ᠡᠷᠭᠦᠨ᠎ᠡ ᠬᠤᠨ ᠤ ᠳᠣᠮᠣᠭӨргөнө хуны домог ᠳᠣᠮᠣᠭ ᠦᠯᠢᠭᠡᠷ

  ᠡᠷᠲᠡ ᠤᠷᠢᠳᠤ ‍ᠶ᠋ᠢᠨ ᠴᠠᠭ  ᠲᠦ ᠶᠤᠮᠰᠠᠨᠵᠠᠢ ᠃

  ᠤᠮᠠᠷᠠᠲᠤ ‍ᠶ᠋ᠢᠨ ᠲᠠᠯ᠎ᠠ ᠨᠤᠲᠤᠭ  ᠲᠦ ᠣᠯᠠᠨ ᠨᠡᠭᠦᠳᠡᠯᠴᠢᠨ ᠠᠶ᠋ᠢᠮᠠᠭ ᠨᠤᠲᠤᠭᠯᠠᠵᠤ ᠪᠠᠶ᠋ᠢᠪᠠ ᠃ ᠲᠡᠳᠡ ᠤᠰᠤ ᠪᠡᠯᠴᠢᠭᠡᠷ ‍ᠢ ᠳᠠᠭᠠᠨ ᠨᠡᠭᠦᠳᠡᠯᠯᠡᠨ ᠠᠮᠢᠳᠤᠷᠠᠳᠠᠭ ᠪᠠᠶ᠋ᠢᠵᠠᠢ ᠃ ᠲᠡᠳᠡᠭᠡᠷ ᠨᠡᠭᠦᠳᠡᠯᠴᠢᠨ ᠠᠶ᠋ᠢᠮᠠᠭ ‍ᠤᠨ ᠳᠣᠲᠣᠷ᠎ᠠ ᠮᠣᠩᠭᠣᠯ ᠭᠡᠳᠡᠭ  ᠨᠢᠭᠡᠨ  ᠪᠠᠭᠤᠷᠠᠢ ᠠᠶ᠋ᠢᠮᠠᠭ ᠪᠠᠶ᠋ᠢᠬᠰᠠᠨ ᠶᠤᠮ ᠃ ᠨᠢᠭᠡ ᠤᠳᠠᠭ᠎ᠠ ᠮᠣᠩᠭᠣᠯ ᠠᠶ᠋ᠢᠮᠠᠭ ᠵᠡᠷᠭᠡᠯᠡᠳᠡᠭᠡ ᠣᠷᠣᠰᠢᠭ᠎ᠠ ᠥᠭᠡᠷ᠎ᠡ ᠨᠢᠭᠡ ᠠᠶ᠋ᠢᠮᠠᠭ ᠎ᠲᠠᠢ ᠎ᠪᠠᠨ ᠡᠶ᠎ᠡ ᠡᠪᠳᠡᠷᠡᠨ ᠮᠠᠭᠤᠳᠠᠯᠴᠠᠵᠤ ᠬᠣᠶᠠᠷ ᠡᠲᠡᠭᠡᠳ ‍ᠢᠶ᠋ᠡᠷ ‍ᠢᠶ᠋ᠡᠨ  ᠶᠡᠬᠡ ᠠᠯᠠᠯᠳᠤᠭᠠᠨ  ᠪᠣᠯᠵᠤ ᠭᠡᠨ᠎ᠡ ᠃ ᠲᠡᠷᠡ ᠠᠯᠠᠯᠳᠤᠭᠠᠨ ‍ᠤ ᠡᠴᠦᠰ ᠲᠤ ᠮᠣᠩᠭᠣᠯ ᠠᠶ᠋ᠢᠮᠠᠭ ᠠ᠋ᠴᠠ ᠬᠣᠶᠠᠷ ᠡᠷᠡᠭᠲᠡᠢ ᠂ ᠬᠣᠶᠠᠷ ᠡᠮᠡᠭᠲᠡᠢ ᠳᠥᠷᠪᠡᠨ ᠵᠠᠯᠠᠭᠤ ᠦᠯᠡᠳᠡᠵᠦ ᠪᠤᠰᠤᠳ ᠨᠢ ᠪᠦᠷ ᠬᠢᠳᠤᠭᠳᠠᠪᠠ ᠃ ᠠᠮᠢᠳᠤ ᠭᠠᠷᠤᠭᠰᠠᠨ ᠳᠥᠷᠪᠡᠨ ᠵᠠᠯᠠᠭᠤ ᠵᠢᠭᠤᠲᠠᠨ ᠳᠤᠲᠠᠭᠠᠭᠰᠠᠭᠠᠷ ᠬᠥᠮᠦᠨ ᠠᠮᠢᠲᠠᠨ ᠬᠦᠷᠬᠦᠶ᠎ᠡ ᠪᠡᠷᠬᠡ ᠨᠢᠭᠡᠨ ᠠᠭᠯᠠᠭ ᠠᠭᠤᠯᠠᠨ ‍ᠳᠤ ᠬᠦᠷᠪᠡ ᠃ ᠡᠨᠡ ᠠᠭᠤᠯᠠᠨ ‍ᠤ ᠳᠥᠷᠪᠡᠨ ᠲᠠᠯ᠎ᠠ ᠎ᠪᠠᠷ ᠬᠠᠯᠢᠯ ᠬᠠᠳᠠ ᠰᠦᠨᠳᠡᠷᠯᠡᠨ ᠂ ᠣᠢ ᠮᠣᠳᠣ ᠪᠦᠷᠬᠦᠭᠡᠳ ᠂ ᠠᠭᠤᠯᠠᠨ ‍ᠳᠤ ᠣᠷᠣᠬᠤ ᠵᠠᠮ ᠬᠡᠵᠥ ᠣᠭᠲᠣᠬᠠᠨ ᠴᠤ᠌ ᠪᠠᠶ᠋ᠢᠬᠤ ᠦᠭᠡᠢ ᠂ ᠲᠡᠳᠡ ᠳᠥᠷᠪᠡᠭᠦᠯᠡ ᠠᠮᠢ ᠵᠤᠯᠪᠠᠬᠤ ‍ᠶ᠋ᠢᠨ ᠲᠥᠯᠥᠭᠡ ᠬᠠᠳᠠ ᠴᠢᠯᠠᠭᠤ ‍ᠶ᠋ᠢ ᠰᠢᠯᠵᠢᠭᠦᠯᠥᠨ ᠂ ᠬᠠᠷᠭᠠᠨ᠎ᠠ ᠰᠤᠨᠳᠤᠤ ‍ᠶ᠋ᠢ ᠲᠠᠰᠤᠳᠠᠨ ᠂ ᠬᠠᠮᠤᠭ ᠪᠡᠷᠬᠡ ‍ᠶ᠋ᠢ ᠲᠤᠭᠤᠯᠤᠨ ᠨᠢᠭᠡᠨ ᠵᠥᠷᠢᠭ ᠭᠠᠷᠭᠠᠵᠤ ᠠᠭᠤᠯᠠᠨ ‍ᠳᠤ ᠵᠢᠭᠤᠲᠠᠨ ᠣᠷᠣᠵᠠᠢ ᠃ ᠠᠭᠤᠯᠠᠨ ‍ᠤ ᠳᠤᠮᠳᠠ ᠣᠷᠣᠪᠠᠯ  ᠬᠠᠷᠢᠨ ᠥᠨᠳᠥᠷ ᠣᠭᠲᠠᠷᠭᠤᠢ ᠴᠡᠯᠮᠡᠵᠦ ᠂ ᠥᠯᠥᠩ ᠡᠪᠡᠰᠦ ᠢᠬᠴᠤᠷᠠᠨ ᠂ ᠥᠩ  ᠰᠢᠮ᠎ᠡ ᠪᠦᠷᠢᠳᠦᠭᠰᠡᠨ ᠂ ᠥᠨᠢᠷ ᠰᠠᠶ᠋ᠢᠬᠠᠨ ᠲᠠᠯ᠎ᠠ ᠪᠠᠶ᠋ᠢᠬᠰᠠᠨ  ᠠᠵᠢ᠃ ᠡᠨᠡ ᠭᠠᠵᠠᠷ ‍ᠤᠨ ᠨᠡᠷ᠎ᠡ ‍ᠶ᠋ᠢ ᠡᠷᠭᠦᠨ᠎ᠡ ᠬᠤᠨ ᠭᠡᠳᠡᠭ ᠪᠠᠶ᠋ᠢᠵᠠᠢ ᠃
      ᠲᠡᠳᠡ ᠳᠥᠷᠪᠡᠭᠦᠯᠡ ᠡᠨᠡ ᠭᠠᠵᠠᠷ ‍ᠢ ᠲᠩᠷᠢ ᠮᠠᠨ ‍ᠳᠤ ᠬᠠᠶ᠋ᠢᠷᠠᠯᠠᠪᠠ ᠬᠡᠮᠡᠨ ᠶᠡᠬᠡᠳᠡ ᠪᠠᠶᠠᠷᠯᠠᠵᠤ ᠂  ᠬᠣᠶᠠᠷ ᠠᠶ᠋ᠢᠯ  ᠭᠡᠷ ᠪᠣᠯᠤᠯᠴᠠᠨ ᠡᠨᠳᠡ ᠨᠤᠲᠤᠭᠰᠢᠨ ᠰᠠᠭᠤᠪᠠ ᠃ ᠡᠨᠡ ᠬᠣᠶᠠᠷ ᠠᠶ᠋ᠢᠯ ᠡᠷᠦᠬᠡ ‍ᠶ᠋ᠢᠨ ᠨᠢᠭᠡ ᠨᠢ  ᠨᠡᠭᠦᠰ ᠣᠪᠣᠭᠲᠤ ᠂ ᠨᠥᠭᠦᠭᠡ ᠨᠢ ᠬᠢᠶᠠᠨ ᠣᠪᠣᠭᠲᠤ ᠪᠣᠯᠪᠠ ᠃ ᠬᠣᠶᠠᠷ ᠣᠪᠣᠭ ᠢᠷᠭᠡᠨ ‍ᠦ ᠬᠣᠶ᠋ᠢᠴᠢ ᠦᠶ᠎ᠡ ᠦᠷᠡᠵᠢᠨ ᠦᠷᠡᠵᠢᠭᠰᠡᠭᠡᠷ ᠪᠠᠰᠠ ᠣᠯᠠᠨ ᠠᠶ᠋ᠢᠮᠠᠭ ᠤᠭᠰᠠᠭ᠎ᠠ ᠪᠣᠯᠤᠨ ᠰᠠᠯᠪᠤᠷᠢᠯᠠᠵᠤ ᠤᠯᠠᠮ ‍ᠢᠶ᠋ᠠᠷ ᠡᠷᠭᠦᠨ᠎ᠡ ᠬᠤᠨ ᠎ᠳ᠋ᠦ᠍ ᠪᠠᠭᠲᠠᠵᠤ ᠶᠠᠳᠠᠬᠤ ‍ᠳᠤ ᠬᠦᠷᠴᠡᠢ ᠃ ᠲᠡᠭᠡᠬᠦᠯᠡᠷ ᠲᠡᠳᠡ ᠡᠨᠡ ᠪᠣᠶ᠋ᠢᠳᠠ ᠪᠥᠭᠯᠡᠭᠦᠦ ᠠᠭᠤᠯᠠᠨ ᠠ᠋ᠴᠠ ᠭᠠᠷᠴᠤ ᠥᠷᠭᠡᠨ ᠠᠭᠤᠳᠠᠮ ᠲᠠᠯ᠎ᠠ ᠨᠤᠲᠤᠭ  ᠲᠦ ᠎ᠪᠠᠨ ᠪᠤᠴᠠᠬᠤ ‍ᠶ᠋ᠢ ᠬᠦᠰᠡᠪᠡ ᠃ ᠲᠡᠳᠡ ᠡᠪᠦᠭᠡ ᠳᠡᠭᠡᠳᠦᠰ ‍ᠦᠨ ᠠᠩᠬ᠎ᠠ ᠠᠭᠤᠯᠠᠨ ‍ᠳᠤ ᠣᠷᠣᠵᠤ ᠢᠷᠡᠭᠰᠡᠨ ᠶᠠᠪᠤᠳᠠᠯ ‍ᠢ ᠴᠡᠭᠡᠵᠢᠯᠡᠭᠰᠡᠭᠡᠷ ᠪᠣᠯᠪᠠᠴᠤ ᠂ ᠲᠡᠷᠡ ᠨᠠᠷᠢᠨ ᠵᠥᠷᠢᠭ ᠨᠢ ᠠᠯᠢ ᠬᠡᠳᠦᠶ᠋ᠢᠨ ᠡᠪᠡᠰᠦ ᠮᠣᠳᠣᠨ ‍ᠳᠤ ᠬᠤᠴᠢᠬᠳᠠᠨ ᠬᠠᠭᠠᠭᠳᠠᠪᠠ ᠃ ᠪᠦᠭᠦᠳᠡᠭᠡᠷ ᠠᠭᠤᠯᠠᠨ ᠠ᠋ᠴᠠ ᠴᠣᠬᠣᠮ ᠶᠠᠭᠠᠬᠢᠵᠤ ᠭᠠᠷᠬᠤ ᠠᠷᠭ᠎ᠠ ᠎ᠪᠠᠨ ᠣᠯᠬᠤ ᠦᠭᠡᠢ ᠵᠣᠪᠠᠵᠤ ᠪᠠᠶ᠋ᠢᠲᠠᠯ᠎ᠠ ᠂ ᠬᠢᠶᠠᠨ ᠣᠪᠣᠭ ‍ᠤᠨ ᠨᠢᠭᠡᠨ ᠡᠪᠦᠭᠡᠨ ᠠᠩᠴᠢᠨ ᠠᠭᠤᠯᠠᠨ ‍ᠤ ᠳᠤᠮᠳᠠ ᠠ᠋ᠴᠠ ᠬᠦᠳᠡᠷ ᠬᠠᠶ᠋ᠢᠯᠤᠭᠤᠯᠵᠤ ᠪᠠᠶ᠋ᠢᠬᠰᠠᠨ ᠭᠠᠵᠠᠷ ‍ᠢ ᠣᠯᠵᠤ ᠦᠵᠡᠭᠡᠳ ᠣᠯᠠᠨ ‍ᠢ ᠳᠠᠭᠠᠭᠤᠯᠤᠨ ᠠᠪᠠᠴᠢᠪᠠ ᠃ ᠪᠦᠭᠦᠳᠡᠭᠡᠷ ᠰᠢᠨᠵᠢᠵᠦ ᠦᠵᠡᠭᠡᠳ ᠬᠦᠳᠡᠷ  ᠬᠠᠶ᠋ᠢᠯᠤᠭᠤᠯᠤᠨ ᠠᠭᠤᠯᠠ ‍ᠶ᠋ᠢ    ᠶᠡᠭᠦᠷᠡᠭᠦᠯᠵᠦ᠂ ᠭᠠᠷᠴᠤ ᠪᠣᠯᠬᠤ ᠨᠢᠭᠡᠨ ᠠᠷᠭ᠎ᠠ ‍ᠶ᠋ᠢ ᠪᠣᠳᠣᠵᠤ ᠣᠯᠪᠠ ᠃ ᠡᠭᠦᠨ ᠎ᠡᠴᠡ  ᠥᠭᠡᠷ᠎ᠡ ᠠᠷᠭ᠎ᠠ ᠣᠯᠳᠠᠭᠰᠠᠨ ᠦᠭᠡᠢ ᠃ ᠲᠡᠭᠡᠭᠡᠳ ᠪᠦᠭᠦᠳᠡᠭᠡᠷ ᠣᠢ ᠳᠣᠲᠣᠷ᠎ᠠ ᠠ᠋ᠴᠠ ᠲᠦᠯᠡᠭᠡ ᠂ ᠨᠡᠭᠦᠷᠡᠰᠦ ᠴᠤᠭᠯᠠᠭᠤᠯᠤᠨ ᠂  ᠪᠠᠰᠠ ᠳᠠᠯᠠᠨ  ᠦᠬᠡᠷ ᠠᠯᠠᠵᠤ ᠠᠷᠠᠰᠤ ‍ᠶ᠋ᠢ ᠨᠢ ᠪᠢᠲᠡᠭᠦᠦ ᠪᠡᠷ ᠥᠪᠴᠢᠨ ᠂ ᠳᠠᠯᠠᠨ   ᠲᠤᠯᠤᠮ ‍ᠤᠨ ᠬᠥᠭᠡᠷᠭᠡ ᠵᠣᠬᠢᠶᠠᠪᠠ ᠃
      ᠨᠢᠭᠡᠨ ᠡᠳᠦᠷ ᠪᠦᠭᠦᠳᠡᠭᠡᠷ ᠬᠤᠷᠠᠨ ᠢᠷᠡᠵᠦ ᠂ ᠴᠤᠭᠯᠠᠭᠤᠯᠤᠭᠰᠠᠨ  ᠲᠦᠯᠡᠭᠡ ᠨᠡᠭᠦᠷᠡᠰᠦ ᠎ᠪᠡᠨ ᠴᠥᠮ ᠲᠡᠷᠡ ᠬᠦᠳᠡᠷ ᠬᠠᠶ᠋ᠢᠯᠤᠭᠤᠯᠵᠤ ᠪᠠᠶ᠋ᠢᠬᠰᠠᠨ ᠭᠠᠵᠠᠷ  ᠎ᠲᠦ᠍ ᠣᠪᠣᠭᠠᠯᠠᠨ  ᠲᠠᠯᠪᠢᠵᠤ ᠂ ᠭᠠᠯ ‍ᠢᠶ᠋ᠠᠨ  ᠬᠥᠭᠵᠢᠭᠡᠭᠡᠳ ᠂ ᠢᠳᠡ ᠬᠦᠴᠦ ᠎ᠲᠡᠢ ᠬᠡᠳᠦᠨ ᠵᠠᠭᠤᠨ ᠰᠠᠶ᠋ᠢᠨ ᠡᠷᠡᠴᠦᠦᠯ ᠳᠠᠯᠠᠨ ᠲᠤᠯᠤᠮ ‍ᠤᠨ ᠬᠥᠭᠡᠷᠭᠡ ᠪᠡᠷ ᠡᠳᠦᠷ ᠰᠥᠨᠢ ᠦᠭᠡᠢ ᠡᠭᠡᠯᠵᠢᠯᠡᠨ ᠬᠥᠭᠡᠷᠭᠡᠳᠡᠪᠡ ᠃ ᠬᠡᠯᠡᠪᠡᠯ ᠰᠣᠨᠢᠨ ᠳᠣᠯᠣᠭᠠᠨ ᠳᠣᠯᠣᠭ᠎ᠠ ᠳᠥᠴᠢ ᠶᠢᠰᠦᠨ ᠬᠣᠨᠣᠭ ᠬᠥᠭᠡᠷᠭᠡᠳᠡᠭᠰᠡᠨ ᠴᠢᠨᠢ ᠬᠦᠳᠡᠷ ᠴᠢᠯᠠᠭᠤ ᠬᠠᠶ᠋ᠢᠯᠤᠨ ᠤᠷᠤᠰᠴᠤ ᠂ ᠬᠥᠬᠡ ᠠᠭᠤᠯᠠ ᠶᠡᠭᠦᠷᠡᠨ ᠨᠤᠷᠠᠭᠠᠳ ᠲᠠᠯ᠎ᠠ ᠨᠤᠲᠤᠭ ᠨᠢᠳᠦᠨ ᠡᠮᠦᠨ᠎ᠡ ᠢᠯᠡᠷᠡᠨ ᠭᠠᠷᠴᠠᠢ ᠃ ᠲᠡᠳᠡ ᠲᠡᠰᠬᠡᠯ ᠦᠭᠡᠢ ᠪᠠᠶᠠᠷᠯᠠᠵᠤ ᠂ ᠤᠯᠠᠮᠵᠢᠯᠠᠯᠲᠤ ᠵᠠᠩᠰᠢᠯ ‍ᠢᠶ᠋ᠠᠷ ᠡᠭᠡᠰᠢᠭᠯᠡᠨ ᠳᠠᠭᠤᠯᠠᠵᠤ ᠂ ᠳᠡᠪᠬᠡᠴᠡᠨ ᠪᠥᠵᠢᠭᠯᠡᠭᠰᠡᠭᠡᠷ ᠡᠷᠭᠦᠨ᠎ᠡ ᠬᠤᠨ ᠎ᠡᠴᠡ ᠭᠠᠷᠴᠤ ᠂ ᠥᠷᠭᠡᠨ ᠠᠭᠤᠳᠠᠮ ᠲᠠᠯ᠎ᠠ ᠨᠤᠲᠤᠭ  ᠲᠦ ᠎ᠪᠠᠨ ᠪᠤᠴᠠᠵᠤ ᠢᠷᠡᠭᠡᠳ  ᠲᠠᠪᠠ ᠳᠠᠢ ᠰᠠᠶ᠋ᠢᠬᠠᠨ ᠠᠮᠢᠳᠤᠷᠠᠨ ᠰᠠᠭᠤᠭᠰᠠᠨ ᠭᠡᠨ᠎ᠡ  ᠃