ᠬᠦᠷᠡᠭᠴᠢ ᠦᠨᠢᠶᠡХүрэгч үнээ
507ᠬᠦᠷᠡᠭᠴᠢ ᠦᠨᠢᠶᠡ
ᠡᠷᠲᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ ᠰᠠᠶ᠋ᠢᠨ ᠰᠠᠨᠠᠭᠠ ᠲᠠᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠪᠠᠶ᠋ᠢᠵᠠᠢ ᠃ ᠨᠢᠭᠡᠨ ᠡᠳᠦᠷ ᠡᠪᠦᠭᠡᠨ ᠨᠢ ᠠᠭᠤᠯᠠᠨ ᠳᠤ ᠶᠠᠪᠤᠵᠤ ᠪᠠᠶ᠋ᠢᠲᠠᠯᠠ ᠦᠬᠦᠮᠡᠷ ᠪᠣᠯᠣᠭᠰᠠᠨ ᠱᠠᠭᠠᠵᠠᠭᠠᠢ ᠲᠠᠭᠠᠷᠠᠵᠤ ᠭᠡᠨᠡ ᠃ ᠦᠵᠡᠭᠰᠡᠨ ᠴᠢᠨᠢ ᠬᠣᠭᠣᠯᠠᠢ ᠳᠤ ᠨᠢ ᠶᠠᠰᠤ ᠲᠡᠭᠡᠭᠯᠡᠴᠢᠬᠡᠭᠰᠡᠨ ᠪᠠᠶ᠋ᠢᠵᠠᠢ᠃ ᠡᠪᠦᠭᠡᠨ ᠶᠠᠰᠤ ᠶ᠋ᠢ ᠨᠢ ᠠᠪᠴᠤ ᠬᠠᠶᠠᠭᠰᠠᠨ ᠳᠤ ᠱᠠᠭᠠᠵᠠᠭᠠᠢ ᠲᠣᠩ ᠶᠡᠬᠡ ᠪᠠᠶᠠᠷᠯᠠᠪᠠ ᠃ ᠱᠠᠭᠠᠵᠠᠭᠠᠢ ᠡᠪᠦᠭᠡᠨ ᠤ ᠠᠴᠢ ᠶ᠋ᠢ ᠬᠠᠷᠢᠭᠤᠯᠠᠬᠤ ᠶᠢᠨ ᠲᠥᠯᠥᠭᠡ ᠮᠠᠷᠭᠠᠰᠢ ᠨᠢ ᠨᠢᠭᠡ ᠬᠦᠷᠡᠭᠴᠢ ᠦᠨᠢᠶᠡ ᠠᠪᠴᠢᠷᠠᠵᠤ ᠥᠭᠴᠡᠢ ᠃ ᠱᠠᠭᠠᠵᠠᠭᠠᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷᠲᠤ᠌᠄ 《 ＜ ᠬᠦᠷᠡᠭᠴᠢ ᠦᠨᠢᠶᠡ ᠢᠪᠢᠯᠦᠭᠡᠴᠢ ＞ ᠭᠡᠵᠦ ᠬᠡᠯᠡᠪᠡᠯ ᠬᠥᠨᠥᠭ ᠰᠦ᠋ ᠪᠠᠭᠤᠨᠠ ᠃ ᠳᠠᠷᠠᠭᠠᠴᠢ ᠪᠠᠷ ᠭᠠᠴᠢᠭᠳᠠᠪᠠᠯ ＜ᠱᠠᠭᠠᠵᠠᠭᠠᠢ ᠮᠢᠨᠢ ᠱᠠᠭ ᠱᠠᠭ ＞ᠭᠡᠪᠡᠯ ᠪᠢ ᠢᠷᠡᠴᠢᠬᠡᠨᠡ ᠰᠢᠦ ! 》 ᠭᠡᠳ ᠨᠢᠰᠤᠨ ᠣᠳᠴᠠᠢ᠃ ᠬᠦᠷᠡᠭᠴᠢ ᠦᠨᠢᠶᠡ ᠨᠢ ᠦᠨᠡᠬᠡᠷ ᠰᠠᠭᠠᠭᠠᠳ ᠪᠠᠷᠠᠬᠤ ᠥᠬᠡᠢ ᠰᠦ᠋ ᠲᠡᠢ ᠶᠤᠮᠰᠠᠨᠵᠠᠢ ᠃ ᠲᠡᠭᠡᠭᠡᠳ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠡᠯᠪᠡᠭ ᠲᠣᠬᠢᠲᠠᠢ ᠠᠮᠢᠳᠤᠷᠠᠳᠠᠭ ᠪᠣᠯᠵᠠᠢ ᠃ ᠨᠢᠭᠡᠨ ᠡᠳᠦᠷ ᠬᠠᠷᠭᠢᠰ ᠨᠣᠶᠠᠨ ᠦᠨᠢᠶᠡ ᠶ᠋ᠢ ᠨᠢ ᠪᠤᠯᠢᠶᠠᠵᠤ ᠠᠪᠠᠴᠢᠪᠠ ᠃ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠭᠠᠴᠢᠭᠳᠠᠬᠤ ᠳᠤ ᠪᠠᠨ 《 ᠱᠠᠭᠠᠵᠠᠭᠠᠢ ᠮᠢᠨᠢ ᠱᠠᠭ ᠱᠠᠭ ! 》 ᠭᠡᠵᠦ ᠳᠠᠭᠤᠳᠠᠭᠰᠠᠨ ᠳᠤ ᠳᠣᠣᠷᠠ ᠪᠠᠨ ᠬᠦᠷᠦᠭᠡᠳ ᠢᠷᠡᠵᠡᠢ ᠃ ᠱᠠᠭᠠᠵᠠᠭᠠᠢ ᠣᠴᠢᠷ ᠢ ᠨᠢ ᠰᠣᠨᠣᠰᠤᠭᠰᠠᠨ ᠢᠶ᠋ᠠᠨ ᠲᠠᠲᠠᠨ ᠳᠤ ᠨᠢᠭᠡ ᠰᠢᠳᠠᠮ ᠥᠭᠭᠦᠭᠡᠳ ᠄ 《 ᠡᠭᠦᠨ ᠢ ᠬᠠᠷᠭᠢᠰ ᠨᠣᠶᠠᠨ ᠤ ᠳᠤ ᠠᠪᠤᠭᠠᠳ ᠣᠴᠢ ᠃ ᠰᠢᠳᠠᠮ ᠢᠶ᠋ᠠᠨ ᠬᠠᠭᠠᠯᠭᠠᠨ ᠤ ᠬᠢᠨᠢ ᠬᠠᠵᠠᠭᠤ ᠳᠦ ᠲᠠᠯᠪᠢᠭᠠᠳ ＜ ᠰᠢᠲᠠᠮ ᠮᠢᠨᠢ ᠲᠢᠱ ᠲᠢᠱ ＞ ᠭᠡᠵᠦ ᠬᠡᠯᠡᠭᠡᠷᠡᠢ 》ᠭᠡᠪᠡ ᠃ ᠡᠪᠦᠭᠡᠨ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠨᠢ ᠬᠢᠪᠠ ᠃ ᠲᠡᠭᠡᠬᠦ ᠳᠤ ᠬᠠᠷᠭᠢᠰ ᠨᠣᠶᠠᠨ ᠪᠠᠰᠠ ᠯᠠ ᠰᠠᠶ᠋ᠢᠨ ᠶᠠᠭᠤᠮᠠ ᠪᠠᠶ᠋ᠢᠬᠠ ᠭᠡᠵᠦ ᠪᠣᠳᠣᠵᠠᠢ ᠃《 ᠰᠢᠳᠠᠮ ᠮᠢᠨᠢ ᠲᠢᠱ ᠲᠢᠱ 》 ᠭᠡᠰᠡᠨ ᠳᠤ ᠥᠨᠥᠬᠢ ᠰᠢᠳᠠᠮ ᠨᠢ ᠭᠡᠨᠡᠳᠲᠡ ᠬᠡᠢ ᠡᠷᠭᠢᠯᠳᠦᠨ ᠪᠣᠰᠴᠤ ᠢᠷᠡᠭᠡᠳ ᠬᠠᠷᠭᠢᠰ ᠨᠣᠶᠠᠨ ᠢ ᠰᠢᠳᠠᠮᠳᠠᠵᠠᠢ ᠃ ᠨᠣᠶᠠᠨ ᠳᠤᠲᠠᠭᠠᠬᠤ ᠳᠤ ᠰᠢᠳᠠᠮ ᠨᠡᠬᠡᠵᠦ ᠣᠴᠢᠭᠠᠳ ᠵᠣᠳᠣᠭᠠᠳ ᠯᠠ ᠪᠠᠶ᠋ᠢᠵᠠᠢ ᠭᠡᠨᠡ ᠃ ᠬᠠᠷᠭᠢᠰ ᠨᠣᠶᠠᠨ ᠤ ᠰᠢᠳᠦ ᠨᠢ ᠪᠤᠯᠭᠤᠷᠠᠪᠠ ᠂ ᠴᠢᠬᠢ ᠨᠢ ᠰᠠᠳᠠᠷᠠᠪᠠ ᠂ ᠪᠥᠭᠰᠡ ᠨᠢ ᠬᠠᠪᠤᠳᠪᠠ ᠃ ᠬᠠᠷᠭᠢᠰ ᠨᠣᠶᠠᠨ ᠠᠷᠭᠠ ᠪᠤᠰᠤ ᠬᠦᠷᠡᠭᠴᠢ ᠦᠨᠢᠶᠡ ᠶ᠋ᠢ ᠨᠢ ᠡᠪᠦᠭᠡᠨ ᠡᠮᠡᠭᠡᠨ ᠳᠤ ᠪᠤᠴᠠᠭᠠᠵᠤ ᠥᠭᠭᠦᠭᠰᠡᠨ ᠳᠤ ᠲᠡᠷᠡ ᠰᠢᠳᠠᠮ ᠰᠠᠶᠢ ᠵᠣᠳᠣᠬᠤ ᠪᠠᠨ ᠪᠣᠯᠢᠵᠤ ᠭᠡᠨᠡ ᠃