠬᠠᠨ ᠬᠣᠶᠠᠷ ᠨᠢᠲᠤ ᠶ᠋ᠢ ᠨᠢ ᠶᠠᠮᠠᠷ ᠰᠦᠮᠡ ᠳᠦ ᠲᠠᠬᠢᠪᠠ ᠳ᠋ᠠ ?
ᠡ ᠄ ᠵᠸ ᠬᠦᠢ ᠂ ᠦᠨᠡᠬᠡᠷᠡᠨ ᠲᠡᠶ᠋ᠢᠮᠦ ᠶᠸ !
ᠭᠠᠯᠪᠠᠷᠠᠭᠴᠢ ᠽᠠᠨᠲᠠᠨ ᠮᠣᠲᠣ ᠭᠠᠵᠠᠷ ᠦ᠋ᠨ ᠬᠥᠷᠥᠰᠥᠨ ᠳᠦ ᠤᠷᠭᠤᠵᠠᠢ ᠂
ᠭᠠᠶ᠋ᠢᠬᠠᠮᠰᠢᠬᠲᠤ ᠳᠥᠷᠪᠡᠨ ᠦᠨᠲᠦᠰᠦ ᠨᠢ ᠯᠤᠤᠰ ᠶ᠋ᠢᠨ ᠣᠷᠲᠣᠨ ᠳᠦ ᠲᠤᠯᠪᠠ ᠃
ᠭᠣᠣᠯ ᠦ᠋ᠨ ᠰᠠᠶ᠋ᠢᠬᠠᠨ ᠰᠠᠯᠠᠭᠠᠨ ᠳ᠋ᠤᠨᠢ ᠭᠠᠯᠪᠢᠩᠬ᠋ᠠ ᠰᠢᠪᠠᠭᠤ ᠡᠭᠦᠷᠯᠡᠵᠡᠢ ᠂
ᠭᠤᠯᠢᠷ ᠠᠲᠠᠯᠢ ᠮᠢᠬᠠ ᠶ᠋ᠢ ᠨᠢ ᠠᠷᠢᠶᠠᠪᠠᠯᠤ ᠪᠣᠷᠬᠠᠨ ᠵᠣᠭᠣᠭᠯᠠᠪᠠ ᠃
ᠭᠤᠯᠪᠠᠶ᠋ᠢᠵᠦ ᠬᠡᠪᠲᠡᠭᠰᠡᠨ ᠪᠡᠶᠡ ᠶ᠋ᠢ ᠨᠢ ᠬᠡᠰᠡᠷ ᠮᠡᠷᠭᠡᠨ ᠬᠠᠷᠪᠤᠪᠠ ᠂
ᠭᠣᠷᠪᠠᠨ ᠰᠠᠶ᠋ᠢᠬᠠᠨ ᠥᠨᠲᠡᠭᠡ ᠶ᠋ᠢ ᠨᠢ ᠬᠣᠣᠷᠲᠤ ᠮᠣᠭᠠᠢ ᠵᠠᠯᠭᠢᠪᠠ ᠃
ᠭᠤᠴᠢᠨ ᠵᠢᠷᠭᠤᠭᠠᠨ ᠵᠢᠭᠦᠷ ᠰᠣᠲᠣ ᠶ᠋ᠢ ᠨᠢ ᠬᠠᠭᠠᠨ ᠰᠠᠩ ᠳᠦ ᠲᠠᠲᠠᠪᠠ ᠂
ᠭᠠᠷᠬᠠᠨ ᠬᠣᠶᠠᠷ ᠨᠢᠲᠦ ᠶ᠋ᠢ ᠨᠢ ᠵᠣᠣ ᠶ᠋ᠢᠨ ᠰᠦᠮᠡ ᠳᠦ ᠲᠠᠬᠢᠪᠠ ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠰᠢᠯᠤᠭᠤᠨ
ᠬᠢᠨᠠᠭᠴᠢ ᠄ ᠴᠣᠯᠮᠣᠨᠲᠤᠶᠠᠭᠠ ᠪᠠᠭᠰᠢ