ᠦᠨᠡᠭᠡ ᠲᠣᠭᠣᠷᠤᠤ ᠬᠣᠶᠠᠷ-ᠦᠯᠢᠭᠡᠷҮнэг тогоруу хоёр-Үлгэр 15 ᠳᠣᠮᠣᠭ ᠦᠯᠢᠭᠡᠷ

  ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌᠂ ᠦᠨᠡᠭᠡ ᠲᠣᠭᠣᠷᠤᠤ ᠬᠣᠶᠠᠷ ᠦᠶ᠎ᠡ ᠵᠠᠢ ᠦᠭᠡᠢ ᠨᠥᠬᠥᠷᠯᠡᠳᠡᠭ ᠪᠠᠶ᠋ᠢᠵᠠᠢ᠃ ᠪᠦᠷ ᠡᠷᠲᠡᠨ ᠦ᠌ ᠠᠨᠳᠠ ᠨᠠᠶ᠋ᠢᠵᠠ ᠨᠤᠭᠤᠳ ᠪᠠᠶ᠋ᠢᠬᠰᠠᠨ ᠭᠡᠨ᠎ᠡ᠃

ᠨᠢᠭᠡᠨ ᠤᠳᠠᠭ᠎ᠠ ᠦᠨᠡᠭᠡ ᠲᠣᠭᠣᠷᠤᠤ ᠶ᠋ᠢ ᠳᠠᠶ᠋ᠢᠯᠠᠬᠤ ᠪᠠᠷ ᠰᠢᠢᠳᠴᠦ ᠲᠡᠭᠦᠨ ᠊ᠢ ᠭᠡᠷ ᠲᠡᠭᠡᠨ ᠤᠷᠢᠬᠤ ᠪᠠᠷ ᠣᠴᠢᠭᠠᠳ᠄ 《ᠲᠣᠭᠣᠷᠤᠤ ᠠ᠋! ᠨᠠᠶ᠋ᠢᠵᠠ ᠮᠢᠨᠢ ᠂ ᠮᠠᠨ ᠤ᠋ ᠳ᠋ᠤ᠌ ᠬᠦᠷᠦᠭᠡᠳ ᠢᠷᠡᠭᠡᠷᠡᠢ! ᠬᠣᠩᠭᠣᠷ ᠮᠢᠨᠢ᠂ ᠪᠢ ᠴᠢᠮ᠎ᠠ ᠶ᠋ᠢ ᠳᠠᠶ᠋ᠢᠯᠠᠬᠤ ᠪᠣᠯᠤᠨ᠎ᠠ! 》ᠭᠡᠵᠦ ᠭᠡᠨ᠎ᠡ᠃

ᠲᠣᠭᠣᠷᠤᠤ ᠬᠢᠷᠢᠨ ᠳ᠋ᠡᠭᠡᠨ ᠪᠡᠯᠡᠳᠦᠭᠡᠳ ᠦᠨᠡᠭᠡ ᠶ᠋ᠢᠨ ᠳ᠋ᠦ᠍ ᠠᠶ᠋ᠢᠯᠴᠢᠯᠠᠵᠤ ᠣᠴᠢᠵᠠᠢ ᠭᠡᠨ᠎ᠡ᠃

ᠦᠨᠡᠭᠡ ᠵᠤᠲᠠᠩ ᠴᠢᠨᠠᠭᠠᠳ ᠲᠡᠭᠦᠨ ᠊ᠢ  ᠪᠡᠨ ᠲᠠᠪᠠᠭ ᠲᠤ᠌ ᠬᠢᠵᠦ ᠥᠭᠭᠦᠭᠡᠳ ᠲᠣᠭᠣᠷᠤᠤ ᠳ᠋ᠤ᠌ ᠢᠩᠭᠢᠵᠦ ᠬᠡᠯᠡᠵᠡᠢ᠄ 《 ᠲᠣᠭᠣᠷᠤᠤ ᠠ᠋᠂ ᠮᠢᠨᠦ ᠬᠣᠩᠭᠣᠷ ᠨᠠᠶ᠋ᠢᠵᠠ ᠮᠢᠨᠢ᠂ ᠢᠳᠡ ᠳᠠ ᠠ᠋!ᠢᠳᠡ! ᠪᠦᠷ ᠴᠠᠳᠲᠠᠯ᠎ᠠ ᠪᠠᠨ ᠰᠠᠢᠨ ᠢᠳᠡᠵᠦ ᠠᠪᠤᠭᠠᠷᠠᠢ! ᠪᠢ ᠴᠢᠮ᠎ᠠ ᠳ᠋ᠤ᠌ ᠵᠣᠷᠢᠭᠤᠯᠤᠭᠠᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠷ ᠊ᠢ ᠭᠠᠷᠭᠠᠵᠤ ᠬᠢᠭᠰᠡᠨ ᠶᠦ᠍ᠮ ᠰᠢᠦ!》 ᠭᠡᠵᠦ ᠭᠡᠨ᠎ᠡ᠃ ᠲᠣᠭᠣᠷᠤᠤ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠤᠭ ᠲᠤᠭ ᠭᠡᠵᠦ ᠳᠤᠩᠰᠢᠭᠰᠠᠭᠠᠷ ᠪᠠᠶ᠋ᠢᠬᠰᠠᠨ ᠴᠤ᠌ ᠠᠮᠠᠨ ᠳ᠋ᠤᠨᠢ ᠶᠠᠭᠤ ᠴᠤ᠌ ᠣᠷᠣᠭᠰᠠᠨ ᠦᠭᠡᠢ ᠭᠡᠨ᠎ᠡ᠃ ᠬᠠᠷᠢᠨ ᠡᠨᠡ ᠬᠣᠭᠣᠷᠣᠨᠳᠣ ᠦᠨᠡᠭᠡ ᠵᠤᠲᠠᠩ ᠢ᠋ᠶ᠋ᠠᠨ ᠳᠣᠯᠢᠶᠠᠭᠰᠠᠭᠠᠷ ᠪᠠᠶ᠋ᠢᠵᠤ ᠪᠦᠭᠦᠳᠡ ᠶ᠋ᠢ ᠨᠢ ᠢᠳᠡᠴᠢᠬᠡᠵᠡᠢ᠃ ᠵᠤᠲᠠᠩ ᠳᠠᠭᠤᠰᠬᠤ ᠳ᠋ᠤ᠌ ᠦᠨᠡᠭᠡ ᠢᠩᠭᠢᠵᠦ ᠬᠡᠯᠡᠵᠡᠢ᠄ 《 ᠲᠣᠭᠣᠷᠤᠤ! ᠬᠣᠩᠭᠣᠷ ᠨᠠᠶ᠋ᠢᠵᠠ ᠮᠢᠨᠢ᠂ ᠪᠢᠲᠡᠭᠡᠢ ᠶᠠᠭᠤᠮ᠎ᠠ ᠪᠣᠳᠣᠭᠠᠷᠠᠢ! ᠳᠠᠬᠢᠭᠠᠳ ᠳᠠᠶ᠋ᠢᠯᠠᠬᠤ ᠵᠦᠢᠯ ᠳᠠᠩᠴᠤ ᠨᠠᠶ᠋ᠢᠵᠠ ᠳ᠋ᠤ᠌ ᠨᠢ ᠠᠯᠠᠭ᠎ᠠ ᠪᠠᠶ᠋ᠢᠨ᠎ᠠ ᠳᠠ! 》 ᠭᠡᠵᠦ ᠭᠡᠨ᠎ᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠲᠣᠭᠣᠷᠤᠤ᠄ 《 ᠨᠠᠮ᠎ᠠ ᠶ᠋ᠢ ᠤᠷᠢᠭᠰᠠᠨ ᠳ᠋ᠤ᠌ ᠮᠠᠰᠢ ᠶᠡᠬᠡ ᠪᠠᠶᠠᠷᠯᠠᠯ᠎ᠠ ᠨᠠᠶ᠋ᠢᠵᠠ ᠠ᠋! ᠬᠠᠷᠢᠨ ᠮᠠᠷᠭᠠᠰᠢ ᠮᠠᠨ ᠤ᠋ ᠬᠢ ᠪᠡᠷ ᠵᠣᠴᠢᠯᠠᠵᠤ ᠢᠷᠡᠭᠡᠷᠡᠢ 》 ᠭᠡᠵᠦ ᠬᠠᠷᠢᠭᠤ ᠤᠷᠢᠯᠭ᠎ᠠ ᠶ᠋ᠢ ᠲᠣᠭᠣᠷᠤᠤ ᠥᠭᠴᠡᠢ ᠭᠡᠨ᠎ᠡ᠃

ᠮᠠᠷᠭᠠᠰᠢ ᠨᠢ ᠪᠣᠯᠵᠤ ᠦᠨᠡᠭᠡ ᠲᠡᠳᠡᠨ ᠦ᠌ ᠳ᠋ᠦ᠍ ᠣᠴᠢᠵᠤ ᠭᠡᠨ᠎ᠡ᠃ ᠲᠣᠭᠣᠷᠤᠤ ᠠᠮᠲᠠᠲᠠᠢ ᠰᠠᠢᠬᠠᠨ ᠪᠤᠭᠤᠳᠠᠢ ᠵᠢᠩᠨᠡᠭᠡᠳ ᠤᠷᠲᠤ ᠨᠠᠷᠢᠬᠠᠨ ᠠᠮᠠᠰᠠᠷ ᠲᠠᠢ ᠸᠠᠭᠠᠷ ᠲᠤ᠌ ᠬᠢᠵᠦ ᠦᠨᠡᠭᠡ ᠶ᠋ᠢᠨ ᠡᠮᠦᠨᠡᠬᠢ ᠰᠢᠷᠡᠭᠡᠨ ᠳᠡᠭᠡᠷ᠎ᠡ ᠲᠠᠯᠪᠢᠭᠠᠳ ᠡᠶ᠋ᠢᠨ ‍ᠬᠦ ᠬᠡᠯᠡᠵᠡᠢ ᠭᠡᠨ᠎ᠡ᠄ 《 ᠦᠨᠡᠭᠡ ᠨᠠᠶ᠋ᠢᠵᠠ ᠮᠢᠨᠢ ᠳᠡ! ᠨᠠᠶ᠋ᠢᠵᠠ ᠮᠢᠨᠢ! ᠰᠠᠢᠨ ᠢᠳᠡᠭᠡᠳ ᠠᠪ! ᠪᠦᠷ ᠴᠠᠳᠲᠠᠯ᠎ᠠ ᠪᠠᠨ ᠰᠠᠢᠬᠠᠨ ᠢᠳᠡᠭᠡᠳ ᠠᠪ᠂ ᠥᠭᠡᠷ᠎ᠡ ᠬᠣᠭᠣᠯᠠ ᠨᠠᠶ᠋ᠢᠵᠠ ᠳ᠋ᠤ᠌ ᠨᠢ ᠪᠠᠶ᠋ᠢᠬᠤ ᠦᠭᠡᠢ ᠪᠣᠯᠬᠣᠷ ᠨᠠᠭᠠᠳᠤᠬᠢ ᠪᠠᠨ ᠰᠠᠢᠨ ᠢᠳᠡᠭᠡᠷᠡᠢ! 》 ᠭᠡᠵᠦ ᠭᠡᠨ᠎ᠡ᠃ ᠦᠨᠡᠭᠡ ᠴᠦ᠍ ᠸᠠᠭᠠᠷ ᠤ᠋ᠨ ᠬᠠᠵᠠᠭᠤ ᠪᠠᠷ ᠡᠷᠭᠢᠯᠳᠦᠵᠦ ᠡᠬᠢᠯᠡᠵᠡᠢ ᠭᠡᠨ᠎ᠡ᠃ ᠢᠩᠭᠢᠵᠦ ᠴᠦ᠍ ᠨᠢᠭᠡ ᠦᠵᠡᠭᠡᠳ ᠲᠡᠭᠡᠵᠦ ᠴᠦ᠍ ᠨᠢᠭᠡ ᠣᠷᠣᠯᠳᠣᠭᠠᠳ᠂ ᠳᠣᠯᠢᠶᠠᠭᠠᠳ᠂ ᠦᠨᠦᠷᠯᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠴᠤ᠌ ᠬᠦᠷᠴᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨ᠎ᠡ᠃ ᠲᠣᠯᠣᠭᠠᠢ ᠨᠢ ᠸᠠᠭᠠᠷ ᠲᠤ᠌ ᠦᠨᠡᠬᠡᠷ ᠪᠠᠭᠲᠠᠬᠤ ᠦᠭᠡᠢ ᠪᠠᠶ᠋ᠢᠯ᠎ᠠ᠃ ᠬᠠᠷᠢᠨ ᠲᠣᠭᠣᠷᠤᠤ ᠲᠡᠷᠡ ᠬᠣᠭᠣᠷᠣᠨᠳᠣ ᠲᠣᠩᠰᠢᠭᠰᠠᠭᠠᠷ ᠪᠠᠶ᠋ᠢᠭᠠᠳ ᠪᠤᠭᠤᠳᠠᠢ ᠪᠠᠨ ᠪᠦᠭᠦᠳᠡ ᠶ᠋ᠢ ᠢᠳᠡᠴᠢᠬᠡᠵᠡᠢ ᠭᠡᠨ᠎ᠡ᠃ ᠲᠡᠭᠡᠭᠡᠳ ᠲᠣᠭᠣᠷᠤᠤ᠄ 《 ᠦᠨᠡᠭᠡ ᠨᠠᠶ᠋ᠢᠵᠠ ᠮᠢᠨᠢ!ᠪᠢᠲᠡᠭᠡᠢ ᠭᠣᠮᠣᠳᠠᠭᠠᠷᠠᠢ! ᠨᠠᠶ᠋ᠢᠵᠠ ᠳ᠋ᠤᠨᠢ ᠳᠠᠬᠢᠭᠠᠳ ᠳᠠᠶ᠋ᠢᠯᠠᠬᠤ ᠶᠠᠭᠤᠮ᠎ᠠ ᠳᠠᠩᠴᠤ ᠠᠯᠠᠭ᠎ᠠ ᠳᠠ! 》 ᠭᠡᠵᠦ ᠭᠡᠨ᠎ᠡ᠃

ᠦᠨᠡᠭᠡ ᠠᠭᠤᠷᠯᠠᠵᠠᠢ ᠭᠡᠨ᠎ᠡ᠃ ᠲᠡᠷᠡ ᠤᠭ ᠨᠢ ᠳᠣᠯᠣᠭᠠᠨ ᠬᠣᠨᠣᠭ ᠤ᠋ᠨ ᠢ᠋ᠶ᠋ᠠᠨ ᠬᠣᠭᠣᠯᠠ ᠶ᠋ᠢ ᠢᠳᠡᠨ᠎ᠡ ᠭᠡᠵᠦ ᠪᠣᠳᠣᠵᠤ ᠡᠨᠳᠡ ᠢᠷᠡᠭᠰᠡᠨ ᠶᠤᠮ ᠰᠠᠨᠵᠠᠢ᠃ ᠭᠡᠰᠡᠨ ᠴᠦ᠍ ᠦᠨᠡᠭᠡ ᠥᠯᠥᠨ ᠬᠣᠳᠣᠭᠣᠳᠣ ᠲᠠᠢ ᠪᠠᠨ ᠭᠡᠷ ᠤᠷᠤᠭᠤ ᠪᠠᠨ ᠪᠤᠴᠠᠬᠤ ᠪᠣᠯᠵᠠᠢ ᠭᠡᠨ᠎ᠡ᠃

ᠲᠡᠷᠡ ᠯᠠ ᠦᠶ᠎ᠡ ᠡᠴᠡ ᠬᠣᠶ᠋ᠢᠰᠢ ᠦᠨᠡᠭᠡ ᠲᠣᠭᠣᠷᠤᠤ ᠬᠣᠶᠠᠷ ᠨᠥᠬᠥᠷᠯᠡᠬᠦ ᠪᠡᠨ ᠪᠣᠯᠢᠭᠰᠠᠨ ᠶᠤᠮ ᠭᠡᠨ᠎ᠡ᠃

   ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ᠪᠦᠷᠢᠨᠴᠡᠴᠡᠭ ᠣᠳᠣᠨᠭᠡᠷᠡᠯ

   ᠦᠰᠦᠭ ᠬᠠᠲᠠᠭᠰᠠᠨ ᠨᠢ ᠄ᠬᠠᠰᠴᠢᠮᠡᠭ ᠮᠣᠳᠣᠲᠤ ᠬᠠᠪᠤᠷᠵᠢᠶ᠎ᠠ

   ᠬᠢᠨᠠᠭᠴᠢ ᠄ ᠮᠥᠴᠢᠷ᠂ ᠨᠡᠷᠡᠨ᠎ᠡ᠂ ᠾᠦᠩ ᠸᠧᠢ