ᠡᠯᠡᠰᠦᠨ ᠳᠦ ᠪᠤᠯᠠᠭᠳᠠᠭᠰᠠᠨ ᠰᠤᠪᠤᠳ – ᠫ᠂ ᠣᠶᠤᠨᠭᠡᠷᠡᠯ <ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠ ᠬᠢᠭᠡᠳ ᠰᠢᠷᠠ ᠨᠢᠳᠦᠨ ᠥᠬᠢᠨ> Элсэнд булагдсан сувдаа – П.Оюунгэрэл <хар нүдэн хурга хийгээд шар нүдэн охин>
36ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠ ᠬᠢᠭᠡᠳ ᠰᠢᠷᠠ ᠨᠢᠳᠦᠨ ᠥᠬᠢᠨ
ᠲᠠᠷᠭᠤ ᠬᠦᠴᠦ ᠪᠡᠨ ᠪᠠᠷᠠᠭᠰᠠᠨ ᠡᠬᠡ ᠮᠠᠯ ᠠᠷᠠᠢ ᠭᠡᠵᠦ ᠬᠣᠶᠠᠷ ᠠᠮᠢ ᠰᠠᠯᠬᠤ ᠲᠡᠳᠦᠢ ᠲᠥᠯᠯᠡᠭᠰᠡᠨ ᠪᠣᠯᠬᠣᠷ ᠬᠤᠷᠠᠭᠠ ᠢᠰᠢᠭᠡ ᠪᠡᠨ ᠴᠢᠳᠬᠤᠵᠤ ᠳᠡᠢᠯᠬᠦ ᠦᠭᠡᠢ ᠳᠤᠨᠳᠠᠭᠤᠷ ᠳᠠᠯᠠᠩ ᠲᠠᠢ᠃ ᠦᠨᠢᠶᠡᠳ ᠲᠤᠭᠤᠯᠤᠭᠰᠠᠨ ᠴᠦ᠍ ᠲᠤᠭᠤᠯ ᠢ᠋ᠶ᠋ᠠᠨ ᠳᠥᠩᠭᠡᠵᠦ ᠴᠢᠳᠬᠤᠬᠤ ᠲᠡᠳᠦᠢ᠃ ᠮᠠᠯᠴᠢᠳ ᠨᠢᠯᠬᠠ ᠲᠥᠯ ᠢ᠋ᠶ᠋ᠡᠨ ᠰᠢᠰᠢ ᠶ᠋ᠢᠨ ᠭᠤᠯᠢᠷ ᠤ᠋ᠨ ᠵᠤᠲᠠᠩ ᠪᠤᠶᠤ ᠪᠤᠳᠠᠭᠠᠨ ᠤ᠋ ᠰᠥᠮᠥᠰᠦ ᠪᠡᠷ ᠤᠭᠵᠢᠵᠤ ᠪᠠᠢᠯᠠ᠃ ᠰᠦᠨ ᠲᠠᠯᠬᠠ ᠣᠯᠳᠠᠬᠤ ᠦᠭᠡᠢ ᠰᠢᠤᠬᠠᠨ᠃ ᠪᠠᠷᠢᠭᠠᠳᠠ ᠡᠴᠡ ᠠᠢᠯ ᠡᠷᠦᠬᠡ ᠳ᠋ᠦ᠍ ᠭᠠᠭᠴᠠ ᠬᠣᠶᠠᠷ ᠤᠭᠤᠲᠠ ᠯᠠ ᠬᠤᠪᠢᠶᠠᠵᠤ ᠥᠭᠭᠦᠨᠡ᠃ ᠲᠡᠭᠦᠨ ᠢ᠋ᠶ᠋ᠡᠨ ᠠᠳᠢᠰ ᠷᠠᠰᠢᠶᠠᠨ ᠰᠢᠭ᠋ ᠢ᠋ᠶ᠋ᠡᠷ ᠭᠠᠭᠴᠠ ᠵᠢᠵᠢᠭ ᠬᠠᠯᠪᠠᠭᠠ ᠠᠪᠴᠤ ᠵᠤᠲᠠᠩ ᠪᠤᠶᠤ ᠰᠥᠮᠥᠰᠦ ᠲᠡᠢ ᠪᠡᠨ ᠬᠣᠯᠢᠵᠤ ᠬᠡᠷᠡᠭᠯᠡᠨᠡ᠃ ᠬᠥᠬᠡ ᠳᠡᠷᠡᠰᠦᠨ ᠦ᠌ ᠰᠠᠭᠠᠳᠠᠭ ᠱᠤᠤᠭᠢᠨ ᠬᠠᠯᠢᠭᠤᠷᠠᠵᠤ᠂ ᠲᠣᠭᠣᠷᠢᠮ ᠭᠦᠪᠡᠭᠡᠯᠡᠨ ᠤᠷᠭᠤᠭᠰᠠᠨ ᠢᠭᠴᠤ ᠰᠠᠬᠤᠯᠢᠭ ᠵᠡᠭᠡᠰᠦᠨ ᠦ᠌ ᠰᠢᠷᠭᠠᠯ ᠨᠠᠮᠠᠭᠠ ᠨᠠᠢᠭᠤᠯᠵᠠᠨ ᠭᠠᠩᠬᠤᠵᠤ ᠪᠠᠢᠳᠠᠭ ᠬᠤᠯᠤᠰᠤᠲᠠᠢ ᠬᠣᠲᠣᠭᠣᠷ ᠲᠤ᠌ ᠮᠠᠯᠴᠢᠨ ᠪᠠᠪᠤᠤ ᠭᠤᠸᠠᠢ ᠶ᠋ᠢᠨ ᠬᠢ ᠬᠠᠪᠤᠷᠵᠢᠵᠤ ᠪᠠᠢᠯᠠ᠃ ᠬᠠᠪᠲᠠᠭᠠᠢ ᠬᠥᠬᠡ ᠴᠢᠯᠠᠭᠤᠳ ᠢ᠋ᠶ᠋ᠠᠷ ᠵᠡᠷᠭᠡᠯᠡᠨ ᠪᠠᠷᠢᠭᠰᠠᠨ ᠮᠠᠯ ᠤ᠋ᠨ ᠫᠧᠩ ᠳ᠋ᠦ᠍ ᠵᠠᠮᠪᠠ ᠲᠠᠯᠪᠢᠨ ᠳᠡᠭᠡᠪᠦᠷᠯᠡᠵᠦ ᠲᠥᠯ ᠦ᠋ᠨ ᠳᠤᠯᠠᠭᠠᠨ ᠬᠣᠷᠣᠭᠠ ᠪᠠᠢᠵᠠᠢ᠃ ᠬᠠᠵᠠᠭᠤ ᠳ᠋ᠤᠨᠢ ᠵᠢᠷᠭᠤᠭᠠᠨ ᠬᠠᠨᠠ ᠲᠠᠢ ᠲᠣᠮᠣ ᠴᠠᠭᠠᠨ ᠭᠡᠷ᠂ ᠬᠠᠭᠤᠴᠢᠨ ᠪᠣᠷᠣ ᠳᠡᠭᠡᠪᠦᠷ ᠲᠡᠢ ᠲᠥᠯ ᠦ᠋ᠨ ᠭᠡᠷ ᠬᠠᠷᠠᠭᠳᠠᠵᠤ᠂ ᠬᠠᠪᠤᠷ ᠤ᠋ᠨ ᠬᠠᠷᠠ ᠰᠠᠯᠬᠢᠨᠠ ᠡᠷᠦᠬᠡ ᠨᠢ ᠳᠠᠷᠪᠠᠯᠵᠠᠨᠠ᠃
ᠤᠤᠬᠠᠨ ᠤ᠋ ᠪᠠᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠲᠠᠪᠢ ᠡᠷᠭᠢᠮᠡ ᠨᠠᠰᠤᠨ ᠤ᠋ ᠲᠣᠮᠣ ᠠᠯᠠᠭ ᠨᠢᠳᠦ ᠲᠡᠢ ᠲᠤᠷᠠᠩᠬᠠᠢ ᠰᠢᠷᠠ ᠠᠪᠠᠭᠠᠢ ᠲᠣᠮᠣ ᠮᠣᠳᠣᠨ ᠣᠭᠣᠷ ᠲᠤ᠌ ᠬᠥᠬᠡ ᠴᠠᠢ ᠨᠦᠳᠦᠵᠦ ᠰᠠᠭᠤᠨᠠ᠃ ᠬᠣᠢᠮᠣᠷ ᠲᠤᠨᠢ ᠬᠥᠳᠥᠰᠥᠨ ᠡᠩᠬᠡ ᠲᠡᠢ ᠮᠠᠷᠢᠶᠠᠯᠢᠭ ᠴᠠᠭᠠᠨ ᠥᠬᠢᠨ ᠰᠠᠶᠢ ᠭᠠᠷᠤᠭᠰᠠᠨ ᠨᠢᠯᠬᠠ ᠢᠰᠢᠭᠡ ᠶ᠋ᠢ ᠠᠯᠴᠢᠭᠤᠷ ᠲᠠᠭᠠᠨ ᠪᠠᠭᠯᠠᠵᠤ《ᠬᠡᠦᠬᠡᠳ》 ᠭᠡᠵᠦ ᠲᠣᠭᠯᠠᠨᠠ᠃ ᠪᠠᠪᠤᠤ ᠶ᠋ᠢᠨ ᠬᠥᠭᠰᠢᠨ ᠴᠡᠴᠡᠭᠮᠠ ᠭᠤᠸᠠᠢ ᠪᠣᠯ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ ᠠᠯᠳᠠᠷ ᠲᠠᠢ ᠠᠵᠢᠯᠴᠢ ᠭᠠᠪᠰᠢᠭᠠᠢ ᠪᠦᠰᠡᠭᠦᠢ᠃ ᠪᠠᠪᠤᠤ ᠭᠤᠸᠠᠢ ᠬᠡᠳᠦᠢᠪᠡᠷ ᠵᠢᠷᠠ ᠭᠠᠷᠤᠭᠰᠠᠨ ᠪᠣᠯᠪᠠᠴᠤ ᠵᠠᠯᠠᠭᠤ ᠶ᠋ᠢᠨ ᠴᠣᠭ ᠢ᠋ᠶ᠋ᠠᠨ ᠠᠯᠳᠠᠭᠠᠳᠤᠢ ᠳᠣᠷᠪᠢᠯᠢᠭ ᠡᠷᠡ᠃ ᠡᠳᠡ ᠬᠣᠶᠠᠭᠤᠯᠠ ᠪᠠᠷᠢᠭᠠᠳᠠ ᠶ᠋ᠢᠨ ᠬᠣᠨᠢ ᠦᠬᠡᠷ ᠦ᠋ᠨ ᠰᠦᠷᠦᠭ ᠢ᠋ ᠳᠠᠭᠠᠭᠠᠴᠢᠯᠠᠨ ᠬᠠᠷᠢᠭᠤᠯᠳᠠᠭ᠃ ᠥᠩᠭᠡᠷᠡᠭᠴᠢ ᠡᠪᠦᠯ ᠴᠠᠭᠠᠨ ᠵᠤᠳ ᠪᠣᠯᠵᠤ ᠬᠠᠪᠤᠷ ᠨᠢ ᠭᠠᠩᠳᠠᠵᠤ ᠭᠠᠴᠢᠭ ᠬᠠᠲᠠᠭᠤ ᠣᠨ ᠢ᠋ ᠤᠭᠲᠤᠵᠠᠢ᠃ ᠬᠠᠮᠲᠤ ᠶ᠋ᠢᠨ ᠮᠠᠯ ᠢ᠋ ᠭᠠᠭᠴᠠ ᠢᠰᠢᠭᠡ ᠴᠦ᠍ ᠬᠣᠷᠣᠭᠠᠯ ᠦᠭᠡᠢ ᠥᠰᠬᠡᠬᠦ ᠭᠡᠵᠦ ᠬᠣᠶᠠᠷ ᠬᠥᠭᠰᠢᠨ ᠶᠣᠰᠣᠲᠠᠢ ᠵᠢᠷᠦᠬᠡᠨ ᠲᠠᠮᠢᠷ ᠢ᠋ᠶ᠋ᠠᠨ ᠰᠢᠪᠬᠠᠨ ᠮᠡᠳᠬᠡᠨ ᠴᠢᠷᠮᠠᠢᠨᠠ᠃
ᠪᠠᠪᠤᠤ ᠴᠡᠴᠡᠭᠮᠠ ᠬᠣᠶᠠᠷ ᠵᠠᠯᠠᠭᠤ ᠪᠠᠭᠠ ᠨᠠᠰᠤᠨ ᠡᠴᠡ ᠪᠡᠨ ᠲᠣᠯᠣᠭᠠᠢ ᠬᠣᠯᠪᠣᠨ ᠠᠮᠢᠳᠤᠷᠠᠭᠰᠠᠨ ᠪᠣᠯᠪᠠᠴᠤ ᠭᠠᠭᠴᠠ ᠦᠷᠡ ᠶ᠋ᠢᠨ ᠵᠤᠯᠠᠢ ᠦᠨᠦᠷᠯᠡᠬᠦ ᠵᠠᠶᠠᠭᠠ ᠳᠤᠲᠠᠭᠤ ᠪᠠᠢᠵᠠᠢ᠃ ᠲᠡᠭᠡᠵᠦ ᠶᠠᠪᠤᠲᠠᠯᠠ ᠪᠤᠷᠬᠠᠨ ᠲᠩᠷᠢ ᠡᠳᠡ ᠬᠣᠶᠠᠷ ᠲᠤ᠌ ᠬᠠᠢᠷᠠᠯᠠᠭᠰᠠᠨ ᠦᠷᠡ ᠨᠢ ᠥᠭᠡᠷᠡ ᠡᠵᠢ ᠶ᠋ᠢᠨ ᠬᠡᠪᠡᠯᠢ ᠳ᠋ᠦ᠍ ᠲᠥᠷᠥᠯ ᠣᠯᠵᠤ ᠮᠡᠨᠳᠦᠯᠡᠭᠡᠳ ᠥᠪᠡᠷ ᠲᠤᠨᠢ ᠬᠦᠷᠦᠭᠡᠳ ᠢᠷᠡᠵᠡᠢ᠃ ᠲᠡᠷᠡ ᠨᠢ ᠦᠷᠭᠦᠯᠵᠢ ᠠᠢᠯ ᠠᠢᠮᠠᠭ ᠶᠠᠪᠤᠭᠰᠠᠨ᠂ ᠣᠯᠠᠨ ᠬᠥᠭᠡᠷᠦᠬᠦᠨ ᠬᠡᠦᠬᠡᠳ ᠲᠡᠢ ᠫᠦᠷᠪᠦ᠂ ᠳ᠋ᠠᠷᠢ ᠬᠣᠶᠠᠷ ᠤ᠋ᠨ ᠳᠣᠯᠣᠳᠤᠭᠠᠷ ᠬᠡᠦᠬᠡᠳ ᠪᠣᠯᠬᠤ ᠠᠯᠢᠶᠠ ᠰᠢᠷᠠ ᠥᠬᠢᠨ ᠤᠨᠤᠨ᠃
ᠭᠤᠷᠪᠠᠨ ᠣᠢ ᠬᠦᠷᠴᠦ ᠪᠠᠢᠭᠰᠠᠨ ᠤᠨᠤᠨ ᠨᠢᠭᠡ ᠡᠳᠦᠷ ᠪᠠᠪᠤᠤ ᠭᠤᠸᠠᠢ ᠶ᠋ᠢᠨ ᠳ᠋ᠦ᠍ ᠢᠷᠡᠭᠡᠳ《ᠪᠢ ᠲᠠᠨ ᠤ᠋ ᠬᠡᠦᠬᠡᠨ ᠪᠣᠯᠤᠶᠠ ᠯᠠ ᠳᠠ》 ᠭᠡᠵᠡᠢ᠃ ᠦᠷᠡ ᠶ᠋ᠢᠨ ᠬᠦᠰᠡᠯ ᠪᠣᠯᠵᠤ ᠶᠠᠪᠤᠭᠰᠠᠨ ᠬᠣᠶᠠᠷ ᠬᠡᠮᠵᠢᠶᠡ ᠦᠭᠡᠢ ᠪᠡᠯᠭᠡᠰᠢᠶᠡᠵᠦ ᠠᠪᠤ ᠡᠵᠢ ᠳ᠋ᠦ᠍ᠨᠢ ᠬᠠᠳᠠᠭ ᠰᠠᠮᠪᠠᠢ ᠲᠠᠢ ᠣᠴᠢᠵᠤ ᠦᠷᠡᠴᠢᠯᠡᠨ ᠲᠡᠵᠢᠭᠡᠬᠦ ᠶ᠋ᠢ ᠭᠤᠶᠤᠪᠠ᠃ ᠠᠪᠤ ᠡᠵᠢ ᠨᠢ ᠮᠡᠳᠡᠭᠡᠵᠢ ᠳᠤᠷᠠ ᠦᠭᠡᠢ᠂ ᠪᠢᠴᠢᠬᠠᠨ ᠤᠨᠤᠨ ᠳ᠋ᠠᠭᠠᠨ ᠠᠯᠢ ᠴᠤ᠌ ᠬᠡᠦᠬᠡᠳ ᠡᠴᠡ ᠪᠡᠨ ᠢᠯᠡᠭᠦᠦ ᠬᠠᠢᠷᠠᠲᠠᠢ ᠪᠣᠯᠤᠭᠠᠳ ᠲᠡᠷᠡ᠃ ᠬᠡᠵᠢᠶᠡᠳᠡ ᠰᠢᠷᠠ ᠴᠢᠴᠤᠯᠠᠢ ᠰᠢᠭ᠋ ᠳᠡᠭᠳᠡᠵᠦ ᠳᠡᠷᠪᠡᠭᠰᠡᠨ ᠬᠥᠳᠡᠯᠭᠡᠭᠡᠨ ᠠᠷᠪᠢᠨ ᠲᠠᠢ ᠰᠡᠷᠭᠦᠯᠡᠩ ᠭᠡᠳᠡᠭ ᠨᠢ ᠵᠢᠭᠲᠡᠢᠬᠡᠨ᠃ ᠣᠢ ᠬᠦᠷᠦᠭᠡᠳᠦᠢ ᠪᠠᠢᠬᠤ ᠳ᠋ᠠᠭᠠᠨ ᠬᠡᠯᠡ ᠳ᠋ᠦ᠍ ᠣᠷᠣᠵᠤ᠂ ᠠᠷᠪᠠᠨ ᠰᠠᠷᠠ ᠪᠣᠯᠣᠮᠠᠭᠴᠠ ᠠᠯᠬᠤᠵᠤ ᠲᠣᠭᠣᠷᠤᠤ ᠲᠣᠭᠣᠳᠠᠭ ᠲᠠᠭᠤᠵᠤ ᠭᠦᠶᠦᠳᠡᠭ ᠶᠦᠮ᠃ ᠭᠡᠷᠡᠯᠲᠦᠭᠰᠡᠨ ᠰᠢᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠢᠨᠢᠶᠡᠭᠰᠡᠨ ᠴᠠᠭᠠᠨᠠ ᠪᠠᠨ ᠨᠢᠭᠡ ᠳᠡᠭᠵᠢᠨ ᠥᠬᠢᠨ᠃
ᠤᠨᠤᠨ ᠤ᠋ ᠠᠪᠤ ᠨᠢ ᠠᠶᠠᠨ ᠳ᠋ᠤ᠌ ᠶᠠᠪᠤᠭᠠᠳ ᠡᠵᠡᠭᠦᠢ ᠪᠣᠯᠬᠣᠷ ᠡᠵᠢ ᠨᠢ ᠡᠵᠡᠨ ᠮᠡᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠭᠡᠳᠡᠭ ᠢ᠋ᠶ᠋ᠡᠨ ᠰᠠᠭᠠᠬᠠᠯᠲᠠ ᠳ᠋ᠠᠭᠠᠨ ᠡᠪᠲᠡᠢᠬᠡᠨ ᠮᠡᠳᠡᠭᠳᠡᠵᠡᠢ᠂ ᠤᠳᠠᠯ ᠦᠭᠡᠢ ᠠᠢᠯ ᠤ᠋ᠳ ᠡᠪᠦᠯᠵᠢᠶᠡ ᠳ᠋ᠦ᠍ ᠨᠡᠭᠦᠬᠦ ᠪᠣᠯᠵᠤ ᠪᠠᠪᠤᠤ ᠭᠤᠸᠠᠢ ᠶ᠋ᠢᠨ ᠬᠢ ᠫᠦᠷᠪᠦ ᠶ᠋ᠢᠨ ᠬᠢ ᠲᠡᠢ ᠨᠤᠲᠤᠭ ᠰᠠᠯᠵᠤ ᠨᠡᠭᠦᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠪᠢᠴᠢᠬᠠᠨ ᠤᠨᠤᠨ ᠠᠴᠢᠶᠠ ᠲᠡᠷᠭᠡᠨ ᠳᠡᠭᠡᠷᠡ ᠨᠢ ᠭᠠᠷᠴᠤ ᠰᠠᠭᠤᠴᠢᠬᠠᠭᠠᠳ
— ᠪᠢ ᠲᠠᠨ ᠤ᠋ ᠬᠣᠶᠠᠷ ᠤ᠋ᠨ ᠥᠬᠢᠨ ᠰᠢᠦ᠂ ᠨᠠᠮᠠᠶ᠋ᠢ ᠠᠪᠤᠭᠠᠳ ᠶᠠᠪᠤᠭᠠᠴᠢ ᠭᠡᠳ ᠤᠬᠢᠯᠠᠭᠠᠳ ᠪᠠᠢᠪᠠ᠃ ᠪᠠᠪᠤᠤ ᠴᠡᠴᠡᠭᠮᠠ ᠬᠣᠶᠠᠷ ᠰᠡᠳᠬᠢᠯ ᠬᠥᠳᠡᠯᠦᠨ ᠨᠢᠯᠪᠤᠰᠤ ᠪᠥᠮᠪᠥᠷᠢᠭᠦᠯᠵᠦ᠂ ᠦᠷᠦ ᠵᠥᠭᠡᠯᠡᠨ ᠳ᠋ᠠᠷᠢ ᠡᠵᠢ᠄
— ᠲᠡᠭᠡᠪᠡᠯ ᠲᠠ ᠬᠣᠶᠠᠷ ᠠᠪᠴᠤ ᠶᠠᠪᠤᠭᠠᠳ ᠬᠡᠳᠦ ᠬᠣᠨᠣᠭᠤᠯᠵᠤ ᠦᠵᠡ᠂ ᠠᠪᠤ ᠨᠢ ᠢᠷᠡᠪᠡᠯ ᠠᠪᠬᠤ ᠪᠠᠷ ᠣᠴᠢᠭ! ᠭᠡᠵᠡᠢ᠃ ᠵᠢᠭᠠᠯ ᠤᠨᠤᠨ ᠢᠩᠭᠢᠵᠦ ᠶᠠᠪᠤᠭᠠᠳ ᠳᠠᠬᠢᠵᠤ ᠠᠪᠤ ᠡᠵᠢ ᠳ᠋ᠡᠭᠡᠨ ᠢᠷᠡᠭᠰᠡᠨ ᠦᠭᠡᠢ᠃ ᠪᠠᠪᠤᠤ ᠴᠡᠴᠡᠭᠮᠠ ᠬᠣᠶᠠᠷ ᠤ᠋ᠨ ᠡᠷᠭᠦᠮᠡᠯ ᠥᠬᠢᠨ ᠪᠣᠯᠵᠤ᠂ ᠠᠯᠠᠭᠠᠨ ᠳᠡᠭᠡᠷᠡᠬᠢ ᠠᠮᠢᠨᠳᠠᠢ᠂ ᠠᠯᠠᠭ ᠨᠢᠳᠦᠨ ᠦ᠌ ᠬᠢᠨᠢ ᠴᠡᠴᠡᠭᠡᠢ᠂ ᠠᠮᠢᠳᠤᠷᠠᠵᠤ ᠶᠠᠪᠤᠬᠤ ᠨᠠᠰᠤᠨ ᠤ᠋ ᠬᠢᠨᠢ ᠬᠦᠰᠡᠯ ᠲᠡᠮᠡᠦᠯᠦᠯ ᠪᠣᠯᠵᠤ᠂ ᠠᠷᠤ ᠥᠪᠥᠷ ᠲᠤᠨᠢ ᠳᠡᠭᠳᠡᠭᠡᠬᠡᠢ ᠰᠢᠭ ᠳᠡᠷᠪᠡᠵᠦ ᠳᠡᠭᠳᠡᠨ ᠭᠦᠶᠦᠨᠡ᠃ ᠫᠦᠷᠪᠦ ᠠᠶᠠᠨ ᠠ᠋ᠴᠠ ᠢᠷᠡᠬᠦ ᠳ᠋ᠦ᠍᠂ ᠠᠯᠢᠶᠠ ᠰᠢᠷᠠ ᠥᠬᠢᠨ ᠨᠢ ᠠᠯᠠᠭᠠ᠂ ᠡᠵᠢ ᠨᠢ ᠡᠮᠢᠶᠡᠨ ᠪᠠᠢᠵᠤ ᠪᠦᠬᠦ ᠤᠴᠢᠷ ᠢ᠋ ᠲᠣᠭᠠᠴᠢᠯᠠ᠃
— ᠡᠵᠡᠭᠦᠢ ᠳ᠋ᠦ᠍ ᠥᠬᠢᠨ ᠢ᠋ ᠮᠢᠨᠢ ᠬᠥᠮᠦᠨ ᠳ᠋ᠦ᠍ ᠥᠭᠴᠦ ᠪᠠᠢᠳᠠᠭ᠂ ᠡᠬᠡ ᠬᠥᠮᠦᠨ ᠭᠡᠬᠦ ᠤᠤ᠂ ᠴᠢᠮᠠᠶ᠋ᠢ? ᠭᠡᠵᠦ ᠡᠬᠡᠨᠡᠷ ᠲᠡᠭᠡᠨ ᠠᠭᠤᠷᠯᠠᠨ ᠥᠬᠢᠨ ᠳ᠋ᠡᠭᠡᠨ ᠠᠪᠤᠭᠰᠠᠨ ᠶᠠᠭᠤᠮᠠ ᠪᠠᠨ ᠡᠪᠦᠷᠲᠦᠯᠡᠵᠦ ᠪᠠᠪᠤᠤ ᠭᠤᠸᠠᠢ ᠶ᠋ᠢᠨ ᠬᠢ ᠶ᠋ᠢ ᠴᠢᠭᠯᠡᠪᠡ᠃ ᠥᠬᠢᠨ ᠦ᠌ ᠬᠢᠨᠢ ᠥᠳᠬᠡᠨ ᠰᠢᠷᠭᠠᠯ ᠭᠡᠵᠢᠭᠡ᠂ ᠮᠠᠷᠢᠶᠠᠯᠢᠭ ᠬᠥᠭᠡᠷᠦᠬᠦᠨ ᠨᠢᠭᠤᠷ᠂ ᠭᠡᠷᠡᠯᠲᠦᠭᠰᠡᠨ ᠨᠢᠳᠦ᠂ ᠴᠣᠪᠣᠭᠣ ᠴᠣᠯᠭᠢᠨ ᠳᠦᠷᠢ ᠨᠢ ᠲᠣᠳᠣᠷᠠᠨ ᠡᠷᠢᠭᠳᠡᠨᠡ᠃ ᠬᠣᠶᠠᠷ ᠣᠢ ᠬᠦᠷᠴᠦ ᠪᠠᠢᠬᠤ ᠳ᠋ᠤᠨᠢ ᠶᠤᠮ ᠳ᠋ᠠᠭ᠂ ᠠᠢᠯ ᠤ᠋ᠨ ᠬᠢᠨᠢ ᠬᠥᠮᠦᠨ ᠭᠡᠷ ᠲᠦ᠋ᠨᠢ ᠣᠷᠣᠭᠰᠠᠨ ᠳ᠋ᠤ᠌᠂ ᠤᠨᠤᠨ ᠣᠷᠣᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠭᠠᠳ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠷᠡ ᠶ᠋ᠢ ᠲᠡᠪᠡᠷᠢᠨ ᠲᠣᠭᠯᠠᠵᠤ ᠪᠠᠢᠵᠠᠢ᠃ ᠠᠢᠯ ᠤ᠋ᠨ ᠬᠢᠨᠢ ᠬᠥᠮᠦᠨ᠄
— ᠲᠠᠨ ᠤ᠋ ᠬᠢ ᠬᠥᠮᠦᠨ ᠦᠭᠡᠢ ᠶᠦᠮ ᠤᠤ? ᠠᠪᠤ ᠡᠵᠢ ᠴᠢᠨᠢ ᠬᠠᠮᠢᠭᠠ ᠶᠠᠪᠤᠭᠠ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠵᠢᠭᠠᠯ ᠤᠨᠤᠨ ᠨᠢᠳᠦ ᠪᠡᠨ ᠴᠠᠪᠴᠢᠯᠠᠨ ᠢᠨᠢᠶᠡᠭᠡᠳ
— ᠪᠢ ᠲᠡᠭᠡᠭᠡᠳ ᠬᠥᠮᠦᠨ ᠪᠢᠰᠢ ᠰᠢᠭ ᠪᠠᠢᠨᠠ ᠤᠤ? ᠭᠡᠵᠡᠢ᠃ ᠠᠢᠯ ᠤ᠋ᠨ ᠬᠢᠨᠢ ᠬᠥᠮᠦᠨ ᠠᠭᠤᠷᠯᠠᠬᠤ ᠠᠲᠠᠯᠠ ᠢᠨᠢᠶᠡᠳᠦ ᠬᠦᠷᠴᠦ
— ᠴᠠᠳᠢᠭ ᠦᠭᠡᠢ ᠴᠢᠴᠠᠭᠠ ᠶ᠋ᠢ ᠵᠦᠭᠡᠷ᠂ ᠶᠠᠭᠠᠬᠢᠵᠤ ᠪᠣᠳᠣᠵᠤ ᠣᠯᠤᠭᠠ ᠪᠣᠢ ᠭᠡᠳ ᠭᠡᠳᠡᠷᠭᠦ ᠪᠤᠴᠠᠵᠠᠢ᠃ ᠪᠢᠴᠢᠬᠠᠨ ᠤᠨᠤᠨ ᠠᠪᠤ ᠡᠵᠢ ᠪᠡᠨ ᠲᠠᠵᠢ᠂ ᠫᠤᠤᠵᠢ ᠭᠡᠵᠦ ᠳᠠᠭᠤᠳᠠᠨᠠ᠃ ᠲᠡᠭᠡᠭᠡᠳ ᠲᠣᠮᠣᠴᠤᠤᠯ ᠱᠣᠭᠯᠠᠵᠤ
— ᠴᠢ ᠠᠪᠤ ᠡᠵᠢ ᠪᠡᠨ ᠨᠡᠷᠡᠯᠡᠵᠦ ᠳᠠᠭᠤᠳᠠᠳᠠᠭ ᠶᠠᠮᠠᠷ ᠬᠠᠴᠢᠨ ᠬᠡᠦᠬᠡᠳ ᠪᠣᠢ? ᠭᠡᠪᠡᠯ
— ᠲᠠᠵᠢ ᠯᠠ ᠪᠣᠯ ᠲᠠᠵᠢ᠂ ᠫᠤᠤᠵᠢ ᠯᠠ ᠪᠣᠯ ᠫᠤᠤᠵᠢ᠂ ᠶᠠᠭᠠᠬᠢᠳᠠᠭ ᠶᠤᠮ ᠭᠡᠳᠡᠭ᠃ ᠠᠪᠤ ᠨᠢ ᠥᠬᠢᠨ ᠦ᠌ ᠪᠡᠨ ᠠᠯᠢᠶᠠᠷᠬᠠᠭ ᠬᠥᠭᠡᠷᠦᠬᠦᠨ ᠳᠦᠷᠢ ᠶ᠋ᠢ ᠡᠷᠭᠢᠴᠡᠭᠦᠯᠦᠨ ᠶᠠᠪᠤᠨᠠ᠃ ᠶᠠᠭᠠᠬᠢᠬᠤ ᠠᠷᠭᠠ ᠦᠭᠡᠢ ᠰᠠᠨᠠᠭᠰᠠᠨ ᠪᠠᠢᠯᠭᠦᠢ᠂ ᠵᠢᠭᠠᠯ ᠤᠨᠤᠨ ᠠᠪᠤ ᠪᠠᠨ ᠬᠦᠵᠦᠭᠦᠳᠡᠨ ᠲᠡᠪᠡᠷᠢᠵᠦ᠂ ᠰᠠᠨᠠᠨ ᠰᠠᠨᠠᠨ ᠦᠨᠦᠰᠦᠭᠦᠯᠵᠦ᠂ ᠣᠷᠣᠢ ᠨᠢ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠪᠦᠷ ᠲᠦ᠍ ᠤᠨᠲᠠᠪᠠ᠃ ᠪᠠᠪᠤᠤ ᠴᠡᠴᠡᠭᠮᠠ ᠬᠣᠶᠠᠷ ᠡᠨᠡ ᠥᠬᠢᠨ ᠴᠦ᠍ ᠮᠠᠷᠭᠠᠰᠢ ᠠᠪᠤ ᠲᠠᠢ ᠪᠠᠨ ᠶᠠᠪᠤᠴᠢᠬᠠᠬᠤ ᠪᠠᠢᠬᠠ ᠭᠡᠵᠦ ᠪᠣᠳᠣᠵᠠᠢ᠃ ᠭᠡᠪᠡᠴᠦ ᠳᠠᠷᠠᠭᠠ ᠥᠷᠯᠥᠭᠡ ᠨᠢ ᠠᠪᠤ ᠪᠠᠨ ᠶᠠᠪᠤᠬᠤ ᠳ᠋ᠤ᠌ ᠬᠦᠵᠦᠭᠦᠳᠡᠨ ᠲᠡᠪᠡᠷᠢᠵᠦ᠂ ᠠᠪᠤ ᠪᠠᠷ ᠢ᠋ᠶ᠋ᠠᠨ ᠲᠡᠪᠡᠷᠢᠭᠦᠯᠦᠨ ᠬᠡᠰᠡᠭ ᠶᠠᠪᠤᠭᠠᠳ ᠭᠡᠨᠡᠳᠲᠡ ᠪᠠᠭᠤᠵᠤ
— ᠠᠪᠤ ᠠ᠋᠂ ᠪᠢ ᠲᠠᠨ ᠲᠠᠢ ᠶᠠᠪᠤᠬᠤ ᠦᠭᠡᠢ ᠰᠢᠦ᠂ ᠡᠨᠡ ᠴᠢᠨᠢ ᠮᠢᠨᠦ ᠭᠡᠷ! ᠭᠡᠯᠡ᠃ ᠥᠬᠢᠨ ᠢ᠋ᠶ᠋ᠡᠨ ᠶᠠᠭᠠᠬᠢᠪᠠᠴᠤ ᠠᠪᠴᠤ ᠬᠠᠷᠢᠨᠠ ᠭᠡᠵᠦ ᠪᠣᠳᠣᠵᠤ ᠣᠴᠢᠭᠰᠠᠨ ᠠᠪᠤ ᠨᠢ ᠪᠦᠷ ᠴᠦ᠍ ᠬᠥᠰᠡᠷᠳᠡᠪᠡ᠃ ᠠᠪᠤ ᠨᠢ ᠲᠣᠮᠣ ᠨᠢᠳᠦᠨ ᠳ᠋ᠡᠭᠡᠨ ᠨᠢᠯᠪᠤᠰᠤ ᠵᠠᠢᠷᠲᠤᠭᠤᠯᠤᠨ ᠥᠬᠢᠨ ᠢ᠋ᠶ᠋ᠡᠨ ᠲᠡᠪᠡᠷᠢᠵᠦ ᠬᠣᠶᠠᠷ ᠬᠠᠴᠠᠷ ᠢ᠋ ᠨᠢ ᠡᠭᠡᠯᠵᠢᠯᠡᠨ ᠦᠨᠦᠰᠦᠭᠡᠳ ᠳᠠᠭᠤ ᠦᠭᠡᠢ ᠮᠣᠷᠳᠠᠵᠤ ᠶᠠᠪᠤᠯᠠ᠃《ᠪᠠᠪᠤᠤ ᠭᠤᠸᠠᠢ ᠶ᠋ᠢᠨ ᠬᠡᠨ ᠦ᠌ ᠬᠢᠨᠢ ᠰᠦᠨᠡᠰᠦ ᠮᠠᠨ ᠤ᠋ ᠳ᠋ᠤ᠌ ᠢᠷᠡᠵᠦ ᠳᠥᠷᠥᠭᠡ ᠪᠣᠯ? ᠦᠷᠡ ᠦᠭᠡᠢ ᠬᠥᠮᠦᠨ ᠢ᠋ ᠦᠶᠡ ᠲᠡᠢ ᠪᠣᠯᠭᠠᠬᠤ ᠭᠡᠵᠦ ᠪᠤᠶᠠᠨ ᠪᠣᠯᠬᠤ ᠪᠠᠢᠯᠭᠦᠢ ᠶᠠᠭᠠᠬᠢᠬᠤᠪ》 ᠭᠡᠵᠦ ᠫᠦᠷᠪᠦ ᠭᠤᠸᠠᠢ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠪᠣᠳᠣᠭᠰᠠᠨ ᠴᠤ᠌ ᠵᠢᠷᠦᠬᠡ ᠨᠢ ᠨᠢᠭᠡᠯᠡ ᠡᠮᠵᠡᠭᠯᠡᠵᠦ ᠨᠢᠳᠦᠨ ᠳ᠋ᠦ᠍ᠨᠢ ᠤᠰᠤᠨ ᠬᠦᠷᠢᠶᠡ ᠲᠠᠲᠠᠭᠠᠳ ᠪᠠᠢᠯᠠ᠃ ᠤᠨᠤᠨ ᠡᠢᠮᠦ ᠦᠯᠢᠭᠡᠷ ᠲᠡᠢ ᠪᠠᠪᠤᠤ ᠭᠤᠸᠠᠢ ᠶ᠋ᠢᠨ ᠥᠬᠢᠨ ᠪᠣᠯᠤᠭᠠᠳ ᠭᠤᠷᠪᠠᠨ ᠵᠢᠯ ᠦ᠋ᠨ ᠨᠢᠭᠤᠷ ᠦᠵᠡᠵᠦ ᠪᠠᠢᠭᠠ ᠨᠢ ᠡᠨᠡ᠃
ᠪᠠᠪᠤᠤ ᠴᠡᠴᠡᠭᠮᠡ ᠬᠣᠶᠠᠷ ᠡᠳᠦᠷᠵᠢᠨ ᠬᠣᠲᠠ ᠬᠣᠷᠣᠭᠠᠨ ᠳ᠋ᠠᠭᠠᠨ ᠪᠣᠷᠪᠢ ᠨᠤᠭᠤᠷᠠᠯ ᠦᠭᠡᠢ ᠶᠠᠭᠠᠷᠠᠨᠠ᠃ ᠴᠡᠴᠡᠭᠮᠠ ᠡᠵᠢ ᠶ᠋ᠢᠨ ᠤᠭᠵᠢᠵᠤ ᠥᠰᠬᠡᠭᠰᠡᠨ ᠬᠠᠢᠷᠠᠲᠠᠢ ᠬᠠᠯᠵᠠᠨ ᠲᠥᠯᠥᠭᠡ ᠨᠢ ᠬᠤᠷᠠᠭᠠᠯᠠᠬᠤ ᠳ᠋ᠠᠭᠠᠨ ᠪᠡᠷᠬᠡᠳᠡᠵᠦ ᠪᠤᠷᠵᠢᠭᠠᠷ ᠴᠠᠭᠠᠨ ᠦᠰᠦ ᠲᠡᠢ ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠ ᠨᠢ ᠮᠡᠨᠳᠦ ᠭᠠᠷᠴᠠᠢ᠃ ᠭᠠᠷᠤᠮᠠᠭᠴᠠ ᠪᠠᠨ ᠡᠬᠡ ᠪᠡᠨ ᠠᠯᠳᠠᠭᠰᠠᠨ ᠥᠨᠥᠴᠢᠨ ᠬᠤᠷᠠᠭᠠ ᠡᠵᠡᠨ ᠦ᠌ ᠪᠡᠨ ᠬᠠᠢᠷᠠ ᠶ᠋ᠢ ᠬᠤᠪᠢ ᠳᠠᠬᠢᠨ ᠬᠦᠷᠲᠡᠬᠦ ᠪᠣᠯᠤᠯᠠ᠃
ᠴᠡᠴᠡᠭᠮᠡ ᠡᠵᠢ ᠡᠳᠦᠷ ᠪᠦᠷᠢ ᠲᠣᠮᠣ ᠰᠢᠷᠡᠮᠦᠨ ᠲᠣᠭᠣᠭᠠᠨ ᠳ᠋ᠤ᠌ ᠰᠢᠰᠢᠨ ᠭᠤᠯᠢᠷ ᠪᠤᠶᠤ ᠰᠢᠷᠠ ᠪᠤᠳᠠᠭᠠᠨ ᠤ᠋ ᠵᠤᠲᠠᠩ ᠪᠤᠴᠠᠯᠭᠠᠵᠤ ᠪᠠᠷᠢᠭᠠᠳᠠᠠ᠋ᠴᠠ ᠬᠤᠪᠢᠶᠠᠭᠰᠠᠨ ᠰᠦᠨ ᠲᠠᠯᠬᠠ ᠶ᠋ᠢ ᠭᠠᠭᠴᠠ ᠬᠠᠯᠪᠠᠭᠠ ᠬᠣᠯᠢᠵᠤ ᠬᠤᠷᠠᠭᠠ ᠢᠰᠢᠭᠡ ᠪᠡᠨ ᠤᠭᠵᠢᠨᠠ᠃ ᠪᠠᠰᠠ ᠲᠣᠮᠣ ᠬᠣᠨᠢᠨ ᠲᠣᠭᠣᠭᠠᠨ ᠳ᠋ᠤ᠌ ᠦᠬᠡᠷ ᠦ᠋ᠨ ᠶᠠᠰᠤ ᠶ᠋ᠢ ᠪᠠᠯᠪᠠᠴᠢᠨ ᠴᠢᠨᠠᠵᠤ ᠶᠠᠳᠠᠷ ᠳᠣᠷᠣᠢ ᠮᠠᠯ ᠳ᠋ᠠᠭᠠᠨ ᠤᠤᠭᠤᠯᠭᠠᠵᠤ᠂ ᠰᠦ ᠰᠢᠮᠡ ᠶ᠋ᠢ ᠨᠢ ᠰᠠᠢᠵᠢᠷᠠᠭᠤᠯᠬᠤ ᠭᠡᠵᠦ ᠣᠷᠣᠯᠳᠣᠨᠠ᠃ ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠ ᠪᠣᠯ ᠪᠤᠰᠤᠳ ᠲᠥᠯ ᠡᠴᠡ ᠠᠷᠠᠢ ᠪᠠᠬᠠᠨ ᠥᠭᠡᠷᠡ᠃ ᠰᠦᠨ ᠲᠠᠯᠬᠠ ᠶ᠋ᠢ ᠬᠣᠯᠢᠴᠠ ᠦᠭᠡᠢ ᠤᠤᠭᠤᠬᠤ 《ᠣᠨᠴᠠᠭᠠᠢ ᠡᠷᠬᠡ》 ᠲᠡᠢ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠷᠲᠡ ᠬᠥᠷᠥᠪᠡᠵᠢᠵᠦ ᠬᠣᠨᠳᠣᠯᠠᠢ ᠰᠡᠭᠦᠯ ᠨᠢ ᠪᠥᠮᠪᠥᠢᠨ ᠲᠠᠷᠭᠤᠯᠠᠵᠤ ᠬᠥᠭᠡᠷᠦᠬᠦᠨ ᠮᠣᠨᠴᠣᠭᠣᠷ ᠰᠡᠭᠦᠯ ᠢ᠋ᠶ᠋ᠡᠨ ᠰᠠᠵᠢᠯᠠᠨ ᠳᠤᠷᠠᠨ ᠬᠠᠷᠠ ᠨᠢᠳᠦ ᠪᠡᠨ ᠲᠣᠷᠮᠣᠯᠵᠠᠭᠤᠯᠤᠨ ᠰᠢᠷᠠ ᠨᠢᠳᠦᠨ ᠥᠬᠢᠨ ᠲᠡᠢ ᠴᠣᠭ ᠴᠡᠴᠡᠭᠮᠠ ᠡᠵᠢ ᠶ᠋ᠢ ᠪᠣᠷᠪᠢᠳᠠᠨ ᠳᠠᠭᠠᠨᠠ᠃ ᠠᠵᠢᠯᠴᠢ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠯᠪᠡᠭ ᠭᠠᠷᠠ᠋ᠴᠠ ᠰᠦ ᠰᠠᠭᠠᠯᠢ ᠶ᠋ᠢ ᠪᠢᠯᠠᠭᠤᠷᠠᠲᠠᠯᠠ ᠢᠳᠡᠵᠦ ᠥᠰᠦᠭᠰᠡᠨ ᠤᠨᠤᠨ ᠳ᠋ᠤ᠌ ᠥᠨᠥ ᠬᠠᠪᠤᠷ ᠨᠢ ᠤᠷᠢᠳᠤ ᠡᠮᠦᠨᠡ ᠪᠠᠢᠭᠠ ᠦᠭᠡᠢ ᠬᠣᠪᠣᠷ ᠭᠠᠴᠢᠭ ᠵᠢᠯ ᠪᠠᠢᠯᠠ᠃ ᠵᠤᠨ ᠤ᠋ ᠳᠤᠮᠳᠠ ᠰᠠᠷᠠ ᠭᠠᠷᠤᠭᠰᠠᠨ ᠠᠲᠠᠯᠠ ᠰᠢᠨᠡ ᠰᠠᠭᠠᠯᠢ ᠭᠠᠷᠤᠭᠠᠳᠤᠢ᠃ ᠪᠦᠯᠢᠶᠡᠨ ᠬᠠᠯᠠᠭᠤᠨ ᠰᠦ ᠤᠤᠭᠤᠵᠤ᠂ ᠥᠷᠥᠮᠡ ᠲᠡᠢ ᠪᠤᠳᠠᠭᠠ ᠢᠳᠡᠬᠦ ᠶ᠋ᠢ ᠵᠢᠭᠠᠯ ᠤᠨᠤᠨ ᠶᠡᠬᠡᠳᠡ ᠮᠥᠷᠥᠭᠡᠳᠴᠦ ᠪᠠᠢᠯᠠ᠃ ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠ ᠡᠵᠢ ᠶ᠋ᠢᠨ ᠬᠢᠨᠢ ᠭᠠᠷᠠ᠋ᠴᠠ ᠰᠦᠨ ᠲᠠᠯᠬᠠ ᠶ᠋ᠢ ᠵᠠᠪᠠᠵᠢ ᠪᠠᠷ ᠢ᠋ᠶ᠋ᠠᠨ ᠬᠥᠭᠡᠰᠦ ᠰᠠᠬᠠᠷᠠᠭᠤᠯᠤᠨ ᠬᠥᠬᠥᠬᠦ ᠶ᠋ᠢ ᠰᠢᠨᠤᠯᠲᠠᠢ ᠭᠡᠭᠴᠢ ᠬᠠᠷᠠᠭᠠᠳ ᠵᠢᠭᠠᠯ ᠤᠨᠤᠨ ᠤ᠋ ᠠᠷᠠᠭᠠᠨ ᠤ᠋ ᠬᠢᠨᠢ ᠰᠢᠯᠦᠰᠦ ᠬᠤᠷᠠᠨᠠ᠃ ᠲᠡᠭᠡᠭᠡᠳ᠄
— ᠡᠵᠢ ᠠ᠋ ᠭᠡᠵᠦ ᠠᠶᠠᠷᠬᠠᠨ ᠳᠠᠭᠤᠳᠠᠪᠠ᠃
— ᠶᠠᠭᠤ ᠬᠡ ᠪᠣᠢ? ᠮᠢᠨᠦ ᠥᠬᠢᠨ!
— ᠰᠦᠨ ᠲᠠᠯᠬᠠ ᠡᠴᠡ ᠪᠡᠨ ᠨᠠᠳᠠ ᠨᠢᠭᠡ ᠬᠠᠯᠪᠠᠭᠠ ᠥᠭᠭᠦᠭᠡᠴᠢ!
— ᠦ᠂ ᠮᠢᠨᠦ ᠥᠬᠢᠨ! ᠪᠣᠯᠬᠤ ᠦᠭᠡᠢ ᠰᠢᠦ᠂ ᠡᠨᠡ ᠴᠢᠨᠢ ᠬᠠᠮᠲᠤ ᠶ᠋ᠢᠨ ᠶᠠᠭᠤᠮᠠ᠂ ᠡᠵᠢ ᠨᠢ ᠵᠤᠲᠠᠩ ᠲᠠᠢ ᠬᠣᠯᠢᠵᠤ ᠢᠰᠢᠭᠡ ᠬᠤᠷᠠᠭᠠ ᠪᠠᠨ ᠤᠭᠵᠢᠵᠤ ᠪᠠᠢᠭᠠ ᠰᠢᠳᠡ᠃ ᠬᠥᠭᠡᠷᠦᠬᠦᠨ ᠢᠰᠢᠭᠡ ᠬᠤᠷᠠᠭᠠ ᠨᠤᠭᠤᠳ ᠨᠢ ᠥᠯᠪᠡᠷᠦᠭᠡᠳ ᠦᠬᠦᠴᠢᠬᠡᠪᠡᠯ ᠬᠠᠢᠷᠠᠨ ᠪᠢᠰᠢ ᠤᠤ? ᠡᠵᠢ ᠨᠢ ᠴᠢᠮᠠ ᠳ᠋ᠤ᠌ ᠥᠭᠡᠬᠦᠨ ᠳ᠋ᠦ᠍ ᠶᠤᠤᠮᠠᠢ ᠶ᠋ᠢᠨ ᠭᠤᠯᠢᠷ ᠬᠠᠭᠤᠷᠴᠤ ᠥᠭᠭᠦᠶᠡ᠃
— ᠡᠵᠢ ᠠ᠋᠂ ᠪᠢ ᠳᠠᠬᠢᠭᠠᠳ ᠲᠠᠯᠬᠠᠨ ᠰᠦ ᠤᠤᠭᠤᠶᠠ ᠭᠡᠵᠦ ᠬᠡᠯᠡᠬᠦ ᠦᠭᠡᠢ ᠃ ᠡᠵᠢ ᠨᠢ ᠥᠬᠢᠨ ᠢ᠋ᠶ᠋ᠡᠨ ᠦᠷᠦ ᠡᠪᠡᠳᠦᠨ᠂ ᠡᠩᠬᠦᠷᠡᠢᠯᠡᠨ ᠦᠨᠦᠰᠦᠭᠡᠳ᠂ ᠲᠤᠩ ᠱᠠᠯᠠᠮᠠᠭᠠᠢ ᠬᠥᠳᠡᠯᠵᠦ ᠲᠣᠭᠣᠭᠠᠨ ᠳ᠋ᠠᠭᠠᠨ ᠰᠡᠮᠡᠵᠡᠨ ᠥᠭᠡᠬᠦ ᠬᠥᠰᠬᠥᠯᠡᠨ ᠶᠤᠤᠮᠠᠢ ᠶ᠋ᠢᠨ ᠭᠤᠯᠢᠷ ᠬᠠᠭᠤᠷᠴᠤ ᠪᠥᠮᠪᠥᠭᠡᠯᠡᠭᠡᠳ ᠬᠤᠷᠤᠳ ᠤ᠋ᠨ ᠬᠡᠪ ᠲᠦ᠍ ᠳᠠᠷᠤᠵᠤ ᠭᠠᠷᠭᠠᠭᠠᠳ ᠥᠬᠢᠨ ᠳ᠋ᠡᠭᠡᠨ ᠠᠳᠬᠤᠭᠤᠯᠪᠠ᠃ ᠤᠨᠤᠨ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠢᠵᠦ ᠥᠭᠭᠦᠭᠰᠡᠨ ᠰᠠᠷᠠᠨ ᠪᠣᠣᠪᠣ ᠶ᠋ᠢ ᠠᠮᠲᠠᠷᠬᠠᠨ ᠢᠳᠡᠵᠦ᠂ ᠪᠤᠷᠭᠠᠰᠤᠨ ᠮᠣᠷᠢ ᠪᠠᠨ ᠵᠠᠢᠳᠠᠯᠠᠨ ᠬᠤᠷᠠᠭᠠ ᠲᠠᠢ ᠬᠣᠨᠢ ᠡᠷᠭᠢᠭᠦᠯᠬᠦ ᠪᠡᠷ《ᠳᠠᠪᠬᠢᠭᠤᠯᠪᠠ》᠃ ᠪᠤᠲᠠᠷᠠᠬᠤ ᠲᠣᠭᠣᠰᠣᠨ ᠳ᠋ᠤᠨᠢ ᠰᠢᠷᠢᠮᠡᠯ ᠤᠯᠠ ᠲᠠᠢ ᠭᠤᠲᠤᠯ ᠤ᠋ᠨ ᠬᠢᠨ ᠥᠰᠥᠭᠡᠢ ᠭᠢᠯᠠᠯᠵᠠᠨ ᠬᠠᠷᠠᠭᠳᠠᠨᠠ᠃ ᠵᠢᠭᠠᠯ ᠤᠨᠤᠨ ᠬᠤᠷᠠᠭᠠ ᠲᠤᠭᠤᠯ ᠬᠠᠷᠢᠭᠤᠯᠵᠤ᠂ ᠬᠥᠳᠡᠭᠡ ᠬᠡᠭᠡᠷᠡ ᠪᠡᠷ ᠡᠷᠬᠡ ᠴᠢᠯᠥᠭᠡ ᠲᠡᠢ ᠲᠣᠭᠯᠠᠨᠠ᠃ ᠤᠨᠤᠨ ᠳᠥᠩᠭᠡᠵᠦ ᠲᠠᠪᠤᠨ ᠨᠠᠰᠤ ᠢᠯᠡᠭᠦᠦ ᠲᠡᠢ ᠪᠣᠯᠪᠠᠴᠤ ᠠᠯᠢᠶᠠ ᠳᠡᠭᠵᠢᠨ᠂ ᠵᠣᠷᠢᠭ ᠵᠢᠷᠦᠬᠡ ᠲᠡᠢ᠂ ᠬᠡᠯᠡᠮᠡᠭᠡᠢ ᠬᠤᠷᠴᠠ ᠭᠡᠳᠡᠭ ᠨᠢ ᠪᠡᠷᠬᠡ᠃ ᠠᠢᠯ ᠤ᠋ᠳ ᠵᠤᠰᠠᠭᠠᠯ ᠳ᠋ᠠᠭᠠᠨ ᠭᠠᠷᠴᠤ᠂ ᠪᠡᠪᠤᠤ ᠭᠤᠸᠠᠢ ᠶ᠋ᠢᠨ ᠬᠢ ᠰᠢᠷᠠ ᠳᠠᠵᠢᠳ ᠭᠤᠸᠠᠢ ᠲᠠᠢ ᠠᠢᠯ ᠬᠣᠲᠠ ᠪᠠᠭᠤᠪᠠ᠃ ᠪᠠᠪᠤᠤ ᠭᠤᠸᠠᠢ ᠶ᠋ᠢᠨ ᠬᠢ ᠬᠣᠨᠢ ᠪᠠᠵᠠᠭᠠᠵᠣ ᠰᠢᠨᠡ ᠱᠥᠯᠥ ᠤᠤᠭᠤᠬᠤ ᠪᠣᠯᠵᠤ᠂ ᠰᠠᠭᠠᠬᠠᠯᠲᠠ ᠳ᠋ᠠᠭᠠᠨ ᠬᠤᠪᠢ ᠢᠳᠡᠭᠡ ᠪᠡᠨ ᠵᠢᠵᠢᠭᠬᠡᠨ ᠭᠠᠤᠯᠢᠨ ᠲᠠᠪᠠᠭ ᠲᠤ᠌ ᠬᠢᠵᠦ ᠥᠬᠢᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠦᠷᠭᠡᠭᠦᠯᠦᠨᠡ᠃ ᠬᠣᠶᠠᠷ ᠠᠭᠠᠰᠢ ᠲᠠᠢ ᠬᠡᠳᠡᠷ ᠶᠠᠬᠢᠷ ᠠᠷᠠᠨᠰᠢᠨ ᠲᠠᠢ ᠰᠢᠷᠠ ᠳᠠᠵᠢᠳ ᠭᠤᠸᠠᠢ ᠳ᠋ᠤ᠌ ᠤᠨᠤᠨ ᠪᠠᠬᠠᠨ ᠳᠠᠭᠠ ᠦᠭᠡᠢ᠃ ᠦᠷᠭᠦᠯᠵᠢ ᠥᠪᠡᠷ ᠢ᠋ ᠨᠢ ᠵᠠᠩᠳᠠᠴᠢᠨ ᠵᠠᠩᠨᠠᠳᠠᠭ ᠪᠣᠯᠤᠭᠠᠳ ᠲᠡᠷᠡ ᠪᠢᠵᠡ᠃ ᠭᠡᠪᠡᠴᠦ ᠠᠢᠯ ᠳ᠋ᠤ᠌ ᠬᠤᠪᠢ ᠢᠳᠡᠭᠡ ᠬᠦᠷᠭᠡᠪᠡᠯ ᠬᠠᠷᠢᠭᠤ ᠳ᠋ᠤᠨᠢ ᠭᠠᠭᠴᠠ ᠰᠢᠷᠬᠡᠭ ᠰᠢᠬᠢᠷ ᠪᠤᠶᠤ ᠶᠣᠣᠲᠠᠩ ᠣᠯᠳᠠᠭ ᠤᠴᠢᠷ ᠤᠨᠤᠨ ᠭᠠᠤᠯᠢᠨ ᠫᠢᠯᠠ ᠲᠠᠢ ᠬᠤᠪᠢ ᠢᠳᠡᠭᠡ ᠶ᠋ᠢ ᠶᠡᠬᠡᠯᠡ ᠪᠣᠯᠭᠣᠮᠵᠢᠯᠠᠨ ᠪᠠᠢᠵᠤ ᠠᠪᠠᠴᠢᠵᠤ ᠥᠭᠪᠡ᠃ ᠳᠠᠵᠢᠳ ᠭᠤᠸᠠᠢ ᠬᠤᠪᠢ ᠢᠳᠡᠭᠡ ᠶ᠋ᠢ ᠲᠣᠰᠴᠤ ᠠᠪᠤᠭᠠᠳ ᠫᠢᠯᠠ ᠶ᠋ᠢ ᠨᠢ ᠶᠡᠭᠦᠯᠡᠵᠦ ᠥᠭᠭᠦᠮᠡᠭᠴᠡ ᠪᠡᠨ ᠴᠠᠭᠠᠰᠢ ᠬᠠᠨᠳᠤᠨ ᠣᠭᠲᠣᠯᠤᠨ ᠡᠮᠬᠦᠯᠡᠨᠡ᠃ ᠵᠢᠭᠠᠯ ᠤᠨᠤᠨ ᠠᠷᠭᠠᠯ ᠤ᠋ᠨ ᠳᠠᠩ（ᠠᠷᠭᠠᠯ ᠤ᠋ᠨ ᠬᠠᠢᠷᠴᠠᠭ） ᠤ᠋ᠨ ᠬᠢᠨᠢ ᠳᠡᠷᠭᠡᠳᠡ ᠫᠢᠯᠠ ᠪᠠᠨ ᠪᠠᠷᠢᠭᠠᠳ ᠵᠣᠭᠰᠣᠭᠠᠳ ᠪᠠᠢᠵᠠᠢ᠃ ᠳᠠᠵᠢᠳ ᠭᠤᠸᠠᠢ ᠵᠢᠭᠠᠯ ᠤᠨᠤᠨ ᠪᠠᠰᠠ ᠶᠠᠪᠤᠭᠠ ᠦᠭᠡᠢ ᠪᠠᠢᠭᠠ ᠶ᠋ᠢ ᠬᠠᠷᠠᠭᠠᠳ ᠡᠷᠭᠢᠨᠡᠭ ᠳᠡᠭᠡᠷᠡᠬᠢ ᠴᠠᠭᠠᠨ ᠢᠳᠡᠭᠡᠨ ᠦ᠌ ᠲᠠᠪᠠᠭ ᠠ᠋ᠴᠠ ᠨᠢᠭᠡ ᠬᠡᠰᠡᠭ ᠬᠠᠲᠠᠭᠰᠠᠨ ᠬᠤᠷᠤᠳ ᠠᠪᠴᠤ ᠫᠢᠯᠠ ᠳ᠋ᠤᠨᠢ ᠰᠢᠳᠡᠯᠡ᠃ ᠭᠠᠤᠯᠢᠨ ᠫᠢᠯᠠ 《ᠲᠠᠩᠭᠠᠷ》 ᠭᠡᠵᠦ ᠳᠤᠤᠭᠠᠷᠬᠤ ᠳ᠋ᠤ᠌ ᠵᠢᠭᠠᠯ ᠤᠨᠤᠨ ᠵᠣᠪᠬᠢᠨ ᠳ᠋ᠠᠭᠠᠨ ᠢᠨᠢᠶᠡᠳᠦ ᠬᠤᠷᠠᠭᠰᠠᠨ ᠬᠠᠷᠠᠴᠠ ᠪᠠᠷ ᠠᠰ ᠰᠢᠷᠳᠡᠵᠦ᠂
— ᠭᠠᠷ ᠢ᠋ᠶ᠋ᠠᠷ ᠠᠪᠤᠭᠠᠳ ᠬᠥᠯ ᠢ᠋ᠶ᠋ᠡᠷ ᠥᠭᠭᠦᠨᠡ ᠭᠡᠭᠴᠢ ᠡᠨᠡ ᠶ᠋ᠢ ᠯᠡ ᠬᠡᠯᠡᠳᠡᠭ ᠪᠠᠢᠬᠠ ᠳᠠ ᠭᠡᠴᠢᠬᠡᠭᠡᠳ ᠭᠣᠳ ᠭᠠᠷᠴᠤ ᠭᠦᠶᠦᠪᠡ᠃ ᠰᠢᠷᠠ ᠳᠠᠵᠢᠳ ᠭᠤᠸᠠᠢ ᠶᠠᠭᠤ ᠬᠡᠯᠡᠬᠦ ᠪᠡᠨ ᠣᠯᠬᠤ ᠦᠭᠡᠢ ᠬᠡᠰᠡᠭ ᠲᠠᠭᠯᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠤᠳᠠᠯ ᠦᠭᠡᠢ ᠠᠷᠤᠠ᠋ᠴᠠ ᠨᠢ ᠢᠷᠡᠵᠦ ᠠᠪᠤ ᠡᠵᠢ ᠳ᠋ᠦ᠍ᠨᠢ ᠬᠣᠪ ᠪᠠᠷᠢᠬᠤ ᠨᠢ ᠲᠡᠷᠡ᠃ ᠴᠡᠴᠡᠭᠮᠡ ᠪᠠᠪᠤᠤ ᠬᠣᠶᠠᠷ ᠳᠠᠵᠢᠳ ᠭᠤᠸᠠᠢ ᠶ᠋ᠢᠨ ᠳᠡᠷᠭᠡᠳᠡ
— ᠮᠢᠨᠦ ᠥᠬᠢᠨ ᠠᠬᠠᠮᠠᠳ ᠲᠣᠮᠣᠴᠤᠤᠯ ᠤ᠋ᠨ ᠥᠭᠡᠳᠡ ᠡᠴᠡ ᠪᠢᠲᠡᠭᠡᠢ ᠦᠭᠡ ᠬᠠᠷᠢᠭᠤᠴᠠᠵᠤ ᠪᠠᠢ ᠭᠡᠵᠦ ᠵᠢᠮᠡᠯᠡᠬᠦ ᠮᠠᠶᠢᠭ ᠭᠠᠷᠭᠠᠭᠰᠠᠨ ᠴᠤ᠌ ᠶᠠᠪᠤᠭᠰᠠᠨ ᠬᠣᠢᠨᠠ ᠨᠢ ᠢᠨᠢᠶᠡᠯᠴᠡᠵᠦ
— ᠬᠣᠷᠭᠣᠰᠤ ᠪᠠᠨ ᠳᠡᠷᠡᠰᠦᠨ ᠳ᠋ᠦ᠍ ᠬᠠᠲᠠᠭᠠᠭᠰᠠᠨ ᠮᠣᠨᠳᠢ ᠴᠢᠨᠢ᠂ ᠬᠡᠦᠬᠡᠳ ᠲᠦ᠍ ᠭᠠᠭᠴᠠ ᠰᠢᠷᠬᠡᠭ ᠰᠢᠬᠢᠷ ᠥᠭᠬᠦ ᠦᠭᠡᠢ ᠪᠠᠢᠭᠠᠳ ᠠᠷᠤᠠ᠋ᠴᠠ ᠨᠢ ᠪᠠᠰᠠ ᠬᠣᠪᠯᠠᠵᠤ ᠢᠷᠡᠬᠦ ᠳ᠋ᠡᠭᠡᠨ ᠶᠠᠭᠠᠬᠢᠳᠠᠭ ᠶᠤᠮ ᠭᠡᠵᠦ ᠳᠤᠷᠠ ᠦᠭᠡᠢᠴᠡᠵᠦ ᠪᠠᠢᠯᠠ᠃ ᠤᠨᠤᠨ ᠲᠤᠩ ᠠᠯᠢᠶᠠ᠂ ᠬᠤᠷᠴᠠ ᠰᠡᠷᠭᠦᠯᠡᠩ ᠬᠡᠦᠬᠡᠳ ᠪᠣᠯᠤᠭᠠᠳ ᠲᠡᠷᠡ ᠤᠤ ᠂ ᠲᠣᠮᠣᠴᠤᠤᠯ ᠠ᠋ᠴᠠ ᠲᠡᠳᠦᠢ ᠯᠡ ᠠᠶᠤᠵᠤ ᠰᠢᠷᠪᠡᠭᠡᠲᠦᠬᠦ ᠶ᠋ᠢ ᠮᠡᠳᠡᠳᠡᠭ ᠦᠭᠡᠢ᠃ ᠬᠡᠵᠢᠶᠡᠳᠡ ᠬᠥᠮᠦᠨ ᠦ᠌ ᠨᠢᠳᠦ ᠶ᠋ᠢ ᠠᠰᠯᠠᠵᠤ ᠬᠠᠷᠠᠭᠠᠳ ᠦᠭᠡ ᠶᠠᠷᠢᠨᠠ᠃ ᠲᠣᠮᠣᠴᠤᠤᠯ ᠤ᠋ᠨ ᠦᠢᠯᠡ ᠬᠥᠳᠡᠯᠦᠯ᠂ ᠦᠭᠡ ᠶᠠᠷᠢᠶᠠ ᠶ᠋ᠢ ᠶᠡᠬᠡᠯᠡ ᠠᠩᠬᠠᠷᠴᠤ ᠰᠢᠨᠵᠢᠨᠡ᠃ ᠲᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠤᠷᠢᠶᠠᠵᠤ ᠠᠯᠢᠶᠠᠷᠬᠠᠨᠠ᠃ ᠲᠡᠷᠡ ᠮᠡᠳᠡᠭᠡ ᠣᠷᠣᠭᠰᠠᠨ ᠴᠠᠭᠠ᠋ᠴᠠ ᠪᠠᠨ ᠠᠪᠤᠭᠠᠳ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠣᠯᠠᠨ ᠲᠡᠵᠢᠭᠡᠪᠦᠷᠢ ᠠᠮᠢᠲᠠᠳ ᠲᠠᠢ ᠲᠣᠭᠯᠠᠵᠤ ᠥᠰᠴᠡᠢ᠃ ᠵᠢᠷᠭᠢᠭᠡ ᠨᠡᠷᠡᠲᠡᠢ ᠠᠩᠴᠢ ᠲᠠᠢᠭᠠ᠂ ᠤᠨᠠᠭᠠ᠂ ᠪᠣᠲᠣᠭᠣ᠂ ᠲᠤᠭᠤᠯ᠂ ᠪᠢᠷᠠᠭᠤ᠂ ᠢᠰᠢᠭᠡ᠂ ᠬᠤᠷᠠᠭᠠ᠂ ᠵᠡᠭᠡᠷᠡ ᠢᠨᠵᠠᠭᠠ ᠭᠡᠳ ᠪᠠᠢᠬᠤ ᠯᠠ ᠪᠤᠶᠠᠨ ᠃ ᠥᠨᠥᠴᠢᠨ ᠬᠤᠷᠠᠭᠠ ᠬᠠᠷᠠ ᠨᠢᠳᠦᠨ ᠲᠡᠢ ᠪᠣᠯ ᠪᠦᠷ ᠴᠦ᠍ ᠢᠵᠢᠯᠢᠳᠦᠨ ᠳᠠᠰᠴᠠᠢ᠃ ᠡᠳᠦᠷᠵᠢᠨ ᠬᠠᠮᠲᠤ ᠲᠣᠭᠯᠠᠨᠠ᠃ ᠣᠷᠣᠢ ᠤᠨᠤᠨ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠡᠯᠢᠭᠡᠨ ᠳ᠋ᠦ᠍ ᠨᠠᠭᠠᠯᠳᠤᠨ ᠤᠨᠲᠠᠨᠠ᠃ ᠬᠠᠷᠠ ᠨᠢᠳᠦᠨ ᠨᠢᠷᠤᠭᠤᠨ ᠳ᠋ᠤᠨᠢ ᠨᠠᠯᠠᠵᠤ ᠤᠨᠲᠠᠨᠠ᠃ ᠪᠠᠪᠤᠤ ᠭᠤᠸᠠᠢ ᠭᠠᠳᠠᠭᠰᠢ ᠶᠠᠪᠤᠭᠠᠳ ᠬᠠᠷᠢᠵᠤ ᠢᠷᠡᠪᠡᠯ ᠬᠠᠮᠤᠭ ᠤ᠋ᠨ ᠲᠡᠷᠢᠭᠦᠨ ᠳ᠋ᠦ᠍
— ᠰᠢᠷᠠ ᠨᠢᠳᠦᠨ ᠥᠬᠢᠨ᠂ ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠ ᠬᠣᠶᠠᠷ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ ᠠᠰᠠᠭᠤᠨᠠ᠃ ᠬᠠᠪᠤᠷ ᠥᠩᠭᠡᠷᠡᠵᠦ ᠥᠩᠰᠡᠭ ᠰᠠᠢᠬᠠᠨ ᠵᠤᠨ ᠤ᠋ ᠤᠯᠠᠷᠢᠯ ᠦᠷᠭᠦᠯᠵᠢᠯᠡᠵᠦ᠂ ᠬᠤᠷᠠ ᠪᠣᠷᠣᠭᠠᠨ ᠡᠯᠪᠡᠭ ᠪᠣᠯᠬᠣᠷ ᠲᠠᠯᠠ ᠪᠠᠷ ᠳᠦᠭᠦᠷᠡᠩ ᠳᠠᠭᠠᠨᠠ ᠮᠠᠩᠭᠢᠷ ᠬᠠᠯᠢᠭᠤᠷᠠᠨ ᠠᠢᠯ ᠤ᠋ᠳ ᠭᠡᠭᠦᠦ ᠪᠠᠷᠢᠵᠤ᠂ ᠠᠢᠷᠠᠭ ᠴᠡᠬᠡ ᠱᠤᠤᠭᠢᠨ ᠠᠶᠠ ᠳᠠᠭᠤᠤ ᠬᠠᠩᠭᠢᠨᠠᠨᠠ᠃ ᠪᠠᠪᠤᠤ ᠴᠡᠴᠡᠭᠮᠠ ᠬᠣᠶᠠᠷ ᠲᠥᠯ ᠮᠠᠯ ᠢ᠋ᠶ᠋ᠠᠨ ᠵᠠᠭᠤᠨ ᠤ᠋ ᠵᠠᠭᠤ ᠪᠠᠷ ᠲᠤᠰᠤᠭᠰᠠᠨ ᠲᠡᠳᠦᠢ ᠦᠭᠡᠢ᠂ ᠳᠡᠭᠡᠷᠡ ᠡᠴᠡ ᠨᠢ ᠢᠰᠢᠭᠡᠨ ᠦ᠌ ᠢᠰᠢᠭᠡ᠂ ᠬᠤᠷᠠᠭᠠᠨ ᠤ᠋ ᠬᠤᠷᠠᠭᠠ᠂ ᠢᠬᠡᠷᠡ ᠶ᠋ᠢᠨ ᠥᠷᠥᠭᠡᠰᠦᠨ ᠭᠡᠳ ᠢᠯᠡᠭᠦᠴᠡ ᠪᠠᠬᠠᠨ ᠢ᠋ ᠥᠰᠬᠡᠵᠦ᠂ ᠨᠡᠢᠲᠡ ᠳ᠋ᠦ᠍ ᠨᠡᠮᠡᠷᠢᠯᠡᠵᠡᠢ᠃《ᠲᠡᠷᠢᠭᠦᠨ ᠦ᠌ ᠮᠠᠯᠴᠢᠨ》᠂ 《ᠬᠥᠳᠡᠯᠮᠦᠷᠢ ᠶ᠋ᠢᠨ ᠵᠢᠱ᠌ᠢᠶᠡᠴᠢ 》 ᠭᠡᠰᠡᠨ ᠠᠪᠤ ᠡᠵᠢ ᠶ᠋ᠢᠨ ᠬᠢᠨᠢ ᠨᠡᠷᠡ ᠲᠡᠢ ᠦᠨᠡᠮᠯᠡᠯ ᠬᠥᠬᠢᠭᠦᠯᠦᠯ ᠬᠠᠨᠠᠨ ᠲᠣᠯᠣᠭᠠᠢ ᠳ᠋ᠤᠨᠢ ᠨᠡᠮᠡᠭᠳᠡᠬᠦ ᠳ᠋ᠦ᠍ ᠤᠨᠤᠨ ᠭᠠᠷ ᠤ᠋ᠨ ᠬᠢᠨᠢ ᠬᠤᠷᠤᠭᠤ ᠨᠡᠮᠡᠭᠳᠡᠬᠦ ᠰᠢᠭ ᠲᠣᠭᠠᠯᠠᠭᠰᠠᠭᠠᠷ ᠪᠠᠢᠯᠠ᠃ ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠ ᠪᠦᠳᠦᠭᠦᠨ ᠰᠡᠭᠦᠯ ᠲᠡᠢ ᠲᠠᠷᠭᠤᠨ ᠵᠣ ᠲᠠᠢ ᠲᠣᠮᠣ ᠬᠣᠨᠢ ᠪᠣᠯᠵᠤ᠂ ᠲᠦᠮᠡᠨ ᠬᠣᠨᠢᠨ ᠤ᠋ ᠲᠦᠷᠦᠭᠦᠦ ᠲᠦᠨᠲᠦᠭᠦᠷ ᠴᠠᠭᠠᠨ ᠬᠤᠴᠠ ᠮᠢᠩᠭᠠᠨ ᠬᠣᠨᠢᠨ ᠤ᠋ ᠲᠦᠷᠦᠭᠦᠦ ᠮᠢᠨᠳᠠᠰᠤᠨ ᠴᠠᠭᠠᠨ ᠬᠤᠴᠠ ᠦᠷᠡ ᠲᠥᠯ ᠴᠢᠨᠢ ᠥᠯᠥᠩ ᠡᠪᠡᠰᠦ ᠰᠢᠭ ᠣᠯᠠᠨ ᠪᠣᠯ ᠠ᠋ ᠭᠡᠵᠦ ᠢᠷᠦᠭᠡᠯᠭᠡᠭᠡᠳ ᠬᠤᠴᠠ ᠪᠣᠯᠵᠤ ᠰᠦᠷᠦᠭ ᠳᠠᠭᠠᠨᠠ᠃ ᠣᠨ ᠵᠢᠯ ᠡᠭᠡᠯᠵᠢᠯᠡᠨ ᠡᠭᠡᠯᠵᠢᠭᠰᠡᠭᠡᠷ᠂ ᠬᠠᠷᠠ ᠨᠢᠳᠦᠨ ᠬᠤᠷᠠᠭᠠᠨ ᠤ᠋ ᠲᠥᠯ ᠦᠷᠡᠵᠢᠭᠰᠡᠭᠡᠷ᠂ ᠤᠨᠤᠨ ᠥᠬᠢᠨ ᠥᠰᠦᠭᠰᠡᠭᠡᠷ᠃᠂ ᠳᠣᠯᠣᠭᠠᠨ ᠨᠠᠰᠤᠨ ᠤ᠋ ᠬᠢᠨᠢ ᠣᠢ ᠶ᠋ᠢ ᠲᠡᠮᠳᠡᠭᠯᠡᠭᠰᠡᠨ ᠲᠡᠷᠡ ᠨᠠᠮᠤᠷ ᠲᠡᠳᠡᠨ ᠦ᠌ ᠳ᠋ᠦ᠍ ᠰᠤᠮᠤᠨ ᠲᠥᠪ ᠡᠴᠡ ᠨᠢᠭᠡ ᠵᠣᠴᠢᠨ ᠢᠷᠡᠯᠡ᠃ ᠳᠤᠮᠳᠠ ᠶ᠋ᠢᠨ ᠨᠠᠮᠬᠠᠨ ᠪᠡᠶᠡ ᠲᠡᠢ᠂ ᠰᠢᠷᠦᠭᠦᠨ ᠬᠠᠷᠠᠴᠠ ᠲᠠᠢ ᠲᠣᠮᠣ ᠨᠢᠳᠦ ᠲᠡᠢ᠂ ᠢᠷᠠᠯᠵᠠᠭᠰᠠᠨ ᠥᠷᠭᠡᠨ ᠰᠢᠲᠦ ᠲᠡᠢ᠂ ᠺᠠᠲ᠌ᠷ ᠬᠤᠪᠴᠠᠰᠤ ᠲᠠᠢ᠂ ᠨᠡᠭᠡᠭᠡᠪᠴᠢ ᠳᠡᠭᠡᠷᠡ ᠪᠡᠨ ᠤᠯᠠᠭᠠᠨ ᠣᠳᠣ ᠲᠠᠢ ᠴᠡᠷᠢᠭ ᠦ᠋ᠨ ᠨᠣᠭᠣᠭᠠᠨ ᠪᠣᠭᠴᠣ ᠵᠥᠷᠢᠭᠦᠯᠦᠨ ᠡᠭᠦᠷᠦᠭᠰᠡᠨ ᠬᠥᠮᠦᠨ᠃ ᠤᠨᠤᠨ ᠲᠡᠷᠡ ᠬᠥᠮᠦᠨ ᠢ᠋ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠬᠠᠷᠠᠵᠤ᠂ ᠴᠡᠷᠢᠭ ᠦ᠋ᠨ ᠨᠣᠭᠣᠭᠠᠨ ᠪᠣᠭᠴᠣ ᠶ᠋ᠢ ᠨᠢ ᠤᠴᠢᠷ ᠦᠭᠡᠢ ᠱᠣᠬᠣᠭᠣᠷᠬᠠᠨᠠ᠃ ᠢᠷᠡᠭᠰᠡᠨ ᠵᠣᠴᠢᠨ ᠬᠠᠵᠠᠭᠤ ᠳ᠋ᠤᠨᠢ ᠰᠠᠭᠤᠭᠠᠳ ᠥᠪᠡᠷ ᠢ᠋ ᠨᠢ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠳᠡᠬᠦ ᠵᠢᠭᠠᠯ ᠥᠬᠢᠨ ᠢ᠋ ᠥᠬᠥᠭᠡᠷᠳᠡᠨ᠄
— ᠨᠡᠷᠡ ᠴᠢᠨᠢ ᠬᠡᠨ ᠭᠡᠳᠡᠭ ᠪᠣᠢ?
— ᠤᠨᠤᠨ᠃
— ᠬᠡᠳᠦᠨ ᠨᠠᠰᠤᠲᠠᠢ ᠪᠣᠢ?
— ᠳᠣᠯᠣᠭᠠᠲᠠᠢ᠃
— ᠶᠠᠭᠤᠨ ᠳ᠋ᠤ᠌ ᠨᠠᠮᠠᠶ᠋ᠢ ᠲᠡᠭᠡᠲᠡᠯᠡ ᠪᠡᠨ ᠬᠠᠷᠠᠭᠠᠳ ᠪᠠᠢᠭᠰᠠᠨ ᠶᠤᠮ?
— ᠺᠠᠲ᠌ᠷ ᠬᠥᠮᠦᠨ ᠶᠠᠮᠠᠷ ᠪᠠᠢᠳᠠᠭ ᠢ᠋ ᠬᠠᠷᠠᠶᠠ ᠭᠡᠰᠡᠨ ᠶᠦᠮ᠃ ᠵᠣᠴᠢᠨ ᠤᠴᠢᠷ ᠦᠭᠡᠢ ᠶᠡᠬᠡ ᠬᠠᠳᠠᠭᠠᠨᠠᠨ ᠢᠨᠢᠶᠡᠭᠡᠳ
— ᠴᠣᠪᠣᠭᠣ ᠥᠬᠢᠨ ᠪᠠᠢᠨᠠ᠂ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠠᠭᠤᠨᠠ ᠤᠤ?
— ᠲᠡᠷᠡ ᠴᠢᠨᠢ ᠶᠠᠭᠤ ᠬᠢᠳᠡᠭ ᠭᠠᠵᠠᠷ ᠶᠤᠮ ᠪᠣᠢ?
— ᠨᠣᠮ ᠰᠤᠷᠳᠠᠭ ᠭᠠᠵᠠᠷ᠃
— ᠣᠴᠢᠨᠠ ᠠ᠋᠂ ᠤᠷᠢᠳ ᠢ᠋ᠶ᠋ᠠᠷ ᠲᠠᠨ ᠤ᠋ ᠪᠣᠭᠴᠣ ᠶ᠋ᠢ ᠴᠢᠨᠢ ᠦᠵᠡᠪᠡᠯ ᠪᠣᠯᠬᠤ ᠤᠤ? ᠭᠡᠵᠦ ᠤᠨᠤᠨ ᠭᠢᠯᠠᠯᠵᠠᠭᠰᠠᠨ ᠰᠢᠷᠠ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠵᠣᠴᠢᠨ ᠢ᠋ ᠴᠣᠭᠣ ᠰᠢᠷᠳᠡᠨᠡ᠃ ᠵᠣᠴᠢᠨ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠵᠤ᠄
— ᠬᠡᠦᠬᠡᠳ ᠬᠥᠮᠦᠨ ᠪᠠᠷᠢᠵᠤ ᠪᠣᠯᠳᠠᠭ ᠦᠭᠡᠢ ᠶᠦᠮ ᠭᠡᠪᠡ᠃
— ᠲᠡᠭᠡᠭᠡᠳ ᠶᠠᠮᠠᠷ ᠬᠥᠮᠦᠨ ᠪᠠᠷᠢᠵᠤ ᠪᠣᠯᠳᠠᠭ ᠪᠣᠢ?
— ᠦ ᠂ ᠪᠢᠴᠢᠭ ᠨᠣᠮ ᠮᠡᠳᠡᠳᠡᠭ ᠰᠡᠬᠡᠭᠡᠲᠡᠨ ᠬᠥᠮᠦᠨ ᠯᠡ ᠪᠠᠷᠢᠵᠤ ᠪᠣᠯᠳᠠᠭ ᠶᠤᠮ᠃
— ᠲᠠ ᠲᠡᠭᠡᠭᠡᠳ ᠰᠡᠬᠡᠭᠡᠲᠡᠨ ᠶᠦᠮ ᠤᠤ ? ᠲᠡᠢᠮᠦ ᠰᠢᠦ ᠃ ᠤᠨᠤᠨ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠯ ᠦᠭᠡᠢ ᠭᠠᠷᠴᠤ ᠶᠠᠪᠤᠯᠠ᠃ ᠲᠡᠳᠡᠨ ᠦ᠌ ᠳ᠋ᠦ᠍ ᠢᠷᠡᠭᠰᠡᠨ ᠵᠣᠴᠢᠨ ᠨᠡᠯᠢᠶᠡᠳ ᠤᠳᠠᠭᠠᠳ ᠮᠣᠷᠳᠠᠯᠠ᠃ ᠤᠨᠤᠨ ᠶᠠᠭᠠᠷᠠᠨ ᠭᠡᠷ ᠲᠡᠭᠡᠨ ᠣᠷᠣᠵᠤ᠄
— ᠡᠵᠢ ᠠ᠋᠂ ᠲᠠ ᠨᠠᠳᠠ ᠨᠥᠭᠦᠭᠡ ᠺᠠᠲ᠌ᠷ ᠤ᠋ᠨ ᠬᠢ ᠲᠡᠢ ᠡᠭᠡᠭᠡ ᠠᠳᠠᠯᠢᠬᠠᠨ ᠪᠣᠭᠴᠣ ᠣᠶᠣᠭᠠᠳ ᠠᠯᠢ! ᠭᠡᠪᠡ᠃ ᠡᠵᠢ ᠨᠢ ᠥᠬᠢᠨ ᠦ᠌ ᠪᠡᠨ ᠵᠥᠭᠡᠯᠡᠨ ᠬᠠᠯᠢᠭᠤᠨ ᠦᠰᠦ ᠲᠡᠢ ᠪᠥᠨᠲᠥᠭᠡᠷ ᠲᠣᠯᠣᠭᠠᠢ ᠶ᠋ᠢ ᠨᠢ ᠦᠨᠦᠷᠯᠡᠨ ᠦᠨᠦᠰᠦᠭᠡᠳ ᠥᠨᠥᠳᠥᠷ ᠦ᠋ᠨ ᠢᠷᠡᠭᠰᠡᠨ ᠴᠢᠨᠢ ᠪᠠᠭᠰᠢ ᠬᠥᠮᠦᠨ ᠰᠢᠦ᠂ ᠴᠢᠮᠠᠶ᠋ᠢ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠠᠪᠠᠴᠢᠬᠤ ᠪᠠᠷ ᠢᠷᠡᠵᠡᠢ ᠭᠡᠪᠡ᠃
— ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠠᠭᠤᠪᠠᠯ ᠰᠡᠬᠡᠭᠡᠲᠡᠨ ᠪᠣᠯᠤᠨᠠ ᠪᠢᠵᠡ ᠳᠡ? ᠭᠡᠵᠦ ᠤᠨᠤᠨ ᠡᠵᠢ ᠡᠴᠡ ᠪᠡᠨ ᠶᠡᠬᠡᠯᠡ ᠪᠣᠳᠣᠯᠭᠠᠰᠢᠷᠠᠩᠭᠤᠢ ᠠᠰᠠᠭᠤᠬᠤ ᠳ᠋ᠤ᠌ ᠡᠵᠢ ᠨᠢ
— ᠪᠣᠯᠣᠯᠭᠦᠢ ᠶᠠᠭᠠᠬᠢᠬᠤᠪ᠂ ᠮᠢᠨᠦ ᠥᠬᠢᠨ ᠭᠡᠳ ᠪᠠᠶᠠᠷᠲᠠᠢᠬᠠᠨ ᠢᠨᠢᠶᠡᠨᠡ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠬᠢᠨᠢ ᠳᠠᠷᠠᠭᠠ ᠡᠵᠢ ᠨᠢ ᠥᠬᠢᠨ ᠳ᠋ᠡᠭᠡᠨ ᠬᠥᠭᠡᠷᠦᠬᠦᠨ ᠠᠪᠰᠠᠷᠬᠠᠨ ᠴᠡᠷᠢᠭ ᠦ᠋ᠨ ᠨᠣᠭᠣᠭᠠᠨ ᠪᠣᠭᠴᠣ ᠣᠶᠣᠵᠤ ᠠᠪᠤ ᠨᠢ ᠤᠯᠠᠭᠠᠨ ᠲᠣᠷᠭᠠ ᠪᠠᠷ ᠲᠠᠪᠤᠨ ᠣᠳᠣ ᠬᠠᠢᠴᠢᠯᠠᠵᠤ ᠨᠡᠭᠡᠭᠡᠪᠴᠢ ᠳᠡᠭᠡᠷᠡ ᠨᠢ ᠬᠠᠲᠠᠵᠤ ᠥᠭᠭᠦᠯᠡ᠃ ᠤᠨᠤᠨ ᠶᠣᠰᠣᠲᠠᠢ ᠨᠢᠭᠡ ᠪᠠᠶᠠᠷᠯᠠᠵᠤ᠂ ᠭᠣᠶᠣ ᠪᠣᠭᠴᠣᠨ ᠳ᠋ᠠᠭᠠᠨ ᠳᠦᠭᠦᠷᠡᠩ ᠴᠠᠭᠠᠰᠤ ᠰᠣᠨᠢᠨ ᠴᠢᠬᠢᠵᠦ ᠡᠭᠦᠷᠦᠭᠡᠳ᠂ ᠮᠣᠳᠣᠨ ᠲᠡᠷᠭᠡᠨ ᠦ᠌ ᠬᠦᠷᠳᠦ ᠤᠨᠤᠭᠠᠳ《ᠥᠨᠥᠬᠢ ᠺᠠᠲ᠌ᠷ᠂ ᠪᠢᠰᠢ᠂ ᠨᠥᠭᠦᠭᠡ ᠰᠡᠬᠡᠭᠡᠲᠡᠨ ᠬᠥᠳᠡᠭᠡ ᠪᠠᠭᠤᠵᠤ ᠪᠠᠢᠨᠠ》 ᠭᠡᠵᠦ ᠲᠣᠭᠯᠠᠨᠠ᠃ ᠨᠠᠮᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠠᠪᠤ ᠨᠢ ᠬᠣᠨᠢᠨ ᠰᠦᠷᠦᠭ ᠲᠡᠢ ᠪᠡᠨ ᠦᠯᠡᠳᠡᠵᠦ᠂ ᠡᠵᠢ ᠨᠢ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠰᠤᠮᠤᠨ ᠲᠥᠪ ᠲᠦ᠍ ᠨᠡᠭᠦᠬᠦ ᠪᠣᠯᠤᠯᠠ᠃
ᠤᠴᠢᠷ ᠨᠢ ᠵᠢᠭᠠᠯ ᠤᠨᠤᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠣᠷᠣᠴᠢᠬᠠᠭᠰᠠᠨ᠃ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠠᠭᠤᠬᠤ ᠭᠡᠵᠦ ᠡᠵᠢ ᠲᠡᠢ ᠪᠡᠨ ᠰᠤᠮᠤᠨ ᠲᠥᠪ ᠤᠷᠤᠭᠤ ᠨᠡᠭᠦᠭᠰᠡᠨ ᠲᠡᠷᠡ ᠡᠳᠦᠷ ᠪᠣᠯ ᠤᠨᠤᠨ ᠤ᠋ ᠨᠠᠰᠤᠨ ᠲᠤᠷᠰᠢᠲᠠ ᠮᠠᠷᠲᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠨᠢᠭᠡᠨ ᠡᠳᠦᠷ᠃ ᠣᠭᠲᠠᠷᠭᠤᠢ ᠴᠡᠩᠬᠡᠷᠲᠦᠨ ᠴᠡᠯᠮᠡᠢᠵᠦ᠂ ᠠᠭᠤᠯᠠ ᠲᠤᠯᠤᠭᠠᠳ᠂ ᠲᠠᠯᠠ ᠬᠥᠳᠡᠭᠡ ᠤᠶᠠᠷᠠᠭᠤᠨ ᠰᠢᠷᠭᠠᠯ ᠦᠵᠡᠮᠵᠢ ᠳ᠋ᠦ᠍ ᠠᠭᠤᠰᠤᠨ ᠲᠤᠨᠤᠷᠠᠵᠤ᠂ ᠠᠯᠤᠰ ᠲᠤ᠌ ᠵᠡᠷᠭᠡᠯᠭᠡᠨ ᠬᠦᠪᠦᠷᠡᠨ ᠬᠦᠪᠦᠷᠡᠨ ᠣᠢᠯᠤᠨᠠ᠃ ᠮᠣᠳᠣᠨ ᠲᠡᠷᠭᠡᠨ ᠦ᠌ ᠠᠷᠠᠯ ᠬᠡᠶᠡᠭᠡᠯᠳᠡᠨ ᠰᠠᠨᠳᠠᠢᠯᠠᠵᠤ ᠠᠷᠠᠯ ᠤ᠋ᠨ ᠰᠢᠷᠠ ᠪᠠᠨ ᠭᠡᠯᠢᠬᠦ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠷᠤᠭᠤᠨ ᠳ᠋ᠤ᠌ ᠨᠠᠭᠠᠯᠳᠤᠨ ᠰᠠᠭᠤᠭᠠᠳ ᠨᠥᠭᠦᠭᠡ《ᠰᠡᠬᠡᠭᠡᠲᠡᠨ ᠬᠥᠮᠦᠨ ᠯᠡ ᠡᠭᠦᠷᠴᠦ ᠪᠣᠯᠳᠠᠭ》 ᠭᠣᠶᠣ ᠪᠣᠭᠴᠣ ᠪᠠᠨ ᠮᠥᠷᠥᠪᠴᠢᠯᠡᠨ ᠡᠯᠢᠭᠡᠨ ᠳ᠋ᠡᠭᠡᠨ ᠴᠢᠩᠭᠠ ᠲᠡᠪᠡᠷᠢᠨ ᠰᠠᠭᠤᠵᠠᠢ᠃ ᠨᠠᠮᠤᠷ ᠤ᠋ᠨ ᠰᠢᠷᠭᠠᠯ ᠨᠠᠷᠠᠨ ᠤ᠋ ᠬᠤᠷᠴᠠ ᠭᠡᠷᠡᠯ ᠳ᠋ᠦ᠍ ᠪᠣᠭᠴᠣᠨ ᠤ᠋ ᠬᠢᠨᠢ ᠨᠡᠭᠡᠭᠡᠪᠴᠢ ᠳᠡᠭᠡᠷᠡᠬᠢ ᠤᠯᠠᠭᠠᠨ ᠣᠳᠣᠨᠠ᠋ᠴᠠ ᠤᠯᠠᠪᠢᠷ ᠲᠤᠶᠠᠭᠠ ᠰᠠᠴᠤᠷᠠᠨᠠ᠃ ᠰᠢᠷᠠ ᠨᠢᠳᠦᠨ ᠥᠬᠢᠨ ᠦ᠌ ᠰᠣᠶᠣᠯ ᠤ᠋ᠨ ᠶᠡᠬᠡ ᠠᠶᠠᠨ ᠶᠠᠭ ᠡᠨᠳᠡ ᠡᠴᠡ ᠡᠬᠢᠯᠡᠵᠦ ᠠᠯᠤᠰ ᠤ᠋ᠨ ᠠᠯᠤᠰ ᠲᠤ᠌ ᠮᠥᠷ ᠢ᠋ᠶ᠋ᠡᠨ ᠭᠠᠷᠭᠠᠭᠰᠠᠨ ᠶᠤᠮ ᠭᠡᠨᠡ ᠯᠠᠢ᠃
2012 ᠣᠨ ᠳ᠋ᠤ᠌ ᠴᠣᠮᠣᠷᠯᠢᠭ ᠰᠡᠳᠬᠦᠯ ᠣᠨ《ᠰᠢᠯᠢᠳᠡᠭ ᠥᠭᠦᠯᠡᠯ ᠦ᠋ᠨ ᠤᠷᠤᠯᠳᠤᠭᠠᠨ》 ᠳ᠋ᠤ᠌
ᠭᠤᠷᠪᠠᠳᠤᠭᠠᠷ ᠳᠡᠰ ᠦ᠋ᠨ ᠱᠠᠩᠨᠠᠯ ᠬᠦᠷᠲᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠠᠷᠠᠨᠲᠤᠶᠠᠭᠠ᠂ ᠠᠯᠲᠠᠨᠴᠡᠴᠡᠭ᠂ ᠡᠷᠳᠡᠨᠢᠭᠤᠸᠠ᠂ ᠮᠥᠩᠭᠥᠨ᠂ ᠤᠷᠠᠨᠴᠢᠮᠡᠭ᠂ ᠬᠡᠯᠡᠰᠣᠶᠣᠯ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠰᠣᠨᠢᠨᠪᠠᠶᠠᠷ᠂ ᠭᠠᠷᠮᠠ