ᠬᠤᠯᠤᠰᠤᠴᠢᠨ -ᠰᠢᠳᠢᠲᠦ ᠦᠯᠢᠭᠡᠷ Хүлсчин
925ᠬᠤᠯᠤᠰᠤᠴᠢᠨ ᠤ᠋ ᠦᠯᠢᠭᠡᠷ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ ᠬᠤᠯᠤᠰᠤᠴᠢᠨ ᠡᠷᠡ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠬᠠᠭᠤᠴᠢᠨ ᠣᠪᠣᠬᠠᠢ ᠳ᠋ᠤ᠌ ᠠᠮᠢᠳᠤᠷᠠᠨ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠥᠷᠯᠥᠭᠡ ᠪᠦᠷᠢ ᠲᠡᠷᠡ ᠪᠡᠷ ᠬᠤᠯᠤᠰᠤ ᠬᠡᠷᠴᠢᠵᠦ ᠭᠡᠷ ᠲᠦ᠍ ᠪᠡᠨ ᠠᠪᠴᠢᠷᠠᠬᠤ ᠪᠠᠷ ᠣᠢ ᠤᠷᠤᠭᠤ ᠶᠠᠪᠤᠳᠠᠭ ᠪᠠᠢᠪᠠ᠃ ᠬᠤᠯᠤᠰᠤᠴᠢᠨ ᠭᠡᠷᠭᠡᠢ ᠶ᠋ᠢᠨ ᠬᠠᠮᠲᠤ ᠬᠤᠯᠤᠰᠤ ᠪᠠᠷ ᠣᠯᠠᠨ ᠲᠥᠷᠥᠯ ᠦ᠋ᠨ ᠵᠦᠢᠯ ᠬᠢᠨ ᠵᠠᠬᠠ ᠳᠡᠭᠡᠷᠡ ᠵᠠᠷᠤᠳᠠᠭ ᠪᠠᠢᠵᠠᠢ ᠭᠡᠨᠡ᠃ ᠬᠥᠭᠡᠷᠦᠬᠦᠢ ᠬᠣᠣᠰ ᠨᠢᠭᠡ ᠴᠤ᠌ ᠬᠡᠦᠬᠡᠳ ᠦᠭᠡᠢ ᠪᠠᠢᠵᠠᠢ᠂ ᠭᠡᠰᠡᠨ ᠴᠦ᠍ ᠲᠡᠳᠡ ᠠᠵᠠ ᠵᠢᠷᠭᠠᠯᠲᠠᠢ ᠠᠮᠢᠳᠤᠷᠠᠳᠠᠭ ᠪᠠᠢᠪᠠ᠃
ᠨᠢᠭᠡᠨ ᠡᠳᠦᠷ ᠣᠢ ᠳ᠋ᠤ᠌ ᠬᠤᠯᠤᠰᠤ ᠬᠡᠷᠴᠢᠵᠦ ᠪᠠᠢᠭᠠᠳ ᠬᠤᠯᠤᠰᠤᠴᠢᠨ ᠣᠢ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠨᠢᠭᠡᠨ ᠭᠣᠢᠳᠠ ᠬᠤᠯᠤᠰᠤ ᠪᠠᠢᠬᠤ ᠶ᠋ᠢ ᠬᠠᠷᠠᠪᠠ ᠭᠡᠨᠡ᠃ ᠲᠡᠷᠡ ᠬᠤᠯᠤᠰᠤ ᠲᠡᠷᠭᠡᠯ ᠰᠠᠷᠠ ᠰᠢᠭ ᠦᠵᠡᠰᠬᠦᠯᠡᠩ ᠲᠡᠢ ᠬᠡᠷᠡᠯᠳᠦᠵᠦ ᠪᠠᠢᠯᠠ᠃ ᠬᠤᠯᠤᠰᠤᠴᠢᠨ ᠰᠣᠨᠢᠭᠤᠴᠢ ᠨᠢᠭᠡᠨ ᠪᠠᠢᠪᠠ᠃ ᠪᠣᠯᠭᠣᠮᠵᠢᠲᠠᠢ ᠭᠡᠭᠴᠢ ᠨᠢ ᠬᠤᠯᠤᠰᠤ ᠶ᠋ᠢ ᠳᠠᠭᠠᠷᠢᠯᠠ᠃ ᠬᠤᠯᠤᠰᠤ ᠶ᠋ᠢ ᠲᠠᠭᠠᠷᠢᠲᠠᠯᠠ ᠬᠤᠯᠤᠰᠤᠴᠢᠨ ᠨᠢᠳᠦᠨ ᠳ᠋ᠦ᠍ ᠪᠡᠨ ᠴᠦ᠍ ᠢᠲᠡᠭᠡᠮᠡ ᠦᠭᠡᠢ ᠵᠦᠢᠯ ᠢ᠋ ᠣᠯᠵᠤ ᠬᠠᠷᠠᠵᠠᠢ ᠭᠡᠨᠡ᠃
—ᠠ ᠁
—ᠡᠨᠡ ᠴᠢᠨᠢ ᠥᠬᠢᠨ ᠬᠡᠦᠬᠡᠳ ᠪᠠᠢᠨᠠ᠃
—ᠬᠤᠯᠤᠰᠤᠨ ᠳᠣᠲᠣᠷᠠ ᠠ᠋ᠴᠠ ᠪᠢᠴᠢᠬᠠᠨ ᠥᠬᠢᠨ ᠭᠠᠷᠴᠤ ᠢᠷᠡᠪᠡ᠂ ᠬᠤᠯᠤᠰᠤᠴᠢᠨ ᠤ᠋ ᠡᠷᠡᠬᠡᠢ ᠬᠤᠷᠤᠭᠤ ᠶ᠋ᠢᠨ ᠴᠢᠨᠡᠭᠡᠨ ᠥᠬᠢᠨ ᠪᠠᠢᠯᠠ᠂ ᠲᠡᠷᠡ ᠥᠬᠢᠨ ᠲᠡᠭᠦᠨ ᠦ᠌ ᠬᠠᠷᠠᠵᠤ ᠪᠠᠢᠭᠰᠠᠨ ᠬᠠᠮᠤᠭ ᠤ᠋ᠨ ᠬᠥᠭᠡᠷᠦᠬᠦᠨ ᠥᠬᠢᠨ ᠪᠠᠢᠵᠠᠢ᠃ ᠲᠡᠷᠡ ᠳᠠᠷᠤᠢ ᠳ᠋ᠤ᠌ ᠥᠬᠢᠨ ᠢ᠋ ᠭᠡᠷ ᠲᠦ᠍ ᠪᠡᠨ ᠠᠪᠠᠴᠢᠨ ᠡᠬᠡᠨᠡᠷ ᠲᠦ᠍ ᠪᠡᠨ ᠬᠠᠷᠠᠭᠤᠯᠬᠤ ᠪᠠᠷ ᠰᠢᠢᠳᠪᠡ᠃ ᠥᠬᠢᠨ ᠢ᠋ ᠠᠯᠠᠭᠠᠨ ᠳᠡᠭᠡᠷᠡ ᠪᠡᠨ ᠵᠥᠭᠡᠯᠡᠨ ᠭᠡᠭᠴᠢ ᠨᠢ ᠡᠷᠭᠦᠵᠦ ᠶᠠᠭᠠᠷᠠᠵᠤ ᠲᠡᠪᠡᠳᠡᠯ ᠦᠭᠡᠢ ᠭᠡᠷ ᠦ᠋ᠨ ᠵᠦᠭ ᠠᠯᠬᠤᠪᠠ᠃ ᠥᠬᠢᠨ ᠢ᠋ ᠭᠡᠮᠲᠦᠭᠡᠬᠦ ᠦᠭᠡᠢ ᠶ᠋ᠢᠨ ᠲᠤᠯᠠᠳᠠ ᠶᠡᠬᠡᠳᠡ ᠪᠣᠯᠭᠣᠮᠵᠢᠯᠠᠵᠤ ᠪᠠᠢᠯᠠ᠃
—ᠭᠠᠷᠤᠭᠠᠳ ᠢᠷᠡᠭᠡᠴᠢ ᠬᠠᠢᠷᠠᠲᠤ ᠮᠢᠨᠢ᠂ ᠭᠠᠷᠴᠤ ᠢᠷᠡᠭᠡᠳ ᠶᠠᠭᠤ ᠣᠯᠤᠭᠰᠠᠨ ᠢ᠋ ᠮᠢᠨᠢ ᠬᠠᠷᠠᠭᠠᠴᠢ!
— ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠬᠡᠯᠡᠵᠦ ᠠᠯᠠᠭᠠ ᠪᠠᠨ ᠠᠭᠠᠵᠢᠮ ᠢ᠋ᠶ᠋ᠠᠷ ᠳᠡᠯᠭᠡᠨ ᠦᠵᠡᠭᠦᠯᠦᠯᠡ᠃ ᠲᠡᠷᠡ ᠳᠠᠷᠤᠢ ᠳ᠋ᠤ᠌ ᠭᠡᠷ ᠨᠢ ᠪᠦᠬᠦᠯᠢ ᠳ᠋ᠦ᠍ ᠪᠡᠨ ᠬᠡᠷᠡᠯᠳᠦᠬᠦ ᠨᠢ ᠲᠡᠷᠡ᠂ ᠡᠬᠡᠨᠡᠷ ᠨᠥᠬᠥᠷ ᠬᠣᠶᠠᠷ ᠠᠯᠮᠠᠢᠷᠠᠵᠤ ᠣᠷᠬᠢᠪᠠ᠃
—ᠰᠠᠷᠠ ᠰᠢᠭ᠋ ᠬᠡᠷᠡᠯᠳᠦᠵᠦ ᠪᠠᠢᠭᠠ ᠶ᠋ᠢ ᠨᠢ ᠬᠠᠷᠠ ᠳᠠ᠂ ᠡᠨᠡ ᠥᠬᠢᠨ ᠢ᠋ ᠰᠠᠷᠠᠨᠲᠤᠶᠠᠭᠠ ᠭᠡᠵᠦ ᠨᠡᠷᠡᠯᠡᠶᠡ᠂
—ᠰᠠᠷᠠᠨᠲᠤᠶᠠᠭᠠ ᠦᠵᠡᠰᠬᠦᠯᠡᠩ ᠲᠡᠢ ᠰᠠᠷᠠᠨ ᠤ᠋ ᠲᠤᠶᠠᠭᠠ᠃
ᠡᠬᠡᠨᠡᠷ ᠨᠢ ᠠᠯᠴᠢᠭᠤᠷ ᠠᠪᠴᠢᠷᠠᠨ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠬᠤᠴᠢᠯᠠ᠂ ᠥᠬᠢᠨ ᠢ᠋ ᠭᠠᠢᠬᠠᠨ ᠬᠠᠷᠠᠵᠤ ᠪᠠᠢᠲᠠᠯᠠ ᠴᠣᠩᠬᠣ ᠪᠠᠷ ᠰᠡᠪᠰᠢᠶᠡ ᠰᠠᠯᠬᠢ ᠣᠷᠣᠵᠤ ᠢᠷᠡᠯᠡ᠂ ᠪᠢᠴᠢᠬᠠᠨ ᠥᠬᠢᠨ ᠭᠠᠷ ᠠ᠋ᠴᠠ ᠨᠢ ᠮᠤᠯᠲᠤᠷᠠᠨ ᠠᠭᠠᠷ ᠲᠤ ᠬᠥᠭᠡᠷᠪᠡ ᠂ ᠡᠬᠡᠨᠡᠷ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠭᠡᠮᠲᠦᠬᠡᠯ ᠦᠭᠡᠢ ᠪᠠᠷᠢᠬᠤ ᠭᠡᠵᠦ ᠤᠷᠤᠯᠳᠤᠵᠤ ᠪᠠᠢᠪᠠ᠃ ᠤᠳᠠᠯ ᠦᠭᠡᠢ ᠰᠠᠯᠬᠢ ᠨᠠᠮᠳᠠᠬᠤ ᠳ᠋ᠤ᠌ ᠳᠠᠪᠤᠤ ᠪᠠᠷ ᠬᠤᠴᠢᠭᠳᠠᠭᠰᠠᠨ ᠪᠢᠴᠢᠬᠠᠨ ᠥᠬᠢᠨ ᠵᠢᠷ ᠦ᠋ᠨ ᠬᠡᠮᠵᠢᠶᠡ ᠲᠡᠢ ᠨᠢᠯᠬᠠ ᠬᠡᠦᠬᠡᠳ ᠪᠣᠯᠵᠤ ᠬᠤᠪᠢᠷᠠᠪᠠ ᠭᠡᠨᠡ᠃
—ᠬᠠ ᠬᠠ ᠬᠠ
—ᠡᠬᠡᠨᠡᠷ ᠨᠥᠬᠥᠷ ᠬᠣᠶᠠᠷ ᠨᠢᠭᠡ ᠨᠢᠭᠡᠨ ᠤᠷᠤᠭᠤ ᠪᠠᠨ ᠭᠠᠢᠬᠠᠨ ᠬᠠᠷᠠᠯᠠ᠃
— ᠬᠠ ᠬᠠ ᠬᠠ ᠦ᠂ ᠪᠢᠴᠢᠬᠠᠨ ᠰᠠᠷᠠᠨᠲᠤᠶᠠᠭᠠ ᠮᠠᠨᠢ ᠭᠠᠷ ᠲᠤ ᠪᠠᠭᠲᠠᠬᠤ ᠪᠠᠨ ᠪᠣᠯᠢᠯᠠ ᠰᠢᠦ᠃
— ᠳᠠᠷᠠᠭᠠ ᠶ᠋ᠢᠨ ᠥᠷᠯᠥᠭᠡ ᠨᠢ ᠬᠤᠯᠤᠰᠤᠴᠢᠨ ᠬᠤᠯᠤᠰᠤ ᠬᠡᠷᠴᠢᠬᠦ ᠪᠡᠷ ᠠᠬᠢᠨ ᠣᠢ ᠤᠷᠤᠭᠤ ᠶᠠᠪᠤᠵᠠᠢ᠂
—ᠭᠦᠦᠭ᠁
— ᠡᠩ᠁ ᠬᠡ ᠬᠡ ᠬᠡ᠂ ᠪᠢ ᠠᠪᠤᠶᠠ!
—ᠡᠬᠡᠨᠡᠷ ᠨᠥᠬᠥᠷ ᠬᠣᠶᠠᠷ ᠨᠢᠭᠡ ᠵᠦᠢᠯ ᠢ᠋ ᠤᠬᠠᠭᠠᠷᠠᠯᠠ᠂ ᠬᠤᠯᠤᠰᠤᠴᠢᠨ ᠤ᠋ ᠣᠯᠤᠭᠰᠠᠨ ᠰᠠᠷᠠᠨᠲᠤᠶᠠᠭᠠ ᠲᠡᠳᠡᠨ ᠦ᠌ ᠡᠳ᠋ ᠪᠠᠶᠠᠯᠢᠭ ᠤ᠋ᠨ ᠡᠭᠦᠳᠡ ᠶ᠋ᠢ ᠨᠡᠭᠡᠭᠡᠵᠦ ᠥᠭᠴᠡᠢ᠃ ᠲᠡᠷᠡ ᠴᠠᠭ ᠠ᠋ᠴᠠ ᠬᠣᠢᠰᠢ ᠬᠤᠯᠤᠰᠤᠴᠢᠨ ᠡᠳᠦᠷ ᠪᠦᠷᠢ ᠭᠡᠷ ᠲᠦ᠍ ᠪᠡᠨ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ ᠠᠪᠴᠢᠷᠠᠳᠠᠭ ᠪᠣᠯᠪᠠ᠂ ᠤᠳᠠᠯ ᠦᠭᠡᠢ ᠲᠡᠳᠡ ᠮᠠᠰᠢ ᠪᠠᠶᠠᠨ ᠪᠣᠯᠤᠯᠠ᠃ ᠲᠡᠳᠡ ᠰᠠᠷᠠᠨᠲᠤᠶᠠᠭᠠ ᠳ᠋ᠤ᠌ ᠰᠢᠮᠡᠲᠦ ᠬᠣᠭᠣᠯᠠ ᠥᠭᠴᠦ ᠦᠨᠡ ᠲᠡᠢ ᠲᠣᠷᠭᠠ ᠪᠠᠷ ᠬᠢᠭᠰᠡᠨ ᠬᠤᠪᠴᠠᠰᠤ ᠡᠮᠦᠰᠦᠭᠦᠯᠳᠡᠭ ᠪᠠᠢᠪᠠ᠂ ᠣᠯᠠᠨ ᠰᠠᠷᠠ ᠥᠩᠭᠡᠷᠡᠵᠦ ᠲᠡᠳᠡᠨ ᠦ᠌ ᠪᠢᠴᠢᠬᠠᠨ ᠥᠬᠢᠨ ᠮᠠᠰᠢ ᠬᠤᠷᠳᠤᠨ ᠥᠰᠴᠦ ᠲᠣᠮᠣ ᠪᠣᠯᠵᠤ ᠪᠠᠢᠪᠠ᠃ ᠪᠣᠭᠣᠨᠢᠬᠠᠨ ᠬᠤᠭᠤᠴᠠᠭᠠᠨ ᠤ᠋ ᠳᠣᠲᠣᠷᠠ ᠰᠠᠷᠠᠨᠲᠤᠶᠠᠭᠠ ᠦᠵᠡᠰᠬᠦᠯᠡᠩᠲᠡᠢ ᠵᠠᠯᠠᠭᠤ ᠪᠦᠰᠡᠭᠦᠢ ᠪᠣᠯᠵᠠᠢ᠃ ᠦᠰᠦ ᠨᠢ ᠦᠨᠡ ᠲᠡᠢ ᠲᠣᠷᠭᠠ ᠪᠠᠷ ᠬᠢᠭᠰᠡᠨ ᠬᠤᠪᠴᠠᠰᠤᠨ ᠠ᠋ᠴᠠ ᠴᠤ᠌ ᠵᠥᠭᠡᠯᠡᠨ ᠪᠣᠯᠤᠭᠰᠠᠨ ᠪᠠᠢᠪᠠ᠂ ᠨᠢᠳᠦ ᠨᠢ ᠣᠳᠣ ᠮᠡᠲᠦ ᠬᠡᠷᠡᠯᠳᠦᠵᠦ ᠪᠠᠢᠯᠠ᠂ ᠠᠷᠠᠰᠤ ᠨᠢ ᠥᠳᠥ ᠠᠳᠠᠯᠢ ᠵᠥᠭᠡᠯᠡᠨ ᠪᠣᠯᠵᠠᠢ᠃ ᠢᠨᠢᠶᠡᠮᠰᠦᠭᠯᠡᠯ ᠨᠢ ᠰᠠᠷᠠᠨ ᠠ᠋ᠴᠠ ᠴᠤ᠌ ᠢᠯᠡᠭᠦᠦ ᠭᠡᠷᠡᠯ ᠰᠠᠴᠤᠷᠠᠭᠤᠯᠵᠤ ᠪᠠᠢᠯᠠ᠃ ᠡᠨᠡ ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠬᠠᠮᠤᠭ ᠤ᠋ᠨ ᠦᠵᠡᠰᠬᠦᠯᠡᠩᠲᠡᠢ ᠪᠦᠰᠡᠭᠦᠢ ᠪᠣᠯᠤᠭᠰᠠᠨ ᠪᠠᠢᠵᠤ ᠴᠤ᠌ ᠮᠡᠳᠡᠬᠦ ᠶᠦ᠍ᠮ᠃ ᠭᠡᠪᠡᠴᠦ ᠬᠤᠯᠤᠰᠤᠴᠢᠨ ᠥᠭᠡᠷᠡ ᠨᠢᠭᠡᠨ ᠵᠦᠢᠯ ᠳ᠋ᠦ᠍ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠯᠠ᠂ ᠲᠣᠰᠬᠣᠨ ᠤ᠋ ᠣᠷᠣᠰᠢᠨ ᠰᠠᠭᠤᠭᠴᠢᠳ ᠲᠡᠭᠦᠨ ᠡᠴᠡ ᠭᠡᠷ ᠲᠤ ᠨᠢ ᠪᠠᠢᠭᠠ ᠦᠵᠡᠰᠬᠦᠯᠡᠩᠲᠡᠢ ᠥᠬᠢᠨ ᠦ᠌ ᠲᠤᠬᠠᠢ ᠠᠰᠠᠭᠤᠵᠤ ᠰᠢᠯᠭᠠᠭᠠᠬᠤ ᠪᠣᠯᠵᠠᠢ᠃ ᠨᠢᠭᠡᠨ ᠣᠷᠣᠢ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠤᠨᠲᠠᠵᠤ ᠪᠠᠢᠬᠤ ᠵᠠᠭᠤᠷᠠ ᠬᠤᠯᠤᠰᠤᠴᠢᠨ ᠡᠬᠡᠨᠡᠷ ᠲᠡᠢ ᠪᠡᠨ ᠶᠠᠷᠢᠯᠴᠠᠪᠠ᠃
—ᠮᠢᠨᠦ ᠰᠠᠨᠠᠭᠠ ᠵᠣᠪᠠᠵᠤ ᠪᠠᠢᠨᠠ᠂ ᠪᠢ ᠬᠥᠮᠦᠰ ᠲᠦ᠍ ᠥᠬᠢᠨ ᠢ᠋ ᠣᠢ ᠳ᠋ᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠪᠠᠢᠬᠤ ᠳ᠋ᠤ᠌ ᠨᠢ ᠣᠯᠤᠭᠰᠠᠨ᠂ ᠲᠡᠭᠡᠭᠡᠳ ᠭᠡᠷ ᠲᠡᠭᠡᠨ ᠠᠪᠴᠢᠷᠠᠵᠤ ᠠᠰᠠᠷᠠᠵᠤ ᠬᠠᠨᠳᠤᠵᠤ ᠪᠠᠢᠭᠠ ᠭᠡᠵᠦ ᠬᠡᠯᠡᠭᠰᠡᠨ᠂ ᠬᠠᠷᠢᠨ ᠣᠳᠣ ᠥᠬᠢᠨ ᠮᠠᠨᠢ ᠨᠠᠰᠤᠨ ᠳ᠋ᠤ᠌ ᠬᠦᠷᠦᠯᠡ ᠰᠢᠦ ᠳᠡ ᠂ ᠢᠩᠭᠢᠭᠡᠳ ᠥᠬᠢᠨ ᠦ᠌ ᠮᠢᠨᠢ ᠭᠤᠸᠠ ᠦᠵᠡᠰᠬᠦᠯᠡᠩ ᠢ᠋ ᠱᠠᠭᠰᠢᠨ ᠮᠠᠭᠲᠠᠵᠤ ᠠᠮᠠ ᠳᠠᠮᠵᠢᠨ ᠶᠠᠷᠢᠯᠴᠠᠵᠠᠭᠠᠵᠤ ᠪᠠᠢᠨᠠ᠃
—ᠪᠢ ᠮᠡᠳᠡᠵᠦ ᠪᠠᠢᠨᠠ᠂ ᠪᠢᠳᠡ ᠥᠬᠢᠨ ᠢ᠋ᠶ᠋ᠡᠨ ᠡᠭᠦᠷᠢᠳᠡ ᠢᠩᠭᠢᠭᠡᠳ ᠨᠢᠭᠤᠭᠠᠳ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ᠃
—ᠥᠷᠯᠥᠭᠡ ᠪᠣᠯᠬᠤ ᠳ᠋ᠤ᠌ ᠬᠤᠯᠤᠰᠤᠴᠢᠨ ᠭᠡᠷᠯᠡᠭᠦᠯᠬᠦ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠥᠬᠢᠨ ᠳ᠋ᠦ᠍ ᠪᠡᠨ ᠬᠡᠯᠡᠪᠡ᠂ ᠣᠯᠠᠨ ᠰᠠᠢᠬᠠᠨ ᠡᠷᠡ ᠲᠡᠭᠦᠨ ᠳ᠋ᠦ᠍ ᠭᠡᠷᠯᠡᠬᠦ ᠰᠠᠨᠠᠯ ᠲᠠᠯᠪᠢᠭᠰᠠᠨ ᠭᠡᠳᠡᠭ ᠢ᠋ ᠴᠤ᠌ ᠬᠡᠯᠡᠯᠡ᠃
—ᠦᠭᠡᠢ ᠠᠪᠤ ᠠ᠋᠂ ᠪᠢ ᠲᠠ ᠬᠣᠶᠠᠷ ᠠ᠋ᠴᠠ ᠬᠣᠯᠠ ᠠᠮᠢᠳᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠶᠠᠭᠠᠬᠢᠭᠠᠳ ᠨᠠᠮᠠ ᠶ᠋ᠢ ᠬᠣᠯᠠ ᠶᠠᠪᠤᠭᠤᠯᠬᠤ ᠭᠡᠳ ᠪᠠᠢᠭᠠ ᠶᠤᠮ ᠪᠣᠢ?—ᠬᠠᠢᠷᠠᠲᠤ ᠥᠬᠢᠨ ᠮᠢᠨᠢ ᠳᠡ᠂ ᠠᠪᠤ ᠨᠢ ᠴᠦ᠍ ᠪᠠᠰᠠ ᠴᠢᠮᠠ ᠠ᠋ᠴᠠ ᠬᠣᠯᠠ ᠠᠮᠢᠳᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠭᠡᠬᠦ ᠳᠤ ᠪᠡᠨ ᠪᠢ ᠴᠢᠮᠠ ᠶ᠋ᠢ ᠡᠭᠦᠷᠢᠳᠡ ᠭᠡᠷ ᠲᠦ᠍ ᠪᠡᠨ ᠨᠢᠭᠤᠭᠠᠳ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠰᠢᠦ ᠳᠡ᠂ ᠪᠢ ᠴᠢᠮᠠ ᠳ᠋ᠤ᠌ ᠬᠠᠢᠷᠠᠲᠠᠢ᠂ ᠬᠠᠢᠷᠠ ᠪᠢᠳᠡᠨ ᠢ᠋ ᠬᠤᠪᠢ ᠪᠠᠨ ᠬᠢᠴᠢᠶᠡ ᠭᠡᠵᠦ ᠵᠢᠭᠠᠭᠠ ᠦᠭᠡᠢ᠂ ᠪᠢ ᠴᠢᠮᠠ ᠶ᠋ᠢ ᠭᠡᠷ ᠡᠴᠡ ᠪᠡᠨ ᠶᠠᠪᠤᠭᠤᠯᠵᠤ ᠥᠪᠡᠷ ᠦ᠋ᠨ ᠠᠮᠢᠳᠤᠷᠠᠯ ᠢ᠋ᠶ᠋ᠠᠷ ᠴᠢᠨᠢ ᠠᠮᠢᠳᠤᠷᠠᠭᠤᠯᠬᠤ ᠶᠣᠰᠣᠲᠠᠢ᠂ ᠪᠢ ᠴᠢᠮᠠ ᠶ᠋ᠢ ᠬᠦᠴᠦᠯᠡᠵᠦ ᠲᠡᠳᠡᠨ ᠦ᠌ ᠨᠢᠭᠡ ᠲᠡᠢ ᠭᠡᠷᠯᠡ ᠭᠡᠵᠦ
ᠠᠯᠪᠠᠳᠠᠬᠤ ᠦᠭᠡᠢ᠂ ᠭᠡᠬᠦ ᠳᠤ ᠪᠡᠨ ᠶᠠᠳᠠᠵᠤ ᠲᠡᠳᠡᠨ ᠲᠡᠢ ᠠᠭᠤᠯᠵᠠᠭᠠᠳ ᠦᠵᠡᠭᠡᠴᠢ ᠳᠡ᠂ ᠲᠡᠭᠡᠬᠦ ᠤᠤ?
—ᠰᠠᠷᠠᠨᠲᠤᠶᠠᠭᠠ ᠠᠪᠤ ᠳ᠋ᠤ᠌ ᠪᠠᠨ ᠮᠠᠰᠢ ᠶᠡᠬᠡ ᠬᠠᠢᠷᠠᠲᠠᠢ ᠤᠴᠢᠷ᠂ ᠦᠭᠡᠢ ᠭᠡᠵᠦ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠂ ᠳᠠᠷᠠᠭᠠ ᠶ᠋ᠢᠨ ᠡᠳᠦᠷ ᠨᠢ ᠲᠠᠪᠤᠨ ᠵᠠᠯᠠᠭᠤ ᠡᠷᠡ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠬᠠᠷᠠᠬᠤ ᠪᠠᠷ ᠢᠷᠡᠯᠡ᠃ ᠲᠡᠳᠡ ᠥᠬᠢᠨ ᠡᠴᠡ ᠨᠢᠳᠦ ᠪᠡᠨ ᠰᠠᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠯᠠ᠄ ᠰᠠᠷᠠᠨᠲᠤᠶᠠᠭᠠ ᠨᠢᠭᠤᠷ ᠲᠤ ᠪᠠᠨ ᠢᠨᠢᠶᠡᠮᠰᠦᠭᠯᠡᠯ ᠴᠤ᠌ ᠲᠤᠳᠤᠷᠠᠭᠤᠯᠤᠯ ᠦᠭᠡᠢ ᠲᠡᠳᠡᠨ ᠤᠷᠤᠭᠤ ᠬᠠᠷᠠᠵᠤ ᠶᠠᠷᠢᠶᠠᠨ ᠠ᠋ᠴᠠ ᠨᠢ ᠪᠠᠶᠠᠷᠯᠠᠵᠤ ᠪᠠᠢᠭᠠ ᠰᠢᠨᠵᠢ ᠣᠭᠲᠣᠬᠠᠨ ᠴᠤ᠌ ᠠᠵᠢᠭᠯᠠᠭᠳᠠᠭᠰᠠᠨ ᠦᠭᠡᠢ᠃
— ᠬᠥᠮᠦᠨ ᠨᠢᠭᠡ ᠪᠦᠷ ᠨᠠᠳᠠ ᠳ᠋ᠤ᠌ ᠥᠭᠡᠷᠡ ᠥᠭᠡᠷᠡ ᠭᠠᠵᠠᠷ ᠠ᠋ᠴᠠ ᠥᠭᠡᠷᠡ ᠥᠭᠡᠷᠡ ᠵᠦᠢᠯ ᠠᠪᠴᠢᠷᠠᠨᠠ ᠤᠤ ᠭᠡᠮᠡᠨ ᠪᠢ ᠲᠠ ᠨᠠᠷ ᠠ᠋ᠴᠠ ᠬᠦᠰᠡᠵᠦ ᠪᠠᠢᠨᠠ᠃ ᠪᠢ ᠵᠥᠪᠬᠡᠨ ᠮᠢᠨᠦ ᠬᠦᠰᠡᠯ ᠢ᠋ ᠪᠡᠶᠡᠯᠡᠭᠦᠯᠦᠭᠰᠡᠨ ᠬᠥᠮᠦᠨ ᠲᠠᠢ ᠯᠠ ᠭᠡᠷᠯᠡᠬᠦ ᠪᠣᠯᠤᠨᠠ᠃
—ᠴᠢ ᠬᠦᠰᠡᠪᠡᠯ ᠪᠢ ᠴᠢᠮᠠ ᠳ᠋ᠤ᠌ ᠪᠦᠦᠳᠡᠭᠡᠷ ᠰᠠᠷᠠ ᠶ᠋ᠢ ᠠᠪᠴᠢᠷᠠᠭᠰᠠᠨ ᠴᠤ᠌ ᠴᠢᠳᠠᠨᠠ ᠬᠠᠢᠷᠠᠲᠤ ᠮᠢᠨᠢ ᠬᠡᠯᠡᠬᠦ ᠳ᠋ᠦ᠍ ᠯᠡ ᠪᠣᠯᠤᠨᠠ᠃
— ᠪᠢ ᠴᠢᠮᠠ ᠳ᠋ᠤ᠌ ᠬᠣᠶᠠᠷ ᠦᠭᠡ ᠬᠡᠯᠡᠶᠡ᠂ ᠡᠨᠳᠡ ᠡᠴᠡ ᠭᠠᠷᠴᠤ ᠦᠵᠡ ᠦᠵᠡᠰᠬᠦᠯᠡᠩᠲᠡᠢ ᠵᠠᠯᠠᠭᠤ ᠬᠠᠲᠤᠭᠲᠠᠢ ᠳ᠋ᠤ᠌ ᠴᠢᠨᠦ ᠪᠦᠦᠳᠡᠭᠡᠷ ᠰᠠᠷᠠ ᠣᠭᠲᠣᠬᠠᠨ ᠴᠤ᠌ ᠬᠡᠷᠡᠭ ᠦᠭᠡᠢ᠂ ᠬᠡᠷᠪᠡ ᠪᠦᠰᠡᠭᠦᠢ ᠬᠦᠰᠡᠬᠦ ᠯᠡ ᠶᠦ᠍ᠮ ᠪᠣᠯ ᠪᠢ ᠭᠢᠯᠲᠠᠭᠠᠨᠠᠭᠰᠠᠨ ᠣᠳᠣᠳ ᠢ᠋ ᠠᠪᠴᠢᠷᠠᠭᠰᠠᠨ ᠴᠤ᠌ ᠴᠢᠳᠠᠨᠠ᠃
— ᠲᠡᠳᠡᠨ ᠢ᠋ ᠰᠣᠨᠣᠰᠬᠤ ᠬᠡᠷᠡᠭ ᠦᠭᠡᠢ ᠭᠦᠩᠵᠦ ᠮᠢᠨᠢ ᠪᠢ ᠴᠢᠮᠠ ᠳ᠋ᠤ᠌ ᠳᠠᠯᠠᠢ ᠶ᠋ᠢᠨ ᠭᠦᠨ ᠡᠴᠡ ᠬᠠᠮᠤᠭ ᠤ᠋ᠨ ᠭᠢᠯᠲᠠᠭᠠᠷ ᠰᠤᠪᠤᠳ ᠢ᠋ ᠠᠪᠴᠢᠷᠠᠵᠤ ᠥᠭᠭᠦᠨᠡ᠃
—ᠡᠩ᠂ ᠨᠠᠳᠠ ᠳ᠋ᠤ᠌ ᠰᠠᠷᠠ ᠣᠳᠣᠳ ᠳᠠᠯᠠᠢ ᠶ᠋ᠢᠨ ᠰᠤᠪᠤᠳ ᠬᠡᠷᠡᠭ ᠦᠭᠡᠢ᠂ ᠪᠢ ᠬᠥᠮᠦᠨ ᠨᠢᠭᠡᠪᠦᠷᠢ ᠡᠴᠡ ᠥᠭᠡᠷᠡ ᠥᠭᠡᠷᠡ ᠵᠦᠢᠯ ᠬᠦᠰᠡᠬᠦ ᠪᠣᠯᠤᠨᠠ᠃
—ᠲᠡᠭᠡᠭᠡᠳ ᠵᠠᠯᠠᠭᠤ ᠪᠦᠰᠡᠭᠦᠢ ᠡᠬᠢᠨ ᠦ᠌ ᠵᠠᠯᠠᠭᠤ ᠪᠣᠯᠬᠤ ᠡᠨᠡᠳᠬᠡᠭ ᠯᠠᠮᠠ ᠳ᠋ᠤ᠌ ᠴᠢᠯᠠᠭᠤ ᠪᠠᠷ ᠬᠢᠭᠰᠡᠨ ᠠᠶᠠᠭᠠ ᠠᠪᠴᠢᠷᠠᠵᠤ ᠥᠭᠬᠦ ᠶ᠋ᠢ ᠳᠠᠭᠠᠭᠠᠯᠭᠠᠵᠠᠢ᠂ —ᠭᠡᠬᠦ ᠳ᠋ᠦ᠍ ᠪᠡᠨ ᠲᠡᠷᠡ ᠠᠶᠠᠭᠠ ᠨᠠᠳᠠ ᠠ᠋ᠴᠠ ᠢᠯᠡᠭᠦᠦ ᠬᠡᠷᠡᠯᠳᠦᠵᠦ ᠪᠠᠢᠬᠤ ᠶᠣᠰᠣᠲᠠᠢ᠃
—ᠬᠣᠶᠠᠳᠠᠬᠢ ᠵᠠᠯᠠᠭᠤ ᠳ᠋ᠤ᠌ ᠳᠣᠷᠣᠨᠠᠲᠤ ᠲᠠᠩᠭᠢᠰ ᠤ᠋ᠨ ᠬᠠᠮᠤᠭ ᠤ᠋ᠨ ᠥᠨᠳᠥᠷ ᠠᠭᠤᠯᠠᠨ ᠤ᠋ ᠣᠷᠭᠢᠯ ᠳ᠋ᠤ᠌ ᠤᠷᠭᠤᠭᠰᠠᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠠᠪᠴᠢᠷᠠᠵᠤ ᠥᠭᠬᠦ ᠶ᠋ᠢ ᠳᠠᠭᠠᠭᠠᠯᠭᠠᠪᠠ ᠭᠡᠨᠡ᠃ ᠤᠭ ᠮᠣᠳᠣᠨ ᠤ᠋ ᠦᠨᠳᠦᠰᠦ ᠨᠢ ᠮᠥᠩᠭᠥ᠂ ᠶᠡᠬᠡ ᠪᠡᠶᠡ ᠨᠢ ᠠᠯᠲᠠ ᠪᠠᠢᠬᠤ ᠪᠥᠭᠡᠳ ᠮᠥᠴᠢᠷ ᠡᠴᠡ ᠨᠢ ᠦᠨᠡᠲᠦ ᠴᠢᠯᠠᠭᠤᠨ ᠵᠢᠮᠢᠰ ᠤᠷᠭᠤᠳᠠᠭ ᠠᠵᠢ᠃
—ᠵᠥᠪᠬᠡᠨ ᠲᠡᠷᠡ ᠮᠣᠳᠣᠨ ᠤ᠋ ᠮᠥᠴᠢᠷ ᠢ᠋ ᠨᠠᠳᠠ ᠳ᠋ᠤ᠌ ᠠᠪᠴᠢᠷᠠᠬᠤ ᠶᠣᠰᠣᠲᠠᠢ ᠰᠢᠦ᠂ ᠥᠭᠡᠷᠡ ᠮᠣᠳᠣᠨ ᠮᠥᠴᠢᠷ ᠠᠪᠴᠢᠷᠠᠪᠠᠯ ᠨᠠᠮᠠ ᠶ᠋ᠢ ᠦᠯᠦ ᠬᠦᠨᠳᠦᠳᠬᠡᠭᠰᠡᠨ ᠶᠠᠪᠤᠳᠠᠯ ᠪᠣᠯᠤᠨᠠ ᠭᠡᠳᠡᠭ ᠢ᠋ ᠰᠠᠨᠠ᠃
—ᠭᠤᠷᠪᠠᠳᠠᠬᠢ ᠵᠠᠯᠠᠭᠤ ᠳ᠋ᠤ᠌ ᠬᠢᠲᠠᠳ ᠤᠷᠤᠭᠤ ᠶᠠᠪᠤᠵᠤ ᠭᠠᠯᠲᠤ ᠬᠤᠯᠤᠭᠠᠨᠠ ᠶ᠋ᠢᠨ ᠨᠥᠮᠥᠷᠭᠡ ᠠᠪᠴᠢᠷᠠᠬᠤ ᠶ᠋ᠢ ᠳᠠᠭᠠᠭᠠᠯᠭᠠᠯᠠ᠃ ᠬᠠᠷᠢᠨ ᠳᠥᠷᠪᠡᠳᠡᠬᠢ ᠵᠠᠯᠠᠭᠤ ᠳ᠋ᠤ᠌ ᠳᠣᠯᠣᠭᠠᠨ ᠥᠩᠭᠡ ᠶ᠋ᠢᠨ ᠭᠡᠷᠡᠯ ᠰᠠᠴᠤᠷᠠᠭᠤᠯᠳᠠᠭ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ ᠠᠪᠴᠢᠷᠠᠬᠤ ᠶ᠋ᠢ ᠳᠠᠭᠠᠭᠠᠯᠭᠠᠪᠠ᠃
ᠲᠤᠰ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ ᠨᠢ ᠯᠤᠤ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠢᠳᠠᠭ ᠠᠵᠢ᠃ ᠬᠠᠷᠢᠨ ᠲᠠᠪᠤᠳᠠᠬᠢ ᠵᠠᠯᠠᠭᠤ ᠳ᠋ᠤ᠌᠄ — ᠬᠠᠷᠢᠨ ᠴᠢ ᠭᠡᠳᠡᠰᠦᠨ ᠳ᠋ᠦ᠍ ᠪᠡᠨ ᠬᠢᠰᠤᠭᠠ ᠠᠪᠴᠤ ᠶᠠᠪᠤᠳᠠᠭ ᠬᠠᠷᠢᠶᠠᠴᠠᠢ ᠶ᠋ᠢ ᠣᠯᠵᠤ ᠨᠠᠳᠠ ᠳ᠋ᠤ᠌ ᠬᠢᠰᠤᠭᠠ ᠶ᠋ᠢ ᠨᠢ ᠠᠪᠴᠢᠷᠠ᠁ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠭᠰᠡᠨ ᠲᠠ ᠪᠦᠬᠦᠨ ᠳ᠋ᠦ᠍ ᠪᠠᠶᠠᠷᠯᠠᠯᠠ᠃
— ᠦ᠂ ᠦ ᠬᠠᠮᠢᠭᠠ ᠠ᠋ᠴᠠ ᠣᠯᠬᠤ ᠪᠣᠢ ?ᠬᠠᠷᠢᠨ ᠲᠡᠢᠮᠦ ᠠ᠋ ᠬᠠᠮᠢᠭᠠ ᠠ᠋ᠴᠠ ᠬᠠᠢᠬᠤ ᠶ᠋ᠢ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠪᠠᠢᠨᠠ᠁
—ᠰᠠᠷᠠᠨᠲᠤᠶᠠᠭᠠ ᠪᠣᠯᠤᠮᠵᠢ ᠦᠭᠡᠢ ᠵᠦᠢᠯ ᠳᠠᠭᠠᠭᠠᠯᠭᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ ᠪᠠᠢᠪᠠ᠂ ᠢᠩᠭᠢᠵᠦ ᠪᠠᠢᠲᠠᠯᠠ ᠠᠪᠤ ᠡᠵᠢ ᠲᠡᠢ ᠪᠡᠨ ᠨᠠᠰᠤᠨ ᠲᠤᠷᠰᠢ ᠳ᠋ᠤ᠌ ᠪᠠᠨ ᠬᠠᠮᠲᠤ ᠠᠮᠢᠳᠤᠷᠠᠬᠤ ᠤᠴᠢᠷᠲᠠᠢ ᠪᠠᠢᠯᠠ᠃ ᠣᠯᠠᠨ ᠳᠣᠯᠣᠭᠠ ᠬᠣᠨᠣᠭ ᠥᠩᠭᠡᠷᠡᠭᠰᠡᠨ ᠴᠦ᠍ ᠲᠠᠪᠤᠨ ᠵᠠᠯᠠᠭᠤ ᠡᠷᠭᠢᠵᠦ ᠢᠷᠡᠭᠰᠡᠨ ᠦᠭᠡᠢ᠃ ᠬᠤᠯᠤᠰᠤᠴᠢᠨ ᠡᠬᠡᠨᠡᠷ ᠲᠡᠢ ᠪᠡᠨ ᠬᠣᠶᠠᠳᠠᠬᠢ ᠵᠠᠯᠠᠭᠤ ᠳᠣᠷᠣᠨᠠᠲᠤ ᠲᠠᠩᠭᠢᠰ ᠢ᠋ ᠭᠠᠲᠤᠯᠵᠤ ᠶᠠᠪᠤᠭᠠᠳ ᠳᠠᠯᠠᠢ ᠶ᠋ᠢᠨ ᠰᠢᠭᠤᠷᠭᠠᠨ ᠳ᠋ᠤ᠌ ᠥᠷᠲᠥᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠠᠪᠴᠤ ᠴᠢᠳᠠᠯ ᠦᠭᠡᠢ ᠢᠷᠡᠭᠰᠡᠨ ᠲᠤᠬᠠᠢ ᠬᠡᠯᠡᠪᠡ ᠭᠡᠨᠡ᠃ ᠭᠤᠷᠪᠠᠳᠠᠬᠢ ᠵᠠᠯᠠᠭᠤ ᠭᠠᠯᠲᠤ ᠬᠤᠯᠤᠭᠠᠨᠠ ᠶ᠋ᠢ ᠬᠠᠢᠵᠤ ᠶᠠᠪᠤᠭᠠᠳ ᠠᠯᠮᠠᠰ ᠲᠠᠢ ᠲᠠᠭᠠᠷᠠᠵᠤ ᠵᠣᠳᠣᠭᠤᠯᠤᠭᠰᠠᠨ ᠠᠵᠢ᠃ ᠬᠠᠷᠢᠨ ᠳᠥᠷᠪᠡᠳᠡᠬᠢ ᠵᠠᠯᠠᠭᠤ ᠯᠤᠤ ᠶ᠋ᠢ ᠣᠯᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠭᠠᠳ ᠬᠠᠷᠠᠩᠭᠤᠢ ᠣᠢ ᠳ᠋ᠤ᠌ ᠣᠷᠣᠬᠤ ᠵᠥᠪᠰᠢᠶᠡᠷᠡᠯ ᠠᠪᠬᠤ ᠭᠡᠰᠡᠨ ᠪᠣᠯᠪᠠᠴᠤ ᠠᠢᠳᠠᠰ ᠲᠤ ᠪᠠᠨ ᠳᠡᠢᠯᠳᠡᠭᠡᠳ ᠪᠠᠭᠤᠵᠤ ᠥᠭᠴᠡᠢ᠃ ᠲᠠᠪᠤᠳᠠᠬᠢ ᠵᠠᠯᠠᠭᠤ ᠬᠠᠷᠢᠶᠠᠴᠠᠢ ᠶ᠋ᠢ ᠪᠠᠷᠢᠬᠤ ᠭᠡᠵᠦ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠶᠠᠴᠠᠢ ᠥᠪᠡᠷ ᠤᠷᠤᠭᠤ ᠨᠢ ᠳᠠᠭᠠᠷᠢᠵᠠᠢ ᠭᠡᠨᠡ᠃ ᠪᠤᠴᠠᠵᠤ ᠢᠷᠡᠭᠰᠡᠨ ᠴᠣᠷᠢ ᠶ᠋ᠢᠨ ᠭᠠᠭᠴᠠ ᠵᠠᠯᠠᠭᠤ ᠡᠨᠡᠳᠬᠡᠭ ᠯᠠᠮᠠ ᠴᠢᠯᠠᠭᠤ ᠪᠠᠷ ᠬᠢᠭᠰᠡᠨ ᠠᠶᠠᠭᠠ ᠶ᠋ᠢ ᠠᠪᠴᠢᠷᠠᠬᠤ ᠶᠣᠰᠣᠲᠠᠢ ᠪᠠᠢᠯᠠ᠂ ᠲᠡᠭᠦᠨ ᠢ᠋ᠶ᠋ᠡᠷ ᠭᠡᠷᠡᠯᠲᠦᠭᠰᠡᠨ ᠰᠠᠢᠬᠠᠨ ᠠᠶᠠᠭᠠ ᠠᠪᠴᠢᠷᠠᠭᠰᠠᠨ ᠴᠤ᠌ ᠰᠠᠷᠠᠨᠲᠤᠶᠠᠭᠠ ᠠ᠋ᠴᠠ ᠢᠯᠡᠭᠦᠦ ᠬᠡᠷᠡᠯᠳᠦᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃
— ᠶᠠᠭᠠᠬᠢᠨᠠ ᠳᠠ ᠂ ᠮᠠᠨ ᠤ᠋ ᠨᠤᠲᠤᠭ ᠲᠤ ᠥᠬᠢᠨ ᠲᠡᠢ ᠮᠢᠨᠢ ᠭᠡᠷᠯᠡᠵᠦ ᠴᠢᠳᠠᠬᠤ ᠬᠥᠮᠦᠨ ᠦᠨᠡᠬᠡᠷ ᠪᠠᠢᠬᠤ ᠦᠭᠡᠢ ᠶᠦᠮ ᠭᠡᠵᠢ ᠤᠤ?
—ᠲᠦᠰ ᠲᠦᠰ ᠲᠦᠰ᠁
—ᠠ᠂ ᠡᠵᠡᠨ ᠬᠠᠭᠠᠨ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠯᠡ᠂ ᠦ ᠪᠢᠳᠡ ᠮᠠᠰᠢ ᠶᠡᠬᠡ ᠪᠠᠶᠠᠷᠲᠠᠢ ᠪᠠᠢᠨᠠ᠃
— ᠪᠢ ᠯᠡ ᠲᠠ ᠬᠣᠶᠠᠷ ᠲᠤ ᠪᠥᠬᠥᠢᠬᠦ ᠤᠴᠢᠷ ᠲᠠᠢ᠂ ᠪᠢ ᠥᠬᠢᠨ ᠳ᠋ᠦ᠍ ᠴᠢᠨᠢ ᠭᠡᠷᠯᠡᠬᠦ ᠰᠠᠨᠠᠯ ᠲᠠᠯᠪᠢᠬᠤ ᠪᠠᠷ ᠵᠣᠷᠢᠵᠤ ᠢᠷᠡᠯᠡ᠂ ᠥᠬᠢᠨ ᠴᠢᠨᠢ ᠥᠪᠡᠷ ᠲᠡᠢ ᠨᠢ ᠭᠡᠷᠯᠡᠬᠦ ᠬᠦᠰᠡᠯ ᠲᠡᠢ ᠬᠥᠮᠦᠰ ᠡᠴᠡ ᠶᠠᠮᠠᠷ ᠵᠦᠢᠯ ᠱᠠᠭᠠᠷᠳᠠᠭᠰᠠᠨ ᠢ᠋ ᠪᠢ ᠰᠣᠨᠣᠰᠤᠭᠰᠠᠨ᠂ ᠲᠠ ᠵᠥᠪᠰᠢᠶᠡᠷᠡᠪᠡᠯ ᠪᠢ ᠥᠬᠢᠨ ᠲᠡᠢ ᠴᠢᠨᠢ ᠠᠭᠤᠯᠵᠠᠵᠤ ᠨᠠᠳᠠ ᠳ᠋ᠤ᠌ ᠶᠠᠮᠠᠷ ᠳᠠᠭᠠᠭᠠᠯᠭᠠᠪᠤᠷᠢ ᠥᠭᠬᠦ ᠶ᠋ᠢ ᠮᠠᠲᠠᠮᠠᠷ ᠪᠠᠢᠨᠠ᠃
—ᠠ ᠶᠠᠭᠤ? ᠠ ᠪᠣᠯᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ ᠂ ᠲᠠ ᠰᠠᠭᠤᠭᠠᠳ ᠬᠦᠯᠢᠶᠡᠵᠦ ᠪᠠᠢ᠂ ᠪᠢ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠤᠳᠠᠭᠠᠳ ᠢᠷᠡᠶᠡ᠃
—ᠡᠵᠡᠨ ᠬᠠᠭᠠᠨ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠬᠠᠷᠠᠬᠤ ᠪᠠᠷ ᠳᠣᠭᠳᠣᠯᠤᠨ ᠬᠦᠯᠢᠶᠡᠵᠦ ᠪᠠᠢᠯᠠ᠂ ᠪᠦᠰᠡᠭᠦᠢ ᠭᠠᠷᠴᠤ ᠢᠷᠡᠬᠦ ᠳᠤ ᠬᠠᠭᠠᠨ ᠦᠵᠡᠰᠬᠦᠯᠡᠩ ᠭᠤᠸᠠ ᠶ᠋ᠢ ᠨᠢ ᠬᠠᠷᠠᠭᠠᠳ ᠲᠡᠭᠦᠨ ᠲᠡᠢ ᠭᠡᠷᠯᠡᠬᠦ ᠪᠡᠷ ᠰᠡᠳᠬᠢᠯ ᠰᠢᠯᠤᠭᠤᠳᠪᠠ ᠭᠡᠨᠡ᠂ ᠭᠡᠪᠡᠴᠦ ᠰᠠᠷᠠᠨᠲᠤᠶᠠᠭᠠ ᠳ᠋ᠤ᠌ ᠬᠡᠯᠡᠬᠦ ᠵᠦᠢᠯ ᠪᠠᠢᠯᠠ᠃
—ᠠ ᠡᠷᠬᠢᠮ ᠳᠡᠭᠡᠳᠦᠰ ᠮᠢᠨᠢ ᠂ ᠲᠠ ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ ᠮᠢᠨᠢ ᠥᠭᠴᠦ ᠴᠢᠳᠠᠨᠠ ᠭᠡᠳᠡᠭ ᠢ᠋ ᠪᠢ ᠮᠡᠳᠡᠵᠦ ᠪᠠᠢᠨᠠ ᠯᠤᠤ ᠶ᠋ᠢᠨ ᠡᠷᠳᠡᠨᠢ ᠶ᠋ᠢᠨ ᠴᠢᠯᠠᠭᠤ᠂ ᠭᠠᠯᠲᠤ ᠬᠤᠯᠤᠭᠠᠨᠠ ᠶ᠋ᠢᠨ ᠨᠥᠮᠥᠷᠭᠡ᠂ ᠠᠯᠲᠠᠨ ᠮᠣᠳᠣᠨ ᠤ᠋ ᠮᠥᠴᠢᠷ ᠢ᠋ ᠲᠠ ᠨᠠᠳᠠ ᠳ᠋ᠤ᠌ ᠲᠦᠪᠡᠭ ᠦᠭᠡᠢᠬᠡᠨ ᠠᠪᠴᠢᠷᠠᠵᠤ ᠥᠭᠴᠦ ᠴᠢᠳᠠᠨᠠ᠂ ᠲᠡᠢᠮᠦ ᠡᠴᠡ ᠪᠢ ᠲᠠᠨ ᠠ᠋ᠴᠠ ᠶᠡᠷᠦ ᠳ᠋ᠦ᠍ ᠪᠡᠨ ᠭᠠᠭᠴᠠᠬᠠᠨ ᠵᠦᠢᠯ ᠢ᠋ ᠯᠡ ᠬᠦᠰᠡᠮᠡᠷ ᠪᠠᠢᠨᠠ᠂ ᠬᠥᠮᠦᠨ ᠲᠡᠢ ᠭᠡᠷᠯᠡᠮᠡᠷ ᠦᠭᠡᠢ ᠪᠠᠢᠭᠠ ᠬᠦᠰᠡᠯ ᠢ᠋ ᠮᠢᠨᠢ ᠬᠦᠨᠳᠦᠳᠬᠡᠨᠡ ᠤᠤ? ᠪᠠᠰᠠ ᠶᠠᠭᠠᠬᠢᠭᠠᠳ ᠭᠡᠳᠡᠭ ᠢ᠋ ᠠᠰᠠᠭᠤᠬᠤ ᠬᠡᠷᠡᠭ ᠦᠭᠡᠢ᠃
—ᠴᠢᠨᠦ ᠵᠥᠪ ᠂ ᠪᠢ ᠴᠢᠮᠠ ᠳ᠋ᠤ᠌ ᠬᠦᠰᠡᠭᠰᠡᠨ ᠪᠦᠬᠦᠨ ᠢ᠋ ᠴᠢᠨᠢ ᠥᠭᠴᠦ ᠴᠢᠳᠠᠨᠠ᠂ ᠴᠢ ᠡᠢᠮᠦ ᠵᠦᠢᠯ ᠬᠦᠰᠡᠵᠦ ᠪᠠᠢᠭᠠ ᠪᠣᠯ ᠪᠢ ᠬᠦᠰᠡᠯ ᠢ᠋ ᠴᠢᠨᠢ ᠪᠡᠶᠡᠯᠡᠭᠦᠯᠬᠦ ᠪᠣᠯᠤᠨᠠ ᠂ ᠭᠡᠬᠦ ᠳ᠋ᠦ᠍ ᠪᠡᠨ ᠬᠠᠷᠢᠭᠤ ᠳ᠋ᠤ᠌ ᠨᠢ ᠪᠢ ᠴᠢᠮᠠ ᠠ᠋ᠴᠠ ᠨᠢᠭᠡ ᠵᠦᠢᠯ ᠭᠤᠶᠤᠵᠤ ᠪᠣᠯᠬᠤ ᠤᠤ? ᠴᠢ ᠪᠣᠯ ᠬᠦᠴᠦᠷᠬᠡᠭ ᠡᠮᠡᠭᠲᠡᠢ ᠪᠢ ᠴᠢᠨᠦ ᠨᠠᠢᠵᠠ ᠪᠣᠯᠵᠤ ᠪᠣᠯᠬᠤ ᠰᠠᠨ ᠪᠣᠯᠪᠠ ᠤᠤ?
—ᠡᠵᠡᠨ ᠬᠠᠭᠠᠨ ᠰᠠᠷᠠᠨᠲᠤᠶᠠᠭᠠ ᠬᠣᠶᠠᠷ ᠨᠠᠢᠵᠠ ᠪᠣᠯᠵᠤ ᠪᠠᠢᠩᠭᠤ ᠶᠠᠷᠢᠯᠴᠠᠳᠠᠭ ᠪᠣᠯᠪᠠ᠃ ᠬᠤᠯᠤᠰᠤᠴᠢᠨ ᠵᠠᠯᠠᠭᠤ ᠡᠷᠡᠴᠦᠳ ᠢ᠋ ᠭᠡᠷ ᠲᠦ᠍ ᠪᠡᠨ ᠣᠷᠣᠭᠤᠯᠬᠤ ᠪᠠᠨ ᠪᠣᠯᠢᠪᠠ᠃ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠠᠬᠢᠵᠤ ᠰᠡᠳᠬᠢᠯ ᠢ᠋ᠶ᠋ᠡᠷ ᠤᠨᠠᠭᠠᠬᠤ ᠶ᠋ᠢ ᠬᠦᠰᠡᠭᠡ ᠦᠭᠡᠢ ᠠᠵᠢ᠃ ᠨᠢᠭᠡ ᠣᠷᠣᠢ ᠬᠤᠯᠤᠰᠤᠴᠢᠨ ᠥᠷᠥᠭᠡᠨ ᠳ᠋ᠦ᠍ ᠪᠡᠨ ᠣᠷᠣᠲᠠᠯᠠ ᠰᠠᠷᠠᠨᠲᠤᠶᠠᠭᠠ ᠴᠣᠩᠬᠣᠨ ᠤ᠋ ᠳᠣᠣᠷᠠ ᠰᠠᠭᠤᠵᠤ ᠪᠠᠢᠪᠠ ᠭᠡᠨᠡ᠃ ᠥᠬᠢᠨ ᠨᠢ ᠨᠢᠳᠦᠨ ᠳ᠋ᠦ᠍ ᠪᠡᠨ ᠨᠢᠯᠪᠤᠰᠤ ᠴᠡᠯᠡᠭᠡᠨᠡᠭᠦᠯᠦᠨ ᠰᠠᠷᠠ ᠤᠷᠤᠭᠤ ᠰᠢᠷᠲᠡᠵᠦ ᠪᠠᠢᠵᠠᠢ᠃
— ᠰᠠᠷᠠᠨᠲᠤᠶᠠᠭᠠ ᠠ᠋᠂ ᠶᠠᠭᠠᠬᠢᠭᠠᠳ ᠣᠬᠢᠯᠠᠭᠠ ᠪᠣᠢ? ᠥᠬᠢᠨ ᠮᠢᠨᠢ᠁
—ᠪᠢ ᠰᠥᠨᠢ ᠪᠦᠷᠢ ᠨᠢᠭᠡ ᠢᠵᠢᠯ ᠵᠡᠭᠦᠳᠦ ᠵᠡᠭᠦᠳᠦᠯᠡᠳᠡᠭ ᠪᠣᠯᠤᠯᠠ ᠠᠪᠤ ᠠ᠋ ᠲᠠᠨ ᠤ᠋ ᠰᠡᠳᠬᠢᠯ ᠢ᠋ ᠲᠦᠭᠰᠢᠭᠡᠬᠦ ᠦᠭᠡᠢ ᠭᠡᠰᠡᠨ ᠳ᠋ᠦ᠍ ᠪᠡᠨ ᠪᠢ ᠲᠠᠨ ᠳ᠋ᠤ᠌ ᠬᠡᠯᠡᠵᠦ ᠪᠠᠢᠭᠠ ᠦᠭᠡᠢ ᠶᠦ᠍ᠮ᠃
—ᠶᠠᠮᠠᠷ ᠵᠡᠭᠦᠳᠦ ᠶᠦ᠍ᠮ?
—ᠰᠠᠷᠠᠨ ᠤ᠋ ᠬᠥᠮᠦᠰ ᠨᠠᠮᠠ ᠶ᠋ᠢ ᠰᠠᠷᠠ ᠤᠷᠤᠭᠤ ᠠᠪᠴᠤ ᠶᠠᠪᠤᠵᠤ ᠪᠠᠢᠨᠠ ᠭᠡᠵᠦ ᠪᠢ ᠵᠡᠭᠦᠳᠦᠯᠡᠳᠡᠭ᠂ ᠤᠷᠢᠳᠤ ᠰᠥᠨᠢ ᠶᠠᠪᠤᠬᠤ ᠡᠳᠦᠷ ᠴᠢᠨᠢ ᠪᠣᠯᠤᠭᠰᠠᠨ ᠭᠡᠵᠦ ᠨᠠᠳᠠ ᠳ᠋ᠤ᠌ ᠨᠢᠭᠡ ᠳᠠᠭᠤ ᠬᠣᠭᠣᠯᠠᠢ ᠬᠡᠯᠡᠭᠰᠡᠨ᠂ ᠡᠨᠡ ᠰᠠᠷᠠ ᠰᠢᠨᠡ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠲᠡᠳᠡ ᠨᠠᠮᠠ ᠶ᠋ᠢ ᠠᠪᠬᠤ ᠪᠠᠷ ᠢᠷᠡᠨᠡ᠃ ᠦ᠂ ᠪᠢ ᠲᠠᠨ ᠢ᠋ ᠣᠷᠬᠢᠵᠤ ᠶᠠᠪᠤᠮᠠᠷ ᠦᠭᠡᠢ ᠪᠠᠢᠨᠠ᠃
—ᠬᠤᠯᠤᠰᠤᠴᠢᠨ ᠰᠠᠷᠠ ᠤᠷᠤᠭᠤ ᠬᠠᠷᠠᠪᠠ᠂ ᠡᠨᠡ ᠣᠯᠠᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠠᠩᠬᠠ ᠤᠳᠠᠭᠠ ᠰᠠᠷᠠ ᠪᠦᠦᠳᠡᠭᠡᠷ ᠬᠠᠷᠠᠭᠳᠠᠵᠤ ᠪᠠᠢᠭᠠ ᠶ᠋ᠢ ᠲᠡᠷᠡ ᠠᠩᠵᠠᠭᠠᠷᠠᠪᠠ ᠭᠡᠨᠡ᠃ ᠲᠤᠶᠠᠭᠠ ᠶ᠋ᠢ ᠨᠢ ᠬᠡᠨ ᠨᠢᠭᠡᠨ ᠬᠥᠮᠦᠨ ᠬᠤᠯᠠᠭᠠᠢᠯᠠᠭᠰᠠᠨ ᠮᠡᠲᠦ ᠬᠠᠷᠠᠭᠳᠠᠵᠤ ᠪᠠᠢᠪᠠ᠃ ᠥᠬᠢᠨ ᠳ᠋ᠦ᠍ ᠪᠡᠨ ᠰᠠᠨᠠᠭᠠ ᠨᠢ ᠵᠣᠪᠠᠵᠤ ᠴᠠᠭ ᠠᠯᠳᠠᠯ ᠦᠭᠡᠢ ᠡᠵᠡᠨ ᠬᠠᠭᠠᠨ ᠠ᠋ᠴᠠ ᠲᠤᠰᠠᠯᠠᠮᠵᠢ ᠭᠤᠶᠤᠨ ᠵᠠᠬᠢᠶᠠ ᠢᠯᠡᠭᠡᠵᠡᠢ᠃ ᠡᠵᠡᠨ ᠬᠠᠭᠠᠨ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠬᠡᠨ ᠳ᠋ᠦ᠍ ᠴᠦ᠍ ᠥᠭᠴᠦ ᠶᠠᠪᠤᠭᠤᠯᠬᠤ ᠦᠭᠡᠢ ᠭᠡᠵᠦ ᠠᠮᠠᠯᠠᠪᠠ᠃
—ᠡᠨᠡ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠰᠠᠷᠠᠨᠲᠤᠶᠠᠭᠠ ᠶ᠋ᠢᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠬᠠᠷᠠᠭᠤᠯ ᠳ᠋ᠤ᠌ ᠭᠠᠷᠬᠤ ᠪᠣᠯᠤᠨᠠ᠂ ᠬᠡᠨ ᠴᠦ᠍ ᠲᠡᠭᠦᠨ ᠳ᠋ᠦ᠍ ᠬᠦᠷᠴᠦ ᠪᠣᠯᠬᠤ ᠦᠭᠡᠢ᠃
—ᠰᠢᠨᠡ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠪᠣᠯᠤᠯᠠ᠂ ᠰᠠᠷᠠᠨᠲᠤᠶᠠᠭᠠ ᠶ᠋ᠢᠨ ᠪᠠᠢᠰᠢᠩ ᠤ᠋ᠨ ᠭᠠᠳᠠᠨᠠ ᠬᠠᠭᠠᠨ ᠤ᠋ ᠬᠣᠶᠠᠷ ᠮᠢᠩᠭᠠᠨ ᠴᠡᠷᠢᠭ ᠨᠤᠮᠤ ᠰᠤᠮᠤ ᠪᠠᠨ ᠪᠡᠯᠡᠳᠦᠨ ᠬᠠᠷᠠᠭᠤᠯᠳᠠᠵᠤ ᠪᠠᠢᠯᠠ᠂ ᠡᠵᠡᠨ ᠬᠠᠭᠠᠨ ᠰᠡᠯᠡᠮᠡ ᠪᠡᠨ ᠠᠭᠰᠠᠨ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠪᠠᠢᠰᠢᠩ ᠤ᠋ᠨ ᠤᠷᠲᠤ ᠵᠣᠭᠰᠣᠵᠤ ᠪᠠᠢᠪᠠ᠃ ᠬᠤᠯᠤᠰᠤᠴᠢᠨ ᠰᠠᠷᠠᠨᠲᠤᠶᠠᠭᠠ ᠶ᠋ᠢ ᠵᠣᠭᠣᠷᠢ ᠤᠷᠤᠭᠤ ᠳᠠᠭᠠᠭᠤᠯᠵᠤ ᠣᠷᠣᠯᠠ᠂ ᠡᠵᠢ ᠨᠢ ᠥᠬᠢᠨ ᠢ᠋ᠶ᠋ᠡᠨ ᠴᠢᠩᠭᠠ ᠲᠡᠪᠡᠷᠢᠨ ᠰᠠᠭᠤᠵᠤ ᠪᠠᠢᠪᠠ᠂ ᠲᠡᠳᠡ ᠪᠦᠭᠦᠳᠡ ᠥᠬᠢᠨ ᠢ᠋ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠪᠡᠯᠡᠨ ᠪᠣᠯᠵᠠᠢ᠃ ᠭᠡᠲᠡᠯᠡ ᠭᠡᠨᠡᠳᠲᠡ ᠲᠡᠭᠷᠢ ᠡᠴᠡ ᠲᠣᠳᠣ ᠭᠡᠷᠡᠯ ᠲᠤᠰᠬᠤ ᠨᠢ ᠲᠡᠷᠡ᠄
—ᠠ ᠁ ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠨᠢᠳᠦ ᠮᠢᠨᠢ ᠶᠠᠭᠤ ᠴᠤ᠌ ᠬᠠᠷᠠᠬᠤ ᠦᠭᠡᠢ ᠪᠠᠢᠨᠠ᠃
—ᠣᠯᠠᠨ ᠪᠢᠴᠢᠬᠠᠨ ᠳᠠᠭᠢᠨᠢ ᠪᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠭᠣᠶᠣᠮᠰᠣᠭ ᠰᠡᠦᠬᠡ ᠲᠡᠷᠭᠡ ᠪᠠᠭᠤᠵᠤ ᠢᠷᠡᠯᠡ᠂ ᠲᠡᠳᠡ ᠯᠢᠮᠪᠦ ᠭᠠᠷᠭᠠᠨ ᠢᠷᠡᠵᠦ ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭ ᠲᠡᠢ ᠠᠶᠠ ᠲᠣᠭᠯᠠᠵᠤ ᠡᠬᠢᠯᠡᠪᠡ᠃ ᠭᠡᠨᠡᠳᠲᠡ ᠰᠠᠷᠠᠨᠲᠤᠶᠠᠭᠠ ᠨᠢᠳᠦ ᠪᠡᠨ ᠠᠨᠢᠵᠤ ᠬᠥᠭᠵᠢᠮ ᠲᠣᠭᠯᠠᠵᠤ ᠪᠣᠢ ᠵᠦᠭ ᠤᠷᠤᠭᠤ ᠬᠥᠪᠦᠨ ᠶᠠᠪᠤᠪᠠ᠃ ᠵᠣᠭᠣᠷᠢᠨ ᠠ᠋ᠴᠠ ᠪᠠᠨ ᠬᠥᠪᠦᠨ ᠭᠠᠷᠴᠠᠢ᠃ ᠡᠴᠢᠭᠡ ᠡᠬᠡ ᠨᠢ ᠴᠤ᠌ ᠪᠠᠰᠠ ᠠᠷᠤ ᠠ᠋ᠴᠠ ᠨᠢ ᠭᠦᠶᠦᠨ ᠭᠠᠷᠴᠠᠢ᠃ ᠪᠢᠴᠢᠬᠠᠨ ᠳᠠᠭᠢᠨᠢ ᠨᠤᠭᠤᠳ ᠭᠢᠯᠲᠠᠭᠠᠨᠠᠭᠰᠠᠨ ᠮᠥᠩᠭᠥᠨ ᠥᠳᠥ ᠪᠡᠷ ᠰᠠᠷᠠᠨᠲᠤᠶᠠᠭᠠ ᠳ᠋ᠤ᠌ ᠬᠦᠷᠦᠯᠡ᠃ ᠰᠠᠷᠠᠨᠲᠤᠶᠠᠭᠠ ᠶ᠋ᠢᠨ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠤᠷᠲᠤ ᠬᠥᠪᠰᠥᠭᠡᠷ ᠴᠠᠭᠠᠨ ᠳᠠᠰᠢᠨᠵᠠ ᠪᠣᠯᠵᠤ ᠬᠤᠪᠢᠷᠠᠪᠠ᠃ ᠨᠢᠳᠦ ᠪᠡᠨ ᠨᠡᠭᠡᠭᠡᠨ ᠪᠠᠶᠠᠷᠲᠠᠢ ᠪᠠᠷ ᠢᠨᠢᠶᠡᠮᠰᠦᠭᠯᠡᠪᠡ᠃ ᠠᠢᠳᠠᠰ ᠨᠢ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠯᠠ ᠂ ᠰᠠᠷᠠᠨᠲᠤᠶᠠᠭᠠ ᠡᠴᠢᠭᠡ ᠡᠬᠡ ᠳᠡᠭᠡᠷᠡ ᠪᠡᠨ ᠣᠴᠢᠨ ᠲᠡᠳᠡᠨ ᠢ᠋ ᠲᠡᠪᠡᠷᠢᠯᠡ᠃
—ᠠᠪᠤ ᠠ᠋ ᠲᠠ ᠨᠠᠮᠠ ᠶ᠋ᠢ ᠮᠠᠰᠢ ᠰᠠᠢᠨ ᠬᠠᠷᠠᠵᠤ ᠬᠠᠨᠳᠤᠭᠰᠠᠨ ᠭᠡᠬᠦ ᠳ᠋ᠦ᠍ ᠪᠡᠨ ᠪᠢ ᠬᠥᠮᠦᠰ ᠳᠡᠭᠡᠷᠡ ᠪᠡᠨ ᠪᠤᠴᠠᠵᠤ ᠣᠴᠢᠵᠤ ᠡᠭᠦᠷᠭᠡ ᠪᠡᠨ ᠪᠡᠶᠡᠯᠡᠭᠦᠯᠬᠦ ᠶᠣᠰᠣᠲᠠᠢ᠃
—ᠶᠠᠭᠤ? ᠪᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠨᠠ᠃
—ᠪᠢ ᠳᠡᠯᠡᠬᠡᠢ ᠳᠡᠭᠡᠷᠡ ᠪᠠᠢᠭᠠ ᠪᠣᠯᠬᠣᠷ ᠰᠠᠷᠠ ᠪᠦᠦᠳᠡᠭᠡᠷ ᠪᠠᠢᠭᠠ ᠶᠤᠮ ᠂ ᠪᠢ ᠪᠣᠯ ᠰᠠᠷᠠᠨ ᠤ᠋ ᠲᠤᠶᠠᠭᠠ ᠂ ᠰᠠᠷᠠ ᠨᠠᠳᠠ ᠦᠭᠡᠢ ᠪᠡᠷ ᠡᠷᠭᠢᠭᠡᠳ ᠬᠡᠪ ᠲᠦ᠍ ᠪᠡᠨ ᠣᠷᠣᠵᠤ ᠴᠢᠳᠠᠬᠤ ᠦᠭᠡᠢ᠂ ᠪᠢ ᠪᠣᠯ ᠬᠥᠮᠦᠰ ᠢ᠋ ᠬᠠᠷᠠᠩᠭᠤᠢ ᠰᠥᠨᠢ ᠭᠡᠷᠡᠯᠲᠦᠭᠦᠯᠵᠦ ᠪᠠᠢᠳᠠᠭ ᠭᠡᠷᠡᠯ ᠭᠡᠭᠡ᠂ ᠪᠢ ᠳᠡᠯᠡᠬᠡᠢ ᠳᠡᠭᠡᠷᠡ ᠢᠷᠡᠵᠦ ᠬᠡᠷᠡᠨ ᠬᠡᠰᠦᠭᠦᠴᠢᠯᠡᠵᠦ ᠪᠠᠢᠭᠠᠳ ᠬᠡᠨ ᠭᠡᠳᠡᠭ ᠢ᠋ᠶ᠋ᠡᠨ ᠮᠠᠷᠲᠠᠭᠰᠠᠨ ᠪᠠᠢᠵᠠᠢ᠂ ᠶᠠᠳᠠᠷᠠᠵᠤ ᠲᠤᠢᠯᠳᠠᠭᠰᠠᠨ ᠪᠠᠢᠭᠰᠠᠨ ᠤᠴᠢᠷ ᠬᠤᠯᠤᠰᠤ ᠤᠷᠤᠭᠤ ᠣᠷᠣᠵᠤ ᠠᠮᠠᠷᠠᠭᠰᠠᠨ᠂ ᠲᠡᠷᠡ ᠦᠶᠡ ᠳ᠋ᠦ᠍ ᠲᠠ ᠨᠠᠮᠠ ᠶ᠋ᠢ ᠣᠯᠤᠭᠰᠠᠨ᠃
—ᠴᠢ ᠵᠠᠪᠠᠯ ᠶᠠᠪᠤᠬᠤ ᠶᠣᠰᠣᠲᠠᠢ ᠭᠡᠵᠢ ᠤᠤ? ᠪᠢᠳᠡᠨ ᠢ᠋ ᠰᠠᠨᠠᠬᠤ ᠦᠭᠡᠢ ᠭᠡᠵᠢ ᠤᠤ?
—ᠡᠵᠢ ᠠ᠋ ᠪᠢ ᠰᠥᠨᠢ ᠪᠦᠷᠢ ᠲᠠᠨ ᠲᠠᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠬᠦ ᠪᠣᠯᠤᠨᠠ ᠲᠡᠭᠷᠢ ᠳ᠋ᠦ᠍ ᠰᠠᠷᠠ ᠭᠠᠷᠤᠭᠠ ᠦᠭᠡᠢ ᠦᠳᠡᠰᠢ ᠲᠠ ᠨᠠᠳᠠ ᠲᠠᠢ ᠠᠭᠤᠯᠵᠠᠬᠤ ᠦᠭᠡᠢ ᠭᠡᠰᠡᠨ ᠦᠭᠡ᠃
ᠴᠢ ᠪᠣᠯ ᠮᠢᠨᠦ ᠰᠠᠢᠨ ᠨᠠᠢᠵᠠ᠂ ᠭᠡᠬᠦ ᠳ᠋ᠦ᠍ ᠪᠡᠨ ᠪᠢ ᠣᠳᠣ ᠶᠠᠪᠤᠬᠤ ᠶᠣᠰᠣᠲᠠᠢ᠃
—ᠰᠠᠷᠠᠨᠲᠤᠶᠠᠭᠠ ᠰᠡᠦᠬᠡ ᠲᠡᠷᠭᠡᠨ ᠳ᠋ᠦ᠍ ᠪᠡᠨ ᠰᠠᠭᠤᠵᠤ ᠳᠡᠯᠡᠬᠡᠢ ᠳᠡᠭᠡᠷᠡᠬᠢ ᠳᠣᠲᠣᠨᠣ ᠶ᠋ᠢᠨ ᠬᠥᠮᠦᠰ ᠤᠷᠤᠭᠤ ᠪᠠᠨ ᠪᠠᠶᠠᠷᠲᠠᠢ ᠪᠠᠷ ᠭᠠᠷ ᠢ᠋ᠶ᠋ᠠᠨ ᠳᠠᠯᠠᠯᠪᠠ᠃ ᠲᠡᠳᠡᠨ ᠢ᠋ ᠴᠠᠭ ᠦᠷᠭᠦᠯᠵᠢ ᠲᠩᠷᠢ ᠡᠴᠡ ᠬᠠᠷᠠᠵᠤ ᠪᠠᠢᠨᠠ ᠭᠡᠳᠡᠭ ᠢ᠋ ᠮᠡᠳᠡᠵᠦ ᠪᠠᠢᠭᠰᠠᠨ ᠤᠴᠢᠷ ᠭᠤᠨᠢᠭᠯᠠᠬᠤ ᠦᠭᠡᠢ ᠪᠠᠢᠯᠠ᠃ ᠰᠡᠦᠬᠡ ᠲᠡᠷᠭᠡ ᠲᠡᠭᠦᠨ ᠢ᠋ ᠰᠠᠷᠠ ᠤᠷᠤᠭᠤ ᠠᠪᠴᠤ ᠣᠳᠪᠠ᠃ ᠬᠤᠯᠤᠰᠤᠴᠢᠨ ᠨᠢᠯᠪᠤᠰᠤ ᠪᠠᠨ ᠠᠷᠴᠢᠨ ᠰᠠᠷᠠᠨᠲᠤᠶᠠᠭᠠ ᠡᠷᠭᠢᠵᠦ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠨ ᠵᠣᠭᠰᠣᠵᠠᠢ᠃ ᠰᠠᠷᠠᠨ ᠤ᠋ ᠲᠤᠶᠠᠭᠠ ᠨᠢ ᠢᠷᠡᠯᠡ ᠂ ᠲᠡᠷᠭᠡᠯ ᠰᠠᠷᠠ ᠭᠠᠷᠤᠭᠰᠠᠨ ᠪᠠᠢᠯᠠ᠃ ᠰᠠᠷᠠ ᠮᠠᠰᠢ ᠲᠣᠳᠣ ᠬᠡᠷᠡᠯᠳᠦᠵᠦ ᠪᠠᠢᠪᠠ᠂ ᠡᠵᠡᠨ ᠬᠠᠭᠠᠨ ᠦᠯᠡᠳᠡᠭᠰᠡᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠪᠠᠨ ᠬᠤᠷᠢᠮ ᠬᠢᠭᠰᠡᠨ ᠦᠭᠡᠢ ᠰᠥᠨᠢ ᠪᠦᠷᠢ ᠲᠡᠭᠦᠨ ᠢ᠋ᠶ᠋ᠡᠷ ᠰᠠᠷᠠ ᠤᠷᠤᠭᠤ ᠣᠯᠠᠨ ᠴᠠᠭ ᠰᠢᠷᠲᠡᠨ ᠨᠠᠰᠤᠨ ᠲᠤᠷᠰᠢ ᠶ᠋ᠢᠨ ᠬᠠᠢᠷᠠᠲᠤ ᠤᠷᠤᠭᠤ ᠪᠠᠨ ᠢᠨᠢᠶᠡᠮᠰᠦᠭᠯᠡᠳᠡᠭ ᠪᠠᠢᠪᠠ᠃ ᠬᠤᠯᠤᠰᠤᠴᠢᠨ ᠲᠣᠮᠣ ᠪᠠᠢᠰᠢᠩ ᠢ᠋ᠶ᠋ᠠᠨ ᠬᠠᠭᠤᠴᠢᠨ ᠵᠢᠵᠢᠭ ᠣᠪᠣᠬᠠᠢ ᠪᠠᠷ ᠰᠣᠯᠢᠵᠠᠢ᠃ ᠰᠥᠨᠢ ᠳ᠋ᠦ᠍ ᠪᠡᠨ ᠰᠠᠷᠠᠨ ᠤ᠋ ᠲᠤᠶᠠᠭᠠ ᠶ᠋ᠢ ᠳᠡᠭᠡᠪᠦᠷ ᠦ᠋ᠨ ᠴᠤᠭᠤᠷᠬᠠᠢ ᠪᠠᠷ ᠣᠷᠣᠭᠤᠯᠬᠤ ᠴᠣᠷᠢ ᠶ᠋ᠢᠨ ᠭᠠᠭᠴᠠ ᠠᠷᠭᠠ ᠨᠢ ᠡᠨᠡ ᠪᠠᠢᠵᠠᠢ ᠭᠡᠨᠡ᠃ ᠬᠤᠯᠤᠰᠤᠴᠢᠨ ᠭᠡᠷᠭᠡᠢ ᠲᠡᠢ ᠪᠡᠨ ᠠᠮᠤᠷ ᠰᠠᠢᠬᠠᠨ ᠳ᠋ᠤ᠌ ᠪᠠᠨ ᠵᠢᠷᠭᠠᠵᠠᠢ᠃
(ᠲᠡᠭᠦᠰᠪᠡ)
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲ· ᠲᠥᠮᠡᠨᠴᠡᠴᠡᠭ
ᠦᠰᠦᠭ ᠬᠠᠳᠠᠭᠴᠢ᠄ ᠲᠣᠳᠣᠭᠡᠷᠡᠯ
ᠬᠢᠨᠠᠭᠴᠢ᠄ ᠢᠷᠡᠭᠡᠳᠦᠢ᠂ ᠤᠷᠨᠨᠲᠠᠨᠡ᠃